16. snēhavidhiradhyāyaḥ

Adhikarana adhyAyopakramaH · Śloka

শোধনাদিগণসঙ্গ্রহাধ্যাযাদনন্তরং স্নেহাধ্যাযারম্ভঃ| যতঃ শোধনং স্নেহস্বেদাবন্তরেণ ন সম্ভবতি| বক্ষ্যতি হি (হৃ. সূ. অ. ১৮|৫৯) - "স্নেহস্বেদাবনভ্যস্য ইত্যাদি|

Adhikarana snehavidhiradhyAyaH (2) · Śloka 2

তস্মাত্স্নেহস্বেদাধ্যাযযোরারম্ভো যুক্ত ইত্যাহ - - - - অথাতঃ স্নেহবিধিমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| গদ্যসূত্রে||২||

স০-স্নেহস্য-সর্পিরাদের্বিধিঃ স্নেহবিধিঃ, তং ব্যাখ্যাস্যামঃ| শেষং পূর্ববদ্যোজ্যম্|

Adhikarana snehanavirUkShaNayoH svarUpam (1) · Śloka 1

গুরুশীতসরস্নিগ্ধমন্দসূক্ষ্মমৃদুদ্রবম্| ঔষধং স্নেহনং প্রাযো, বিপরীতং বিরূক্ষণম্||১||

স০-গুর্বাদিগুণযুক্তং যদ্দ্রব্যং তত্ স্নেহনং ভবতি| বিপরীতমতো যল্লঘূষ্ণস্থিররূক্ষতীক্ষ্ণস্থূলকঠিনসান্দ্রগুণোপেতং তদ্বিরূক্ষণম্| প্রাযোগ্রহণং বিরূক্ষণে স্নেহনে চ যোজ্যম্| তথা চ,- লঘ্হ্বপি সার্ষপং তৈলং ছাগং চ দুগ্ধং তথা বিষ্কিরপ্রতুদমৃগাখ্যং বর্গত্রযং স্নেহনং ভবতি| তথা, উষ্ণমপি মত্স্যমহিষমাংসং স্নেহনং ভবতি| এবং রূক্ষণেঽপি বেদ্যম্| তথা চ,- যবো গুরুশীতসরাদিগুণযুক্তোঽপি বিরূক্ষণঃ, তথা রাজমাষোঽপি| স্নেহনে প্রকৃতেঽপি বিরূক্ষণোপন্যাসোঽন্বযব্যতিরেকেণ সুতরাং স্নেহস্য সম্যক্প্রতিপাদনার্থঃ|

Adhikarana sneheShu sarpirAdInAM pravaratvam, sneheShvuttamaM sarpiH (2-3) · Śloka 3

সর্পির্মজ্জা বসা তৈলং স্নেহেষু প্রবরং মতম্| তত্রাপি চোত্তমং সর্পিঃ সংস্কারস্যানুবর্তনাত্||২|| মাধুর্যাদবিদাহিত্ত্বাজ্জন্মাদ্যেব চ শীলনাত্| |৩|

স০-স্নেহেষু-ক্ষীরানূপামিষাদিষু মধ্যে, সর্পিরাদযশ্চত্বারঃ স্নেহাঃ প্রকর্ষেণ বরাঃ| তত্রাপি চ-তেষ্বপি চতুর্ষু মধ্যে, সর্পিরুত্তমম্, সংস্কারস্যানুবর্তনাত্| ননু, যদি সংস্কারমনুবর্ততে সর্পিস্তদানীং মরিচচিত্রকাদিদ্রব্যাভিসংস্কৃতস্য ঘৃতস্য শৈত্যাদিগুণবিপর্যাসঃ প্রাপ্তঃ| ন চেদং দৃষ্টম্| যদস্য শৈত্যাদযো গুণা বিনশ্যন্ত্যৌষ্ণ্যাদযশ্চোত্পদ্যন্তে ইতি| অত্রোচ্যতে| অনুশব্দোঽত্র সহার্থে, অনেকার্থত্বান্নিপাতানাম্| তেনাযমর্থঃ,-সর্পিষো গুণাঃ সংস্কারগুণৈঃ সহ বর্তন্তে, ন তু তৈলাদীনাম্| তৈলবসামজ্জানো হি সংস্কারবশাত্ স্বগুণাংস্ত্যজন্তি| অত্র চোদাহরণং যথা,-চন্দনাদ্যং তৈলমিতি| অতো দ্রব্যগুণান্তরৈরনভিভূতগুণত্বাত্সর্পিষ ইতরেষাং চ তৈলাদীনাং দ্রব্যৈরভিভূতগুণত্বাদুত্তমত্বম্| অত এব চ বাতপিত্তজ্বরাদিষু বিকারেষু ঘৃতসাধ্যেষু ভেষজং তৈলং নেষ্টম্, অনিষ্টসম্পাদনাত্| তৈলসাধ্যেষু তু বিকারেষু তদুপশান্ত্যর্থ তথাবিধদ্রব্যসংস্কৃতং ঘৃতমপীষ্টম্| তদ্ধি ন তথাঽনিষ্টহেতুঃ| তস্মাত্ সর্বস্নেহেভ্যঃ সর্পিরেবোত্তমম্, সংস্কারস্যানুবর্তনাদিতি ন্যাযাত্ ন্যায্যমেব| মাধুর্যাদিহেতোশ্চ|

Adhikarana sarpirAdInAM snehaprayoge doShavisheSheNa tAratamyam (3) · Śloka 3

| পিত্তঘ্নাস্তে যথাপূর্বমিতরঘ্না যথোত্তরম্||৩||

স০-যো যঃ পূর্বো-যথাপূর্বম্, যো য উত্তরো-যথোত্তরম্| "যথাসাদৃশ্যে" ইত্যব্যযীভাবঃ| উত্তরমপেক্ষ্য পূর্বঃ পূর্বং চাপেক্ষ্যোত্তরঃ| তেন চতুর্ণাং স্নেহানাং যথানির্দিষ্টানাং সর্পিরাদীনাং ত্রয এব স্নেহা বসামজ্জসর্পিঃসংজ্ঞকা যথাপূর্বত্বেন সম্বধ্যন্তে, ন তু তৈলাখ্যঃ স্নেহঃ, তস্য পূর্বত্বাভাবাত্| ন হ্যন্যোঽস্মাত্ কশ্চিদুত্তরোঽস্তি, যদপেক্ষ্যৈষঃ পূর্বত্বমাত্মন আসাদযেত্| তস্মান্নাস্তি পূর্বত্বসম্বন্ধস্তৈলস্য| [তথা, চতুর্ণাং স্নেহানাং ত্রয এব স্নেহা মজ্জবসাতৈলাখ্যা যথোত্তরত্বেনাভিসম্বধ্যন্তে, ন সর্পিঃসংজ্ঞকঃ স্নেহঃ, উত্তরত্বাভাবাত্| ন হ্যন্যঃ কশ্চিদস্য পূর্বো বিদ্যতে, যদপেক্ষযৈবোত্তরত্বমাত্মন আসাদযতীত্যুক্তম্| ] তদেবং যথাপূর্বং পিত্তঘ্নত্বং বসামজ্জসর্পিষাং সামান্যেনোক্তম্| বিশেষেণ চ-, বসা পিত্তঘ্নী, মজ্জা পিত্তঘ্নতরঃ, সর্পিঃ পিত্তঘ্নতমমিত্যর্থঃ| ইতরঘ্না ইত্যাদি| ইতরৌ-বাতকফৌ পিত্তাপেক্ষযা, তৌ ঘ্হ্নন্তি-পরাকুর্বন্তীতীতরঘ্হ্নাঃ| যথোত্তরং ত্রযঃ স্নেহা মজ্জবসাতৈলাখ্যা বাতশ্লেষ্মঘ্নাঃ| তেন মজ্জা বাতশ্লেষ্মঘ্নো বসা বাতশ্লেষ্মঘ্নতরা তৈলং বাতশ্লেষ্মঘ্নতমমিত্যবগন্তব্যম্| অন্যে ত্বেবং ব্যাচক্ষতে-শ্লেষ্মণি স্নেহনিষেধাদিতরঘ্না ইতি সামান্যোক্তাবপি বাতঘ্না ইতি গম্যতে| অথবা দ্রব্যান্তরসংস্কৃতসর্পিরাদ্যপেক্ষযা কফস্যাপীতরশব্দেন গ্রহণমিতি|

