35. viṣapratiṣēdhādhyāyaḥ

Adhikarana adhyAyopakramaH · Śloka

অধুনা বিষতন্ত্রমুচ্যতে, সদ্যঃপ্রাণহারিত্বেন তুল্যসাধর্ম্যাত্|

Adhikarana viShapratiShedhAdhyAyaH (2) · Śloka 2

অথাতো বিষপ্রতিষেধং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)|২|

তত্র বিষস্য প্রাগুত্পত্তিদর্শনার্থমাহ-

Adhikarana viShayasya prAgutpattidarshanam (1-3) · Śloka 3

মথ্যমানে জলনিধাবমৃতার্থং সুরাসুরৈঃ| জাতঃ প্রাগমৃতোত্পত্তেঃ পুরুষো ঘোরদর্শনঃ||১|| দীপ্ততেজাশ্চতুর্দংষ্ট্রো হরিকেশোঽনলেক্ষণঃ| জগদ্বিষণ্ণং তং দৃষ্ট্বা তেনাসৌ বিষসংজ্ঞিতঃ||২|| হুংকৃতো ব্রহ্মণা মূর্তী ততঃ স্থাবরজঙ্গমে| সোঽধ্যতিষ্ঠন্নিজং রূপমুজ্ঝিত্বা বঞ্চনাত্মকম্||৩||

স০- সমুদ্রে সুরাসুরৈরমৃতার্থং বিলোড্যমানেঽমৃতোত্পত্তেঃ পূর্বং পুরুষো দারুণদৃষ্টিঃ সমিদ্ধধামা চতুর্দংষ্ট্রো হরিবর্ণকচো দহনতুল্যনেত্রো জাতঃ| তং পুরুষং দৃষ্ট্বা ভুবনং বিষাদং গতম্| অত এবাসৌ জগদ্বিষদনাত্ বিষসংজ্ঞঃ| ব্রহ্মণ হুংকৃতস্তু সন্নসৌ বঞ্চনস্বভাবং স্বং রূপং হিত্বা স্থাবরজঙ্গমাখ্যে মূর্তী অধিতস্থৌ| পুরুষরুপী তিষ্ঠেদসৌ ততো ব্রহ্মা শাপং দদ্যাত্|

Adhikarana sthAvaraM viShaM kandeShvativIryam (4) · Śloka 4

স্থিরমত্যুল্বণং বীর্যে যত্কন্দেষু প্রতিষ্ঠিতম্| কালকূটেন্দ্রবত্সাখ্যশৃঙ্গীহালাহলাদিকম্||৪||

স০-যদ্বিষং স্থিরং-স্থাবরং, কন্দেষু প্রতিষ্ঠিতং বীর্যে অত্যুল্বণং তত্ কালকূটাদিভেদভিন্নম্| ফলাদিষ্বপি তদ্ ভবতি, কিন্তু কন্দে বীর্যাতিকৃত্| আদিশব্দেন সঙ্গ্রহোক্তা ভেদা গৃহ্যন্তে| যথা (সং.উ. অ. ৪০)-"কালকূটং বত্সনাভং সাক্তুকং বালকং কর্দমকং বৈরাটং মুস্তকং শৃঙ্গী পুণ্ডরীকং মহাবিষং হালাহলং মর্কটকং কর্কটং কাশপুষ্পকমিন্দ্রাযুধং তথা তৈলম্|" ইতি (ত্যাদি) ভেদাঃ প্রকীর্তিতাঃ| এষাং তু লক্ষণং তত্রোক্তম্| তদহি বিস্তরতরগ্রন্থশঙ্কযা নোক্তম্|

Adhikarana ja~ggamaM viShaM sarpAdidaMShTrAsu dAruNam (5) · Śloka 5

সর্পলূতাদিদংষ্ট্রাসু দারুণং জঙ্গমং বিষম্| |৫|

স০- সর্পাদিদংষ্ট্রাসু তু যদ্ব্যবস্থিতং তজ্জঙ্গমম্| তচ্চ দারুণম্| দংষ্ট্রেত্যুপলক্ষণার্থম্, নখবিষাণমূত্রাদীনামপি পুরো বিষত্বেন বক্ষ্যমাণত্বাত্|

Adhikarana iti dviprakAramakRutrimaM viSham (5) · Śloka 5

| স্থাবরং জঙ্গমং চেতি বিষং প্রোক্তমকৃত্রিমম্||৫||

স০-স্থাবরং জঙ্গমং চেতি দ্বিপ্রকারং বিষমকৃত্রিমম্|

Adhikarana kRutrimaM tu garasaMj~jam kRutrimasya lakShaNam (6-7) · Śloka 7

কৃত্রিমং গরসংজ্ঞং তু ক্রিযতে বিবিধৌষধৈঃ| হন্তি যোগবশেনাশু চিরাচ্চিরতরাচ্চ তত্||৬|| শোফপাণ্ডূদরোন্মাদদুর্নামাদীন্ করোতি বা| |৭|

স০- গরসংজ্ঞং তু কৃত্রিমম্| যস্মাত্তত্ ক্রিযতে| অত এব বিবিধানি বক্ষ্যমাণান্যৌষধানি যস্মিংস্তদেবম্| তচ্চ যোগবশাচ্ছীঘ্রং হন্তি| তথা বিবিধযোগবশাচ্চিরাচ্চিরং হন্তি| শোফাদীংশ্চ বিধত্তে|

