16. sarvākṣirōgapratiṣēdhādhyāyaḥ

Adhikarana sarvAkShirogapratiShedhAdhyAyaH||16|| abhiShyandeShu prAgrUpe tIkShNagaNDUShAdi (2-1) · Śloka 1

অধুনা সর্বাক্ষিরোগপ্রতিষেধ উপক্রম্যতে অথাতঃ সর্বাক্ষিরোগপ্রতিষেধং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)|২| প্রাগ্রূপ এব স্যন্দেষু তীক্ষ্ণং গণ্ডূষনাবনম্| কারযেদুপবাসং চ কোপাদন্যত্র বাতজাত্||১||

স০-স্যন্দেষু পূর্বরূপাবস্থাযাং তীক্ষ্ণমেব গণ্ডূষাদিকমুপবাসং চ স্যন্দবন্তং কারযেত্, বাতোত্থং কোপং মুক্ত্বা|

Adhikarana abhiShyandeShu dAhAdishAntyarthaM patrAdibiDAlakaH (2-3) · Śloka 3

দাহোপদেহরাগাশ্রুশোফশান্ত্যৈ বিডালকম্| কুর্যাত্সর্বত্র পত্রৈলামরিচস্বর্ণগৈরিকৈঃ||২|| সরসাঞ্জনযষ্ট্যাহ্বনতচন্দনসৈন্ধবৈঃ| |৩|

স০-দাহাদিশান্ত্যৈ বিডালকং কুর্যাত্| সর্বত্র স্যন্দে পত্রৈলাদিভিঃ সৈন্ধবান্তৈর্বিডালকং কুর্যাত্|

Adhikarana vAtaje~abhiShyande saindhavAdi pittaraktaje~abhiShyande mAMsyAdilepaH kaphaje~abhiShyande manohvAdilepaH sarvaje~abhiShyande pUrvoktaH sarvalepaH (3-5) · Śloka 5

| সৈন্ধবং নাগরং তার্ক্ষ্যং ভৃষ্টং মণ্ডেন সর্পিষঃ||৩|| বাতজে ঘৃতভৃষ্টং বা যোজ্যং শবরদেশজম্| মাংসীপদ্মককালীযযষ্ট্যাহ্বৈঃ পিত্তরক্তযোঃ||৪|| মনোহ্বাফলিনীক্ষৌদ্রৈঃ কফে, সর্বৈস্তু সর্বজে| |৫|

স০-সৈন্ধবাদি ঘৃতমণ্ডেন ভৃষ্টং বা পবনজে ঘৃতভৃষ্টং বা রোধ্রং যোজ্যম্| মাংস্যাদিভিঃ পিত্তরক্তযোর্বিডালকং কুর্যাত্| মনঃশিলাদিভিঃ কফজে| সর্বজে তু স্যন্দে সর্বৈঃ-পূর্বোক্তৈর্মিলিতৈঃ, বিডালকং কার্যম্|

Adhikarana sarvaje~abhiShyande prakupitamAtre sitamaricAdyavaguNThanam (5) · Śloka 5

সিতমরিচভাগমেকং চতুর্মনোহ্বং দ্বিরষ্টশাবর্কম্| সঞ্চূর্ণ্য বস্ত্রবদ্ধং প্রকুপিতমাত্রেঽবগুণ্ঠনং নেত্রে||৫||

স০-চতুর্ভাগপ্রমাণা মনোহ্বা যস্মিংস্তচ্চতুর্মনোহ্বম্| দ্বিঃ-দ্বৌ বারৌ, অষ্টাষ্টভাগপ্রমাণঃ শাবরকো যস্মিংস্তত্ দ্বিরষ্টশাবরকম্| তেন সিতমরিচস্যৈকং ভাগং মনঃশিলাযাশ্চতুরো ভাগান্ রোধ্রস্য ষোডশ ভাগান্ সঞ্চূর্ণ্য এতত্সূক্ষ্মবস্ত্রবদ্ধং প্রকুপিতমাত্রে-সদ্যঃপ্রকুপিতে, নযনেঽবগুণ্ঠনং হিতম্| গীতিঃ সমুখচপলা|

Adhikarana sarvaje~abhiShyande prakupitamAtre kulatthacUrNAvacUrNanam (6) · Śloka 6

আরণ্যাশ্ছগণরসে পটাববদ্ধাঃ সুস্বিন্না নখবিতুষীকৃতাঃ কুলত্থাঃ| তচ্চূর্ণং সকৃদবচূর্ণনান্নিশীথে নেত্রাণাং বিধমতি সদ্য এব কোপম্||৬||

স০-আরণ্যাঃ কুলত্থাশ্ছগণরসে-গোশকৃদ্রসে, পটাববদ্ধাঃ সুস্বিন্নাস্তথা নখৈর্বিতুষীকৃতাস্তেষাং চূর্ণমেকবারমেবাবচূর্ণনাত্ সদ্য এব নেত্রাণাং কোপং বিধমতি-জযতি| প্রহর্ষিণীবৃত্তম্|