Adhikarana sarpirAdInAM gurutve tAratamyam (4) · Śloka 4

ঘৃতাত্তৈলং গুরু বসা তৈলান্মজ্জা ততোঽপি চ| |৪|

স০-ঘৃতাদ্গুরুণঃ সকাশাত্তৈলং গুরু-গুরুতরমিত্যর্থঃ| বসা তু তৈলাদ্গুরুতমা| ততোঽপ্যতিশযেন মজ্জা গুরুতমঃ|

Adhikarana yamakastrivRuto mahAn iti saMj~jAtrayam (4) · Śloka 4

ইদানীং যমকঃ স্নেহস্ত্রিবৃতঃ স্নেহো মহাস্নেহ ইতি চ তত্র তত্রোচ্যন্তে, ন চ তে জ্ঞাযন্ত ইত্যাহ - - - - | দ্বাভ্যাং ত্রিভিশ্চতুর্ভিস্তৈর্যমকস্ত্রিবৃতো মহান্||৪||

স০-দ্বাভ্যাং স্নেহাভ্যাং-সর্পির্বসাভ্যাং সর্পিস্তৈলাভ্যাং সর্পির্মজ্জভ্যামিত্যাদি, দ্বাভ্যাং দ্বাভ্যাং যমকো নাম্না স্নেহঃ| এবং ত্রিভিঃ স্নেহৈস্ত্রিবৃতঃ, চতুর্ভির্মহাস্নেহঃ, 'উচ্যতে' ইতি শেষঃ|

Adhikarana snehyAH (5-6) · Śloka 6

সম্প্রতি স্নেহ্যান্নিরূপযতি - - - - স্বেদসংশোধ্যমদ্যস্ত্রীব্যাযামাসক্তচিন্তকাঃ| বৃদ্ধবালাবলকৃশা রূক্ষাঃ ক্ষীণাস্ররেতসঃ||৫|| বাতার্তস্যন্দতিমিরদারুণপ্রতিবোধিনঃ| স্নেহ্যাঃ|৬|

স০-স্বেদ্যাদযঃ স্নেহ্যাঃ-স্নেহার্হাঃ| ন হ্যস্নেহিতঃ স্বেদ্য ইত্যর্থঃ| এবং যোঽপি শোধ্যঃ সোঽপি পূর্বং স্নেহ্যঃ| স্বেদ্যাঃ-স্বেদার্হাঃ| অর্হার্থে কৃত্যপ্রত্যযোঽত্র ণ্যঃ| এবং সংশোধ্যাঃ-শোধনার্হাঃ, মদ্যাসক্তাঃ স্ত্র্যাসক্তা ব্যাযামসক্তাশ্চ, তথা চিন্তকাঃ, তথা বৃদ্ধা বালা অবলাঃ-অল্পবলাঃ কৃশা রূক্ষাঃ ক্ষীণরুধিরাঃ ক্ষীণশুক্রাশ্চ, বাতার্তাঃ-বাতপীডিতাঃ, স্যন্দাদিষু প্রত্যেকস্মিন্ যোজ্যঃ, স্যন্দিনঃ-অক্ষিরোগযুক্তাঃ, তিমিরিণশ্চ, দারুণপ্রতিবোধিনঃ-কৃচ্ছ্রোন্মীলিনঃ, এতে স্নেহার্হাঃ|

Adhikarana snehanAyogyAH (6-8) · Śloka 8

| ন ত্বতিমন্দাগ্নিতীক্ষ্ণাগ্নিস্থূলদুর্বলাঃ||৬|| ঊরুস্তম্ভাতিসারাঽঽমগলরোগগরোদরৈঃ| মূর্চ্ছাচ্ছর্দ্যরুচিশ্লেষ্মতৃষ্ণামদ্যৈশ্চ পীডিতাঃ||৭|| অপপ্রসূতা যুক্তে চ নস্যে বস্তৌ বিরেচনে| |৮|

স০-অতিমন্দাগ্ন্যাদযো ন স্নেহ্যাঃ| অতিশব্দো যাবদ্দুর্বলেষু প্রত্যেকং যোজ্যঃ| তেনাতিদুর্বলা ন স্নেহ্যা ইত্যর্থঃ| অত এবাল্পবলাঃ স্নেহ্যাঃ, ন ত্বতিদুর্বলাঃ, ইতি ন পূর্বাপরবিরোধঃ| অতিতীক্ষ্ণাগ্নেঃ স্নেহনাদত্যগ্নিবৃদ্ধিঃ| অতিস্থূলস্য চাগ্নিমেদসোর্বৃদ্ধিঃ| অতিদুর্বলস্য চ জরণাশক্তেঃ স্নেহস্য ব্যাপত্| ঊরুস্তম্ভাদিভির্যাবন্মদ্যৈশ্চ পীডিতা ন স্নেহ্যাঃ| অপপ্রসূতা-স্রুতগর্ভা, ন স্নেহ্যেতি লিঙ্গবচনবিপরিণামঃ| প্রযুক্তে চ নস্যাদিকর্মণি সর্ব এব ন স্নেহ্যাঃ|

Adhikarana ghRutasya viShayaH (8) · Śloka 8

সাম্প্রতং চতুর্ণাং স্নেহানাং মধ্যে যো যেভ্যো হিতঃ, তং দর্শযন্নাহ - - - - | তত্র ধীস্মৃতিমেধাদিকাঙ্ক্ষিণাং শস্যতে ঘৃতম্||৮||

স০-তত্র-তেষু স্নেহেষু মধ্যে, ধীস্মৃত্যাদ্যভিলাষিণাং ঘৃতং শস্যতে, যাবদগ্নিকাঙ্ক্ষিণাম্| অন্যে তু "মেধাদিকাঙ্ক্ষিণাং" ইতি পঠন্তি| আদিশব্দেন স্বরাযুর্বর্ণাদিপরিগ্রহঃ|

Adhikarana tailasya viShayaH (9) · Śloka 9

গ্রন্থিনাডীকৃমিশ্লেষ্মমেদোমারুতরোগিষু| তৈলং লাঘবদার্ঢ্যার্থিক্রূরকোষ্ঠেষু দেহিষু||৯||

স০-তৈলং গ্রন্থ্যাদিরোগিষু শস্যতে| লাঘবদার্ঢ্যার্থিষু ক্রূরকোষ্ঠেষু প্রাণিষু চ শস্যতে|

Adhikarana vasAmajjorviShayaH (10-11) · Śloka 11

বাতাতপাধ্বভারস্ত্রীব্যাযামক্ষীণধাতুষু| রূক্ষক্লেশক্ষমাত্যগ্নিবাতাবৃতপথেষু চ||১০|| শেষৌ| |১১|

স০-বাতাদীনাং ক্ষীণধাতুনা প্রত্যেকং সম্বন্ধঃ| বাতক্ষীণধাতুষু এবমাতপক্ষীণধাতুষ্বিত্যাদি, শেষৌ-ঘৃততৈলাভ্যামুক্তাভ্যামন্যৌ বসামজ্জানৌ, শস্যেতে| তথা রূক্ষাদিষ্বপি, এবং ক্লেশসহেষু| অত্যগ্নিষু-মহাগ্নিষু বলবদগ্নিষ্বিতি দ্রষ্টব্যম্, অন্যথাঽত্যগ্নিষু স্নেহনিষেধাত্ পূর্বাপরবিরোধঃ স্যাত্| অথবা, অত্যগ্নিষ্বপি বসামজ্জানাবনুজজ্ঞে, অপবাদবাক্যত্বাদস্যেতি ব্যাখ্যেযম্| বাতেনাবৃতাঃ পন্থানঃ-ছিদ্রাখ্যাঃ, যেষাং তেষু চ শস্যেতে শেষৌ|

Adhikarana vasAyAH viShayAntaram (11) · Śloka 11

বসাযাস্ত্বন্যদপি বিশেষান্তরমাহ - - - - বসা তু সন্ধ্যস্থিমর্মকোষ্ঠরুজাসু চ| তথা দগ্ধাহতভ্রষ্টযোনিকর্ণশিরোরুজি||১১||

স০-তুর্বিশেষে| চঃ সমুচ্চযে| রুজাশব্দঃ প্রত্যেকং সম্বধ্যতে| সন্ধিরুজাস্বস্থিরুজাস্বিত্যাদি| তথা দগ্ধরুজ্যাহতরুজি চ, তথা ভ্রষ্টযোনিরুজীত্যেবং সম্বন্ধঃ কার্যঃ|

