18. vamanavirēcanavidhiradhyāyaḥ

Adhikarana adhyAyopakramaH · Śloka

"শুদ্ধিভির্নির্হ্রিযন্তে" ইত্যুক্তম্| কাস্তাঃ শুদ্ধযঃ ? ইতি শুদ্ধ্যর্থং বমনবিরেচনাধিকারঃ - - - -

Adhikarana vamanavirecanavidhiradhyAyaH (2) · Śloka 2

"শুদ্ধিভির্নির্হ্রিযন্তে" ইত্যুক্তম্| কাস্তাঃ শুদ্ধযঃ ? ইতি শুদ্ধ্যর্থং বমনবিরেচনাধিকারঃ - - - - অথাতো বমনবিরেচনবিধিমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে||২||

স০-অথাত ইত্যাদি| বমনং চ বিরেচনং চ, তযোর্বিধিঃ| শেষং পূর্ববদ্ব্যাখ্যেযম্| তত্র যথোদ্দেশতযা নির্দেশ ইতি পূর্বং বমনবিধিমাচষ্টে| অথবা বিরেকাত্পূর্বং বমনস্যোপন্যাসো যুক্তঃ, হৃতকফস্য হি সম্যগ্বিরেকা ভবন্তি| তথা চোক্তম্ (চরকে সি. অ. ১|৮) - "বিরিচ্যতে মন্দকফস্তু সম্যক্" ইতি|

Adhikarana vamanavirecanayoH sAmAnyato viShayaH (1) · Śloka 1

অতো বমনবিধিমাহ - - - - কফে বিদধ্যাদ্বমনং সংযোগে বা কফোল্বণে| তদ্বদ্বিরেচনং পিত্তে|১|

স০-শ্লেষ্মণি বমনং কুর্যাত্, সংযোগে চ কফাধিকে| তত্র চ পিত্তকফবান্ বমনং কুর্যাত্| যথা,-কফে কফাধিকে সংযোগে বমনং কুর্যাত্ তথৈব পিত্তে পিত্তাধিকে বা সংযোগে বিরেচনং কুর্যাদিতি তদ্বচ্ছব্দস্যার্থঃ|

Adhikarana vamanasya visheShato viShayaH (1-3) · Śloka 3

| বিশেষেণ তু বামযেত্||১|| নবজ্বরাতিসারাধঃপিত্তাসৃগ্রাজযক্ষ্মিণঃ| কুষ্ঠমেহাপচীগ্রন্থিশ্লীপদোন্মাদকাসিনঃ||২|| শ্বাসহৃল্লাসবীসর্পস্তন্যদোষোর্ধ্বরোগিণঃ|৩|

স০-বিশেষেণ পুনর্নবজ্বরাতিসারাদীন্ ঊর্ধ্বরোগপর্যন্তান্ বামযেত্| [ নবজ্বরাদীনাং যক্ষ্মান্তানাং দ্বন্দ্ব ইনিঃ| এবং চ কুষ্ঠাদীনাং কাসান্তানাং শ্বাসাদীনামূর্ধ্বরোগান্তানাং চ দ্বন্দ্বে ইনী কার্যৌ|

Adhikarana avAmyAH visheShato viShayaH viShadyAbhyavahAre tu vamanam (3-6) · Śloka 6

| অবাম্যা গর্ভিণী রূক্ষঃ ক্ষুধিতো নিত্যদুঃখিতঃ||৩|| বালবৃদ্ধকৃশস্থূলহৃদ্রোগিক্ষতদুর্বলাঃ| প্রসক্তবমথুপ্লীহতিমিরক্রিমিকোষ্ঠিনঃ||৪|| ঊর্ধ্বপ্রবৃত্তবায্বস্রদত্তবস্তিহতস্বরাঃ| মূত্রাঘাত্যুদরী গুল্মী দুর্বমোঽত্যগ্নিরর্শসঃ||৫|| উদাবর্তভ্রমাষ্ঠীলাপার্শ্বরুগ্বাতরোগিণঃ| ঋতে বিষগরাজীর্ণবিরুদ্ধাভ্যবহারতঃ||৬||

স০-গর্ভিণ্যাদযো বাতরোগান্তা অবাম্যাঃ| অর্শাংসি বিদ্যন্তে যস্য সোঽর্শসঃ| "অর্শআদিভ্যশ্চ" ইত্যচ্| তত্র গর্ভিণ্যা বমনাদ্গর্ভব্যাপদ্গর্ভভ্রংশশ্চ (শাচ্চ) দারুণরোগস্য রক্তপিত্তাদেরিদ্ভূতিঃ| রূক্ষস্য বাযুঃ বাগ্ঘনুহস্তাদীনাং ব্যাপারাযতীর্হত্বা হন্বাদীনাং গ্রহং কুর্যাত্| ক্ষুধিতস্য নিত্যদুঃখিতস্য চ বাযুনা ক্ষপিতশরীরত্বাদ্বলক্ষযঃ স্যাত্| বালাদীনামৌষধবলাক্ষমত্বাত্ বলোপরোধঃ স্যাত্| হৃদ্রোগাদীনাং হৃদযোপরোধঃ| প্রসক্তচ্ছর্দীনামুদানো বাযুরুত্ক্ষিপ্য প্রাণানপি হিংস্যাত্| এবমন্যত্রাপি রোগোদ্গমশ্চিন্ত্যঃ| [ কিং সর্বদৈব গর্ভিণ্যাদযোঽবাম্যাঃ ? উত কস্যাঞ্চিদবস্থাযাং বাম্যাঃ, ইত্যাহ- ] ঋত ইত্যাদি| বিষাদ্যভ্যবহারমন্তরেণ| বিষাদ্যভ্যবহারে তু বাম্যা এবৈতে|

Adhikarana keciddhUmAntaiH karmabhirvarjyAH ajIrNinaH sarvaiH karmabhirvarjyAH (7) · Śloka 7

প্রসক্তবমথোঃ পূর্বে প্রাযেণামজ্বরোঽপি চ| ধূমান্তৈঃ কর্মভির্বর্জ্যাঃ, সর্বৈরেব ত্বজীর্ণিনঃ||৭||

স০-প্রসক্তবমথোঃ পূর্বে-পূর্বস্থিতা দুর্বলান্তা একাদশাতুরাঃ, তথাঽঽমজ্বরশ্চ| তে সর্বে ধূমান্তৈঃ কর্মভিঃ প্রাযেণ বর্জ্যাঃ, ন কেবলং বমনেনৈব| ধূমগ্রহণং গণ্ডূষাদিকর্মণঃ পরিহারার্থম্| প্রাযোগ্রহণমষ্টমাসাযা গর্ভিণ্যা নিরূহা ন বর্জ্যা ইতি সূচনার্থম্| তথা, সদ্যোভুক্তস্য জ্বরিতস্য সতো বমনানুজ্ঞানার্থম্| তু-পুনঃ, অজীর্ণিনঃ পুরুষাঃ সর্বৈরেব-বমনাদিভির্গণ্ডূষাদিভিশ্চ বর্জ্যাঃ| আমদোষভযাত্তৈর্বমনাদযো ন সেব্যা ইত্যর্থঃ| অত্রাপি প্রাযোগ্রহণমনুবর্ততে| সদ্যোঽজীর্ণিনাং হি বমনমনুজ্ঞাতমেব|

