27. sirāvyadhavidhiradhyāyaḥ

Adhikarana adhyAyopakramaH · Śloka

অনন্তরাতীতেঽধ্যাযে শৃঙ্গাদীন্ লোহিতাবসেচনোপাযানুক্ত্বা 'প্রচ্ছানেনৈকদেশস্থং' ইত্যাদিবাক্যেন তেষাং বিষযো দর্শিতঃ| সিরাব্যধস্য তু বহুবক্তব্যত্বাত্ পৃথগধ্যাযৌ যুক্ত ইত্যাহ-

Adhikarana sirAvyadhavidhiradhyAyaH (2) · Śloka 2

অথাতঃ সিরাব্যধবিধিমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২|

স০-সরত্যাভী রক্তমিতি সিরাঃ, তাসাং ব্যধঃ, তস্য বিধিঃ, তমধ্যাযং ব্যাখ্যাস্যামঃ| শেষং পূর্ববত্|

Adhikarana shuddharaktasya lakShaNam shuddharaktasyArogyahetutvam (1-2) · Śloka 2

মধুরং লবণং কিঞ্চিদশীতোষ্ণমসংহতম্| পদ্মেন্দ্রগোপহেমাবিশশলোহিতলোহিতম্||১|| লোহিতং প্রভবঃ শুদ্ধং, তনোস্তেনৈব চ স্থিতিঃ| |২|

স০-লোহিতং মধুরগুণং(রসং) , তথা, ঈষল্লবণং, কিঞ্চিচ্ছব্দ ঈষদর্থে, তথাঽশীতোষ্ণং-নঞীষদর্থে, ঈষচ্ছীতমীষদুষ্ণং, তথাঽসংহতং-দ্রবং, শুদ্ধং স্যাত্| সম্প্রতি বর্ণতঃ শুদ্ধলোহিতলক্ষণমাহ-পদ্মেত্যাদি| ইন্দ্রগোপঃ-মৃগনক্ষত্রোত্পন্নঃ কীটকবিশেষঃ| হেম-কনকম্| অবিঃ-মেষঃ| অবিশশযোর্লোহিতশব্দেন রক্তবাচিনা সম্বন্ধঃ| পদ্মাদীনাং দ্বন্দ্বঃ| পদ্মেন্দ্রগোপহেমাবিশশলোহিতমিব লোহিতং-রক্তবর্ণং, যদ্রক্তং তচ্ছুদ্ধং স্যাত্| তচ্চ তনোঃ-শরীরস্য, প্রভবঃ-উত্পত্তিহেতুঃ| তেনৈবরক্তেন, তনোঃ স্থিতিঃ-প্রবন্ধাবিচ্ছেদলক্ষণা| অনেকদৃষ্টান্তোপাদানং চ শুদ্ধরক্তস্যানেকবর্ণদর্শনাত্|

Adhikarana raktasya duShTikAraNam (2) · Śloka 2

| তত্পিত্তশ্লেষ্মলৈঃ প্রাযো দূষ্যতে|২|

স০-তচ্চ-রক্তং, বাহুল্যেন পিত্তশ্লেষ্মলৈর্দূষ্যতে| পিত্তলৈঃ-ক্ষারোষ্ণতীক্ষ্ণাদিভিঃ| শ্লেষ্মলৈঃ-মাষতিলাদিভিঃ| তথা পুরাকৃতাদ্দৈবাদপি, শরত্কালস্বভাবাত্ কদাচিদ্বাতলৈরপি দূষ্যত ইতি প্রাযোগ্রহণম্|

Adhikarana duShTaraktasya kAryam duShTaraktakAryasya sAmAnyalakShaNam (2-5) · Śloka 5

| কুরুতে ততঃ||২|| বিসর্পবিদ্রধিপ্লীহগুল্মাগ্নিসদনজ্বরান্| মুখনেত্রশিরোরোগমদতৃড্লবণাস্যতাঃ||৩|| কুষ্ঠবাতাস্রপিত্তাস্রকট্বম্লোদ্গিরণভ্রমান্| শীতোষ্ণস্নিগ্ধরূক্ষাদ্যৈরূপক্রান্তাশ্চ যে গদাঃ||৪|| সম্যক্সাধ্যা ন সিধ্যন্তি তে চ রক্তপ্রকোপজাঃ| |৫|

স০-ততো-দূষণাত্কারণাত্, বিসর্পাদীন্ ভ্রমান্তান্ কুরুতে| তথা, শীতোষ্ণাদিভিঃ সম্যক্চিকিত্সিতাঃ সাধ্যা অপি রোগা যে ন সিধ্যন্তি, তে চ রক্তপ্রকোপজাঃ| ন কেবলং বিসর্পাদযঃ, ইতি চার্থঃ| আদিশব্দেন স্তম্ভস্বেদনাদিপরিগ্রহঃ|

Adhikarana duShTaraktakAryasya pratIkAraH (5) · Śloka 5

| তেষু স্রাবযিতুং রক্তমুদ্রিক্তং ব্যধযেত্সিরাম্||৫||

স০-তথা, তেষু-বিসর্পাদিষু রোগেষু, উল্বণং রক্তং স্রাবযিতং সিরাং ব্যধযেত্| অদন্তত্বাদত্র বৃদ্ধেরভাবঃ|

Adhikarana unaShoDashAbdAdInAM sirAvyAdhaniShedhaH (6-9) · Śloka 9

ন তূনষোডশাতীতসপ্তত্যব্দস্রুতাসৃজাম্| অস্নিগ্ধাস্বেদিতাত্যর্থস্বেদিতানিলরোগিণাম্||৬|| গর্ভিণীসূতিকাজীর্ণপিত্তাস্রশ্বাসকাসিনাম্| অতীসারোদরচ্ছর্দিপাণ্ডুসর্বাঙ্গশোফিনাম্||৭|| স্নেহপীতে প্রযুক্তেষু তথা পঞ্চসু কর্মসু| নাযন্ত্রিতাং সিরাং বিধ্যেন্ন তির্যঙ্গাপ্যনুত্থিতাম্||৮|| নাতিশীতোষ্ণবাতাভ্রেষ্বন্যত্রাত্যযিকাদ্গদাত্| |৯|

