10. annapānavidhiḥ

Adhikarana athA~annapAnavidhirnAma dashamo~adhyAyaH -------------------- upodghAtaH · Śloka

সুরক্ষিতমপ্যন্নপানমবিধিনোপযুক্তং রোগায মরণায বা সম্পদ্যতে| ততস্তস্যোপযোগে বিধিনা বিশেষপ্রদর্শনার্থমধ্যাযারম্ভঃ|

Adhikarana pratij~jA (1) · Śloka 1

অথাতোঽন্নপানবিধিমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

অথাত ইত্যাদি পূর্ববত্ ব্যাখ্যেযম্||১||

Adhikarana annapAnasya vidhyupayogaprayojanam (2) · Śloka 2

বিধিবিহিতমন্নপানমিষ্টেন্দ্রিযার্থমাযতনমাযুষো ব্রুবতে| যদাযত্তানি হ্যোজস্তেজোধাত্বিন্দ্রিযবলতুষ্টিপুষ্টিপ্রতিভারোগ্যাদীনি| তদিন্ধনা চান্তরাগ্নেঃ স্থিতিঃ| অগ্নিমূলং চ দেহধারণমিতি||২||

বিধিনা বিহিতমন্নপানমিষ্টেন্দ্রিযার্থমভিমতরসগন্ধাদি সদাযুষ আযতনমাশ্রযমাচার্যা ব্রুবতে| তথাবিধস্যাহারস্যাযত্তান্যোজঃপ্রভৃতীনি| কার্যকারণভাবাত্| তদিন্ধনা আহার ইন্ধনং যস্যা অন্তরাগ্নিস্থিতেঃ সা তথাবিধা দেহস্য ধারণেঽগ্নিঃ প্রথমং কারণম্||২||

Adhikarana sapta AhAravidhivisheShAyatanAni (3) · Śloka 3

অথাত্মবান্ স্বভাব-সংযোগ-সংস্কার- মাত্রা-দেশ- কালোপযোগ-ব্যবস্থাঃ সপ্তাহারকল্পনাবিশেষাণাং স্বাস্থ্যাস্বাস্থ্যফলানাং হেতুভূতাঃ সমীক্ষ্য হিতমেবানুরুধ্যেত||৩||

অথানন্তরমন্নপানস্য বিধ্যুপযোগপ্রযোজনমুক্ত্বা বিধিরুচ্যতে| আত্মবান্ বুদ্ধিমান্ অন্নস্য স্বভাবসংযোগাদীন্ সপ্ত সম্যক্ সূক্ষ্মযা বুদ্ধ্যা সমীক্ষ্য হিতমেবোপযুক্তং যতেতাহিতং পরিত্যজেত্| কিম্ভূতান্ সপ্ত? আহ-স্বাস্থ্যাস্বাস্থ্যফলানামাহারকল্পনাবিশেষাণা- মোদনপেযাভক্ষ্যব্যঞ্জনাদীনাং কারণভূতান্| মূলপাঠে তু দ্বন্দ্বে স্ত্রীলিঙ্গস্য পরত্বাত্তত্সমানাধিকরণ্যেন হেতুভূতেতি প্রযোগঃ||৩||

Adhikarana svabhAvalakShaNam (4) · Śloka 4

তত্র স্বভাবতো দিব্যোদকরক্তশালিষষ্টিকমুদ্গৈণলাবাদযো লঘবঃ, ক্ষীরেক্ষুব্রীহিমাষানূপামিষাদযো গুরব ইতি| তে খল্বপি সংযোগাদিবিশেষৈরন্যথাত্বং প্রতিপদ্যন্তে||৪||

