14. dvividhōpakramaṇīyādhyāyaḥ

Adhikarana adhyAyopakramaH · Śloka

দোষোপক্রমণীযাদনন্তরং দ্বিবিধোপক্রমণীযারম্ভেঽযং সম্বন্ধঃ| পূর্বং সামান্যেনোপক্রমো দোষোপক্রমণীযেঽভিহিতঃ|

Adhikarana dvividhopakramaNIyAdhyAyaH (2) · Śloka 2

অত্র তূপক্রমস্য বিশেষ উচ্যত ইত্যাহ - - - - অথাতো দ্বিবিধোপক্রমণীযমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে||২||

স০-দ্বিবিধং-দ্বিপ্রকারং চ তদুপক্রমণং চ দ্বিবিধোপক্রমণম্, তস্মৈ হিতো দ্বিবিধোপক্রমণীযঃ| শেষং পূর্ববত্| উপক্রমশ্চ সমাসতো দ্বিবিধঃ, তন্ত্রান্তরপঠিতানাং চতুর্ণামুপক্রমাণামত্রৈবান্তর্ভবাত্|

Adhikarana upakramasya dvaividhyam, dvaividhyanirUpaNam (1) · Śloka 1

অত এব সহেতুকমুপদিশন্নাহ - - - - উপক্রম্যস্য হি দ্বিত্বাদ্দ্বিধৈবোপক্রমো মতঃ| |১|

স০-হি-যস্মাত্, উপক্রম্যস্য-চিকিত্স্যস্য, দ্বিত্বাদ্ধেতোরুপক্রমো দ্বিধৈব মতঃ-ইষ্টঃ| এবশব্দোঽবধারণং কুর্বন্ পরমতং ক্ষিপতি|

Adhikarana bRuMhaNala~gghanayorlakShaNam (1-3) · Śloka 3

কথং দ্বিধা ? ইত্যাহ - - - - একঃ সন্তর্পণস্তত্র দ্বিতীযশ্চাপতর্পণঃ|১| বৃংহণো লঙ্ঘনশ্চেতি তত্পর্যাযাবুদাহৃতৌ| বৃংহণং যদ্বৃহত্বায লঙ্ঘনং লাঘবায যত্||২|| দেহস্য| ||৩||

স০-তত্র-তযোর্দ্বযোরুপক্রমযোঃ, এক সন্তর্পণরূপ উপক্রমো, দ্বিতীযশ্চাপতর্পণরূপ উপক্রমঃ| বৃংহণো লঙ্ঘনশ্চ তযোঃ-সন্তর্পণাপতর্পণযোঃ, পর্যাযৌ তত্পর্যাযাবুদাহৃতৌ|| বৃংহণং তদুচ্যতে যদ্দেহস্য বৃহত্ত্বায ভবতি| লঙ্ঘনং তদুচ্যতে যদ্দেহস্য লাঘবায-লাঘবোত্পাদনায, ভবতি|

Adhikarana la~gghanabRuMhaNe udAharati (1) · Śloka 1

| ভবতঃ প্রাযো ভৌমাপমিতরচ্চ তে||১||

স০-তচ্চ তচ্চ তে,-সন্তর্পণাপতর্পণে, ভৌমাপমিতরচ্চ ভবতঃ| ভূমেরিদং ভৌমম্| অপামিদমাপম্| ভৌমযুক্তমাপং সন্তর্পণম্| ইতরত্-ভৌমাপাদন্যদগ্নিবায্বাকাশাত্মকমপতর্পণম্| প্রাযোগ্রহণাত্কিঞ্হ্চিদ্ভৌমাপমপ্যপতর্পণম্| যথা,-যবকমসূরমকুষ্ঠতণ্ডুলীযাদি| তথা, অগ্নিপবনোত্কটস্য কটুকস্যাপি শুণ্ঠীপিপ্পল্যাদেঃ সন্তর্পণত্বম্, বৃষ্যত্বেন সন্তর্পণকার্যদর্শনাত্|

Adhikarana snehAdInAM bRuMhaNe rUkShAdInAM ca la~gghane~antarbhAvaH (3-4) · Śloka 4

অধুনা স্নেহনাদেশ্চতুর্বিধস্যোপক্রমস্য সন্তর্পণাপতর্পণযোরেবান্তর্ভাবং দর্শযন্নাহ - - - - | স্নেহনং রূক্ষণং কর্ম স্বেদনং স্তম্ভনং চ যত্||৩|| ভূতানাং তদপি দ্বৈধ্যাদ্দ্বিতযং নাতিবর্ততে| |৪|

স০-স্নেহনাদি যচ্চতুর্বিধং কর্ম, তদপি দ্বিতযং-সন্তর্পণাপতর্পণরূপং, নাতিবর্ততে-নাতিক্রামতি| কুতো হেতোঃ ? ইত্যাহ-ভূতানাং সন্তর্পণাপতর্পণরূপাত্ দ্বৈধ্যাত্-দ্বিপ্রকারকত্বাত্|

Adhikarana la~gghanabhedau (4) · Śloka 4

ইদানীং প্রত্যেকং তযোর্ভেদানাহ - - - - | শোধনং শমনং চেতি দ্বিধা তত্রাপি লঙ্ঘনম্||৪||

স০-তত্র-তযোঃ সন্তর্পণাপতর্পণযোর্বৃংহণলঙ্ঘনাপরপর্যাযযোর্মধ্যে, যল্লঙ্ঘনং-অপতর্পণম্, তত্ দ্বিধা| কথম্ ? ইত্যাহ-শোধনং শমনং চেতি| ইতি হেত্বর্থে, যতঃ শোধনং শমনং চ ততো দ্বিধেত্যর্থঃ|

