28. śalyāharaṇavidhiradhyāyaḥ

Adhikarana adhyAyopakramaH · Śloka

শিরাব্যধবিধেরনন্তরং শল্যাহরণবিধিরারভ্যতে| যতঃ সিরাব্যধবিধ্যধ্যাযে শল্যরূপস্য রক্তস্য সকলকাযব্যাপিনঃ সিরাব্যধোপাযেন নির্হরণমুক্তম্| ইদানীং প্রাদেশিকস্য লোহাদেঃ শল্যস্য প্রতিদেশস্থিতস্য লক্ষণং নির্হরণোপাযাদিশ্চাস্মিন্নধ্যাযে শল্যাহরণবিধৌ নির্দিশ্যত ইত্যাহ-

Adhikarana shalyAharaNavidhiradhyAyaH shalyagatiBedAH (2-1) · Śloka 1

অথাতঃ শল্যাহরণবিধিমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২| বক্রর্জুতির্যগূর্ধ্বাধঃ শল্যানাং পঞ্চধা গতিঃ| |১|

স০-বক্রাদিভেদভিন্না শল্যানাং পঞ্চপ্রকারা গতিঃ-গমনম্| কদাচিচ্ছল্যানি বক্রং কৃত্বা, তির্যগ্বা ঊর্ধ্বং বা, অধো বা, গচ্ছন্তিঃ কদাচিদৃজু কৃত্বা| এবমুভযথা তির্যগূর্ধ্বাধোভেদগমনাচ্ছল্যানাং পঞ্চধা গতিঃ|

Adhikarana antaHshalyasya lakShaNam (1-2) · Śloka 2

| ধ্যামং শোফরুজাবন্তং স্রবন্তং শোণিতং মুহুঃ||১|| অভ্যুদ্গতং বুদ্বুধবত্পিটিকোপচিতং ব্রণম্| মৃদুমাংসং চ জানীযাদন্তঃশল্যং সমাসতঃ||২||

স০-এবংবিধং ব্রণমন্তঃশল্যং জানীযাত্| সমাসতঃসঙ্ক্ষেপেণ| ধ্যামং-শ্যামবর্ণম্| তথা, শোফরুজাবন্তম্| তথা, মুহুঃ শোণিতং স্রবন্তম্| তথা, অভ্যুদ্গতং-আভিমুখ্যেনোচ্ছ্রিতমুন্নতম্| তথা, বুদ্বুদেন তুল্যং বর্ততে বুদ্বুদবত্| তথা, পিটকৈরুপচিতং-ব্যাপ্তম্| তথা, মৃদুমাংসং-কোমলমাংসম্|

Adhikarana tvaggatashalyasya lakShaNam (3) · Śloka 3

বিশেষাত্ত্বগ্গতে শল্যে বিবর্ণঃ কঠিনাযতঃ| শোফো ভবতি|৩|

স০-বিশেষেণ পুনস্ত্বগ্গতে শল্যে শোফো বিবর্ণস্তথা কঠিনো দীর্ঘশ্চ স্যাত্|

Adhikarana mAMsagatasya lakShaNam (3-4) · Śloka 4

| মাংসস্থে চোষঃ শোফো বিবর্দ্ধতে||৩|| পীডনাক্ষমতা পাকঃ শল্যমার্গো ন রোহতি| |৪|

স০-মাংসগতে শল্যে চোষঃ স্যাত্| 'সর্বাঙ্গীণস্তীব্রোঽরতিমান্ দাহশ্চোষ উচ্যতে' ইত্যাহুঃ| তথা শোফো বিবর্দ্ধতে| তথা, পীডনস্যাক্ষমত্বং পাকশ্চ, শল্যমার্গশ্চ রোহং ন যাতি|

Adhikarana peshIgatasya lakShaNam (4) · Śloka 4

| পেশ্যন্তরগতে মাংসপ্রাপ্তবচ্ছ্বযথুং বিনা||৪||

স০-পেশীমধ্যগতে মাংসগতেন তুল্যং লক্ষণম্, শোথং বর্জযিত্বা| মাংসাবযববিশেষো দীর্ঘতন্ত্বাকৃতিঃ পেশীত্যুচ্যতে|

Adhikarana snAyugatasya lakShaNam (5) · Śloka 5

আক্ষেপঃ স্নাযুজালস্য সংরম্ভস্তম্ভবেদনাঃ| স্নাযুগে দুর্হরং চৈতত্|৫|

স০-স্নাযুগে শল্যে স্ত্রাযুজালস্যাক্ষেপাদ্যাঃ স্যুঃ| আক্ষেপঃ-আকর্ষণম্| সংরম্ভঃ-ক্ষোভঃ| স্তম্ভঃ-স্তব্ধতা| বেদনাশূলম্| এতচ্চ-স্ত্রাযুগং শল্যং, দুঃখেন হর্তুং শক্যতে|

Adhikarana sirAgatasya lakShaNam (5) · Śloka 5

| সিরাধ্মানং সিরাশ্রিতে||৫||

স০-সিরাশ্রিতে শল্যে সিরাণামানাহঃ স্যাত্|

Adhikarana strotogatasya lakShaNam (6) · Śloka 6

স্বকর্মগুণহানিঃ স্যাত্স্রোতসাং স্রোতসি স্থিতে| |৬|

স০-স্রোতোগতে শল্যে স্রোতসাং স্বকর্মগুণযোর্হানিঃ স্যাত্| যথা,-কণ্ঠস্রোতঃস্থিতে শল্যে পানাভ্যবহরণস্য নিরোধো জাযতে গুণোঽপি যস্তস্যাপ্রদুষ্টত্বাদিলক্ষণঃ সোঽপ্যস্য হীযত ইতি| এবমন্যেষাং স্বকর্মগুণহানির্ব্যাখ্যেযা|

Adhikarana dhamanIgatasya lakShaNam (6-7) · Śloka 7

| ধমনীস্থেঽনিলো রক্তং ফেনযুক্তমুদীরযেত্||৬|| নির্যাতি শব্দবান্ স্যাচ্চ হৃল্লাসঃ সাঙ্গবেদনঃ| |৭|

স০-ধমনীস্থে শল্যে বাযুর্লোহিতং সফেনং প্রেরযেত্| তথা সশব্দো মরুন্নির্যাতি, হৃল্লাসশ্চাঙ্গপীডাযুক্তঃ স্যাত্|

