28. bhagandarapratiṣēdhādhyāyaḥ

Adhikarana adhyAyopakramaH · Śloka

ব্রণসামান্যাদ্ ভগন্দরপ্রতিষেদমাচষ্টে-

Adhikarana bhagandarapratiShedhAdhyAyaH bhagandarasya nidAnaM lakShaNaM ca (2-5) · Śloka 5

অথাতো ভগন্দরপ্রতিষেধং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যশুত্রে||২|| ) হস্ত্যশ্বপৃষ্ঠগমনকঠিনোত্কটকাসনৈঃ| অর্শোনিদানাভিহিতৈরপরৈশ্চ নিষেবিতৈঃ||১|| অনিষ্টাদৃষ্টপাকেন সদ্যো বা সাধুগর্হণৈঃ| প্রাযেণ পিটিকাপূর্বো যোঽঙ্গুলে হ্যঙ্গুলেঽপি বা||২|| পাযোর্ব্রণোঽন্তর্বাহ্যো বা দুষ্টাসৃঙ্মাংসগো ভবেত্| বস্তিমূত্রাশযাভ্যাসগতত্বাত্স্যন্দনাত্মকঃ||৩|| ভগন্দরঃ স সর্বাশ্চ দারযত্যক্রিযাবতঃ| ভগবস্তিগুদাংস্তেষু দীর্যমাণেষু ভূরিভিঃ||৪|| বাতমূত্রশকৃচ্ছুক্রং খৈঃ সূক্ষ্মৈর্বমতি ক্রমাত্| |৫|

স০-হস্ত্যশ্বাদিগমনাদিভিরর্শোনিদানোক্তৈরপরৈরপি নিষেবিতৈরশুভপুরাকৃতকর্মবিপাকেন সদ্যো বা সাধুনিন্দাভিঃ পাযোরঙ্গুলে দ্ব্যঙ্গুলে বা যো ব্রণোঽন্তর্বাহ্যো বা বাহু ল্যেন পিটিকাপূর্বা দুষ্টরক্তমাংসগো বস্তিমূত্রাশযসমীপগতত্বাত্ স্যন্দনস্বভাবঃ স ভগন্দরঃ স্যাত্| সং-ভগাদীন্ সর্বান্ দারযতি, ক্রিযারহিতস্য পুংসঃ| তেষু-ভগাদিষু, শীর্যমাণেষু খৈঃ-ছিদ্রৈঃ, সূক্ষ্মৈর্বহুভিঃ ক্রমেণ বাতাদীন্ বমতি|

Adhikarana bhaga aShTavidhatvam (5) · Śloka 5

| দোষৈঃ পৃথগ্যুতৈঃ সর্বৈরাগন্তুঃ সোঽষ্টমঃ স্মৃতঃ||৫||

স০-ভগন্দরাখ্যো ব্রণো দোষৈঃ পৃথক্ ত্রিধা| যুক্তৈশ্চ দোষৈস্ত্রিধা| সর্বৈরেকঃ| আগন্তুরষ্টমো গদিতঃ|

Adhikarana apavkashophasya piTikAtvam pavkoshophasya bhagandaratvam (6) · Śloka 6

অপক্বং পিটিকামাহুঃ পাকপ্রাপ্তং ভগন্দরম্| |৬|

স০-অপক্বং শোফং পিটিকাং কথযন্তি| পক্বং শোফং ভগন্দরমাহুঃ|

Adhikarana bhagandarakRut piTikAyA lakShaNam (6-7) · Śloka 7

| গূঢমূলাং সসংরম্ভাং রুগাঢ্যাং রূঢকোপিনীম্||৬|| ভগন্দরকরীং বিদ্যাত্ পিটিকাং ন ত্বতোঽন্যথা| |৭|

স০-পিটিকাং গূঢমূলাদিগুণাং ভগন্দরকরীং বিদ্যাত্| অতোঽন্যথা-বিপর্যযেণ, পিটিকামাত্রাং বিজানীযাত্|

