26. śastravidhiradhyāyaḥ

Adhikarana adhyAyopakramaH · Śloka

অথেদানীং ষড্বিংশাধ্যাযরম্ভঃ শস্ত্রস্বরূপবিজ্ঞানার্থঃ|

Adhikarana shastravidhiradhyAyaH (2-3) · Śloka 3

অথাতঃ শস্ত্রবিধিমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২| )|৩|

স০-শস্ত্রস্য বিধিঃ শস্ত্রবিধিঃ| শেষং পূর্ববত্|

Adhikarana ShaDviMshatiH shastrANiteShAmupayogaH ShavDishatishastrANAM nAmAni (1-3.5) · Śloka 3

ষড্বিংশতিঃ সুকর্মারৈর্ঘটিতানি যথাবিধি| শস্ত্রাণি রোমবাহীনি বাহুল্যেনাঙ্গুলানি ষট্||১|| সুরূপাণি সুধারাণি সুগ্রহাণি চ কারযেত্| অকরালানি সুধ্মাতসুতীক্ষ্ণাবর্তিতেঽযসি||২|| সমাহিতমুখাগ্রাণি নীলম্ভোজচ্ছবীনি চ| নামানুগতরূপাণি সদা সন্নিহিতানি চ||৩|| স্বোন্মনার্ধচতুর্থাংশফলান্যেকৈকশোঽপি চ| প্রাযো দ্বিত্রাণি, যুঞ্জীত তানি স্থানবিশেষতঃ||৪|| (মণ্ডলাগ্রং বৃদ্ধিপত্রমুত্পলাধ্যর্দ্ধধারকে| সর্পৈষণ্যৌ বেতসাখ্যং শরার্যাস্যত্রিকূর্চকে||১|| কুশাস্যং সাটবদনমন্তর্বক্রার্ধচন্দ্রকে (কম্)| ব্রীহিমুখং কুঠারী চ শলাকাঙ্গুলিশস্ত্রকে||২|| বডিশং করপত্রাখ্যং কর্তরী নখশস্ত্রকম্| দন্তলেখনকং সূচ্যঃ কূর্চো নাম খ্রজাহ্বযম্||৩|| আরা চতুর্বিধাকারা তথা স্যাত্কর্ণবেধনী(নম্)||৩.৫||

স০-বাহুল্যেন শস্ত্রাণি ষডঙ্গুলানি ভবন্তি| তথা ষড্বিংশতিসঙ্খ্যানি, তথা সুকর্মারৈঃ-কর্মকুশলৈর্নরৈঃ, যথাবিধি { ঘটিতানি }-সম্যঙ্নিষ্পাদিতানি, তথা রোমবাহীনি-লোমশাতনসমর্থানি, তথা সুরূপাণি-শোভনাকারাণি, তথা সুধারাণি-শোভনধারাণি, তথা সুখেন গৃহ্যন্তে-সুগ্রহাণি চ, কারযেত্| ক্ব ? অযসি| কীদৃশে ? সুষ্ঠু ধ্মাতং সুধ্মাতং, তথা সুতীক্ষ্ণং স্বাবর্তিতং চ যদযঃ-শস্ত্রং, তস্মিন্| কীদৃশানি শস্ত্রাণি ? অকরালানি-সুদর্শনানি| তথা, সমাহিতং-সুষ্ঠুকৃতং, মুখাগ্রং-ফলং, যেষাং তানি সমাহিতমুখাগ্রাণি| তথা, নীলোত্পলদ্যুতীনি| তথা, নাম্নাঽনুগতং রূপং যেষাং তানি-অন্বর্থনামানীত্যর্থঃ| তথা, সর্বকালং সন্নিহিতানি-সমীপস্থানি| তথা, স্বং চ তদুন্মানং চ স্বোন্মানং-আত্মীযং প্রমাণং, তস্মাত্সকাশাদর্ধম্, তস্য চতুর্থাংশঃ-অষ্টভাগঃ, ফলং যেষাং তান্যেবম্| অপি চেতি সমুচ্চযে| এবংবিধানি শস্ত্রাণ্যেকৈকশঃ স্থানবিশেষাত্ দ্বিত্রাণি প্রযুঞ্জীত| একৈকশ ইতি "একং বহুব্রীহিবত্ " ইতি দ্বিত্বসুব্লোপৌ, ততঃ শস্প্রত্যযঃ|

Adhikarana 1 maNDalAgraM shastram (5) · Śloka 5

মণ্ডলাগ্রং ফলে তেষাং তর্জন্যন্তর্নখাকৃতি| লেখনে ছেদনে যোজ্যং পোথকীশুণ্ডিকাদিষু||৫||

স০-তেষাং শস্ত্রাণাং মধ্যে মণ্ডলাগ্রং নাম শস্ত্রম্| কীদৃক্ ? ফলোদ্দেশে তর্জন্যা অন্তর্নখস্তর্জন্যন্তর্নখঃ তস্যেবাকৃতির্যস্য তদেবম্| ক্বৈতদ্যোজ্যম্ ? ইত্যাহ-লেখনে ছেদনে চ পোথক্যাদিষু যোজ্যম্| আদিশব্দেন বর্ত্মরোগাদযো গৃহ্যন্তে|

Adhikarana 2 vRuddhipatraM (6-7) · Śloka 7

বৃদ্ধিপত্রং ক্ষুরাকারং ছেদভেদনপাটনে| ঋজ্বগ্রমুন্নতে শোফে গম্ভীরে চ তদন্যথা||৬|| নতাগ্রং পৃষ্ঠতো দীর্ঘহ্রস্ববক্ত্রং যথাশ্রযম্| |৭|

স০-বৃদ্ধিপত্রং নাম শস্ত্রং ক্ষুরাকারং স্যাত্| তচ্চ ছেদনাদিষু যোজ্যমিতি প্রকৃতম্| ফলপরিমাণং তূক্তমেব| কীদৃক্ ? ঋজু-স্পষ্টমগ্রং যস্য তদৃজ্বগ্রম্, তদুন্নতে শোফে স্যাত্| গম্ভীরে তু শোফে তত্-বৃদ্ধিপত্রমন্যথা| কথমন্যথা ? ইত্যাহ-নতেত্যাদি| পৃষ্ঠতঃ-পৃষ্ঠদেশে, নতমগ্রং যস্য তন্নতাগ্রং ভবতীতি|