Adhikarana shodhanasya lakShaNaM bhedAshca (5) · Śloka 5

ইদানীং শোধনস্য লক্ষণং প্রভেদং চাধিকৃত্যাহ - - - - যদীরযেদ্বহির্দোষান্ পঞ্চধা শোধনং চ তত্| নিরূহো বমনং কাযশিরোরেকোঽস্রবিস্রুতিঃ||৫||

স০-যদৌষধং দোষান্-বাতাদীনন্তঃস্থিতান্, বহিরীরযেত্-ক্ষিপেত্, তচ্ছোধনম্| তচ্চ পঞ্চধা,-পঞ্চবিধম্| তদেব পঞ্চবিধত্বমাহ-নিরূহ ইত্যাদি| নিরূহো-বস্তিঃ, তথা বমনম্, তথা কাযবিরেকঃ শিরোবিরেকশ্চ, তথাঽস্রবিস্রুতিঃ-রক্তস্রাবশ্চ, ইতি পঞ্চধা শোধনম্| সর্বশরীরস্য শিরঃপ্রভৃতেরধোমলনির্হরণং যত্ স কাযবিরেকশব্দেনোচ্যতে| যত্তু কেবলং শিরঃসংজ্ঞকস্য শরীরাবযবস্য ঘ্রাণেনোর্ধ্বমলনির্হরণং স শিরোবিরেকঃ|

Adhikarana shamanasya lakShaNaM bhedAshca (6-7) · Śloka 7

সম্প্রতি শমনাখ্যস্য লক্ষণং প্রভেদং চাধিকৃত্যাহ - - - - ন শোধযতি যদ্দোষান্ সমান্নোদীরযত্যপি| সমীকরোতি বিষমান্ শমনং তচ্চ সপ্তধা||৬|| পাচনং দীপনং ক্ষুত্তৃড্ব্যাযামাতপমারুতাঃ| |৭|

স০-যদৌষধং দোষান্-বাতাদীন্, ন শোধযতি-নান্তঃস্থিতান্ বহির্নিষ্কাসযতি, তথা সমান্-স্বপ্রমাণস্থান্, নোদীরযতি-ন চোত্ক্লেশযতি, বিষমাংশ্চ-স্বপ্রমাণাদ্ধীনাধিকভবাবস্থিতান্, সমীকরোতি-স্বপ্রমাণস্থান্ বিদধাতি, তচ্ছমনমুচ্যতে| তচ্চ সপ্তধা,-সপ্তপ্রকারম্, পাচনাদিভেদেন| পাচযতীতি পাচনম্| পচতোঽগ্রেঃ পক্তুং শক্তিমধিকাং যদুত্পাদযতি তদ্দ্রব্যং ক্রিযা বা পাচনমুচ্যতে| যথা,-লঙ্ঘনং মুস্তাদি বা| দীপনং যথা,-ঘৃতাদি| তন্ত্রান্তরে চ দীপনপাচনযোর্লক্ষণমুক্তম্| যথা,_"যদগ্নিকৃত্পচেন্নামং দীপনং তদ্যথা ঘৃতম্| পাচনং তদ্বিপর্যস্তং যথা বক্ষ্যামি লঙ্ঘনম্||" ইতি| [ক্ষারপাণিনাঽপ্যুক্তম্-"পাচনং পাচযেদ্দোষান্ সামান্ শমনমেব তু| দীপনং হ্যগ্নিকৃত্ত্বামং কদাচিত্পাচযেন্ন বা||" ইতি| ] ক্ষুত্তৃট্শব্দাভ্যাং ক্ষুতৃষ্ণানিগ্রহাবিহ গৃহীতৌ|

Adhikarana bRuMhaNaM shamanameva (7) · Śloka 7

পাচনাদীনাং দোষশমনত্বমুক্তম্| তচ্চ বাতে বাতপিত্তে চ ন সম্ভবতীত্যাহ - - - - | বৃংহণং শমনং ত্বেব বাযোঃ পিত্তানিলস্য চ||৭||

স০-তুশব্দো বিশেষে| বিশেষস্তু লঙ্ঘনাপেক্ষযা| শোধনং শমন চেতি দ্বিধা লঙ্ঘনমুক্তম্| বৃংহণমপি শোধনং ভবতি| যথা,-দুগ্ধাদিদ্রব্যম্, শোধনস্বভাবদ্রব্যাত্| তেন যথাবিধেন দ্রব্যেণ কেবলস্য বাতস্য পিত্তযুক্তস্য বা কোপ আশঙ্ক্যতে| যথা-লঙ্ঘনেন শোধনদ্রব্যেণ হরীতক্যাদিনা| ততো বৃংহণস্য বিশেষার্থস্তুশব্দঃ কৃতঃ| বৃংহণং যচ্ছোধনং তন্মরুতঃ কেবলস্য পিত্তসহিতস্য বা শমনম্, ন তু লঙ্ঘনশোধনবত্কোপনম্| এবকারোঽবধারণার্থঃ| বৃংহণং শোধনরূপং বাতস্য পিত্তযুক্তস্য বা শমনমেবোক্তম্, ন কোপনং জাতুচিদিত্যর্থঃ| লঙ্ঘনং তূভযরূপমপি বাতস্য বাতপিত্তযোর্বা কোপেনমেব|