Adhikarana viShasya guNA ekAdasha (7-8) · Śloka 8

অথ বিষগুণান্নির্দিশতি | তীক্ষ্ণোষ্ণরূক্ষবিশদং ব্যবায্যাশুকরং লঘু||৭|| বিকাষি সূক্ষ্মমব্যক্তরসং বিষমপাকি চ| |৮|

স০- তত্সর্বং বিষং তীক্ষ্ণাদিগুণং স্যাত্| গুণনির্দেশনাদস্য রৌক্ষ্যাদ্বাতমুষ্ণত্বাত্ পিত্তং করোতীতি জ্ঞাপ্যতে| ননু, রৌক্ষ্যাদিভির্গুণৈর্বাযোঃ কোপো ন যুজ্যতে, রৌক্ষ্যাদীনাং গুণত্বাদ্বাযোশ্চ দ্রব্যত্বাত্| ব্রূমঃ| বাযোর্যে রৌক্ষ্যাদযো গুণাস্তেষামেব বিষস্থৈ রৌক্ষ্যাদিভির্গুণৈর্বৃদ্ধিঃ ক্রিযতে| তে চ বাযোরাত্মভূতাঃ, তন্নাশে বাযোর্নাশঃ স্যাত্, যথা তন্তুনাশে পটনাশঃ| তস্মাদ্যুক্তঃ পবনস্য রৌক্ষ্যাদিভির্গুণৈঃ প্রকোপঃ| এবং পিত্তেঽপি যোজ্যম্| কট্বম্লাদিকথনেঽপি বিষস্যাব্যক্তরসত্বম্, অনেকরসসম্ভবাদেকস্যাপি চ ব্যক্তস্যানুপলব্ধেঃ| ব্যবাযিত্বং চাস্য দ্রাগেবাখিলকাযস্য ব্যাপ্তেঃ| তথা অপাকি,-বিষস্য হি মন্ত্রতন্ত্রাভ্যামন্তরেণ পাকাভাবাত্, পক্বেঽপ্যন্নে বিষস্যাপক্বস্যেবোপলব্ধেঃ| অত এব শমিতমপি কিঞ্চিত্কারণং প্রাপ্য পুনঃ কুপ্যতি|

Adhikarana viShamojoviparItaguNam ,viShaM nRuNAM sadyojIvitaharam (8-9) · Śloka 9

| ওজসো বিপরীতং তত্ তীক্ষ্ণাদ্যৈরন্বিতং গুণৈঃ||৮|| বাতপিত্তোত্তরং নৃণাং সদ্যো হরতি জীবিতম্| |৯|

সং-তথা বিষমোজসো বিপরীতং তীক্ষ্ণাদিভির্দশভির্গুণৈর্যুক্তম্| তীক্ষ্ণাদ্যৈরন্বিতমিতি হেতৌ প্রথমা| তীক্ষ্ণাদিগুণযুক্তত্বাদোজসো বিপরীতমিত্যর্থঃ| তথা বাতপিত্তোতরং নরাণাং দ্রাগেব জীবিতং হরতি|

Adhikarana tara hetuH (9-10) · Śloka 10

কুতঃ ? ইত্যাহ | বিষং হি দেহং সম্প্রাপ্য প্রাগ্ দূষযতি শোণিতম্||৯|| কফপিত্তানিলাংশ্চানু সমং দোষান্ সহাশযান্| ততো হৃদযমাস্থায দেহোচ্ছেদায কল্পতে||১০||

স০- যস্মাদ্বিষং শরীরং প্রাপ্য পূর্বং রক্তং সর্বশরীরগতং দূষযতি, পশ্চাত্ কফপিত্তবাতানাশযসহিতান্ দূষযতি| অনন্তরং কফাদিভিঃ সমমেব হৃদযমাশ্রিত্য শরিরনাশায সম্পদ্যতে| ননু, বিষস্য তীক্ষ্ণাদিভির্গুণৈর্যুগপত্ ত্রিদোষকোপিত্বাদ্রক্তকোপিত্বাচ্চ পূর্বং শোণিতং দূষযতি পশ্চাত্রীন্ দোষানিতি যদুক্তং তদযুক্তিমদিব দৃশ্যতে| অত্র ভণামঃ বিষপ্রভাবেণ রক্তমাকৃষ্টং পূর্বং সহ তেন সংযুক্তং বিষেণ দূষ্যতে, ততো যুগপদেব দোষত্রযকোপঃ, ততো দোষৈঃ শোণিতেন সহ হৃদযং ব্যাপ্য সর্বস্রোতাংসি বদ্ধ্বা দেহোচ্ছেদায প্রবর্তত ইতি ন কিঞ্চিদত্রানুপপন্নম্|

Adhikarana sthAvaraviShasya prathamavegasya lakShaNam (11) · Śloka 11

স্থাবরস্যোপযুক্তস্য বেগে পূর্বে প্রজাযতে| জিহ্বাযাঃ শ্যাবতা স্তম্ভো মূর্চ্ছা ত্রাসঃ ক্লমো বমিঃ||১১||

স০-স্থাবরস্য বিষস্যোপযুক্তস্য প্রথমে বেগে রসনাশ্যাবতাদি জাযতে|

Adhikarana sthAvaraviShasya dvitIyavegasya lakShaNam (12) · Śloka 12

দ্বিতীযে বেপথুঃ স্বেদো দাহঃ কণ্ঠে চ বেদনা| বিষং চামাশযং প্রাপ্তং কুরুতে হৃদি বেদনাম্||১২||