Adhikarana asthisandhigatasya lakShaNam (7) · Śloka 7

| সঙ্ঘর্ষো বলবানস্থিসন্ধিপ্রাপ্তেঽস্থিপূর্ণতা||৭||

স০-অস্থিসন্ধিপ্রাপ্তে শল্যে বলবান্ সঙ্ঘর্ষঃ-ক্ষোভঃ, স্যাত্| তথা, অস্থিপূর্ণতা চ জাযতে|

Adhikarana asthigatasya lakShaNam (8) · Śloka 8

নৈকরূপা রুজোঽস্থিস্থে শোফঃ| |৮|

স০-অস্থিস্থে শল্যে, অনেকাকারাঃ (নৈকরূপাঃ)-নানাবিধাঃ, রুজো- ভগ্নরূগ্ণমৃদিতপীডিতাবনুন্নপ্রাযাঃ স্যুঃ, শোফশ্চ|

Adhikarana sandhigatasya lakShaNam (8) · Śloka 8

তদ্বচ্চ সন্ধিগে| চৈষ্টানিবৃত্তিশ্চ ভবেত্|৮|

স০-সন্ধিগতে শল্যে তদ্বদেব-অস্থিস্থশল্যেন তুল্যং লক্ষণম্| তথা, সন্ধিস্থশল্যাক্রান্তাবযবস্য চেষ্টানিবৃত্তিঃ-ব্যাপারোপরমশ্চ ভবতি| পূর্বমস্থিসন্ধিগতস্য শল্যস্য লক্ষণমুক্তম্| অধুনা শরীরসন্ধিগতশল্যস্য লক্ষণম্| অন্যো হি শরীরসন্ধিঃ| তথা চ রাজযক্ষ্মনিদানে বক্ষ্যতি (হৃ. নি. অ. ৫|৫)-"শরীরসন্ধীনাবিশ্য" ইতি|

Adhikarana koShThagatasya lakShaNam (8-9) · Śloka 9

| আটোপঃ কোষ্ঠসংশ্রিতে||৮|| আনাহোঽন্নশকৃন্মূত্রদর্শনং চ ব্রণাননে| |৯|

স০--কোষ্ঠসংশ্রিতে-উদরাশ্রিতে শল্যে, আটোপঃ-ক্ষোভঃ তথাঽঽনাহো-জঠরাধ্মানম্, তথা ব্রণমুখেঽন্নশকৃন্মূত্রদর্শনং চ স্যাত্|

Adhikarana marmagatasya lakShaNam (9) · Śloka 9

| বিদ্যান্মর্মগতং শল্যং মর্মবিদ্ধোপলক্ষণৈঃ||৯||

স০-মর্মস্থং শল্যং মর্মবিদ্ধোপলক্ষণৈর্বিদ্যাত্-জানীযাত্| মর্মবিদ্ধস্য চ লক্ষণং সঙ্গ্রহে কথিতম্| যথা (শা. অ. ৭) "দেহপ্রসুপ্তির্গুরুতা সম্মোহঃ শীতকামিতা| স্বেদো মূর্চ্ছা বমিঃ শ্বাসো মর্মবিদ্ধস্য লক্ষণম্||" ইতি|

Adhikarana tvaggatAdInAM strAvato lakShaNam (10) · Śloka 10

যথাস্বং চ পরিস্রাবৈস্ত্বগাদিষু বিভাবযেত্| |১০|

স০-ন কেবলং সামান্যলক্ষণেন-ধ্যামাদিনা, তথা ত্বগাদিস্থশল্যবিশেষলক্ষণেন, ত্বগাদিস্থং শল্যং লক্ষযেত্| যাবত্ যথাস্বং পরিস্রাবৈস্তথাঽনুরূপৈর্বিভাবযেত্|

Adhikarana antaHshalyo~apiruDho vraNaH (10) · Śloka 10

| রুহ্যতে শুদ্ধদেহানামনুলোমস্থিতং তু তত্||১০||

স০-তত্-প্রাঙ্নির্দিষ্টং শল্যং, রুহ্যতে-রোহং যাতি| কিম্ভূতানাং পুংসাম্ ? বমনবিরেচনাদিভিঃ শুদ্ধদেহানাম্| রুহ্যত ইতি কর্মকর্তরীতি কেচিত্, তচ্চ ন যুক্তম্| যতঃ কর্মস্থভাবকানাং কর্মস্থক্রিযাণাং চ কর্তা কর্মবদ্ভবতি| ন কর্তৃস্থভাবকানাং ন চ কর্তৃস্থক্রিযাণামিত্যুক্তম্| রুহিশ্চ কর্তৃস্থক্রিযঃ| তস্মাত্ রোহতীতি রুট্| রুডিবাচরতীতি ক্যঙন্তোঽযম্| রূঢাভাসো হ্যযম্, ন তু সম্যগ্রূঢঃ| তথা চ বক্ষ্যতি-"দোষকোপ" ইত্যাদি| তস্মাদস্য রূঢাভাসত্বাদেষৈব ব্যুত্পত্তির্যুক্তা|

Adhikarana rUDhamapi shalyaM bAdhate (11) · Śloka 11

দোষকোপাভিঘাতাদিক্ষোভাদ্ভূযোঽপি বাধতে| |১১|

স০-যতস্তচ্ছল্যমসম্যগ্রূঢত্বাত্ ভূযোঽপি বাধতে| প্রাক্কৃতবাধমপি পুনরপি পীডাং জনযতি| কুতো হেতোঃ ? ইত্যাহ-দোষকোপশ্চাভিঘাতশ্চ, তাবাদী যেষাং ধাবনলঙ্ঘনাদীনাং তে এবং, তৈঃ ক্ষোভঃ-সংরম্ভঃ, তস্মাত্| দোষকোপক্ষোভাত্ অভিঘাতাদিক্ষোভাত্ বাধতে|

Adhikarana tva~gnaShTashalyasyopAyaH (11-12) · Śloka 12

| ত্বঙ্নষ্টে যত্র তত্র স্যুরভ্যঙ্গস্বেদমর্দনৈঃ||১১|| রাগরুগ্দাহসংরম্ভা যত্র চাজ্যং বিলীযতে| আশু শুষ্যতি লেপো বা তত্স্থানং শল্যবদ্বদেত্||১২||

