15. śōdhanādigaṇasaṅgrahōdhyāyaḥ

Adhikarana adhyAyopakramaH · Śloka

দ্বিবিধোপক্রমণীযাধ্যাযাদনন্তরং শোধনাদিগণসঙ্হ্গ্রহাধ্যাযারম্ভঃ| যতো দোষোপক্রমণীযে দ্বিবিধোপক্রমণীযে চ নানাবিধা উপক্রমা অভিহিতাঃ | তে চ মদনমধুকাদিভেষজাশ্রযাঃ, অতস্তানি শোধনাদ্যুপযোগীনি সর্বোপক্রমাধিকারীণি সঞ্জিঘৃক্ষুরধ্যাযমিমমারেভে-

Adhikarana SodhanAdigaNasa~ggrahodhyAyaH (2) · Śloka 2

যতো দোষোপক্রমণীযে দ্বিবিধোপক্রমণীযে চ নানাবিধা উপক্রমা অভিহিতাঃ, তে চ মদনমধুকাদিভেষজাশ্রযাঃ, অতস্তানি শোধনাদ্যুপযোগীনি সর্বোপক্রমাধিকারীণি সঞ্জিঘৃক্ষুরধ্যাযমিমমারেভে - - - - অথাতঃশোধনাদিগণসঙ্গ্রহমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| গদ্যসূত্রে||২||

স০-শোধনং-শোধনরূপো দ্রব্যগণঃ, আদির্যেষাং ত এবম্| আদি শব্দেন বাতহরাদিগণপরিগ্রহঃ| তেষাং সঙ্গ্রহো যস্মিন্নধ্যাযে স শোধনাদিগণসঙ্গ্রহঃ, তং শোধনাদিগণসঙ্গ্রহসংজ্ঞমধ্যাযং ব্যাখ্যাস্যামঃ| গণঃ-সমূহঃ| বিক্ষিপ্তানাং পদার্থানামেকত্র রাশীকরণং-সঙ্গ্রহঃ| তত্র শোধনগণস্য সর্বদোষবিজযিত্বেন প্রাধান্যাত্ পূর্বমুপন্যাসঃ|

Adhikarana vamanagaNaH (1) · Śloka 1

শোধনং চতুর্বিধম্,- বমনবিরেচনাস্থাপনশিরোবিরেচনদ্রব্যভেদেন| তত্রাপি বমনস্যৌষধগণং তাবত্পূর্বং বক্তি - - - - মদনমধুকলম্বানিম্ববিম্বীবিশালা- ত্রপুসকুটজমূর্বাদেবদালীকৃমিঘ্নম্| বিদুলদহনচিত্রাঃ কোশবত্যৌ করঞ্জঃ কণলবণবচৈলাসর্ষপাশ্র্ছর্দনানি||১||

স০-মদনং-রাঠঃ| মধুকং-মধুযষ্টিকা| লম্বা-তুম্বী দীর্ঘতিক্তাঽলাবুসংজ্ঞা| নিম্বঃ-পিচমন্দঃ| বিম্বী-গোহ্লা, ওষ্ঠোপমফলসংজ্ঞা| বিশালা-ইন্দ্রবারুণী| ত্রপুসং-তিক্তত্রপুসং ব্রেদ্যম্, তস্য বমনযোগ্যত্বাত্| কুটজং-বত্সকম্| মূর্বা-পীলুপর্ণী| দেবদালী-গরাগরী| কৃমিঘ্নং-বিডঙ্গম্| বিদুলো-জলবেতসঃ| দহনঃ-চিত্রকঃ| চিত্রা-মূষিকপর্ণী| কোশবত্যৌ-ঘণ্টালিকে, একা ধামার্গবো দ্বিতীযা রাজকোশাতকী| করঞ্জো-নক্তমালঃ| কণা-কৃষ্ণা| লবণং-সৈন্ধবম্| বচা-গোলোমী| এলা-ত্রুটীঃ| সর্ষপো-রক্ষোঘ্নঃ| এতানি মদনাদীনি ছর্দনানি-ছর্দিকরাণি| "বসুমুনিবিরতিশ্চেন্মালিনী নৌ মযোঃ যঃ|" অত্র চ মদনবিশালাত্রপুসকুটজবিডঙ্গৈলাসর্ষপাণাং ফলানি বমনক্রন্তি| মধুকবিদুলচিত্রকদন্তীবচানাং তু মূলানি| রোধ্রসুবর্ণক্ষীরীকম্পিল্লানাং ত্বচঃ| শেষাণাং ফলপত্রপুষ্পাণি বেদিতব্যানীতি|

Adhikarana virecanagaNaH (2) · Śloka 2

নিকুম্ভকুম্ভত্রিফলাগবাক্ষী- স্রুক্শঙ্খিনীনীলিনিতিল্বকানি| শম্যাককম্পিল্লকহেমদুগ্ধা দুগ্ধং চ মূত্রং চ বিরেচনানি||২||

স০-নিকুম্ভো-দন্তী| কুম্ভঃ-ত্রিবৃত্| ত্রিফলা-বরা| গবাক্ষী-বিশালা, দ্বিতীযেন্দ্রবারুণী| স্রুক্-গুডা| শঙ্খিনী-যবতিক্তা| নীলিনী-নীলপুষ্পা, ভারবাহীসংজ্ঞা| তিল্বকো-রোধ্রঃ| শম্যাকঃ-কর্ণিকারঃ| কম্পিল্লকো-রঞ্জনকঃ| হেমদুগ্ধা-কনকক্ষীরী| দুগ্ধং-ক্ষীরম্| মূত্রং-প্রসিদ্ধম্| নিকুম্ভাদীন্যেতানি বিরেচনানি| উপজাতির্বৃত্তম্|

Adhikarana nirUhagaNaH (3) · Śloka 3

মদনকুটজকুষ্ঠদেবদালী- মধুকবচাদশমূলদারুরাস্নাঃ| যবমিশিকৃতবেধনং কুলত্থা মধু লবণং ত্রিবৃতা নিরূহণানি||৩||

স০-মদনং-মদনফলম্| কুটজং-বত্সকত্বক্| কুষ্ঠং-গদনাম| দারু-দেবদারুঃ| রাস্না-যুক্তরসা| মিশিঃ-শতপুষ্পা| কৃতবেধনং-ধামার্গবঃ| কুলত্থাঃ-প্রসিদ্ধাঃ| এতানি নিরূহণানি-নিরূহণসাধনানি| "ভবতি জগতি নৌ ততঃ পরৌ র্যৌ নজসহিতৈর্জরগৈশ্চ পুষ্পিতাগ্রা|"