স০- দ্বিতীযে বেগে বেপথ্বাদযঃ| বিষং চামাশযং প্রাপ্তং হৃদযে বেদনাং বিধত্তে|

Adhikarana sthAvaraviShasya tRutIyavegasya lakShaNam (13-14) · Śloka 14

তালুশোষস্তৃতীযে তু শূলং চামাশযে ভৃশম্| দুর্বলে হরিতে শূনে জাযেতে চাস্য লোচনে||১৩|| পক্বাশযগতে তোদহিধ্মাকাসান্ত্রকূজনম্| |১৪|

স০- তৃতীযে চ বেগে তালুশোষঃ আমাশযেঽতিরুজা স্যাত্| নেত্রে চাস্য দুর্বলাদিগুণে ভবতঃ| পক্বাশযগতে তোদাদযঃ স্যুঃ|

Adhikarana sthAvaraviShasya caturthavegasya lakShaNam (14) · Śloka 14

| চতুর্থে জাযতে বেগে শিরসশ্চাতিগৌরবম্||১৪||

স০- চতুর্থে বেগে মূর্ধ্নোঽতিগুরুত্বং জাযতে| চশব্দাত্ পূর্বোক্তা রসনাশযাবতাদযঃ স্যুঃ| এবমগ্রেঽপি চশব্দার্থো বোধ্যঃ|

Adhikarana sthAvaraviShasya pa~jcamavegasya lakShaNam (15) · Śloka 15

কফপ্রসেকো বৈবর্ণ্যং পর্বভেদশ্চ পঞ্চমে| সর্বদোষপ্রকোপশ্চ পক্বাধানে চ বেদনা||১৫||

স০- পঞ্চমে বেগে কফপ্রসেকাদিঃ| সর্বদোষাণাং প্রকোপঃ| পূর্বোক্তাশ্চ| পক্বাশযে ব্যথা চ|

Adhikarana sthAvaraviShasya ShaShThavegasya lakShaNam (16) · Śloka 16

ষষ্ঠে সংজ্ঞাপ্রণাশশ্চ সুভৃশং চাতিসার্যতে| |১৬|

স০- ষষ্ঠে বেগে চেতনাযাঃ প্রণাশোঽতিশযেনাতিসারশ্চ|

Adhikarana sthAvaraviShasya saptamavegasya lakShaNam (16) · Śloka 16

| স্কন্ধপৃষ্ঠকটীভঙ্গো ভবেন্মৃত্যুশ্চ সপ্তমে||১৬||

স০- সপ্তমে স্কন্ধাদিভঙ্গঃ, সপ্তানাং ধাতূনাং দূষণান্মৃত্যুশ্চ স্যাত্|

Adhikarana prathame viShavege vamanAdi (17) · Śloka 17

প্রথমে বিষবেগে তু বান্তং শীতাম্বুসেচিতম্| সর্পির্মধুভ্যাং সংযুক্তমগদং পাযযেদ্ দ্রুতম্||১৭||

স০- প্রথমে বিষবেগে তু কৃতবমনং শিশিরজলসেচিতং শীঘ্রমেবাগদং সঘৃতমাক্ষিকং পাযযেত্|

Adhikarana dvitIye viShavege vamanavirecanAdi (18) · Śloka 18

দ্বিতীযে পূর্ববদ্বান্তং বিরিক্তং চানু পাযযেত্| |১৮|

স০- দ্বিতীযে বিষবেগে পূর্ববত্-শীতাম্বুসেচিতং, বান্তং বিরিক্তং চানু-পশ্চাত্, অগদং পাযযেত্|

Adhikarana tRutIye viShavege agadapAnAdi (18) · Śloka 18

| তৃতীযেঽগদপানং তু হিতং নস্যং তথাঽঞ্জনম্||১৮||

স০- তৃতীযে বেগেঽগদপানং নস্যমঞ্জনং চ হিতম্|

Adhikarana caturthe viShavege sasnehAgadapAnam (19) · Śloka 19

চতুর্থে স্নেহসংযুক্তমগদং প্রতিযোজযেত্| |১৯|

স০- চতুর্থে বেগে স্নেহসংযুতমগদং প্রতিযোজযেত্|

Adhikarana pa~jcame viShavege samadhukakvAthAdi yukto~agadaH (19) · Śloka 19

| পঞ্চমে মধুকক্বাথমাক্ষিকাভ্যাং যুতং হিতম্||১৯||

স০- পঞ্চমে বেগে মধুযষ্টিকাক্বাথমাক্ষিকাভ্যাং যুক্তমগদং হিতম্|

Adhikarana ShaShThe viShavege atIsAravatsiddhiH (20) · Śloka 20

ষষ্ঠেঽতিসারবত্সিদ্ধিঃ| |২০|

স০- ষষ্ঠে বেগেঽতিসারতুল্যা চিকিত্সা|

Adhikarana saptame viShavege avapIDAdi (20) · Śloka 20

অবপীডস্তু সপ্তমে| মূর্ধ্নি কাকপদং কৃত্বা সাসৃগ্বা পিশিতং ক্ষিপেত্||২০||

স০- সপ্তমে বেগেঽবপীডো-রোগানুত্পাদনীযোক্তো (হৃ.সূ. অ. ৪/৬), দেযঃ| অথবা মস্তকে কাকপদং কৃত্বা সরক্তং পিশিতং ন্যসেত্|

