17. svēdavidhiradhyāyaḥ

Adhikarana adhyAyopakramaH · Śloka

শোধনপ্রসঙ্গেন স্নেহোপযোগঃ| স্নিগ্ধে চ দেহে দোষাণাং মার্দবীকরণায স্বেদস্য প্রসঙ্গঃ|

Adhikarana svedavidhiradhyAyaH (2) · Śloka 2

অতস্তত্পরিজ্ঞানার্থোঽযমধ্যায আরভ্যতে - - - - অথাতঃ স্বেদবিধিমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| গদ্যসূত্রে||২||

স০-অথাত ইতি| স্বেদনং-স্বেদঃ, তস্য বিধিঃ-বিধানং, যত্র তং ব্যাখ্যাস্যামঃ| শেষং পূর্ববত্|

Adhikarana svedasya cAturvidhyam (1) · Śloka 1

স্বেদস্য চাতুর্বিধ্যমাহ - - - - স্বেদস্তাপোপনাহোষ্মদ্রবভেদাচ্চতুর্বিধঃ| |১|

স০-স্বেদশ্চতুর্বিধঃ,- তাপাদিভেদাত্|

Adhikarana tApasya lakShaNam (1) · Śloka 1

তত্র তাপাদীনেব লক্ষযিতুমাচষ্টে - - - - | তাপোঽগ্নিতপ্তবসনফালহস্ততলাদিভিঃ||১||

স০-তাপঃ-তাপস্বেদঃ, অগ্নিতপ্তেন বসনেন, তথা ফালেন-অযোমযেনাগ্নিতপ্তেন, তথা [ অগ্নিতপ্তেন ] হস্ততলেনাপি| আদিগ্রহণাদ্দারুবালুকাঘটিকাকাংস্যভাজনাদযো গৃহ্যন্তে|

Adhikarana upanAhasya lakShaNam (2-4) · Śloka 4

উপনাহো বচাকিণ্বশতাহ্বাদেবদারুভিঃ| ধান্যৈঃ সমস্তৈর্গন্ধৈশ্চ রাস্নৈরণ্ডজটামিষৈঃ||২|| উদ্রিক্তলবণৈঃ স্নেহচুক্রতক্রপযঃপ্লুতৈঃ| কেবলে পবনে, শ্লেষ্মসংসৃষ্টে সুরসাদিভিঃ||৩|| পিত্তেন পদ্মকাদ্যৈস্তু সাল্বণাখ্যৈঃ পুনঃপুনঃ| |৪|