Adhikarana sarvaje~abhiShyande prakupitamAtre ghoShAdipoTalI (7) · Śloka 7

ঘোষাভযাতুত্থকযষ্টিরোধ্রৈ- র্মূতী সুসূক্ষ্মৈঃ শ্লথবস্ত্রবদ্ধৈঃ| তাম্রস্থধান্যাম্লনিমগ্নমূর্তি- রর্তিং জযত্যক্ষিণি নৈকরূপাম্||৭||

স০-ঘোষাদিভিঃ সুসূক্ষ্মৈঃ শ্লথবস্ত্রবদ্ধৈর্মূতী-পোটলিকা, তাম্রস্থকাঞ্জিকনিমগ্নমূর্তিঃ পীডাং নানাবিধাং নেত্রে ধারিতা জযতি| ইন্দ্রবজ্রাবৃত্তম্|

Adhikarana sarvaje~abhiShyande prakupitamAtre kaTa~gkaTerIkvAthasekaH (8) · Śloka 8

ষোডশভিঃ সলিলপলৈঃ পলং তথৈকং কটঙ্কটের্যাঃ সিদ্ধম্| সেকোঽষ্টভাগশিষ্টঃ ক্ষৌদ্রযুতঃ সর্বদোষকুপিতে নেত্রে||৮||

স০-দার্ব্যাঃ পলং জলপলৈঃ ষোডশভিঃ শৃতমষ্টভাগশেষঃ সেকো মধুযুতঃ সর্বদোষকুপিতে চক্ষুষি হিতঃ| আর্যা গীতিঃ|

Adhikarana sarvaje~abhiShyande prakupitamAtre shigrupallavarasaH (9) · Śloka 9

বাতপিত্তকফসন্নিপাতজাং নেত্রযোর্বহুবিধামপি ব্যথাম্| শীঘ্রমেব জযতি প্রযোজিতঃ শিগ্রুপল্লবরসঃ সমাক্ষিকঃ||৯||

স০-একৈকদোষজাং সন্নিপাতজাং বা নযনযোর্নানাবিধাং পীডাং শীঘ্রমেক এব শোভাঞ্জনকরসঃ সক্ষৌদ্রো জযতি| রথোদ্ধতাবৃত্তম্|

Adhikarana vAtaje~abhiShyande eraNDamUlasiddhakShIram vAtaje~abhiShyande saktupiNDikA (10) · Śloka 10

তরুণমুরুবূকপত্রং মূলং চ বিভিদ্য সিদ্ধমাজে ক্ষীরে| বাতাভিষ্যন্দরুজং সদ্যো বিনিহন্তি সক্তুপিণ্ডিকা চোষ্ণা||১০||

স০-এরণ্ডস্য তরুণং পত্রং মূলং চ বিভিদ্য-সংক্ষুদ্য, ছাগদুগ্ধসিদ্ধং বাতাভিষ্যন্দে পীডাং সদ্য এব নিহন্তি| দোষাদিবশাত্ সক্তুপিণ্ডী উষ্ণা বা রুজং হন্তি| আর্যা গীতিঃ|

Adhikarana vAtaje~abhiShyande bilvAdikvAthaH Ashcyotane vAtaje~abhiShyande hrIberAdi shUlAshcyotanam raktapittaje~abhiShyande ma~jjiShThAdikvAthasekaH (11-13) · Śloka 13

আশ্চ্যোতনং মারুতজে ক্বাথো বিল্বাদিভির্হিতঃ| কোষ্ণঃ সহৈরণ্ডজটাবৃহতীমধুশিগ্রুভিঃ||১১|| হ্রীবেরবক্রশার্ঙ্গেষ্টোদুম্বরত্বক্ষু সাধিতম্| সাম্ভসা পযসাঽঽজেন শূলাশ্চ্যোতনমুত্তমম্||১২|| মঞ্জিষ্ঠারজনীলাক্ষাদ্রাক্ষর্দ্ধিমধুকোত্পলৈঃ| ক্বাথঃ সশর্করঃ শীতঃ সেচনং রক্তপিত্তজিত্||১৩||

স০-বাতজেঽভিষ্যন্দে বিল্বাদিভিরেরণ্ডমূলাদিভিঃ সহ ক্বাথঃ কৃতঃ কোষ্ণো হিতমাশ্চ্যোতনম্| হ্রীবেরাদিষু সাধিতং সজলেনাজেন পযসা উত্তমং শূলাশ্চ্যোতনং প্রসাদনং ভবেত্| হ্রীবেরং-বালকম্| বক্রং-তগরম্| মঞ্জিষ্ঠাদিভিঃ ক্বাথঃ সসিতঃ শিশিরঃ সেকো রক্তপিত্তঘ্নঃ|

Adhikarana raktapittaje~abhiShyande kaserukAdirajaHpAnIyam (14) · Śloka 14

কসেরুযষ্ট্যাহ্বরজস্তান্তবে শিথিলং স্থিতম্| অপ্সু দিব্যাসু নিহিতং হিতং স্যন্দেঽস্রপিত্তজে||১৪||

স০-কসেরুকাদিরজো বস্ত্রে শিথিলং স্থিতং দিব্যজলে ক্ষিপ্তং স্যন্দে রক্তপিত্তজে হিতম্|

