30. kṣārāgnikarmavidhiradhyāyaḥ

Adhikarana adhyAyopakramaH · Śloka

অতোঽনন্তরং ক্ষারাগ্নিকর্মবিধিরারভ্যতে| যথৈব হি শস্ত্রেণ পাটনাদীনি কৃত্বা তত্সাধ্য আময উপক্রম্যতে, তথৈব ক্ষারাগ্নিভ্যামিত্যাহ-

Adhikarana kShArAgnikarmavidhiradhyAyaH (2) · Śloka 2

অথাতঃ ক্ষারাগ্নিকর্মবিধিমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২|

সং-ক্ষারশ্চাগ্নিশ্চ ক্ষারাগ্নী, তযোঃ কর্ম ক্ষারাগ্নিকর্ম, তস্য বিধিঃ| শেষং পূর্ববত্| ক্ষারস্য বাহ্যাভ্যন্তরোপযোগিত্বেন পূর্বমুপন্যাসঃ|

Adhikarana kShAraprashaMsA (1-2) · Śloka 2

সর্বশস্ত্রানুশস্ত্রাণাং ক্ষারঃ শ্রেষ্ঠো বহূনি যত্| ছেদ্যভেদ্যাদিকর্মাণি কুরুতে বিষমেষ্বপি||১|| দুঃখাবচার্যশস্ত্রেষু তেন সিদ্ধিমযাত্সু চ| অতিকৃচ্ছ্রেষু রোগেষু যচ্চ পানেঽপি যুজ্যতে||২||

স ০ -সর্বাণি চ তানি শস্ত্রাণ্যনুশস্ত্রাণি চ তান্যেবম্, তেষাং সর্বশস্ত্রানুশস্ত্রাণাং মধ্যে ক্ষারঃ শ্রেষ্ঠো জ্যাযান্| কুতোঽস্য শ্রেষ্ঠতা ? ইত্যাহ-যত্-যস্মাত্, বহূনি ছেদ্যভেদ্যাদীনি কর্মাণ্যসৌ করোতি| আদিশব্দেন লেখনপাটনাদিপরিগ্রহঃ| বিষমেষ্বপি-দেহদেশেষু| দুঃখাবচার্যশস্ত্রেষু-নাসার্শোর্বুদাদিষু, দুঃখেনাবচারযিতুং শক্যং শস্ত্রং যেষু তেষু| অপিশব্দাত্ সমেষ্বপি দেহদেশেষু যুজ্যতে| তেন চ-শস্ত্রেণ চ, সিদ্ধিমযাত্সু-অসিধ্যত্সু দুষ্টব্রণেষু বহুশঃ প্রকোপিষু| কিম্ভূতেষু ? অতিকৃচ্ছ্রেষু-অতিদুঃখসাধ্যেষু দুষ্টব্রণাদিষু| চশব্দাদন্যেষ্বপি রোগোষ্বসৌ ক্ষারৌ যুজ্যতে-যোগ্যঃ সম্পদ্যতে, ততোঽপি হেতোঃ ক্ষারঃ শ্রেষ্ঠঃ| যচ্চেতি| যস্মাচ্চ ক্ষারঃ পানবিষযেঽপি যুজ্যতে শরীরান্তঃস্থিতরোগশান্ত্যৈ| অপিশব্দাদ্বাহ্যেঽপি বাহ্যস্থিতরোগশান্ত্যৈ লেপে স যুজ্যতে|

Adhikarana antaH parimArjanasya viShayaH (3) · Śloka 3

অধুনা ক্ষারস্য পেযলেপবিষযবিভাগং দর্শযতি- স পেযোঽর্শোগ্নিসাদাশ্মগুল্মোদরগরাদিষু| |৩|

স০-সঃ-ক্ষারঃ, অর্শঃসু বিষযে পেযঃ| তথাঽগ্নিসাদে, তথাশ্মর্যাং, গুল্মাদিষু চ| আদিগ্রহণাদানাহশূলাদিষু চ|

Adhikarana bahiH parimArjanasya viShayaH (3-4) · Śloka 4

| যোজ্যঃ সাক্ষান্মষশ্বিত্রবাহ্যার্শঃকুষ্ঠসুপ্তিষু||৩|| ভগন্দরার্বুদগ্রন্থিদুষ্টনাডীব্রণাদিষু| |৪|

সং-স ক্ষারো যোজ্যঃ সাক্ষাত্-লেপনেন, মষাদিষু| আদিগ্রহণাত্ চর্মকীলবর্ত্মতিলকাদিপরিগ্রহঃ|

Adhikarana dvayorapi kShArayorniShedhaH (4-8) · Śloka 8

| ন তূভযোঽপি যোক্তব্যঃ পিত্তে রক্তে চলেঽবলে||৪|| জ্বরেঽতিসারে হন্মূর্ধরোগে পাণ্ড্বামযেঽরুচৌ| তিমিরে কৃতসংশুদ্দ্ধৌ শ্বযথৌ সর্বগাত্রগে||৫|| ভীরুগর্ভিণ্যৃতুমতীপ্রোদ্বৃত্তফলযোনিষু| অজীর্ণেঽন্নে শিশৌ বৃদ্ধে ধমনীসন্ধিমর্মসু||৬|| তরুণাস্থিসিরাস্নাযুসেবনীগলনাভিষু| দেশেঽল্পমাংসে বৃষণমেঢ্রস্রোতোনখান্তরে||৭|| বর্ত্মরোগাদৃতেঽক্ষ্ণোশ্চ শীতবর্ষোষ্ণদুর্দিনে| |৮|