Adhikarana virecanasya visheShato viShayaH (8-10) · Śloka 10

বিরেকসাধ্যা গুল্মার্শোবিস্ফোটব্যঙ্গকামলাঃ| জীর্ণজ্বরোদরগরচ্ছর্দিপ্লীহহলীমকাঃ||৮|| বিদ্রধিস্তিমিরং কাচঃ স্যন্দঃ পক্বাশযব্যথা| যোনিশুক্রাশ্রযা রোগাঃ কোষ্ঠগাঃ কৃমযো ব্রণাঃ||৯|| বাতাস্রমূর্ধ্বগং রক্তং মূত্রাঘাতঃ শকৃদ্গ্রহঃ| বাম্যাশ্চ কুষ্ঠমেহাদ্যাঃ|১০|

স০-বিরেকেণ সাধ্যাঃ-উপক্রম্যাঃ, গুল্মাদযঃ শকৃদ্গ্রহপর্যন্তাঃ| পক্বাশযে ব্যথা পক্বাশযব্যথা| বাম্যাশ্চেতি চঃ সমুচ্চযে| যে চ কুষ্ঠাদ্যা ঊর্ধ্বরোগপর্যন্তা বমনার্হা উক্তাস্তে চ বিরেচ্যাঃ|

Adhikarana avirecyAH visheShato viShayaH (10-11) · Śloka 11

| ন তু রেচ্যা নবজ্বরী||১০|| অল্পাগ্র্যধোগপিত্তাস্রক্ষতপায্বতিসারিণঃ| সশল্যাস্থাপিতক্রূরকোষ্ঠাতিস্নিগ্ধশোষিণঃ||১১||

স০-তুরবধারণে| নবজ্বরো নৈব রেচ্যঃ| তস্য হি বিরেচনমপক্বান্ দোষাননির্হরন্ বাতকোপাযৈব স্যাত্| যক্ষ্মাদীনাং ত্ববস্থাবশান্মৃদুবিরেচ্যত্বমনুজ্ঞাতমেব| যথা চ পঠিষ্যতি (হৃ. চি. অ. ৫|১)- "বলিনো বহুদোষস্য স্নিগ্ধস্বিন্নস্য শোধনম্| ঊর্ধ্বাধো যক্ষ্মিণঃ কুর্যাত্সস্নেহং যন্ন কর্শনম্||" ইতি [ যক্ষ্মণঃ ]| তথা (হৃ. চি. অ. ৯|৪) - "অপি চাধ্মানগুরুতাশূলস্তৈমিত্যকারিণি| প্রাণদা প্রাণদা দোষে বিবদ্ধে সম্প্রবর্তিনী||" ইত্যাদিনাঽতীসারস্যাপি মৃদুবিরেচনমনুজ্ঞাতম্| নৈবং নবজ্বরস্য স্বল্পবিরেচ্যত্বং কদাঽপি| অল্পাগ্ন্যাদযঃ শোষ্যন্তা ন বিরেচ্যাঃ| তত্রাল্পাগ্নিরবলত্বাদ্ভেষজবেগং ন সহতে| অধোগরক্তপিত্তাতিসারিণোরতিপ্রবৃত্ত্যা হন্যাত্| ক্ষতপাযোঃ প্রাণোপরোধকরীং রুজাং জনযেত্| সশল্যস্য ক্ষতে বাযুরাশ্রিতো জীবিতং হিংস্যাত্| আস্থাপিতস্য ভেষজবেগাসহনাদ্বলোপরোধঃ স্যাত্| ক্রূরকোষ্ঠস্যৌষধোদ্ধতা দোষা হ্যপ্রবর্তমানা হৃদযশূলপর্বভেদানাহচ্ছর্দিমূর্চ্ছাক্লমান্ জনযিত্বা প্রাণান্ হন্যুঃ| অতিস্নিগ্ধস্যাতিযোগায স্যাত্| শোষিণঃ ক্ষীণধাতুতযা মলবলত্বম্, তদভাবাদ্দেহবিনাশঃ স্যাদিতি|

Adhikarana vamanavidhiH (12-18) · Śloka 18

অথ সাধারণে কালে স্নিগ্ধস্বিন্নং যথাবিধি| শ্বোবম্যমুত্ক্লিষ্টকফং মত্স্যমাষতিলাদিভিঃ||১২|| নিশাং সুপ্তং সুজীর্ণান্নং পূর্বাহ্ণে কৃতমঙ্গলম্| নিরন্নমীষত্স্নিগ্ধং বা পেযযা পীতসর্পিষম্||১৩|| বৃদ্ধবালাবলক্লীবভীরূন্ রোগানুরোধতঃ| আকণ্ঠং পাযিতান্মদ্যং ক্ষীরমিক্ষুরসং রসম্||১৪|| যথাবিকারবিহিতাং মধুসৈন্ধবসংযুতাম্| কোষ্ঠং বিভজ্য ভৈষজ্যমাত্রাং মন্ত্রাভিমন্ত্রিতাম্||১৫|| "ব্রহ্মদক্ষাশ্বিরুদ্রেন্দ্রভূচন্দ্রার্কানিলানলাঃ| ঋষযঃ সৌষধিগ্রামা ভূতসঙ্ঘাশ্চ পান্তু বঃ||১৬|| রসাযনমিবর্ষীণামমরাণামিবামৃতম্| সুধেবোত্তমনাগানাং ভৈষজ্যমিদমস্তু তে||১৭|| ঔম্ নমো ভগবতে ভৈষজ্যগুরবে বৈডূর্যপ্রভরাজায| তথাগতাযার্হতে সম্যক্সম্বুদ্ধায| তদ্যথা| ঔম্ ভৈষজ্যে ভৈষজ্যে মহাভৈষজ্যে সমুদ্রতে স্বাহা| " প্রাঙ্মুখং পাযযেত্| |১৮|