Adhikarana raktapittaje~abhiShyande puNDrAdipoTalI (15) · Śloka 15

পুণ্ড্রযষ্টীনিশামূতী প্লুতা স্তন্যে সশর্করে| ছাগদুগ্ধেঽথবা দাহরুগ্রাগাশ্রুনিবর্তনী||১৫||

স০-পুণ্ড্রাদিভির্মূতী স্ত্রীক্ষীরে সশর্করে প্লুতা ছাগদুগ্ধে বা দাহাদিহৃত্|

Adhikarana raktapittaje~abhiShyande shvetarodhrAdipoTalI (16) · Śloka 16

শ্বেতরোধ্রং সমধুকং ঘৃতভৃষ্টং সুচূর্ণিতং| বস্ত্রস্থং স্তন্যমৃদিতং পিত্তরক্তাভিঘাতজিত্||১৬||

স০-শ্বেতরোধ্রং সমধুকং ঘৃতভৃষ্টং সূক্ষ্মরজীকৃতং বসনস্থং স্তন্যেন মৃদিতং পিত্তাদিজিত্|

Adhikarana kaphaje~abhiShyande nAgarAdikvAthaH Ashcyotane sarvaje~abhiShyande mishrairetairAshcotanam (17) · Śloka 17

নাগরত্রিফলানিম্ববাসরোধ্ররসঃ কফে| কোষ্ণমাশ্চ্যোতনং মিশ্রৈর্ভেষজৈঃ সান্নিপাতিকে||১৭||

স০-নাগরাদিরসঃ শ্লেষ্মণ্যাশ্চ্যোতনং কোষ্ণং হিতম্| স০-সান্নিপাতিকেঽভিষ্যন্দে মিশ্রৈরৌষধৈঃ-এতৈরেবানন্তরোক্তৈঃ, আশ্চ্যোতনং কোষ্ণং হিতম্|

Adhikarana vAtAdyabhiShyande susnigdhaM kRutvArudhirasrAvaH vAtAdyabhiShyande punaH snigdhaM kRutvA virekaH (18-19) · Śloka 19

সর্পিঃ পুরাণং পবনে, পিত্তে শর্করযাঽন্বিতম্| ব্যোষসিদ্ধং কফে পীত্বা যবক্ষারাবচূর্ণিতম্||১৮|| স্রাবযেদ্রুধিরং ভূযস্ততঃ স্নিগ্ধং বিরেচযেত্| |১৯|

স০-পবনে পুরাণং ঘৃতং হিতম্| পিত্তে শর্করযা যুতং ঘৃতং হিতম্| কফে ব্যোষসিদ্ধং ঘৃতং যবক্ষারাবচূর্ণিতং পীত্বা রুধিরং স্রাবযেত্| ভূযঃ স্নিগ্ধং ততো বিরেচযেত্|

Adhikarana vAtAdyabhiShyande shUladAhayorAnUpavesavAralepaH (19-20) · Śloka 20

| আনূপবেসবারেণ শিরোবদনলেপনম্||১৯|| উষ্ণেন শূলে, দাহে তু পযঃসর্পির্যুতৈর্হিমৈঃ| |২০|

স০-আনূপবেসবারেণ শিরোবদনলেপনমুষ্ণেন কার্যং শূলে সতি| দাহে তু সতি ক্ষীরঘৃতান্বিতৈঃ শীতৈঃ প্রলেপঃ কার্যঃ|

Adhikarana vAtAdyabhiShyande timirapratiShedhavatpratIkAraH (20) · Śloka 20

| তিমিরপ্রতিষেধং চ বীক্ষ্য যুঞ্জ্যাদ্যথাযথম্||২০||

স০-তিমিরপ্রতিষেধং চ পর্যালোচ্য যথাযোগং চিকিত্সিতং যুঞ্জ্যাত্|

Adhikarana adhimanthAdhiShu ayameva vidhiH adhimanthe~ashAntau bhruvorupari dAhaH (21) · Śloka 21

অযমেব বিধিঃ সর্বো মন্থাদিষ্বপি শস্যতে| অশান্তৌ সর্বথা মন্থে ভ্রুবোরুপরি দাহযেত্||২১||

স০-এষ এব বিধিরশেষেষু মন্থাদিষ্বপি শস্যতে| স০-সর্বথৈবাশান্তৌ মন্থে ভ্রুবোরুপরি দাহযেত্|

Adhikarana vAtaje~adhimanthe godadhivartiH (22) · Śloka 22

রূপ্যং রূক্ষেণ গোদধ্না লিম্পেন্নীলত্বমাগতে| শুষ্কে তু মস্তুনা বর্তির্বাতাক্ষ্যামযনাশিনী||২২||

স০-রূপ্যং গোদধ্না রূক্ষেণ লিম্পেত্| তস্মিন্ দধ্নি নীলত্বমাগতে শুষ্কে চ মস্তুনা বর্তির্বাতাক্ষিরোগনাশিনী|

