1. putrakāmīyaḥ

Adhikarana atha putrakAmIyo nAma prathamo~adhyAyaH| upodghAtaH · Śloka

পূর্বস্মিন্ স্থানে সকলতন্ত্রব্যাপকস্যার্থজাতস্য সূত্রণং কৃতং শাস্ত্রকৃতা| যতঃ প্রতিপ্রসঙ্গমাকাংক্ষানিবৃত্তযে পুনঃ পুনরুচ্যমানমতিগহনত্বাত্ কেবলমপ্রতিপত্তযে সম্পদ্যত ইতি| শেষেষু স্থানেষু যথাক্রমং প্রথমং সূত্রিতমেব বিস্তরেণাঽঽখ্যাযতে| তত্র শরীরস্য তদধিষ্ঠাতৃভূতস্যাযুষশ্চ প্রাধান্যোনোপেযত্বাত্ দ্বিতীযস্থান উচিত এব নির্ণযঃ| তদর্থং শারীরস্থানমরভ্যতে| তত্র প্রথমং শরীরস্বরূপনির্ণযঃ কর্ত্তব্যঃ| তস্য চ প্রথমং জন্ম| তচ্চ কারণাধীনম্| তেষাঞ্চাগ্রণীঃ পিতা, তত্পরাযত্তত্বাত্ কারণান্তরসামগ্র্যাঃ| অতস্তস্যৈবানুষ্ঠেযপ্রদর্শনার্থমধ্যাযারম্ভঃ|

Adhikarana pratij~jA (1) · Śloka 1

অথাতঃ পুত্রকামীযমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

অথেত্যাদি চ পূর্বদ্ব্যাখ্যেযম্| পুত্রং কামযন্ত ইতি পুত্রকামাঃ, তেভ্যো হিতঃ পুত্রকামীযঃ, তত্ প্রাপ্ত্যুপাযপ্রদর্শকত্বেনাঽঽধ্যাযঃ পুত্রকামীযঃ, তং ব্যাখ্যাস্যামঃ|| ১||

Adhikarana puruShasya vivAhavayaH pariNayArthaM strINAM lakShaNa~jca (2) · Śloka 2

অথ খলু পুমানেকবিংশতিবর্ষঃ কন্যামতুল্যগোত্রাং তুল্যাভিজনামসঞ্চারিরোগকুলপ্রসূতাং রূপশীললক্ষণসম্পন্নামনূনামবিনষ্টদন্তৌষ্ঠকর্ণনাসানখকেশস্তনীং মৃদুমরোগপ্রকৃতিমকপিলামপিঙ্গলামহীনাধিকাঙ্গীং দ্বাদশবর্ষদেশীযামমরভুজগসরিদচলবৃক্ষপক্ষিনক্ষত্রান্ত্যপ্রেষ্যভীষণকনামান্যনুদ্বহন্তীমনঘামনিন্দ্যামানিন্দ্যেন বিধিনোদ্বহেত্||২||

অথেতি মঙ্গলে| একবিংশতিবর্ষঃ পুমান্ কন্যামনিন্দ্যেনালোকদ্বিষ্টেন বিধিনোদ্বহেত্ স্বীকুর্যাদিতি সম্বন্ধঃ| কিম্ভূতাং কন্যামিত্যাহ-- অতুল্যগোত্রামিত্যাদি| তুল্যশব্দোঽত্রৈকশব্দস্য সাধারণস্যার্থে বর্ততে| গোত্রঞ্চ বসিষ্ঠাদিঋষিনামপূর্বকং লোকশাস্ত্রে চ প্রসিদ্ধম্| অভিজনঃ কুলম্| অত্র তুল্যশব্দঃ সদৃশপর্যাযঃ| সাদৃশ্যং চাত্র বিত্তবৃত্তদিভিঃ প্রকৃতত্বাত্ তুল্যার্থত্বে পুমান্ প্রত্যবমৃশ্যতে| তথা যস্মিন্ কুলে সঞ্চারী রোগঃ কুষ্ঠপৈঙ্গল্যাদিঃ নাস্তি, তত্র যা প্রসূতা তাং তথা সাতিশযৈঃ রূপাদিভিঃ সম্পন্নাম্| লক্ষণানি শুভানি লোকে শাস্ত্রে চ প্রসিদ্ধানি| নাজাতানি নাপি ভূত্বা বিনষ্টানি দন্তাদীনি যস্যাঃ সা তথোক্তা| মৃদুঃ কোমলা শরীরেণ স্বভাবেন চ| তথারোগা প্রকৃতিঃ স্বভাবো যস্যাঃ সা, তথাবিধাম্| কপিলা পীতলোহিতা| পিঙ্গলা অরুণলোহিতা, তাম্| যস্যাশ্চাঙ্গানি বাহুনযনাঙ্গুলিপ্রভৃতীনি অন্যাঙ্গাপেক্ষযা নাপ্যূনানি নাপ্যধিকানি তথা ঈষদসমাপ্তা দ্বাদশবর্ষা দ্বাদশবযাংসি যস্যাস্তাম্| তথা অমরাদিনামরহিতাং শচীসহস্রাক্ষ্যুমালক্ষ্মীপ্রভৃতীন্যমরনামানি| গোধাতক্ষকীপ্রভৃতীনি দাগনামানি| গঙ্গাযমুনাসরস্বতীপ্রভৃতীনি সরিন্নামানি| মেরুমলযবিন্ধ্যপ্রভৃতীন্য্চলনামানি| মধূকি(লি)কাবদরীশমীপ্রভৃতীনি বৃক্ষনামানি| হংসীবলাকাচকোরীকোকিলাপ্রভৃতীনি পক্ষিনামানি| রোহিণীরেবতীমঘাপ্রভৃতীনি নক্ষত্রনামানি| অন্ত্যা রজকচণ্ডালাদাযঃ, তেষাং প্রতিদেশে প্রসিদ্ধ্যা যানি নামানি তদ্বর্জিতাম্| এবং প্রেষ্যা দাসশিল্পিনঃ| সত্যপি যথোক্তাবিরোধে কাচিত্ ভীষণং নামাকোমলমস্থ্যাবল্যাদি বিভর্তি তামপি| অনিন্দ্যামন্যেনাপি কেনচিল্লোকদ্বিষ্টেন প্রকারেণাগর্হণীযাম্|| ২||

Adhikarana dampatyoH putrotpAdanavayaH (3) · Śloka 3

তস্যাং ষোডশবর্ষাযাং পঞ্চবিংশতিবর্ষঃ পুরুষঃ পুত্রার্থং প্রযতেত| তদা হি তৌ প্রাপ্তবীর্যৌ বীর্যান্বিতমপত্যং জনযতঃ||৩||

তস্যামনন্তরোক্তাযামঙ্গনাযাং কালেন্ ষোডশবর্ষাযাং স পুমান্ পঞ্চবিংশতিবর্ষো বক্ষ্যমাণেন বিধিনা পুত্রার্থং প্রযতেত| যতস্তৌ দম্পতী তদেতি ষোডশে পঞ্চবিংশে চ বর্ষে লব্ধাত্মবীর্যাতিশযৌ সন্তৌ বীর্যবন্তং বলারোগ্যাদিসম্পন্নং পুত্রং জনযতঃ|| ৩||

Adhikarana nyUnAbdAbhyAM RutorAdyadinatraye shukrArtavadoShe ca garbhasambhave doShAH (4) · Śloka 4

ঊনপঞ্চবিংশতিবর্ষেণোনষোডশবর্ষাযামাহিতো গর্ভঃ কুক্ষিস্থ এব বিনাশমাপ্নুযাদল্পাযুর্বলারোগ্যবিভবো বা স্যাদ্বিকলেন্দ্রিযো বা ঋতাবাদ্যে চ রাত্রিত্রযে তথা দুষ্টে শুক্রার্তব ইতি||৪||

ঊনষোডশবর্ষাযা বা আহিতো গর্ভ ঊনপঞ্চবিংশতিবর্ষেণ বাপ্যাহিতঃ কারণসামগ্র্যনপেক্ষযা কদাচিন্মাতৃকুক্ষাবেব নশ্যতি কদাচিদ্ বিকলেন্দ্রিযো বা ভবতি| ইন্দ্রিযেণৈকেন দ্বাভ্যাং বা হীনো ভবতীত্যর্থঃ| ন কেবলং দম্পত্যোরূনবর্ষতযা গর্ভস্যৈবংবিধতা, যাবত্ পূর্ণযোরপি মাতাপিত্রোর্মাতুরাদ্যে পুষ্পদর্শনাদারভ্য ঋতৌ রাত্রিত্রযে আহারবিহারাদিনা বাতাদিদুষ্টে শুক্রার্তবে চৈবংবিধতৈব|| ৪||

Adhikarana shukrotpattiH (5) · Śloka 5

তত্রাহারস্য সম্যক্পরিণতস্য ক্রমান্মজ্জাজমনুপ্রাপ্তস্য সারঃ শুক্রসংজ্ঞাং লভতে||৫||

শুক্রার্তবং কিমুচ্যতে কথং চ তদ্ গর্ভজন্মাদ্যুপকরোতি উপঘাতশ্চ তস্য কথং ভবতীত্যাহ-- তত্রাহারস্যেত্যাদি| আহারস্য চতুর্বিধস্য সম্যক্ যথাবত্ পরিণতস্য জঠরাগ্নি ধাত্বগ্নিপরিপাকপরম্পরাবশাচ্চক্রমান্মজ্জানং মজ্জস্বভাবং প্রাপ্তস্য যঃ সারঃ সঃ শুক্রসংজ্ঞাং লভতে|| ৫||

Adhikarana shukrasya sthAnAni (6) · Śloka 6

তত্তু ক্ষীর ইব সর্পিরিক্ষুরস ইব গুডঃ শরীরে শুক্রধরাং কলামাশ্রিত্যাস্রুতং সর্বাঙ্গব্যাপিতযা স্থিতম্| বিশেষতশ্চ মজ্জমুষ্কস্তনেষু||৬||

তচ্চ শুক্রং (ব্যাপকমপি মজ্জপ্রভৃতিষু বিশেষতঃ স্থিতং) শরীরে যা শুক্রধরা নাম কলা বক্ষ্যমাণলক্ষণা তামাশ্রিত্যাস্রুতং সত্ সর্বাঙ্গব্যাপিত্বেন স্থিতং ভবতি| দৃষ্টান্তো যথা- ক্ষীরে সর্পির্ঘৃতম্| যথা চেক্ষুরসে গুডঃ| ব্যাপ্যস্থিতমপি তদবস্থাযাং ন দৃশ্যতে| ক্রিযাসংস্কারাদিবশাচ্চ পশ্চাদভিব্যজ্যতে| তথৈব শরীরে শুক্রমিতি দৃষ্টান্তঃ| ক্ষীরাদৌ চ সর্পিরাদেরস্তিত্বমনুমানলব্ধং যদিহ সমুত্পদ্যতে| তন্ন চেত্| কথং সিকতাভ্যো লোকস্তৈলং ন গৃহ্ণীযাত্| অথবা কার্যকারণমাত্রো বা দৃষ্টান্তঃ|| ৬||