স০-ঊনষোডশবর্ষাদীনাং তু সিরাং ন ব্যধযেত্| স্নেহপীতে-পীতস্নেহ ইত্যর্থঃ, আহিতাগ্ন্যাদিত্বাত্ পরনিপাতঃ| তথা, পঞ্চসু-বমনাদিষু, কর্মসু বিহিতেষু সত্সু, সিরাং ন ব্যধযেত্| তথা, অযন্ত্রিতাং-অবদ্ধাং, সিরাং ন ব্যধযেত্| তথা, ন তির্যক্, ন চানুত্থিতাং, নাতিশীতে, নাত্যুষ্ণে, নাতিবাতে, ন চ মেঘোদযে, সিরাং ব্যধযেত্| আত্যযিকাত্-রোহিণীবিষাদিকাত্, অন্যত্র ন ব্যধযেত্| আত্যযিকে তু রোগে শীতোষ্ণবৃষ্টীনাং যথাযথং প্রতীকারং বিধায সিরাং মোক্ষযেদেব|

Adhikarana shiroroge netraroge ca vedhyAH sirAH (9-10) · Śloka 10

| শিরোনেত্রবিকারেষু ললাট্যাং মোক্ষযেত্সিরাম্||৯|| আপাঙ্গ্যামুপনাস্যাং বা| |১০|

স০-শিরোনযনবিকারেষু ললাট্যাং সিরাং মোক্ষযেত্| ললাটে ভবা-ললাট্যা, শরীরাবযবাদ্যত্, এবমগ্রেঽপি| অপাঙ্গে ভবাং অপাঙ্গ্যাং, নাসিকাসমীপে ভবাং-উপনাস্যাং, বা|

Adhikarana karNarogeShu sirAH (10) · Śloka 10

কর্ণরোগেষু কর্ণজাম্| |১০|

স০-কর্ণামযেষু কর্ণজাং-কর্ণসমীপভবাং, সিরাং বিধ্যেত্|

Adhikarana nAsAroge sirAH (10) · Śloka 10

| নাসারোগেষু নাসাগ্রে স্থিতাম্|১০|

স০-নাসামযেষু নাসাগ্রে স্থিতাং বিধ্যেত্|

Adhikarana pInase sirAH (10-11) · Śloka 11

| নাসাললাটযোঃ||১০|| পীনসে| |১১|

স০-পীনসে-প্রতিশ্যাযে, নাসাললাটমধ্যস্থাং সিরাং বিধ্যেত্|

Adhikarana mukharogeShu sirAH (11) · Śloka 11

মুখরোগেষু জিহ্বৌষ্ঠহনুতালুগাঃ| |১১|

স০-মুখরোগেষু জিহ্বাদিগাঃ সিরা বিধ্যেত্|

Adhikarana jatrUrdhvagranthiShu sirAH (11) · Śloka 11

| জত্রূর্ধ্বগ্রন্থিষু গ্রীবাকর্ণশঙ্খশিরঃশ্রিতাঃ||১১||

স০-জত্রূর্ধ্বং-বক্ষোংসযোঃ সন্ধ্যূর্ধ্বং, যে গ্রন্থযস্তেষু গ্রীবাদ্যাশ্রিতাঃ সিরা বিধ্যেত্|

Adhikarana unmAde sirAH (12) · Śloka 12

উরোপাঙ্গললাটস্থা উন্মাদে| |১২|

স০-উন্মাদে উরঃস্থা অপাঙ্গস্থা ললাটাশ্রিতাশ্চ বিধ্যেত্|

Adhikarana apasmAre sirAH shirorogAdiShu sAmAnyataH sirAH (12) · Śloka 12

ঽপস্মৃতৌ পুনঃ| হনুসন্ধৌ সমস্তে বা শিরাং ভ্রূমধ্যগামিনীম্||১২||

স০-অপস্মারে তু হনুসন্ধৌ স্থিতাং সিরাং বিধ্যেত্| সমস্তে-সর্বস্মিন্, বা হনৌ সিরাং বিধ্যেত্| ভ্রূমধ্যগামিনীং- ভ্রূমধ্যস্থাং, সিরাং বাঽপরস্মৃতৌ বিধ্যেদিতি বাশব্দোঽত্রানুবর্ত্য যোজ্যঃ|

Adhikarana vidradhipArshcashUlayoH sirAH (13) · Śloka 13

বিদ্রধৌ পার্শ্বশূলে চ পার্শ্বকক্ষাস্তনান্তরে| |১৩|

স০-বিদ্রধৌ পার্শ্বশূলে চ পার্শ্বস্থাঃ কক্ষাস্থাঃ স্তনান্তরস্থাশ্চ সিরা বিধ্যেত্|

Adhikarana tRutIyakajvare sirAH (13) · Śloka 13

| তৃতীযকেংঽসযোর্মধ্যে|১৩|

স০-তৃতীযকে জ্বরেংঽসযোর্মধ্যে-স্কন্ধসন্ধৌ স্থিতাং সিরাং, বিধ্যেত্|

Adhikarana caturthakajvare sirAH (13) · Śloka 13

| স্কন্ধস্যাধশ্চতুর্থকে||১৩||

স০-চতুর্থকে জ্বরে স্কন্ধস্যাধোগতাং-অন্যতরপার্শ্বাশ্রযাং, সিরাং বিধ্যেত্|

Adhikarana sashUlaprAvAhikAyAM sirAH (14) · Śloka 14

প্রবাহিকাযাং শূলিন্যাং শ্রোণিতো দ্ব্যঙ্গুলে স্থিতাং| |১৪|

স০-প্রবাহিকাযাং শূলযুক্তাযাং শ্রোণিতঃ-কঠ্যাঃ, দ্ব্যঙ্গুলে স্থিতাং সিরাং বিধ্যেত্|

Adhikarana shukrarogemeDhraroge ca sirAH (14) · Śloka 14

| শুক্রমেঢ্রামযে মেঢ্রে|১৪|

স০-শুক্ররোগে মেঢ্ররোগে চ মেড্রস্থিতাং সিরাং বিধ্যেত্|

Adhikarana galagaNDayoH sirAH (14) · Śloka 14

| ঊরুগাং গলগণ্ডযোঃ||১৪||

স০-গলগণ্ডযোশ্চোভযোরূরুস্থাং সিরাং বিধ্যেত্|

Adhikarana gRudhrasyAM sirAH (15) · Śloka 15

গৃধ্রস্যাং জানুনোঽধস্তাদূর্ধ্বং বা চতুরঙ্গুলে| |১৫|

স০-গৃধ্রস্যাং জানুনোঽধস্তাচ্চতুরঙ্গুল ঊর্ধ্বং বা জানুনশ্চতুরঙ্গুলে স্থিতাং সিরাং বিধ্যেত্|