স০-তত্র-তেষু ত্বঙ্নষ্টাদিষু শল্যেষু মধ্যে, ত্বঙ্নষ্টং যত্র প্রদেশে স্যাত্ তত্র-তস্থানে, অভ্যঙ্গাদিভির্লৌহিত্যশূলদাহক্ষোভাঃ স্যুঃ| যত্র বা স্থানে ঘৃতং স্ত্যানং যোজিতং বিলীযতে তত্স্থানং শল্যবত্-সশল্যং বদেত্| যদ্বা লেপঃ-চন্দনাদিনা দত্তো, যত্রাশ্বেব শুষ্যতি, তত্স্থানং-ত্বগ্দেশং, শল্যবজ্জানীযাত্|

Adhikarana mAMsanaShTasyopAyaH (13) · Śloka 13

মাংসপ্রণষ্টং সংশুদ্ধ্যা কর্শনাচ্ছ্লততা গতম্| ক্ষোভাদ্রাগাদিভিঃ শল্যং লক্ষযেত্|১৩|

স০-মাংসপ্রণষ্টং-মাংসেনাদৃশ্যতাং প্রাপ্তং, সংশুদ্ধ্যা-বমনবিরেচনাদিকযা, যত্কর্শনং-কৃশত্বং কৃতং, তস্মাত্ শ্লথতাং শিথিলত্বং প্রাপ্তং, ক্ষোভাত্- অনেকপ্রকারাদ্বেদনারূপাত্, তথা রাগাদিভির্লক্ষযেত্|

Adhikarana peshyAdiShu naShTasyopAyaH (13-14) · Śloka 14

| তদ্বদেব চ||১৩|| পেশ্যস্থিসন্ধিকোষ্ঠেষু নষ্টম্| |১৪|

স০-তদ্বদিতি তেন-মাংসপ্রণষ্টেন, তুল্যং বর্ততে| যথা,-শুদ্ধ্যা কর্শনাত্ শ্লথতাং গতং ক্ষোভাদ্রাগাদিভির্লক্ষযেদিতি|

Adhikarana asthinaShTasyopAyaH (14) · Śloka 14

অস্থিষু লক্ষযেত্| অস্থ্নামভ্যঞ্জনস্বেদবন্ধপীডনমর্দনৈঃ||১৪||

স০-অস্থিষু নষ্টং শল্যমস্থ্নামভ্যঞ্জনাদিভির্লক্ষযেত্|

Adhikarana snAvAdiShu naShTasyopAyaH (15-16) · Śloka 16

প্রসারণাকুঞ্চনতঃ সন্ধিনষ্টং তথাঽস্থিবত্| নষ্টে স্নাযুশিরাস্রোতোধমনীষ্বসমে পথি||১৫|| অশ্বযুক্তং রথং খণ্ডচক্রমারোপ্য রোগিণম্| শীঘ্রং নযেত্ততস্তস্য সংরম্ভাচ্ছল্যমাদিশেত্||১৬||

স০-সন্ধিনষ্টং শল্যমস্থিনষ্টশল্যবল্লক্ষযেত্ সং-স্নাযুশিরাস্রোতোধমনীষু নষ্টে শল্যে, অসমে পথি-বিষমে মার্গে, রথমারোপ্য রোগিণং-শল্যবন্তং, শীঘ্রং নযেত্-আশ্বেব দেশান্তরং প্রাপযেত্| কিম্ভূতং রথম্ ? খণ্ডং চক্রম্ যস্য স খণ্ডচক্রঃ, তম্| ততস্তস্য-রথস্য, সংরম্ভাত্-ক্ষোভাত্, শল্যমাদিশেত্-লক্ষযেত্|

Adhikarana marmanaShTasyopAyAnuktau hetuH (17) · Śloka 17

মর্মনষ্টং পৃথঙ্নোক্তং তেষাং মাংসাদিসংশ্রযাত্| |১৭|

স০-মর্মনষ্টং শল্যং পৃথক্ নাভিহিতম্| কুতঃ ? তেষাং-মর্মণাং, মাংসাদিরেব প্রাঙ্নির্দিষ্টো যতঃ সংশ্রযো, ন তু পৃথঙ্মর্মাণি বিদ্যন্তে| { তথা চ সঙ্গ্রহে(সূ. অ. ৩৭)-"মর্মপ্রণষ্টেঽপ্যনন্যভাবান্মাংসাদিভ্যো মর্মণামুক্তং পরীক্ষণং ভবতি|" ইতি|

Adhikarana naShTasya sAmAnyalakShaNam (17) · Śloka 17

| সামান্যেন সশল্যং তু ক্ষোভিণ্য ক্রিযযা সরুক্||১৭||

স০-সামান্যেন-সামান্যলক্ষ্ণেন, ক্শেভিণ্যা ক্রিযযা-সংরম্ভোত্পাদকেন কর্মণা শ্বসনপ্রাণাযামাদিকেন, যত্ সরুক্ স্থানং তত্ সশল্যং জানীযাত্|

Adhikarana adRushyashalyasyAkRutirvraNAkRutyA j~jeyA (18) · Śloka 18

বৃত্তং পৃথু চতুষ্কোণং ত্রিপুটং চ সমাসতঃ| অদৃশ্যশল্যসংস্থানং ব্রণাকৃত্যা বিভাবযেত্||১৮||

স০-বৃত্তং-বর্তুলম্| পৃথু-পার্শ্বাপরপার্শ্বাভ্যাং যত্পরিচ্ছিদ্যতে| চতুষ্কোণং-চতুরস্রম্| ত্রিপুটং-ত্র্যস্রম্| সমাসতঃ-সঙ্ক্ষেপেণ|| অদৃশ্যস্য-অনুপলব্ধস্য, শল্যস্য সংস্থানং-আকৃতিং, ব্রণাকৃত্যা-ব্রণসংস্থানেন, বিভাবযেত্-বিদ্যাত্|