Adhikarana shukrapravRuttau hetuH| (7) · Śloka 7

হর্ষোদীরিতং তু সঙ্ঘট্টনেন হৃদযাবেশাত্ পিণ্ডীভূতমঙ্গাদঙ্গাত্ প্রবর্ততে||৭||

তচ্চ শুক্রং সর্বাঙ্গব্যাপি স অঙ্গনাসংযোগে হর্ষেণোদীরিতং প্রেরিতমঙ্গাদঙ্গাদ্বহিঃ প্রবর্ততে|| ৭||

Adhikarana garbhAdhAnayogyaM shukram| (8) · Śloka 8

তত্ সৌম্যং স্নিগ্ধং গুরু শুক্লং মধুগন্ধি মধুরং পিচ্ছিলং বহু বহলং ঘৃততৈলক্ষৌদ্রান্যতমবর্ণং চ শুক্রং গর্ভাধানযোগ্যং ভবতি||৮||

কিম্ভূতং ? সঙ্ঘট্টনেন বেগাবেশেন হৃদযাবেশাত্পিণ্ডীভূতমেকত্বং যাতং বাতাদিভিরনুপহতং সৌম্যস্নিগ্ধাদিগুণযুক্তং সদ্গর্ভাধানযোগ্যং ভবতি| সৌম্যং সোমগুণভূযিষ্ঠং মধুগন্ধি মাক্ষিকগন্ধি বহলং নাতিঘনম্| তথা ঘৃতবর্ণং তৈলবর্ণং বা| ক্ষৌদ্রবর্ণং বা ক্ষৌদ্রং চ কপিলং বিদ্যাত্| এতদ্বিপরীতং গর্ভাধানাযোগ্যম্| ইতি শুক্রস্য স্বরূপমুক্তম্|| ৮||

Adhikarana ArtavalakShaNam| (9) · Śloka 9

তথা রক্তমেব চ স্ত্রীণাং মাসে মাসে গর্ভকোষ্ঠমনুপ্রাপ্য ত্র্যহং প্রবর্তমানমার্তবমিত্যাহুঃ||৯||

আর্তবস্যাত্রোচ্যতে-- তথা রক্তমিত্যাদি| রক্তমেব সর্বস্য ধাতুত্বেন জাযতে| তদেবং বিশিষ্টং সদ্ আর্তবমিত্যাঽঽচার্য্যা আহুঃ| কিম্ভূতং ? মাসে মাসে ত্র্যহং বহিঃ প্রবর্তমানম্| কিং কৃত্বা ? গর্ভকোষ্ঠং যোষিতো গর্ভস্থানং সর্বতঃ শরীরাত্ প্রাপ্য| বহিঃ প্রবর্তমানত্বং তস্যোপলক্ষণম্| ন তু তদেবার্তবং যত্ প্রবর্তত এব কেবলম্| ঋতৌ ভবতীত্যার্তবম্| ঋতুশ্চ নিষিক্তস্য বীজস্য ফলপ্রসবানুগুণঃ কালঃ| তস্মিংশ্চর্তৌ প্রথমং ত্র্যহং বহির্দুষ্টমবশ্যং প্রবর্ততে|| ৯||

Adhikarana asRugdarAdicikitsA| (10) · Śloka 10

অতিপ্রসঙ্গেনানৃতাবৃতৌ বা তদেবাসৃগ্দরং প্রদরং ব্যাপদং চ রক্তযোনিসংজ্ঞাং লভতে| তত্সাধনে রক্তপিত্তচিকিত্সিতং গুহ্যরোগপ্রতিষেধং চেক্ষেত||১০||

তদেবাতিপ্রসঙ্গেনর্তকাল এব প্রবর্তমানমনৃতৌ বাতিপ্রসঙ্গেন প্রবর্তমানমস্রমসৃগ্দরাদি সংজ্ঞাং লভতে| এতল্লক্ষণং চোত্তরত্র বক্ষ্যতে| ঋতোস্তু লক্ষণং ক্ষামপ্রসন্নবদনামিত্যত্রৈব বক্ষ্যতে| তত্সাধন ইতি| তত্সাধনেঽতিপ্রসক্তরক্তচিকিত্সিতায রক্তপিত্তচিকিত্সিতং গুহ্যরোগপ্রতিষেধং চেক্ষেত| তেনৈতদুক্তং ভবতি-- তথাবিধস্য নিদানাদিবশাত্ কদাচি রক্তপিত্ততা ভবতি, কদাচিদ্ যোনিরোগোক্তান্যতমপ্রকারতা| অতএব চ তেষাং বিশেষে বিশেষাচ্চিকিত্সিতমুক্তমিতি|| ১০||

Adhikarana ArtavApravRuttistaccikitsAsUtraM ca| (11) · Śloka 11

বাতকফাবৃতমার্গাণাঞ্চাপ্রবর্তমানং পিত্তলৈরুপাচরেত্||১১||

তথা তদেবার্তবং কদাচিত্ প্রাপ্তেঽপি কালে বাতশ্লেষ্মণা আবৃতরক্তমার্গাণাং যোষিতাং নৈব প্রবর্ততে, তথাবিধমপ্রবর্তমানং পিত্তলৈরাহারাদিভিরূপাচরেত্|| ১১||

Adhikarana raktagulmaH taccikitsAtideshashca| (12) · Śloka 12

তদ্ধি বর্দ্ধমানমন্তর্বর্তমানং সশুক্রমশুক্রং বা জীবরহিতং বাতলান্যাসেবমানাযা যোষিতো গর্ভলিঙ্গানি দর্শযদ্ গুল্মীভবতি| তত্র গুল্মচিকিত্সিতমীক্ষেত||১২||

যতস্তদ্রক্তং বহিরপ্রবর্তমানমন্তর্মহাস্রোতসি নিষিক্তশুক্রসহিতং কেবলমেব বা বর্ধতে| তদ্বর্ধমানং যা বাতলান্যাঽঽহারাদীন্যাসেবতে তস্যা গর্ভলিঙ্গানি স্তন্যদর্শনাদীনি প্রকটযদ্ গুল্মীভবতি| তদেবং গুল্মত্বং প্রাপ্নোতি| তত্রারক্ষযা গুল্মীভূতে চিকিত্সাযৈ গুল্মচিকিত্সিতমীক্ষেত| তত্র হি রক্তগুল্মস্য পৃথক্ চিকিত্সিতমুক্তম্| এবং রক্তগুল্মাদীনাং কদাচিদ্ রক্তযোনিতা ভবতি|| ১২||

Adhikarana duShTArtavajanyaM vAtodarantaccikitsAsUtra~jca| (13) · Śloka 13

কদাচিদ্বা গর্ভ ইব বাতোদরং ভবতি তদ্বাতোপশমনৈরুপশাম্যতি||১৩||

কদাচিদ্বা গুল্মত্বেন বিনা রক্তগুল্মলক্ষণৈর্বক্ষ্যমাণৈর্বিরহিতং গর্ভ- সাদৃশ্যমাত্রেণৈব বাতোদরাখ্যাং প্রাপ্নোতি| তদ্বাতো প্রশমহেতুভিঃ শাম্যতি|| ১৩||

Adhikarana asRu~gnirodhe garbhabhramaH| (14) · Śloka 14

তদেব কদাচিদ্ আর্তবং সৌম্যৈর্বৃংহণাত্মভিরাহারবিহারৈঃ স্তম্ভিতমনুপদ্রবমেবোদরং গর্ভাধিষ্ঠিতমিব বর্ধযতি| যেন তামগর্ভাং গর্ভিণীমাহুর্মূঢাঃ||১৪||

কদাচিদ্বা সৌম্যাদিভী রুদ্ধং সদনুপদ্রবং পীডাদিকম্ অকুর্বদ্ উদরং বর্ধযতি| যেন হেতুনা মূঢা যাথাতথ্যপরিজ্ঞানবহিষ্কৃতাঃ অগর্ভামেব যোষিতং গর্ভিণীমাহুঃ|| ১৪||

Adhikarana garbhasya bhUtahatatvabhrAntiH| (15) · Śloka 15

ততো বিরীতৈর্যদৃচ্ছযা বা প্রবৃত্তে রক্তে গর্ভশরীরমপশ্যন্তো ভূতহৃতমিত্যজ্ঞা ব্রুবতে||১৫||

ততোঽনন্তরং সৌম্যাদিহেতুবিপরীতৈঃ কাকতালীযেন সাধুভিষজা বা প্রযুক্তৈঃ স্বযমেবৌষধনিরপেক্ষযা বা প্রবৃত্তে রক্তে গর্ভং দুর্বুদ্ধিকল্পিতং প্রত্যক্ষেণাপশ্যন্তো ভূতৈরাহৃতমিতি বদন্ত্যজ্ঞা এবং তেষামজ্ঞত্বম্|| ১৫||

Adhikarana rakShasAM sharIrApaharaNe~ashaktiH (16) · Śloka 16

যস্মাত্ সম্ভবত্যোজসোঽপহরণং রক্ষোভির্ন তু শরীরাপহরণমনিষ্টত্বাদশক্তের্বা| ইচ্ছাশক্ত্যোর্হি প্রবৃত্তেরুপলব্ধিঃ ন চ দৃশ্যতে কস্যচিদমানুষৈর্দেহাপ্রহারঃ||১৬||

রক্ষোভিরোজসোঽপহরণং সম্ভাব্যতে ন তু শরীরোপহরণম্| ননু কথং ন সম্ভাব্যত ইত্যাহ-- অনিষ্টত্বাত্| অথবাঽশক্তিতঃ| শক্তোঽপি কদাচিদনিষ্টেন প্রবর্ততে, ইষ্টেঽপি বা অশক্ত্যা ন প্রবর্ততে| এতদুক্তমিচ্ছাশক্ত্যোর্হি প্রবৃত্তেরুপলব্ধিরিতি| ন চেত্যাদি, তর্হ্যেবং কদাচিদ্ দৃষ্টং য্দমানুষৈঃ রক্ষোভিঃ কস্যচিদ্দেহোপহারঃ কৃত ইতি|| ১৬||