Adhikarana vegAntare sarvaviShaghnI koshAtakyAdiyavAgUH (21-23) · Śloka 23

কোশাতক্যগ্নিকঃ পাঠা সূর্যবল্যমৃতাভযাঃ| শেলুঃ শিরীষঃ কিণীহী হরিদ্রে ক্ষৌদ্রসাহ্বযা||২১|| পুনর্নবে ত্রিকটুকং বৃহত্যৌ সারিবে বলা| এষাং যবাগূং নির্যুহে শীতাং সঘৃতমক্ষিকাম্||২২|| যুঞ্জ্যাদ্বেগান্তরে সর্ববিষঘ্নীং কৃতকর্মণঃ| |২৩|

স০- কোশাতক্যাদীনাং ক্বাথে যবাগূং সিদ্ধাং শীতাং সসর্পিষ্কমাক্ষিকাং যুঞ্জযাত্| সূর্যবল্লী-করবীরকাকারপুষ্পী| ক্ষৌদ্রসাহ্বযং-বটমাক্ষিকম্| বেগান্তরে-বেগমধ্যে, সর্ববিষঘ্নীম্| কৃতং কর্ম যস্য তস্যৈবং কার্যম্|

Adhikarana vegAntare sarva madhUkAdiyavAgUH (23) · Śloka 23

| তদ্বন্মধূকমধুকপদ্মকেসরচন্দনৈঃ||২৩||

স০- মধূকাদিক্বাথে পেযাং শীতাং সঘৃতমাক্ষিকাং যুঞ্জ্যাত্|

Adhikarana sarvaviSheShu candrodayo nAmAgadaH (24-32) · Śloka 32

অঞ্জনং তগরং কুষ্ঠং হরিতালং মনঃশিলা| ফলানী ত্রিকটু স্পৃক্কা নাগপুষ্পং সকেসরম্||২৪|| হরেণুর্মধুকং মাংসী রোচনা কাকমালিকা| শ্রীবেষ্টকং সর্জরসঃ শতাহ্বা কুঙ্কুমং বলা||২৫|| তমালপত্রতালীসভূর্জোশীরনিশাদ্বযম্| কন্যোপবাসিনী স্নাতা শুক্লবাসা মধুদ্রুতৈঃ||২৬|| দ্বিজানভ্যর্চ্য তৈঃ পুষ্যে কল্পযেদগদোত্তমম্| বৈদ্যশ্চাত্র তদা মন্ত্রং প্রযতাত্মা পঠেদিমম্||২৭|| "নমঃ পুরুষসিংহায নমো নারাযণায চ| যথাঽসৌ নাভিজানাতি রণে কৃষ্ণপরাজযম্||২৮|| এতেন সত্যবাক্যেন অগদো মে প্রসিধ্যতু| নমো বৈদূর্যমাতে হুলুহুলু রক্ষ মাং সর্ববিষেভ্যঃ||২৯|| গৌরি গান্ধারি চাণ্ডালি মাতঙ্গি স্বাহা| " পিষ্টে চ দ্বিতীযো মন্ত্রঃ "হরিমাযি স্বাহা||৩০|| " অশেষবিষবেতালগ্রহকার্মণপাপ্মসু| মরকব্যাধিদুর্ভিক্ষযুদ্ধাশনিভযেষু চ||৩১|| পাননস্যাঞ্জনালেপমণিবন্ধাদিযোজিতঃ| এষ চন্দ্রোদযো নাম শান্তিস্বস্ত্যযনং পরম্||৩২|| |বাসবো বৃত্রমবধীত্সমালিপ্তঃ কিলামুনা| ]||৩২||

স০- অঞ্জনাদীনি দ্রব্যাণি| কন্যা কৃতোপবাসা স্নাতাশুক্লবস্ত্রা তৈঃ-পূর্বোক্তৈর্দ্রব্যৈঃ, মাক্ষিকসিক্তৈঃ পুষ্যনক্ষত্রে বিপ্রান্ পূজযিত্বাঽনন্তরমগদবরমিমং কল্পযেত্| বৈদ্যশ্চ সমীপস্থো মন্ত্রং নম ইত্যাদিকং পঠেত্| পিষ্টে চাগদে দ্বিতীযো মন্ত্রো হরিমায্যাদিকোঽত্র যোজ্যঃ| নিখিলেষু বিষাদিষু পানাদিমণিবন্ধাদি যোজিতোঽযং চন্দ্রোদযো নামাগদঃ পরং শান্তং(ন্তি) স্বস্ত্যযনম্|

Adhikarana dUShIviShasya lakShaNam dUShIviShArtasya lakShaNam (33-36) · Śloka 36

জীর্ণং বিষঘ্নৌষধিভির্হতং বা দাবাগ্নিবাতাতপশোষিতং বা| স্বভাবতো বা ন গুণৈঃ সুযুক্তং দূষিবিষাখ্যাং বিষমভ্যুপৈতি||৩৩|| বীর্যাল্পভাবাদবিভাব্যমেতত্ কফাবৃতং বর্ষগণানুবন্ধি| তেনার্দিতো ভিন্নপুরীষবর্ণো দুষ্টাস্ররোগী তৃডরোচকার্তঃ||৩৪|| মূর্চ্ছন্ বমন্ গদ্গদবাক্ বিমুহ্যন্ ভবেচ্চ দূষ্যোদরলিঙ্গজুষ্টঃ| আমাশযস্থে কফবাতরোগী পক্বাশযস্থেঽনিলপিত্তরোগী||৩৫|| ভবেন্নরো ধ্বস্তশিরোরুহাঙ্গো বিলূনপক্ষঃ স যথা বিহঙ্গঃ| স্থিতং রসাদিষ্বথবা বিচিত্রান্ করোতি ধাতুপ্রভবান্ বিকারান্||৩৬||