অন্নে চ দ্রব্যাণি সংযোগবিশেষেণ হি বিলক্ষণকার্যকরাণি ভবন্তি| এষাং চ স্বভাবসংযোগাদীনাং লক্ষণমুচ্যতে| তত্র স্বভাবো দ্রব্যস্বরূপম্| যথা দিব্যোদকাদীনাং লঘুত্বম্ ক্ষীরাদীনাং গুরুত্বমিতি| তানি দ্রব্যাণি সংযোগাদিবিশেষাত্স্বভাবাদন্যথাত্বং বৈপরীত্যং ভজন্তে| এতচ্চ মাত্রাদিপ্রকরণে সবিস্তরমুক্তম্| কেবলমত্র লক্ষণমুচ্যতে||৪||

Adhikarana saMyogalakShaNam (5) · Śloka 5

তত্র সংযোগো নাম দ্বযোর্বহূনাং বা দ্রব্যাণাং সংহতীভাবঃ| স বিশেষমারভতে যন্নৈকৈকশো দ্রব্যাণি||৫||

সংযোগোঽনেকস্য সাহিত্যম্| স চ সংযোগঃ সংযোগিদ্রব্যকার্যবিশিষ্টং কার্যমারভতে| যত্ কার্যমেকৈকং দ্রব্যং কর্তুমশক্তং সত্যপি স্বকার্যকর্তৃত্বে||৫||

Adhikarana saMskAralakShaNam (6) · Śloka 6

সংস্কারস্তু তোযাগ্নিসন্নিকর্ষশৌচমন্থনদেশকালভাবনাভাজনাদিভিরুপজন্যতে||৬||

সংস্কারোঽস্যৈব দ্রব্যস্য জলাগ্নিসন্নিকর্ষাদিভির্বিশেষপ্রাপ্তিঃ

Adhikarana mAtrAlakShaNam (7) · Śloka 7

মাত্রা পুনঃ পিণ্ডপরিমাণতঃ সমুদাযেন প্রতিদ্রব্যাপেক্ষযা চাহাররাশিঃ||৭||

মাত্রা দ্বিধা| একা পিণ্ডপরিমাণেন| যথান্নেনাবিচারিতগুরুলাঘবেন কুক্ষের্দ্বৌ ভাগৌ পূরযিতব্যাবিতি| নানাবিধদ্রব্যসমুদাযেন দ্বিতীযা প্রতিদ্রব্যাপেক্ষযা| যথা গুরূণাং দ্রব্যাণামর্দ্ধতৃপ্ত্যা, লঘূনাং চ নাতিতৃপ্ততযা ভবতি ইতি| দ্বিবিধোঽপ্যাহাররাশির্মাত্রাশব্দবাচ্যঃ||৭||

Adhikarana deshalakShaNam (8) · Śloka 8

দেশো দ্রব্যস্যোপযোক্তুশ্চোত্পত্ত্যবস্থানে| তত্র পুনরুপযোক্তা স্বস্থাতুরত্বতঃ প্রকৃতিভেদতশ্চ পরীক্ষ্যঃ||৮||

দেশো দ্রব্যস্যোপযুজ্যমানস্যোত্পত্তিস্থানমুত্পন্নস্য চ স্থিতিস্থানমেবমুপযোক্তুশ্চ পুরুষস্য| তেন কস্মিন্ কিঙ্গুণযুক্তে দেশে পুরুষো দ্রব্যং বা জাতং, কস্মিন্ বা স্থিতমিতি বিকল্পযেদিত্যর্থঃ| তত্র চ দেশে তস্য দ্রব্যস্যোপযোক্তা স্বস্থো বা স্যাদাতুরো বা কিম্প্রকৃতিশ্চেতি পরীক্ষ্যঃ| এতাবতা হি নানাবিধবিশেষাবগতির্ভবতি||৮||