স০-উপনাহো-বন্ধনম্| কিণ্বং-সুরাপ্রকৃতিঃ| শতাহ্বা-শতপুষ্পা| ধান্যৈরিতি সামান্যোক্তাবপি তিলাতসীমাষাদীনিযোগ্যত্বাদ্যান্যুষ্ণবীর্যাণি স্নিগ্ধানি বা তানি প্রাযেণ প্রযোজ্যানীতি| সমস্তগ্রহণং গন্ধৈরেব যুজ্যতে| অত এব সঙ্গ্রহেঽবদত্ (সূ. অ. ২৬) - "সর্বগন্ধ" ইতি| গন্ধৈঃ-গন্ধদ্রব্যৈঃ কুষ্ঠাগুরুতগরসুরসাদিভিঃ| তথা, রাস্নাদিভিঃ| কিম্ভূতৈঃ পূর্বোক্তৈঃ ? উদ্রিক্তলবণৈঃ-লবণাঢ্যৈঃ| তথা, স্নেহশ্চ চুক্রং চ তক্রং চ পযশ্চ, তৈঃ প্লুতৈঃ-আলোডিতৈঃ| চুক্রং-অম্লম্| তক্রস্য চুক্রত্বাদেব গ্রহণে সিদ্ধে তক্রগ্রহণমতিশযার্থম্, অতিশযেন সাল্বণাখ্যে স্বেদে তক্রং প্রযোজ্যমিতি| কেবলে পবনে বচাদিভিরুপানাহস্বেদঃ কার্যঃ| শ্লেষ্মসংসৃষ্টে পবনে সুরসাদিভিঃ-সুরসযুগাদিনা গণেন (হৃ. সূ. অ. ১৫|৩০)| পিত্তেন সংসৃষ্টে পবনে পদ্মকাদ্যৈঃ-"পদ্মকপুণ্ড্রৌ" (হৃ. সূ. অ. ১৫|১২) ইত্যাদিভিঃ| পিত্তেন সংসৃষ্টে পবন ইত্যত্র কিঞ্চিদেব পিত্তেন সংসৃষ্টে পবনে পদ্মকাদিভিরুপনাহঃ কার্য ইত্যববোধ্যম্, নাধিকেন পিত্তেন যুক্তে পবনে, নাপি তুল্যেন পিত্তেন যুক্তে পবন ইতি| এবং হ্যুক্তম্ (হৃ. সূ. অ. ১৩|১৪)- "গ্রৈষ্মঃ প্রাযো মরুত্পিত্তে" বিধিঃ কার্যঃ| গ্রৈষ্মশ্চ বিধিঃ প্রাযেণ সর্বঃ শীতঃ| তত্র স্বেদো দূরোত্সারিত এব| তস্মাত্ কিঞ্চিত্পিত্তেন সংসৃষ্টে পবনে পদ্মকাদ্যৈরুপনাহঃ কার্য ইতি বেদ্যম্| এতে চ ত্রয উপনাহাঃ কেবলে বাযৌ তথা কফযুক্তে পিত্তযুক্তে চ ক্রমেণ যোজ্যাঃ| এতে চ সাল্বণাভিধানাঃ স্বেদা ইত্যাহ-সাল্বণাখ্যৈরিতি| পুনঃপুনরিতি অসকৃত্তৈঃ স্বেদযোজনা কার্যেত্যর্থঃ| নিরপাযো হি যথাঽযং সাল্বণাপরসংজ্ঞ উপনাহাখ্যঃ স্বেদো ন তথাঽপরে স্বেদা ইতি| উপনহ্যতে-বধ্যতে চর্মপটাদিনা, ইত্যন্বর্থং নামাস্যোপনাহ ইতি| সাল্বণ ইত্যস্য তন্ত্রান্তরপ্রসিদ্ধং নাম| তথা চ ধন্বন্তরিঃ (সু. চি. অ. ৪|১৪) - "কাকোল্যাদিঃ সবাতঘ্নঃ সর্বাম্লদ্রব্যসংযুতঃ| সানূপৌদকমাংসস্তু সর্বস্নেহসমন্বিতঃ|| সুখোষ্ণঃ স্পষ্টলবণঃ সাল্বণঃ পরিকীর্তিতঃ|" ইতি| 'উদ্রিক্তলবণৈঃ স্নেহচুক্রতক্রপযঃপ্লুতৈঃ|' ইতি ত্রিষ্বপি স্বেদেষু যোজ্যম্|

Adhikarana bandhanavidhiH (4-5) · Śloka 5

বন্ধাত্মকশ্চাযং স্বেদ ইতি বন্ধাত্মকস্বেদোপাযভূতান্ চর্মপট্টাদীনাহ - - - - | স্নিগ্ধোষ্ণবীর্যৈর্মৃদুভিশ্চর্মপট্টৈরপূতিভিঃ||৪|| অলাভে বাতজিত্পত্রকৌশেযাবিকশাটকৈঃ| বদ্ধং রাত্রৌ দিবা মুঞ্চেন্মুঞ্চেদ্রাত্রৌ দিবাকৃতম্||৫||

স০-চর্মপট্টৈর্বদ্ধং-উপনদ্ধমঙ্গং, রাত্রৌ দিবা মুঞ্চেত্| কিম্ভূতৈঃ ? স্নিগ্ধোষ্ণবীর্যৈঃ, তথাঽপূতিভিঃ-অদুর্গন্ধৈঃ সুপরিকর্মিতত্বাত্| অলাভে-চর্মপট্টানামভাবে, বাতজিত্পত্রৈঃ-এরণ্ডজাদিভিঃ, তথা কৌশেযাদিভিঃ| কৌশেযং-রাঙ্কবাদিবস্ত্রবিশেষম্| আবিকং-কম্বলম্| [ শাটকং-বস্ত্রখণ্ডম্| ] তৈর্বদ্ধং রাত্রৌ দিবা মুঞ্চেত্| দিবা তু বদ্ধং রাত্রৌ মোক্তব্যম্|

Adhikarana UShmasvedasya lakShaNam (6-7) · Śloka 7

ঊষ্মা তূত্কারিকালোষ্টকপালোপলপাংসুভিঃ| পত্রভঙ্গেন ধান্যেন করীষসিকতাতুষৈঃ||৬|| অনেকোপাযসন্তপ্তৈঃ প্রযোজ্যো দেশকালতঃ| |৭|

