11. vikr̥tavyādhivijñānīyaḥ

Adhikarana atha vikRutavyAdhivij~jAnIyo nAmaikAdasho~adhyAyaH pratij~jA (1) · Śloka 1

ಅಥಾತೋ ವಿಕೃತಿವ್ಯಾಧಿವಿಜ್ಞಾನೀಯಮಧ್ಯಾಯಂ ವ್ಯಾಖ್ಯಾಸ್ಯಾಮಃ| ಇತಿ ಹ ಸ್ಮಾಹುರಾತ್ರೇಯಾದಯೋ ಮಹರ್ಷಯಃ|೧|

ಚೇಷ್ಟಾದೀನಾಂ ಸ್ವರೂಪಂ ದರ್ಶಯಿತ್ವಾ ವ್ಯಾಧೀನಾಂ ಮಾರಣಾತ್ಮಕಾನಾಂ ಲಕ್ಷಣಪರಿಜ್ಞಾನಾರ್ಥಮಧ್ಯಾಯಾರಮ್ಭಃ|| ೧||

Adhikarana hetvAdibhiratimAtrairvyAdhyudbhave riShTam (1) · Śloka 1

ಸರ್ವೈರ್ಯಥಾಸ್ವಂ ಹೇತುಪ್ರಾಗ್ರೂರೂಪೈರೈಮಾತ್ರೈರ್ಯಸ್ಯ ವ್ಯಾಧಿರುತ್ಪದ್ಯತೇ||೧||

Adhikarana vyAdhitamukhakarajaradanodarA- shrayANi riShTAni (2) · Śloka 2

ವ್ಯಾಧಿತಸ್ಯ ವಾ ಯಸ್ಯಾಶು ಮುಖೇ ಪಿಪ್ಲುವ್ಯಙ್ಗಲೇಖಾತಿಲ- ಕಾಲಕಾಃ| ಕರಜರದನೇಷು ವಾ ಪುಷ್ಪಾಣ್ಯುದರೇ ವಾ ನಾನಾವರ್ಣಾಃ ಸಿರಾಃ||೨||

Adhikarana cakShurnIsikAshrayANi riShTAni (1) · Śloka 1

ಯಸ್ಯ ಶುಷ್ಯತೋ ನೇತ್ರೋಪದೇಹೋ ವರ್ತ್ಮನಾಸಿಕಾನ್ಯತರಶ್ವಯಥುರ್ವರ್ತ್ಮ ಸ್ರಂಸೋ ವಾ|೧|

Adhikarana kShuttRuShNayorbahubhirannapAnaira- pyashAntaye riShTam (1) · Śloka 1

ಯಸ್ಯ ಕ್ಷೀಣಸ್ಯ ಕ್ಷುತ್ತೃಷ್ಣಾ ವಾ ಹೃದ್ಯೈರ್ಬಹುಭಿರಪ್ಯನ್ನಪಾನೈರ್ನ ಶಾ ಮ್ಯತಿ||೧||

Adhikarana mukhAtsaphenaraktasrutau kukShyu- rasoH shUle ca riShTam (3) · Śloka 3

ಯಸ್ಯ ಸಫೇನಮಸೃಕ್ಪ್ರಸಿಚ್ಯೇತೇ| ಕುಕ್ಷಿಶೂಲಞ್ಚ| ಉರಸೋ ವಾ||೩||

Adhikarana mukhAnnIlapItalohitashleShmanirgame riShTam (1) · Śloka 1

ಯಸ್ಯ ಶ್ಲೇಷ್ಮಾ ನೀಲಪೀತಲೋಹಿತೋ ಬಹುಶಶ್ಚ|೧|

Adhikarana grIvAvamarddajihvAshoShakaNThAsya- gudapAkarUpANi riShTani (1) · Śloka 1

ಯಸ್ಯ ಬಲವಾನ್ ಗ್ರೀವಾವಮರ್ದ್ದೋ ಜಿಹ್ವಾಶೋಷಃ ಕಣ್ಠಾಸ್ಯಗುದ ಪಾಕಶ್ಚ|೧|

Adhikarana pakvAshayotthaparikartikAtRuShNA~ati mAtragudagrahAshrayANi riShTani (1) · Śloka 1

ಯಸ್ಯ ಪಕ್ವಾಶಯೋತ್ಥಾ ಪರಿಕರ್ತಿಕಾಽತಿತೃಷ್ಣಾತಿಮಾತ್ರಶ್ಚ ಗುದ ಗ್ರಹಃ|೧|

Adhikarana saMj~jAnAshapUrvakaM kaNThe ghurghurakashabde riShTam (1) · Śloka 1

ಯಸ್ಯಾಮಪಕ್ವಾಶಯಾನ್ಯತರಮಾಶ್ರಿತ್ಯ ಸಂಜ್ಞಾಂ ಚ ಹತ್ವಾ ವಾಯುಃ ಕಣ್ಠೇ ಘುರ್ಘುರಕಂ ಕರೋತಿ||೧||

Adhikarana tRuShNAbhivRuddhihRucchUlayo riShTam (2) · Śloka 2

ಯಸ್ಯ ಕ್ಷೀಣಸ್ಯ ತೃಷ್ಣಾಭಿವೃದ್ಧಿರ್ಹೃದಿ ಶೂಲಞ್ಚ| ತಥಾ ಹಿಧ್ಮಾ ರಕ್ತಾತಿಸಾರೌ ವಾಽಽಧ್ಮಾನಾತಿಸಾರೌ ವಾ| ಭೃಶಂ ಸತೃಷ್ಣೌ ಸ ಪರಾಸುರಿತಿ||೨||

