5. dravadravyavijñānīyādhyāyaḥ

Adhikarana adhyAyopakramaH · Śloka

স০-অথ দ্রবদ্রব্যবিজ্ঞানীযঃ| তস্যাযং সম্বন্ধঃ "নিত্যং হিতাহারবিহারসেবী " ইত্যুক্তম্| তৌ চাহারবিহারৌ দিনচর্যুর্তুচর্যযোর্যদ্যপি নিযমিতৌ, তথাপি ন ভবত্যলং হিতাহিতস্বরূপবিজ্ঞানম্| এবং হি তত্রাবাদীত্ (হৃ.সূ.অ.৩|২৬)-'গুরুশীতদিবাস্বপ্নস্নিগ্ধাম্লমধুরাংস্ত্যজেত্"| তথা (হৃ.সূ.অ.৩|৪৭)-ব্যক্তাম্ললবণস্নেহং সংশুষ্কং ক্ষৌদ্রবল্লঘু"| তথা, অনন্তরাতীতেঽপ্যধ্যাযে জগাদ (সূ.অ. ৪|৬)-"অন্নপানং চ বিড্ভেদি ইতি| তদিযতা বাক্যেন ন জ্ঞাযতে কিং পুনস্তত্ গুরুশীতম্? কিং লঘু ? কিং স্নিগ্ধাম্লম্ ? কিং শকৃদ্ভেদনম্? ইতি| তস্মাদাহারদ্রব্যস্বরূপমতঃপরং প্রতন্যতে| তত্রাপি পঞ্চবর্গস্বভাবত্বেনাল্পবক্তব্যত্বাত্ প্রাগ্দ্রবদ্রব্যবিজ্ঞানীযস্বরূপং নির্দেষ্টুং যুক্তম্, অন্নস্য সপ্তবর্গস্বভাবত্বেন ভূযস্ত্বাদিত্যাহ-

Adhikarana dravadravyavij~jAnIyAdhyAyaH pa~jcamaH (2) · Śloka 2

অথাতো দ্রবদ্রব্যবিজ্ঞানীযমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২|

স০-অপামেবাযং স্বাভাবিকো গুণো যত্ দ্রবত্বম্| অতো যানি কানিচিত্ দ্রবরূপাণি দ্রব্যাণি তানি সর্বাণি আপ্যান্যেব ক্ষীরদধ্যাদীনি| তদর্থং দ্রবদ্রব্যশব্দঃ সামান্যেন সর্বদ্রবব্যক্তিপরিগ্রহার্থঃ শাস্ত্রকৃতা প্রযুক্তঃ| দ্রবাণি চ তানি দ্রব্যাণি চ দ্রবদ্রব্যাণি, তেষাং বিজ্ঞানং-অববোধঃ, তস্মৈ হিতো দ্রবদ্রব্যবিজ্ঞানীযোঽধ্যাযঃ, তং ব্যাখ্যাস্যামঃ-প্রথযিষ্যামঃ|

Adhikarana toyavargaH ga~ggAjalaguNAH (1-2) · Śloka 2

প্রাধান্যাচ্চ পানীযস্য প্রাগুপদেশঃ| তথা চাষ্টাঙ্গসঙ্গ্রহেঽন্নপানপ্রকরণেঽধ্যগীষ্ট (সূ.অ.১০) "অনুপানে তু সলিলমেব শ্রেষ্ঠম্, সর্বরসযোনিত্বাত্সর্বভূতসাত্ম্যাজ্জীবনাদিগুণযোগাচ্চ"| তথা, তত্রৈবাধ্যৈষ্ট (সং.সূ.অ.৬)_"পানীযং প্রাণিনাং প্রাণা বিশ্বমেব চ তন্মযম্" ইত্যাদি| তথা, চাত্রৈবাপ্যসঙ্গ্রহেঽপি তদেব প্রাগুপনীতম্ (সং.সূ.অ.১৩)- "শ্রেষ্ঠমুদকমাশ্বাসনস্তম্ভনক্লেদনানাম্" ইতি| বহুগুণত্বাচ্চান্তরিক্ষস্য জলস্য প্রাগুপন্যাসো যুক্ত ইত্যাহ অথ তোযবর্গঃ| জীবনং তর্পণং হৃদ্যং হ্লাদি বুদ্ধিপ্রবোধনম্| তন্বব্যক্তরসং মৃষ্টং শীতং লঘ্বমৃতোপমম্||১|| গঙ্গাম্বু নভসো ভ্রষ্টং স্পৃষ্টং ত্বর্কেন্দুমারুতৈঃ| হিতাহিতত্বে তদ্ভূযো দেশকালাবপেক্ষতে||২||

স০-জীবনং-ওজোবিবৃদ্ধিকরম্, সৌম্যধাতুবর্ধনমিত্যন্যে| তর্পণং-ক্লমহৃত্, [তৃপ্তিকৃদিত্যন্যে]| হৃদ্যং-হৃদযায হিতম্, ন তু হৃদযস্য প্রিযং হৃদ্যমিতি ব্যাখ্যেযম্| এবং হি ব্যাখ্যাযমানে, "অম্লং হৃদ্যানাম্" (চ.সূ.অ.২৫|৩৯) ইত্যাগ্র্যাণাং মধ্যে তত্পাঠং মুনির্নৈবাকরিষ্যত্| যস্মাত্কিঞ্চিত্ দ্রব্যং কস্যচিত্প্রিযং ভবতি, ন সর্বং সর্বস্য| তস্মাদ্ধৃদযায হিতং হৃদ্যমিতি বোধ্যম্| তথা, হ্লাদি-আহ্লাদকরম্| তথা, বুদ্ধেঃ প্রবোধনম্, যাবন্মাত্রা যস্য শেমুষী সা তস্য স্ফুটপ্রতিভাসা তদ্যোগাদ্ভবতীত্যর্থঃ| তনু-স্বচ্ছম্| অব্যক্তরসং-অনভিব্যক্তষড্রসমিত্যর্থঃ| মৃষ্টং-অত্যাস্বাদসুখম্| সন্তি হি ভূরিরসক্বাথচূর্ণবটকাদীন্যপ্যব্যক্তরসানি, ন তু কার্ত্স্ন্যেন তানীন্দ্রিযপ্রসাদাস্বাদপ্রীতিকরাণি| তথা, অনুরসবাহুল্যাত্পৃথগপি দ্রব্যাণ্যভযামলকাদীন্যব্যক্তরসানি, ন তু পুনস্তানি তথা মনঃপ্রীণনানি| পানীযস্য চাব্যক্তরসস্যাপ্যাশ্রযবশাত্ কষাযত্বস্বাদুত্বাদি ভবত্যেব| তথা চাষ্টাঙ্গসঙ্গ্রহেঽপঠত্(সূ.অ.৬)- "শ্বেতে কষাযং, তত্স্বাদু কৃষ্ণে, তিক্তং চ পাণ্ডুরে" ইত্যাদি| মৃষ্টং-শুদ্ধমিতি ন ব্যাখ্যেযম্| তথা চ মুনিঃ (চ.সূ.অ.২৭|১৯৩)- শীতং শুচি শিবং মৃষ্টং বিমলং লঘু ষড্গুণম্| প্রকৃত্যা দিব্যমুদকম্" ইতি| অত্র হি মৃষ্টবিমলযোর্দ্বযোরুপাদানে পৌনরুক্ত্যং স্যাত্| তস্মান্মৃষ্টশব্দোঽত্র মনঃপ্রীণনার্থঃ| তথা, শীতং-বীর্যেণ চ স্পর্শেন চ| তথা, লঘু-লঘুগুণযুক্তম্| তথা,অমৃতোপমং-যথা কিলামৃতং ত্রিদোষঘ্নত্বধাতুসাম্যকৃত্ত্ববিষার্তিজিত্ত্বাদিগুণৈরশেষৈর্যুক্তং তথৈবৈতজ্জলমপীত্যর্থঃ| তথা চোক্তং সঙ্গ্রহে (সূ.অ.৬)- "সূর্যোদ্ধৃতপ্রমুক্তত্বাল্লঘু বাতকফাপহম্| শৈত্যজীবনসৌম্যত্বৈঃ পিত্তরক্তবিষার্তিজিত্||" ইতি| তথা, নভসো ভ্রষ্টং-অন্তরিক্ষাত্পতিতমাত্রং, বস্ত্রাদিগৃহীতং গাঙ্গং জলমীদৃগ্গুণং ভবতি| তুশব্দঃ পুনরর্থে| অর্কেন্দুমারুতৈঃ-রবিচন্দ্রানিলৈঃ, স্পৃষ্টং-সম্বদ্ধং সত্, পুনঃ হিতাহিতত্বে-পথ্যাপথ্যত্বে, দেশকালাবপেক্ষতে-দেশকালাবনুবর্ততে| দেশো বিষযঃ পাত্রমাশ্রয ইতি পর্যাযাঃ| তত্র কিমনূপদেশে জাঙ্গলে বা তত্পতিতম্? তথা, কিমসিতশ্বেতাদ্যন্যতমে বা? ইতি দেশানুবর্তনম্| তথা, শীতে কিমুতোষ্ণেঽথবা বর্ষাখ্যে পতিতম্? ইতি কালানুবর্তনম্| রবিচন্দ্রানিলৈরিতি সমস্তনির্দেশো যদা সমস্তৈরেতৈঃ স্পৃষ্টং ন তু ব্যস্তৈঃ, তদা হিতাহিতত্বে দেশাদ্যপেক্ষত ইতি দ্যোতযতি| সদ্যো বস্ত্রাদিগৃহীতস্য জলস্য তু ন সর্বৈরেতৈর্যোগঃ সম্ভবতীতি তত্প্রাযেণ হিতমেব|

Adhikarana ga~ggAjalalakShaNam (3) · Śloka 3

নন্বাকাশাত্পতত্ লক্ষণমন্তরেণ গাঙ্গমিদমিতি ন জ্ঞাযত ইত্যাহ যেনাভিবৃষ্টমমলং শাল্যন্নং রাজতে স্থিতম্| অক্লিন্নমবিবর্ণং চ তত্পেযং গাঙ্গম্|৩|

স০-যেন-অম্বুনা, অভিবৃষ্টং-আভিমুখ্যতঃ সিক্তং, শাল্যন্নং রাজতস্থিতমক্লিন্নং-অক্লেদযুতং, অবিবর্ণং চ ভবতি, তদ্গাঙ্গং জলং পেযম্| পেযমিত্যুপলক্ষণার্থম্, স্নানাবগাহযোরপি তত্পথ্যমেব| রজতস্য রূপস্য বিকারো রাজতম্| প্রাণিরজতাদিভ্যোঽঞ্|

Adhikarana sAmudrajalalakShaNam, sAmudrajalapAnaniShedhaH (3-4) · Śloka 4

| অন্যথা||৩|| সামুদ্রং, তন্ন পাতব্যং মাসাদাশ্বযুজাদ্বিনা| |৪|

স০-অন্যথা সামুদ্রমিতি| এতল্লক্ষণবিপর্যযেণ যেনাম্বুনা সিক্তং শাল্যন্নং বিবর্ণং মলিনং ক্লিন্নং ভবেত্, তত্সামুদ্রম্| তচ্চ ন পাতব্যম্| অত্রাপি পাননিষেধ উপলক্ষণার্থ:| স্নানাবগাহাবপি হি নানেন কার্যৌ| সামুদ্রস্য ক্ষারান্বযত্বাত্ ক্লেদনাদিযোগঃ| ননু, সামুদ্রমিত্যযুক্তম্| যতঃ সমুদ্রশব্দস্য ধূমাদিপাঠাত্ ধূমাদিভ্যশ্চেতি বুঞা ভবিতব্যমিতি কেচিত্| মৈবম্| ধূমাদিভ্যশ্চেত্যত্রৈব গণে পঠ্যতে, সমুদ্রান্নাবি মনুষ্যে চ বুঞ্| সামুদ্রিকী নৌঃ সামুদ্রিকো মনুষ্যঃ| অন্যত্র ত্বণেব, সামুদ্রং জলমিতি| তস্মান্ন্যায্যমেবৈতত্| এবং সামুদ্রো মণিরিত্যাদযো বৈদ্যাঃ| অথ কিং সদৈবৈতন্ন পাতব্যম্ ? নেত্যাহ-মাসাদিত্যাদি| আশ্বযুজমন্তরেণৈতন্ন পাতব্যম্| আশ্বযুজে তু মাসি কালস্বাভাব্যাত্ পথ্যমেবেতি ভাবঃ| সুশ্রুতস্ত্বধীতে (সূ.অ.৪৫| ৭)- "গাঙ্গমাশ্বযুজে মাসি প্রাযো বর্ষতি মাধবঃ| তদুপাদদীত" ইত্যাদি|

Adhikarana AntarikShaM jalaM peyam, tadabhAve bhaumam (4-5) · Śloka 5

| ঐন্দ্রমম্বু সুপাত্রস্থমবিপন্নং সদা পিবেত্||৪|| তদভাবে চ ভূমিষ্ঠমান্তরিক্ষানুকারি যত্| শুচিপৃথ্বসিতশ্বেতে দেশেঽর্কপবনাহতম্||৫||

স০-ঐন্দ্রং-আন্তরিক্ষম্, অম্বু-জলং গাঙ্গম্, সুপাত্রস্থং শোভনে ভাজনে রাজতাদৌ স্থিতম্, অবিপন্নং-অদূষিতমবিনষ্টং, পিবেত্| ন মলিনাশুচিজুগুপ্সিতপাত্রস্থম্| তদভাবে-তস্যৈন্দ্রস্যাভাবে সতি, ভূযিষ্ঠং-বাহুল্যেন, আন্তরিক্ষানুকারি-আন্তরিক্ষমৈন্দ্রং জলং যদনুকরোতি স্বচ্ছাদিগুণৈঃ সদৃশং, তত্পিবেত্| তদেবাহ-শুচীত্যাদি| শুচিশ্চাসৌ পৃথ্বসিতশ্বেতশ্চ শুচিপৃথ্বসিতশ্বেত:, তস্মিন্ দেশে যজ্জলং স্থিতম্| তথা, অর্কপবনাভ্যামাহতং-আসমন্তাত্ ক্রান্তম্| ঈদৃশমান্তরিক্ষানুকারি স্যাদিতি ভাবঃ|

Adhikarana pAnAyogyaM jalam,AntarikShamapi pAne~ayogyam (6-8) · Śloka 8

ইদানীং যাদৃশং জলং ন পেযম্, তদ্দর্শযতি ন পিবেত্পঙ্কশৈবালতৃণপর্ণাবিলাস্তৃতম্| সূর্যেন্দুপবনাদৃষ্টমভিবৃষ্টং ঘনং গুরু||৬|| ফেনিলং জন্তুমত্তপ্তং দন্তগ্রাহ্যতিশৈত্যতঃ| অনার্তবং চ যদ্দিব্যমার্তবং প্রথমং চ যত্||৭|| লূতাদিতন্তুবিণ্মূত্রবিষসংশ্লেষদূষিতম্| |৮|

স০-পঙ্ক-কর্দমঃ| শৈবালঃ-শৈবলম্| তৃণং-খটঃ| পর্ণং-পত্রম্| আবিলং চাস্তৃতং চাবিলাস্তৃতম্, পঙ্কাদিভিরাবিলাস্তৃতং পঙ্কাদ্যাবিলাস্তৃতম্| যথাসম্ভবমত্র সম্বন্ধঃ, তেন পঙ্কেনাবিলং-কলুষং, শৈবালাদিভিরাস্তৃতং-সঞ্ছাদিতমিতি বোধ্যম্| তথা, সূর্যেন্দুপবনৈরদৃষ্টং-অনাসেবিতং, ন পিবেত্| তথা, অভিবৃষ্টং-তত্কালপতিতান্যবর্ষমিশ্রীভূতং কালান্তরাশ্রিতম্| খরনাদে ত্বেবমুক্তম্- "বার্ষিকং তদহর্বৃষ্টং ভূমিষ্ঠমহিতং জলম্| ব্যুষ্টং দ্বিরাত্রং তচ্চৈব প্রসন্নমমৃতোপমম্||" ইতি| তথা, ঘনং-অস্বচ্ছম্| তথা, গুরু-গুরুগুণম্| তথা, ফেনিলং ফেনবত্| তথা, জন্তুমত্-কীটযুক্তম্| তথা, তপ্তং-উষ্ণম্| তথা, অতিশৈত্যতঃ-অতিজাড্যাত্, দন্তগ্রাহি-দন্তান্ গৃহ্ণাতি কার্যাক্ষমান্ করোতি, তচ্ছীলম্| ন পিবেদিতি প্রতিপদং যোজ্যম্| ইত্যযং প্রাযো ভূমিষ্ঠতোযস্য নিষেধঃ| অধুনা আন্তরিক্ষং যন্ন পেযং তদাহ-অনার্তবমিত্যাদি| যদ্দিব্যং জলমার্তবং ন ভবতি, তচ্চ ন পিবেত্| ননু, সর্বমেব দিব্যং জলমার্তবম্, কালস্য ঋতুরূপত্বাত্| ঋতৌ চ ভবমার্তবম্| এবং চ ন কিঞ্চিদনার্তবং সম্ভবতি| উচ্যতে| অনার্তবং ন পিবেত্| অর্থাদার্তবং পিবেদিত্যুক্তং ভবতি| তদত্র সামান্যোক্তাবপি বিশিষ্টো দিব্যস্য জলস্য কাল ঋতুরূপো বোধ্যো বর্ষাখ্যঃ, যস্মিন্ কালে দিব্যং জলং পেযত্বেনাভ্যনুজ্ঞাযতে| যথা-"বর্ষাসু দিব্যনাদেযে" ইত্যাদি| অন্যর্তুভবং ত্বনার্তবত্বান্ন পেযম্| অত্র চ বর্ষাখ্য ঋতুশ্চাতুর্মাসিকোঽভিপ্রেতঃ| অত এবাশ্বযুজে মাসি দিব্যং জলং পেযত্বেনানুজজ্ঞে| অন্যথা হ্যনার্তবত্বাত্তদপেযমেব স্যাত্| আর্তবং প্রথমং চ যত্ন কেবলমনার্তবং ন পিবেত্ যাবদার্তবমপি প্রথমং ন পিবেত্| কুতো হেতো: ? ইত্যাহ-লূতাদীত্যাদি| লূতা আদির্যেষাং তে লূতাদযঃ,-ক্ষুদ্রজন্তবঃ প্রাণিবিশেষাঃ, তেষাং তন্তুবিণ্মূত্রবিষাণি| তন্তুঃ-সূত্রাকারবিশেষো, লালেত্যন্যে| তেষাং লূতাদিতন্তুবিণ্মূত্রবিষাণাং সংশ্লেষঃ-সম্পর্কঃ, তেন দূষিতং যতঃ, ততস্তদার্তবমপি ন পেযম্| কেচিত্ত্বেবং ব্যাখ্যানযন্তি-আর্তবং প্রথমং চ যত্তন্ন পেযম্, লূতাদিতন্ত্বাদিদূষিতং চ ন পেযমিতি| সঙ্গ্রহে চাধ্যগীষ্ট (সূ.অ.৬)- "তত্কুর্যাত্স্নানপানাভ্যাং তৃষ্ণাধ্মানোদরজ্বরান্| কাসাগ্নিসাদাভিষ্যন্দকণ্ডূগণ্ডাদিকানতঃ|| তদ্বর্জযেদভাবে বা তোযস্যান্যস্য শস্যতে| ঘনবস্ত্রপরিস্রাবৈঃ ক্ষুদ্রজন্ত্বভিরক্ষণম্|| ব্যাপন্নস্যাস্য তপনমগ্ন্যর্কাযসপিণ্ডকৈঃ| পর্ণীংমূলবিসগ্রন্থিমুক্তাকতকশৈবলৈঃ|| বস্ত্রগোমেদকাভ্যাং বা কারযেত্তত্প্রসাদনম্| পাটলাকরবীরাদিকুসুমৈর্গন্ধনাশনম্||' ইতি|

