6. madātyayādinidānam

Adhikarana atha madAtyayanidAnaM nAma ShaShTho~adhyAyaH | pratij~jA (1) · Śloka 1

অথাতো মদাত্যযনিদানংনামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

বাতকফোহেতুসামান্যাদ্ধাতুশোষণসামান্যাচ্চ রাজযক্ষ্মানন্তরং মদাত্যযাদিনির্ণযাধ্যাযারম্ভঃ| মদেনাত্যযো মদাত্যযঃ| মদহেতুকো ব্যাধিরিত্যর্থঃ| মদো নাম চিত্তধাতুবিকারঃ| স চ মদকার্য্যম্| মদ্যং চ যথাকারণতাং তত্র প্রতিপদ্যতে তথা তীক্ষ্ণ ইত্যাদিনা দর্শযতি|| ১||

Adhikarana madyaujasorguNAH (2) · Śloka 2

তীক্ষ্ণোষ্ণরূক্ষাসূক্ষ্মমাম্লং ব্যবায্যাশুকরং লঘু| বিকাশি বিশদং মদ্যমোজসোঽস্মাদ্বিপর্যযঃ||২||

তীক্ষ্ণাদিগুণদশকসংযুক্তং মদ্যম্| তেনাস্মান্ মদ্যাত্তীক্ষ্ণাদিগুণবিপরীতমন্দাদিগুণদশকসংযুক্তস্যৌজসৌ বিপর্য্যয এব||২||

Adhikarana madyatulyatve~api viShasya mArakatve hetuH (3) · Śloka 3

তীক্ষ্ণাদযো বিষেঽপ্যুক্তাশ্চিত্তোপপ্লাবিনো গুণাঃ| জীবিতান্তায জাযন্তে বিষে তূত্কর্ষবৃত্তিতঃ||৩||

তীক্ষ্ণাদযো গুণা বিষেঽপ্যুক্তাঃ| তত্রস্থাশ্চ তে জীবিতান্তায জাযন্তে| তত্র তেষামুত্কর্ষবৃত্তিহেতুঃ| অনেনৈতত্কথযতি-বিষং মদ্যং সমমেবৌজসো বিপরীতমিতি|| ৩||

Adhikarana prathamamadaH (4) · Śloka 4

তীক্ষ্ণাদিভির্গুণৈর্মদ্যং মন্দাদীনোজসো গুণান্| দশভির্দশসংক্ষোভ্য চেতো নযতি বিক্রিযাম্| আদ্যে মদ্যে...............................||৪||

অত এব মদ্যং তীক্ষ্ণাদিগুণমোজসোঃ মন্দাদিগুণম্; অতো বিপর্য্যযান্মদ্যং সেবিতং তীক্ষ্ণাদিভীঃ সর্বৈর্দশভির্গুণৈরোজসো মন্দাদীন্ দশাপি গুণান্ বিক্ষোভ্য চেতোবিক্রিযাং নযতি| অযমাদ্যো মদঃ|| ৪||

Adhikarana dvitIyamadaH (5) · Śloka 5

...............দ্বিতীযে তু প্রমাদাযতনে স্থিতঃ| দুর্বিকল্পহতো মূঢঃ সুখমিত্যববুধ্যতে||৫||

ততো মদ্যস্যাঽতিপানেন দ্বিতীযো মদো ভবতি| যস্মিন্ প্রমাদাযতনে প্রমাদকরণভূতে স্থিতঃ পুরুষো দুর্বিকল্পহতঃ সন্ মূঢস্তদেব সুখমিত্যববুধ্যতে|| ৫||

Adhikarana tRutIyamadaH (6) · Śloka 6

মধ্যমোত্তমযোঃ সন্ধিং প্রাপ্য রাজসতামসঃ| নিরঙ্কুশ ইব ব্যালো ন কিঞ্চিন্নাচরেজ্জডঃ||৬||

ততোঽপি তৃতীযো মদো ভবতি| যস্য দ্বিতীযেন তথাবিধঃ সন্ধির্ভবতি| যং সন্ধিং রজস্তমোভ্যাং যুক্তঃ সন্ পুরুষো নিরঙ্কুশ ইব ব্যালো ন কিঞ্চিন্নাচরেজ্জডঃ| নিরঙ্কুশঃ স্বতন্ত্রবৃত্তিঃ ব্যালো দুষ্টগজঃ|| ৬||