ಯಸ್ಯ ಸರ್ವೈರಿತ್ಯಾದೇಃ ಸ ಪರಾಸುರಿತ್ಯನೇನ ಸಮ್ಬನ್ಧಃ| ಯಥಾಸ್ವಂ ಹೇತ್ವಾದಿಭಿರತಿಮಾತ್ರೈರಿತಿ| ಜ್ವರೋ ಹೇತ್ವಾದಿಭಿಃ ಪರಿಪೂರ್ಣಸ್ತಥಾ ರಕ್ತಪಿತ್ತಾದಿಷ್ವಪಿ ವಾಚ್ಯಮ್| ಕ್ಷೀಣಸ್ಯ ಸತಃ ಕ್ಷುತ್ ಬಹುನಾಪ್ಯನ್ನೇನ ನ ಶಾಮ್ಯತಿ| ತೃಡ್ವಾ ಬಹುನಾ ಪಾನೇನ| ಸಫೇನಮಸೃಕ್ಷ್ಠೀವನವತ್ ಮುಖಾತ್ ಪ್ರಸಿಚ್ಯತೇ| ಉರಸೋ ವಾ ಶೂಲಮಿತ್ಯನುವರ್ತ್ತತೇ| ಶ್ಲೇಷ್ಮಾ ಪ್ರಸಿಚ್ಯತ ಇತ್ಯನೇನ ಚ ಸಮ್ಬಧ್ಯತೇ| ಗ್ರೀವಾವಮರ್ದ್ದಾದಿಗುದಪಾಕಾನ್ತಂ ಯುಗಪದ್ ವರ್ತ್ತತೇ| ಶಕೃದ್ಭೇದಾನ್ತಂ ವಸ್ತುಯುಗಪತ್| ಪರಿಕಾರ್ತಿಕಾದ್ಯತಿಮಾತ್ರಗುದಗ್ರಹಾನ್ತಂ ವಸ್ತು ಪಕ್ವಾಶಯಸ್ಯ ಛೇದನಮಿವ ಯಾ ವೇದನಾ ಸ ಪರಿಕರ್ತಿಕಾ| ಸಂಜ್ಞಾಂ ಹತ್ವಾ ಅಚೇತನಂ ಕೃತ್ವ| ಘುರ್ಘುರಕಮವ್ಯಕ್ತಶಬ್ದವಿಶೇಷಮ್|| ೨||

Adhikarana jvarariShTAni (5) · Śloka 5

ಜ್ವರೋ ನಿಹನ್ತಿ ಬಲವಾನ್ ಗಮ್ಭೀರೋ ದೈರ್ಘರಾತ್ರಿಕಃ| ಸಪ್ರಲಾಪಭ್ರಮಶ್ವಾಸಃ ಕ್ಷೀಣಂ ಶೂನಂ ಹತಾನಲಮ್| ಅಕ್ಷಾಮಂ ಸಕ್ತವಚನಾಂ ರಕ್ತಾಂಕ್ಷಂ ಹೃದಿ ಶೂಲಿನಮ್| ಸಶುಷ್ಕಕಾಸಃ ಪೂರ್ವಾಹ್ಣೇ ಯೋಽಪರಾಹ್ಣೇಽಪಿ ವಾ ಭವೇತ್| ಬಲಮಾಂಸವಿಹೀನಸ್ಯ ಶ್ಲೇಷ್ಮಕಾಸಸಮನ್ವಿತಃ|೫|

Adhikarana raktapittariShTAni (5) · Śloka 5

ರಕ್ತಪಿತ್ತಂ ಭೃಶಂ ರಕ್ತಂ ಕೃಷ್ಣಮಿನ್ದ್ರಧನುಷ್ಪ್ರಭಮ್| ತಾಮ್ರಹಾರಿದ್ರಹರಿತಂ ರೂಪಂ ರಕ್ತಂ ಪ್ರದರ್ಶಯೇತ್| ರೋಮಕೂಪಪ್ರವಿಸೃತಂ ಕಣ್ಠಾಸ್ಯಹೃದಯೇ ಸಜತ್| ವಾಸಸೋಽರಞ್ಜನಂ ಪೂತಿ ವೇಗವಚ್ಚಾತಿಭೂತಿ ಚ| ವೃದ್ಧಂ ಪಾಣ್ಡುಜ್ವರಚ್ಛರ್ದಿ ಕಾಸಶೋಫಾತಿಸಾರಿಣಮ್||೫||

Adhikarana kAsashvAsariShTAni (1) · Śloka 1

ಕಾಸಶ್ವಾಸೌ ಜ್ವರಚ್ಛರ್ದಿತೃಷ್ಣಾತಿಸಾರಶೋಫಿನಮ್||೧||

Adhikarana rAjarakShmariShTAni (7) · Śloka 7

ಯಕ್ಷ್ಮಾ ಪಾರ್ಶ್ವರುಜಾಽಽನಾಹರಕ್ತಚ್ಛರ್ದ್ಯಸತಾಪಿನಮ್| ಛರ್ದಿರ್ವೇಗವತೀ ಮೂತ್ರಶಕೃದ್ಗನ್ಧಿಃ ಸಚನ್ದ್ರಿಕಾ| ಸಾಸ್ರವಿಟ್ಪೂಯರುಕ್ಕಾಸಶ್ವಾಸವತ್ಯನುಷಙ್ಗಿಣೀ| ತೃಷ್ಣಾನ್ಯರೋಗಕ್ಷಪಿತಂ ಬಹಿರ್ಜಿಹ್ವಂ ವಿಚೇತನಮ್| ಮದಾತ್ಯಯೋಽತಿಶೀತಾರ್ತಂ ಕ್ಷೀಣಂ ತೈಲಪ್ರಭಾನನಮ್| ಅರ್ಶಾಂಸಿ ಪಾಣಿಪನ್ನಾಭಿಗುದಮುಷ್ಕಾಸ್ಯಶೋಫಿನಮ್| ಹೃತ್ಪಾರ್ಶ್ವಾಙ್ಗರುಜಾಚ್ಛರ್ದಿ ಪಾಯುಪಾಕಜ್ವರಾತುರಮ್||೭||

Adhikarana atIsArariShTani (9) · Śloka 9

ಅತೀಸಾರೋ ಯಕೃತ್ಪಿಣ್ಡಮಾಂಸಧಾವನಮೇಚಕೈಃ| ತುಲ್ಯಸ್ತೈಲಘೃತಕ್ಷೀರದಧಿಮಜ್ಜವಸಾಸವೈಃ| ಮಸ್ತುಲುಙ್ಗಮಷೀಪೂಯವೇಶವಾರಾಮ್ಬುಮಾಕ್ಷಿಕೈಃ| ಅತಿರಕ್ತಾಸಿತಸ್ನಿಗ್ಧಪೂತ್ಯಚ್ಛಘನವೇದನಃ| ಕರ್ಬೂರಂ ಪ್ರಸ್ರವನ್ ಧಾತೂನ್ ನಿಷ್ಪುರೀಷೋತ್ಥವಾತಿವಿಟ್| ತನ್ತುಮಾನ್ ಮಕ್ಷಿಕಾಕ್ರಾನ್ತೋ ರಾಜೀಮಾಂಶ್ಚನ್ದ್ರಕೈರ್ಯುತಃ| ಶೀರ್ಣಪಾಯುಂ ಬಲಿಂ ಮುಕ್ತನಾಲಂ ಪರ್ವಾಸ್ಥಿಶೂಲಿನಮ್| ಸ್ರಸ್ತಪಾಯುಃ ಬಲಕ್ಷೀನಮನ್ನಮೇವೋಪವೇಶಯೇತ್| ಸತೃಟ್ಕಾಸಜ್ವರಚ್ಛರ್ದಿದಾಹಾಽಽನಾಹಪ್ರವಾಹಿಕಃ||೯||