Adhikarana nadInirupaNam (8-9) · Śloka 9

ইদানীং নদীর্নিরূপযন্নাহ | পশ্চিমোদধিগাঃ শীঘ্রবহা যাশ্চামলোদকাঃ||৮|| পথ্যাঃ সমাসাত্তা নদ্যো বিপরীতাস্ত্বতোঽন্যথা| |৯|

স০- নদ্যঃ সমাসাত্-সংক্ষেপতঃ, পথ্যাঃ-হিতা:| কাঃ ? ইত্যাহ-যাঃ পশ্চিমমুদধিং-সমুদ্রং গচ্ছন্তীতি পশ্চিমোদধিগাঃ| অন্যেভ্যোঽপি দৃশ্যত ইতি ডঃ| তথা, শীঘ্রবহাঃ-বেগবত্যঃ| তথা, অমলোদকাঃ-নির্মলসলিলাঃ| এবং ত্রিবিশেষণবিশিষ্টাঃ পথ্যাঃ| অতঃ-আভ্যো, যাঃ পুনরন্যথা-বিপরীতলক্ষণাঃ, তা বিপরীতাঃ- অপথ্যাঃ|

Adhikarana nadyaH pathyApathyAH himavanmalayanadIguNAH (9-10) · Śloka 10

| উপলাস্ফালনাক্ষেপবিচ্ছেদৈঃ খেদিতোদকাঃ||৯|| হিমবন্মলযোদ্ভূতাঃ পথ্যাস্তা এব চ স্থিরাঃ| কৃমিশ্লীপদহৃত্কণ্ঠশিরোরোগান্ প্রকুর্বতে||১০||

স০-হিমবাংশ্চ মলযশ্চ হিমবন্মলযৌ, তাভ্যামুদ্ভূতাঃ-সঞ্জাতাঃ পথ্যাঃ| কিং সর্বা এব ? নেত্যাহ-উপলেত্যাদি| উপলানামাস্ফালনং-উল্লালনং, তেনাক্ষেপঃ-ক্ষোভঃ, তেন বিচ্ছেদাঃ-বিশ্লেষাঃ, উপলাস্ফালনাক্ষেপবিচ্ছেদাঃ তৈঃ| খেদিতং-জাতক্ষোভমুদকং যাসাং তাঃ খেদিতোদকাঃ, যা হিমবন্মলযোদ্ভূতাস্তা এব পথ্যা:| যাস্ত্বেবংভূতা ন ভবন্তি তা অপথ্যাঃ| স্থিরা ইতি| তা এবাঽবহন্ত্যঃ সত্যঃ কৃম্যাদীন্ কুর্বতে| হৃচ্চ কণ্ঠশ্চ শিরশ্চ তেষাং রোগাঃ, কৃমযশ্চ শ্লীপদং চ হৃত্কণ্ঠশিরোরোগাশ্চেতি দ্বন্দ্বঃ| মুনিরপি হিমবত্প্রভবানাং পথ্যত্বমাহ| কৃষ্ণাত্রেযসুশ্রুতৌ ত্বপথ্যত্বমাহতুঃ| অত এবাযং গ্রন্থকারো যুক্ত্যা মতদ্বযমপি সঙ্গিরমাণো বিশেষণমুপন্যস্তবান্- 'উপলাস্ফালনাক্ষেপবিচ্ছেদৈ: খেদিতোদকা:' ইতি| তেন যা এবংবিধা ন ভবন্তি, তা ন পথ্যা ইতি|

Adhikarana avantinadiguNAH mahendraparvatanadIguNAH sahrAvindyanadIguNAH pAriyAtranadIguNAH samudrodakaguNAH (11-12) · Śloka 12

প্রাচ্যাবন্ত্যপরান্তোত্থা দুর্নামানি, মহেন্দ্রজাঃ| উদরশ্লীপদাতঙ্কান্, সহ্যবিন্ধ্যোদ্ভবা: পুনঃ||১১|| কুষ্ঠপাণ্ডুশিরোরোগান্, দোষঘ্ন্যঃ পারিযাত্রজাঃ| বল পৌরুষকারিণ্যঃ, সাগরাম্ভস্ত্রিদোষকৃত্||১২||

স০-প্রাচ্যাদিজা নদ্যো দুর্নামানি-অর্শাসি কুর্বতে| প্রাচ্যাঃ-গৌডাঃ| অবন্তযো-মালবাঃ| অপরান্তাঃ-কৌঙ্কণাঃ| মহেন্দ্রজা নদ্য উদরাদীন্ কুর্বতে| সহ্যবিন্ধ্যপর্বতোত্থাশ্চ পুনঃ কুষ্ঠাদীন্ কুর্বতে| পারিযাত্রাত্ সঞ্জাতা দোষঘ্ন্যো ভবন্তি| সাগরাম্ভঃ-সমুদ্রোদকং, দোষত্রযকারি|

Adhikarana kUpataDAgAdiguNAH (13) · Śloka 13

বিদ্যাত্কূপতডাগাদীন্ জাঙ্গলানূপশৈলতঃ| |১৩|

স০-আদিশব্দেন সঙ্গ্রহোক্তা (সূ.অ.৬) গৃহ্যন্তে| যথা-"কৌপসারসতাডাগচৌণ্ড্যপ্রাস্রবণৌদ্ভিদম্| বাপীনদীতোযমিতি তত্পুনঃ স্মৃতমষ্টধা|| [কৌপং স্বাদু ত্রিদোষঘ্নং লঘু পথ্যং চ সর্বদা| ক্ষারং তু কফবাতঘ্নং দীপনং পিত্তকৃত্পরম্|| কষাযবহুলং শ্লেষ্মপিত্তঘ্নং বাতকৃচ্চ তত্| তৃষ্ণাঘ্নং সারসং বল্যং কষাযমধুরং লঘু|| বাতলং লঘু তাডাগং, চৌণ্ড্যং পিত্তকরং স্মৃতম্| লঘুশীতামলং স্বাদু প্রোক্তং প্রাস্রবণং জলম্|| ঔদ্ভিদং স্বাদু পিত্তঘ্নং দীপনং গুরু কিঞ্চন| সক্ষারং কটু বাপ্যম্বু পিত্তলং কফবাতজিত্|| লঘ্বল্পদোষং সুস্বাদু নববাপীষ্ববার্ষিকম্| অনভিষ্যন্দি নাদেযং কটুকং কফপিত্তজিত্|| বিশদং বাতলং রূক্ষমনবস্থিতলাঘবম্|"] ইতি| সুশ্রুতে (?) চৈষাং লক্ষণমুক্তম্| যথা-"ভূম্যুত্খাতসমুদ্ভূতমিন্দ্রনীলসমপ্রভম্| বিমলং মধুরাস্বাদং কৌপং জলমুদাহৃতম্|| নদ্যাঃ শৈলবরাদ্বাপি স্রুতমেকান্তসংস্থিতম্| কুমুদাম্ভোজসঞ্ছন্নং বারি সারসমুচ্যতে|| প্রশস্তভূমিভাগস্থং নৈকসংবত্সরোষিতম্| কষাযমধুরাস্বাদং তাডাগং সলিলং স্মৃতম্|| স্বযংশীর্ণশিলাশ্বভ্রে নীলোত্পলনিভং জলম্| লতাবিতানসঞ্ছ্ন্নং বুধৈশ্চৌণ্ডেযমুচ্যতে|| শৈলসানুসমুদ্ভূতং স্পৃষ্টং বাতহিমাতপৈঃ| লঘু শীতামলং স্বাদু স্মৃতং প্রাস্রবণং জলম্|| বিদার্য ভূমিমুদ্ভূতং মহত্যা ধারযা স্রবেত্| যজ্জলং বেদিতব্যং তদৌদ্ভিদং স্বাদু শীতলম্|| পাষাণৈরিষ্টকাভির্বা বদ্ধা স্যাদ্যা তু কূপবত্| বাপি সা খলু বিজ্ঞেযা কৃতসোপানপঙ্ক্তিকা|| নদ্যাং শৈলপ্রসূতাযাং গোমেদকমণিপ্রভম্| প্রশস্তভূমিভাগস্থং জলং নাদেযমুচ্যতে||" ইতি| "পৌষাদিদ্বিতযেষ্বিষ্টং বিশেষেণ ক্রমাজ্জলম্| সরস্তডাগযোঃ কূপচুণ্ডযোঃ প্রস্রবণোদ্ভিদোঃ|| কূপেন্দ্রযোঃ কূপচুণ্ডযোঃ সর্বং পথ্যং ততঃ পরম্|" তদেতান্ কূপাদীন্ জাঙ্গলানূপশৈলান্ সমাশ্রিত্য জাতান্ বিদ্যাত্| জাঙ্গলাদিদেশজান্ যথাযোগং লঘূন্ গুরূংশ্চ জানীযাদিত্যর্থঃ| তত্র জাঙ্গলদেশে কূপাদীনাং সপ্তানাং বহূদকসম্বন্ধাভাবাল্লঘুত্বং বেদ্যম্| আনূপে তু বহূদকসম্বন্ধাদ্গুরুত্বং বেদ্যম্|শৈলে তূদকাল্পতযা লঘুতরত্বং বেদ্যম্| তথা চ সঙ্গ্রহে (সূ.অ.৬)- "ধন্বানূপমহীধ্রাণাং সামীপ্যাদ্গুরুলাঘবম্|" ইতি|

Adhikarana keShA~jcijjalapAnaniShedhaH (13-14) · Śloka 14

ইদানীং কেষাঞ্চিজ্জলপাননিষেধমাহ | নাম্বু পেযমশক্ত্যা বা স্বল্পমল্পাগ্নিগুল্মিভিঃ||১৩|| পাণ্ডূদরাতিসারার্শোগ্রহণীশোষশোথিভিঃ| ঋতে শরন্নিদাঘাভ্যাং পিবেত্স্বস্থোঽপি চাল্পশঃ||১৪||

স০-অল্পাগ্ন্যাদিভিরম্বু ন পেযম্| সর্বথৈষাং জলপাননিষেধপ্রত্যপাযমাশঙ্কমান ইদমাহ-অশক্ত্যা বা,-পিপাসামসহিষ্ণুভিঃ, স্বল্পং-অত্যল্পং পেযম্| যাবন্মাত্রেণ প্রত্যপাযো ন ভবতি তাবদেব পেযমিত্যর্থঃ| অল্পাগ্নযশ্চ গুল্মিনশ্চেতি দ্বন্দ্বঃ| পাণ্ড্বাদীনাং সপ্তানাং দ্বন্দ্বঃ, ততো মত্বর্থীয ইনিঃ| শরন্নিদাঘাভ্যামন্তরেণ স্বস্থোঽপ্যল্পশঃ পিবেত্| কিং পুনরাতুরঃ| সঙ্গ্রহে ত্বেবমুবাচ (সূ.অ.৬)- "কামমল্পমশক্তৌ তু পেযমৌষধসংস্কৃতম্| পাষাণরূপ্যমৃদ্ভেমজতুতাপার্কতাপিতম্|| পানীযমুষ্ণং শীতং বা ত্রিদোষঘ্নং তৃডর্তিজিত্|" ইতি|

Adhikarana Bojane~ambupAnaprakAraH (15) · Śloka 15

সমস্থূলকৃশা ভুক্তমধ্যান্তপ্রথমাম্বুপাঃ| |১৫|

স০-সমাশ্চ স্থূলাশ্চ কৃশাশ্চ সমস্থূলকৃশাঃ| মধ্যশ্চ অন্তশ্চ প্রথমশ্চ মধ্যান্তপ্রথমাঃ| ভক্তস্য মধ্যান্তপ্রথমাঃ ভক্তমধ্যান্তপ্রথমাঃ| তেষু কালেষু যেঽম্বু পিবন্তি, তে ভক্তমধ্যান্তপ্রথমাম্বুপাঃ, যথাক্রমং সমাঃ স্থূলাঃ কৃশাশ্চ ভবন্তীত্যর্থঃ| ভক্তমধ্যেঽম্বু পীতং ধাতুসাম্যং সমানতাং করোতি| ভক্তান্তে তু পীতমামাশযে কফবৃদ্ধিং বিদধত্স্থৌল্যমাধত্তে| ভক্তাদৌ চ পীতং নিরিন্ধনমগ্নিং তেজঃপ্রতিপক্ষতযাঽবশ্যমবসাদযতি, মন্দোঽগ্নিশ্চ সম্যগাহারং পক্তুমশক্তো ভবতি, আহারস্য চাসম্যগ্পাকান্ন তথাপুষ্টিঃ, ইতি কৃশত্বে যুক্তিঃ| তথা চ সঙ্গ্রহে (সূ.অ.৬)-"ভক্তস্যাদৌ জলং পীতমগ্নিসাদং কৃশাঙ্গতাম্| অন্তে করোতি স্থূলত্বমূর্ধ্বং চামাশযাত্কফম্|| মধ্যে মধ্যাঙ্গতাং সাম্যং ধাতূনাং জরণং সুখম্|" ইতি|

Adhikarana shItAmbuguNAH (15-16) · Śloka 16

| শীতং মদাত্যযগ্লানিমূর্চ্ছাচ্ছর্দিশ্রমভ্রমান্||১৫|| তৃষ্ণোষ্ণদাহপিত্তাস্রবিষাণ্যম্বু নিযচ্ছতি| |১৬|

স০-শীতমম্বু মদাত্যযাদীন্ নিযচ্ছতি-পরাকরোতি| মদাত্যযো-মদ্যোত্থো রোগঃ| গ্লানিঃ-ক্লান্তিঃ| মূর্চ্ছা-মোহঃ| ছর্দিঃ-বমিঃ| শ্রমঃ-খেদঃ| ভ্রমঃ-অনবস্থিতিঃ| তথা, তৃষ্ণাদীনি নিযচ্ছতি| এবংগুণমপ্যামং ক্বচিন্নেষ্যতে| তথা চোক্তং সঙ্গ্রহে (সূ.অ.৬)-"অনবস্থিতদোষাগ্নের্ব্যাধিক্ষীণবলস্য চ| নাল্পমপ্যামমুদকং হিতং, তদ্ধি ত্রিদোষকৃত্|" ইতি|

Adhikarana uShNAmbuguNAH (16-17) · Śloka 17

অধুনোষ্ণাম্বুগুণানাহ | দীপনং পাচনং কণ্ঠ্যং লঘূষ্ণং বস্তিশোধনম্||১৬|| হিধ্মাধ্মানানিলশ্লেষ্মসদ্যঃশুদ্ধিনবজ্বরে| কাসামপীনসশ্বাসপার্শ্বরুক্ষু চ শস্যতে||১৭||

স০-দীপনাদিগুণযুক্তমুষ্ণমম্বু ভবতি| বস্তিশব্দেন তাত্স্থ্যান্মূত্রং গৃহ্যতে| তেন মূত্রশোধনমিত্যত্রার্থো বোধ্যঃ| হিধ্মাধ্মানাদিষু চ শস্যতে| কাসশ্চ আমশ্চ পীনসশ্চ শ্বাসশ্চ পার্শ্বরুক্ চ, তাসু চ শস্যতে| আমো-অপক্বঃ, আহার ইত্যর্থঃ| কেচিত্ত্বামপীনস ইতি পীনসবিশেষণমামশব্দমাহুঃ| তৈরজীর্ণ উষ্ণাম্বু নোক্তং স্যাত্| অজীর্ণে চালসকাদিরূপে জলমুষ্ণমিষ্যত এব|

Adhikarana kvathitashItalAmbuguNAH vyuShitakvathitashItalambuguNAH (18) · Śloka 18

অধুনা ক্বথিতশীতলং নির্দিদিক্ষুরাহ অনভিষ্যন্দি লঘু চ তোযং ক্বথিতশীতলম্| পিত্তযুক্তে হিতং দোষে, ব্যুষিতং তত্ত্রিদোষকৃত্||১৮||