Adhikarana shalyAharaNopAyaBedau (19) · Śloka 19

তেষামাহরণোপাযৌ প্রতিলোমানুলোমকৌ| |১৯|

স০-তেষাং-অদৃশ্যানাং শল্যানাম্| আকর্ষণোপাযৌ দৌ প্রতিলোমানুলোমকৌ| প্রতিলোমঃ-শরীরান্তঃপ্রবেশবিপর্যযঃ| অনুলোমঃ-শরীরান্তঃপ্রবেশানুগতঃ| প্রতিলোমানুলোমযোর্নির্হরণবিষযমাহ-

Adhikarana tayorviShayaH (19) · Śloka 19

| অর্বাচীনপরাচীনে নির্হরেত্তাদ্বিপর্যযাত্||১৯||

স০-তযোঃ-প্রতিলোমানুলোমযোর্বিপর্যযঃ, তস্মাদ্বিপর্যযাত্, অনুলোমং পরাচীনমানযেদিত্যর্থঃ|

Adhikarana tiryaggataM tUbhayorviShayaH (20) · Śloka 20

সুখাহার্যং যতশ্ছিত্ত্বা ততস্তির্যগ্গতং হরেত্| |২০|

স০-তির্যগ্গতং শল্যং যতো-যস্মাদ্দেহদেশাত্, ছিত্বা-বিলুপ্য, সুখাহার্যং সম্পদ্যতে-সুখেনাহর্তুং শক্যতে, ততঃ-তস্মাদ্দেহদেশাত্, ছিত্ত্বোদ্ধরেত্| ছিত্ত্বেত্যত্র যদ্যপি কর্ম কিঞ্চিন্ন নির্দিষ্টং, তথাঽপি ত্বঙ্মাংসাদীনাং যোগ্যত্বাত্তেষামেব কর্মত্বং বোধ্যম্| মাংসাদীনি ছিত্ত্বোদ্ধরেদিত্যর্থঃ|

Adhikarana urogatAdiShu shalyeShu nirghAtananiShedhaH (20-21) · Śloka 21

| শল্যং ন নির্ঘাত্যমুরঃকক্ষাবঙ্ক্ষণপার্শ্বগম্||২০|| প্রতিলোমমনুত্তুণ্ডং ছেদ্যং পৃথুমুখং চ যত্| |২১|

স০-শল্যমুরোগতমুরঃস্থং কক্ষাস্থং বঙ্ক্ষণস্থং পার্শ্বস্থং চ ন নির্ঘাত্যং-ন নির্ঘাতনীযম্| তথা প্রতিলোমং-নানুলোমগতং, তথাঽনুত্তুণ্ডং বারিবুদ্বুদবন্নোন্নতং, তথা ছেদ্যং শল্যং, তথা পৃথুমুখং-বিস্তীর্ণাননং, চ ন নির্ঘাত্যম্|

Adhikarana anAharaNIyaM shalyam (21) · Śloka 21

| নৈবাহরেদ্বিশল্যঘ্নং নষ্টং বা নিরুপদ্রবম্||২১||

স০-বিশল্যং হন্তীতি বিশল্যঘ্নম্| তাবজ্জীবতি যাবত্সশল্যঃ| শল্যাপাযে তু ম্রিযতে তন্নাহরেদেব| বিশল্যস্য তস্য প্রাণহরণত্বাত্| এতত্স্বরূপং মর্মবিভাগে স্পষ্টং কৃত্বা বক্ষ্যতে| নষ্টং বেতি বাশব্দশ্চার্থে| নষ্টং-অদৃশ্যতাং প্রাপ্তং চ, যন্নিরুপদ্রবং-তন্নিমিত্তরোগরহিতং, নাহরেত্, প্রত্যবাযভযাত্|

Adhikarana hastAhAryaM shalyam (22) · Śloka 22

অথাহরেত্করপ্রাপ্যং করেণৈব| |২২|

স০-করপ্রাপ্যং-হস্তগ্রাহ্যং শল্যং, করণৈবাহরেত্-নাপরেণ কঙ্কমুখাদিনা|

Adhikarana siMhamukhAdisvastikayantrAhAryaM shalyam (22) · Śloka 22

ইতরত্পুনঃ| দৃশ্যং সিংহাহিমকরবর্মিকর্কটকাননৈঃ||২২||

স০-ইতরত্-অকরপ্রাপ্যং তু শল্যং, দৃশ্যং সিংহমুখাদিভির্যন্ত্রৈরাহরেত্|

Adhikarana ka~gkamukhAdisvastikayantrAhAryaM shalyam (23) · Śloka 23

অদৃশ্যং ব্রণসংস্থানাদ্গ্রহীতুং শক্যতে যতঃ| কঙ্কভৃঙাহ্বকুররশরারীবাযসাননৈঃ||২৩||

স০-অদৃশ্যং পুনঃ শল্যং ব্রণসংস্থানাদাকলয্য কঙ্কমুখদিভির্গ্রহীতুং শক্যতে যতস্ততস্তৈর্হরেত্| যত্তদোর্নিত্যাভিসম্বন্ধাত্তদোপলম্ভঃ|

Adhikarana sandaMSAhAryam Salyam (24) · Śloka 24

সন্দংশাভ্যাং ত্বগাদিস্থম্| |২৪|

স০-ত্বগাদিস্থং শল্যং সন্দংশাভ্যাং নির্হরেত্| আদিগ্রহণান্মাংসাদীনাং গ্রহণম্|

Adhikarana tAlayantrAhAryaM Salyam (24) · Śloka 24

তালাভ্যাং সুষিরং হরেত্| |২৪|

স০-সুষিরং যচ্ছল্যং ত্বগাদিস্থং তত্তালযন্ত্রাভ্যাং হরেত্,-ন সংদশাভ্যাম্|

Adhikarana nADIyantrAhAryaM Salyam (24) · Śloka 24

| সুষিরস্থং তু নলকৈঃ|২৪|

স০-সুষিরস্থং পুনঃ শল্যং নলকৈঃ-নাডীযন্ত্রৈঃ, আকর্ষেত্|

Adhikarana sheShayantrAhAryaM shalyam (24) · Śloka 24

| শেষং শেষৈর্যথাযথম্||২৪||

স০-শেষং শল্যং শেষৈর্যন্ত্রৈর্যথাযোগমাহরেত্|

Adhikarana yantreNAhartumashakyasyashalyasyopAyaH (25) · Śloka 25

শস্ত্রেণ বা বিশস্যাদৌ ততো নির্লোহিতং ব্রণম্| কৃত্বা ঘৃতেন সংস্বেদ্য বদ্ধাঽঽচারিকমাদিশেত্||২৫||