Adhikarana AkShepapUrvako rakShobhiH sharIrApaharaNaniShedhaH| (17) · Śloka 17

যদি চ দৃষ্টমপি সমুল্লঙ্ঘ্য কেচিদতিশক্তিযুক্তা গর্ভস্য শরীরাক্ষেপে প্রবর্তন্তে তদা কথমিব প্রাপ্তাবসরাস্তজ্জননীমুপেক্ষেরন্||১৭||

অথ কশ্চিদেবং ব্রূযাত্ যথাপূর্বং ন দৃষ্টমধুনা তু দৃশ্যতে তদর্থমাহ-- যদি চেত্যাদি| যদি হি শক্ত্যতিশযযুক্তা মাতুরপি শরীরাহরণে সমর্থা অদৃষ্টেঽপি দেহাপহারে প্রবর্তেরন্ কিমিতি সাতিশযস্বার্থসম্পাদনং স্থূলস্থূলং তন্মাতৃশরীরমুপেক্ষন্তে| অতোঽনুমানাত্ জ্ঞাযতে শরীরাপহরণং ভূতানামনিষ্টমশক্ততা বা তত্রেতি| এতচ্চাচার্যস্যাসম্ভবমাত্রপ্রদর্শনমিতি কৃত্বা গৃহ্যতে| অন্যথা শরীরবদোজসি পর্যনুযুক্তঃ কিমুত্তরং দাস্যতি|| ১৭||

Adhikarana shuddhArtavalakShaNam| (18) · Śloka 18

আর্তবং পুনঃ শশরুধিরলাক্ষারসোপমং ধৌতঞ্চ বিরজ্যমানং শুদ্ধমাহুঃ||১৮||

তচ্চানন্তরোক্তমার্তবং শশরুধিরাদিসদৃশং সদ্ আচার্য্যাঃ শুদ্ধমিত্যাহুঃ| তদ্ধি গর্ভাধনযোগ্যং ভবতি| ধৌতং সদ্বস্ত্রাদ্বিবিরজ্যমানমপসরচ্চ্|| ১৮||

Adhikarana strIpuMsayo rajaH shukrAdInAmanupalabdhikAlaH| (19) · Śloka 19

যথা চ বালস্য জীর্ণস্য বা তরোঃ পুষ্পফলং পুষ্পফলস্য বা তদ্বিধস্য গন্ধো নোপলভ্যতে তথৈব নোনষোডশাতীতসপ্ততিবর্ষস্য পুংসঃ শুক্ররোমাদযো যোষিতশ্চোনদ্বাদশাতীতপঞ্চাশদ্বর্ষাযা রজস্তন্যাদয ইতি||১৯||

প্রস্তুতশুক্রং তথা রোমাদয ঊনষোডশবর্ষস্য পুংসো নোপলভ্যতে| যথা বালস্য তরোঃ পুষ্পফলম্| যথা বা তদ্বিধস্য বালস্যৈব পুষ্পফলস্য গন্ধঃ| অস্ত্যপি সত্তযা ব্যক্তভাবো নোপলভ্যতে| দেশকালবশাত্তু ব্যক্তং ভবত্যেতত্| অতীতসপ্ততিবর্ষস্যাপি পুংসঃ শুক্রাদযো নোপলভ্যন্তে| যথা জীর্ণস্য তরোঃ পুষ্প্ফলং, তদ্বিধস্য বা পুষ্পফলস্য গন্ধোঽতিজীর্ণস্য ইতি| অনেনৈব ক্রমেণ যোষিত আর্তবস্তন্যাদীনাং বাচ্যম্| আদিশব্দেন রোমাদীনাং পরিগ্রহঃ|

Adhikarana shukrArtavayorA~a~apyAyanam| (20) · Śloka 20

অথ শুদ্ধশুক্রার্তবমরোগং মিথোঽনুরক্তং মিথুনমুপস্নেহ্যবিধিবত্ সংশোধ্যাস্থাপনানুবাসনাভ্যামুপাচরেত্| বিশেষতস্তু ঘৃতক্ষীরবদ্ভির্মধুরৌষধসংস্কারৈঃ পুরুষম্, তৈলেন নারীং পিত্তলৈশ্চ মাংসৈঃ| এবং হি সমানগুণতযা শুক্রার্তবমাপ্যাযতে||২০||

অথেত্যাদি সুবোধম্| প্রশস্তেষু তিথিমুহূর্তনক্ষত্রেষু সদপত্যলাভায মিথুনমুপস্নেহ্যার্তবাম্যর্ণে কালে শুদ্ধশুক্রার্তবত্বাদিযুক্তং মিথুনং জাযাপতী আস্থাপনানুবাসনাভ্যামুপাচরেদিতি সম্বন্ধঃ| কিং কৃত্বা ? আহ, পূর্বমুপস্নেহ্য পশ্চাচ্ছাস্ত্রোক্তেন বিধানেন সংশোধ্যেতি| পুরুষং তু বিশেষাদ্ ঘৃতাদিভিরুপাচরেত্| মধুরস্কন্ধনির্দিষ্টৈরৌষধান্নসংস্কারৈশ্চোপাচরেদুপচর্যমাণস্য বহুদিবসোপযোগেন যশ্শরীরেঽতিশযঃ স মধুরৌষধসংস্কারঃ| নারীং তু বিশেষেণ তৈলাদিভিঃ| পিত্তলানি মাংসানি আনূপসত্ত্বজানি তানি কফপিত্তলানি ভবন্ত্যেব| এবং হি ঘৃতাদ্যুপচারেণ পুংসঃ শুক্রমাপ্যাযতে সদৃশ্গুণত্বাত্| তথা তৈলাদ্যুপযোগেন রক্তমাপ্যাযতে|| ২০||

Adhikarana garbhAsambhavakarAH shukradoShAH| (21) · Śloka 21

বাতপিত্তশ্লেষ্মকুণপগন্ধিগ্রন্থিপূযক্ষীণমূত্রপুরীষরেতাংসি ত্ববীজানি ভবন্তি||২১||

তত্র যান্যশুদ্ধানি আহারাদিহেতুকবাতাদিদোষাদ্রেতাংসি তান্যবীজানি ভবন্তি গর্ভায ন ভবন্তীত্যর্থঃ|| ২১||

Adhikarana vAtAdiduShTasya shukrasya lakShaNAni| (22) · Śloka 22

তত্র তনু রূক্ষং ফেনিলমরুণমল্পং বিচ্ছিন্নং সরুজং চিরাচ্চ নিষিচ্যতে বাতেন| কিঞ্চিত্ পীতমপিচ্ছিলমানীলং বা দহদিব প্রবর্ততে পিত্তেন| মজ্জোসংসৃষ্টং প্রভূতং বিবদ্ধং চাম্ভসি চ কিঞ্চিন্মজ্জতি শ্লেষ্মণা| কুণপগন্ধ্যনল্পং রক্তেন| গ্রন্থিভূতং বাতশ্লেষ্মভ্যাম্| পূতি পূযনিভং পিত্তশ্লেষ্মভ্যাম্| ক্ষীণং বাতপিত্তাভ্যাম্| তদুক্তং সসাধনং প্রাক্| মূত্রপুরীষগন্ধি সন্নিপাতেন||২২||

তত্র তস্মিন্ ইত্যাদিনা বাতাদিদুষ্টস্য শুক্রস্য লক্ষণং চিকিত্সিতং চ দোষক্রমেণোচ্যতে| সুবোধমন্যত্| বাতপিত্তাভ্যাং শুক্রক্ষযঃ ক্রিযতে, তচ্চ ক্ষীণং শুক্রং প্রাগ্ দোষাদিবিজ্ঞানীযে সচিকিত্সিতমুক্তম্|| ২২||

Adhikarana duShTArtavalakShaNAtideshaH duShTashukrArtavayoH sAdhyatvAdi ca| (23) · Śloka 23

আর্তবমপি শুক্রবদ্ দোষৈরুপসৃষ্টমবীজমেব| তস্য লিঙ্গং নাম চ পূর্ববত্| তেষু কুণপগ্রন্থিপূযক্ষীণরেতাংসি কৃচ্ছ্রসাধ্যানি| মূত্রপুরীষশুক্রার্তবং ত্বসাধ্যং কুণপগ্রন্থিপূযার্তবং চ||২৩||

ন কেবলং বাতাদিদুষ্টং শুক্রমবীজং ভবতি যাবত্ তেনৈব ক্রমেণ তৈরেব দুষ্টমার্তবমপ্যবীজং ভবতি| তস্য চাঽঽর্ত্তবস্য দুষ্টস্য শুক্রবদেব ক্রমেণ লক্ষণং নাম চ বিজানীযাত্| তেষু দুষ্টেষু শুক্রার্ত্তবেষু মধ্যে কুণপাদিরেতাংসি কৃচ্ছ্রসাধ্যানি| মূত্রপুরীষশুক্রার্ত্তবান্যসাধ্যানি| তানি প্রজোত্পাদনে ন সমর্থান্যেব ভবন্তি| কুণপগ্রন্থ্যাদি দুষ্টমার্ত্তবং চ| শেষং সর্বং সাধ্যম্|| ২৩||

Adhikarana vAtAditriduShTayoH shukrArtavadoShayoshcikitsAtideshaH| (24) · Śloka 24

তত্রাদ্যাংস্ত্রীন্ শুক্রার্ত্তবদোষান্ যথাস্বং দোষসাধনেন সাধযেত্| গুহ্যযোনিরোগপ্রতিষেধেন চোভযান্||২৪||

তত্র সাধ্যেষু বাতাদিভিস্ত্রীন্ শুক্রদোষাংস্তৈরেব ত্রীনার্ত্তবদোষান্ স্বহেতুদোষচিকিত্সযোপক্রমেত্| গুহ্যরোগপ্রতিষেধোক্তবিধানেন চ|| ২৪||

Adhikarana vAtikashukradoShe cikitsAvisheShaH| (25) · Śloka 25

অপি চ-- বাতিকে শুক্রদোষে বসুকসৈন্ধবফলাম্লসিদ্ধং যবক্ষারপ্রতীবাপং সর্পিষ্পানম্| বিল্ববিদারীসিদ্ধং ক্ষীরযুক্তমাস্থাপনম্| মধুকভদ্রদারুসিদ্ধং তৈলমনুবাসনং ক্ষীরকুলীররসসিদ্ধং তৈলমুত্তরবস্তিঃ||২৫||