স০-অনভিষ্যন্দি-ন শ্লেষ্মকারি| লঘুগুণযোগোঽম্ভসোঽস্ত্যেব, পুনর্লঘুত্বকথনমগ্নিসংস্কারবশাল্লঘুতরত্বপ্রতিপত্ত্যর্থম্| অথবা, আধারাদিবশাদক্বথিতমম্ভো লঘ্বাপি যদ্গুরু সম্পন্নম্, তদপি ক্বথিতশীতলং লঘু ভবতি| শীতলত্বাদভিষ্যন্দিত্বং যত্তোযস্য প্রাপ্তম্, তত্ক্বথিতশীতলত্বেনাস্য নিষিদ্ধম্| মদাত্যযাদিহন্তৃত্বং তু যচ্ছীতলত্বসামান্যাত্তদস্যাস্ত্যেব, ন কেনচিন্নিষেদ্ধুং সম্ভাব্যতে| পিত্তযুক্ত ইত্যেকবচনমবিবক্ষিতম্, তেন বাতপিত্তে পিত্তশ্লেষ্মণি সন্নিপাতে চ যত্র পিত্তযোগঃ-পিত্তাধিকত্বং দৃশ্যতে, তত্রৈতত্ ক্বথিতশীতলং জলং হিতম্| সঙ্গ্রহোক্তং (সূ.অ.৬) তত্ক্বথনলক্ষণং সঙ্ক্ষেপাভিপ্রাযেণেহ নোক্তম্| যথা-"ক্ষীণপাদত্রিভাগার্ধং দেশর্তুগুরুলাঘবাত্| ক্বথিতং ফেনরহিতমবেগমমলং হিতম্||" ইতি| অস্যার্থঃ শিষ্যব্যুত্পত্ত্যৈ দর্শ্যতে-ধন্বসাধারণানূপেষু দেশেষু ক্রমশঃ ক্ষপিতচতুর্ভাগাত্রিভাগার্ধং সলিলমধিশ্রপেত্| জাঙ্গলো হি দেশোঽনিলানলাভ্যাং ভূযিষ্ঠমধিষ্ঠিতঃ, তেনাত্র তোযং লাঘবাদাশু বিশুদ্ধিং প্রাপ্নোতি| আনূপস্তু ভূমিসোমগুণবহুলঃ, তত্র গুরুত্বাদিগুণযোগাচ্চিরেণ বিশুদ্ধিমশ্নুতে| এবং সাধারণো দেশশ্চিন্ত্যঃ| তথা, ঋতুষ্বপি যথাযোগমযমেব ক্রমো বোধ্যঃ| সুশ্রুতে তূক্তম্ (সূ.অ.৪৫|৪০)- "যত্ক্বাথ্যমানং নির্বেগং নিষ্ফেনং নির্মলং লঘু| চতুর্ভাগাবশিষ্টং তু তত্তোযং কফরোগনুত্|| তত্পাদহীনং পিত্তঘ্নং, হীনমর্ধেন বাতনুত্|" ইতি| সঙ্গ্রহোক্তমেব (সূ.অ.৬) গ্রন্থমিমং কেচিদত্রাঽপি পঠন্তি| যথা_ "পানীযং ন তু পানীযং পানীযেঽন্যপ্রদেশজে| অজীর্ণে ক্বথিতং চামে পক্বে জীর্ণেঽপি নেতরত্|| শীতে বিধিরযং, তপ্তে ত্বজীর্ণে শিশিরং ত্যজেত্| অতিযোগেন সলিলং তৃষ্যতোঽপি প্রযোজিতম্|| প্রযাতি শ্লেষ্মপিত্তত্বং জ্বরিতস্য বিশেষতঃ|" ইতি| অন্যপ্রদেশজে পীতে পানীযে অজীর্ণে পানীযং-জলং, ন পানীযং-ন পেযম্| এতদুক্তং ভবতি-পানীযে পীতে তজ্জরণান্তং যাবত্ বিজাতীযং জলং ন পেযমিতি| অন্যপ্রদেশজ ইতি কোঽর্থঃ? কৌপে পীতে তাডাগং ন পেযম্, তাডাগে পীতে কৌপং ন পেযম্, এবং সর্বত্র চিন্ত্যম্| তথা, আমে-অপক্বে জলে, অজীর্ণে ক্বথিতং চ জলং ন পেযম্| পক্বে-ক্বথিতে, পীতে জীর্ণেঽপি, ইতরত্-আমং জলং ন পেযম্, যাবন্ন ভুঙ্ক্তে তাবত্সজাতীযমাপ ন পেযমিত্যর্থঃ| শীতে বিধিরযং-ক্বথিতশীত এতদ্বিধানমিত্যর্থঃ| তুরবধারণে| তপ্তেঽজীর্ণ এব শিশিরং ত্যজেত্, জীর্ণে তু শীতং পিবেদিত্যর্থঃ| অতিযোগেন-অতিবাহুল্যেন, তৃষ্যতঃ-তৃষ্ণাবতোঽপি প্রযোজিতং-উপযুক্তং, সর্বস্যাপি নরস্য শ্লেষ্মপিত্ততাং যাতি| জ্বরিতস্য বিশেষতঃ-যত আমেনাগ্নৌ বহিষ্কৃতে জ্বরস্যোত্পত্তিঃ, আমস্য চ পানীযং বর্ধকমিতি| সঙ্ক্ষেপতযাঽল্পোপযোগিত্বাচ্চ অবশ্যাযাদিগুণা গ্রন্থকৃতা নোক্তাঃ| তাংশ্চাত্র শিষ্যহিতায ব্রূমঃ-"রূক্ষস্তনুরবশ্যাযঃ শীতো বাতাস্রকোপনঃ| পানতৃড্দাহপিত্তাস্রকুষ্ঠোরুস্তম্ভমেহজিত্|| গ্রীষ্মে তু সর্বজন্তূনাং স্পর্শনাদপি শস্যতে| পদ্মিন্যম্বু চ পিত্তঘ্নং কফকৃদ্বিরসং গুরু|| হিমং তু শীতলং রূক্ষং দারুণং সূক্ষ্মমেব চ| কফং ন সন্দূষযতি ন পিত্তং ন চ মারুতম্|| যথাঽশ্মবর্ষং প্রালেযং হিমাদল্পান্তরং গুণৈঃ| চরাচরাণামহিতং, তুষারং ত্বগ্নিনাশনম্|| (সুশ্রুতে সূ.অ.৪৫|৩৫)- 'বৈকিরং লঘু সক্ষারং শ্লেষ্মঘ্নং বহ্নিদীপনম্| কৈদারং মধুরং প্রোক্তং বিপাকে গুরু দোষলম্|| তদ্বত্পাল্বলমুদ্দিষ্টং বিপাকে দোষলং তু তত্| অনেকদোষমানূপং বার্যভিষ্যন্দিগর্হিতম্|| এভির্দোষৈরসংযুক্তং নিরবদ্যং তু জাঙ্গলম্| পাকেঽবিদাহি তৃষ্ণাঘ্নং প্রশস্তং প্রীতিবর্ধনম্|| দীপনং স্বাদু শীতং চ তোযং সাধারণং লঘু|' চন্দ্রকান্তভবং রক্ষোবিষপিত্তজ্বরাপহম্|| রত্নাকরসমুত্থং চ সর্বদোষকরং মতম্||" ইতি|

Adhikarana nArikelodakaguNAH (19) · Śloka 19

নারিকেলোদকং স্নিগ্ধং স্বাদু বৃষ্যং হিমং লঘু| তৃষ্ণাপিত্তানিলহরং দীপনং বস্তিশোধনম্||১৯||

স০-নারিকেলান্তঃস্থিতমুদকং স্নিগ্ধং স্বাদু বৃষ্যং হিমং চ ভবতি| এবম্ভূতমপি প্রভাবাল্লঘু ভবতি| তথা, তৃষ্ণাদিহরং দীপনং মূত্রশোধনং চ ভবতি|

Adhikarana divyanAdeyayorvarAvaratve (20-1) · Śloka 1

ইদানীং যুক্ত্যাঽগ্র্যসঙ্গ্রহং নির্দিশতি বর্ষাসু দিব্যনাদেযে পরং তোযে বরাবরে| |২০| ইতি তোযবর্গঃ||১||

স০-প্রাবৃষ্যান্তরিক্ষং জলং পরং বরং-অত্যন্তং পথ্যম্| নদীসম্ভবং ত্বপথ্যম্| ইতি তোযবর্গঃ|

Adhikarana kShIravargaH sAmAnyakShIraguNAH (20-21) · Śloka 21

পরিশেষেভ্যো বর্গেভ্যঃ প্রাজ্যজনোপযোগিতযোপকারিত্বেনাজন্মসাত্ম্যেন প্রাধান্যাত্ পযঃ সজ্ঞাসামান্যাত্ পযস ইব জীবনাদিগুণযোগাচ্চ তোযবর্গাদনু ক্ষীরবর্গঃ প্রক্রম্যতে| তত্রাপি দধ্যাদীনাং মূলকারণত্বাত্ ক্ষীরস্য প্রাগুপাদানম্| তথা, জীবনীযানাং রসাযনানাং চাগ্রেসরত্বাত্| তথা চাষ্টাঙ্গসঙ্গ্রহে (সূ. অ. ১৩)- "ক্ষীরং জীবনীযানাম্| ক্ষীরঘৃতাভ্যাসো রসাযনানাম্| " ইত্যাদি| অথ ক্ষীরবর্গঃ| | স্বাদুপাকরসং স্নিগ্ধমোজস্যং ধাতুবর্ধনম্||২০|| বাতপিত্তহরং বৃষ্যং শ্লেষ্মলং গুরু শীতলম্| প্রাযঃ পযঃ|২১|

স০-পযঃ-ক্ষীরং, প্রাযঃ স্বাদুপাকরসাদিযুক্তং ভবতি| পাকশ্চ রসশ্চ পাকরসৌ, স্বাদূ পাকরসৌ যস্য তদেবম্| ওজসে হিতং-ওজস্যম্| ধাতূন্ বর্ধযতীতি ধাতুবর্ধনম্| বৃষ্যং-শুক্রকরমতিশযেনেতি বোধ্যম্| ধাতুবর্ধনত্বাদেব শুক্রকরত্বমাত্রস্য সিদ্ধেঃ প্রাযোগ্রহণাত্ ক্বচিত্ক্ষীরং নৈবং ভবতি| তথা চোষ্ট্রীক্ষীরমীষদ্রূক্ষোষ্ণলবণং পঠ্যতে, অজাক্ষীরং চ লঘু, আবিকমুষ্ণম্, ঐকশফমুষ্ণং সাম্ললবণং চেতি| তস্মাত্প্রাযোগ্রহণং কৃতম্| স্বাদুপাকারসত্বাদেব ক্ষীরস্য স্নিগ্ধবৃষ্যাদযো গুণা লব্ধা এব| কিং পুনরেতৈরুদ্দিষ্টৈঃ ? ইতি কেচিত্| তান্ ব্রূমহে| মধুররসাশ্রিতেভ্যঃ স্নিগ্ধবৃষ্যাদিভ্যোঽপরে স্নিগ্ধবৃষ্যাদযো গুণা বহুতরাঃ ক্ষীরস্য বিদ্যন্ত ইতি জ্ঞাপনাযৈতে স্নিগ্ধাদযো গুণাঃ পুনরুদ্দিষ্টাঃ| মহাভূতানাং হি সংযোগাদিবিশেষাত্ ক্বচিদ্রসসহচরিতা এব গুণা দ্রব্যমভিনিবিশন্তে| যে রসে সমারোপ্য বর্ণ্যন্তে| যথা-মধুর আযুষ্যাদিগুণাঃ, অম্লেঽগ্নিদীপ্তিকৃদাদযঃ| কেচিচ্চ রসমনপেক্ষ্যৈব দ্রব্যে নিবিশন্তে| যথা-মধুররসদ্রব্যে মকুষ্টতণ্ডুলীযাদৌ রূক্ষাদযো গুণাঃ| তথা হি স্নিগ্ধাদীনাং তত্রোপলম্ভঃ প্রাপ্তো মধুররসাশ্লিষ্টত্বাত্| তস্মান্মকুষ্টাদিদ্রব্যং মধুররসসহচরোক্তেন গুণৌঘেন সংযুক্তং বক্তুং যুক্তম্| অন্যথা তু, কৃতং ষড্রসগুণস্বরূপবর্ণনমনর্থকমেব স্যাত্| তস্মাদযমত্র বিষযবিভাগো জ্ঞেযঃ| কেচিদ্গুণা রসসহচরিতা দ্রব্যে নিবিশন্তে, যদ্বশাত্তদ্দ্রব্যং রসগুণাননুবর্ততে| ঈদৃশং চ বিষযমুদ্দিশ্য তন্ত্রকৃদ্ভির্মধুরাদিরসানাং স্নিগ্ধাদিগুণা বর্ণিতা বেদ্যাঃ| কেচিতু রসনিরপেক্ষা এব দ্রব্যে নিবিশন্তে| অত এব তদ্দ্রব্যং রসগুণান্নানুবর্ততে| অস্মিংস্তু বিষযে রসগুণবর্ণনং নোক্তমেব বেদ্যম্| তস্মাত্ক্ষীরস্য স্নিগ্ধাদিযোগাত্স্বাদুপাকরসত্বে সত্যপি স্নিগ্ধাদিগুণবর্ণনম্| এবং চোভযথা ক্ষীরস্য স্নিগ্ধাদিগুণযোগাদধিকাঃ স্নিগ্ধাদযো যে গুণাস্তেঽস্য সন্তীত্যবগচ্ছ| অযমেব চ ব্যবহারোঽন্যত্রাপ্যেবংবিধে শাল্যাদৌ দ্রব্যে বিজ্ঞেযঃ| ননু, "স্বাদুঃ পটুশ্চ মধুরমম্লোঽম্লং পচ্যতে রসঃ|" ইতি (হৃ. সূ. অ. ৯|২১) বক্ষ্যতে| ততশ্চ স্বাদুরসত্বাদেব স্বাদুপাকত্বং লব্ধম্, তত্কিং পাকগ্রহণেন ? ভণামঃ| "শালিপিষ্টমযং সর্বং গুরুভাবাদ্বিদহ্যতে" ইত্যুক্তম্| তদেতত্ক্ষীরং গুরুগুণযুক্তমপি বিদাহাবস্থাযাং চিরং ন তিষ্ঠতি, প্রাগেব স্বাদুপাকতাং যাতি| ইতীমমর্থং জ্ঞাপযিতুং পাকগ্রহণম্| স্ত্রীণাং চাহাররস এবাপত্যস্নেহাত্ ক্ষীরায সম্পদ্যতে| তথা চ দারুবাহিঃ- "স্ত্রীণামপত্যজাদ্ধর্ষাদ্রসঃ ক্ষীরায কল্পতে| স্নেহাদ্রসঃ ক্ষরত্যেবং হৃদযাত্ক্ষীরমেত্যতঃ||" ইতি| গব্যস্য চ পূর্বতরমুপাদানং সর্বক্ষীরেভ্যো জ্যাযস্ত্বাত্, তথা মাহিষমপি তক্রাদি গোরসশব্দেন প্রথিতমিতি|

Adhikarana gokShIraguNAH (21-23) · Śloka 23

| অত্র গব্যং তু জীবনীযং রসাযনম্||২১|| ক্ষতক্ষীণহিতং মেধ্যং বল্যং স্তন্যকরং সরম্| শ্রমভ্রমমদালক্ষ্মীশ্বাসকাসাতিতৃট্ক্ষুধঃ||২২|| জীর্ণজ্বরং মূত্রকৃচ্ছ্রং রক্তপিত্তং চ নাশযেত্| |২৩|

স০- অত্র-এষু ক্ষীরেষু মধ্যে, গব্যং পুনঃ ক্ষীরং জীবনীযমতিশযেনেতি বোদ্ধব্যম্, জীবনীযমাত্রস্যৌজস্যমিত্যনেনৈব ক্ষীরসামান্যলক্ষণেনোক্তত্বাত্| ওজস্যং হি জীবনীযমুচ্যতে| তথা হ্যোজঃক্ষযে জীবনীযানামৌষধানামুপযোগো নির্দিষ্টঃ| যথা (হৃ. সূ. অ. ১১|৩৯)- "ওজঃ ক্ষীযেত কোপাদিভিঃ" ইত্যুক্ত্বাঽনন্তরমুবাচ-"জীবনীযৌষধক্ষীররসাদ্যাস্তত্র ভেষজম্|" ইতি| অত্র চ ক্ষীরং জীবনীযত্বেন গৃহীতমপি পুনরুক্তং প্রাধান্যখ্যাপনার্থম্| তথা চ মুনিঃ (চ. সূ. অ. ২৭|২১৪)- "প্রবরং জীবনীযানাং ক্ষীরমুক্তং রসাযনম্|" ইতি| রসাযনংরসরক্তাদীনাং শ্রেষ্ঠানাং লাভোপাযঃ| তথা চোক্তম্ (হৃ. উ. অ. ৩৯|২)- "লাভোপাযো হি শস্তানাং রসাদীনাং রসাযনম্|" ইতি| তথা, ক্ষতক্ষীণহিতং-উরঃক্ষতায হিতং ক্ষীণায চ হিতম্| ক্ষীণঃ-ক্ষীণধাতুঃ| তথা, মেধা-ধারণাশক্তিঃ, তস্যৈ হিতং-মেধ্যম্| "উগবাদিভ্যো যত্" ইতি যত্| এবং বল্যম্| তথা, স্তন্যকরম্| কৃঞো হেতুতাচ্ছীল্যেতি হেতৌ টঃ, স্ত্রীণাং স্তন্যকরণে হেতুরিত্যর্থঃ| তথা, সরম্| শ্রমাদীংশ্চৈকাদশ নাশযেত্|

Adhikarana mAhiShakShIraguNAH (23) · Śloka 23

| হিতমত্যগ্ন্যনিদ্রেভ্যো গরীযো মাহিষং হিমম্||২৩||

স০-মহিষ্যা ইদং-মাহিষং ক্ষীরম্, অত্যগ্নিভ্যোঽনিদ্রেভ্যশ্চ হিতম্| তথা, গরীযো-গুরুতরম্| তথা, হিমং-শীতবীর্যম্| মুনিরপ্যাহ (চ. সূ. অ. ২৭|২১৫)- "মহিষীণাং গুরুতরং গব্যাচ্ছীততরং পযঃ| স্নেহাদূনমনিদ্রাণামত্যগ্নীনাং হিতং চ তত্||" ইতি| [স্নেহাত্ অদূনং-আপূর্ণং, স্নেহাদূনমিতি ব্যাখ্যেযম্| ন তু স্নেহোনমিতি, প্রত্যক্ষবিরোধাত্| তথা চ গোক্ষীরাত্ মাহিষক্ষীরে বহুঃ স্নেহ উপলভ্যতে| হরিশ্চন্দ্রোঽপ্যেবমেব ব্যাচষ্টে| তস্মাত্স্নেহাধিকমিতি ব্যাখ্যেযম্| ] খরনাদে চোক্তম্-"গব্যং স্নেহোত্তমং ক্ষীরং গব্যাচ্চ পযসঃ পযঃ| যথোত্তরং স্নেহহীনমৌরভ্রচ্ছাগমাহিষম্|| জাঙ্গলানূপশৈলেষু চরন্তীনাং যথোত্তরম্| পযো গুরুতরং বত্সো যথা তাসাং প্রবর্ধতে|| গুরু শীততরং গব্যান্মাহিষং স্বপ্নলং পযঃ| চতুর্থভাগস্নেহোনং পিত্তঘ্নং চ বিশেষতঃ||" ইতি| যত্তু রবিগুপ্তঃ সিদ্ধসারেঽধ্যগীষ্ট-"গব্যাত্ স্নিগ্ধং গুরুতরং মাহিষং স্বপ্নকৃত্পয:|" ইতি| তদ্বুধৈশ্চিন্ত্যম্, সর্বমতবিরুদ্ধত্বাত্|

