38. mūṣikālarkaviṣapratiṣēdhādhyāyaḥ

Adhikarana adhyAyopakramaH (1) · Śloka 1

|১|

বিষচিকিত্সাপ্রক্রমাত্ মূষিকালর্কবিষমুপক্রমতে-

Adhikarana mUShikAlarkaviShapratiShedhAdhyAyaH ------- mUShikANAM aShTAdashatvam (2) · Śloka 2

অথাতো মূষিকালর্কবিষপ্রতিষেধং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে||২|| ) লালনশ্চপলঃ পুত্রো হসিরশ্চিক্কিরোঽজিরঃ| কষাযদন্তঃ কুলকঃ কোকিলঃ কপিলোঽসিতঃ||১|| অরুণঃ শবলঃ শ্বেতঃ কপোতঃ পলিতোন্দুরঃ| ছুচ্ছুন্দরো রসালাখ্যো দশাষ্টৌ চেতি মূষিকাঃ||২||

স০- লালনাদিভেদেন দশাষ্টাধিকা ইত্যষ্টাদশ মূষিকা ভবন্তি|

Adhikarana mUShikANAM shukraviShatvam, mUShikaviShasya sAmAnyaM lakShaNam (3-5) · Śloka 5

শুক্রং পততি যত্রৈষাং শুক্রদিগ্ধৈঃ স্পৃশন্তি বা| যদঙ্গমঙ্গৈস্তত্রাস্রে দূষিতে পাণ্ডুতাং গতে||৩|| গ্রন্থযঃ শ্বযথুঃ কোঠো মণ্ডলানি ভ্রমোঽরুচিঃ| শীতজ্বরোঽতিরুক্সাদো বেপথুঃ পর্বভেদনম্||৪|| রোমহর্ষঃ স্রুতির্মূর্চ্ছা দীর্ঘকালানুবন্ধনম্| শ্লেষ্মানুবদ্ধবহ্বাখুপোতকচ্ছর্দনং সতৃট্||৫||

স০- এষাং মূষিকাণাং যত্র শুক্রং পততি, শুক্রদিগ্ধৈরঙ্গৈর্বা যদঙ্গং স্পৃশন্তি, তস্মিন্নঙ্গে রক্তে দূষিতে পাণ্ডুত্বং যাতি সতি গ্রন্থ্যাদযঃ স্যুঃ| তথা তত্প্রভাবাত্ কফানুগতবহুমূষিকপোতকবমনং সতৃট্ স্যাত্|

Adhikarana mUShikaviShasya kRuccrasAdhyalakShaNam (6) · Śloka 6

ব্যবায্যাখুবিষং কৃচ্ছ্রং ভূযো ভূযশ্চ কুপ্যতি| |৬|

স০-আখুবিষং ব্যবাযি-সকলশরীরব্যাপনশীলং, তথা কৃচ্ছ্রং-কৃছ্রসাধ্যং, পুনঃ পুনশ্চ কুপ্যতি|

Adhikarana mUShikaviShasya asAdhyalakShaNam (6-7) · Śloka 7

| মূর্চ্ছাঙ্গশোফবৈবর্ণ্যক্লেদশব্দাশ্রুতিজ্বরাঃ||৬|| শিরোগুরুত্বং লালাসৃক্ছর্দিশ্চাসাধ্যলক্ষণম্| |৭|

স০-মূর্চ্ছাদযোঽসাধ্যলক্ষণম্|

Adhikarana mUShikaviShasya varjyalakShaNam (7-8) · Śloka 8

| শূনবস্তিং বিবর্ণৌষ্ঠমাখ্বাভৈর্গ্রন্থিভিশ্চিতম্||৭|| ছুচ্ছুন্দরসগন্ধং চ বর্জযেদাখুদূষিতম্| |৮|

স০-শূনবস্তিং বিবর্ণাধরং মূষিকনিভৈর্গ্রন্থিভির্ব্যাপ্তং ছুচ্ছুন্দরগন্ধতুল্যগন্ধং চ মূষিকবিষদূষিতং নোপক্রমেত্|