Adhikarana nAvanagaNaH (4) · Śloka 4

বেল্লাপামার্গব্যোষদার্বীসুরালা বীজং শৈরীষং বার্হতং শৈগ্রবং চ| সারো মাধূকঃ সৈন্ধবং তার্ক্ষ্যশৈলং ত্রুট্যৌ পৃথ্বীকা শোধযন্ত্যুত্তমাঙ্গম্||৪||

স০-বেল্লং-বিডঙ্গম্| অপামার্গঃ-প্রত্যুক্পুষ্পী| ব্যোষং-ত্রিকটুকম্| দার্বী-পীতদ্রুঃ| সুরালা-শ্রেষ্ঠসর্জরসঃ| শৈরীশং-শিরীষবীজম্| বার্হতং-বৃহতীবীজম্| শৈগ্রবং-শিগ্রুবীজম্| সারো মাধূকো-মধূকপুষ্পসারঃ| সৈন্ধবং-সিন্ধূত্থম্| তার্ক্ষ্যশৈলং-শুষ্করসাঞ্জনম্| ত্রুট্যৌ-সূক্ষ্মৈলা স্থূলৈলা চ| পৃথ্বীকা-হিঙ্গুপত্রী| এতান্যুত্তমাঙ্গং শোধযন্তি,- মূর্ধবিরেচনানীত্যর্থঃ| "মৌ যৌ পঞ্চাশ্বৈর্বৈশ্বদেবীতি নাম্না|"

Adhikarana vAtaghnagaNaH (5) · Śloka 5

ভদ্রদারু নতং কুষ্ঠং দশমূলং বলাদ্বযম্| বাযুং বীরতরাদিশ্চ বিদার্যাদিশ্চ নাশযেত্||৫||

স০-ভদ্রাদারু-কিলিমম্| নতং-তগরম্| কুষ্ঠং-গদঃ| দশমূলং=দ্বিপঞ্চমূলম্| বলাদ্বযং-বলাঽতিবলা চ| এতানি ভদ্রদার্বাদীনি, চ-অপরং, বক্ষ্যমাণো বীরতরাদির্বিদার্যাদিশ্চ গণো বাযুং নাশযতি|

Adhikarana pittaghnagaNaH (6) · Śloka 6

দূর্বাঽনন্তা নিম্ববাসাঽঽত্মগুপ্তা গুন্দ্রাঽভীরুঃ শীতপাকী প্রিযঙ্গুঃ| ন্যগ্রোধাদিঃ পদ্মকাদিঃ স্থিরে দ্বে পদ্মং বন্যং সারিবাদিশ্চ পিত্তম্||৬||

স০-দূর্বা-শাদ্বলম্| অনন্তা-যবাসকঃ| নিম্বঃ-প্রসিদ্ধঃ| বাসা-আটরূষকঃ| আত্মগুপ্তা-কপিকচ্ছূঃ| গুন্দ্রা-পদএরকঃ| অভীরুঃ-শতাবরী| শীতপাকী-শিখণ্ডিকা কাকণন্তিকাভেদঃ| প্রিযঙ্গুঃ-শ্যামা| এষ দূর্বাদির্গণঃ, তথা বক্ষ্যমাণো ন্যগ্রোধাদিঃ পদ্মকাদিশ্চ গণঃ, তথা শালিপর্ণীপৃশ্নিপর্ণ্যৌ, তথা পদ্মং-জলজম্, বন্যং-কুটন্নটম্, তথা সাবাদিশ্চ গণঃ, এতে পিত্তং নাশযন্তি| "ম্তৌ তৌ গৌ চেচ্ছালিনী বেদলোকেঃ|"

Adhikarana shleShmaghnagaNaH (7) · Śloka 7

আরগ্বধাদিরর্কাদির্মুষ্ককাদ্যোঽসনাদিকঃ| সুরসাদিঃ সমুস্তাদির্বত্সকাদির্বলাসজিত্||৭||

স০-আরগ্বধাদ্যাদযো গণাঃ সপ্তৈতে বলাসং-শ্লেষ্মণং জযন্তি|

Adhikarana jIvanIyAkhyo gaNaH (8) · Śloka 8

জীবন্তি কাকোল্যৌ মেদে দ্বে মুদ্গমাষপর্ণ্যৌ চ| ৠষভকজীবকমধুকং চেতি গণো জীবনীযাখ্যঃ||৮||

স০-জীবন্ত্যাদির্গণো জীবনীযসংজ্ঞঃ| উদাহরণমাত্রং চেদম্| ধীমতা স্বাদুশীতস্নিগ্ধাদীন্ জীবন্ত্যাদিষু সাধারণগুণানালোচ্য ক্ষীরেক্ষুদ্রাক্ষাক্ষোডবিদারিকন্দাদিষু (ষ্বপি) তদ্গুণেষু জীবনীযাদিত্বমবধারযিতুং যুক্তমিতি| জীবন্তী-জীববর্দ্ধনী| কাকোল্যৌ দ্বে-একা কাকোলী কেবডীসংজ্ঞা, অন্যা ক্ষীরকাকোলী পযস্বিনীসংজ্ঞা| দ্বে মেদে-একা মেদা মণিচ্ছিদ্রাসংজ্ঞা, অন্যা মহামেদা বৃক্ষরুহাসংজ্ঞা| মুদ্গপর্ণ্যাদীনাং নামানি প্রাগুক্তানীতি| "হ্যন্তান্তরাদিগুরুভিঃ সোদধিলৈঃ সপ্তভির্গণৈর্গুরুণা| আর্যার্ধে নাত্রাযুজি জঃ ষষ্ঠোঽযং নলঘুকৌ বা|"

Adhikarana vidAryAdigaNaH (9-10) · Śloka 10

বিদারিপঞ্চাঙ্গুলবৃশ্চিকালী- বৃশ্চীবদেবাহ্বযশূর্পপর্ণ্যঃ| কণ্ডূকরী জীবনহ্রস্বসংজ্ঞে দ্বে পঞ্চকে গোপসুতা ত্রিপাদী||৯|| বিদার্যাদিরযং হৃদ্যো ব্রূংহণো বাতপিত্তহা| শোষগুল্মাঙ্গমর্দোর্ধ্বশ্বাসকাসহরো গণঃ||১০||