Adhikarana vAtajAyAH piTikAyA lakShaNam (7-8) · Śloka 8

| তত্র শ্যাবাঽরুণা তোদভেদস্ফুরণরুক্করী||৭|| পিটিকা মারুতাত্| |৮|

স০-তেষু মধ্যাচ্ছ্যাবাদিগুণা পিটিকা পবনাত্ স্যাত্|

Adhikarana pittajAyAH piTikAyA lakShaNam (8) · Śloka 8

পিত্তাদুষ্ট্রগ্রীবাবদুচ্ছ্রিতা| রাগিণি তনুরূষ্মাঢ্যা জ্বরধূমাযনান্বিতা||৮||

স০-পিত্তাত্ পিটিকোষ্ট্রগ্রীবেবোচ্ছ্রিতা রাগাদিগুণান্বিতা চ স্যাত্|

Adhikarana kaphajAyAH piTikAyA lakShaNam (9) · Śloka 9

স্থিরা স্নিগ্ধা মহামূলা পাণ্ডুঃ কণ্ডুমতী কফাত্| |৯|

স০-কফাত্ পিটিকা স্থিরাদিগুণা স্যাত্|

Adhikarana vAtapittajAyAH piTikAyA lakShaNam (9) · Śloka 9

| শ্যাবা তাম্রা সদাহোষা ঘোররুগ্ বাতপিত্তজা||৯||

স০-বাতপিত্তোত্থা পিটিকা শ্যাবদিগুণা স্যাত্|

Adhikarana vAtakaphajAyAH piTikAyA lakShaNam (10) · Śloka 10

পাণ্ডুরা কিঞ্চিদাশ্যাবা কৃচ্ছ্রপাকা কফানিলাত্| |১০|

স০-শ্লেষ্মপবনাত্ পিটিকা পাণ্ডুরাদিগুণা স্যাত্| কফপিত্তজস্তু ভগন্দরঃ "অর্শঃস(দুর্না)মাশ্রিত্য" (শ্লো.১৫) ইত্যারভ্যাগ্রে প্রতিপাদযিষ্যতি| তেনেহ তত্পিটিকা তন্ত্রকৃতা নাভিহিতা|

Adhikarana sarvajAyAH piTikAyA lakShaNam (10-11) · Śloka 11

| পাদাঙ্গুষ্ঠসমা সর্বৈর্দোষৈর্নানাবিধব্যথা||১০|| শূলারোচকতৃড্দাহজ্বরচ্ছর্দিরুপদ্রুতা| |১১|

স০-সর্বৈর্দোষৈঃ পাদাঙুষ্ঠতুল্যা নানাবিধব্যথা শূলাদিভিরুপদ্রুতা পিটিকা স্যাত্|

Adhikarana etAH pakvA vraNA bhavanti (11) · Śloka 11

ব্রণতাং যান্তি তাঃ পক্বাঃ প্রমাদাত্| |১১|

স০-তাশ্চ পিটিকাঃ প্রমাদাত্-অযত্নাত্, পক্বাঃ সদ্যো ব্রণতাং যান্তি|

Adhikarana 1 shataponakasya bhagandarasya lakShaNam (11-13) · Śloka 13

| তত্র বাতজা||১১|| চীযতেঽণুমুখৈশ্ছিদ্রৈঃ শতপোনকবত্ ক্রমাত্| অচ্ছং স্রবদ্ভিরাস্রাবমজস্রং ফেনসংযুতম্||১২|| শতপোনকসংজ্ঞোঽযম্| |১৩|

স০-তেষু মধ্যাদ্বাতজা পিটিকা শতপোনকবত্-তিত উবত্, সূক্ষ্মদ্বারৈশ্ছিদ্রৈঃ ক্রমেণ চীযতে| কিং কুর্বাণৈঃ ? অচ্ছং-তনুং, আস্রাবং সহ ফেনমনবরতং স্রবদ্ভিঃ| অযং শতপোনকসংজ্ঞো ভগন্দরঃ|

Adhikarana 2 uShTragrIvasya bhagandarasya lakShaNam (13) · Śloka 13

উষ্ট্রগ্রীবস্তু পিত্তজঃ| |১৩|

স০-পিত্তজস্তু ভগন্দর উষ্ট্রগ্রীবাখ্যঃ|

Adhikarana 3 paristrAviNo bhagandarasya lakShaNam (13) · Śloka 13

| বহুপিচ্ছাপরিস্রাবী পরিস্রাবী কফোদ্ভবঃ||১৩||

স০-কফোত্থো ভগন্দরো বহুপিচ্ছপরিস্রাবী স্যাত্| স চ পরিস্রাবী কথ্যতে|

Adhikarana 4 parikShepiNo bhagandarasya lakShaNam (14) · Śloka 14

বাতপিত্তাত্পরিক্ষেপী পরিক্ষিপ্য গুদং গতিঃ| জাযতে পরিতস্তত্র প্রাকারং পরিখেব চ||১৪||