Adhikarana tRutIyamadanindA (7) · Śloka 7

ইযং ভূমিরবদ্যানাং দৌশ্শীল্যস্যেদমাস্পদম্| একোঽযং বহুমার্গাযা দুর্গতের্দেশিকঃ পরম্||৭||

অবদ্যানাং দোষাণামিযং ভূমিঃ| যো মধ্যমোত্তমযোঃ সন্দিগ্ধঃ| দেশিকঃ উপদেষ্টা|| ৭||

Adhikarana sampUrNasya tRutIyamadasya lakShaNam (8) · Śloka 8

নিশ্চেষ্টঃ শববচ্ছেতে তৃতীযে তু মদে স্থিতঃ| মরণাদপি পাপাত্মা গতঃ পাপতরাং দশাম্||৮||

যদা তু তৃতীযং মদং সম্পূর্ণং প্রাপ্নোতি তদা সঃ পাপান্মরণাদপি পাপতরাং দশামবস্থাং গতো নিশ্চেষ্টঃ সন্ শববচ্ছেতে| এতদেবাঽন্তরোক্তং মদত্রযলক্ষণম্|| ৮||

Adhikarana madyAsaktAvasthA (9) · Śloka 9

ধর্মাধর্মং সুখং দুঃখমর্থানর্থং হিতাহিতম্| যদাঽস্ক্তো ন জানাতি কথং তচ্ছীলযেদ্বুধঃ||৯||

তচ্চ মদ্যং বুধঃ শীলযিতুং নার্হতি| যস্মিন্নাঽসক্তে ধর্মাধর্মাদিকং দৃষ্টফলং ন জানাতি| তন্মদ্যং কথং বুধঃ শীলযেত্||৯||

Adhikarana madyapAne doShAH (10) · Śloka 10

মদ্যে মোহো ভযং শোকঃ ক্রোধো মৃত্যুশ্চ সংশ্রিতাঃ| সোন্মাদমদমূর্চ্ছাযাঃ সাঽপস্মারাপতানকাঃ||১০||

মদ্যে নিত্যং মোহাদযঃ সংশ্রিতাঃ তত্কারণত্বাত্ অপতানকো বাতব্যাধৌ বক্ষ্যতে|| ১০||

Adhikarana madyasyA~asAdhutvam (11) · Śloka 11

যত্রৈকঃ স্মৃতিবিভ্রংশস্তত্র সর্বমসাধু যত্| অযুক্তিযুক্তমন্নং হি ব্যাধযে মরণায বা| মদ্যং ত্রিবর্গধীধৈর্যলজ্জাদেরপি নাশনম্||১১||

অথবা কিং মোহাদিভিরুক্তৈর্যত্রৈকঃ স্মৃতিবিভ্রংশস্তত্র যদসাধু তত্সর্বং স্থিতমেব| তচ্চ মদ্যমযুক্ত্যাযুক্তং সুতরামসাধু| তথা চান্নমযুক্তিযুক্তং ব্যাধযে ভবতি| অথবা মরণায ভবতি| এতন্ন কদাচিদদৃষ্টক্ষত্যৈ| মদ্যং পুনরযুক্তিযুক্তং ত্রিবর্গাদিনাশনেঽপি পর্য্যাপ্তং ভবতি| ধীর্বস্তুগ্রহণশক্তিঃ| ধৈর্য্যং মনসঃ স্থিরত্বম্| আদিগ্রহণেনান্যেষাং শ্লাঘ্যানাং গুণানাং গ্রহণম্|| ১১||

Adhikarana balyAdayo madyena nAtimAdyanti (12) · Śloka 12

নাঽতিমাদ্যন্তি বলিনঃ কৃতাহারা মহাশনাঃ| স্নিগ্ধাঃ সত্ববযোযুক্তা মদ্যনিত্যাস্তদন্বযাঃ| মেদঃ কফাধিকা মন্দবাতপিত্তাঃ দৃঢাগ্নযঃ||১২||

তচ্চ মদ্যং ন সর্বত্র দোষাবহত্বেন সম্ভবতি| যতো বল্যাদযো বহুনাপি মদ্যেন নাঽতিমাদ্যন্তি| তদন্বযাঃ মদ্যকুলোত্পন্নাঃ||১২||

Adhikarana durbalAH amlamadyAdinA cAdimAdyanti (13) · Śloka 13

বিপর্যযেঽতিমাদ্যন্তি বিস্ত্রব্ধাঃ কুপিতাশ্চ যে| মদ্যেন চাম্লরূক্ষেণ সাঽজীর্ণে বহুনাতি চ||১৩||

