13. dōṣōpakramaṇīyādhyāyaḥ

Adhikarana adhyAyopakramaH · Śloka

পূর্বেঽধ্যাযে বিকৃতান্ দোষানাশ্বেবোপক্রমেদিত্যুক্তম্|

Adhikarana doShopakramaNIyAdhyAyaH (2) · Śloka 2

অতস্তমেবোপক্রমং দর্শযিতুং দোষোপক্রমণীযমারিরিপ্সুরিদমাহ - - - - অথাতো দোষোপক্রমণীযমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২|

স০-দোষাণামুপক্রমণং-চিকিত্সা, দোষোপক্রমণম্| তস্মৈ হিতো দোষোপক্রমণীযঃ| শেষং পূর্ববদ্যোজ্যম্|

Adhikarana vAtasyopakramaH (1-3) · Śloka 3

সর্বদোষেভ্যশ্চ প্রধানো বাত ইতি তদুপক্রমং পূর্বমাহ - - - - বাতস্যোপক্রমঃ স্নেহঃ স্বেদঃ সংশোধনং মৃদু| স্বাদ্বম্ললবণোষ্ণানি ভোজ্যান্যভ্যঙ্গমর্দনম্||১|| বেষ্টনং ত্রাসনং সেকো মদ্যং পৈষ্টিকগৌডিকম্| স্নিগ্ধোষ্ণা বস্তযো বস্তিনিযমঃ সুখশীলতা||২|| দীপনৈঃ পাচনৈঃ সিদ্ধাঃ স্নেহাশ্চানেকযোনযঃ| বিশেষান্মেদ্যপিশিতরসতৈলানুবাসনম্||৩||

স০-বাতস্যোপক্রমঃ স্নেহঃ, শ্রেষ্ঠত্বাচ্চ প্রাগুপাদানং স্নেহস্য| ততঃ স্বেদঃ| কৃতস্নেহস্বেদস্য চ সংশোধনম্| তচ্চ মৃদু-ন তীক্ষ্ণম্, তীক্ষ্ণস্য বাতকোপহেতুত্বাত্| তথা, স্বাদ্বাদীনি ভোজ্যানি-ভক্ষ্যাণি| অভ্যঙ্গশ্চ মর্দনং চাভ্যঙ্গমর্দনম্| মর্দনং-পাণ্যাদি না| বেষ্টনং-শাটকাদিনা| ত্রাসনং-খঙ্গব্যগ্রাগ্রহস্তরাজপুরুষদর্শনাদিনা| ননু, ভীশোকাদিভির্মারুতস্য কোপ ঊক্তঃ| বক্ষ্যতি হি (হৃ. নি. অ. ১|১৫) - "ক্রিযাতিযোগভীশোক" ইত্যাদি| তত্ কথং ত্রাসনং বাযোরুপক্রমঃ ? উচ্যতে| ভযং বাতপ্রকোপহেতুঃ, ন তু ত্রাসনম্| ত্রাসনং হি সর্ববতবিজযি| তস্মাদ্বাতোপশান্ত্যর্থং ত্রাসনং যুক্তম্| যথা,-উন্মাদাদিষু| তথা চ বক্ষ্যতি বাতোন্মাদে (হৃ. উ. অ. ৬|২৯) - "হর্ষণাশ্বাসনোত্ত্রাসভযতাডনতর্জনম্|" ইত্যাদি| তথা, সেকাদিরুপক্রমঃ| সেকো-দশমূলক্বাথাদিনা| তথা, মদ্যং পৈষ্টিকং গৌডিকং চ বাতস্যোপক্রমঃ| তথা, স্নিগ্ধোষ্ণা বস্তযো বাতস্যোপক্রমঃ| স্নিগ্ধোষ্ণা ইত্যুক্ত্যা রূক্ষশীতং বস্তিমত্র নিরাকরোতি| তথা, বস্তিনিযমো-যথাবিধি বস্তিদানম্, বাতস্যোপক্রমঃ| অথবা বস্তিনিযমঃ-কর্মকালযোগাখ্যস্ত্রিপঞ্চাশদ্বস্তিসঙ্খ্যঃ "প্রাক্ স্নেহ একঃ পঞ্চান্তে" (হৃ. সূ. অ. ১৯|৬৩) ইত্যেবমাদিনা গ্রন্থেন যো দর্শিতঃ, স বাতস্যোপক্রমঃ| তথা সুখং শীলযতীতি সুখশীলঃ| শীলিকামিভিক্ষ্যাচরিভ্যো ণঃ| তস্য ভাবঃ সুখশীলতা,-সৌখ্যবৃত্তিত্বম্| তিলপ্রিযালাক্ষোডাদযোঽনেকা যোনযো যেষাং তেঽনেকযোনযঃ স্নেহাঃ, তে চ বাতস্যোপক্রম ইতি যোজ্যম্| কিম্ভূতাঃ ? দীপনপাচনৈর্দ্রব্যৈঃ সিদ্ধাঃ| বিশেষেণ পুষ্টমাংসরসস্তৈলমনুবাসনং চ বাতস্যোপক্রমঃ|

Adhikarana pittasyopakramaH (4-9) · Śloka 9

পিত্তস্যোপক্রমং বক্তি - - - - পিত্তস্য সর্পিষঃ পানং স্বাদুশীতৈর্বিরেচনম্| স্বাদুতিক্তকষাযাণি ভোজনান্যৌষধানি চ||৪|| সুগন্ধিশীতহৃদ্যানাং গন্ধানামুপসেবনম্| কণ্ঠেগুণানাং হারাণাং মণীনামুরসা ধৃতিঃ||৫|| কর্পূরচন্দনোশীরৈরনুলেপঃ ক্ষণে ক্ষণে| প্রদোষশ্চন্দ্রমাঃ সৌধং হারি গীতং হিমোঽনিলঃ||৬|| অযন্ত্রণসুখং মিত্রং পুত্রঃ সন্দিগ্ধমুগ্ধবাক্| ছন্দানুবর্তিনো দারাঃ প্রিযাঃ শীলবিভূষিতাঃ||৭|| শীতাম্বুধারাগর্ভাণি গৃহাণ্যুদ্যানদীর্ঘিকাঃ| সুতীর্থবিপুলস্বচ্ছসলিলাশযসৈকতে||৮|| সাম্ভোজজলতীরান্তে কাযমানে দ্রুমাকুলে| সৌম্যা ভাবাঃ পযঃ সর্পির্বিরেকশ্চ বিশেষতঃ||৯||