Adhikarana AjakShIraguNAH (24) · Śloka 24

অল্পাম্বুপানব্যাযামকটুতিক্তাশনৈর্লঘু| আজং শোষজ্বরশ্বাসরক্তপিত্তাতিসারজিত্||২৪||

স০-আজং-ছাগলং ক্ষীরং, লঘু ভবতি, অল্পাম্বুপানাদিভির্হেতুভূতৈঃ| অল্পাম্বুপানাদিত্বং চাজানাং স্বভাবঃ, অন্যাসাং তু দেশসাত্ম্যাপেক্ষযা| ননু, যদ্যেবং স্বভাবাদেবাল্পাম্বুপানাদের্গম্যমানত্বাদেতদুপন্যাসো ব্যর্থ এব| অত্রোচ্যতে| জ্ঞাপনার্থম্| ইদং জ্ঞাপযতি,-যদা অজা অল্পব্যাযামগুর্বশনাদি কুর্যুঃ, তদা তাসামপ্যন্যথা ক্ষীরং ভবেত্| এবং চ গবাদীনামপ্যাহারাদিবশাদ্গুরুলঘুত্বং চিন্ত্যমিতি| তেন প্রাদোষমপরাহ্ণে যদ্গৃহীতং পযঃ, তদপেক্ষযৌষসং প্রভাতে যদ্গৃহীতং তদ্গুরু, চেষ্টারহিতত্বাত্| রাত্রৌ হি প্রাণিনাং ন কদাচিচ্চেষ্টা ভবতি, অত ঔষসং গুরু| দিবা চ ধাবনপ্লবনাদিকযা চেষ্টযা প্রাদোষং লঘু| অনযা চ দিশা সর্বমপি চিন্ত্যম্| অত এব সঙ্গ্রহে যদুক্তম্ (সূ. অ. ৬)- "পিণ্যাকাম্লাশিনীনাং তু গুর্বভিষ্যন্দি তদ্ভৃশম্|" ইতি| তদেতেনৈবোক্তপ্রাযত্বান্নেহোক্তম্| শোষেত্যাদি| শোষাদীনাং দ্বন্দ্বঃ| তান্ জযতীতি ক্বিপ্| শোষজিত্| এবং জ্বরজিদিত্যাদি|

Adhikarana auShTrakakShIraguNAH (25) · Śloka 25

ঈষদ্রূক্ষোষ্ণলবণমৌষ্ট্রকং দীপনং লঘু| শস্তং বাতকফানাহকৃমিশোফোদরার্শসাম্||২৫||

স০-ঔষ্ট্রকং-উষ্ট্রীণাং ক্ষীরং, লঘু তথা ঈষত্-মনাগ্রূক্ষোষ্ণলবণং তথা দীপনং ভবতি| তথা, বাতাদীনাং শস্তং-বাতাদিষু পথ্যমিত্যর্থঃ| ঔষ্ট্রকমিতি "উষ্ট্রাদ্বুঞ্" ইতি বুঞ্| প্রাতিপদিকগ্রহণে লিঙ্গবিশিষ্টস্যাপি গ্রহণমিত্যুষ্ট্রীশব্দাদপি|

Adhikarana mAnuShakShIraguNAH (26) · Śloka 26

মানুষং বাতপিত্তাসৃগভিঘাতাক্ষিরোগজিত্| তর্পণাশ্চোতনৈর্নস্যৈঃ|২৬|

স০-মানুষীণাং ক্ষীরং বাতপিত্তাসৃগভিঘাতাক্ষিরোগজিদ্ভবতি বাতশ্চ পিত্তং চাসৃক্ চাভিঘাতশ্চেতি দ্বন্দ্বঃ, তৈরক্ষিরোগঃ, তং জযতি যত্তদেবম্| কেন প্রযোগেণ ? ইত্যাহ-তর্পণাশ্চোতনৈর্নস্যৈঃ| ন ত্বভ্যবহারাদিনা| তর্পণাদীনি-স্বে স্বেঽধ্যাযে বক্ষ্যমাণানি|

Adhikarana AvikakShIraguNAH (26-27) · Śloka 27

| অহৃদ্যং তূষ্ণমাবিকম্||২৬|| বাতব্যাধিহরং হিধ্মাশ্বাসপিত্তকফপ্রদম্| |২৭|

স০-আবিকং ক্ষীরমুষ্ণবীর্যং ভবতি| তথা, অহৃদ্যং-হৃদযাযাহিতং ভবতি| তথা, বাতব্যাধিহরম্| তথা, হিক্কাদিপ্রদম্| আবিকমিত্যবিশব্দাত্ স্বার্থে কপ্রত্যযান্তাত্ "তস্যেদম্" ইত্যণ্|

Adhikarana hastinIkShIraguNAH (27) · Śloka 27

| হস্তিন্যাঃ স্থৈর্যকৃত্|২৭|

স০-হস্তিন্যাঃ ক্ষীরং স্থৈর্যকৃদ্ভবতি|

Adhikarana vaDavAdikShIraguNAH (27-28) · Śloka 28

বাঢমুষ্ণং ত্বৈকশফং লঘু||২৭|| শাখাবাতহরং সাম্ললবণং জডতাকরম্| |২৮|

স০-একঃ শফো-নখো, যাসাং বডবাদীনাং তা একশফাঃ, তাসামিদং-ঐকশফং ক্ষীরং, বাঢং-অতিশযেনোষ্ণং ভবতি| তথা, শাখাসু-বাহূরুপ্রভৃতিষু যো বাতঃ, তং হরতীতি শাখাবাতহরম্| "হরতেরনুদ্যমনেঽচ্" ইত্যচ্| তথা, সম্ললবণং-ঈষদম্লমীষল্লবণং চ| তথা, জডতাকরং-অঙ্গজাড্যকরণহেতুঃ| "কুঞো হেতুঃ" ইত্যাদীনা হেতৌ টঃ|

Adhikarana apakvakShIraguNAH pakvakShIraguNAH (28) · Śloka 28

| পযোঽভিষ্যন্দি গুর্বামং, যুক্ত্যা শৃতমতোঽন্যথা||২৮||

স০-আমং-অক্বথিতং, পযোঽভিষ্যন্দি-শ্লেষ্মপ্রকোপি, তথা গুরু ভবতি| অতঃ-আমাত্, অন্যথা-বিপরীতং, যুক্ত্যা শৃতং ভবতি| অনভিষ্যন্দি লঘু চ| লঘিমা তু পূর্বাবস্থামপেক্ষ্যোচ্যতে| যুক্তিঃ-যোগ উপায:| খরনাদেন ক্ষীরস্য শ্রপণে যুক্তিঃ স্পষ্টং কৃত্বা দর্শিতা-"অর্ধোদকং ক্ষীরশিষ্টমামাল্লঘুতরং শৃতম্|" ইতি|

Adhikarana atipakvakShIraguNAH dhAroShNakShIraguNAH (29) · Śloka 29

ভবেদ্গরীযোঽতিশৃতং, ধারোষ্ণমমৃতোপমম্| |২৯|

স০-অতিশযেন ক্বথিতং কবলভোজ্যমিব সঞ্জাতং, গরীযো-গুরুতরং ভবেত্| খরনাদেনোক্তম্-"স্যান্নির্জলং শৃতং দ্বিত্রিচতুরষ্টাংশশেষিতম্| যথাশৃততমং সারং গুরু বল্যতমং পযঃ||" ইতি| সুশ্রুতে (?) চোক্তম্-"শৃতশীতং তু পিত্তঘ্নং শৃতোষ্ণং কফবাতজিত্| ত্যজেদ্বিবর্ণং গ্রথিতং বিগন্ধং বিরসং পটু|| রক্তপিত্তপ্রশমনী বৃষ্যা সন্তানিকা গুরুঃ|" ইতি| খরনাদেনোক্তম্-"ধারোষ্ণাত্সর্বশঃ ক্ষীরাচ্ছীতং গুরুতরং ভবেত্|" ইতি| ধারোষ্ণমমৃতোপমম্, নির্দোষত্বাত্|

Adhikarana dadhiguNAH,dadhiBojananiyamAH (29-33) · Śloka 33

| অম্লপাকরসং গ্রাহি গুরূষ্ণং দধি বাতজিত্||২৯|| মেদঃশুক্রবলশ্লেষ্মপিত্তরক্তাগ্নিশোফকৃত্| রোচিষ্ণু শস্তমরুচৌ শীতকে বিষমজ্বরে||৩০|| পীনসে মূত্রকৃচ্ছ্রে চ, রূক্ষং তু গ্রহণীগদে| নৈবাদ্যান্নিশি নৈবোষ্ণং বসন্তোষ্ণশরত্সু ন||৩১|| নামুদ্গসূপং নাক্ষৌদ্রং তন্নাঘৃতসিতোপলম্| ন চানামলকং নাপি নিত্যং নো মন্দমন্যথা||৩২|| জ্বরাসৃক্ পিত্তবীসর্পকুষ্ঠপাণ্ডুভ্রমপ্রদম্| |৩৩|

স০-অম্লৌ পাকরসৌ যস্য তদেবংভূতং দধি ভবতি| তথা, গ্রাহি-স্তম্ভনম্| তথা চোক্তম্-"ভেদি তত্পিণ্ডিতান্ ভাবান্ শকৃদাদীন্ ভিনত্তি যত্| বিপরীতমতো গ্রাহি তচ্চ স্তম্ভনমুচ্যতে||" ইতি| তথা, গুরু উষ্ণং বাতজিচ্চ| মেদআদীনাং দ্বন্দ্বঃ, তান্ করোতি যত্তদেবম্| রোচত ইতি রোচিষ্ণু| ন রোচত এব কেবলম্, অরোচকমপি ব্যাবর্তযতীতি শস্তমরুচৌ| রোচনং হি ঘৃতপূরাদি ন ত্বরুচিং জযতি| অরুচিঘ্নং প পটোলপত্রং তন্ন রোচতে| তথা হ্যত্রৈব পঠিষ্যতি (হৃ. সূ. অ. ১০|১৪)- "তিক্তঃ স্বযমরোচিষ্ণুররুচিম্" ইত্যাদি| রোচিষ্ণুত্বাদেব চোচ্চাবচব্যঞ্জনপরিবৃতৈর্মাংসমণ্ডকাদিভিরপি সুহিতস্যাপি দধন্যভিলাষ উত্পদ্যত এব| অত এব চৈতদাহারান্তেঽভ্যবহরন্তি| শীতক ইতি বিষমজ্বরবিশেষণম্| শীতকারিত্বং তু বাতে শ্লেষ্মণি তত্সংসর্গে বা যদ্যপি ত্রিতযে সম্ভবতি, তথাঽপি বাতজিদ্বাতজ এব বিষমজ্বরে দধি প্রযোজ্যম্, সংসর্গে বা বাতোল্বণে| তথা হি শীতজ্বর এবোক্তম্ (হৃ. চি. অ. ১|১৪২)- "অগ্ন্যনগ্নিকৃতান্ স্বেদান্ স্বেদি ভেষজভোজনম্|" ইতি| ননু, পীনসে শস্তমিতি কথমবিশেষেণোক্তম্ ? যতশ্চত্বারঃ পীনসা বাতপিত্তকফসন্নিপাতজা ইতি বক্ষ্যন্তে| তত্র দধ্নো বাতাধিক এব যুক্তত্বং, ন শেষেষু| অত্র সঞ্চক্ষ্মহে| পরিপাকাত্ পীনসস্যোপশান্তিঃ| পরিপাককরং চ দধি, উষ্ণত্বাত্| অথবা পূর্ববত্সামান্যোক্তাবপি যত্র যোগ্যতাঽস্য বাতিকে, তত্রৈব তদুপকল্প্যতাম্| অনুক্তেষ্বপি হি সামান্যোপক্রমো বস্তুবশাদ্বিশেষ্বেব বিপরিণমতি| তথা হ্যত্রৈবোপরিষ্টাদ্দুগ্ধকর্মসু ব্যতীতম্-"শ্রমভ্রমমদালক্ষ্মীশ্বাসকাসাতিতৃট্ক্ষুধঃ| জীর্ণজ্বরং মূত্রকৃচ্ছ্রং রক্তপিত্তং চ নাশযেত্||" ইতি| ন চ সর্বেষ্বেব কাসশ্বাসকৃচ্ছ্রাস্রপিত্তেষু পযঃ কার্মুকমিতি| তথা, গ্রহণীরোগে তু তদ্রূক্ষং শস্তম্| অনেন চ হেতুনা দধ্নঃ প্রকৃতিস্থস্য স্নিগ্ধত্বং যুক্ত্যৈবোক্তম্| যতো গ্রহণ্যাং রূক্ষং-উদ্ধৃতসারমুদ্দিষ্টম্| নিশি নৈব-ন কিঞ্চিদদ্যাত্| নৈবাদ্যান্নিশি নৈবোষ্ণমিত্যেবকারা আত্যন্তিকনিষেধায| রাত্রৌ নিষেধাদ্দিবা ভুঞ্জীতেত্যর্থাদবগম্যতে| নৈবোষ্ণং-অগ্ন্যাদিতাপাত্তপ্তম্| তথা, বসন্তগ্রীষ্মশরত্সু ন ভোজ্যম্| অন্যর্তাবপি মুদ্গসূপাদীনামন্যতমেন রহিতং ন ভোজ্যম্| তত্র ঘৃতসিতোপলযোঃ সমাংশিকতযোরেব যোগেন পথ্যত্বমিচ্ছন্তি| মুদ্গসূপাদীনাং তু মিশ্রীভাবো দধ্না জন্যমানস্য দোষস্য প্রতিবন্ধার্থং কল্প্যতে, রক্তপিত্তবত্| যথাসমীরণোল্বণেঽস্রপিত্তে তিত্তির্যাদীনামৌষ্ণ্যমুদুম্বরাদিরসেন প্রতিবধ্নাতি| নিত্যমিতি| যদ্যুপশেতে শরীরস্য তথাপ্যুদকরোগাবহত্বান্ন শীলনীযম্| অত এব মাত্রাশিতীযেঽপ্যতিদোষলত্বাদস্য নিষেধং করোতি| তথা চ বক্ষ্যতি (হৃ. সূ. অ. ৮|৪০)- "কিলাটদধিকূচীকা" ইত্যাদি| নো মন্দমিতি| দুগ্ধাবস্থাং ব্যতীত্য দধ্যবস্থামসম্প্রাপ্তমন্তরালবর্তি-মন্দকমিত্যুচ্যতে| তস্মিন্ সত্যপি স্নেহে পরিণতিবিশেষেণ কালাত্মনা স্রোতসামত্যন্তোপলেপকৃতো দোষত্রযকোপোঽপি ভবতীত্যতীব বর্জনীযমেব মন্দকনিষেধশ্চোপলক্ষণার্থঃ, তেন মদ্যাদীনপ্যপ্রাপ্তরসান্নোপযুঞ্জীতেত্যবগন্তব্যম্| অন্যথেত্যাদি| প্রশব্দ এবং দ্যোতযতি-বিধিভ্রষ্টং দধি নিষেব্যমাণং প্রকর্ষেণ জ্বরাসৃক্পিত্তাদীন্ দদাতি| ননু, শুক্রকৃত্ত্ববলবর্ধনত্বাদ্দীপনত্বমনুপপন্নম্| শুক্রকৃদ্বলবর্ধনানি হি দ্রব্যাণি প্রাযেণ গুরূণি ভবন্তি| অতো দধ্যেবংগুণং সত্কথং নামাগ্নিকৃত্স্যাত্ ? অত্রাচক্ষ্মহে| অম্লত্বাদুষ্ণবীর্যত্বাচ্চ যুক্তমেব| যতো রসবিপাকাভ্যামম্লং বীর্যেণোষ্ণং চ দধি, অতোঽগ্নিকৃত্ত্বমস্মিন্নুপপন্নমিতি| ননু, শুক্রকরত্বং দধ্নো ন যুক্তম্| যতোঽম্লপাকরসং দধীত্যধীতমাচার্যেণ, অম্লশ্চ শুক্রনাশনঃ, তস্মাচ্ছুক্রকৃত্ত্বমযুক্তম্| অত্রাচক্ষ্মহে| স্নিগ্ধত্ববৃংহণত্ববাতঘ্নত্ববল্যত্বৈঃ শুক্রকৃত্ত্বমুপপন্নমেব| তথা চ বক্ষ্যতি (হৃ. সূ. অ. ৯|২২)- "কিঞ্চিদ্রসেন কুরুতে কর্ম পাকেন চাপরম্| গুণান্তরেণ বীর্যেণ প্রভাবেণৈব কিঞ্চন||" ইতি| ননু, বাতজিদিত্যনেন নার্থঃ| যানি খলু দ্রব্যাণি বল্যস্নিগ্ধগুরূষ্ণযুক্তানি, তানি বাতঘ্নান্যেব দৃষ্টানি| তস্মাদ্বাতজিদিতি ন বাচ্যম্| নৈবম্| সক্তুমদ্যসূর্যতাপমন্দকাদিষু ব্যভিচারাত্| তথা হি-সক্তবো বাতলা বৃষ্যা রূক্ষা বলকরাশ্চ| মার্দ্বীকাদিমদ্যং হর্ষণত্বাদ্বৃষ্যং বাতলং চ| তথা চ বক্ষ্যতি (হৃ. উ. অ. ৪০|৩৫)- "মনসো হর্ষণং যচ্চ তত্সর্বং বৃষ্যমুচ্যতে|" ইতি| মদ্যং চ মাত্রা পীতং হর্ষণং ভবতি| তথা চ মুনিঃ (চ.চি.অ.২৪|৫৯)-"হর্ষমূর্জপ্রদং পুষ্টিমারোগ্যং পৌরুষং পরম্| যুক্ত্যা পীতং করোত্যাশু মদ্যম্" ইতি| সূর্যতাপশ্চোষ্ণোঽপি সন্মারুতস্য বৃদ্ধযে| তথা চ মুনিঃ (চ.চি.অ. ১৪|১৩)-"কষাযকটুতিক্তানি রূক্ষশীতলঘূনি চ|" ইত্যারভ্য যাবত্ "বাতাতপৌ ভযং শোকো হেতুর্বাতার্শসামিতি||" ইতি| মন্দকং চ স্নিগ্ধাম্লগুরুগুণযুক্তমপি ত্রিদোষকরম্| তথা চ মুনিঃ (চ. সূ. অ. ২৭|২২৪)- "ত্রিদোষং মন্দকম্" ইতি| ত্রিষু চ দোষেষ্বন্তর্ভূতঃ পবন ইতি চৈবং ব্যভিচারদর্শনাদ্বাতজিদিত্যুক্তম্| ক্ষীরস্য চ দধ্যাত্মনা পরিণমতোঽনভিব্যক্তাম্লাভিব্যক্তাম্লাত্যম্ললক্ষণাস্তিস্রোঽবস্থাঃ সম্পদ্যন্তে| তত্র মন্দজাতং-অনভিব্যক্তাম্লম্| সম্যগ্জাতং-অভিব্যক্তাম্লম্| অতিজাতং-অত্যম্লম্| তত্র মন্দজাতং ত্রিদোষকৃত্ত্বান্নিষিদ্ধম্| সম্যগ্জাতস্যৈতে পূর্বোক্তা গুণাঃ| কিঞ্চিদ্ধীনাশ্চাত্যম্লস্য| তথা, সুজাতেঽত্যম্লে চ দধ্নি সরমণ্ডৌ স্তঃ| তত্র দধ্ন উপরিভাগঃ সরঃ, অধো মণ্ডঃ| এতদ্গুণাস্তু লাঘবিকত্বান্নেহোক্তাঃ| মুনিনা চ দর্শিতাঃ (চ.সূ.অ. ২৭|২২৪)- "ত্রিদোষং মন্দকং জাতং বাতঘ্নং দধি শুক্রলম্| সরঃ শ্লেষ্মানিলঘ্নস্তু মণ্ডঃ স্রোতোবিশোধনঃ||" ইতি| শ্লেষ্মপিত্তরক্তকৃত্ত্বং চাম্লপাকরসোষ্ণবীর্যত্বাদেবাত্রগম্যতে| যত্তু সাক্ষাদেতেষামুপাদানং তত্ প্রকর্ষার্থম্| অন্যেভ্যোঽম্লদ্রব্যেভ্যো দধ্যেতান্যতিশযেন করোতীতি| নৈবাদ্যান্নিশীত্যাদৌ গ্রন্থে চৈকস্মিন্নেব নকারে কর্তব্যে যদনেকনকারকরণং তচ্ছাস্ত্রনিষিদ্ধদধিভক্ষণাদতিপ্রত্যবাযজ্ঞাপনার্থম্| চরকোক্তশ্চ মঙ্গল্যগুণো নেহোক্তঃ, চিকিত্সাযামনুপযোগিত্বাত্| অত এব সর্পিরাদীনাং মঙ্গল্যানামপি চরকেঽপি মঙ্গলত্বং নাবাদীদিতি| সুশ্রুতে তু (সূ.অ. ৪৫|৬৮) দধ্নো বিশেষগুণা উক্তাঃ| যথা-"দধ্যাজং কফপিত্তঘ্নং লঘু বাতক্ষযাপহম্| দুর্নামশ্বাসকাসেষু হিতমগ্নেশ্চ দীপনম্|| বিপাকে মধুরং বৃষ্যং রক্তপিত্তপ্রণাশনম্| বলাসবর্ধনং স্নিগ্ধং বিশেষাদ্দধি মাহিষম্|| বিপাকে কটু সক্ষারমম্লং ভেদ্যৌষ্ট্রকং দধি| বাতমর্শাংসি কুষ্ঠানি কৃমীন্ হন্ত্যুদরাণি চ|| বাতঘ্নং কফকৃত্স্নিগ্ধং বিশেষান্ন চ পিত্তকৃত্| কুর্যাদ্ভক্তাভিলাষং চ দধি যত্ সুপরিস্রুতম্|| শৃতক্ষীরাচ্চ যজ্জাতং গুণবদ্দধি তত্স্মৃতম্| বাতপিত্তহরং রুচ্যং ধাত্বগ্নিবলবর্ধনম্|| দধি ত্বসারং রূক্ষং চ গ্রাহি বিষ্টম্ভিবাতলম্| দীপনীযং বিশেষেণ সকষাযং রুচিপ্রদম্||" ইতি| কেবলমপি স্বল্পং কদাচিদ্দধি ভুঞ্জীতেত্যর্থাদবগম্যতে| অন্যথা কেবলস্য গুণকথনং নিষ্ফলমেব স্যাদিতি কেচিদাহুঃ|