Adhikarana viShayuktasya shuno lakShaNam (8-10) · Śloka 10

| শুনঃ শ্লেষ্মোল্বণাং দোষাঃ সংজ্ঞাং সংজ্ঞাবহাশ্রিতাঃ||৮|| মুষ্ণন্তঃ কুর্বতে ক্ষোভং ধাতূনামতিদারুণম্| লালাবানন্ধবধিরঃ সর্বতঃ সোঽভিধাবতি||৯|| স্রুস্তপুচ্ছহনুস্কন্ধঃ শিরোদুঃখী নতাননঃ| |১০|

স০-শুনঃ-সারমেযস্য, শ্লেষ্মাধিকা দোষাঃ সংজ্ঞাবহানি স্রোতাংস্যাশ্রিতাঃ সংজ্ঞামপহরন্তো ধাতূনামতিঘোরং ক্ষোভং কুর্বন্তি| সঃ-শ্বা, লালাযুতোঽন্ধবধিরো ধ্বস্তপুচ্ছহনুস্কন্ধঃ শিরো দুঃখী নতমুখঃ সর্বতো ধাবতি|

Adhikarana viShayuktasya daMshasya lakShaNam (10-11) · Śloka 11

| দংশস্তেন বিদষ্টস্য সুপ্তঃ কৃষ্ণং ক্ষরত্যসৃক্||১০|| হৃচ্ছিরোরুগ্জ্বরস্তম্ভতৃষ্ণামূর্চ্ছাদ্ভবোঽনু চ| |১১|

স০-তেন-শুনা, বিদষ্টস্য দংশঃ সুপ্তঃ-অচেতনঃ, কৃষ্ণং রক্তং স্রবতি| পশ্চাদ্ হৃত্পীডাদ্যুদ্ভূতিঃ স্যাত্|

Adhikarana evaM shRugAlAdayo vedyAH (11-12) · Śloka 12

| অনেনান্যেঽপি বোদ্ধব্যা ব্যালা দংষ্ট্রাপ্রহারিণঃ||১১|| শৃগালাশ্বতরাশ্বর্ক্ষদ্বীপিব্যাঘ্রবৃকাদযঃ| |১২|

স০- অনেন-দংশাদিস্বরূপেণ, অপরে ব্যালাঃ-দুষ্টাঃ, দংষ্ট্রাপ্রহারিণঃ শৃগালাদয এবং বেদ্যাঃ|

Adhikarana saviShadaMshasya lakShaNam,nirviShadaMshasya lakShaNam (12-14) · Śloka 14

| কণ্ডূনিস্তোদবৈবর্ণ্যসুপ্তিক্লেদজ্বরভ্রমাঃ||১২|| বিডহরাগরুক্পাকশোফগ্রন্থিবিকুঞ্চনম্| দংশাবদরণং স্ফোটাঃ কর্ণিকা মণ্ডলানি চ||১৩|| সর্বত্র সবিষে লিঙ্গং, বিপরীতং তু নির্বিষে| |১৪|

স০-সর্বত্রৈব সবিষে দংশে কণ্ড্বাদযো লিঙ্গম্| নির্বিষে চ দংশেঽতো বিপরীতং লক্ষণং বিদ্যাত্|

Adhikarana daShTasyAsAdhyalakShaNam (14-15) · Śloka 15

| দষ্টো যেন তু তচ্চেষ্টারুতং কুর্বন্ বিনশ্যতি||১৪|| পশ্যংস্তমেব চাকস্মাদাদর্শসলিলাদিষু| |১৫|

স০ -যেন প্রাণিনা দষ্টস্তচ্চেষ্টারুতং কুর্বন্ ম্রিযতে| তমেব দষ্টারং, আদর্শকাদিষু সহসা পশ্যন্ বিনশ্যতি|

Adhikarana jalasaMtrAsasya lakShaNam (15-16) · Śloka 16

| যোঽদ্ভ্যস্ত্রস্যেদদষ্টোঽপি শব্দসংস্পর্শদর্শনৈঃ||১৫|| জলসন্ত্রাসনামানং দষ্টং তমপি বর্জযেত্| |১৬|