Adhikarana 3 utpalapatraM,4 adhyarddadhAraM shastram (7) · Śloka 7

| উত্পলাধ্যর্ধধারাখ্যে ভেদনে ছেদনে তথা||৭||

স০-{ যথাযথং-যথাস্বং, দীর্ঘবক্ত্রং হ্রস্ববক্ত্রং চ যুঞ্জ্যাত্| } উত্পলং চাধ্যর্ধধারং চ, তে আখ্যে যযোস্ত উত্পলাধ্যর্ধধারাখ্যে শস্ত্রে যথাক্রমং দীর্ঘহ্রস্ববক্ত্রে ভবথঃ| উত্পলপত্রং দীর্ঘমুখমধ্যর্ধধারং তু হ্রস্ববক্ত্রমিত্যর্থঃ| তে ভেদনে ছেদনে চ যোজ্যে| তথেতি সমুচ্চযে, পাটনে চ যোজ্য ইত্যর্থঃ|

Adhikarana 5 sarpAsyaM shastram (8) · Śloka 8

সর্পাস্যং ঘ্রাণকর্ণার্শশ্চ্ছেদনেঽর্ধাঙ্গুলং ফলে| |৮|

স০-সর্পবক্ত্রং নাম শস্ত্রং নামানুগতাকারং ঘ্রাণার্শশ্চ্ছেদনে কর্ণার্শশ্ছেদনে চ যোজ্যম্| তচ্চ ফলেঽর্ধাঙ্গুলং ভবতি|

Adhikarana 6 anveShaNA eShaNI bhedanArthA eShaNI ca shastram (8-9) · Śloka 9

| গতেরন্বেষণে শ্লক্ষ্ণা গণ্ডূপদমুখৈষণী||৮|| ভেদনার্থেঽপরা সূচীমুখা মূলনিবিষ্টখা| |৯|

স০-এষণী নাম শস্ত্রম্ গতের্ব্রণানামন্বেষণে যোজ্যম্| কীদৃশী ? শ্লক্ষ্ণা-কোমলস্পর্শা| তথা, গণ্ডূপদমুখমিব মুখং যস্যাঃ সা গণ্ডূপদমুখা| দ্বিতীযামেষণীমাহ- স০-অপরৈষণী ভেদনার্থে সূচীমুখা স্যাত্| তথা, মূলে নিবিষ্টং-কৃতং, খং-ছিদ্রং, যস্যাঃ সা মূলনিবিষ্টখা|

Adhikarana 7 vetasapatraM shastram (9) · Śloka 9

| বেতসং ব্যঘনে|৯|

স০- বেতসং- বেতসপত্রাকারং শস্ত্রম্, ষডঙ্গুলং পূর্বোক্তফলম্| তচ্চ ব্যধনে যোজ্যম্|

Adhikarana 8 sharArimukhaM shastram,9 trikUrcakaM shastram (9) · Śloka 9

| স্রাব্যে শরার্যাস্যত্রিকূর্চকে||৯||

স০-শরারিঃ-আঠ্যাখ্যঃ পক্ষিবিশেষঃ| শরার্যাস্যং নাম শস্ত্রং ত্রিকূর্চকে চ স্রাব্যে যোজ্যম্|

Adhikarana 10 kushapatraM shatram11 ATAmukhaM shastram (10) · Śloka 10

কুশাটাবদনে স্রাব্যে হ্যঙ্গুলং স্যাত্তযোঃ ফলম্| |১০|

স০-কুশাটা নাম শস্ত্রং বদনে স্রাব্যে যোজ্যম্| তযোঃ-শরারিকুশাটযোঃ, ফলং দ্ব্যঙ্গুলপ্রমাণং স্যাত্|

Adhikarana 12 antarmukhaM shastram (10-11) · Śloka 11

| তদ্বদন্তর্মুখং তস্য ফলমধ্যর্ধমঙ্গুলম্||১০|| অর্ধচন্দ্রাননং চৈতত্| |১১|

স০-অন্তর্মুখং নাম শস্ত্রং তদ্বত্-কুশাটাতুল্যম্| তস্য-অন্তর্মুখস্য, ফলং সার্ধমঙ্গুলং স্যাত্| তথা-কুশাটাতুল্যমেতদপি, অর্ধচন্দ্রাস্যসংজ্ঞং শস্ত্রম্| চঃ সমুচ্চযে ভিন্নক্রমে|

Adhikarana 13 vrIhimukhaM shastraM (11) · Śloka 11

তথাধ্যর্ধাঙ্গুলং ফলে| ব্রীহিবক্ত্রং প্রযোজ্যং চ তচ্ছিরোদরযোর্ব্যধে||১১||

স০-ব্রীহিবক্ত্রমপ্যধ্যর্ধাঙ্গুলং ফলে স্যাত্| তচ্চ শিরাব্যধ উদরব্যধে চ যোজ্যম্|

Adhikarana 14 kuThArI shastram (12) · Śloka 12

পৃথুঃ কুঠারী গোদন্তসদৃশার্ধাঙ্গুলাননা| তযোর্ধ্বদণ্ডযা বিধ্যেদুপর্যস্থাং স্থিতাং শিরাম্||১২||

স০-কুঠারী নাম শস্ত্রং পৃথুঃ-বিস্তীর্ণসংস্থানদণ্ডা| তথা, গোদন্তসদৃশমর্ধাঙ্গুলমাননং যস্যাঃ সৈবম্| তযা-কুঠারিকযা, ঊর্ধ্বদণ্ডযা সত্যা শিরামস্থ্নামুপরি স্থিতাং বিধ্যেত্|

Adhikarana 15 shalAkA shastram (13) · Śloka 13

তাম্রী শলাকা দ্বিমুখী মুখে কুরুবকাকৃতিঃ| লিঙ্গনাশং তযা বিধ্যেত্|১৩|

স০-তাম্রমযী শলাকা দ্বিমুখী স্যাত্| সা চ মুখে কুরুবকাকৃতিঃ-রক্তসহচরপুষ্পমুকুলাকারা স্যাত্| তযা শলাকযা, লিঙ্গনাশং-কফোত্থপটলসংজ্ঞং, বিধ্যেত্|

Adhikarana 16 a~gulIshastram (13-15) · Śloka 15

| কুর্যাদঙ্গুলিশস্ত্রকম্||১৩|| মুদ্রিকানির্গতমুখং ফলে ত্বর্ধাঙ্গুলাযতম্| যোগতো বৃদ্ধিপত্রেণ মণ্ডলাগ্রেণ বা সমম্||১৪|| তত্প্রদেশিন্যগ্রপর্বপ্রমাণার্পণমুদ্রিকম্| সূত্রবদ্ধং গলস্রোতোরোগচ্ছেদনভেদনে||১৫||