স০-বিদারী-বৃষ্যকন্দা| পঞ্চাঙ্গুলঃ-এরণ্ডঃ| বৃশ্চিকালী-উষ্ট্রধূমকা মেষশ্রৃঙ্গী বা| বৃশ্চীবঃ-ক্ষুদ্রবর্ষাভূঃ| দেবাহ্বযঃ-সুরদারু| [দেবাদ্বযেতি পাঠে একা সহদেবা দ্বিতীযা বিশ্বদেবা চেতি দেবাদ্বযম্| ] শূর্পর্ণ্যৌ-মুদ্গপর্ণী মাষপর্ণী চ| কণ্ডূকরী-কপিকচ্ছূঃ| জীবনেত্যাদি| "অভীরুবীরাজীবন্তীজীবকর্ষভকৈঃ স্মৃতম্| জীবনাখ্যম্" (হৃ. সূ. অ. ৬|১৭০) ইতি জীবনসংজ্ঞং পঞ্চমূলম্| বৃহতী কণ্টকারিকা শালিপর্ণী পৃশ্নিপর্ণী গোক্ষুরকমিতি হ্রস্বসংজ্ঞং পঞ্চমূলম্| গোপসুতা-সারিবা| ত্রিপাদি-হংসপাদী কীটমারিকাখ্যা| এষ বিদার্যাদিগণো বৃংহণো বাতপিত্তঘ্নঃ শোষাদিহরশ্চ| উপজাতির্বৃত্তম্|

Adhikarana sArivAdigaNaH (11) · Śloka 11

সারিবোশীরকাশ্মর্যমধূকশিশিরদ্বযম্| যষ্টী পরূষকং হন্তি দাহপিত্তাস্রতৃড্জ্বরান্||১১||

স০-সারিবা-কৃষ্ণবল্লী| উশীরং-বীরতরু (রম্)| কাশ্মর্যঃ-সর্বতোভদ্রা| মধূকো-গুডপুষ্পকঃ| শিশিরদ্বযং-একং সিতচন্দনং মলযজসংজ্ঞমন্যদ্রক্তচন্দনসংজ্ঞম্| যষ্টী-ক্লীতকসংজ্ঞম্| পরূষকং-মৃদুফলম্| সারিবাদিরযং দাহাদীন্ হন্তি|

Adhikarana padmakAdigaNaH (12) · Śloka 12

পদ্মকপুণ্ড্রৌ বৃদ্ধিতুগর্দ্য্ধঃ শৃঙ্গ্যমৃতা দশ জীবনসংজ্ঞাঃ| স্তন্যকরা ঘ্নন্তীরণপিত্তং প্রীণনজীবনবৃংহণবৃষ্যাঃ||১২||

স০-পদ্মকং-হেমপদ্মম্| পুণ্ড্রঃ-প্রপৌণ্ডরীকম্| বৃদ্ধিঃ-মহাশ্রাবণী| তুগা-তুগাক্ষীরী| ঋদ্ধিঃ-শ্রাবণী| শ্রৃঙ্গী-কুলীরশ্রৃঙ্গী| অমৃতা-ছিন্নরুহা| দশ জীবনসংজ্ঞাঃ-জীবন্ত্যাদিগণোক্তাঃ| এতে পদ্মকাদযঃ স্তন্যহেতবঃ, তথা বাতপিত্তং ঘ্নন্তি, তথা প্রীণনাদিগুণযুক্তাঃ| "অষ্টাভ্যো ভদ্গৌ যোজ্যাবুপচিত্রা|"

Adhikarana parUShakAdigaNaH (13) · Śloka 13

পরূষকং বরা দ্রাক্ষা কট্ফলং কতকাত্ ফলম্| রাজাহ্বং দাডিমং শাকং তৃণ্মূত্রামযবাতজিত্||১৩||

স০-পুরূষকো-মৃদুফলো ধন্বনচ্ছদঃ| বরা-শ্রেষ্ঠা| দ্রাক্ষা-মধুফলা| কট্ফলং-রোহিণী সোমবল্কঃ| কতকফলং-বারিপ্রসাদনম্| রাজাহ্বং-কড়্ণিকারম্| দাডিমং-শুকেষ্টম্| শাকং-খরচ্ছদবৃক্ষবিশেষঃ| পরূষকাদিরেষ তৃডামযাদিজিত্|

Adhikarana a~jjanAdigaNaH (14) · Śloka 14

অঞ্জনং ফলিনী মাংসী পদ্মোত্পলরসাঞ্জনম্| সৈলামধুকনাগাহ্বং বিষান্তর্দাহপিত্তনুত্||১৪||

স০-অঞ্জনং দ্বিধা,-একং স্রোতোঞ্জনং যামুনসংজ্ঞমপরং সৌবীরং নেত্রভূষণাখ্যম্| ফলিনী-প্রিযঙ্গুঃ| মাংসী-কৃষ্ণজটা| পদ্মং-পুষ্করম্| উত্পলং-শশিপ্রিযম্| রসাঞ্জনং-তার্ক্ষ্যশৈলম্| এলা-বহুলা| মধুকং-মধুযষ্টী| নাগাহ্বং-নাগকেসরম্| এষোঽঞ্জনাদির্বিষাদিজিত্|

Adhikarana paTolAdigaNaH (15) · Śloka 15

পটোলকটুরোহিণীচন্দনং মধুস্রবগুডূচিপাঠান্বিতম্| নিহন্তি কফপিত্তকুষ্ঠজ্বরান্ বিষং বমিমরোচকং কামলাম্||১৫||

স০-পটোলং-পাণ্ডুফলম্| কটুরোহিণী-কটুকা| চন্দনং-গন্ধসারম্| মধুস্রবো-মুরঙ্গী| গুডূচী-ছিন্নরুহা| পাঠা-অম্বষ্ঠা| এতৈর্দ্রব্যৈর্যুক্তমেতত্ পটোলাদিকং কফাদীন্ নিহন্তি| "মাত্রাসমকং নবমো ল্গান্তম্ (মো লগোন্ত্যঃ) " (বৃত্তরত্নাকরে অ. ২|৩২)

Adhikarana guDUcyAdigaNaH (16) · Śloka 16

গুডূচীপদ্মকারিষ্টধানকারক্তচন্দনম্| পিত্তশ্লেষ্মজ্বরচ্ছর্দিদাহতৃষ্ণাঘ্নমগ্নিকৃত্||১৬||

স০-গুডূচী-ছিন্নোদ্ভবা| পদ্মকো-মরুদ্ভবঃ| অরিষ্টো-নিম্বঃ| ধানকা-ধান্যকম্| রক্তচন্দনং-রক্তকাষ্ঠম্| এষ গুডূচ্যাদিঃ পিত্তাদীন্ হন্তি, [অগ্নিকরশ্চ ]|

