10. rasabhēdīyādhyāyaḥ

Adhikarana adhyAyopakramaH · Śloka

স০-পূর্বস্মিন্নধ্যাযে (শ্লো. ১২)- "রসান্ ভেদৈরুত্তরত্রোপদেক্ষ্যতে" ইত্যুক্তম্, অতস্তান্ রসভেদান্ বক্তুং রসভেদীযাধ্যাযং ব্রূতে-

Adhikarana rasaBedIyAdhyAyaH (2) · Śloka 2

অথাতো রসভেদীযমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে||২||

স০-রসানাং ভেদো রসভেদঃ, তস্মৈ হিতো রসভেদীযঃ, তমধ্যাযং ব্যাখ্যাস্যামঃ-কথযিষ্যামঃ| "রসনার্থো রসঃ" ইতি মুনিঃ (চ. সূ. অ. ১|৬৩)| তথা, অব্যোনিঃ, অপামেব রসবত্ত্বাত্| তথা চ মুনিঃ (চ. সূ. অ. ২৫|১৩)- "আপো হি রসবত্যঃ" ইতি| অপাং চাত্র্যক্তরসত্বাত্ প্রতিব্যক্ত্যন্যাদৃশোঽন্যাদৃশো রসানাং মহাভূতবৈলক্ষণ্যজ আস্বাদ আস্বাদ্যতে| তথা চ, মধুররসাধিষ্ঠতানাং ক্ষীরদ্রাক্ষেক্ষুশর্করাদীনাং প্রতিব্যক্ত্যন্যাদৃশোঽন্যাদৃশো মধুররসাস্বাদ উপলভ্যতে, ন ত্বেকরূপঃ| এবমম্লানামারনালকোলাম্লীকাদীনামপি প্রতিদ্রব্যমনেকরূপ আস্বাদবিশেষ উপলভ্যতে, ন ত্বেক এব|

Adhikarana ShaDrasAnAmutpattiH (1) · Śloka 1

পূর্বং চ প্রত্যপাদি 'ষডেব রসাঃ' ইতি| তানেব লক্ষযতি- ক্ষ্মাম্ভোগ্নিক্ষ্মাম্বুতেজঃ খবায্বগ্ন্যনিলগোনিলৈঃ| দ্বযোল্বণৈঃ ক্রমাদ্ভূতৈর্মধুরাদিরসোদ্ভবঃ||১||

স০-পৃথিব্যাদিভির্মহাভূতৈর্দ্বযোল্বণৈঃ-হ্যাধিকৈঃ, ক্রমাত্-পরিপাট্যা, যথাসঙ্খ্যমিত্যর্থঃ, মধুরাদীনাং ষণ্ণাং রসানামুদ্ভবো-অভিনিবৃত্তির্ভবতি| দ্বযমুল্বণং যেষু ভূতেষু তানি দ্বযোল্বণানি, তৈঃ দ্বযোল্বণৈঃ| দ্বযোল্বণশব্দোপাদানাচ্চ দ্রব্যবদ্রসস্যাপি পাঞ্চভৌতিকত্বমিতি প্রতিপাদযতি| কতমত্ পুনর্ভূতদ্বযং কতমস্মিন্ রসেঽধিকমারম্ভকং স্যাদিতি যথাসঙ্খ্যেন দর্শযন্নাহ-ক্ষ্মাম্ভ ইত্যাদি| ভূমিজলাভ্যামধিকাভ্যাং মধুরঃ, ক্ষ্মাগ্নিভ্যামম্লঃ, অম্ব্বগ্নিভ্যাং লবণঃ, খবাযুভ্যাং তিক্তকঃ. অগ্নিবাযুভ্যাং কটুকঃ, ক্ষ্মানিলাভ্যাং কষাযঃ| ননু, যথা ভূমিতোযাধিক্যান্মধুরঃ, এবমম্বুবায্বাধিক্যাদন্যো ভূম্যাকাশাধিক্যাদন্য ইত্যেবমাদিবিকল্পৈরসঙ্খ্যেযরসপ্রসঙ্গঃ প্রাপ্নোতি| অত্রোচ্যতে| স্বভাবাদদোষঃ| এষাং ভূম্যাকাশাদীনামীদৃশঃ স্বভাবো যত্কেনচিদেব ভূতাধিক্যেন ব্যবস্থিতানি ভূম্যাদীনি রসান্তরোত্পাদনসমর্থানি ভবন্তি, ন সর্বেণেতি|

Adhikarana madhurarasalakShaNam (2-3) · Śloka 3

ননু, স্বলক্ষণং বিনাঽনুক্তো রসবিশেষঃ কথং জ্ঞাযতাম্ ? ইতি তল্লক্ষণার্থমাহ তেষাং বিদ্যাদ্রসং স্বাদু যো বক্ত্রমনুলিম্পতি| আস্বাদ্যমানো দেহস্য হ্লাদনোঽক্ষপ্রসাদনঃ||২|| প্রিযঃ পিপীলিকাদীনাম্| |৩|

স০-তেষাং-রসানাং মধ্যে, য আস্বাদ্যমানো বক্ত্রমনুলিম্পতি-মুখোপদেহং জনযতি, তথা দেহস্য হ্লাদনঃ-আশ্বাসকঃ, তথাঽক্ষাণাং-ইন্দ্রিযাণাং, প্রসাদনঃ-প্রসন্নত্বকৃত্, তথা পিপীলিকাদীনাং প্রিযঃ, তং মধুরং জানীযাত্| পিপীলিকাদীনাং প্রিয এতেনৈতদ্দর্শযতি,-প্রমেহাদিষু মূত্রত্বগাদৌ পিপীলিকোপসর্পণাত্ মাধুর্যানুমানং কৃত্বা মধুমেহত্বাদি জ্ঞাযতে| আস্বাদ্যমান ইত্যুত্তরত্রাপি যোজ্যম্|

Adhikarana amlarasalakShaNam (3) · Śloka 3

অম্লঃ ক্ষালযতে মুখম্| হর্ষণো রোমদন্তানামক্ষিভ্রুবনিকোচনঃ||৩||

স০-অম্লো রস আসাদ্যমানো মুখং ক্ষালযতে-স্রাবযতি| তথা, রোমদন্তানাং হর্ষণঃ-"হৃষু অলীকে" অলীককারী, উদ্বেজক ইত্যর্থঃ| তথা, অক্ষিভ্রুবনিকোচনঃ, অক্ষিণী চ ভ্রুবৌচাক্ষিভ্রুবম্, অচতুরাদিসূত্রে নিপাতিতম্|