Adhikarana kAlalakShaNam (9) · Śloka 9

কালস্তু ঋতুব্যাধ্যপেক্ষো জীর্ণাজীর্ণলক্ষণশ্চ||৯||

কালস্তু দ্বৈবিধ্যেনান্নপানোপযোগযোগ্যতাং যাতি| ঋতুব্যাধ্যপেক্ষত্বেন জীর্ণাজীর্ণলক্ষণত্বেন চ| তত্র স্বস্থস্য ঋত্বপেক্ষযাস্মিন্নৃতাবেবমাহারপানমাম্নাতমিত্যাতুরস্য তু ব্যাধ্যপেক্ষযাস্মিন্ ব্যাধাবস্যামবস্থাযামিদং যোজ্যমিতি| যথা জ্বরে- `ক্ষীরোচিতস্য' ইত্যাদি| অথবাঽঽতুরস্যাপি ঋত্বপেক্ষা বিদ্যত এব| তথাহি- শরদি শ্লেষ্মজেঽপি ব্যাধৌ তদ্বিপরীতান্যপি অত্যর্থতীক্ষ্ণোষ্ণানি দাতুং ন পার্যন্তে| উভযস্য স্বস্থস্যাতুরস্য চ জীর্ণাজীর্ণলক্ষণঃ||৯||

Adhikarana ajIrNe bhojanasya sarvadoShaprakopakatvam (10) · Śloka 10

অজীর্ণেঽপি পূর্বস্যাহারস্যাপরিণতো রস উত্তরেণোপসংসৃজ্যমানঃ সর্বান্ দোষান্ প্রকোপযত্যাশু||১০||

এতদুচ্যতে-অজীর্ণস্য তু দ্বৈবিধ্যমন্নত্বেনাহারসারত্বেন চ| অন্নে ত্বজীর্ণে ভোজনেচ্ছাঽপি ন ভবতি| আহারসারে ত্বজীর্ণ উত্তরেণাদ্যতনেন রসেন মিশ্রীভূতে বাতাদীনামুপলেপেন মার্গরোধাদিনা প্রকোপঃ শীঘ্রমেব||১০||

Adhikarana jIrNe bhojanasya guNAH bhojanasya kAlashca (11) · Śloka 11

জীর্ণে তু স্বস্থানস্থেষু দোষেষু বাতানুলোম্যাদুত্সৃষ্টেষু মূত্রপুরীষবেগেষু বিশুদ্ধেষূদ্গারহৃদযস্রোতোমুখেষু বিশদকরণে লঘুনি শরীরেঽগ্নাবুদীর্ণে জাতাযাং বুভুক্ষাযামভ্যবহৃতমন্নমপ্রদূষযদ্দোষানাযুর্বলবর্ণানভিবর্দ্ধযতি| কেবলমযমেব কালো ভোজনস্য||১১||

জীর্ণে তু স্বস্থানস্থদোষাদিলক্ষণে ভুক্তমন্নং দোষাদিকমকোপযদাযুর্বলাদীন্ বর্ধযতি| সুবোধম্||১১||

Adhikarana atItakAlabhojanasya doShAH (12) · Śloka 12

অতীতকালং পুনস্তদ্বাতবিষ্টব্ধং কৃচ্ছ্রাদ্বিপচ্যতে কর্শযত্যন্নরুচিং চ পুনরুপহন্তি||১২||

অতীতকালমস্মিন্ জীর্ণাজীর্ণলক্ষণকালেঽতিক্রান্তে|

Adhikarana AhAropayoge niyamAH (13) · Śloka 13

উপযোগব্যবস্থা তু নাস্নাতো, ন দিগ্বাসা, নৈকবস্ত্রধৃক্, ন মলিনবসনো, নাহুত্বা, নাজপিত্বা, নানিরূপ্য দেবতাভ্যো ন পিতৃভ্যো, নাদত্বাঽগ্রমন্নমগ্নযে, ন গুরুভ্যো নাতিথযে, নাভ্যাগতেভ্যো, ন শ্বযবঃশ্বপচেভ্যঃ প্রত্যবেক্ষ্য চাশ্রিতোপাশ্রিতানপি তিরশ্চোঽপি, স্বপরিগৃহীতান্ প্রশস্তদেশকালোপকরণযুক্তঃ, স্রগ্বী বিভূষিতঃ, সুগন্ধিরার্দ্রপাণিপাদঃ সুবিশুদ্ধবদনোঽভিমতসহাযঃ কেশমক্ষিকাদ্যনুপজুষ্টমনিন্দ্যমনিন্দন্ননিন্দিতমপুনরূষ্ণীকৃতং, নাঽত্যুষ্ণমনুপদগ্ধং, সুসিদ্ধমলোলো, নাসাত্ম্যং নাবিদিতং, নাবিদিতাগমং, নাতিসাযং, নাতিপ্রগে, নাকাশে, নাতপে, নান্ধকারে, নাধো বৃক্ষস্য, ন শয্যাস্থো, নোন্নম্য প্রদেশিনীং, ন পাত্রে ভিন্নে, নাসংবৃতে, ন মলিনে ভাবদূষিতে বা, ন চাসনস্থিতে, ন হস্তস্থে, ন হস্তে, প্রাঙ্মুখঃ, সুমনাঃ শুচিভক্তাক্ষুধিতানুকূলজনোপহিতং হিতমন্নমশ্নীযাত্||১৩||

