34. guhyarōgapratiṣēdhādhyayaḥ

Adhikarana guhyarogapratiShedhAdhyAyaH --------- upadaMshe nave meDhramadhye sirAvyadhAdi (2) · Śloka 2

ಅಥೈತಚ್ಚಿಕಿತ್ಸಾಂ ಬ್ರೂತೇ ಅಥಾತೋ ಗುಹ್ಯರೋಗಪ್ರತಿಷೇಧಂ ವ್ಯಾಖ್ಯಾಸ್ಯಾಮಃ| ಇತಿ ಹ ಸ್ಮಾಹುರಾತ್ರೇಯಾದಯೋ ಮಹರ್ಷಯಃ| (ಗದ್ಯಸೂತ್ರೇ)|೨| ಮೇಢ್ರಮಧ್ಯೇ ಸಿರಾಂ ವಿಧ್ಯೇದುಪಂದಶೇ ನವೋತ್ಥಿತೇ| ಶೀತಾಂ ಕುರ್ಯಾತ್ ಕ್ರಿಯಾಂ ಶುದ್ಧಿಂ ವಿರೇಕೇಣ ವಿಶೇಷತಃ||೧|| ತಿಲಕಲ್ಕಘೃತಕ್ಷೌದ್ರೈರ್ಲೇಪಃ ಪಕ್ವೇ ತು ಪಾಟಿತೇ| |೨|

ಸ೦- ಉಪದಂಶೇಽಚಿರೋದ್ಭೂತೇ ಲಿಙ್ಗಸ್ಯ ಮಧ್ಯೇ ಸಿರಾಂ ಮೋಕ್ಷಯೇತ್| ಶಿಶಿರಾಂ ಚ ಚಿಕಿತ್ಸಾಂ ಲೇಪಸೇಕಾದಿಭಿಃ ಕುರ್ಯಾತ್| ವಿಶೇಷೇಣ ವಿರೇಚನೇನ ಶುದ್ಧಿಂ ವಿದಧೀತ| ಪಕ್ವೇ ಪಾಟಿತೇ ಚ ತಿಲಕಲ್ಕಾಜ್ಯಮಧುಭಿರ್ಲೇಪಃ|

Adhikarana upadaMshe jambvAdikvAthena kShAlanam, upadaMshe jambvAditailena ropaNam (2-4) · Śloka 4

| ಜಮ್ಬ್ವಾಮ್ರಸುಮನೋನೀಪಶ್ವೇತಕಾಮ್ಬೋಜಿಕಾಙ್ಕುರಾನ್||೨|| ಶಲ್ಲಕೀಬದರೀಬಿಲ್ವಪಲಾಶತಿನಿಶೋದ್ಭವಾಃ| ತ್ವಚಃ ಕ್ಷೀರಿದ್ರುಮಾಣಾಂ ಚ ತ್ರಿಫಲಾಂ ಚ ಪಚೇಜ್ಜಲೇ||೩|| ಸ ಕ್ವಾಥಃ ಕ್ಷಾಲನಂ, ತೇನ ಪಕ್ವಂ ತೈಲಂ ಚ ರೋಪಣಮ್| |೪|

ಸ೦- ಜಮ್ಬ್ವಾದ್ಯಙ್ಕುರಾನ್ ಶಲ್ಲಕ್ಯಾದೀನಾಂ ತ್ವಚಃ ಕ್ಷೀರಿವೃಕ್ಷಾಣಾಂ ಚ ತ್ವಚಸ್ತ್ರಿಫಲಾಂ ಚ ಜಲೇ ಪಚೇತ್| ಸ ಕ್ವಾಥಃ ಕ್ಷಾಲನಂ ಹಿತಮ್| ತೇನ ಚ ಕ್ವಾಥೇನ ತೈಲಂ ಪಕ್ವಂ ರೋಪಣಂ ಸ್ಯಾತ್|

Adhikarana upadaMshe tutthAdilepo vraNaharaH (4-5) · Śloka 5

| ತುತ್ಥಗೈರಿಕಲೋಧ್ರೈಲಾಮನೋಹ್ವಾಲರಸಾಞ್ಜನೈಃ||೪|| ಹರೇಣುಪುಷ್ಪಕಾಸೀಸಸೌರಾಷ್ಟ್ರೀಲವಣೋತ್ತಮೈಃ| ಲೇಪಃ ಕ್ಷೌದ್ರಯುತೈಃ ಸಕ್ಷ್ಮೈರುಪದಂಶವ್ರಣಾಪಹಃ||೫||

ಸ೦- ತುತ್ಥಾದಿಭಿರ್ಮಾಕ್ಷಿಕದ್ರುತೈಃ ಸೂಕ್ಷ್ಮೀಕೃತೈರ್ಲೇಪ ಉಪದಂಶವ್ರಣಹರಃ|

Adhikarana upadaMshe triphalAmaShIleporopaNam (6) · Śloka 6

ಕಪಾಲೇ ತ್ರಿಫಲಾ ದಗ್ಧಾ ಸಘೃತಾ ರೋಪಣಂ ಪರಮ್| |೬|

ಸ೦-ಕರ್ಪರೇ ತ್ರಿಫಲಾ ದಗ್ಧಾ ಘೃತಾನ್ವಿತಾ ಪರಂ ರೋಪಣಮ್|

Adhikarana upadaMshe pratidoShaM shoPavat cikitsitam (6) · Śloka 6

| ಸಾಮಾನ್ಯಂ ಸಾಧನಮಿದಂ ಪ್ರತಿದೋಷಂ ತು ಶೋಫವತ್||೬||

ಸ೦- ಸಾಮಾನ್ಯಮೇತತ್ ಸಾಧನಮ್| ಸ೦- ಪ್ರತಿದೋಷಂ ತು ಶೋಫತುಲ್ಯಂ ಚಿಕಿತ್ಸಿತಂ ಜ್ಞೇಯಮ್|

Adhikarana upadaMshe pAkaM yathAna yAti tathA~atiyatnaH kAryaH (7) · Śloka 7

ನ ಚ ಯಾತಿ ಯಥಾ ಪಾಕಂ ಪ್ರಯತೇತ ತಥಾ ಭೃಶಮ್| ಪಕ್ವೈಃ ಸ್ನಾಯುಸಿರಾಮಾಂಸೈಃ ಪ್ರಾಯೋ ನಶ್ಯತಿ ಹಿ ಧ್ವಜಃ||೭||

ಸ೦-ಯಥಾ ಚ ಪಾಕಂ ನ ಯಾತಿ ತಥಾಽತಿಯತ್ನಃ ಕಾರ್ಯಃ| ಯತಃ ಪಕ್ವೈಃ ಸ್ನಾಯ್ವಾದಿಭಿಃ ಪ್ರಾಯೇಣ ಮೇಢ್ರೋ ನಶ್ಯತಿ|

Adhikarana arshaHsu CinnadagdheShu upadaMSavat kriyA (8) · Śloka 8

ಅರ್ಶಸಾಂ ಛಿನ್ನದಗ್ಧಾನಾಂ ಕ್ರಿಯಾ ಕಾರ್ಯೋಪದಂಶವತ್| |೮|

ಸ೦- ಅರ್ಶಸಾಂ ಛಿನ್ನಾನಾಂ ದಗ್ಧಾನಾಂ ಚೋಪದಂಶತುಲ್ಯಾ ಕ್ರಿಯಾ ಕಾರ್ಯಾ|

Adhikarana sarShapikAsu leKanaM kaShAyairavacUrNanAdi (8-9) · Śloka 9

| ಸರ್ಷಪಾ ಲಿಖಿತಾಃ ಸೂಕ್ಷ್ಮೈಃ ಕಷಾಯೈರವಚೂರ್ಣಯೇತ್||೮|| ತೈರೇವಾಭ್ಯಞ್ಜನಂ ತೈಲಂ ಸಾಧಯೇತ್ ವ್ರಣರೋಪಣಮ್| |೯|