Adhikarana lavaNarasalakShaNam (4) · Śloka 4

লবণঃ স্যন্দযত্যাস্যং কপোলগলদাহকৃত্| |৪|

স০-লবণো রসো মুখং স্যন্দযতি| তথা, কপোলযোর্গলে চ দাহং করোতি| অন্নস্য রোচন ইতীহাতিপ্রসিদ্ধত্বান্নোক্তম্| সঙ্গ্রহে তু স্পষ্টার্থমুক্তম্| যথা (সূ. অ. ১৮)- "কণ্ঠকপোলং বিদহতি, অন্নং প্ররোচযতি|" ইতি|

Adhikarana tiktarasalakShaNam (4) · Śloka 4

| তিক্তো বিশদযত্যাস্যং রসনং প্রতিহন্তি চ||৪||

স০-তিক্তো মুখং বিশদযতি-অপৈচ্ছিল্যযুক্তং করোতি| রসনেন্দ্রিযং চ প্রতিহন্তি-অন্যরসগ্রহণশক্তিং নাশযতীত্যর্থঃ|

Adhikarana kaTurasalakShaNam (5) · Śloka 5

উদ্বেজযতি জিহ্বাগ্রং কুর্বংশ্চিমিচিমাং কটুঃ| স্রাবযত্যক্ষিনাসাস্য কপোলৌ দহতীব চ||৫||

স০-কটুরাস্বাদ্যমানো জিহ্বাগ্রমুদ্বেজযতি-সোদ্বেগং করোতি| চিমিচিমাং কুর্বন্-দহনজ্বালাসংস্পর্শাদিবাক্ষ্যাদি স্রাবযতি| গণ্ডৌ চ দহতীব|

Adhikarana kaShAyarasalakShaNam (6) · Śloka 6

কষাযো জডযেজ্জিহ্বাং কণ্ঠস্রোতোবিবন্ধকৃত্| |৬|

স০-কষাযো জিহ্বাং জডযতি-রসাদিক্রিযাযাং মন্দীকরোতি| তথা, কণ্ঠস্য স্রোতাংসি-শিরাবিশেষাঃ, তেষাং বিবন্ধং করোতি| শ্বাসাদীনামযথাপ্রবৃত্তিমিব কুরুত ইত্যর্থঃ|

Adhikarana madhurasasya karmANi (6-9) · Śloka 9

| রসানামিতি রূপাণিকর্মাণিমধুরো রসঃ||৬|| আজন্মসাত্ম্যাত্কুরুতে ধাতূনাং প্রবলং বলম্| বালবৃদ্ধক্ষতক্ষীণবর্ণকেশেন্দ্রিযৌজসাম্||৭|| প্রশস্তো বৃংহণঃ কণ্ঠ্যঃ স্তন্যসন্ধানকৃদ্গুরুঃ| আযুষ্যো জীবনঃ স্নিগ্ধঃ পিত্তানিলবিষাপহঃ||৮|| কুরুতেঽপ্যুপযোগেন স মেদঃশ্লেষ্মজান্ গদান্| স্থৌল্যাগ্নিসাদসন্ন্যাসমেহগণ্ডার্বুদাদিকান্||৯||

স০-ইতি-পরিসমাপ্তৌ| রসানাং মধুরদীনাং রূপাণি-লক্ষণানি সমাপ্তানি| সম্প্রতি তেষাং কর্ম যথাস্বং প্রদর্শযন্নাহ- স০-কর্মাণীতি| বক্ষ্যমাণানীতি বাক্যশেষঃ| অথ কো রসঃ কিং কর্ম করোতি ? ইত্যাহ- স০-মধুরো রসো ধাতূনাং বলং প্রবলং কুরুতে-প্রকৃষ্টতযা শক্ত্যা যুক্তং বলং জনযেত্, নিজং বলং যত্ তত্প্রকৃষ্টং জনযতীত্যর্থঃ| কুতঃ ? আজন্মসাত্ম্যাত্,-জন্মপ্রভৃতি দেহস্য সাত্ম্যাদিত্যর্থঃ| বালভাব এব হি ক্ষীরাদিনা পুরুষস্য বৃত্তিঃ| তথা, বালাদীনাং প্রশস্তো-হিতঃ| ওজসোঽধিকবর্ধনত্বাত্ প্রশস্তঃ| "ওজস্তু তেজো ধাতূনাং শুক্রান্তানাং পরং স্মৃতম্|" ইত্যোজোলক্ষণং (হৃ. সূ. অ. ১১|৩৭) বক্ষ্যতি| তথা, বৃংহণঃ কণ্ঠ্যশ্চ| স্তন্যং-ক্ষীরম্, সন্ধানং-শ্লেষঃ, তে করোতীতি স্তন্যসন্ধানকৃত্ গুরুশ্চ| তথা, আযুষ্যাদিগুণঃ| ননু, আযুষ্যজীবনযোরেকার্থত্বাদেকতরোপাদানমেব যুক্তম্| মৈবম্| এতযোর্ভিন্নার্থত্বাত্| তথা হি,-আযুষ্যঃ স উচ্যতে যোঽপরিমিতাযুষো হিতঃ, অধিকাযুষো হেতুত্বাত্| তথা চ মুনিঃ-(চ. সূ অ. ১|২৫)- "তেনাযুরমিতং লেভে" ইতি| যস্ত্বাযুষো নিযতরূপস্য তামেব মর্যাদামনুবধ্নাতি, স জীবযতীতি জীবন উচ্যতে| তদনযোঃ স্পষ্ট এব ভেদঃ| তথা, জীবনমোজস্যমিত্যভিন্নার্থৌ, কিন্ত্বেতযোরপীহ যদুপাদানং তদোজসো দ্বিবিধাযা অপি বৃদ্ধেঃ কারকোঽযমিতি প্রতিপাদযিতুম্| তথা চ,-মধুরো রসো রুধিরাদিক্রমেণৌজসো বৃদ্ধিকরঃ সামান্যাদ্বিশেষাচ্চ| যথা,-ক্ষীরং ধাতুবর্ধনমুক্তং বৃষ্যং চ| তত্র ধাতুবর্ধনত্বেনৈব বৃষ্যত্বস্যোক্তত্বাদ্বৃষ্যশব্দোপাদানং যান্যন্যানি বৃষ্যাণি দ্রব্যাণ্যাত্মগুপ্তাদীনি, তেভ্যঃ সকাশাদ্বিশেষেণাশ্বেববৃদ্ধিকরমিতি দ্যোতযিতুং কৃতমিতি| কুরুত ইত্যাদি| সঃ-মধুরো রসঃ, অত্যুপযোগেন-অতিসেবযা, মেদঃশ্লেষ্মোত্থান্ রোগান্ করোতি| কাংস্তান্ ? ইত্যাহ-স্থৌল্যাদিকান্|