Adhikarana ashmarIriShTAni (3) · Śloka 3

ಅಶ್ಮರೀ ಶೂನವೃಷಣಂ ಬದ್ಧಮುತ್ರಂ ರುಜಾರ್ದಿತಮ್||೩||

ಜ್ವರ ಇತ್ಯಾದಿ ಸುಬೋಧಮ್| ಗಮ್ಭೀರೋಽನ್ತರ್ವೇಗಃ| ದೀರ್ಘರಾತ್ರಿಕೋ ಬಹುಕಾಲಪ್ರರೂಢಃ| ಅಪರಾಹ್ನೇ ಶ್ಲೇಷ್ಮಕಾಸಸಮನ್ವಿತ ಇತ್ಯನೇನ ಸಮ್ಬನ್ಧಃ| ಸಜನ್ ಸಙ್ಗಚ್ಛನ್| ವಾಸಸೋಽರಞ್ಜನಂ ಧೌತಸ್ಯಾಪಿ ವ್ರುದ್ಧಂ ಗತವಯಸ್ಕಂ ಕರ್ಮ| ರಕ್ತಪಿತ್ತಂ ಕರ್ತ್ತೃ ನಿಹನ್ತಿ ತಥಾ ಪಾಣ್ಡ್ವಾದಿಯುಕ್ತಂ ಕರ್ಮ| ಕಾಸಶ್ವಾಸೌ ಜ್ವರಾದಿಯುಕ್ತಮ್| ಸಹಾಽಸ್ರವಿಡ್ಭ್ಯಾಂ ವರ್ತ್ತತ ಇತಿ ಸಾಽಸ್ರವಿಟ್| ತಥಾ ಪೂಯಾದಿಮತೀ| ಅನುಷಙ್ಗಿಣೀ ಚಿರಪ್ರಸಕ್ತಾ| ಅನ್ಯೇನಕ್ ರೋಗೇಣ ಜ್ವರಾದಿನಾ ಕ್ಷಪಿತಮ್| ಮೇಚಕಮನೇಕವರ್ಣಮ್| ಮಸ್ತುಲುಙ್ಗಂ ಕಪಾಲಮಜ್ಜಾ| ವೇಶ್ವಾರಃ ಕುಟ್ಟಿತಂ ಮಾಂಸಮ್| ಕರ್ಬುತೋ ವರ್ಣವಿಶೇಷಃ| ಶೀರ್ಣಪಾಯುಬಲಿತ್ವಾದಿಯುಕ್ತಮತೀಸಾರೋ ನಿಹನ್ತಿ| ಶೀರ್ಣಾಃ ಪಾಯುರ್ವಲಯಶ್ಚ ಯಸ್ಯ ತಮ್| ಮುಕ್ತನಾಲಂ ಸ್ರಸ್ತಗುದಬನ್ಧಮ್| ಸಹ ತೃಡಾದಿಭಿರ್ವರ್ತ್ತತ ಇತಿ ಸ ತಥೋಕ್ತೋಽತಿಸಾರಃ| ಪ್ರವಾಹಿಕಾ ನಿಸ್ತಾನಿಕಾ|| ೩||

Adhikarana pramehariShTAni (1) · Śloka 1

ಮೇಹಸ್ತೃಡ್ದಾಹಪಿಟಕಾ ಮಾಂಸಕೋಥಾತಿಸಾರಿಣಮ್||೧||

Adhikarana pramehapiTakAriShTAni (4) · Śloka 4

ಪಿಟಕಾ ಮರ್ಮಹೃತ್ಪೃಷ್ಠಸ್ತನಾಂಸಗುದಮೂರ್ದ್ಧಗಾ| ಪರ್ವಪಾದಕರಸ್ಥಾ ವಾ ಮನ್ದೋತ್ಸಾಹಂ ಪ್ರಮೇಹಿಣಮ್| ಸರ್ವಂ ಚ ಮಾಂಸಸಙ್ಕೋಥದಾಹತೃಷ್ಣಾಮದಜ್ವರೈಃ| ವಿಸರ್ಪಮರ್ಮಸಂರೋಧಹಿಧ್ಮಾಶ್ವಾಸಭ್ರಮಕ್ಲಮೈಃ||೪||

Adhikarana gulmariShTAni (3) · Śloka 3

ಗುಲ್ಮಃ ಪೃಥುಪರಿಣಾಹೋ ಘನಃ ಕೂರ್ಮ ಇವೋನ್ನತಃ| ಸಿರಾನದ್ಧೋ ಜ್ವರಚ್ಛರ್ದಿಹಿಧ್ಮಾಽಽಧ್ಮಾನರುಜಾನ್ವಿತಃ| ಕಾಸಪೀನಸಹೃತ್ಲ್ಲಾಸಶ್ವಾಸಾತೀಸಾರಶೋಫವಾನ್||೩||

Adhikarana udarariShTAni (4) · Śloka 4

ವಿಣ್ಮೂತ್ರಸಂಗ್ರಹಶ್ವಾಸಶೋಫಹಿಧ್ಮಾಜ್ವರಭ್ರಮೈಃ| ಮೂರ್ಚ್ಛಾಚ್ಛರ್ದ್ಯತಿಸಾರೈಶ್ಚ ಜಠರಂ ಹನ್ತಿ ದುರ್ಬಲಮ್| ಶೂನಾಕ್ಷಂ ಕುಟಿಲೋಪಸ್ಥಮುಪಕ್ಲಿನ್ನತನುತ್ವಚಮ್| ವಿರೇಚನಹೃತಾನಾಹಮಾಽಽನಹ್ಯನ್ತಂ ಪುನಃ ಪುನಃ||೪||