স০-ঊষ্মা-বাষ্পঃ, তদাখ্যঃ স্বেদ উত্কারিকাদিভিঃ প্রযোজ্যঃ| তত্র যবমাষৈরণ্ডবীজাতসীকুসুম্ভবীজাদিভিঃ পিষ্টস্বিন্নৈর্লপ্যসিকাকৃতির্যঃ স্বেদনোপাযঃ সা উত্কারিকা| লোষ্টং-মৃত্পিণ্ডঃ| কপালং-কর্পরম্| উপলঃ-পাষাণঃ| পাংসুঃ-ধূলিঃ| তথা, পত্রভঙ্গেন-ছদসমূহেন| তথা, ধান্যেন| করীষো-গবাদিশকৃচ্চূর্ণঃ| সিকতা-বালুকা| তুষো-ধান্যত্বক্| এতৈরুত্কারিকাদিভিস্তুষান্তৈঃ স্বেদো বিধাতব্যঃ| কিম্ভূতৈঃ ? অনেকোপাযসন্তপ্তৈঃ,-অনেকে চ ত উপাযাশ্চ, তৈঃ সন্তপ্তাঃ-উষ্ণীকৃতা য উত্কারিকাদযঃ, তৈঃ| কথং প্রযোজ্যঃ ? ইত্যাহ-দেশকালতঃ| ল্যব্লোপে পঞ্চমী চেযম্| তেন দেশকালাবপেক্ষ্য| উপলক্ষণং চেদম্| তেন দোষদূষ্যাদীনপ্যপেক্ষ্য স্বেদোঽযং প্রযোজ্যঃ| লোষ্টকপালপাষাণানগ্নিতপ্তান্ সন্দংশেন গৃহীত্বা স্বেদ্যদোষাদ্যপেক্ষযাঽম্ভস্যম্লে ধান্যাম্লে শুক্তাদৌ বা নিমজ্জযেত্| তদুদ্ভূতবাষ্পৈঃ স্বেদঃ শযনস্থস্য কার্যঃ| অথবা গবাদিশকৃতাঽঽর্দ্রেণ পিণ্ডীকৃতেনোষ্ণেন স্বেদঃ স চ পিণ্ডস্বেদসংজ্ঞঃ| স এব সঙ্করস্বেদ উচ্যতে| অথবৈরণ্ডাদিদ্রব্যযুক্তানি যবাদীনি ধান্যানি সাম্লকাদীনি গৃহীত্বা পিহিতমুখাযামুখাযাং সম্যগুপস্বেদ্য নিবাতে গৃহে শযনস্থে কিলিঞ্জে প্রস্তীর্যাবিককৌশেযবাতহরপত্রান্যতমোত্তরপ্রচ্ছদে রৌরবাজিনপ্রাবারাদিস্ববচ্ছন্নং স্বেদযেত্| অথবা পূর্ববত্স্বেদ্যদ্রব্যাণি কুম্ভ্যামুত্ক্বাথ্য তন্নিকটোপবিষ্টো ঘনবস্ত্রপ্রাবৃত ঊষ্মাণং গৃহ্ণীযাত্| এষ সংস্তরস্বেদঃ| এবমনেকোপাযসন্তপ্তত্বং দোষদূষ্যাদ্যপেক্ষযা নিরূপ্য স্বেদো যোজ্যঃ|

Adhikarana dravasvedaH (7-10) · Śloka 10

অথ দ্রবস্বেদমাহ - - - - | শিগ্রুবারণকৈরণ্ডকরঞ্জসুরসার্জকাত্||৭|| শিরীষবাসাবংশার্কমালতীদীর্ঘবৃন্ততঃ| পত্রভঙ্গৈর্বচাদ্যৈশ্চ মাংসৈশ্চানূপবারিজৈঃ||৮|| দশমূলেন চ পৃথক্ সহিতৈর্বা যথামলম্| স্নেহবদ্ভিঃ সুরাশুক্তাবারিক্ষীরাদিসাধিতৈঃ||৯|| কুম্ভীর্গলন্তীর্নাডীর্বা পূরযিত্বা রুজার্দিতম্| বাসসাঽঽচ্ছাদিতং গাত্রং স্নিগ্ধং সিঞ্চেদ্যথাসুখম্||১০||