ಸ೦- ಸರ್ಷಪಿಕಾಃ ಶಸ್ತ್ರೇಣ ಲಿಖಿತಾಃ ಕಷಾಯದ್ರವ್ಯೈರ್ಜಮ್ಬ್ವಾದಿಭಿಃ ಪೂರ್ವೋಕ್ತೈಃ ಸೂಕ್ಷ್ಮಚೂರ್ಣೈರವಚೂರ್ಣಯೇತ್| ತೈರೇವ ಕಷಾಯೈಸ್ತೈಲಂ ಪಚೇತ್| ತದಭ್ಯಞ್ಜನಂ ವ್ರಣರೋಪಣಂ ಸ್ಯಾತ್|

Adhikarana avamanthe~apIyaM kriyA (9) · Śloka 9

| ಕ್ರಿಯೇಯಮವಮನ್ಥೇಽಪಿ ರಕ್ತಂ ಸ್ರಾವ್ಯಂ ತಥೋಭಯೋಃ||೯||

ಸ೦-ಏತಚ್ಚಿಕಿತ್ಸಿತಮವಮನ್ಥೇಽಪಿ ಕಾರ್ಯಮ್| ತಥೈತ(ಥೋಭ)-ಯೋಃ-ಸರ್ಷಪಾವಮನ್ಥಯೋಃ, ಅಸ್ರಂ ಸ್ರಾವ್ಯಮ್|

Adhikarana kumbhIkAyAM raktamokShaNaM tinukAdibhirlepastailaM ca (10) · Śloka 10

ಕುಮ್ಭೀಕಾಯಾಂ ಹರೇದ್ರಕ್ತಂ ಪಕ್ವಾಯಾಂ ಶೋಧಿತೇ ವ್ರಣೇ| ತಿನ್ದುಕತ್ರಿಫಲಾರೋಧ್ರೈಲೇಪಸ್ತೈಲಂ ಚ ರೋಪಣಮ್||೧೦||

ಸ೦-ಕುಮ್ಭೀಕಾಯಾಂ ಲೋಹಿತಂ ಮೋಕ್ಷಯೇತ್| ಪಕ್ವಾಯಾಂ ತು ವ್ರಣೇ ಶೋಧಿತೇ ಸತಿ ತಿನ್ದುಕಾದಿಭಿರ್ಲೇಪಃ| ತಿನ್ದುಕಾದಿಭಿರೇವ ಸಿದ್ಧಂ ತೈಲಂ ರೋಪಣಂ ಸ್ಯಾತ್|

Adhikarana alajyAmayameva kriyAkramaH (11) · Śloka 11

ಅಲಜ್ಯಾಂ ಸ್ರುತರಕ್ತಾಯಾಮಯಮೇವ ಕ್ರಿಯಾಕ್ರಮಃ| |೧೧|

ಸ೦-ಅಲಜ್ಯಾಂ ಸ್ರುತಶೋಣಿತಾಯಾಮೇಷ ಏವೋಪಕ್ರಮಃ|

Adhikarana uttamAyAM chedanaM kaShAyakalkacUrNairUpakramashca (11-12) · Śloka 12

| ಉತ್ತಮಾಖ್ಯಾಂ ತು ಪಿಟಿಕಾಂ ಸಞ್ಚ್ಛಿದ್ಯ ಬಡಿಶೋದ್ಧೃತಾಮ್||೧೧|| ಕಲ್ಕೈಶ್ಚೂರ್ಣೈಃ ಕಷಾಯಾಣಾಂ ಕ್ಷೌದ್ರಯುಕ್ತೈರುಪಾಚರೇತ್| |೧೨|

ಸ೦-ಉತ್ತಮಾಖ್ಯಾಂ ಪಿಟಿಕಾಂ ಬಡಿಶೋದ್ಧೃತಾಂ ಸಮ್ಯಕ್ ಛೇದಯಿತ್ವಾ ಕಷಾಯಾಣಾಂ ಕಲ್ಕೈಶ್ಚೂರ್ಣೈಃ ಕ್ಷೌದ್ರಯುಕ್ತೈರುಪಕ್ರಮೇತ್|

Adhikarana puShkarikAsaMvyUDhayostvakpAke sparshahAnyAM ca pittavisarpoktaH kramaH (12-13) · Śloka 13

| ಕ್ರಮಃ ಪಿತ್ತವಿಸರ್ಪೋಕ್ತಃ ಪುಷ್ಕರವ್ಯೂಢಯೋರ್ಹಿತಃ||೧೨|| ತ್ವಕ್ಪಾಕೇ ಸ್ಪರ್ಶಹಾನ್ಯಾಂ ಚ ಸೇಚಯೇದ್| |೧೩|

ಸ೦-ಪುಷ್ಕರಿಕಾಯಾಂ ಸಂವ್ಯೂಢೇ ಚ ಪಿತ್ತವಿಸರ್ಪವಿಹಿತಂ ಚಿಕಿತ್ಸಿತಂ ಹಿತಮ್| ಸಂ-ತ್ವಕ್ಪಾಕಸ್ಪರ್ಶಹಾನ್ಯೋಃ ಸೇಚನಮ್|

Adhikarana mRudite balAtailena secanaM madhurairupanAhanaM ca (13) · Śloka 13

ಮೃದಿತಂ ಪುನಃ| ಬಲಾತೈಲೇನ ಕೋಷ್ಣೇನ ಮಧುರಶ್ಚೋಪನಾಹಯೇತ್||೧೩||

ಸ೦- ಮೃದಿತಂ ನಾಮ ಲಿಙ್ಗರೋಗಂ ವಕ್ಷ್ಯಮಾಣೇನ (ಶ್ಲೋ.೪೨) ಬಲಾ ತೈಲೇನ ಸೇಚಯೇತ್| ತಥಾ ಮಧುರೈರ್ದ್ರವ್ಯೈಃ ಕಲ್ಕಿತೈಃ ಸುಖೋಷ್ಣೈರ್ಘೃತಸ್ನಿಗ್ಧೈರುಪನಾಹಶ್ಚ ಕಾರ್ಯಃ|

Adhikarana aShThIlikAyAM rakte hRute shleShmagranthivadupakramaH (14) · Śloka 14

ಅಷ್ಠೀಲಿಕಾಂ ಹೃತೇ ರಕ್ತೇ ಶ್ಲೇಷ್ಮಗ್ರನ್ಥಿವದಾಚರೇತ್| |೧೪|

ಸ೦- ಅಷ್ಠೀಲಿಕಾಂ ರಕ್ತೇ ಹೃತೇ ಕಫಗ್ರನ್ಥಿಮಿವೋಪಕ್ರಮೇತ್|

Adhikarana nivRutte dhRutAbhya~jjanAdi (14-16) · Śloka 16

| ನಿವೃತ್ತಂ ಸರ್ಪಿಷಾಽಭ್ಯಜ್ಯ ಸ್ವೇದಯಿತ್ವೋಪನಾಹಯೇತ್||೧೪|| ತ್ರಿರಾತ್ರಂ ಪಞ್ಚರಾತ್ರಂ ವಾ ಸುಸ್ನಿಗ್ಧೈಃ ಶಾಲ್ವಲಾದಿಭಿಃ| ಸ್ವೇದಯಿತ್ವಾ ತತೋ ಭೂಯಃ ಸ್ನಿಗ್ಧಂ ಚರ್ಮ ಸಮಾನಯೇತ್||೧೫|| ಮಣಿಂ ಪ್ರಪೀಡ್ಯ ಶನಕೈಃ ಪ್ರವಿಷ್ಟೇ ಚೋಪನಾಹನಮ್| ಮಣೌ ಪುನಃಪುನಃ ಸ್ನಿಗ್ಧಂ ಭೋಜನಂ ಚಾತ್ರ ಶಸ್ಯತೇ||೧೬||