স০-যো জলেভ্যোঽদষ্টোঽপি সন্ত্রস্যেত্ শব্দসংস্পর্শদর্শনৈর্হেতুভিঃ, তং জলসন্ত্রাসসংজ্ঞং দষ্টং বর্জযেত্|

Adhikarana AkhunA daShTamAtrasya daMshadAhaH (16-17) · Śloka 17

| আখুনা দষ্টমাত্রস্য দংশং কাণ্ডেন দাহযেত্||১৬|| দর্পণোনাথবা, তীব্ররুজা স্যাত্কর্ণিকাঽন্যথা| |১৭|

স০-আখুনা দষ্টমাত্রস্য নরস্য সতো দংশং কাণ্ডেন দাহযেত্| দর্পণেন বা দাহযেত্| অন্যথা-এবমদগ্ধে সতি, কর্ণিকা দারুণপীডা স্যাত্|

Adhikarana dagdhadaMshasya vistrAvaH shirIShabIjAdiBiH pralepaSca (17-18) · Śloka 18

| দগ্ধং বিস্রাবযেদ্দংশং প্রচ্ছিতং চ প্রলেপযেত্||১৭|| শিরীষরজনীবক্রকুঙ্কুমামৃতবল্লিভিঃ| |১৮|

স০- দংশং দগ্ধং প্রচ্ছিতং বিস্রাবযেত্| শিরীষবীজাদিভিঃ প্রলেপযেচ্চ|

Adhikarana AkhuviShaghnaH karNikApAtanashcAgAradhUmAdilepaH (18-19) · Śloka 19

| অগারধূমমঞ্জিষ্ঠারজনীলবণোত্তমৈঃ||১৮|| লেপো জযত্যাখুবিষং কর্ণিকাযাশ্চ পাতনঃ| |১৯|

স০- অগারধূমাদিকো লেপো হ্যযং মূষিকবিষং হন্তি| কর্ণিকাং চ পাতযতি|

Adhikarana AkhuviShaghnaH tato~amlaiH kShAlanAdi, sirAmokSho vA (19-20) · Śloka 20

| ততোঽম্লৈঃ ক্ষালযিত্বাঽনু তোযৈরনু চ লেপযেত্||১৯|| পালিন্দীশ্বেতকটভীবিল্বমূলগুডূচিভিঃ| অন্যৈশ্চ বিষশোফঘ্নৈঃ সিরাং বা মোক্ষযেদ্দ্রুতম্||২০||

স০- অনন্তরমম্লৈঃ ক্ষালযিত্বাঽনু জলৈঃ ক্ষালযেত্| পশ্চাত্ পালিন্দ্যাদিভিরপরৈশ্চ বিষঘ্নৈঃ শ্বযথুঘ্নৈশ্চ লেপযেত্| অথবা শীঘ্রং সিরাং ব্যধযেত্| পালিন্দী-মালবিকা ত্রিবৃত্|

Adhikarana AkhuviShaghnaH nIlinyAdikvAthaiH cchardanam (21) · Śloka 21

ছর্দনং নীলিনীক্বাথৈঃ শুকাখ্যাঙ্কোল্লযোরপি| |২১|

স০- নীলিনীক্বাথেন ছর্দনং কার্যম্| শুকাখ্যাঙ্কোল্লযোশ্চ ক্বাথেন বমনম্| শুকাখ্যঃ-শিরীষঃ|

Adhikarana AkhuviShaghnaH koshAtakyAdicUrNena cchardanam (21-22) · Śloka 22

| কোশাতক্যাঃ শুকাখ্যাযাঃ ফলং জীমূতকস্য চ||২১|| মদনস্য চ সঞ্চূর্ণ্য দধ্না পীত্বা বিষং বমেত্| |২২|

স০- কোশাতক্যাদীনাং ফলানি সঞ্চূর্ণ্য দধ্না পীত্বা বিষং বমেত্|

Adhikarana AkhuviShaghnaH vacAdinA pAnam, trivRudAdinA virecanam (22-23) · Śloka 23

| বচামদনজীমূতকুষ্ঠং ব মূত্রপেষিতম্||২২|| পূর্বকল্পেন পাতব্যং সর্বোন্দুরবিষাপহম্| বিরেচনং ত্রিবৃন্নীলীত্রিফলাকল্ক ইষ্যতে||২৩||