Adhikarana takraguNAH (33-34) · Śloka 34

| তক্রং লঘু কষাযাম্লং দীপনং কফবাতজিত্||৩৩|| শোফোদরার্শোগ্রহণীদোষমূত্রগ্রহারুচীঃ| প্লীহগুল্মঘৃতব্যাপদ্গরপাণ্ড্বামযান্ জযেত্||৩৪||

স০-তক্রং লঘু কষাযাম্লং দীপনং কফবাতজিচ্চ ভবতি| তথা, শোফাদীনেকাদশ জযেত্| ঘৃতস্যাতিপানাত্ ব্যাপত্-রোগো ঘৃতব্যাপত্| গরঃ-কৃত্রিমো বিষবিশেষঃ| সুশ্রুতে চোক্তম্ (সূ.অ.৪৫|৮৬)- "নৈব তক্রং ক্ষতে দদ্যান্নোষ্ণকালে ন দুর্বলে| ন মূর্চ্ছাভ্রমদাহেষু ন রোগে রক্তপৈত্তিকে|| শীতকালেঽগ্নিমান্দ্যে চ কফোত্থেষ্বামযেষু চ| মার্গাবরোধে দুষ্টে চ বাযৌ তক্রং প্রশস্যতে||" ইতি| তথোক্তম্ (সঙ্গ্রহে সূ. অ. ৭)- "তক্রমামং কফং কোষ্ঠে হন্তি কণ্ঠে করোতি তু| পীনসশ্বাসকাসাদৌ সিদ্ধমেবোপযোজযেত্||" ইতি| "মন্দজাতং মরুত্কোপি রূক্ষাভিষ্যন্দি দুর্জরম্| অতিজাতং ভৃশাম্লৌষ্ণ্যতৈক্ষ্ণ্যাত্পিত্তকরং পরম্|| দোষঘ্নমুদ্ধৃতস্নেহং সস্নেহমপি শোফজিত্| (সু. সূ. অ. ৪৫|৮৯)- 'বাতেঽম্লং সৈন্ধবোপেতং, স্বাদু পিত্তে সশর্করম্|| হিতং তক্রং কফে সাম্লং ব্যোষসৌবর্চলান্বিতম্| তক্রাল্লঘুতরো মণ্ডো দুর্জরা তক্রকূর্চিকা'||" ইতি|

Adhikarana mastuguNAH (35) · Śloka 35

তদ্বন্মস্তু সরং স্রোতঃশোধি বিষ্ঠম্ভজিল্লঘু| |৩৫|

স০-মস্তু তদ্বত্-তক্রবদ্গুণৈর্বেদ্যম্| তথা, সরম্| তথা, স্রোতঃশোধিঃ| তথা, বিষ্টম্ভজিত্| সুশ্রুতে চোক্তম্ (সূ.অ.৪৫|৮১)- "তৃষ্ণাক্লমহরং মস্তু লঘু স্রোতোবিশোধনম্| অম্লং কষাযানুরসমবৃষ্যং কফবাতজিত্|| আহ্লাদনং প্রীণনং চ ভিনত্ত্যাশু মলং চ তত্| বলমাবহতি ক্ষিপ্রং তথা ভক্তস্য রোচকম্||" ইতি|

Adhikarana navanItaguNAH (35-36) · Śloka 36

| নবনীতং নবং বৃষ্যং শীতং বর্ণবলাগ্নিকৃত্||৩৫|| সঙ্গ্রাহি বাতপিত্তাসৃক্ক্ষযার্শোর্দিতকাসজিত্| |৩৬|

স০-নবনীতং নবং-নবোদ্ধৃতং, লঘু বৃষ্যং চ| তথা, শীতং-শীতবীর্যং, বলবর্ণাগ্নিকরং চ| তথা, সঙ্গ্রাহি বাতাদিজিচ্চ| সঙ্গ্রহে চোক্তম্ (সূ.অ.৬)-"শীতং স্বাদু কষাযাম্লং নবনীতং নবোদ্ধৃতম্|" ইত্যাদি|

Adhikarana kShIrodBavanavanItaguNAH (36) · Śloka 36

| ক্ষীরোদ্ভবং তু সঙ্গ্রাহি রক্তপিত্তাক্ষিরোগজিত্||৩৬||

স০-ক্ষীরোদ্ভবং তু-ক্ষীরাদেব জাতং মথিত্বোত্পাদিতং, নবনীতং সঙ্গ্রাহি রক্তপিত্তাক্ষিরোগজিচ্চ ভবতি|

Adhikarana ghRutaguNAH (37-39) · Śloka 39

শস্তং ধীস্মৃতিমেধাগ্নিবলাযুঃশুক্রচক্ষুষাম্| বালবৃদ্ধপ্রজাকান্তিসৌকুমার্যস্বরার্থিনাম্||৩৭|| ক্ষতক্ষীণপরীসর্পশস্ত্রাগ্নিগ্লপিতাত্মনাম্| বাতপিত্তবিষোন্মাদশোষালক্ষ্মীজ্বরাপহম্||৩৮|| স্নেহানামুত্তমং শীতং বযসঃ স্থাপনং পরম্| সহস্রবীর্যং বিধিভির্ঘৃতং কর্মসহস্রকৃত্||৩৯||

স০-ঘৃতং ধীপ্রভৃতীনামগ্নিগ্লপিতাত্মান্তানাং শস্তং-হিতম্| ধীঃ-বুদ্ধিঃ, বস্তুগ্রহণশক্তিঃ| স্মৃতিঃ-অতীতবিচারশক্তিঃ| প্রজার্থিনাং শস্তম্| প্রজা-অপত্যম্, তদর্থিনাম্| শুক্রস্য সফলতাকরমিত্যর্থঃ| তথা, বাতাদিঘ্নম্| তথা, স্নেহানাং-তৈলাদীনাং, উত্তমং-শ্রেষ্ঠম্| তথা, শীতম্| বযসঃ স্থাপনং-জরযা বিনা বযসঃ স্থাপনমিত্যর্থঃ| সহস্রবীর্যমিতি| সহস্র-শব্দোঽনেকার্থঃ, অনেকশক্তীত্যর্থঃ| কথম্ ? বিধিভিঃ,-যোগসংস্কারাদিভির্ঘৃতমনেকশক্তিঃ সম্পদ্যতে| যেন দ্রব্যেণ প্রযুজ্যতে সংস্ক্রিযতে বা, তচ্ছক্তিমেবাঽনুরুধ্যতে| অথবা তত্সংযোগাচ্ছক্ত্যন্তরমন্যদারোহতি| অতো হেতোঃ সহস্রশব্দোঽনেকার্থঃ| অন্যথা দ্রব্যাণামানন্ত্যাত্কথং দশশতবাচী সহস্রশব্দ উপপদ্যতে| অন্যে ত্বেবং ব্যাচক্ষতে -সহস্রশব্দো দশশতসংখ্যাবাচ্যেব| সহস্রপাক্যং হি সর্পিরুক্তম্, ন সহস্রপাক্যাত্পরেণ| তত্র চেদং সহস্রপাক্যত্বে প্রযোজনম্-পাকসহস্রং যাবদস্য সংস্কারোঽনুবর্ততে, নাতঃপরম্| অন্যথা সহস্রপাকাত্পরেণ কিমিতি পাকো নোক্তঃ ? তস্মাদাসহস্রং পাকানাং শক্ত্যন্তরাণ্যারোহন্তি পাকাঃ, ন ততঃ পরেণেতি| তথা, কর্মসহস্রকৃত্-অনেককার্যকৃত্|

Adhikarana purANaghRutaguNAH (40) · Śloka 40

মদাপস্মারমূর্ছাযশিরঃকর্ণাক্ষিযোনিজান্| পুরাণং জযতি ব্যাধীন্ ব্রণশোধনরোপণম্||৪০||

স০-পুরাণং-অতীতবহু কালং, পঞ্চদশাদিবর্ষস্থিতং, ঘৃতং মদাদীন্ ব্যাধীন্ জযতি| ব্রণানাং পৈচ্ছিল্যাদীন্ শোধযতি| তথা, ব্রণান্ রোপযতি| সঙ্গ্রহে চৈবমধ্যৈষ্ট (সূ. অ. ৬)- "ব্রণশোধনরোপণম্| পূর্বোক্তাংশ্চাধিকান্কুর্যাদ্গুণাংস্তদমৃতোপমম্|| তদ্বচ্চ ঘৃতমণ্ডোঽপি রূক্ষস্তীক্ষ্ণস্তনুস্তু সঃ|" ইতি|

Adhikarana kilATAdiguNAH (41) · Śloka 41

বল্যাঃ কিলাটপীযূষকূর্চিকামোরণাদযঃ| শুক্রনিদ্রাকফকরা বিষ্টম্ভিগুরুদোষলাঃ||৪১||

স০-কিলাটাদযো বল্যাঃ| তথা, শুক্রাদিকরাঃ| তথা, বিষ্টম্ভিনো গুরবো দোষলাশ্চ স্যুঃ| আদিগ্রহণাত্তক্রপিণ্ডকক্ষীরশাকযোর্গ্রহণম্| বহ্নিনাশকত্বং চৈষাং বল্যত্বেন শুক্রকৃত্ত্বেন বিষ্টম্ভিদোষলত্বেনাবগতমেবেতি 'বহ্নিসাদনাঃ' ইতি গ্রন্থকৃতা নেহকৃতম্| সঙ্গ্রহে তু স্পষ্টার্থং কৃতমেব| তত্র, কিলাটঃ-অল্পক্ষীরো বহুনা তক্রেণ কৃতঃ| পীযূষঃ-সদ্যঃপ্রসূতাক্ষীরকৃতঃ| কূর্চিকা-দধিতক্রকৃতা কিলাটিকা| মোরণঃ-ক্ষীরসদৃশঃ কিলাটিকঃ| পিণ্ডনং-উত্তরাপথে প্রসিদ্ধম্| ক্ষীরশাকঃ-প্রসিদ্ধঃ|

Adhikarana kShIraghRutayoHshreShThatvaninditatve (42-2) · Śloka 2

গব্যে ক্ষীরঘৃতে শ্রেষ্ঠে নিন্দিতে চাবিসম্ভবে| |৪২| ইতি ক্ষীরবর্গঃ||২||

স০-গোসম্ভবে ক্ষীরঘৃতে শ্রেষ্ঠে| আবিকে চ নিন্দিতে-গর্হিতে| ঘৃতস্য চ ক্ষীরবিকারোপলক্ষণার্থত্বাদ্দধিতক্রমস্ত্বাদীনামপি গব্যানাং শ্রেষ্ঠত্বমেব বেদ্যম্| অত এবাবিসম্ভবানাং দধিতক্রাদীনামধমত্বমেব বেদ্যম্, ন ক্ষীরঘৃতযোরেব| অত এব সঙ্গ্রহে সুস্পষ্টং কৃত্বোক্তম্ (সূ. অ. ৬)- "বিদ্যাদ্দধিঘৃতাদীনাং গুণদোষান্ যথাপযঃ|" ইতি| অস্য হ্যযমর্থঃ-ঘৃতাদীনাং পযোগুণানতিক্রমেণ গুণান্ বিদ্যাত্| যথাশব্দস্য পদার্থানতিবৃত্ত্যর্থেঽস্যাব্যযীভাবঃ| তেনৈতদুক্তং ভবতি| যথা-"স্বাদুপাকরসম্" ইত্যাদীনা সামান্যেন ক্ষীরগুণা উক্তাঃ| তদ্বদ্দধ্যাদীনামপি সামান্যেনৈব গুণা উক্তাঃ| বিশেষাভিলাষে তু দধ্যাদীনাং সত্স্বপি সামান্যগুণেষু প্রকৃতিভূতং যত্ক্ষীরং তদ্গুণোচ্চযোঽপি গ্রাহ্য ইতি| খরনাদে তূক্তম্-"দধ্যাদীনাং তু তজ্জানাং সামান্যে গুণকর্মণী| তথা স্বাত্ স্বাদপি ক্ষীরাদ্দধ্যাদীনাং বিশেষণম্||" ইতি| গব্যমিতি "গোপযসোর্যত্" ইতি যত্| বাহুল্যেন ক্ষীরনির্দেশাত্ক্ষীরবর্গোঽযম্| দধিনবনীতাদীনাং তু তদ্বিকারভূতত্বাত্| ইতি ক্ষীরবর্গঃ|

Adhikarana ikShuvargaH ikShurasaguNAH (42-43) · Śloka 43

ক্ষীরবর্গাদনন্তরমিক্ষুবর্গ আরম্ভ্যতে, গুণক্রিযাতুল্যত্বাত্| তথা, হি-ইক্ষুরপি ক্ষীরবত্সরগুরুস্নিগ্ধবৃংহণাদিগুণকর্মা অথেক্ষুবর্গঃ| | ইক্ষোঃ সরো গুরুঃ স্নিগ্ধো বৃংহণঃ কফমূত্রকৃত্||৪২|| বৃষ্যঃ শীতোঽস্রপিত্তঘ্নঃ স্বাদুপাকরসো রসঃ| সোঽগ্রে সলবণো, দন্তপীডিতঃ শর্করাসমঃ||৪৩||

স০-ইক্ষো রসঃ সরত্বাদিগুণযুক্তঃ| তথা, কফমূত্রকৃত্| সরঃ-শকৃদ্ভেদীতি কথ্যতে| তথা, (হৃ. সূ. অ. ৬|৮৪)- "গুর্বী সরা তু পালক্যা" ইত্যুক্ত্বানন্তরমুক্তবান্-"পালক্যাবত্স্মৃতশ্চঞ্চুঃ স তু সঙ্গ্রহণাত্মকঃ|" ইতি চঞ্চুশাকস্য সঙ্গ্রহণেন গুণেন সরত্বং বাধিতমিতি| অত্র স্নিগ্ধবৃংহণবৃষ্যমধুরাদিগুণেন যুক্তং চ দ্রব্যং প্রাযঃ পবনহন্তৃ দৃষ্টম্| অতোঽস্যাপীক্ষুরসস্য মারুতজিত্ত্বং বেদ্যম্| গ্রন্থকৃতা তু স্পষ্টং কৃত্বা নোক্তম্| ভুক্তে হি সমীরণকৃত্ত্বমস্য দৃষ্টম্| তথা চ সঙ্গ্রহে (সূ.অ.৬)-"বৃষ্যঃ শীতঃ পবনজিদ্ভুক্তে বাতপ্রকোপনঃ|" ইতি| খরনাদেঽপ্যুক্তম্-"মারুতাঽঽধ্মানজননশ্চক্ষুষ্যো বৃংহণো রসঃ|" ইতি| স০-স চ-রসঃ, অগ্রে-ইক্ষুপ্রান্তে জাতঃ, সলবণঃ-ঈষল্লবণঃ| সুশ্রুতে চোক্তম্ (সূ.অ.৪৫|১৫৬)-"অতীব মধুরো মূলে, মধ্যে মধুর এব চ| অগ্রে ত্বক্ষিষু বিজ্ঞেয ইক্ষূণাং লবণো রসঃ||" ইতি| পাষাণাদিসঙ্ক্ষুণ্ণস্যেক্ষোঃ সদ্য এব যো রস উত্পদ্যতে, তস্যৈতে যথোক্তা গুণা বেদ্যাঃ, নান্যথা পীডিতস্যেক্ষুরসস্য| যন্ত্রদন্তাদিপীডিতস্যান্যথা শাস্ত্রকৃতা গুণো নির্দিশ্যতে| দন্তপীডিতো যঃ, স শর্করাসম ইতি|