স০-এতত্ পূর্বোক্তং রেচ্যারেচ্যত্বমবগম্যানন্তরং সাধারণে-শ্রাবণাদৌ কালে, যথাবিধি-স্নেহস্বেদাধ্যাযোদিতেন ক্রমেণ, স্নিগ্ধস্বিন্নং পুরুষং ভৈষজ্যমাত্রাং প্রাঙ্মুখং পাযযেদিতি বক্ষ্যমাণেন সম্বন্ধঃ| কীদৃশম্ ? শ্বোবম্যং-প্রাতর্বমনার্হম্| বম্যমিতি "অর্হেকৃত্যতৃচশ্চ" ইত্যর্হার্থে পোরদুপধাদিতি যত্| উত্ক্লিষ্টঃ-স্থানাচ্চলিতঃ, কফো যস্য তমুত্ক্লিষ্টকফম্| কৈঃ? মত্স্যাদিভিঃ| অন্তর্ভাবিতণ্যর্থোঽত্র| উত্ক্লেশিতকফমিত্যর্থঃ| তথা, নিশাং সুপ্তম্| "কালাধ্বনোঃ" ইতি দ্বিতীযা| অত এব যথোচিতঃ সকলনিশাস্বাপোঽত্রোপলক্ষ্যতে| তথা, সুষ্ঠু জীর্ণমন্নং-আহারো যস্য তম্| কদা পাযযেত্ ? পূর্বাহ্ণে-প্রাতঃকালে| কিম্ভূতম্ ? কৃতং মঙ্গলং-স্বস্ত্যযনাদি, যস্য তম্| মঙ্গলমিত্যুপলক্ষণার্থম্,- কৃতদেবদ্বিজাগ্নিগুরুবৃদ্ধার্চনমপীতি দ্রষ্টব্যম্| তথা, নিরন্নং-অকৃতাহারম্| আতুরবশাদ্বা কিঞ্চিত্স্নিগ্ধম্| কথম্ ? ইত্যাহ-পেযযা পীতসর্পিষম্| বৃদ্ধেত্যাদি| তথা, অসৌ বাম্যো বৃদ্ধো বা বালো বা দুর্বলো বা ক্লীবঃ-খেদাসহিষ্ণুর্বা ভবতি, ভীরুর্বা-কাতরো ভবতি| তদা রোগানুরোধাদাকণ্ঠং-অতিমাত্রং মদ্যক্ষীরাদিকং পাযযেত্| তদনন্তরং ভৈষজ্যমাত্রাং পাযযেত্| সঙ্গ্রহেঽপ্যুক্তম্ (সূ. অ. ২৭) - "ভীরুকৃশবালবৃদ্ধসুকুমারান্বা দোষানুরোধেনাকণ্ঠং পীতযূষেক্ষুরসক্ষীরতক্রমাংসরসমদ্যতুষোদকযবাগূমণ্ডান্যতমম্" ইতি| কিম্ভূতাং মাত্রাম্ ? যথাবিকারবিহিতাং,- রোগানুসারেণ সাধিতাম্| তথা, মধুসৈন্ধবাভ্যাং যুতাম্| কিং কৃত্বা ? কোষ্ঠং-মৃদুমধ্যক্রূরলক্ষণং, বিভজ্য-বিচার্য| শ্লেষ্মাধিক্যেন মৃদুত্বং, শ্লেষ্মমধ্যত্বেন মধ্যত্বং, শ্লেষ্মহীনত্বেন ক্রূরত্বং বমনে কোষ্ঠস্য বোধ্যম্| তথা চোক্তম্ চরকে (সি. অ. ১|৮) - "শ্লেষ্মোত্তরশ্চ্ছর্দযতে হ্যদুঃখম্" ইতি| কিম্ভূতাং ভৈষজ্যমাত্রাম্ ? মন্ত্রাভিমন্ত্রিতাম্| তানেব মন্ত্রানাহ-ব্রহ্মেত্যাদিগ্রন্থেন|

Adhikarana pAnAnantaraM vidhiH (18) · Śloka 18

পীতো মুহূর্তমনুপালযেত্| তন্মনাঃ|১৮|

স০-ভৈষজ্যমাত্রাং পীতঃ সন্নাতুরঃ মুহূর্তং তন্মনাঃ-বমিগতচিত্তঃ, অনুপালযেত্-প্রতীক্ষেত|

Adhikarana pravRuttavamanasya kRutyam (18-21) · Śloka 21

| জাতহৃল্লাসপ্রসেকশ্চ্ছর্দযেত্ততঃ||১৮|| অঙ্গুলিভ্যামনাযস্তো নালেন মৃদুনাঽথবা| গলতাল্বরুজন্ বেগানপ্রবৃত্তান্ প্রবর্তযন্||১৯|| প্রবর্তযন্ প্রবৃত্তাংশ্চ জানুতুল্যাসনে স্থিতঃ| উভে পার্শ্বে ললাটং চ বমতশ্চাস্য ধারযেত্||২০|| প্রপীডযেত্তথা নাভিং পৃষ্ঠং চ প্রতিলোমতঃ| |২১|

স০-ততঃ-অনন্তরং, সঞ্জাতহৃল্লাসপ্রসেকঃ সন্ ছর্দযেত্| হৃল্লাসো-হৃদুপরোধঃ| প্রসেকো-নিষ্ঠীবনম্| কথং বমেত্ ? অঙ্গুলিভ্যাং দ্বাভ্যাম্| যদ্বা, কোমলেন সুবর্চলৈরণ্ডাদিজেন-নালেন মৃদুনা বমেত্| কীদৃশঃ ? অনাযস্তঃ,- অনাযাসেনেত্যর্থঃ| অপরং গলতাল্বপীডযন্| তথা, অপ্রবৃত্তান্ বেগান্ প্রবর্তযন্ প্রবৃত্তাশ্চ প্রবর্তযন্| জানুপ্রমাণে পীঠে স্থিতঃ| চ-অপরং, অস্য-নরস্য, বমনং কুর্বতো দ্বে পার্শ্বে ললাটং চ ধারযেত্| পরিচারক ইতি শেষঃ| নাভিং চ পীডযেত্| পৃষ্ঠং চ প্রতিলোমতঃ-অসন্মার্গেণ পীডযেত্|

Adhikarana doShabhedena vamanadravyabhedaH (21-22) · Śloka 22

| কফে তীক্ষ্ণোষ্ণকটুকৈঃ পিত্তে স্বাদুহিমৈরিতি||২১|| বমেত্ স্নিগ্ধাম্ললবণৈঃ সংসৃষ্টে মরুতা কফে| |২২|

স০-কফে তীক্ষ্ণোষ্ণকটুকৈর্দ্রব্যৈর্বমেত্| পিত্তে স্বাদুশীতৈর্দ্রব্যৈর্বমেত্| স্নিগ্ধাম্ললবণৈর্বাযুনা যুক্তে কফে বমেত্|

Adhikarana vamanAvadhiH (22) · Śloka 22

কিযন্তং কালং বমেত্ ? ইত্যাহ - - - - | পিত্তস্য দর্শনং যাবচ্ছেদো বা শ্লেষ্মণো ভবেত্||২২||

স০-যাবত্ পিত্তস্য দর্শনং স্যাত্, কফস্য বা ছেদঃ-অন্তঃ স্যাত্, তাবদ্বমেত্|

Adhikarana hInavegasyauShadham (23) · Śloka 23

হীনবেগঃ কণাধাত্রীসিদ্ধার্থলবণোদকৈঃ| বমেত্পুনঃপুনঃ|২৩|

স০-হীনবেগো নরঃ কণাধাত্রীসিদ্ধার্থলবণোদকৈরসকৃদ্বমেত্|

Adhikarana hInayogalakShaNAm hInayogajA rogAH (23-24) · Śloka 24

| তত্র বেগানামপ্রবর্তনম্||২৩|| প্রবৃত্তিঃ সবিবন্ধা বা কেবলস্যৌষধস্য বা| অযোগস্তেন নিষ্ঠীবকণ্ডূকোঠজ্বরাদযঃ||২৪||