Adhikarana pANDurogariShTani (1) · Śloka 1

ಪಾಣ್ಡುರೋಗಃ ಶ್ವಯಥುಮಾನ್ ಪೀತಾಕ್ಷಿನಖದರ್ಶನಮ್||೧||

Adhikarana shophariShTAni (4) · Śloka 4

ತನ್ದ್ರಾದಾಹಾರುಚಿಚ್ಛರ್ದಿಮೂರ್ಚ್ಛಾಧ್ಮಾನಾತಿಸಾರವಾನ್| ಅನೇಕೋಪದ್ರವಯುತಃ ಪಾದಾಭ್ಯಾಂ ಪ್ರಸೃತೋ ನರಮ್| ನಾರೀಂ ಶೋಫೋಮುಖಾದ್ಧನ್ತಿ ಕುಕ್ಷಿಗುಹ್ಯಾದುಭಾವಪಿ| ರಾಜೀಚಿತಃ ಸ್ರವಂಶ್ಛರ್ದಿಜ್ವರಶ್ವಾಸಾತಿಸಾರಣಿಮ್| ಜ್ವರಾತಿಸಾರೌ ಶೋಫಾನ್ತೇಶ್ವಯಥುರ್ವಾ ತಯೋಃ ಕ್ಷಯೇ| ದುರ್ಬಲಸ್ಯ ವಿಶೇಷೇಣ ಜಾಯನ್ತೇಽನ್ತಾಯ ದೇಹಿನಃ| ಶ್ವಯಥುರ್ಯಸ್ಯ ಪಾದಸ್ಥಃ ಪರಿಸ್ರಸ್ತೇ ಚ ಪಿಣ್ಡಿಕೇ| ಸೀದತಃ ಸಕ್ಥಿನೀ ಚೈವ ತಂ ಭಿಷಕ್ ಪರಿವರ್ಜಯೇತ್|೪|

ತೃಡಾದಿಭಿರ್ಯುಕ್ತಂ ಮೇಹೋ ಹನ್ತಿ| ಮಾಂಸಕೋಥೋ ಮಾಂಸಕ್ಲೇದಃ| ಪಿಟಕಾಃ ಶರಾವಿಕಾದ್ಯಾ ಮರ್ಮಾದಿಗಾಃ| ಹೃದ್ಗುದಸ್ಯ ಪ್ರಾಧಾನ್ಯಾತ್ಪೃಥಗ್ಗ್ರಹಣಮ್| ಮನ್ದೋತ್ಸಾಹಂ ಪ್ರಮೇಹಿಣಂ ಚ ತಾಃ ಘ್ನನ್ತಿ| ತಾಶ್ಚ ಪಿಟಕಾಃ ಮಾಂಸಕೋಥಾದಿಭಿಃ ಕಾರಣೈಃ ಸರ್ವಂ ವಿಶೇಷಾನಪೇಕ್ಷಯಾ ಘ್ನನ್ತಿ| ಮರ್ಮಣಾಂ ಹೃದಯಕಣ್ಠಾದೀನಾಂ ಸಮನ್ತತೋ ಯಾಸ್ತಾಸ್ತಥೋಕ್ತಾಃ| ಜಠರಮುದರಮಪಿ ಮೂತ್ರಸಙ್ಘಾದಿಭಿಃ ಕಾರಣಭೂತೈರ್ಹನ್ತಿ| ದುರ್ಬಲತ್ವಾದಿಯುಕ್ತಂ ಚ ಪುರುಷಂ ಹನ್ತಿ| ಉಪಸ್ಥಂ ಮೇಢ್ರಮ್| ವಿರೇಚನಹೃತಾಽನಾಹಂ ಸನ್ತಂ ಪುನಃ ಪುನರಾನಹ್ಯನ್ತಮ್| ಪಾದಾಭ್ಯಾಂ ಪ್ರಥಮಂ ಪ್ರಸೃತಃ ಶ್ವಯಥುಃ ಪುಮಾಂಸಂ ಹನ್ತಿ| ಮುಖಾತ್ ಪ್ರಸೃತೋ ನಾರೀಂ ಹನ್ತಿ, ನ ತು ಪುರುಷಮ್| ಕುಕ್ಷಿಗುಹ್ಯಾಭ್ಯಾಂ ಪ್ರಸೃತೇಃ ಉಭಯಂ ಹನ್ತಿ, ಪುರುಷಮಪಿ ನಾರೀಮಪಿ| ರಾಜೀಭಿಶ್ಚಿತಃ ಶ್ವಯಥುಸ್ತಥಾಸ್ರವನ್ ಛಾರ್ದ್ಯಾದಿಯುಕ್ತಂ ಹನ್ತಿ| ಶೋಫಸ್ಯಾನ್ತೇ ಶೋಫೇ ನಿವೃತ್ತೇ ಜ್ವರಾತಿಸಾರೌ| ಜ್ವರಾತಿಸಾರಯೋರ್ವಾ ಕ್ಷಯೇ ಶೋಫಃ| ಏವಂ ವಿಧಾ ಜ್ವರಾತಿಸಾರಶೋಫಾಃ ಸರ್ವಸ್ಯಾನ್ತಾಯ ಜಾಯನ್ತೇ| ದುರ್ಬಲಸ್ಯ ಪುಂಸೋ ವಿಶೇಷೇಣಾನ್ತಾಯ ಜಾಯನ್ತೇ| ಅನ್ತೋ ಮರಣಮ್|| ೪||

Adhikarana atishayitodarashophayoH riShTam (4) · Śloka 4

ಆನನಂ ಹಸ್ತಪಾದೌ ಚ ವಿಶೇಷಾದ್ಯಸ್ಯ ಶುಷ್ಯತಃ| ಶೂಯೇತೇ ವಾ ವಿನಾ ದೇಹಾತ್ಸ ಮಾಸಾದ್ಯಾತಿ ಪಞ್ಚತಾಮ್| ಉದರೀ ಯಶ್ಚ ಶೋಫೀ ವಾ ಸ್ವಂ ನ ಪಶ್ಯತಿ ಮೇಹನಮ್| ಯಸ್ಯ ವಾ ಜಠರೋನ್ನಾಮಾತ್ ಪರಿಧಾನಂ ನ ತಿಷ್ಠತಿ||೪||