Adhikarana kAlavisheShe snehavisheShopayogaH (12-13) · Śloka 13

| ইদানীং কস্মিন্কালে কস্য স্নেহস্যোপযোগঃ শস্ত ইতি দর্শযন্নাহ - ] - - - - তৈলং প্রাবৃষি, বর্ষান্তে সর্পিরন্যৌ তু মাধবে| ননু, বর্ষাসু তৈলং বর্ষান্তে সর্পির্বসামজ্জানৌ মাধব ইতি যোঽযং নিযমঃ, স কিঞ্চিদপেক্ষ্য বর্ততে আহোস্বিদনপেক্ষ্য ? ইত্যস্মিন্ পর্যনুযোগ ইদমাহ - - - - ঋতৌ সাধারণে স্নেহঃ শস্তোঽহ্নি বিমলে রবৌ||১২|| তৈলং ত্বরাযাং শীতেঽপি| |১৩|

স০-তৈলং প্রাবৃষি শস্যত ইতি সম্বন্ধঃ| এবমুত্তরত্রাপি যোজনীযম্| স্বস্থস্য স্নেহনার্থং সর্বস্যৈব স্নেহস্য প্রসঙ্গে নিযমোঽযং ক্রিযতে-, তৈলং প্রাবৃষ্যেব, বর্ষান্তে এব সর্পিঃ, অন্যৌ বসামজ্জানৌ, মাধব এবেতি| স০-সাধারণে ঋতৌ-শ্রাবণাদৌ, সংশোধনাত্ পূর্বং স্নেহনার্থং স্নেহঃ-সর্পিরাদিশ্চতুষ্প্রকারোঽপি শস্তঃ| তথা, অহ্নি-বাসরে, ন নিশি| তথা, বিমলে রবৌ-জলদনীহারাদিনাঽনাচ্ছাদিতে খরাংশৌ| স্নেহ ইতি সামান্যশব্দপ্রযোগাত্ সর্বঃ স্নেহঃ সর্পিরাদিশ্চতুষ্প্রকারো গৃহ্যতে| স০-ত্বরাযাং সত্যাং-ব্যাধিক্রিযাং প্রতি প্রাপ্তে কালে স্নেহযোগ্যতাযাং সত্যাম্, শীতে-হেমন্তশিশিরাখ্যে কালে, তৈলং সংশোধনাত্পূর্বং স্নেহনার্থং শস্তম্, নান্যঃ স্নেহঃ| অপিশব্দান্ন কেবলং বর্ষাসু, অবর্ষাসু চ শস্তমিত্যর্থঃ|

Adhikarana gharme~api ca nishi ghRutopayogaH (13) · Śloka 13

সর্বস্য স্নেহস্যান্হ্যুপযোগাদ্রাত্রাবপ্রযোগঃ প্রাপ্ত ইত্যাহ - - - - ঘর্মেঽপি চ ঘৃতং নিশি| |১৩|

স০-ন কেবলং শরদি ঘৃতং প্রযুঞ্জীত যাবদ্ঘর্মেঽপি ঘৃতং নিশ্যুপযুঞ্জীত|

Adhikarana pittAdiShu divAsnehanasyApavAdaH (13) · Śloka 13

| নিশ্যেব পিত্তে পবনে সংসর্গে পিত্তবত্যপি||১৩||

স০-ন চ ঘর্ম এব নিশ্যুপযুঞ্জীত, যাবত্পিত্তে কুপিতে তজ্জে বা বিকারে, তথা পবনে কুপিতে তজ্জে বা বিকারে স্নেহসাধ্যে, ঘর্মে ঘৃতং নিশ্যুপযুঞ্জীত, ন দিবা ন চ তৈলং বসামজ্জানৌ বা| তথা, পিত্তবতি-পিত্তাধিকে সংসর্গে বাতপিত্তাখ্যে শ্লেষ্মপিত্তাখ্যে কুপিতে তজ্জে বা বিকারে স্নেহসাধ্যে, ঘর্মে ঘৃতমেব নিশ্যুপযুঞ্জীত| পিত্তে পবন ইত্যেতত্ দোষবিকারোভযোপলক্ষণার্থং বেদ্যম্| পিত্তবতীতি ভূম্নি মতুপ্|

Adhikarana divArAtriniyamasya tyAge doShaH (14) · Śloka 14

নিশ্যন্যথা বাতকফাদ্রোগাঃ স্যুঃ পিত্ততো দিবা| |১৪|

স০-অন্যথা-উক্তপ্রকারাদপরেণ প্রকারেণ| যথা,- শীতকালে নিশি ঘৃতোপযোগাত্ বাতকফাদ্ধেতো রোগা ভবেযুঃ| তথা, দিবা ঘর্মে কালে তৈলোপযোগাত্ পিত্ততঃ-পিত্তাত্, রোগাঃ স্যুঃ| বসামজ্জোস্ত্বনিশ্চিতস্বরুপত্বাত্ ন তূষ্ণকালে নাপি শীতকালে ত্বরাযাং সত্যামুপযোগস্তন্ত্রকারেণ দর্শিতঃ| তথা চোক্তম্-"যথাসত্বং তু শৈত্যোষ্ণে বসামজ্জ্ঞোস্তু নির্দিশেত্|" ইতি|

Adhikarana snehopayogaprakAraH (14-15) · Śloka 15

কথং স্নেহ উপযোজ্য ইত্যাহ - - - - | যুক্ত্যাঽবচারযেত্স্নেহং ভক্ষ্যাদ্যন্নেন বস্তিভিঃ||১৪|| নস্যাভ্যঞ্জনগণ্ডূষমূর্দ্ধকর্ণাক্ষিতর্পণৈঃ| |১৫|

স০-যুক্তিঃ-যোগ উপাযলক্ষণঃ| যুক্ত্যা-মাত্রাকালক্রিযাভূমিদেহদোষস্বভাবযা, স্নেহং-সর্পিরাদিকম্, অবচারযেত্-উপযুঞ্জীত| কেন সহ ? ইত্যাহ-ভক্ষ্যাদ্যন্নেন| আদিশব্দেন ভোজ্যলেহ্যপেযস্য ত্রিবিধস্যাপ্যন্নস্য গ্রহণম্| তথা, বস্তিভির্নস্যেনাভ্যঞ্জনেন গণ্ডূষেণ চ স্নেহমবচারযেত্| মূর্দ্ধাদীনাং তর্পণশব্দেন প্রত্যেকং সম্বন্ধঃ| তেন, মূর্দ্ধতর্পণেন-শিরোবস্ত্যাখ্যেন| তথা, কর্ণতর্পণেন-কর্ণপূরণাখ্যেন| তথা, অক্ষিতর্পণেন-তর্পণপুটপাকবিধ্যুক্তেন| ভক্ষ্যং-শশাঙ্ককিরণাদি, তেন ভক্ষ্যেণ সহ| আদিগ্রহণাদোদনাদযো মুন্যুক্তা গৃহ্যন্তে| তথা চ মুনিঃ (চ. সূ. অ. ১৩|২৩) - "ওদনশ্চ বিলেপী চ রসো মাংসং পযো দধি| যবাগূঃ সূপশাকে চ যূষঃ কাম্বলিকঃ খলঃ|| সক্তবস্তিলপিষ্টং চ মদ্যং লেহাস্তথৈব চ| ভক্ষ্যমভ্যঞ্জনং বস্তিস্তথৈবোত্তরবস্তযঃ||" ইতি| বস্তিভিরিতি বহুবচননির্দেশো বস্তিত্রযগ্রহণার্থঃ| তেন নিরূহোঽন্বাসনং বস্তিরুত্তর ইতি|

Adhikarana snehasya catuH ShaShThirvicAraNAH (15-16) · Śloka 16

| রসভেদৈককত্বাভ্যাং চতুঃষষ্টির্বিচারণাঃ||১৫|| স্নেহস্যান্যাভিভূতত্বাদল্পত্বাচ্চ ক্রমাত্স্মৃতাঃ| |১৬|