অপি চেতি বিশেষসমুচ্চযায| বসুকাদিসিদ্ধং সর্পির্যবক্ষারপ্রতীবাপং বাতিকে শুক্রদোষে| প্রতীবাপো যঃ সিদ্ধে চূর্ণত্বেন দীযতে| মাত্রা চাস্য দোষাদ্যপেক্ষযা| বসুকং রোমকম্| সৈন্ধবং মাণিমন্থম্| ফলাম্লমম্লদাডিমাদিফলম্| সক্ষীরং ক্বাথকল্পনযা সিদ্ধং বিল্বাদিক্বাথমাস্থাপনম্| তত্রৈবানুবাসনযোগ্যতাযাং মধুকাদিসিদ্ধং তৈলম্| তত্রৈব ক্ষীরকুলীররসাভ্যাং সিদ্ধং তৈলমুত্তরবস্তিঃ| কুলীরো জলজপ্রাণিবিশেষঃ কর্কটাখ্যঃ| তেষাং সমভাগত্বম্|| ২৫||

Adhikarana paittikashukradoShe cikitsAvisheShaH| (26) · Śloka 26

পৈত্তিকে কাণ্ডেক্ষুশ্বদংষ্ট্রাগুডূচীসিদ্ধং মূর্বামধূকপ্রতীবাপং সর্পিষ্পানম্| ত্রিবৃচ্চূর্ণঃ সঘৃতো বিরেকঃ| পযস্যাশ্রীপর্ণীসিদ্ধং ক্ষীরযুক্তমাস্থাপনম্| মধুকমুদ্গপর্ণীসিদ্ধং তৈলমনুবাসনমুত্তরবস্তিশ্চ||২৬||

পৈত্তিকে সুবোধম্| পযস্যযা শ্রীপর্ণ্যা চ সিদ্ধেন ক্ষীরেণাস্থাপনম্| মধুকমুদ্গপর্ণীসিদ্ধং তৈলমনুবাসনমুত্তরবস্তিশ্চ|| ২৬||

Adhikarana shlaiShmikashukradoShe cikitsAvisheShaH| (27) · Śloka 27

শ্লৈষ্মিকে পাষাণভেদাঽশ্মন্তকাঽঽমলকক্বাথসিদ্ধং পিপ্পলীমধুকচূর্ণপ্রতীবাপং সর্পিষ্পানম্| মদনফলকষাযো বমনম্| দন্তীবিডঙ্গচূর্ণস্তৈললীঢো বিরেকঃ| রাজবৃক্ষমদনফলকষাযপ্রগাঢমাঽঽস্থাপনম্| মধুকপিপ্পলীসিদ্ধং তৈলমনুবাসনমুত্তরবস্তিশ্চ||২৭||

শ্লৈষ্মিকে পাষানভেদাদি সিদ্ধং সর্পিষ্পানম্ | মদনফলকষাযেণ বমনম্ |দন্ত্যাদি চূর্ণেন বিরেকঃ |রাজবৃক্ষাদিকষাযপ্রগাঢমাস্থাপনম্ |প্রগাঢং ভূযিষ্ঠং ঘনম্ | মধুকাদি সিদ্ধং তৈলমনুবাসনমুত্তরবস্তিশ্চ|

Adhikarana vAtajArttavadoShe cikitsAvisheShaH| (28) · Śloka 28

বাতজে পুষ্পদোষে ভার্ঙ্গীমধুকভদ্রদারুসিদ্ধং সর্পিষ্পানম্| কাশ্মর্য্যক্ষুদ্রসহাসিদ্ধং বা ক্ষীরম্| মধুকশৃগালবিন্নাকল্কং পযস্সর্পিস্সহিতং প্রিযঙ্গুতিলকল্কং বা যোনৌ ধারযেত্| সরলমুদ্গপর্ণীকষাযঃ প্রক্ষালনম্||২৮||

বাতজে পুষ্পদোষে| পুষ্পদোষঃ আর্ত্তবদোষঃ| মধুকাদিসিদ্ধং পরস্পরসমাভ্যাং পযঃসর্পিভ্যাং সম্মিশ্র্য যথাযোগম্| কল্কং পানীযপিষ্টদ্রব্যাণাম্ এতত্ পানমেব| তিলপ্রিযঙ্গ্বোঃ কল্কং যোনৌ ধারযেত্| বেতি সমুচ্চযে| প্রক্ষালনং প্রকরণাদ্যোনেঃ|| ২৮||

Adhikarana pittajArtavadoShe cikitsAvisheShaH| (29) · Śloka 29

পিত্তজে কাকোলীদ্বযবিদারীমূলক্বাথমুত্পলপদ্মকক্বাথং মধূকপুষ্পকাশ্মর্য্যফলক্বাথং বা সশর্করং পিবেত্| শ্বেতচন্দনক্বাথং বা সক্ষৌদ্রম্| ধবধাতকীকল্কং বা ঘৃতেন বা মধুকমধুরসামৃদ্বীকাকল্কম্| শম্যাকগবাক্ষীক্ষীরং বিরেকঃ| চন্দনপযস্যাকল্কং যোনৌ ধারযেত্| গৌরিকারিষ্টকষাযঃ প্রক্ষালনম্||২৯||

পিত্তজে কাকোল্যাদীনাং ক্বাথত্রযং সশর্করং দোষাদ্যপেক্ষযা বিকল্পেন যোজ্যম্| সর্পির্মধুভ্যাং সংযুক্তমনুপানমথবা শ্বেতচন্দনক্বাথং সক্ষৌদ্রম্| মধুকাদিকল্কঃ সঘৃতঃ| সর্বত্র দোষাদ্যপেক্ষযা বিকল্পঃ| শম্যাকাদিভিবিরেকশ্চন্দনাদিকল্কং যোনৌ ধারযেত্| গৈরিকাদিকষাযং প্রক্ষালনম্|| ২৯||

Adhikarana shlaiShmikArttavadoShe cikitsAvisheShaH| (30) · Śloka 30

শ্লৈষ্মিকে কুটজকটুকাশ্বগন্ধাক্বাথং পিবেত্| সমাক্ষিকং বা ক্ষীরিবৃক্ষপ্রবালক্বাথম্| এতেষামেব বা চূর্ণং মধুঘৃতাভ্যাং লিহ্যাত্| মদনফলকষাযেণ বমনম্| তত্কল্কমেব চ যোনৌ ধারযেত্| লোধ্রতিন্দুককষাযঃ প্রক্ষালনং বস্তমেষমূত্রং বা||৩০||

শ্লৈষ্মিকে কুটজাদিক্বাথং সমাক্ষিকম্| এতেষামপীতি ক্ষীরিবৃক্ষপ্রবালানামেব||৩০||

Adhikarana kuNaparetasi cikitsA| (31) · Śloka 31

কুণপরেতসি ধাতকীপুষ্পখদিরার্জুনদাডিমৈঃ সিদ্ধমসনাদিভির্বা সর্পিঃ পাযযেত্||৩১||

কুণপরেতসি ধাতক্যাদিভিঃ পক্বং সর্পিঃ পাযযেত্| অসনাদিগণেন চ পক্বম্||৩১||

Adhikarana granthiretasi cikitsA| (32) · Śloka 32

গ্রন্থিরেতসি পাষাণভেদা পলাশভস্মনা বা||৩২||

গ্রন্থিরেতসি পাষাণভেদপক্বং পলাশভস্মনা বা|| ৩২||

Adhikarana pUyaretasi cikitsA| (33) · Śloka 33

পূযরেতসি পরুষকাদিন্যগ্রোধাদিভ্যাম্||৩৩||

পূযরেতসি পরুষকাদিন্যগ্রোধাদিভ্যাং বা সাধিতং পানোপযোগে ঘৃতম্|| ৩৩||

Adhikarana mUtrapurISharetasi cikitsA| (34) · Śloka 34

মূত্রপুরীষরেতসি বাযুনাতিবিকৃতে হিঙ্গূশীরচিত্রকৈরথবা চিত্রকবিতুন্নকপ্রিযঙ্গুসমঙ্গামৃণালসিদ্ধম্ এলামোচচূর্ণপ্রতীবাপম্||৩৪||

মূত্রপুরীষরেতসি নাতিদুষ্টে চিকিত্সা| অতিদুষ্টে উপেক্ষা, অনুপ্রক্রমণমেব| ঘৃতং হিঙ্গ্বাদিত্রযপক্বম্| অথবা চিত্রকাদিসিদ্ধমেলামোচচূর্ণপ্রতীবাপম্| প্রতীবাপো যঃ সিদ্দে চ প্রকীর্য্যত প্রক্ষিপ্যতে|| ৩৪||

Adhikarana granthyArtave cikitsA| (35) · Śloka 35

তথ গ্রন্থ্যার্ত্তবে পাঠাত্রিকণ্টকবৃক্ষকক্বাথম্||৩৫||

সুবোধম্|| ৩৫||

Adhikarana kuNapapUyArttave cikitsA| (36) · Śloka 36

কুণপপূযার্ত্তবে চন্দনক্বাথং পিবেত্| ত্রিফলাকল্কক্বাথৌ চাত্র ধারণাচমনে||৩৬||

অত্রেতি কুণপপূযার্ত্তবযোঃ প্রত্যবমর্শঃ| ধারণং যোনৌ|| ৩৬||

Adhikarana shukrArttavadoSheShu sAmAnyA cikitsA| (37) · Śloka 37

সর্বেষু চ শুক্রার্ত্তবদোষেষু স্ত্রীপুংসৌ স্নেহাদিকর্মভির্বিশেষেণ চোত্তরবস্তিভিঃ পুনঃ পুনরুপাচরেত্| যথাস্বং চ যোনৌ কল্কৈঃ পিচুভিশ্চ| ইত্যেবং বিশুদ্ধশুক্রার্ত্তবৌ পূর্বোক্তং বিধিমাসেবেতাম্||৩৭||

স্নেহাদীনি কর্মাণি ধূমান্তানি| সর্বেষু শুক্রার্ত্তবদোষেষু যদুক্তং, তৈঃ স্নেহাদিভিরুপাচরেত্| যথাস্বমিতি| যত্র যদৌষধং তত্র তদেব কল্কেন পিচুনা দেযং যোনাবিতি| পূর্বোক্তং বিধিং ঘৃতক্ষীরতৈলমাংসাদিকম্|| ৩৭||

Adhikarana RutukAlaH tatra matAntarANi ca| (38) · Śloka 38

ঋতুস্তু দৃষ্টার্ত্তবো দ্বাদশরাত্রং ভবতি| ষোডশরাত্রমিত্যন্যে| শুদ্ধযোনিগর্ভাশযার্ত্তবাযা মাসমপি কেচিত্| তদ্বদদৃষ্টার্ত্তবোঽপ্যস্তীত্যপরে||৩৮||