Adhikarana pittaraktaje~adhimanthe sumanaHkorakAdivartiH (23) · Śloka 23

সুমনঃকোরকাঃ শঙ্খস্ত্রিফলা মধুকং বলা| পিত্তরক্তাপহা বর্তিঃ পিষ্টা দিব্যেন বারিণা||২৩||

স০-সুমনঃকলিকাদযো বর্তির্দিব্যেন জলেন পিষ্টা পিত্তরক্তহৃত্|

Adhikarana kaphaje~adhimanthe saindhavAdivartiH (24) · Śloka 24

সৈন্ধবং ত্রিফলা ব্যোষং শঙ্খনাভিঃ সমুদ্রজঃ| ফেন ঐলেযকং সর্জো বর্তিঃ শ্লেষ্মাক্ষিরোগনুত্||২৪||

স০-সৈন্ধবাদিভির্বর্তিঃ শ্লেষ্মাক্ষিরোগজিত্|

Adhikarana sarvaje~adhimanthe pAshupato yogaH (25-27) · Śloka 27

প্রপৌণ্ডরীকং যষ্ট্যাহ্বং দার্বী চাষ্টপলং পচেত্| জলদ্রোণে রসে পূতে পুনঃ পক্বে ঘনে ক্ষিপেত্||২৫|| পুষ্পাঞ্জনাদ্দশপলং কর্ষং চ মরিচাত্ততঃ| কৃতশ্চূর্ণোঽথবা বর্তিঃ সর্বাভিষ্যন্দসম্ভবান্||২৬|| হন্তি রাগরুজাঘর্ষান্ সদ্যো দৃষ্টিং প্রসাদযেত্| অযং পাশুপতো যোগো রহস্যং ভিষজাং পরম্||২৭||

স০-প্রপ্রৌণ্ডরীকাদিকমষ্টপলং পৃথগ্জলদ্রোণে পচেত্| রসে পূতে পুনঃ শৃতে ঘনে চ পুষ্পাঞ্জনাদ্দশ পলানি, মরীচাত্কর্ষং চ ক্ষিপেত্| কৃতশ্চূর্ণোঽথবা বর্তিঃ সর্বাভিষ্যন্দোত্থান্ রাগাদীন্ হন্তি| তথা সদ্য এব দৃষ্টিং প্রসাদযেত্| এষ পাশুপতাখ্যো যোগো ভিষজাং পরং রহস্যম্|

Adhikarana shuShkAkShipAke ghRutapAnatarpaNAdi (28-29) · Śloka 29

শুষ্কাক্ষিপাকে হবিষঃ পানমক্ষ্ণোশ্চ তর্পণম্| ঘৃতেন জীবনীযেন নস্যং তৈলেন বাঽণুনা||২৮|| পরিষেকো হিতশ্চাত্র পযঃ কোষ্ণং সসৈন্ধবম্| |২৯|

স০-শুষ্কাক্ষিপাকে ঘৃতস্য পানমক্ষ্ণোশ্চ জীবনীযসিদ্ধেন ঘৃতেন তর্পণং হিতম্| অণুনা তৈলেন নস্যং হিতম্ অত্র চ ক্ষীরং কোষ্ণং সৈন্ধবযুতং পরিষেকো হিতঃ|

Adhikarana shuShkAkShipAke mahauShadhA~jjanam shuShkAkShipAke AnUpasattvotthA vasA~a~jjanam (29-30) · Śloka 30

| সর্পির্যুক্তং স্তন্যপিষ্টমঞ্জনং চ মহৌষধম্||২৯|| বসা বাঽঽনূপসত্ত্বোত্থা কিঞ্চিত্সৈন্ধবনাগরা| |৩০|

স০-নাগরং স্তন্যপিষ্টং ঘৃতান্বিতমঞ্জনং হিতম্| আনূপপ্রাণিজা বা বসা কিঞ্চিত্সৈন্ধবশুণ্ঠীযুতা [ অঞ্জনং ] শস্যতে|

Adhikarana shuShkAkShipAke keshamaShI a~jjanam (30-31) · Śloka 31

| ঘৃতাক্তান্ দর্পণে ঘৃষ্টান্ কেশান্ মল্লকসম্পুটে||৩০|| দগ্ধ্বাঽঽজ্যপিষ্টা লোহস্থা সা মষী শ্রেষ্ঠমঞ্জনম্| |৩১|

স০-কেশান্ ঘৃতাক্তান্ দর্পণে ঘৃষ্টান্ মল্লকসম্পুটে দগ্ধ্বা ঘৃতপিষ্টা লোহপাত্রস্থা সা মষী শ্রেষ্ঠমঞ্জনম্|

Adhikarana sashophe alpashophe ca snigdhasya sirAvyadhaH sashophe alpashophe punaHsnigdhaM kRutvA virekaH (31-32) · Śloka 32

| সশোফেবাঽল্পশোফে চ স্নিগ্ধস্য ব্যধযেত্সিরাম্||৩১|| রেকঃ স্নিগ্ধে পুনর্দ্রাক্ষাপথ্যাক্বাথত্রিবৃদ্ঘৃতৈঃ| |৩২|