নাস্নাত ইত্যাদিনা আহারস্যোপযোগে নিযম উচ্যতে| দিগ্বাসা অগৃহীতবসনঃ| ন চৈকপটঃ| নাহুত্বা তিলঘৃতাদিভির্মন্ত্রপূর্বমগ্নিম্| ন জপমকৃত্বা| ন দেবতাভ্যোঽনিরূপ্যাসঙ্কল্প্য তদাহারং ন চাগ্রং প্রথমমনুচ্ছিষ্টসকলভোজনেভ্যঃ স্তোকং স্তোকমগ্নযে অদত্বা| অতিথিরাগন্তুর্ভোজনার্থী| অভ্যাগতাস্তদ্বেশ্ম কেনচিত্প্রসঙ্গেনাগতা বান্ধবাদ্যাঃ| বযাংসি পক্ষিণঃ প্রত্যবেক্ষ্য ভোজনাদিনা| আশ্রিতান্ তদুপাসকান্ ভৃত্যবান্ধবাদীনুপাশ্রিতানাশ্রিতাশ্রিতান্| তিরশ্চো গবাশ্বাদযঃ| পরিগৃহীতাঃ স্বত্বমাপাদিতাঃ| তথা প্রশস্তৈরদুষ্টৈর্দেশাদিভির্যুক্তঃ অনিন্দ্যঃ| ভোজনমগর্হিতং স্বভাবেন| তথা চানিন্দ্যমপি স্বযমনিন্দন্নাহারে গর্হামকুর্বন্নন্যৈশ্চানিন্দিতম্| উপদগ্ধমিত্যগ্নিসংযোগাত্ অসাত্ম্যং বক্ষ্যমাণলক্ষণমবিদিতং গুণাগুণৈরবিজ্ঞাতস্বরূপমবিদিতাগমমজ্ঞাতাগমং নাতিসাযং নাতিপ্রগ ইতি চেত্যাচার্যস্য দিনারম্ভে দিনক্ষযে চ ভোজনপ্রতিষেধোঽভীষ্টঃ| পূর্বাহ্ণাভিধাযী তু প্রগেশব্দঃ কথং প্রযুক্ত ইতি ন জানে| অথবাতিক্রান্তপ্রগ ইতি মধ্যাহ্নে ভোজনপ্রতিষেধঃ| আকাশং নিরাবরণো দেশঃ| উন্নময্য উত্ক্ষিপ্য প্রদেশিনীং অঙ্গুষ্ঠতো দ্বিতীযাঙ্গুলিঃ প্রদেশিনী| ভাবদূষিতমদুষ্টমপি দুষ্টতযা ভাবিতম্| ভোক্তুর্ন হস্তস্থে পাত্রে গৃহীতমাহারমশ্নীযাত্| কেবলং হস্তে গৃহীত্বা চ নাশ্নীযাত্| শুচ্যাদিগুণযুক্তেন পরিজনোপহিতং ঢৌকিতম্| হিতং বক্ষ্যমাণলক্ষণমশ্নীযাত্||১৩||