Adhikarana bRuMhAH (8-9) · Śloka 9

ইদানীং বৃংহ্যনাহ - - - - বৃংহযেদ্ব্যাধিভৈষজ্যমদ্যস্ত্রীশোককর্শিতান্| ভারাধ্বোরঃক্ষতক্ষীণরূক্ষদুর্বলবাতলান্||৮|| গর্ভিণীসূতিকাবালবৃদ্ধান্ গ্রীষ্মেঽপরানপি| |৯|

স০-কর্শিতশব্দস্য ব্যাধ্যাদিভিঃ প্রত্যেকং সম্বন্ধঃ| ব্যাধিকর্শিতান্ বৃংহযেত্| এবং শেষেষ্বপি যোজ্যম্| ভারাদিভিঃ ক্ষীণস্য প্রত্যেকং সম্বন্ধঃ| ভারক্ষীণান্ বৃংহযেত্| এবং শেষেষু| রূক্ষাদীন্ বৃংহযেত্| গ্রীষ্মেঽপরানপি-অন্যাননুক্তানপি বৃংহযেত্| [ইত্থং চ গ্রীষ্মে সর্বানপি বৃংহযেত্,] অতিতরাং তু ব্যাধিকর্শিতাদীন্ বৃংহযেত্|

Adhikarana bRuMhaNAni (9-10) · Śloka 10

কৈর্বৃংহযেত্ ? ইত্যাহ - - - - | মাংসক্ষীরসিতাসর্পির্মধুরস্নিগ্ধবস্তিভিঃ||৯|| স্বপ্নশয্যাসুখাভ্যঙ্গস্নাননির্বৃতিহর্ষণৈঃ| |১০|

স০-মাংসাদিভির্বৃংহযেত্ বস্তিভিশ্চ| কথম্ভূতৈর্বস্তিভিঃ ? মধুরস্নিগ্ধৈঃ, ন তু রূক্ষতীক্ষ্ণৈঃ, তেষামপতর্পণস্বভাবত্বাত্| স্বপ্নো-নিদ্রা| শয্যাসুখং-খট্বাজনিতং শর্ম| নির্বৃতিঃ-চিত্তস্যামাকুলত্বম্|

Adhikarana la~gghanIyAH (10-11) · Śloka 11

লঙ্ঘনীযানাহ - - - - | মেহামদোষাতিস্নিগ্ধজ্বরোরুস্তম্ভকুষ্ঠিনঃ||১০|| বিসর্পবিদ্রাধিপ্লীহশিরঃকণ্ঠাক্ষিরোগিণঃ| স্থূলাংশ্চ লঙ্ঘযেন্নিত্যং শিশিরে ত্বপরানপি||১১||

স০-মেহাদীনামিনির্মত্বর্থীযঃ| মেহিপ্রভৃতীন্ লঙ্ঘযেত্| শিশিরে পুনরপরানপি-অন্যানপি, ইতি ব্যাধিতানাং গ্রহণম্| স্বস্থানাং তু শিশিরে হেমন্তবিধির্বিশেষেণোক্ত এব| শিশিরশব্দঃ শীতমাত্রোপলক্ষণার্থঃ| তেন হেমন্তেঽপি লঙ্ঘযেদিত্যর্থ উপলভ্যতে|

Adhikarana la~gghanabhedasya shodhanasya viShayaH, pAcanadIpanayorviShayaH, kShuttRuShorviShayaH, vyAyAmAtapamArUtAnAM viShayaH (12-15) · Śloka 15

পূর্বমুক্তং লঙ্ঘনং দ্বিধা,-শোধনং শমনং চেতি| তত্র শোধনবিষযং নিরূপযন্নাহ - - - - তত্র সংশোধনৈঃ স্থৌল্যবলপিত্তকফাধিকান্| আমদোষজ্বরচ্ছর্দিরতীসারহৃদামযৈঃ||১২|| বিবন্ধগৌরবোদ্গারহৃল্লাসাদিভিরাতুরান্| মধ্যস্থৌল্যাদিকান্ প্রাযঃ পূর্বং পাচনদীপনৈঃ||১৩|| এভিরেবামযৈরার্তান্ হীনস্থৌল্যবলাদিকান্| ক্ষুত্তৃষ্ণানিগ্রহৈর্দোষৈস্ত্বার্তান্ মধ্যবলৈর্দৃঢান্||১৪|| সমীরণাতপাযাসৈঃ কিমুতাল্পবলৈর্নরান্| |১৫|

স০-লঙ্ঘযেদিতি বর্ততে| তত্র-তেষু লঙ্ঘনীযেষু মধ্যে, সংশোধনাখ্যৈর্লঙ্ঘনৈঃ স্থৈল্যাদ্যধিকান্ তথা, আমদোষাদিভিরার্তান্ লঙ্ঘযেত্| মধ্যেত্যাদি| তথা মধ্যস্থৌল্যবলপিত্তকফানেভিরেব- আমদোষাদিভির্গদৈরাতুরান্ প্রাযঃ পূর্বং পাচনদীপনৈর্লঙ্ঘনভেদৈর্লঙ্ঘযেত্| প্রাযোগ্রহণং দেশকালাদ্যপেক্ষযা নিযমস্যাসর্ববিষযত্বজ্ঞাপনার্থম্| হীনস্থৌল্যবলাদিকাংস্তু সতঃ ক্ষুত্তৃষ্ণানিগ্রহৈঃ-বুভুক্ষাপিপাসাবেগবিধারণাখ্যৈর্লঙ্ঘনবিশেষৈর্লঙ্ঘযেত্| দোষৈঃ-বাতপিত্তকফৈর্মধ্যবলৈরার্তান্, তথা দৃঢান্-শক্তান্, সমীরণাদিভির্লঙ্ঘযেত্| আযাসো-ব্যাযামঃ| কিমুত-কিংপুনঃ ? অল্পবলৈর্দোষৈরার্তান্ সমীরণাদিভির্লঙ্ঘযেত্| সুতরাং হীনবলৈরার্তান্ লঙ্ঘযেদেবেত্যর্থঃ|