স০-রসভেদশ্চৈককত্বং চ, তাভ্যাং রসভেদৈককত্বাভ্যাং স্নেহস্যাবচার্যমাণস্য চতুঃষষ্টির্বিচারণা ভবন্তি| রসভেদেন-"ষট্ পঞ্চকাঃ ষট্ চ পৃথক্" (হৃ. সূ. অ. ১০|৪৩) ইত্যাদিগ্রন্থনির্দিষ্টেন ত্রিষষ্টিসঙ্খ্যাবচ্ছিন্নেন সহোপযুক্তস্য স্নেহস্য, তথৈককত্বেন-অসহাযেন কেবলেন স্নেহেন সতাঽস্য স্নেহস্য চতুঃষষ্টির্বিচারণাঃ-স্নেহপ্রযোগকল্পনাঃ| যা এতা ভক্ষ্যাদ্যন্নেন, তথা রসভেদেন মূর্ধকরণাক্ষিতর্পণেন চ| যা এতাঃ ক্রমাত্-যথাক্রমং নির্দিষ্টাঃ, তাঃ কল্পনাঃ স্নেহস্যান্যাভিভূতত্বাত্ অন্যেন ভক্ষ্যাদিনা বহুনা, তথা রসভেদেন সহোপযুক্তস্যাভিভূতত্বাত্, তথাঽল্পত্বাত্-অল্পোপযোগিত্বাত্, মূর্দ্ধাক্ষিতর্পণাদৌ হি পান ইব প্রভূতস্যাবচারযিতুমশক্যত্বাচ্চ বিচারণাঃ স্মৃতাঃ| আযুর্বেদকর্তৃভিরিতি শেষঃ|

Adhikarana acchapeyaH snehaH (16) · Śloka 16

| যথোক্তহেত্বভাবাচ্চ নাচ্ছপেযো বিচারণা||১৬||

স০-স্নেহস্যাচ্ছস্য বিচারণাসংজ্ঞাত্বে ন যথানির্দিষ্টো হেতুঃ| তস্য যথোক্তস্য হেতোরভাবাত্-অবিদ্যমানত্বাত্, যোঽচ্ছপেযস্নেহঃ-কেবল এব, ন সংযুক্তঃ, নাসৌ বিচারণা, কেবলোপযোগিত্বাদ্বহূপযোগিত্বাচ্চেত্যর্থঃ| ননু, ইহ কেবলঃ স্নেহো ন বিচারণেত্যুচ্যতে| প্রাক্কেবলস্যৈব স্নেহস্য বস্ত্যাদ্যুপযোগে বিচারণেত্যভ্যধাযি| তদেতত্পূর্বাপরব্যাহতমিব মন্যামহে| নৈতদস্তি| অচ্ছপেয ইত্যস্য হ্যযমর্থঃ,-অচ্ছঃ কেবলো যঃ স্নেহঃ পীযতে সা বিচারণা ন ভবতি| মূর্দ্ধাদিতর্পণাদিনা তু কেবলস্য স্নেহস্য য উপযোগঃ সা বিচারণেতি|

Adhikarana tasya shreShThatvam (17) · Śloka 17

স্নেহস্য কল্পঃ স শ্রেষ্ঠঃ স্নেহকর্মাশুসাধনাত্| |১৭|

স০-সঃ-অচ্ছপেযাখ্যঃ, কল্পঃ-প্রযোগঃ, স্নেহস্য শ্রেষ্ঠঃ-প্রশস্যতমঃ| কুতঃ ? ইত্যাহ-স্নেহকর্মাশুসাধনাত্,-স্নেহকর্মণাং-তর্পণমার্দবাদীনাং শীঘ্রং সম্পাদনাত্|

Adhikarana acchapeyasya mAtrAtrayam, acchapeyasya caturthI mAtrA (17-18) · Śloka 18

অধুনা স্নেহস্য ত্রিবিধমাত্রালক্ষণমধিকৃত্যাহ - - - - | দ্বাভ্যাং চতুর্ভিরষ্টাভির্যামৈর্জীর্যন্তি যাঃ ক্রমাত্||১৭|| হ্রস্বমধ্যোত্তমা মাত্রাস্তাস্তাভ্যশ্চ হ্রসীযসীম্| কল্পযেদ্বীক্ষ্য দোষাদীন্ প্রাগেব তু হ্রসীযসীম্||১৮||

স০-দ্বাভ্যাং যামাভ্যাং-প্রহারাভ্যাং, যা স্নেহস্য মাত্রা প্রযুক্তা জাঠরানলবশাজ্জরাং যাতি সা তস্য হ্রস্বা মাত্রা, চতুর্ভির্যামৈর্যা জীর্যতি সা তস্য মধ্যমা মাত্রা, অষ্টাভির্যামৈর্যা জীর্যতি সোত্তমা মাত্রা, ক্রমাত্-যথাক্রমং, তা হ্রস্বমধ্যমোত্তমা মাত্রাঃ| তাভ্যশ্চ-তিসৃভ্যো মাত্রাভ্যো, হ্রসীযসীং-অতিশযেন হ্রস্বাং মাত্রাং কল্পযেত্| বৈদ্য ইতি শেষঃ| হ্রস্বমধ্যোত্তমা ইতি নির্দেশে "ঙ্যাপোঃ" ইত্যাদিনা হ্রস্বঃ| হ্রস্বা মাত্রা যামদ্বযজরণলক্ষণা উক্তা, ততোঽপ্যর্বাক্কালেন যা জরাং যাতি সা হ্রসীযসীতি| দোষাদীন্-দোষভেষজদেশকালবলশরীরাহারসত্ত্বসাত্ম্যপ্রকৃতীঃ বীক্ষ্য-আকলয্য, প্রাক্-পূর্বমেব, অজ্ঞাতকোষ্ঠে পুরুষ উত্তমমাত্রাবিষযে পূর্বং হ্রসীযসীং কল্পযেত্| ততো হ্রস্বাং ততো মধ্যমাং তত উত্তমাং চ প্রকলপ্যেত্| এবং মধ্যমমাত্রাবিষযে হ্রসীযসীং, হ্রস্বমাত্রাবিষযেঽপি হ্রসীযসীং প্রাক্কল্পযেত্| অন্যথা প্রত্যবাযভযং স্যাত্| এবকারোঽবধারণে| তুশব্দো যথোত্তরমিতি ক্রমনির্দেশার্থঃ| সঙ্গ্রহেঽপ্যুক্তম্ (সূ. অ. ২৫) - "অজ্ঞাতকোষ্ঠে হি বহুঃ কুর্যাজ্জীবিতসংশযম্|" ইতি| ইযং হ্রস্বা ইযং হ্রস্বা ইযমনযোরতিশযেন হ্রস্বা ইতি হ্রসীযসীং| হ্রসীযসীত্যত্র ঈযসুনি "স্থূলদূর" ইত্যাদিনা বলোপঃ| অন্যৈস্তু পলদ্বযপলচতুষ্টযপলষট্কসঙ্খ্যাবচ্ছিন্না মাত্রা উক্তাঃ| ন চৈতদ্যুজ্যতে| যতো জঠরানলশক্তিমনপেক্ষ্য স্নেহমাত্রাঃ প্রযুজ্যমানা অনর্থাযৈব| অতোঽস্মাভিঃ পলদ্বযাদিসঙ্খ্যাবচ্ছিন্না নোক্তাঃ| মুনেরপি নৈতন্মতম্| তদ্গ্রন্থো হি (চ. সূ. অ. ১৩|২৯) - "অহোরাত্রমহঃ কৃত্স্নমর্ধাহং চ প্রতীক্ষতে| প্রধানা মধ্যমা হ্রস্বা স্নেহমাত্রা জরাং প্রতি||" ইতি|

Adhikarana shodhanasyAcchapeyasya kAlo mAtrA ca (19) · Śloka 19

অধুনা শোধনশমনবৃংহণভেদাত্ত্রিবিধস্য স্নেহস্য কালমাত্রালক্ষণমধিকৃত্যাহ - - - - হ্যস্তনে জীর্ণ এবান্নে স্নেহোঽচ্ছঃ শুদ্ধযে বহুঃ| |১৯|

স০-হ্যস্তনেঽন্নে-আহারে, জীর্ণ এব-জীর্ণমাত্র এব ন ত্বন্নাভিলাষে সতি, শুদ্ধযে-শোধনার্থং, বহুঃ-উত্তমযা মাত্রযা, স্নেহোঽচ্ছঃ-কেবলঃ, পেযত্বেন শস্যতে| সঞ্জাতবুভুক্ষেণ তু পীতো জাঠরানলস্য দীপ্তত্বাচ্ছোধনকার্যমকুর্বাণস্তদ্যোগ্যতাং চানুত্পাদযন্নাশ্বেব জরামুপৈতি| বমনমপি বুভুক্ষিতস্য ন সম্পদ্যতে, কফাপচিতেঃ পূর্বোক্তাচ্চ হেতোঃ| তস্মাদ্যুক্তমুক্তং 'হ্যস্তনে জীর্ণ এবান্নে' ইতি|

