13. timirapratiśēdhādhyāyaḥ

Adhikarana timirapratiShedhAdhyAyaH||13|| (2-3) · Śloka 3

ಅಸ್ಮಾದನನ್ತರಂ ತಿಮಿರಿಪ್ರತಿಷೇಧ ಉಚ್ಯತೇ ಅಥಾತಸ್ತಿಮಿರಪ್ರತಿಷೇಧಂ ವ್ಯಾಖ್ಯಾಸ್ಯಾಮಃ| ಇತಿ ಹ ಸ್ಮಾಹುರಾತ್ರೇಯಾದಯೋ ಮಹರ್ಷಯಃ| (ಗದ್ಯಸೂತ್ರೇ||೨|| )||೩||

ಸ೦-ನನು, ದೃಷ್ಟಿರೋಗವಿಜ್ಞಾನಾದನನ್ತರಂ ದೃಷ್ಟಿರೋಗಪ್ರತಿಷೇಧೋ ಜ್ಞಾಪ್ಯಃ| ಉಪಪನ್ನಮಾಹ ಭವಾನ್| ಕಿಂ ತು ದೃಷ್ಟಿತೋಗಚಿಕಿತ್ಸಿತಸ್ಯ ಬಹುವಕ್ತವ್ಯತ್ವಾತ್ ಪೃಥಗಧ್ಯಾಯೋ ವಕ್ತುಂ ಯುಕ್ತಃ| ತತ್ರಾಪಿ ಕ್ರಮಪ್ರಾಪ್ತಸ್ತಿಮಿರಪ್ರತಿಷೇಧ ಇತಿ ತಿಮಿರಪ್ರತಿಷೇಧಾರಮ್ಭ ಏವ ಯುಕ್ತಃ| ಕಾಚಾದೀನಾಂ ತ್ವಲ್ಪವಕ್ತವ್ಯತ್ವಾದತ್ರೈವಾಭಿಧಾನಮ್| ತತೋ ಬಹುವಕ್ತವ್ಯತ್ವಾತ್ ಪೃಥಗಧ್ಯಾಯೋ ಲಿಙ್ಗನಾಶಸ್ಯ| ಇತಿ ಸರ್ವಂ ಯುಕ್ತಮ್|

Adhikarana timirasya shIghraM sAdhanam (1) · Śloka 1

ತಿಮಿರಂ ಕಾಚತಾಂ ಯಾತಿ ಕಾಚೋಽಪ್ಯಾನ್ಧ್ಯಮುಪೇಕ್ಷಯಾ| ನೇತ್ರರೋಗೇಷ್ವತೋ ಘೋರಂ ತಿಮಿರಂ ಸಾಧಯೇದ್ ದ್ರುತಮ್||೧||

ಸ೦-ತಿಮಿರಮುಪೇಕ್ಷಯಾ ಕಾಚತ್ವಂ ಯಾತಿ| ಕಾಚೋಽಪ್ಯುಪೇಕ್ಷಿತ ಆನ್ಧ್ಯಂ ಗಚ್ಛತಿ| ಅತಃ ಕಾರಣಾನ್ನೇತ್ರರೋಗೇಷು ಮಧ್ಯೇ ತಿಮಿರಂ ದಾರುಣಂ ಶೀಘ್ರಂ ಸಾಧಯೇತ್|

Adhikarana timiraharaM jIvantyAdighRutam (2-4) · Śloka 4

ತುಲಾಂ ಪಚೇತ್ ಜೀವನ್ತ್ಯಾ ದ್ರೋಣೇಽಪಾಂ ಪಾದಶೇಷಿತೇ| ತತ್ಕ್ವಾಥೇ ದ್ವಿಗುಣಕ್ಷೀರಂ ಘೃತಪ್ರಸ್ಥಂ ವಿಪಾಚಯೇತ್||೨|| ಪ್ರಪೌಣ್ಡರೀಕಕಾಕೋಲೀಪಿಪ್ಪಲೀರೋಧ್ರಸೈನ್ಧವೈಃ| ಶತಹ್ವಾಮಧುಕದ್ರಾಕ್ಷಾಸಿರಾದಾರುಫಲತ್ರಯೈಃ||೩|| ಕರ್ಷಿಕೈರ್ನಿಶಿ ತತ್ಪೀತಂ ತಿಮಿರಾಪಹರಂ ಪರಮ್| |೪|

ಸ೦-ಜೀವನ್ತ್ಯಾಃ ಪಲಶತಮಪಾಂ ದ್ರೋಣೇ ಪಾದಾವಶೇಷಿತಂ ಪಚೇತ್| ತತ್ಕ್ವಾಥೇ ಘೃತಪ್ರಸ್ಥಂ ದ್ವಿಗುಣಕ್ಷೀರಂ ಪ್ರಪೌಣ್ಡರೀಕಾದಿಭಿಃ ಕರ್ಷಪರಿಮಾಣೈಃ ಕಲ್ಕಿತೈರ್ವಿಪಾಚಯೇತ್| ನಿಶಿ ಪೀತಂ ತತ್ಪರಂ ತಿಮಿರಾಪಹಮ್|

Adhikarana kAcatimirAdiharaM drAkShAdighRutam (4-6) · Śloka 6

| ದ್ರಾಕ್ಷಾಚನ್ದನಮಞ್ಜಿಷ್ಠಾಕಾಕೋಲೀದ್ವಯಜೀವಕೈಃ||೪|| ಸಿತಾಶತಾವರೀಮೇದಾಪುಣ್ಡ್ರಾಹ್ವಮಧುಕೋತ್ಪಲೈಃ| ಪಚೇಜ್ಜೀರ್ಣಘೃತಪ್ರಸ್ಥಂ ಸಮಕ್ಷೀರಂ ಪಿಚೂನ್ಮಿತೈಃ||೫|| ಹನ್ತಿ ತತ್ಕಾಚತಿಮಿರರಕ್ತರಾಜೀಶಿರೋರುಜಃ| |೬|

ಸ೦-ತಥಾ ದ್ರಾಕ್ಷಾದಿಭಿಃ ಪಿಚೂನ್ಮಿತೈಃ-ಕರ್ಷಾಂಶೈಃ, ಜೀರ್ಣಸ್ಯ-ಪುರಾಣಘೃತಸ್ಯ ಪ್ರಸ್ಥಂ ಸಮಕ್ಷೀರಂ ಪಚೇತ್| ತಚ್ಚ ಕಾಚಾದೀನ್ ಹನ್ತಿ|

Adhikarana shukratimirAdiharaM paTolAdighRutam (6-10) · Śloka 10

| ಪಟೋಲನಿಮ್ಬಕಟುಕಾದಾರ್ವೀಸೇವ್ಯವರಾವೃಷಮ್||೬|| ಸಧನ್ವಯಾಸತ್ರಾಯನ್ತೀಪರ್ಪಟಂ ಪಾಲಿಕಂ ಪೃಥಕ್| ಪ್ರಸ್ಥಮಾಮಲಕಾನಂ ಚ ಕ್ವಾಥಯೇನ್ನಲ್ವಣೇಽಮ್ಭಸಿ||೭|| ತದಾಢಕೇಽರ್ಧಪಲಿಕೈಃ ಪಿಷ್ಟೈಃ ಪ್ರಸ್ಥಂ ಘೃತಾತ್ಪಚೇತ್| ಮುಸ್ತಭೂನಿಮ್ಬಯಷ್ಟ್ಯಾಹ್ವಕುಟಜೋದೀಚ್ಯಚನ್ದನೈಃ||೮|| ಸಪಿಪ್ಪಲೀಕೈಸ್ತತ್ಸರ್ಪಿಘ್ರಾಣಕರ್ಣಾಸ್ಯರೋಗಜಿತ್| ವಿದ್ರಧಿಜ್ವರದುಷ್ಟಾರುರ್ವಿಸರ್ಪಾಪಚಿಕುಷ್ಠನುತ್||೯|| ವಿಶೇಷಾಚ್ಛುಕ್ರತಿಮಿರನಕ್ತಾನ್ಧ್ಯೋಷ್ಣಾಮ್ಲದಾಹಹೃತ್| |೧೦|

ಸ೦-ಪಟೋಲಾದಿಕಂ ಪರ್ಪಟಾನ್ತಂ ಪೃಥಕ್ ಪಲೋನ್ಮಿತಮಾಮಲಕಾನಾಂ ಪ್ರಸ್ಥಂ ನಲ್ವಣೇ-ದ್ರೋಣೇಽಮ್ಭಸಿ, ಕ್ವಾಥಯೇತ್| ತದಾಢಕೇ ಮುಸ್ತಾದಿಭಿಃ ಸಪಿಪ್ಪಲೀಕೈಃ ಪಿಷ್ಟೈಃ-ಕಲ್ಕಿತೈಃ, ಅರ್ಧಪಲಿಕೈರ್ಘೃತಪ್ರಸ್ಥಂ ವಿಪಾಚಯೇತ್| ತಚ್ಚ ಘೃತಂ ಘ್ರಾಣಾದಿರೋಗಜಿತ್, ವಿದ್ರಧ್ಯಾದಿರೋಗಜಿತ್, ವಿಶೇಷೇಣ ಶುಕ್ರಾದಿಘ್ನಮ್| ಏತತ್ಪಟೋಲಾದ್ಯಂ ಘೃತಮ್|

Adhikarana timiraghnaM triphalAghRutam (10-12) · Śloka 12

| ತ್ರಿಫಲಾಷ್ಟಪಲಂ ಕ್ವಾಥ್ಯಂ ಪಾದಶೇಷಂ ಜಲಾಢಕೇ||೧೦|| ತೇನ ತುಲ್ಯಪಯಸ್ಕೇನ ತ್ರಿಫಲಾಪಲಕಲ್ಕವಾನ್| ಅರ್ಧಪ್ರಸ್ಥೋ ಘ್ರುತಾತ್ಸಿದ್ಧಃ ಸಿತಯಾ ಮಾಕ್ಷಿಕೇಣ ವಾ||೧೧|| ಯುಕ್ತಂ ಪಿಬೇತ್ತತ್ತಿಮಿರೀ ತದ್ಯುಕ್ತಂ ವಾ ವರಾರಸಮ್| |೧೨|

ಸ೦-ತ್ರಿಫಲಾಯಾಃ ಪಲಾಷ್ಟಕಂ ಜಲಾಢಕೇ ಪಾದಶೇಷಂ ಕ್ವಾಥ್ಯಮ್| ತೇನ ಕ್ವಾಥೇನ ತುಲ್ಯಕ್ಷೀರೇಣ ತ್ರಿಫಲಾಪಲಕಲ್ಕಯುಕ್ತೋ ಘೃತಾರ್ಧಪ್ರಸ್ಥಃ ಪಕ್ವಃ ಶರ್ಕರಯಾ ಮಾಕ್ಷಿಕೇಣ ವಾ ಯುತಂ ತತ್ತಿಮಿರೀ ಪಿಬೇತ್| ಘೃತೇನ ವಾ ತೇನ ಯುಕ್ತಂ ತ್ರಿಫಲಾಕ್ವಾಥಂ ದೋಷದೂಷ್ಯಾದಿವಶಾತ್ ಪಿಬೇತ್| ಏತಚ್ಚ ತ್ರಿಫಲಾಘ್ರುತಮುಚ್ಯತೇ|

Adhikarana timiraghnaM mahAtraiphalaghRRutam (12-14) · Śloka 14

| ಯಷ್ಟೀಮಧುದ್ವಿಕಾಕೋಲೀವ್ಯಾಘ್ರೀಕೃಷ್ಣಾಮೃತೋತ್ಪಲೈಃ||೧೨|| ಪಾಲಿಕೈಃ ಸಸಿರಾದ್ರಾಕ್ಷೈರ್ಘೃತಪ್ರಸ್ಥಂ ಪಚೇತ್ಸಮೈಃ| ಅಜಾಕ್ಷೀರವರಾವಾಸಾಮಾರ್ಕವಸ್ವರಸೈಃ ಪೃಥಕ್||೧೩|| ಮಹಾತ್ರೈಫಲಮಿತ್ಯೇತತ್ಪರಂ ದೃಷ್ಟಿವಿಕಾರಜಿತ್| |೧೪|

ಸ೦-ಯಷ್ಟ್ಯಾದಿಭಿಃ ಪಾಲಿಕೈಃ ಸಹಸಿತಾದ್ರಾಕ್ಷೈರಜಾಕ್ಷೀರಾದಿಭಿಃ ಪೃಥಕ್ಸ್ವರಸೈಃ ಸಮೈಃ ಪ್ರಸ್ಥಪ್ರಮಾಣೈಃ ಸರ್ಪಿಃಪ್ರಸ್ಥಂ ವಿಪಾಚಯೇತ್| ಏತನ್ಮಹಾತ್ರೈಫಲಂ ಸುಷ್ಟ್ರು ದೃಷ್ಟಿವಿಕಾರಜಿತ್|