স০-সশোফেঽল্পশোফে বা স্নিগ্ধস্য সিরাং বিধ্যেত্| স্নিগ্ধস্য পুনর্দ্রাক্ষাদিভির্বিরেকঃ|

Adhikarana saSoPe alpaSoPe SUlaharaH SvetarodhrapoTalIsekaH (32-33) · Śloka 33

| শ্বেতরোধ্রং ঘৃতে ভৃষ্টং চূর্ণিতং তান্তবস্থিতম্||৩২|| উষ্ণাম্বুনা বিমৃদিতং সেকঃ শূলহরঃ পরম্| |৩৩|

স০-শ্বেতরোধ্রং ঘৃতে ভৃষ্টং চূর্ণিতং বস্ত্রস্থিতমুষ্ণাম্বুনা মৃদিতং সেকঃ শূলহৃত্পরম্|

Adhikarana sashophe alpashophe dArvyAdikvAthaH Ashcyotane (33) · Śloka 33

| দার্বীপ্রপৌণ্ডরীকস্য ক্বাথো বাঽঽশ্চ্যোতনে হিতঃ|৩৩|

স০-দার্বীপ্রপৌণ্ডরীকযোশ্চ ক্বাথ আশ্চ্যোতনে হিতঃ|

Adhikarana sashophe alpashophe gharShAdiharA vakShyamANAH sandhAvAH (33) · Śloka 33

সন্ধবাংশ্চ প্রযুঞ্জীত ঘর্ষরাগাশ্রুরুগ্ঘরান্| ||৩৩||

স০-সন্ধাবাংশ্চ বক্ষ্যমাণান্ ঘর্ষাদিহরান্ প্রযুঞ্জীত|

Adhikarana sashophe alpashophe gharShAdiharA tAmraghRuShTAdiH sandhAvaH sashophe alpashophe gharShAdiharA gavyadadhisarAdiH sandhAvaH (34.5) · Śloka

তাম্রং লোহে মূত্রঘৃষ্টং প্রযুক্তং নেত্রে সর্পির্ধূপিতং বেদনাঘ্নম্| তাম্রে ঘৃষ্টো গব্যদধ্নঃ সরো বা যুক্তঃ কৃষ্ণাসৈন্ধবাভ্যাং বরিষ্ঠঃ||৩৪.৫||

স০-লোহভাণ্ডে তাম্রং গোমূত্রেণ ঘৃষ্টং সর্পির্ধূপিতং নেত্রে প্রযুক্তং পীডাহৃত্| গব্যদধিসরস্তাম্রে ঘৃষ্টঃ কৃষ্ণাসৈন্ধবযুক্তো নেত্রে প্রযুক্তো বরীযান্ বেদনাঘ্নঃ সন্ধাবঃ|

Adhikarana sashophe alpashophe gharShAdiharA sha~gkhaghRuShTAdiH sandhAvaH (35.5) · Śloka

শঙ্খং তাম্রে স্তন্যঘৃষ্টং ঘৃতাক্তৈঃ শম্যাঃ পত্রৈর্ধূপিতং তদ্যবৈশ্চ| নেত্রে যুক্তং হন্তি সন্ধাবসংজ্ঞং ক্ষিপ্রং ঘর্ষং বেদনাং চাতিতীব্রাম্||৩৫.৫||

স০-শঙ্খং স্তন্যেন তাম্রে ঘৃষ্টং শমীপত্রৈর্যবৈশ্চ ঘৃতাক্তৈর্ধূপিতং তত্সন্ধাবসংজ্ঞং নেত্রে প্রযুক্তং শীঘ্রং ঘর্ষং বেদনামতিদারুণাং চ হন্তি| শালিন্যৌ বৃত্তে|

Adhikarana sashophe alpashophe gharShAdiharA udumbaraphalAdiH sandhAvaH (36-37) · Śloka 37

| উদুম্বরফলং লোহে ঘৃষ্টং স্তন্যেন ধূপিতম্||৩৬|| সাজ্যৈঃ শমীচ্ছদৈর্দাহশূলরাগাশ্রুহর্ষজিত্| |৩৭|

স০-উদুম্বরফলং লোহে স্তন্যেন ঘৃষ্টং ঘৃতাক্তৈঃ শমীপত্রৈর্ধূপিতং দাহাদিজিত্|

Adhikarana sashophe alpashophe gharShAdiharA shigrupallavaniryAsAdiH sandhAvaH (37-38) · Śloka 38

| শিগ্রুপল্লবনির্যাসঃ সুঘৃষ্টস্তাম্রসম্পুটে||৩৭|| ঘৃতেন ধূপিতো হন্তি শোফঘর্ষাশ্রুবেদনাঃ| |৩৮|

স০-শিগ্রুপল্লবরসঃ সুঘৃষ্টস্তাম্রসম্পুটে ঘৃতেন ধূপিতঃ শোফাদীন্ হন্তি|

Adhikarana sashophe alpashophe gharShAdiharA mRutkapAlAdiH sandhAvaH (38-39) · Śloka 39

| তিলাম্ভসা মৃত্কপালং কাংস্যে ঘৃষ্টং সুধূপিতম্||৩৮|| নিম্বপত্রৈর্ঘৃতাভ্যক্তৈর্ঘর্ষশূলাশ্রুরাগজিত্| |৩৯|