Adhikarana amlarasakarmANi (10-12) · Śloka 12

অম্লোঽগ্নিদীপ্তিকৃত্স্নিগ্ধো হৃদ্যঃ পাচনরোচনঃ| উষ্ণবীর্যো হিমস্পর্শঃ প্রীণনঃ ক্লেদনো লঘুঃ||১০|| করোতি কফপিতাস্রং মূঢবাতানুলোমনঃ| সোঽত্যভ্যস্তস্তনোঃ কুর্যাচ্ছৈথিল্যং তিমিরং ভ্রমম্||১১|| কণ্ডুপাণ্ডুত্ববীসর্পশোফবিস্ফোটতৃড্জ্বরান্| |১২|

স০-অম্লো রসোঽগ্নিদীপ্তিকৃত্ত্বাদিযুতঃ| তথা, কফপিত্তাস্রং করোতি| মূঢং-অননুলোমগং, বাতমনুলোমযতীতি-মূঢবাতানুলোমনঃ| সঃ-অম্লো রসো, অতিসেবিতো দেহশৈথিল্যং তিমিরাদীংশ্চ কুর্যাত্|

Adhikarana lavaNarasakarmANi (12-14) · Śloka 14

| লবণঃ স্তম্ভসঙ্ঘাতবন্ধবিধ্মাপনোঽগ্নিকৃত্||১২|| স্নেহনঃ স্বেদনস্তীক্ষ্ণো রোচনশ্ছেদভেদকৃত্| সোঽতিযুক্তোঽস্রপবনং খলতিং পলিতং বলিম্||১৩|| তৃট্রকূষ্ঠবিষবীসর্পান্ জনযেত্ক্ষপযেদ্ধলম্| |১৪|

স০-লবণো রসঃ স্তম্ভাদিবিধ্মাপনো বহ্নিকৃত্ত্বাদিযুতশ্চ| সোঽত্যভ্যস্তো বাতরক্তাদীন্ জনযেত্| বলং-প্রাণং ক্ষপযেত্|

Adhikarana tiktarasakarmANi (14-16) · Śloka 16

| তিক্তঃ স্বযমরোচিষ্ণুররুচিং কৃমিতৃড্বিষম্||১৪|| কুষ্ঠমূর্চ্ছাজ্বরোত্ক্লেশদাহপিত্তকফান্ জযেত্| ক্লেদমেদোবসামজ্জশকৃন্মূত্রোপশোষণঃ||১৫|| লঘুর্মেধ্যো হিমো রূক্ষঃ স্তন্যকণ্ঠবিশোধনঃ| ধাতুক্ষযানিলব্যাধীনতিযোগাত্করোতি সঃ||১৬||

স০-তিক্তো রসঃ স্বযং মুখস্যারোচনশীলঃ অরুচ্যাদীন্ জযেত্| অরুচিঃ-আহারদ্রব্যবিষযেঽনভিলাষঃ| স চ ক্লেদাদীনামুপশোষণঃ| তথা, লঘ্বাদিগুণযুক্তঃ| সোঽতিসেবিতো ধাতুক্ষযাদীন্ করোতি|

Adhikarana kaTurasakarmANi (17-19) · Śloka 19

কটুর্গলামযোদর্দকুষ্ঠালসকশোফজিত্| ব্রণাবসাদনঃ স্নেহমেদঃক্লেদোপশোষণঃ||১৭|| দীপনঃ পাচনো রুচ্যঃ শোধনোঽন্নস্য শোষণঃ| ছিনত্তি বন্ধান্ স্রোতাংসি বিবৃণোতি কফাপহঃ||১৮|| কুরুতে সোঽতিযোগেন তৃষ্ণাং শুক্রবলক্ষযম্| মূর্চ্ছামাকুঞ্চনং কম্পং কটিপৃষ্ঠাদিষু ব্যথাম্||১৯||

স০-কটুর্গলামযাদীন্ জযতি| ব্রণস্যাবসাদনো-রোহণঃ| স্নেহাদিবিশোষণো দীপনত্বাদিগুণযুক্তশ্চ| অন্নং শোষযতি-বিদহতি| অন্নশোষণত্বাচ্ছিনত্তি বন্ধান্| স্রোতাংসি বিবৃণোতি-প্রসারযতি| কফঘ্নশ্চ| সোঽতিনিষেবিতস্তৃষ্ণাদীন্ করোতি|

Adhikarana kaShAyarasakarmANi (20-22) · Śloka 22

কষাযঃ পিত্তকফহা গুরুরস্রবিশোধনঃ| পীডনো রোপণঃ শীতঃ ক্লেদমেদোবিশোষণঃ||২০|| আমসংস্তম্ভনো গ্রাহি রূক্ষোঽতি ত্বক্প্রসাদনঃ| করোতি শীলিতঃ সোঽতি বিষ্টম্ভাধ্মানহৃদ্রুজঃ||২১|| তৃট্কার্শ্যপৌরুষভ্রংশস্রোতোরোধমলগ্রহান্| |২২|

স০-কষাযঃ পিত্তকফঘ্নো গুরুত্বাদিযুতোঽতিশযেন ত্বক্প্রসাদনশ্চ| সোঽপ্যুপযুক্তো বিষ্টম্ভাদীন্ করোতি|

Adhikarana madhuraskandhaH (22-25) · Śloka 25

অথ মধুরাদিস্কন্ধান্নির্দিশতি- | ঘৃতহেমগুডাক্ষোডমোচচোচপরূষকম্||২২|| অভীরুবীরাপনসরাজাদনবলাত্রযম্| মেদে চতস্রঃ পর্ণিন্যো জীবন্তী জীবকর্ষভৌ||২৩|| মধূকং মধুকং বিম্বী বিদারী শ্রাবণীযুগম্| ক্ষীরশুক্লা তুগাক্ষীরী ক্ষীরিণ্যৌ কাশ্মরী সহে||২৪|| ক্ষীরেক্ষুগোক্ষুরক্ষৌদ্রদ্রাক্ষাদির্মধুরো গণঃ| |২৫|