স০-বাতপিত্তাত্ পরিক্ষেপীত্যুচ্যতে| তত্র গুদং পরিক্ষিপ্য গতিঃ পুরপ্রাকারং পরিতঃ পরিখেব চ জাযতে|

Adhikarana 5 RujoH bhagandarasya lakShaNam (15) · Śloka 15

ঋজুর্বাতকফাদৃজ্ব্যা গুদো গত্যাঽত্র দীর্যতে| |১৫|

স০-বাতকফাদ্ ঋজুসংজ্ঞো ভগন্দরঃ| তত্র ঋজ্ব্যা গত্যা গুদো দীর্যতে|

Adhikarana 6 arshostrAviNo bhagandarasya lakShaNam (15-17) · Śloka 17

| কফপিত্তে তু পূর্বোত্থং দুর্নামাশ্রিত্য কুপ্যতঃ||১৫|| অর্শোমূলে ততঃ শোফঃ কণ্ডূদাহাদিমান্ ভবেত্| স শীঘ্রং পক্বভিন্নোঽস্য ক্লেদযন্মূলমর্শসঃ||১৬|| স্রবত্যজস্রং গতিভিরযমর্শোভগন্দরঃ| |১৭|

স০-পূর্বোত্থং দুর্নাম সমাশ্রিত্য কফপিত্তে যদা কুপ্যতঃ, ততঃ-তত্কোপাত্, অর্শোমূলে শোফঃ কণ্ড্বাদিমান্ স্যাত্| সঃ-শোফঃ, পক্বভিন্নোঽস্য-অর্শসো, মূলমাশ্বেব ক্লেদযন্ গতিভিরজস্রং স্রবতি| স শোফোঽর্শোভগন্দর উচ্যতে|

Adhikarana 7 shambukAvartasya bhagandarasya lakShaNam (17-18) · Śloka 18

| সর্বজঃ শম্বুকাবর্তঃ শম্বুকাবর্তসন্নিভঃ||১৭|| গতযো দারযন্ত্যস্মিন্ রুগ্বেগৈর্দারুণৈর্গুদম্| |১৮|

স০-সন্নিপাতোত্থঃ শম্বুকাবর্তসংজ্ঞঃ শম্বুকাবর্তসমঃ স্যাত্| অস্মিন্-সর্বজে ভগন্দরে, রুগ্বেগৈস্তীব্রৈর্গতযো গুদং দারযন্তি|

Adhikarana 8 kShatajasya bhagandarasya lakShaNam (18-20) · Śloka 20

| অস্থিলেশোঽভ্যবহৃতো মাংসগৃদ্ধ্যা যদা গুদম্||১৮|| ক্ষিণোতি তির্যঙ্নির্গচ্ছন্নুন্মার্গং ক্ষততো গতিঃ| স্যাত্ততঃ পূযদীর্ণাযাং মাংসকোথেন তত্র চ||১৯|| জাযন্তে কৃমযস্তস্য খাদন্তঃ পরিতো গুদম্| বিদারযন্তি নচিরাদুন্মার্গী ক্ষতজশ্চ সঃ||২০||

স০-অস্থিলবো মাংসগার্ধ্যেন ভুক্তো যদা তির্যক্-উন্মার্গং, নির্গচ্ছন্ গুদং ক্ষিণোতি, তদা ক্ষাতাদ্গতিঃ স্যাত্| ততঃ পূযদীর্ণাযাং গতৌ মাংসকোথেন চ তস্মিন্ কৃমযো ভবন্তি| তে চ কৃমযঃ তস্য-ভগন্দরিণো, গুদং ভক্ষযন্তঃ পরিতো বিদারযন্তি শীঘ্রমেব| অসাবুন্মার্গী ক্ষতজশ্চোচ্যতে|