Adhikarana apacyAM sirAH (15) · Śloka 15

| ইন্দ্রবস্তেরধোঽপচ্যাং দ্ব্যঙ্গুলে|১৫|

স০-অপচীসংজ্ঞে রোগে ইন্দ্রবস্তেরধো দ্ব্যঙ্গুলে সিরাং বিধ্যেত্| ইন্দ্রবস্তিঃ-জঙ্ঘান্তরে বক্ষ্যমাণঃ (হৃ. শা. অ. ৪|৫)

Adhikarana sakthishUle kroShTukashIrShake ca sirAH (15-16) · Śloka 16

| চতুরঙ্গুলে||১৫|| ঊর্ধ্বং গুল্ফস্য সক্থ্যর্তৌ, তথা ক্রোষ্টুকশীর্ষকে| |১৬|

স০-সক্থিপীডাযাং গুল্ফস্যোর্ধ্বং চতুরঙ্গুলে সিরাং বিধ্যেত্| ক্রোষ্টুকশীর্ষাখ্যে বাতরোগবিশেষে গুল্ফস্যোর্ধ্বং চতুরঙ্গুলে বিধ্যেত্|

Adhikarana pAdadAhAdiShu ShaTsu sirAH (16-17) · Śloka 17

| পাদদাহে খুডে হর্ষে বিপাদ্যাং বাতকণ্টকে||১৬|| চিপ্পে চ দ্ব্যঙ্গুলে বিধ্যেদুপরি ক্ষিপ্রমর্মণঃ| |১৭|

স০-পাদদাহাদিষু ক্ষিপ্রমমর্ণ উপরি দ্ব্যঙ্গুলে বিধ্যেত্| খুডং-বাতরক্তম্|

Adhikarana vishvAcyAM sirAH (17) · Śloka 17

| গৃধ্রস্যামিব বিশ্বাচ্যাম্|১৭|

স০-বিশ্বাচ্যাং গৃধ্রসীপ্রোক্তাং সিরাং বিধ্যেত্| "গৃধ্রস্যাং জানুনোঽধস্তাত্ " ইতি|

Adhikarana yathoktasirANAmadarshane tadAsannAH sirAH (17-18) · Śloka 18

| যথোক্তানামদর্শনে||১৭|| মর্মহীনে যথাসন্নে দেশেঽন্যাং ব্যধযেত্ সিরাম্| |১৮|

স০-যথোক্তানাং সিরাণামদর্শনে সতি মর্মবর্জিতে যথাসন্নে স্থানে ব্যাধিবশাদপরাং ব্যধযেত্|

Adhikarana sirAvyadhavidhiH kaNThordhasirANAM yantraNam (18-22) · Śloka 22

| অথ স্নিগ্ধতনুঃ সজ্জসর্বোপকরণো বলী||১৮|| কৃতস্বস্ত্যযনঃ স্নিগ্ধরসান্নপ্রতিভোজিতঃ| অগ্নিতাপাতপস্বিন্নো জানূচ্চাসনসংস্থিতঃ||১৯|| মৃদুপট্টাত্তকেশান্তো জানুস্থাপিতকূর্পরঃ| মুষ্টিভ্যাং বস্ত্রগর্ভাভ্যাং মন্যে গাঢং নিপীডযেত্||২০|| দন্তপ্রপীডনোত্কাসগণ্ডাধ্মানানি চাচরেত্| পৃষ্ঠতো যন্ত্রযেচ্চৈনং বস্ত্রমাবেষ্টযন্নরঃ||২১|| কন্ধরাযাং পরিক্ষিপ্য ন্যস্যান্তর্বামতর্জনীম্| এষোঽন্তর্মুখবর্জ্যানাং সিরাণাং যন্ত্রণে বিধিঃ||২২||

স০-অথেত্যানন্তর্যে| স্নিগ্ধা তনুর্যস্য স স্নিগ্ধতনুঃ| তথা, সজ্জানি-প্রগুণানি, { সর্বাণি } উপকরণানি-বস্ত্রষণ্ডপটোদকস্নেহগৈরিকাদীনি, যস্য স সজ্জসর্বোপকরণঃ| তথা, বলীপুষ্টঃ| তথা, কৃতং স্বস্ত্যযনং-বলিমঙ্গলহোমাদিকং, যস্য স কৃতস্বস্ত্যযনঃ| তথা, স্নিগ্ধরসযুক্তেনান্নেন প্রতিভোজিতঃ| তথা, অগ্নিতাপশ্চাতপশ্চ, তাভ্যাং স্বিন্নঃ| তথা, জানুতুল্যে উচ্চাসনে, সংস্থিতঃ-সমুপবিষ্টঃ| তথা, মৃদুনা-সূক্ষ্মেণ, বস্ত্রপট্টেনাত্তো-গৃহীতো বদ্ধঃ কেশান্তো যস্য স এবম্| তথা, জানুনোঃ স্থাপিতৌ কূর্পরৌ যেন স এবম্| তথা, মুষ্টিভ্যাং বস্ত্রগর্ভাভ্যাং মন্যেঽতিশযেন পীডযেত্| তথা, দন্তপ্রপীডনাদীন্যাচরেত্| এনং চাতুরং পৃষ্ঠদেশে বসনমাবেষ্টযন্নরো যন্ত্রযেত্| কথম্ ? গ্রীবাযাং বস্ত্রং পরিক্ষিপ্য, তথাঽন্তঃ-মধ্যে, বামতর্জনীং ন্যস্য| সিরাণাং যন্ত্রণ এষ বিধিঃ-এতদ্বিধানম্| কিম্ভূতানাম্ ? অন্তর্মুখবর্জ্যানাম্|