Adhikarana la~gghanIyAn na bRuMhayet (15) · Śloka 15

| ন বৃংহযেল্লঙ্ঘনীযান্|১৫|

স০-লঙ্ঘনীযান্-লঙ্হ্ঘনার্হান্ মেহামদোষাদিযুতান্, ন বৃংহযেত্|

Adhikarana bRuMhyAn mRudu la~gghayet (15-16) · Śloka 16

তর্হি বৃংহ্যস্য বাতলাদের্যদা জ্বরাদিব্যাধির্লঙ্ঘনসাধ্যো জাযতে, তদা কিং লঙ্ঘনং কার্যমুত বৃংহণম্ ? ইত্যত্র সংশযঃ| ইত্যাহ - - - - | বৃংহ্যাংস্তু মৃদু লঙ্ঘযেত্||১৫|| যুক্ত্যা বা দেশকালাদিবলতস্তানুপাচরেত্| |১৬|

স০-যে পুনর্বৃংহ্যাস্তান্ লঙ্ঘনসাধ্যামযার্তান্ মৃদু কৃত্বা লঙ্ঘযেত্,-মৃদুনা লঙ্ঘনপ্রকারেণাপতর্পযেদিত্যর্থঃ| যুক্ত্বা বাপ্রযোগেণ সন্তর্পণাপতর্পণব্যামিশ্রলক্ষণেন, দেশকালাদীনাং বলতঃ-অনুরোধেন, তানুপাচরেত্-উপক্রমেত্, বিনৈব লঙ্ঘনাদিত্যর্থঃ| আদিগ্রহণেন সত্ত্বসাত্ম্যাদিগ্রহণম্|

Adhikarana bRuMhitasya lakShaNam (16) · Śloka 16

বৃংহিতলঙ্ঘিতযোঃ কিং লক্ষণম্ ? ইত্যাহ - - - - | বৄংহিতে স্যাদ্বলং পুষ্টিস্তত্সাধ্যামযসঙ্ক্ষযঃ||১৬||

স০-বৃংহিতে সতি বলং পুষ্টিশ্চ স্যাত্| তথা, বৃংহণসাধ্যা য আমযাস্তেষাং সঙ্ক্ষযো-বিনাশঃ স্যাত্|

Adhikarana la~gghitasya lakShaNam (17-18) · Śloka 18

সম্প্রতি লঙ্ঘিতলক্ষণমাহ - - - - বিমলেন্দ্রিযতা সর্গো মলানাং লাঘবং রুচিঃ| ক্ষুত্তৃট্সহোদযঃ শুদ্ধহৃদযোদ্গারকণ্ঠতা||১৭|| ব্যাধিমার্দবমুত্সাহস্তন্দ্রানাশশ্চ লঙ্ঘিতে| |১৮|

স০-বিমলেন্দ্রিযতাদিস্তন্দ্রানাশশ্চেত্যন্তো গ্রন্থো লঙ্ঘিতলক্ষণম্| বিমলেন্দ্রিযতা-করণপাটবম্| ক্ষুত্তৃষোঃ সহ-এককালমুদযঃ| শুদ্ধহৃদযেতি| হৃদযং চোদ্গারশ্চ কণ্ঠশ্চ হৃদযোদ্গারকণ্ঠম্, শুদ্ধং চ তদ্ধৃদযোদ্গারকণ্ঠং চ তস্য ভাবঃ হৃদযোদ্গারকণ্ঠতা| বিমলেন্দ্রিযতাদীনাং পদানামসমস্তানাং নির্দেশো দোষদেশাদ্যনুরোধেনৈকস্য দ্বযোস্ত্রিচতুরাণাং বহুতরাণাং বা সর্বেষাং চ লঙ্হ্ঘিতলক্ষণত্বং ভবেত্, ন ত্বেকস্য দ্বযোর্বহূনাং চোত্পত্তৌ লঙ্ঘিতলক্ষণত্বং ভবেত্, মুনিরপ্যনেনৈব হেতুনঽসমাসেনৈব লক্ষণং ব্যধত্ত| যথা (চ. সূ. অ. ২২|৩৪) - "বাতমূত্রপুরীষাণাং বিসর্গে গাত্রলাঘবে| হৃদযোদ্গারকণ্ঠাস্যশুদ্ধৌ তন্দ্রাক্লমে গতে|| স্বেদে জাতে রুচৌ চৈব ক্ষুত্পিপাসাসহোদযে| কৃতং লঙ্ঘনমাদেশ্যং নির্ব্যথে চান্তরাত্মনি||" ইতি|

Adhikarana atibRuMhitala~gghitayorlakShaNam (18-19) · Śloka 19

| অনপেক্ষিতমাত্রাদিসেবিতে কুরুতস্তু তে||১৮|| অতিস্থৌল্যাতিকার্শ্যাদীন্, বক্ষ্যন্তে চ সৌষধাঃ| |১৯|

স০-তে-বৃংহণলঙ্ঘনে, অনপেক্ষিতমাত্রাদিসেবিতে অতিস্থৌল্যাতিকার্শ্যাদীন্ কুরুতঃ| অনপেক্ষিতাশ্চ তে মাত্রাদযশ্চ-অনপেক্ষিতমাত্রাদযঃ, তৈঃ সেবিতে| মাত্রাদ্যনপেক্ষযা কৃতে ইত্যর্থঃ| তে চ-অতিস্থৌল্যাতিকার্শ্যাদযঃ, সৌষধাঃ-সভেষজাঃ, বক্ষ্যন্তে-পুরস্তাদ্ভণিষ্যন্তে|