স০-তত্র-তেষু সম্যগ্যোগাতিযোগাযোগেষু মধ্যাত্, বেগানামপ্রবর্তনমসাবযোগঃ| সবিবন্ধা চ যা প্রবৃত্তিঃ সোঽপ্যযোগঃ| কেবলস্য-দোষাদিরহিতস্যৌষধস্য যা প্রবৃত্তিঃ সোঽপ্যযোগঃ| তেন-অযোগেন, নিষ্ঠীবাদযঃ স্যুঃ|

Adhikarana samyagyogalakShaNam (1-25) · Śloka 25

নির্বিবন্ধং প্রবর্তন্তে কফপিত্তানিলাঃ ক্রমাত্| (মনঃপ্রসাদঃ স্বাস্থ্যং চাবস্থানং চ স্বযং ভবেত্| বৈপরীত্যমযোগানাং ন চাতিমহতি ব্যথা||১|| ) সম্যগ্যোগে|২৫|

স০-সম্যগ্যোগে কফপিত্তানিলাঃ ক্রমেণ নির্বিবন্ধং-নিঃসঙ্গং প্রবর্তন্তে|

Adhikarana atiyogalakShaNam (25-26) · Śloka 26

| অতিযোগে তু ফেনচন্দ্রকরক্তবত্||২৫|| বমিতং ক্ষামতা দাহঃ কণ্ঠশোষস্তমো ভ্রমঃ| ঘোরা বায্বামযা মৃত্যুর্জীবশোণিতনির্গমাত্||২৬||

স০-অতিযোগে পুনঃ ফেনচন্দ্রকরক্তবদ্বমিতং-বমনং ভবতি| ফেনশ্চ চন্দ্রকশ্চ রক্তং চ, তানি বিদ্যন্তে যস্য বমিতস্য তদেবম্| তথা, ক্ষামতাদযো ভবন্তি| তমঃ-তিমিরদর্শনং, দারুণাশ্চ বাতরোগাঃ| তথা মৃত্যুর্ভবতি, জীবাখ্যস্য শোণিতস্য নির্গমাত্-নিষ্কাসাত্|

Adhikarana samyagvAntasyopacAraH (27) · Śloka 27

সম্যগ্যোগেন বমিতং ক্ষণমাশ্বাস্য পাযযেত্| ধূমত্রযস্যান্যতমং স্নেহাচারমথাদিশেত্||২৭||

স০-সম্যগ্যোগেন বমিতে সতি মুহূর্তমাশ্বাস্য-শীতবাতাদিনা, ধূমত্রযস্য-স্নিগ্ধমধ্যতীক্ষ্ণাখ্যস্য, অন্যতমং-একং, পাযযেদ্বৈদ্যঃ| অথ-অনন্তরং, স্নেহাচারং-"উষ্ণোদকোপচারী স্যাত্" ইত্যাদিকং, আদিশেত্|

Adhikarana samyagvAntasya peyAdikrameNa bhojanam (28) · Śloka 28

ততঃ সাযং প্রভাতে বা ক্ষুদ্বান্ স্নাতঃ সুখাম্বুনা| ভুঞ্জানো রক্তশাল্যন্নং ভজেত্পেযাদিকং ক্রমম্||২৮||

স০-ততঃ-ঊর্ধ্বং, সাযং-অপরাহ্ণে, প্রভাতে-পূর্বাহ্ণে বা, বভুক্ষিত উষ্ণোদকেন স্নাতো রক্তশাল্যন্নং ভুঞ্জানঃ পেযাদিকং ক্রমং ভজেত্|

Adhikarana peyAdikramaH (29) · Śloka 29

তমেব পেযাদিকং ক্রমমাহ - - - - পেযাং বিলেপীমকৃতং কৃতং চ যূষং রসং ত্রীনুভযং তথৈকম্| ক্রমেণ সেবেত নরোঽন্নকালান্ প্রধানমধ্যাবরশুদ্ধিশুদ্ধঃ||২৯||

স০-প্রধানা চ মধ্যা চাবরা চ প্রধানমধ্যাবরাঃ| প্রধানমধ্যাবরাশ্চ তাঃ শুদ্ধযশ্চ, তাভিঃ শুদ্ধো নরঃ ক্রমেণ-যথাসঙ্খ্যং, পেযাং ত্রীনন্নকালান্ দ্বাবন্নকালাবেকন্নকালং ভজেদিতি| বিলেপ্যাদিষ্বপ্যেবং যোজ্যম্| এতদেব স্পষ্টীকৃত্যোচ্যতে| যথা,-প্রধানশুদ্ধ্যা শুদ্ধো নরো দ্বাবন্নকালাবেকস্মিন্ দিনে পেযাং ভজেত্| দ্বিতীযেঽহন্যেকমন্নকালং পেযাং দ্বিতীযমন্নকালং বিলেপীম্| তৃতীযে বাসরে দ্বাবন্নকালৌ বিলেপীমেব| চতুর্থে দিবসে অকৃতং-শুণ্ঠীলবণাদ্যসংস্কৃতং যূষং, কৃতং-শুণ্ঠীলবণাদিসংস্কৃতং যূষং চ দ্বাবন্নকালৌ ভজেত্, পঞ্চমেঽহ্নি প্রথমেঽন্নকালে চ| চঃ সমুচ্চযে| ত্রিষ্বপি কালেষ্বকৃতং কৃতং চ যূষং ভজেত্, বিভজ্য তাবদ্গম্যতে| এবং কালত্রযং কৃতাকৃতং রসং বিভজ্য ভোজযেত্| সপ্তরাত্রেণ (সপ্তাহাত্) প্রকৃতিভোজনং ক্রমেণ সেবেত| এবং যথাস্বং মধ্যশুদ্ধিশুদ্ধস্যাবরশুদ্ধিশুদ্ধস্য চ যোজনা কার্যা| মুনিস্ত্বাহ (চ. সূ. অ. ১৫|১৭) - "অথৈনং সাযাহ্নে পরে বাঽহ্নি সুখোদকপরিষিক্তং পুরাণানাং লোহিতশালিতণ্ডুলানাং স্ববক্লিন্নাং মণ্ডপূর্বাং সুখোষ্ণাং যবাগূং পাযযেদগ্নিবলমভিসমীক্ষ্য| এবং দ্বিতীযে তৃতীযে চান্নকালে| চতুর্থে ত্বন্নকালে তথাবিধানামেব শালীনাং সুস্বিন্নাং বিলেপীমুষ্ণোদকদ্বিতীযামস্নেহলবণামল্পস্নেহলবণাং বা ভোজযেত্| এবং পঞ্চমে ষষ্ঠে চান্নকালে| সপ্তমে ত্বন্নকালে তথাবিধানামেব শালীনাং দ্বিপ্রসৃতং সুস্বিন্নমোদনমুষ্ণোদকানুপানং তনুনা তনুস্নেহলবণোপপন্নেন মৃদ্গযূষেণ ভোজযেত্| এবমষ্টমে নবমে চান্নকালে| দশমে ত্বন্নকালে লাবকপিঞ্জলাদীনামন্যতমস্য মাংসস্য রসেনৌদকলাবণিকেন নাতিসারবতা ভোজযেদুষ্ণোদকানুপানম্| এবমেকাদশে দ্বাদশে চান্নকালে| অত ঊর্ধ্বমন্নগুণান্ ক্রমেণোপযুঞ্জানঃ সপ্তাহাত্ প্রকৃতিভোজনমাগচ্ছেত্|" ইতি| ত্রীনিতি "কালাধ্বনোরত্যন্তসংযোগে" ইতি দ্বিতীযা|