Adhikarana timiraghnaM traiphalaghRutaleho gArutmatadRuShTikaraH (14-16) · Śloka 16

| ತ್ರೈಫಲೇನಾಥ ಹವಿಷಾ ಲಿಹಾನಸ್ತ್ರಿಫಲಾಂ ನಿಶಿ||೧೪|| ಯಷ್ಟೀಮಧುಕಸಂಯುಕ್ತಾಂ ಮಧುನಾ ಚ ಪರಿಪ್ಲುತಾಮ್| ಮಾಸಮೇಕಂ ಹಿತಾಹಾರಃ ಪಿಬನ್ನಾಮಲಕೋದಕಮ್||೧೫|| ಸೌಪರ್ಣಂ ಲಭತೇ ಚಕ್ಷುರಿತ್ಯಾಹ ಭಗವಾನ್ನಿಮಿಃ| |೧೬|

ಸ೦-ತ್ರೈಫಲೇನ ಚ ಸರ್ಪಿಷಾ ತ್ರಿಫಲಾಂ ಯಷ್ಟೀಯುಕ್ತಾಂ ಮಾಕ್ಷಿಕೇಣ ಚ ಪರಿಪ್ಲುತಾಂ ರಾತ್ರೌ ಲಿಹಾನೋ ಮಾಸಮೇಕಂ ಹಿತಾಶೀ ಸನ್ನಾಮಲಕೋದಕಂ ಪಿಬನ್ ಗಾರುತ್ಮತಂ ಚಕ್ಷುರ್ಲಭತ ಇತಿ ಭಗವಾನ್ನಿಮಿರಾಹ|

Adhikarana timiraghnaM triphalAkvAthaH (16-17) · Śloka 17

| ತಾಪ್ಯಾಯೋಹೇಮಯಷ್ಟ್ಯಾಹ್ವಸಿತಾಜೀರ್ಣಾಜ್ಯಮಾಕ್ಷಿಕೈಃ||೧೬|| ಸಂಯೋಜಿತಾ ಯಥಾಕಾಮಂ ತಿಮಿರಘ್ನೀ ವರಾ ವರಾ| |೧೭|

ಸ೦-ತಾಪ್ಯಾದಿಭಿಃ ಸಂಯೋಜಿತಾ ತ್ರಿಫಲಾ ಯಥಾಕಾಮಂ ವರಾ ತಿಮಿರಘ್ನೀ ಸ್ಯಾತ್|

Adhikarana timiraghnaM apUpasUpasaktavaH (17-18) · Śloka 18

| ಸಘೃತಂ ವಾ ವರಾಕ್ವಾಥಂ ಶೀಲಯೇತ್ತಿಮಿರಾಮಯೀ||೧೭|| ಅಪೂಪಸೂಪಸಕ್ತೂನ್ ವಾ ತ್ರಿಫಲಾಚೂರ್ಣಸಂಯುತಾನ್| |೧೮|

ಸ೦-ಅಥವಾ ತ್ರಿಫಲಾಕ್ವಾಥಂ ಸಸರ್ಪಿಷ್ಕಂ ತಿಮಿರರೋಗಹರಮಭ್ಯಸೇತ್| ಅಪೂಪಾದೀನ್ ವಾ ತ್ರಿಫಲಾಚೂರ್ಣಸಂಯುತಾನ್ ಶೀಲಯೇತ್|

Adhikarana timiraghnaM pAyasAdibhakShaNam (18-19) · Śloka 19

| ಪಾಯಸಂ ವಾ ವರಾಯುಕ್ತಂ ಶೀತಂ ಸಮಧುಶರ್ಕರಮ್||೧೮|| ಪ್ರಾತರ್ಭಕ್ತಸ್ಯ ವಾ ಪೂರ್ವಮದ್ಯಾತ್ಪಥ್ಯಾಂ ಪೃಥಕ್ ಪೃಥಕ್| ಮೃದ್ವೀಕಾಶರ್ಕರಾಕ್ಷೌದ್ರೈಃ ಸತತಂ ತಿಮಿರಾತುರಃ||೧೯||

ಸ೦-ಪಾಯಸಂ ತ್ರಿಫಲಾಯುತಂ ವ ಶೀತಂ ಸಮಧುಶರ್ಕರಂ ಪ್ರಾತರದ್ಯಾತ್| ಭಕ್ತಸ್ಯ ಪೂರ್ವಂ ವಾ| ಹರೀತಕೀಂ ವಾ ಮೃದ್ವೀಕಾಶರ್ಕರಾಕ್ಷೌದ್ರೈಃ ಪೃಥಕ್ ಪೃಥಕ್ ಯುತಾಮನಾರತಂ ತಿಮಿರಾತುರೋಽದ್ಯಾತ್|

Adhikarana timiraghnaM cUrNA~jjanam (20-22) · Śloka 22

ಸ್ರೋತೋಜಾಂಶಾಂಶ್ಚತುಃಷಷ್ಟಿಂ ತಾಮ್ರಾಯೋರೂಪ್ಯಕಾಞ್ಚನೈಃ| ಯುಕ್ತಾನ್ ಪ್ರತ್ಯೇಕಮೇಕಾಂಶೈರನ್ಧಮೂಷೋದರಸ್ಥಿತಾನ್||೨೦|| ಧ್ಮಾಪಯಿತ್ವಾ ಸಮಾವೃತ್ತಂ ತತಸ್ತಚ್ಚ ನಿಷೇಚಯೇತ್| ರಸಸ್ಕನ್ಧಕಷಾಯೇಷು ಸಪ್ತಕೃತ್ವಃ ಪೃಥಕ್ ಪೃಥಕ್||೨೧|| ವೈಡೂರ್ಯಮುಕ್ತಾಶಙ್ಖಾನಾಂ ತ್ರಿಭಿರ್ಭಾಗೈರ್ಯುತಂ ತತಃ| ಚೂರ್ಣಾಞ್ಜನಂ ಪ್ರಯುಞ್ಜೀತ ತತ್ಸರ್ವತಿಮಿರಾಪಹಮ್||೨೨||

ಸ೦-ಸ್ರೋತೋಜಾತ್ ಚತುಃಷಷ್ಟಿಮಂಶಾಂಸ್ತಾಮ್ರಾದಿಭಿಃ ಪ್ರತ್ಯೇಕಮೇಕಾಂ-ಶೈರ್ಯುತಾನನ್ಧಮೂಷೋದರಸ್ಥಿತಾನ್ ಧ್ಮಾಪಯಿತ್ವಾ ಸಮ್ಯಗಾವೃತ್ತಂ-ಆವರ್ತಿತಂ ಶಿಲಾಯಾಂ, ತತಃ-ಅನನ್ತರಂ, ಮಧುರಾದಿಗಣಕ್ವಾಥೇಷು ತನ್ನಿಷೇಚಯೇತ್ ಪೃಥಕ್ ಪೃಥಕ್ ಸಪ್ತವಾರಾನ್| ತತೋ ವೈಡೂರ್ಯಮುಕ್ತಾಶಙ್ಕಾನಾಂ ತ್ರಿಭಿರ್ಭಾಗೈರ್ಯುತಮೇತಚ್ಚೂರ್ಣಾಞ್ಜನಂ ಸರ್ವತಿಮಿರಘ್ನಂ ಪ್ರಯುಞ್ಜೀತ|

Adhikarana timiraghnaM mAMsyAdya~jjanam (23-24) · Śloka 24

ಮಾಂಸೀತ್ರಿಜಾತಕಾಯಃಕುಙ್ಕುಮನೀಲೋತ್ಪಲಾಭಯಾತುತ್ಥೈಃ| ಸಿತಕಾಚಶಙ್ಖಫೇನಕಮರಿಚಾಞ್ಜನಪಿಪ್ಪಲೀಮಧುಕೈಃ||೨೩|| ಚನ್ದ್ರೇಽಶ್ವನೀಸನಾಥೇ ಸುಚೂರ್ಣಿತೈರಞ್ಜಯೇದ್ಯುಗುಲಮಕ್ಷ್ಣೋಃ| ತಿಮಿರಾರ್ಮರಕ್ತರಾಜೀಕಣ್ಡೂಕಾಚಾದಿಶಮಮಿಚ್ಛನ್||೨೪||

ಸಂ-ಮಾಂಸ್ಯಾದಿಭಿಃ ಸೂಕ್ಷ್ಮರಜೀಕೃತೈಶ್ಚನ್ದ್ರೇಽಶ್ವಿನೀಯುಕ್ತೇ ಸತ್ಯಕ್ಷಿಯುಗ್ಮಮಞ್ಜಯೇತ್ ತಿಮಿರಾದಿಶಾನ್ತಿಮಿಚ್ಛನ್| ಆರ್ಯೇ ಮುಖಚಪಲೇ|

Adhikarana timiraghnaM maricAdicUrNam timiraghnaM manohvAdya~jjanam (25-2) · Śloka 2

ಮರಿಚವರಲವಣಭಾಗೌ ಭಾಗೌ ದ್ವೌ ಕಣಸಮುದ್ರಫೇನಾಭ್ಯಾಮ್| ಸೌವೀರಭಾಗನವಕಂ ಚಿತ್ರಾಯಾಂ ಚೂರ್ಣಿತಂ ಕಫಮಯಜಿತ್||೨೫|| | ಮನೋಹ್ವಾತುತ್ಥಕಸ್ತೂರೀಮಾಂಸೀಮಲಯರೋಚನಾಃ| ದಶಕರ್ಪೂರಸಂಯುಕ್ತಮಶೀತಿಗುಣಮಞ್ಜನಮ್||೧|| ಪಿಷ್ಟಂ ಚಿತ್ರಾಶ್ವಿನೀಪುಷ್ಯೇ ಷಡ್ವಿಧೇ ತಿಮಿರೇ ಹಿತಮ್| ಪ್ರಸಾದನಂ ಚ ದೃಷ್ಟೇಃ ಸ್ಯಾಚ್ಚಕ್ಷುಷೇಣಾವಭಾಷಿತಮ್]||೨||

ಸ೦-ಮರಿಚಸೈನ್ಧವಯೋರ್ದ್ವೌ ಭಾಗೌ, ಪಿಪ್ಪಲೀಸಮುದ್ರಫೇನಯೋರ್ದ್ವೌ ಭಾಗೌ, ಸೌವೀರಾಞ್ಜನಸ್ಯ ಭಾಗಾ ನವ, ಏತಚ್ಚಿತ್ರಾಯಾಂ ಚೂರ್ಣಿತಂ ಕಫಾಮಯಜಿತ್| ಗೀತಿರಾರ್ಯಾ|

Adhikarana timiraghnaM videhapatikRutama~jjanam (26-27) · Śloka 27

ದ್ರಾಕ್ಷಾಮೃಣಾಲೀಸ್ವರಸೇ ಕ್ಷೀರಮದ್ಯವಸಾಸು ಚ| ಪೃಥಕ್ ದಿವ್ಯಾಪ್ಸು ಸ್ರೋತೋಜಂ ಸಪ್ತಕೃತ್ವೋ ನಿಷೇಚಯೇತ್||೨೬|| ತಚ್ಚೂರ್ಣಿತಂ ಸ್ಥಿತಂ ಶಙ್ಖೇ ದೃಕ್ಪ್ರಸಾದನಮಞ್ಜನಮ್| ಶಸ್ತಂ ಸರ್ವಾಕ್ಷಿರೋಗೇಷು ವಿದೇಹಪತಿನಿರ್ಮಿತಮ್||೨೭||

ಸ೦-ದ್ರಾಕ್ಷಾದಿಸ್ವರಸೇಷು ಪೃಥಕ್ ಪೃಥಕ್ ದಿವ್ಯಜಲೇ ಚ ಸ್ರೋತೋಞ್ಜನಂ ಸಪ್ತಕೃತ್ವೋ ನಿಷೇಚಯೇತ್| ತಚ್ಚೂರ್ಣಿಕೃತಂ ಶಙ್ಕೇ ಸ್ಥಿತಂ ದೃಷ್ಟಿಪ್ರಸಾದಕೃದಞ್ಜನಂ ಸರ್ವಾಕ್ಷಿರೋಗೇಷು ಶ್ರೇಷ್ಠಂ ವಿದೇಹಪತಿನಿರ್ಮಿತಮ್|