স০-উপক্রম ইত্যনুবর্ততে| সর্পিষঃ পানমিত্যাদি পিত্তস্যোপক্রমঃ| তথা, হারাণাং-মুক্তাদাম্নাং কণ্ঠেগুণসংজ্ঞানাং বক্ষসা ধৃতিঃ-ধারণম্| তথা, মণীনাং-মরকতচন্দ্রকান্তপদ্মরাগাদীনাম্| তথা, কর্পূরাদিভিঃ প্রতিক্ষণমনুলেপনম্| তথা, প্রদোষাদিঃ পিত্তস্যোপক্রম ইতি বর্ততে| প্রদোষো-রাত্রিমুখম্| সুধাযা ইদং সৌধং,-ধবলগৃহম্| হারি-রম্যম্, গীতং-গানম্| তথা, মিত্রমযন্ত্রণসুখং-ন বিদ্যতে যন্ত্রণা যস্মিংস্তথাবিধং সুখং যস্মিংস্তথাবিধং মিত্রম্| তথা, সন্দিগ্ধা-অব্যক্তা, মুগ্ধা-অপ্রৌঢা, বাগ্-বাণী, যস্য স এবংবিধঃ পুত্রঃ| দারাঃ-কলত্রাণি, বল্লভাঃ-সুশীলাশ্চ| তথা, ছন্দানুবর্তিনঃ-চিত্তানুগুণকারিণঃ| শীতাম্বুধারা গর্ভে-অভ্যন্তরে, যেষাং তথাবিধানি গৃহাণি| তথা, উদ্যানং-উপবনম্| তথা, দীর্ঘিকাঃ-গৃহপুষ্করিণ্যঃ| তথা, সৌম্যা ভাবাঃ পিত্তস্যোপক্রমঃ| ক্ব স্থিতস্য ? সুতীর্থবিপুলস্বচ্ছসলিলাশযসৈকতে যত্ কাযমানং-তৃণগৃহম্, তস্মিন্| শোভনং তীর্থং তস্য স এবম্| সুতীর্থশ্চাসৌ বিততবিমলজলাশযশ্চ সুতীর্থবিপুলস্বচ্ছসলিলাশযঃ তস্য সমীপে সৈকতম্, তস্মিন্| সিকতা অস্মিন্দেশে সন্তীতি সৈকতম্, "সিকতাশর্করাভ্যাং চ" ইত্যণ্| সমূহার্থে ঠগ্দুর্নিবারঃ স্যাত্| কীদৃশে কাযমানে ? সাম্ভোজং-সপদ্মং, জলং যস্মিংস্তীরান্তে স এবং সাম্ভোজজলস্তীরান্তো যস্মিন্ কাযমানে তস্মিন্| তথা, দ্রুমৈঃ-বৃক্ষৈঃ, আকুলে-ব্যাপ্তে| বিশেষেণ তু পযো ঘৃতং বিরেকশ্চোপক্রমঃ|

Adhikarana shleShmaNa upakramaH (10-12) · Śloka 12

আধুনা শ্লেষ্মণ উপক্রমমাহ - - - - শ্লেষ্মণো বিধিনা যুক্তং তীক্ষ্ণং বমনরেচনম্| অন্নং রূক্ষাল্পতীক্ষ্ণোষ্ণং কটুতিক্তকষাযকম্||১০|| দীর্ঘকালস্থিতং মদ্যং রতিপ্রীতিঃ প্রজাগরঃ| অনেকরূপো ব্যাযামশ্চিন্তা রূক্ষং বিমর্দনম্||১১|| বিশেষাদ্বমনং যূষঃ ক্ষৌদ্রং মেদোঘ্নমৌষধম্| ধূমোপবাসগণ্ডূষা নিঃসুখত্বং সুখায চ||১২||

স০-বিধিনা-শাস্ত্রোক্তেন, যুক্তং তীক্ষ্ণং বমনবিরেচনং কফস্যোপক্রমঃ| তথা, অন্নং রূক্ষাদিগুণযুক্তম্| তথা, মদ্যং পুরাণম্| রতিপ্রীতিঃ প্রজাগরঃ,-রমণং-রতিঃ, তস্যাঃ প্রীতিঃ-সুখম্| তথা, প্রজাগরঃ-অতিজাগরণম্| তথা, অনেকরূপো ব্যাযামো-নিযুদ্ধধনুরাকর্ষণাদিকঃ| বিশেষেণ তু বমনং যূষো মাক্ষিকং তথা মেদোঘ্নং যদৌষধং তচ্চ ধূমাদযশ্চ| তথা, নিঃসুখত্বং-সুখাভাবো দুঃখরূপত্বম্, বাগ্দেহমনঃকর্মণো দুঃখদস্যানুষ্ঠানাদ্যদসুখমুপদ্যতে, তচ্চ শ্লেষ্মণো বৃদ্ধস্য বিকারকরণহেতোরুপশমাত্ সুখায জাযতে|

Adhikarana saMsargasannipAtabhedAnAmupakramaH (13) · Śloka 13

ইদানীং সংসর্গোপক্রমং বক্তি - - - উপক্রমঃ পৃথগ্দোষান্ যোঽযমুদ্দিশ্য কীর্তিতঃ| সংসর্গসন্নিপাতেষু তং যথাস্বং বিকল্পযেত্||১৩||

স০-পৃথক্-প্রত্যেকং, দোষান্-বাতাদীন্. উদ্দিশ্য-আশ্রিত্য, য উপক্রমঃ কীর্তিতঃ-উক্তঃ, সংসর্গে সন্নিপাতে চ তং-উপক্রমং, যথাস্বং বিকল্পযেত্-প্রবৃদ্ধদোষানুসারেণ নিরূপ্য প্রযুঞ্জীত| যথা,-বাতপিত্তসংসর্গে বাতপিত্তোপক্রমৌ মিশ্রৌ, বাতকফসংসর্গে বাতকফোপক্রমৌ, ইত্যাদি| এবং সন্নিপাতেঽপি নিরূপ্যোপক্রমঃ প্রযোজ্যঃ|

Adhikarana saMsargabhedAnAmupakramAntaram (14) · Śloka 14

সংসর্গে ভূযোঽপ্যুপক্রমমাহ - - - - গ্রৈষ্মঃ প্রাযো মরুত্পিত্তে বাসন্তঃ কফমারুতে| মরুতো যোগবাহিত্বাত্, কফপিত্তে তু শারদঃ||১৪||