Adhikarana atisthaulyAdayo rogAH (19) · Śloka 19

অথাতিবৃংহিতলঙ্ঘিতযোঃ কিং লক্ষণম্ ? ইত্যাহ - - - - | রূপং তৈরেব চ জ্ঞেযমতিবৃংহিতলঙ্ঘিতে||১৯||

স০-অতিবৃংহিতশ্চাতিলঙ্ঘিতশ্চেত্যেকবদ্ভাবঃ| অতিবৃংহিতেঽতিলঙ্ঘিতে চ তৈরেব-অতিস্থৌল্যাদিভিঃ, তথাঽতিকার্শ্যাদিভিশ্চ, রূপং-বৃংহণলঙ্ঘনাতিযোগলক্ষণং বেদ্যম্| চশব্দঃ সমুচ্যযে|

Adhikarana atisthaulyAdInAmupakramaH (20-21) · Śloka 21

তানেবাতিস্থৌল্যাদীনাহ - - - - অতিস্থৌল্যাপচীমেহজ্বরোদরভগন্দরান্| কাসসন্ন্যাসকৃচ্ছ্রামকুষ্ঠাদীনতিদারুণান্||২০|| অথৈষামতিস্থৌল্যাদীনামুপক্রমমাহ - - - - তত্র মেদোনিলশ্লেষ্মনাশনং সর্বমিষ্যতে| |২১|

স০-অতিবৃংহিতমতিস্থৌল্যাদীন্ কুরুতে| 'অতিবৃংহিতং কুরুতে' ইত্যনুপাত্তেনাপি প্রকৃতত্বাদত্র কর্তৃপদেন ক্রিযাপদেন চ সম্বন্ধঃ কার্যঃ| অত এব তদপেক্ষযাঽতিস্থৌল্যাদীনাং দ্বিতীযা| অথবা যোগ্যতযৈবানুপাত্তেনাপি সম্বন্ধঃ ক্রিযাদিনা ভবত্যেব, সুকবিলক্ষণস্যৈবংস্থিতত্বাত্| তথা চ ভগবতো ব্যাসস্য-"যশ্চ নিম্বং পরশুনা যশ্চৈনং মধুসর্পিষা| যশ্চৈনং গন্ধমাল্যেন সর্বস্য কটুরেব সঃ||" ইতি| অত্র হি ছেদসেকালঙ্করণক্রিযাপেক্ষযা নিম্বাদীনাং দ্বিতীযাঽর্থসম্বন্ধশ্চ| স০-তত্র-তেষ্বতিস্থৌল্যাদিষু, মেদোনিলশ্লেষ্মনাশনং সর্বং-অন্নপানৌষধমিষ্যতে|

Adhikarana triphalAdayashctvArH prayogAH, rasA~jjanAdayashcatvAraH prayogAH, viDa~ggAdiyogaH (21-24) · Śloka 24

কিং তত্ ? ইতি ব্রূতে - - - - | কুলত্থজূর্নশ্যামাকযবমুদ্গমধূদকম্||২১|| মস্তুদণ্ডাহতারিষ্টচিন্তাশোধনজাগরম্| মধুনা ত্রিফলাং লিহ্যাদ্গুডূচীমভযাং ধনম্||২২|| রসাঞ্জনস্য মহতঃ পঞ্চমূলস্য গুগ্গুলোঃ| শিলাজতুপ্রযোগশ্চ সাগ্নিমন্থরসো হিতঃ||২৩|| বিডড্গং নাগরং ক্ষারঃ কাললোহরজো মধু| যবামলকচূর্ণং চ যোগোঽস্থৌল্যদোষজিত্||২৪||

স০-কুলত্থাদিকং স্থূলাযেষ্যতে| জূর্ণঃ-তৃণধান্যবিশেষো দক্ষিণাপথে জোন্ধলক ইতি প্রসিদ্ধঃ| দণ্ডাহতং-মথিতম্| ত্রিফলাদীনামন্যতমং মধুনা লিহ্যাত্| তথা, রসাঞ্জনাদেশ্চ প্রযোগোঽগ্নিমন্থরসসহিতো হিতঃ, অতিস্থূলাযেতি প্রকৃতেন যোজ্যম্| বিডঙ্গাদিযোগঃ সর্বসমভাগোঽতিস্থৌল্যদোষজিত্|

Adhikarana vyoShAdiyogaH (25-28) · Śloka 28

ব্যোষকট্বীবরাশিগ্রুবিডঙ্গাতিবিষাস্থিরাঃ| হিড্গুসৌবর্চলাজাজীযবানীধান্যচিত্রকাঃ||২৫|| নিশে বৃহত্যৌ হপুষা পাঠা মূলং চ কেম্বুকাত্| এষাং চূর্ণং মধু ঘৃতং তৈলং চ সদৃশাংশকম্||২৬|| সক্তুভিঃ ষোডশগুণৈর্যুক্তং পীতং নিহন্তি তত্| অতিস্থৌল্যাদিকান্ সর্বান্ রোগানান্যাংশ্চ তদ্দ্বিধান্||২৭|| হৃদ্রোগকামলাশ্বিত্রশ্বাসকাসগলগ্রহান্| বুদ্ধিমেধাস্মৃতিকরং সন্নস্যাগ্নেশ্চ দীপনম্||২৮||