Adhikarana sirotthApanavidhiH (23) · Śloka 23

ততো মধ্যমযাঽঙ্গুল্যা বৈদ্যোঽঙ্গুষ্ঠবিমুক্তযা| তাডযেত্|২৩|

স০-ততো-যন্ত্রণাদনন্তরং, বৈদ্যোঽঙ্গুষ্ঠবিমুক্তযা বামপাণিজযা মধ্যমযাঽঙ্গুল্যা তাডযেত্|

Adhikarana sirAlakShIkaraNavidhiH sirAmokShaNavidhiH (23-25) · Śloka 25

| উত্থিতাং জ্ঞাত্বা স্পর্শাদ্বাঽঙ্গুষ্ঠপীডনৈঃ||২৩|| কুঠার্যা লক্ষযেন্মধ্যে বামহস্তগৃহীতযা| ফলোদ্দেশে সুনিষ্কম্পং সিরাং, তদ্বচ্চ মোক্ষযেত্||২৪|| তাডযন্ পীডযংশ্চৈনাং| |২৫|

স০-স্পর্শেন তথাঽঙ্গুষ্ঠপীডনৈর্বোত্থিতাং জ্ঞাত্বা, ঊর্ধ্বদণ্ডসিরাযা মধ্যে ন্যস্য ফলোদ্দেশে সুনিষ্কম্পং বামহস্তগৃহীতযা কুঠার্যা সিরাং লক্ষযেত্| তদ্বচ্চ মোক্ষযেত্| যথৈব লক্ষযেত্তথৈবেত্যর্থঃ| ব্রীহিমুখেন পুনস্তাডযন্-ব্যথযন্, তথাঽঙ্গুষ্ঠাদিনা পীডযন্, এনাং-কুঠারিকাবিষযজাং সিরাং, বিধ্যেত্| ননু, কুঠারিকাবিষযে কথং ব্রীহিবক্ত্রস্য প্রযোগঃ ? যতঃ 'অপবাদবিষযং পরিহৃত্যোত্সর্গঃ প্রবর্ততে' ইতি ন্যাযাত্ ব্রীহিবক্ত্রস্যৈব সামান্যেন প্রযোগোঽনুজ্ঞাতঃ| তথা চাহ (হৃ. সূ. অ. ২৬|১১)- "ব্রীহিবক্ত্রং প্রযোজ্যং চ তত্সিরোদরযোর্ব্যধে|" ইতি| কুঠার্যাঃ পুনর্বিশেষোঽভিহিতঃ (হৃ. সূ. অ. ২৬|১২)-"তযোর্ধ্বদণ্ডযাবিধ্যেদুপর্যস্থ্নাং স্থিতাং শিরাম্|" ইতি| তস্মাদযুক্তমেতত্| অত্রোচ্যতে জ্ঞাপকম্| কুঠারিকাবিষযে ব্রীহিবক্ত্রস্য প্রযোগো ন্যায্য এব| যদযমাচার্যো বক্ষ্যতি (শ্লো.৩৩)-"মাংসলে নিক্ষিপেদ্দেশে ব্রীহাস্যং ব্রীহিমাত্রকম্|" ইতি| অনেন হি বচনেন গ্রন্থকার ইদং প্রত্যপাদযত্,- বহুমাংসে শরীরাবযবে ব্রীহিমুখং ব্রীহিমাত্রং নিক্ষেপ্যম্, অন্যত্র ত্বাশযানুরোধেন ব্রীহিবক্ত্রস্য প্রযোগঃ কার্য ইতি| অনেনৈবাভিপ্রাযেণ শাস্ত্রকৃতা "প্রমাণপরিমাণাভ্যাং সঙ্খ্যাযাশ্চাপি সংশযে মাত্রচ্ বক্তব্যঃ ইত্যনেন মাত্রচ্ কৃতঃ| অন্যথা তু স্পষ্টং কৃত্বা "ব্রীহিপ্রমাণং ব্রীহ্যাস্যং মাংসলে নিক্ষিপেদ্ব্যধে|" ইতি পাঠং কুর্যাত্| তস্মাদ্যুক্তো ব্রীহিমুখস্য কুঠারিকাবিষযে প্রযোগ ইতি|

Adhikarana upanAsikAyA vyadhanam (25) · Śloka 25

বিধ্যেদ্ব্রীহিমুখেন তু| অঙ্গুষ্ঠেনোন্নময্যাগ্রে নাসিকামুপনাসিকাম্||২৫||

স০-অগ্রে-অগ্রদেশে, নাসিকামঙ্গুষ্ঠেনোন্নময্য, উপনাসিকাং- নাসিকাসন্নদেশস্থাং সিরাং, বিধ্যেত্|

Adhikarana jihvAdhaH sirAvyadham (26) · Śloka 26

অভ্যুন্নতবিদষ্টাগ্রজিহ্বস্যাধস্তদাশ্রযাম্| |২৬|

স০-আভিমুখ্যেনোন্নতা-উপরি তালুদেশে নীতা, তথা বিশেষেণ দন্তৈর্দষ্টা-বিদষ্টা, অগ্রে জিহ্বা-অগ্রজিহ্বা, যেনাসাবভ্যুন্নতবিদষ্টাগ্রজিহ্বঃ, তস্যাধঃ-প্রকৃতত্বাজ্জিহ্বাযা এবাধস্তাত্, তদাশ্রযাং-জিহ্বাধঃস্থাং সিরাং বিধ্যেত্| তদিত্যনেন জিহ্বাধঃ পরামৃশ্যতে| জিহ্বাধ আশ্রযো যস্যাঃ সিড়্রাযাঃ, তাম্|

Adhikarana grIvAsirANAM yantraNam (26) · Śloka 26

| যন্ত্রযেত্স্তনযোরূর্ধ্বং গ্রীবাশ্রিতসিরাব্যধে||২৬||

স০-গ্রীবাশ্রিতানাং সিরাণাং ব্যধো-গ্রীবাশ্রিতসিরাব্যধঃ, তস্মিন্ স্তনযোরূর্ধ্বং যন্ত্রযেত্-বাসসা বেষ্টযেত্|

Adhikarana bhujasirANaM yantraNam (27) · Śloka 27

পষাণগর্ভহস্তস্য জানুস্থে প্রসৃতে ভুজে| কুক্ষেরারভ্য মৃদিতে বিধ্যেদ্বদ্ধোর্ধ্বপট্টকে||২৭||