স০-শস্ত্রেণ বা পূর্বং বিশস্য-মাংসাদীন্ ছিত্ত্বা, ততঃ- অনন্তরং, অপনীতরক্তং ব্রণং বিধায, সর্পিষা স্বেদযিত্বা, বস্ত্রপট্টাদিনা সর্পিমধু বদ্ধ্বা, আচারিকং-স্নেহবিধ্যুক্তং "উষ্ণোদকোপচারী স্যাত্" ইত্যাদিকং, আদিশেত্-কথযেত্|

Adhikarana sirAsnAyuvIlagnasyopAyaH (26) · Śloka 26

সিরাস্নাযুবিলগ্নং তু চালযিত্বা শলাকযা| |২৬|

স০-সিরাস্নাযুবিলগ্নং পুনঃ শল্যং শলাকযা চালযিত্বা শিথিলীকৃত্য, আহরেত্|

Adhikarana hRudayalagnasyopAyaH (26-27) · Śloka 27

| হৃদযে সংস্থিতং শল্যং ত্রাসিতস্য হিমাম্বুনা||২৬|| ততঃ স্থানান্তরং প্রাপ্তমাহরেত্তদ্যথাযথম্| যথামার্গং দুরাকর্ষম্|২৭|

স০-হৃদযে যদাশ্রিতং শল্যং তচ্ছীতজলেন ত্রাসিতস্য স্থানান্তরগতং জ্ঞাত্বা, যথাযথং-যথাস্বং বিশিষ্টযন্ত্রৈঃ, শল্যং নির্হরেত্|

Adhikarana hRudayopAyamanyatrAdishati (27) · Śloka 27

| অন্যতোঽপ্যেবমাহরেত্||২৭||

স০-অন্যতোঽপি-অন্যদেশস্থমপি শল্যং, দুরাকর্ষং-দুঃখেনাক্রষ্টুং শক্যতে, তত্ স্বমার্গং নযেত্ তদেবমেবাহরেত্, যথা হৃত্স্থং শল্যম্ স্থানান্তরং প্রাপ্তং নির্হার্যম্| তথা, যথামার্গং-মার্গানতিক্রমেণ, অন্যদেশস্থমপি শল্যমাকর্ষণীযম্|

Adhikarana asthilagnasyopAyaH (28) · Śloka 28

অস্থিদষ্টে নরং পদ্ভ্যাং পীডযিত্বা বিনির্হরেত্| |২৮|

স০-অস্থিদষ্টে-অস্থ্নি বিদষ্টে স্পৃষ্টে সতি শল্যে, নরং বলবন্তং পদ্ভ্যাং পীডযিত্বা-আক্রম্য, তচ্ছল্যং বিনির্হরেত্| 'অস্থিনষ্টে' ইতি বা পাঠঃ|

Adhikarana upAyAntaram (28) · Śloka 28

| ইত্যশক্যে সুবলিভিঃ সুগৃহীতস্য কিঙ্করৈঃ||২৮||

স০-ইত্যশক্যে-অনেনাপি প্রকারেণক্রষ্টুমশক্যে শল্যে, কিঙ্করৈঃ-ভৃত্যৈঃ, মহাবলৈঃ সুগৃহীতস্য-সুষ্ঠ্ববষ্টব্ধস্য নরস্য, শল্যং কঙ্কমুখাদিনা নির্হরেত্|

Adhikarana evamapyashakyasyopAyaH (29-31) · Śloka 31

তথাঽপ্যশক্যে বারঙ্গং বক্রীকৃত্য ধনুর্জ্যযা| সুবদ্ধং বক্ত্রকটকে বধ্নীযাত্সুসমাহিতঃ||২৯|| সুসংযতস্য পঞ্চাঙ্গ্যা বাজিনঃ কশযাঽথ তম্| তাডযেদিতি মূর্ধানং বেগেনোন্নমযন্ যথা||৩০|| উদ্ধরেচ্ছল্যম্| |৩১|

স০-তথাপ্যশক্যে-এবমপি শল্য আহর্তুমশক্যে, বারঙ্গং-শস্ত্রাদিমযস্য শল্যস্য শিখাকারং, বক্রীকৃত্য-কুটিলতাং প্রাপয্য, ততো ধনুর্জ্যযা-স্নায্বাদিময্যা, সুবদ্ধং কৃত্বা, অনন্তরং, বাজিনঃ-অশ্বস্য, বক্ত্রকটকে বধ্নীযাদ্বৈদ্যঃ| কিম্ভূতঃ ? সুসমাহিতঃ,-তদ্গতমনাঃ| কিম্ভূতস্য বাজিনঃ ? সুসংযতস্য,-সুষ্ঠু-শোভনং কৃত্বা, বদ্ধস্য| কথং সুসংযতস্য ? পঞ্চাঙ্গ্যা, পঞ্চানামঙ্গানাং-চতুর্ণাং পাদানাং মুখসহিতানাং, সমাহারঃ পঞ্চাঙ্গী,-বন্ধবিশেষঃ, তযা পঞ্চাঙ্গ্যা, বদ্ধস্য| অনন্তরং বাজিনং কশযা-চর্মযষ্ট্যা, ইতি-এবং, তাডযেত্, যথা স বাজী মূর্ধানমুন্নমযন্-উত্ক্ষিপন্, বেগেন-বলেনাঽঽক্রান্ত্যা, শল্যমুদ্ধরেত্|

Adhikarana upAyAntaram (31) · Śloka 31

এবং বা শাখাযাং কল্পযেত্তরোঃ| |৩১|

স০-অথবা এবং-অনেন প্রকারেণ, বারঙ্গং বক্রতাং নীত্বা ধনুর্জ্যযা সুবদ্ধং সম্পাদ্য সুসমাহিতো ভিষক্, বৃক্ষস্য শাখামানময্য ধনুর্জ্যযৈব তস্যাং তত্ বধ্নীযাচ্ছল্যাকর্ষণার্থম্| অত্র চ যা শাখা কিঙ্করহস্তাদিবিমুক্তমাত্রৈবোর্ধ্বমুন্নম্যমানা শল্যমুদ্ধরতি তাদৃশী কল্পনীযা|