ಸ೦-ನಿವೃತ್ತಸಂಜ್ಞಂ ಲಿಙ್ಗರೋಗಂ ಘೃತೇನಾಭ್ಯಜ್ಯ ಸ್ವೇದಯಿತ್ವಾ ಚೋಪನಾಹಯೇತ್ ತ್ರಿರಾತ್ರಂ ಪಞ್ಚರಾತ್ರಂ ವಾ ಸುಸ್ನಿಗ್ಧೈಃ ಶಾಲ್ವಲಾದಿಭಿಃ| ತತೋ ಭೂಯಃ ಸ್ವೇದಯಿತ್ವಾ ಸ್ನಿಗ್ಧಂ ಚರ್ಮ ಮಣಿಂ ಸಮಾನಯೇತ್| ಕಿಂ ಕೃತ್ವಾ ? ಮಣಿಂ ಶನೈಃ ಪ್ರಪೀಡ್ಯ| ಪ್ರವಿಷ್ಟೇ ಮಣೌ ಚೋಪನಾಹಂ ಪುನಃಪುನಃ ಕುರ್ಯಾತ್| ಭೋಜನಂ ಚಾತ್ರ ಸ್ನಿಗ್ಧಂ ಹಿತಮ್|

Adhikarana avapATyAmapyayameva kramaH (17) · Śloka 17

ಅಯಮೇವ ಪ್ರಯೋಜ್ಯಃ ಸ್ಯಾದವಪಾಟ್ಯಾಮಪಿ ಕ್ರಮಃ| |೧೭|

ಸ೦- ಅಯಮೇವ ಕ್ರಮೋಽವಪಾಟಿಕಾಯಾಂ ಯೋಜ್ಯಃ ಸ್ಯಾತ್|

Adhikarana niruddhamaNau nADyA snehasi~jcanAdi,niruddhamaNau evamasiddhau shastreNa pATanAdi (17-19) · Śloka 19

| ನಾಡೀಮುಭಯತೋದ್ವಾರಾಂ ನಿರುದ್ಧೇ ಜತುನಾ ಸೃತಾಮ್||೧೭|| ಸ್ನೇಹಾಕ್ತಾಂ ಸ್ರೋತಸಿ ನ್ಯಸ್ಯ ಸಿಞ್ಚೇತ್ಸ್ನೇಹೈಶ್ಚಲಾಪಹೈಃ| ತ್ರ್ಯಹಾತ್ತ್ರ್ಯಹಾತ್ಸ್ಥೂಲತರಾಂ ನ್ಯಸ್ಯ ನಾಡೀಂ ವಿವರ್ಧಯೇತ್||೧೮|| ಸ್ರೋತೋದ್ವಾರಮಸಿದ್ಧೌ ತು ವಿದ್ವಾನ್ ಶಸ್ತ್ರೇಣ ಪಾಟಯೇತ್| ಸೇವನೀಂ ವರ್ಜಯನ್ ಯುಞ್ಜ್ಯಾತ್ ಸದ್ಯಃಕ್ಷತವಿಧಿಂ ತತಃ||೧೯||

ಸ೦- ನಿರುದ್ಧೇ-ನಿರುದ್ಧಾಖ್ಯೇ ನಿರುದ್ಧಮಣೌ, ನಾಡೀಂ ದ್ವಿದ್ವಾರಾಂ ಜತುನಾ ಸೃತಾಂ ಲಿಪ್ತಾಃ ಸ್ನೇಹಾಕ್ತಾಂ ಲಿಙ್ಗೇ ನ್ಯಸ್ಯ ಲಿಙ್ಗಂ ಬಲಾತೈಲಾದಿಭಿಃ ಸ್ನೇಹೈಃ ಸಿಞ್ಚೇತ್| ತ್ರ್ಯಹಾತ್ತ್ರ್ಯಹಾತ್ ಸ್ಥೂಲತರಾಂ ನಾಡೀಂ ಕ್ಷಿಪ್ತ್ವಾ ಸ್ರೋತೋದ್ವಾರಂ ವೃದ್ಧಿಂ ನಯೇತ್| ಏವಮಪ್ಯಸಿದ್ಧೌ ಧೀಮಾನ್ ವೈದ್ಯಃ ಸೇವನೀಂ ಪರಿಹರನ್ ಶಸ್ತ್ರೇಣ ಪಾಟಯೇತ್| ತತಃ-ಪಾಟನಾದನನ್ತರಂ, ಸದ್ಯಃಕ್ಷತವಿಧಾನಂ ಯುಞ್ಯಾತ್|

Adhikarana grathite svedanamupanAhashca (20) · Śloka 20

ಗ್ರನ್ಥಿತಂ ಸ್ವೇದಿತಂ ನಾಡ್ಯಾ ಸ್ನಿಗ್ಧೋಷ್ಣೈರುಪನಾಹಯೇತ್| |೨೦|

ಸ೦-ಗ್ರನ್ಥಿತಸಂಜ್ಞಂ ನಾಡ್ಯಾ ಸ್ವೇದಿತಂ ಸ್ನಿಗ್ಧೋಷ್ಣೈರುಪನಾಹಯೇತ್|

Adhikarana Sataponake lekhanaM kaShAyairlepaSca (20) · Śloka 20

| ಲಿಮ್ಪೇತ್ಕಷಾಯೈಃ ಸಕ್ಷೌದ್ರೈರ್ಲಿಖಿತ್ವಾ ಶತಪೋನಕಮ್||೨೦||

ಸ೦- ಶತಪೋನಕಂ ಲಿಙ್ಗರೋಗಂ ಲಿಖಿತ್ವಾ ಕಷಾಯದ್ರವ್ಯಚೂರ್ಣೈಃ ಸಮಾಕ್ಷಿಕೈರ್ಲಿಮ್ಪೇತ್|

Adhikarana raktArbude raktavidradhivat (21) · Śloka 21

ರಕ್ತವಿದ್ರಧಿವತ್ಕಾರ್ಯಾ ಚಿಕಿತ್ಸಾ ಶೋಣಿತಾರ್ಬುದೇ| |೨೧|

ಸ೦-ಶೋಣಿತಾರ್ಬುದೇ ರಕ್ತವಿದ್ರಧಿವಚ್ಚಿಕಿತ್ಸಾ ಕರ್ತವ್ಯಾ|

Adhikarana sarveShu yathAvasthaM vraNopacAraH (21) · Śloka 21

| ವ್ರಣೋಪಚಾರಂ ಸರ್ವೇಷು ಯಥಾವಸ್ಥಂ ಪ್ರಯೋಜಯೇತ್||೨೧||

ಸ೦-ಸರ್ವೇಷು ಲಿಙ್ಗರೋಗೇಷು ಯಥಾವಸ್ಥಂ-ಅವಸ್ಥಾವಶಾತ್, ವ್ರಣೋಪಚಾರಾನ್-ಅನ್ತಃಶುದ್ಧಿಕಷಾಯಲೇಪಘೃತತೈಲರಸಕ್ರಿಯಾಚೂರ್ಣಾಂಶ್ಛೋಧನರೋಪಣಾನ್, ಪ್ರಯೋಜಯೇತ್|

Adhikarana yonivyApaccikitsA ------- yonivyApatsu BUyiShThaM vAtajit karma, tatra hetuSca,vAtajAsu visheShataH snehanAdi (22-23) · Śloka 23