স০-ব্যোষাদীনি দ্রব্যাণি চতুর্বিংশতিঃ পরস্পরসমভাগানীত্যেকো ভাগঃ, তত্সমো মধুনো দ্বিতীযো ভাগঃ, ঘৃতস্য তৃতীযঃ, তৈলস্য চতুর্থঃ, এষাং সর্বেষাং মিশ্রীভূতানাং ষোডশগুণা যবসক্তবঃ| তদেতত্পীতমতিস্থৌল্যাদিকান্ পূর্বোক্তান্ সর্বান্ রোগান্নিহন্তি| অন্যাংশ্চ তথা বিধান্ রোগান্-বৃংহণোত্থানিত্যর্থঃ| তথা, হৃদ্রোগাদীন্ নিহন্তি| তথা, বুদ্ধ্যাদিকরং সন্নস্য-মন্দস্যাগ্নের্দীপনং চ|

Adhikarana atikArshyAdayo rogAH (29-31) · Śloka 31

সাম্প্রতমতিলঙ্ঘনোত্থান্ রোগান্ সৌষধানাহ - - - - অতিকার্শ্যং ভ্রমঃ কাসস্তৃষ্ণাধিক্যমরোচকঃ| স্নেহাগ্নিনিদ্রাদৃক্শ্রোত্রশুক্রৌজঃক্ষুত্স্বরক্ষযঃ||২৯|| বস্তিহৃন্মূর্ধজঙ্ঘোরুত্রিকপার্শ্বরুজা জ্বরঃ| প্রলাপোর্ধ্বানিলগ্লানিচ্ছর্দিপর্বাস্থিভেদনম্||৩০|| বর্চোমূত্রগ্রহাদ্যাশ্চ জাযন্তেঽতিবিলঙ্ঘনাত্| |৩১|

স০-অতিকার্শ্যাদযোঽতিলঙ্ঘনাজ্জাযন্তে| স্নেহাদীনাং ক্ষযশব্দেন সমাসঃ, বস্ত্যাদীনাং চ রুজাশব্দেন| মূত্রগ্রহাদ্যাশ্চেত্যাদ্যশব্দেন নানাবিধানাং বাতরোগাণাং গ্রহণম্|

Adhikarana sthaulyApekShayA kArshyaM varam (31) · Śloka 31

যদ্যপি কার্শ্যাখ্যোঽযং মহান্ দোষঃ, তথা~পি স্থৌল্যমপেক্ষ্য বর এবেতি প্রতিপাদযন্নাহ - - - - | কার্শ্যমেব বরং স্থৌল্যাত্|৩১|

স০-অত্র চাতিকার্শ্যমেব বরমতিস্থৌল্যাদিতি বেদ্যম্, ন কার্শ্যমাত্রং স্থৌল্যমাত্রং বা| যস্মাদতিস্থূলাতিকৃশাবেব লঙ্ঘনবৃংহণাভ্যামুপক্রম্যাবত্র বিবক্ষিতৌ, ন স্থূলকৃশৌ সামান্যেন|

Adhikarana tatra kAraNam (31-32) · Śloka 32

কার্শ্যমেব স্থৌল্যাত্ কুতো বরম্ ? ইত্যাহ - - - - | ন হি স্থূলস্য ভেষজম্||৩১|| বৃংহণং লঙ্ঘনং বাঽলমতিমেদোগ্নিবাতজিত্| |৩২|

স০-যস্মাত্ স্থূলস্য ভেষজং বৃংহণং নালং-ন সমর্থম্, ন চ লঙ্ঘনং সমর্থম্| যস্মাত্স্থূলস্য ভেষজমতিমেদোগ্নিবাতজিত্| যন্মেদঃক্ষপণং তদগ্নিনাশকৃদ্বাতহৃচ্চ| স্থূলস্য হি বৃংহণেন মেদোঽতিতরামুপচীযতে, লঙ্ঘনেন চ মেদঃক্ষপণং ভবতি, কিন্ত্বগ্নিপবনাবস্যোপচীযতে| যস্মাত্ বৃংহণং-মাংসক্ষীরাদি, যচ্চ লঙ্ঘনং-কোদ্রবশ্যামাকাদি, তত্পূর্বস্মাদ্ধেতোঃ স্থূলস্য ন ভেষজম্|

Adhikarana dvitIyaM kAraNam (32-33) · Śloka 33

| মধুরস্নিগ্ধসৌহিত্যৈর্যত্সৌখ্যেন চ নশ্যতি||৩২|| ক্রশিমা স্থবিমাঽত্যন্তবিপরীতনিষেবণৈঃ| |৩৩|