স০-শিগ্র্বাদিজৈঃ পত্রসমূহৈঃ, তথা বচাদ্যৈঃ-বচাদিগণোক্তৈঃ, তথা মাংসৈরানূপজৈর্জলজৈশ্চ, দশমূলেন চ পৃথক্-ব্যস্তৈর্দ্বিত্রাদিভিঃ, সহিতৈর্বা-সমস্তৈর্বা, যথামলং স্নেহবদ্ভিঃ-দোষহরঘৃতাদ্যন্যতমস্নেহযুক্তৈর্যথাদোষং সুরাশুক্তবারিক্ষীরাদিসাধিতৈঃ, কুম্ভীঃ-স্থালীঃ, পূরযিত্বা, অথবা গলন্তীর্নাডীর্বা-অনবরতং ধারযা জলাদিস্রবন্তীর্বারিধানিকাসংজ্ঞাঃ বংশাদিমযীঃ পূরযিত্বা, রুজার্দিতং-পীডার্তং, গাত্রং-অঙ্গং, বাসসাঽঽচ্ছাদিতং তথা স্নিগ্ধং সত্ যথাসুখং-সুখস্পর্শং কদাচিদত্যুষ্ণং কদাচিদীষদুষ্ণং সিঞ্চেত্|

Adhikarana avagAhasvedaH (11) · Śloka 11

ইতি দোষপীডাবশাত্ পরিষেকস্বেদমাখ্যাযাবগাহস্বেদং দ্রবভেদমাহ - - - - তৈরেব বা দ্রবৈঃ পূর্ণং কুণ্ডং সর্বাঙ্গগেঽনিলে| অবগাহ্যাতুরস্তিষ্ঠেদর্শঃকৃচ্ছ্রাদিরুক্ষু চ||১১||

স০-তৈরেব-পূর্বোক্তৈঃ, স্বেদদ্রবৈঃ পূর্ণং কুণ্ডং ভৃশমবগাহ্য-প্রবিশ্য, আতুরো-রোগী তিষ্ঠেত্| কীদৃশে দোষে ? ইত্যাহ-সর্বাঙ্গগেঽনিলে,-সর্বশরীরব্যাপিনি বাযৌ| তথা, অর্শঃপ্রভৃতিরোগকষ্টপীডাসু| আদিগ্রহণেন হস্তপাদপীডাসু চ| কুণ্ডগ্রহণমুপলক্ষণার্থম্| তেন কূপকুটীস্বেদৌ চ বেদ্যৌ| সঙ্গ্রহে চোক্তম্ (সূ. অ. ২৬)- "শযনস্যাধোবিস্তারদ্বিগুণখাতে কূপে বাতহরদারুকরীষান্যতরপূর্ণদগ্ধে বিগতধূমে স্বাস্তীর্ণশযনস্থং স্বেদযেদিতি কূপস্বেদঃ| কুটীং নাত্যুচ্চবিস্তারাং বৃত্তামচ্ছিদ্রামুপনাহদ্রব্যকল্কঘনপ্রদিগ্ধকুড্যাং সর্বতো বিধূমপ্রদীপ্তখদিরাঙ্গারপূর্ণহসন্তিকাসমূহপরিবৃতাং বিধায তন্মধ্যস্থিতশয্যাস্থং স্বেদযেদিতি কুটীস্বেদঃ| পদ্মোত্পলাদিভিঃ সক্তুপিণ্ড্যা বাঽঽচ্ছাদ্য চক্ষুষী| শীতৈর্মুক্তাবলীপদ্মমুকুলোত্পলভাজনৈঃ|| মুহুঃ করৈশ্চ সজলৈঃ স্বিদ্যতো হৃদযং স্পৃশেত্|" ইতি|

Adhikarana svedavidhiH (12) · Śloka 12

নিবাতেঽন্তর্বহিঃস্নিগ্ধো জীর্ণান্নঃ স্বেদমাচরেত্| |১২|

স০-অপগতবাতে দেশে স্বেদমাচরেত্| কিম্ভূতঃ ? অন্তঃ স্নেহপানেন বহিশ্চাভ্যঙ্গাদিনা স্নিগ্ধঃ| তথা, জীর্ণান্নশ্চ,-যেন (যস্য) হ্যস্তনমন্নং জীর্ণম্, আমজীর্ণাদ্যাক্রান্তং নরং বর্জযিত্বা তেন স্বেদার্হেণ নরেণ স্বেদ আচরণীযঃ|

Adhikarana vyAdhyAdyapekShayA svedaprakAraH (12) · Śloka 12

কীদৃশং স্বেদমাচরেত্ ? ইত্যাহ - - - - | ব্যাধিব্যাধিতদেশর্তুবশান্মধ্যবরাবরম্||১২||

স০-ব্যাধ্যপেক্ষযা ব্যাধিতাপেক্ষযা দেশাপেক্ষযা ঋত্বপেক্ষযা চ যথাবিধমেব মধ্যমমুত্কৃষ্টং হীনং বা স্বেদমাচরেত্|