Adhikarana shamanasyAcchapeyasya kAlo mAtrA ca (19) · Śloka 19

| শমনঃ ক্ষুদ্বতোঽনন্নো মধ্যমাত্রশ্চ শস্যতে||১৯||

স০-শমনো-যো রোগস্য শমনাযোপযুজ্যতে স্নেহঃ, স ক্ষুদ্বতো-জাতবুভুক্ষস্য শস্যতে, জাতাযাং বুভুক্ষাযাং ন জীর্ণমাত্র এবান্নে শোধন ইব| শমনো হি স্নেহো যত্রতত্রস্থং দোষং কুপিতং সর্বশরীরব্যাপিত্বাচ্ছমনরূপত্বাত্ [ চ ] শমযতি| যদি পুনর্জীর্ণমাত্র এবান্নে স্নেহোঽযমবুভুক্ষিতস্যৈবোপযুজ্যতে, তদানীং স্রোতসাং কফাদ্যুপলেপানিবর্তনাত্ তত্সম্পৃক্তঃ স স্নেহো ন সর্বশরীরং ব্যাপ্নুতে, অব্যাপ্নুবংশ্চ দোষং ন শমযেত্| তস্মাত্ ক্ষুদ্বত এবাযং শস্যতে| স চ মধ্যমমাত্রযা, অনন্নঃ-কেবল এব ভক্ষ্যাদিনাঽঽহারেণ রহিতঃ, অচ্ছ এব পেয ইত্যর্থঃ| অত্র চোত্তমযা মাত্রযা স্নেহপানদিনানন্তরং পথ্যং কার্যম্| পুনঃ স্নেহপ্রযোগঃ| পুনরন্যস্মিন্নহনি পথ্যং কার্যম্| মধ্যমমাত্রযা স্নেহপানে তু লঘুভোজিনো যামমাত্রেঽন্নাকাঙ্ক্ষা ভবতি| তদা চ স্নেহোপযোগে রাত্র্যারম্ভে রাত্রিযামার্দ্ধে গতে বা রসকৌদনপ্রাযং ভোজনং ভোজ্যং মাত্রযৈব| গ্রন্থকারো হি শমনে স্বল্পভোজনমেবানুজজ্ঞে| বক্ষ্যতি হি (শ্লো. ২৯) - "উপচারস্তু শমনে কার্যঃ স্নেহে বিরিক্তবত্|" ইতি| সুশ্রুতে চোক্তম্ (চি. অ. ৩১|৩৪) - "পরিষিচ্যাদ্ভিরুষ্ণাভির্জীর্ণস্নেহং ততো নরম্| যবাগূং পাযযেদুষ্ণাং সুক্লিন্নামল্পতণ্ডুলাম্|| পেযো যূষো রসো বা স্যাদকৃতঃ সৌরভাযুতঃ| কৃতৌ বাঽল্পাল্পসর্পিষ্কৌ বিলেপী বা বিধীযতে||" ইতি|

Adhikarana bRuMhaNasya kAlo mAtrA ca (20) · Śloka 20

বৃংহণো রসমদ্যাদ্যৈঃ সভক্তোঽল্পঃ| |২০|

স০-বৃংহণঃ স্নেহো রসমদ্যাদ্যৈঃ সহ শস্যতে| " রস ইত্যবিশেষোক্তৌ জ্ঞেযো মাংসভবো রসঃ|" ইতি তন্ত্রান্তরোক্ত্যা রসশব্দেন মাংসরসোঽত্র বোদ্ধব্যঃ| আদ্যশব্দেন ক্ষীরখণ্ডাদের্দ্রবরূপস্য গ্রহণম্| তথা, সহ ভক্তেন-ওদনাদিনা বর্ততে ইতি সভক্তশ্চ শস্যতে| এষ চ স্নেহোঽল্পো-হ্রসীযসীতোঽপি মাত্রাতোঽল্পঃ|

Adhikarana bRuMhaNasya viShayaH (20-21) · Śloka 21

হিতঃ স চ| বালবৃদ্ধপিপাসার্তস্নেহদ্বিণ্মদ্যশীলিষু||২০|| স্ত্রীস্নেহনিত্যমন্দাগ্নিসুখিতক্লেশভীরুষু| মৃদুকোষ্ঠাল্পদোষেষু কালে চোষ্ণে কৃশেষু চ||২১||

স০-স চ-স্নেহো, বালাদিষু হিতঃ| বালাদীনামিতরেতরদ্বন্দ্বঃ| পিপাসার্তাঃ-তৃট্পীডিতাঃ| স্নেহাদ্বিষো-যে স্বভাবেনৈব স্নেহং দ্বিষন্তি| স্ত্রীস্নেহযোর্নিত্যশব্দেন সম্বন্ধঃ, স্ত্রীনিত্যেষু স্নেহনিত্যেষু চেত্যর্থঃ| কালে চোষ্ণে-গ্রীষ্মাদৌ, কৃশেষু চ নরেষু হিতঃ|

Adhikarana bRuMhaNasyaiva prAgbhaktAdibhedena viShayaH (22) · Śloka 22

স চোপযুক্তঃ কিং করোতি ? ইত্যাহ - - - - প্রাঙ্মধ্যোত্তরভক্তোঽসাবধোমধ্যোর্ধ্ব-দেহজান্| ব্যাধীঞ্জযেদ্বলং কুর্যাদঙ্গানাং চ যথাক্রমম্||২২||

স০-প্রাক্ চ মধ্যং চোত্তরং চ প্রাঙ্মধ্যোত্তরম্| প্রাঙ্মধ্যোত্তরং ভক্তং যস্মিন্স্নেহে স এবম্| তেনাযমর্থঃ,-ভক্তস্যাদাবুপযুক্তোঽসৌ স্নেহোঽধোদেহজান্ ব্যাধীন্ জযেত্, মধ্য উপযুক্তো মধ্যদেহজান্, ভক্তস্যোপর্যুপযুক্ত ঊর্ধ্বদেহজানিতি যথাক্রমম্| তথা, অঙ্গানাং-শরীরাবযবানামধোমধ্যোর্ধ্বসংজ্ঞকানাং, বলং কুর্যাত্| ইদং চোক্তম্-"মারুতেঽভ্যধিকে সর্পিঃ সদা সলবণং হিতম্| কেবলং ত্বধিকে পিত্তে, কফে সত্র্যূষণং তথা||" ইতি|

Adhikarana acchapeyasyAnupAnam, tuvarabhallAtakasnehayoruShNodakaniShedhaH (23-24) · Śloka 24

বার্যুষ্ণমচ্ছেঽনু পিবেত্ স্নেহে তত্সুখপক্তযে| আস্যোপলেপশুদ্ধ্যৈ চ, তৌবরারুষ্করে ন তু||২৩|| জীর্ণাজীর্ণবিশঙ্কাযাং পুনরুষ্ণোদকং পিবেত্| তেনোদ্গারবিশুদ্ধিঃ স্যাত্ততশ্চ লঘুতা রুচিঃ||২৪||

স০-অচ্ছে-অচ্ছপেযে, স্নেহে-উত্তমমধ্যমহ্রস্বমাত্রোপযোজিতে, অনু-পশ্চাত্, উষ্ণং বারি পিবেত্| কিমর্থম্ ? তত্সুখপক্তযে-তস্য-স্নেহস্য, সুখপক্তিঃ-সুখেন পাকঃ, তদর্থম্| তথা, আস্যোপলেপশুদ্ধ্যৈ চ স্নেহলিপ্তস্য মুখস্য শুদ্ধিনিমিত্তং চ| তৌবরারুষ্করে ন তু-তুবরতৈলে ভল্লাতকতৈলে চাচ্ছপেযেঽপ্যুষ্ণোদকং ন পিবেত্, তযোরত্যুষ্ণবীর্যত্বাদিতি ভাবঃ| তুবরস্যাযং বিকারঃ স্নেহস্তৌবরঃ| তস্য বিকার ইত্যণ্| এবমারুষ্করে চ| চিরপীতে চ স্নেহে জীর্ণাজীর্ণং প্রতি সংশযে সতি ভূযোঽপ্যুষ্ণং জলং পিবেত্| অনুপানাপেক্ষং পুনর্গ্রহণম্, ন বীপ্সার্থম্| তেন-উষ্ণোদকপানেন, উদ্গারস্য বিশুদ্ধির্ভবেত্| ততশ্চ-জীর্ণাজীর্ণবিশঙ্কাতঃ, অধিকমঙ্গলাঘবং রুচিশ্চ স্নেহপাযিনঃ স্যাত্| সঙ্গ্রহেঽন্যদপ্যুক্তম্ (সূ. অ. ২৫)| যথা-"ততো গুরুপ্রাবরণো নিবাতে শযনে স্থিতঃ| জরণান্তং প্রতীক্ষেত তৃষ্যন্নুষ্ণাল্পবারিপঃ|| শিরোরুগ্ভ্রমনিষ্ঠীবমূর্চ্ছাসাদারুচিক্লমৈঃ| জানীযাদ্ভেষজং জীর্যজ্জীর্ণং তচ্ছান্তিলাঘবাত্|| অনুলোমানিলস্বাস্থ্যক্ষুত্তৃষ্ণোদ্গারশুদ্ধিভিঃ|" ইতি|