স০-উপক্রম ইত্যনুবর্ততে| বাতপিত্তসংসর্গে গ্রীষ্মর্তুচর্যাবিহিত উপক্রমঃ প্রাযেণ যোজ্যঃ| যথা (হৃ. সূ. অ. ৩|২৭) - "অতোঽস্মিন্ পটুকট্বম্লব্যাযামার্ককরাংস্ত্যজেত্| ভজেন্মধুরমেবান্নম্" ইত্যাদি সর্বং ত্যাজ্যং সেব্যং চ| কফমারুতসংসর্গে বসন্তর্তুভবঃ "তীক্ষ্ণৈর্বমননস্যাদ্যৈঃ" (হৃ. সূ. অ. ৩|১৯) ইত্যাদিরুপক্রমো যোজ্যঃ| প্রাযেণেত্যত্রাপি যোজ্যম্| ননু, গ্রীষ্মেঽত্যন্তশীতসেবোক্তা, বসন্তে চ তীক্ষ্ণং বমননস্যাদ্যুক্তম্| এতচ্চ দ্বযমপ্যেকান্তেন পবনহেতুঃ| তত্কথমুক্তম্ ? "গ্রৈষ্মঃ প্রাযো মরুত্পিত্তে বাসন্তঃ কফমারুতে|" ইত্যাশঙ্ক্যাহ-মরুতো যোগবাহিত্বাত্| অত্রাযং ভাবঃ,-যদা কিল বাযুঃ পিত্তেন যুজ্যতে তদা দাহাদিকৃত্, ন চ পিত্তে সমে সতি দাহাদিকং কর্তুং মরুত্সমর্থঃ| অপি চ গ্রীষ্মে শীতমেব সেব্যত ইতি নাযং নিযমঃ| কিং তর্হি? স্নিগ্ধাদ্যপি| তস্মান্মরুত্পিত্তে গ্রীষ্মবিধির্যুক্তঃ| বসন্তে চ কফযোগাত্ কফবিকারকার্যেব ভবতি পবনঃ, যোগবাহিত্বাত্| অতস্তীক্ষ্ণো বমননস্যাদির্ন্যায্য এব| পিত্তেন সহ স্থিতস্য বাযোঃ পিত্তচিকিত্সা, কফেন সহ স্থিতস্য বাযোঃ কফচিকিত্সা, স্বভাববশাদিতি ভাবঃ| তথা চ গ্রন্থঃ,-"যোগবাহী" (পৃ. ৯|২৩) ইত্যাদি| কফপিত্তসংসর্গে তু শারদঃ-শরদৃতুচর্যাবিহিত উপক্রমঃ| ননু, সন্নিপাতে ক উপক্রমঃ ? ব্রূমঃ| বর্ষর্তুচর্যাবিহিতঃ| প্রাবৃষি হি দোষত্রযকোপ উক্তঃ| অত এব তত্রাহ (হৃ. সূ. অ. ৩|৪৪) - "ভজেত্সাধারণং সর্বম্" ইত্যাদি|

Adhikarana upakramasya kAlaH (15) · Śloka 15

সম্প্রত্যুপক্রমস্য কালং বক্তি - - - - চয এব জযেদ্দোষং কুপিতং ত্ববিরোধযন্| সর্বকোপে বলীযাংসং শেষদোষাবিরোধতঃ||১৫||

স০-চযকাল এব দোষং-বাতাদিং, জযেত্| যথা ছিন্নমূলত্বান্ন বিকুর্বীত| ন কোপকালং প্রতীক্ষেতেতি সূচনার্থ এবশব্দঃ| কথং জযেত্ ? ইত্যাহ-কুপিতং দোষমবিরোধযন্| সর্বদোষকোপে তু বলবত্তরং দোষং জযেত্| কথম্? শেষদোষাবিরোধেন|

Adhikarana ashuddhashuddhaprayogayorlakShaNam (16) · Śloka 16

প্রযোগঃ শমযেদ্ব্যাধিমেকং যোঽন্যমুদীরযেত্| নাঽসৌ বিশুদ্ধঃ শুদ্ধস্তু শমযেদ্যো ন কোপযেত্||১৬||

স০-যঃ প্রযোগো ব্যাধিং শমযেদন্যমন্যং ব্যাধিমুদীরযেত্-প্রকোপযেত্, নাসৌ বিশুদ্ধো-ন শ্রেষ্ঠ ইত্যর্থঃ| স তু বিশুদ্ধঃ প্রযোগো, যঃ শমযেদ্ব্যাধিং ন কোপযেত্| তস্মাদন্যং ব্যাধিমবিরোধযন্ ব্যাধিং জযেত্|

Adhikarana doShANAM sthAnAntaraprAptiprakAraH (17-19) · Śloka 19

অত কথং দোষাঃ কোষ্ঠাচ্ছাখাস্থিমর্মসু যান্তি ? ইত্যাহ - - - - ব্যাযামাদূষ্মণস্তৈক্ষ্ণ্যাদহিতাচরণাদপি| কোষ্ঠাচ্ছাখাস্থিমর্মাণি দ্রুতত্বান্মারুতস্য চ||১৭|| শাখাদিভ্যঃ কথং দোষাঃ কোষ্ঠং যান্তি ? ইত্যাহ - - - - দোষা যান্তিতথা তেভ্যঃ স্রোতোমুখবিশোধনাত্| বৃদ্ধ্যাঽভিষ্যন্দনাত্পাকাত্কোষ্ঠং বাযোশ্চ নিগ্রহাত্||১৮|| কোষ্ঠস্থা দোষাঃ কিং কুর্যঃ ? ইত্যাহ - - - - তত্রস্থাশ্চ বিলম্বেরন্ ভূযো হেতুপ্রতীক্ষিণঃ| |১৯|