স০- বচাদিং বা গোমূত্রেণ সঞ্চূর্ণ্য পূর্বকল্পেন-দধ্না, পীত্বা সর্বোন্দুরবিষং হন্তি| স০- বিরেচনং ত্রিবৃতাদিকল্ক ইষ্যতে|

Adhikarana AkhuviShaghnaH shirIShasArAdinA shirovirecanam (24) · Śloka 24

শিরোবিরেচনে সারঃ শিরীষস্য ফলানি চ| |২৪|

স০- শিরোবিরেচনে শিরীষস্য সারঃ ফলং চ যোজ্যম্|

Adhikarana AkhuviShaghnaH gomayarasenA~jjanam (24) · Śloka 24

| অঞ্জনং গোমযরসো ব্যোষসূক্ষ্মরজোন্বিতঃ||২৪||

স০- গোমযরসশ্চূর্ণীকৃতস্ত্রিকটুকান্বিতোঽঞ্জনম্|

Adhikarana AkhuviShaghnaH kapitthAdirasenAvalehaH (25) · Śloka 25

কপিত্থতোমযরসো মধুমানবলেহনম্| |২৫|

স০- কপিত্থগোমযরসঃ সমাক্ষিকোঽবলেহনম্|

Adhikarana AkhuviShaghnaH tandulIyakamUlAdisiddhAni ghRutAni (25-26) · Śloka 26

| তন্দুলীযকমূলেন সিদ্ধং পানে হিতং ঘৃতম্||২৫|| দ্বিনিশাকটভীরক্তাযষ্ট্যাহ্বৈর্বাঽমৃতান্বিতৈঃ| আস্ফোতমূলসিদ্ধং বা পঞ্চকাপিত্থমেব বা||২৬||

স০- তন্দুলীযকমূলেন পক্বং সর্পিঃ পানে হিতম্| দ্বিনিশাদিভির্বা সাধিতং ঘৃতং পানে হিতম্| অথবাঽর্কমূলেন সিদ্ধং ঘৃতং পানে হিতম্| অথবা পঞ্চকাপিত্থসিদ্ধং সর্পিঃ পানে হিতম্| কপিত্থস্যেমানি কাপিত্থানি,-মূলত্বক্পত্রপুষ্পফলানি পঞ্চ, পঞ্চ চ তানি কাপিত্থানি চ, তৈঃ সিদ্ধং পঞ্চকাপিত্থম্|

Adhikarana AkhuviShaghnaH sinduvArAdikvAthaH (27-28) · Śloka 28

সিন্দুবারং নতং শিগ্রুবিল্বমূলং পুনর্নবা| বচাশ্বদংষ্ট্রাজীমূতমেষাং ক্বাথং সমাক্ষিকম্||২৭|| পিবেচ্ছাল্যোদনং দধ্না ভুঞ্জানো মূষিকার্দিতঃ| |২৮|

স০- সিন্দুবারাদীনাং ক্বাথং সমাক্ষিকং পিবেত্| মূষিকবিষপীডিতো দধ্না শাল্যোদনং ভুঞ্জানঃ|

Adhikarana AkhuviShaghnaH sharapu~gkhAbIjacUrNam (28) · Śloka 28

| তক্রেণ শরপুঙ্খাযা বীজং সঞ্চূর্ণ্য বা পিবেত্||২৮||

স০- অথবা শরপুঙ্খাযা বীজং সঞ্চূর্ণ্য মথিতেন পিবেত্|

Adhikarana AkhuviShaghnaH a~gkolamUlakalkaH (29) · Śloka 29

অঙ্কোল্লমূলকল্কো বা বস্তমূত্রেণ কল্কিতঃ| পানালেপনযোর্যুক্তঃ সর্বাখুবিষনাশনঃ||২৯||