তত্স্বরূপবিপর্য্যযে চাঽতিমাদ্যন্তি| তথা বিস্ত্রব্ধাঃ সুবিশ্বস্তাঃ তথা কুপিতাশ্চ যে অম্লরূক্ষেণ চ মদ্যেন সর্ব এবাতিমাদ্যন্তি| ইতি সম্বন্ধঃ| তথা সাঽজীর্ণে পীতেনাপি| বহুনা চ পীতেন||১৩||

Adhikarana madAtyayaprabhedAH (14) · Śloka 14

বাতাত্পিত্তাত্কফাত্সর্বৈশ্চত্বারঃ স্যুর্মদাত্যযাঃ| সর্বেঽপি সর্বৈর্জাযন্তে ব্যপদেশস্তু ভূযসা||১৪||

বাতাদিভিঃ সন্নিপাতেন চ চত্বারো মদাত্যযাঃ স্যুঃ| সর্বেষামপি ত্রিদোষজত্বে ভূযসা ব্যপদেশঃ|| ১৪||

Adhikarana madAtyayasAmAnyalakShaNam (15) · Śloka 15

সামান্যং লক্ষণং তেষাং প্রমেহা হৃদযব্যথা| বিড্ভেদঃ সততং তৃষ্ণা সৌম্যাগ্নেযা জ্বরোঽরুচিঃ| শিরঃ পার্শ্বাস্থিক্কম্পো মর্মভেদস্ত্রিকগ্রহঃ| জ্বরো বিবন্ধস্তিমিরং কাসশ্বাসপ্রজাগরাঃ| স্বেদোঽতিমাত্রং বিষ্টম্ভঃ শ্বযথুশ্চিত্তবিভ্রমঃ| প্রলাপশ্ছর্দিরুত্ক্লেশো ভ্রমো দুঃস্বপ্নদর্শনম্||১৫||

সর্বেষাং মদাত্যযানাং প্রমেহাদিসাধারণং লিঙ্গম্| সৌম্যাগ্নেযা জ্বরো যো মিশ্রলক্ষণ ইত্যুক্তঃ|| ১৫||

Adhikarana vAtikamadAtyayalakShaNAni (16) · Śloka 16

বিশেষাজ্জাগরশ্বাসকম্পমূর্ধরুজোঽনিলাত্| স্বপ্নে ভ্রমত্যুত্পততি প্রেতৈশ্চ সহ ভাষতে||১৬||

এষু লিঙ্গেষু সত্স্বপি বাতিকে জাগরাদিকং সাতিশযং ভবতি||১৬||

Adhikarana paittikamadAtyayalakShaNAni (17) · Śloka 17

পিত্তাদ্দাহজ্বরস্বেদমোহাতীসারতৃড্ভ্রমাঃ| দেহো হরিতহারিদ্রো রক্তনেত্রকপালতা||১৭||

পিত্তাদ্দাদিকম্|| ১৭||

Adhikarana shlaiShmikamadAtyayalakShaNAni (18) · Śloka 18

শ্লেষ্মণা ছর্দিহৃল্লাসনিদ্রোদর্দাঙ্গগৌরম্||১৮||

শ্লেষ্মণা ছর্দ্যাদিকম্|| ১৮||

Adhikarana sAnnipAtikamadAtyayalakShaNAni (19) · Śloka 19

সর্বজে সর্বলিঙ্গত্বং...............||১৯||

সন্নিপাতিকে মদাত্যযে সর্বং লিঙ্গত্বম্| ইতি মদাত্যযঃ||১৯||

Adhikarana dhvaMsakavikShayau dhvaMsakavikShayasambhavahetuH (20) · Śloka 20

...................ংউক্ত্বা মদ্যং পিবেষু যঃ| সহসাঽনুচিতং চান্যত্তস্য ধ্বংসকবিক্ষযৌ| ভবেতাং মারুতাত্কষ্টৌ দুর্বলস্য বিশেষতঃ||২০||

অনন্তরং মদ্যকারণৌ ধ্বংসকবিক্ষযৌ নির্ণীযেতে| যো নরো মদ্যপঃ সন্ মদ্যং বহুকালং ত্যক্ত্বা সহসাঽন্যদনুচিতং মদ্যং পিবেত্ তস্য বাতাদ্ধেতোর্ধ্বংসকবিক্ষযৌ নাম্না কষ্টৌ ব্যাধী ভবেতাম্||২০||