সং-পানলেপনভেদেন দ্বিধোঽপি ক্ষারঃ পিত্তাদৌ ন যোক্তব্যঃ| চলে-বাতে| অবলে-প্রাণাহীনে| { জ্বরে, অতিসারে, হৃদ্রোগে, মূর্ধরোগে, পাণ্ড্বামযে-পাণ্ডুরোগে, অরুচৌ-অরোচকে, কৃতসংশুদ্ধৌ-কৃতবমনবিরেকে, শ্বযথৌ সর্বগাত্রগে-সর্বাঙ্গে শূনে, তথা ভীরৌ, গর্ভিণ্যাম্, ঋতুমত্যাম্, } প্রোদ্বৃত্তফলযোনিঃ-বক্ষ্যমাণা উত্তরতন্ত্রে গুহ্যরোগবিজ্ঞানে| প্রকর্ষেণোদ্বৃত্তং ফলং-রজোরূপং, যস্যা যোনেঃ সা প্রোদ্বৃত্তফলযোনিঃ| রজ এব ফলং গর্ভাখ্যফলসাধনোপাযত্বাত্| প্রোদ্বৃত্তফলযোনের্লক্ষণমুক্তম্, যথা (হৃ. উ. অ. ৩৩|৩৩)-"বেগোদাবর্তনাদ্যোনিং প্রপীডযতি মারুতঃ| সা ফেনিলং রজঃ কৃচ্ছ্রাদুদাবৃত্তং বিমুঞ্চতি|| ইযং ব্যাপদুদাবৃত্তা" ইত্যাদি| তথা শিশৌ-বালে, বৃদ্ধে-গতবযসি| তথা ধমন্যাদিষু শরীরদেশেষু, দেশেঽল্পমাংসে-খল্পপিশিতে| তথা, বৃষণাদিষু শরীরদেশেষু| তথা, অক্ষ্ণোঃ-নেত্রযোঃ বর্ত্মরোগং বর্জযিত্বাঽন্যত্র ক্ষারো ন প্রযোজ্যঃ| বর্ত্মরোগে তু ক্ষারো যোজ্য এব| শীতবর্ষোষ্ণা ইতি হেমন্তশিশিরপ্রাবৃড্গ্রীষ্মাঃ, দুর্দিনং-মেঘাদ্যাকুলদিবসম্, এষু ক্ষারো ন যোজ্যঃ|

Adhikarana bahiH parimArjanasya dahanavidhiH galanavidhiH pAkavidhiH (8-20) · Śloka 20

অধুনা ক্ষারক্রিযামাহ | কালমুষ্ককশম্যাককদলীপারিভদ্রকান্||৮|| অশ্বকর্ণমহাবৃক্ষপলাশাস্ফোতবৃক্ষকান্| ইন্দ্রবৃক্ষার্কপূতীকনক্তমালাশ্বমারকান্||৯|| কাকজঙ্ঘামপামার্গমগ্নিমন্থাগ্নিতিল্বকান্| সার্দ্রান্ সমূলশাখাদীন্ খণ্ডশঃ পতিকল্পিতান্||১০|| কোশাতকীশ্চতস্রশ্চ শূকং নালং যবস্য চ| নিবাতে নিচযীকৃত্য পৃথক্ তানি শিলাতলে||১১|| প্রক্ষিপ্য মুষ্ককচযে সুধাশ্মানি চ দীপযেত্| ততস্তিলানাং কুতলৈর্দগ্ধ্বাঽগ্নৌ বিগতে পৃথক্||১২|| কৃত্বা সুধাশ্মনাং ভস্ম দ্রোণং ত্বিতরভস্মনঃ| মুষ্ককোত্তরমাদায প্রত্যেকং জলমূত্রযোঃ||১৩|| গালযেদর্ধভারেণ মহতা বাসসা চ তত্| যাবত্পিচ্ছিলরক্তাচ্ছস্তীক্ষ্ণো জাতস্তদা চ তম্||১৪|| গৃহীত্বা ক্ষারনিষ্যন্দং পচেল্লৌহ্যাং বিঘট্টযন্| পচ্যমানে ততস্তস্মিংস্তাঃ সুধাভস্মশর্করাঃ||১৫|| শুক্তীঃ ক্ষীরপকং শঙ্খানাভীশ্চাযসভাজনে| কৃত্বাঽগ্নিবর্ণান্বহুশঃ ক্ষারোত্থে কুডবোন্মিতে||১৬|| নির্বাপ্য পিষ্ট্বা তেনৈব প্রতীবাপং বিনিক্ষিপেত্| শ্লক্ষ্ণং শকৃদ্দৃক্ষশিখিগৃধ্রকঙ্ককপোতজম্||১৭|| চতুষ্পাত্পক্ষিপিত্তালমনোহ্বালবণানি চ| পরিতঃ সুতরাং চাতো দর্ব্যা তমবঘট্টযেত্||১৮|| সবাষ্পৈশ্চ যদোত্তিষ্ঠেদ্বুদ্বুদৈর্লেহবদ্ধনঃ| অবতার্য তদা শীতো যবরাশাবযোমযে||১৯|| স্থাপ্যোঽযং মধ্যমঃ ক্ষারো| |২০|