স০-কোষ্ঠাত্-উদারাত্, শাখাস্থিমর্মাণি দোষা যান্তি| কুতঃ ? ইতি হেতুচতুষ্টযমাহ-ব্যাযামাদিভিঃ শাখাস্থিমর্মাণি দোষা যান্তি| তত্র ব্যাযামোপজাতশ্রমস্যোর্ধ্বং প্রপন্নঃ পবনো ব্যাযামকৃতক্ষোভশ্রমোষ্মাদিভিঃ প্রশিথিলং চলং চ দোষং স্বাস্পদাত্ চ্যাবযিত্বা পর্যাকুলং শাখাদিষু ক্ষিপতি| তথা, অগ্ন্যাতপাদিসম্বন্ধিন ঊষ্মণস্তৈক্ষ্ণ্যাত্,-তীক্ষ্ণেন হ্যূষ্মণা বিলাযিতা দোষাস্তেনৈব চোষ্মণা বিবৃতেষু স্রোতোমুখেষু সত্সু শাখাদীনি যান্তি| অহিতেত্যাদি| অহিতেন চ সেবিতেন দোষাঃ স্বপ্রমাণাদতিরিচ্যমানাঃ কোষ্ঠমাপূর্য বার্ষিকা ইব জলৌঘা নিম্নোন্নতানীব শাখাস্থিমর্মাণি প্রপদ্যন্তে| অপি সমুচ্চযে| দ্রুতত্বাদিত্যাদি| দ্রুতত্বাত্-শীঘ্রবাহিত্বাত্, মারুতস্য চ, কোষ্ঠাচ্ছাখাস্থিমর্মাণি দোষা যান্তি| স০-স্রোতসাং মুখানি, তেষাং বিশোধনং-বিবরণম্, তস্মাদ্দোষাঃ কোষ্ঠং যান্তি| তথা, বৃদ্ধ্যাদিভিঃ| বৃদ্ধিঃ-স্বপ্রমাণাতিরেকঃ| বৃদ্ধা হি দোষাঃ স্বানি স্রোতাংস্যাপূর্য কোষ্ঠং যান্তি| অভিষ্যন্দনং চ নাগ্নিতাপাদিতীক্ষ্ণোষ্ণাদিসংশ্লেষাদেব, অপি তু ক্ষীরদধ্যাদ্যভিষ্যন্দিভোজনাদপি| এবং পাকাত্,-পাচনাদিভিঃ পক্বা দোষাঃ ক্বচিদনাসজ্জন্তঃ কোষ্ঠং যান্তি| কিঞ্চঃ ? বাযোশ্চ নিগ্রহাত্,-চশব্দান্ন কেবলং পূর্বেভ্যো হেতুভ্যো যাবদ্বায্বপ্রেরণাচ্চ, ইতি চার্থঃ| স০-তত্রস্থাঃ-কোষ্ঠস্থাশ্চ দোষা বিলম্বেরন্-ন রোগানুত্পাদযেযুঃ| যস্মাত্তে ভূযো হেতুপ্রতীক্ষিণঃ, নিমিত্তকারণহেতুষু সর্বাসাং প্রাযোদর্শনাদ্ধেতৌ প্রথমা, ভূযো হেতুপ্রতীক্ষিত্বাদিত্যর্থঃ| বৃদ্ধোঽপি হি দোষঃ কোষ্ঠে শাখাদৌ বা মার্গান্তরেণ গতো হীনশক্তিত্বান্ন রোগোত্পাদনসমর্থো ভবতি|

Adhikarana doShAH kAlAdibalenAnyasthAne~api kupyanti (19) · Śloka 19

যদ্যেবং কিং কদাচিদপ্যন্যস্থানগতা দোষা হীনশক্তিত্বান্ন রোগান্ কুর্যুঃ ? ইত্যাহ - - - - | তে কালাদিবলং লব্ধ্বা কুপযন্ত্যন্যাশ্রযেষ্বপি||১৯||

স০-তে-দোষাঃ, কালদেশাপথ্যাদেঃ সমানগুণাদ্বলং লব্ধ্বা কুপ্যন্তি,-বিকারমুত্পাদযন্তীত্যর্থঃ| কুত্র স্থানে ? ইত্যাহ-অন্যাশ্রযেষ্বপি,-কোষ্ঠাশ্রযাঃ শাখাস্থিমর্মস্বপি, শাখাস্থিমর্মস্বপি, শাখামর্মাশ্রিতাঃ কোষ্ঠেষ্বপীত্যর্থঃ| ন কেবলং স্বস্থানস্থা এব কুপ্যন্তীতি সূচনার্থোঽপি শব্দঃ|

Adhikarana AgantudoShasyAlpabalasya sthAnicikitsA (20) · Śloka 20

ইদানীং পরস্থানগতানাং দোষাণাং বিকল্পেন চিকিত্সামুপদিশন্নাহ - - - - তত্রান্যস্থানসংস্থেষু তদীযামবলেষু তু| কুর্যাচ্চিকিত্সাম্|২০|

স০-তত্র-তেষু বাতাদিষু, অন্যস্থানসংস্থেষু-অন্যস্য স্থানমন্যস্থানং তত্র সন্তিষ্ঠন্তেঽন্যস্থানসংস্থাস্তেষু,-পরস্থানগতেষু, তদীযাং-স্থানিদোষসম্বন্ধিনীমেব, চিকিত্সাং কুর্যাত্, ন স্বকীযাম্| তস্য-পরস্থানদোষস্যেযং-তদীযা, তাম্| কিম্ভূতেষু দোষেষু ? অবলেষু তু| তুরবধারণে, অবলেষ্বেব ন বলবত্সু| বলবত্সু হি স্বামেব চিকিত্সাং বক্ষ্যতি|

Adhikarana prabalasyAgantoH svacikitsA (20) · Śloka 20

অত এবাহ - - - - | স্বামেব বলেনান্যাভিভাবিষু||২০||

স০-বলেন- আত্মীযযা শক্ত্যা, অন্যাভিভাবিষু-অন্যস্থানিদোষমভিভবিতুং শীলং যেষাং তেঽন্যাভিভাবিনঃ, স্থানিদোষং পরাভূয তত্র যে সন্তিষ্ঠন্তে ইত্যর্থঃ| তেষু স্বামেব চিকিত্সাং কুর্যাত্|

Adhikarana AgantusthAninostulyabalayoH krameNa cikitsA (21) · Śloka 21

কিমেষ এব নিযমঃ ? যদন্যস্থানগতেষ্ববলেষ্বাগন্তুষু স্থানিদোষসম্বন্ধিনীং চিকিত্সাং কুর্যাত্| বলবত্সু পুনরাগন্তুসম্বন্ধিনীং চিকিত্সাং কুর্যাত্| অথ পক্ষান্তরোঽপি কুত্রচিত্ কশ্চিদস্তি ? ইত্যাহ - - - - আগন্তুং শমযেদ্দোষং স্থানিনং প্রতিকৃত্য বা| |২১|