Adhikarana yAntrikekShurasaguNAH (44-45) · Śloka 45

যান্ত্রিকস্ত্বন্যগুণ এবেত্যাহ মূলাগ্রজন্তুজগ্ধাদিপীডনান্মলসঙ্করাত্| কিঞ্চিত্কালং বিধৃত্যা চ বিকৃতিং যাতি যান্ত্রিকঃ||৪৪|| বিদাহী গুরুবিষ্টম্ভী তেনাসৌ| |৪৫|

স০-মূলং চাগ্রং চ জন্তুজগ্ধাদযশ্চ মূলাগ্রজন্তুজগ্ধাদযঃ, তেষাং তথাবিধানামিক্ষূণাং পীডনং, তস্মান্মূলাগ্রজন্তুজগ্ধাদিপীডনাত্| তথা, মলসঙ্করাত্-মলমিশ্রণাত্| তথা, কিঞ্চিত্কালং বিধৃত্যা চ-যান্ত্রিকে রসে স্বল্পকালং বিধৃতিঃ-বিলম্বশ্চ দৃষ্টঃ| তদেতৈঃ কারণৈর্যান্ত্রিকো রসো বিকৃতিং যাতি-স্বভাবান্যথাত্বং প্রাপ্নোতি| তথা-গুরুরধিকং গুরুঃ সম্পদ্যতে, অবিদাহি বিদাহি, অবিষ্টম্ভী বিষ্টম্ভী, ইত্যেবংবিধাঽস্য বিকৃতিঃ| যান্ত্রিকস্য চ রসস্য বাহুল্যেন লোকে মূলাদিসহিতস্য পীডনাত্কালবিলম্বোপলব্ধেশ্চ গ্রন্থকৃদেবং সমবোচত্| অত এব হেতুনির্দেশোঽত্র কৃতঃ, হেত্বভাবাত্কার্যাভাবপ্রতিপাদনায| তেন যদাঽতিনিপুণধীভির্মূলাদিরহিতঃ পীড্যতে, কালবিলম্বিতং চ নোপযুজ্যতে, তদা বিকৃতিং ন যাত্যেবের্থঃ|বিদাহীত্যাদি| যতো বিকৃতিং যাতি, তেন-হেতুনা, অসৌ যান্ত্রিকো, বিদাহ্যাদিগুণঃ সম্পদ্যতে| বিদাহী-জঠরাগ্নিসংযোগাদ্যঃ পাকং গচ্ছন্মধ্যমাযামেবাবস্থাযাং বিদহ্যমানঃ পিত্তং কুর্বংশ্চিরকালমবতিষ্ঠতে, ন দ্রাগেব জরাং যাতি গুরুত্বাদথবা বস্তুস্বভাবাত্, স বিদাহগুণযুক্তো ভাবো ভণ্যতে| তস্মাত্ গুরুস্বাভাব্যাদ্বিদাহী কথিতঃ| তথা চোক্তং ধান্বন্তরে-"শালিপিষ্টমযং সর্বং গুরুভাবাদ্বিদহ্যতে|" ইতি|

Adhikarana pauNDrikekShuguNAH vAMshikekShuguNAH (45) · Śloka 45

তত্র পৌণ্ড্রকঃ| শৈত্যপ্রসাদমাধুর্যৈর্বরস্তমনু বাংশিকঃ||৪৫||

স০-তত্র-তেষু ইক্ষুরসেষু মধ্যে, পৌণ্ড্রকো রসো বরঃ-সর্বেক্ষুরসেভ্যঃ শ্রেষ্ঠঃ| কথম্ ? শৈত্যাদিভির্হেতুভূতৈঃ| শীতস্য ভাবঃ-শৈত্যম্| "গুণবচন" ইত্যাদিনা ষ্যঞ্| প্রসাদঃ-প্রসন্নত্বম্| মাধুর্যং-স্বাদুতা| তমনু বাংশিকঃ-হীনার্থেঽনুশব্দস্য "কর্মপ্রবচনীযযুক্ত" ইতি দ্বিতীযা, শৈত্যাদিভিঃ পৌণ্ড্রকাদ্ধীনো বাংশিক ইত্যর্থঃ|

Adhikarana shataparvakAdInAM guNAH (46) · Śloka 46

শতপর্বককান্তারনৈপালাদ্যাস্ততঃ ক্রমাত্| সক্ষারাঃ সকষাযাশ্চ সোষ্ণাঃ কিঞ্চিদ্বিদাহিনঃ||৪৬||

স০-শতপর্বকাদযঃ, ততঃ-বাংশিকাত্, ক্রমাত্-উত্তরোত্তরং, শৈত্যাদিভির্হীনাঃ| তে চ শতপর্বকাদয ঈষত্ক্ষারত্বেন যুক্তা ঈষত্কষাযরসা ঈষদুষ্ণাঃ কিঞ্চিদ্বিদাহিনশ্চ|

Adhikarana phANitaguNAH (47) · Śloka 47

ফাণিতং গুর্বভিষ্যন্দি চযকৃন্মূত্রশোধনম্| |৪৭|

স০-ফাণিতং-ক্ষুদ্রগুডীভূত ইক্ষুরসঃ, গুরু-অতিশযেনেত্যর্থাদ্বেদ্যম্, গুরুত্বমাত্রস্যেক্ষুরসেঽপ্যুক্তত্বাত্| অভিষ্যন্দি| তথা, চযকৃত্-ত্রিদোষকরম্| মূত্রশোধনং-মূত্রমতিবাহযতি| তন্ত্রান্তরে চোক্তম্-"রূক্ষং মধূকপুষ্পোত্থং ফাণিতং বাতপিত্তকৃত্| কফঘ্নং মধুরং পাকে কষাযং বস্তিদূষণম্||" ইতি|

Adhikarana dhautaguDaguNAH adhautaguDaguNAH (47-48) · Śloka 48

নাতিশ্লেষ্মকরো ধৌতঃ সৃষ্টমূত্রশকৃদ্গুডঃ||৪৭|| প্রভূতকৃমিমজ্জাসৃড্মেদোমাংসকফোঽপরঃ| |৪৮|

স০-গুডো ধৌতঃ-সংস্কারবশান্নির্মলো, নাতিশ্লেষ্মকরঃ-কিঞ্চিত্কফকর ইত্যর্থঃ| মূত্রং চ শকৃচ্চ মূত্রশকৃত্, সৃষ্টং-বহিঃ ক্ষিপ্তং, মূত্রশকৃদ্যেন স এবম্| প্রভূত ইতি| অপর ইতি ধৌতাত্-বিশুদ্ধাদন্যঃ, সমল ইতি যাবত্| প্রভূতাঃ কৃমিমজ্জাসৃড্মেদোমাংসকফা যস্য স এবম্| কারণে কার্যোপচারাদ্গুডোঽপ্যেবমুক্তঃ| যথা-আনূপোদকং পাদরোগ ইতি| প্রভূতকৃম্যাদীন্ করোতীত্যর্থঃ|

Adhikarana purANaguDaguNAH navaguDaguNAH (48) · Śloka 48

| হৃদ্যঃ পুরাণঃ পথ্যশ্চ, নবঃ শ্লেষ্মাগ্নিসাদকৃত্||৪৮||

স০-গুড ইত্যনুবর্ততে| পুরাণো গুডো হৃদযায হিতঃ| তথা, পথ্যঃ-অন্তর্মধ্যবহির্মার্গায হিতঃ| নবো গুডঃ শ্লেষ্মাণমগ্নিসাদং চ করোতি|

Adhikarana matsyaNDikAdiguNAH (49) · Śloka 49

বৃষ্যাঃ ক্ষীণক্ষতহিতা রক্তপিত্তানিলাপহাঃ| মত্স্যণ্ডিকাখণ্ডসিতাঃ ক্রমেণ গুণবত্তমাঃ||৪৯||

স০-মত্স্যণ্ডিকাদযস্ত্রযো বৃষ্যাঃ| তথা, ক্ষীণক্ষতহিতা রক্তপিত্তানিলাপহাশ্চ| তথা, ক্রমেণ গুণবত্তমাঃ-ধৌতগুডাদপি মত্স্যণ্ডিকা গুণকারী নির্মলতরত্বাত্, ততোঽপি খণ্ডো গুণবত্তরঃ, খণ্ডাদপি শর্করা গুণবত্তমা নির্মলতমত্বাত্, গুণবত্তমেতি গুণবতীশব্দস্য তমপ্প্রত্যযে পুংবদ্ভাবোঽত্র পক্ষে চ বক্তব্য ইতি পুংবদ্ভাবঃ|

Adhikarana yavAsasharkarAguNAH (50) · Śloka 50

তদ্গুণা তিক্তমধুরা কষাযা যাসশর্করা| |৫০|

স০-তদ্গুণেতি শর্করাসমা| যাসশর্করা-যবাসশর্করেতি যা লোকে প্রসিদ্ধা, তিক্তমধুরকষাযরসা চ| কেচিত্ত্বাচক্ষতে-দুরালভারসেন সা ক্রিযত ইতি|

Adhikarana sarvasharkarAguNAH (50) · Śloka 50

| দাহতৃট্চ্ছর্দিমূর্চ্ছাসৃক্পিত্তঘ্ন্যঃ সর্বশর্করাঃ||৫০||

স০-সর্বশর্করা ইত্যেতাশ্চান্যাশ্চ দাহাদিনাশনাঃ| গ্রন্থান্তরে চোক্তম্ (সুশ্রুতে সূ.অ. ৪৫|১৬৩)- "যথা যথাঽঽসাং বৈমল্যং মধুরত্বং তথা তথা| স্নেহলাঘবশৈত্যাদি সারত্বং চ তথা তথা||" ইতি|

Adhikarana sharkarAPANitayorvarAvaratve (51) · Śloka 51

অধুনা বরাবরত্বং নির্ধারযতি শর্করেক্ষুবিকারাণাং ফাণিতং চ বরাবরে| |৫১|

স০-ইক্ষুবিকারাণাং মধ্যে শর্করা ফাণিতং চ ক্রমেণ বরাবরে ভবতঃ| শর্করা শ্রেষ্ঠা, ফাণিতমশ্রেষ্ঠম্|

Adhikarana madhuguNAH madhusharkarAguNAH (51-53) · Śloka 53

শর্করাযোনিপ্রসঙ্গেন মধুনোঽপি গুণানাহ | চক্ষুষ্যং ছেদি তৃট্শ্লেষ্মবিষহিধ্মাস্রপিত্তনুত্||৫১|| মেহকুষ্ঠকৃমিচ্ছর্দিশ্বাসকাসাতিসারজিত্| ব্রণশোধনসন্ধানরোপণং বাতলং মধু||৫২|| রূক্ষং কষাযমধুরং, তত্তুল্যা মধুশর্করা| |৫৩|

স০-মধু চক্ষুষে হিতম্| তথা, ছেদি-উভযথাঽঽশ্চোতনব্রণলেপাদাবুপযুক্তম্, তথাঽভ্যবহারবিষযেঽপি| তৈক্ষ্ণ্যাদ্যো দেহে পিণ্ডিতান্ ভাবান্ ছিনত্তি-বিভজতি, স ছেদীতি কথ্যতে| তথা, তৃডাদিনুত্ মেহাদিজিদিতি চ প্রাযেণাভ্যবহারবিষয এব| ব্রণানাং শোধনং সন্ধানং রোপণং চ| শোধনং-যত্ পূযপৈচ্ছিল্যাদিপ্রেরকম্| সন্ধানং-যদ্ দ্বৌ ব্রণৌ চৈকীকরোতি| রোপণং-সুপ্রসিদ্ধম্| এতচ্চ কার্যং বাহ্যবিষযমেবাস্য বেদ্যম্| তথা, বাতলমেতচ্চাস্য বাহ্যোপযোগেনাভ্যন্তরোপযোগেন চ, অন্তে ব্যস্তশ্রুতত্বাত্| "চক্ষুষ্যং ছেদি" ইত্যাদিনাঽস্য মধুনঃ কর্মনির্দেশঃ| "রূক্ষং কষাযমধুরং" ইত্যনেনাস্য স্বরূপনির্দেশঃ| লাঘবাচ্চাত্র গ্রন্থকারেণৈতদ্ভেদাদি নোক্তম্| তথা হ্যযমেব তন্ত্রকারঃ সঙ্গ্রহে (সূ.অ.৬) মধুনো ভেদানাখ্যত্| যথা-"ভ্রামরং পৌত্তিকং ক্ষৌদ্রং মাক্ষিকং চ যথোত্তরম্| [তত্র স্যাদ্ভ্রামরং শুক্লং ঘৃতবর্ণং তু পৌত্তিকম্|| ক্ষৌদ্রং তু কপিলং প্রোক্তং তৈলাভং মাক্ষিকং স্মৃতম্| ভ্রামরং তর্পণং স্বাদু, ত্রিদোষং পৌত্তিকং বিদুঃ|| বরং চ গুর্বভিষ্যন্দি ক্ষৌদ্রং রূক্ষং মনাগ্গুরু| মাক্ষিকং লঘ্বপবনং মধুরং শস্যতে ব্রণে|| গরীযঃ স্বাদ্বভিষ্যন্দি নবং, জীর্ণমতোঽন্যথা| মণ্ডঃ পুরাণো মধুরস্তীক্ষ্ণো রূক্ষো লঘুস্তনুঃ||"] ইতি| তথা সঙ্গ্রহে কটুপাকিত্বগুরুত্বশৈত্যবিষান্বযত্ববিরুদ্ধোপক্রমত্বযোগবাহিত্বাদীন্ গুণানবোচত্| যোগবাহিত্বে চ বিবদন্তে বহুবিদঃ| তত্র কেচিদেবং সমগিরন্ত,-যধ্রব্যং দ্রব্যান্তরেণ সংযুজ্যাত্মীযং স্বভাবং হিত্বা সংযুক্তদ্রব্যস্বভাবমেবানুবর্ততে, তদ্যোগবাহীতি| ন চৈতদ্যুক্তম্| যতো যদ্যেবং যোগবাহিতা নিশ্চীযতে তদানীং যোগবাহিদ্রব্যোপযোগো নিরর্থকঃ স্যাত্| তথা হি-যোগবাহিদ্রব্যমন্তরেণাপি যত্স্বভাবং দ্রব্যং প্রাগাসীত্ তত্স্বভাবমেব যোগবাহিদ্রব্যযুক্তমপি| তস্মাদসদেতদ্যোগবাবাহিলক্ষণমিতি| কেচিত্ত্বেবং প্রতিজানতে,-যধ্রব্যং দ্রব্যান্তরেণ যুক্তং সত্ তস্য দ্রব্যস্য শক্ত্যুত্কর্ষমুত্পাদযতি, তদ্যোগবাহীতি| তদপ্যসম্যক্| যস্মাদেবমভ্যুপগম্যমানে বহূনি দ্রব্যাণি যোগবাহীনি স্যুঃ| তথা চ মধ্বাদেরপি দ্রব্যস্য কিঞ্চিধ্রব্যং সমানগুণং শক্ত্যুত্কর্ষং কুর্বদেব দৃষ্টম্| তত্কথং মধ্বাদেরেব যোগবাহিত্বমুচ্যতে নাপরস্যেতি| তদেতদপি লক্ষণমসচ্ছ্রুতত্বাদলক্ষণম্| অপরে ত্বেবমাহুঃ,-যধ্রব্যং দ্রব্যান্তরেণাননুগুণেনাপি যুক্তং সত্তদ্গুণাননুবর্ততে স্বং চ কার্যং তদবিরুদ্ধং কিঞ্চিত্করোতি, তদ্যোগবাহি দ্রব্যং ভৃত্যবত্| যথা ভৃত্যঃ স্বামিকার্যমত্যজন্ স্বকার্যমপি শরীরযাত্রাদিকং স্বাম্যবিরুদ্ধং করোতি, তথৈব মধু মদনফলসংযুক্তং বমনকার্যং করোতি, ন তু বমননিবারণং মধুকার্যম্| এবং মধু হরীতকীসংযোগাদ্বিরেচনকার্যমেব করোতি, ন মধুকার্যং স্তম্ভনরূপমিতি| যে ত্বত্রৈবং প্রতিপন্নাঃ,-মদনফলাদেঃ শক্ত্যুক্তর্ষস্তথাবিধোঽস্তি যেন মধুসম্বন্ধিকার্যমবধূয, স্বং কার্যং করোতীতি, তে চৈবং চোদযন্তো ভবন্তীতি বচনীযাঃ| যতঃ স্তম্ভনদ্রব্যেণান্যেন যেন কেনচিত্সংযুক্তস্য সুধাক্ষীরস্যাপি শক্তিঃ কিঞ্চিদপহীযমানা দৃষ্টা, মধুনা তু স্তম্ভনস্বভাবেনাপ্যস্য নাপহীযতে মনাগপি| অতো মধ্বাদেরেব যোগবাহিত্বং নান্যস্য| অপি চান্যদা যোগবাহি দ্রব্যং ত্রিবৃতাদিমদনফলেন যুক্তং সদ্বিরেচনং বমনং চোভযকার্যং কুর্বদ্দৃষ্টম্, ন কেবলং বমনমেব বিরেচনমেব বা| তস্মান্মধ্বাদেরেব যোগবাহিত্বমিতি স্থিতমেতত্| তত্তুল্যেতি মধুসমা গুণৈর্মধুশর্করা|

Adhikarana uShNamadhuguNAH (53) · Śloka 53

| উষ্ণমুষ্ণার্তুমুষ্ণে চ যুক্তং চোষ্ণৈর্নিহন্তি তত্||৫৩||

স০-তত্-মধু, উষ্ণমুপযুক্তং সন্নিহন্তি-মারযতি| তথা, উষ্ণার্তং-প্রতপ্তং পুরুষং নিহন্তি| উষ্ণে চ কালে দেশে চোপযুক্তং তথা, উষ্ণৈরাহারাদিভিশ্চ যুক্তং সন্নিহন্তি|