Adhikarana kaphe svedavisheShaH, kaphAnile visheShaH (13) · Śloka 13

কফার্তো রূক্ষণং রূক্ষো, রূক্ষঃ স্নিগ্ধং কফানিলে| |১৩|

স০-কফার্তঃ-কফগ্রস্তো, রূক্ষঃ সন্-অন্তর্বহিরস্নিগ্ধো, রূক্ষণং-ন চ স্নিগ্ধং, স্বেদমাচরেত্| অপরং শ্লেষ্মবাতে রূক্ষস্নিগ্ধং-কেনচিদংশেন রূক্ষং কেনচিদংশেন স্নিগ্ধং, পর্যাযেণ বা রূক্ষস্নিগ্ধং, এবংবিধং স্বেদমাচরেত্|

Adhikarana sthAnabhedena visheShaH (13-14) · Śloka 14

| আমাশযগতে বাযৌ কফে পক্বাশযাশ্রিতে||১৩|| রূক্ষপূর্বং তথা স্নেহপূর্বং স্থানানুরোধতঃ| |১৪|

স০-আমাশযং গতঃ-আমাশযগতঃ, পক্বাশযমাশ্রিতঃ-পক্বাশযাশ্রিতঃ, দ্বিতীযা শ্রিতেতি সমাসঃ| বাযাবামাশযগতে কফে চ পক্বাশযাশ্রিতে যথাসঙ্খ্যেন রূক্ষপূর্বং স্নেহপূর্বং চ স্বেদমাচরেত্| আমাশযগতে বাত আদৌ রূক্ষঃ স্বেদঃ কার্যঃ পশ্চাত্স্নিগ্ধঃ| তথা, পক্বাশযগতে কফ আদৌ স্নিগ্ধঃ স্বেদঃ, পশ্চাদ্রূক্ষ ইত্যর্থঃ| কুত এবং নিযমঃ ? ইত্যাহ-স্থানানুরোধতঃ,-স্থানবশাত্| বাযুর্যতঃ আমাশয আগন্তুঃ, স্থানং চ তত্ শ্লেষ্মণঃ, তদ্বশাত্তত্রাদৌ রূক্ষ এব স্বেদো যোজ্যঃ, পশ্চাত্ স্নিগ্ধ ইতি| কফশ্চ পক্বাশয আগন্তুঃ, স্থানং চ তদ্বাযোঃ, অতঃ পূর্বং স্নিগ্ধঃ স্বেদো যোজ্যঃ, পশ্চাদ্রূক্ষ ইতি পূর্বোক্ত এব ন্যাযো যোজ্যঃ| তথা চোক্তম্ (হৃ. সূ. অ. ১৩|২০) - "তত্রান্যস্থানসংস্থেষু তদীযাম্" ইতি| তথা (হৃ. সূ. অ. ১৩|২৯) - "আগন্তুং শমযেদ্দোষং স্থানিনং প্রতিকৃত্য বা|" ইতি| তস্মাত্পূর্বং রূক্ষেণ স্থানিনং কফং প্রতিকৃত্য পশ্চাদাগন্তুকস্য বাযোঃ শমনং স্নিগ্ধস্বেদাখ্যং প্রযোজ্যমিতি| ননু, বাযোরামাশযে কোপোঽনুপপন্নঃ| যতো মরুত্ লঘ্বাদিগুণযুক্তঃ| আমাশযস্তু গুরুমৃদুপিচ্ছিলাদিযুক্তঃ| অতঃ শম এবোপপন্ন ইতি কেচিত্| এতচ্চাযুক্তম্| বলিনো হ্যন্যাশ্রযস্থস্যাপি কোপো যুক্তঃ| মার্গরোধাচ্চ বাযোরামাশযেঽপি প্রকোপসম্ভব ইতি| তথা চ বক্ষ্যতি (হৃ. চি. অ. ৬|৫৭) - "প্রাযোঽনিলো রুদ্ধগতিঃ কুপ্যত্যামাশযে গতঃ|" ইতি| তথা চোক্তম্ (হৃ. সূ. অ. ১৩|১৯) - "তে কালাদিবলং লব্ধ্বা কুপ্যন্ত্যন্যাশ্রযেষ্বপি|" ইতি|

Adhikarana avayavabhedena visheShaH (14) · Śloka 14

| অল্পং বঙ্ক্ষণযোঃ, স্বল্পং দৃঙ্মুষ্কহৃদযে ন বা||১৪||

স০-বঙ্ক্ষ্ণযোরল্পমেবেতি যোজ্যম্| দৃশোর্মুষ্কযোর্হৃদি চাত্যল্পমেবেতি| অথবা দৃগাদিষু স্বেদং নাচরেদেব|