Adhikarana timiraghnaM bhAskaracUrNam (28-31) · Śloka 31

ನಿರ್ದಗ್ಧಂ ಬಾದರಾಙ್ಗಾರೈಸ್ತುತ್ಥಂ ಚೇತ್ಥಂ ನಿಷೇಚಿತಮ್| ಕ್ರಮಾದಜಾಪಯಃ ಸರ್ಪಿಃಕ್ಷೌದ್ರೇ ತಸ್ಮಾತ್ ಪಲದ್ವಯಮ್||೨೮|| ಕಾರ್ಷಿಕೈಸ್ತಾಪ್ಯಮರಿಚಸ್ರೋತೋಜಕಟುಕಾನತೈಃ| ಪಟುರೋಧ್ನಶಿಲಾಪಥ್ಯಾಕಣೈಲಾಞ್ಜನಫೇನಕೈಃ||೨೯|| ಯುಕ್ತಂ ಪಲೇನ ಯಷ್ಟ್ಯಾಶ್ಚ ಮೂಷಾನ್ತರ್ಧ್ಮಾತಚೂರ್ಣಿತಮ್| ಹನ್ತಿ ಕಾಚಾರ್ಮನಕ್ತಾನ್ಧ್ಯರಕ್ತರಾಜೀಃ ಸುಶೀಲತಃ||೩೦|| ಚೂರ್ಣೋ ವಿಶೇಷಾತ್ತಿಮಿರಂ ಭಾಸ್ಕರೋ ಭಾಸ್ಕರೋ ಯಥಾ| |೩೧|

ಸ೦-ಬಾದರಙ್ಗಾರೈಸ್ತುತ್ಥಂ ನಿರ್ದಗ್ಧಂ ಪೂರ್ವವತ್ ಕ್ರಮೇಣ ಛಾಗಕ್ಷೀರಘೃತಮಾಕ್ಷಿಕೇ ನಿಷೇಚಿತಂ, ತಸ್ಮಾತ್-ನಿರ್ದಗ್ಧಾಚ್ಚ ತುತ್ಥಾತ್ ಪಲದ್ವಯಂ, ತಾಪ್ಯಾದಿಭಿಃ ಕಾರ್ಷಿಕೈರ್ಯಷ್ಟೀಪಲೇನ ಚ ಯುಕ್ತಂ, ಮೂಷಾನ್ತರ್ಧ್ಮಾಪಿತಂ ಚೂರ್ಣಿತಂ, ಕಾಚಾದೀನ್ ಹನ್ತಿ| ಸುಸೇವಿತೋಽಯಂ ಭಾಸ್ಕರಶ್ಚೂರ್ಣೋ ವಿಶೇಷೇಣ ತಿಮಿರಂಹನ್ತಿ| ಯಥಾ ರವಿರನ್ಧಕಾರಮಿತ್ಯುಪಮಾಶ್ಲೇಷೋಽಲಙ್ಕಾರಃ|

Adhikarana bhAskarA~jjanam (31-33) · Śloka 33

| ತ್ರಿಂಶದ್ಭಾಗಾ ಭುಜಙ್ಗಸ್ಯ ಗನ್ಧಪಾಷಾಣಪಞ್ಚಕಮ್||೩೧|| ಶುಲ್ಬತಾಲಕಯೋರ್ದ್ವೌ ದ್ವೌ ವಙ್ಗಸ್ಯೈಕೋಽಞ್ಜನಾತ್ತ್ರಯಮ್| ಅನ್ಧಮೂಷೀಕೃತಂ ಧ್ಮಾತಂ ಪಕ್ವಂ ವಿಮಲಮಞ್ಜನಮ್||೩೨|| ತಿಮಿರಾನ್ತಕರಂ ಲೋಕೇ ದ್ವಿತೀಯ ಇವ ಭಾಸ್ಕರಃ| |೩೩|

ಸ೦-ಬುಜಙ್ಗಸ್ಯ-ಸೀಸಕಸ್ಯ ತ್ರಿಂಶದ್ಭಾಗಾಃ, ಗನ್ಧಪಾಷಾಣಸ್ಯ ಭಾಗ ಪಞ್ಚಕಂ, ಶುಲ್ಬತಾಲಕಯೋರ್ದ್ವೌ ದ್ಬೌ ಭಾಗೌ, ವಙ್ಗಸ್ಯ-ತ್ರಪುಣ ಏಕೋ ಭಾಗಃ, ಅಞ್ಜನಾದ್ಭಾಗತ್ರಯಮನ್ಧಮೂಷಾಧ್ಮಾತಂ ವಿಪಕ್ವಮಞ್ಜನಂ ದ್ವಿತೀಯೋ ಭಾಸ್ಕರ ಇವಲೋಕೇ ತಿಮಿರಾನ್ತಕರಮ್| ಭುಜಙ್ಗಾದೀನಾಂ ಶೋಧಿತನಾಮತ್ರ ಪ್ರಯೋಗಃ, ನ ತು ಮಾರಿತಾನಾಮ್|

Adhikarana timiraghnaM tutthaM garuDasamacakShuHkaram (33) · Śloka 33

ಗೋಮೂತ್ರೇ ಛಗಣರಸೇಽಮ್ಲಕಾಞ್ಜಿಕೇ ಚ ಸ್ತ್ರೀಸ್ತನ್ಯೇ ಹವಿಷಿ ವಿಷೇ ಚ ಮಾಕ್ಷಿಕೇ ಚ| ಯತ್ತುತ್ಥಂ ಜ್ವಲಿತಮನೇಕಶೋ ನಿಷಿಕ್ತಂ ತತ್ಕುರ್ಯಾದ್ಗರುಡಸಮಂ ನರಸ್ಯ ಚಕ್ಷುಃ||೩೩||

ಸ೦-ತತ್ತುತ್ಥಂ ನರಸ್ಯ ಗರುಡನಯನತುಲ್ಯಂ ನಯನಂ ಕುರ್ಯಾತ್| ಕತಮಮ್ ? ಯದ್ದೀಪ್ತಂ ಸತ್ ಗೋಮೂತ್ರಾದಿಷ್ವನೇಕಶಃ-ಸಪ್ತಕೃತ್ವೋ, ನಿಷಿಕ್ತಮ್| ಪ್ರಹರ್ಷಿಣೀವೃತ್ತಮ್|

Adhikarana timiraghnaM sIsashalAkA (34-35) · Śloka 35

ಶ್ರೇಷ್ಠಾಜಲಂ ಭೃಙ್ಗರಸಂ ಸವಿಷಾಜ್ಯಮಜಾಪಯಃ| ಯಷ್ಟೀರಸಂ ಚ ಯತ್ಸೀಸಂ ಸಪ್ತಕೃತ್ವಃ ಪೃಥಕ್ ಪೃಥಕ್||೩೪|| ತಪ್ತಂ ತಪ್ತಂ ಪಾಯಿತಂ ತಚ್ಛಲಾಕಾ ನೇತ್ರೇ ಯುಕ್ತಾ ಸಾಞ್ಜನಾಽನಞ್ಜನಾ ವಾ| ತೈಮಿರ್ಯಾರ್ಮಸ್ರಾಪಪೈಚ್ಛಿಲ್ಯಪೈಲ್ಲಂ ಕಣ್ಡೂಂ ಜಾಡ್ಯಂ ರಕ್ತರಾಜೀಂ ಚ ಹನ್ತಿ||೩೫||

ಸ೦-ಯತ್ಸೀಸಂ ತಪ್ತಂ ತಪ್ತಂ ತ್ರಿಫಲಾಕ್ವಾಥಾದಿಕಂ ಪೃಥಕ್ ಪೃಥಕ್ ಸ್ಪತಕೃತ್ವಃ ಪಾಯಿತಂ ತಸ್ಯ ಸೀಸಸ್ಯ ಶಲಾಕಾ ನಯನೇ ಯುಕ್ತಾ ಸಹಾಞ್ಜನಾಽಞ್ಜನೇನ ರಹಿತಾ ವಾ ತೈಮಿರ್ಯಾದೀನ್ ಹನ್ತಿ| ಶಾಲಿನೀವೃತ್ತಮ್| ದ್ರವ್ಯಶಲಾಕೇಯಮಿತಿ ಪ್ರಥಿತಾ|

Adhikarana timiraghnaM rasendrAdya~jjanam (36) · Śloka 36

ರಸೇನ್ದ್ರಭುಜಗೌ ತುಲ್ಯೌ ತಯೋಸ್ತುಲ್ಯಮಥಾಞ್ಜನಮ್| ಈಷಾತ್ಕರ್ಪೂರಸಂಯುಕ್ತಮಞ್ಜನಂ ತಿಮಿರಾಪಹಮ್||೩೬||

ಸ೦-ಪಾರದಸೀಸಕೌ ಸಮಾಂಶೌ, ತಯೋಃ ಸಮಮಞ್ಜನಂ, ಷೋಡಶಾಂಶಕರ್ಪೂರಯುತಮಿದಮಞ್ಜನಂ ತಿಮಿರಾಪಹಂ ಭವತಿ|

Adhikarana timiraghnaM gRudhrA~jjanam (37) · Śloka 37

ಯೋ ಗೃಧ್ರಸ್ತರುಣರವಿಪ್ರಕಾಶಗಲ್ಲ- ಸ್ತಸ್ಯಾಸ್ಯಂ ಸಮಯಮೃತಸ್ಯ ಗೋಶಕೃದ್ಭಿಃ| ನಿರ್ದಗ್ಧಂ ಸಮಧೃತಮಞ್ಜನಂ ಚ ಪೇಷ್ಯಂ ಯೋಗೋಽಯಂ ನಯನಬಲಂ ಕರೋತಿ ಗಾರ್ಧ್ರಮ್||೩೭||

ಸ೦-ಯೋ ಗೃಧ್ರಸ್ತರುಣರವಿಪ್ರಕಾಶಗಲ್ಲಸ್ತಸ್ಯ ಸಮಯಮೃತಸ್ಯಾಸ್ಯಂ ಮುಖಂ, ಗೋಶಕೃದ್ಭಿಃ-ಗೋಮಯಕರೀಷೈಃ, ನಿರ್ದಗ್ಧಂ-ಭಸ್ಮಾಸಾತ್ಕೃತಂ, ತಸ್ಯ ಸಮಮಞ್ಜನಂ-ಸ್ರೋತೋಜಂ, ಸಮಧೃತಂ-ಸಮಭಾಗಂ, ಪೇಷ್ಯಂ-ಚೂರ್ಣಯಿತವ್ಯಮ್| ಅಯಂ ಯೋಗೋ ನಯನಯೋಃ-ನೇತ್ರಯೋಃ, ಬಲಂ ಗಾರ್ಧ್ರಂ-ಗೃಧ್ರತುಲ್ಯಂ, ಕರೋತಿ|

Adhikarana timiraghnaM kRuShNasarpAsyAdya~jjanam (38) · Śloka 38

ಕೃಷ್ಣಸರ್ಪವದನೇ ಸಹವಿಷ್ಕಂ ದಗ್ಧಮಞ್ಜನನಿಃಸೃತಧೂಮಮ್| ಚೂರ್ಣಿತಂ ನಲದಪತ್ರವಿಮಿಶ್ರಂ ಭಿನ್ನತಾರಮಪಿ ರಕ್ಷತಿ ಚಕ್ಷುಃ||೩೮||

ಸ೦-ಕೃಷ್ಣಸರ್ಪಸ್ಯ ವದನೇ ಸಹವಿಷ್ಕಮಞ್ಜನಮನಿಃಸೃತಧೂಮಂ ದಗ್ಧಂ ಮಾಂಸೀಪತ್ರಕಮಿಶ್ರಿತಂ ಚೂರ್ಣೀತಮುಪಯುಕ್ತಂ ಸತ್ ಚಕ್ಷುರ್ಭಿನ್ನತಾರಮಪಿ ರಕ್ಷತಿ| ಭಿನ್ನತಾರಮಪೀತ್ಯನೇನ ಶಕ್ತ್ಯತಿಶಯಮಸ್ಯಾಹ| ನ ತು ಭಿನ್ನತಾರಸ್ಯ ಕಥಞ್ಚಿದ್ರಕ್ಷಣಂ ಸ್ಯಾತ್| ಅನ್ಯತ್ರಾಪ್ಯೇವಂವಿಧೋ ನ್ಯಾಯೋಽಯಮನುಸರಣೀಯಃ| ಸ್ವಾಗತಾವೃತ್ತಮ್|