Adhikarana paryuShitAnnaniShedhaH apavAdashca (14) · Śloka 14

ন পর্যুষিতমন্যত্র মাংসোপদংশভক্ষ্যেভ্যঃ||১৪||

মাংসাদীংশ্চ বর্জযিত্বাঽন্যমাহারং পর্যুষিতং গতাহোরাত্রং নাশ্নীযাত্| উপদংশং যদনগ্নিসিদ্ধিমপি ফলাদি দন্তোনোপদশ্যান্নেন সহ ভুজ্যতে||১৪||

Adhikarana nishsheShabhojananiShedhaH apavAdashca (15) · Śloka 15

নাশেষমন্যত্র দধি-মধু-সলিল-সক্তু-শুক্ত-পাযসেভ্যঃ||১৫||

দধ্যাদীনি চ নিঃশোষাণ্যভ্যবহরেত্ অন্যত্ সশেষমিতি|

Adhikarana snigdhatvAdiguNayuktAhArasyaiva BojananirdeshaH Bojanakramashca (16) · Śloka 16

অপি চ স্নিগ্ধং লঘূষ্ণমবিলম্বিতমনতিদ্রুতমজল্পন্নহসংস্তন্মনাঃ সমীক্ষ্য সম্যগাত্মানম্||১৬||

তথা স্নিগ্ধত্বাদিগুণযুক্তং চাহারমভ্যবহরেত্ তন্মনাঃ অভ্যবহ্নিযমাণে দত্তচিত্তঃ| আত্মানং চ সম্যক্ সমীক্ষ্য বিকল্প্য|

Adhikarana snigdhalaghUShNAhAraguNAH (17) · Śloka 17

স্নিগ্ধলঘূষ্ণানি হি বহ্নিমৌদর্যমুদীরযন্তি কোষ্ঠং পরিশোধযন্তি ধাতূন্ন বিকুর্বতে ক্ষিপ্রজ্জরযন্ত্যনিলমনুলোমযন্তি||১৭||

স্নিগ্ধাদীনি ত্রীণি ধাতূন্ রসাদীন্ নির্মলীকরণেনোপবৃংহকত্বেন চ ন বিকুর্বতে||১৭||

Adhikarana snigdhAhAraguNAH (18) · Śloka 18

তথা স্নিগ্ধং দৃঢীকরোতীন্দ্রিযাণ্যুপচিনোতি শরীরমপচিনোতি জরসং, বলমভিবর্দ্ধযতি, বর্ণপ্রসাদমভিনির্বর্ত্তযতি||১৮||

অন্যত্ সুবোধম্||১৮||

Adhikarana laghvAhAraguNAH (19) · Śloka 19

লঘু চ পুনঃ স্বভাবাদিভিরন্নমপ্রতিপীডযদ্দোষানব্যথমানং পরিণামমেতি| বিপন্নমপি চাল্পদোষং ভবতি||১৯||

আদিগ্রহণেন অসংযোগসংস্কারাদিলঘুত্বগ্রহণম্| বিপন্নমপি অপথ্যতাং প্রাপ্তমপি স্বল্পদোষং ভবতি||১৯||

Adhikarana uShNAhAraguNAH (1) · Śloka 1

উষ্ণং চ পুনর্জনযতি রুচিমুপশোষযতি শ্লেষ্মাণম্|১|

Adhikarana vilambitAhAragrahaNe doShAH (1) · Śloka 1

বিলম্বিতং তু ভুঞ্জানো ন তৃপ্তিমধিগচ্ছতি বহু চ ভুঙ্ক্তে শীতীভবতি চান্নজাতং বিষমপাকং চ ভবতি||১||

Adhikarana atidrutAhAragrahaNe doShAH (20) · Śloka 20

অতিদ্রুতন্তু ভুঞ্জানস্য জল্পতো হসতোঽন্যমনসো বা ভবেদুত্স্নেহনমবসাদনং ভোজনস্যাপ্রতিষ্ঠানং গুণদোষবিভাবনঞ্চ||২০||