স০-অঙ্গুলিশস্ত্রকং কুর্যাত্| কীদৃশম্ ? মুদ্রিকযা-ঊর্মিকযা, নির্গতং-নিষ্ক্রান্তং, মুখং যস্য তন্মুদ্রিকানির্গতমুখম্| ফলে তু-তস্মিন্মুখে, অর্ধাঙ্গুলদীর্ঘম্| যোগতঃ-সংস্থানেন, বৃদ্ধিপত্রেণ মণ্ডলাগ্রেণ বা তুল্যম্| কিযত্প্রমাণাঽস্য মুদ্রিকা কার্যা ? ইত্যাহ-তত্প্রদেশিন্যগ্রেত্যাদি| তস্য-বৈদ্যস্য, যা প্রদেশিনী তস্যা যদগ্রপর্ব তস্য যত্প্রমাণং তেনার্প্যত ইতি তত্প্রদেশিন্যগ্রপর্বপ্রমাণার্পণী-ভিষক্তর্জন্যগ্রপর্বপ্রবেশাগ্রচ্ছিদ্রা, মুদ্রিকা যস্মিন্ তত্ তত্প্রদেশিন্যগ্রপর্বপ্রমাণার্পণমুদ্রিকম্| তথা, সূত্রেণ বদ্ধং-সূত্রবদ্ধম্, সূত্রেণ বদ্ধ্বা মণিবন্ধে যোজ্যমিত্যর্থঃ| গলস্রোতোরোগাণাং ছেদনে ভেদনে চ তদ্যোজ্যম্|

Adhikarana 17 baDishaM shastram (16) · Śloka 16

গ্রহণে শুণ্ডিকার্মাদের্বডিশং সুনতাননম্| |১৬|

স০-বডিশং নাম শস্ত্রং শুণ্ডিকার্মাদের্গ্রহণে যোজ্যম্| আদিশব্দেন প্রতিজিহ্বিকাদের্গ্রহণম্| কীদৃশং তত্ ? সুনতং-অঙ্কুশবদানতং, আননং-মুখং, যস্য তদেবম্|

Adhikarana 18 karapatraM shastram (16-17) · Śloka 17

| ছেদেঽস্ত্থ্নাং করপত্রং তু খরধারং দশাঙ্গুলম্||১৬|| বিস্তারে দ্ব্যঙ্গুলং সূক্ষ্মদন্তং সুত্সরুবন্ধনম্| |১৭|

স০-করপত্রং নাম শস্ত্রং খরধারং, তথা দশাঙ্গুলং দৈর্ঘ্যেণ, দ্ব্যঙ্গুলং বিস্তারেণ, সূক্ষ্মা দন্তা যস্য তত্সূক্ষ্মদন্তম্| তথা, ত্সরুঃ-মুষ্টিঃ, বন্ধনং-গ্রহণম্, শোভনে ত্সরুবন্ধনে যস্য তত্ সুত্সরুবন্ধনম্| অভিধানকোশে যদ্যপি 'ত্সরুঃ-অসিমুষ্টিঃ' ইত্যভ্যধাযি, তথাঽপি মুষ্টিমাত্রস্যেহোপলক্ষণার্থত্বাত্ মুষ্টাবপ্যুপপন্নমেব|

Adhikarana 19 kartarI shastram (17) · Śloka 17

| স্নাযুসূত্রকচচ্ছেদে কর্তরী কর্তরীনিভা||১৭||

স০-কর্তরী নাম শস্ত্রং কর্তরীসদৃশং স্নায্বাদিচ্ছেদে যোজ্যম্|

Adhikarana 20 nakhashastram (18) · Śloka 18

বক্ত্রর্জুধারং দ্বিমুখং নখশস্ত্রং নবাঙুলম্| সূক্ষ্মশল্যোদ্ধৃতিচ্ছেদমেদপ্রচ্ছানলেখনে||১৮||

স০-নখশস্ত্রং-নখচ্ছেদকং, প্রসিদ্ধম্| তচ্চ বক্ত্রা ঋজুশ্চ ধারা যস্য তদেবম্| তস্যৈকং মুখং বক্ত্রমন্যদৃজু-স্পষ্টম্| তথা, নবাঙ্গুলং-নবাঙুলপ্রমাণম্, ন তু ষডঙ্গুলম্| এতচ্চ সূক্ষ্মশল্যস্য-কণ্টকাদেরুদ্ধরণদৌ নখচ্ছেদনে ভেদনে { প্রচ্ছানে লেখনে } চ যোজ্যম্|

Adhikarana 21 dantalekhanakaM shastram (19) · Śloka 19

অধুনা দন্তলেখনশস্ত্রমাহ একধারং চতুষ্কোণং প্রবদ্ধাকৃতি চৈকতঃ| দন্তলেখনকং তেন শোধযেদ্বন্তশর্করাম্||১৯||

স০-একধারং-একস্মিন্ প্রদেশে { ধারা যস্য তদেবম্| } তথা, চতুষ্কোণম্| তথা, একতঃ-একস্মিন্দেশে প্রবদ্ধা আকৃতির্যস্য তত্| তদ্দন্তলেখনকং নাম শস্ত্রম্| তেন দন্তশর্করাং শোধযেত্|

Adhikarana 22 sUcItrayaM shastram (20-22) · Śloka 22

অধুনা সূচীশস্ত্রমাহ বৃত্তা গূঢদৃঢাঃ পাশে তিস্রঃ সূচ্যোঽত্র সীবনে| মাংসলানাং প্রদেশানাং ত্র্যস্রা ত্র্যঙ্গুলমাযতা||২০|| অল্পমাংসাস্থিসন্ধিস্থব্রণানাং দ্ব্যঙ্গুলাযতা| ব্রীহিবক্ত্রা ধনুর্বক্ত্রা পক্বামাশযমর্মসু||২১|| সা সার্ধদ্ব্যঙ্গুলা| |২২|

স০-অত্র-এষু শস্ত্রেষু মধ্যে, সীবনে-সীবনবিষযে, তিস্রঃ সূচ্যঃ স্যুঃ| কিম্ভূতাঃ ? বৃত্তাঃ-বর্তুলাঃ, পাশে গূঢাস্তথা দৃঢাঃ সারত্বাত্| আসাং চ প্রত্যেকং সংস্থানবিশেষেণ বিশেষোপযোগমাহ- স০-মাংসলানাং-বহুমাংসানাং, শরীরদেশানাং ত্র্যস্রা মুখে সূচী স্যাত্| সঙ্গ্রহেঽপ্যবোচত্ (সূ.অ.৩৪)-"ত্র্যস্রাগ্রা" ইতি| ত্র্যস্রেতি চিন্ত্যম্| তথা, ত্র্যঙ্গুলমাযতা-ত্র্যঙ্গুলদীর্ঘা| বৃত্তত্বং দৃঢপাশত্বং চোক্তমেব সামান্যলক্ষণেন| স০-অল্পমাংসানাং ব্রণানাং সন্ধ্যস্থিসংশ্রিতানাং চ দ্ব্যঙ্গুলমাযতা-দীর্ঘা| বৃত্তমুখত্বং চাস্যাঃ সামান্যেনোক্তম্| তৃতীযামাহ- স০-ব্রীহিমুখা, চাপবত্ কুটিলা, দৈর্ঘ্যেণ দ্বেঽঙ্গুলে সার্ধে স্যাত্| সা চ পক্বাশয আমাশযে মর্মসু চ ব্রণানাং সীবনে যোজ্যা|