স০-পাষাণগর্ভৌ হস্তৌ যস্য, তস্য নরস্য ভুজে জানুস্থে-জানুপৃষ্ঠস্থিতে, প্রসৃতে-প্রসারিতে| 'ভুজে' ইত্যেকবচনমতন্ত্রম্, দ্বাবপি হি ভুজৌ গৃহ্যেতে| কুক্ষেরারভ্য যাবদ্গ্রীবং তাবন্মৃদিতে- মলিতে| কস্মিন্ ? গ্রীবাশ্রিতসিরাব্যর্ধার্হেঽঙ্গে| তথা বদ্ধ ঊর্ধ্বং পট্টকো যস্মিংস্তস্মিন্ বিধ্যেত্| প্রকৃতত্বাত্ সিরাম্|

Adhikarana hastasirANAM yantraNam (28-29) · Śloka 29

বিধ্যেদ্ধস্তশিরাং বাহাবনাকুঞ্চিতকূর্পরে| বদ্ধ্বা সুখোপবিষ্টস্য মুষ্টিমঙ্গুষ্ঠগার্ভিণম্||২৮|| ঊর্ধ্বং বেধ্যপ্রদেশাচ্চ পট্টিকাং চতুরঙ্গুলে| |২৯|

স০-হস্তসিরাং বিধ্যেত্| কথম্ ? বাহাবনাকুঞ্চিতকূর্পরে,-অনাকুঞ্চিতঃ-প্রসারিতঃ, কূর্পরো যস্য বাহোস্তস্মিন্| তথা, সুখোপবিষ্টস্য-সুখাসীনস্য| তথা, মুষ্টিং বদ্ধ্বা| কিম্ভূতম্ ? অঙ্গুষ্ঠেন গর্ভিণং-অঙ্গুষ্ঠগর্ভিণম্| গূঢাঙ্গুষ্ঠং মুষ্টিং বদ্ধ্বেত্যর্থঃ| তথা, বেধ্যস্থানাদুপরি চতুরঙ্গুলপরিমাণে স্থানে পট্টিকাং বদ্ধ্বা বিধ্যেত্|

Adhikarana pArshvasirANAM yantraNam (29) · Śloka 29

| বিধ্যেদালম্বমানস্য বাহুভ্যাং পার্শ্বযোঃ সিরাম্||২৯||

স০-বাহুভ্যামালম্বমানস্য-অবলম্ব্যং বস্তু ভুজাভ্যামাসজতঃ পার্শ্বযোঃ সিরাং বিধ্যেত্|

Adhikarana meDhrasirANAM yantraNam (30) · Śloka 30

প্রহৃষ্টে মেহনে| |৩০|

স০-প্রহৃষ্টে-স্তব্ধে, মেঢ্রে তদাশ্রিতাং সিরাং বিধ্যেত্|

Adhikarana ja~gghAsirANAM yantraNam (30) · Śloka 30

জঙ্ঘাসিরাং জানুন্যকুঞ্চিতে| |৩০|

স০-জানুন্যকুঞ্চিতে স্পষ্টে স্থিতে সতি, জঙ্ঘাযাং সিরাং বিধ্যেত্|

Adhikarana pAdasirANAM yantraNam (30-32) · Śloka 32

| পাদে তু সুস্থিতেঽধস্তাজ্জানুসন্ধের্নিপীডিতে||৩০|| গাঢং করাভ্যামাগুল্ফং চরণে তস্য চোপরি| দ্বিতীযে কুঞ্চিতে কিঞ্চিদারূঢে হস্তবত্ততঃ||৩১|| বদ্ধ্বা বিধ্যেত্সিরাম্| |৩২|

স০-সুখং কৃত্বা ভূম্যাদিদেশে স্থিতে পাদে সতি পাদসিরাং বিধ্যেত্| তথা জানুসন্ধেরধস্তাদাগুল্ফং-গুল্ফং যাবত্, করাভ্যাং গাঢং কৃত্বা পীডিতে সতি, তস্য চরণস্যোপরি-উপরিষ্টাত্ দ্বিতীযে চরণ ঈষত্সঙ্কুচিতে, তথা আরূঢে-তত্কলিতে সতি, ততো হস্তবত্-বেধ্যস্থানাদুপরি চতুরঙ্গুলে পট্টিকাং, বদ্ধ্বা সিরাং বিধ্যেত্|

Adhikarana anuktasirANAM yantraNam (32) · Śloka 32

ইত্থমনুক্তেষ্বপি কল্পযেত্| তেষু তেষু প্রদেশেষু তত্তদ্যন্ত্রমুপাযবিত্||৩২||

স০-ইত্থং-অনেন প্রকারেণ যন্ত্রলক্ষণোদ্দেশেন, অনুক্তমপি যন্ত্রং তত্তদ্দেশমাহাত্ম্যাত্ ক্রিযাসৌকর্যার্থং তেষু তেষু শরীরাবযবেষু স্ববুদ্ধ্যা তত্তদ্যন্ত্রং যথাযোগং কল্পযেত্, উপাযজ্ঞো বৈদ্যঃ|

Adhikarana vrIhimukhasya nikhananam kuThArikAyA nikhananam (33) · Śloka 33

মাংসলে নিক্ষিপেদ্দেশে ব্রীহ্যাস্যং ব্রীহিমাত্রকম্| যবার্ধমস্থ্নামুপরি সিরাং বিধ্যন্ কুঠারিকাম্||৩৩||

স০-মাংসলে শরীরাবযবে ব্রীহিমুখং শস্ত্রং ব্রীহিপ্রমাণং নিক্ষিপেত্| অস্থ্নামুপরি কুঠারিকাং যবার্ধমাত্রাং নিক্ষিপেত্| কিং কুর্বন্ ? সিরাং বিধ্যন্|

Adhikarana samyagviddhAlakShaNam (34) · Śloka 34

সম্যগ্বিদ্ধা স্রবেদ্ধারাং যন্ত্রে মুক্তে তু ন স্রবেত্| |৩৪|

স০-সম্যগ্বিদ্ধে সতি(দ্বা সতী) ধারাং স্রবেত্| যন্ত্রে চ মুক্তে সতি ন স্রবেত্|

Adhikarana durviddhAlakShaNam atividdhAlakShaNam (34-35) · Śloka 35

| অল্পকালং বহত্যল্পং, দুর্বিদ্ধা তৈলচূর্ণনৈঃ||৩৪|| সশব্দমতিবিদ্ধা তু স্রবেদ্দুঃখেন ধার্যতে| |৩৫|