Adhikarana durbalavAra~ggasyopAyaH (31) · Śloka 31

| বদ্ধা দুর্বলবারঙ্গং কুশাভিঃ শল্যমাহরেত্||৩১||

স০-দুর্বলং-তনু, বারঙ্গং যস্য শল্যস্য তচ্ছল্যং কুশাভিঃ-বংশাদিকম্বিকাভিঃ, বদ্ধা শল্যমাকর্ষেত্|

Adhikarana shoPagrastavAra~ggasyopAyaH (32) · Śloka 32

শ্বযথুগ্রস্তবারঙ্গং শোফমুত্পীড্য যুক্তিতঃ| |৩২|

স০-শ্বযথুনা গ্রস্তং-আচ্ছাদিতং, বারঙ্গং যস্য শল্যস্য তচ্ছল্যমাহরেত্| কথম্ ? যুক্তিতঃ,-যথা যুজ্যতে তথা, শোফমুত্পীড্য-ঊর্ধ্বং পীডযিত্বা|

Adhikarana uttuNDitasyopAyaH (32) · Śloka 32

| মুদ্গরাহতযা নাড্যা নির্ঘাত্যোত্তুণ্ডিতং হরেত্||৩২||

স০-উত্তুণ্ডিতং শল্যং-বুদ্বুদবদভিমুখীভূতং, নাড্যা নির্ঘাত্য-চালযিত্বা, হরেত্| কিম্ভূতযা? মুদ্গরেণাহতযা| মুদ্গরগ্রহণমুপলক্ষণার্থম্, পাষাণাদিভিরপ্যাহতযোত্তুণ্ডিতং হরেদিতি বেদ্যম্|

Adhikarana amArgottuNDitasyopAyaH (33) · Śloka 33

তৈরেব চানযেন্মার্গমমার্গোত্তুণ্ডিতং তু যত্| |৩৩|

স০-তৈরেব চ-মুদ্গরাদিভিরাহতৈঃ, অমার্গৈরুত্তুণ্ডিতং-অমার্গোত্তুণ্ডিতং, মার্গমানযেত্-মার্গং প্রাপযেত্|

Adhikarana karNayoktasyopAyaH (33) · Śloka 33

| মৃদিত্বা কর্ণিনাং কর্ণং নাড্যাস্যেন নিগৃহ্য বা||৩৩||

স০-কর্ণঃ কর্ণৌ কর্ণা বা বিদ্যন্তে যেষাং তে কর্ণিনঃ,-ভল্লাদযঃ তেষাং কর্ণং মৃদিত্বা-ভঙ্ক্ত্বা, শল্যং নির্হরেত্| অথবা নাড্যাস্যেন-নাডীমুখেন, নিগৃহ্য নির্হরেত্| "নাডী পঞ্চমুখচ্ছিদ্রা" (হৃ. সূ. অ. ২৪|১৩) ইত্যেবমাদিগ্রন্থনির্দিষ্টৈর্নাডীযন্ত্রৈর্নির্হরেদিত্যর্থঃ|

Adhikarana niShkarNasyopAyaH (34) · Śloka 34

অযস্কান্তেন নিষ্কর্ণং বিবৃতাস্যমৃজুস্থিতম্| |৩৪|

স০-অযস্কান্তেন-লোহাকর্ষকমণিবিশেষেণ, নিষ্কর্ণং শল্যং তথা বিবৃতমুখং ঋজু-স্পষ্টং কৃত্বাঽবস্থিতম্ নির্হরেত্|

Adhikarana pakkAshayagatasyopAyaH (34) · Śloka 34

| পক্বাশযগতং শল্যং বিরেকেণ বিনির্হরেত্||৩৪||

স০-পক্বাশযস্থিতং শল্যং বিরেচনেন বিশেষেণ নির্হরেত্|

Adhikarana duShTavAtAdInAmupAyaH (35) · Śloka 35

দুষ্টবাতবিষস্তন্যরক্ততোযাদি চূষণৈঃ| |৩৫|

স০-দুষ্টবাতাদীনি চূষণৈর্নির্হরেত্| চূষণৈরিতি বহুবচননির্দেশাচ্ছৃঙ্গাদিভিরিতি বোধ্যম্|

Adhikarana kaNThagatasyopAyaH (35-36) · Śloka 36

| কণ্ঠস্রোতোগতে শল্যে সূত্রং কণ্ঠে প্রবেশযেত্||৩৫|| বিসেনাত্তে ততঃ শল্যে বিসং সূত্রং সমং হরেত্| |৩৬|

স০-কণ্ঠস্রোতঃস্থে শল্যে সূত্রং-কার্পাসাদিজং, বিসেন কণ্ঠে প্রবেশযেত্- বিসসংলগ্নং সূত্রং কৃত্বা শল্যনির্হরণায প্রবেশযেদিত্যর্থঃ| আত্তে-গৃহীতে, শল্যে বিসসংলগ্নে, অনন্তরং শল্যং বিসসূত্রং সমং-তুল্যকালং, আহরেত্|

Adhikarana jAtuShasyopAyaH (36-37) · Śloka 37

| নাড্যাঽগ্নিতাপিতাং ক্ষিপ্ত্বা শলাকামপ্স্থিরীকৃতাম্||৩৬|| আনযেজ্জাতুষং কণ্ঠাত্| |৩৭|

স০-জাতুষে শল্যে কণ্ঠস্রোতঃপ্রবিষ্টে তত্ জাতুষং শল্যং কণ্ঠাদানযেত্| কথম্ ? ইত্যাহ-শলাকাং কণ্ঠে ক্ষিপ্ত্বা| কথম্ ? নাড্যা-নাডীযন্ত্রেণ প্রক্ষিপ্য কণ্ঠদাহপরিহারার্থম্| কীদৃশীং শলাকাম্ ? অদ্ভিঃ স্থিরীকৃতাং, নির্বাপণদ্বারেণ| তাং তথাবিধাম্ শলাকাং কৃত্বা নাড্যৈব জাতুষং শল্যং কণ্ঠাদানযেত্-আকর্ষযেত্| জাতুষমিত্যত্র"ত্রপুজতুনোঃষুক্" ইত্যণ্ ষুগাগমশ্চ|