Adhikarana timiraghnaM andhadRuShTipradaM kukkuTapurISham (39-40) · Śloka 40

ಕೃಷ್ಣಸರ್ಪಂ ಮೃತಂ ನ್ಯಸ್ಯ ಚತುರಶ್ಚಾಪಿ ವೃಶ್ಚಿಕಾನ್| ಕ್ಷೀರಕುಮ್ಭೇ ತ್ರಿಸಪ್ತಾಹಂ ಕ್ಲೇದಯಿತ್ವಾ ಪ್ರಮನ್ಥಯೇತ್||೩೯|| ತತ್ರ ಯನ್ನವನೀತಂ ಸ್ಯಾತ್ಪುಷ್ಣೀಯಾತ್ತೇನ ಕುಕ್ಕುಟಮ್| ಅನ್ಧಸ್ತಸ್ಯ ಪುರೀಷೇಣ ಪ್ರೇಕ್ಷತೇ ಧ್ರುವಮಞ್ಜನಾತ್||೪೦||

ಸ೦-ಕ್ಷೀರಕುಮ್ಭೇ ಮೃತಂ ಕೃಷ್ಣಸರ್ಪಂ ನ್ಯಸ್ಯ ವೃಶ್ಚಿಕಾಂಶ್ಚ ಚತುರಸ್ತ್ರಿಸಪ್ತಾಹಂ ಕ್ಲೇದಯಿತ್ವಾ ವಿಲೋಡಯೇತ್| ತಸ್ಮಿನ್ ಯನ್ನವನೀತಂ ಭವೇತ್, ತೇನ ನವನೀತೇನ ಕುಕ್ಕುಟಂ ಪುಷ್ಣೀಯಾತ್| ತಸ್ಯ ಕುಕ್ಕುಟಸ್ಯ ಪುರೀಷೇಣಾನ್ಧೋಽಪ್ಯಞ್ಜನಾನ್ನಿಶ್ಚಿತಮೀಕ್ಷತೇ|

Adhikarana timiraghnaM andhadRuShTipradaM rasakriyA (41) · Śloka 41

ಕೃಷ್ಣಸರ್ಪವಸಾ ಶಙ್ಖಃ ಕತಕಾತ್ ಫಲಮಞ್ಜನಮ್| ರಸಕ್ರಿಯೇಯಮಚಿರಾದನ್ಧಾನಂ ದರ್ಶನಪ್ರದಾ||೪೧||

ಸ೦-ಕೃಷ್ಣಸರ್ಪಸ್ಯ ವಸಾ ಶಙ್ಖಃ ಕತಕಫಲಂ ಸೌವೀರಾಞ್ಜನಮ್| ಇಯಂ ರಸಕ್ರಿಯಾ ದ್ರಾಗೇವಾನ್ಧಾನಾಂ ದೃಷ್ಟಿಪ್ರದಾ|

Adhikarana timiraghnaM pratIsArAkhyama~jjanam (42) · Śloka 42

ಮರಿಚಾನಿ ದಶಾರ್ಧಪಿಚು- ಸ್ತಾಪ್ಯಾತ್ತುತ್ಥಾತ್ಪಲಂ ಪಿಚುರ್ಯಷ್ಟ್ಯಾಃ| ಕ್ಷೀರಾರ್ದ್ರದಗ್ಧಮಞ್ಜನ- ಮಪ್ರತಿಸಾರಾಖ್ಯಮುತ್ತಮಂ ತಿಮಿರೇ||೪೨||

ಸ೦-ದಶ ಮರಿಚಾನಿ, ವಟ್ಟಮಾಕ್ಷಿಕಾದರ್ಧಕರ್ಷಂ, ತುತ್ಥಾತ್ಪಲಂ, ಮಧುಯಷ್ಟಿಕಾಯಾಃ ಕರ್ಷಃ, ಏತತ್ಸರ್ವಂ ಕ್ಷೀರಾರ್ದ್ರಂ ಪಶ್ಚಾದ್ದಗ್ಧಮಪ್ರತಿಸಾರಸಂಜ್ಞಮಞ್ಜನಮತಿಶ್ರೇಷ್ಠಂ ತಿಮಿರೇ| ಗೀತಿರಾರ್ಯಾ|

Adhikarana timiraghnaM akShabIjAdiguTikA (43) · Śloka 43

ಅಕ್ಷಬೀಜಮರಿಚಾಮಲಕತ್ವಕ್- ತುತ್ಥಯಷ್ಟಿಮಧುಕೈರ್ಜಲಪಿಷ್ಟೈಃ| ಛಾಯಯೈವ ಗುಟಿಕಾಃ ಪರಿಶುಷ್ಕಾ ನಾಶನ್ಯನ್ತಿ ತಿಮಿರಾಣ್ಯಚಿರೇಣ||೪೩||

ಸ೦-ಅಕ್ಷಬೀಜಾದಿಭಿರ್ಜಲಪಿಷ್ಟೈರ್ಗುಟಿಕಾಃ ಛಾಯಯೈವ ಪರಿಶುಷ್ಕಾಃ-ನ ತ್ವಾತಪೇನ, ತಿಮಿರಾಣಿ ಲಘು ನಾಶಯನ್ತಿ| ಸ್ವಾಗತಾವೃತ್ತಮ್|

Adhikarana timiraghnaM ShaNmAkShiko yogaH (44) · Śloka 44

ಮರಿಚಾಮಲಕಜಲೋದ್ಭವ- ತುತ್ಥಾಞ್ಜನತಾಪ್ಯಧಾತುಭಿಃ ಕ್ರಮವೃದ್ಧೈಃ| ಷಣ್ಮಾಕ್ಷಿಕ ಇತಿ ಯೋಗ- ಸ್ತಿಮಿರಾರ್ಮಕ್ಲೇದಕಾಚಕಣ್ಡೂಹನ್ತಾ||೪೪||

ಸ೦-ಮರಿಚಾದಿಭಿಃ ಕ್ರಮವೃದ್ಧೈಃ ಷಣ್ಮಾಕ್ಷಿಕ ಇತಿ ಯೋಗಸ್ತಿಮಿರಾದಿಘ್ನಃ| ಷಣ್ಮಾಕ್ಷಿಕ ಇತಿ ಕೋಽರ್ಥಃ ? ಕೀದೃಶಃ ಸಮಾಸಃ ? ಬ್ರೂಮಃ| ಮಾಕ್ಷಿಕಶಬ್ದೇನಾದಿಲೋಪಾಖ್ಯಯಾ ತನ್ತ್ರಯುಕ್ತ್ಯಾ ವಟ್ಟಮಾಕ್ಷಿಕ ಇತ್ಯುಚ್ಯತೇ| ಷಟ್ಪೂರಣೋ ವಟ್ಟಮಾಕ್ಷಿಕೋ ಯಸ್ಮಿನ್ನಿತಿ ಸಮಾಸಃ| ತೇನಾಸ್ಮಿನ್ ಯೋಗೇ ಷಷ್ಠೋ ವಟ್ಟಮಾಕ್ಷಿಕ ಇತ್ಯವತಿಷ್ಠತೇ| ಗೀತಿರಾರ್ಯಾ|

Adhikarana timiraghnaM cUrNA~jjanam (45) · Śloka 45

ರತ್ನಾನಿ ರೂಪ್ಯಂ ಸ್ಫಟಿಕಂ ಸುವರ್ಣಂ ಸ್ರೋತೋಞ್ಜನಂ ತಾಮ್ರಮಯಃ ಸಶಙ್ಖಮ್| ಕುಚನ್ದನಂ ಲೋಹಿತಗೈರಿಕಂ ಚ ಚೂರ್ಣಾಞ್ಜನಂ ಸರ್ವದೃಗಾಮಯಘ್ನಮ್||೪೫||

ಸ೦-ರತ್ನಾದಿಭಿಶ್ಚೂರ್ಣಾಞ್ಜನಮ್| ರತ್ನಾನ್ಯತ್ರ ವಜ್ರಮರಕತಾದೀನಿ ಯಥಾಲಾಭಂ ಗ್ರಾಹ್ಯಾಣಿ| ಲೋಹಿತಗೈರಿಕಂ-ಲೋಹಿತಂ ಗೈರಿಕಮ್, ಕೇಚಿತ್ತು ಲೋಹಿತಂ-ಕುಙ್ಕುಮಮಾಹುಃ| ಏತಚ್ಚೂರ್ಣಾಞ್ಜನಮಶೇಷದೃಷ್ಟಿರೋಗಹರಮ್| ಉಪಜಾತಿವೃತ್ತಮ್|

Adhikarana timiraghnaM tilatailAdinasyam (46) · Śloka 46

ತಿಲತೈಲಮಕ್ಷತೈಲಂ ಭೃಙ್ಗಸ್ವರಸೋಽಸನಾಚ್ಚ ನಿರ್ಯೂಹಃ| ಆಯಸಪಾತ್ರವಿಪಕ್ವಂ ಕರೋತಿ ದೃಷ್ಟೇರ್ಬಲಂ ನಸ್ಯಮ್||೪೬||

ಸ೦-ತಿಲತೈಲಮಕ್ಷತೈಲಂ ಚ ಸಮಾಂಶಂ ಮಾರ್ಕವಸ್ವರಸೋಽಸನಾಚ್ಚ ಕ್ವಾಥಶ್ಚೇತ್ಯಯಸಃ ಪಾತ್ರೇ ವಿಪಕ್ವಂ ದೃಷ್ಟೇರ್ಬಲಮೇತನ್ನಸ್ಯಂ ಕರೋತಿ| ಆರ್ಯಾ|

Adhikarana doShAnurodhena snehAdyupacAraH (47) · Śloka 47

ದೋಷಾನುರೋಧೇನ ಚ ನೈಕಶಸ್ತಂ ಸ್ನೇಹಾಸ್ರವಿಸ್ರವಣರೇಕನಸ್ಯೈಃ| ಉಪಾಚರೇದಞ್ಜನಮೂರ್ಧಬಸ್ತಿ- ಬಸ್ತಿಕ್ರಿಯಾತರ್ಪಣಲೇಪಸೇಕೈಃ||೪೭||

ಸ೦-ದೋಷವಶಾಚ್ಚ ಸ್ನೇಹಾದಿಭಿರ್ಮುಹುರ್ಮುಹುರೇನಂ-ನೇತ್ರರೋಗಿಣಮುಪಕ್ರಮೇತ್| ಮೂರ್ಧಬಸ್ತಿಃ-ಗಣ್ಡೂಷಾದಿವಿಧ್ಯುಕ್ತಃ (ಹೃ.ಸೂ.ಅ. ೨೨)| ಬಸ್ತಿಃಬಸ್ತಿವಿಧ್ಯುಕ್ತಃ (ಹೃ.ಸೂ.ಅ. ೧೯)| ಉಪಜಾತಿವೃತ್ತಮ್|

Adhikarana ataHparaM pratidoShaM sAdhanam (48) · Śloka 48

| ಸಾಮಾನ್ಯಂ ಸಾಧನಮಿದಮ್ ಪ್ರತಿದೋಷಮತಃ ಶೃಣು||೪೮||

ಸ೦-ಇದಂ-ಅನನ್ತರಾಭಿಹಿತಂ, ಸಾಮಾನ್ಯಂ ಚಿಕಿತ್ಸಿತಮ್ ಸಂ-ಅತಃ-ಅನನ್ತರಂ, ಪ್ರತಿದೋಷಂ ಸಾಧನಂ ಶೃಣು|

Adhikarana vAtaje timire dashamUlAdighRutam (49-50) · Śloka 50

ಕಿಂ ತತ್ ? ಇತ್ಯಾಹ ವಾತಜೇ ತಿಮಿರೇ ತತ್ರ ದಶಮೂಲಾಮ್ಭಸಾ ಘೃತಮ್| ಕ್ಷೀರೇ ಚತುರ್ಗುಣೇ ಶ್ರೇಷ್ಠಾಕಲ್ಕಪಕ್ವಂ ಪಿಬೇತ್ತತಃ||೪೯|| ತ್ರಿಫಲಾಪಞ್ಚಮೂಲಾನಾಂ ಕಷಾಯಂ ಕ್ಷೀರಸಂಯುತಮ್| ಏರಣ್ಡತೈಲಸಂಯುಕ್ತಂ ಯೋಜಯೇಚ್ಚ ವಿರೇಚನಮ್||೫೦||