সং-কালমুষ্ককো-মোক্ষঃ| অশ্বকর্ণঃ-কুশিকঃ| মহাবৃক্ষঃ-স্নুহী| আস্ফোতো-গিরিকর্ণিকা| বৃক্ষকো-নন্দীবৃক্ষঃ| ইন্দ্রবৃক্ষঃ-কুটজঃ| পূতীকঃ-পূতীকরঞ্জঃ| নক্তমালঃ-করঞ্জঃ| অশ্বমারঃ-করবীরঃ| কালমুষ্ককাদীন্ মূলাদিসহিতান্ খণ্ডং খণ্ডং কল্পিতান্-পরশ্বাদিনা ছিন্নান্| তথা কোশাতকীশ্চতস্রো, যবস্য চ শূকং নালং-যবস্য শূকো নালোঽবযবো ভবতি, তাংশ্চ নিবাতে দেশে শিলাতলে-শিলাপৃষ্ঠে, পৃথক্ মুষ্ককাদীন্নিচযীকৃত্য, মুষ্ককচযে চ সুধাশ্মানি-সুধাশর্করাঃ, প্রক্ষিপ্য দীপযেত্-জ্বালযেত্| কৈঃ ? তিলানাং কুতলৈঃ-কাণ্ডৈঃ| সুধাশ্মানি চেতি নপুংসকত্বং চিন্ত্যম্| পৃথগ্দীপনে চৈষামচিন্ত্যপ্রভাবঃ| এবং তানি দগ্ধ্বাঽনন্তরমগ্নৌ বিগতে সুধাশ্মনাং ভস্ম দ্রোণং পৃথক্কৃত্বা-ব্যস্তং সংস্থাপ্য, ইতরভস্মনঃ-শম্যাকাদিদ্রব্যভস্মনো, দ্রোণমাদায-গৃহীত্বা| কিম্ভূতং দ্রোণম্ ? মুষ্কক উত্তরঃ-অধিকো, যস্য তমাদায, জলমূত্রযোঃ প্রত্যেকমর্ধভারেণ তত্-ভস্ম, গালযেত্| কথং গালযেত্ ? মহতা-বিস্তীর্ণেন, বাসসা| কিযন্তং কালম্ ? যাবত্ ক্ষারনিষ্যন্দঃ-ক্ষারস্রাবঃ, পিচ্ছিলরক্তাচ্ছস্তথা তীক্ষ্ণো জাতঃ-সম্পন্নঃ, তদা-তস্মিম্কালে, তং-ক্ষারনিষ্যন্দং, গৃহীত্বা লৌহ্যাং স্নেহপাকবিধিনা পচেত্| কিং কুর্বন্ ? দর্ব্যা-খজকসংজ্ঞযা, বিঘট্টযন্-আলোডযন্| ততঃ-অনন্তরং, তস্মিন্-ক্ষারনিষ্যন্দে, পচ্যমানে তাঃ-প্রাক্ স্থাপিতাঃ সুধাভস্মশর্করাঃ, { যা মুষ্ককমধ্যে প্রক্ষিপ্য দত্তাঃ,} তথা শুক্তীঃ-প্রাণিবিশেষাস্থীনি, তথা ক্ষীরপকং-প্রলেপকং (?) খটিকাসংজ্ঞম্, তথা শঙ্খনাভীশ্চাগ্নিবর্ণান্ কৃত্বা, ক্ষারোত্থে-ক্ষারনিষ্যন্দে, কুডবোন্মিতে-পলাষ্টকপরিমাণে ক্বথিতক্ষারোত্থে, আযসভাজনে- তীক্ষ্ণলোহপাত্রগতে, বহুশঃ-বহূন্ বারান্, নির্বাপ্য-শীতীকৃত্য, তেনৈব-ক্ষারনিষ্যন্দেন, দৃষদি পিষ্ট্বা তস্মিন্পচ্যমানে ক্ষারনিষ্যন্দে, প্রতীবাপং বিনিক্ষিপেত্| দ্রবদ্রব্যে দ্রব্যান্তরং শ্লক্ষ্ণপিষ্টং দীযতে স প্রতীবাপ উচ্যতে| ন চ কেবলমেষ এব প্রতীবাপত্বেন ক্ষেপ্তব্যো যাবত্ দক্ষাদীনামপি শকৃত্ শ্লক্ষ্ণং কৃত্বা বিনিক্ষিপেত্| দক্ষঃ-কুক্কুটঃ| (শিখী-মযূরঃ| গৃধ্রঃ-শ্যেনঃ| কঙ্ককপোতকৌ-পক্ষিণৌ| } তথা চতুষ্পদাং-গবাদীনাং, তথা পক্ষিণাং পিত্তং, তথা হরিতালমনোহ্বালবণানি চ { অলং-হরিতালম্| মনোহ্বা-মনঃশিলা| লবণং-সৈন্ধবাদি| এতানি } শ্লক্ষ্ণানি কৃত্বা প্রতীবাপং বিনিক্ষিপেত্| অতঃ-প্রতীবাপাদনন্তরং, পরিতঃ-সমন্তাত্, দর্ব্যা তমবঘট্টযেত্| সবাষ্পৈরিত্যাদি| যদা-যস্মিন্ কালে, স ক্ষারনিষ্যন্দঃ সবাষ্পৈঃ-সোষ্মভিঃ, বুদ্বুদৈর্ঘনো লেহ ইবোত্তিষ্ঠেত্-উদ্গচ্ছেত্, যদা {সান্দ্রতযা পচ্যমানঃ সন্ লেহতুল্যো } দর্বীপ্রলেপী স্যাদিত্যর্থঃ| তদা-তস্মিন্ কালে অযোমযে-লোহভাণ্ডে, স্থিতো যবরাশৌ স্থাপ্যঃ| কিং কৃত্বা ? অবতার্য চুল্লীতঃ, তথা শীতঃ সন্| অযং মধ্যমঃ ক্ষারঃ|

Adhikarana mRudutIkShNakShArayorvisheShaH (20-22) · Śloka 22

ন তু পিষ্ট্বা ক্ষিপেন্মৃদৌ| নির্বাপ্যাপনযেত্তীক্ষ্ণে পূর্ববত্ প্রতিবাপনম্||২০|| তথা লাঙ্গলিকাদন্তিচিত্রকাতিবিষাবচাঃ| স্বর্জিকাকনকক্ষীরিহিঙ্গুপূতীকপল্লবাঃ||২১|| তালপত্রী বিডং চেতি, সপ্তরাত্রাত্পরং তু সঃ| যোজ্যঃ|২২|

স০ -মৃদৌ ক্ষারে সুধাদীনি নির্বাপ্য-তস্মিন্নিষ্যন্দে প্রক্ষিপ্যৈব, অপনযেত্-বিসর্জযেত্, ন তু পিষ্ট্বা বিনিক্ষিপেত্| তীক্ষ্ণে ক্ষারে পূর্ববত্-মধ্যমক্ষারতুল্যং, প্রতিবাপনং-নির্বাপ্য পিষ্ট্বা বিনিক্ষিপেদিতি| ন চৈতাবদেবাত্র প্রতিবাপনমিত্যাহ-তথেত্যাদি| লাঙ্গলিকাদীনি বিডপর্যন্তানি চ তত্র প্রতিবাপং বিনিক্ষিপেত্| সপ্তরাত্রাত্ পরং-অনন্তরং, সঃ-ক্ষারো, যোজ্যঃ|

Adhikarana kShAratraye viShayatrayam (22-23) · Śloka 23

ইতি ক্ষারত্রৈবিধ্যমুক্ত্বা তদ্বিষযং নির্দিদিক্ষুরাহ- | তীক্ষ্ণোঽনিলশ্লেষ্মমেদোজেষ্বর্বুদাদিষু||২২|| মধ্যেষ্বেষ্বেব মধ্যোঽন্যঃ পিত্তাস্রগুদজন্মসু| বলার্থং ক্ষীণপানীযে ক্ষারাম্বু পুনরাবপেত্||২৩||

স০-তীক্ষ্ণঃ ক্ষারো বাতশ্লেষ্মমেদঃসমুত্থেষ্বর্বুদাদিষু যোজ্যঃ| মহত্স্বেব যোজ্যঃ, মধ্যেষু, ক্ষারান্তরবিধানাত্| আদিগ্রহণাদন্যেষ্বপি তত্সাধ্যেষু রোগেষ্বযং ক্ষারো যোজ্যঃ| মধ্যেষ্বেষ্বেবেতি| এষ্বেব-অনিলকফমেদোজেষু বিকারেষ্বর্বুদাদিষু, মধ্যেষু-নোত্কৃষ্টেষু নাপি হীনেষু, মধ্যঃ ক্ষারো যোজ্যঃ| অন্য ইতি| অন্যো- মৃদঃ ক্ষারঃ, পিত্তরক্তসমুত্থেষ্বর্শঃসু যোজ্যো, ন তীক্ষ্ণমধ্যৌ ক্ষারৌ| বলার্থমিত্যাদি| ক্ষীণপানীযে-ঘনীভূতে ক্ষারে, বলার্থং-বলাধানার্থং, পুনঃ-ভূযঃ, ক্ষারাম্বু-ক্ষারবিধিস্রুতং জলম্ , আবপেত্-দদ্যাত্|