Adhikarana 23 kUrcaH shastram (22-23) · Śloka 23

অধুনা কূর্চং লিলক্ষযিষুরাহ সর্ববৃত্তাস্তাশ্চতুরঙ্গুলাঃ| কূর্চো বৃত্তৈকপীঠস্থাঃ সপ্তাষ্টৌ বা সুবন্ধনাঃ||২২|| স যোজ্যো নীলিকাব্যঙ্গকেশশাতেষু কুট্টনে| |২৩|

স০-তাঃ-সূচ্যঃ, সর্বতো বর্তুলা দৈর্ঘ্যেণ চতুরঙ্গুলাঃ কূর্চ ইত্যুচ্যতে| কিম্ভূতাঃ ? বৃত্ত একস্মিন্ পীঠে সংস্থিতাঃ| তথা, সপ্তসঙ্খ্যা অষ্টৌ বা| তথা, শোভনং বন্ধনং যাসাং তাঃ সুবন্ধনাঃ| অত এবেদং শস্ত্রং সূচীকূর্চসংজ্ঞং শংসন্তি| তথা চার্শশ্চিকিত্সিতে জগাদ (হৃ. চি. অ. ৮|২৯)- "অর্শোভ্যো জলজশ্শস্ত্রসূচীকূর্চৈঃ" ইত্যাদি| স চ-সুবদ্ধসপ্তাষ্টসূচীকঃ কূর্চো, নীলিকাদিষু চ কুট্টনবিষযে যোজ্যঃ| উপলক্ষণার্থত্বাচ্চাস্য(সৌ) শ্বিত্রেন্দ্রলুপ্তাদিষ্বপি যোজ্যঃ|

Adhikarana 24 khajaH shastram (23-24) · Śloka 24

| অর্ধাঙ্গুলমুখৈর্বৃত্তৈরষ্টাভিঃ কণ্টকৈঃ খজঃ||২৩|| পাণিভ্যাং মথ্যমানেন ঘ্রাণাত্তেন হরেদসৃক্| |২৪|

স০-অষ্টাভিঃ কণ্টকৈঃ খজ উচ্যতে| কীদৃশৈঃ ? অর্ধাঙ্গুলপ্রমাণং মুখং যেষাং তৈঃ, তথা বর্তুলৈঃ| তেন-খজেন, হস্তাভ্যাং বিলোড্যমানেন, নাসিকাতোঽস্ত্রং হরেত্|

Adhikarana 25 karNavevyadhanaM shastram (24) · Śloka 24

| ব্যধনং কর্ণপালীনাং যূথিকামুকুলাননম্||২৪||

স০-কর্ণপালীনাং ব্যধনে যূথিকা নাম শস্ত্রং স্যাত্| কীদৃশী ? মুকুলাননা|

Adhikarana 26 ArA shastram (25-26) · Śloka 26

আরাঽর্ধাঙ্গুলবৃত্তাস্যা তত্প্রবেশা তথোর্ধ্বতঃ| চতুরস্রা, তযা বিধ্যেচ্ছোফং পক্বামসংশযে||২৫|| কর্ণপালীং চ বহলাং| |২৬|

স০-অর্ধাঙ্গুলপ্রমাণং বৃত্তং আস্যং-মুখং, যস্যাঃ সাঽর্ধাঙ্গুলবৃত্তাস্যা| তথা, স এব-অর্ধাঙ্গুলপ্রমাণঃ প্রবেশো যস্যাঃ সা তত্প্রবেশা| তথোর্ধ্বত ইতি বৃত্তার্ধাঙ্গুলাদুপরিষ্টাত্ তথৈব-অর্ধাঙ্গুলপ্রমাণৈব চতুরস্রা স্যাত্| সা আরানাম শস্ত্রম্| তযা আরযা, শোফং বিধ্যেত্| কদা ? পক্বামসংশযে,-কিমযং পক্বঃ শোফ উতাম ইতি সন্দেহে| বহলাং চ কর্ণপলীং তযা বিধ্যেত্|

Adhikarana karNavedhanI sUcI (26) · Śloka 26

বহলাযাশ্চ শস্যতে| সূচী ত্রিভাগসুষিরা ত্র্যঙ্গুলা কর্ণবেধনী||২৬||

স০-বহলাযাঃ-অতিমাংসলাযাঃ কর্ণপাল্যাশ্চ, সূচী শস্যতে,-ন কেবলমারা| কীদৃশী সূচী ? ত্রিভাগঃ-প্রান্তভাগাত্ সুষিরো যস্যাঃ সৈবম্| তথা, ত্র্যঙ্গুলা-দৈর্ঘ্যেণ| সা চ কর্ণবেধনী স্যাত্|

Adhikarana anushastrANi (27-28) · Śloka 28

জলৌকঃক্ষারদহনকাচোপলনখাদযঃ| অলৌহান্যনুশস্ত্রাণি, তান্যেবং চ বিকল্পযেত্||২৭|| অপরাণ্যপি যন্ত্রাদীন্বুপযোগং চ যৌগিকম্| |২৮|

স০-জলৌকঃপ্রভৃতযোঽনুশস্ত্রাণি রক্তস্রাবকার্যকারণাত্| তানি চালৌহানি-লোহবর্জিতানি| আদিশব্দেনাযস্কান্তশাকশোফালিকাদিখরপত্রাদীনাং গ্রহণম্| এবং চোক্তেন ন্যাযেনান্যান্যপি যন্ত্রাদীনি বিকল্পযেত্| আদিশব্দেন শস্ত্রাণাং গ্রহণম্| উপযোগং চ যৌগিকং-সাধুতরং, বুদ্ধ্যা নিরূপযেত্|

Adhikarana shastra kAryANi (28-29) · Śloka 29

| উত্পাট্যপাট্যসীব্যৈষ্যলেখ্যপ্রচ্ছানকুট্টনম্||২৮|| ছেদ্যং ভেদ্যং ব্যধো মন্থো গ্রহো দাহশ্চ তত্ক্রিযাঃ| |২৯|