স০-যত্-যস্মাত্, ক্রশিমা মধুরস্নিগ্ধতৃপ্তিভিঃ সৌখ্যেন-অনাযাসেন চ, নশ্যতি-শাম্যতি, তস্মাত্কার্শ্যং স্থৌল্যাদ্বরম্| যতশ্চ স্থবিমা-স্থূলত্বং, অত্যন্তবিপরীতনিষেবণৈঃ শাম্যতি| অত্যন্তং বিপরীতানি চ তানি নিষেবণানি চাত্যন্তবিপরীতনিষেবণানি তৈঃ,-তিক্তকটুকষাযপ্রাযৈঃ রূক্ষৈরন্নপানৌষধসেবনৈরিত্যর্থঃ| স্থূলকৃশযোশ্চ যদি বৃংহণসাদ্যস্তুল্যো ব্যাধিঃ স্যাত্, তার্হি স্থূলস্যোপক্রমবিরোধাত্তথা সুখেন ন শাম্যতি যথা কৃশস্য| লঙ্ঘনসাধ্যোঽপি বিসূচিকাদির্যাদি চৈতযোঃ স্যাত্, সোঽপি কৃশস্য শীঘ্রমুপশমং গচ্ছতি| স্থূলস্য তু বিরুদ্ধোপক্রমত্বাত্ দুঃখেন শাম্যতি| তথা হি-অত্র প্রধানোপক্রমঃ স্বেদঃ, স চ তাবন্ন ঘটতে| "ন স্বেদযেদতিস্থূলম্" (হৃ. সূ. অ. ১৭|২১) ইতি নিষেধাত্| অথৈনং লঙ্ঘযতি তদা (সঙ্গ্রহে সূ. অ. ২৪) - "স্রোতঃসু মেদোরুদেষু বাযুঃ কোষ্ঠে বিশেষতঃ| চরন্ প্রজ্বলযত্যগ্নিং ক্ষুতৃষৌ স্তস্ততোঽধিকম্| স্থূলং কোটরবদ্দৃদ্ধৌ দহতোঽগ্ন্যনিলৌ চ তৌ||" ইত্যাদি ন্যাযাদ্বাতসখেনাগ্নিনা বনস্যেবাস্য মহতি ব্যাপদুত্পদ্যতে| অথ বৃংহণোপক্রমঃ ক্রিযতেঽস্য তদাঽঽমদোষো বর্ধেত| কৃশস্য ত্ববিরুদ্ধোপক্রমত্বাদ্বিসূচিকাদিঃ সুখেনোপক্রম্যঃ| তস্মাত্কার্শ্যমেব স্থৌল্যাদ্বরম্| ক্রশিমেতি কৃশশব্দাত্পৃথ্বাদিপাঠাদিমনিচ্, রঋতো হলাদেরিতি রেফাদেশঃ| স্থবিমেতি দৃঢাদেরাকৃতিগণত্বাদিমনিজিতি কেচিত্| তস্মিংশ্চ সতি স্থূলদূরেতি যণাদিপরস্য লোপঃ, ঋকারস্য চ গুণঃ|

Adhikarana kArshyasya pradhAnauShadham (33) · Śloka 33

অথ কৃশে কীদৃশং ভেষজং যোজ্যম্ ? ইত্যাহ - - - - | যোজযেদ্ধৃংহণং তত্র সর্বং পানান্নভেষজম্||৩৩||

স০-তত্র-কৃশে, বৃংহণং সর্বং পানান্নৌষধং যোজ্যম্|

Adhikarana kArshyasya pradhAnatarauShadham (34-35) · Śloka 35

অচিন্তযা হর্ষণেন ধ্রুবং সন্তর্পণেন চ| স্বপ্নপ্রসঙ্গাচ্চ কৃশো বরাহ ইব পুষ্যতি||৩৪|| ন হি মাংসসমং কিঞ্চিদন্যদ্দেহবৃহত্ত্বকৃত্| মাংসাদমাংসং মাংসেন সম্ভৃতত্বাদ্বিশেষতঃ||৩৫||

স০-অচিন্তযা-চেতসঃ শোককার্যাদ্যনাকুলত্বেন, তথা হর্ষণেন-চিত্ততুষ্ট্যা, তথা সন্তর্পণেন-আহারবিশেষাদিনা বৃংহণেন, তথা স্বপ্নপ্রসঙ্গাত্-অতিনিদ্রাসেবনেন, কৃশঃ পুষ্যতি-সর্বোপচিতধাতুঃ সম্পদ্যতে| ক ইব ? বরাহ এব,-শূকরো যথা| অন্যেভ্যশ্চ পুষ্টিহেতুভ্যঃ কৃশবিষযে স্বপ্ন এব প্রধান ইতি দর্শযিতুং বরাহো দৃষ্টান্তত্বেনোপন্যস্তো গ্রন্থকৃতা| তথা হি-বরাহস্য স্বপ্নমন্তরেণ ন কশ্চিত্তথাবিধোঽভ্যবহারাদিরুপলভ্যতে, যথাঽসৌ পুষ্টোঽতিমেদুরো দৃশ্যতে| অতিস্থূলাতিকৃশযোশ্চ লক্ষণং মুনিনাঽভ্যধাযি (চ. সূ. অ. ২১|৯) - "মেদোমাংসাতিবৃদ্ধত্বাচ্চলস্ফিগুদরস্তনঃ| অযথোপচ্চযোত্সাহো নরোঽতিস্থূল উচ্যতে||" তথা (চ. সূ. অ. ২১|১৪)- "শুষ্কস্ফিগুদরগ্রীবো ধমনীজালসন্ততঃ| ত্বগস্থিশেষোঽতিকৃশঃ স্থূলপর্বা নরো মতঃ||" ইতি| স০-মাংসেন সমমপরং দেহবৃহত্ত্বকরং ন চ বিদ্যতে| সর্ববৃহত্ত্বকরেভ্যো মাংসমতিবৃংহণমিত্যর্থঃ| বিশেষেণ মাংসাদমাংসং দেহবৃহত্ত্বকৃত্| কুতঃ ? ইত্যাহ-মাংসেন সম্ভৃতত্বাত্,-পুষ্টত্ত্বাত্|

Adhikarana sthUlakRushayoH samAsenopakramaH, sthUlakRushayoryavagodhUmaM hitam (36) · Śloka 36

এবং বিস্তরেণ স্থূলকৃশযোরুপক্রমমুক্ত্বা সমাসেনাহ - - - - গুরু চাতর্পণং স্থূলে বিপরীতং হিতং কৃশে| যবগোধূমমুভযোস্তদ্যোগ্যাহিতকল্পনম্||৩৬||