স০-অল্পং বিদ্ধা সতী সিরা স্তোকং কালং বহতি| দুর্বিদ্ধা-অসম্যগ্বিদ্ধা সতী, সিরা তৈলযুক্তৈশ্চূর্ণনৈঃ স্রবেত্| অতিবিদ্ধা তু সিরা সশব্দং স্রবেত্| দুঃখেন-কৃচ্ছ্রেণ ধার্যতে|

Adhikarana raktAvarodhakAraNAni (35-36) · Śloka 36

| ভীমূর্চ্ছাযন্ত্রশৈথিল্যকুণ্ঠশস্ত্রাতিতৃপ্তযঃ||৩৫|| ক্ষামত্ববেগিতাস্বেদা রক্তস্যাস্রুতিহেতবঃ| |৩৬|

স০-ভীমূর্ছাদযো রক্তস্যাস্রবণহেতবঃ| ভীঃ-ভযম্| মূর্চ্ছা-মোহস্তমসীব প্রবেশঃ| যন্ত্রশৈথিল্যম্-অগাঢং কৃত্বা যন্ত্রপীডনম্| তথা, কুণ্ঠং-ভগ্নং শস্ত্রম্| তথা, অতিতৃপ্তিঃ-অতিসৌহিত্যম্| ক্ষামত্বং-নির্বলতা| বেগিতা-সঞ্জাতবেগত্বম্| অস্বেদঃ-স্বেদাযোগঃ| যতশ্চৈতে রুধিরস্যাস্রুতিহেতবস্ততো রক্তস্রুতাবেতে পরিহার্যাঃ|

Adhikarana samyaksrAvArthamauShadham (36-37) · Śloka 37

| অসম্যগস্ত্রে স্রবতি বেল্লব্যোষনিষানতৈঃ||৩৬|| সাগারধূমলবণতৈলৈর্দিহ্যাচ্ছিরামুখম্| |৩৭|

স০-অসম্যগস্ত্রে স্রবতি বেল্লাদিভিঃ সিরাবদনং দিহ্যাত্ প্রলেপযেত্|

Adhikarana samyaksrAvanirvAhArthamauShadham (37) · Śloka 37

| সম্যক্প্রবৃত্তে কোষ্ণেন তৈলেন লবণেন চ||৩৭||

স০-সম্যক্প্রবৃত্তে রক্তে সিরামুখং কোষ্ণাভ্যাং তৈললবণাভ্যাং দিহ্যাত্|

Adhikarana duShThAsramevAgre sirAH sravanti (38) · Śloka 38

অগ্রে স্রবতি দুষ্টাস্রং কুসুম্ভাদিব পীতিকা| |৩৮|

স০-যথা রাগপীতিকামিশ্রীভূতাত্ কুসুম্ভাদগ্রে-পূর্বং, পীতিকা স্রবতি, এবং দুষ্টাদুষ্টরক্তাদেকলোলীভূতাত্ পূর্বং দুষ্টমস্রং স্রবতি|

Adhikarana svayaM sthitaM raktaM nAharet (38) · Śloka 38

| সম্যক্স্রুত্বা স্বযং তিষ্ঠেচ্ছুদ্ধং তদিতি নাহরেত্||৩৮||

স০-যথাবত্প্রস্রুত্য স্বযং-যত্নেন বিনা, যত্ তিষ্ঠেত্-ন স্রবেত্, শুদ্ধং তদিতি নাহরেত্-ন স্রাবযেত্, জীবিতহেতুত্বাত্|

Adhikarana mUrcchAyAM pratIkAraH (39) · Śloka 39

যন্ত্রং বিমুচ্য মূর্চ্ছাযাং বীজিতে ব্যজনৈঃ পুনঃ| স্রাবযেন্মূর্চ্ছতি পুনস্ত্বপরেদ্যুস্ত্র্যহেঽপি বা||৩৯||

স০-মূর্চ্ছাযাং সত্যাং যন্ত্রং বিমুচ্য ব্যজনৈর্বীজিতে-সমাশ্বস্তেনরে সতি, পুনরস্রং স্রাবযেত্| পুনর্মূর্চ্ছতি ত্বাতুরেঽশুদ্ধমপি রক্তং তস্মিন্নহনি ন স্রাবযেত্| কদা তর্হি স্রাবযেত্ ? ইত্যাহ-অপরেদ্যুঃ,-অন্যস্মিন্ দিনে, ত্র্যহেঽপি বা-তৃতীযে বাঽহ্নি, স্রাবযেত্|

Adhikarana vAtaduShTaraktasya lakShaNam (40) · Śloka 40

বাতাচ্ছ্যাবারুণং রূক্ষং বেগস্রাব্যচ্ছফেনিলম্| |৪০|

স০-বাতাত্ শ্যাবাদিলক্ষণং রক্তং স্যাত্|

Adhikarana pittaduShTarakasya lakShaNam (40) · Śloka 40

| পিত্তাত্ পীতাসিতং বিস্রমস্কন্দ্যৌষ্ণ্যাত্সচন্দ্রিকম্||৪০||

স০-পিত্তাত্ পীতাদিলক্ষণমস্রং স্যাত্| অস্কন্দি-অস্ত্যানম্, উষ্ণত্বাত্| সচন্দ্রিকং চ|

Adhikarana kaphaduShTaraktasya lakShaNam (41) · Śloka 41

কফাত্ স্নিগ্ধমসৃক্পাণ্ডু তন্তুমত্পিচ্ছিলং ঘনম্| |৪১|

স০-কফাত্ স্নিগ্ধাদিলক্ষণমসৃক্ স্যাত্|

Adhikarana dvandvaduShTaraktasya lakShaNam (41) · Śloka 41

| সংসৃষ্টলিঙ্গং সংসর্গাত্|৪১|

স০-সংসর্গাদ্দোষাণাং সংসৃষ্টলিঙ্গং রক্তং স্যাত্|

Adhikarana tridoShaduShTaraktasya lakShaNam (41) · Śloka 41

| ত্রিদোষং মলিনাবিলম্||৪১||

স০-ত্রিদোষরক্তং মলিনং-কলুষং, আবিলং-ঘনং চ| এতচ্চ দোষত্রযসংসর্গলক্ষণাদধিকং লক্ষণং মন্তব্যম্| ন চৈতাবদেব ত্রিদোষলক্ষণং মন্তব্যম্|