Adhikarana AragvadhAdigaNaH (17-18) · Śloka 18

আরগ্বধেন্দ্রযবপাটলিকাকতিক্তা- নিম্বামৃতামধুরসাস্রুববৃক্ষপাঠাঃ| ভূনিম্বসৈর্যক্রপতোলকরঞ্জযুগ্ম- সপ্তচ্ছদাগ্নিসুষবীফলবাণঘোণ্টাঃ||১৭|| আরগ্বধাদির্জযতি ছর্দিকুষ্ঠবিষজ্বরান্| কফং কণ্ডূং প্রমেহং চ দুষ্টব্রণবিশোধনঃ||১৮||

স০-আরগ্বধঃ-শম্যাকঃ| ইন্দ্রযবাঃ-কলিঙ্গকাঃ| পাটলিঃ-বসন্তদূতী| কাকপিক্তা-শার্ঙ্গেষ্টা| নিম্বঃ-পারিভদ্রকঃ| অমৃতা-গুডূচী| মধুরসা-মূর্বা| স্রুববৃক্ষো-বিকঙ্কতঃ, [কণ্টকীবৃক্ষঃ কণ্টকারিকেতি প্রসিদ্ধঃ ]| পাঠা-অম্বষ্ঠা| ভূনিম্বঃ-কৈরাতঃ| সৈর্যকঃ-সহচরঃ| পটোলং-কর্কশচ্ছদম্| করঞ্জযুগ্মং-একঃ পূতিককরঞ্জশ্চিরিবিল্বাখ্যোঽপরো নক্তমালাখ্যঃ| সপ্তচ্ছদঃ-অযুগ্মচ্ছদঃ| অগ্নিঃ-চিত্রকঃ| সুষবী-কারবী, পানীযবল্লীসংজ্ঞা| ফলং-মদনফলম্| বাণঃ-সহচরঃ| ঘোণ্টা-পূগবিশেষঃ| অযমারগ্বধাদিশ্চ্ছর্দ্যাদীন্নিহন্তি| [মেদোদরান্ বিশোধযতি-পরাকরোতি| ] বসন্ততিলকাবৃত্তম্|

Adhikarana asanAdigaNaH (19-20) · Śloka 20

অসনতিনিশভূর্জশ্বেতবাহপ্রকীর্যাঃ খদিরকদরভণ্ডীশিংশিপামেষশৃঙ্গ্যঃ| ত্রিহিমতলপলাশা জোঙ্গকঃ শাকশালৌ ক্রমুকধবকলিঙ্গচ্ছাপকর্ণাশ্বকর্ণাঃ||১৯|| অসনাদির্বিজযতে শ্বিত্রকুষ্ঠকফক্রিমীন্| পাণ্ডুরোগং প্রমেহং চ মেদোদোষনিবর্হণঃ||২০||

স০-অসনঃ-পীতশালাখ্যঃ| তিনিশঃ-স্যন্দনসংজ্ঞঃ| ভূর্জো-বহুপুটাখ্যঃ| শ্বেতবাহঃ-অর্জুনঃ| প্রকীর্যঃ-পূতিকরঞ্জঃ| খদিরো-গাযত্রী| কদরঃ-খদিরাকৃতিঃ শ্বেতসারঃ| ভণ্ডী-শিরীষঃ| শিংশিপা-মণ্ডলপত্রিকা| মেষশৃঙ্গী-অজশৃঙ্গী| ত্রিহিমং-চন্দনত্রযম্, মলযজরক্তচন্দনদারুহরিদ্রাভেদেন| তলঃ-তালঃ| পলাশঃ-কিংশুকঃ| জোঙ্গকঃ-অগুরুসংজ্ঞঃ| শাকং-বরদারু| শালো-রসনির্যাসাখ্যঃ| ক্রমুকঃ-পূগম্| ধবঃ-শকটাখ্যঃ| কলিঙ্গাঃ-শক্রযবাঃ| ছাগকর্ণো-বস্তকর্ণঃ| অশ্বকর্ণঃ-কুশিকঃ| অযমসনাদিঃ শ্বিত্রাদীন্ বিজযতে-শমযতি| বিজযত ইতি "বিপরাভ্যাং জেঃ" ইত্যাত্মনেপদম্| তথা, মেদোদোষং নিবর্হতি-পরাকরোতি| মালিনীবৃত্তম্|

Adhikarana varUNAdigaNaH (49)) · Śloka 22

বরুণসৈর্যকযুগ্মশতাবরী- দহনমোরটবিল্ববিষাণিকাঃ| দ্বিবৃহতীদ্বিকরঞ্জজযাদ্বযং বহলপল্লবদর্ভরুজাকরাঃ||২১|| বরুণাদিঃ কফং মেদো মন্দাগ্নিত্বং নিযচ্ছতি| আঢ্যবাতং শিরঃশূলং গুল্মং চান্তঃ সবিদ্রধিম্||২২||

স০-বরুণঃ-তমালঃ| সৈর্যকযুগ্মং-সহচরদ্বযম্, একো রক্তপুষ্পঃ কুরবকাখ্যোঽন্যঃ পীতপুষ্পঃ কুরণ্টকাখ্যঃ| শতাবরী-বরী| দহনো-বহ্নিঃ| মোরটো-মূর্বা| বিল্বঃ-পূতিবাতঃ| বিষাণিকা-অজশৃঙ্গী| দ্বিবৃহত্যৌ-কণ্টকারিকামহোটিকাখ্যে| দ্বিকরঞ্জঃ-করঞ্জদ্বযং প্রাগুক্তম্| তর্কারী হরীতকী চেতি-জযাদ্বযম্| বহলপল্লবঃ-শোভাঞ্জনঃ| দর্ভঃ-কুশঃ| রুজাকরো-হিন্তালঃ| বরুণাদিরযং কফাদীন্ হন্তি| "দ্রুতবিলম্বিতমাহনভৌ ভরৌ" (বৃত্তরত্নাকরে অ. ৩|৪৯)|

Adhikarana UShakAdigaNaH (23) · Śloka 23

ঊষকস্তুত্থকং হিঙ্গু কাসীসদ্বযসৈন্ধবম্| সশিলাজতু কৃচ্ছ্রাশ্মগুল্মমেদঃকফাপহম্||২৩||

