24. tarpaṇapuṭapākavidhiradhyāyaḥ

Adhikarana adhyAyopakramaH · Śloka

অস্মাদনন্তরং চতুর্বিংশাধ্যাযারম্ভঃ| আশ্চোতনাঞ্জনাভ্যাং হি প্রাযো নযনস্য দৌর্বল্যম্| অতস্তর্পণাদেরুপযোগো যুক্ত ইত্যাহ

Adhikarana tarpaNapuTapAkavidhiradhyAyaH (2) · Śloka 2

অথাতস্তর্পণপুটপাকবিধিমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| গদ্যসুত্রে|২|

স০-তর্পণং চ পুটপাকশ্চ তর্পণপুটপাকৌ, তযোর্বিধিঃ, তম্| শেষং পূর্ববত্|

Adhikarana tarpaNasya viShayo deshaH kAlashca (1-4) · Śloka 4

নযনে তাম্যতি স্তব্ধে শুষ্কে রূক্ষেঽভিঘাতিতে| বাতপিত্তাতুরে জিহ্মে শীর্ণপক্ষ্মাবিলেক্ষণে||১|| কৃচ্ছ্রোন্মীলশিরাহর্ষশিরোত্পাততমোর্জুনৈঃ| স্যন্দমন্থান্যতোবাতবাতপর্যাযশুক্রকৈঃ||২|| আতুরে শান্তরাগাশ্রুশূলসংরম্ভদূষিকে| নিবাতে তর্পণং যোজ্যং শুদ্ধযোর্মূর্দ্ধকাযযোঃ||৩|| কালে সাধারণে প্রাতঃ সাযং বোত্তানশাযিনঃ| |৪|

স০-চক্ষুষি ম্লাযতি সতি, তথা স্তব্ধাদিগুণে তর্পণং কার্যম্| তথা, শীর্ণে পক্ষ্মণী যস্য তদেবম্| আবিলং-অস্পষ্টং, ঈক্ষণং-দর্শনং, যস্য তদেবম্| শীর্ণপক্ষ্ম চ তদাবিলেক্ষণং চ, তত্তস্মিন্| তথা কৃচ্ছ্রোন্মীলাদযঃ-অক্ষিরোগেষু বক্ষ্যন্তে| কৃচ্ছ্রোন্মীলশ্চ শিরাহর্ষশ্চ শিরোত্পাতশ্চ তমশ্চার্জুনশ্চ, তৈরাতুরে| তথা স্যন্দশ্চ মন্থশ্চান্যতোবাতশ্চ বাতপর্যাযশ্চ শুক্রকং চ, তৈরাতুরে| { তথা, নস্যানর্হে| যতো বক্ষ্যতি (শ্লো-২১)-"তর্পণং পুটপাকং চ নস্যানর্হে ন যোজযেত্|" ইতি| তথা, শান্তাঃ শমং গতাঃ, রাগাশ্রুশূলসংরম্ভদূষিকা যস্মিন্নযনে তস্মিন্| কীদৃশি স্থানে ? নিবাতে,-বিগতানিলে| উপলক্ষণং চেদম্| বিগতাতপরজোধূমাদিক ইত্যপি দ্রষ্টব্যম্| কীদৃশযোর্মস্তকদেহযোঃ ? শুদ্ধযোঃ,-যথাযোগং বমনবিরেচননস্যৈঃ কৃতশুদ্ধ্যোরিত্যর্থঃ| কীদৃশি কালে ? সাধারণে,-বসন্তাদিকে| কদা ? সাযং প্রাতর্বা, দোষদূশ্যাদ্যপেক্ষযা| কীদৃশস্যাতুরস্য ? উত্তানশাযিন ইতি শযনস্থস্যোত্তানস্যেত্যর্থঃ|

Adhikarana tarpaNavidhiH (4-6) · Śloka 6

| যবমাষমযীং পালীং নেত্রকোশাদ্বহিঃ সমাম্||৪|| দ্ব্যঙ্গুলোচ্চাং দৃঢাং কৃত্বা যথাস্বং সিদ্ধমাবপেত্| সর্পির্নিমীলিতে নেত্রে তপ্তাম্বুপ্রবিলাযিতম্||৫|| নক্তান্ধ্যবাততিমিরকৃচ্ছ্রবোধাদিকে বসাম্| আপক্ষ্মাগ্রাত্|৬|