ಯೋನಿವ್ಯಾಪತ್ಸು ಭೂಯಿಷ್ಠಂ ಶಸ್ಯತೇ ಕರ್ಮ ವಾತಜಿತ್| ಸ್ನೇಹನಸ್ವೇದಬಸ್ತ್ಯಾದಿ ವಾತಜಾಸು ವಿಶೇಷತಃ||೨೨|| ನ ಹಿ ವಾತಾದೃತೇ ಯೋನಿರ್ವನಿತಾನಾಂ ಪ್ರದುಷ್ಯತಿ| ಅತೋ ಜಿತ್ವಾ ತಮನ್ಯಸ್ಯ ಕುರ್ಯಾದ್ದೋಷಸ್ಯ ಭೇಷಜಮ್||೨೩||

ಸ೦- ಯೋನಿವ್ಯಾಪತ್ಸು ವಿಷಯೇ ಪ್ರಾಯೇಣ ಪವನವಿಜಯಿ ಚಿಕಿತ್ಸಿತಂ ಯುಕ್ತಮ್| ಸ್ನೇಹನಾದಿ ವಾತೋತ್ಥಾಸು ವ್ಯಾಪತ್ತಿಷು ವಿಶೇಷೇಣ ಶಸ್ಯತೇ| ಸಂ-ಯತೋ ವಾತಮನ್ತರೇಣ ಯೋಷಿತೋ ಯೋನಿರ್ನ ದುಷ್ಯತಿ| ತಸ್ಮಾತ್ತಂ ಮಾರುತಂ, ಜಿತ್ವಾ ಪರಸ್ಯ ದೋಷಸ್ಯೌಷಧಂ ಕುರ್ಯಾತ್|

Adhikarana vAtajAsu balAtailAdipAnam, duHsthitAdiyoneH samatvAdikaraNam, tatra hetushca (24-26) · Śloka 26

ಪಾಯಯೇತ(ತ್ತಾಂ) ಬಲಾತೈಲಂ ಮಿಶ್ರಕಂ ಸುಕುಮಾರಕಮ್| ಸ್ನಿಗ್ಧಸ್ವಿನ್ನಾಂ ತಥಾ ಯೋನಿಂ ದುಃಸ್ಥಿತಾಂ ಸ್ಥಾಪಯೇತ್ಸಮಾಮ್||೨೪|| ಪಾಣಿನಾ ನಮಯೇಜ್ಜಿಹ್ಯಾಂ ಸಂವೃತಾಂ ವ್ಯಧಯೇತ್ ಪುನಃ| ಪ್ರವೇಶಯೇನ್ನಿಃಸೃತಾಂ ಚ ವಿವೃತಾಂ ಪರಿವರ್ತಯೇತ್||೨೫|| ಸ್ಥಾನಾಪವೃತ್ತಾ ಯೋನಿರ್ಹಿ ಶಲ್ಯಭೂತಾ ಸ್ತ್ರಿಯೋ ಮತಾ| |೨೬|

ಸ೦- ತಾಂ-ಸ್ತ್ರಿಯಂ, ಬಲಾತೈಲಂ (ಚಿ. ಅ.೨೧/೭೩), ಮಿಶ್ರಕಾಖ್ಯಂ(ಚಿ. ಅ.೧೪/೮೯), ವಾ, ಸುಕುಮಾರಕಾಹ್ವಯಂ (ಚಿ. ಅ.೧೩/೪೧), ಪಾಯಯೇತ್| ತಥಾ ಯೋನಿಂ ಸ್ನಿಗ್ಧಾಂ ಸ್ವಿನ್ನಾಂ ಚ ದುಃಸ್ಥಿತಾಂ ಸಮಾಂ ಸ್ಥಾಪಯೇತ್| ಜಿಹ್ಯಾಂ-ಕುಟಿಲಾಂ ಯೋನಿಂ, ಹಸ್ತೇನ ನಮಯೇತ್| ಸಂವೃತಾಂ ತು ವ್ಯಧಯೇತ್-ಪ್ರಸಾರಯೇದಿತ್ಯರ್ಥಃ| ನಿಃಸೃತಾಂ ಚ ಪ್ರವೇಶಯೇತ್| ವಿವೃತಾಂ ತು ಸತೀಂ ಪರಿವರ್ತಯೇತ್| ಯತಃ ಸ್ಥಾನಾದ್ ಭ್ರಷ್ಟಾ ಯೋನಿಃ ಸ್ತ್ರಿಯಃ ಶಲ್ಯರೂಪಾ ಭವೇತ್|

Adhikarana vAtajAsu strIShu mRudUni vamanAdikarmANi, strIShu shuddhAsu bastyAdi karma (26-27) · Śloka 27

| ಕರ್ಮಭಿರ್ವಮನಾದ್ಯೈಶ್ಚ ಮೃದುಭಿರ್ಯೋಜಯೇತ್ಸ್ತ್ರಿಯಮ್||೨೬|| ಸರ್ವತಃ ಸುವಿಶುದ್ಧಾಯಾಃ ಶೇಷಂ ಕರ್ಮ ವಿಧೀಯತೇ| ಬಸ್ತ್ಯಭ್ಯಙ್ಗಪರೀಷೇಕಪ್ರಲೇಪಪಿಚುಧಾರಣಮ್||೨೭||

ಸ೦- ವಮನಾದೀನಿ ಚ ಕರ್ಮಾಣಿ ಮೃದೂನಿ-ಅಖರಾಣಿ, ಸ್ತ್ರೀ(ಸ್ತ್ರಿಯಾ) ಕಾರಯಿತವ್ಯಾ(ನಿ)| ಸರ್ವತಃ-ಅಧ ಉಪರಿಷ್ಟಾಚ್ಚ, ವಿಶುದ್ಧಾಯಾ ನಾರ್ಯಾಃ ಪರಿಶಿಷ್ಟಂ ಕರ್ಮ-ಬಸ್ತ್ಯಾದಿಕಂ, ಕ್ರಿಯತೇ|

Adhikarana vAtajAsu kAshmaryAdighRutaM paraM garbhadam (28-29) · Śloka 29

ಕಾಶ್ಮರ್ಯತ್ರಿಫಲಾದ್ರಾಕ್ಷಾಕಾಸಮರ್ದನಿಶಾದ್ವಯೈಃ| ಗುಡೂಚೀಸೈರ್ಯಕಾಭೀರುಶುಕನಾಸಾಪುನರ್ನವೈಃ||೨೮|| ಪರೂಷಕೈಶ್ಚ ವಿಪಚೇತ್ಪ್ರಸ್ಥಮಕ್ಷಸಮೈರ್ಘೃತಾತ್| ಯೋನಿವಾತವಿಕಾರಘ್ನಂ ತತ್ಪೀತಂ ಗರ್ಭದಂ ಪರಮ್||೨೯||

ಸ೦- ಕಾಶ್ಮರ್ಯಾದಿಭಿಃ ಕಲ್ಕಿತೈಃ ಕಾರ್ಷಿಕೈರ್ಘೃತಾತ್ಪ್ರಸ್ಥಂ ಪಚೇತ್| ತತ್-ಘೃತಂ, ಪೀತಂ ಯೋನಿವಾತವಿಕಾರಹರಂ ಸುಷ್ಠು ಗರ್ಭದಂ ಚ|

Adhikarana vAtajAsu vacAdicUrNaM yonipArshvArtyAdinAshakam (30-31) · Śloka 31

ವಚೋಪಕುಞ್ಚಿಕಾಜಾಜೀಕೃಷ್ಣಾವೃಷಕಸೈನ್ಧವಮ್| ಅಜಮೋದಾಯವಕ್ಷಾರಶರ್ಕರಾಚಿತ್ರಕಾನ್ವಿತಮ್||೩೦|| ಪಿಷ್ಟ್ವಾ ಪ್ರಸನ್ನಯಾಽಽಲೋಡ್ಯ ಖಾದೇತ್ತದ್ಘೃತಭರ್ಜಿತಮ್| ಯೋನಿಪಾರ್ಶ್ವಾರ್ತಿಹೃದ್ರೋಗಗುಲ್ಮಾರ್ಶೋವಿನಿವೃತ್ತಯೇ||೩೧||