Adhikarana dhvaMsakalakShaNam (21) · Śloka 21

ধ্বংসকে শ্লেষ্মনিষ্ঠীবঃ কণ্ঠশোষোঽতিনিদ্রতা| শব্দাঽসহত্ত্বং তন্দ্রা চ ........................||২১||

দুর্বলস্য তু বিশেষেণ তৌ স্যাতাম্| ধ্বংসকে শ্লেষ্মনিষ্ঠীবাদি লক্ষণম্||২১||

Adhikarana vikShayalakShaNam (22) · Śloka 22

...................বিক্ষযেঽঙ্গশিরোঽতিরুক্| হৃত্কণ্ঠরোধঃ সম্মোহঃ কাসস্তৃষ্ণাবমিজ্বরঃ||২২||

বিক্ষযেঽঙ্গরুগাদি|| ২২||

Adhikarana tyaktamadyasya lAbhAH (23) · Śloka 23

নিবৃত্তো যস্তু মদ্যেভ্যো জিতাত্মা বুদ্ধিপূর্বকৃত্| বিকারৈঃ স্পৃশ্যতে জাতু ন স শারীরমানসৈঃ||২৩||

মদ্যমুপসংহরতি-নিবৃত্ত ইত্যাদিনা| সুবোধম্|| ২৩||

Adhikarana madamUrcchAsaMnyAsAnAM nidAnAdi (24) · Śloka 24

রজোমোহাহিতাহারপরস্য স্যুস্ত্রযো গদাঃ| রসাসৃক্চেতনাবাহিস্ত্রোতোরোধসমুদ্ভবাঃ| মদমূর্চ্ছাযসংন্যাসা যথোত্তরবলোত্তরাঃ||২৪||

অনন্তরং মদ্যবচ্চিত্তোপঘাতসামান্যাদত্রৈব মদাদযো নির্ণীযন্তে| রজোমোহাদ্যভ্যাসপরস্য পুরুষস্য দোষৈ রসাদিবাহিষু স্ত্রোতস্সু রুদ্ধেষু মোহাদযো ব্যাধিবিশেষা উত্পদ্যন্তে| তে চ যথোত্তরং বলাধিকাঃ| মদামূর্চ্ছাযস্ততঃ সংন্যাস ইতি|| ২৪||

Adhikarana madanidAnam, madaprabhedAH (25) · Śloka 25

মদোঽত্র দোষৈঃ সর্বৈশ্চ রক্তমদ্যবিষৈরপি||২৫||

তেষু চ বাতাদিভিঃ সন্নিপাতেন রক্তমদ্যবিষৈশ্চেতি সপ্ত ভেদাঃ||২৫||

Adhikarana vAtamadalakShaNam (26) · Śloka 26

সক্তাঽনল্পদ্রুতাভাষশ্চলস্খলিতচেষ্টিতঃ| রূক্ষশ্যাবারুণতনুর্মদে বাতোদ্ভবে ভবেত্||২৬||

সক্তাভাষত্বাদিযুক্তঃ পুরুষো বাতোদ্ববে মদে ভবেত্|| ২৬||

Adhikarana pittamadalakShaNam (27) · Śloka 27

পিত্তেন ক্রোধনো রক্তপীতাভঃ কলহপ্রিযঃ||২৭||

পিত্তেন ক্রোধনত্বাদিযুক্তঃ|| ২৭||

Adhikarana kaphamadalakShaNam (28) · Śloka 28

স্বল্পাসম্বদ্ধবাক্পাণ্ডুঃ কফাদ্ধযানপরোঽলসঃ||২৮||

কফাদ্ধযানপরত্বাদিযুক্তঃ|| ২৮||

Adhikarana sAnnipAtikamadalakShaNam (29) · Śloka 29

সর্বাত্মা সন্নিপাতেন.................||২৯||

সন্নিপাতেনাঽনন্তরোক্তং সর্বলিঙ্গম্|| ২৯||

Adhikarana raktajamadalakShaNam (30) · Śloka 30

............................. রক্তাত্স্তব্ধাঙ্গদৃষ্টিতা| পিত্তলিঙ্গঞ্চ ......................................||৩০||