Adhikarana uShNamadhuna upayogaH (54-3) · Śloka 3

প্রচ্ছর্দনে নিরূহে চ মধূষ্ণং ন নিবার্যতে| অলব্ধপাকমাশ্বেব তযোর্যস্মান্নিবর্ততে||৫৪|| ইতীক্ষুবর্গঃ||৩||

স০-তচ্চ মধু প্রচ্ছর্দনে-বমনে, তথা নিরূহে চ উষ্ণং ন নিবার্যতে-ন নিষিধ্যতে| যস্মাত্কারণাত্, তযোঃ-বমিনিরূহযোঃ, অলব্ধপাকং-অপক্বমেবাশু নিবর্ততে-পুনরাগচ্ছতি| ইতীক্ষুবর্গঃ|

Adhikarana tailavargaH tailaguNAH tailasya bRuMhaNAdikaratvam (55-56) · Śloka 56

সর্পিষোঽনন্তরং স্নেহসামান্যাত্তৈলবর্গে বক্তব্যে গুডস্য সমানরসবীর্যবিপাককর্মত্বাত্ প্রাযেণ চাহারদ্রব্যেষু ভক্ষ্যভোজ্যেষ্বস্যৈব তৈলেভ্যঃ সুতরাং ভোজনোপযোগিত্বাদীক্ষুবর্গোঽন্তরা নির্দিষ্টঃ| ভূরিভোজনোপযোগিতযা চ মদ্যাত্প্রাক্ তৈলবর্গো বক্তব্য ইত্যাহ অথ তৈলবর্গঃ| তৈলং স্বযোনিবত্তত্র মুখ্যং তীক্ষ্ণং ব্যবাযি চ| ত্বগ্দোষকৃদচক্ষুষ্যং সূক্ষ্মোষ্ণং কফকৃন্ন চ||৫৫|| কৃশানাং বৃংহণাযালং স্থূলানাং কর্শনায চ| বদ্ধবিট্কং কৃমিঘ্নং চ সংস্কারাত্সর্বরোগজিত্||৫৬||

স০-সর্বং তৈলং স্বকারণসমগুণং ভবতি| যতো যদভিনির্বৃত্তং তত্স্বরূপমেব তদিত্যর্থঃ| তত্র-তৈলেষু মধ্যে, মুখ্যং-তিলোদ্ভবং, যত্তৈলং তত্তীক্ষ্ণং-মন্দবিপরীতম্| তথা, ব্যবাযি-ব্যাপ্তিশীলম্, যদ্দেহং ব্যাপ্য পাকং যাতি| তথা, ত্বগ্দোষকৃত্-পানাভ্যাসেন ত্বচং দূষযতি| অচক্ষুষ্যং-চক্ষুষে হিতং ন ভবতি| সূক্ষ্মং-সূক্ষ্মস্রোতোগামি| উষ্ণং-উষ্ণবীর্যম্| স্বযোনিবদিত্যতিদেশাত্কফকৃত্ত্বং প্রাপ্তমিত্যাহ-কফকৃন্ন চ,-কফং ন করোতি| সঙ্গ্রহেঽপ্যুক্তম্ (সূ.অ.৭)-"মেধ্যস্তিলঃ স্পর্শশীতো, মেধ্যং তৈলং, খলো হিম:| তস্যৈব শ্লেষ্মকর্তৃত্বং, ন তৈলস্য খলস্য বা||" ইতি| পানকস্ত্বাযুর্বেদাবতারেঽধিজগে-"বিপাকে কটুকং তৈলং বাতঘ্নং কফপিত্তকৃত্|" ইতি| ননু চ, তৈলমিতি কথমস্য মুখ্যং নাম ? যতো যথা তিলস্য বিকারঃ স্নেহস্তৈলমিত্যুচ্যতে, তথৈরণ্ডাদীনামপি যো বিকারঃ স্নেহঃ সোঽপি তৈলমিত্যুচ্যতে| মুনরপ্যাহ (চ.বি.অ. ৮|২১)- "অতৈলমপি তৈলমেব কৃত্বোপদেক্ষ্যতে, তৈলপ্রাধান্যাত্|" স্নেহপ্রাধান্যাদিতি যাবত্| সামানাধিকরণ্যপ্রযোগোঽত এবোপপন্নঃ| যথা-কৌসুম্ভং তৈলমৈরণ্ডং তৈলমিতি| অত্রোচ্যতে| তিলস্যেদং বস্তু তৈলমিত্যন্বর্থতা তিলোদ্ভবস্যৈব তৈলস্য সম্ভবতি, ন কৌসুম্ভাদীনাম্| অপি চ, কৌসুম্ভং তৈলমিত্যাদৌ তৈলশব্দঃ কাণ্ডাদিব্যবচ্ছেদপরঃ সম্ভাব্যতে| যথা-কৌসুম্ভং তৈলং, ন পত্রং কাণ্ডং বেতি| ইদং তৈলং তৈলমিত্যত্র তু সামানাধিকরণ্যেন যদি তৈলশব্দো নির্দিশ্যতে ততঃ পূর্বস্মাত্তৈলশব্দাত্স্নেহাভিধাযিনোঽধিকমর্থান্তরং ন বক্তি| ননু, অত্রাপি তৈলশব্দঃ কস্মাত্কাণ্ডাদিব্যবচ্ছেদপরো ন ভবতি ? ইতি চেত্ ব্রূমঃ| রূঢিরূপত্বাত্তৈলশব্দস্য| স্নেহবিষয এব তৈলশব্দো রূঢঃ, ন কাণ্ডপত্রাদিবিষযে| তিলস্য হি কাণ্ডং পত্রং বা ন তৈলমিত্যুচ্যতে, কিং তর্হি ? তিলপত্রং তিলকাণ্ডমিতি| অত এব তৈলশব্দোচ্চারণস্য সমনন্তরং স্নেহবিষযৈব ধীর্জাযতে, ন পত্রকাণ্ডাদিবিষযা| তস্মাদস্যৈবৈতন্মুখ্যং নামেতি যুক্তমুক্তম্| সংস্কারানুবর্তিত্বেন সর্বরোগজিত্ত্বাচ্চাস্য মুখ্যত্বম্| তথা চোক্তম্-"সংস্কারাত্সর্বরোগজিত্" ইতি| কুসুম্ভাদীনাং তিলশব্দস্য চ স্নেহনার্থবাচ্যে বিকারে স্নেহে তৈলচ্প্রত্যযে সতি কুসুম্ভতৈলমেরণ্ডতৈলং তিলতৈলমিতি রূপং ভবতি| কৃশানাং পুংসাং বৃংহণায-বৃহত্ত্বায, অলং-পর্যাপ্তম্| স্থূলানাং চ কর্শনাযালম্| ননু, কথমেকস্মাদ্বস্তুনো বিরুদ্ধং কার্যদ্বযং কর্শনত্ববৃংহণত্বরূপং স্যাদিতি ? ব্রূম:| কৃশানাং তাত্বত্স্রোতাংসি সঙ্কোচমাযান্তি| সঙ্কুচিতস্রোতসাং চ নরাণাং তৈলমন্তরেণান্যানি দ্রব্যাণি বৃংহণগুণযুক্তান্যপি ন তথা প্রবেষ্টুং সমর্থানি ভবন্তি| তৈলং পুনঃ সঙ্কুচিতানি স্রোতাংসি তীক্ষ্ণাদিভির্গুণৈর্ঝটিত্যেব প্রবিশ্য শোধযতি| স্রোতঃশুদ্ধ্যা চ শরীরপুষ্টিঃ| তথা চ বক্ষ্যতি (হৃ. চি. অ. ৮|৪৩)- " স্রোতঃসু তক্রশুদ্ধেষু রসো ধাতূনুপৈতি যঃ| তেন তুষ্টির্বলং বর্ণঃ পরং পুষ্টিশ্চ জাযতে||" ইতি| তস্মাত্কৃশানাং বৃংহণাযালমিত্যুপপন্নম্| তথা, স্থূলানাং সূক্ষ্মস্রোতোগামিত্বাত্সর্বস্রোতঃসু তৈলং প্রবিশ্য তীক্ষ্ণোষ্ণাদিগুণযোগান্মেদঃ ক্ষপযতি| তত্ক্ষপণাচ্চ কর্শনং সম্পদ্যতে, ইতি স্থূলানাং কর্শনায চেত্যপ্যুপপন্নম্| স্নেহাদিগুণযোগাত্তৈলস্য বৃংহণত্বকর্শনত্বে সিদ্ধে সতি 'কৃশানাং বৃংহণাযালং স্থূলানাং কর্শনায চ|' ইত্যুক্তং জ্ঞাপনার্থম্| যদিত্থংভূতং তীক্ষ্ণাদিগুণযুক্তমন্যদপি, তত্ কৃশানাং বৃংহণাযালং স্থূলানাং কর্শনায চেতি| বদ্ধেত্যাদি| বদ্ধা বিট্ যেন তদ্বদ্ধবিট্কম্| কপ্সমাসান্তঃ| গ্রথিতপুরীষমিত্যর্থঃ| তথা, কৃমিঘ্নম্| সংস্কারাদিত্যাদি| বিশিষ্টদ্রব্যকৃতং সংস্কারমাশ্রিত্যাশেষরোগজিত্|

Adhikarana eraNDatailaguNAH raktairaNDatailaguNAH (57-58) · Śloka 58

সত্তিক্তোষণমৈরণ্ডং তৈলং স্বাদু সরং গুরু| বর্ধ্মগুল্মানিলকফানুদরং বিষমজ্বরম্||৫৭|| রুক্শোফৌ চ কটীগুহ্যকোষ্ঠপৃষ্ঠাশ্রযৌ জযেত্| তীক্ষ্ণোষ্ণং পিচ্ছিলং বিস্রং, রক্তৈরণ্ডোদ্ভবং ত্বতি||৫৮||

স০-এরণ্ডতৈলমীষত্তিক্তকটুকং ভবতি| তথা, স্বাদু-মধুরম্| তথা, সরং গুরু চ| বর্ধ্মেত্যাদি| বর্ধ্মাদীন্ জযেত্| কটীগুহ্যকোষ্ঠপৃষ্ঠস্থিতৌ রুক্শোফৌ জযেত্| তচ্চ তীক্ষ্ণোষ্ণং পিচ্ছিলং বিস্রং চ ভবতি| লোহিতৈরণ্ডতৈলং ত্বতিশযেন তীক্ষ্ণাদিগুণযুক্তম্|

Adhikarana sArShApatailaguNAH (59) · Śloka 59

কটূষ্ণং সার্ষপং তীক্ষ্ণং কফশুক্রানিলাপহম্| লঘু পিত্তাস্রকৃত্ কোঠকুষ্ঠার্শোব্রণজন্তুজিত্||৫৯||

স০-সর্ষপাণামিদং সার্ষপং তৈলং কটূষ্ণং চ ভবতি| তথা, তীক্ষ্ণং কফশুক্রানিলাপহং চ| অপপূর্বাদ্ধন্তেরন্যেষ্বপি দৃশ্যত ইতি ডঃ| তথা চ, লঘু পিত্তাস্রং চ করোতি| তথা, কোঠাদীন্ জযতি|

Adhikarana akShatailaguNAH (60) · Śloka 60

আক্ষং স্বাদু হিমং কেশ্যং গুরু পিত্তানিলাপহম্| |৬০|

স০-অক্ষাণাং-বিভীতকানামিদমাক্ষং তৈলং মধুরাদিগুণযুক্তং পিত্তানিলহৃচ্চ|

Adhikarana nimbodBavatailaguNAH (60) · Śloka 60

| নাত্যুষ্ণং নিম্বজং তিক্তং কৃমিকুষ্ঠকফপ্রণুত্||৬০||

স০-নিম্বোদ্ভবং তৈলমতিশযেনোষ্ণং ন ভবতি| তথা, তিক্তম্| তথা, কৃমিকুষ্ঠকফনাশনমতিশযেন|

Adhikarana umAkusumBajatailaguNAH (61) · Śloka 61

উমাকুসুম্ভজং চোষ্ণং ত্বগ্দোষকফপিত্তকৃত্| |৬১|

স০- অতসীজং কুসুম্ভজং চ তৈলমুষ্ণবীর্যং ভবতি| তথা ত্বগ্দোষকফপিত্তানি করোতি|

Adhikarana vasAmajjamedoguNAH (61-4) · Śloka 4

স্নেহপ্রসঙ্গাদিদমপ্যাহ | বসা মজ্জা চ বাতঘ্নৌ বলপিত্তকফপ্রদৌ||৬১|| মাংসানুগস্বরূপৌ চ, বিদ্যান্মেদোঽপি তাবিব| |৬২| ইতি তৈলবর্গঃ||৪||

স০- বসা-তনুরূপেণ শুদ্ধমাংসস্য স্নেহঃ| মজ্জা-ধাতুঃ| তৌ বাতনাশনৌ| তথা, মাংসানুগস্বরূপৌ-যস্য প্রাণিনঃ সম্বধি মাংসং তত্সদৃশরূপৌ| মেদোঽপি তাবিব-বসামজ্জ্ঞোঃ সদৃশস্বরূপং বিদ্যাত্| সংক্ষেপতযা চাযং তৈলবর্গ ইহোক্তঃ| তথা চ সঙ্গ্রহেঽধিকমপ্যুক্তম্ (সূ.অ.৬)-"দন্তীমূলকরক্ষোঘ্নকরঞ্জারিষ্টশিগ্রুজম্| সুবর্চলেঙ্গুদীপীলুশঙ্খিনীনীপসম্ভবম্|| সরলাগুরুদেবাহ্বশিংশপাসারজন্ম চ| তুবরারুষ্করোত্থং চ তীক্ষ্ণং কট্বস্রপিত্তকৃত্|| অর্শঃকুষ্ঠকৃমিশ্লেষ্মশুক্রমেদোঽনিলাপহম্| করঞ্জনিম্বজে তিক্তে নাত্যুষ্ণে তত্র নির্দিশেত্|| কষাযতিক্তকটুকং সারলং ব্রণশোধনম্| ভৃশোষ্ণতীক্ষ্ণকটুকে তুবরারুষ্করোদ্ভবে|| বিশেষাত্কৃমিকুষ্ঠঘ্নে তথোর্ধ্বাধোবিরেচনে| অক্ষাতিমুক্তকাক্ষোডনালিকেরমধূকজম্|| ত্রপুসৈর্বারুকূষ্মাণ্ডশ্লেষ্মাতকপ্রিযালজম্| বাতপিত্তহরং বৃষ্যং শ্লেষ্মলং গুরু শীতলম্|| পিত্তশ্লেষ্মপ্রশমনং শ্রীপর্ণীকিংশুকোদ্ভবম্| তিলতৈলং বরং তেষু কৌসুম্ভমবরং পরম্|| বসা মজ্জা চ বাতঘ্নৌ বলপিত্তকফপ্রদৌ| মাংসানুগস্বরূপৌ চ বিদ্যান্মেদোঽপি তাবিব|| তৌলূকী শৌকরী পাকহংসজা কুক্কুটোদ্ভবা| বসা শ্রেষ্ঠা স্ববর্গেষু কুম্ভীরমহিষোদ্ভবা|| কাকমদ্গুবসা তদ্বত্কারণ্ডোত্থা চ নিন্দিতা| শাখাদমেদসাং ছাগং হাস্তিনং চ বরাবরম্||" ইতি| ইতি তৈলবর্গঃ|

Adhikarana madyavargaH sAmAnyamadyaguNAH (62-65) · Śloka 65

তীক্ষ্ণোষ্ণসূক্ষ্মাদিগুণসামান্যাত্তৈলবর্গাদনন্তরং মদ্যবর্গ আরভ্যতেঅথ মদ্যবর্গঃ| | দীপনং রোচনং মদ্যং তীক্ষ্ণোষ্ণং তুষ্টিপুষ্টিদম্||৬২|| সস্বাদুতিক্তকটুকমম্লপাকরসং সরম্| সকষাযং স্বরারোগ্যপ্রতিভাবর্ণকৃল্লঘু||৬৩|| নষ্টনিদ্রাঽতিনিদ্রেভ্যো হিতং পিত্তাস্রদূষণম্| কৃশস্থূলহিতং রূক্ষং সূক্ষ্মং স্রোতোবিশোধনম্||৬৪|| বাতশ্লেষ্মহরং যুক্ত্যা পীতং বিষবদন্যথা| |৬৫|

স০-সর্বং মদ্যং দীপনাদিগুণযুক্তম্| তুষ্টিঃ-চিত্তপরিতোষঃ, পুষ্টিঃ-শরীরপোষঃ, তে দদাতি-জনযতি, যত্তত্তুষ্টিপুষ্টিদম্| আতোঽনুপসর্গে কঃ| তথা ঈষন্মধুরতিক্তকটুকম্| তথা, অম্লৌ পাকরসৌ যস্য তদেবম্| তথা, সরম্| তথা সকষাযম্| তথা, স্বরশ্চারোগ্যং চ প্রতিভা চ বর্ণশ্চ তান্ করোতি| ননু, সর্বাণ্যেব দ্রব্যাণ্যারোগ্যার্থমুপদিশ্যন্তে| তস্মাদারোগ্যকৃত্বং সর্বেষামেব দ্রব্যাণাং প্রাপ্তম্| কিমিতি মদ্যস্যৈবারোগ্যকৃত্ত্বমুচ্যতে ? যুক্তমাহ ভবান্| কিন্ত্বতিশযখ্যাপনার্থমেতত্| মদ্যমতিশযেনারোগ্যকৃদিত্যর্থঃ| তথা, লঘু| তথা, নষ্টনিদ্রেভ্যো নরেভ্যোঽতিনিদ্রেভ্যশ্চ হিতম্| সর্বমেব মদ্যং প্রভাবাদিতি কেচিত্| অন্যে ত্বেবং মন্যন্তে, যথা-সুরাদি যন্মদ্যং শ্লেষ্মাদিবর্ধনং, তন্নষ্টনিদ্রেভ্যো হিতম্| যচ্চ মাধবাদি মদ্যং শ্লেষ্মাদিহন্তৃ, তচ্চাতিনিদ্রেভ্যো হিতমিতি| তথা, পিত্তাস্রদূষণম্| তথা, কৃশেভ্যঃ স্থূলেভ্যশ্চ হিতম্, ইতি সামান্যেঽপি নির্দেশেঽত্রাযং বিশেষো বোধ্যঃ,-কিঞ্চিন্মদ্যং কৃশায হিতং কিঞ্চিত্স্থূলাযেতি| অথবা, তৈলোক্তন্যাযেন কৃশস্থূলহিতত্বং বোধ্যম্| তথা, রূক্ষং| তথা, সূক্ষ্মং-স্রোতোগামি| তথা, স্রোতো বিশোধযতি| তথা, বাত শ্লেষ্মহরম্| যুক্ত্যা পীতং সদেবংগুণং মদ্যং ভবতি| যুক্তিস্তু-মদাত্যযনিদানে চিকিত্সিতে চ বক্ষ্যমাণা| অন্যথা-অযুক্ত্যা পীতং সত্, বিষতুল্যং ভবতি|