Adhikarana snehaprayoge bhojananiyamaH (25) · Śloka 25

মাত্রামাহ - - - - ভোজ্যোঽন্নং মাত্রযা পাস্যন্ শ্বঃ পিবন্ পীতবানপি| দ্রবোষ্ণমনভিষ্যন্দি নাতিস্নিগ্ধমসঙ্করম্||২৫||

স০-ভোজ্যো-ভোজযিতব্যো নরঃ| কিং তত্ ? অন্নম্| কিম্ভূতম্ ? দ্রবোষ্ণম্| অত্র চোভযথা সমাসঃ,-দ্রবেণমুদ্গযূষাদিনা সহোষ্ণমন্নং দ্রবোষ্ণম্, তথা কেবলং দ্রবং চ তদুষ্ণং চ দ্রবোষ্ণং বিলেপ্যাদিকং কেবলমেব, ইতি| তথা, অনভিষ্যন্দি-ন কফকৃত্| তথা, নাতিস্নিগ্ধং-ঈষত্স্নিগ্ধমিত্যর্থঃ| তথা, অসঙ্করং-অসঙ্কীর্ণম্, অপথ্যেনামিশ্রিতমিত্যর্থঃ| কঃ পুরুষঃ কিং কুর্বন্নীদৃশমন্নং মাত্রযা ভোজ্যঃ ? ইত্যাহ-শ্বঃ স্নেহং পাস্যন্-পাতুমিচ্ছন্| তথা, তস্মিন্নেব দিনে স্নেহং পিবন্| তথা, পীতবানপি যঃ স্নেহম্| অপিঃ সমুচ্চযে| ননু, "মাত্রাশী সর্বকালং স্যাত্" (হৃ. সূ. অ. ৮|১) ইতি প্রাগুক্তমেব| তত্কিমিহ পুনর্মাত্রাগ্রহণেন ? ব্রূমঃ| মাত্রাশব্দস্তত্র প্রমাণার্থঃ, ইহ ত্বল্পার্থঃ| তেনাযমর্থঃ,-যাবদন্নমস্য সম্যগ্যথাকালং পরিণমতি তাবতোঽপ্যন্নাদনেন স্বল্পং ভোজ্যমিতি|

Adhikarana snehaprayoge vihAraniyamaH (26-28) · Śloka 28

উষ্ণোদকোপচারী স্যাদ্ব্রহ্মচারী ক্ষপাশযঃ| ন বেগরোধী ব্যাযামক্রোধশোকহিমাতপান্||২৬|| প্রবাতযানযানাধ্বভাষ্যাত্যাসন সংস্থিতীঃ| নীচাত্যুচ্চোপধানাহঃ স্বপ্নধূমরজাংসি চ||২৭|| যান্যহানি পিবেত্তানি তাবন্ত্যন্যান্যপি ত্যজেত্| সর্বকর্মস্বযং প্রাযো ব্যাধিক্ষীণেষু চ ক্রমঃ||২৮||

স০-তথা, অসৌ স্নেহস্য পাতা উষ্ণোদকোপচার্যাদিগুণযুক্তঃ স্যাত্| উষ্ণোদকমুপচরিতুং সেবিতুং-শীলমস্য স এবম্| তথা, ব্রহ্মচারী-ললনাসঙ্গরহিতঃ| ক্ষপাশয ইতি "অধিকরণে শেতেঃ" ইত্যচ্| ক্ষপাশয ইত্যনেন দিবাস্বপ্নস্য রাত্রিজাগরণস্য চ নিষেধঃ| স্নেহং পিবতি যাবন্ত্যহানি, তান্যপরং তাবত্সঙ্খ্যানি স্নেহপানরহিতান্যপ্যহানি যাবত্ ব্যাযামাদীংস্ত্যজেত্| স০-সর্বকর্মসু-বমনবিরেচনাদিষু, অযং-"উষ্ণোদকোপচারী স্যাত্" ইত্যাদিকঃ, ক্রমো-বিধিরিত্যর্থঃ| যাপনাদিষ্বহঃস্বপ্নাজীর্ণবর্জ্যো নাযং বিধিরিতি প্রদর্শনার্থং প্রাযোগ্রহণম্| ব্যাধিক্ষীণেষু চ প্রাযোঽযমেব বিধিঃ| অত্রপ্যতীসারাদিষ্বহঃস্বপ্নাদীনামনুজ্ঞানাত্ প্রাযোগ্রহণম্|

Adhikarana shamanasnehe viriktavadupacAraH (29) · Śloka 29

উপচারস্তু শমনে কার্যঃ স্নেহে বিরিক্তবত্| |২৯|

স০-তুর্ব্যতিরেকে| শমনে স্নেহে তূপযুক্তে উপচারোঽভোজনাদিবিধিঃ, বিরিক্তবত্ কার্যঃ,-যথা বিরিক্তস্য পেযাদিকঃ ক্রমস্তথা তস্যাপীত্যর্থঃ|

Adhikarana acchapAnasya pAnAvadhiH, avadhyatikrame doShaH (29-30) · Śloka 30

| ত্র্যহমচ্ছং মৃদৌ কোষ্ঠে ক্রূরে সপ্তদিনং পিবেত্||২৯|| সম্যক্স্নিগ্ধোঽথবা যাবদতঃ সাত্ম্যী ভবেত্পরম্| |৩০|

স০-মৃদৌ কোষ্ঠে সতি পুরুষস্ত্রিদিনমচ্ছং স্নেহং পিবেত্| ক্রূরকোষ্ঠে সপ্তাহং পিবেত্| মধ্যকোষ্ঠস্ত্বত এব লক্ষণাদধিগম্যতে| যথা,-চত্বার্যহানি পঞ্চ বা স্নেহং পিবেদিতি| যদি চ [ মৃদুকোষ্ঠে ] ত্রযেণ সম্যক্স্নিগ্ধলক্ষণং ন স্যাত্ তদা চতুষ্পঞ্চরাত্রমপি স্নেহং পিবেত্| মধ্যকোষ্ঠস্তু ষড্রাত্রমপি পিবেদিত্যাহ-সম্যক্স্নিগ্ধোঽথবা যাবদিত্যাদি| অথবা নৈষ নিযমঃ, সম্যক্স্নিগ্ধলক্ষণোত্পত্তিরেব নিযমঃ| অতঃ সপ্তাহাদপ্যূর্ধ্বমচ্ছঃ স্নেহঃ পেযো যাবত্স্নিগ্ধলক্ষণং স্যাত্| অতঃপরং স্নেহঃ সাত্ম্যী ভবেত্| সাত্ম্যীভূতে চ স্নেহে যো দোষঃ স সঙ্গ্রহে কথিতঃ| যথা (সূ. অ. ২৫) - "সাত্ম্যীভূতো হি কুরুতে ন মলানামুদীরণম্| অতিযোগেন বা ব্যাধীন্ যথাঽম্ব্বোঘোঽতিযোজনাত্||" ইতি| যদি তু সপ্তাহেনাপি স্নিগ্ধলক্ষণং নোত্পদ্যতে তদা দিনমেকং বিশ্রম্য পুনঃ স্নেহো যোজ্য ইতি সদ্বৈদ্যাঃ|

Adhikarana samyaksnigdhalakShaNam, asnigdhalakShaNam, atisnigdhalakShaNam (30-31) · Śloka 31

| বাতানুলোম্যং দীপ্তোঽগ্নির্বর্চঃ স্নিগ্ধমসংহতম্||৩০|| স্নেহোদ্বেগঃ ক্লমঃ সম্যক্স্নিগ্ধে, রূক্ষে বিপর্যযঃ| অতিস্নিগ্ধে তু পাণ্ডুত্বং ঘ্রাণবক্ত্রগুদস্রবাঃ||৩১||