Adhikarana visarpariShTAni (2) · Śloka 2

ವಿಸರ್ಪಃ ಕಾಸವೈವರ್ಣ್ಯಜ್ವರಮೂರ್ಚ್ಛಾಙ್ಗಭಙ್ಗವಾನ್| ಭ್ರಮಾಸ್ಯಶೋಫಹೃಲ್ಲಾಸದೇಹಸಾದಾತಿಸಾಪವಾನ್|೨|

Adhikarana kuShThariShTAni (2) · Śloka 2

ಕುಷ್ಠಂ ವಿಶೀರ್ಯಮಾಣಾಙ್ಗಂ ರಕ್ತನೇತ್ರಂ ಹತಸ್ವರಮ್| ಮನ್ದಾಗ್ನಿಂ ಜನ್ತುಭಿರ್ಜುಷ್ಟಂ ಹನ್ತಿ ತೃಷ್ಣಾತಿಸಾರಿಣಮ್||೨||

Adhikarana vAtarogariShTAni (1) · Śloka 1

ವಾಯುಃ ಸುಪ್ತತ್ವಚಂ ಭುಗ್ನಂ ಕಮ್ಪಶೋಫರುಜಾತುರಮ್||೧||

Adhikarana vAtaraktariShTAni (2) · Śloka 2

ವಾತಾಸ್ರಂ ಮೋಹಮೂರ್ಚ್ಛಾಯಮದಾಸ್ವಪ್ನಜ್ವರಾನ್ವಿತಮ್| ಶಿರೋಗ್ರಹಾರುಚಿಶ್ವಾಸಸಙ್ಕೋಚಸ್ಫೋಟಕೋಥವತ್|೨|

Adhikarana sadyojIvitaharA vikArAH (2) · Śloka 2

ಶೋರಿರೋಗಾರುಚಿಶ್ವಾಸಮೋಹವಿಡ್ಭೇದತೃಡಭ್ರಮೈಃ| ಘ್ನನ್ತಿ ಸರ್ವಾಮಯಾಃ ಕ್ಷೀಣಸ್ವರಧಾತುಬಲಾನಲಮ್|೨|

Adhikarana kShINasya vAtavyAdhyAdiShu riShTalakShaNam (2) · Śloka 2

ವಾತವ್ಯಾಧಿರಪಸ್ಮಾರೀ ಕುಷ್ಠೀ ರಕ್ತ್ಯುದರೀ ಕ್ಷಯೀ| ಗುಲ್ಮೀ ಮೇಹೀ ಚ ತಾನ್ಕ್ಷೀಣಾನ್ವಿಕಾರೇಽಲ್ಪೇಽಪಿ ವರ್ಜಯೇತ್|೨|

Adhikarana pakShatrayAnmaraNasUcakaM riShTam (2) · Śloka 2

ಬಲಮಾಂಸಕ್ಷಯಸ್ತೀವ್ರೋ ರೋಗವೃದ್ಧಿರರೋಚಕಃ| ಯಸ್ಯಾತುರಸ್ಯ ಲಕ್ಷ್ಯನ್ತೇ ತ್ರೀನ್ ಪಕ್ಷಾನ್ನ ಸ ಜೀವತಿ||೨||

Adhikarana vAtAShThIlAriShTAni (5) · Śloka 5

ವಾತಾಷ್ಠೀಲಾಽತಿಸಂವೃದ್ಧಾ ತಿಷ್ಠನ್ತಿ ದಾರುಣಾ ಹೃದಿ| ತೃಷ್ಣಯಾಽನುಪರೀತಸ್ಯ ಸದ್ಯೋ ಮುಷ್ಣಾತಿ ಜೀವಿತಮ್||೫||

ಯಸ್ಯ ದೇಹೋ ನ ತಥಾ ಶುಷ್ಯತಿ ಯಥಾ ಹಸ್ತಪಾದಂ ಸ ಪಞ್ಚತಾಂ ಮರಣಾಖ್ಯಾಂ ಮಾಸಾದ್ಯಾತಿ| ಪಞ್ಚಭೂತಾನಾಂ ಪೃಥಗ್ಭಾವಃ ಪಞ್ಚತಾ| ಉದರೀತ್ಯಾದೌ ಮಾಸಾತ್ ಸ ನ ಜೀವತಿ ಇತ್ಯನುವರ್ತ್ತತೇ| ವಿಸರ್ಪ ಇತ್ಯಾದೌ ಹನ್ತೀತಿ ಸ್ಥಿತಮ್| ತೃಡ್ವನ್ತಮತೀಸಾರಿಣಞ್ಚ ಕುಷ್ಠಂ ಹನ್ತಿ| ಮದಮೂರ್ಛಾಯೇ ವಕ್ಷ್ಯೇತೇ| ಶಿರೋಗ್ರಹಾದಿಮತ್ ವಾತಾಸ್ರಂ ಹನ್ತಿ| ಸರ್ವಾಮಯಾಶ್ಚ ಜ್ವರಾದಯಃ ಶಿರೋರೋಗಾದಿಭಿಃ ಕಾರಣಭುತೈರ್ಹನ್ತಿ| ಕ್ಷೀಣಸ್ವರಧಾತುತ್ವಾದಿಯುಕ್ತಂ ವಾತವ್ಯಾಧಿರಾಕ್ಷಿಪಕಾದಿಃ| ವಾತವ್ಯಾಧಿನಾ ಅಪಸ್ಮಾರಾದಿಭಿಶ್ಚಾಽಽರ್ತ್ತಾನ್ ಸ್ವಲ್ಪೇಽಪಿ ವಿಕಾರೇ ಕ್ಷೀಣದೇಹಾನ್ ಸತೋ ವರ್ಜಯೇತ್| ಸುಬೋಧಮ್| ತೃಷ್ಣಯಾ ಪರಿ ಸಮನ್ತಾದಿತೋ ವ್ಯಾಪ್ತಃ ಪರೀತಃ ತಸ್ಯ ಮುಷ್ಣಾತೀತಿ ವಾತಾಷ್ಠೀಲೇತ್ಯನೇನ ಸಮ್ಬಧ್ಯತೇ| ಅಷ್ಠೀಲೇವ ಪ್ರಸ್ತರಮಯೀ ವಾಯುನಾ ವಾತಾಷ್ಠೀಲಾ|| ೫||