Adhikarana peyAdikramasya phalam (30) · Śloka 30

অধুনা পেযাদিক্রমস্য ফলং বক্তি - - - - যথাঽণুরগ্নিস্তৃণগোমযাদ্যৈঃ সন্ধুক্ষ্যমাণো ভবতি ক্রমেণ| মহান্ স্থিরঃ সর্বপচস্তথৈব শুদ্ধস্য পেযাদিভিরন্তরাগ্নিঃ||৩০||

স০-যথা বাহ্যোঽগ্নিরণুঃ-অত্যল্পঃ, তৃণগোমযকাষ্ঠদলাদিভিঃ সন্ধুক্ষ্যমাণঃ-উদ্দীপ্যমানো, মহান্ স্থিরঃ-চিরকালস্থাযী, সর্বপচঃ-স্থূলসূক্ষ্মগুরুলঘুপাচকঃ, ক্রমেণ ভবতি| তথৈব-তেনৈব প্রকারেণ, শুদ্ধস্য নরস্য পেযাদিভিরন্তরাগ্নিঃ-ঔদর্যোঽগ্নিঃ, মহান্ স্থিরঃ সর্বপচশ্চ ভবতি| সর্বপচ ইতি পচেরজন্তস্য সর্বশব্দেন সহ ষষ্ঠীসমাসঃ| খরনাদেঽপ্যুক্তম্-"বিরেকে বমনে শ্রেষ্ঠে পেযাদীনাং ক্রিযাক্রমঃ| ত্রিশো, দ্বিশো মধ্যমে স্যাদেকশস্তু কনীযসি||" ইতি|

Adhikarana trividhasya vamanasya vegamAnam, trividhasya virekasya tulAmAnam (31) · Śloka 31

জঘন্যমধ্যপ্রবরে তু বেগা- শ্চত্বার ইষ্টা বমনে ষডষ্টৌ| দশৈব তে দ্বিত্রিগুণা বিরেকে প্রস্থস্তথা স্যাদ্দ্বিচতুর্গুণশ্চ||৩১||

স০-জঘন্যং চ মধ্যং চ প্রবরং চ তস্মিন্ বমনে ক্রমেণ বেগাশ্চত্বারঃ ষডষ্টেষ্টাঃ| তন্ত্রকৃতামিতি শেষঃ| তে বেগা দশৈব দ্বিত্রিগুণা জঘন্যমধ্যপ্রবরে বিরেকে ক্রমেণ ভবন্তি| তথেতি সমুচ্চযে| ন কেবলং বেগা মানম্, প্রস্থশ্চ দ্বিচতুর্গুণো মানং স্যাদিতি তথাশব্দস্যার্থঃ| ত্রীণ্যেতান্যুপজাতিবৃত্তানি|

Adhikarana vamanasya pittAvasAnatvaM samyaktvam, trividhasya vamanasya tulAmAnam, virekasya kaphAvasAnatvaM samyaktvam (32) · Śloka 32

পিত্তাবসানং বমনং বিরেকাদর্দ্ধং, কফান্তং চ বিরেকমাহুঃ| - |৩২|

স০-পিত্তান্তং বমনং বদন্তি| বিরেকাদর্দ্ধং বমনং কথযন্তি| বিরেচনং কফান্তমাহুঃ|

Adhikarana vegamAne tulAmAne cApohyamAnam (32) · Śloka 32

| দ্বিত্রান্ সবিট্কানপনীয বেগান্ মেযং বিরেকে, বমনে তু পীতম্||৩২||

স০-দ্বৌ বা ত্রযো বা দ্বিত্রাঃ| "সঙ্খ্যযাঽব্যযা" ইতি বহুব্রীহিঃ| "বহুব্রীহৌ সঙ্খ্যেযে ডচ্" ইতি ডচ্ বা সমাসান্তঃ| সহ বিশা-পুরীষেণ বর্তন্ত ইতি সবিট্কাঃ| দ্বিত্রান্ বেগান্ সবিট্কানপনীয-গণনাযামনুপারুহ্য, বিরেকে মেযং-মাতব্যম্| বমনে পুনঃ পীতং যদৌষধং তদপনীয মেযম্| ইন্দ্রবজ্রাবৃত্তম্|

Adhikarana virecanavidhiH (33) · Śloka 33

অথৈনং বামিতং ভূযঃ স্নেহস্বেদোপপাদিতম্| শ্লেষ্মকালে গতে জ্ঞাত্বা কোষ্ঠং সম্যগ্বিরেচযেত্||৩৩||

স০-এনং-নরং বামিতং, ভূযঃ-পুনরপি, স্নেহস্বেদাভ্যামুপপাদিতমনন্তরং সম্যগ্বিরেচযেত্| কদা ? শ্লেষ্মণঃ কালঃ-সত্রিভাগঃ প্রহরঃ, তস্মিন্ গতে সতি| কিং কৃত্বা ? কোষ্ঠং-মৃদুমধ্যক্রূরলক্ষণং, জ্ঞাত্বা-অবগম্য|

Adhikarana mRudukoShThasya lakShaNam (34) · Śloka 34

বহুপিত্তো মৃদুঃ কোষ্ঠঃ ক্ষীরেণাপি বিরিচ্যতে| |৩৪|

স০-যো বহুপিত্তঃ কোষ্ঠঃ স মৃদুর্ভবতি| স চ ক্ষীরেণ বিরিচ্যতে| অপিশব্দাদারগ্বধাদিভিরপি|

Adhikarana krUrakoShThasya lakShaNam (34) · Śloka 34

| প্রভূতমারুতঃ ক্রূরঃ কৃচ্ছ্রাচ্ছ্যামাদিকৈরপি||৩৪||

স০-প্রভূতমারুতঃ ক্রূরঃ কোষ্ঠো ভবতি| স চ কৃচ্ছ্রেণ-কথঞ্চিদপি, শ্যামাদিকৈর্বিরিচ্যতে| আদিশব্দেন কঙ্কুষ্ঠসুধাদীনাং গ্রহণম্| অপিশব্দাদারগ্বধাদিভির্ন বিরিচ্যতে|