স০- যদ্বিষং পুরাণং, বিষঘ্নৌষধিভির্বা হতবীর্যং, যদ্বা দাবাগ্নীত্যাদিভিঃ শোষিতং, স্বভবেনৈব বা গুণৈর্ন সুষ্ঠু যুক্তং, তদ্ দূষীবিষসংজ্ঞামুপৈতি| তথা বীর্যস্যাল্পত্বাদেতদবিভাব্যং-অলক্ষ্যম্| তথা কফেনাবৃতং বর্ষবৃন্দং চ তত্স্থাযি| তেন-দূষীবিষেণ, পীডিতো ভিন্নপুরীষবর্ণাদিকঃ স্যাত্| তথা মূর্চ্ছাং গচ্ছন্ বমন্নস্ফুটবাক্ তথা বিমুহ্যন্ তথা দূষ্যেনোপলক্ষিত উদরে যানি লিঙ্গানি (হৃংই. অ. ১২/২০), তৈঃ সেবিতশ্চ ভবেত্| আমাশযস্থে দূষীবিষে কফবাতরোগী স্যাত্ পক্বাশযস্থে দূষীবিষেঽনিলপিত্তরোগী স্যাত্| উপজাতযঃ| ধ্বস্তাঃ কচাঃ শরীরং চ যস্য স ধ্বস্তশিরোতুহাঙ্গো বিলূনপক্ষঃ পক্ষীব ভবেত্| রসাদিষু চ স্থিতং নানাবিধান্ ধাতুপ্রভবান্ বিকারান্ করোতি| উপেন্দ্রবজ্রাবৃত্তম্|

Adhikarana dUShIviShasya niruktiH (37) · Śloka 37

প্রাগ্বাতাজীর্ণশীতাভ্রদিবাস্বপ্নাহিতাশনৈঃ| দুষ্টং দূষযতে ধাতূনতো দূষীবিষং স্মৃতম্||৩৭||

স০-তচ্চ পুরোবাতাদিভির্দুষ্টং সদ্ধাতূন্ দূষযতি যতঃ, ততোঽপি হেতোর্দূষীবিষং স্মৃতম্|

Adhikarana dUShIviShArte svedaH shodhanaM ca (38) · Śloka 38

দূষীবিষার্তং সুস্বিন্নমূর্ধ্বং চাধশ্চ শোধিতম্| দূষীবিষারিমগধং লেহযেন্মধুনাঽঽপ্লুতম্||৩৮||

স০-দূষীবিষপীডিতং নরং সুস্বিন্নমূর্ধ্বমধস্তাচ্চ শোধিতং সন্তং দূষীবিষারি-বক্ষ্যমাণং, মাক্ষিকেণাপ্লুতমগদং লেহযেত্|

Adhikarana dUShIviShArte dUShIviShArirnAmAgadaH (39-40) · Śloka 40

তমেবাহ পিপ্পল্যো ধ্যামকং মাংসী রোধ্রমেলা সুবর্চিকা| কুটন্নটং নতং কুষ্ঠং যষ্টী চন্দনগৈরিকম্||৩৯|| দূষীবিষারির্নাম্নাঽযং ন চান্যত্রাপি বার্যতে| |৪০|

স০- পিপ্পল্যাদিকোঽযমগদো নাম্না দূষীবিষারিঃ| ন চান্যস্মিন্নপি বার্যতে| কিন্তু বিশেষেণ প্রযুজ্যতে|

Adhikarana viShaliptashastraviddhasya lakShaNam (40-44) · Śloka 44

| বিষদিগ্ধেন বিদ্ধস্তু প্রতাম্যতি মুহুর্মুহুঃ||৪০|| বিবর্ণভাবং ভজতে বিষাদং চাশু গচ্ছতি| কীটৈরিবাবৃতং চাস্য গাত্রং চিমিচিমাযতে||৪১|| শ্রোণিপৃষ্ঠশিরঃস্কন্ধসন্ধযঃ স্যুঃ সবেদনাঃ| কৃষ্ণদুষ্টাস্রবিস্রাবী তৃণ্মূর্চ্ছাজ্বরদাহবান্||৪২|| দৃষ্টিকালুষ্যবমথুশ্বাসকাসকরঃ ক্ষণাত্| আরক্তপীতপর্যন্তঃ শ্যাবমধ্যোঽতিরুগ্ব্রণঃ||৪৩|| শূযতে পচ্যতে সদ্যো গত্বা মাংসং চ কৃষ্ণতাম্| প্রক্লিন্নং শীর্যতেঽভীক্ষ্ণং সপিচ্ছিলপরিস্রবম্||৪৪||