রক্তাত্ মদে স্তব্ধাঙ্গদৃষ্টিতা পিত্তলিঙ্গঞ্চ ভবতি|| ৩০||

Adhikarana madyajamadalakShaNam (31) · Śloka 31

.................... মদ্যেন বিকৄতেহাস্বরাঙ্গতা||৩১||

মদ্যেন মদে বিকৃতেহত্বাদিলিঙ্গম্|| ৩১||

Adhikarana viShajamadalakShaNam (32) · Śloka 32

বিষাত্কম্পোঽতিনিদ্রা চ সর্বেভ্যোঽভ্যধিকশ্চ সঃ||৩২||

বিষান্মদে কম্পোঽতিনিদ্রা চ ভবতি| স এব সর্ব-মদেভ্যোঽধিকো দুস্সাধ্যতাবহঃ|| ৩২||

Adhikarana raktajAdimadeShu lakShaNaiH doShasa~ggatirj~jeyA (33) · Śloka 33

লক্ষযেল্লক্ষণোত্কর্ষাদ্বাতাদীন্ শোণিতাদিষু||৩৩||

তেষু চ শোণিতাদিমদেষু বাতাদীন্ লক্ষণোত্কর্ষাত্ লক্ষযেত্| অনেনৈতদুক্তম্-রক্তমদ্যবিষমদাঃ যদ্যপি ত্রিদোষজাস্তথাঽপ্যুত্কৃষ্টেন বাতাদীনামন্যতমস্যাঽধিক্যং ব্যবস্যেত্| ইত্যুক্তা মদাঃ||৩৩||

Adhikarana mUrcchAyanidAnam, vAtamUrcchAlakShaNam (34) · Śloka 34

অরুণং নীলকৃষ্ণং বা খং পশ্যন্ প্রবিশেত্তমঃ| শীঘ্রং চ প্রতিবুধ্যেত হৃত্পীডা বেপর্ভ্রমঃ| কার্শ্যং চ শ্যাবারুণা ছাযা মূর্চ্ছাযে মারুতাত্মকে||৩৪||

মূর্চ্ছাযা উচ্যন্তে| মারুতাত্মকে মূর্চ্ছাযে পুরুষোঽরুণং নীলং কৃষ্ণং বা আকাশং পশ্যংস্তমঃ প্রবিশেত্| শীঘ্রং চ প্রতিবুধ্যেত্| হৃত্পীডাদিকং চাত্র ভবতি তমঃ প্রবেশঃ অচৈতন্যম্|| ৩৪||

Adhikarana pittamUrcchAlakShaNam (35) · Śloka 35

পিত্তেন রক্তং পীতং বা নভঃ পশ্যন্ বিশেত্তমঃ| বিবুধ্যেত চ সস্বেদো দাহতৃট্তাপপীডিতঃ| ভিন্নবিণ্নীলপীতাভো রক্তপীতাকুলেক্ষণঃ||৩৫||

রক্তং পীতং বেত্যাদিপিকৃন্মূর্চ্ছাযাঃ লক্ষণম্|| ৩৫||

Adhikarana kaphamUrcchAlakShaNam (36) · Śloka 36

কফেন মেঘসঙ্গাশং পশ্যন্নাকাশমাবিশেত্| তমশ্চিরাচ্চ বুধ্যেত সহৃল্লাসপ্রসেকবান্| গুরুভিস্তিমিতৈরঙ্গৈরাদ্রচর্মাবনদ্ধবত্||৩৬||

মেঘেত্যাদিকং কফমূর্চ্ছালক্ষণম্||৩৬||

Adhikarana sAnnipAtikamUrcchAyalakShaNam (37) · Śloka 37

সর্বাকৃতিস্ত্রিভির্দোষৈরপস্মার ইবাঽপরঃ| পাতযত্যাশু নিশ্চেষ্টং বিনা বীভত্সচেষ্টিতৈঃ||৩৭||

ত্রিভির্দোষৈর্মূর্চ্ছাযঃ সর্বাকৃতিঃ সর্বরূপো ভবতি| মহারম্ভত্বেঽপর ইবাঽপস্মারঃ| অযং তু মূর্চ্ছাযো বীভত্সচেষ্টিতৈর্মূত্রপুরীষোত্সর্গাদিভির্বিনা নিশ্চেষ্টং পৌরুষমাশু পাতযতি|| ৩৭||

Adhikarana madamUrcchAyayoH saMnyAsAt bhedaH (38) · Śloka 38

দোষেষু মদমূর্চ্ছাযাঃ কৃতবেগেষু দেহিনাম্| স্বযমেবোপশাম্যন্তি সংন্যাসেনৌষধৈর্বিনা||৩৮||