স০-মৃত্কপালং তিলাম্ভসা কাংস্যে ঘৃষ্টং তথা নিম্বপত্রৈর্ঘৃতাভ্যক্তৈর্ধূপিতং ঘর্ষাদিজিত্|

Adhikarana sandhAvenA~jjite netre stanyAshcyotanam (39-40) · Śloka 40

| সন্ধাবেনাঞ্জিতে নেত্রে বিগতৌষধবেদনে||৩৯|| স্তন্যেনাশ্চ্যোতনং কার্যং ত্রিঃ পরং নাঞ্জযেচ্চ তৈঃ| |৪০|

স০-সন্ধাবেন নেত্রেঽঞ্জিতে বিগতৌষধবেদনে সতি স্তন্যেনাশ্চ্যোতনং হিতং কার্যং ত্রীন্ বারান্| তৈশ্চ-সন্ধাবৈঃ, পরং-ত্রিভ্যো বারেভ্যো, নাঞ্জযেত্|

Adhikarana sashophe alpashophe gharShAdiharA tAlIsapatrAdiguTikA sandhAvaH (40-42) · Śloka 42

| তালীসপত্রচপলানতলোহরজোঞ্জনৈঃ||৪০|| জাতীমুকুলকাসীসসৈন্ধবৈর্মূত্রপেষিতৈঃ| তাম্রমালিপ্য সপ্তাহং ধারযেত্পেষযেত্ততঃ||৪১|| মূত্রেণৈবানু গুটিকাঃ কার্যাশ্ছাযবিশোষিতাঃ| তাঃ স্তন্যঘৃষ্টা ঘর্ষাশ্রুশোফকণ্ডূবিনাশনাঃ||৪২||

স০-তালীসপত্রাদিভির্মূত্রপিষ্টৈস্তাম্রমালিপ্য সপ্তাহং ধারযেত্| ততঃ সপ্তাহাদূর্ধ্বং গোমূত্রেণৈব গুটিকাঃ কুর্যাত্| তাশ্চ ছাযাবিশোষিতাঃ স্তন্যঘৃষ্টা ঘর্ষাদিঘ্নাঃ|

Adhikarana sashophe alpashophe vyAghryAdikaH sandhAvaH (43) · Śloka 43

ব্যাঘ্রীত্বঙ্ঽঽমধুকং তাম্ররজোঽজাক্ষীরকল্কিতম্| শম্যামলকপত্রাজ্যধূপিতং শোফরুক্প্রণুত্||৪৩||

স০-ব্যাঘ্র্যাদিকমজাক্ষীরকল্কিতং শম্যামলকপত্রৈর্ঘৃতান্বিতৈর্ধূপিতং শোফরুক্প্রণুত্|

Adhikarana amloShite pittAbhiShyandacikitsA (44) · Śloka 44

অম্লোষিতে প্রযুঞ্জীত পিত্তাভিষ্যন্দসাধনম্| |৪৪|

স০-অম্লোষিতে নেত্ররোগে পিত্তাভিষ্যন্দচিকিত্সিতং কুর্যাত্|

Adhikarana dIrghakAlAnubandhitvAdukliShTAdayo~aShTAdasha rogAH pillasaMj~jAH (44-46) · Śloka 46

| উত্ক্লিষ্টাঃ কফপিত্তাস্রনিচযোত্থাঃ কুকূণকঃ||৪৪|| পক্ষ্মোপরোধঃ শুষ্কাক্ষিপাকঃ পূযালসো বিসঃ| পোথক্যম্লোষিতোঽল্পাখ্যঃ স্যন্দমন্থা বিনাঽনিলাত্||৪৫|| এতেঽষ্টাদশ পিল্লাখ্যা দীর্ঘকালানুবন্ধিনঃ| |৪৬|

স০-উত্ক্লিষ্টাদযোঽষ্টাদশ রোগা ইমে পিল্লাখ্যা দীর্ঘকালানুবন্ধিনঃ|

Adhikarana pilleShu vakShyamANA sAmAnyacikitsA pilleShu vartmanirlekhanam (46-48) · Śloka 48

| চিকিত্সা পৃথগেতেষাং স্বংস্বমুক্তা অথ বক্ষ্যতে||৪৬|| পিল্লীভূতেষু সামান্যাত্ অথ পিল্লাখ্যরোগিণঃ| স্নিগ্ধস্য ছর্দিতবতঃ সিরাব্যধহৃতাসৃজঃ||৪৭|| বিরিক্তস্য চ বর্ত্মানু নির্লিখেদাবিশুদ্ধিতঃ| |৪৮|

স০-এতেষাং পৃথক্ চিকিত্সা যথাস্বমুক্তা| স০-অথ ভণিষ্যতে চিকিত্সা পিল্লীভূতেষু সামান্যেন| স০-অথ পিল্লাখ্যাক্ষিরোগবতঃ স্নিগ্ধস্য ছর্দিতবতো নরস্য বিদ্ধসিরস্য বিরিক্তস্য চ বর্ত্ম নির্লিখেদাবিশুদ্ধেঃ|