ಸ೦- ವಚಾದಿಕಂ ಪಿಷ್ಟ್ವಾ ಪ್ರಸನ್ನಯಾಽಽಲೋಡ್ಯ ಘೃತಭರ್ಜಿತಂ ಖಾದೇತ್ ಯೋನಿಪಾರ್ಶ್ವಾರ್ತ್ಯಾದಿಶಾನ್ತಯೇ|

Adhikarana vAtajAsu vRuShakAdicUrNaM tathaiva (32) · Śloka 32

ವೃಷಕಂ ಮಾತುಲುಙ್ಗಸ್ಯ ಮೂಲಾನಿ ಮದಯನ್ತಿಕಾಮ್| ಪಿಬೇನ್ಮದ್ಯೈಃ ಸಲವಣೈಸ್ತಥಾ ಕೃಷ್ಣೋಪಕುಞ್ಚಿಕೇ||೩೨||

ಸ೦- ವೃಷಕಾದೀನಿ ಮದ್ಯೈಃ ಸಲವಣೈಃ ಪಿಬೇತ್| ತಥಾ ಪಿಪ್ಪಲೀ ಸ್ಥೂಲಜೀರಕೇ ವಾ ಮದ್ಯೈಃ ಸಲವಣೈಃ ಪಿಬೇತ್|

Adhikarana vAtajAsu rAsnAdishRutaM payaH shUlaharam (33) · Śloka 33

ರಾಸ್ನಾಶ್ವದಂಷ್ಟ್ರಾವೃಷಕೈಃ ಶೃತಂ ಶೂಲಹರಂ ಪಯಃ| |೩೩|

ಸ೦- ರಾಸ್ನಾದಿಭಿಃ ಶೃತಂ ಪಯಃ ಶೂಲಘ್ನಮ್|

Adhikarana vAtajAsu guDUcyAdikvAthaiH secanam (33) · Śloka 33

| ಗುಡೂಚೀತ್ರಿಫಲಾದನ್ತೀಕ್ವಾಥೈಶ್ಚ ಪರಿಷೇಚನಮ್||೩೩||

ಸ೦- ಗುಡೂಚ್ಯಾದಿಭಿಃ ಕ್ವಾಥೈಃ ಪರಿಷೇಚನಂ ಸುಖೋಷ್ಣಂ ಹಿತಮ್, ಪ್ರಕೃತತ್ವಾದ್ಯೋನೇಃ|

Adhikarana vAtajAsu natAdisAdhitatailapicuH shUlaghnaH (34) · Śloka 34

ನತವಾರ್ತಾಕಿನೀಕುಷ್ಠಸೈನ್ಧವಾಮರದಾರುಭಿಃ| ತೈಲಾತ್ಪ್ರಸಾಧಿತಾದ್ಧಾರ್ಯಃ ಪಿಚುರ್ಯೋನೌ ರುಜಾಪಹಃ||೩೪||

ಸ೦- ನತಾದಿಭಿಸ್ತೈಲಾತ್ ಪಕ್ವಾತ್ ಪಿಚುರ್ಯೋನೌ ಧೃತೋ ರುಜಾಘ್ನಃ|

Adhikarana pittalAsu shItAH yonisekAdayaH (35) · Śloka 35

ಪಿತ್ತಲಾನಾಂ ತು ಯೋನೀನಾಂ ಸೇಕಾಭ್ಯಙ್ಗಪಿಚುಕ್ರಿಯಾಃ| ಶೀತಾಃ ಪಿತ್ತಜಿತಃ ಕಾರ್ಯಾಃ ಸ್ನೇಹನಾರ್ಥಂ ಘೃತಾನಿ ಚ||೩೫||

ಸ೦- ಪಿತ್ತಲಾನಾಂ ಚ ಯೋನೀನಾಂ ಶೀತಾದಿಕಾಃ ಕ್ರಿಯಾಃ ಸೇಕಾದ್ಯಾಃ ಕಾರ್ಯಾಃ| ಸ್ನೇಹನಾರ್ಥಂ ಘೃತಾನಿ ಚ ದೇಯಾನಿ|

Adhikarana pittalAsu shatAvaryAdilehaH (36-40) · Śloka 40

ಶತಾವರೀಮೂಲತುಲಾಚತುಷ್ಕಾತ್ ಕ್ಷುಣ್ಣಪೀಡಿತಾತ್| ರಸೇನ ಕ್ಷೀರತುಲ್ಯೇನ ಪಾಚಯೇತ ಘೃತಾಢಕಮ್||೩೬|| ಜೀವನೀಯೈಃ ಶತಾವರ್ಯಾ ಮೃದ್ವೀಕಾಭಿಃ ಪರೂಷಕೈಃ| ಪಿಷ್ಟೈಃ ಪ್ರಿಯಾಲೈಶ್ಚಾಕ್ಷಾಂಶೌರ್ದ್ವಿಬಲಾಮಧುಕಾನ್ವಿತೈಃ||೩೭|| ಸಿದ್ಧಶೀತೇ ತು ಮಧುನಃ ಪಿಪ್ಪಲ್ಯಾಶ್ಚ ಪಲಾಷ್ಟಕಮ್| ಶರ್ಕರಾಯಾ ದಶಪಲಂ ಕ್ಷಿಪೇಲ್ಲಿಹ್ಯಾತ್ಪಿಚುಂ ತತಃ||೩೮|| ಯೋನ್ಯಸೃಕ್ಶುಕ್ರದೋಷಘ್ನಂ ವೃಷ್ಯಂ ಪುಂಸವನಂ ಪರಮ್| ಕ್ಷತಂ ಕ್ಷಯಮಸೃಕ್ಪಿತ್ತಂ ಕಾಸಂ ಶ್ವಾಸಂ ಹಲೀಮಕಮ್||೩೯|| ಕಾಮಲಾಂ ವಾತರುಧಿರಂ ವಿಸರ್ಪಂ ಹೃಚ್ಛಿರೋಗ್ರಹಮ್| ಅಪಸ್ಮಾರಾರ್ದಿತಾಯಾಮಮದೋನ್ಮಾದಾಂಶ್ಚ ನಾಶಯೇತ್||೪೦||

ಸ೦- ಶತಾವರೀಮೂಲತುಲಾಚತುಷ್ಟಯಾತ್ ಕ್ಷುಣ್ಣಪೀಡಿತಾದ್ ರಸೇನ ದುಗ್ಧಸಮೇನ ಸರ್ಪಿಷ ಆಢಕಂ ಪಚೇಜ್ಜೀವನೀಯಾದಿಭಿಃ ಕರ್ಷಾಂಶೈಃ ಕಲ್ಕೀಕೃತೈಃ| ಪಕ್ವೇ ಶೀತೇ ಚ ಮಾಕ್ಷಿಕಪಲಾಷ್ಟಕಂ, ಕಣಾಷ್ಟಪಲಂ, ಸಿತಾಪಲಾನಿ ಚ ದಶ, ಕ್ಷಿಪೇತ್| ತಸ್ಮಾಚ್ಚ ಕರ್ಷಮಾತ್ರಂ ಲಿಹ್ಯಾತ್ ಯೋನ್ಯಾದಿದೋಷಘ್ನಂ ವೃಷ್ಯಾದಿಗುಣಂ ಚ|

Adhikarana pittalAsu evameva payaH sarpiH (41) · Śloka 41

ಏವಮೇವ ಪಯಃ ಸರ್ಪಿರ್ಜೀವನೀಯೋಪಸಾಧಿತಮ್| ಗರ್ಭದಂ ಪಿತ್ತಜಾನಾಂ ಚ ರೋಗಾಣಾಂ ಪರಮಂ ಹಿತಮ್||೪೧||

ಸ೦- ಅನೇನೈವ ಕ್ರಮೇಣ ಕ್ಷೀರಂ ಸರ್ಪಿರ್ವಾ ಜೀವನೀಯೈಃ ಪಕ್ವಂ ಗರ್ಭಪ್ರದಂ ಪಿತ್ತಜಾನಾಂ ಚ ರೋಗಾಣಾಂ ಪರಂ ಹಿತಮ್|