Adhikarana doShabhedena virecanabhedaH (35) · Śloka 35

কষাযমধুরৈঃ পিত্তে বিরেকঃ, কটুকৈঃ কফে| স্নিগ্ধোষ্ণলবণৈর্বাযৌ|৩৫|

স০-কষাযমধুরৈঃ-আরগ্বধাদিভিঃ, পিত্তে বিরেকঃ| কটুকৈঃ কফে বিরেকঃ| স্নিগ্ধোষ্ণলবণৈঃ-এরণ্ডতৈলাদিভির্বাযৌ বিরেকঃ কার্যঃ|

Adhikarana virecanapravRuttau pravartanopAyaH (35-36) · Śloka 36

| অপ্রবৃত্তৌ তু পাযযেত্||৩৫|| উষ্ণাম্বু, স্বেদযেদস্য পাণিতাপেন চোদরম্| ||৩৬||

স০-অপ্রবৃত্তিঃ-মন্দা প্রবৃত্তিঃ| নঞ্ ঈষদর্থে| বিরেকাপ্রবৃত্তাবুষ্ণাম্বু পাযযেদ্বৈদ্যঃ| অস্য চাতুরস্য পাণিতাপেন জঠরং স্বেদযেত্|

Adhikarana upAyenApyapravRutau kRutyam (37-38) · Śloka 38

| উত্থানেঽল্পে দিনে তস্মিন্ভুক্ত্বাঽন্যেদ্যুঃ পুনঃ পিবেত্| অদৃঢস্নেহকোষ্ঠস্তু পিবেদূর্ধ্বং দশাহতঃ| ভূযোঽপ্যুপস্কৃততনুঃ স্নেহস্বেদৈর্বিরেচনম্||৩৭|| যৌগিকং সম্যগালোচ্য স্মরন্পূর্বমতিক্রমম্| |৩৮|

স০-তস্মিন্-বিরেকস্য দিনে, অল্প উত্থানে-স্তোকাযাং প্রবৃত্তৌ সত্যাং, ভুক্ত্বাঽন্নমন্যেদ্যুঃ-অন্যস্মিন্ দিনে পুনর্বিরেচনৌষধং পিবেদাতুরঃ| স্নেহনং-স্নেহঃ| দৃঢঃ স্নেহকোষ্ঠো যস্য স দৃঢস্নেহকোষ্ঠঃ| ন দৃঢস্নেহকোষ্ঠোঽদৃঢস্নেহকোষ্ঠঃ| স ভূযোঽপি স্নেহস্বেদৈঃ সংস্কৃতশরীরো দশাহাদূর্ধ্বং যৌগিকং বিরেচনং পিবেত্| [ সম্যগালোচ্য- ] যথাবন্নিরূপ্য, পূর্বমনুক্রমং-"ভৈষজ্যমাত্রাং মন্ত্রাভিমন্ত্রিতাম্" ইত্যাদিকং, তথা "অপ্রবৃত্তৌ তু পাযযেত্| উষ্ণাম্বু স্বেদযেদস্য পাণিতাপেন চোদরম্|" ইত্যাদিকং চ, স্মরন্ পিবেদিতি|

Adhikarana virecane hInayogalakShaNaNam (38-39) · Śloka 39

| হৃত্কুক্ষ্যশুদ্ধিররুচিরুত্ক্লেশঃ শ্লেষ্মপিত্তযোঃ||৩৮|| কণ্ডূবিদাহঃ পিটিকাঃ পীনসো বাতবিঙ্গ্রহঃ| অযোগলক্ষণম্|৩৯|

স০-অযোগলক্ষণং হৃত্কুক্ষ্যশুদ্ধিরিত্যাদিকম্|

Adhikarana virecane samyagyogalakShaNam (39) · Śloka 39

| যোগো বৈপরীত্যে যথোদিতাত্||৩৯||

স০-যথোক্তাদ্বৈপরীত্যে-হৃত্কুক্ষিশুদ্ধিরিত্যাদিকো(কে), যোগো-যোগলক্ষণম্|

Adhikarana virecane atiyogalakShaNam (40-42) · Śloka 42

বিট্পিত্তকফবাতেষু নিঃসৃতেষু ক্রমাত্স্রবেত্| নিঃশ্লেষ্মপিত্তমুদকং শ্বেতং কৃষ্ণং সলোহিতম্||৪০|| মাংসধাবনতুল্যং বা মেদঃখণ্ডাভমেব বা| গুদনিঃসরণং তৃষ্ণা ভ্রমো নেত্রপ্রবেশনম্||৪১|| ভবন্ত্যতিবিরিক্তস্য তথাঽতিবমনামযাঃ| |৪২|

স০-অতিবিরিক্তস্য বিট্পিত্তকফবাতেষু ক্রমান্নিঃসৃতেষু জলং স্রবেত্| কিম্ভূতম্ ? নিঃশ্লেষ্মপিত্তং, তথা শ্বেতং কিঞ্চিত্কৃষ্ণং সলোহিতং-ঈষদ্রক্তং, অথবা মাংসপ্রক্ষালনসদৃশমথবা মেদঃশকলাভং স্রবেত্| তথা গুদনিঃসরণাদযোঽতিবমনামযাশ্চ-ক্ষামতাদযো ভবন্তি|

Adhikarana samyagviriktasya samyagvAntavidhiH (42-43) · Śloka 43

| সম্যগ্বিরিক্তমেনং চ বমনোক্তেন যোজযেত্||৪২|| ধূমবর্জ্যেন বিধিনা| |৪৩|

স০-এনং চ-নরং সম্যগ্বিরিক্তং, বমনবিহিতেন বিধিনা বিধূমেনোপপাদযেত্|

Adhikarana prakRutibhojanamapi krameNa kuryAt (43) · Śloka 43

ততো বমিতবানিব| ক্রমেণান্নানি ভুঞ্জানো ভজেত্প্রকৃতিভোজনম্||৪৩||

স০-ততঃ-অনন্তরং, ক্রমেণ-পূর্বোক্তেন, রক্তশাল্যন্নসহিতপেযোদীন্যন্নান্যশ্নন্ প্রকৃতিভোজনং ভজেত্|

Adhikarana mandavahnyAdibhiH shodhanadine upavAsaH kAryaH (44) · Śloka 44

মন্দবহ্নিমসংশুদ্ধমক্ষামং দোষদুর্বলম্| অদৃষ্টজীর্ণলিঙ্গং চ লঙ্ঘযেত্পীতভেষজম্||৪৪||

স০-পীতভেষজান্ মন্দবহ্ন্যাদীন্ পঞ্চ লঙ্ঘযেত্| অদৃষ্টং জীর্ণলিঙ্গং পীতভেষজস্য যস্যেতি যোজ্যম্|

Adhikarana la~gghanasya phalam (45) · Śloka 45

এবং লঙ্ঘিতে যো গুণো ভবতি, তমাহ - - - - স্নেহস্বেদৌষধোত্ক্লেশসঙ্গৈরিতি ন বাধ্যতে| |৪৫|