স০-উত্পাট্যাদীনি তত্ক্রিযাঃ,-তেষাং-ষড্বিংশতিশস্ত্রাণাং, ক্রিযাঃ-কর্মাণি, তত্ক্রিযাঃ| { তানি ষড্বিংশতিশস্ত্রাণি সঙ্গ্রহোক্তানি (সূ. অ. ৩৪)- "তদ্যথা-দন্তলেখনমণ্ডলাগ্রবৃদ্ধিপত্রোত্পলপত্রাধ্যর্ধধারমুদ্রিকাকর্তরীসর্পবক্ত্রকরপত্রকুশপত্রাটামুখা-ন্তর্মুখশরারিমুখত্রিকূর্চকূঠারিকাব্রীহিমুখশলাকাবেতসপত্রারাকর্ণব্যধনসূচীসূচীকুর্চখজৈষণী-বডিশনখশস্ত্রাণি|" ইতি| } উত্পাট্যং-উদ্ধার্যম্, তত্র নখশস্ত্রং প্রযোজ্যম্| পাটনে বৃদ্ধিপত্রাদি| সীবনে সূচ্যঃ| লেখনে মণ্ডলাগ্রাদিঃ| প্রচ্ছানে নখশস্ত্রাদি| কুট্টনে কূর্চঃ| ছেদনে উত্পলপত্রাদি| ভেদনে এষণী সূচীমুখা| ব্যধনে বেতসাদি| মন্থনে খজঃ| গ্রহে সন্দংশঃ| দাহে শলাকাদিরিতি|

Adhikarana shastradoShAH (29-30) · Śloka 30

শস্ত্রদোশানহ | কুণ্ঠখণ্ডতনুস্থূলহ্রস্বদীর্ঘত্ববক্রতাঃ||২৯|| শস্ত্রাণাং খরধারত্বমষ্টৌ দোষাঃ প্রকীর্তিতাঃ| |৩০|

স০-স্পষ্টম্

Adhikarana shastragrahaNavidhiH (30-32) · Śloka 32

অধুনা শস্ত্রাণাং গ্রহণবিধিং দর্শযতি | ছেদভেদনলেখ্যার্থং শস্ত্রং বৃন্তফলান্তরে||৩০|| তর্জনীমধ্যমাঙ্গুষ্ঠৈর্গৃহ্ণীযাত্সুসমাহিতঃ| বিস্রাবণানি বৃন্তাগ্রে তর্জন্যঙ্গুষ্ঠকেন চ||৩১|| তলপ্রচ্ছন্নবৃন্তাগ্রং গ্রাহ্যং ব্রীহিমুখং মুখে| মূলেষ্বাহরণার্থানি ক্রিযাসৌকর্যতোঽপরম্||৩২||

স০-ছেদভেদনলেখ্যার্থং তর্জনীমধ্যমাঙ্গুষ্ঠৈর্মিলিতৈঃ শস্ত্রং বৃন্তফলান্তরে-বৃন্তফলমধ্যভাগে, গৃহ্ণীযাত্| কীদৃক্ ? সুসমাহিতঃ,-তদ্গতমনাঃ| বিস্রাবণকার্যাণি শরার্যাস্যাদীনি শস্ত্রাণি বৃন্তাগ্রে তর্জন্যঙ্গুষ্ঠাভ্যাং গৃহ্ণীযাত্| গৃহ্ণীযাদিত্যনুবর্ততে| তলশব্দেন পাণিতলমুচ্যতে, আদিলোপাখ্যযা তন্ত্রযুক্ত্যা| তলেন প্রচ্ছ্হন্নং বৃন্তাগ্রং যস্য তত্ ব্রীহিমুখং মুখে গৃহ্ণীযাত্| শেষং শস্ত্রং ক্রিযাসৌকর্যতো গৃহ্ণীযাত্| সুকরস্য ভাবঃ সৌকর্যম্| যথা সুকরা পাটনাদিকা ক্রিযা স্যাত্তথাঽঽদদীতেত্যর্থঃ|

Adhikarana shastrakoshaH (33-34) · Śloka 34

শস্ত্রকোশমাচষ্টতে স্যান্নবাঙ্গুলবিস্তারঃ সুঘনো দ্বাদশাঙ্গুলঃ| ক্ষৌ মপত্রোর্ণকৌশেযদুকূলমৃদুচর্মজঃ||৩৩|| বিন্যস্তপাশঃ সুস্যূতঃ সান্তরোর্ণার্স্থশস্ত্রকঃ| শলাকাপিহিতাস্যশ্চ শস্ত্রকোশঃ সুসঞ্চযঃ||৩৪||

স০-নবাঙ্গুলবিস্তারঃ শস্ত্রকোশঃ স্যাত্| তথা, সুষ্ঠু ঘনোনিবিডঃ| তথা, দ্বাদশাঙ্গুলপ্রমাণো দৈর্ধ্যেণ| তথা, ক্ষৌ মাদিজঃ| তথা, বিন্যস্তঃ-কৃতঃ, পাশো যস্য স বিন্যস্তপাশঃ| তথা, সুষ্ঠু স্যূতঃ| তথা, সান্তরাণি-সব্যবধানানি, ঊর্ণাস্থানি শস্ত্রাণি যস্মিন্ স সান্তরোর্ণাস্থশস্ত্রকঃ| তথা, শলাকযা পিহিতং-স্থগিতং, আস্যং যস্য স এবম্| তথা, শোভনঃ সঞ্চযো যস্য স সুসঞ্চযঃ, নাপিতভাণ্ডিকাবত্| তন্ত্রান্তরে চোক্তম্ "নিশানী তু শস্ত্রাণাং শ্লক্ষ্ণা শিলিকা মাষমুদ্গপ্রভা" ইত্যাদি|

Adhikarana jalaukasAM viShayaH (35) · Śloka 35

সুকুমারবালানামস্রবিস্রাবণার্থং জলৌকসো যোজযেত্ জলৌকসস্তু সুখিনাং রক্তস্রাবায যোজযেত্| |৩৫|

স০-সুখিনাং-সুখোচিতানাং, রক্তস্রাবণার্থং জলৌকসো যোজযেত্| তাশ্চ দ্বিপ্রকারাঃ,-সবিষানির্বিষাশ্চ| তত্র সবিষাণাং সাপাযত্বাত্তা এব তাবল্লক্ষযতি-

Adhikarana varjyA jalaukasaH (35-37) · Śloka 37

তাশ্চ দ্বিপ্রকারাঃ,- সবিষা নির্বিষাশ্চ| তত্র সবিষাণাং সাপাযত্বাত্তা এব তাবল্লক্ষযতি | দুষ্টাম্বুমত্স্যভেকাহিশবকোথমলোদ্ভবাঃ||৩৫|| রক্তাঃ শ্বেতা ভৃশং কৃষ্ণাশ্চপলাঃ স্থূলপিচ্ছিলাঃ| ইন্দ্রাযুধবিচিত্রোর্ধ্বরাজযো রোমশাশ্চ তাঃ||৩৬|| সবিষা বর্জযেত্| |৩৭|