ঋতাবিত্যুক্তং তত্র ন জ্ঞাযতে কিযান্ কাল ঋতুর্ভবতীত্যাহ--ঋতুস্ত্বিত্যাদি| মাসি ভবাদার্ত্তবদর্শনাদারভ্য যাবত্ দ্বাদশরাত্রম্| অন্যে ত্বাচার্য্যাঃ ষোডশরাত্রমিতি বদন্তি| অন্যে ত্বেবং বদন্তি--সর্বথা যোন্যাদীনাং শুদ্ধৌ দোষানুপহতত্বে সতি মাসমৃতুর্ভবতীতি| অত্র সদৈবর্ত্তুঃ| ক্রমোপচযাপচযে তু বিশেষঃ| গর্ভাধানায ন বিশেষঃ| ঋতুত্বোপদর্শনরহিতমন্যে ঋতুমিচ্ছন্তি| ইতি মতচাতুর্বিধ্যং গর্ভস্যাঽনিযতদর্শনাত্|| ৩৮||

Adhikarana RutumatyA lakShaNam| (39) · Śloka 39

ক্ষামপ্রসন্নবদনাং স্ফুরচ্ছ্রোণিপযোধরাম্| স্রস্তাক্ষিকুক্ষিং পুংস্কামাং বিন্দ্যাদৃতুমতীং স্ত্রিযম্||৩৯||

যোন্যাদিশুদ্ধ্যশুদ্ধিভ্যাং চোপপ্লবতেঽতস্তত্র নিশ্চযায ঋতুমত্যা লক্ষণং ক্ষামবদনত্বাদিকমুচ্যতে| স্রস্তং সন্ধিবন্ধেভ্যঃ শিথিলীভূতমক্ষিকুক্ষি যস্যাঃ|| ৩৯||

Adhikarana RutAvatIte garbhAsambhavasya hetuH| (40) · Śloka 40

পদ্মং সঙ্কোচমাযাতি দিনেঽতীতে যথা তথা| ঋতাবতীতে যোনিঃ স্যাচ্ছুক্রং নাতঃ প্রতীচ্ছতি||৪০||

দিনেষ্বর্ত্তোশ্চ সাদৃশ্যং পদ্মস্য যোনেশ্চাতঃ ক্রমসঙ্কোচাদ্ধেতোঃ দিনেঽতীতে শর্বর্য্যাম্ অতীতেঽপ্যৃতৌ যোনির্বীজং ন গৃহ্ণাতি| গর্ভাশযং ন প্রাপযতীত্যর্থঃ|| ৪০||

Adhikarana Arttavasa~jcayakAlaH vAyorArttavaprartakattva~jca| (41) · Śloka 41

মাসেনোপচিতং রক্তং ধমনীভ্যামৃতৌ পুনঃ| ঈষত্কৃষ্ণং বিগন্ধং চ বাযুর্যোনিমুখান্নুদেত্||৪১||

সাম্প্রতিকমাসভবং তু ত্র্যহং স্রবতি ত্র্যহাদূর্ধ্বমুপচীযত এব| অনেন চ মাসি মাস্যাভিনব ঋতুর্ভবতীতি দর্শিতম্| তত্র চ পূর্বমুপচিতরক্তস্রুতৌ নিযতঃ কালঃ| অতিস্রুতৌ যোনিদোষোক্তম্|| ৪১||

Adhikarana RutumatyA niyamAH| (42) · Śloka 42

ততঃ পুষ্পদর্শনি প্রথমদিবসাত্প্রভৃতি ব্রহ্মচারিণী, স্নানাদ্যলঙ্কাররহিতা, দর্ভসংস্তরশাযিনী ত্রিরাত্রমাসীত| পর্ণশরাবকরতলান্যতমেন যাবকং পযসা সিদ্ধমল্পং কর্শনার্থম্ অশ্নীযাত্| তীক্ষ্ণোষ্ণাঽম্ললবণানি চ বর্জযেত্||৪২||

ততঃ ঋতুপ্রাপ্তৌ পুষ্পদর্শনে প্রথমদিবসাত্ প্রভৃতি ত্রিরাত্রম্ আসীতেতি সম্বন্ধঃ| কিম্ভূতা ? ব্রহ্মচারিণী পুংসা অসঙ্গতা| স্নানাদিকযা শোভার্থযা মৃজযা রহিতা অলঙ্কাররহিতা চ| দর্ভশয্যাশাযিনী চ| তস্মিংশ্চ ত্রিরাত্রে পর্ণাদীনামন্যতমে স্থিতং যাবকম্ অন্নং ক্ষীরেণ সিদ্ধং কর্শনার্থম্ অল্পম্ অশ্নীযাত্| কর্শনং রক্তশুদ্ধযে মার্গশুদ্ধযে চ| যাবকং চ যবমেব নিস্তুষমিতি তস্মিন্নেব ক্রিযতে| তস্মিংশ্চ ত্রিরাত্রে তীক্ষ্ণাদীনি বর্জযেদ্ রক্তাঽঽশুদ্ধিভযাত্|| ৪২||

Adhikarana RutusnAtAyAH prathamabhartRudarshanavidhiH tatra hetushca| (43) · Śloka 43

চতুর্থেঽহন্যুদ্বর্ত্তিতা শীতসলিলস্নাতাঽনুলিপ্তাঽলঙ্কৃতা শুক্লমাল্যাম্বরা কৃতমঙ্গলস্বস্ত্যযনৈবংবিধমেবং ভর্ত্তারং পশ্যেদনন্যমনাঃ| তদা হি যাদৃশমেব পশ্যতি চিন্তযতি বা তাদৃশং প্রসূত ইতি||৪৩||

চতুর্থে ত্বহন্যুদ্বর্তিতত্বাদিযুক্তা তথাবিধমেব উদ্বতির্ততত্বাদিযুক্তং ভর্তারং পরিজনদর্শনাত্ পূর্বম্ অনন্যমনাঃ সতী পশ্যেত্| শীতসলিলেন স্নাতা পশ্চাচ্চানুলিপ্তা সুকান্তিভির্গন্ধৈঃ| শুক্লং মাল্যম্ অম্বরং চ যস্যাঃ সা তথা| তথাবিধদর্শনে স্বযং প্রযোজনমাহ-- তদেতি|| ৪৩||

Adhikarana gunavatputrArthI saptarAtramupekSheta| (44) · Śloka 44

ততঃ স্নানাত্ পুনরপি গুণবত্ পুত্রার্থী ত্রিরাত্রম্ উপেক্ষেত| পুষ্পদর্শনাত্ সপ্তরাত্রম্||৪৪||

ততঃ স্নানাদনন্তরং পুরুষো যদ্যুত্কৃষ্টগুণযুক্তং পুত্রমর্থযেত ততোঽন্যচ্চ ত্রিরাত্রি তামুপেক্ষেত ন সঙ্গচ্ছেদিত্যর্থঃ| স্নানদিনমুভযস্মিন্নপি ত্রিরাত্রে সম্বধ্যতে| তেন সপ্তরাত্রগ্রহণম্ অষ্টরাত্রভ্রান্তিনিবৃত্ত্যর্থম্|| ৪৪||

Adhikarana yugmAsu putrakAmaH saMvishet| (45) · Śloka 45

অথাষ্টম্যাং দশম্যাং দ্বাদশ্যাং বা রাত্রৌ পুত্রকামঃ সংবিশেত্||৪৫||

ততোঽনন্তরং পুষ্পদর্শনাদষ্টম্যাং রাত্রৌ পুত্রকামো নারীং সংবিশেদ্ দশম্যাং দ্বাদশ্যাং বা|| ৪৫||

Adhikarana ayugmAsu duhitRukAmaH saMvishet| (46) · Śloka 46

পঞ্চম্যাং সপ্তম্যাং নবম্যাং বা দুহিতৃকামঃ||৪৬||

দুহিতৃকামঃ পঞ্চম্যাং সপ্তম্যাং নবম্যাং বা| অত্র স্নানদিনাচ্চ ত্রিরাত্রমনুপেক্ষণং দুহিতুর্মাত্রার্ত্তবস্যৈব সম্ভবহেতুত্বাত্|| ৪৬||

Adhikarana prashastarAtriShUttarottarA rAtrayaH prashastatarAH| (47) · Śloka 47

তাসূত্তরোত্তরমাযুরারোগ্যৈশ্বর্য্যসৌভাগ্যবলবর্ণেন্দ্রিযসম্পদপত্যস্য ভবতি| অতঃ পরং তূত্তরোত্তরমেবাযুরাদীনাং হ্রাসঃ||৪৭||

এতাসু যথোক্তাসু পুত্রদুহিতৃরাত্রিষু যা রাত্রির্যস্য উত্তরা সা ততঃ পুত্রস্য দুহিতুর্বা আযুরাদীনাং হেতুঃ| তেনাঽষ্টম্যা রাত্রের্দশমী জ্যেষ্ঠা ততোঽপি দ্বাদশী| এবং পঞ্চম্যাস্ততোঽপি সপ্তমী| অতোঽনন্তরং ত্রোদশ্যাদিষু রাত্রিষু যথোত্তরমেব পুত্রস্যাযুরাদীনাং হ্রাসঃ, দশম্যাদিষু চ দুহিতুঃ|| ৪৭||

Adhikarana strIpuMgarbhasambhave upapattiH| (48) · Śloka 48

তত্র যুগ্মাসু রাত্রিষ্বল্পীভবত্যার্ত্তবমযুগ্মাস্বাপ্যায্যতে| তস্মাত্তাসু ক্রমাত্ পুত্রস্য দুহিতুশ্চ জন্ম| অতএব চানুপরতার্ত্তবদর্শনাং পুত্রার্থী বিপ্রকৃষ্টেষ্বপ্যহস্তু নোপেযাত্||৪৮||

যুগ্মাসু চ সমাসু দ্বিতীযাচতুর্থ্যাদিষু রাত্রিষু সমদোষবলাদের্যথোক্তবযসো মিথুনস্য গর্ভারম্ভকশুক্ররক্তাপেক্ষযা অত্রাঽঽদ্যরাত্র্যপেক্ষয বাঽল্পীভবতি রক্তম্, অতস্তাসু শুক্রস্য বাহুল্যাত্ পুমান্ জাযতে কারণস্যানতিক্রমণাত্ কার্যস্য| এবমযুগ্মাসু প্রথমতৃতীযাদিষু দৃষ্টার্ত্তবস্য স্বভাবেন বহুত্বাচ্ছুক্রস্যাল্পত্বাদ্ দুহিতৃজন্ম| অতএব রক্তস্যাল্পত্বাদ্ধেতোর্যতঃ পুত্রস্য জন্ম, ততঃ পুত্রার্থং পুরুষোঽনুপরতার্ত্তবদর্শনাং পরিদৃশ্যমানার্ত্তবাং বিপ্রকৃষ্টদর্শনাদযুগ্মেষ্বহঃসু স্ত্রিযং নোপেযাত্| আর্ত্তবে দৃশ্যমানে অষ্টম্যাদিরাত্রিষ্বপি পুত্রার্থী নোপেযাদিত্যর্থঃ|| ৪৮||