Adhikarana samyaksvinnalakShaNamsvinnasya kRutyam (15) · Śloka 15

শীতশূলক্ষযে স্বিন্নো জাতেঽঙ্গানাং চ মার্দবে| স্যাচ্ছনৈর্মৃদিতঃ স্নাতস্ততঃ স্নেহবিধিং ভজেত্||১৫||

স০-শীতশূলযোঃ ক্ষযে সঞ্জাতে সতি, অঙ্গানাং-পাণিপাদাদীনাং চ, মার্দবে-মৃদুত্বে জাতে সতি, স্বিন্নো নরঃ স্যাত্| স চ স্বিন্নঃ শনৈর্মৃদিতো-মন্দং মর্দিতাঙ্গঃ, স্নাতঃ-উষ্ণোদকেন, [ ততঃ- ] অনন্তরং, স্নেহোক্ত (স্নেহ) বিধিং-'উষ্ণোদকোপচারী স্যাত্' ইত্যাদিকং, ভজেত্|

Adhikarana atisvinnalakShaNam, atisvinnasyauShadham, viShAdiShvapi stambhanamauShadham (16-17) · Śloka 17

ইতি স্বেদস্য সম্যগ্লক্ষণমুক্ত্বাঽতিযোগলক্ষণমাহ - - - - পিত্তাস্রকোপতৃণ্মূর্চ্ছাস্বরাঙ্গসদনভ্রমাঃ| সন্ধিপীডা জ্বরঃ শ্যাবরক্তমণ্ডলদর্শনম্||১৬|| স্বেদাতিযোগাচ্ছর্দিশ্চ, তত্র স্তম্ভনমৌষধম্| বিষক্ষারাগ্ন্যতীসারচ্ছর্দিমোহাতুরেষু চ||১৭||

স০-স্বেদস্যাতিযোগাত্ রক্তপিত্তকোপাদযো ভবন্তি, ছর্দিশ্চ| মূর্চ্ছা-মোহঃ| স্বরাঙ্গযোঃ সদনেন সম্বন্ধঃ| ভ্রমঃ-অজ্ঞানম্| শ্যাবানি চ রক্তানি চ শ্যাবরক্তানি, তান্যেবংভূতানি যানি মণ্ডলানি তেষাং দর্শনং-উপলম্ভঃ| তত্র-স্বেদাতিযোগে, স্তম্ভনং-বক্ষ্যমাণমৌষধং কার্যম্| তথা, বিষাদ্যাতুরেষ্বপি স্তম্ভনমেবৌষধং কার্যম্| তথা, বিষাদ্যাতুরেষ্বপি স্তম্ভনমেবৌষধং ন্যায্যমিত্যর্থঃ|

Adhikarana svedanadravyam, stambhana dravyam (18-19) · Śloka 19

স্বেদনং গুরু তীক্ষ্ণোষ্ণং প্রাযঃ, স্তম্ভনমন্যথা| দ্রবস্থিরসরস্নিগ্ধরূক্ষসূক্ষ্মং চ ভেষজম্||১৮|| স্বেদনং, স্তম্ভনং শ্লক্ষ্ণং রূক্ষসূক্ষ্মসরদ্রবম্| প্রাযাস্তিক্তং কষাযং চ মধুরং চ সমাসতঃ||১৯||

স০-গুরু যদ্দ্রব্যং তীক্ষ্ণমুষ্ণং চ, তদ্বাহুল্যেন স্বেদনং ভবতি| প্রাযোগ্রহণাত্ ভযশোকাদিকমগুর্বপি গৃহ্যতে| অন্যথা-অতো বৈপরীত্যেন, স্তম্ভনং ভবতি| দ্রবাদিগুণযুক্তং যত্ তত্ দ্রব্যং স্বেদনং ভবতি| তথা, শ্লক্ষ্ণাদিযুক্তং তত্ সমাসতঃ স্তম্ভনং ভবতি| অধুনা রসতঃ স্তম্ভনং নির্দিশন্নাহ-প্রায ইত্যাদি| প্রাযঃ সঙ্ক্ষেপেণ তিক্তং কষাযং মধুরং চ স্তম্ভনং ভবতি|