ಸ೦-[ತತ್ರ-] ತೇಷು ತಿಮಿರಾದಿಷು ಮಧ್ಯೇ, ವಾತೋತ್ಥೇ ತಿಮಿರೇ ದಶಮೂಲಕ್ವಾಥೇನ ಘೃತಂ ಕ್ಷೀರೇ ಚತುರ್ಗುಣೇ ತ್ರಿಫಲಾಕಲ್ಕಪಕ್ವಂ ಪಿಬೇತ್| ಅನನ್ತರಂ ತ್ರಿಫಲಾಪಞ್ಚಮೂಲಾನಾಂ ಕ್ವಾಥಂ ಕ್ಷೀರೇಣ ಸಂಯುತಮೇರಣ್ಡತೈಲಾನ್ವಿತಂ ವಿರೇಚನಂ ಯೋಜಯೇತ್|

Adhikarana vAtaje timire triphalAdivirecanam (51-54) · Śloka 54

ಸಮೂಲಜಾಲಜೀವನ್ತೀತುಲಾಂ ದ್ರೋಣೇಽಮ್ಭಸಃ ಪಚೇತ್| ಅಷ್ಟಭಾಗಸ್ಥೈತೇ ತಸ್ಮಿಂಸ್ತೈಲಪ್ರಸ್ಥಂ ಪಯಃಸಮೇ||೫೧|| ಬಲಾತ್ರಿತಯಜೀವನ್ತೀವರೀಮೂಲೈಃ ಪಲೋನ್ಮಿತೈಃ| ಯಷ್ಟೀಪಲೈಶ್ಚತುರ್ಭಿಶ್ಚ ಲೋಹಪಾತ್ರೇ ವಿಪಾಚಯೇತ್||೫೨|| ಲೋಹ ಏವ ಸ್ಥಿತಂ ಮಾಸಂ ನಾವನಾದೂರ್ಧ್ವಜತ್ರುಜಾನ್| ವಾತಪಿತ್ತಾಯಮಯಾನ್ ಹನ್ತಿ ತದ್ವಿಶೇಷಾದ್ದೃಗಾಶ್ರಯಾನ್||೫೩|| ಕೇಶಾಸ್ಯಕನ್ಧರಾಸ್ಕನ್ಧಪುಷ್ಟಿಲಾವಣ್ಯಕಾನ್ತಿದಮ್| |೫೪|

ಸ೦-ಮೂಲಜಾಲಯುತಾಯಾ ಜೀವನ್ತ್ಯಾಃ ಪಲಶತಂ ಜಲದ್ರೋಣೇ ಪಚೇತ್| ತಸ್ಮಿನ್ ಜಲೇಽಷ್ಟಭಾಗಶೇಷೇ ಕ್ಷೀರತುಲ್ಯೇ ತೈಲಪ್ರಸ್ಥಂ ಬಲಾತ್ರಿತಯಾದಿಭಿಃ ಪಲೋನ್ಮಿತೈರ್ಮಧುಯಷ್ಟಿಕಾಪಲೈಶ್ಚತುರ್ಭಿರ್ಲೋಹಪಾತ್ರೇ ವಿಪಾಚಯೇತ್| ಲೋಹಭಾಣ್ಡ ಏವಂ ಮಾಸಂ ಸ್ಥಿತಂ ತನ್ನಸ್ಯೇನೋರ್ಧ್ವಜತ್ರುಜಾನ್ ರೋಗಾನ್ ಹನ್ತಿ| ವಿಶೇಷೇಣ ದೃಷ್ಟ್ಯಾಶ್ರಯಾನ್ ವಾತಪಿತ್ತರೋಗಾನ್ ಪರಾಕರೋತಿ| ಕೇಶಾದಿಷು ಪುಷ್ಟಿಲಾವಣ್ಯಕಾನ್ತಿಕರಮ್|

Adhikarana vAtaje timire jIvantItailanasyaM keshAsyAdikAntidaM ca (54-55) · Śloka 55

| ಸಿತೈರಣ್ಡಜಟಾಸಿಂಹೀಫಲದಾರುವಚಾನತೈಃ||೫೪|| ಘೋಷಯಾ ಬಿಲ್ವಮೂಲೈಶ್ಚ ತೈಲಂ ಪಕ್ವಂ ಪಯೋನ್ವಿತಮ್| ನಸ್ಯಂ ಸರ್ವೋರ್ಧ್ವಜತ್ರೂತ್ಥವಾತಶ್ಲೇಷ್ಮಾಮಯಾರ್ತಿಜಿತ್||೫೫||

ಸ೦-ಶುಕ್ಲೈರಣ್ಡಮೂಲಾದಿಭಿಸ್ತೈಲಂ ಸಕ್ಷೀರಂ ಪಕ್ವಂ ನಸ್ಯೇನ ಸರ್ವಜತ್ರೂರ್ಧ್ವರೋಗಾದಿಜಿತ್|

Adhikarana vAtaje timire sitairaNDAditailanasyam (56) · Śloka 56

ವಸಾಽಞ್ಜನೇ ಚ ವೈಯಾಘ್ರೀ ವಾರಾಹೀ ವಾ ಪ್ರಶಸ್ಯತೇ| ಗೃಧ್ರಾಹಿಕುಕ್ಕುಟೋತ್ಥಾ ವಾ ಮಧುಕೇನಾನ್ವಿತಾ ಪೃಥಕ್||೫೬||

ಸ೦-ವೈಯಾಘ್ರೀ ವಾರಾಹೀ ವಾ ವಸಾಽಞ್ಜನೇ ಶಸ್ಯತೇ| ಗೃಧ್ರಸರ್ಪಕುಕ್ಕುಟೋತ್ಥಾ ವಾ ವಸಾ ಪೃಥಙ್ ಮಧುಯಷ್ಟಿಕಾಯುತಾ ಶ್ರೇಷ್ಠಾ|

Adhikarana vAtaje timire vaiyAghryAdivasA~jjanam vAtaje timire sroto~jjanamM pratya~jjane (57) · Śloka 57

ಪ್ರತ್ಯಞ್ಜನೇ ಚ ಸ್ರೋತೋಜಂ ರಸಕ್ಷೀರಘೃತೇ ಕ್ರಮಾತ್| ನಿಷಿಕ್ತಂ ಪೂರ್ವವದ್ಯೋಜ್ಯಂ ತಿಮಿರಘ್ನಮನುತ್ತಮಮ್||೫೭||

ಸ೦-ಪ್ರತ್ಯಞ್ಜನೇ ಚ ಸ್ರೋತೋಞ್ಜನಂ ಮಾಂಸರಸಾದಿಷು ಕ್ರಮೇಣ ತಪ್ತಂ ತಪ್ತಂ ಸಪ್ತಕೃತ್ವಃ ನಿಷಿಕ್ತಂ ಪೂರ್ವವದ್ಯೋಜ್ಯಮ್| ಏತಚ್ಚ ಪರಂ ತಿಮಿರಹೃತ್|

Adhikarana vAtaje timire evaM timirAshAntau tarpaNam (58) · Śloka 58

ನ ಚೇದೇವಂ ಶಮಂ ಯಾತಿ ತತಸ್ತರ್ಪಣಮಾಚರೇತ್| |೫೮|

ಸ೦-ಯದ್ಯೇವಂ ತಿಮಿರಂ ನ ಶಾಮ್ಯೇತ್ ತತಸ್ತರ್ಪಣಮಾಚರೇತ್-ಕುರ್ಯಾತ್|

Adhikarana vAtaje timire shatAhvAdighRutamM tarpaNam (58-59) · Śloka 59

| ಶತಾಹ್ವಾಕುಷ್ಠನಲದಕಾಕೋಲೀದ್ವಯಷ್ಟಿಭಿಃ||೫೮|| ಪ್ರಪೌಣ್ಡರೀಕಸರಲಪಿಪ್ಪಲೀದೇವದಾರುಭಿಃ| ಸರ್ಪಿರಷ್ಟಗುಣಕ್ಷೀರಂ ಪಕ್ವಂ ತರ್ಪಣಮುತ್ತಮಮ್||೫೯||

ಸ೦-ಶತಪುಷ್ಪಾದಿಭಿರ್ಘೃತಮಷ್ಟಗುಣಕ್ಷೀರಂ ಪಕ್ವಂ ಶ್ರೇಷ್ಠಂ ತರ್ಪಣಮ್|

Adhikarana vAtaje timireaiNeyamedotejaH tarpaNam (60) · Śloka 60

ಮೇದಸಸ್ತದ್ವದೈಣೇಯಾದ್ದುಗ್ಧಸಿದ್ಧಾತ್ ಖಜಾಹತಾತ್| ಉದ್ಧೃತಂ ಸಾಧಿತಂ ತೇಜೋ ಮಧುಕೋಶೀರಚನ್ದನೈಃ||೬೦||

ಸ೦-ತಥೈವ ಕೃಷ್ಣಹರಿಣಾನ್ಮೇದಸೋ ದುಗ್ಧೇ ಸಿದ್ಧಾತ್ ಖಜೇನಾಲೋಡಿತಾತ್ ತೇಜ ಉದ್ಧೃತ್ಯ ಮಧಿಕೋಶೀರಚನ್ದನೈಃ ಸಹ ಪಕ್ವಂ ತರ್ಪಣಮುತ್ತಮಮ್|

Adhikarana vAtaje timire shvAvidAdivasA tarpaNam (61) · Śloka 61

ಶ್ವಾವಿಚ್ಛಲ್ಯಕಗೋಧಾನಾಂ ದಕ್ಷತಿತ್ತಿರಿಬರ್ಹಿಣಾಮ್| ಪೃಥಕ್ಪೃಥಗನೇನೈವ ವಿಧಿನಾ ಕಲ್ಪಯೇದ್ವಸಾಮ್||೬೧||

ಸ೦-ಶ್ವಾವಿದಾದೀನಾಂ ಪೃಥಗನೇನೈವ ವಿಧಿನಾ ವಸಾಂ ಕಲ್ಪಯೇತ್|

Adhikarana vAtaje timire puTapAkaH (62) · Śloka 62

ಪ್ರಸಾದನಂ ಸ್ನೇಹನಂ ಚ ಪುಟಪಾಕಂ ಪ್ರಯೋಜಯೇತ್| |೬೨|

ಸ೦-ಪುಟಪಾಕಂ ತು ಪ್ರಸಾದನಂ ಸ್ನೇಹನಂ ಚ-ತರ್ಪಣಪುಟಾಪಾಕವಿಧ್ಯುಕ್ತಂ (ಹೃ.ಸೂ.ಅ. ೨೪/೧೪-೧೬), ಪ್ರಯೋಜಯೇತ್|

Adhikarana vAtaje timire vAtapInasavannirUhAdi (62) · Śloka 62

| ವಾತಪೀನಸವಚ್ಚಾತ್ರ ನಿರೂಹಂ ಸಾನುವಾಸನಮ್||೬೨||

ಸ೦-ಅತ್ರ ಚ-ವಾತಜೇ ತಿಮಿರೇ, ವಾತಪೀನಸ ಇವ ನಿರೂಹಮನುವಾಸನಂ ಚ ಪ್ರಯೋಜಯೇತ್

Adhikarana pittaje timire jIvanIyAdighRutasnigdhasya sirAvyadhaH (63) · Śloka 63

ಪಿತ್ತಜೇ ತಿಮಿರೇ ಸರ್ಪಿರ್ಜೀವನೀಯಫಲತ್ರಯೈಃ| ವಿಪಾಚಿತಂ ಪಾಯಯಿತ್ವಾ ಸ್ನಿಗ್ಧಸ್ಯ ವ್ಯಧಯೇತ್ಸಿರಾಮ್||೬೩||

ಸ೦-ಪಿತ್ತಜೇ ತಿಮಿರೇ ಜೀವನೀಯೈಃ ಫಲತ್ರಿಕೇನ ಚ ಪಕ್ವಂ ಸರ್ಪಿಃ ಪಾಯಯಿತ್ವಾ ತತಃ ಸ್ನಿಗ್ಧಸ್ಯ ಸತಃ ಸಿರಾಂ ವ್ಯಧಯೇತ್|