স০- অঙ্কোলমূলকল্কো বা ছাগমূত্রেণ পিষ্টঃ পানলেপনযোর্যুক্তঃ সর্বাখুবিষহা|

Adhikarana AkhuviShaghnaH kapitthamadhyAdikam, tilakama~jjarI (30) · Śloka 30

কপিত্থমধ্যতিলকতিলাঙ্কোল্লজটাঃ পিবেত্| গবাং মূত্রেণ, পযসা মঞ্জরীং তিলকস্য বা||৩০||

স০- কপিত্থবীজাদিকং গোমূত্রেণ পিবেত্| ক্ষীরেণ বা তিলকমঞ্জরীং পিবেত্|

Adhikarana AkhuviShaghnaH sairyakamUlam (31) · Śloka 31

অথবা সৈর্যকান্মূলং সক্ষৌদ্রং তন্দুলাম্বুনা| |৩১|

স০- সৈর্যকমূলং বা সমাক্ষিকং জ্যেষ্ঠাম্ভসা পিবেত্|

Adhikarana AkhuviShaghnaH kaTukAlAbuvinyastaM jalam (31) · Śloka 31

| কটুকালাবুবিন্যস্তং পীতং বাঽম্বু নিশোষিতম্||৩১||

স০- অথবা কটুকালাবুনি জলং নিক্ষিপ্তং রাত্রিস্থিতং পীতং মূষিকবিষনাশনং স্যাত্|

Adhikarana AkhuviShaghnaH sinduvAramUlAdyagadaH (32) · Śloka 32

সিন্দুবারস্য মূলানি বিডালাস্থি বিষং নতম্| জলপিষ্টোঽগদো হন্তি নস্যাদ্যৈরাখুজং বিষম্||৩২||

স০- সিন্দুবারমূলাদিকো জলপিষ্টোঽগদো নস্যাদ্যৈর্মূষিকবিষং হন্তি|

Adhikarana sasheShamUShikaviShasyAbhradarshanAdau prakopaH (33) · Śloka 33

সশেষং মূষিকবিষং প্রকুপ্যত্যভ্রদর্শনে| যথাযথং বা কালেষু দোষাণাং বৃদ্ধিহেতুষু||৩৩||

স০- মূষিকবিষং কিঞ্চিচ্ছেষং জলদোন্নতৌ কুপ্যতি| অথবা বাতাদীনাং যথাস্বং কালেষু বৃদ্ধিকারণেষু প্রকুপ্যতি|

Adhikarana tatra yathAvasthamupakramAH,tatra dUShIviShApahAshcopakramAH (34) · Śloka 34

তত্র সর্বে যথাবস্থং প্রযোজ্যাঃ স্যুরুপক্রমাঃ| যথাস্বং যে চ নির্দিষ্টাস্তথা দূষীবিষাপহাঃ||৩৪||

স০- তত্রাবস্থাবশাদুপক্রমাঃ সর্বে যথাযোগং প্রযোজ্যাঃ স্যুঃ| যে চ দূষীবিষঘ্নাঃ নির্দিষ্টাস্তে চ প্রযোজ্যাঃ

Adhikarana alarkadaMshe dAho lepaH purANaghRutapAnaM ca (35) · Śloka 35

দংশং ত্বলর্কদষ্টস্য দগ্ধমুষ্ণেন সর্পিষা| প্রদিহ্যাদগদৈস্তৈস্তৈঃ পুরাণং চ ঘৃতং পিবেত্||৩৫||

স০- অলর্কদষ্টস্য দংশমুষ্ণেন ঘৃতেন দগ্ধমগদৈস্তৈস্তৈঃ পূর্বোক্তৈঃ, লেপযেত্| পুরাণং চ সর্পিঃ পিবেত্|

Adhikarana alarkadaMshe arkakShIrayutaM virecanam (36) · Śloka 36

অর্কক্ষীরযুতং চাস্য যোজ্যমাশু বিরেচনম্| |৩৬|

স০- অর্কক্ষীরান্বিতং চাস্য বিরেচনং ক্ষিপ্রং যোজ্যম্|

Adhikarana alarkadaMshe a~gkollottaramUlajalam, shvetapunarnavA (36-37) · Śloka 37

| অঙ্কোল্লোত্তরমূলাম্বু ত্রিপলং সহবিঃপলম্||৩৬|| পিবেত্সধত্তূরফলাং শ্বেতাং বাঽপি পুনর্নবাম্| |৩৭|