Adhikarana pitta balAdighRutatailaM garbhadam (42-44) · Śloka 44

ಬಲಾದ್ರೋಣದ್ವಯಕ್ವಾಥೇ ಘೃತತೈಲಾಢಕಂ ಪಚೇತ್| ಕ್ಷೀರೇ ಚತುರ್ಗುಣೇ ಕೃಷ್ಣಾಕಾಕನಾಸಾಸಿತಾನ್ವಿತೈಃ||೪೨|| ಜೀವನ್ತೀಕ್ಷೀರಕಾಕೋಲೀಸ್ಥಿರಾವೀರರ್ಧಿಜೀವಕೈಃ| ಪಯಸ್ಯಾಶ್ರಾವಣೀಮುದ್ಗಪೀಲುಮಾಷಾಖ್ಯಪರ್ಣಿಭಿಃ||೪೩|| ವಾತಪಿತ್ತಾಮಯಾನ್ ಹತ್ವಾ ಪಾನಾದ್ ಗರ್ಭಂ ದಧಾತಿ ತತ್| |೪೪|

ಸ೦-ಬಲಾಯಾ ದ್ರೋಣದ್ವಯಸ್ಯ ಕಷಾಯೇ ಘೃತತೈಲಯೋರಾಢಕಂ ಪಚೇತ್| ಕ್ಷೀರೇ ಚತುರಾಢಕೇ ಕೃಷ್ಣಾದಿಭಿಃ ಕಲ್ಕಿತೈಃ ಸಾಮಾನ್ಯಪರಿಭಾಷಯೋಕ್ತಪ್ರಮಾಣೈಃ| ತತ್-ಘೃತಂ, ಪಾನೇನ ವಾತಪಿತ್ತರೋಗಾನ್ ಹತ್ವಾ ಗರ್ಭಂ ಧತ್ತೇ| ಮುದ್ಗಾದೀನಾಂ ಪರ್ಣ್ಯಾ ಪ್ರತ್ಯೇಕಂ ಸಮ್ಬನ್ಧಃ,- ಮುದ್ಗಪರ್ಣೀ ಪೀಲುಪರ್ಣೀ ಮಾಷಪರ್ಣೀತಿ|

Adhikarana raktayonyAM yathAdoShaM raktasthApanamauShadham (44-45) · Śloka 45

| ರಕ್ತಯೋನ್ಯಾಮಸೃಗ್ವರ್ಣೈರನುಬನ್ಧಮವೇಕ್ಷ್ಯ ಚ||೪೪|| ಯಥಾದೋಷೋದಯಂ ಯುಞ್ಜ್ಯಾದ್ ರಕ್ತಸ್ಥಾಪನಮೌಷಧಮ್| |೪೫|

ಸ೦- ರಕ್ತಯೋನ್ಯಾಂ ಲೋಹಿತಂ ವರ್ಣೈರ್ಲಕ್ಷಯಿತ್ವಾಽನುಬನ್ಧಂ ಚ ಯಥಾದೋಷೋದಯಂ, ರಕ್ತಸ್ಥಾಪನಂ ಭೇಷಜಂ ಪ್ರಯುಞ್ಜೀತ|

Adhikarana raktayonyAM puShyAnugaM cUrNam, shlaiShmikyAM sarvaM rukShoShNamauShadham (45-50) · Śloka 50

| ಪಾಠಾಂ ಜಮ್ಬ್ವಾಮ್ರಯೋರಸ್ಥಿ ಶಿಲೋದ್ಭೇದಂ ರಸಾಞ್ಜನಮ್||೪೫|| ಅಮ್ಬಷ್ಠಾಂ ಶಾಲ್ಮಲೀಪಿಚ್ಛಾಂ ಸಮಙ್ಗಾಂ ವತ್ಸಕತ್ವಚಮ್| ಬಾಹ್ಲೀಕಬಿಲ್ವಾತಿವಿಷಾರೋಧ್ರತೋಯದಗೈರಿಕಮ್||೪೬|| ಶುಣ್ಠೀಮಧೂಕಮಾಚೀಕರಕ್ತಚನ್ದನಕಟೂಫಲಮ್| ಕಟ್ವಙ್ಗವತ್ಸಕಾನನ್ತಾಧಾತಕೀಮಧುಕಾರ್ಜುನಮ್||೪೭|| ಪುಷ್ಯೇ ಗೃಹೀತ್ವಾ ಸಞ್ಚೂರ್ಣ್ಯ ಸಕ್ಷೌದ್ರಂ ತನ್ದುಲಾಮ್ಭಸಾ| ಪಿಬೇದರ್ಶಃಸ್ವತೀಸಾರೇ ರಕ್ತಂ ಯಶ್ಚೋಪವೇಶ್ಯತೇ||೪೮|| ದೋಷಾ ಜನ್ತುಕೃತಾ ಯೇ ಚ ಬಾಲಾನಾಂ ತಾಂಶ್ಚ ನಾಶಯೇತ್| ಯೋನಿದೋಷಂ ರಜೋದೋಷಂ ಶ್ಯಾವಶ್ವೇತಾರುಣಾಸಿತಮ್||೪೯|| ಚೂರ್ಣಂ ಪುಷ್ಯಾನುಗಂ ನಾಮ ಹಿತಮಾತ್ರೇಯಪೂಜಿತಮ್| ಯೋನ್ಯಾಂ ಬಲಾಸದುಷ್ಟಾಯಾಂ ಸರ್ವಂ ರೂಕ್ಷೋಷ್ಣಮೌಷಧಮ್||೫೦||

ಸ೦- ಪಾಠಾದಿಕಂ ಪುಷ್ಯೇ ಗೃಹೀತ್ವಾ ಸಞ್ಚೂರ್ಣ್ಯ ಕ್ಷೌದ್ರಾನ್ವಿತಂ ತನ್ದುಲಾಮ್ಭಸಾ ಪಿಬೇತ್ ಅರ್ಶೋವಿಷಯಾದಿಷು| ಯೇ ಚ ದೋಷಾ ಜನ್ತುಕೃತಾ ಬಾಲಾನಾಂ, ತಾಂಶ್ಚ ಯೋನಿದೋಷಾದೀನ್ ಹನ್ತಿ| ಪುಷ್ಯಾನುಗಸಂಜ್ಞಮೇತಚ್ಚೂರ್ಣಂ ಹಿತಮಾತ್ರೇಯಪೂಜಿತಂ ಚ| ಸ೦- ಯೋನ್ಯಾಂ ಬಲಾಸೇನಾ ದುಷ್ಟಾಯಾಂ ಸರ್ವಮೇವ ರೂಕ್ಷೋಷ್ಣಂ ಹಿತಮ್|

Adhikarana shUnonnatAstabdhApicchilAsrAviNIviplutopaplutAdyAsu yoniShu dhAtakyAditailenAbhya~ggAdikam (51-54) · Śloka 54