Adhikarana pilleShu tutthakAdinA sekaH (48-50) · Śloka 50

| তুত্থকস্য পলং শ্বেতমরিচানি চ বিংশতিঃ||৪৮|| ত্রিংশতা কাঞ্জিকপলৈঃ পিষ্ট্বা তাম্রে নিধাপযেত্| পিল্লানপিল্লান্ কুরুতে বহুবর্ষোত্থিতানপি||৪৯|| তত্সেকেনোপদেহাশ্রুকণ্ডূশোফাংশ্চ নাশযেত্| |৫০|

স০-তুত্থকস্য পলং, বিংশতিঃ শ্বেতমরিচানি-সৌভাঞ্জনবীজানি, কাঞ্জিকপলৈস্ত্রিংশতা পিষ্ট্বা তাম্রে নিধাপযেত্| তত্সেকেন পিল্লান্ বহুবর্ষোত্থিতানপ্যপিল্লান্ কুরুতে| উপদেহাদীংশ্চ নাশযেত্|

Adhikarana pilleShu kara~jjabIjAdirasakriyA~a~jjanam (50-51) · Śloka 51

| করঞ্জবীজং সুরসং সুমনঃকোরকাণি চ||৫০|| সংক্ষুদ্য সাধযেত্ক্বাথে পূতে তত্র রসক্রিযা| অঞ্জনং পিল্লভৈষজ্যং পক্ষ্মণাং চ প্ররোহণম্||৫১||

স০-করঞ্জবীজাদীনি সংক্ষুদ্য জলে সাধযেত্| ক্বাথে পূতে তত্র রসক্রিযা| অঞ্জনং পিল্লে ঔষধং পক্ষ্মণাং চ প্ররোহণম্|

Adhikarana pilleShu rasA~jjanAdi a~jjanam (52-53) · Śloka 53

রসাঞ্জনং সর্জরসো রীতিপুষ্পং মনঃশিলা| সমুদ্রফেনো লবণং গৈরিকং মরিচানি চ||৫২|| অঞ্জনং মধুনা পিষ্টং ক্লেদকণ্ডূঘ্নমুত্তমম্| |৫৩|

স০-রসাঞ্জনাদিকং মধুনা পিষ্টমঞ্জনং পরং ক্লেদকণ্ডূহৃত্|

Adhikarana pilleShu tagarAdi a~jjanam pilleShu devadArvAdi a~jjanam (53-54) · Śloka 54

| অভযারসপিষ্টং বা তগরং পিল্লনাশনম্||৫৩|| ভাবিতং বস্তমূত্রেণ সস্নেহং দেবদারু চ| |৫৪|

স০-হরীতকীক্বাথপিষ্টং তগরং পরং পিল্লঘ্নম্| দেবদারুসস্নেহং বস্তমূত্রেণ ভাবিতং তদ্বত্|

Adhikarana pilleShu saindhavAdivartiH (54-55) · Śloka 55

| সৈন্ধবত্রিফলাকৃষ্ণাকটুকাশঙ্খ্নাভযঃ||৫৪|| সতাম্ররজসো বর্তিঃ পিল্লশুক্রকনাশিনী| |৫৫|

স০-সৈন্ধবাদযস্তাম্রজঃসহিতা বর্তিঃ পিল্লশুক্রহৃত্|

Adhikarana pilleShu puShpakAsIsAdi a~jjanam (55-56) · Śloka 56

| পুষ্পকাসীসচূর্ণো বা সুরসারসভাবিতঃ||৫৫|| তাম্রে দশাহং তত্ পৈল্ল্যপক্ষ্মশাতজিদঞ্জনম্| |৫৬|

স০-পুষ্পকাসীসচূর্ণঃ সুরসারসেন দশাহং ভাবিতস্তদঞ্জনং পৈল্ল্যপক্ষ্মশাতঘ্নম্| সুরসা-মূর্বা|

Adhikarana pilleShu alAdicUrNaH (56) · Śloka 56

অলং চ সৌবীরকমঞ্জনং চ তাভ্যাং সমং তাম্ররজঃ সুসূক্ষ্মম্| পিল্লেষু রোমাণি নিষেবিতোঽসৌ চূর্ণঃ করোত্যেকশলাকযাঽপি||৫৬||

স০-হরিতালং সৌবীরাঞ্জনং [চ]| তাভ্যাং দ্বাভ্যাং তুল্যং তাম্রচূর্ণং সূক্ষ্মম্| এষ চূর্ণো নিষেবিত একযাঽপি শলাকযা পিল্লেষু রোমাণি করোতি| উপজাতিঃ|

Adhikarana pilleShu lAkShAdimaShI (57) · Śloka 57

লাক্ষানির্গুণ্ডীভৃঙ্গদার্বীরসেন শ্রেষ্ঠং কার্পাসং ভাবিতং সপ্তকৃত্বঃ| দীপঃ প্রজ্বাল্যঃ সর্পিষা তত্সমুত্থা শ্রেষ্ঠা পিল্লানাং রোপণার্থে মষী সা||৫৭||