স০-স্থানিনং দোষং প্রতিকৃত্য-যথাস্বং স্থানিদোষ আগন্তুদোষচকিত্সানির্বর্তনান্ন বিকারং কুর্যাত্তথা তস্য প্রতীকারং কৃত্বা, স্বৈরেবোপক্রমৈরবলবন্তমাগন্তুং দোষং শমযেত্-চিকিত্সেত্| ন কেবলমন্যস্থানসংস্থেষ্বাগন্তুষ্ববলেষু স্থানিদোষচিকিত্সাং কুর্যাত্, যাবদাগন্তুদোষচিকিত্সামপি কুর্যাদিত্যর্থঃ| অথাসৌ স্থানিদোষ আগন্তুদোষেণ বলবত্ত্বাদভিভূযেত, ততোঽস্য বিকারকরণং প্রত্যসমর্থত্বাত্তত্প্রতীকারমকৃত্বৈবাগন্তুং শমযেদিতি বাশব্দার্থঃ| অন্যস্থানসংস্থেষ্বিতি বহুবচননির্দেশঃ পর্যাযেণ দোষাণাং স্থিতত্বাত্| অন্যথা দ্বযোরেকস্য বাঽন্যস্থানস্থিতত্বং সম্ভবতি, ন ত্রযাণাম্|

Adhikarana tiryaggateShu doSheShu sAvadhAnena cikitsA (21-22) · Śloka 22

তির্যগ্গতেষু দোষেষু যত্কার্যং তদাহ - - - - | প্রাযস্তির্যগ্গতা দোষাঃ ক্লেশযন্ত্যাতুরাংশ্চিরম্||২১|| কুর্যান্ন তেষু ত্বরযা দেহাগ্নিবলবিত্ ক্রিযাম্| |২২|

স০-তির্যগ্গতা দোষাঃ প্রাযো-বাহুল্যেন, আতুরাংশ্চিরং ক্লেশযন্তি-পীডযন্তি| তেষু-তির্যগ্গতেষু দোষেষু, ত্বরযা-শীঘ্রমেব, ক্রিযাং-চিকিত্সাং, ন কুর্যাত্| বৈদ্য ইতি শেষঃ| কীদৃশো বৈদ্যঃ ? দেহাগ্নিবলাভিজ্ঞঃ|

Adhikarana taccikitsAprakAraH (22-23) · Śloka 23

কথং তেষামুপক্রমঃ কার্যঃ ? ইত্যাহ - - - - | শমযেত্তান্ প্রযোগেণ সুখং বা কোষ্ঠমানযেত্||২২|| জ্ঞাত্বা কোষ্ঠপ্রপন্নাংশ্চ যথাসন্নং বিনির্হরেত্| |২৩|

স০-তান্-তির্যগ্গতান্ দোষান্, প্রযোগেণ-শাস্ত্রবিহিতেন, শমযেত্| সুখং বেতি বা দেহপীডা ন ভবতি তথা ক্রমেণ কোষ্ঠমানযেত্, "বৃদ্ধ্যাঽভিষ্যন্দনাত্" ইত্যাদিনা| জ্ঞাত্বেত্যাদি| কোষ্ঠগতাংশ্চাবগত্য যথাসন্নং বিনির্হরেত্,-যো য আসন্নো মার্গো গুদং মুখং ঘ্রাণং বা, তেনৈব যথাসন্নং-বমনবিরেচনাদিনা নিষ্কাসযেদিত্যর্থঃ|

Adhikarana sAmadoShalakShaNam, nirAmadoShalakShaNam (23-24) · Śloka 24

সম্প্রতি সামমললিঙ্গমাহ - - - - | স্রোতোরোধবলভ্রংশগৌরবানিলমূঢতাঃ||২৩|| আলস্যাপক্তিনিষ্ঠীবমলসঙ্গারুচিক্লমাঃ| লিঙ্গং মলানাং সামানাং, নিরামাণাং বিপর্যযঃ||২৪||

স০-স্রোতসাং রোধঃ-স্রোতোরোধঃ| বলস্য ভ্রংশো-হানিঃ,-বলভ্রংশঃ| গৌরবং-গুরুত্বম্| অনিলস্য-বাযোঃ, মূঢতা-সম্যগসঞ্চারঃ| আলস্যং-তন্দ্রা| অপক্তিঃ-আহারস্যাপাকঃ| নিষ্ঠীবো-মুখস্রাবঃ| মলস্য-পুরীষাদেঃ, সঙ্গঃ-অপ্রবৃত্তিঃ| অরুচিঃ-অন্নানভিলাষঃ| ক্লমো-গ্লানিঃ| ইত্যেতত্সামানাং মলানাং-দোষাণাম্. লিঙ্গং-লক্ষণম্| নিরামাণাং বিপর্যযঃ-অস্মাদ্বৈপরীত্যম্|

Adhikarana AmalakShaNam (25) · Śloka 25

সম্প্রত্যামলিঙ্গমাহ - - - - ঊষ্মণোঽল্পবলত্বেন ধাতুমাদ্যমপাচিতম্| দুষ্টমামাশযগতং রসমামং প্রচক্ষতে||২৫||

স০-ঊষ্মণঃ-অগ্নেঃ, অল্পবলত্বেন-দৌর্বল্যেন, আদ্যং-প্রথমং, ধাতুং রসং-রসাখ্যম্, অপাচিতমামং প্রচক্ষ্যতে-বদন্তি| আচার্যা ইতি শেষঃ| কিম্ভূতং রসম্ ? আমাশযগতম্| তথা, দুষ্টং-বাতাদ্যনুশযিতম্| রসগ্রহণমনিলস্য নিরাসার্থম্| অন্যথা আদ্যো ধাতুর্বাতাখ্য ইত্যাশঙ্ক্যেত| বাতাদীনামপি হি ধারণাদ্ধাতুসংজ্ঞাঽস্ত্যেব|

Adhikarana anyamatenAmalakShaNam (26) · Śloka 26

অন্যে দোষেভ্য এবাতিদুষ্টেভ্যোঽন্যোন্যমূর্চ্ছনাত্| কোদ্রবেভ্যো বিষস্যেব বদন্ত্যামস্য সম্ভবম্||২৬||

স০-অন্যে-অপরে আচার্যাঃ, দোষেভ্য এব-বাতাদিভ্যো, অতিদুষ্টেভ্যোঽন্যোন্যমূর্চ্ছনাত্-পরস্পরমিশ্রীভাবাত্, আমস্য সম্ভবং কথযন্তি| কেভ্যঃ কস্যেব? যথা কোদ্রবেভ্যো বিষস্য সম্ভবং কথযন্তি| [তথা দোষেভ্য আমস্য সম্ভবম্| ]

Adhikarana sAmA doShA rogAshca (27) · Śloka 27

আমেন তেন সম্পৃক্তা দোষা দূষ্যাশ্চ দূষিতাঃ| সামা ইত্যুপদিশ্যন্তে যে চ রোগাস্তদুদ্ভবাঃ||২৭||