ಧಾತಕ್ಯಾಮಲಕೀಪತ್ರಸ್ರೋತೋಜಮಧುಕೋತ್ಪಲೈಃ| ಜಮ್ಬ್ವಾಮ್ರಸಾರಕಾಸೀಸರೋಧ್ರಕಟ್ಫಲತಿನ್ದುಕೈಃ||೫೧|| ಸೌರಾಷ್ಟ್ರಿಕಾದಾಡಿಮತ್ವಗುದುಮ್ಬರಶಲಾಟುಭಿಃ| ಅಕ್ಷಮಾತ್ರೈರಜಾಮೂತ್ರೇ ಕ್ಷೀರೇ ಚ ದ್ವಿಗುಣೇ ಪಚೇತ್||೫೨|| ತೈಲಪ್ರಸ್ಥಂ ತದಭ್ಯಙ್ಗಪಿಚುಬಸ್ತಿಷು ಯೋಜಯೇತ್| ತೇನ ಶೂನೋನ್ನತಾ ಸ್ತಬ್ಧಾ ಪಿಚ್ಛಿಲಾ ಸ್ರಾವಿಣೀ ತಥಾ||೫೩|| ವಿಪ್ಲುತೋಪಪ್ಲುತಾ ಯೋನಿಃ ಸಿದ್ಧ್ಯೇತತ್ಸ್ಫೋಟಶೂಲಿನೀ| |೫೪|

ಸ೦- ಧಾತಕ್ಯಾದಿಭಿಃ ಕಾರ್ಷಿಕೈಶ್ಛಾಗಮೂತ್ರೇ ದ್ವಿಗುಣೇ, ಕ್ಷೀರೇ ಚ ದ್ವಿಗುಣೇ, ತೈಲಪ್ರಸ್ಥಂ ಪಚೇತ್| ತತ್ತೈಲಮಭ್ಯಙ್ಗಾದಿಷು ಯೋಜ್ಯಮ್| ಅನೇನ ತೈಲೇನ ಶೂನಾದಿಗುಣಾ ಯೋನಿಃ ಸಿಧ್ಯತಿ|

Adhikarana shUnonnatAstabdhApicchilAsrAviNIviplutopaplutAdyAsu yoniShu yavAnnAdishIlanam (54-55) · Śloka 55

| ಯವಾನ್ನಮಭಯಾರಿಷ್ಟಂ ಸೀಧು ತೈಲಂ ಚ ಶೀಲಯೇತ್||೫೪|| ಪಿಪ್ಪಲ್ಯಯೋರಜಃ ಪಥ್ಯಾಪ್ರಯೋಗಾಂಶ್ಚ ಸಮಾಕ್ಷಿಕಾನ್| |೫೫|

ಸ೦- ತಥಾ ಯವಾನ್ನಾದಿಕಂ ಶೀಲಯೇತ್| ಪಿಪ್ಪಲ್ಯಾದಿಪ್ರಯೋಗಾಂಶ್ಚ ಕ್ಷೌದ್ರಾನ್ವಿತಾನಭ್ಯಸೇತ್|

Adhikarana paicchilye kAsIsAdicUrNo vaishadyakArakaH (55-56) · Śloka 56

| ಕಾಸೀಸಂ ತ್ರಿಫಲಾ ಕಾಙ್ಕ್ಷೀ ಸಾಮ್ರಜಮ್ಬ್ವಸ್ಥಿ ಧಾತುಕೀ||೫೫|| ಪೈಚ್ಛಿಲ್ಯೇ ಕ್ಷೌದ್ರಸಂಯುಕ್ತಶ್ಚೂರ್ಣೋ ವೈಶದ್ಯಕಾರಕಃ| |೫೬|

ಸ೦- ಕಾಸೀಸಾದಿಕಶ್ಚೂರ್ಣೋ ಮಾಕ್ಷಿಕಾನ್ವಿತಃ ಪೈಚ್ಛಿಲ್ಯೇ ವಿಶದತ್ವಕೃತ್|

Adhikarana paicchilye durgandhe palAshAdicUrNaH, AragvadhAdikvAthena secanam (56-57) · Śloka 57

| ಪಲಾಶಧಾತಕೀಜಮ್ಬೂಸಮಙ್ಗಾಮೋಚಸರ್ಜಜಃ||೫೬|| ದುರ್ಗನ್ಧೇ ಪಿಚ್ಛಿಲೇ ಕ್ಲೇದೇ ಸ್ತಮ್ಭನಶ್ಚೂರ್ಣ ಇಷ್ಯತೇ| ಆರಗ್ವಧಾದಿವರ್ಗಸ್ಯ ಕಷಾಯಃ ಪರಿಷೇಚನಮ್||೫೭||

ಸ೦- ಪಲಾಶಾದಿಜಶ್ಚೂರ್ಣೋ ದುರ್ಗನ್ಧಾದಿಷು ಸ್ತಮ್ಭನಮಿಷ್ಯತೇ| ಆರಗ್ವಧಾದಿವರ್ಗಕ್ವಾಥೋ (ಹೃ.ಸೂ. ಅ. ೧೫/೧೭) ದುರ್ಗನ್ಧಾದೌ ಪರಿಷೇಕಃ|

Adhikarana stabdhAsu karkashAsu mArdavakaraM vesavArAdi dhAraNam (58) · Śloka 58

ಸ್ತಮ್ಬ್ಧಾನಾಂ ಕರ್ಕಶಾನಾಂ ಚ ಕಾರ್ಯಂ ಮಾರ್ದವಕಾರಕಮ್| ಧಾರಣಂ ವೇಸವಾರಸ್ಯ ಕೃಸರಾಪಾಯಸಸ್ಯ ಚ||೫೮||

ಸಂ-ಸ್ತಮ್ಬ್ಧಾನಾಂ ಖರಸ್ಪರ್ಶಾನಾಂ ಚ ಯೋನೀನಾಂ ಮೃದುತ್ವಕರಂ ವೇಸವಾರಾದಿಧಾರಣಂ ವಿಧೇಯಮ್| ವೇಸವಾರಃ-ಕುಟ್ಟಿತಸ್ವಿನ್ನಸಂಸ್ಕೃತಮಾಂಸವಿಶೇಷಃ| ಕೃಸರಾ ಚ ಪಾಯಸಂ ಚ ಕೃಸರಾಪಾಯಸಮ್|

Adhikarana durgandhAsu yoniShu sarvagandhAnAM kaShAyAdi (59) · Śloka 59

ದುರ್ಗನ್ಧಾನಾಂ ಕಷಾಯಃ ಸ್ಯಾತ್ತೈಲಂ ವಾ ಕಲ್ಕ ಏವ ವಾ| ಚೂರ್ಣೇ ವಾ ಸರ್ವಗನ್ಧಾನಾಂ ಪೂತಿಗನ್ಧಾ(ನ್ಧ್ಯ)ಪಕರ್ಷಣಃ||೫೯||

ಸಂ-ದುರ್ಗನ್ಧಾನಾಂ ಯೋನೀನಾಂ ಸರ್ವಗನ್ಧದ್ರವ್ಯಾಣಾಂ ಕಷಾಯಃ-ಕ್ವಾಥೋ, ಹಿತಃ| ತತ್ಪಕ್ವಂ ತೈಲಂ ತತ್ಕಲ್ಕ ಏವ ವಾ| ಅಥವಾ ಸರ್ವಗನ್ಧಾನಾಂ ಚೂರ್ಣಃ ಪೂತಿಗನ್ಧಾ(ನ್ಧ್ಯ) ಪಹಃ|

Adhikarana shleShmalAsu kaTuprAyA bastayaH, pitte samadhukakShIrAH bastayaH, vAte tailAmlayutAH bastayaH (60) · Śloka 60

ಶ್ಲೇಷ್ಮಲಾನಾಂ ಕಟುಪ್ರಾಯಾಃ ಸಮೂತ್ರಾ ಬಸ್ತಯೋ ಹಿತಾಃ| ಪಿತ್ತೇ ಸಮಧುಕಕ್ಷೀರಾ ವಾತೇ ತೈಲಾಮ್ಲಸಂಯುತಾಃ||೬೦||

ಸ೦- ಶ್ಲೇಷ್ಮಲಾನಾಂ ಯೋನೀನಾಂ ಕಟುಪ್ರಾಯಾ ಗೋಮೂತ್ರಯುತಾಶ್ಚ ಬಸ್ತಯೋ ಹಿತಾಃ| ಪಿತ್ತೇ ಮಧುಯಷ್ಟೀಕ್ಷೀರಯುಕ್ತಾ ಬಸ್ತಯಃ| ವಾತೇ ತೈಲಾಮ್ಲಯುತಾ ಬಸ್ತಯೋ ಹಿತಾಃ|