স০-ঊষকো-বৃষকঃ, কল্লর ইতি প্রসিদ্ধঃ| তুত্থকং-খর্পরং কিটিহাপরসংজ্ঞম্| হিঙ্গু-রামঠম্| কাসীসদ্বযং-একং পাংশুধাতুসংজ্ঞমপরং পুষ্পকাসীসাখ্যম্| সৈন্ধবং-মাণিমন্থম্| শিলাজতু-শিলাজম্| ঊষকাদিরযং মূত্রকৃচ্ছ্রাদীন্ হন্তি|

Adhikarana vIratarAdigaNaH (24-25) · Śloka 25

বেল্লন্তরারণিকবূকবৃষাশ্মভেদ- গোকণ্টকেত্কটসহাচরবাণকাশাঃ| বৃক্ষাদনীনলকুশদ্বযগুণ্ঠগুন্দ্রা- ভল্লূকমোরটকুরণ্টকরম্ভপার্থাঃ||২৪|| বর্গো বীরতরাদ্যোঽযং হন্তি বাতকৃতান্ গদান্| অশ্মরীশর্করামূত্রকৃচ্ছ্রাঘাতরুজাহরঃ||২৫||

স০-বেল্লন্তরো-বীরতর উশীরাখ্যঃ| অরণিকঃ-অগ্নিমন্থঃ| বূকঃ-ঈশ্বরমল্লিকা| বৃষঃ-আটরূষকঃ| অশ্মভেদঃ-পাষাণভেদঃ| গোকণ্টকো-গোক্ষুরকঃ| ইত্কটা-সূক্ষ্মপত্রিকা দীর্ঘলোহিতযষ্টিকা কাণ্ডবিশেষঃ, 'ইকডি' ইতি লোকে| সহাচরঃ-সহচরঃ| বাণো-নীলপুষ্পঃ সৈর্যকঃ| কাশঃ-শ্বেতচামরকঃ| বৃক্ষাদনী-কামবৃক্ষকঃ| নলো-মৃত্যুপুষ্পাখ্যঃ| কুশদ্বযং-স্থূলসূক্ষ্মভেদেন দর্ভদ্বযম্| গুণ্ঠো-বৃত্ততৃণঃ, কুদগুণ্ঠিকাপরসংজ্ঞঃ| গুন্দ্রা-পদএরকঃ| ভল্লূকঃ-শ্যোনাকঃ| মোরটঃ-ক্ষীরমোরটঃ| কুরণ্টঃ-সিতিবারকঃ| করম্ভঃ-উত্তমারণিঃ| পার্থা-সুবর্চলা| এষ বীরতরাদির্বর্গো-গণো, বাতজান্ রোগান্ হন্তি| তথা, অশ্মর্যাদিহরঃ| বসন্ততিলকাবৃত্তম্|

Adhikarana rodhrAdigaNaH (26-27) · Śloka 27

রোধ্রশাবরকরোধ্রপলাশা জিঙ্গিণীসরলকট্ফলযুক্তাঃ| কুত্সিতাম্বকদলীগতশোকাঃ সৈলবালুপরিপেলবমোচাঃ||২৬|| এষ রোধ্রাদিকো নাম মেদঃ কফহরো গণঃ| যোনিদোষহরঃ স্তম্ভী বর্ণ্যো বিষবিনাশনঃ||২৭||

স০-রোধ্রঃ-তিল্বকঃ| শাবরকো-দ্বিতীযরোধ্রঃ, অক্ষিভেষজাপরসংজ্ঞঃ| কদম্বপলাশৌ-প্রসিদ্ধৌ| জিঙ্গিণী-কৃষ্ণশাল্মলী| সরলং-দেবদারু| কট্ফলং-কুমুদা, রোহিণীভেদঃ| যুক্তা-রাস্না, গিরিকর্ণিকেত্যন্যে| কুত্সিতাম্বঃ-কদম্বঃ| কদলী-রম্ভা| গতশোকঃ-অশোকঃ| এলবালু-ঐলেযম্| পরিপেলবং-কুটন্নটং গোপালদমনকাখ্যম্| মোচা-শল্লকী| অযং রোধ্রাদিকো গণো মেদঃকফাপহো যোনিদোষঘ্নশ্চ| তথা, স্তম্ভী দোষাণাং শকৃদাদেশ্চ| তথা, বর্ণায হিতো বিষঘ্নশ্চ| স্বাগতবৃত্তম্|

Adhikarana arkAdigaNaH (28-29) · Śloka 29

অর্কালর্কৌ নাগদন্তী বিশল্যা ভার্ঙ্গী রাস্না বৃশ্চিকালী প্রকীর্যা| প্রত্যক্পুষ্পী পীততৈলোদকীর্যা শ্বেতাযুগ্মং তাপসানাং চ বৃক্ষঃ||২৮|| অযমর্কাদিকো বর্গঃ কফমেদোবিষাপহঃ| কৃমিকুষ্ঠপ্রশমনো বিশেষাদ্ব্রণশোধনঃ||২৯||

স০-অর্কঃ-সদাপুষ্পী| অলর্কো-মন্দারকাখ্যঃ শ্বেতকুসুমঃ| নাগদন্তী-পর্বপুষ্পিকা| বিশল্যা-লাঙ্গলী| ভার্ঙ্গী-ফঞ্জী| রস্না-রস্যা| বৃশ্চিকালী-উষ্ট্রধূমকঃ| প্রকীর্যা-করঞ্জঃ| প্রত্যক্পুষ্পী-অপামার্গঃ| পীততেলা-কাকাদনী| উদকীর্যা-করঞ্জঃ| শ্বেতাযুগ্মং-একা কিণিহীসংজ্ঞাঽন্যা মহাশ্বেতা পালিন্দীসংজ্ঞা| তাপসানাং বৃক্ষঃ-ইঙ্গুদী| এষোঽর্কাদির্বর্গঃ কফাদিঘ্নোঽতিশযেন ব্রণশোধনঃ| শালিনীবৃত্তম্|

Adhikarana surasAdigaNaH (30-31) · Śloka 31

সুরসযুগফণিজ্জং কালমালা বিডঙ্গং খরবুসবৃষকর্ণীকট্ফলং কাসমর্দঃ| ক্ষবকসরসিভাঙ্গীকার্মুকাঃ কাকমাচী কুলহলবিষমুষ্টীভূস্তৃণো ভূতকেশী||৩০|| সুরসাদির্গণঃ শ্লেষ্মমেদঃকৃমিনিষূদনঃ| প্রতিশ্যাযারুচিশ্বাসকাসঘ্নো ব্রণশোধনঃ||৩১||