স০-উত্ক্লেশাশ্চ সঙআশ্চোত্ক্লেশসঙ্গাঃ| স্নেহশ্চ স্বেদশ্চৌষধং চ তানি, তেষামুত্ক্লেশসঙ্গাঃ স্নেহস্বেদৌষধোত্ক্লেশসঙ্গাঃ তৈঃ| ইতি-এবং লঙ্ঘিতে সতি, মন্দাগ্ন্যাদির্ন বাধ্যতে-ন পীড্যতে|

Adhikarana peyAdikrame yuktiH (45-46) · Śloka 46

| সংশোধনাস্রবিস্রাবস্নেহযোজনলঙ্ঘনৈঃ||৪৫|| যাত্যগ্নির্মন্দতাং তস্মাত্ ক্রমং পেযাদিমাচরেত্| |৪৬|

স০-সংশোধনাদিভির্যতোঽগ্নির্মন্দতাং যাতি, অতো হেতোঃ পেযাদিক্রমমাচরেত্| সংশোধনং-সম্যক্শুদ্ধিঃ| অস্রবিস্রাবো-রক্তস্রুতিঃ| স্নেহযোজনং- স্নেহোপযোগঃ| ননু, শুদ্ধ্যাগ্নিমান্দ্যমিহোচ্যতে| বক্ষ্যতি চ (শ্লো. ৬০) - "বুদ্ধিপ্রসাদং" ইত্যাদিনা "জ্বলনস্য দীপ্তিং সংশোধনং করোতি" ইতি| তদিমে বচসি পরস্পরং ব্যাঘ্নাতে| অত্রোচ্যতে| কালভেদাদদোষঃ| সংশোধনে ক্রিযমাণেঽগ্নিমান্দ্যং ভবতি| কৃতে চ সংশোধনেঽথ পেযাদিক্রমমাসেবমানস্যাগ্নিদীপ্তিরিতি ন কশ্চিদত্র ব্যাঘাতঃ|

Adhikarana srutAlpapittAdau peyAniShedhaH, niShiddhapeyAnAM peyAsthAne manthaH (46-47) · Śloka 47

| স্রুতাল্পপিত্তশ্লেষ্মাণং মদ্যপং বাতপৈত্তিকম্||৪৬|| পেযাং ন পাযযেত্তেষাং তর্পণাদিক্রমো হিতঃ| |৪৭|

স০-স্রুতৌ-পতিতৌ, অল্পৌ পিত্তশ্লেষ্মাণৌ যস্য তং, তথা মদ্যপো যো নরস্তং মদ্যপং. তথা বাতপৈত্তিকং, এতাংস্ত্রীনপি পেযাং ন পাযযেত্| তর্হ্যেষাং কিং কার্যম্ ? ইত্যাহ-তেষামিত্যাদি| প্রথমেঽন্নকালে লাজসক্তবো দ্বিতীযেঽন্নকালে মাংসরসৌদন(?)মিত্যেষ তর্পণাদিক্রমস্তেষাং হিতঃ|

Adhikarana vamanavirecanayoH svakAryapratIkShAvadhiH (47-48) · Śloka 48

ননু, বিরেচনস্যেব বমনস্য কস্মাত্ পাকো ন প্রতীক্ষ্যতে ? ইত্যাহ - - - - | অপক্বং বমনং দোষান্ পচ্যমানং বিরেচনম্||৪৭|| নির্হরেদ্বমনস্যাতঃ পাকং ন প্রতিপালযেত্| |৪৮|

স০-বমনমপক্বং সত্ দোষান্নির্হরেত্| বিরেচনং তু পচ্যমানং দোষান্নির্হরেত্| অতো বমনস্য পাকো ন প্রতিপাল্যতে|

Adhikarana durbalAditvAhAraireva shodhyaH (48-49) · Śloka 49

| দুর্বলো বহুদোষশ্চ দোষপাকেন যঃ স্বযম্||৪৮|| বিরিচ্যতে ভেদনীযৈর্ভোজ্যৈস্তমুপপাদযেত্| |৪৯|

স০-দুর্বলো নরো বহুদোষশ্চ দোষপাকেন হেতুনা স্বযং-ঔষধমন্তরেণ, যো বিরিচ্যতে-ভিদ্যতে, তং-নরং, ভেদনীযৈর্ভোজ্যৈঃ-ভক্ষ্যৈর্যোজযেত্|

Adhikarana durbalAdInAM mRudvalpamauShadham alpadoShasya durbalasya shamanam (49-51) · Śloka 51

| দুর্বলঃ শোধিতঃ পূর্বমল্পদোষঃ কৃশো নরঃ||৪৯|| অপরিজ্ঞাতকোষ্ঠশ্চ পিবেন্মৃদ্বল্পমৌষধম্| বরং তদসকৃত্পীতমন্যথা সংশযাবহম্||৫০|| হরেদ্বহূংশ্চলান্ দোষানল্পানল্পান্ পুনঃপুনঃ| দুর্বলস্য মৃদুদ্রব্যৈরল্পান্ সংশমযেত্তু তান্||৫১||

স০-দুর্বলাদযঃ পঞ্চ মৃদ্বল্পং বিরেচনৌষধং পিবেযুঃ| কিমিত্যাহ-যস্মাত্ তত্-বিরেচনৌষধং, অসকৃত্-পুনঃপুনঃ, পীতং বরম্, ন বহু| অন্যথা-বহু তীক্ষ্ণং চৌষধং পীতং, সংশযাবহং-প্রাণসন্দেহকারি| তথা, পুনঃপুনঃ প্রযুক্তমৌষধং চলান্ বহূন্ দোষানল্পানল্পান্ হরেত্| এবং বলহানিং বিনা দোষনির্হারঃ কৃতঃ স্যাত্| তুরবধারণে| দুর্বলস্য নরস্য মৃদুদ্রব্যৈরল্পানেব তান্ দোষান্ সম্যক্ শমযেত্|

Adhikarana bahudoShasya shamane bAdhakam (52) · Śloka 52

ননু, বহবো দোষাঃ কস্মান্ন শাম্যন্তে ? ইত্যাহ - - - - ক্লেশযন্তি চিরং তে হি হন্যুর্বৈনমনির্হৃতাঃ| |৫২|

স০-হি-যস্মাত্, তে-বহবো দোষাঃ, অনির্হৃতাশ্চিরমেনং-আতুরং, ক্লেশযন্তি| হন্যুর্বা-অনির্হৃতা মারযেযুঃ|

Adhikarana mandAdagnikrUrakoShThayoH shodhane pUrvA~ggam (52-53) · Śloka 53

| মন্দাগ্নিং ক্রূরকোষ্ঠং চ সক্ষারলবণৈর্ঘৃতৈঃ||৫২|| সন্ধুক্ষিতাগ্নিং বিজিতকফবাতং চ শোধযেত্| |৫৩|

স০-মন্দাগ্নিং ক্রূরকোষ্ঠং চ নরং সহ ক্ষারলবণাভ্যাং বর্তন্তে যানি ঘৃতানি তৈর্যথাসঙ্খ্যমুদ্দীপিতানলং বিজিতকফবাতং চ শোধযেত্|