Adhikarana srAvapramANam (42) · Śloka 42

অশুদ্ধৌ বলিনোঽপ্যস্রং ন প্রস্থাত্স্রাবযেত্পরম্| অতিস্রুতৌ হি মৃত্যুঃ স্যাদ্দারুণা বা চলামযাঃ||৪২||

স০-অশুদ্ধমস্রং বলিনোঽপি-কিং পুনরবলিনঃ, প্রস্থাত্ পরং-অধিকং, ন স্রাবযেত্| { কস্মাত্ ? ইত্যাহ- } অতিস্রাবে হি রক্তস্য, মৃত্যুর্ভবেত্| অথবা বাতরোগাশ্চ কৃচ্ছ্রাঃ স্যুঃ|

Adhikarana atisrAve bheShajam (43) · Śloka 43

তত্রাভ্যঙ্গরসক্ষীররক্তপানানি ভেষজম্| |৪৩|

স০-তত্র-রক্তাতিস্রুতৌ, অভ্যঙ্গাদীনি ভেষজম্|

Adhikarana srutaraktasyAnantaraM kRutyam (43-44) · Śloka 44

| স্রুতে রক্তে শনৈর্যন্ত্রমপনীয হিমাম্বুনা||৪৩|| প্রক্ষাল্য তৈলপ্লোতাক্তং বন্ধনীযং সিরামুখম্| |৪৪|

স০-স্রুতে রক্তে সতি যন্ত্রং শনৈর্বিমুর্চ্য-মন্দং মন্দমপনীয, সিরামুখং শীতোদকেন প্রক্ষাল্য, তৈলপ্লোতেনাক্তং সদ্বন্ধনীযম্|

Adhikarana asamyakshuddhaupunaH srAvakAlaH (44-45) · Śloka 45

| অশুদ্ধং স্রাবযেদ্ভূযঃ সাযমহ্ন্যপরেঽপি বা||৪৪|| স্নেহোপস্কৃতদেহস্য পক্ষাদ্বা ভৃশদূষিতম্| |৪৫|

স০-অশুদ্ধং-বাতাদিদুষ্টরুধিরলক্ষণেন দুষ্টং জ্ঞাত্বা, ভূযঃ-পুনঃ, স্রাবযেত্| কদা ? সাযং-অপরাহ্নে, তস্মিন্নেব দিনে| অথবা, অপরেঽহ্নি-দ্বিতীযে দিনে| অথবা স্নেহেনোপস্কৃতোভাবিতো, দেহো যস্য তথাবিধস্য ভৃশদূষিতং-অতিশযেন দুষ্টং রক্তং, পক্ষাদূর্ধ্বং পুনঃ স্রাবযেত্| এবমশুদ্ধং রক্তং যথাযোগং সাযমহ্ন্যপরে পক্ষাদূর্ধ্বং বা প্রস্থপরিমাণমেব স্রাবযেন্ন ততোঽধিকমিতি রক্তস্রুতৌ ক্রমঃ| প্রস্থপরিমাণং চ তন্ত্রান্তরে গদিতম্ "বমনে চ বিরেকে চ রক্তাতীসারযোরপি| সার্দ্ধত্রযোদশপলং প্রস্থমাহুর্মনীষিণঃ||" ইতি|

Adhikarana ki~jcidduShTaraktasheShe~api na srutiH (45-46) · Śloka 46

| কিঞ্চিদ্ধি শেষে দুষ্টাস্রে নৈব রোগোঽতিবর্ততে||৪৫|| সশেষমপ্যতো ধার্যং ন চাতিস্রুতিমাচরেত্| |৪৬|

স০-যস্মাত্ কিঞ্চিচ্ছেষে দুষ্টরক্তে নৈব রোগো-দুষ্টরক্তোদ্ভবো ব্যাধিঃ, অতিবর্ততে-ক্রিযাপথমতিক্রম্য মার্গান্তরমসৌ নাসাদযতি| অতো দুষ্টমপি রক্তং সশেষং ধার্যম্| নাস্য দুষ্টরক্তস্যাতিস্রুতিমাচরেত্, প্রাণাযতনত্বাত্| সুশ্রুতোঽপ্যধ্যগীষ্ট (?) "সশেষং দুষ্টরুধিরমপি কুর্যাদ্বিচক্ষণঃ| ন চাতিপ্রস্রুতং কুর্যাচ্ছেষং সংশমনৈর্জযেত্||" ইতি|

Adhikarana duShTaraktasheShasya shRu~ggAdibhirharaNam (46) · Śloka 46

| হরেচ্ছৃঙ্গাদিভিঃ শেষম্|৪৬|

স০-স্রুতশেষং দুষ্টরক্তং শৃঙ্গতুম্বঘটিকাদিভির্হরেত্, ন তু সিরযা|

Adhikarana athavA tasya shItopacArAdibhiH prasAdanam (46-47) · Śloka 47

| প্রসাদমথবা নযেত্||৪৬|| শীতোপচারপিত্তাস্রক্রিযাশুদ্ধিবিশোষণৈঃ| দুষ্টং রক্তমনুদ্রিক্তমেবমেব প্রসাদযেত্||৪৭||

স০-অথবা শীতোপচারেণ, পিত্তাস্রক্রিযযা, শুদ্ধ্যা-বমনবিরেচনাদিরূপযা, বিশোষণেন-লঙ্ঘনরূপেণ, তদ্দুষ্টং রক্তং প্রসাদযেত্-কলুষতাং পরিত্যজ্য তস্য প্রসন্নত্বমুপপাদযেত্| ন তু কেবলং স্রুতশেষং রুধিরং শীতোপচারেণ (চারাদিনা) প্রসাদযেত্| যাবদনুদ্রিক্ত-অপ্রবৃদ্ধং দুষ্টং রুধিরং, এবমেব-অনেনৈব শীতোপচারাদিনা, প্রসাদং নযেত্| ন তু তন্নির্হরণে সিরাব্যধাদিনা যতনীযম্, অনুদ্রিক্তরক্তনির্হরণস্য সাপাযত্বাত্|