স০-বিষদিগ্ধেন-বিষলিপ্তেন শস্ত্রেণ, বিদ্ধো নরঃ পুনঃপুনঃ প্রতাম্যতি| তথা বৈবর্ণ্যং প্রযাতি| দ্রাগেব বিষাদমেতি| অস্য চ-বিষদিগ্ধেন বিদ্ধস্য, শরীরং কীটৈরিব ব্যাপ্তং চিমিচিমাযতে| শ্রোণ্যাদযশ্চাস্য সরুজাঃ স্যুঃ কৃষ্ণং দুষ্টং চ রক্তং ক্ষরতি| তৃডাদিযুতঃ ক্ষণেনৈব চ দৃষ্টিকালুষ্যাদিকরঃ স্যাত্| তথা ব্রণ ঈষদ্রক্তপ্রযন্তঃ শ্যাবমধ্যো মহারুজঃ স্যাত্| তথা শূযতে পাকং যাতি| তেষাং সদ্য এব চ মাংসং কৃষ্ণতাং গত্বা প্রক্লিন্নং সদ্দীর্যতে নিত্যমেব পিচ্ছিলযুতং পরিস্রবং কুর্যাত্|

Adhikarana viShashastraviddhe hRudayAvaraNam, shalyAharaNapUrvakovraNadAhaH, muShkakAdikShAreNa pratisAraNam, shukanAsAdibhirlepaH (45-47) · Śloka 47

কুর্যাদমর্মবিদ্ধস্য হৃদযাবরণং দ্রুতম্| শল্যমাকৃষ্য তপ্তেন লোহেনানু দহেদ্ ব্রণম্||৪৫|| অথবা মুষ্ককশ্বেতাসোমত্বক্তাম্রবল্লিতঃ| শিরীষাদ্ গৃধ্রনখ্যাশ্চ ক্ষারেণ প্রতিসারযেত্||৪৬|| শুকনাসাপ্রতিবিষাব্যাঘ্রীমূলৈশ্চ লেপযেত্| |৪৭|

স০- অমর্মবিদ্ধস্য হৃদযাবরণং দ্রুতং বিদধীত| স০- শল্যমাকৃষ্য তপ্তেন লোহেন ব্রণং পশ্চাদ্দহেত্| অথবা মুষ্ককাদিক্ষারেণ প্রতিসারযেত্| শুকনাসাদিভিশ্চ লেপযেত্ ব্রণম্|

Adhikarana viSha kITadaShTacikitsA ca (47) · Śloka 47

| কীটদষ্টচিকিত্সাং চ কুর্যাত্তস্য যথার্হতঃ||৪৭||

স০-তস্য চ-দিগ্ধফলবিদ্ধস্য, কীটদষ্টচিকিত্সিতং যথাযোগং কুর্যাত্|

Adhikarana viSha vraNe pUtimAMse pittavisarpavatkriyA (48) · Śloka 48

ব্রণে তু পূতিপিশিতে ক্রিযা পিত্তবিসর্পবত্| |৪৮|

স০-ব্রণে চ পূতিমাংসে পিত্তবিসর্প ইব চিকিত্সা কার্যা|

Adhikarana garaviShadAyakAH (48-49) · Śloka 49

| সৌভাগ্যার্থং স্ত্রিযো ভর্ত্রে রাজ্ঞে বাঽরাতিচোদিতাঃ||৪৮|| গরমাহারসম্পৃক্তং যচ্ছন্ত্যাসন্নবর্তিনঃ| |৪৯|

সং-নানাকান্তাঃ যোষিতঃ পত্যে সৌভাগ্যার্থং রাজ্ঞশ্চ(রাজ্ঞে বা) নিকটবর্তিনো নরাশ্চারাতিপ্রেরিতা গরযুক্তং ভোজনং দদতি|

Adhikarana garasya lakShaNam (49-50) · Śloka 50

| নানাপ্রাণ্যঙ্গশমলবিরুদ্ধৌষধিভস্মনাম্||৪৯|| বিষাণাং চাল্পবীর্যাণাং যোগো গর ইতি স্মৃতঃ| |৫০|

স০-নানাপ্রকারপ্রাণ্যঙ্গশকৃতাং তথা বিরুদ্ধৌষধিভস্মনাং বিষাণাং চ স্তোকবীর্যাণাং যো যোগঃ, স গর ইতি স্মৃতঃ|

Adhikarana garArtasya lakShaNam (50-54) · Śloka 54

| তেন পাণ্ডুঃ কৃশোঽল্পাগ্নিঃ কাসশ্বাসজ্বরার্দিতঃ||৫০|| বাযুনা প্রতিলোমেন স্বপ্নচিন্তাপরাযণঃ| মহোদরযকৃত্প্লীহী দীনবাগ্দুর্বলোঽলসঃ||৫১|| শোফবান্ সততাধ্মাতঃ শুষ্কপাদকরঃ ক্ষযী| স্বপ্নে গোমাযুমার্জারনকুলব্যালবানরান্||৫২|| প্রাযঃ পশ্যতি শুষ্কাংশ্চ বনস্পতিজলাশযান্| মন্যতে কৃষ্ণমাত্মানং গৌরো, গোরং চ কালকঃ||৫৩|| বিকর্ণনাসানযনং পশ্যেত্তদ্বিহতেন্দ্রিযঃ| |৫৪|

স০- তেন গরেণ পাণ্ড্বাদিগুণঃ কাসাদিপীডিতশ্চ স্যাত্| বাতেন প্রতিলোমেন যুক্তস্তথা স্বপ্নচিন্তাপরঃ স্যাত্| তথা বৃহজ্জঠরযকৃত্প্লীহবান্ দীনবাগাদিগুণশ্চ স্যাত্| স্বপ্নে শৃগালাদীন্ পশ্যতি| প্রাযেণ শুষ্কবৃক্ষোদপানানি লোকতে| আত্মানং চ গৌরঃ সন্ কৃষ্ণং মন্যতে| কৃষ্ণশ্চ গৌরং মন্যতে| তেন-গরবিষেণ, বিহতেন্দ্রিযঃ সন্ বিকর্ণঘ্রাণচক্ষুষং পশ্যেত্|