স০-সুরসযুগং-তুলসীদ্বযং গৌরকৃষ্ণভেদেন| ফণিজ্জো-মরীচকঃ| কালমালা-কৃষ্ণার্জকঃ, কুঠেরকভেদঃ| বিডঙ্গং-বেল্লম্| খরবুসো-মরুবকঃ| বৃষকর্ণী-মূষিককর্ণী| কট্ফলং-সোমবল্কম্| কাসমর্দঃ-কাসঘ্নঃ| ক্ষবকঃ-ক্ষুদ্বিবোধনঃ| সরসী-তুম্বরপত্রিকা| ভার্ঙ্গী-অঙ্গারবল্লী| কার্মুকা-রক্তমঞ্জরী, অতিমুক্তক ইত্যন্যে| কাকমাচী-গুডফলা| কুলহলো-ভূকদম্বকোঽলম্বুসাখ্যঃ| বিষমুষ্টিঃ-কর্কোটী, মহানিম্ব ইত্যন্যে| ভূস্তৃণং-গুহ্যবীজমতিচ্ছত্রাখ্যম্| ভূতকেশী-মাংসী পুত্রজারী| সুরসাদিরেষ গণঃ শ্লেষ্মাদিঘ্নঃ প্রতিশ্যাযাদিহরো ব্রণশুদ্ধিকৃত্ [চ]| মালিনীবৃত্তম্|

Adhikarana muShkakAdigaNaH (32) · Śloka 32

মুষ্ককস্নুগ্বরাদ্বীপিপলাশধবশিংশিপাঃ| গুল্মমেহাশ্মরীপাণ্ডুমেদোর্শঃকফশুক্রজিত্||৩২||

স০-মুষ্ককো-মোক্ষকঃ| স্নুক্-গুডা উগ্রকাণ্ডঃ| বরাদীনাং প্রোক্তানি নামানি| মুষ্ককাদিরেষ গুল্মাদিজিত্|

Adhikarana vatsAkAdigaNaH (33-34) · Śloka 34

বত্সকমূর্বাভার্ঙ্গী- কটুকা মরীচং ঘুণপ্রিযা চ গণ্ডীরম্| এলা পাঠাঽজাজী কট্বঙ্গফলাজমোদসিদ্ধার্থবচাঃ||৩৩|| জীরকহিঙ্গুবিডঙ্গং পশুগন্ধা পঞ্চকোলকং হন্তি| চলকফমেদঃপীনসগুল্মজ্বরশূলদুর্নাম্নঃ||৩৪||

স০-বত্সকো-বনতিক্তকঃ| মূর্বা-মধুরসা| মরিচং-ঊষণম্| ঘুণপ্রিযা-অতিবিষা| গণ্ডীরং-স্নুহী| এলা-বালৈলা| পাঠা-প্রাচীনা| অজাজী-জীরকঃ| কট্বঙ্গফলং-অরলুকফলম্| কেচিতু কট্বঙ্গফলং-তিন্দুকীফলমিত্যাহুঃ| অজমোদো-দীপ্যকঃ| সিদ্ধার্থো-গৌরসর্ষপঃ| অন্যেষাং নামান্যুক্তানি| "গুর্বন্তাষ্টগণাভাগাঽঽর্যা পূর্বার্দ্ধসদৃশশকলদ্বিতযা| আর্যৈরার্যাগীতিঃ সঙ্গীতা সঙ্গীতগীতসংবিধ্যৈঃ||" পশুগন্ধা-অজগন্ধা মকরন্তরাখ্যা| পঞ্চকোলকং-প্রাগুক্তম্| বত্সকাদিরসৌ বাতাদীন্নিহন্তি| আর্যা|

Adhikarana vacAharidrAdigaNau (35-36) · Śloka 36

বচাজলদদেবাহ্বনাগরাতিবিষাভযাঃ| হরিদ্রাদ্বযযষ্ট্যাহ্বকলশীকুটজোদ্ভবাঃ||৩৫|| বচাহরিদ্রাদিগণাবামাতীসারনাশনৌ| মেদঃকফাঢ্যপবনস্তন্যদোষনিবর্হণৌ||৩৬||

স০-বচা-গোলোমী| জলদঃ-অম্বুধরঃ| দেবাহ্বং-কিলিমম্| নাগরং-বিশ্বম্| অতিবিষা-ভঙ্গুরা| অভযা-অমৃতা| হরিদ্রাদ্বযং-একা পিণ্ডা, অপরা পচম্পচা দারুহরিদ্রা| যষ্ট্যাহ্বং-ক্লীতিকা| কলশী-পৃশ্নিপর্ণী| কুটজোদ্ভবাঃ-ইন্দ্রযবাঃ| এতৌ বচাদিহরিদ্রাদিগণাবামাতীসারঘ্নৌ মেদঃকফাদিহরৌ চ|

Adhikarana priya~ggvambaShThAdigaNau (21)) · Śloka 39

প্রিযঙ্গুপুষ্পাঞ্জনযুগ্মপদ্মাঃ পদ্মাদ্রজো যোজনবল্ল্যনন্তা| মানদ্রুমো মোচরসঃ সমঙ্গা পুন্নাগশীতং মদনীযহেতুঃ||৩৭|| অম্বষ্ঠা মধুকং নমস্করী নন্দীবৃক্ষপলাশকচ্ছুরাঃ| রোধ্রং ধাতকিবিল্বপেশিকে কট্বঙ্গঃ কমলোদ্ভবং রজঃ||৩৮|| গণৌ প্রিযড্গ্বম্বষ্ঠাদী পক্বাতীসারনাশনৌ| সন্ধানীযৌ হিতৌ পিত্তে ব্রণানামপি রোপণৌ||৩৯||