Adhikarana eteShujasya rugAdayo vranavat (21) · Śloka 21

তেষু রুগ্দাহকণ্ড্বাদীন্ বিদ্যাদ্ ব্রণনিষেধতঃ| |২১|

স০-তেষু-ভগন্দরেষু, ব্রণনিষেধতো-ব্রণপ্রতিষেধাত্, রুগাদীন্ বিদ্যাত্|

Adhikarana eteShAM sAdhyAsAdhyatvam (21-22) · Śloka 22

| ষট্ কৃচ্ছ্রসাধনাস্তেষাং, নিচযক্ষতজৌ ত্যজেত্||২১|| প্রবাহিণীং বলীং প্রাপ্তং সেবনীং বা সমাশ্রিতম্| |২২|

স০-তেষাং মধ্যাত্ কৃচ্ছ্রসাধনাঃ ষট্-একদোষজা দ্বিদোষজাশ্চ| সন্নিপাতজং ক্ষতজং চ ত্যজেত্| প্রবাহিণীং বলীং প্রাপ্তং যদ্ভগন্দরং তত্ত্যজেত্| তথা সেবনীমাশ্রিত্য যজ্জাতং তচ্চ বর্জযেত্|

Adhikarana asya piTikA yathApAkaM na yAti tathA yantraH (22-23) · Śloka 23

| অথাস্য পিটিকামেব তথা যত্নাদুপাচরেত্||২২|| শুধ্দ্যসৃক্স্রুতিসেকাদ্যৈর্যথা পাকং ন গচ্ছতি| |২৩|

স০-অথাস্য-ভগন্দরস্য, পিটিকামেব-পিটিকাবস্থামেব, যত্নং কৃত্বা শুধ্দ্যাদিভিস্তথোপক্রমেত্ যথা পাকং ন প্রাপ্নোতি|

Adhikarana pAke tu tasyA avA~gukhatvAdyavalokanam (23-24) · Śloka 24

| পাকে পুনরুপস্নিগ্ধং স্বেদিতং চাবগাহতঃ||২৩|| যন্ত্রযিত্বাঽর্শসমিব পশ্যেত্সম্যগ্ভগন্দরম্| অর্বাচীনং পরাচীনমন্তর্মুখবহির্মুখম্||২৪||

স০-পাকে তু সত্যুপস্নিগ্ধমবগাহেন চ স্বেদিতং ততোঽর্শসমিব যন্ত্রযিত্বা সুষ্ঠু ভগন্দরং পশ্যেত্-অবাঙ্মুখং পরাঙ্মুখং বা, অন্তর্মুখং বহির্মুখং বা, ইত্যেবং সুষ্ঠু নিরূপ্য| অর্বাচীনমিতি "বিভাষাঞ্চেরদিক্ স্ত্রিযাম্" ইতি স্বার্থে খঃ|

Adhikarana antarmukhe bahirmukhe ca shastreNa pATanaM kRutvA kShArAgninA sAdhayet,uShTrakandhare kShANaiva sAdhayet (25-26) · Śloka 26

অথান্তর্মুখমেষিত্বা সম্যক্ শস্ত্রেণ পাটযেত্| বহির্মুখং চ নিঃশেষং ততঃ ক্ষারেণ সাধযেত্||২৫|| অগ্নিনা বা ভিষক্ সাধু ক্ষারেণৈবোষ্ট্রকন্ধরম্| |২৬|

স০-অনন্তরমন্তর্মুখমেষিণ্যা এষিত্বা সম্যক্ শস্ত্রেণ পাটযেত্| বহির্মুখং চ ভগন্দরং নিঃশেষং পাটযিত্বা ততঃ ক্ষারেণ সাধযেত্ জ্বলনেন বা| উষ্ট্রকন্ধরং-উষ্ট্রগ্রীবং, ক্ষারেণৈব সাধু কৃত্বা বৈদ্যঃ সাধযেত্-ন ত্বগ্নিনা|

Adhikarana shataponake pATanaprakAraH (26-27) · Śloka 27

| নাডীরেকান্তরাঃ কৃত্বা পাটযেচ্ছতপোনকম্||২৬|| তাসু রূঢাসু শোষাশ্চ, মৃত্যুর্দীর্ণে গুদেঽন্যথা| |২৭|