Adhikarana ajAtuShasyopAyaH (37) · Śloka 37

জতুদিগ্ধামজাতুষম্| |৩৭|

স০-অজাতুষং-দারুবেণ্বাদিমযং শল্যং, কণ্ঠস্রোতঃস্থিতং জতুদিগ্ধাং-লাক্ষালিপ্তাং, শলাকামগ্নিতাপিতাং নাড্যা ক্ষিপ্ত্বা পূর্ববচ্ছল্যমাহরেত্| জতুদিগ্ধামিত্যুপলক্ষণার্থম্, সিক্থাদিদিগ্ধামপি| যথা শলাকযা হর্তুং যুজ্যতে তথা কৃত্বেতি বোধ্যম্|

Adhikarana matsyAdikaNTakasyopAyaH (37-38) · Śloka 38

| কেশোন্দুকেন পীতেন দ্রবৈঃ কণ্টকমাক্ষিপেত্||৩৭|| সহসা সূত্রবদ্ধেন বমতঃ| |৩৮|

স০-কণ্টকং-মত্স্যাদিজং, মাংসসঙ্গেন ভুক্তং কণ্ঠস্রোতসি স্থিতং, দ্রবৈঃ-পানীযাদিভিঃ সহ, পীতেন কেশোন্দুকেনাক্ষিপেত্| কেশানাং সমূহঃ-কেশোন্দুকম্, তেন| কিম্ভূতেন কেশোন্দুকেন ? সূত্রবদ্ধেন,-দীর্ঘসূত্রগ্রথিতেন| বমতঃ-বমনমাচরতঃ, কণ্টকমেকদেশসক্তসূত্রং সহসৈবাক্ষিপেত্| এবং চ বমনদ্রব্যসংস্কৃতৈর্দ্রবৈঃ কেশোন্দুকং পাতব্যমিত্যবতিষ্ঠতে|

Adhikarana keshondukasyopAyaH (38) · Śloka 38

তেন চেতরত্| |৩৮|

স০-তেন-কণ্ঠকেন, ইতরত্-কেশোন্দুকং, প্রমাদপীতমাহরেত্| ক্ষতকণ্ঠশ্চ ত্রিফলাং মধুঘৃতসিতোপেতামনুকণ্ঠং লিহ্যাত্| সুশ্রুতে চোক্তম্ (সূ. অ. ২৭|১৯)-"অস্থিশল্যমন্যদ্বাতির্যক্কণ্ঠাসক্তমবেক্ষ্য কেশোন্দুকং দৃঢৈকসূত্রবদ্ধং দ্রবভক্তোপহিতং পাযযেদাকণ্ঠাত্ পূর্ণকোষ্ঠং চ বামযেত্| বমতশ্চ শল্যৈকদেশসক্তং জ্ঞাত্বা সূত্রং সহসা ত্বাক্ষিপেত্| মৃদুনা বা দন্তধাবনকূর্চকেনাপহরেত্ প্রণুদেদ্বাঽন্তঃ|" ইতি|

Adhikarana UrdhvamAhartumashakyasyopAyaH (38) · Śloka 38

| অশক্যং মুখনাসাভ্যামাহর্তুং পরতো নুদেত্||৩৮||

স০-মুখনাসাগতং শল্যং মুখনাসাভ্যামাহর্তুমশক্যং-আক্রষ্টুং যন্ন শক্যতে, তত্পরতো নুদেত্| প্রকৃতত্বান্মুখাত্ পরতো নাসাযাশ্চ পরতঃ| তস্মাদ্যেন কেনচিদুপাযেন কোষ্ঠং নযেদিতি গম্যতে|

Adhikarana grAsashalyasyopAyaH (39) · Śloka 39

অপ্পানস্কন্ধঘাতাভ্যাং গ্রাসশল্যং প্রবেশযেত্| |৩৯|

স০-গ্রাসঃ শল্যমিব গ্রাসশল্যং কণ্ঠাসক্তমন্তঃকোষ্ঠাখ্যং নযেত্| কথম্ ? অপাং পানং-অপ্পানং, তেন| তথা স্কন্ধঘাতেন, স্কন্ধস্য মুষ্ট্যাদিনা হননং-স্কন্ধঘাতঃ|

Adhikarana sUkShmAkShivraNashalyAnAmupAyaH (39) · Śloka 39

| সূক্ষ্মাক্ষিব্রণশল্যানি ক্ষৌমবালজলৈর্হরেত্||৩৯||

স০-অক্ষণী চ ব্রণশ্চ, তত্র শল্যানি-অক্ষিব্রণশল্যানি, সূক্ষ্মাণি চ তান্যক্ষিব্রণশল্যানি চ-সূক্ষ্মাক্ষিব্রণশল্যানি, তানি ক্ষৌ মাদিভির্নির্হরেত্| যোগ্যতাবশাত্ কদাচিত্ ক্ষৌ মেন-কৌশেযেন, কদাচিদ্বালেন, কদাচিজ্জলেন চ, নির্হরেত্|

Adhikarana udakashalyasyopAyaH (40) · Śloka 40

অপাং পূর্ণং বিধুনুযাদবাক্শিরসমাযতম্| বামযেচ্চামুখং ভস্মরাশৌ বা নিখনেন্নরম্||৪০||

স০-অপাং পূর্ণং নরং বিধুনুযাত্| কিম্ভূতম্ ? অবক্শিরসম্, অবাক্-অধঃ, শিরো-মূর্ধা, যস্য তম্| তথা আযতং-দীর্ঘং কৃত্বা, তথা তং নরং বামযেদ্বৈদ্যঃ| অথবা, আমুখং-মুখং যাবত্, ভস্মরাশৌ নিখনেত্-ন্যসেত্| তথোক্তম্-"উদকপূর্ণস্য চক্রাদ্যারোপণেনোদকনিঃসারঃ কার্যঃ|" ইতি|

Adhikarana karNagatodakashalyasyopAyaH (41) · Śloka 41

কর্ণেঽম্বুপূর্ণে হস্তেন মথিত্বা তৈলবারিণী| ক্ষিপেদধোমুখং কর্ণং হন্যাদ্বাঽঽচূষযেত বা||৪১||