স০-হেম-কাঞ্হ্চনম্| রাজাদনঃ-চাষপ্রিযম্| বলাত্রযং-বলাঽতিবলা নাগবলেতি| মেদা মহামেদেতি-মেদাদ্বযম্| চতস্রঃ পর্ণিন্য ইতি শালিপর্ণী পৃশ্নিপর্ণী মুদ্গপর্ণী মাষপর্ণী চ| মধূকং-মধূকপুষ্পম্| মধুকং-মধুযষ্টী| বিম্বী-গোল্হা| শ্রাবণীযুগং-শ্রাবণী মহাশ্রাবণী চ| ক্ষীরিণী-কাঞ্চনক্ষীরী| কাশ্মরী-গম্ভারী| সহে-মহাসহা, ক্ষুদ্রসহা চ| আদিশব্দেন তৃণপঞ্চমূলমেদোমজ্জতৈলমধুরদাডিমপুষ্করবীজশৃঙ্গাটকাশ্বগন্ধাশ্বদংষ্ট্রামৃণালকশেরুকসিঞ্-চতিকাখর্জূরীতালমস্তকাদীনি গৃহ্যন্তে|

Adhikarana amlaskandhaH (25-26) · Śloka 26

ইদানীমম্লস্কন্ধমাহ | অম্লো ধাত্রীফলাম্লীকামাতুলুঙ্গাম্লবেতসম্||২৫|| দাডিমং রজতং তক্রং চুক্রং পালেবতং দধি| আম্রমাম্রাতকং ভব্যং কপিত্থং করমর্দকম্||২৬||

স০-ধাত্রীফলং-আমলকম্| রজতং-রৌপ্যম্| চুক্রং-শুক্তম্| উপলক্ষণং চেদম্| সঙ্গ্রহোক্তান্যন্যান্যপি কোশাম্রলকুচকুবলকোলবদরৈরাবতপ্রাচীনামলকমস্তুধান্যাম্লাদীনীহৈব বোধ্যানি|

Adhikarana lavaNaskandhaH (27) · Śloka 27

লবণস্কন্ধমাহ বরং সৌবর্চলং কৃষ্ণং বিডং সামুদ্রমৌদ্ভিদম্| রোমকং পাংসুজং শীসং ক্ষারশ্চ লবণো গণঃ||২৭||

স০-বরং-সৈন্ধবম্, লবণশ্রেষ্ঠত্বাত্| ক্ষারঃ-স্বর্জিকাদিঃ|

Adhikarana tiktaskandhaH (28-30) · Śloka 30

তিক্তস্কন্ধমাহ- তিক্তঃ পটোলী ত্রাযন্তী বালকোশীরচন্দনম্| ভূনিম্বনিম্বকটুকাতগরাগুরুবত্সকম্||২৮|| নক্তমালদ্বিরজনীমুস্তমূর্বাটরূষকম্| পাঠাপামার্গকাংস্যাযোগুডূচীধন্বযাসকম্||২৯|| পঞ্চমূলং মহদ্ব্যাঘ্র্যৌ বিশালাঽতিবিষা বচা| |৩০|

স০-নক্তমালঃ-করঞ্জঃ কাংস্যং-লোহভেদঃ| অযো-লোহম্|

Adhikarana kaTuskandhaH (30-31) · Śloka 31

কটুস্কন্ধমাহ | কটুকো হিড্গুমরিচকৃমিজিত্পঞ্চকোলকম্||৩০|| কুঠেরাদ্যা হরিতকাঃ পিত্তং মূত্রমরুষ্করম্| |৩১|

স০-পিত্তং মূত্রং ছাগাদীনাম্| উপলক্ষণং চেদম্| অন্যানি চ সঙ্গ্রহোক্তানি মনঃশিলাসর্ষপকুষ্ঠাদীনি বোধ্যানি|

Adhikarana kaShAyaskandhaH (31-32) · Śloka 32

কষাযস্কন্ধমাহ- | বর্গঃ কষাযঃ পথ্যাঽক্ষং শিরীষঃ খদিরো মধু||৩১|| কদম্বোদুম্বরং মুক্তাপ্রবালাঞ্জনগৈরিকম্| বালং কপিত্থং খর্জূরং বিসপদ্মোত্পলাদি চ||৩২||

স০-আদিশব্দেন প্রিযঙ্গুরোধ্রকট্বঙ্গাদীনি গৃহ্যন্তে|

Adhikarana madhurasya shleShmakaratvApavAdaH (33) · Śloka 33

ইদানীমেষাং গুণনিরূপণং করোতি মধুরং শ্লেষ্মলং প্রাযো জীর্ণাচ্ছালিযবাদৃতে| মুদ্গাদ্গোধূমতঃ ক্ষৌদ্রাত্সিতাযা জাঙ্গলামিষাত্||৩৩||

স০-প্রাযেণ মধুরং দ্রব্যং কফকৃদ্ভবতি, শাল্যাদীন্ পুরাণান্ বর্জযিত্বা| প্রাযোগ্রহণং তৈলমকুষ্টাদৌ ব্যভিচারদর্শনাত্| এবমুত্তরত্রাপি প্রাযোগ্রহণস্য প্রযোজনং বেদ্যম্|

Adhikarana amlasya pittakaratvApavAdaH (34) · Śloka 34

প্রাযোঽম্লং পিত্তজননং দাডিমামলকাদৃতে| |৩৪|

স০-অম্লং দ্রব্যং প্রাযঃ পিত্তকৃত্, দাডিমামলকে হিত্বা|

Adhikarana lavaNasyAcakShuShyApavAdaH (34) · Śloka 34

| অপথ্যং লবণং প্রাযশ্চক্ষুষোঽন্যত্র সৈন্ধবাত্||৩৪||

স০-লবণং দ্রব্যং প্রাযশ্চক্ষুষোঽপথ্যম্, সৈন্ধবং বর্জযিত্বা|

Adhikarana tiktakaTunoravRuShvAtakopanApavAdaH (35) · Śloka 35

তিক্তং কটু চ ভূযিষ্ঠমবৃষ্যং বাতকোপনম্| ঋতেঽমৃতাপটোলীভ্যাং শুণ্ঠীকৃষ্ণারসোনতঃ||৩৫||