Adhikarana AhArAvashAdyugmAyugmAsu shukrasya nyUnAdhikye durapatyatA| (49) · Śloka 49

যদি ত্বাহারনুরোধাদযুগ্মাসু শুক্রস্যাধিকতা চ ন্যূনতা স্যাত্ততঃ পুমান্ স্ত্র্যাকৃতির্দুর্বলো হীনাঙ্গো বা জাযতে| স্ত্রী চ পুরুষাকৃতির্দুর্বলা হীনাঙ্গী বা||৪৯||

আহারাদিবিশেষবশাচ্চ যদ্যযুগ্মাসু শুক্রবাহুল্যং যুগ্মাস্বাঽঽর্ত্তববাহুল্যং ভবতি তদা সংযোগাত্ পুমান্ স্ত্র্যাকৃতিত্বাদিযুক্তঃ স্ত্রী চ পুরুষাকৃতিত্বাদিযুক্তা জাযতে|| ৪৯||

Adhikarana klIbA~apratyatAyAH kAraNam| (50) · Śloka 50

একাদশীত্রযোদশ্যোস্তু নপুংসকং স্যাত্||৫০||

একাদশীত্রযোদশ্যোর্নপুংসকং ভবেত্|| ৫০||

Adhikarana putrIyaM vidhAnAdi| (51) · Śloka 51

অথোপাধ্যাযঃ পুত্রীযং বিধানমাচরেত্| শূদ্রাযাস্তু মন্ত্রবর্জিতম্| যাদৃশং চ পুত্রমাশাসীত তদ্রূপবর্ণচরিতাঞ্জনপদাননুচিন্তযেতি স্ত্রী বাচ্যা চ| তজ্জনপদাহারবিহারোপচারপরিচ্ছদাংশ্চানুবিদধীত্||৫১||

অথেতি মঙ্গলে| উপাধ্যাযঃ পুত্রীযবিধানং বিধিমাচরেত্ কুর্বীত| শূদ্রাযাস্তু মত্রবর্জিতং বিধানমাচরেত্| স্ত্রী যাদৃশং পুত্রমাশাসীতাভিলষেত্, তদ্রূপাদিমতো জনপদাননুচিন্তযেতি বাচ্যা চ| সা চ স্ত্রী মজ্জনপদাহারাদীংশ্চানুবিদধীত কুর্বীত|| ৫১||

Adhikarana putrIyavidhyanuShThAnAtparaM dampatyoshcaryyA| (52) · Śloka 52

কর্মান্তে চ পুমান্ মাসং ব্রহ্মচারী সর্পিঃক্ষীরাভ্যাং শল্যোদনমভিপ্রাশ্য নাত্যাঽঽশিতঃ সুখী স্রগ্বী সুমনাঃ প্রীণীতাঙ্গঃ শুক্লনিবসনো মৌহূর্তিকানুমতে রাত্রিভাগে কল্যাণানি চিন্তযাস্তদভিকামঃ স্বাস্তীর্ণং শযনং দক্ষিণেন পাদেন প্রাগারোহেত্| তদ্বিধৈব চ প্রমদা কর্শিতাঙ্গী তৈলমাষোত্তরাহারা, পূর্বং বামপাদেন পুরুষস্য দক্ষিণতঃ শয্যামধিরোহেত্||৫২||

কর্মান্তে পুত্রীযবিধ্যনুষ্ঠানাবসানে পুমান্ মাসং ব্রহ্মচারী আজ্যক্ষীরাভ্যা শাল্যন্নং ভুক্ত্বা নাত্যাশিত ইত্যাদিকঃ সন্ মৌহূর্তিকানুমতে রাত্রভাগে কল্যাণনি চিন্তযতস্তস্যামভিকামঃ দক্ষিণেন পাদেন স্ত্রীতঃ প্রাক্ স্বাস্তীর্ণং শযনমারোহেত্| প্রমদাপি তদ্বিধৈব পুরুষবিশেষণবিশিষ্টৈব পূর্বোক্তযবান্নভোজনেন কর্শিতাঙ্গী তৈলমাষোত্তরাহারা পূর্বং বামেন পাদেন তস্য পুরুষস্য দক্ষিণতঃ শয্যামারোহেত্|| ৫২||

Adhikarana shayyAdhirohaNe prayojyamantrAH| (53) · Śloka 53

তত্র মন্ত্রং প্রযুঞ্জীত-- 'আযুরসি, সর্বতঃ প্রতিষ্ঠাসি, ধাতা ত্বা দধাতু, বিধাতা ত্বা দধাতু, ব্রহ্মবর্চসা ভব ইতি| ব্রহ্মা বৃহস্পতির্বিষ্ণুঃ সোমসূর্যস্তথাঽশ্বিনৌ| ভগোঽথ মিত্রাবরুণৌ বীরং দধতু মে সুতম্||৫৩||

তত্র মন্ত্রমিতি| মন্ত্রার্থ ঊহ্যঃ|| ৫৩||

Adhikarana saMveshanaprakArastaduttarakRutya~jca| (54) · Śloka 54

ততঃ পরস্পরং সামভিরভিসান্ত্ব্য সহর্ষমনুকূলং সংবিশেতাম্| পর্যাপ্তে চৈনাং শীতোদকেন সহসা পরিষিঞ্চেত্||৫৪||

তত ইতি| শয্যারোহণাঽনন্তরং তৌ পরস্পরং সামভিঃ সান্ত্বযিত্বা সহর্ষমনুকূলং চ সংবিশেষতাম্| পর্য্যাপ্তেতি| পর্যাপ্তে ব্যবাযেঽবসিতে সত্যেনাং স্ত্রিযং সহসা শীতোদকেন পরিষিঞ্চেত্|| ৫৪||

Adhikarana maithune~ayogyau strIpuruShau (55) · Śloka 55

তত্রাঽত্যাশিতা, ক্ষুধিতা, পিপাসিতা, ভীতা, বিমনাঃ, শোকার্ত্তা, ক্রুদ্ধাঽতিমেদুরাঽন্যকামাঽব্যবাযকামা বা ন গর্ভং ধত্তে, বিগুণং বা| তথা পুরুষোঽপি| ন চাসৌ অধস্তিষ্ঠেত্| তথা হি স্ত্রীচেষ্টঃ পুমাঞ্জাযতে, পুংশ্চেষ্টা বা স্ত্রী||৫৫||

অথ স্ত্রিযা উক্তপ্রকারবৈপরীত্যে দোষমাহ-- তত্রেতি| তত্র ব্যবাযে স্ত্রী অত্যাশিতত্বাদিযুক্তা গর্ভং ন ধত্তে, বিগুণং বা গর্ভং ধত্তে| তথা পুরুষোঽপীত্যনেনাঽত্যাশিতত্বাদিকং পুরুষেণাপি বর্জনীযমিত্যুক্তম্| পুংসো বিশেষমাহ-- ন চেতি| অসৌ পুরুষো নাঽধস্তিষ্ঠেত্, তত্র দোষমাহ-- তথাহীতি| তথা সতি স্ত্রীচেষ্টঃ পুমাঞ্জাযতে| স্ত্রী চ পুংশ্চেষ্টা জাযতে|| ৫৫||

Adhikarana nyubjapArshvagatastrIsevananiShedhAdi (56) · Śloka 56

ন চ ন্যুব্জাং বা সেবেত| ন্যুব্জাযাং বাতো বলবান্ স যোনিং পীডযতি| দক্ষিণপার্শ্বগতাযাঃ শ্লেষ্মা পীডিতশ্চ্যুতঃ পিদধাতি গর্ভাশযম্| বামপার্শ্বগতাযাস্তদ্বত্ পিত্তং বিদহতি রক্তশুক্রে| তস্মাদুত্তানং বীজং গৃহ্ণীযাত্| তথা হি যথাস্থানমেব তিষ্ঠন্তি দোষাঃ||৫৬||

তস্মিংশ্চ কালে ন্যুব্জাং পার্শ্বগতাং কা ন সেবেত উত্তানামেব সেবেতেতি যাবত্| ন্যুব্জা অধোমুখী| পুরুষস্যাঽধঃস্থিতাবপি দক্ষিণপার্শ্বগাযা দক্ষিণপার্শ্বস্য শ্লেষ্মাশ্রযত্বং পিত্তস্য বামপার্শ্বাশ্রযত্বাচ্ছ্লেষ্মা পীডিতঃ স্বস্থানাচ্চ্যুতঃ পিত্তেন সহ গর্ভাশযং বিদধতি, তথৈব বামপার্শ্বগতাযাস্তদ্বত্পিত্তং বিদহতি|| ৫৬||

Adhikarana puMsavanakAlaH matAntarANi ca (57) · Śloka 57

লব্ধগর্ভাং চৈনাং বিদিত্বা, প্রাগ্ব্যক্তীভাবাদ্গর্ভস্য পুষ্যে পুংসবনানি প্রযুঞ্জীত| দ্বাদশরাত্রমিত্যন্যে| তত্রাপি যুগ্মদিনেষ্বিতি কেচিত্| প্রত্যহমিত্যপরে||৫৭||

অথ যত্যোক্তেন লক্ষণেন লব্ধগর্ভাং বিদিত্বা কুক্ষিগৌরবাদিলক্ষণাদ্গর্ভব্যক্তীভাবাত্| পূর্বস্মিন্নেব দিনে পুষ্যনক্ষত্রবতি পুত্রার্থিন্যাং ভিষক্ পুংসবনানি যোগানি প্রযুঞ্জীত বক্ষ্যমণানি যৈঃ পুমাংসং সূযেত| প্রথমেঽহ্নি কেচিত্ পুংসবনমিচ্ছন্তি| তত্রাপ্যযুগ্মদিনং বিভাগযুগ্মেষু দিনেষ্বিতি কেচিত্ প্রবদন্তি| কেচিত্তন্ত্রকারাঃ প্রত্যহং পুংসবনমিচ্ছন্তি| গর্ভলক্ষণাত্ পূর্বং প্রতিদিনমেবেতি কেচিত্| কেচিত্তু দ্বাদশরাত্রস্যৈব যুগ্মদিনেষ্বিতি বিশেষং নিক্ষিপন্তি| যুগ্মদিনানি দ্বিতীযচতুর্থাদীনি|| ৫৭||