Adhikarana pittaje timire sharkarAdivirecanam (64) · Śloka 64

ಶರ್ಕರೈಲಾತ್ರಿವೃಚ್ಚೂರ್ಣೈರ್ಮಧುಯುಕ್ತೈರ್ವಿರೇಚಯೇತ್| |೬೪|

ಸ೦-ಶರ್ಕರಾದಿಭಿಃ ಸಮಾಕ್ಷಿಕೈರ್ವಿರಚಯೇತ್|

Adhikarana pittaje timire netrAdiShu sishItAH sekalepAdayaH (64) · Śloka 64

| ಸುಶೀತಾನ್ ಸೇಕಲೇಪಾದೀನ್ ಯುಞ್ಜ್ಯಾನ್ನೇತ್ರಾಸ್ಯಮೂರ್ಧಸು||೬೪||

ಸ೦-ನೇತ್ರಾಸ್ಯಶಿರಃಸು ಚಾತಿಶಿಶಿರನ್ ಸೇಕಲೇಪಾದೀನ್ ಯುಞ್ಜ್ಯಾತ್|

Adhikarana pittaje timire sArivAdivartiH a~jjane (65-66) · Śloka 66

ಸಾರಿವಾಪದ್ಮಕೋಶೀರಮುಕ್ತಾಶಾಬರಚನ್ದನೈಃ| ವರ್ತಿಃ ಶಸ್ತಾಽಞ್ಜನೇ, ಚೂರ್ಣಸ್ತಥಾ ಪತ್ರೋತ್ಪಲಾಞ್ಜನೈಃ||೬೫|| ಸನಾಗಪುಷ್ಪಕರ್ಪೂರಯಷ್ಟ್ಯಾಹ್ವಸ್ವರ್ಣಗೈರಿಕೈಃ| ||೬೬||

ಸ೦-ಸಾರಿವಾದಿಭಿರ್ವರ್ತಿರಞ್ಜನೇ ಶಸ್ತಾ| ತಥಾ ಪತ್ರಾದಿಭಿಶ್ಚೂರ್ಣೋಽಞ್ಜನಂ ಶಸ್ತಮ್|

Adhikarana pittaje timire patrAdicUrNaH a~jjane (67) · Śloka 67

| ಸೌವೀರಾಞ್ಜನತುತ್ಥಕಶೃಙ್ಗೀಧಾತ್ರೀಫಲಸ್ಫಟಿಕಕರ್ಪೂತಮ್| ಪಞ್ಚಾಂಶಂ ಪಞ್ಚಾಂಶಂ ತ್ರ್ಯಂಶಮಥೈಕಾಂಶಮಞ್ಜನಂ ತಿಮಿರಘ್ನಮ್| |೬೭|

ಸ೦-ಸೌವೀರಾಞ್ಜನಾದಿಕಮಞ್ಜನಂ ಶಸ್ತಮ್| ಕಿಯತ್ಕಿಯತ್ಪ್ರಮಾಣಮ್ ? ಇತ್ಯಾಹ-ಪಞ್ಚಾಂಶಮಿತ್ಯಾದಿ| ತದೇವಂ ಪಞ್ಚ ಭಾಗಾಃ ಸೌವೀರಾಞ್ಜನಸ್ಯ, ಪಞ್ಚೈವ ತುತ್ಥಕಸ್ಯ, ಶೃಙ್ಗ್ಯಾಮಲಕಾನಾಂ ಭಾಗಾಸ್ತ್ರಯಃ, ಸ್ಫಟಿಕಕರ್ಪೂರಸ್ಯ ಭಾಗ ಏಕಃ, ಇತಿ ಸ್ಥಿತಮ್| ಏವಮೇತದಞ್ಜನಂ ತಿಮಿರಹೃತ್ ಕುರ್ಯಾತ್| ಗೀತಿರಾರ್ಯೇಯಮ್|

Adhikarana pittaje timire sauvIrA~jjanAdi a~jjane (67) · Śloka 67

| ನಸ್ಯಂ ಚಾಜ್ಯಂ ಶೃತಂ ಕ್ಷೀರಜೀವನೀಯಸಿತೋತ್ಪಲೈಃ||೬೭||

ಸ೦-ಕ್ಷೀರೇಣ ಚತುರ್ಗುಣೇನ ಜೀವನೀಯಾದಿಭಿರಾಜ್ಯಂ-ಘೃತಂ, ಪಕ್ವಂ ನಸ್ಯೇ ಶ್ರೇಷ್ಠಮ್|

Adhikarana pittaje timire jIvanIyAdighRutanasyam (68-69) · Śloka 69

ಶ್ಲೇಷ್ಮೋದ್ಭವೇಽಮೃತಾಕ್ವಾಥವರಾಕಣಶೃತಂ ಘೃತಮ್| ವಿಧ್ಯೇತ್ಸಿರಾಂ ಪೀತವತೋ ದದ್ಯಾಚ್ಚಾನು ವಿರೇಚನಮ್||೬೮|| ಕ್ವಾಥಂ ಪೂಗಾಭಯಾಶುಣ್ಠೀಕೃಷ್ಣಾಕುಮ್ಭನಿಕುಮ್ಭಜಮ್| |೬೯|

ಸ೦-ಶ್ಲೇಷ್ಮೋತ್ಥತಿಮಿರೇಽಮೃತಾದಿಭಿಃ ಪಕ್ವಂ ಘೃತಂ ಪೀತವತಃ ಸಿರಾಂ ವಿಧ್ಯೇತ್| ವಿರೇಚನಂ ಚ ಪೂಗಾದಿಭಿಃ ಕ್ವಾಥಂ ದದ್ಯಾತ್|

Adhikarana kaphaje timire amRutAdighRutam (69-70) · Śloka 70

| ಹ್ನೀಬೇರದಾರುದ್ವಿನಿಶಾಕೃಷ್ಣಾಕಲ್ಕೈಃ ಪಯೋನ್ವಿತೈಃ||೬೯|| ದ್ವಿಪಞ್ಚಮೂಲನಿರ್ಯೂಹೇ ತೈಲಂ ಪಕ್ವಂ ಚ ನಾವನಮ್| |೭೦|

ಸ೦-ಹ್ನೀಬೇರಾದಿಭಿಃ ಕಲ್ಕಿತೈಃ ಪಯೋನ್ವಿತರ್ದ್ವಿರ್ಪಞ್ಚಮೂಲಕ್ವಾಥೇ ತೈಲಂ ಪಕ್ವಂ ನಾವನಂ ಹಿತಮ್|

Adhikarana kaphaje timire pUgAdivirecanam (70-71) · Śloka 71

| ಶಙ್ಖಪ್ರಿಯಙ್ಗುನೇಪಾಲೀಕಟುತ್ರಿಕಫಲತ್ರಿಕೈಃ||೭೦|| ದೃಗ್ವೈಮಲ್ಯಾಯ ವಿಮಲಾ ವರ್ತಿಃ ಸ್ಯಾತ್| |೭೧|

ಸ೦-ಶಙ್ಖಾದಿಭಿರ್ದೃಗ್ವೈಮಲ್ಯಾಯ ವಿಮಲಾಖ್ಯೇಯಂ ವರ್ತಿರ್ಹಿತಾ ಸ್ಯಾತ್|

Adhikarana kaphaje timire hrIberAditailanasyam (71) · Śloka 71

ಕೋಕಿಲಾ ಪುನಃ| ಕೃಷ್ಣಲೋಹರಜೋವ್ಯೋಷಸೈನ್ಧವತ್ರಿಫಲಾಞ್ಜನೈಃ||೭೧||

ಸ೦-ಕೃಷ್ಣಲೋಹಾದಿಭಿಃ ಕೋಕಿಲಾಖ್ಯಾ ವರ್ತಿಃ|

Adhikarana kaphaje timire vimalA vartiH (72-73) · Śloka 73

ಶಶಗೋಖರಸಿಂಹೋಷ್ಟ್ರದ್ವಿಜಾ ಲಾಲಾಟಮಸ್ಥಿ ಚ| ಶ್ವೇತಗೋವಾಲಮರಿಚಶಙ್ಖಚನ್ದನಫೇನಕಮ್||೭೨|| ಪಿಷ್ಟಂ ಸ್ತನ್ಯಾಜದುಗ್ಧಾಭ್ಯಾಂ ವರ್ತಿಸ್ತಿಮಿಶುಕ್ರಜಿತ್| |೭೩|

ಸ೦-ಶಶಾದಿಜಾ ದ್ವಿಜಾಃ-ದನ್ತಾಃ, ಏಷಾಮೇವ ಲಾಲಾಟಂ-ಲಲಾಟೇ ಭವಮಸ್ಥಿ, ತಥಾ ಶ್ವೇತಗೋವಾಲಾದೀನಿ, ಸ್ತ್ರೀಕ್ಷೀರಚ್ಛಾಗದುಗ್ಧಾಭ್ಯಾಂ ಪಿಷ್ಟಾ ವರ್ತಿಸ್ತಿಮಿರಶುಕ್ರಹರೇತ್ಯರ್ಥಃ|

Adhikarana kaphaje timire kokilA vartiH (73) · Śloka 73

| ರಕ್ತಜೇ ಪಿತ್ತವತ್ಸಿದ್ಧಿಃ ಶೀತೈಶ್ಚಾಸ್ರಂ ಪ್ರಸಾದಯೇತ್||೭೩||

ಸ೦-ರಕ್ತಜೇ ತಿಮಿರೇ ಪಿತ್ತವದುಪಕ್ರಮಃ| [ಶೀತೈಃ-] ಶೀತವೀರ್ಯೈಃ ಶೀತಸ್ಪರ್ಶೈರನ್ನಪಾನೌಷಧಸೇಕಲೇಪಾದಿಭಿಶ್ಚ, ರಕ್ತಂ ಪ್ರಸಾದಯೇತ್|

Adhikarana kaphaje timire shashadvijAdivartiH (74) · Śloka 74

ದ್ರಾಕ್ಷಯಾ ನಲದರೋಧ್ರಯಷ್ಟಿಭಿಃ ಶಙ್ಖತಾಮ್ರಹಿಮಪದ್ಮಪದ್ಮಕೈಃ| ಸೋತ್ಪಲೈಶ್ಛಗಲದುಗ್ಧವರ್ತಿತೈ- ರಸ್ರಜಂ ತಿಮಿರಮಾಶು ನಶ್ಯತಿ||೭೪||

ಸ೦-ದ್ರಾಕ್ಷಾದಿಭಿಶ್ಛಾಗಲೀದುಗ್ಧಪಿಷ್ಟೈಃ ಶೀಘ್ರಂ ರಕ್ತೋತ್ಥಂ ತಿಮಿರಂ ನಶ್ಯತಿ|

Adhikarana raktaje timire pittavat (75) · Śloka 75

ಸಂಸರ್ಗಸನ್ನಿಪಾತೋತ್ಥೇ ಯಥಾದೋಷೋದಯಂ ಕ್ರಿಯಾ| |೭೫|

ಸ೦-ಸಂಸರ್ಗಜೇ ಸನ್ನಿಪಾತಜೇ ಚ ತಿಮಿರೇ ಯಥಾದೋಷೋದ್ರೇಕಂ ಚಿಕಿತ್ಸಿತಮ್|

Adhikarana raktaje timire shItaiH raktaprasAdanam (75-76) · Śloka 76

| ಸಿದ್ಧಂ ಮಧೂಕಕೃಮಿಜಿನ್ಮರಿಚಾಮರದಾರುಭಿಃ||೭೫|| ಸಕ್ಷೀರಂ ನಾವನಂ ತೈಲಂ ಪಿಷ್ಟೈರ್ಲೇಪೋ ಮುಖಸ್ಯ ಚ| |೭೬|

ಸ೦-ಮಧೂಕಾದಿಭಿಃ ಸಕ್ಷೀರಂ ತೈಲಂ ಸಿದ್ಧಂ ನಾವನಂ ಹಿತಮ್| ಮಧೂಕಾದಿಭಿರೇವ ಜಲೇನ ಪಿಷ್ಟೈರ್ಮುಖಲೇಪೋ ಹಿತಃ|

Adhikarana raktaje timire drAkShAdibheShajam (76-77) · Śloka 77

| ನತನೀಲೋತ್ಪಲಾನನ್ತಾಯಷ್ಟ್ಯಾಹ್ವಸುನಿಷಣ್ಣಕೈಃ||೭೬|| ಸಾಧಿತಂ ನಾವನೇ ತೈಲಂ ಶಿರೋಬಸ್ತೌ ಚ ಶಸ್ಯತೇ| |೭೭|

ಸ೦-ನತಾದಿಭಿಃ ಸಾಧಿತಂ ತೈಲಂ ನಾವನೇ ಶಿರೋಬಸ್ತೌ ಚ ಶಸ್ಯತೇ|

Adhikarana saMsargasannipAtaje yathAdoSham (77-78) · Śloka 78

| ದದ್ಯಾದುಶೀರನಿರ್ಯೂಹೇ ಚೂರ್ಣಿತಂ ಕಣಸೈನ್ಧವಮ್||೭೭|| ತತ್ಸ್ರುತಂ ಸಘೃತಂ ಭೂಯಃ ಪಚೇತ್ಕ್ಷೌದ್ರಂ ಘನೇ ಕ್ಷಿಪೇತ್| ಶೀತೇ ಚಾಸ್ಮಿನ್ ಹಿತಮಿದಂ ಸರ್ವಜೇ ತಿಮಿರೇಽಞ್ಜನಮ್||೭೮||