স০-শতপোনকাখ্যমেকান্তরা নাডীঃ কৃত্বা পাটযেত্| তাসু রূঢাসু শেষা অপি নাডীঃ পাটযেত্| অন্যথা-একহেলযৈব, গুদে পাটিতে সতি মৃত্যুঃ স্যাত্|

Adhikarana parikSheNi kShArasUtraiH sAdhanam (27) · Śloka 27

| পরিক্ষেপিণী চাপ্যেবং নাড্যুক্তৈঃ ক্ষারসূত্রকৈঃ||২৭||

স০-পরিক্ষেপিণি চ ভগন্দরে নাডীকথিতৈঃ ক্ষারসূত্রকৈরেবংক্রমাত্, সাধযেত্|

Adhikarana arshobhagandare~arshaH pratisAdhanAdi (28) · Śloka 28

অর্শোভগন্দরে পূর্বমর্শাংসি প্রতিসাধযেত্| |২৮|

স০-অর্শোভগন্দরে পূর্বমর্শাংসি প্রতিসাধযেত্-উপচরেত্|

Adhikarana kShataje pratyAkhyAyopacAraH (28-29) · Śloka 29

| ত্যক্ত্বোপচর্যঃ ক্ষতজঃ শল্যং শল্যবতস্ততঃ||২৮|| আহারেচ্চ তথা দদ্যাত্ কৃমিঘ্নং লেপভোজনম্| পিণ্ডনাড্যাদযঃ স্বেদাঃ সুস্নিগ্ধা রুজি পূজিতাঃ||২৯||

স০-ক্ষতজো ভগন্দরস্ত্যক্ত্বা-প্রত্যাখ্যায, চিকিত্স্যঃ| অনন্তরং শল্যবতঃ-সশল্যস্য, শল্যমাহরেত্| তথা কৃমিঘ্নং লেপং ভোজনং চ দদ্যাত্| পীডাযাং চ সত্যাং পিণ্ডস্বেদাদযঃ সুস্নিগ্ধা হিতাঃ|

Adhikarana bahucchidre gotIrthAdayashchchedAH (30) · Śloka 30

সর্বত্র চ বহুচ্ছিদ্রে ছেদানালোচ্য যোজযেত্| গীতীর্থসর্বতোভদ্রদললাঙ্গল্ললাঙ্গলান্||৩০||

স০-বহুচ্ছিদ্রে চ ভগন্দরে সর্বত্রৈবালোচ্য চতুরশ্ছেদান্ গোতীর্থকাদিকান্ কুর্যাত্| তানেব ছেদানাহ-গোতীর্থেত্যাদি|

Adhikarana gotIrthasya chedasya lakShaNam sarvatAbhadrasya chedasya lakShaNam ardhalA~ggalasya chedasya lakShaNam lA~ggalasya chedasya lakShaNam (31-32) · Śloka 32

পার্শ্বং গতেন শস্ত্রেণ ছেদো গোতীর্থকো মতঃ| সর্বতঃ সর্বতোভদ্রঃ, পার্শ্বচ্ছেদোঽর্ধলাঙ্গলঃ||৩১|| পার্শ্বদ্বযে লাঙ্গলকঃ| |৩২|

স০-শস্ত্রেণ পার্শ্বং গতেন যশ্ছেদঃ স গোতীর্থকাখ্যঃ, স চ কাব্যগতগোমূত্রিকাকারঃ| সর্বতো যশ্ছেদঃ স সর্বতোভদ্রাখ্যঃ, স চ সর্বতোভদ্রকাব্যাকারঃ| য একস্মিন্ পার্শ্বে চেদঃ, স চ দললাঙ্গলকাখ্যঃ,-কুটারহিতহলাকারঃ| পার্শ্বদ্বযে যশ্ছেদঃ স লাঙ্গলকাখ্যঃ,-সম্পূর্ণহলাকারঃ|

Adhikarana sarvavraNAnAmagninA dAhaH (32) · Śloka 32

সমস্তাংশ্চাগ্নিনা দহেত্| আস্রাবমার্গান্নিঃশেষং নৈবং বিকুরুতে পুনঃ||৩২||

স০-ব্রণান্ সর্বাংশ্চাস্রাবমার্গান্ নিঃশেষং কৃত্বাঽগ্নিনা দহেত্| এবং কৃতে সতি পুনর্বিকারং ব্রণো ন যাতি|