স০-যবৈর্মিশ্রা মাষা যবমাষাঃ, তৈঃ কৃতা যা সা যবমাষমযী, তাম্| তাদৃশীং পালীং নেত্রকোশাদ্বাহ্যত উভযপার্শ্বযোঃ সমাং-অনিম্নোন্নতাং কৃত্বা, যথাযোগং দোষদূষ্যাদ্যনুরোধাত্ পক্বং ঘৃতং নিমীলিতে-অনুন্মিষিতে লোচনে ক্ষিপেত্| অথ পাল্যা উচ্ছ্রাযমাহ-দ্ব্যঙ্গুলোচ্চাং,-দ্ব্যঙ্গুলোচ্ছ্রাযবতীম্| তথা দৃঢাং নিবিঢাং, যথা স্নেহো ন স্রবেত্| কীদৃশং সর্পিঃ ? তপ্তেন জলেন প্রকর্ষেণ বিলাযিতং-দ্রবীকৃতম্| নক্তান্ধ্যেত্যাদি| রাত্র্যন্ধ্যাদিষু বসাং যথাস্বৌষধসিদ্ধাং তথৈব বিলাযিতামাবপেত্| কথম্ ? আপক্ষ্মাগ্রাত্,-পক্ষ্মাগ্রাণি যাবন্নিমগ্নানি তাবত্সর্ষিরাদিমাবপেদিতি|

Adhikarana tarpaNadhAraNAvadhiH (6-8) · Śloka 8

| অথোন্মেষং শনকৈস্তস্য কুর্বতঃ||৬|| মাত্রা বিগণযেত্তত্র বর্ত্মসন্ধিসিতাসতে| দৃষ্টৌ চ ক্রমশো ব্যাধৌ শতং ত্রীণি চ পঞ্চ চ||৭|| শতানি সপ্ত চাষ্টৌ চ, দশ মন্থে, দশানিলে| পিত্তে ষট্, স্বস্থবৃত্তে চ বলাসে পঞ্চ ধারযেত্||৮||

স০-অথ-ঘৃতাদ্যাবপনাদনন্তরং, শনৈঃশনৈরুন্মীলনং বিদধতস্তস্য-আতুরস্য, মাত্রাঃ-পূর্বোক্তাঃ, বিগণযেত্| তত্র-তস্মিন্ বর্ত্মাদিকে ব্যাধৌ সর্পিষি ক্ষিপ্তে, শতসঙ্খ্যাদীর্মাত্রা বিগণযেত্ ক্রমেণ| তত্র বর্ত্মরোগে মাত্রাশতম্, সন্ধিরোগে ত্রীণি শতনি, সিতরোগে পঞ্চ শতানি, অসিতরোগে সপ্ত শতানি, দৃষ্টিরোগেঽষ্টৌ শতানি, ধারযেদিতি ক্রমার্থঃ| যথাসঙ্খ্যেন মন্থাখ্যে রোগে দশ শতানি, বাতরোগে দশৈব শতানি, পিত্তরোগে ষট্ শতানি, স্বস্থবৃত্তে চ ষট্ শতানি, কফে পঞ্চ শতানি,ধারযেত্|

Adhikarana tarpaNAnantaraM kRutyam (9) · Śloka 9

কৃত্বাঽপাঙ্গে ততো দ্বারং স্নেহং পাত্রে নিগালযেত্| পিবেচ্চ ধূমং, নেক্ষেত ব্যোম রূপং চ ভাস্বরম্||৯||

স০-{ ততঃ-} যথোক্তমাত্রাধারণাদনন্তরং, অপাঙ্গদেশে পাল্যা দ্বারং কৃত্বা স্নেহং ভাজনে নিক্ষিপেত্| ততঃ সক্তুপিণ্ড্যাঽক্ষিকোশং প্রমৃজ্য স্নেহেরিতকফোপশান্তযে ধূমং চ পিবেত্, ন কেবলং তর্পণং কুর্যাত্| প্রক্ষালিতনেত্রং চৈনং মাত্রযাঽঽমযাদিবশেন ভোজযেত্| তথা, নভো ন পশ্যেদ্ভাস্বরং রূপং চ| উপলক্ষণং চেদম্| আতপাদ্যপি ভাস্বরং ন পশ্যেত্|