স০-তেন-পূর্বোক্তলক্ষণেন, আমেন সম্পৃক্তাঃ-সংযুক্তাঃ, দোষা দূষ্যাশ্চ-রসাদযঃ| কীদৃশাঃ ? দূষিতাঃ, তৈরেব বাতাদিভিঃ| সহামেন সামাঃ, ইত্যুপদিশ্যন্তে-তত্র তত্র প্রদেশে তন্ত্রে ভণ্যন্তে| যে চ রোগাঃ-জ্বরাদযঃ, তদুদ্ভবাঃ-বাতাদিদোষসমুত্থাঃ, তেনামেন যুক্তাঃ সামা ইত্যুচ্যন্তে| যথেহৈব (হৃ. চি. অ. ১|১৮) - "অজীর্ণ ইব শূলঘ্নং সামে তীব্ররুজি জ্বরে|" ইত্যাদি বক্ষ্যতি| আমলক্ষণং চৈবং পঠন্তি-"দ্রবং গুর্বনেকবর্ণং হেতুঃ সর্বরোগাণাং স্নিগ্ধং পিচ্ছিলমামং তন্তুমদনুবদ্ধশূলং দুর্গন্ধি" ইত্যাদি| সামানাং চ বাতাদীনাং সঙ্গ্রহে পৃথগ্লক্ষণমুক্তম্| তে সঙ্গ্রহশ্লোকা যথা (সূ. অ. ২১) - "বাযুরামান্বযঃ সার্তিরাধ্মানকৃদসঞ্চরঃ| দুর্গন্ধমসিতং পিত্তং কটুকং বহলং গুরু|| আবিলস্তন্তুমাংস্ত্যানঃ প্রলেপী পিচ্ছিলঃ কফঃ| বিপর্যযে তু পক্বত্বং তথা তাম্রং সমেচকম্|| পীতং চ পিত্তমচ্ছং চ শ্লেষ্মাঽচ্ছঃ পিণ্ডিতোঽথবা| বিশদশ্চ সফেনশ্চ ধবলো মধুরো রসে||" ইতি|

Adhikarana sAmadoShANAM cikitsA, sarvadehapravisRutAdisAmadoSheShu shodhananiShedhaH (28-29) · Śloka 29

সামা অপি দোষা যাদৃশা ন নির্হার্যাস্তাদৃশান্ দর্শযতি - - - - সর্বদেহপ্রবিসৃতান্ সামান্ দোষান্ ন নির্হরেত্| লীনান্ ধাতুষ্বনুত্ক্লিষ্টান্ ফলাদামাদ্রসানিব||২৮|| আশ্রযস্য হি নাশায তে স্যুর্দুর্নির্হরত্বতঃ| |২৯|

স০-সামান্-দোষান্-বাতাদীন্, সর্বস্মিন্ দেহে প্রবিসৃতান্-ব্যাপ্তাশেষকাযান্, ধাতুষু-রসাদ্যেষু, লীনান্-শ্লিষ্টান্, অনুত্ক্লিষ্টান্-স্বস্থানাদচলিতান্, ন নির্হরেত্-বমনাদিভির্ন শোধযেত্| কুতঃ ? দুর্নির্হরত্বতঃ-দুঃখেন নির্হর্তুং শক্যত্বাত্| তে হি নির্হ্রিযমাণা আশ্রযস্য-শরীরাখ্যস্য, নাশায স্যুঃ| যাবত্তু সর্বদেহপ্রবিসৃতা ন স্যুঃ| যথা ভুক্তানন্তরং জ্বরোত্পত্তৌ নবাতিসারে চ তদা বমনেন হরীতক্যা চ যথাযোগং নির্হারোঽনুজ্ঞাত এব গ্রন্থকৃতা| অত্র দৃষ্টান্তমাহ-ফলাদিত্যাদি| আমাত্-অপক্বাত্, ফলাত্-আম্রাদেঃ, রসো নির্হ্রিযমাণো দুর্নির্হরত্বাত্ আশ্রযস্য-ফলস্য, যথা নাশায ভবতি, এবং দোষা অপি|

Adhikarana tAn shedhanayogyAn kRutva yathAsannaM shodhayet (29-30) · Śloka 30

তর্হীদৃশে দোষে কিং কার্যম্ ? ইত্যাহ - - - - | পাচনৈর্দীপনৈঃ স্নেহৈস্তান্ স্বেদৈশ্চ পরিষ্কৃতান্||২৯|| শোধযেচ্ছোধনৈঃ কালে যথাসন্নং যথাবলম্| |৩০|

স০-তান্-তথাবিধান্ দোষান্, পাচনৈঃ-জ্বরাদ্যধ্যাযোক্তৈঃ| দীপনৈরিতি পাচনানাং স্নেহানাং চ বিশেষণম্, মধ্যদীপকত্বাত্| অগ্নিদীপ্তিকৃদ্ভিঃ পাচনৈঃ স্নেহৈশ্চ তথা স্বেদৈঃ পরিষ্কৃতান্-পরিকল্পিতান্ কৃতসংস্কারান্, যথাসন্নং যথাবলং চ কৃত্বা যথোক্তে কালে শোধনৈর্দ্রব্যৈঃ শোধযেত্| যথাসন্নমিতি যস্য দোষস্য য আসন্নো মার্গস্তেনৈব তং নির্হরেত্| যথাবলমিতি যস্য যাবদ্বলমাতুরস্যোত্তমং মধ্যমমধমং বা, তজ্জ্ঞাত্বা তীক্ষ্ণেন মধ্যেন মৃদুনা বা শোধনেন শোধযেদিত্যর্থঃ|

Adhikarana yathAsannamArgaH (30-31) · Śloka 31

কস্য কো মার্গ আসন্নঃ ? ইত্যাহ - - - - | হন্ত্যাশু যুক্তং বক্ক্রেণ দ্রব্যমামাশযান্মলান্||৩০|| ঘ্রাণেন চোর্ধ্বজত্রূত্থান্ পক্বাধানাদ্গুদেন চ| |৩১|

স০-বক্ক্রেণ দ্রব্যং যুক্তং-পীতং, আমাশযাত্ মলানাশু হন্তি| ঘ্রাণেন তু পীতমূর্ধ্বজত্রূত্থান্ মলানাশু হন্তি| গুদেন যুক্তং পক্বাধানাত্-পক্বাশযাত্, আশু মলান্ হন্তি|