স০-সম্যক্স্নিগ্ধে পুরুষে বাতানুলোম্যাদি ক্লমান্তং লক্ষণং ভবতি| বর্চঃ-শকৃত্, স্নিগ্ধং তথাঽসংহতং-শিথিলম্| রূক্ষে-অস্নিগ্ধে, বিপর্যযো-বৈপরীত্যম্| অতিস্নিগ্ধে তু-স্নেহস্যাতিযোজনাত্, পাণ্ডুত্বাদযো ভবন্তি| স্রবশব্দস্য ঘ্রাণাদিভিঃ প্রত্যেকং সম্বন্ধঃ|

Adhikarana mithyAsnigdhalakShaNam (32-33) · Śloka 33

অমাত্রযাঽহিতো কালে মিথ্যাহারবিহারতঃ| স্নেহঃ করোতি শোফার্শস্তন্দ্রাস্তম্ভবিসংজ্ঞতাঃ||৩২|| কণ্ডূকুষ্ঠজ্বরোত্ক্লেশশূলানাহভ্রমাদিকান্| |৩৩|

স০-অমাত্রঃ পীতঃ স্নেহঃ-সর্পিরাদিঃ, শোফাদীন্ করোতি| আদিশব্দেন বলক্ষযজাড্যবাগ্গ্রহাদযঃ সঙ্গ্রহোক্তা গৃহ্যন্তে| অহিতো-যো যস্য প্রতিষিদ্ধঃ স্নেহঃ| তথা, অকালে-গ্রীষ্মাদৌ পূর্বং প্রতিষিদ্ধে| তথা, মিথ্যাহারতো-"দ্রবোষ্ণং " ইত্যাদিবিপর্যযেণ| তথা, মিথ্যাবিহারতঃ-"উষ্ণোদকোপচারী স্যাত্" ইত্যাদিবিপর্যযেণ|

Adhikarana atisnigdhamithyAsnigdhayoshcikitsitam (33-35) · Śloka 35

| ক্ষুত্তৃষ্ণোল্লেখনস্বেদরূক্ষপানান্নভেষজম্||৩৩|| তক্রারিষ্টখলোদ্দালযবশ্যামাককোদ্রবম্| পিপ্পলীত্রিফলাক্ষৌদ্রপথ্যাগোমূত্রগুগ্গুলু||৩৪|| যথাস্বং প্রতিরোগং চ স্নেহব্যাপদি সাধনম্| |৩৫|

স০-স্নেহব্যাপদি-স্নেহবিধিবিভ্রংশে সতি, ক্ষুত্তৃষ্ণাদি সাধনং-চিকিত্সা| ক্ষুত্তৃষ্ণানিগ্রহৌ ক্ষুত্তৃষ্ণাশব্দেনাত্রোক্তৌ| উল্লেখনং-বমনম্| রূক্ষশব্দস্য পানাদিভিস্ত্রিভির্যোগঃ| তক্রাণি চারিষ্টাশ্চেত্যেবং সমাসঃ| খলো-ব্যঞ্জনবিশেষঃ প্রাগুক্তঃ| উদ্দালঃ-শালিবিশেষঃ| যথাস্বং-দোষানুগুণ্যেন, প্রতিরোগং-যদ্যস্মিন্ রোগে স্বে স্বেঽধ্যায উক্তং তত্, তদপি সাধনম্|

Adhikarana virUkShaNasya samyagyogAtiyogalakShaNam (35) · Śloka 35

স্নেহব্যাপত্সাধনস্য বিরূক্ষণস্বভাবত্বাত্ প্রসঙ্গেন বিরূক্ষণস্য সম্যক্কৃতাতিকৃতলক্ষণমাহ - - - - | বিরূক্ষণে লঙ্ঘনবত্কৃতাতিকৃতলক্ষণম্||৩৫||

স০-বিরূক্ষণে সম্যগুত্পন্নে তথাঽত্যর্থোত্পন্নে চ লঙ্ঘনবত্ কৃতাতিকৃতলক্ষণং জ্ঞেযম্| কৃতং চাতিকৃতং চ কৃতাতিকৃতে, তযোর্লক্ষণং কৃতাতিকৃতলক্ষণম্| কৃতশব্দেন সম্যক্কৃতমুচ্যতে| বিরূক্ষণাযোগলক্ষণং তু স্নেহাতিযোগলক্ষণেনৈবোক্তম্| তত্র সম্যক্কৃতস্য লঙ্ঘনস্য যল্লক্ষণং বিমলেন্দ্রিযতাদি তদেব সম্যগ্বিরূক্ষণে কৃতে লক্ষণং বোধ্যম্| তথা, অতিকৃতে বিরূক্ষণেঽতিলঙ্ঘিতস্য লক্ষণং কার্শ্যাদিকং বেদ্যম্|

Adhikarana snigdhasya svedaH kAryaH, snigdhasya tryahAdvirecanam, snigdhasya dvyahAdvamanam (36-37) · Śloka 37

স্নিগ্ধদ্রবোষ্ণধন্বোত্থরসভুক্ স্বেদমাচরেত্| স্নিগ্ধস্ত্র্যহং স্থিতঃ কুর্যাদ্বিরেকং, বমনং পুনঃ||৩৬|| একাহং দিনমন্যচ্চ কফমুত্ক্লেশ্য তত্করৈঃ| |৩৭|

স০-স্নিগ্ধশ্চাসৌ দ্রবোষ্ণধন্বোত্থরসশ্চ, তং ভুঙ্ক্তে যঃ স স্নিগ্ধদ্রবোষ্ণধন্বোত্থরসভুক্| ধন্বোত্থরসো-জাঙ্গলদেশমাংসসমুদ্ভূতো রসঃ, তং ভুঞ্জানঃ স্বেদমাচরেত্| মাংসরসস্য স্বভাবত এব স্নিগ্ধদ্রবত্বাত্ স্নিগ্ধদ্রবগ্রহণমধিকযোগাযেতি বেদ্যম্| উষ্ণং-উভযথা বীর্যতোঽগ্নিসংযোগাচ্চ| এবম্ভূতঃ পুরুষঃ পূর্বং স্নিগ্ধোঽনন্তরং স্নিগ্ধদ্রবোষ্ণধন্বোত্থরসভুক্ স্বেদমাচরন্ দিনত্রযং স্থিতঃ সন্ বিরেকং কুর্যাত্| বমনং পুনরিতি| যদা তু স্নেহাদনন্তরং বমনমেবোপযুঙ্ক্তে তদৈকাহমনেনৈব প্রকারেণ স্নিগ্ধদ্রবোষ্ণধন্বোত্থরসভুক্ স্বেদমাচরন্ স্থিতোঽন্যচ্চ দিনং-দ্বিতীযমহঃ, কফমুত্ক্লেশ্য-স্থানাত্ প্রচ্যাব্য, স্থিতো বমনং কুর্যাত্| কৈরুত্ক্লেশ্য ? তত্করৈঃ,-কফকরণহেতুভির্মাষক্ষীরমত্স্যগুডাদিভিঃ| তত্করৈরিতি কৃঞো হেত্বাদিনা হেতৌ টঃ|

Adhikarana mAMsalAdInAM rUkShaNapUrvakaM snehanam (37-38) · Śloka 38

| মাংসলা মেদুরা ভূরিশ্লেষ্মাণো বিষমাগ্নযঃ||৩৭|| স্নেহোচিতাশ্চ যে স্নেহ্যাস্তান্ পূর্বং রূক্ষযেত্ততঃ| সংস্নেহ্য শোধযেদেবং স্নেহব্যাপন্ন জাযতে||৩৮||

স০-মাংসলত্বাদিযুক্তাঃ পুরুষা যে শোধ্যত্বেন স্নেহযিতুমভীষ্টাঃ, তান্ পূর্বং-প্রথমং, রূক্ষযেত্| ততো-রূক্ষযিত্বাঽনন্তরং, সংস্নেহ্য শোধযেত্| কিমেবং স্যাত্ ? ইত্যাহ-এবং স্নেহব্যাপন্ন জাযতে| মাংসলাঃ-উপচিতমাংসাঃ| মেদুরাঃ-মেদস্বিনঃ|

Adhikarana malapreraNam (39) · Śloka 39

অলং মলানীরযিতুং স্নেহশ্চাসাত্ম্যতাং গতঃ| |৩৯|

স০-ন কেবলং স্নেহব্যাপদেবং ন স্যাত্| যাবত্ স্নেহোঽসাত্ম্যতাং গতঃ সন্ মলান্-বাতাদীন্ পুরীষাদীংশ্চ, ঈরযিতুং-প্রেরযিতুং, অলং-পর্যাপ্তঃ|