Adhikarana stambhitasya lakShaNam (20) · Śloka 20

স্তম্ভিতস্য লক্ষণমাহ - - - - স্তম্ভিতঃ স্যাদ্বলে লব্ধে যথোক্তামযসঙ্ক্ষযাত্| |২০|

স০-বলে লব্ধে-জাতে সতি, যথোক্তানাং রোগাণাং চ সঙ্ক্ষযাত্ স্তম্ভিতো নরঃ স্যাত্|

Adhikarana atistambhitalakShaNam (20-21) · Śloka 21

অতিস্তম্ভিতং সম্প্রতি লক্ষযতি - - - - | স্তম্ভত্বক্স্নাযুসঙ্কোচকম্পহৃদ্বাগ্ধনুগ্রহৈঃ||২০|| পাদৌষ্ঠত্বক্করৈঃ শ্যাবৈরতিস্তম্ভিতমাদিশেত্| |২১|

স০-ত্বক্ চ স্নাযুশ্চ, তযোঃ সঙ্কোচঃ| হৃদযাদীনাং গ্রহেণ সম্বন্ধঃ| ততঃ স্তম্ভাদীনাং দ্বন্দ্বঃ| স্তম্ভাদিভিস্তথা শ্যাবৈঃ পাদাদিভিরতিস্তম্ভিতং কথযেত্|

Adhikarana atisthUlAdInAM svedaniShedhaH, Atyayike gade mRudusvedaH (21-24) · Śloka 24

| ন স্বেদযেদতিস্থূলরূক্ষদুর্বলমূর্চ্ছিতান্||২১|| স্তম্ভনীযক্ষতক্ষীণক্ষামমদ্যবিকারিণঃ| তিমিরোদরবীসর্পকুষ্ঠশোষাঢ্যরোগিণঃ||২২|| পীতদুগ্ধদধিস্নেহমধূন্ কৃতবিরেচনান্| ভ্রষ্টদগ্ধগুদগ্লানিক্রোধশোকভযার্দিতান্||২৩|| ক্ষুত্তৃষ্ণাকামলাপাণ্ডুমেহিনঃ পিত্তপীডিতান্| গর্ভিণীং পুষ্পিতাং সূতাং, মৃদু চাত্যযিকে গদে||২৪||

স০-অতিস্থূলদীন্ন স্বেদযেত্| অতিস্থূলস্য স্বেদেন মেদোবিলযনাদত্যন্তং শরীরক্ষোভঃ স্যাত্| রূক্ষাদীনাং কার্শ্যমতিশযেন ভবেত্| 'মদ্যবিকারিণঃ' ইত্যবিশেষোক্তাবপি পিত্তাদ্যন্যেষাং সঙ্গ্রহঃ| পিত্তমদ্যবিকারিণস্তু 'পিত্তপীডিতান্' ইত্যনেনৈব সঙ্গৃহীতাঃ| আঢ্যরোগে-বাতরক্তম্| ভ্রষ্টদগ্ধগুদাঃ-অতীসারক্ষারাগ্ন্যাদিভিঃ| গ্লান্যাদীনামর্দিতেন সম্বন্ধঃ| ক্ষুধাদীনাং মেহান্তানাং দ্বন্দ্বঃ, ততো মত্বর্থীয ইনিঃ| ক্ষুধ্বতঃ স্বেদাদত্যন্তং দেহগ্লানিঃ| কামলাপাণ্ডুমতোঃ স্বেদেন পিত্তবৃদ্ধ্যা রোগবৃদ্ধিঃ| যস্মাদধ্যেষ্যতে (হৃ. নি. অ. ১৩|১৫) - "পিত্তপ্রধানাঃ কুপিতাঃ" ইত্যাদি| তথা, (হৃ. নি. অ. ১৩|১৫) - "যঃ পাণ্ডুরোগী সেবেত পিত্তলং তস্য কামলাম্|" ইত্যাদি| মেহিনস্তু স্বেদবৃদ্ধ্যা রোগবৃদ্ধিঃ| গর্ভিণ্যাঃ স্বেদেন গর্ভব্যাপত্| পুষ্পিতাযা রক্তাতিপ্রবৃত্তিঃ| সূতাযাঃ কার্শ্যম্| মৃদু চেতি| যদৈষামতিস্থূলাদীনামাত্যযিকো ব্যাধিঃ-বিসূচিকাদিঃ স্যাত্, তদৈতে মৃদু স্বেদযিতব্যা এব|