Adhikarana vAtAdibhedena tarpaNAvRuttiH AvRutyavadhiH (10) · Śloka 10

ইত্থং প্রতিদিনং বাযৌ, পিত্তে ত্বেকান্তরং, কফে| স্বস্থে চ হ্যন্তরং দদ্যাদাতৃপ্তেরিতি যোজযেত্||১০||

স০-ইত্থং-অনেন ক্রমেণ, পবনে প্রত্যহং তর্পণং দদ্যাত্| পিত্তে পুনরেকান্তরং তর্পণং দদ্যাত্| কফে স্বস্থে চ দ্বিদিনান্তরং যোজযেত্| ইতি-এবং, যাবন্নযনস্য তৃপ্তিঃ স্যাত্তাবত্তর্পণং যোজ্যম্|

Adhikarana tRutpAtRutpAtitRutpalakShaNam (11) · Śloka 11

তৃপ্তস্য কিং লক্ষণং ? ইত্যাহ প্রকাশক্ষমতা স্বাস্থ্যং বিশদং লঘু লোচনম্| তৃপ্তে, বিপর্যযোঽতৃপ্তেঽতিতৃপ্তে শ্লেষ্মজা রূজঃ||১১||

স০-প্রকাশক্ষমত্বাদিকং সম্যক্তৃপ্তস্য লক্ষণম্| প্রকাশক্ষমতা-প্রভাভাস্বরাদিরূপসহত্বম্| অতৃপ্তে-অজাতাযাং তৃপ্তৌ, পিপর্যযঃ-প্রকাশাক্ষমতাদিকঃ| অতিতৃপ্তে সতি কফোদ্ভবাঃ কণ্ডূপৈচ্ছিল্যাদিকা রুজঃ স্যুঃ|

Adhikarana puTapAkasya viShayaH (12-13) · Śloka 13

স্নেহপীতা তনুরিব ক্লান্তা দৃষ্টির্হি সীদতি| তর্পণানন্তরং তস্মাদৃগ্বলাধানকারিণম্||১২|| পুটপাকং প্রযুঞ্জীত পূর্বোক্তেষ্বেব যক্ষ্মসু| |১৩|

স০-স্নেহপীতা দৃষ্টিঃ ক্লান্তা তনুরিব যতোঽবসীদতি, তস্মাত্কারণাত্ তর্পণাদনন্তরং পুটপাকং প্রযুঞ্জীত| কীদৃশম্ ? দৃশোর্বলং দৃগ্বলং, তস্যাধানং-প্রবন্ধেন বৃত্তিঃ, তত্করোতীতি দৃগ্বলাধানকারিণম্| হেতৌ দ্বিতীযা, দৃগ্বলাধানকারিত্বাত্ প্রযুঞ্জীতেত্যর্থঃ| পূর্বোক্তেষ্বেব-তর্পণোক্তেষ্বামযেষু|

Adhikarana puTapAkasya traividhyaM saviShayam (13-14) · Śloka 14

| স বাতে স্নেহনঃ শ্লেষ্মসহিতে লেখনো হিতঃ||১৩|| দৃগ্দৌর্বল্যেঽনিলে পিত্তে রক্তে স্বস্থে প্রসাদনঃ| |১৪|

স০-স চ-পুটপাকো, বাতে স্নেহনো হিতঃ| কফসহিতে মারুতে লেখনো হিতঃ| দৃষ্টিদৌর্বল্যাদিষু প্রসাদনো হিতঃ|

Adhikarana snehanasya dravyANi (14-15) · Śloka 15

ইদানীমেষাং পুটপাকানাং কল্পনামাহ | ভূশযপ্রসহানূপমেদোমজ্জবসামিষৈঃ||১৪|| স্নেহনং পযসা পিষ্টৈর্জীবনীযৈশ্চ কল্পযেত্| |১৫|