স০-তিক্তং দ্রব্যং কটু চ প্রাযেণাবৃষ্যং বাতকৃচ্চ, গুডূচ্যাদীন্ হিত্বা|

Adhikarana kaShAyasya shItastamBanApavadaH (36) · Śloka 36

কষাযং প্রাযশঃ শীতং স্তম্ভনং চাভযাং বিনা| |৩৬|

স০-কষাযং দ্রব্যং প্রাযেণ শীতবীর্যং স্তম্ভনং চ ভবতি, হরীতকীং বর্জযিত্বা|

Adhikarana kaTvamlalavaNA yathottaraM vrIryoShNAH,tiktakaShAyamadhurAH shItalAH tiktakaTukaShAyA rUkShAH kaTvamlamadhurAH snigdhAH kaTukaShAyamadhurAH guravaH amlakaTutiktA laghavaH (36-39) · Śloka 39

| রসাঃ কট্বম্ললবণা বীর্যেণোষ্ণা যথোত্তরম্||৩৬|| তিক্তঃ কষাযো মধুরস্তদ্বদেব চ শীতলাঃ| তিক্তঃ কটুঃ কষাযশ্চ রূক্ষা বদ্ধমলাস্তথা||৩৭|| পট্বম্লমধুরাঃ স্নিগ্ধাঃ সৃষ্টবিণ্মূত্রমারুতাঃ| পটোঃ কষাযস্তস্মাচ্চ মধুরঃ পরমং গুরুঃ||৩৮|| লঘুরম্লঃ কটুস্তস্মাত্তস্মাদপি চ তিক্তকঃ| |৩৯|

স০-কট্বম্ললবণা রসা যথোত্তরমুষ্ণবীর্যাঃ| কটুরুষ্ণঃ অম্ল উষ্ণতরঃ, লবণ উষ্ণতমঃ| এবমুত্তরত্রাপি যথোত্তরত্বং যোজ্যম্| তিক্তাদযশ্চ তদ্বদেব যথোত্তরং শীতবীর্যাঃ| তেন তিক্তঃ শীতবীর্যঃ, কষাযঃ শীতবীর্যতরঃ, মধুরঃ শীতবীর্যতম ইতি স্থিতম্| তিক্তকটুকষাযা রূক্ষা বিষ্টম্ভকৃতশ্চ| তথেতি যথোত্তরমিত্যর্থঃ| পট্বাদযঃ স্নিগ্ধা নিঃসারিতবিণ্মূত্রবাতাশ্চ| তথেত্যত্রাপি বর্ততে| অর্থাত্ লবণাত্কষাযো গুরুতরঃ, কষাযান্মধুরঃ পরমং গুরুঃ,-অতিশযেন গুরুরিত্যর্থঃ| অম্লো লঘুঃ, তস্মাত্-অম্লাত্, কটুর্লঘুতরঃ, তস্মাচ্চ-কটোঃ, তিক্তো লঘুতমঃ|

Adhikarana rasAnAM saMyogakalpanayorviBAgaH (39-40) · Śloka 40

ইদানীং রসানামাধারদ্বারেণ সংযোগান্ কল্পনাং চ বিভজন্নাহ | সংযোগাঃ সপ্তপঞ্চাশত্কল্পনা তু ত্রিষষ্টিধা||৩৯|| রসানাং যৌগিকত্বেন যথাস্থূলং বিভজ্যতে| |৪০|

স০-বক্ষ্যমাণাযা রীত্যা রসানাং সংযোগাঃ সপ্তপঞ্চাশদ্বিভজ্যন্ত ইতি বচনবিপরিণামেন সম্বন্ধঃ| কল্পনা পুনরেষাং ত্রিষষ্টিধা বিভজ্যতে| কথং কৃত্বা কল্পনা বিভজ্যতে ? যথাস্থূলম্,-স্থূলানতিক্রমেণ ব্যক্তরসাস্বাদানুরূপতযা, ন পুনর্যথাসূক্ষ্মম্| তথা হি,-রসানুরসকল্পনযা তরতমযোগবশাচ্চ রসানাং কল্পনা ক্রিযমাণাঽঽনন্ত্যমুপৈতি| তস্মাদ্যথাস্থূলং রসানাং কল্পনা ত্রিষষ্টিধা বিভজ্যতে| তথা, যৌগিকত্বেন-শরীরোপযোগ্যত্বেন|

Adhikarana rasasaMyogaviBAgaH (40-42) · Śloka 42

ইদানীং রসসংযোগানাং সঙ্খ্যানং বিভক্তুকাম আহ | একৈকহীনাস্তান্ পঞ্চদশ যান্তি রসা দ্বিকে||৪০|| ত্রিকে স্বাদুর্দশাম্লঃ ষট্ ত্রীন্ পটুস্তিক্ত এককম্| চতুষ্কেষু দশ স্বাদুশ্চতুরোঽম্লঃ পটুঃ সকৃত্||৪১|| পঞ্চকেষ্বেকমেবাম্লো মধুরঃ পঞ্চ সেবতে| দ্রব্যমেকং ষডাস্বাদমসংযুক্তাশ্চ ষড্রসাঃ||৪২||