স০-দুষ্টাম্বূদ্ভবাশ্চ জলৌকসঃ সবিষা ইতি বর্জযেত্| তথা মত্স্যভেকসর্পাদিশবকোথোদ্ভবাঃ, তথা তেষামেব মত্স্যাদীনাং যে মলাঃ-মূত্রপুরীষাদযঃ, তদুদ্ভবাশ্চ সবিষা ইতি বর্জযেত্| সবিষাণাং লক্ষণমাহ-রক্তা ইত্যাদি| যাবল্লোমশা যাস্তাঃ সবিষা যতঃ, ততো বর্জযেত্-তা ন যোজযেত্|

Adhikarana varjyAprayoge doShaH varjyAdoShe cikitsA (37) · Śloka 37

তাভিঃ কণ্ডূপাকজ্বরভ্রমাঃ| বিষপিত্তাস্রনুত্কার্যং তত্র|৩৭|

স০-তাভির্হি যোজিতাভিঃ কণ্ড্বাদযঃ স্যুঃ| উপলক্ষণং চেদম্| দাহশোষমূর্চ্ছাদযোঽপি স্যুঃ| { তত্র- } তাসু মোহাদ্যোজিতাসু, বিষাদিজিত্ কার্যম্|

Adhikarana grAhyA jalaukasaH (37-38) · Śloka 38

| শুদ্ধাম্বুজাঃ পুনঃ||৩৭|| নির্বিষাঃ শৈবলশ্যাবা বৃত্তা নীলোর্ধ্বরাজযঃ| কষাযপৃষ্ঠাস্তন্বঙ্গ্যঃ কিঞ্চিত্পীতোদরাশ্চ যাঃ||৩৮||

স০-জলৌকস ইত্যনুবর্ততে| শুদ্ধজলোদ্ভবাঃ (শুদ্ধাম্বুজাঃ)-সৌগন্ধিকোত্পলকমলবিপুলসলিলশৈবালজা জলৌকসো, নির্বিষাঃ স্যুঃ| আসাং চ লক্ষণমাহ-শৈবলেত্যাদি| শৈবলমিব শ্যাবাঃ, তথা বৃত্তাঃ, তথা নীলোর্ধ্বরাজযঃ, তথা কষাযং-ন্যগ্রোধাদিবল্কলসদৃশবর্ণং, পৃষ্ঠং যাসাং তা এবম্, তথা তনুশরীরাঃ কিঞ্চিত্পীতবর্ণজঠরাশ্চ নির্বিষা বেদ্যাঃ|

Adhikarana grAhyAsvapi mattA varjyAH (39) · Śloka 39

তা অপ্যসম্যগ্বমনাত্ প্রততং চ নিপাতনাত্| সীদন্তীঃ সলিলং প্রাপ্য রক্তমত্তা ইতি ত্যজেত্||৩৯||

স০-নির্বিষা অপি জলৌকসো রক্তমত্তা ইতি ত্যজেত্| ন কেবলং সবিষা ইতি প্রতিপাদনার্থোঽপিশব্দঃ| রক্তমত্তত্বে হেতুদ্বযমাহ-অসম্যগ্বমনাত্, দুষ্টরক্তস্যেতি শেষঃ| প্রততং চ লাগনাত্, দুষ্টরক্তবাসিত্বেন রক্তমত্তা ইত্যুক্তাঃ| তাশ্চ কথং লক্ষ্যন্তে ? ইত্যাহ-সীদন্তীরিত্যাদি| জলং (সলিলং) প্রাপ্যতোযপূর্ণভাণ্ডমাসাদ্য, সীদন্তীঃ-ন তথা চেষ্টমানাঃ, ইতি জ্ঞাত্বা ত্যজেত্|

Adhikarana jalaukasAM prayogaH (40-41) · Śloka 41

অথেতরা নিশাকল্কযুক্তেঽম্ভসি পরিপ্লুতাঃ| অবন্তিসোমে তক্রে বা পুনশ্চাশ্বাসিতা জলে||৪০|| লাগযেদ্দৃতমৃত্স্তন্যরক্তশস্ত্রনিপাতনৈঃ| পিবন্তীরুন্নতস্কন্ধাশ্ছাদযেন্মৃদুবাসসা||৪১||

স০-অথ-পরিক্ষাতোঽনন্তরং, ইতরা লাগযেত্| কিম্ভূতাঃ ? হরিদ্রাকল্কযুক্তজলে পরিপ্লুতাঃ, কাঞ্জিকে কালশেযে বা পরিপ্লুতাঃ, পুনশ্চ জলে সমাশ্বাসিতাঃ-সাত্ম্যভূতে জলে প্লবনার্হাঃ সোত্সাহাঃ সতীঃ, যোজযেত্| অলগন্তীঃ কথং লাগযেত্ ? ইত্যাহ-ঘৃতেত্যাদি| ঘৃতাদিপাতনৈস্তা যোজযেত্| পাতনশব্দঃ প্রত্যেকং যোজ্যঃ| শস্ত্রেণাঙ্গে রক্তং মোক্ষযিত্বা বা ত যোজযেত্| তাশ্চ পিবন্তীঃ সূক্ষ্মবাসসাঽঽচ্ছাদযেত্| এবং হি তাসাং মক্ষিকাদ্যনুপদ্রবাত্ সম্যগ্যোজনা স্যাত্| অথ কিমেতাঃ পিবন্ত্যুত নেতি কথং জ্ঞাযতে ? ইত্যত্র বিশেষণদ্বারেণ হেতুমাহ-উন্নতস্কন্ধা ইতি| উন্নতঃ স্কন্ধো যাসাং তা এবম্| উন্নতস্কন্ধত্বেন তাসাং পানং জ্ঞাযত ইত্যর্থঃ|

Adhikarana jalaukAH prathamaM duShTaM raktaM pibati (42-1) · Śloka 1

সম্পৃক্তাদ্দুষ্টশুদ্ধাস্রাজ্জলৌকা দুষ্টশোণিতম্| আদত্তে প্রথমং হংসঃ ক্ষীরং ক্ষীরোদকাদিব||৪২|| (গুল্মার্শোবিদ্রধীন্ কুষ্ঠবাতরক্তগলামযান্| নেত্ররুগ্বিষবীসর্পান্ শমযন্তি জলৌকসঃ| )||১||