অপস্মারাদ্ বিনা মদমূর্চ্ছাযযোঃ পুনরববোধে দোষেষ্বিত্যাদিনাহেতুরুচ্যতে| দেহিনাং কৃতবেগেষু সত্সু দোষেষু মদমূর্চ্ছাযাঃ স্বযমেবৌষধনিরপেক্ষমেবোপশাম্যন্ত্যাঽঽবেগকালম্| সংন্যাসঃ পুনরৌষধৈর্বিনা ন শাম্যতি|| ৩৮||

Adhikarana saMnyAsanidAnAdi saMnyAsastadasAdhyatva~jca (39) · Śloka 39

বাগ্দেহমনসাং চেষ্টামাঽঽক্ষিপ্যাতিবলা মলাঃ| সংন্যাসং সন্নিপতিতাঃ প্রাণাযতনসংশ্রযাঃ| কুর্বন্তি তেন পুরুষঃ কাষ্ঠভূতো মৃতোপমঃ| ম্রিযেত শীঘ্রং-শীঘ্রং চেচ্চিকিত্সা ন প্রযুজ্যতে||৩৯||

সংন্যাসঃ ক উচ্যত ইত্যাঽঽহ-বাগিত্যাদি| অতিবলা স্বকারণবিশেষবশাদ্বাতাদযো দুষ্টাঃ বাগ্দেহমনসাং চেষ্টামাঽঽক্ষিপ্ত গৃহীত্বা পরস্পরং সন্নিবর্তিতাঃ প্রাণাযতনসংশ্রিতাশ্চ সংন্যাসং কুর্বন্তি| প্রাণাযতনং হৃদযাদি| তেন চ সংন্যাসেন পুরুষঃ কাষ্ঠভূতো মৃতোপমশ্চ ভবতি| তত্র যদি শীঘ্রং চিকিত্সা ন প্রযুজ্যতে ততো ম্রিযেতৈব|| ৩৯||

Adhikarana saMnyAse Ashu cikitsA yojyA (40) · Śloka 40

অগাধে গ্রাহবহুলে সলিলৌঘ ইবাতটে| সংন্যাসে বিনিমজ্জন্তং নরমাশু নিবর্ত্তযেত্||৪০||

তথা ভিষক সংন্যাসে বিনিমজ্জন্তং নরমাশু নিবর্তযেত্| অগাধে গম্ভীরে গ্রাহবহুলে অতটে চ সলিলৌঘে নিমজ্জন্তং নরং যথাবান্ধবা নিবর্তযন্তি|| ৪০||

Adhikarana yuktiviyuktamadyadeShAH (41) · Śloka 41

মদমানরোষতোপ্রভৃতিভিরভির্নিজৈঃ পরিষ্বঙ্গঃ| যুক্তাযুক্তং চ সমং যুক্তিবিযুক্তেন মদ্যেন||৪১||

মদমানেত্যাদিনা মদাত্যযনিদানত্বান্মদ্যেনৈবোপসংহরন্নাহ| তোষো হর্ষঃ| প্রভৃতিশব্দেন কামক্রোধাদযঃ|যুক্তাযুক্তং চ সমমিতি কৃত্যাকৃত্যাবিবেকো ন ভবতি|| ৪১||

Adhikarana yuktiyuktamadyaguNAH (42-6) · Śloka 6

বলকালদেশসাত্ম্যপ্রকৃতিসহাযামবযবাংসি| প্রবিভজ্য তদনুরূপ যদি পিবতি ততঃ পিবত্যমৃতম্||৪২|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতৌ অষ্টাঙ্গসংগ্রহসংহিতাযাং নিদানস্থানে মদাত্যযনিদানং নাম ষষ্ঠোঽধ্যাযঃ||৬||

এবং বিধিহীনস্য দোষমুক্ত্বা বলকালেত্যাদিনা বিধিযুক্তস্য পুনর্গুণমাহ| বলাদীনি পৃথঙ্নিরূপ্য বলাদ্যনুরূপমেব যদি মদ্যং পিবতি ততোঽমৃতমেব পিবতি|| ৪২|| ইতি শ্রীমন্মহামহোপাধ্যাযেন্দুবিরচিতাযাম্ অষ্টাঙ্গসংগ্রব্যাখ্যাযাং শশিলেখাযাং নিদানস্থানে ষষ্ঠোঽধ্যাযঃ