স০-দ্বিকে-দ্বিপরিমাণে রসাধারদ্রব্যসম্বন্ধিনী সংযোগে, পঞ্চ রসাঃ-মধুরাম্ললবণতিক্তকটুকাঃ, তান্-রসান্, পঞ্চ-অম্ললবণতিক্তকটুকষাযাখ্যান্, যান্তি-সংযুজ্যন্তে| কিম্ভূতান্ ? একৈকহীনান্,-একৈকেন হীনাঃ- বিনাকৃতাঃ, একৈকহীনাঃ, তান্| যেনৈকেন যুক্তাস্তদ্বিযুক্তানিত্যর্থঃ| অত্র চ পঞ্চানাং রসানাং পর্যাযেণ প্রত্যেকমেকৈকহীনতাবশাত্ কর্মত্বেন কর্তৃত্বেন চ সম্বন্ধো বেদ্যঃ| অত এব "চতুর্দ্বিকৌ পঞ্চদশপ্রকারৌ" ইতি যদ্বক্ষ্যতি তদুপপন্নম্| এবং মধুরোঽম্লাদীন্, অম্লো লবণাদীন্, লবণস্তিক্তাদীন্, তিক্তঃ কটুকষাযৌ, কটুঃ কষাযং যাতীতি স্থিতম্| দ্বিক ইতি দ্বৌ পরিমাণমস্য সংযোগস্য| সঙ্খ্যাযাঃ সংজ্ঞেত্যাদিপরিমাণানুবৃত্তেঃ পরিমাণার্থে সঙ্খ্যাযাঃ অতিশদন্তাযাঃ কনিতি কন্| এবং ত্রিকাদিষ্বপি বক্ষ্যমাণেষু লক্ষণং যোজ্যম্| দ্বিরসদ্রব্যসংযোগে পঞ্চদশ ভেদা ভবন্তি| যথা,-মধুরোঽম্লং যাতি| ১| মধুরো লবণম্| ২| মধুরস্তিক্তম্| ৩| মধুরঃ কটুকম্| ৪| মধুরঃ কষাযম্| ৫| অম্লো লবণং যাতি| ৬| অম্লস্তিক্তম্| ৭| অম্লঃ কটুকম্| ৮| অম্লঃ কষাযম্| ৯| লবণস্তিক্তম্| ১০| লবণঃ কটুকম্| ১১| লবণঃ কষাযম্| ১২| তিক্তঃ কটুকম্| ১৩| তিক্তঃ কষাযম্| ১৪| কটুঃ কষাযমিতি| ১৫| অত্র চ মধুরস্য গন্তৃত্বমেব, ন গম্যত্বম্, আদৌ স্থিতত্বাত্| কষাযস্য গম্যত্বমেব, ন গন্তৃত্বম্, অন্ত্যত্বাত্| এবং দ্বিরসসংযোগে পঞ্চদশ| ত্রিকে-ত্রিরসাধারদ্রব্যসম্বন্ধিনি সংযোগে, স্বাদুঃ-মধুরো, দশ সংযোগান্ যাতি| যথা,-মধুরাম্ললবণাঃ| ১| মধুরাম্লতিক্তকাঃ| ২| মধুরাম্লকটুকাঃ| ৩| মধুরাম্লকষাযাঃ| ৪| স এব মধুরোঽম্লত্যাগেন তত্স্থানে লবণযুক্তস্তিক্তাদিভিস্ত্রিভিঃ ক্রমেণান্বিতস্ত্রীন্ সংযোগান্ যাতি| মধুরলবণতিক্তকাঃ| ৫| মধুরলবণকটুকাঃ| ৬| মধুরলবণকষাযাঃ| ৭| স এব লবণত্যাগেন তত্স্থানে তিক্তযুক্তঃ কটুকষাযাভ্যাং ক্রমেণান্বিতো দ্বৌ সংযোগৌ যাতি| মধুরতিক্তকটুকাঃ| ৮| মধুরতিক্তকষাযাঃ| ৯| স এব তিক্তত্যাগেন তত্স্থানে কটুকান্বিত একং সংযোগং যাতি| মধুরকটুকষাযাঃ| ১০| এবং মধুরো দশ সংযোগান্ যাতি| অম্ল ইত্যাদি| ত্রিক ইতি বর্ততে| অম্লঃ ষট্ সংযোগান্ যাতি| যথা,-অম্ললবণতিক্তকাঃ| ১| অম্ললবণকটুকাঃ| ২| অম্ললবণকষাযাঃ| ৩| স এবাম্লো লবণত্যাগেন তত্স্থানে তিক্তান্বিতঃ কটুকষাযাভ্যাং ক্রমেণ যুক্তো দ্বৌ সংযোগৌ যাতি| অম্লতিক্তকটুকাঃ| ৪| অম্লতিক্তকষাযাঃ| ৫| এবং তিক্তত্যাগেনৈকং সংযোগং যাতি| অম্লকটুকষাযাঃ| ৬| ইত্যম্লঃ ষট্| ত্রীন্ পটুরিতি| লবণস্তিক্তযুক্তঃ কটুকষাযাভ্যাং ক্রমেণান্বিতো দ্বৌ সংযোগৌ যাতি| লবণতিক্তকটুকাঃ| ১| লবণতিক্তকষাযাঃ| ২| স এব তিক্তত্যাগেনৈকং যাতি| লবণকটুকষাযাঃ| ৩| এবং লবণস্ত্রীন্ সংযোগান্ যাতি| তিক্ত একমেব সংযোগং যাতি| তিক্তকটুকষাযাঃ| ১| এবং ত্রিকসংযোগে বিংশতিঃ| চতুষ্কেষ্বিত্যাদি| চতুষ্করসসংযোগেষু স্বাদুর্দশ সংযোগান্ যাতি| তত্র মধুরঃ সাম্লো লবণাদিভিঃ ষট্ সংযোগান্ যাতি| যথা,-মধুরাম্ললবণতিক্তাঃ| ১| মধুরাম্ললবণকটুকাঃ| ২| মধুরাম্ললবণকষাযাঃ| ৩| মধুরাম্লতিক্তকটুকাঃ| ৪| মধুরাম্লতিক্তকষাযাঃ| ৫| মধুরাম্লকটুকষাযাঃ| ৬| স এব মধুরোঽম্লত্যাগেন তত্স্থানে লবণান্বিতস্ত্রীন্ সংযোগান্ যাতি| মধুরলবণতিক্তকটুকাঃ| ৭| মধুরলবণতিক্তকষাযাঃ| ৮| মধুরলবণকটুকষাযাঃ| ৯| স এব লবণত্যাগেন তত্স্থানে তিক্তান্বিত একং সংযোগং যাতি| মধুরতিক্তকটুকষাযাঃ| ১০| এবং চতুষ্কেষু মধুরো দশ সংযোগান্ যাতি| চতুরোঽম্ল ইত্যাদি| চতুষ্ক ইতি বর্ততে| অম্লঃ সলবণস্তিক্তাদিভিস্ত্রীন্ সংযোগান্ যাংতি| যথা,-অম্ললবণতিক্তকটুকাঃ| ১| অম্ললবণতিক্তকষাযাঃ| ২| অম্ললবণকটুককষাযাঃ| ৩| স এব লবণত্যাগেন তত্স্থানে তিক্তান্বিত একং সংযোগং যাতি| অম্লতিক্তকটুককষাযাঃ| ৪| এবং চতুষ্কেষ্বম্লশ্চতুরঃ সংযোগান্ যাতি| পটুঃ সকৃদিতি পটুঃ-লবণঃ, সকৃত্-একং ভেদং, যাতি| যথা,-লবণতিক্তকটুকষাযাঃ| ১| এবং চতুষ্কেষু পঞ্চদশ সংযোগভেদাঃ| পঞ্চকেষ্বেকমেবাম্ল ইতি| পঞ্চকেষ্বম্লো