স০-প্রিযঙ্গুঃ-শ্যামা| পুষ্পাঞ্জনং-রীতিপুষ্পম্| যুগ্মেত্যত্রানুবৃত্তিকৃতেন সম্বন্ধেনাঞ্জনমিতি সম্বধ্যতে| তেনাঞ্জনযুগ্মং-একং স্রোতোঞ্জনমন্যত্সৌবীরমিত্যর্থোঽবতিষ্ঠতে| পদ্মা-পদ্মচারিণী| পদ্মাত্-কমলাত্, রজঃ-কেসরম্| যোজনবল্লী-মঞ্জিষ্ঠা| অনন্তা-যবাসকঃ| মানদ্রুমঃ-শাল্মলী| মোচরসঃ-শাল্মলীনির্যাসঃ| সমঙ্গা-নমস্কারী রক্তমূলাখ্যা| পুন্নাগঃ-তুঙ্গো রক্তকেসরাখ্যঃ| শীতং-চন্দনম্| মদনীযহেতুঃ-ধাতুকী| উপজাতিবৃত্তম্| অম্বষ্ঠা-পাঠা মযূরশিখাখ্যা| মধুকং-মধুযষ্টিকা| নমস্করী-সমঙ্গা| নন্দীবৃক্ষঃ-প্ররোহী| পলাশঃ-প্রসিদ্ধঃ| কচ্ছুরা-ফণিহারী ধন্বযবাসকাখ্যঃ| বিল্বপেশিকা-বিল্বমজ্জা| কট্বঙ্গঃ-স্যোনাকঃ| কমলোদ্ভবং রজঃ-পদ্মরেণুঃ| এতৌ প্রিযড্গ্বংবষ্ঠাদী গণো পক্বাতীসারনাশনৌ সন্ধানীযৌ পিত্তে হিতৌ ব্রণরোপণৌ চ| "ম্সো জ্গৌ শুদ্ধবিরাডিতং মতম্" (বৃত্তরত্নাকরে অ. ৩|২১)|

Adhikarana mustAdigaNaH (40) · Śloka 40

মুস্তাবচাগ্নিদ্বিনিশাদ্বিতিক্তা- ভল্লাতপাঠাত্রিফলাবিষাখ্যাঃ| কুষ্ঠং ত্রুটী হৈমবতী চ যোনি- স্তন্যামযঘ্না মলপাচনাশ্চ||৪০||

স০-মুস্তা-গাঙ্গেযী| তিক্তাদ্বযং-একা কটুকাঽন্যা কাকতিক্তা| বিষাখ্যা-শুক্লকন্দা| হৈমবতী-শ্বেতবচা| এতে যোন্যামযঘ্নাঃ স্তন্যামযঘ্না মলপাচনাশ্চ| "তৌ জো গুরু চেদ্ভবতীন্দ্রবজ্রা|"

Adhikarana nyagrodhAdigaNaH (41-42) · Śloka 42

ন্যগ্রোধপিপ্পলসদাফলরোধ্রযুগ্মং জম্বূদ্বযার্জুনকপীতনসোমবল্কাঃ| প্লক্ষাম্রবঞ্জুলপিযালপলাশনন্দী- কোলীকদম্ববিরলামধুকং মধূকম্||৪১|| ন্যগ্রোধাদির্গণো ব্রণ্যঃ সঙ্গ্রাহী ভগ্নসাধনঃ| মেদঃপিত্তাস্রতৃড্দাহযোনিরোগনিবর্হণঃ||৪২||

স০-ন্যগ্রোধো-বটঃ| পিপ্পলঃ-আশ্বত্থঃ| সদাফলঃ-উদুম্বরঃ| জম্বূদ্বযং-একা রাজজম্বূর্বৃহত্ফলাঽন্যা হ্রস্বফলা কাকজম্বূঃ| অর্জুনঃ-পার্থঃ| কপীতনঃ-কপিচূডো বানীরাখ্যঃ| সোমবল্কঃ-শ্বেতসারঃ খদিরঃ| প্লক্ষঃ-শৃঙ্গী প্লবাখ্যঃ| আম্রঃ-চূতঃ| বঞ্জুলো-বেতসঃ| পিযালো-দ্রাক্ষারসপ্রিযঃ খরস্কন্ধাখ্যঃ| নন্দী-জযবৃক্ষঃ| কোলী-বদরী| বিরলা-তিন্দুকী| মধুকং-যষ্টী| মধূকং-মধূকপুষ্পম্| ন্যগ্রোধাদিরযং সঙ্গ্রহণাদিগুণযুক্তঃ| বসন্ততিলকাবৃত্তম্|

Adhikarana elAdigaNaH (43-44) · Śloka 44

এলাযুগ্মতুরুষ্ককুষ্ঠফলিনীমাংসীজলধ্যামকং স্পৃক্কাচোরকচোচপত্রতগরস্থৌণেযজাতীরসাঃ| শুক্তির্ব্যাঘ্রনখোঽমরাহ্বমগুরুঃ শ্রীবাসকঃ কুঙ্কুমং চণ্ডাগুগ্গুলুদেবধূপখপুরাঃ পুন্নাগনাগাহ্বযম্||৪৩|| এলাদিকো বাতকফৌ বিষং চ বিনিযচ্ছতি| বর্ণপ্রসাদনঃ কণ্ডূপিটিকাকোঠনাশনঃ||৪৪||

স০-এলাযুগ্মং-সূক্ষ্মৈলা স্থূলৈলা চ| তুরুষ্কঃ-কৃত্রিমো নির্যাসবিশেষঃ| কুষ্ঠং-গদঃ| ফলিনী-গন্ধপ্রিযঙ্গুঃ| মাংসী-নলদম্| জলং-হ্রীবেরম্| ধ্যামকং-দেবদগ্ধকম্| স্পৃক্কা-দেবী| চোরকো-গ্রন্থিপর্ণঃ| চোচং-ত্বক্| পত্রং-তমালপত্রম্| তগরং-বক্রম্| স্থৌণেযং-তৈলপীতকম্| জাতিরসো-বোলঃ| শুক্তিঃ-নখঃ| ব্যাঘ্রনখঃ-সমুদ্রজঃ| অমরাহ্বং-দেবদারু| অগুরুঃ-প্রসিদ্ধঃ| শ্রীবাসকঃ-চীডা শ্রীবেষ্টকাখ্যঃ| কুঙ্কুমং-বাহ্লীকম্| চণ্ডা-কোপনা| গুগ্গুলুঃ-পুরঃ| দেবধূপঃ-সর্জরসঃ| খপুরঃ-কুন্দুরুকঃ| পুন্নাগো-রক্তকেসরঃ| নাগাহ্বযং-নাগকেসরম্| এলাদিরযং বাতাদীন্ হন্তি| তথা, বর্ণপ্রসন্নত্বকৃত্ কণ্ড্বাদিহৃচ্চ| "ম্সৌ জ্সৌ তৌ গুরুকং চ সূর্যতুরগৈঃ শার্দূলবিক্রীডিতম্|"