Adhikarana bhagandariNaH koShThashuddhou~antarA~antarA yatnaH (33) · Śloka 33

যতেত কোষ্ঠশুদ্ধৌ চ ভিষক্ তস্যান্তরাঽন্তরা| |৩৩|

স০-তস্য-ভগন্দরিণঃ, কোষ্ঠশুদ্ধৌ চান্তরাঽন্তরা বৈদ্যো যতেত|

Adhikarana bhagandariNaH vraNe biDAlAsthilepaH (33) · Śloka 33

| লেপো ব্রণে বিডালাস্থি ত্রিফলারসকল্কিতম্||৩৩||

স০-মার্জারাস্থি ত্রিফলারসকল্কিতং ব্রণে লেপো হিতঃ|

Adhikarana bhagandariNaH jyotiShmatyAditailenAbhya~ggaH (34) · Śloka 34

জ্যোতিষ্মতীমলযুলাঙ্গলিশেলুপাঠা- কুম্ভাগ্নিসর্জ(র্জি)করবীরবচাসুধার্কৈঃ| অভ্যঞ্জনায বিপচেত ভগন্দরাণাং তৈলং বদন্তি পরমং হিতমেতদেষাম্||৩৪||

স০-জ্যোতিষ্মত্যাদিভিরভ্যঙ্গার্থং তৈলং পচেত্| ভগন্দরাণামেতেষামেতত্ পরমং-অতিশযেন, হিতং গদন্তি| বসন্ততিলকাবৃত্তম্| বক্ষ্যমাণং চ মধুকাদি দ্রুতবিলম্বিতম্|

Adhikarana bhagandariNaH madhukAditailam (35-36) · Śloka 36

মধুকরোধ্রকণাত্রুরেণুকা- দ্বিরজনীফলিনীপটুসারিবাঃ| কমলকেসরপদ্মকধাতকী- মদনসর্জরসামযরোদিকাঃ||৩৫|| সবীজপূরচ্ছদনৈরেভিস্তৈলং বিপাচিতম্| ভগন্দরাপচীকুষ্ঠমধুমেহব্রণাপহম্||৩৬||

স০-মধুকাদিভিরেতৈঃ সবীজপূরপত্রৈস্তৈলং বিপাচিতং ভগন্দরাদিঘ্নম্|

Adhikarana bhagandariNaH ropaNo viDa~ggasArAdilehaH (37) · Śloka 37

মধুতৈলযুতা বিডঙ্গসার- ত্রিফলামাগধিকাকণাশ্চ লীঢাঃ| কৃমিকুষ্ঠভগন্দরপ্রমেহ- ক্ষতনাডীব্রণরোপণা ভবন্তি||৩৭||

স০-বিডঙ্গসারাদযো মাক্ষিকতৈলযুক্তা লীঢাঃ কৃম্যাদিব্রণরোপণাঃ স্যুঃ| মাগধিকাকণাঃ-পিপ্পলীতণ্ডুলাঃ| ঔপচ্ছন্দসিকং বৃত্তম্|

Adhikarana bhagandariNaH amRutAdgugguluH (38) · Śloka 38

অমৃতাত্রুটিবেল্লবত্সকং কলিপথ্যামলকানি গুগ্গুলুঃ| ক্রমবৃদ্ধমিদং মধুদ্রুতং পিটিকাস্থৌল্যভগন্দরান্ জযেত্||৩৮||

স০-অমৃতাদিকমিদং ক্রমেণ ভাগবৃধ্দ্যা বৃদ্ধং মধুনা দ্রুতং পিটিকাদীন্ জযেত্| বৈতালীযম্|

Adhikarana bhagandariNaH mAgadhikAdigugguluH (39) · Śloka 39

মাগধিকাগ্নিকলিঙ্গবিডঙ্গৈ- র্বিল্বধৃতৈঃ সবরাপলষট্কৈঃ| গুগ্গুলুনা সদৃশেন সমেতৈঃ ক্ষৌদ্রযুতৈঃ সকলামযনাশঃ||৩৯||