Adhikarana puMsavanavidhiH (58) · Śloka 58

তদ্যথা-- লক্ষ্মণা-বটশ্রৃঙ্গ-সহদেবা-বিশ্ব-দেবানাম-ন্যতমাং ক্ষীরেঽভিষুত্য ত্রীশ্চতুরো বা বিন্দূন্ দক্ষিণে নাসাপুটে স্বযমাসিঞ্চেত্ পিচুনা| বামে তু দুহিতৃকামা| ন চৈতান্ নিষ্ঠীবেত্| তথা পুষ্যোদ্ধৃতাযাঃ শ্বেতবৃহত্যা মূলকল্কাদ্রসং নাবযেত্| তদ্বচ্চোত্পলপত্রং কুমুদপত্রং লক্ষ্মণামূলং বটশৃঙ্গাণি চাষ্টৌ চ নাবযেত্| শুক্ল-মাল্যাম্বরধরা চ নারী পুষ্যোদ্ধৃতাযা লক্ষ্মণাযা মূলকল্কমুদুম্বরমাত্রং পযসা পিবেত্ পুত্রস্যোত্পাদনায স্থিতযে চ| তদ্বদ্গৌরদণ্ডমপামার্গং জীবকর্ষভকৌ শঙ্খপুষ্পীমধ্যদণ্ডাং সহচরং নগ্নজিতমগ্নিজিহ্বামষ্টৌ বা বটশ্রৃঙ্গানি| শালিপিষ্টস্য চ পচ্যমানস্যোষ্মাণমাঘ্রায তদ্রসং দেহল্যাং স্থিতা পূর্ববন্নাবযেত্| যচ্চান্যদপি ব্রাহ্মণা বৃদ্ধস্ত্রিযো বা ব্রূযুস্তচ্চ কুর্যাত্||৫৮||

তদ্যথেতি পুংসবনপ্রদর্শনপরম্| লক্ষ্মণাদীনামন্যতমং যথালাভং ক্ষীরেণাভিষুত্য বস্ত্রান্তর্গতং গর্ভবৃদ্ধ্যর্থং চ জপন্ পবিত্রান্ মন্ত্রান্ বামহস্তেন দক্ষিণনাসাপুটে সিঞ্চেত্ অনেনৈব বিধিনা দুহিতৃকামা বামে নাসাপুটে সিঞ্চেত| তাংশ্চ বিন্দূন্ ন নিষ্ঠীবেত্| মুখেন নোদ্গিরেদেবেত্যর্থঃ| দুহিতৃকামেতি প্রাসঙ্গিকম্| তথৈব বামদক্ষিণভেদেন পরিষেচনাত্ পুংস্ত্রিযৌ ভবতঃ| বামে দুহিতা দক্ষিণে পুমান্| এবং পুষ্যোদ্ধৃতাযাঃ শ্বেতবৃহত্যাঃ কল্কান্ সুশ্লক্ষ্ণপিষ্টাদযো রসস্য নাবযেত্| তদ্বদেব বামদক্ষিণভেদেন রসবিধানেনোত্পলপত্রাদীনামন্যতমং নাবযেত্| তথৈবাষ্টৌ বটশ্রৃঙ্গানি| শ্রৃঙ্গং প্রথমোদ্ভিন্নং পত্রাঙ্কুরম্| শুক্লমাল্যাদিকা নারী পুষ্যোদ্ধৃতাযা লক্ষ্মণাযা মূলকল্কমুদুম্বরফলমাত্রং পযসা পিবেত্ পুত্রস্যোত্পাদনায স্থিতযে চ| নাসযা বা গর্ভিণ্যা মুখেন বা পীতমিতি| কেচিত্ তত্কালমপি পীতো ব্যক্তস্যাপি পুত্রস্য পরিস্থাপনং রক্ষাভিধানাং স্থিতিং করোতি| উদুম্বরং নাম ফলবিশেষঃ| ক্ষীরং চ পানাযালোডনোপযোগি| সর্বাপি তদ্বল্লক্ষ্মণা বিধানেন গৌরদণ্ডাদীন্যপি পিবেত্| সংখ্যাযামনিযমঃ| তেন যথাসম্ভবম্ একং, দ্বে, ত্রীণি| শালিপিষ্টস্য বা পিণ্ডীকৃতস্যাগ্নিনা পচ্যমানস্যোষ্মাণমাঘ্রায তত এব পীডিতং সা যোষিত্ দ্বারদেহল্যং দ্বারশাখাধারে স্থিতা দক্ষিণে নাসাপুটে স্বযং সিঞ্চেদিতি পুংসবনানি| তথান্যদপি যত্কিঞ্চিদ্ বৃদ্ধস্ত্রিযো ব্রাহ্মণাশ্চ ব্রূযুস্তত্ সর্বং যোষিত্ কুর্যাত্| বৃদ্ধস্ত্রীগ্রহণং গর্ভিণ্যাং হেযোপাদেযতত্ফলানামনুভবাভ্যাসেন পরিজ্ঞানবিশেষপ্রদর্শনার্থং, ন তু সামান্যেন বৃদ্ধস্ত্রীবচনস্যানুষ্ঠেযত্বম্| তথৈব ব্রাহ্মণবচনং শ্রৌতস্মার্ত্তবিধানোপলক্ষণার্থম্|| ৫৮||

Adhikarana garbhasthApanAni (59) · Śloka 7

ততঃ প্রজাস্থাপনাখ্যা দশৌষধীঃ শিরসা দক্ষিণেন চ পাণিনা ধারযেত্| এতাভিশ্চ সিদ্ধং পযো ঘৃতং বা পিবেত্| এতাভিরেব পুষ্যে-পুষ্যে স্নাযাত্| সদা চ সমালভেত| তথা সর্বাসাং জীবনীযানামৌষধীনাং সদোপযোগস্তৈর্বিধানৈঃ| ইতি গর্ভস্থাপনানি| সৌম্যাকৃতিবচনোপচারচেষ্টাশ্চ প্রিযহিতানুবর্তিনঃ পরিচারকাস্তথা ভর্তেতি||৭||

ততোঽনন্তরমৈন্দ্রীব্রাহ্মীত্যাদিনা দশৌষধীঃ প্রজাস্থাপনাখ্যা গর্ভিণী শিরসা ধারযেত্ তথা দক্ষিণেন চ পাণিনা| তথাতাভিঃ প্রজাস্থাপনাখ্যাভির্যথাস্ববিধানেন সিদ্ধং পযো ঘৃতং বা পিবেত্| সুবোধম্| তৈস্তৈর্বিধানৈর্বিধারণস্নানাদিভিরিতি| গর্ভস্থাপনানিযৈর্গর্ভো ন স্রবতি| তথা সৌম্যাকৃত্যাদিযুক্তাঃ পরিচারকা ভর্তা চ গর্ভস্থাপনম্| সৌম্যা আকৃত্যাদযশ্চেষ্টান্তা যেষান্তে তথোক্তাঃ প্রিযাশ্চ তে| তে ক্রিযাশ্চেষ্টাস্তথা হিতাশ্চানুবর্তিনশ্চ তে তথোক্তাঃ|| ৫৯||

Adhikarana punarupagamananiShedhakAlaH (60) · Śloka 60

পুনশ্চৈনাং মাসাদুপেযাত্||৬০||

এনাং চ লব্ধগর্ভাং মাসাদুপেযাদ্ ভর্তেতি সম্বধ্যতে| নেদং মাসাদুপগমনবিধানপারমুচ্যেত| কিং তর্হি ? মাসমত্যন্তপ্রতিষেধপরম্|

Adhikarana garbhasya varNavisheShahetavaH (61) · Śloka 61

তত্র শুক্রে শুক্লে ঘৃতমণ্ডাভে বা গর্ভস্য গৌরত্বম্| তৈলাভে কৃষ্ণত্বম্| মধ্বাভে শ্যামত্বম্| তথা ক্ষীরাদিমধুরাণামুপযোগাত্ মাতুরুদকবিহারাচ্চ গৌরতা| তিলান্নবিদাহিনাং কৃষ্ণতা| ব্যামিশ্রাণাং শ্যামতা| দেশকুলানুবৃত্তিতশ্চ বর্ণভেদঃ| তথা তেজোধাতোরুদকাঽঽকাশধাতুসম্পর্কাদ্গৌরতা, ভূবাযুসম্পর্কাত্ কৃষ্ণতা, সর্বধাতুসাম্যে শ্যামতা||৬১||

অনন্তরং গর্ভস্য বর্ণবিশেষহেতুপ্রদর্শনং করোতি-- তত্র শুক্রেত্যাদি| শুক্রং বিশিনষ্টি-- পুরুষাহারাদিহেতুনা শুক্রস্যানেকশো দৃষ্টেন বর্ণেন ভবিষ্যতস্তদ্গর্ভস্য বর্ণবিশেষনিযম উচ্যতে| এতেন বর্ণবিশেষস্য পিতুরাযত্তত্ত্বং দর্শিতম্| মাতাঽপ্যন্তর্বত্নী সতী যদা সৌম্যান্যাসেবতে তদা গর্ভস্য গৌরতা| উদকবিহারঃ জলক্রীডা| আগ্নেযৈস্তিলাদিভিঃ কৃষ্ণতা| বিদাহিনঃ সর্বে দ্রব্যতো গুণতঃ কর্মতশ্চ| তেনোষরদেশাধিবাসোঽপি গৃহীতঃ| মিশ্রাণাং সেবনাত্ শ্যাবত্বম্| এবং স্থিতিদেশকুলানুবৃত্ত্যাপি বর্ণভেদো ভবতি| যথা-- ঔত্তরাপথিকানাং গৌরতা, দাক্ষিণাত্যানামান্ধ্রদ্রবিডপাড্যাদীনাং কৃষ্ণতা| মধ্যদেশে শ্যাবত্ত্বমিত্যেবমাদি| তথা কুলেঽপি জাত্যা শিল্প্যাদিভেদভিন্নে ক্বচিদ্গৌরত্বং, ক্বচিত্কৃষ্ণত্বং, ক্বচিচ্ছ্যাবত্বং চেতি| ন কেবলমেতদেব বর্ণবিশেষকারণং যাবদ্গর্ভারম্ভকগৃহা ভূতাধিক্যমপি| এতদ্দর্শযতি-- তথেত্যাদি| তেজোদধানোর্বর্ণবিশেষকর্ত্তৃত্বে সতি প্রাধান্যাদ্ বর্ণসংগ্রহেষ্বাধিক্যেনৈবান্বযিত্বম্| তেষাং চাহারবিহারদেশকুলাদিভূতাধিক্যানাং পরস্পরনানাবিধভেদভিন্নানাং মিশ্রীভাবেন বর্ণানাং মানম্| ইতি গর্ভস্য বর্ণবিশেষতাকরা ভাবা উক্তাঃ|| ৬১||