Adhikarana svedasAdhyA rOgAH (25-27) · Śloka 27

শ্বাসকাসপ্রতিশ্যাযহিধ্মাধ্মানবিবন্ধিষু| স্বরভেদানিলব্যাধিশ্লেষ্মামস্তম্ভগৌরবে||২৫|| অঙ্গমর্দকটীপার্শ্বপৃষ্ঠকুক্ষিহনুগ্রহে| মহত্বে মুষ্কযোঃ খল্যামাযামে বাতকণ্টকে||২৬|| মূত্রকৃচ্ছ্রার্বুদগ্রন্থিশুক্রঘাতাঢ্যমারুতে| স্বেদং যথাযথং কুর্যাত্তদৌষধবিভাগতঃ||২৭||

স০-শ্বাসাদীনাং বিবন্ধান্তানাং দ্বন্দ্বঃ| শ্বাসাদিমত্সু যথাস্বং স্বেদং কুর্যাত্,- ক্বচিত্তাপং ক্বচিদুপনাহং ক্বচিদূষ্মাণং ক্বচিদ্দ্রবমিতি| কথম্ ? তেষ্বৌষধানি তদৌষধানি, তেষাং বিভাগো-যথাস্বমুপযোগঃ, তেন,- তদৌষধবিভাগেন স্বেদং কুর্যাত্| "খল্লী তীব্ররুজান্বিতা|" ইতি (হৃ. নি. অ. ১৫|৫৫) বাতব্যাধৌ বক্ষ্যতে, আযামবাতকণ্টকৌ চ| আঢ্যমারুতঃ-ঊরুস্তম্ভঃ|

Adhikarana anAgneyasvedasya viShayaH (28) · Śloka 28

স্বেদো হিতস্ত্বনাগ্নেযো বাতে মেদঃকফাবৃতে| |২৮|

স০-মেদঃকফাভ্যাং পবন আবৃতে সত্যনাগ্নেযঃ স্বেদো হিতঃ| অমাগ্নেয ইত্যগ্নের্ঢক্, ততো নঞ্ঽঽসমাসঃ|

Adhikarana anAgneyasvedasya bhedAH (28-30) · Śloka 30

কোঽসাবনাগ্নেযঃ ? ইত্যাহ - - - - | নিবাতং গৃহমাযাসো গুরুপ্রাবরণং ভযম্||২৮|| উপনাহাহবক্রোধা ভূরিপানং ক্ষুধাঽঽতপঃ| ২৮ ১/২||৩০||

স০-নিবাতগৃহাদযোঽনাগ্নেযাঃ স্বেদাঃ| আযাসো-ব্যাযামঃ| গুরুপ্রাবরণং-রল্লকাদি| ভযং-খড্গহস্তরাজপুরুষদর্শনাদিনা| উপনাহোঽপ্যনাগ্নেযঃ স্বেদঃ, উপনাহস্য দ্বৈবিধ্যাত্| তত্র "উপনাহো বচাকিণ্ব" ইত্যাদিরাগ্নেযঃ, তত্র "তাপোঽগ্নিতপ্তবসন" ইত্যনুবৃত্তেঃ| অনাগ্নেযস্তু-"স্নিগ্ধোষ্ণবীর্যৈর্মৃদুভিশ্চর্মপট্টৈঃ" ইত্যাদিকঃ| আহবঃ-সমরঃ| ভূরিপানং-বহুমদ্যপানম্|

Adhikarana svedanasya shodhanA~ggatvam (17) · Śloka 17

স্নেহক্লিন্নাঃ কোষ্ঠগা ধাতুগা বা স্রোতোলীনা যে চ শাখাস্থিসংস্থাঃ| দোষাঃ স্বেদৈস্তে দ্রবীকৃত্য কোষ্ঠং নীতাঃ সম্যক্ শুদ্ধিভির্নির্হ্রিযন্তে| ২৯ ১/২| ইতি শ্রী বৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে স্বেদবিধির্নাম সপ্তদশোঽধ্যাযঃ||১৭||

স০-তে দোষাঃ সম্যক্-সুষ্ঠু, শুদ্ধিভিঃ-বমনবিরেচনলক্ষণাভিঃ, নির্হ্রিযন্তে-নিষ্কাস্যন্তে| কে দোষাঃ ? ইত্যাহ-স্নেহক্লিন্না যে, তথা কোষ্ঠগা ধাতুস্থাশ্চ, তথা স্রোতোলীনাঃ, তথা শাখাস্বস্থিষু চ স্থিতাঃ| কিম্ভূতাঃ ? স্বেদৈর্দ্রবীকৃত্য কোষ্ঠং নীতাঃ-উদরং প্রাপিতাঃ| শালিনীবৃত্তম্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে স্বেদবিধ্যধ্যাযঃ সপ্তদশঃ সমাপ্তঃ|| ১৭||