স০-যদ্গুরু যচ্চাপতর্পণং, তত্সমাসেন স্থূলে হিতং মাক্ষিকশালূকাদি| এতাদ্ধি রৌক্ষ্যান্মেদঃ ক্ষপযতি, গৌরবাচ্চ শীঘ্রং জরাং ন গচ্ছতি| যদতো বিপরীতং-লঘু সন্তর্পণং চ, তদতিকৃশে হিতং শালিষষ্টিকৈণেযশশলাবকপিঞ্জলাদিকম্| অতিকৃশস্য হ্যগ্নিরপি কৃশো ভবতি| তস্মাদ্যপি তস্য গুর্বন্নপানৌষধমুপযুজ্যতে, ততোঽগ্নিসাদোঽস্য জাযতে| তথাঽস্য লঘু অপতর্পণমুপযুজ্যতে, তদ্ভূযঃ কার্শ্যাযাস্য স্যাত্| তস্মাল্লঘু সন্তর্পণং চ যত্তত্কৃশায হিতম্| গুরু চেত্যত্র চশব্দাল্লঘু চ যদতর্পণং শ্যামাককোরদূষাদিকং, তথাঽন্যদপি যন্ন গুরু ন চ লঘু মেদোঘ্নং জাগরব্যবাযব্যাযামচিন্তাদিকং, তচ্চ স্থূলে হিতমিতি গম্যতে| উভযোঃ-স্থূলকৃশযোর্যবগোধূমং হিতম্| কিম্ভূতং যবযোগধূমম্ ? ইত্যাহ-তদ্যোগ্যেত্যাদি| তযোঃ-স্থূলকৃশযোঃ, যোগ্যা-উচিতা, আহিতা-কৃতা, কল্পনা-সংযোগসংস্কারাদিনোপযোগোঽপাযো বা, যস্মিন্ যবগোধূমে, তদেবম্| যবাঃ স্থূলে হিতাঃ, গোধূমাঃ কৃশে, ইত্যর্থঃ| 'হিতযোগে চতুর্থী বক্তব্যা" ইত্যস্য প্রাযিকত্বাত্ স্থূলে হিতমিত্যত্র ন চতুর্থী| অন্যেঽপি হ্যেবং প্রযোগা দৃশ্যন্তে| যথা রুদ্রটস্য (কাব্যালঙ্কারে অ. ৫|১৪ টী.) - "সামাজা ধীমতাং হিতম্|" ইতি| তথাঽস্যৈব (হৃ. সূ. অ. ৬|২৯) - "বিলেপি গ্রাহিণী হৃদ্যা তৃষ্ণাঘ্নী দীপনী হিতা| ব্রণাক্ষিরোগসংশুদ্ধদুর্বলস্নেহপাযিনাম্||" ইতি|

Adhikarana bahavo~apyupakrama dvitvAnnAtiricyante (14) · Śloka 14

ননু, অতীসারজ্বরগুল্মাদীনামনেকরূপত্বাদনন্তা এবোপক্রমাঃ প্রাপ্তাঃ| তত্কথমুক্তম্ ? "উপক্রম্যস্য হি দ্বিত্বাদ্ধিধৈবোপক্রমো মতঃ| " ইতি| অত আহ - - - - দোষগত্যাঽতিরিচ্যন্তে গ্রাহিভেদ্যাদিভেদতঃ| উপক্রমা ন তে দ্বিত্বাদ্ভিন্না অপি গদা ইব||৩৭|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে দ্বিবিধোপক্রমণীযো নাম চতুর্দশোঽধ্যাযঃ||১৪||

স০-দোষাণাং-পৃথগ্রূপাণাং সংসর্গসন্নিপাতাদিতরতমভেদেনাঽঽনন্ত্যং যাতানাং যা গতিঃ, তথা তেষামেব স্থানবৃদ্ধিক্ষযলক্ষণা যা গতিঃ, তথা তির্যগূর্ধ্বাধোলক্ষণা যা গতিঃ, তথা শাখাকোষ্ঠাস্থিসন্ধিলক্ষণা চ যা গতিঃ, তযা| অতিরিচ্যন্তে-বহবো ভবন্ত্যুপক্রমাঃ| কথম্ ? ইত্যাহ-গ্রাহিভেদ্যাদিভেদতঃ,-গ্রাহী চ ভেদী চ গ্রাহিভেদিনৌ, তাবাদী যেষাং-রোগানুরোধান্নানাবিধানামুপক্রমাণাং, তে গ্রাহিভেদ্যাদযঃ, তেষাং ভেদো-বিশেষো, গ্রাহিভেদ্যাদিভেদঃ, তস্মাত্| যদ্যপ্যতিরিচ্যন্তে-অনন্তাঃ সম্পদ্যন্তে, তথাঽপি দ্বিত্বাত্-সন্তর্পণাপতর্পণরূপাত্, ন তেঽতিরিচ্যন্তে| সন্তর্পণরূপত্বমপতর্পণরূপত্বং বা বর্জযিত্বা ন তেষামুপক্রমাণাং রূপান্তরং সম্ভবতীত্যর্থঃ| কথমিব নাতিরিচ্যন্তে? ইত্যাহ-ভিন্না অপি গদা ইব| যথা,-বাতাদিদোষবশান্নানাবিধা অপি জ্বরাদযো বৃংহণলঙ্ঘনসাধ্যত্বং [সামত্বং নিরামত্বং বা ] নাতিবর্তন্তে, যথোপক্রমা অপীতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে দ্বিবিধোপক্রমণীযাধ্যাযশ্চতুর্দশঃ সমাপ্তঃ|| ১৪||