Adhikarana svayaMpravRuttAnsAmAnna stambhayet (31-32) · Śloka 32

ইদানীং যাদৃশা আমা ন ধার্যাস্তাদৃশান্ দর্শযতি - - - - | উত্ক্লিষ্টানধ ঊর্ধ্বং বা ন চামান্ বহতঃ স্বযম্||৩১|| ধারযেদৌষধৈর্দোষান্ বিধৃতাস্তে হি রোগদাঃ| |৩২|

স০-অধ ঊর্ধ্বং বোত্ক্লিষ্টানামান্ স্বযং বহতো-যত্নং বিনৈব প্রবৃত্তান্, ঔষধৈঃ-স্তম্ভনৈঃ, ন ধারযেত্| কুতঃ ? ইত্যাহ-হি-যস্মাত্, তে-দোষাঃ, বিধৃতা রোগদাঃ-জ্বরাদিকারিণঃ|

Adhikarana teShUpekShaiva bheShajam, savibandheShu teShu pAcanA nirharaNaM vA (32-33) · Śloka 33

তেষু তু যত্কার্যং তদাহ - - - - | প্রবৃত্তান্ প্রাগতো দোষানুপেক্ষেত হিতাশিনঃ||৩২|| বিবদ্ধান্ পাচনৈস্তৈস্তৈঃ পাচযন্নির্হরেত বা| |৩৩|

স০-অতঃ-অস্মাদ্ধেতোঃ, প্রবৃত্তান্ প্রাক্-প্রারম্ভকালে, দোষান্ হিতভোজিন উপেক্ষেত-সঙ্গ্রহণেন ন ধারযেত্| বিবদ্ধান্-ঈষত্প্রবৃত্তান্, তৈস্তৈঃ-যথোক্তৈঃ, পাচনৈঃ পাচযেত্-পাকং নযেত্| নির্হরেদ্বা|

Adhikarana svasthasya shodhanakAlaH (33-34) · Śloka 34

অথ কঃ শোধনকালঃ ? ইত্যাহ - - - - | শ্রাবণে কার্তিকে চৈত্রে মাসি সাধারণে ক্রমাত্||৩৩|| গ্রীষ্মবর্ষাহিমচিতান্ বায্বাদীনাশু নির্হরেত্| |৩৪|

স০-ক্রমাত্-যথাক্রমম্| গ্রীষ্মচিতং বাযুং শ্রাবণে নির্হরেত্| বর্ষাচিতং পিত্তং কার্তিকে নির্হরেত্| হেমন্তশিশিরচিতং কফং চৈত্রে নির্হরেত্| এতে হি সাধারণাঃ কালাঃ অত এতেষু শোধনং যুক্তম্|

Adhikarana asandhau shodhananiShedhaH (34-35) · Śloka 35

ননু, গ্রীষ্মাদিষ্বেব কস্মাদ্বাতাদযো ন শোধ্যন্তে ? ইত্যাহ - - - - | অত্যুষ্ণবর্ষশীতা হি গ্রীষ্মবর্ষাহিমাগমাঃ||৩৪|| সন্ধৌ সাধারণে তেষাং দুষ্টান্ দোষান্ বিশোধযেত্| সংশোধনসাধ্যস্যাযমেব সংশোধনকালঃ ? নেত্যাহ - - - - স্বস্থবৃত্তমভিপ্রেত্য, ব্যাধৌ ব্যাধিবশেন তু||৩৫||

স০-যতো গ্রীষ্মাদযোঽত্যুষ্ণাদিযুক্তাঃ| [তেষাং-অত্যুষ্ণবর্ষশীতানাং, গ্রীষ্মবর্ষাহিমাগমানাং, সাধারণে সন্ধৌ শীতোষ্ণবর্ষসমভাবে কালে দোষান্-বাতাদীন্, দুষ্টান্-বিকৃতান্, বিশোধযেত্-বিনির্হরেত্| সন্ধৌ হি সাম্যম্| ] ততঃ শোধনং প্রতি ন তে কালাঃ| তথা হি-গ্রীষ্মে তাবদাদানগ্লানং খরতররবিকিরণতপ্তং পিপাসাক্লমাদ্যাকুলমতিপ্রবিলীনদোষমতিশিথিলং শরীরং ভবতি| ঔষধং পুনরতিখরদিবাকরকরনির্ভরতাপাদুষ্ণতীক্ষ্ণতাং যাতমতিযোগায সম্পদ্যতে| প্রাবৃষি ঘনঘনৌষসঙ্ঘট্টসাদিতে সর্বতো জগত্যবসন্নোঽগ্নির্ভবতি| আদানদুর্বলং চ শরীরং ভবতি| ওষধযশ্চ জলদজলপ্লাবিতমূলা অল্পবীর্যাঃ সম্পদ্যন্তে| ভূবাষ্পসংযোগাচ্চৌষধীনাং বিদগ্ধত্বম্| অতোঽপথ্যতাং গতা অযোগাযৈব| শীতকালে চাতিশীতোপহতত্বাচ্ছরীরমতিবাতবিষ্টব্ধমতিস্তব্ধগুরুদোষং ভবতি| শীতোপহতত্বাচ্চোষ্ণস্বভাবমপ্যৌষধং সংশোধনাযোপযুক্তং মন্দবীর্যতাং প্রাপ্তমযোগাযৈব কল্পতে ইতি| তস্মাদ্যুক্তমুক্তমত্যুষ্ণবর্ষশীতত্বাত্ গ্রীষ্মাদিষু স্বস্থস্য শোধনমযুক্তম্, ন ত্বাতুরস্য, ইতি| স০-স্বস্থাবস্থমধিকৃত্যাযং সংশোধনকাল উক্তঃ| ব্যাধৌ ত্বাত্যযিকে ব্যাধ্যনুরোধেন সংশোধনকালঃ|

Adhikarana vyAdhitasya shodhanakAlaH (36) · Śloka 36

যদি হেমন্তাদাবতিশীতোষ্ণাদৌ কালে ব্যাধিঃ সংশোধনসাধ্যঃ সম্ভবেত্, তদা কথং সংশোধনং কার্যম্ ? ইত্যাহ - - - - কৃত্বা শীতোষ্ণবৃষ্টীনাং প্রতীকারং যথাযথম্| প্রযোজযেত্ক্রিযাং প্রাপ্তাং ক্রিযাকালং ন হাপযেত্||৩৬||