Adhikarana garArtasya cikitsitAbhAve sadyo nAshaH (54-55) · Śloka 55

| এতৈরন্যৈশ্চ বহুভিঃ ক্লিষ্টো ঘোরৈরুপদ্রবৈঃ||৫৪|| গরার্তো নাশমাপ্নোতি কশ্চিত্সদ্যোঽচিকিত্সিতঃ| |৫৫|

স০-এতৈঃ-উক্তৈরুপদ্রবৈঃ, অপরৈশ্চানুক্তৈর্দারুণৈঃ ক্লিষ্টঃ সন্ গরপীডিতঃ কশ্চিদচিকিত্সিতঃ সদ্য এব নাশমশ্নুতে|

Adhikarana garArte vamanaM pathyapAnabhojanaM suvarNashIlanaM ca (55-56) · Śloka 56

| গরার্তো বান্তবান্ ভুক্ত্বা তত্পথ্যং পানভোজনম্||৫৫|| শুদ্ধহৃচ্ছীলযেদ্ধেম সূত্রস্থানবিধেঃ স্মরন্| |৫৬|

স০- গরাতুরঃ কৃতবমনঃ সন্ তত্-পূর্বোক্তং, পথ্যং পানভোজনং ভুক্ত্বা শুদ্ধহৃদযঃ সুবর্ণং শীলযেত্| কিং কুর্বন্ ? সূত্রস্থানোক্তবিধেঃ-"শুদ্ধে হৃদি ততঃ শাণং হেমচূর্ণস্য দাপযেত্|" (হৃ.সূ. অ. ৭/২৮) ইতি স্মরন্| বিধেঃ স্মরন্নিত্যত্র "অধীগর্থ-" ইত্যাদিনা বিধিশব্দাত্ কর্মণি ষষ্ঠী|

Adhikarana garArte tApyasuvarNalehaH (56-57) · Śloka 57

| শর্করাক্ষৌদ্রসংযুক্তং চূর্ণং তাপ্যসুবর্ণযোঃ||৫৬|| লেহঃ প্রশমযত্যুগ্রং সর্বযোগকৃতং বিষম্| |৫৭|

স০-মাক্ষীকধাতুকাঞ্চনযোশ্চূর্ণং শর্করামাক্ষিকান্বিতং লেহো দারুণং গরযোগজং বিষং হন্তি|

Adhikarana garArte hatAgnau mUrvAdicUrNam (57-58) · Śloka 58

| মূর্বামৃতানতকণাপটোলীচব্যচিত্রকান্||৫৭|| বচামুস্তবিডঙ্গানি তক্রকোষ্ণাম্বুমস্তুভিঃ| পিবেদ্রসেন বাঽম্লেন গরোপহতপাবকঃ||৫৮||

স০-মূর্বাদীনি তক্রাদিভিরম্লেন বা-বীজপূররসাদিরসেন, গরোপহতাগ্নিঃ পুমান্ পিবেত্|

Adhikarana garArte pArAvatAmiShAdishRutaM jalam (59) · Śloka 59

পারাবতামিষশঠীপুষ্করাহ্বশৃতং হিমম্| গরতৃষ্ণারুজাকাসশ্বাসহিধ্মাজ্বরাপহম্||৫৯||

স০- পারাবতামিষাদিভিঃ শৃতং শীতং জলং গরতৃষ্ণাদিঘ্নম্|

Adhikarana viShasa~gkaTasya lakShaNam (60) · Śloka 60

বিষপ্রকৃতিকালান্নদোষদূষ্যাদিসঙ্গমে| বিষসঙ্কটমুদ্দিষ্টং শতস্যৈকোঽত্র জীবতি||৬০||

স০-বিষপ্রকৃত্যাদিযোগে সতি বিষসঙ্কটং কথিতম্| [অত্র-] অস্মিংশ্চ বিষসঙ্কটে, বিষার্তঃ শতমধ্য একো জীবেত্| তত্র বিষপ্রকৃতিঃ-পিত্তপ্রকৃতিঃ| কালো-বর্ষাঃ| বিষান্নং-সর্ষপাদি| বিষদোষঃ-পিত্তম্| দূষ্যং-রক্তম্| আদিশব্দেন সাত্ম্যাদীনাং গ্রহণম্|

Adhikarana viShavRuddhihetavaH kShudhAdayaH (61-63) · Śloka 63

ক্ষুত্তৃষ্ণাঘর্মদৌর্বল্যক্রোধশোকভযশ্রমৈঃ| অজীর্ণবর্চোদ্রবতাপিত্তমারুতবৃদ্ধিভিঃ||৬১|| তিলপুষ্পফলাঘ্রাণভূবাষ্পঘনগর্জিতৈঃ| হস্তিমূষিকবাদিত্রনিঃস্বনৈর্বিষসঙ্কটৈঃ||৬২|| পুরোবাতোত্পলামোদমদনৈর্বর্ধতে বিষম্| |৬৩|