Adhikarana sannipAtajAyAM sAdhAraNaM karma (61) · Śloka 61

ಸನ್ನಿಪಾತಸಮುತ್ಥಾಯಾಃ ಕರ್ಮ ಸಾಧಾರಣಂ ಹಿತಮ್| |೬೧|

ಸ೦-ಸನ್ನಿಪಾತೋತ್ಥಾಯಾಃ ಸಾಧಾರಣಂ ಕರ್ಮ ಹಿತಮ್|

Adhikarana evaM yoniShu shuddhAsu garbhadhAraNam (61-62) · Śloka 62

| ಏವಂ ಯೋನಿಷು ಶುದ್ಧಾಸು ಗರ್ಭಂ ವಿನ್ದನ್ತಿ ಯೋಷಿತಃ||೬೧|| ಅದುಷ್ಟೇ ಪ್ರಾಕೃತೇ ಬೀಜೇ ಜೀವೋಪಕ್ರಮಣೇ ಸತಿ| |೬೨|

ಸ೦- ಏವಂ-ಅನೇನ ಪ್ರಕಾರೇಣ, ಯೋನಿಷು ವಿಶುದ್ಧಾಸು ಸತೀಷು ಸ್ತ್ರಿಯೋ ಗರ್ಭಂ ಲಭನ್ತೇ| ಪ್ರಾಕೃತೇ ಬೀಜೇಽದುಷ್ಟೇ ಸತಿ ತಥಾ ಜೀವಸ್ಯೋಪಕ್ರಮಣೇ ಕ್ಷೇಪೇ ಸತಿ|

Adhikarana puruShasyApi duShTaM shukraM parIkShyopakramaH (62-63) · Śloka 63

| ಪಞ್ಚಕರ್ಮವಿಶುದ್ಧಸ್ಯ ಪುರುಷಸ್ಯಾಪಿ ಚೇನ್ದ್ರಿಯಮ್||೬೨|| ಪರೀಕ್ಷ್ಯ ವರ್ಣೈರ್ದೋಷಾಣಾಂ ದುಷ್ಟಂ ತದ್ಘ್ನೈರುಪಾಚರೇತ್| |೬೩|

ಸ೦- ನರಸ್ಯ ಪಞ್ಚಭಿಃ ಕರ್ಮಭಿಃ ಶುದ್ಧಸ್ಯ, ಇನ್ದ್ರಿಯಂ,ಶುಕ್ರಂ, ದೋಷಾಣಾಂ ವರ್ಣೈರ್ದುಷ್ಟಂ ಪರೀಕ್ಷ್ಯ ತದ್ಘ್ನೈಃ-ದೋಷಘ್ನೈಃ, ಉಪಕ್ರಮೇತ್|

Adhikarana phalasarpiH yonishukradoSheShu shastamAyuShyAdikaraM ca (63-34) · Śloka 34

| ಮಞ್ಜಿಷ್ಠಾಕುಷ್ಠತಗರತ್ರಿಫಲಾಶರ್ಕರಾವಚಾಃ||೬೩|| ದ್ವೇ ನಿಶೇ ಮಧುಕಂ ಮೇದಾಂ ದೀಪ್ಯಕಂ ಕಟುರೋಹಿಣೀಮ್| ಪಯಸ್ಯಾಹಿಙ್ಗುಕಾಕೋಲೀವಾಜಿಗನ್ಧಾಶತಾವರೀಃ||೬೪|| ಪಿಷ್ಟ್ವಾಽಕ್ಷಾಂಶಾ ಘೃತಪ್ರಸ್ಥಂ ಪಚೇತ್ಕ್ಷೀರಚತುರ್ಗುಣಮ್| ಯೋನಿಶುಕ್ರಪ್ರದೋಷೇಷು ತತ್ಸರ್ವೇಷು ಪ್ರಶಸ್ಯತೇ||೬೫|| ಆಯುಷ್ಯಂ ಪೌಷ್ಟಿಕಂ ಮೇಧ್ಯಂ ಧನ್ಯಂ ಪುಂಸವನಂ ಪರಮ್| ಫಲಸರ್ಪಿರಿತಿ ಖ್ಯಾತಂ ಪುಷ್ಪೇ ಪೀತಂ ಫಲಾಯ ಯತ್||೬೬|| ಮ್ರಿಯಮಾಣಪ್ರಜಾನಾಂ ಚ ಗರ್ಭಿಣೀನಾಂ ಚ ಪೂಜಿತಮ್| ಏತತ್ಪರಂ ಚ ಬಾಲಾನಾಂ ಗ್ರಹಘ್ನಂ ದೇಹವರ್ಧನಮ್||೬೭|| ಇತಿ ಶ್ರೀವೈದ್ಯಪತಿಸಿಂಹಗುಪ್ತಸೂನುಶ್ರೀಮದ್ವಾಗ್ಭಟವಿರಚಿತಾಯಾಮಷ್ಟಾಙ್ಗಹೃದಯಸಂಹಿತಾಯಾಂ ಷಷ್ಠೇ ಉತ್ತರಸ್ಥಾನೇ ಗುಹ್ಯರೋಗಪ್ರತಿಷೇಧೋ ನಾಮ ಚತುಸ್ತ್ರಿಂಶೋಽಧ್ಯಾಯಃ||೩೪||

ಸಂ-ಮಞ್ಜಿಷ್ಟಾದಿಭಿಃ ಕಾರ್ಷಿಕೈಃ ಪಿಷ್ಟೈರ್ಘೃತಪ್ರಸ್ಥಂ ಕ್ಷೀರಚತುರ್ಗುಣಂ ಪಚೇತ್| ತದ್ಧೃತಂ ಸರ್ವೇಷು ಯೋನಿಶುಕ್ರಪ್ರದೋಷೇಷು ಶಸ್ಯತೇ| ಆಯುಷ್ಯಾದಿ ಗುಣಂ ಪರಂ ಪುಂಸವನಂ ಮ್ರಿಯಮಾಣಗರ್ಭಾಣಾಂ ಗರ್ಭಿಣೀನಾಂ ಚ ಹಿತಮ್| ಫಲಸರ್ಪಿರಿತಿ ನಾಮ್ನಾ ಪ್ರಸಿದ್ಧಮ್| ಕುತಃ ? ಯಸ್ಮಾತ್ ಪುಷ್ಪೇ-ಆರ್ತವಸಮಯೇ, ಪೀತಂ ಫಲಾಯ ಜಾಯತೇ| ತಥಾ ಪರಂ ಬಾಲಾನಾಂ ಗ್ರಹಘ್ನಂ ಶರೀರವೃದ್ಧಿಕರಂ ಚೇತಿ| ಇತಿ ಶ್ರೀಮೃಗಾಙ್ಕದತ್ತಪುತ್ರಶ್ರೀಮದರುಣದತ್ತವಿರಚಿತಾಯಾಮಷ್ಟಾಙ್ಗಹೃದಯ ಟೀಕಾಯಾಂ ಸರ್ವಾಙ್ಗಸುನ್ದರಾಖ್ಯಾಯಾಂ ಷಷ್ಠ ಉತ್ತರಸ್ಥಾನೇ ಗುಹ್ಯರೋಗ ಪ್ರತಿಷೇಧೋ ನಾಮ ಚತುಸ್ತ್ರಿಂಶೋಽಧ್ಯಾಯಃ ಸಮಾಪ್ತಃ|| ೩೪|| ಇತಿ ಶಲ್ಯತನ್ತ್ರಂ ನಾಮ ಪಞ್ಚಮಮಙ್ಗಂ ಸಮಾಪ್ತಮ್|