Adhikarana rUkShAdInAM virecanamapi na virecayati te kathaM virecyAH? (53-55) · Śloka 55

| রূক্ষবহ্বনিলক্রূরকোষ্ঠব্যাযামশীলিনাম্||৫৩|| দীপ্তাগ্নীনাং চ ভৈষজ্যমবিরেচ্যৈব জীর্যতি| তেভ্যো বস্তিং পুরা দদ্যাত্ততঃ স্নিগ্ধং বিরেচনম্||৫৪|| শকৃন্নির্হৃত্য বা কিঞ্চিত্তীক্ষ্ণাভিঃ ফলবর্তিভিঃ| প্রবৃত্তং হি মলং স্নিগ্ধো বিরেকো নির্হরেত্সুখম্||৫৫||

স০-রূক্ষাদীনাং ভৈষজ্যমবিরেচ্যৈব-বিরেচনমকৃত্বৈব, পরিণমতি| তেভ্যো-রূক্ষাদিভ্যঃ, পূর্বং বস্তিং দদ্যাত্| অনন্তরং স্নিগ্ধং-এরণ্ডতৈলবিন্দুঘৃতাদিকং, বিরেচনং যোজযেত্| অথবা ফলবর্তিভিস্তীক্ষ্ণাভিঃ পুরীষং কিঞ্চিত্-অল্পং, নির্হৃত্য-নিঃসার্য, স্নিগ্ধং বিরেচনং দদ্যাত্| কিমিতি বস্তিনা তীক্ষ্ণাভিঃ ফলবর্তিভিশ্চ কিঞ্চিচ্ছকৃন্নির্হারঃ ক্রিযতে ? ইত্যাহ-প্রবৃত্তং হীত্যাদি| যস্মান্মলং প্রবৃত্তং সন্তং কিঞ্চিত্পতিতং স্নিগ্ধো বিরেকঃ সুখং-অকৃচ্ছ্রেণ নির্হরেত্|

Adhikarana viShAdyArtaiShu shodhanam (56) · Śloka 56

বিষাভিঘাতপিটিকাকুষ্ঠশোফবিসর্পিণঃ| কামলাপাণ্ডুমেহার্তান্নাতিস্নিগ্ধান্ বিশোধযেত্||৫৬||

স০-নাতিশব্দোঽত্রেষদর্থে| "নাতিশীতগুরুস্নিগ্ধং" (হৃ. সূ. অ. ৬|৬৩) ইত্যত্র যথা| বিষাদ্যার্তানীষত্স্নিগ্ধান্ বিশোধযেত্|

Adhikarana sarveShAM snehavirecanam snehabhAvitAnAM rUkShaM virecanam (57) · Śloka 57

সর্বান্ স্নেহবিরেকৈশ্চ, রূক্ষৈস্তু স্নেহভাবিতান্| |৫৭|

স০-সর্বান্-ঈষত্সিগ্ধান্ বিষার্তাদীনীষদ্রূক্ষান্ বা, স্নেহবিরেকৈঃ শোধযেত্| স্নেহভাবিতাংশ্চ পুরুষান্ রূক্ষৈর্বিরেকৈঃ শোধযেত্|

Adhikarana pratikarmaM snehasvedau kAryau,sarvakarmAnte punaH snehanam (57-58) · Śloka 58

| কর্মণাং বমনাদীনাং পুনরপ্যন্তরেঽন্তরে||৫৭|| স্নেহস্বেদৌ প্রযুঞ্জীত, স্নেহমন্তে বলায চ| |৫৮|

স০-বমনাদীনাং কর্মণামন্তরেঽন্তরে-মধ্যে মধ্যে, পুনরপি-ভূযঃ, স্নেহস্বেদৌ প্রযুঞ্জীত| অন্তে চ কর্মণাং বলায-শরীরস্য বলাধানার্থং, স্নেহং প্রযুঞ্জীত| তদযমর্থোঽত্র বোধ্যঃ,-আদৌ স্নেহস্বেদৌ ততো বমনং, পুনঃ স্নেহস্বেদৌ ততো বিরেচনং, পুনঃ স্নেহস্বেদৌ ততোঽনুবাসনং, পুনঃ স্নেহস্বেদৌ ততো নিরূপণং, পুনঃ স্নেহস্বেদৌ ততোঽনুবাসনমিতি|

Adhikarana snehasvedAbhyAse yuktiH (58-59) · Śloka 59

কিমিত্যেবং বিধীযতে ? ইত্যাহ - - - - | মলো হি দেহাদুত্ক্লেশ্য হ্রিযতে বাসসো যথা||৫৮|| স্নেহস্বেদৈস্তথোত্ক্লিষ্টঃ শোধ্যতে শোধনৈর্মলঃ| |৫৯|

স০-যতো দেহাদুত্ক্লেশ্য-পতনোন্মুখং কৃত্বা মলো বিরেচনাদিভির্হ্রিযতে| কথমিব ? বাসসো-বস্ত্রাদ্যথা,- মর্দনিকাযাং বস্ত্রং মর্দযিত্বা জলাদিনা মলো নির্হ্রিযত ইতি|

Adhikarana snehasvedanAbhyAse doShaH (59-60) · Śloka 60

ননু, স্নেহস্বেদাবন্তরেণাপি কস্মান্মলঃ শোধনৈর্ন শোধ্যতে ? ইত্যাহ - - - - | স্নেহস্বেদাবনভ্যস্য কুর্যাত্সংশোধনং তু যঃ||৫৯|| দারু শুষ্কমিবানামে শরীরং তস্য দীর্যতে||৫৯|| ১/২||৬০||

স০-যো নরঃ স্নেহস্বেদাবনভ্যস্য-অশীলযিত্বা, সংশোধনং কুর্যাত্, তস্য শরীরং দীর্যতে| কথমিব ? আনামে-আনমনে, কাষ্ঠং শুষ্কং যথা দীর্যত ইতি|

Adhikarana samyak shodhanasya phalam (17) · Śloka 18

সাম্প্রতং সংশুদ্ধেঃ ফলমাহ - - - - বুদ্ধিপ্রসাদং বলমিন্দ্রিযাণাং ধাতুস্থিরত্বং জ্বলনস্য দীপ্তিম্| চিরাচ্চ পাকং বযসঃ করোতি সংশোধনং সম্যগুপাস্যমানম্| ৬০ ১/২| ইতি শ্রী বৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে বমনবিরেচনবিধির্নামাষ্টাদশোঽধ্যাযঃ||১৮||

স০-সংশোধনং সম্যক্ ক্রিযমাণং বুদ্ধিপ্রসাদাদীন্ পঞ্চ করোতি| বুদ্ধিপ্রসাদো-ধীপাটবম্| বযসো-যৌবনাদেঃ, পাকঃ-পরিণাম ইতি| উপজাতির্বৃত্তম্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে বমনবিরেচনবিধির্নামাষ্টাদশোঽধ্যাযঃ সমাপ্তঃ|| ১৭||