স০-ভূশযাঃ- বিলেশযা ভেকগোধাদ্যাঃ, প্রসহাঃ-গোখরাদযঃ, আনূপাঃ-মহামৃগবারিচরবারিশযাঃ, তেষাং মেদোমজ্জবসামিষাণি, তৈঃ| তথা, জীবনীযৈঃ-জীবন্তীকাকোল্যাদিভিশ্চ, ক্ষীরপিষ্টৈঃ স্নেহনং পুটপাকং কল্পযেদ্বৈদ্যঃ|

Adhikarana lekhanasya dravyANi (15-16) · Śloka 16

| মৃগপক্ষিযকৃন্মাংসমুক্তাযস্তাম্রসৈন্ধবৈঃ||১৫|| স্রোতোজশঙ্খফেনালৈর্লেখনং মস্তুকল্কিতৈঃ| |১৬|

স০-মৃগাঃ-হরিণাদ্যাঃ, পক্ষিণো-লাবাদ্যাঃ, তেষাং যকৃন্মাংসানি, তৈঃ| তথা, মুক্তাদিভির্মস্তুকল্কিতৈর্লেখনং পুটপাকং কল্পযেদ্বৈদ্যঃ| প্রসহানাং মৃগপক্ষিণাং স্নেহনে পুটপাক উপযুক্তত্বাত্ জাঙ্গলা এব মৃগপক্ষিণোঽত্র গ্রাহ্যাঃ|

Adhikarana prasAdanasya dravyANi (16-17) · Śloka 17

| মৃগপক্ষিযকৃন্মজ্জবসান্ত্রহৃদযামিষৈঃ||১৬|| মধুরৈঃ সঘৃতৈঃ স্তন্যক্ষীরপিষ্টৈঃ প্রসাদনম্| |১৭|

স০-মৃগপক্ষ্যাদীনাং যকৃন্মজ্জবসাহৃদযামিষাণি, তৈঃ| তথা, মধুরৈঃ-মধুরবর্গোক্তৈঃ, ঘৃতান্বিতৈঃ স্তন্যক্ষীরপিষ্টৈঃ প্রসাদনং পুটপাকং কল্পযেদ্বৈদ্যঃ| অত্র স্তন্যং স্ত্রিযা এব|

Adhikarana puTapAkasya sAdhanam puTapAkavidhiH (17-19) · Śloka 19

অধুনা পুটপাকস্য কল্পনামাহ বিল্বমাত্রং পৃথক্ পিণ্ডং মাংসভেষজকল্কযোঃ||১৭|| উরুবূকবটাম্ভোজপত্রৈঃ স্নেহাদিষু ক্রমাত্| বেষ্টযিত্বা মৃদা লিপ্তং ধবধন্বনগোমযৈঃ||১৮|| পচেত্প্রদীপ্তৈরগ্ন্যাভং পক্বং নিষ্পীড্য তদ্রসম্| নেত্রে তর্পণবদ্যুঞ্জ্যাত্|১৯|

স০-মাংসং চ ভেষজকল্কশ্চ তযোঃ পৃথক্ পলমাত্রং পিণ্ডমেরণ্ডাদিপত্রৈর্বেষ্টযিত্বা কৃষ্ণমৃত্তিকযা লিপ্তং বৃদ্ধবৈদ্যব্যবহারাত্ দ্ব্যঙ্হ্গুলোত্সেধং মৃত্তিকালেপং কৃত্বা ক্রমেণ ধবাদীন্ধনৈঃ প্রদীপ্তৈঃ পচেত্| তত্র স্নেহনে পুটপাক এরণ্ডপত্রৈর্বেষ্টনং ধবকাষ্ঠৈঃ প্রদীপনম্, লেখনে বটপত্রৈর্বেষ্টনং ধন্বনেন্ধনেন প্রদীপনম্, প্রসাদনে জলজপত্রৈর্বেষ্টনং গোমযেন্ধনেন প্রদীপনম্, ইতি ক্রমার্থঃ| অগ্ন্যাভং-অগ্নিবর্ণং সত্, পক্বং জ্ঞাত্বা, অপনীতপত্রং বিধায, বাসসা নিষ্পীড্য, তদ্রসং নযনে তর্পণমিব যুঞ্জ্যাত্|