রস একমেব সংযোগং সেবতে| যথা,-অম্ললবণতিক্তকটুকষাযাঃ| ১| মধুরঃ পঞ্চ সেবত ইতি| মধুরো রসঃ পঞ্চ সংযোগান্ সেবতে| যথা,-অম্লত্যাগাত্ মধুরলবণতিক্তকটুকষাযাঃ| ১| লবণত্যাগাত্ মধুরাম্লতিক্তকটুকষাযাঃ| ২| তিক্তত্যাগাত্ মধুরাম্ললবণকটুকষাযাঃ| ৩| কটুকত্যাগাত্ মধুরাম্ললবণতিক্তকষাযাঃ| ৪| কষাযত্যাগাত্ মধুরাম্ললবণতিক্তকটুকাঃ| ৫| এবমেকীকৃতাঃ ষট্পঞ্চাশত্ সংযোগা ভবন্তি| দ্রব্যমিত্যাদি| একং ষড্রসং দ্রব্যমিতি সপ্তপঞ্চাশত্| ষড্রসাঃ পৃথগ্ভূতাঃ মধুরাম্ললবণতিক্তকটুকষাযা ইতি| শর্করাকাঞ্চিকসৌবর্চলকিরাততিক্তমরীচখদিরাদীনাং যথাক্রমং মধুরাদযো রসা আস্বাদ্যন্তে| এবমেতে ত্রিষষ্টিসঙ্খ্যাঃ| পদ্যেন চ সুখস্মৃত্যৈ রসভেদান্ শৃণুষ্ব মে| মধুরোঽম্লেন পটুনা তিক্তেন কটুকেন চ|| ১|| কষাযেণ পৃথক্ সার্ধমম্লস্তু লবণেন চ| তিক্তেন কটুনা সার্ধং কষাযেণ পৃথক্ সহ|| ২|| পটুস্তিক্তেন কটুনা কষাযেণ পৃথক্ সহ| তিক্তস্তু কটুনা সার্ধং কষাযেণ পৃথক্ তথা|| ৩|| কটুকস্তু কষাযেণ দ্বিসংযোগ ইতি স্মৃতাঃ| দশ পঞ্চ চ ভেদাস্তে সঙ্খ্যাতা, বিংশতিস্ত্রিকে|| ৪|| মধুরাম্লৌ তু পটুনা তিক্তেন কটুনা তথা| কষাযেণ তথা সার্ধং তথা স্বাদুপটূ পৃথক্|| ৫|| তিক্তেন কটুকেনাপি কষাযেণ তথা সহ| স্বাদুতিক্তৌ তু কটুনা কষাযেণ পৃথক্ সহ|| ৬|| স্বাদূষণৌ কষাযেণ স্বাদোরেবং দশ ত্রিকে| ভেদাঃ স্যুরম্ললবণৌ তিক্তেন কটুনা পৃথক্|| ৭|| কষাযেণ তথা সার্ধমম্লতিক্তৌ পৃথক্ সহ| কটুকেন কষাযেণ তথাঽম্লকটুকৌ সহ|| ৮|| কষাযেণেতি ষট্ প্রোক্তা ভেদা অম্লস্য তু ত্রিকে| পটুতিক্তৌ তু কটুনা কষাযেণ পৃথক্ সহ|| ৯|| পটূষণৌ কষাযেণ ভেদা ইতি পটোস্ত্রযঃ| তিক্তোষণৌ কষাযেণ তিক্তস্যৈবং সকৃত্স্মৃতঃ|| ১০|| ত্রিকে ভেদা ইতি প্রোক্তাশ্চতুষ্কে দশ পঞ্চ চ| স্বাদ্বম্ললবণাঃ সার্ধং তিক্তেন কটুকেন চ|| ১১|| পৃথক্কষাযেণ তথা মধুরাম্লৌ সতিক্তকৌ| কটুকেন তু সম্পৃক্তৌ কষাযেণ পৃথক্ তথা|| ১২|| স্বাদ্বম্লকটুকাঃ সার্ধং কষাযেণেতি ষট্ স্মৃতাঃ| সপ্তমশ্চাত্র মধুরলবণোষণতিক্তকৈঃ|| ১৩|| ভেদোঽষ্টমো মতঃ স্বাদুকটুতিক্তকষাযকৈঃ| নবমস্ত্বত্র মধুরপটূষণকষাযকৈঃ|| ১৪|| দশমোঽত্র ভবেত্স্বাদুতিক্তোষণকষাযকৈঃ| দশ ভেদা ভবন্ত্যেবং মধুরেণ চতুষ্ককে|| ১৫|| কটুতিক্তাম্লবণৈর্ভেদ একশ্চতুষ্ককে| দ্বিতীযস্ত্বম্ললবণকষাযকটুকৈঃ স্মৃতঃ|| ১৬|| তৃতীযোঽত্র ভবেদম্লপটুতিক্তকষাযকৈঃ| চতুর্থোঽত্র ভবেদম্লতিক্তোষণকষাযকৈঃ|| ১৭|| এবমম্লেন ভেদাঃ স্যুশ্চত্বারোঽত্র চতুষ্ককে| পটুনৈকোঽত্র লবণতিক্তোষণকষাযকৈঃ|| ১৮|| এবং পঞ্চদশ খ্যাতাশ্চতুষ্করসসঙ্খ্যযা| ষড্ ভেদান্ পঞ্চকে প্রাহুস্তান্ বক্ষ্যামি বিভাগশঃ|| ১৯|| একো ভেদোঽম্ললবণতিক্তোষণকষাযকৈঃ| দ্বিতীযঃ স্বাদুলবণতিক্তোষণকষাযকৈঃ|| ২০|| তৃতীযস্ত্বম্লমধুরতিক্তোষণকষাযকৈঃ চতুর্থস্ত্বম্লমধুরপটূষণকষাযকৈঃ|| ২১|| পঞ্চমস্ত্বম্লমধুরপটুতিক্তকষাযকৈঃ| ষষ্ঠো ভেদোঽম্লমধুরলবণোষণতিক্তকৈঃ|| ২২|| ষড্ ভেদা ইতি নির্দিষ্টাঃ পঞ্চকে প্রবিভাগশঃ| ভেদঃ স্বাদ্বম্ললবণতিক্তোষণকষাযকৈঃ|| ২৩|| এক এব ষড্রসেন, পৃথক্ত্বেন তু ষট্ স্মৃতাঃ| স্বাদুরম্লোঽথ লবণস্তিক্তশ্চ কটুকস্তথা|| ২৪|| কষায ইতি ভেদাঃ স্যুঃ সর্বতোঽত্র ত্রিষষ্টিধা| ক্ষীরং সুরা বিডং নিম্বশ্চব্যং পদ্মং রসাশ্রযম্|| ২৫|| দ্রব্যং স্বাদুরসাদীনাং ষণ্ণাং বিদ্ধি যথাক্রমম্| দ্রব্যং দ্রব্যান্তরেণৈব যোজযেদ্দ্বিরসাদিষু|| ২৬|| ধাত্রীফলং শর্করযা লবণেনার্দ্রকং তথা| এবমাদীনি দ্রব্যাণি যোজযেদ্ভিষগুত্তমঃ|| ২৭|| কানিচিত্ দ্বিরসাদীনি দ্রব্যাণি স্যুঃ স্বভাবতঃ| যথৈণঃ ষড্রসঃ কৃষ্ণো, যথা পঞ্চরসাঽভযা|| ২৮|| মদ্যং পঞ্চরসং যদ্বত্তিলো যদ্বচ্চতূ রসঃ| এরণ্ডতৈলং ত্রিরসং, মাক্ষিকং দ্বিরসং যথা|| ২৯|| ঘৃতমেকং স্বাদুরসং মধুরাদিবিভাগতঃ| দিঙ্মাত্রাদুদিতাদেবং শেষমূহ্যং মনীষিণা|| ৩০|| সম্প্রতি "একৈকহীনান্" ইত্যাদিনা গ্রন্থেন যে রসানাং ভেদাঃ শাস্ত্রকৃতোক্তাঃ, তানেব সঙ্ক্ষেপেণ প্রকটযিতুমাহ-