Adhikarana mumUrShulakShaNAni (6) · Śloka 6

ಶೈಥಿಲ್ಯಂ ಪಿಣ್ಡಿಕೇ ವಾಯುರ್ನೀತ್ವಾ ನಾಸಾಞ್ಚ ಜಿಹ್ಯತಾಮ್| ಕ್ಷೀಣಸ್ಯಾಽಽಯಮ್ಯ ಮನ್ಯೇ ವಾ ಸದ್ಯೋ ಮುಷ್ಣಾತಿ ಜೀವಿತಮ್| ನಾಭೀಗುದಾನ್ತರಂ ಗತ್ವಾ ವಂಕ್ಷಣೌ ವಾ ಸಮಾಶ್ರಯನ್| ಗೃಹೀತ್ವಾ ಪಾಯುಹೃದಯೇ ಕ್ಷೀಣದೇಹಸ್ಯ ವಾ ಬಲೀ| ಮಲಾನ್ ವಸ್ತಿಶಿರೋನಾಭಿಂ ವಿಬಧ್ಯ ಜನಯನುಜಮ್| ಕುರ್ವನ್ ವಂಕ್ಷಣಯೋಃ ಶೂಲಂ ತೃಷ್ಣಾಂ ಭಿನ್ನಪುರೀಷತಾಮ್| ಶ್ವಾಸಂ ವಾ ಜನಯನ್ ವಾಯುರ್ಗೃಹೀತ್ವಾ ಗುದವಂಕ್ಷಣೌ| ವಿತತ್ಯ ಪರ್ಶುಕಾಗ್ರಾಣಿ ಗೃಹೀತ್ವೋರಶ್ಚ ಮಾರುತಃ| ಸ್ತಿಮಿತಸ್ಯಾತತಾಕ್ಷಸ್ಯ ಸದ್ಯೋ ಮುಷ್ಣಾತಿ ಜೀವಿತಮ್| ಸಹಸಾ ಜ್ವರಸನ್ತಾಪಸ್ತೃಷ್ಣಾಮೂರ್ಚ್ಛಬಲಕ್ಷಯಃ| ವಿಶ್ಲೇಷಣಞ್ಚ ಸನ್ಧೀನಾಂ ಮುಮೂರ್ಶೋರುಪಜಾಯತೇ||೬||

ನಾಸಾ ಜಿಹ್ಯಾ ಸಙ್ಕುಚಿತೇವ| ನಾಭೀತ್ಯಾದೌ ವಾಯುರಿದಮಿದಂ ಕೃತ್ವಾ ಸದ್ಯೋಜೀವಿತಂ ಮುಷ್ಣಾತಿ| ನಾಭೀಗುದಸ್ಯಾನ್ತರಂ ಮಧ್ಯಂ ಗತ್ವಾ ರುಜಾಂ ಜನಯನ್| ಅಥವಾ ವಂಕ್ಷಣೌ ಸಮಾಶ್ರಯನ್| ಅಥವಾ ಬಲೀ ಕ್ಷೀಣದೇಹಸ್ಯ ಪಾಯುಹೃದಯೇ ಗೃಹೀತ್ವಾ ಮಲಾದೀನ್ ವಿಬಧ್ಯ ರುಜಾಂ ಜನಯನ್ ಸದ್ಯೋ ಮುಷ್ಣಾತಿ ಜೀವಿತಮ್| ಮಲಾದೋಷಾಃ ಶಕೃದಾದಯಶ್ಚ| ಅಥವಾ ಗುದವಂಕ್ಷಣಂ ಗೃಹೀತ್ವಾ ಪಾಯುವಂಕ್ಷಣಯೋಃ ಶೂಲಂ ತೃಷ್ಣಾಂ ಭಿನ್ನಪುರೀಷತಾಂ ಚ ಕುರ್ವನ್| ಶ್ವಾಸಂ ವಾ ಜನಯನ್| ಅಥವಾ ಮಾರುತಃ ಪಾರ್ಶ್ವಕಾಸ್ಥೀನಾಮಗ್ರಾಣಿ ವಿತತ್ಯ ವ್ಯಾಪ್ಯೋರಶ್ಚ ಗೃಹೀತ್ವಾ ಸ್ತಿಮಿತಸ್ಯಾತತಾಕ್ಷಸ್ಯ ಪುರುಷಸ್ಯ ಸದ್ಯೋ ಮುಷ್ಣಾತಿ ಜೀವಿತಮ್| ಜ್ವರಸನ್ತಾಪಾದಿ ಸಹಸಾ ಮುಮೂರ್ಷೋರೇವೋಪಜಾಯತೇ ನಾಽನ್ಯಸ್ಯ|| ೬||

Adhikarana lepajvarariShTam (7) · Śloka 7

ಗೋಸರ್ಗೇ ವದನಾದ್ಯಸ್ಯ ಸ್ವೇದಃ ಪ್ರಚ್ಯವತೇ ಭೃಶಮ್| ಲೇಪಜ್ವರೋಪತಪ್ತಸ್ಯ ದುರ್ಲಭಂ ತಸ್ಯ ಜಿವಿತಮ್||೭||

ಗೋಸರ್ಗೇ ಯಸ್ಮಿನ್ ಕಾಲೇ ಗಾವೋ ಭವನಾನ್ನಿಸ್ಸರನ್ತಿ| ರಾತ್ರ್ಯನ್ತ ಇತಿ ಯಾವತ್| ಲೇಪೋ ಮುಖಸ್ಯೋಪಲೇಪಃ|| ೭||

Adhikarana masUrikAriShTam (8) · Śloka 8

ಪ್ರವಾಲಗುಲಿಕಾಭಾಸಾ ಯಸ್ಯ ಗಾತ್ರೇ ಮಸೂರಿಕಾಃ| ಉತ್ಪದ್ಯಾಶು ವಿನಶ್ಯನ್ತಿ ನ ಚಿರಾತ್ಸ ವಿನಶ್ಯತಿ||೮||

ಪ್ರವಾಲಗುಲಿಕಾ ವಿದ್ರುಮಗುಲಿಕಾಸ್ತಾ ಇವ ಭಾಸನ್ತೇ| ಮಸೂರಿಕಾ ಮಸೂರಾಕೃತಿಸಙ್ಘಾತಾಃ|| ೮||

Adhikarana visphoTakariShTam (9) · Śloka 9

ಮಸೂರವಿದಲಪ್ರಖ್ಯಾಸ್ತಥಾ ವಿದ್ರುಮಸನ್ನಿಭಾಃ| ಅನ್ತರ್ವಕ್ರಾಃ ಕಿಣಾಭಾಶ್ಚ ವಿಸ್ಫೋಟಾ ದೇಹನಾಶನಾಃ||೯||