Adhikarana puTapAkadhAraNavidhiH (19-20) · Śloka 20

| শতং দ্বে ত্রীণি ধারযেত্||১৯|| লেখনস্নেহনান্ত্যেষু| |২০|

স০-লেখনাদিষু শতাদীনি ধারযেত্| তত্র লেখনে শতং মাত্রাণাং ধারযেত্| স্নেহনে দ্বে শতে| অন্ত্যে-প্রসাদনে, ত্রীণি শতানি ধারযেত্|

Adhikarana puTapAkAnAmuShNashItabhedaH (20) · Śloka 20

কোষ্ণৌ পূর্বৌ, হিমোঽপরঃ| |২০|

স০-পূর্বো-স্নেহনলেখনৌ, কোষ্ণৌ যোজ্যৌ| হিমোঽপরঃ-প্রসাদনাখ্যঃ|

Adhikarana lekhanasnehAnayorante kRutyam (20) · Śloka 20

| ধূমপোঽন্তে তযোরেব|২০|

স০-তযোঃ-আদ্যযোঃ পুটপাকযোঃ, অন্তে ধূমপঃ স্যাত্| স্নেহেরিতকফোপশান্ত্যৈ, ন তু প্রসাদনান্তে, ইত্যেবশব্দার্থঃ|

Adhikarana puTapAkasya samyagyogAdi lakShaNam (20) · Śloka 20

| যোগাস্তত্র চ তৃপ্তিবত্||২০||

স০-তত্র চ-তেষু পুটপাকেষু, যোগাস্তর্পণ ইব স্যুঃ| তৃপ্তিবদিতি সপ্তম্যন্তাদ্বতিঃ| যোগা ইতি বহুবচননির্দেশাত্ সম্যগ্যোগাযোগাতিযোগা গৃহ্যন্তে|

Adhikarana tarpaNapuTapAkaniShedhaH (21) · Śloka 21

তর্পণং পুটপাকং চ নস্যানর্হে ন যোজযেত্| |২১|

স০-তর্পণপুটপাকৌ নস্যাযোগ্যে ন যোজযেত্| নস্যানর্হাঃ-"যোজ্যেন্ন তু নাবনম্|" ইত্যাদ্যুক্তাঃ|

Adhikarana tarpaNapuTapAkayorAcAraH (21-21.5) · Śloka 21

যাবন্ত্যহানি যুঞ্জীত দ্বিস্ততো হিতভাগ্ভবেত্||২১|| মালতীমল্লিকাপুষ্পৈর্বদ্ধাক্ষো নিবসেন্নিশাম্||২১.৫||

স০-যাবন্ত্যহানি-যাবন্মাত্রাণি দিনানি, তর্পণপুটপাকৌ কুর্বীত ততো দ্বিগুণানি দিনানি হিতসেবী স্যাত্| কৃততর্পণ পুটপাকো মালত্যাদিপুষ্পৈর্বদ্ধাক্ষঃ সন্ বিভাবরীং বসেত্| মালতী-সুমনাঃ| মল্লিকা-গন্ধবার্ষিকা|

Adhikarana netrarakShaNe yatnaH kAryaH (24) · Śloka 24

সর্বাত্মনা নেত্রবলায যত্নং কুর্বীত নস্যাঞ্জনতর্পণাদ্যৈঃ| দৃষ্টিশ্চ নষ্টা বিবিধং জগচ্চ তমোমযং জাযত একরূপম্||২২.৫|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে তর্পণপুটপাকবিধির্নাম চতুর্বিংশোঽধ্যাযঃ||২৪||

স০-সর্বেণ প্রকারেণ নেত্রবলায-চক্ষুঃসামর্থ্যায, নস্যাদিভির্যত্নং কুর্যাত্| দৃষ্টিশ্চেতি চ হেতৌ| যতো দৃষ্টির্যদি ন স্যাত্ততো জগদ্বিবিধমপি তমোমযং-অন্ধকাররূপং, একরূপং-একলক্ষণং, সম্পদ্যত ইতি| উপজাতির্বৃত্তম্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে তর্পণপুটপাকবিধির্নাম চতুর্বিংশোঽধ্যাযঃ সমাপ্তঃ|| ২৪||