ಸ೦-ಉಶೀರಕ್ವಾಥೇ ಪಿಪ್ಪಲೀಸೈನ್ಧವಂ ರಜೀಕೃತಂ ದದ್ಯಾತ್| ತಚ್ಚ ಸ್ರುತಂ ಸತ್ ಘೃತಾನ್ವಿತಂ ಪುನಃ ಪಚೇತ್| ಘನೇ ಚಾಸ್ಮಿನ್ ಶೀತೇ ಚ ಕ್ಷೌದ್ರಂ ಕ್ಷಿಪೇತ್| ಏತತ್ ಸರ್ವೋತ್ಥೇ ತಿಮಿರೇ ಹಿತಮಞ್ಜನಮ್|

Adhikarana saMsargasannipAtaje madhUkAditailaM nasyam (79-81) · Śloka 81

ಅಸ್ಥೀನಿ ಮಜ್ಜಪೂರ್ಣಾನಿ ಸತ್ತ್ವಾನಾಂ ರಾತ್ರಿಚಾರಿಣಾಮ್| ಸ್ರೋತೋಜಾಞ್ಜನಯುಕ್ತಾನಿ ವಹತ್ಯಮ್ಭಸಿ ವಾಸಯೇತ್||೭೯|| ಮಾಸಂ ವಿಂಶತಿರಾತ್ರಂ ವಾ ತತಶ್ಚೋದ್ಧೃತ್ಯ ಶೋಷಯೇತ್| ಸಮೇಷಶೃಙ್ಗೀಪುಷ್ಪಾಣಿ ಸಯಷ್ಟ್ಯಾಹ್ವಾನಿ ತಾನ್ಯನು||೮೦|| ಚೂರ್ಣಿತಾನ್ಯಞ್ಜನಂ ಶ್ರೇಷ್ಠಂ ತಿಮಿರೇ ಸಾನ್ನಿಪಾತಿಕೇ| |೮೧|

ಸ೦-ರಾತ್ರಿಚಾರಿಣಾಂ ಪ್ರಾಣಿನಾಮಸ್ಥೀನಿ ಮಜ್ಜಪೂರ್ಣಾನಿ ಸ್ರೋತೋಞ್ಜನಯುಕ್ತಾನಿ ಜಲೇ ವಹತಿ ಮಾಸಂ ವಿಂಶತಿರ್ವಾ ನಿಶಾ ವಾಸಯೇತ್| ತತಃ-ಪಶ್ಚಾತ್, ಉದ್ಧೃತ್ಯ ಶೋಷಯೇತ್| ತನಿ ಚ ಮೇಷಶೃಙ್ಗೀಪುಷ್ಪೈರ್ಯುತಾನಿ ಮಧೂಕೇನ ಚ, ಚೂರ್ಣಿತಾನಿ ಸಾನ್ನಿಪಾತಿಕೇ ತಿಮಿರೇಽಞ್ಜನಂ ಶ್ರೇಷ್ಠಮ್|

Adhikarana saMsargasannipAtaje madhUkAdirmukhalepaH (81-82) · Śloka 82

| ಕಾಚೇಽಪ್ಯೇಷಾ ಕ್ರಿಯಾ ಮುಕ್ತ್ವಾ ಸಿರಾಂ, ಯನ್ತ್ರನಿಪೀಡಿತಾಃ||೮೧|| ಆನ್ಧ್ಯಾಯ ಸ್ಯುರ್ಮಲಾ ದದ್ಯಾತ್ಸ್ರಾವ್ಯೇ ತ್ವಸ್ರೇ ಜಲೌಕಸಃ| |೮೨|

ಸ೦-ಕಾಚೇಽಪ್ಯಯೇಷಾ-ಪೂರ್ವೋದಿತಾ ಕ್ರಿಯಾ, ಸಿರಾಂ ಹಿತ್ವಾ| ಸಿರಾಽಪಿ ಕಸ್ಮಾನ್ನಾನುಮೀಯತೇ ? ಇತ್ಯಾಹ-ಯನ್ತ್ರೇತ್ಯಾದಿ| ಸಿರೋಪಯೋಗಿಯನ್ತ್ರನಿಪೀಡಿತಾ ಮಲಾ ಆನ್ಧ್ಯಾಯ ಯತಃ ಸ್ಯುಃ| ಸ್ರಾವ್ಯೇ ತು ರಕ್ತೇ ಜಲೌಕಸೋ ದದ್ಯಾತ್|

Adhikarana saMsargasannipAtaje natAditailaM nasye shiro bastau ca (82-83) · Śloka 83

| ಗುಡಃ ಫೇನೋಽಞ್ಜನಂ ಕೃಷ್ಣಾ ಮರಿಚಂ ಕುಙ್ಕುಮಾದ್ರಜಃ||೮೨|| ರಸಕ್ರಿಯೇಯಂ ಸಕ್ಷೌದ್ರಾ ಕಾಚಯಾಪನಮಞ್ಜನಮ್| |೮೩|

ಸ೦-ಗುಡಾದಯೋ ರಸಕ್ರಿಯಾ ಕ್ಷೌದ್ರಾನ್ವಿತೇಯಂ ಕಾಚಯಾಪನಮಞ್ಜನಮ್|

Adhikarana nakulAndhe timiravidhiH (83) · Śloka 83

| ನಕುಲನ್ಧೇ ತ್ರಿದೋಷೋತ್ಥೇ ತೈಮಿರ್ಯವಿಹಿತೋ ವಿಧಿಃ||೮೩||

ಸ೦-ನಕುಲಾನ್ಧೇ ತ್ರಿದೋಷಜೇ ತಿಮಿರವಿಹಿತೋ ವಿಧಿಃ ಕಾರ್ಯಃ|

Adhikarana rAtryandhe tArkShyAdirasakriyA (84) · Śloka 84

ರಸಕ್ರಿಯಾ ಘೃತಕ್ಷೌದ್ರಗೋಮಯಸ್ವರಸದ್ರುತೈಃ| ತಾರ್ಕ್ಷ್ಯಗೈರಿಕತಾಲೀಸೈರ್ನಿಶಾನ್ಧೇ ಹಿತಮಞ್ಜನಮ್||೮೪||

ಸ೦-ಘೃತಾದಿದ್ರುತೈ ರಸಾಞ್ಜನಾದಿಭಿರ್ನಿಶಾನ್ಧೇ ರಸಕ್ರಿಯಾ ಹಿತಮಞ್ಜನಮ್|

Adhikarana rAtryandhe maricA~jjanam (85) · Śloka 85

ದಘ್ನಾ ವಿಘೃಷ್ಟಂ ಮರಿಚಂ ರಾತ್ರ್ಯನ್ಧೇಽಞ್ಜನಮುತ್ತಮಮ್| |೮೫|

ಸ೦-ದಧ್ನಾ ವಿಘೃಷ್ಟಂ ಮರಿಚಂ ರಾತ್ರ್ಯನ್ಧೇ ಶ್ರೇಷ್ಠಮಞ್ಜನಮ್|

Adhikarana rAtryandhe kauntyAdivartiH (85-86) · Śloka 86

| ಕರಞ್ಜಿಕೋತ್ಪಲಸ್ವರ್ಣಗೈರಿಕಾಮ್ಭೋಜಕೇಸರೈಃ||೮೫|| ಪಿಷ್ಟೈರ್ಗೋಮಯತೋಯೇನ ವರ್ತಿದೋಷಾನ್ಧನಾಶಿನೀ| |೮೬|

ಸ೦-ಕರಞ್ಜಿಕಾದಿಭಿರ್ಗೋಮಯರಸೇನ ಪಿಷ್ಟೈರ್ವರ್ತಿರ್ನಕ್ತಾನ್ಧ್ಯಹೃತ್|

Adhikarana rAtryandhe kAlAnusAryAdayo vartayaH (86-87) · Śloka 87

| ಅಜಾಮೂತ್ರೇಣ ವಾ ಕೌನ್ತೀಕೃಷ್ಣಾಸ್ರೋತೋಜಸೈನ್ಧವೈಃ||೮೬|| ಕಾಲಾನುಸಾರೀತ್ರಿಕಾತುತ್ರಿಫಲಾಲಮನಃಶಿಲಾಃ| ಸಫೇನಾಶ್ಛಾಗದುಗ್ಧೇನ ರಾತ್ರ್ಯನ್ಧೇ ವರ್ತಯೋ ಹಿತಾಃ||೮೭||

ಸ೦-ಅಜಾಮೂತ್ರೇಣ ಪಿಷ್ಟೈಃ ಕೌನ್ತ್ಯಾದಿಭಿರ್ವಾ ವರ್ತಿರ್ನಿಶಾನ್ಧ್ಯಘ್ನೀ| ಸಂ-ಕಾಲಾನುಸಾರ್ಯಾದಯೋಽಜಾಕ್ಷೀರೇಣ ಪಿಷ್ಟಾ ವರ್ತಯೋ ನಿಶಾನ್ಧೇ ಹಿತಾಃ|

Adhikarana rAtryandhe pippalya~jjanam (88) · Śloka 88

ಸನ್ನಿವೇಶ್ಯ ಯಕೃನ್ಮಧ್ಯೇ ಪಿಪ್ಪಲೀರದಹನ್ಪಚೇತ್| ತಾಃ ಶುಷ್ಕಾ ಮಧುನಾ ಘೃಷ್ಟಾ ನಿಶಾನ್ಧೇ ಶ್ರೇಷ್ಠಮಞ್ಜನಮ್||೮೮||

ಸ೦-ಪಿಪ್ಪಲೀರ್ಯಕೃನ್ಮಧ್ಯೇ ಸನ್ನಿವೇಶ್ಯಾದಹನ್ ಪಚೇತ್| ತತಃ ಪಿಪ್ಪಲ್ಯಃ ಶುಷ್ಕಾ ಮಧುಘೃಷ್ಟಾ ರಾತ್ರ್ಯನ್ಧೇ ಪರಮಞ್ಜನಮ್|

Adhikarana rAtryandhe mAhiShaplIhayakRudbhakShaNam (89) · Śloka 89

ಖಾದೇಚ್ಚ ಪ್ಲೀಹಯಕೃತೀ ಮಾಹಿಷೇ ತೈಲಸರ್ಪಿಷಾ| |೮೯|

ಸ೦-ಮಾಹಿಷೇ ಚ ಪ್ಲೀಹಯಕೃತೀ ತೈಲಸರ್ಪಿಷಾ ಸಹ ಭಕ್ಷಯೇತ್|

Adhikarana rAtryandhe jIvantyAdipallavabhakShaNam (89-90) · Śloka 90

| ಘೃತೇ ಸಿದ್ಧಾನಿ ಜೀವನ್ತ್ಯಾಃ ಪಲ್ಲವಾನಿ ಚ ಭಕ್ಷಯೇತ್||೮೯|| ತಥಾಽತಿಮುಕ್ತಕೈರಣ್ಡಾಶೋಫಾಲ್ಯಭೀರುಜಾನಿ ಚ| ಭೃಷ್ಟಂ ಘೃತಂ ಕುಮ್ಭಯೋನೇಃ ಪತ್ರೈಃ ಪಾನೇ ಚ ಪೂಜಿತಮ್||೯೦||

ಸ೦-ಜೀವನ್ತ್ಯಾಶ್ಚ ಪಲ್ಲವಾನಿ ಸರ್ಪಿಷಾ ಪಕ್ವಾನಿ ಭುಞ್ಜೀತ| ತಥಾ ಅತಿಮುಕ್ತಕಾದೀನಿ ಪತ್ರಾಣಿ ಘೃತಸಿದ್ಧಾನಿ ಖಾದೇತ್| ಅಗಸ್ತಿಪತ್ರೈಃ ಸರ್ಪಿಃ ಸಿದ್ಧಂ ಪಾನೇ ಚ ಪೂಜಿತಮ್|

Adhikarana dhUmarAmlapittoShNavidagdhAsu jIrNasarpirvirecanam shItalepashca (91) · Śloka 91

ಧೂಮರಾಖ್ಯಾಮ್ಲಪಿತ್ತೋಷ್ಣವಿದಾಹೇ ಜೀರ್ಣಸರ್ಪಿಷಾ| ಸ್ನಿಗ್ಧಂ ವೇರೇಚಯೇಚ್ಛೀತೈಃ ಶೀತೋರ್ದಿಹ್ಯಾಚ್ಚ ಸರ್ವತಃ||೯೧||