স০-কর্ণেঽম্বুনা পূর্ণে সতি তৈলবারিণী ক্ষিপেত্| কিং কৃত্বা ? হস্তেন মথিত্বা-করেণ বিলোড্য| তথাঽধোমুখং কর্ণং হন্যাত্| বা-অথবা, চূষযেত্ নাড্যা বা শৃঙ্গাদিভিঃ|

Adhikarana karNagatakITashalyasyopAyaH (42) · Śloka 42

কীটে স্রোতোগতে কর্ণং পূরযেল্লবণাম্বুনা| সুক্তেন বা সুখোষ্ণেন মৃতে ক্লেদহরো বিধিঃ||৪২||

স০-কীটে-পিপীলিকাশতপদ্যাদৌ, স্রোতঃস্থিতে (স্রোতোগতে)-তোদগৌরবমেদাদিভিরনুমিতে, কর্ণং লবণাম্বুনা পূরযেত্| অথবা সুক্তেন পূরযেত্| কিম্ভূতেন? সুখোষ্ণেন| মৃতে পুনস্তস্মিন্ কীটে ক্লেদহরো বিধিঃ কার্যঃ|

Adhikarana jAtuShAdishalyaM dehoShmaNaiva vilIyate (43) · Śloka 43

জাতুষং হেমরূপ্যাদিধাতুজং চ চিরস্থিতম্| ঊষ্মণা প্রাযশঃ শল্যং দেহজেন বিলীযতে||৪৩||

স০-জাতুষাদিশল্যং দেহজেনোষ্মণা চিরস্থিতং প্রাযশো বিলীযতে|

Adhikarana mRudAdishalyaM cirAdapi na ciliyate,vilayanABAve hetuH (44-45) · Śloka 45

মৃদ্বেণুদারুশৃঙ্গাস্থিদন্তবালোপলানি ন| বিষাণবেণ্বযস্তালদারুশল্যং চিরাদপি||৪৪|| প্ড়যো নির্ভুজ্যতে তদ্ধি পচত্যাশু পলাসৃজী| |৪৫|

স০-মৃদ্বেণুদার্বাদিশল্যং দেহোষ্মণা ন বিলীযতে| উপলশব্স্য নপুংসকত্বং চিন্ত্যম্| বিষাণাদিশল্যং প্রাযো দেহজেনোষ্মণা চিরাদপি ন বিলীযতে| অপি তু নির্ভুজ্যতে-পৃথগ্ভবতি| চিরাদপি ন পচ্যতে কুতঃ ? ইত্যাহ-তদ্ধীত্যাদি| হি-যস্মাত্, তত্-বিষাণাদিশল্যং, শীঘ্রমেব পলাসৃজী পচতি| অতো মাংসরক্তপাকাদ্দেহজেন চোষ্মণা প্রাযো নির্ভুজ্যতে|

Adhikarana vidAhopAyaH (45-47) · Śloka 47

| শল্যে মাংসাবগাঢে চেত্স দেশো ন বিদহ্যতে||৪৫|| ততস্তং মর্দনস্বেদশুদ্ধিকর্ষণবৃংহণৈঃ| তীক্ষ্ণোপনাহপানান্নঘনশস্ত্রপদাঙ্কনৈঃ||৪৬|| পাচযিত্বা হরেচ্ছল্যং পাটনৈষণমেদনৈঃ| |৪৭|

স০-মাংসাবগাঢে-মাংসান্তর্নিগূঢে শল্যে সতি, যদি স দেশো ন বিদহ্যতে-ন পচ্যতে, যত্র তত্ তিষ্ঠতি শল্যম্| ততস্তং মর্দনেন স্বেদনেন বা, কদাচিত্ শুদ্ধ্যা-বমনাদিকযা, কদাচিত্কর্ষণেন, কদাচিদ্বৃংহণেন, কদাচিত্তীক্ষ্ণোপনাহেন, কদাচিত্তীক্ষ্ণান্নপানেন, তীক্ষ্ণশব্দস্য হি প্রত্যেকং সম্বন্ধঃ, কদাচিদ্ধনশস্ত্রপদাঙ্কনৈঃ, শস্ত্রস্য পদানি-শস্ত্রপদানি, ঘনানি সংহিতনি, চ তানি শস্ত্রপদানি চ, তেষামঙ্কনং-লক্ষণং, তৈঃ| মর্দনাদিভিরেকেন দ্বাভ্যাং সর্বৈর্বা যথাক্রমং পূর্বং শল্যং পাচযিত্বা ততঃ পাটনৈষণভেদনৈর্হরেত্|

Adhikarana anuktashalyasa~ggrahArthaMmupAyaH (28) · Śloka 28

| শল্যপ্রদেশযন্ত্রাণামবেক্ষ্য বহুরূপতাম্||৪৭|| তৈস্তৈরুপাযৈর্মতিমান্ শল্যং বিদ্যাত্তথাঽঽহরেত্| ৪৭ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা- যামষ্টাঙ্গহৃদযসংহিতাযাং সূত্রস্থানে শল্যাহর- ণবিধির্নামাষ্টাবিংশোঽধ্যাযঃ||২৮||

স০-শল্যানি-ধাতুবিষাণবেণ্বাদিজানি, প্রদেশাঃ-ত্বঙ্মাংসাদযঃ, যন্ত্রাণি-স্বস্তিকাদীনি, তেষাং বহুরূপতামবেক্ষ্য- নানাকারতাং জ্ঞাত্বা, তৈস্তৈরুপাযৈঃ-উক্তানুক্তৈর্বিজ্ঞানসাধনকারণৈঃ, মতিমান্-ভিষক্, শল্যং জানীযাত্ তথাঽঽকর্ষেদিতি| সঙ্গ্রহে চোক্তম্ (সূ. অ. ৩৭)-"ব্রণে প্রসন্নে প্রান্তেষু নাতিস্পর্শাসহিষ্ণুষু| অল্পে শোফে চ তাপে চ নিঃশল্যমিতি নির্দিশেত্|" ইতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদয- টীকাযাং সর্বাঙ্গসুন্দরাখ্যাযাং সূত্রস্থানে শল্যাহরণ- বিধির্নামাষ্টাবিংশোঽধ্যাযঃ সমাপ্তঃ|| ২৮||