স০-লাক্ষাদিরসেন শ্রেষ্ঠং কার্পাসং সপ্তবারান্ ভাবিতম্| তেন কার্পাসেন সর্পিষা দীপঃ প্রজ্বাল্যঃ| তত্সমুত্থা মষী পিল্লানাং রোপণার্থে শ্রেষ্ঠা| বৈশ্বদেবীবৃত্তম্|

Adhikarana pilleShu punaHpunarvartmAvalekhanAdi (58-59) · Śloka 59

| বর্ত্মাবলেখং বহুশস্তদ্বচ্ছোণিতমোক্ষণম্||৫৮|| পুনঃপুনর্বিরেকং চ নিত্যমাশ্চ্যোতনাঞ্জনম্| নাবনং ধূমপানং চ পিল্লরোগাতুরো ভজেত্||৫৯||

স০-পিল্লরোগী বর্ত্মাবলেখাদিকং পুনঃপুনর্ভজেত্|

Adhikarana pilleShu pUyAlase~ashAnte dAhaH (60) · Śloka 60

পূযালসে ত্বশান্তেঽন্তে দাহঃ সূক্ষ্মশলাকযা| |৬০|

স০-পূযালসে পুনরশান্তে সত্যন্তে সূক্ষ্মশলাকযা দাহো হিতঃ|

Adhikarana iti caturNavatirnetrarogAH (60-61) · Śloka 61

| চতুর্ণবতিরিত্যক্ষ্ণো হেতুলক্ষণসাধনৈঃ||৬০|| পরস্পরমসঙ্কীর্ণাঃ কার্ত্স্ন্যেন গদিতা গদাঃ| |৬১|

স০-ইত্যেবমক্ষ্ণশ্চতুর্ণবতি গদা লক্ষণহেতুসাধনৈরন্যোন্যমসঙ্কীর্ণাঃ কার্ত্স্ন্যেনোক্তাঃ|

Adhikarana svasthasyApi nayanapriyasya sadA purANayavAdisevanam (61-65) · Śloka 65

| সর্বদা চ নিষেবেত স্বস্থোঽপি নযনপ্রিযঃ||৬১|| পুরাণযবগোধূমশালিষষ্টিককোদ্রবান্| মুদ্গাদীন্ কফপিত্তঘ্নান্ ভূরিসর্পিঃপরিপ্লুতান্||৬২|| শাকং চৈবংবিধং মাংসং জাঙ্গলং দাডিমং সিতাম্| সৈন্ধবং ত্রিফলাং দ্রাক্ষাং বারি পানে চ নাভসম্||৬৩|| আতপত্রং পদত্রাণং বিধিবদ্দোষশোধনম্| বর্জযেদ্বেগসংরোধমজীর্ণাধ্যশনানি চ||৬৪|| ক্রোধশোকদিবাস্বপ্নরাত্রিজাগরণাতপান্| বিদাহি বিষ্টম্ভকরং যচ্চেহাহারভেষজম্||৬৫||

স০-স্বস্থোঽপি নযনবল্লভঃ সন্ সদৈব পুরাণযবাদিকং নিষেবেত| এবংবিধং কফপিত্তঘ্নং শাকং চ| বিধির্বিদ্যতে যস্মিংস্তচ্চ শোধনং-বিরেচনাদি, ভজেত্| তথা বেগসংরোধাদিকং বর্জযেত্|

Adhikarana svasthasyApi pAdamrakShaNAdi (66) · Śloka 66

দ্বে পাদমধ্যে পৃথুসন্নিবেশে শিরে গতে তে বহুধা চ নেত্রে তা ম্রক্ষণোদ্বর্তনলেপনাদীন্ পাদপ্রযুক্তান্নযনে নযন্তি||৬৬||

স০-দ্বে পাদস্য মধ্যে পৃথুরূপে সিরে| তে চ বহুধা নেত্রগতে| তাঃ সিরাঃ অভ্যঙ্গাদীন্ পাদপ্রযুক্তান্নেত্রং(ত্রে)প্রাপযন্তি|

Adhikarana svasthasyApi upAnadAdisevanam (16) · Śloka 16

মলৌষ্ণ্যসঙ্ঘট্টনপীডনাদ্যৈ- স্তা দূষযন্তে নযনানি দুষ্টাঃ| ভজেত্সদা দৃষ্টিহিতানি তস্মা- দুপানদভ্যঞ্জনধাবনানি||৬৭|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং ষষ্ঠে উত্তরস্থানে সর্বাক্ষিরোগপ্রতিষেধো নাম ষোডশোঽধ্যাযঃ||১৬||

স০-তাশ্চ মলৌষ্ণ্যাদিভির্দুষ্টা নযনানি দূষযন্তে| যত এবং তস্মাদ্ দৃষ্টিহিতানি সর্বদা উপানদভ্যঞ্জনাদীনি ভজেত্| উপজাতী বৃত্তে| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং ষষ্ঠে উত্তরস্থানে সর্বাক্ষিরোগপ্রতিষেধো নাম ষোডশোঽধ্যাযঃ সমাপ্তঃ|| ১৬||