Adhikarana atisrAve stambhanam (48) · Śloka 48

রক্তে ত্বতিষ্ঠতি ক্ষিপ্রং স্তম্ভনীমাচরেত্ক্রিযাম্| |৪৮|

স০-রক্তে ত্বতিষ্ঠতি-স্থিতিমলভমানে, ত্বরিতমেব স্তম্ভনীং ক্রিযাং-বক্ষ্যমাণাং, কুর্যাত্, রক্তস্য প্রাণাযতনত্বাত্|

Adhikarana stambhana visheShaH (48-50) · Śloka 50

| রোধ্রপ্রিযঙ্গুপত্তঙ্গমাষযষ্ট্যাহ্বগৈরিকৈঃ||৪৮|| মৃত্কপালাঞ্জনক্ষৌ মমষীক্ষীরিত্বগঙ্কুরৈঃ| বিচূর্ণযেদ্ব্রণমুখং পদ্মকাদিহিমং পিবেত্||৪৯|| তামেব বা সিরাং বিধ্যেদ্ব্যধাত্তস্মাদনন্তরম্| সিরামুখং বা ত্বরিতং দহেত্তপ্তশলাকযা||৫০||

স০-রোধ্রাদিভিঃ সিরাব্রণমুখং বিচূর্ণযেত্| পদ্মকাদিহিমং-শীতকষাযং, পিবেত্| তামেব-প্রাগ্বিদ্ধাং, সিরাং তস্মাত্প্রাগ্ব্যধাদনন্তরং, অব্যবহিতং বিধ্যেত্| অথবা সিরাদ্বারং ক্ষিপ্রং কৃত্বাঽগ্নিনোপতপ্তযা শলাকযা দহেত্|

Adhikarana srutaraktasya pathyaniyamakAlAvadhiH (51) · Śloka 51

উন্মার্গগা যন্ত্রনিপীডনেন স্বস্থানমাযান্তি পুনর্ন যাবত্| দোষাঃ প্রদুষ্টা রুধিরং প্রপন্না স্তাবদ্ধিতাহারবিহারভাক্ স্যাত্||৫১||

স০-যন্ত্রনিপীডনেনোন্মার্গগাঃ-স্বমার্গমুল্লঙ্ঘ্য মার্গান্তরসমাশ্রযণেনোত্পথং প্রতিপন্নাঃ| কিংভূতা দোষাঃ? প্রদৃষ্টাঃ, তথাবিধং রক্তং প্রাপ্তা |তে পুনর্যাবত্স্বাশ্রযং ন প্রতিপদ্যন্তে তাবদ্ধিতাহারবিহারভাক্ স্যাত্-হিতাবাহারবিহারৌ ভজেত্| "ভজো ণ্বিঃ ইতি ণ্বিঃ| ইন্দ্রবজ্রাবৃত্তম্|

Adhikarana pathyam ukte pathye yuktiH (52) · Śloka 52

নাত্যুষ্ণশীতং লঘু দীপনীযং রক্তেঽপনীতে হিতমন্নপানম্| তদা শরীরং হ্যনবস্থিতাসৃ গগ্নির্বিশেষাদিতি রক্ষিতব্যঃ||৫২||

স০-রক্তে স্রাবিতেঽন্নপানং নাত্যুষ্ণশীতং হিতম্| অত্যুষ্ণং হ্যন্নপানং রক্তং প্রদূষযেত্| অতিশীতং ত্বগ্নিং সাদযেত্| তথা, লঘু-স্বভাবতো মাত্রাসংস্কারাদিনা বা, তথা দীপনীযম্| কুত এবমন্নপানং হিতম্ ? ইত্যাহ-যস্মাত্তস্মিন্ কালে শরীরমনবস্থিতং-চলিতবৃত্তি, রক্তং যস্য শরীরস্য তদেবংভূতং ভবতি| তচ্চাসৃক্ শরীরস্যাধারো, রক্তস্য চ পিত্তং, পিত্তং চ বহ্নিঃ| তথা চ বক্ষ্যতি (হৃ. শা. অ. ৩|৯০)- "পিত্তং বহ্নিঃ" ইতি| তস্মাদ্বিশেষাত্-মহতা যত্নেন, বহ্নির্নাত্যুষ্ণশীতাদিনাঽঽহারবিহারেণ রক্ষিতব্যঃ|

Adhikarana vishuddharaktasya lakShaNam (27) · Śloka 27

প্রসন্নবর্ণেন্দ্রিযমিন্দ্রিযার্থা- নিচ্ছন্তমব্যাহতপক্তৃবেগম্| সুখান্বিতং পুষ্টিবলোপপন্নং বিশুদ্ধরক্তং পুরুষং বদন্তি||৫৩|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে শিরাব্যধবিধির্নাম সপ্তবিংশোঽধ্যাযঃ||২৭||

স০-বর্ণশ্চেন্দ্রিযাণি চ বর্ণেন্দ্রিযাণি, প্রসন্নানি বর্ণেন্দ্রিযাণি যস্য তং প্রসন্নবর্ণেন্দ্রিযম্| তথা, ইন্দ্রিযার্থান্ শব্দাদীন্ স্বভাবাভিপ্রেতান্, ইচ্ছন্তং-অভিলষন্তম্| তথা, পক্তুর্বেগঃ-সামর্থ্যম্, অব্যাহতঃ-অনভিভূতঃ, পক্তৃবেগো যস্য তমব্যাহতপক্তৃবেগম্| তথা, সুখান্বিতং-আরোগ্যযুক্তং প্রকৃতিমাপন্নম্| তথা পুষ্টিবলাভ্যাং যুক্তম্| এবংবিধং বিশুদ্ধরক্তং পুরুষং বদন্তি, ইতি শরীরস্য লক্ষণমুক্তম্| "মধুরং লবণং" ইত্যাদিনা তু রক্তস্যৈব বিশুদ্ধলক্ষণমভিহিতমিতি| উপজাতির্বৃত্তম্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে শিরাব্যধবিধির্নাম সপ্তবিংশোঽধ্যাযঃ সমাপ্তঃ|| ২৭||