Adhikarana shyAmAdigaNaH (45) · Śloka 45

শ্যামাদন্তীদ্রবন্তীক্রমুককুটরণা- শঙ্খিনীচর্মসাহ্বা- স্বর্ণক্ষীরীগবাক্ষীশিখরিরজনক- চ্ছিন্নরোহাকরঞ্জাঃ| বস্তান্ত্রী ব্যাধিঘাতো বহলবহুরস- স্তীক্ষ্ণবৃক্ষাত্ ফলানি শ্যামাদ্যো হন্তি গুল্মং বিষমরুচিকফৌ হৃদ্রুজং মূত্রকৃচ্ছ্রম্||৪৫||

স০-শ্যামা-মালবিকা ত্রিবৃত্ মসূরবিদলাখ্যা| দন্তী-মুকূলকশ্চিত্রাখ্যঃ| দ্রবন্তী-উন্দুরকর্ণিকা| ক্রমুকঃ-পট্টিকারোধ্রঃ| কুটরণা-শুক্লা ত্রিবৃত্| শঙ্খিনী-যবতিক্তা| চর্মসাহ্বা-সাতলা, ব্রাহ্মীত্যন্যে| স্বর্ণক্ষীরী-কঙ্কুষ্ঠম্| গবাক্ষী-গবাদনী স্থাণুকর্ণীসংজ্ঞা, ইন্দ্রবারুণীত্যন্যে| শিখরী-অপামার্গঃ| রজনকঃ-কম্পিল্লকঃ| ছিন্নরোহা-অমৃতবল্লী| করঞ্জঃ-কৈডর্যঃ| বস্তান্ত্রী-বৃষগন্ধা| ব্যাধিঘাতঃ- কৃতমালঃ| বহুলো-বহুফলঃ| বহুরসঃ-ইক্ষুঃ| তীক্ষ্ণবৃক্ষাত্-পীলোঃ ফলানি| শ্যামাদিরেষ গুল্মাদীন্ হন্তি| [অত্র পিপ্পল্যাদিঃ প্রসিদ্ধত্বান্নোক্তঃ| ] "ম্রৌ ভ্রৌ যাশ্চ ত্রযঃ স্যুঃ স্বরমুনিতুরগৈঃ স্রগ্ধরাস্যাদ্বিরামৈঃ|"

Adhikarana iti trayastriMshadgaNAH (46) · Śloka 46

ত্রযস্ত্রিংশদিতি প্রোক্তা বর্গাস্তেষু ত্বলাভতঃ| যুঞ্জ্যাত্তদ্বিধমন্যচ্চ দ্রব্যং জহ্যাদযৌগিকম্||৪৬||

স০-ইতি-এবং প্রকারেণ, ত্রযস্ত্রিংশত্সঙ্খ্যা বর্গাঃ কথিতাঃ| অত্র সঙ্খ্যোপাদানমেষাং প্রাধান্যখ্যাপনার্থম্| অন্যেঽপ্যেবংপ্রকারাঃ সন্তি, এতে তু প্রধানা ইত্যর্থঃ| সুখস্মরণার্থং চ সঙ্খ্যাবচনম্| এষু চ ত্রযস্ত্রিংশত্সু বর্গেষ্বলাভতঃ-অলাভে সতি, তদ্বিধং-রসবীর্যপাকৈস্তুল্যং, দ্রব্যমন্যত্-অনুক্তমপি যুঞ্জ্যাত্| ন কেবলমেতাবদেব বিধেযমিত্যাহ-জহ্যাদযৌগিকম্,-ন কেবলমেষু বর্গেষু তদ্দ্রব্যলাভে যথালাভমন্যত্তদ্বিধং দ্রব্যং যুঞ্জ্যাত্, যাবদযৌগিকং যত্ দ্রব্যং তচ্চ ত্যজেত্| দোষরোগাদ্যপেক্ষযা পুরুষস্যাস্মিন্ কালে বযসি বা অযমেব গণঃ প্রশস্তঃ, তদা তত্সমস্তগণদ্রব্যলাভে তদ্বিধমেকং দ্রব্যং দ্বে বা বহূনি বা দ্রব্যাণি সংযোজ্য প্রযোজ্য এব, ন সমস্তদ্রব্যাপেক্ষা কার্যেতি| তথা চ সুশ্রুতঃ (সু. অ. ৩৮|৮২) - "সমীক্ষ্য দোষভেদাংশ্চ গণান্ ভিন্নান্ প্রযোজযেত্| পৃথঙ্মিশ্রান্ সমস্তাংশ্চ গণান্ বা ব্যস্তসংহতান্||" ইতি| ত্রযস্ত্রিংশদিতি "ত্রেস্ত্রযশ্চ" ইতি ত্রযসাদেশঃ| অযৌগিকমিতি অযোগায প্রভবতীত্যর্থঃ| যোগাদ্যচ্চেতি ঠঞ্|

Adhikarana teShu kasyacidravyasyAlAbhe tadvidhamanyadyojyam, ete vargAH sarvakalpayogyAshca (15) · Śloka 15

এতে বর্গা দোষদূষ্যাদ্যপেক্ষ্য কল্কক্কাথস্নেহলেহাদিযুক্তাঃ| পানে নস্যেঽন্বাসনেঽন্তর্বহির্বা লেপাভ্যঙ্গৈর্ঘ্নন্তি রোগান্ সুকৃচ্ছ্রান্||৪৭|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে শোধনাদিগণসঙ্গ্রহো নাম পঞ্চদশোঽধ্যাযঃ||১৫||

স০-এতে-পূর্বোক্তাঃ, বর্গা দোষদূষ্যবযোবলাদীন্যপেক্ষ্যবিকল্প্য, কল্কাদিযুক্তাঃ সুকৃচ্ছ্রান্ রোগান্-আমযান্ ঘ্নন্তি| যুক্তা ইত্যত্রান্তর্ভাবিতণ্যর্থো যুজিঃ| ততঃ কল্কাদিষু বৈদ্যেন যোজিতা ইত্যর্থোঽবতিষ্ঠতে| আদিশব্দেন ফাণ্টশীতকষাযাদিপরিগ্রহঃ| কথমেতে ঘ্নন্তি ? ইতি প্রকারং যুক্ত্যাঽঽহ-পান ইত্যাদি| পানে-পানাদ্যুপযোগে সতি| লেপাভ্যঙ্গৈরিতি বহুবচনেন লেপাভ্যঙ্গস্রানাদিভিশ্চেতি যোজ্যম্| শালিনীবৃত্তম্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে শোধনাদিগণসঙ্গ্রহাধ্যাযঃ পঞ্চদশঃ সমাপ্তঃ|| ১৫||