ಮಸೂರವಿದಲಂ ಮಸೂರದಲಮ್| ಅನ್ತರ್ವಕ್ರಾಃ ಮಧ್ಯನಿಮ್ನಾಂ ಕಿಣಾಃ ಕರಾದೌ ವ್ರಣಗ್ರನ್ಥಿಃ| ವಿಸ್ಫೋಟೋ ಗ್ರನ್ಥಿಃ|| ೯||

Adhikarana kAmalAriShTam (10) · Śloka 10

ಕಾಮಿಲಾಕ್ಷ್ಣೋರ್ಮುಖಂ ಪುರ್ಣಂ ಶಙ್ಖಯೋರ್ಮುಕ್ತಮಾಂಸತಾ| ಸನ್ತ್ರಾಸಶ್ಚೋಷ್ಣತಾಙ್ಗೇ ಚ ಯಸ್ಯ ತಂ ಪರಿವರ್ಜಯೇತ್||೧೦||

ಅಕ್ಷ್ಣೋಃ ಕಾಮಿಲೇತ್ಯಾದಿಕಂ ಯಸ್ಯ ತಂ ಪರಿವರ್ಜಯೇತ್|| ೧೦||

Adhikarana vraNariShTam (11) · Śloka 11

ಅಕಸ್ಮಾದನುಧಾವಚ್ಚ ವಿಘೃಷ್ಟಂ ತ್ವಕ್ಸಮಾಶ್ರಯಮ್| ಚನ್ದನೋಶೀರಮದಿರಾಕುಣಪಧ್ವಾಙ್ಕ್ಷಗನ್ಧಯಃ| ಶೈವಾಲಕುಕ್ಕುಟಶಿಖಾಕುಙ್ಕುಮಾಲಮಷೀಪ್ರಭಾಃ| ಅನ್ತರ್ದಾಹಾನಿರೂಷ್ಮಾಣಃ ಪ್ರಾಣನಾಶಕರಾ ವ್ರಣಾಃ| ಯೋ ವಾತಜೋ ನ ಶೂಲಾಯ ಸ್ಯಾನ್ನ ದಾಹಾಯ ಪಿತ್ತಜಃ| ಕಫಜೋ ನ ಚ ಪೂಯಾಯ ಮರ್ಮಜಶ್ಚ ರುಜೇ ನ ಯಃ| ಅಚೂರ್ಣಶ್ಚುರ್ಣಕೀರ್ಣಾಭೋ ಯತ್ರಾಕಸ್ಮಾಚ್ಚ ದೃಶ್ಯತೇ| ರೂಪಂ ಶಕ್ತಿಧ್ವಜಾದೀನಾಂ ಸರ್ವಾಸ್ತಾನ್ ವರ್ಜಯೇದ್ ವ್ರಣಾನ್||೧೧||

ತಥಾ ತ್ವಕ್ಸಮಾಶ್ರಯಂ ವಿಘೃಷ್ಟಂ ನಾಮ್ನಾ ಸದ್ಯೋವ್ರಣಮಕಸ್ಮಾತ್ ಝಟಿತಿ ಅನುಧಾವತ್ ವಿಸರ್ಪ್ರವದ್ಯಸ್ಯ ತಂ ಪರಿವರ್ಜಯೇದಿತಿ ಸಮ್ಬನ್ಧಃ| ಚನ್ದನಾದಿಗನ್ಧಾಃ ಶೈವಾಲಾದಿ ಪ್ರಭಾ ಅನ್ತರ್ದಾಹಾದಿಯುಕ್ತಾ ವ್ರಣಾಃ ಪ್ರಾಣನಾಶಕರಾಃ| ಯೋ ವಾತಜ ಇತ್ಯಾದಿನಾ ವ್ರಣೋ ವಿಜ್ಞೇಯಃ| ಯತ್ರ ಯಸ್ಮಿನ್ ವ್ರಣೇ ಶಕ್ತಿಧ್ವಜಖಡ್ಗಚಕ್ರಾದಿಸಮ್ಬನ್ಧಿರೂಪಮಕಸ್ಮಾದ್ ದೃಷ್ಯತ ಇತ್ಯೇವಂ ಸರ್ವಾನ್ ವ್ರಣಾನ್ ವರ್ಜಯೇತ್|| ೧೧||