Adhikarana navajIrNamadyaguNAH (65) · Śloka 65

| গুরু তদ্দোষজননং নবং, জীর্ণমতোঽন্যথা||৬৫||

স০-নবং-কিঞ্চিত্কালাতিক্রান্তম্, তত্-মদ্যং, গুরু ত্রিদোষকরং চ ভবতি| নবং-অনতীতসংবত্সরমিত্যেকে| জীর্ণং-পুরাণং বহুকালাতিক্রান্তম্| অতঃ-নবাত্, অন্যথা-লঘু দোষহরং চেত্যর্থঃ|

Adhikarana uShNopacAreNa madyapAnaniShedhaH (66) · Śloka 66

পেযং নোষ্ণোপচারেণ ন বিরিক্তক্ষুধাতুরৈঃ| নাত্যর্থতীক্ষ্ণমৃদ্বল্পসম্ভারং কলুষং ন চ||৬৬||

স০-তচ্চ মদ্যমুষ্ণোপচারেণ ন পেযম্| উষ্ণো-বিহারাহারাদিক উপচারো যস্য স এবম্, তেন| ন বিরিক্তেত্যাদি| কৃতবিরেচনেন ন পেযম্, দোষাসাম্যাদিতি ভাবঃ| তথা, ক্ষুধার্তেন ন পেযম্| তথা, অতিতীক্ষ্ণমতিমৃদু চ মদ্যং ন পেযম্| অল্পসম্ভারমিতি| যদ্যাবতা সম্ভারেণ লোকপ্রসিদ্ধেন সন্ধীযতে সুরাদি, তত্র তদপেক্ষযা চাল্পসম্ভারং ন পেযম্| তথা, কলুষং-অস্বচ্ছং পাংসুশর্করাদিভির্যুক্তং, চ ন পেযম্|

Adhikarana surAguNAH (67) · Śloka 67

গুল্মোদরার্শোগ্রহণীশোষহৃত্ স্নেহনী গুরুঃ| সুরাঽনিলঘ্নী মেদোঽসৃক্স্তন্যমূত্রকফাবহা||৬৭||

স০--সুরা গুল্মাদিহৃদ্ভবতি| তথা, স্নেহযতীতি স্নেহনী| তথা, গুরুর্বাতনাশিনী চ| তথা, মেদশ্চাসৃক্ চ স্তন্যং চ মূত্রং চ কফশ্চ তানাবহতি|

Adhikarana vAruNIguNAH,baiBItakIguNAH (68) · Śloka 68

তদ্গুণা বারুণী হৃদ্যা লঘুস্তীক্ষ্ণা নিহন্তি চ| শূলকাসবমিশ্বাসবিবন্ধাধ্মানপীনসান্||৬৮||

স০-এবং বারুণী-প্রসন্না| ত এব সুরোক্তা গুণা যস্যাঃ সা তদ্গুণা, সুরাসমগুণেত্যর্থঃ| তথা, হৃদযায হিতা-হৃদ্যা| তথা, লঘুস্তীক্ষ্ণা চ| শূলাদীন্নিহন্তি চ| বিবন্ধঃ-স্রোতসামুপলেপেন দোষাদীনামবহনম্| জগলমেদকবক্কসানাং সুতরামনুপযোগিত্বাদ্গুণা নেহোক্তাঃ| সঙ্গ্রহে (সূ.অ.৬) তূক্তা এব| যথা-"জগলঃ পাচনো গ্রাহী রূক্ষস্তদ্বচ্চ মেদকঃ| বক্কসো হৃতসারত্বাদ্বিষ্টম্ভী দোষকোপনঃ||" ইতি| বারুণ্যা অধোভাগো ঘনো-জগলঃ| জগলস্যাধোভাগো-মেদকঃ| পানীযেন মদ্যকল্কপীড(নে)নোত্পন্নো-বক্কসঃ|

Adhikarana baiBItakIguNAH yavasurAguNAH (69-70) · Śloka 70

নাতিতীব্রমদা লঘ্বী পথ্যা বৈভীতকী সুরা| ব্রণে পাণ্ড্বামযে কুষ্ঠে ন চাত্যর্থং বিরুধ্যতে||৬৯|| বিষ্টম্ভিনী যবসুরা গুর্বী রূক্ষা ত্রিদোষলা| |৭০|

স০-বিভীতকানামিযং বৈভীতকী| নাতিতীব্রো মদো যস্যাঃ সৈবম্| তীব্রমদং ন জনযতীত্যর্থঃ| তথা, লঘ্বী| তথা, পথ্যা| তথা, ব্রণাদিষু চাত্যর্থমন্যমদ্যবন্ন বিরুধ্যতে|

Adhikarana ariShTaguNAH (22)) · Śloka 71

| যথাদ্রব্যগুণোঽরিষ্টঃ সর্বমদ্যগুণাধিকঃ||৭০|| গ্রহণীপাণ্ডুকুষ্ঠার্শঃশোফশোষোদরজ্বরান্| হন্তি গুল্মকৃমিপ্লীহ্নঃ কষাযকটুবাতলঃ||৭১||

স০-অরিষ্টো যো যৈর্দ্রব্যৈঃ সিদ্ধঃ, স তদ্গুণাননুগচ্ছতি| সর্বৈশ্চ দীপনত্বাদিভির্মদ্যগুণৈরধিকঃ| তন্ত্রান্তরে চোক্তম্-"মদ্যাকরাধিকদ্রব্যং মদিরাদ্যাত্মকং ত্বতঃ| যথাদ্রব্যগুণোঽরিষ্টঃ সর্বমদ্যগুণাধিকঃ||" ইতি| গ্রহণ্যাদিকাংশ্চ রোগান্ হন্তি| তথা, কষাযকটুশ্চাসৌ বাতলশ্চ স এবম্| লক্ষণং চাস্য প্রাগুক্তম্ (অ. ৩|২২)|

Adhikarana mArdvIkaguNAH (72) · Śloka 72

মার্দ্বীকং লেখনং হৃদ্যং নাত্যুষ্ণং মধুরং সরম্| অল্পপিত্তানিলং পাণ্ডুমেহার্শঃকৃমিনাশনম্||৭২||

স০-মার্দ্বীকং-দ্রাক্ষারসোদ্ভবং, লেখনত্বাদিযুক্তম্| তথা, অল্পৌ পিত্তানিলৌ যস্য তদেবম্| অন্যমদ্যাপেক্ষযাঽল্পতরৌ করোতীত্যর্থঃ| তথা, পাণ্ড্বাদিনাশনম্| "বিলিখত্যতিতৈক্ষ্ণ্যাদ্যদ্ধাতূংস্তল্লেখনং মতম্|"

Adhikarana khArjUramadyaguNAH shArkaramadyaguNAH (73) · Śloka 73

অস্মাদল্পান্তরগুণং খার্জূরং বাতলং গুরু| শার্করঃ সুরভিঃ স্বাদুহৃদ্যো নাতিমদো লঘুঃ||৭৩||

স০-খার্জূরং মদ্যমস্মাত্-মার্দ্বীকাদল্পান্তরগুণম্| অল্পান্তরাঃ-কিঞ্চিদ্বিশেষা গুণা যস্য তদেবম্| তথা, বাতলং গুরু চ| দ্রাক্ষাসবশ্চান্যত্রোক্তঃ| যথা-"শুষ্কদ্রাক্ষাম্বুসম্ভূতো বিশদো রোচনো হিমঃ| দ্রাক্ষাসবো মধুসমো বৃংহণো ভৃশদীপনঃ||' ইতি| শার্করঃ-শর্করাসম্বন্ধী মদ্যবিশেষঃ, সুরভিঃ-সুগন্ধির্ভবতি| তথা, স্বাদুশ্চ (শ্চাসৌ) হৃদ্যশ্চ স্বাদুহৃদ্যঃ| তথা, নাতিমদো লঘুশ্চ ভবতি|

Adhikarana gauDamadyaguNAH (74) · Śloka 74

সৃষ্টমূত্রশকৃদ্বাতো গৌডস্তর্পণদীপনঃ| |৭৪|

স০-গুডসম্বন্ধী-গৌডঃ, সৃষ্টমূত্রত্বাদিভির্গুণৈর্যুক্তঃ| তথা, তর্পণাশ্চাসৌ দীপনশ্চ তর্পণদীপনঃ|

Adhikarana pakvarasaguNAH (74-75) · Śloka 75

| বাতপিত্তকরঃ সীধুঃ স্নেহশ্লেষ্মবিকারহা||৭৪|| মেদঃশোফোদরার্শোঘ্নস্তত্র পক্বরসো বরঃ| |৭৫|

স০-সীধুঃ বাতপিত্তকরঃ| তথা, স্নেহবিকারান্ শ্লেষ্মবিকারাংশ্চ হন্তি| ব্রহ্মভ্রূণবৃত্রেষ্বিত্যত্র চতুর্বিধস্য নিযমস্য প্রাযিকত্বাত্ ক্বিপ্| সীধুঃ-অপক্বেক্ষুরসকৃতঃ পক্বেক্ষুরসকৃতশ্চ| তত্র সীধ্বোর্মধ্যে, পক্বরসো মেদঃশোফোদরার্শাংসি হন্তি, শ্রেষ্ঠশ্চ ভবতি| মেদঃশোফোদরার্শোঘ্ন ইতি "অমনুষ্যকর্তৃকে চ" ইতি ঠক্|

Adhikarana madhvAsavaguNAH (75) · Śloka 75

| ছেদী মধ্বাসবস্তীক্ষ্ণো মেহপীনসকাসজিত্||৭৫||

স০-মধ্বাসবো-মাক্ষিকেণ সন্ধীযতে মাধবাখ্যো মদ্যবিশেষঃ, ছেদী তীক্ষ্ণো মেহাদিনাশনশ্চ| অষ্টাঙ্গসঙ্গ্রহে তু (সূ.অ.৬) সুরাসবাদযো গদিতাঃ| তথা চাপঠত্-"সুরাসবস্তীব্রমদঃ স্বাদুস্তীক্ষ্ণোঽনিলাপহঃ| মৈরেযো মধুরো বৃষ্যঃ সরঃ সন্তর্পণো গুরুঃ||" ইত্যাদি| তত্র মধুনৈব সুরাসন্ধানেন যা ক্রিযতে, তাং সুরাং সুরাসবমাহুঃ| মৈরেযঃ-কোদ্রবৈর্জাযতে|

Adhikarana shuktaguNAH (76-77) · Śloka 77

রক্তপিত্তকফোত্ক্লেদি শুক্তং বাতানুলোমনম্| ভৃশোষ্ণতীক্ষ্ণরূক্ষাম্লং হৃদ্যং রুচিকরং সরম্||৭৬|| দীপনং শিশিরস্পর্শং পাণ্ডুদৃক্কৃমিনাশনম্| |৭৭|

স০-শুক্তং রক্তপিত্তকফানুত্ক্লেদযতি| তথা, বাতমনুলোমযতি-মার্গান্তরেভ্যস্তমানীয স্বমার্গপ্রতিপন্নং করোতি, তদ্বাতানুলোমনম্| অতিশযেনোষ্ণতীক্ষ্ণরূক্ষাম্লম্| তথা, হৃদ্যম্| তথা, পরং-অতিশযেন রুচিকরম্| তথা, দীপনম্| তথা, শিশিরঃ স্পর্শো যস্য তদেবম্| তথা, পাণ্ড্বাদিঘ্নম্|

Adhikarana guDAdInAM yathottaraM laghutvam (77) · Śloka 77

| গুডেক্ষুমদ্যমার্দ্বীকশুক্তং লঘু যথোত্তরম্||৭৭||

স০-গুডাদিভিবং শুক্রং যথোত্তরং লঘু-যদ্যদুত্তরং তত্তল্লঘু, গুডকৃতাচ্ছুক্তাদিক্ষুশুক্তং লঘু, ইক্ষুশুক্তান্মদ্যশুক্তং লঘু, মদ্যশুক্তান্মার্দ্বীকং শুক্তং লঘু ভবতি|

Adhikarana shuktagatakandAdiguNAH (78) · Śloka 78

কন্দমূলফলাদ্যং চ তদ্বদ্বিদ্যাত্তদাসুতম্| |৭৮|

স০-কন্দাদিকং চ তদাসুতং-গুডশুক্তাদ্যাসুতং, তদ্বদ্বিদ্যাত্- তচ্ছুক্তসমানগুণং জানীযাত্| শুক্তেনাত্যুত্কৃষ্টশক্তিনা পরিত্যাজ্য নিজং স্বভাবং, বশীকৃত্যাঽঽত্মরূপতাং নীযত ইত্যর্থঃ| আদ্যগ্রহণাত্কাণ্ডত্বক্পত্রাদিপরিগ্রহঃ| তেন কাণ্ডাদ্যপি তথৈব বেদ্যম্|

Adhikarana shukteMtarasandhAnaguNAH (78) · Śloka 78

অম্লত্বরোচনাদিগুণতুল্যত্বাদন্যদপি শাণ্ডাক্যাদিকমাহ | শাণ্ডাকী চাসুতং চান্যত্কালাম্লং রোচনং লঘু||৭৮||

স০-মূলকসর্ষপশাকানি ক্বথিতাসুতানি কালজীরকরাজিকাচূর্ণভাবিতান্যম্লতীক্ষ্ণানি শাণ্ডাকীশব্দেনোচ্যন্তে| সা টক্কবিষযে প্রসিদ্ধা| সা চান্যচ্চানুক্তমপ্যাসুতং কালেনাম্লং-অম্লীভূতম্, ন তু স্বযমাম্ল্যমাপাদ্যম্| অনেনৈব হেতুনা সুতরাং তত্সংস্কারতামধিকরোতীতি| তচ্চ রোচনং লঘু ভবতি|

Adhikarana kA~jjikaguNAH (79-81) · Śloka 81

ধান্যাম্লং ভেদি তীক্ষ্ণোষ্ণং পিত্তকৃত্স্পর্শশীতলম্| শ্রমক্লমহরং রুচ্যং দীপনং বস্তিশূলনুত্||৭৯|| শস্তমাস্থাপনে হৃদ্যং লঘু বাতকফাপহম্| এভিরেব গুণৈর্যুক্তে সৌবীরকতুষোদকে||৮০|| কৃমিহৃদ্রোগগুল্মার্শঃপাণ্ডুরোগনিবর্হণে| তে ক্রমাদ্বিতুষৈর্বিদ্যাত্সতুষৈশ্চ যবৈঃ কৃতে||৮১||

স০-ধান্যাম্লং-কাঞ্জিকং, ভেদি তীক্ষ্ণম্| তথা, উষ্ণবীর্যম্| তথা, পিত্তকৃত্| স্বভাবাচ্চ স্পর্শশীতলম্| ব্যাযামাদিনা শ্রান্তত্বং-শ্রমঃ, নির্ব্যাযামাদেরেবোপশ্রান্তত্বং-ক্লমঃ, তৌ হরতি| তথা, রুচ্যং দীপনং চ| বস্তিশূলং চ জযতি| তথা, আস্থাপনে-নিরূহে শস্তম্| তথা, লঘু বাতকফাপহং চ| হন্তেঃ "অন্যেষ্বপি দৃশ্যতে" ইতি ডঃ| ধান্যাম্লং-তণ্ডুলকণ্ডনাদিকৃতম্| সৌবীরকতুষোদকে তু বিতুষৈঃ সতুষৈশ্চ যবৈঃ ক্রমাত্কৃতে তদ্বদ্বিদ্যাত্|

Adhikarana go~ajAdimUtraguNAH (82-83) · Śloka 83

মদ্যবত্তীক্ষ্ণোষ্ণাদিযুক্তত্বাত্ গোমূত্রাদিগুণানপ্যাহ মূত্রং গোঽজাবিমহিষীগজাশ্বোষ্ট্রখরোদ্ভবম্| পিত্তলং রূক্ষতীক্ষ্ণোষ্ণং লবণানুরসং কটু||৮২|| কৃমিশোফোদরানাহশূলপাণ্ডুকফানিলান্| গুল্মারুচিবিষশ্বিত্রকুষ্ঠার্শাংসি জযেল্লঘু||৮৩||

স০-মূত্রং গোঽজাদিভবং পিত্তলাদিগুণযুক্তম্| তথা, লবণোঽনুরসঃ স্বল্পো যস্য তদেবম্| তথা, কৃম্যাদীন্ জযেত্| লঘু চ| গোমূত্রস্য চ পূর্বমুপন্যাসাত্ প্রাধান্যং জ্ঞেযম্| সঙ্গ্রহে তু বিশেষান্তরমপ্যুক্তম্ (সূ. অ. ৬)- "শ্বাসকাসহরং ছাগং পূরণাত্কর্ণশূলজিত্| দদ্যাত্ক্ষারে কিলাসে চ গজবাজিসমুদ্ভবম্| হন্ত্যুন্মাদমপস্মারং কৃমীন্মেহং চ রাসভম্| কষাযতিক্তমেতেষাং হিধ্মাশ্বাসহরং শকৃত্|| পিত্তং তিক্তং কৃমিহরং, রোচনা কফবাতজিত্| তিক্তা পামাহরা, মূত্রং মানুষং তু বিষাপহম্||" ইতি|

Adhikarana dravaikadeshodAharaNam (5) · Śloka 5

তোযক্ষীরেক্ষুতৈলানাং বর্গৈর্মদ্যস্য চ ক্রমাত্| ইতি দ্রবৈকদেশোঽযং যথাস্থূলমুদাহৃতঃ||৮৪|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে দ্রবদ্রব্যবিজ্ঞানীযো নাম পঞ্চমোঽধ্যাযঃ||৫||

স০-ইতি-অনন্তরোক্তেন প্রকারেণ, তোযাদীনাং বর্গৈঃ ক্রমানতিক্রমেণ দ্রবাণামেকদেশো যথাস্থূলমযমুদাহৃতঃ-উক্তঃ| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে পঞ্চমোঽধ্যাযঃ সমাপ্তঃ|| ৫||