Adhikarana bAlavRuddhAdiShu sadyaH snehanam (39-40) · Śloka 40

| বালবৃদ্ধাদিষু স্নেহপরিহারাসহিষ্ণুষু||৩৯|| যোগানিমাননুদ্বেগান্ সদ্যঃস্নেহান্ প্রযোজযেত্| |৪০|

স-বালাদিষু তথা যঃ স্নেহবিষযে পরিহারঃ-শীতোদকাদিঃ, তমসহিষ্ণুষু-অক্ষমেষু, সদ্যঃস্নেহাখ্যাননুদ্বেগান্-অনুদ্বেজকান্, এতা(ইমা) ন্-বক্ষ্যমাণান্, যোগান্ প্রযোজযেত্|

Adhikarana sadyaH snehanA aShTau yogAH (40-42) · Śloka 42

কাংস্তান্ ? ইত্যাহ - - - - | প্রাজ্যমাংসরসাস্তেষু, পেযা বা স্নেহভর্জিতা||৪০|| তিলচূর্ণশ্চ সস্নেহফাণিতঃ, কৃশরা তথা| ক্ষীরপেযা ঘৃতাঢ্যোষ্ণা, দধ্নো বা সগুডঃ সরঃ||৪১|| পেযা চ পঞ্চপ্রসৃতা স্নেহৈস্তণ্ডুলপঞ্চমৈঃ| সপ্তৈতে স্নেহনাঃ সদ্যঃ, স্নেহাশ্চ লবণোল্বণাঃ||৪২||

স০-তেষু-বালাদিষু, প্রাজ্যমাংসরসাঃ-প্রভূতমাংসানি নিষ্ক্বাথ্য তদ্রসাঃ| তথা, স্নেহভর্জিতা পেযা| তথা, তিলচূর্ণঃ-পললাখ্যঃ, সস্নেহফাণিতঃ-[ স্নেহেন- ] সর্পিরাদিনা যুক্তঃ, ফাণিতেন-ক্ষৌদ্রগুডবিকারবিশেষেণ চ যুক্তঃ| তথা, কৃশরা তথেতি স্নেহফাণিতযুক্তেত্যর্থঃ| তথা, ক্ষীরপেযা-ক্ষৈরেযী সর্পিষ্মত্যুষ্ণা চ| [ তথা, ] দধিসরো বা সগুডঃ| [ তথা, ] পেযা চ পঞ্চপ্রসৃতা, 'দ্বে পলে-প্রসৃতং বিদুঃ' পঞ্চ প্রসৃতানি যস্যাং সা পঞ্চপ্রসৃতা| কেষাং পুনস্তানি পঞ্চ প্রসৃতানি ? ইতি ব্যাচষ্টে-স্নেহৈস্তণ্ডুলপঞ্চমৈরিতি| সর্পিস্তৈলং বসা মজ্জেতি চতুর্ণাং স্নেহানাং চত্বারি প্রসৃতানি তণ্ডুলাশ্চ প্রসৃতমেকমিত্যর্থঃ| এতে সপ্ত পূর্বোক্তাঃ সদ্যঃ-শীঘ্রং স্নেহনাঃ,- ত্রিচতুরৈরহোভির্বিনাঽপি স্নেহনাঃ, নিষ্পরিহারাশ্চ| ন কেবলমেত এব সদ্যঃস্নেহনা ইত্যাহ-স্নেহাশ্চ লবণোল্বণা ইতি| স্নেহাঃ-সর্পিরাদযোঽপক্বা এব| কিং বিশিষ্টাঃ ? লবণোল্বণাঃ-লবণাঢ্যাঃ, সদ্যঃস্নেহনা ইত্যর্থঃ|

Adhikarana lavaNasaMyogAt kathaM sadyaH snehanatvam (43) · Śloka 43

কস্মাল্লবণসংযোগাত্ স্নেহা অপক্বা অপি সদ্যঃস্নেহনাঃ ? ইত্যাহ - - - - তদ্ধ্যভিষ্যন্দ্যরূক্ষং চ সূক্ষ্মমুষ্ণং ব্যবাযি চ| |৪৩|

স০-যস্মাল্লবণমভিষ্যন্দি-স্রোতসাং স্রাবকং, অরূক্ষত্বাদিগুণযুক্তং চ| সূক্ষ্মং-সূক্ষ্মস্রোতোগামি| 'ব্যবাযি-দেহমখিলং ব্যাপ্য পাকায কল্পতে'|

Adhikarana kuShThAdiShu snehArthaM guDAdiniShedhaH (43-44) · Śloka 44

| গুডানূপামিষক্ষীরতিলমাষসুরাদধি||৪৩|| কুষ্ঠশোফপ্রমেহেষু স্নেহার্থং ন প্রকল্পযেত্| |৪৪|

স০-কুষ্ঠাদিষু স্নেহযোগ্যত্বে সতি গুডাদি স্নেহনার্থং ন প্রকল্পযেত্-ন যোজযেত্|

Adhikarana teShAM snehanaprakAraH (44-45) · Śloka 45

তর্হি তে কথং স্নেহ্যাঃ ? ইত্যাহ - - - - | ত্রিফলাপিপ্পলীপথ্যাগুগ্গুল্বাদিবিপাচিতান্||৪৪|| স্নেহান্ যথাস্বমেতেষাং যোজযেদবিকারিণঃ| |৪৫|

স০-এতেষাং-কুষ্ঠাদীনাম্, ত্রিফলাদিভির্বিপাচিতান্-সাধিতান্, অবিকারিণঃ-অবিকারকান্, স্নেহান্ যোজযেত্| যথাস্বং-যথাযোগ্যম্| কুষ্ঠাদীনাং সম্বন্ধী যো বিকারস্তদ্বতাম্, তেন কুষ্ঠিনাং শোফিনাং মেহিনামিত্যর্থোঽবতিষ্ঠতে|

Adhikarana AmayakShINAnAM snehanaprakAraH (45) · Śloka 45

| ক্ষীণানাং ত্বামযৈরগ্নিদেহসন্ধুক্ষণক্ষমান্||৪৫||

স০-আমযৈঃ-ব্যাধিভিঃ, ক্ষীণানাং পুনঃ পুংসামগ্নিদেহসন্ধুক্ষণক্ষমান্ স্নেহান্ যোজযেত্| অগ্নিশ্চ দেহশ্চাগ্নিদেহৌ, সন্ধুক্ষণাশ্চ ক্ষমাশ্চ সন্ধুক্ষণক্ষমাঃ, তান্| যথাসঙ্খ্যেনাত্র সম্বন্ধঃ| অগ্নেঃ সন্ধুক্ষণাঃ-উদ্দীপকাঃ, দেহস্য ক্ষমাঃ-পুষ্ট্যাবহাঃ| অত্র চাযং ভাবঃ,-কিল ব্যাধিভিঃ ক্ষীণানাং বহ্নিরপি ক্ষীণো ভবতি| অতস্তেষাং ন কেবলং যে পুষ্ট্যাবহাঃ [ তে উপযোজ্যাঃ| কুতঃ ? তে ] বহ্নিমান্দ্যমাবহন্তি| অথবা বহ্নিসন্ধুক্ষণা ন পুষ্ট্যাবহাঃ| ন তে স্নেহা উপযোক্তুং যুক্তাঃ| কিং তর্হি ? উভযকারিণ এব যোক্তুং যুক্তা ইতি|

Adhikarana snehashIlanasya phalam (16) · Śloka 16

দীপ্তান্তরাগ্নিঃ পরিশুদ্ধকোষ্ঠঃ প্রত্যগ্রধাতুর্বলবর্ণযুক্তঃ| দৃঢেন্দ্রিযো মন্দজরঃ শতাযুঃ স্নেহোপসেবী পুরুষঃ প্রদিষ্টঃ||৪৬|| ইতি শ্রী বৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে স্নেহবিধির্নাম ষোডশোঽধ্যাযঃ||১৬||

স০-যঃ পুমানাভীক্ষ্ণ্যেন স্নেহমুপসেবতে, স দীপ্তান্তরাগ্নিত্বাদিগুণযুক্তো ভবতীতি প্রদিষ্টঃ| সদ্বৈদ্যৈরিতি শেষঃ| উপজাতির্বৃত্তম্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে স্নেহবিধ্যধ্যাযঃ ষোডশঃ সমাপ্তঃ|| ১৬||