স০-দুষ্টশুদ্ধাস্রান্মিলিতাদপি জলৌকা দুষ্টরক্তমেব পূর্বমাদত্তে, ন শুদ্ধং দেহধাতুস্থম্, ইতি দৃষ্টান্তেন দর্শযতি-হংস ইত্যাদি| হংসো যথা ক্ষীরজলান্মিশ্রিতাত্ প্রাগ্দুগ্ধমাদত্তে ন তু জলম্, তথা জলৌকাঃ প্রাগ্শুদ্ধং রক্তমাদত্তে পশ্চাদিতরদিতি ন্যায্যমেতত্|

Adhikarana jalaukasAM mokShaNakAlaH (43) · Śloka 43

দংশস্য তোদে কণ্ড্বাং বা মোক্ষযেত্| |৪৩|

স০-দংশস্য তোদে সতি কণ্ড্বাং সত্যাং বা মোক্ষযেত্, শুদ্ধরক্তরক্ষার্থমতিযোগভযাচ্চ| তামিত্যেকবচননির্দেশাদেকৈকাং মোক্ষযেত্, ন তু সর্বাঃ সকৃদেবেতি গমযতি| অথ পানলৌল্যল্যাদৃশং, - ন ত্যজেত্ততো হরিদ্রাচূর্ণং বা বদনে দত্ত্বা মোক্ষযেত্|

Adhikarana mokShitAnAM kRutyam (43) · Śloka 43

বামযেচ্চ তাম্| পটুতৈলাক্তবদনাং শ্লক্ষ্ণকণ্ডনরূষিতাম্||৪৩||

স০-মোক্ষিতাং চ জলৌকসং বামযেত্| বমনবিধানমাহ পট্বিত্যাদি| সৈন্ধবযুতেন তৈলেন রূষিতাস্যাং তথা সূক্ষ্মেণ তণ্ডুলকণ্ডনেন রূষিতাং-অবকীর্ণাং, বামযেত্| তণ্ডুলশব্দস্যাত্র লোপো জ্ঞেযস্তন্ত্রযুক্ত্যা|

Adhikarana saptAhAdarvAk jalaukasAM punaH prayo niShedhaH (44) · Śloka 44

রক্ষন্ রক্তমদাদ্ভূযঃ সপ্তাহং তা ন পাতযেত্| |৪৪|

স০-তাঃ-কৃতবমনা জলৌকসো, রক্তমদাদ্রক্ষন্ পুনঃ সপ্তাহং ন যোজযেত্|

Adhikarana jalaukasAM samyagvamanalakShaNam (44) · Śloka 44

| পূর্ববত্ পটুতা দার্ঢ্যং সম্যগ্বান্তে জলৌকসাম্||৪৪||

স০-জলৌকসাং সম্যগ্বান্তে সতি পূর্ববত্-অলাগিতানামিব, পটুতাদি ভবতি|

Adhikarana ativAnte lakShaNam (45) · Śloka 45

ক্লমোঽতিযোগান্মৃত্যুর্বা| |৪৫|

স০-অতিযোগাদ্বমনস্য ক্লমো মৃত্যুর্বা স্যাত্|

Adhikarana durvAnte lakShaNam (45) · Śloka 45

দুর্বান্তে স্তব্ধতা মদঃ| |৪৫|

স০-দুর্বান্তে সতি স্তব্ধতা মদশ্চ স্যাত্|

Adhikarana jalaukasAM pAlanavidhiH (45-46) · Śloka 46

| অন্যত্রান্যত্র তাঃ স্থাপ্যা ঘটে মৃত্স্নাম্বুগর্ভিণি||৪৫|| লালাদিকোথনাশার্থং, সবিষাঃ স্যুস্তদন্বযাত্| |৪৬|

স০-তাশ্চান্যস্মিন্নন্যস্মিন্ ঘটে ত্র্যহাত্ পঞ্চাহাদ্বা স্থাপ্যাঃ| কিম্ভূতে ? মৃত্স্নাপৃক্তেন জলেন গর্ভিণি, তদ্যুক্ত ইত্যর্থঃ| প্রশস্তা মৃত্-মৃত্স্না, "সস্নৌ প্রশংসাযাম্" ইতি স্নপ্রত্যযঃ| অনেকভাজনস্থাপনে কোঽর্থঃ ? ইত্যাহ-লালাদিকোথনাশার্থম্| আদিশব্দেন মূত্রপুরীষাদীনাং গ্রহণম্| লালাদীনাং_জলৌকঃসম্বন্ধিনাং, কোথঃ-কুথিতত্বং ক্লিন্নতা, তন্নাশায| তদন্বযাত্-লালাদিযোগাত্, তাঃ সবিষাঃ স্যুঃ|

Adhikarana daMshAparisrAve strAvaNauShadham (46) · Śloka 46

| অশুদ্ধৌ স্রাবযেদ্দংশান্ হরিদ্রাগুডমাক্ষিকৈঃ||৪৬||

স০-অশুদ্ধৌ-অশুদ্ধলিঙ্গানুমিতে রক্তে সতি, দংশান্ হরিদ্রাদিভিঃ স্রাবযেত্|

Adhikarana daMshastrAvAnantaraM kRutyam (47) · Śloka 47

শতধৌতাজ্যপিচবস্ততো লেপাশ্চ শীতলাঃ| |৪৭|

স০-অনন্তরং শতধৌতঘৃতসম্পৃক্তাঃ পিচবো 'যোজ্যাঃ' ইতি শেষঃ| শতশব্দোঽনেকপর্যাযঃ, বহুকৃত্বো ধৌতমিত্যর্থঃ| তথা, শীতলা লেপাঃ-যষ্টীচন্দনোশীরাদিজাঃ, যোজ্যাঃ| দংশস্থিতচলিতরক্তপ্রসাদনাযেতি ভাবঃ|

Adhikarana srAvaphalam (47) · Śloka 47

| দুষ্টরক্তাপগমনাত্সদ্যো রাগরুজাং শমঃ||৪৭||

স০-দুষ্টরক্তস্যাপগমনাত্-নিঃসরণাত্, সদ্যো-দ্রাগেব, রাগপীডাশান্তির্ভবতি| উপলক্ষণং চেদম্| শ্বযথুশৈথিল্যদাহশমোঽপি হি ভবত্যেব|

Adhikarana dvitIye~ahni punaHsrAvaH (48) · Śloka 48

অশুদ্ধং চলিতং স্থানাত্স্থিতং রক্তং ব্রণাশযে| ব্যম্লীভবেত্পর্যুষিতং তস্মাত্তত্স্রাবযেত্পুনঃ||৪৮||

স০-অশুদ্ধং রক্তং স্বাশযাচ্চলিতং ব্রণস্থানে স্থিতং পর্যুষিতং সত্ ব্যম্লীভবেদ্যতঃ, তস্মাত্ তত্-রক্তং, ভূযঃ স্রাবযেত্|