Adhikarana sa~gkhyayA kalpanAvibhAgaH (43) · Śloka 43

ষট্ পঞ্চকাঃ, ষট্ চ পৃথগ্রসাঃ স্যু- শ্চতুর্দ্বিকৌ পঞ্চদশপ্রকারৌ| ভেদাস্ত্রিকা বিংশতিরেকমেব দ্রব্যং ষডাস্বাদমিতি ত্রিষষ্টিঃ||৪৩||

স০-পঞ্চকরসানাং সংযোগাঃ ষট্সঙ্খ্যাঃ, "পঞ্চকেষ্বেকমেবাম্লে মধুরঃ পঞ্চ সেবতে" ইতি| ষট্ চ পৃথগ্রসাঃ, "অসংযুক্তাশ্চ ষড্রসাঃ" ইতি| চতুরীত্যাদি| চতুষ্কভেদঃ পঞ্চদশপ্রকারঃ , দ্বিকভেদশ্চ পঞ্চদশপ্রকারঃ| "চতুষ্কেষু দশ স্বাদুশ্চতুরোঽম্লঃ পটুঃ সকৃত্|" এবং পঞ্চদশ প্রকারাঃ| "একৈকহীনাংস্তান্ পঞ্চ পঞ্চ যান্তি রসা দ্বিকে|" ইতি বচনাত্ [চ]| ভেদা ইত্যাদি| ত্রিকাঃ-ত্রিভেদভিন্না ভেদা বিংশতিঃ| "ত্রিকে স্বাদুর্দশাম্লঃ ষট্ ত্রীন্ পটুস্তিক্ত এককম্|" ইতি বিংশতিঃ| একমেব দ্রব্যং ষডাস্বাদম্| ইতি-ইত্থম্, রসানাং ভেদাস্ত্রিষষ্টিঃ,-যথাস্থূলং চৈষা ত্রিষষ্টিধা কল্পনা ব্যাখ্যাতা| উপজাতিবৃত্তম্|

Adhikarana rasabhedAnAmAnantyam sarveShAM rasabhedAnAmupayogitvam (10) · Śloka 10

সম্প্রতি যথাসূক্ষ্মং প্রদর্শযিতুমাহ তে রসানুরসতো রসভেদা- স্তারতম্যপরিকল্পনায চ| সম্ভবন্তি গণনাং সমতীতা দোষভেষজবশাদুপযোজ্যাঃ||৪৪|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে রসভেদীযো নাম দশমোঽধ্যাযঃ||১০||

স০-তে রসভেদাঃ-ত্রিষষ্টিরূপাঃ, রসতো-রসবশেন, তথাঽনুরসতো-অনুরসবশেন, তথা তারতম্যপরিকল্পনযা-অযং মধুরোঽযং মধুরতরোঽযং মধুরতম ইত্যেবংরূপা যা তযা চ, গণনাং সমতীতাঃ-সঙ্খ্যামতিক্রান্তাঃ সম্ভবন্তি| দোষেত্যাদি| দোষাঃ-বাতাদযো, ভেষজানি-হরীতক্যাদীনি, দোষাশ্চ ভেষজানি চ দোষভেষজানি, তেষাং বশো-অনুরোধঃ সামর্থ্যং বা, তস্মাদ্ধেতুভূতাদ্রসভেদা উপযোজ্যাঃ, ন দোষমনপেক্ষ্য ভেষজং বাঽনপেক্ষ্য| এবমেবোপযোজ্যা ইত্যর্থঃ| তথা চ মুনিঃ (চ. সূ. অ. ২৬|২৩)- "ক্বচিদেকো রসঃ কল্প্যঃ সংযুক্তাশ্চ রসাঃ ক্বচিত্| দোষৌষধাদীন্ সঞ্চিন্ত্য ভিষজা সিদ্ধিমিচ্ছতা||" ইতি| দোষভেষজবশাদিত্যুপলক্ষণার্থম্| দেশাদিবশাদপি দোষাদীন্ বীক্ষ্য রসভেদা উপযোজ্যাঃ| যথা,-পবনে জেতব্যে মধুরাম্লৌ মধুরাম্ললবণা বেতি| স্বাগতা রনভগৈর্গুরুকান্তা ইতি| ইতি শ্রীমৃগাঙ্কদত্তপুত্র শ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে রসভেদীযাধ্যাযো দশমঃ সমাপ্তঃ|| ১০||