Adhikarana bhagandarariShTam (12) · Śloka 12

ವಿಣ್ಮೂತ್ರಮಾರುತವಹಂ ಕೃಮಿಣಂಚ ಭಗನ್ದರಮ್||೧೨||

ವಿಡಾದಿವಹಂ ಕೃಮಿಣಂ ಭಗನ್ದರಂ ಚ ವರ್ಜಯೇತ್|| ೧೨||

Adhikarana aparANi mumUrShulakShaNAni (13) · Śloka 13

ಘಟ್ಟಯನ್ ಜಾನುನಾ ಜಾನು ಪಾದಾವುದ್ಯಮ್ಯ ಪಾತಯನ್| ಯೋಽಪಾಸ್ಯತಿ ಮುಹುರ್ವಕ್ತ್ರಮಾಽಽತುರೋ ನ ಸ ಜಿವತಿ| ದನ್ತೈಶ್ಛಿನ್ದನ್ನಖಾಗ್ರಾಣಿ ತೈಶ್ಚ ಕೇಶಾಂಸ್ತೃಣಾನಿ ವಾ| ಭೂಮಿಂ ಕಾಷ್ಠೇನ ವಿಲಿಖನ್ ಲೋಷ್ಠಂ ಲೋಷ್ಠೇನ ತಾಡಯನ್| ಹೃಷ್ಟರೋಮಾ ಸಾನ್ದ್ರಮೂತ್ರಃ ಶುಷ್ಕಕಾಸೀ ಜ್ವರೀ ಚ ಯಃ| ಮುಹುರ್ಹಸನ್ ಮುಹುಃ ಕ್ಷ್ವೇಲನ್ ಶಯ್ಯಾಂ ಪಾದೇನ ಹನ್ತಿ ಯಃ| ಮುಹುಶ್ಛಿದ್ರಾಣಿ ವಿಮೃಶನ್ನಾಽಽತುರೋ ನ ಸ ಜೀವತಿ| ಊರ್ಧ್ವಶ್ವಾಸಂ ತಗೋಷ್ಮಾಣಂ ಶೂಲೋಪಹತವಂಕ್ಷಣಮ್| ಶರ್ಮ ಚಾಽಽನಧಿಗಚ್ಛನ್ತಂ ಬುದ್ಧಿಮಾನ್ ಪರಿವರ್ಜಯೇತ್| ವಿಕಾರಾ ಯಸ್ಯ ವರ್ದ್ಧನ್ತೇ ಪ್ರಕೃತಿಃ ಪರಿಹೀಯತೇ| ಸಹಸಾ-ಸಹಸಾ ತಸ್ಯ ಮೃತ್ಯುರ್ಹರತಿ ಜೀವಿತಮ್| ಯಮುದ್ದಿಶ್ಯಾತುರಂ ವೈದ್ಯಃ ಸಮ್ಪಾದಯಿತುಮೌಷಧಮ್| ಯತಮಾನೋ ನ ಶಕ್ನೋತಿ ದುರ್ಲಭಂ ತಸ್ಯ ಜೀವಿತಮ್| ವಿಜ್ಞಾತಂ ಬಹುಶಃ ಸಿದ್ಧಂ ವಿಧಿವಚ್ಛಾವಚಾರಿತಮ್| ನ ಸಿದ್ಧ್ಯತ್ಯೌಷಧಂ ಯಸ್ಯ ನಾಸ್ತಿ ತಸ್ಯ ಚಿಕಿತ್ಸಿತಮ್| ಭವೇದ್ಯಸ್ಯೌಷಧೇಽನ್ನೇ ವಾ ಕಲ್ಪ್ಯಮಾನೇ ವಿಪರ್ಯ್ಯಯಃ| ಅಕಸ್ಮಾದ್ವರ್ಣಗನ್ಧಾದೇಃ ಸ್ವಸ್ಥೋಽಪಿ ನ ಸ ಜೀವತಿ| ನಿವಾತೇ ಸೇನ್ಧನಂ ಯಸ್ಯ ಜ್ಯೋತಿಶ್ಚಾಪ್ಯುಪಶಾಮ್ಯತಿ| ಆತುರಸ್ಯ ಗೃಹೇ ಯಸ್ಯ ಭಿದ್ಯನ್ತೇ ವಾ ಪತನ್ತಿ ವಾ| ಅತಿಮಾತ್ರಮಮತ್ರಾಣಿ ದುರ್ಲಭಂ ತಸ್ಯ ಜೀವಿತಮ್||೧೩||

ಯ ಆತುರೋ ಮುಹುರ್ವಕ್ತ್ರಮಪಾಸ್ಯತ್ಯಪಕ್ಷಿಪತಿ| ಜಾನುಂ ಜಾನುನಾ ಘಟ್ಟಯನ್| ಪಾದಾವುದ್ಯಮ್ಯ ಚ ಪಾತಯನ್| ತೈರಿತಿ ನಖಾಗ್ರೈಃ| ಕ್ಷ್ವೇಲನ್ ವ್ಯಾಹರನ್| ಛಿದ್ರಾಣಿ ಕರ್ಣನಾಸಾದೀನಿ ಸ್ರೋತಾಂಸಿ ವಿಮೃಶನ್| ವಿಕಾರಾಃ ಶಾರಿರಮಾನಸಾ ವ್ಯಾಧಯಃ| ಪ್ರಕೃತಿಃ ಸ್ವಭಾವಃ| ಸಹಸಾ ಯುಗಪತ್ ಝಟಿತಿ ಯಮಾತುರಮುದ್ದಿಶ್ಯ ವೈದ್ಯಃ ಔಷಧಂ ಸಮ್ಪಾದಯಿತುಂ ಯತಮಾನಃ ಸನ್ ನ ಶಕ್ನೋತಿ| ತಸ್ಯಾತುರಸ್ಯ ದುರ್ಲಭಂ ಜೀವಿತಮ್| ವರ್ಣಾದಿವಿಪರ್ಯ್ಯಯೋಽಕಸ್ಮಾದೌಷಧೇಽನ್ನೇ ವಾ| ಜ್ಯೋತಿರಗ್ನಿಃ ಅಮತ್ರಂ ಭಾಜನಮ್||೧೩||

Adhikarana Atreyamatena riShTalakShaNam (14-11) · Śloka 11

ಯನ್ನರಂ ಸಹಸಾ ರೋಗೋ ದುರ್ಬಲಂ ಪರಿಮುಞ್ಚತಿ| ಸಂಶಯಪ್ರಾಪ್ತಮಾತ್ರೇಯೋ ಜೀವಿತಂ ತಸ್ಯ ಮನ್ಯತೇ||೧೪|| ಇತಿ ವೈದ್ಯಪತಿಸಿಂಹಗುಪ್ತಸ್ಯ ಸೂನೋರ್ವಾಗ್ಭಟಸ್ಯ ಕೃತೌ ಅಷ್ಟಾಙ್ಗಸಂಗ್ರಹಸಂಹಿತಾಯಾಂ ಶಾರೀರಸ್ಥಾನೇ ವಿಕೃತ ವ್ಯಾಧಿವಿಜ್ಞಾನೀಯೋ ನಾಮೈಕಾದಶೋಽಧ್ಯಾಯಃ||೧೧||

ಯಂ ದುಬಲಂ ನರಂ ಸಹಸಾ ರೋಗಃ ಪರಿಮುಞ್ಚತಿ| ತಸ್ಯ ನರಸ್ಯಾತ್ರೇಯೋ ಧನ್ವನ್ತರಿಃ ಸಂಶಯಪ್ರಾಪ್ತಂ ಜೀವಿತಂ ಮನ್ಯತೇ| ಸಂಶಯಪ್ರಾಪ್ತಮಿತಿ ಕದಾಚಿತ್ ಜೀವಿತಮಪಿ ತಸ್ಯ ಸಮ್ಭಾವ್ಯತ ಇತಿ ಪ್ರದರ್ಶನಾರ್ಥಮ್|| ೧೪|| ಇತಿ ಶ್ರೀಮನ್ಮಹಾಮಹೋಪಾಧ್ಯಾಯೇನ್ದುವಿರಚಿತಾಯಾಮ್ ಅಷ್ಟಙ್ಗಸಂಗ್ರಹವ್ಯಾಖ್ಯಾಯಾಂ ಶಶಿಲೇಖಾಯಾಂ ಶಾರೀರಸ್ಥಾನೇ ಏಕಾದಶೋಽಧ್ಯಾಯಃ