Adhikarana garbhasya sattvavisheShakarANi (62) · Śloka 62

সত্ত্ববিশেষকরাণি পুনর্মাতাপিতৃসত্ত্বাদযোঽন্তর্বত্ন্যাঃ শ্রুতযশ্চাভীক্ষ্ণং স্বোপচিতং চ কর্ম ভবতি| পূর্বাভ্যাসশ্চেতি||৬২||

সত্ত্ববিষেষাণাং কারণত্বমুচ্যতে-- মাতেত্যাদি| গর্ভস্য হ্যেতদেব প্রধানং যত্সত্ত্বং চিত্তম্| সত্ত্বশব্দেন শুদ্ধং মন উচ্যতে| যচ্চ পরমাত্মনশ্চেতনস্বরূপস্যাপি মনসা সংযুক্তস্য চেতনাদিভির্ব্যক্তং চৈতন্যং তন্মনস উপচারাদুচ্যতে| তস্য চ মনসো রজস্তমোভ্যামশুদ্ধিঃ| তাভ্যামেবাসংখ্যভেদেন পরস্পরনানাসংযোগবিশেষেণ তস্য সত্ত্বস্য বিশেষা উত্পদ্যন্তে| গর্ভস্য তু সত্ত্ববিশেষপ্রাপ্তৌ কিং কারণমিত্যুচ্যতে __ মাতাপিতৃসত্ত্বাদয ইতি| আদিগ্রহণেন মাতাপিতৃসম্বন্ধিনাং শীলকুলাচারশৌচাদীনাং গ্রহণম্| অন্তর্বত্ন্যাঃ গর্ভিণ্যাঃ| অভীক্ষ্ণং পুনঃ পুনর্বিহিতাঃ শ্রুতযো গর্ভস্য সত্ত্ববিশেষকরা| তেন সুসত্ত্বাদীনাং বৃদ্ধাদীনাং সম্বন্ধিন্যঃ শ্রুতযো গর্ভিণ্যাঃ| অভীক্ষ্ণং শ্রুতাঃ সুসত্ত্বমেব গর্ভং জনযন্তি| অন্যেষাং দুস্সত্ত্বম্| গর্ভেণ চান্যস্মিঞ্জন্মনি যদুপচিতং কর্ম,ধর্মাধর্মলক্ষণং তদ্বশাদপি সত্ত্ববিশেষঃ সম্পদ্যতে| তথা অন্যজন্মসহস্রাভ্যস্তবাসনাবশাদপি সত্ত্ববিশেষো ভবতি| কেষা- ঞ্চিত্ সত্ত্বকরাণাং পরস্পরসংযোগবিশেষেণ গর্ভস্য সত্ত্ববিশেষাণামানন্ত্যম্|| ৬২||

Adhikarana adhyAyopasaMhAraH (63) · Śloka 63

ভবন্তি চাত্র||৬৩||

ভবন্তি চাত্রেতি তন্ত্ররীতিঃ সহেতুরধ্যাযোপসংহারশ্লোকসমুচ্চযপ্রদর্শনায|

Adhikarana Arttavasya bahvalpakAlasthitau hetuH (64) · Śloka 64

ঘৃতক্ষীরাদিনিত্যাসু মুদিতাসু কফাত্মসু| আর্ত্তবং তিষ্ঠতি চিরং বিপরীতাস্বতোঽন্যথা||৬৪||

ঘৃতাদিসৌম্যমাহারং যা নিত্যং সেবন্তে, যাশ্চ নিত্যং মুদিতা হর্ষপরাঃ, যাশ্চ শ্লেষ্মপ্রকৃতযস্তাসামার্ত্তবং গর্ভযোগ্যং শোণিতমৃতৌ বহুকালং ভবতি| ন তু ক্ষীযতে| নাপি বিকৃতিমাযাতীত্যর্থঃ| যথোক্তলক্ষণবিপরীতাসু বিপরীতং চিরং ন তিষ্ঠতীত্যর্থঃ|| ৬৪||

Adhikarana shuddhe garbhAshaye bIjanipAtAdeva garbhagrahaNam (65) · Śloka 65

নিপাতাদেব গৃহ্ণাতি রাগং বাসো যথাঽমলম্| ধ্রুবং গর্ভং তথা বীজং ক্ষেত্রং বীজমুপস্কৃতম্||৬৫||

শুদ্ধশুক্রার্ত্তবমিত্যাদের্নিপাতাদেবেত্যাদিনা হেতুমুপসংহরতি-- নিপাতাদিতি| অমলং নির্মলং, বাসো নিপাতমাত্রাদেব যথা ধ্রুবমবশ্যং রাগং গৃহ্ণাতি, তথৈবোপস্কৃতং শুদ্ধ্যাদিসংস্কারকরণেনোত্পাদিতযোগ্যত্বং স্ত্রীশরীরাখ্যং ক্ষেত্রং ধ্রুবমবশ্যং গর্ভং গৃহ্ণাতি তথৈব বীজমনন্তরোক্তেনাঽঽহারাদিনা ধ্রুবমুপনিপাতাদেব গর্ভং গৃহ্ণাতি|| ৬৫||

Adhikarana garbhali~ggAbdivyakteH pUrvameva puMsavanasya anuShTheyatvam (66) · Śloka 66

অবিরুদ্ধে ধ্রুবং দৈব কালে যুক্তস্য কর্মণঃ| সিদ্ধিঃ পুংসবনাদ্যস্মাত্পূর্বং ব্যক্তেঃ প্রযোজযেত্||৬৬||

প্রাগ্ব্যক্তীভাবাদ্গর্ভস্যেত্যত্র সহেতুকমুপসংহরতি-- অবিরুদ্ধ ইত্যাদি| অস্মাদ্ধেতোর্ব্যক্তেঃ পূর্বং পুংসবনানি প্রযোজযেত্| যতঃ ফলাবাপ্তির্যোগ্যে কালে প্রযুক্তস্য কর্মণঃ ক্রিযাযাঃ সিদ্ধর্ধ্রুবমবশ্যম্ভাবিনী দৃষ্টা| অন্যলিঙ্গাভিমুখস্য বীজস্য ততো নির্বৃত্তিং কৃত্বা যথাভিমতলিঙ্গযোজনং দ্রব্যপ্রভাবাত্ ক্রিযতে| তচ্চ নিষ্পন্নে কার্য্যে নিষ্প্রযোজনম্| ন হি বিশিষ্টবর্ণকার্পাসার্থী নিষ্পন্নে ফলে রাগমুপদধাতি| ক্বচিত্ কালেঽপি যুক্তস্য কর্মণঃ সিদ্ধির্ন দৃষ্টেতি| চোদ্যপরিহারাযাবিরুদ্ধ ইতি বিশেষণম্| বিরুদ্ধে হি দৈবে বলবতি পূর্বজন্মনি কৃতে কর্মণি কালেঽপি যুক্তে পৌরুষস্য ন সিদ্ধিরিত্যর্থঃ|

Adhikarana puMsavanAdividhinA jAtAnAM putrANAM sadguNatvam (67) · Śloka 67

জাতাশ্চৈবং রূপবন্তো মহাসত্ত্বাশ্চিরাযুষঃ| ঋণান্মোচযিতারঃ স্যুঃ সুপুত্রাঃ পুত্রিণাং মতাঃ||৬৭||

এবংবিধেন সংস্কারেণ সুপুত্রঃ সম্পদ্যত ইত্যত্র জাতা ইত্যাদিনা প্রযোজনকথনম্| এবংবিধিনা জাতাঃ সত্পুত্রাঃ কামং পূজিতাঃ রূপাদিমন্তঃ পুত্রিণাং ঋণান্মোচযিতারঃ স্যুরিতি| পুত্রো হি দেবর্ষিপিতৃণামৃণবান্ ভবতীতি বেদদর্শনম্|| ৬৭||

Adhikarana devatAdiratAnAM mahAguNaputrotpattiH (68) · Śloka 68

দেবতাচারশৌচাদিরতা সূতে মহাগুণম্| ধাবত্যেবং চাচরিতং প্রাগ্জন্মাভ্যাসযোগতঃ||৬৮||

তথা দেবতাদিরতা মহাগুণমুদারগুণং পুত্রং সূতে| এনং চ তথাবিধমাতৃসম্ভূতং তথা স্বকর্মবশাত্ পূর্বাঽনেকজন্মাভ্যাসযোগেন তথাবিধমেবাচরিতং ধাবত্যাঽঽশ্বাযাতি||৬৮||

Adhikarana strIshukrasya garbhaM pratyaki~jcitkaratvam (69-5) · Śloka 5

যোষিতোঽপি স্রবত্যেব শুক্রং পুংসঃ সমাগমে| গর্ভস্য তত্র কিঞ্চিত্তুং করোতীতি ন চিন্ত্যতে||৬৯|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতৌ অষ্টাঙ্গসংগ্রহসংহিতাযাং শারীরস্থানেঽঙ্গ- বিভাগো নাম প্রথমোঽধ্যাযঃ||৫||

ইতি বৈদ্যপতিসিংহগুপ্তস্য সূনোর্বাগ্ভটস্য কৃতাবষ্টাঙ্গসংগ্রহসংহিতাযাং শারীরস্থানে পুত্রকামীযো নাম প্রথমোঽধ্যাযঃ যোষিত ইত্যাদিভ্রান্তিনিরাসাযোচ্যতে -- যোষিতোঽপি বিশিষ্টে পুংসঃ সমাগমে শুক্রং স্রবত্যেব| ন কেবলং যোষিতঃ সমাগমেষু পুংসঃ স্রবতীত্যপিশব্দস্যার্থঃ| তেন স্ত্রীপুরুষযোর্ভাবলাভে সর্বসমত্বম্| তথা চ সমলিঙ্গযোঃ সমকালযোশ্চানবতরঙ্গমেন গ্লান্যাদযঃ সমাদৃষ্টা এবেতি| তচ্চ যোষিতঃ স্রুতমপি গর্ভস্য ন কিঞ্চিদ্যতঃ করোতি নোকারায ভবত্যতো ন বিচিন্ত্যতে| ন হি স্ত্রীশরীরচ্যুতস্য বহিঃ প্রবৃত্তস্য পুনঃ ক্ষেত্রলাভ ইতি|| ৬৯|| ইতি শ্রীমন্মহামহোপাধ্যাযেন্দুবিরচিতাযাম্ অষ্টাঙ্গসংগ্রহব্যাখ্যাং শশিলেখাযাং শারীরস্থা প্রথমোঽধ্যাযঃ