Adhikarana kShAraguNAH (24-26) · Śloka 26

অধুনা ক্ষারগুণানাহ নাতিতীক্ষ্ণমৃদুঃ শ্লক্ষ্ণঃ পিচ্ছিলঃ শীঘ্রগঃ সিতঃ| শিখরী সুখনির্বাপ্যো ন বিষ্যন্দী ন চাতিরুক্||২৪|| ক্ষারো দশগুণঃ শস্ত্রতেজসোরপি কর্মকৃত্| আচূষন্নিব সংরম্ভাদ্গাত্রমাপীডযন্নিব||২৫|| সর্বতোঽনুসরন্ দোষানুন্মূলযতি মূলতঃ| কর্ম কৃত্বা গতরুজঃ স্বযমেবোপশাম্যতি||২৬||

স০-[ ক্ষারে নাতিতীক্ষ্ণাদযো দশ গুণা ভবন্তি|] শীঘ্রং গচ্ছতি-আশু ব্যাপ্নোতীতি শীঘ্রগঃ| শিখরী-উপরিষ্টাত্পিটিকাবান্| মুখেন-কাঞ্জিকাদিনা, নির্বাপ্যতে-শীতীক্রিযতে, ইতি সুখনির্বাপ্যঃ| বিষ্যন্দোঽস্যাস্তীতি বিষ্যন্দী-স্রুতিমান্, ন বিষ্যন্দী-ন স্রুতিমান্| ন চাতিরুক্-ন চার্তিমান্| নাতিতীক্ষ্ণাদযো দশ গুণা যস্য স দশগুণঃ ক্ষারঃ| সঙ্গ্রহে চাস্য দশৈব দোষা গদিতাঃ| তদ্যথা (সূ. অ. ৩৯)- "অত্যুষ্ণোঽতিশীতোঽতিতীক্ষ্ণোঽতিমৃদুরতিতনুরতিঘনোঽতিপিচ্ছিলোঽতিবসর্পী হীনৌষধো হীনপাকশ্চেতি|" ইতি| শস্ত্রস্য যত্কর্ম-ছেদনপাটনলেখনাদিকং, তথা তেজসো-বহ্নেরপি, যত্কর্ম-ব্যাধ্যুপশমলক্ষণং, তত্করোতি| অধুনা ত্বন্তরানুভবদ্বারেণ ক্ষারস্য গুণান্নির্দিশতি-আচূষন্নিবেত্যাদি| সংরম্ভাত্-ক্ষোভাত্, গাত্রমাচূষন্নিব, তথাঽঽপীডযন্নিব, তথা সর্বতঃ-সর্বস্মিন্, অনুসরন্-গচ্ছন্, দোষান্-তত্সাধ্যান্, মূলত উন্মূলযতি-উদ্ধরতি| তথা, কর্ম-স্বীযং দাহাদিকং, কৃত্বা গতরুজঃ-পুরুষস্য, স্বযমেব-যত্নং বিনৈব, উপশাম্যতি|

Adhikarana kShAraprayogaH (27-28) · Śloka 28

ক্ষারসাধ্যে গদে ছিন্নে লিখিতে স্রাবিতেঽথবা| ক্ষারং শলাকযা দত্ত্বা প্লোতপ্রাবৃতদেহযা||২৭|| মাত্রাশতমুপেক্ষেত| |২৮|

স ০ -ক্ষরসাধ্যে ব্যাধাবর্শোর্বুদাদৌ ছেদাদৌ [ ছিন্নে-দ্বিধাকৃতে, লিখিতে-শস্ত্রেণ বিঘৃষ্টে, স্রাবিতে-প্রচ্ছাদ্য নির্হৃতশোণিতে, ] কর্মণি কৃতে ক্ষারো যোজ্যো, নাকৃতে ছেদাদৌ, ইতি ক্ষারস্য বিষযো দর্শিতঃ| ক্ষারং শলাকযা দত্ত্বা মাত্রাশতমুপেক্ষেত, ন কাঞ্জিকাদিনা নির্বাপণং কার্যমিত্যর্থঃ| কিম্ভূতযা শলাকযা ? প্লোতেন-চৈলখণ্ডেন, প্রাবৃতঃ-স্থগিতো, দেহঃ বিগ্রহো যস্যাঃ|

Adhikarana arshaHsu visheShaH (28) · Śloka 28

তত্রার্শঃস্বাবৃতাননম্| হস্তেন যন্ত্রং কুর্বীত|২৮|

স০-তত্র ক্ষারসাধ্যেষ্বর্শঃসু ক্ষারপাতনং কৃত্বা মাত্রাশতং যাবত্তাবদ্ধস্তেন যন্ত্রমাবৃতাননং-ছাদিতমুখং, কুর্যাত্|

Adhikarana vartmarogeShu visheShaH (28-29) · Śloka 29

| বর্ত্মরোগেষু বর্ত্মনী||২৮|| নির্ভুজ্য পিচুনাঽঽচ্ছাদ্য কৃষ্ণভাগং বিনিক্ষিপেত্| পদ্মপত্রতনুঃ ক্ষারলেপো, ঘ্রাণার্বুদেষু চ||২৯||

স০-ক্ষারসাধ্যেষু বর্ত্মরোগেষু বর্ত্মনী নির্ভুজ্য-কুটিলীকৃত্য, ততঃ ক্ষারস্পর্শপরিহারায পিচুনা-কার্পাসাদিমযেন, কৃষ্ণভাগং-তারকপ্রদেশং, আচ্ছাদ্য ক্ষারং বিনিক্ষিপেত্| তত্র চ পদ্মপত্রতনুঃ ক্ষারলেপো দেযঃ, ন গুদার্শঃস্বিব ঘনঃ| পদ্মপত্রমিব তনুরিতি "উপমানানি সামান্যবচনৈঃ" ইতি সমাসঃ| ঘ্রাণার্বুদেষু চ পদ্মপত্রতনুঃ ক্ষারলোপো যোজ্যঃ| কথং তত্র লেপো দেযঃ ? ইত্যাহ-