স০- অঙ্কোল্লোত্তরমূলজলং পলত্রযমাত্রং সঘৃতপলং পিবেত্| ধত্তূরফলযুতাং শ্বেতাং বা পুনর্নবাং জলেন পিবেত্|

Adhikarana alarkadaMshe palalatailAdi (37-38) · Śloka 38

| ঐকধ্যং পললং তৈলং রূপিকাযাঃ পযো গুডঃ||৩৭|| ভিনত্তি বিষমালর্কং ঘনবৃন্দমিবানিলঃ| |৩৮|

স০- ভৃষ্টতিলচূর্ণং, তৈলং, রূষিকাযাঃ-অর্কস্য ক্ষীরং, গুডঃ, একত্র মিশ্রিতং প্রকৃতত্বাজ্জলেন পীতং বিষমলর্কং ভিনত্তি| পযোদৌঘমিব বাযুঃ|

Adhikarana alarkadaMshe samantrauShadhIratnaM snapanam (38) · Śloka 38

| সমন্ত্রং সৌষধীরত্নং স্নপনং চ প্রযোজযেত্||৩৮||

স০-মন্ত্রান্বিতমৌষধীরত্নযুতং স্নপনং চ কারযেত্| ["অষ্টোত্তরশতং বারান্ সিদ্ধমন্ত্রাভিমন্ত্রিতৈঃ| অষ্টোত্তরশতোন্মানৈঃ পুষ্পমালাবগুণ্ঠিতৈঃ|| গোচর্মমাত্রকে লিপ্তে জ্বলিতেঽগ্নৌ কুশাস্তৃতে| স্থণ্ডিলে সরিতস্তীরে স্নানং বাঽস্য চতুষ্পথে|| অলর্কাধিপতে যক্ষ সারমেযগণাধিপ| অলর্কজুষ্টমেতন্মে নির্বিষং কুরু মা চিরাত্|| স্বাহেতি মন্ত্রোঽলর্কার্তে সর্বকর্মসু শস্যতে|" ইতি বৃদ্ধবাগ্ভটাত্ (সং.উ. অ. ৪৬)|]

Adhikarana catuShpAdAdinakhadantaparikShatasya lakShaNam (39) · Śloka 39

চতুষ্পাদ্ভির্দ্বিপাদ্ভির্বা নখদন্তপরিক্ষতম্| শূযতে পচ্যতে রাগজ্বরস্রাবরুজান্বিতম্||৩৯||

স০-চতুষ্পাদ্ভিঃ-দন্ত্যশ্বপ্রভৃতিভিঃ প্রাণিভিঃ, দ্বিপাদ্ভিঃ-মনুষ্যমযূরকুক্কুটাদিভিঃ, বা নখপরিক্ষতং দন্তপরিক্ষতং চ শূযতে পচ্যতে চ রাগাদ্যন্বিতম্|

Adhikarana nakhadantaviShaghnaH somavalkAdilepaH (40-38) · Śloka 38

সোমবল্কোঽশ্বকর্ণশ্চ গোজিহ্বা হংসপাদিকা| রজন্যৌ গৈরিকং লেপো নখদন্তবিষাপহঃ||৪০|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙহৃদযসংহিতাযাং ষষ্ঠে উত্তরস্থানে মূষিকালর্কবিষপ্রতিষেধো নামাষ্টত্রিংশোঽধ্যাযঃ||৩৮||

স০- খদিরাদিভির্লেপো নখদন্তবিষঘ্নঃ ইতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং ষষ্ঠ উত্তরস্থানে মূষিকালর্কবিষপ্রতিষেধো নামাষ্টত্রিংশোঽধ্যাযঃ সমাপ্তঃ|| ৩৮|| ইতি বিষতন্ত্রং নাম ষষ্টমঙ্গং সমাপ্তম্