স০- ক্ষুধাদিভির্বিষং বৃদ্ধিমেতি|

Adhikarana varShAsu viShavRuddheH kAraNam,sharadi viShasya mandavIryatve hetuH (63-64) · Śloka 64

| বর্ষাসু চাম্বুযোনিত্বাত্সংক্লেদং গুডবদ্গতম্||৬৩|| বিসর্পতি ঘনাপাযে, তদগস্ত্যো হিনস্তি চ| প্রযাতি মন্দবীর্যত্বং বিষং তস্মাদ্ধনাত্যযে||৬৪||

স০- প্রাবৃষি চ জলপ্রভবত্বাদ্বিষং সংক্লেদং গুডবদ্ যাতি| বিসর্পতি-প্রসরতি, ঘনাপাযে-বিগতবর্ষাসমযে| তত্-বিষং, অগস্ত্যো হিনস্তি-অল্পশক্তি করোতি| তস্মাদ্ঘনাত্যযে-শরত্সমযে, মন্দবীর্যত্বং প্রযাতি|

Adhikarana iti prakRutyAdyAlocya karmAcaraNam (65) · Śloka 65

ইতি প্রকৃতিসাত্ম্যর্তুস্থানবেগবলাবলম্| অলোচ্য নিপুণং বুদ্ধ্যা কর্মানন্তরমাচরেত্||৬৫||

স০-ইতি-এবং পূর্বোক্তেন প্রকারেণ, প্রকৃত্যাদিকং বুদ্ধ্বা-যত্নেন নিরূপ্য, ততঃ কর্ম কুর্যাত্|

Adhikarana shlaiShmike viShe vamanAdibhiH shamanam (66) · Śloka 66

শ্লৈষ্মিকং বমনৈরুষ্ণরূক্ষতীক্ষ্ণৈঃ প্রলেপনৈঃ| কষাযকটুতিক্তৈশ্চ ভোজনৈঃ শমযেদ্বিষম্||৬৬||

স০-শ্লৈষ্মিকং বিষং বমনৈরুষ্ণাদিগুণৈঃ প্রলেপৈশ্চেদ্দশৈর্ভোজনৈশ্চ কষাযাদিগুণৈঃ শান্তিং নযেত্|

Adhikarana paittike viShe virecanAdibhiH shamanam (67) · Śloka 67

পৈত্তিকং স্রংসনৈঃ সেকপ্রদেহৈর্ভৃশশীতলৈঃ| কষাযতিক্তমধুরৈর্ঘৃতযুক্তৈশ্চ ভোজনৈঃ||৬৭||

স০-পৈত্তিকং বিষং বিরেচনৈস্তথাঽতিশীতলৈঃ সেকৈঃ প্রলেপৈশ্চ তথা ভোজনৈঃ কষাযতিক্তমধুরৈরাজ্যযুতৈশ্চ শমযেত্|

Adhikarana vAtike viShe svAdvAdyAhArAdibhiH shamanam (68) · Śloka 68

বাতাত্মকং জযেত্স্বাদুস্নিগ্ধাম্ললবণান্বিতৈঃ| সঘৃতৈর্ভোজনৈর্লেপৈস্তথৈব পিশিতাশনৈঃ||৬৮||

স০-বাতিকং মধুরাদিযুক্তৈঃ সসর্পিষ্কৈর্ভোজনৈর্লেপৈর্মাংসভোজনৈশ্চ জযেত্|

Adhikarana sarvaviSheShu sarvAvastheShu ghRutatulyaM bheShajaM nAsti visheShAt vAte~adhike (69-70) · Śloka 70

নাঘৃতং স্রংসনং শস্তং প্রলেপো ভোজ্যমৌষধম্| সর্বেষু সর্বাবস্থেষু বিষেষু ন ঘৃতোপমম্||৬৯|| বিদ্যতে ভেষজং কিঞ্চিদ্বিশেষাত্ প্রবলেঽনিলে| |৭০|

স০- বিষে স্রংসনং-বিরেচনং, প্রলেপো বা ভোজ্যমৌষধং বা নাঘৃতং শস্তম্| কিং তর্হি ? সর্বমেব তত্ সঘৃতং শস্তম্| স০- সর্বেষু বিষেষু সর্বাবস্থেষু চ ঘৃততুল্যং নান্যদৌষধং কিমপ্যস্তি| বিশেষেণ চ বাতেঽতিরিক্তে|

Adhikarana kaphapittavAtagataviShANAM sAdhyAsAdhyatvam (35) · Śloka 35

| অযত্নাচ্ছ্লেষ্মগং সাধ্যং, যত্নাত্ পিত্তাশযাশ্রযম্||৭০|| সুদুঃসাধ্যমসাধ্যং বা বাতাশযগতং বিষম্| ৭০ ১/২| ইতি শ্রীবৈদ্যপতিসিংহগুপ্তসূনুশ্রীবদ্বাগ্ভটবিরচি- তাযামষ্টাঙ্গহৃদযসংহিতাযাং ষষ্ঠে উত্তরস্থানে বিষপ্রতিষেধো নাম পঞ্চত্রিংশোঽধ্যাযঃ||৩৫||

স০- কফগতং বিষমল্পযত্নেন সাধ্যম্| পিত্তাশযাশ্রযং যত্নেন সাধ্যম্| বাতাশযাশ্রিতং সুষ্ঠু দুঃখেন সাধ্যতেঽসাধ্যং বা স্যাদিতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটী- কাযাং সর্বাঙ্গসুন্দরাখ্যাযাং ষষ্ঠে উত্তরস্থানে বিষপ্রতিষেধো নাম পঞ্চত্রিংশোঽধ্যাযঃ সমাপ্তঃ|| ৩৫||