Adhikarana GrANArbudeShu visheShaH (30) · Śloka 30

প্রত্যাদিত্যং নিষণ্ণস্য সমুন্নম্যাগ্রনাসিকাম্| মাত্রা বিধার্যঃ পঞ্চাশত্|৩০|

স০-প্রত্যাদিত্যং-রবিসম্মুখং, নিষণ্ণস্য-সংস্থিতস্য| তথা, অগ্রে নাসিকা-অগ্রনাসিকা, তামুন্নম্য-উত্ক্ষিপ্য| কিযন্তং কালং লেপো ধার্যঃ ? ইত্যাহ| মাত্রাঃ পঞ্চাশদ্বিধার্যঃ| বর্ত্মসু চাল্পতরা মাত্রাঃ স্থানস্য সুকুমারত্বাত্|

Adhikarana karNArshaHsu visheShaH (30) · Śloka 30

| তদ্বদর্শসি কর্ণজে||৩০||

স০-কর্ণজেঽর্শসি তদ্বত্-তেন ঘ্রাণার্বুদেন তুল্যম্, স এব পদ্মপত্রতনুঃ ক্ষারলেপস্তা এব পঞ্চাশন্মাত্রা ধার্যঃ|

Adhikarana kShAraprayogAnantaraM kRutyam (31-32) · Śloka 32

ক্ষারং প্রমার্জনেনানু পরিমৃজ্যাবগম্য চ| সুদগ্ধং ঘৃতমধ্বক্তং তত্পযোমস্তুকাঞ্জিকৈঃ||৩১|| নির্বাপযেত্ততঃ সাজ্যৈঃ স্বাদুশীতৈঃ প্রদেহযেত্| অভিষ্যন্দীনি ভোজ্যানি ক্লেদনায চ||৩২||

স০-অনু-পশ্চাত্ ক্ষারলেপদাননিযমিতাত্কালাদনন্তরং, ক্ষারং প্রমার্জনেন-চৈলাদিনা, পরিমৃজ্য-শোধযিত্বা, সুদগ্ধং ক্ষারস্থানমর্শোর্বুদাদ্যধিষ্ঠানমবগম্য-সম্যগ্দাহলক্ষণেন জ্ঞাত্বা, তত্-ক্ষারদগ্ধং স্থানং, ঘৃতমধুলেপিতং কৃত্বা পযঃপ্রভৃতিভির্নিবাপযেত্-শীতীকুর্যাত্| ততঃ-অনন্তরং, স্বাদুশীতৈর্দ্রব্যৈঃ-মধুযষ্টিকাদিভিঃ, সাজ্যৈঃ-সঘৃতৈঃ, লেপযেত্| অভিষ্যন্দীনি-স্রুতিরূপশ্লেষ্মকারীণি, ভোজ্যানি-অন্নপানানি মাষদধ্যাদীনি, ভোজ্যানি-ভক্ষযিতব্যানি| কিমর্থম্ ? ক্লেদনায-ক্ষারদগ্ধস্থানবিশরণায| যতঃ ক্ষারদগ্ধং ক্লিন্নং সচ্ছীর্যতে|

Adhikarana sudagdhe~apyashIrNe kRutyam (33-34) · Śloka 34

যদি চ স্থিরমূলত্বাত্ক্ষারদগ্ধং ন শীর্যতে| ধান্যাম্লবীজযষ্ট্যাহ্বতিলৈরালেপযেত্ততঃ||৩৩|| তিলকল্কঃ সমধুকো ঘৃতাক্তো ব্রণরোপণঃ| |৩৪|

স০-যদি চ ক্ষারদগ্ধমিভিষ্যন্দিভিরপি ভোজ্যৈরুপযুক্তৈঃ স্থিরমূলত্বাত্-দৃঢমূলত্বাত্, তদ্রোগাধিষ্ঠানং ন শীর্যতে, ততো ধান্যাম্লস্য বীজং-অবযববিশেষঃ, তেন তথা মধুকতিলাভ্যাং চালেপযেত্| তিলকল্কো মধুযষ্টিযুক্তো ঘৃতান্বিতো ব্রণস্য রোপণঃ|

Adhikarana sudagdhalakShaNam (34) · Śloka 34

| পক্বজম্ব্বসিতং সন্নং সম্যগ্দগ্ধম্|৩৪|

স০-পক্বজম্বূফলবদসিতং-কৃষ্ণং, তথা সন্নং-নিম্রং, সম্যগ্দগ্ধং স্থানং বিদ্যাত্|

Adhikarana durdagdhalakShaNam (34-35) · Śloka 35

| বিপর্যযে||৩৪|| তাম্রতাতোদকণ্ড্বাদ্যৈর্দুর্দগ্ধম্| |৩৫|

স০-বিপর্যযে-পক্বজম্ব্বসিতাদিলক্ষণবিপর্যযে, তথা তাম্রতাতোদকণ্ড্বাদ্যৈঃ, আদিগ্রহণাত্ শোফবিস্ফোটাদিভিঃ, দুর্দগ্ধং স্থানং বিদ্যাত্|

Adhikarana durdagdhe punardAhaH (35) · Śloka 35

তং পুনর্দহেত্| |৩৫|

স০-তং-তথাভূতং জ্ঞাত্বা, পুনর্দহেত্-ভূযস্তত্র ক্ষারং পাতযেত্, দাহায|

Adhikarana atidagdhalakShaNam (35) · Śloka 35

| অতিদগ্ধে স্রবেদ্রক্তং মূর্চ্ছাদাহজ্বরাদযঃ||৩৫||

স০-অতিদগ্ধে সতি রক্তং স্রবেত্| তথা, মূর্চ্ছাদযো জাযন্তে| আদিগ্রহণাদ্বিসর্পশোফৌষবিস্ফোটাদযোঽপি|

Adhikarana gudAtidagdhalakShaNam (36) · Śloka 36

গুদে বিশেষাদ্বিণ্মূত্রসংরোধোঽতিপ্রবর্তনম্| পুংস্ত্বোপঘাতো মৃত্যুর্বা গুদস্য শাতনাদ্ধ্রুবম্||৩৬||