স০-মাগধিকাদিকৈর্বিল্বধৃতৈঃ-পৃথক্ পলমিতৈঃ, ত্রিফলাপলষট্কসহিতৈঃ সর্বৈস্তুল্যেন গুগ্গুলুনা যুতৈর্মধুসমেতৈর্মিশ্রিতৈর্মাত্রযা ভক্ষিতৈঃ(?) সমস্তব্যাধিহরণং স্যাত্|

Adhikarana bhagandariNaH svAyaM bhUvo gugguluH (40) · Śloka 40

গুগ্গুলুপঞ্চপলং পলিকাংশা মাগধিকা ত্রিফলা চ পৃথক্স্যাত্| ত্বক্ত্রুটিকর্ষযুতং মধুলীঢং কুষ্ঠভগন্দরগুল্মগতিঘ্নম্||৪০||

স০-গুগ্গুলুপলানি পঞ্চ, পিপ্পল্যাদযঃ পলাংশিকাঃ, ত্বগেলযোঃ পৃথক্ কর্ষম্| তদেতন্মধুলীঢং কুষ্ঠাদিঘ্নম্| স্বাযম্ভুবাখ্যো গুগ্গুলুরেষ প্রসিদ্ধঃ| দোধকং(কে) বৃত্তম্(ত্তে)|

Adhikarana bhagandariNaH vAtarogajidouShadham (41) · Śloka 41

শৃঙ্গবেররজোযুক্তং তদেব চ সুভাবিতম্| ক্বাথেন দশমূলস্য বিশেষাদ্বাতরোগজিত্||৪১||

স০-তদেব-গুগ্গুল্বাদিকং দ্রব্যং, শুণ্ঠীচূর্ণযুতং দশমূলক্বাথেন সুভাবিতং বিশেষেণ বাতরোগজিত্|

Adhikarana bhagandariNaH uttamAdigugguluH (42) · Śloka 42

উত্তমাখদিরসারজং রজঃ শীলযন্নসনবারিভাবিতম্| হন্তি তুল্যমহিষাক্ষমাক্ষিকং কুষ্ঠমেহপিটিকাভগন্দরান্||৪২||

স০-ত্রিফলাদিরজোঽসনক্বাথেন ভাVবিতং তুল্যমহিষাখ্য(ক্ষ)মাক্ষিকং শীলযন্ কুষ্ঠাদীন্ হন্তি| রো নরৌ লগযুতা রথোদ্ধতা|

Adhikarana sheSheShu yathAyogamupakramaH (43) · Śloka 43

ভগন্দরেষ্বেষ বিশেষ উক্তঃ শেষাণি তু ব্যঞ্জনসাধনানি| ব্রণাধিকারাত্ পরিশীলনাচ্চ সম্যগ্বিদিত্বৌপযিকং বিদধ্যাত্||৪৩||

স০-ভগন্দরেষু সর্বেষ্বযমুপক্রমবিশেষোঽভিহিতঃ| শেষাণি তু ব্রণানি প্রকটসাধনানি| তেষু ব্রণাধিকারাত্ পরিশীলনাচ্চ সম্যগ্বিদিত্বোপক্রমং যথাযোগ্যং কুর্যাত্| উপজাতিঃ|

Adhikarana rUDhe~api bhagandare~ashvapRuShThagamanAdi varShAdhikaM varjayet (28) · Śloka 28

অশ্বপৃষ্ঠগমনং চলরোধং মদ্যমৈথুনমজীর্ণমসাত্ম্যম্| সাহসানি বিবিধানি চ রূঢে বত্সরং পরিহরেদধিকং বা||৪৪|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবির- চিতাযামষ্টাঙ্গহৃদযসংহিতাযাং ষষ্ঠে উত্তর- স্থানে ভগন্দরপ্রতিষেধো নামা- ষ্টাবিংশোঽধ্যাযঃ||২৮||

স০-ভগন্দরে ব্রণে রূঢেঽপি তুরগপৃষ্ঠগমনাদিকং বর্ষং যাবদধিকং বা পরিহরেদিতি| স্বাগতাবৃত্তম্| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদয- টীকাযাং সর্বাঙ্গসুন্দরাখ্যাযাং ষষ্ঠে উত্তরস্থানে ভগন্দর প্রতিষেধো নামাষ্টাবিংশোঽধ্যাযঃ সমাপ্তঃ|| ২৮||