ಸ೦-ಅಮ್ಲಪಿತ್ತೋಷ್ಣೈರ್ವಿದಾಹೋ-ವಿದಗ್ಧತ್ವಂ, ಅಮ್ಲಪಿತ್ತೋಷ್ಣವಿದಾಹಃ| ಧೂಮರಾಖ್ಯಶ್ಚಾಮ್ಲಪಿತ್ತೋಷ್ಣವಿದಾಹಶ್ಚ ತಸ್ಮಿನ್| ತತ್ರ ಧೂಮರಾಖ್ಯಃ-"ಶೋಕಜ್ವರಾದಿ" (ಅ. ೧೨/೨೯) ಇತ್ಯಾದಿ ಲಕ್ಷಣಃ| "ಭೃಶಮಮ್ಲಾಶನಾತ್" (ಅ. ೧೨/೨೮) ಇತ್ಯಾದಿನಾಽಮ್ಲವಿದಗ್ಧಾ| "ಭವೇತ್ಪಿತ್ತವಿದಗ್ಧಾಖ್ಯಾ" (ಅ. ೧೨/೧೬) ಇತಿ ಪಿತ್ತವಿದಗ್ಧಾ| "ಉಷ್ಣತಪ್ತಸ್ಯ" (ಅ. ೧೨/೨೬) ಇತ್ಯಾದಿನಾ ಉಷ್ಣಾವಿದಗ್ಧೇತಿ| ತಸ್ಮಿನ್ ಧೂಮರಾಖ್ಯಾಮ್ಲಪಿತ್ತೋಷ್ಣವಿದಾಹೇಽತಿಪುರಾಣಸರ್ಪಿಷಾಽಭ್ಯಕ್ತಂ ಸ್ನಿಗ್ಧಂ ಶೀತೈರ್ವಿಶೋಧಯೇತ್| ಶೀತೈಶ್ಚ ಸರ್ವತೋ ಲೇಪಯೇತ್|

Adhikarana dhUmarAmlapittoShNavidagdhAsu goshakRudrasA~jjanam dhUmarAmlapittoShNavidagdhAsu svarNagairikAdirasakriyA (92) · Śloka 92

ಗೋಶಕೃದ್ರಸದುಗ್ಧಾಜ್ಯೈರ್ವಿಪಕ್ವಂ ಶಸ್ಯತೇಽಞ್ಜನಮ್| ಸ್ವರ್ಣಗೈರಿಕತಾಲೀಸಚೂರ್ಣಾವಾಪಾ ರಸಕ್ರಿಯಾ||೯೨||

ಸ೦-ಗೋಶಕೃದಾದಿಭಿರ್ವಪಕ್ವಮಞ್ಜನಂ ಶಸ್ಯತೇ| ಸ್ವರ್ಣಗೈರಿಕಾದೀನಾಂ ಚೂರ್ಣೈರಾವಾಪೋ ಯಸ್ಯಾಂ ಸಾ, ಏವಂವಿಧಾ ರಸಕ್ರಿಯಾ ವ ಶಸ್ಯತೇ|

Adhikarana dhUmarAmlapittoShNavidagdhAsu medAdighRutatailaM nasyam (93) · Śloka 93

ಮೇದಾಶಾಬರಕಾನನ್ತಾಮಞ್ಜಿಷ್ಠಾದಾರ್ವಿಯಷ್ಟಿಭಿಃ| ಕ್ಷೀರಾಷ್ಟಾಂಶಂ ಘೃತಂ ಪಕ್ವಂ ಸತೈಲಂ ನಾವನಂ ಹಿತಮ್||೯೩||

ಸ೦-ಮೇದಾದಿಭಿಃ ಕ್ಷೀರಾಷ್ಟಾಂಶಂ ಘೃತಂ ತೈಲಸಹಿತಂ ಪಕ್ವಂ ನಾವನಂ ಹಿತಮ್|

Adhikarana dhUmarAmlapittoShNavidagdhAsu kShIrasarpistarpaNam (94) · Śloka 94

ತರ್ಪಣಂ ಕ್ಷೀರಸರ್ಪಿಃ ಸ್ಯಾದಶಾಮ್ಯತಿ ಸಿರಾವ್ಯಧಃ| |೯೪|

ಸ೦-ಕ್ಷೀರೋದ್ಭವಮ್ ಸರ್ಪಿಸ್ತರ್ಪಣಂ ಹಿತಮ್| ಏವಮಶಾಮ್ಯತಿ ಸಿರಾವ್ಯಧಃ ಕಾರ್ಯಃ|

Adhikarana dhUmarAmlapittoShNavidagdhAsu evamashAntau sirAvyadhaH timirarogivadavalokane kAraNAni (94-96) · Śloka 96

| ಚಿನ್ತಾಭಿಘಾತಭೀಶೋಕರೌಕ್ಷ್ಯಾತ್ ಸೋತ್ಕಟಕಾಸನಾತ್||೯೪|| ವಿರೇಕನಸ್ಯವಮನಪುಟಪಾಕಾದಿವಿಭ್ರಮಾತ್| ವಿದಗ್ಧಾಹಾರವಮನಾತ್ ಕ್ಷುತ್ತೃಷ್ಣಾದಿವಿಧಾರಣಾತ್||೯೫|| ಅಕ್ಷಿರೋಗಾವಸಾನಾಚ್ಚ ಪಶ್ಯೇತ್ತಿಮಿರರೋಗಿವತ್| |೯೬|

ಸ೦-ಚಿನ್ತಾದಿಭಿರತಿಮಿರವಾನಪಿ ತಿಮಿರರೋಗೀವ ಪಶ್ಯೇತ್|

Adhikarana timirarogivadavalokane yathAdoShamauShadham (96) · Śloka 96

| ಯಥಾಸ್ವಂ ತತ್ರ ಯುಞ್ಜೀತ ದೋಷಾದೀನ್ ವೀಕ್ಷ್ಯ ಭೇಷಜಮ್||೯೬||

ಸ೦-[ ತತ್ರ- ] ತಸ್ಮಿಂಶ್ಚ ತಿಮಿರರೋಗಿಸದೃಶದರ್ಶನೇ, ಯಥಾಯೋಗಂ ದೋಷದೂಷ್ಯದೇಶಾದೀನ್ ವೀಕ್ಷ್ಯೌಷಧಂ ಪ್ರಯುಞ್ಜೀತ|

Adhikarana sUryo parAgAdyupahatekShaNe santarpaNam sUryo parAgAdyupahatekShaNe suvarNA~jjanam (97) · Śloka 97

ಸೂರ್ಯೋಪರಾಗಾನಲವಿದ್ಯುದಾದಿ- ವಿಲೋಕನೇನೋಪಹತೇಕ್ಷಣಸ್ಯ| ಸನ್ತರ್ಪಣಂ ಸ್ನಿಗ್ಧಹಿಮಾದಿ ಕಾರ್ಯಂ ತಥಾಞ್ಜನಂ ಹೇಮ ಘೃತೇನ ಘೃಷ್ಟಮ್||೯೭||

ಸ೦-ಸೂರ್ಯೋಪರಾಗಾದಿವಿಲೋಕನೇನೋಪಹತದರ್ಶನಸ್ಯ ಸ್ನಿಗ್ಧಹಿಮಾದಿ ಸನ್ತರ್ಪಣಂ ಕಾರ್ಯಮ್| ಆದಿಶಬ್ದೇನಾತಿಸೂಕ್ಷ್ಮಾತಿಭಾಸುರಾದಿಪರಿಗ್ರಹಃ| ಸುರ್ವಣಂ ಚ ಘೃತೇನ ಘೃಷ್ಟಮಞ್ಜನಂ ಹಿತಮ್| ಉಪಾಜಾತಿವೃತ್ತಮ್|

Adhikarana netrarakShaNaM sarvadA kartavyam (98) · Śloka 98

ಚಕ್ಷೂರಕ್ಷಾಯಾಂ ಸರ್ವಕಾಲಂ ಮನುಷ್ಯೈ- ರ್ಯತ್ನಃ ಕರ್ತವ್ಯೋ ಜೀವಿತೇ ಯಾವದಿಚ್ಛಾ| ವ್ಯರ್ಥೋ ಲೋಕೋಽಯಂ ತುಲ್ಯರಾತ್ರಿಂದಿವಾನಾಂ ಪುಂಸಾಮನ್ಧಾನಾಂ ವಿದ್ಯಮಾನೇಽಪಿ ವಿತ್ತೇ||೯೮||

ಸ೦-ನೇತ್ರರಕ್ಷಾಯಾಂ ಸದಾ ಯತ್ನೋ ವಿಧೇಯೋ ಯಾವಜ್ಜೀವಿತಾಭಿಲಾಷಿತ್ವಮ್| ಯಸ್ಮಾದನ್ಧಾನಾಂ ತುಲ್ಯರಾತ್ರಿಂದಿವಾನಾಂ ಪುಂಸಾಂ ವಿದ್ಯಮಾನೇಽಪಿ ಧನೇ ಲೋಕ ಏವ ನಿರರ್ಥಕಃ ಸ್ಯಾತ್| ರಾತ್ರಿಂದಿವಶಬ್ದೋಽತ್ರಾಚತುರಾದಿಸೂತ್ರೇ ನಿಪಾತಿತಃ| ವೈಶ್ವದೇವೀವೃತ್ತಮ್|

Adhikarana netrarakShaNakaraM triphalAdi (99) · Śloka 99

ತ್ರಿಫಲಾ ರುಧಿರಸ್ರುತಿರ್ವಿಶುದ್ಧಿ- ರ್ಮನಸೋ ನಿರ್ವೃತಿರಞ್ಜನಂ ಸನಸ್ಯಮ್| ಶಕುನಾಶನತಾ ಸಪಾದಪೂಜಾ ಘೃತಪಾನಂ ಚ ಸದೈವ ನೇತ್ರರಕ್ಷಾ||೯೯||

ಸ೦-ತ್ರಿಫಲಾದಿಕಂ ಸದೈವ-ಸರ್ವಕಾಲಂ, ನೇತ್ರರಕ್ಷಾ ಸ್ಯಾತ್|

Adhikarana netrarakShaNakaraM ahitAshananivRuttyAdi (13) · Śloka 13

ಅಹಿತಾದಶನಾತ್ಸದಾ ನಿವೃತ್ತಿ- ರ್ಭೃಶಭಾಸ್ವಚ್ಚಲಸೂಕ್ಷ್ಮವೀಕ್ಷಣಾಚ್ಚ| ಮುನಿನಾ ನಿಮಿನೋಪದಷ್ಟಮೇತತ್ ಪರಮಂ ರಕ್ಷಣಮೀಕ್ಷಣಸ್ಯ ಪುಂಸಾಮ್||೧೦೦|| ಇತಿ ಶ್ರೀವೈದ್ಯಪತಿಸಿಂಹಗುಪ್ತಸೂನುಶ್ರೀಮದ್ವಾಗ್ಭಟವಿರಚಿ- ತಾಯಾಮಷ್ಟಾಙ್ಗಹೃದಯಸಂಹಿತಾಯಾಂ ಷಷ್ಠೇ ಉತ್ತರ ಸ್ಥಾನೇ ತಿಮಿರಪ್ರತಿಷೇಧೋ ನಾಮ ತ್ರಯೋದಶೋಽಧ್ಯಾಯಃ||೧೩||

ಸ೦-ಅಹಿತಾದಾಹಾರಾತ್ ಸತತಂ ನಿವೃತ್ತಿಃ, ಅತಿಭಾಸುರಾದ್ಯಾಲೋಕನಾಚ್ಚೋಪರತಿಃ, ಇತ್ಯೇತನ್ನಿಮಿನಾಮ್ರಾ ಮುನಿನಾ ಪರಮಂ ನೃಣಾಂ ನಯನಸ್ಯ ರಕ್ಷಣಮುದಿತಮ್| ಔಪಚ್ಛನ್ದಸಿಕಂ(ಕೇ) ವೃತ್ತಮ್(ತ್ತೇ)| ಇತಿ ಶ್ರೀಮೃಗಾಙ್ಕದತ್ತಪುತ್ರಶ್ರೀಮದರುಣದತ್ತವಿರಚಿತಾಯಾಮಷ್ಟಾಙ್ಗಹೃದಯ- ಟೀಕಾಯಾಮ್ ಸರ್ವಾಙ್ಗಸುನ್ದರಾಖ್ಯಾಯಾಂ ಷಷ್ಠೇ ಉತ್ತರಸ್ಥಾನೇ ತಿಮಿರ- ಪ್ರತಿಷೇಧೋ ನಾಮ ತ್ರಯೋದಶೋಽಧ್ಯಾಯಃ ಸಮಾಪ್ತಃ|| ೧೩||