স০-গুদেঽতিদগ্ধে বিশেষেণ বিণ্মূত্রযোঃ সংরোধঃ, তথা তযোরেবাতিপ্রবর্তনং কদাচিদ্ভবতি| বিশেষগ্রহণাত্ পূর্বোক্তা রক্তস্রাবাদযোঽপি| তথা, পুংস্ত্বোপঘাতঃ-শুক্রক্ষযাত্কান্তাগমনাসামর্থ্যম্| অথবা, গুদস্য শাতনাত্-বিদারণাত্, নিশ্চযেন মৃত্যুর্ভবেত্

Adhikarana nAsAtidagdhalakShaNam (37) · Śloka 37

নাসাযাং নাসিকাবংশদরণাকুঞ্চনোদ্ভাবঃ| ভবেচ্চ বিষযাজ্ঞানম্|৩৭|

স০-নাসাযাং ক্ষারাতিদগ্ধাযাং নাসিকাবংশস্য দরণাকুঞ্চনে উদ্ভবতঃ| তথা, বিষযাজ্ঞানং-গন্ধস্যাবেদনং চ ভবেত্|

Adhikarana shrotrAdyatidagdhalakShaNam (37) · Śloka 37

| তদ্বচ্ছ্রোত্রাদিকেষ্বপি||৩৭||

স০-তদ্বত্-তেন ক্ষারাতিদগ্ধনাসিকাবিষযাজ্ঞানেন তুল্যং, ক্ষারাতিদগ্ধেষু শ্রোত্রাদিকেষু-শ্রোত্রচক্ষূরসনেষু স্থানেষু, বিষযাজ্ঞানং স্যাত্|

Adhikarana atidagdhe pratIkAraH (38-1) · Śloka 1

বিশেষাদত্র সেকোঽম্লৈর্লেপো মধু ঘৃতং তিলাঃ| বাতপিত্তহরা চেষ্টা সর্বৈব শিশিরা ক্রিযা||৩৮|| অম্লো হি শীতঃ স্পর্শেন ক্ষারস্তেনোপসংহিতঃ| যাত্যাশু স্বাদুতাং তস্মাদম্লৈর্নির্বাপযেত্তরাম্||৩৯|| (বিষগ্নিশস্ত্রাশনিমৃত্যুতুল্যঃ ক্ষারো ভবেদল্পমতিপ্রযুক্তঃ| স ধীমতা সম্যগনুপ্রযুক্তো রোগান্নিহন্যাদিচিরেণ ঘোরান্)||১||

স০-তস্মিন্নতিক্ষারদগ্ধে বিশেষেণাম্লৈঃ-কাঞ্চিকাদিভিঃ, সেকো হিতঃ| মধুঘৃততিলাশ্চ লেপ ইষ্টঃ| তথা সর্বৈব চ শিশিরা ক্রিযা বাতপিত্তহরা চেষ্টা| সঙ্গ্রহে চোক্তম্ (সূ. অ.৩৯)- "পাযযেতাতিযোগেঽত্র তং শীঘ্রং সঘৃতং দধি| সগুডং বা দধিসরং তৈলং বা সসিতোপলম্||" ইতি| অম্ল ইত্যাদি| তস্মাদ্ধেতোঃ ক্ষারদগ্ধমম্লৈঃ-কাঞ্জিকাদিভিঃ, নির্বাপযেত্তরাম্| যস্মাদম্লঃ শীতঃ স্পর্শেন| তেন চ-অম্লেন, ক্ষার উপসংহিতো-যুক্তঃ, আশ্বেব কটুকলবণভূযিষ্ঠতাম্ ত্যক্ত্বা স্বাদুতাং যাতি| তরাংগ্রহণমতিশযেনাম্লৈর্নির্বাপযেত্ দেশসাত্য্মানুরোধাত্ কদাচিত্ ক্ষীরাদিভিরপীতি গমযতি| ইতি ক্ষারবিধিঃ| অগ্নিকর্মবিধিমাহ-

Adhikarana agniprashaMsA (40) · Śloka 40

অগ্নিঃ ক্ষারাদপি শ্রেষ্ঠস্তদ্দগ্ধানামসম্ভবাত্| ভেষজক্ষারশস্ত্রৈশ্চ ন সিদ্ধানাং প্রসাধনাত্||৪০||

স০-ক্ষারাদপ্যগ্নেঃ প্রশস্যতরত্বম্| কুতঃ ? তেন-অগ্নিনা, দগ্ধানাং রোগাণামর্শঃপ্রভৃতিনামসম্ভবাত্| ভূযোঽগ্নিদগ্ধো রোগঃ প্ররোহং ন যাতি, মূলাদুন্মূলনাদিত্যর্থঃ| ভেষজক্ষারশস্ত্রৈশ্চ যে রোগা ন শান্তাস্তেষাং বহ্নিনা সাধনাত্ জ্বলনো জ্যাযান্|

Adhikarana agnidAhyAnya~ggAni (41) · Śloka 41

ত্বচি মাংসে সিরাস্নাযুসন্ধ্যস্থিষু স যুজ্যতে| |৪১|

স০-সঃ-অগ্নিদাহঃ ত্বগাদিষু যুজ্যতে|

Adhikarana tvagdAha viShayaH tvagdAhasAdhanAni (41-42) · Śloka 42

| মষাঙ্গগ্লানিমূর্ধার্তিমন্থকীলতিলাদিষু||৪১|| ত্বগ্দাহো বর্তিগোদন্তসূর্যকান্তশরাদিভিঃ| |৪২|

স০-তত্র মষাদিষু রোগেষু ত্বগ্দাহঃ কার্যো বর্ত্যাদিভিঃ| বর্তিঃ-পিচুবর্তিঃ| আদিগ্রহণাদন্যেষ্বপি ক্ষুদ্রোগাধ্যাযোক্তেষু ত্বগ্দাহো যোজ্যঃ| শরাদিভিরিত্যাদিগ্রহণাদন্যৈরপি দেশান্তরপ্রসিদ্ধৈস্ত্বগ্দাহঃ কার্যঃ|

Adhikarana mAMsadAhaviShayaH mAMsadAhasAdhanAni (42-43) · Śloka 43

| অর্শোভগন্দরগ্রন্থিনাডীদুষ্টব্রণাদিষু||৪২|| মাংসদাহো মধুস্নেহজাম্ববৌষ্ঠগুডাদিভিঃ| |৪৩|