Adhikarana alAbughaTikayoraviShayaH (49) · Śloka 49

যুঞ্জ্যান্নালাবুঘটিকা রক্তে পিত্তেন দূষিতে| তাসামনলসংযোগাত্|৪৯|

স০-রক্তে পিত্তেন দূষিতে সতি, অলাবুঘটিকা ন লাগযেত্| তাসাং-অলাবূনাং ঘটিকানাং চ, অগ্নিসংযোগাত্ পিত্তরক্তকোপোপপত্তেরিতি ভাবঃ|

Adhikarana alAbughaTikayorviShayaH (49) · Śloka 49

| যুঞ্জ্যাত্তু কফবাযুনা||৪৯||

স০-তাস্তু কফবাতেন দুষ্টেঽসৃজি যুঞ্জ্যাত্|

Adhikarana shRu~ggasyAviShayaH (50) · Śloka 50

কফেন দুষ্টং রুধিরং ন শৃঙ্গেণ বিনির্হরেত্| স্কন্নত্বাত্|৫০|

স০-কফেন দুষ্টং রক্তং সত্ শৃঙ্গেণ নাকর্ষেত্| স্কন্নত্বাত্স্ত্যানত্বাদ্ধেতোঃ| শৃঙ্গস্য চাগ্নিসংযোগাভাবেন কফবিলযনে সামর্থ্যাভাবাত্|

Adhikarana shRu~ggasya viShayaH (50) · Śloka 50

| বাতপিত্তাভ্যাং দুষ্টম্ শৃঙ্গেণ নির্হরেত্||৫০||

স০-বাতপিত্তাভ্যাং দুষ্টং রুধিরং শৃঙ্গেণ নির্হরেত্|

Adhikarana pracchAnavidhiH pracchAnasya viShayaH jalaukasAM viShayaH shRu~ggAlAbughaTikAnAM viShayaH shirAvyadhasya viShayaH (51-53) · Śloka 53

গাত্রং বদ্ধোপরি দৃঢং রজ্জ্বা পট্টেন বা সমম্| স্নাযুসন্ধ্যস্থিমর্মাণি ত্যজন্ প্রচ্ছানমাচরেত্||৫১|| অধোদেশপ্রবিসৃতৈঃ পদৈরুপরিগামিভিঃ| ন গাঢঘনতির্যগ্ভির্ন পদে পদমাচরন্||৫২|| প্রচ্ছানেনৈকদেশস্থং গ্রথিতং জলজন্মভিঃ| হরেচ্ছৃঙ্গাদিভিঃ সুপ্তমসৃগ্ব্যাপি শিরাব্যধৈঃ||৫৩||

স০-গাত্রং রজ্জ্বা পট্টেন বা দৃঢং সমং বদ্ধোপরি প্রচ্ছনীযপ্রদেশস্য, তথা স্নায্বাদি পরিহরন্, প্রচ্ছানং কুর্যাত্| কথম্ ? অধোদেশাত্প্রবিসৃতৈঃ-প্রবৃত্তৈঃ, পদৈরুপরিগামিভিঃ-ঊর্ধ্বপ্রসারিভিঃ| কিম্ভূতৈঃ পদৈঃ ? ন গাঢৈঃ-ন খরৈঃ, ন ঘনৈঃ-ন নিরন্তরৈঃ, ন চ তির্যগ্ভিঃ-তিরশ্চীনৈঃ| তথা, পদে পদং নাচরন্-পদস্যোপরি পদমকুর্বন্নিত্যর্থঃ| একদেশস্থিতং রক্তং প্রচ্ছানেনাকর্ষেত্| গ্রথিতং গ্রন্থ্যর্বুদাদিষু রক্তং জলৌকাভিরপহরেত্| সুপ্তং-নিশ্চেতনং সত্ স্থানে প্রসুপ্ত্যাদিবিকারি, শৃঙ্গাদিভির্হরেত্| ব্যাপি-সর্বশরীরস্য, লোহিতং শিরাব্যধৈরাকর্ষেত্|

Adhikarana pracchAnasya viShayAntaram (54) · Śloka 54

প্রচ্ছানং পিণ্ডিতে বা স্যাত্| |৫৪|

স০-পিণ্ডিতে রক্তে প্রচ্ছানং বা স্যাত্|

Adhikarana jalaukasAM viShAyAntaram (54) · Śloka 54

অবগাঢে জলৌকসঃ| |৫৪|

স০-অবগাঢে রক্তে জলৌকসঃ স্যুঃ|

Adhikarana alAbvAdInAM viShayAntaram (54) · Śloka 54

| ত্বক্স্থেঽলাবুঘটীশৃঙ্গম্|৫৪|

স০-ত্বক্স্থে-উত্তানে রক্তে, অলাবুঘটীশৃঙ্গাণি স্যুঃ|

Adhikarana shirAvyadhasya niyatatvam (54) · Śloka 54

| শিরৈব ব্যাপকেঽসৃজি||৫৪||

স০-সর্বশরীরব্যাপকে রক্তে শিরৈব ভবতি| শিরাযাং মতবিকল্পো নাস্ত্যেবেত্যেবশব্দার্থঃ|

Adhikarana shRu~ggAdInAM viShayAntarANi (55) · Śloka 55

বাতাদিধাম বা শৃঙ্গজলৌকোলাবুভিঃ ক্রমাত্| |৫৫|

স০- অথবা বাতাদিস্থানস্থিতং রক্তং যথাক্রমং শৃঙ্গাদিভির্হরেত্|

Adhikarana srutaraktasya shItopacArAtishaye doShaH (26) · Śloka 26

স্ত্রতাসৃজঃ প্রদেহাদ্যৈঃ শীতৈঃ স্যাদ্বাযুকোপতঃ||৫৫|| সতোদকণ্ডূঃ শোফস্তং সর্পিষোষ্ণেন সেচযেত্| ৫৫ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা- যামষ্টাঙ্গহৃদযসংহিতাযাং সূত্রস্থানে শস্ত্রবি- ধির্নাম ষঙ্বিংশোঽধ্যাযঃ||২৬||

স০-স্রুতরক্তস্য নরস্য শীতলৈঃ প্রলেপাদিভিস্থোদকণ্ডূযুতঃ শোফো বাতকোপাত্ স্যাত্| তং-তাদৃশং শোফং, ঘৃতেনোষ্ণেন সেচযেদিতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকা- যাং সর্বাঙ্গসুন্দরাখ্যাযাং সূত্রস্থানে শস্ত্রবিধির্নাম ষড্বিংশোঽধ্যাযঃ সমাপ্তঃ|| ২৬||