স০-শীতোষ্ণবৃষ্টীনাং প্রতীকারং কৃত্বা-কৃত্রিমং ঋতুগুণং যথাযথং সম্পাদ্য সংশোধনাদিলক্ষণাং ক্রিযাং প্রযোজযেত্| কৃত্রিমগুণোপধানং চ যথা,-হেমন্তে গর্ভগৃহাদি, গ্রীষ্মে ধারাগ্রহাদীনি| ক্রিযাকালং ন হাপযেত্-নাতিক্রামযেত্, আত্যযিকস্য ব্যাধেঃ প্রাণহারিত্বাত্|

Adhikarana shamanauShadhakAlAH dasha (37) · Śloka 37

সম্প্রত্যৌষধকালান্ দর্শযন্নাহ - - - - যুঞ্জ্যাদনন্নমন্নাদৌ মধ্যেঽন্তে কবলান্তরে| গ্রাসে গ্রাসে মুহুঃ সান্নং সামুদ্গং নিশিচৌষধম্||৩৭||

স০-দশৈতে ঔষধস্য কালাঃ| অনন্নমৌষধং তদুচ্যতে যদুপযুজ্য পরিণতে তস্মিন্ ভুঞ্জীত| অন্নাদৌ তদুচ্যতে যদুপযুজ্য সমনন্তরমাহারোপযোগো বিধীযতে| মধ্য ইতি অন্নস্য-আহারস্য মধ্যে যদৌষধং ভুজ্যতে| অন্তে-অবসানে| কবলান্তর ইতি কবলযোঃ-গ্রাসযোঃ, অন্তরে-মধ্যে, ন তু গ্রাসমিশ্রিতং কৃত্বেত্যর্থঃ| গ্রাসে গ্রাস ইতি যদ্ঽঽগ্রাসসম্পৃক্তং ভুজ্যতে| মুহুরিতি পুনঃ পুনর্ভুক্তেঽভুক্তে বা যদৌষধং ভুজ্যতে| সান্নমিতি সহান্নেন-আহারেণ যদৌষধং ভুজ্যতে| সামুদ্গং তদ্ভণ্যতে যদাহারস্য প্রাক্ পশ্চাচ্চ প্রযুজ্যতে, তেন হি সমুদ্গপুটযুগলসমেনৌষধদ্বযেনাহারো মধ্যীক্রিযতে| সমুদ্গঃ-সম্পুটকঃ| নিশি তদুচ্যতে যচ্ছযনবেলাযাং ভুজ্যতে|

Adhikarana anannasya viShayaH, prAgbhaktasya viShayaH, madhyebhaktasya viShayaH, adhobhaktasya viShayaH, grAsagrAsAntayorviShayaH, muhurauShadhasya viShayaH, sAnnasya viShayaH, sAmudrasya viShayaH, naishauShadhasya viShayaH (13) · Śloka 13

অধুনা বিষযবিভাগেন যস্মিন্ ব্যাধৌ যদুপযুজ্যতে তদ্দর্শযতি - - - - কফোদ্রেকে গদেঽনন্নং বলিনো রোগরোগিণোঃ| অন্নাদৌ বিগুণেঽপানে, সমানে মধ্য ইষ্যতে||৩৮|| ব্যানেঽন্তে প্রাতরাশস্য, সাযমাশস্য তূত্তরে| গ্রাসগ্রাসান্তযোঃ প্রাণে প্রদুষ্টে মাতরিশ্বনি||৩৯|| মুহুর্মুহুর্বিষচ্ছর্দিহিধ্মাতৃট্শ্বাসকাসিষু| যোজ্যং সভোজ্যং ভৈষজ্যং ভোজ্যৈশ্চিত্রৈররোচকে||৪০|| কম্পাক্ষেপকহিধ্মাসু সামুদ্রং লঘুভোজিনাম্| ঊর্ধ্বজত্রুবিকারেষু স্বপ্নকালে প্রশস্যতে||৪১|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে দোষোপক্রমণীযো নাম ত্রযোদশোঽধ্যাযঃ||১৩||

স০-কফোদ্রেকে রোগে নিরন্নমৌষধং যোজ্যম্| কযোঃ ? ইত্যাহ-বলিনোরিত্যাদি| বলবতি রোগে রোগিণি চ তত্কেবলমন্নাদিরহিতমৌষধং যোজ্যম্| তদ্ধি নিরন্নমতিবীর্যং ভবতি| বলবাংশ্চ যদি রোগী তদোপযুঞ্জীত, ন তু দুর্বলে| দুর্বলস্য ত্বন্নসহিতং ন গ্লানিকরং ভবতি| অন্নাদাবিতি| অপানে বাযৌ বিগুণে-কুপিতে সতি, ঔষধং ভুক্ত্বা সমনন্তরমেবাহার ইষ্যত ইত্যর্থঃ| সমানে বাযৌ বিগুণে মধ্যে ভক্তস্যৌষধমিষ্যতে| ব্যানে বাযৌ বিগুণে প্রাতরাশস্য-পূর্বাহ্ণভুক্তস্য, অন্তে-অবসানে, ভেষজমিষ্যতে| সাযমিত্যাদি| উত্তরে-ব্যানাপেক্ষযা উদানে মরুতি, বিগুণে সাযমাশস্য-অপরাহ্ণভুক্তস্য ত্বন্তে ভেষজমিষ্যতে| প্রাণে মাতরিশ্বনি-বাতে, প্রদুষ্টে-বিকৃতে, গ্রাসগ্রাসান্তরযোর্ভেষজমিষ্যতে| গ্রাসস্য গ্রাসান্তশ্চ তযোঃ, তেন গ্রাসসম্পৃক্তমৌষধং গ্রাসযোর্মধ্যে ভেষজমিতি চাবতিষ্ঠতে| মুহুর্মুহুঃ-ভুক্তে যদভুক্তে বা ভেষজং, তত্তু বিষাদিষু যোজ্যম্| অরোচকে-অরুচৌ, সহ ভোজ্যৈর্ভৈষজ্যং যোজ্যম্| কীদৃশৈর্ভোজ্যৈঃ ? চিত্রৈঃ-অনেকবিধৈঃ| সামুদ্গং নাম যদাদাবন্তে চাহারস্য ভুজ্যতে তত্কম্পাদিষু 'প্রশস্যতে' ইতি বক্ষ্যমাণেন সম্বন্ধঃ| কেষাম্ ? লঘ্বন্নাশিনাম্| ঊর্ধ্বজত্রুবিকারেষু শযনবেলাযামৌষধং প্রশস্যত ইতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে দোষোপক্রমণীযাধ্যাযস্ত্রযোদশঃ সমাপ্তঃ|| ১৩||