স০-অর্শঃপ্রভৃতিষু রোগেষু মধুস্নেহাদিভির্মাংসদাহঃ কার্যঃ| আদিগ্রহণেনার্বুদগণ্ডমালাদযো গৃহ্যন্তে| তত্র কদাচিন্মধুনা, কদাচিত্পৃথক্স্নেহৈঃ, কদাচিজ্জাম্ববৌষ্ঠেন, জাম্ববৌষ্ঠঃ-শলাকাবিশেষো যন্ত্রবিধাবুক্তঃ (হৃ. সূ. অ. ২৫|২৬) যেন ক্ষারো দীযতে, কদাচিদ্গুডেন, কদাচিদেবংপ্রাযেণান্যেনাপি দেশবিশেষপ্রসিদ্ধেন|

Adhikarana sirAdidAhaviShayaH sirAdidAhasAdhanAniss (43-44) · Śloka 44

| শ্লিষ্টবর্ত্মন্যসৃক্স্রাবনীল্যসম্যগ্ব্যধাদিষু||৪৩|| সিরাদিদাহস্তৈরেব| |৪৪|

স০-শ্লিষ্টবর্ত্মাদিষু সিরাদিদাহঃ কার্যঃ| তৈরেব-মধুস্নেহাদিভিঃ|

Adhikarana agnidAhaniShedhaH (44) · Śloka 44

ন দহেত্ক্ষারবারিতান্| অন্তঃশল্যাসৃজো ভিন্নকোষ্ঠান্ ভূরিব্রণাতুরান্||৪৪||

স০-ক্ষারবারিতান্ ন দহেত্| ন কেবলং যেষু ক্ষারো বারিতস্তান্ ন দহেত্, যাবদন্তঃশল্যং তথাঽন্তর্লোহিতং যেষাং তান্, তথা ভিন্নঃ-শস্ত্রাদিনা, কোষ্ঠঃ-শরীরমধ্যো, যেষাং তান্, তথা ভূরিভির্ব্রণৈরার্তান্ [ চ ন দহেত্ ]|০

Adhikarana dAhAnantaraM kRutyam (45) · Śloka 45

সুদগ্ধং ঘৃতমধ্বক্তং স্নিগ্ধশীতৈঃ প্রদেহযেত্| |৪৫|

স০-সুদগ্ধং-অগ্নিনা রোগাধিষ্ঠানং জ্ঞাত্বা, ঘৃতমধুভ্যামভ্যক্তং কৃত্বা, স্নিগ্ধশীতৈঃ- মধুযষ্টিশালিমূলাদিভিঃ, প্রলেপযেত্|

Adhikarana sudagdhalakShaNam (45-46) · Śloka 46

| তস্য লিঙ্গং স্থিতে রক্তে শব্দবল্লসিকান্বিতম্||৪৫|| পক্বতালকপোতাভং সুরোহং নাতিবেদনম্| |৪৬|

স০-তস্যেত্যনেন সুদগ্ধং স্থানং পরামৃশ্যতে| তস্য-সুদগ্ধস্য স্থানস্য, লিঙ্গং-লক্ষণং, স্থিতে রক্তে-দহ্যমানাবস্থাপ্রবৃত্তাসৃজি নিবৃত্তে সতি, শব্দবত্-বুদ্বুদশব্দবত্, তত্স্থানং ভবেত্| তথা, লসিকান্বিতম্| লসিকা-কুশশস্ত্রাদিবিক্ষতে প্রথমং যা দৃশ্যতে জললবাকৃতিঃ| তথা, পক্বতালফলসদৃশম্, কদাচিত্কপোতসদৃশম্| সুখেন রোহতি-সুরোহম্| তথা, নাতিবেদনং-ন তীব্ররুক্|

Adhikarana durdagdhAtidagdhayorlakShaNam (46) · Śloka 46

| প্রমাদদগ্ধবত্সর্বং দুর্দগ্ধাত্যর্থদগ্ধযোঃ||৪৬||

স০-দুর্দগ্ধাত্যর্থদগ্ধযোঃ প্রমাদদগ্ধেন তুল্যং সর্বং লক্ষণং বোধ্যম্| ন চ লক্ষণমন্তরেণৈতত্সম্যগ্জ্ঞাযত ইতি তল্লক্ষণার্থং ভেদান্তরদর্শনার্থং বাঽঽহ-

Adhikarana pramAdadagdhaBedAH (47) · Śloka 47

চতুর্ধা তত্তু তুচ্ছেন সহ| |৪৭|

স০-তত্-প্রমাদদগ্ধং, চতুষ্প্রকারম্| কথম্ ? তুচ্ছেন-তুচ্ছদগ্ধলক্ষণেন, সহ| অবিমৃশ্যদগ্ধং হি কদাচিত্ সম্যগ্দগ্ধলক্ষণং, কদাচিদ্দুর্দগ্ধলক্ষণম্, কদাচিদতিদগ্ধলক্ষণম্, কদাচিচ্চ তুচ্ছদগ্ধলক্ষণং স্যাত্|

Adhikarana tucCalakShaNam (47) · Śloka 47

তুছস্য লক্ষণম্| ত্বগ্বিবর্ণাষ্যতেঽত্যর্থং ন চ স্ফোটসমুদ্ভবঃ||৪৭||

স০-তুচ্ছস্য-তুচ্ছদগ্ধস্য লক্ষণমিতি কার্যে কারণোপচারাদেবমুক্তম্| ত্বগিত্যাদি| ত্বগ্বিবর্ণা| সত্যত্যর্থমুষ্যতে-রুজ্যতে, ন চ স্ফোটানাং সমুদ্ভূতিরিতি তুচ্ছদগ্ধস্থানস্য লক্ষণম্| যত্কিঞ্চিন্মাত্রমেবাগ্নিনা স্পৃষ্টং তত্তুচ্ছদগ্ধমিত্যুচ্যতে|

Adhikarana durdagdhalakShaNam (48) · Śloka 48

সস্ফোটদাহতীব্রোষং দুর্দগ্ধম্| |৪৮|

স০-যত্র প্রদেশে স্ফোটানামুদ্ভবো দাহযুক্তা তীব্রা ঊষারুজা, জাযতে, তদ্দুর্দগ্ধং রোগাধিষ্ঠানং বিদ্যাত্|

Adhikarana atidagdhalakShaNam (48-49) · Śloka 49

অতিদাহতঃ| মাংসলম্বনসঙ্কোচদাহধূপনবেদনাঃ||৪৮|| সিরাদিনাশস্তৃণ্মূর্চ্ছাব্রণগাম্ভীর্যমৃত্যবঃ| |৪৯|

স০-অতিদাহাদ্রোগাধিষ্ঠানস্য মাংসলম্বনাদযঃ স্যুঃ| [ সঙ্কোচঃ-সিরাদীনাম্| ধূপনং-ধূমাযনম্| বেদনা-রুজা| সিরাদীনাং নাশো-ব্যাপত্| ব্রণগাম্ভীর্যং-গম্ভীরব্রণতা| মৃত্যুঃ-মরণং চ| ]সম্যগ্দগ্ধলিঙ্গং তূক্তমেব "তস্য লিঙ্গং স্থিতে রক্তে" (শ্লো.৪৫) ইত্যাদিনা| তস্মাত্তত্পুনর্ন নির্দিষ্টম্| অধুনা চতুর্বিধস্যাস্য চিকিত্সিতমাহ-

Adhikarana tucCasyauShadham (49-50) · Śloka 50

| তুচ্ছস্যাগ্নিপ্রতপনং কার্যমুষ্ণং চ ভেষজম্||৪৯|| স্ত্যানেঽস্ত্রে বেদনাঽত্যর্থং বিলীনে মন্দতা রুজঃ| |৫০|

স০-তুচ্ছদগ্ধস্যাগ্নিনা প্রতপনং কার্যম্| তথা, উষ্ণম্ ভেষজং-ঔষধম্| রক্তস্য বিলযনার্থমেতত্| যতস্তুচ্ছদগ্ধেঽবশ্যং স্ত্যানমসৃগ্ভবতীতি যুক্ত্যা প্রতিপাদযন্নাহ-স্ত্যানেঽস্ত্র ইত্যাদি| লোহিতে স্ত্যানে সত্যতিশযেন রুগ্ভবতি| বিলীনে রক্তে পীডাযা মন্দতা-মন্দত্বং ভবতি| অতস্তুচ্ছদগ্ধেঽগ্নি প্রতপনং যোজ্যম্|

Adhikarana durdagdhasyauShadham (50) · Śloka 50

| দুর্দগ্ধে শীতমুষ্ণং চ যুঞ্জ্যাদাদৌ ততো হিমম্||৫০||

স০-দুর্দগ্ধে শীতমুষ্ণং চ পর্যাযেণৌষধম্| তত্রাদৌ-প্রথমং, হিমং ভেষজং যুঞ্জ্যাত্|

Adhikarana samyagdagdhasyauShadham (51) · Śloka 51

সম্যগ্দগ্ধে তবক্ষীরিপ্লক্ষচন্দনগৈরিকৈঃ| লিম্পেত্সাজ্যামৃতৈরূর্ধ্বং পিত্তবিদ্রধিবত্ক্রিযা||৫১||

স০-সম্যগ্দগ্ধে তবক্ষীর্যাদিভিলেপযত্| কিম্ভূতৈঃ ? সাজ্যামৃতৈঃ-ঘৃতগুডূচীযুক্তৈঃ| আদাবিত্যত্রাপি যোজ্যম্| আদৌ তৈর্লেপযেত্, ঊর্ধ্বং-অনন্তরং, পিত্তবিদ্রধিবত্ ক্রিযা কার্যেতি শেষঃ|

Adhikarana atidagdhasyauShadham (52) · Śloka 52

অতিদগ্ধে দ্রুতং কুর্যাত্সর্বং পিত্তবিসর্পবত্| |৫২|

স০-অতিদগ্ধে দ্রুতং-শীঘ্রমেব, সর্বং-বহিরন্তশ্চ ভেষজং, পিত্তবিসর্প ইব কুর্যাত্|

Adhikarana snehadagdhasyauShadham (52-1) · Śloka 1

| স্নেহদগ্ধে ভৃশতরং রূক্ষং তত্র তু যোজযেত্||৫২|| (শস্ত্রক্ষারাগ্নযো যস্মান্মৃত্যোঃ পরমমাযুধম্| অপ্রমত্তো ভিষক্ তস্মাত্তান্ সম্যগবচারযেত্)||১||

স০-স্নেহদগ্ধেঽতিতরাং রূক্ষং যোজযেত্| [ভৃশতরং রূক্ষং চাত্র ভেষজং তত্র তু যোজযেত্| তুশব্দান্ন কেবলং ] ভৃশতরগ্রহণাচ্চ বাহুল্যেন রূক্ষং [ প্রলেপাদি তত্র যোজযেত্ কিন্তু ] দেহদেশাদিসাত্ম্যবশাত্স্নিগ্ধমপি যথাবস্থং যথাযোগং যোজযেত্|

Adhikarana sUtrasthanasyopasaMhAraH (30) · Śloka 30

সমাপ্যতে স্থানমিদং হৃদযস্য রহস্যবত্| অত্রার্থাঃ সূত্রিতাঃ সূক্ষ্মাঃ প্রতন্যন্তে হি সর্বতঃ||৫৩|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা- যামষ্টাঙ্গহৃদযসংহিতাযাং সূত্রস্থানে ক্ষারাগ্নিকর্ম- বিধির্নাম ত্রিংশত্তমোঽধ্যাযঃ||৩০||

স০-বক্তব্যং যদ্বস্তু তস্য সর্বস্যৈবোক্তত্বাদিদং স্থানং সমাপ্যতে-নিষ্পাদ্যতে| কিম্ভূতং স্থানম্ ? রহস্যবত্, রহস্যং-অত্যর্থং গুহ্যরূপং, তদ্যস্যাস্তি তদ্রহস্যবত্| কস্য স্থানম্ ? হৃদযস্য| হৃদযশব্দেনাষ্টাঙ্গহৃদযমুপলক্ষ্যতে, যথা-সত্যভামা ভামেতি| কুত এতত্স্থানং রহস্যবত্ ? ইত্যাহ- সং-যস্মাদত্র-স্থানে, অর্থাঃ সূত্রিতাঃ-সূচিতাঃ| কিম্ভূতাঃ ? সূক্ষ্মাঃ,-তীক্ষ্ণতরমতিসমধিগম্যাঃ| যতস্তে এবার্থাঃ সর্বস্মিংস্তন্ত্রে প্রতন্যন্তে-বিস্তার্যন্তে| তস্মাদিদং স্থানং তন্ত্রসম্বন্ধিনামন্যস্থানানাং রহস্যবদিত্যুক্তমিতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটী- কাযাং সর্বাঙ্গসুন্দরাখ্যাযাং সূত্রস্থানে ক্ষারাগ্নিকর্মবিধি- র্নাম ত্রিংশত্তমোঽধ্যাযঃ সমাপ্তঃ|| ৩০||