উত্স্নেহনমন্নস্যান্যনাডীগমনম্| ভোজনস্য কোষ্ঠপ্রাপ্তিপাকযোরবসাদঃ| অন্যমনস্কত্বাচ্চ ভোজনগুণদোষান্ বিচারযিতুং ন শ্ক্যতে||২০||

Adhikarana bhojanasamaye AtmasamIkShA (21) · Śloka 21

সমীক্ষ্য সম্যগাত্মানমিতি, মমেদং সাত্ম্যমিদমসাত্ম্যমিতি নিত্যমপ্রমত্তঃ প্রত্যবেক্ষেত্||২১||

সমীক্ষ্য সম্যগাত্মানমিতি পূর্বোক্তং ব্যাকরোতি| আত্মানং পরীক্ষ্য ইদং বা তদাত্বে প্রস্তুতং সাত্ম্যমিদমসাত্ম্যমিতি||২১||

Adhikarana sAtmyAsAtmyalakShaNam (22) · Śloka 22

তত্র সাত্ম্যং নাম সহাত্মনা ভবত্যভ্যস্তং তদৌচিত্যাদুপশেত ইত্যেকে| সাত্ম্যবিপরীতমপশযাদসাত্ম্যম্||২২||

সাত্ম্যং যজ্জন্মনঃ প্রভৃতি সহাত্মনাঽভ্যস্তং তচ্চ শরীরে ঔচিত্যাদভ্যস্তত্বাদুপশেতে সুখাবহং ভবতি এতদেব চ লোকে সাত্ম্যশব্দেনোচ্যতে| যজ্জন্মনঃ প্রভৃত্যভ্যস্তং সুখাবহং চ| স্বল্পকালাভ্যস্তং সাত্ম্যমেব| এতদ্বিপরীতমসাত্ম্যম্||২২||

Adhikarana matAntareNa sAtmyAsAtmyalakShaNam (23) · Śloka 23

অন্যে পুনঃ প্রকৃতিবযোদেশর্তুদোষব্যাধিবশেন সাত্ম্যং বহুবিধমিচ্ছন্তি| তে হ্যপশযমাত্রমঙ্গীকৃত্য বিপরীতগুণমপ্যুপচারেণ সাত্ম্যমাচক্ষতে| তুল্যগুণং চানুপশযাদসাত্ম্যম্||২৩||

অন্যে ত্বাচার্যাঃ প্রকৃত্যাদিভেদেন সুখকর্তৃত্বমাত্রহেতুং বহুবিধং সাত্ম্যমিচ্ছন্তি| তে চ জন্মনঃ প্রভৃত্যভ্যস্তমনপেক্ষ্য প্রকৃতিদেশাদিবিশেষমাশ্রিত্য শরীরসংবর্দ্ধকদ্রব্যগুণেভ্যো বিপরীতগুণমপি সম্প্রতি সুখহেতুত্বাত্ সাত্ম্যমাচক্ষতে| তেষাঞ্চ সদৃশগুণমপি শরীরেণাহারজাতং সম্প্রত্যসুখাবহত্বাদসাত্ম্যম্||২৩||

Adhikarana sAtmyasya traividhyam (24) · Śloka 24

সাত্ম্যন্তু প্রবরাবরমধ্যবিভাগেন ত্রিবিধম্| তত্র সর্বরসং প্রবরমেকরসমবরং, মধ্যন্তু মধ্যমেব||২৪||

সর্বং চ সাত্ম্যং ত্রিপ্রকারং ত ইচ্ছন্তি| সুবোধম্|| ২৪||

Adhikarana sAtmyAnAmupayogavyavasthA (25) · Śloka 25

তেষু প্রবরং সমদোষস্যোপদিশন্তীতি| ইতরেষামপি ক্রমেণ সাত্ম্যমপি চাহিতং পাদেন (পাদাংশেন) বা বিবর্জযেদিত্যুক্তং প্রাক্||২৫||

তেষু চ মধ্যে প্রবরং সর্বরসং সমদোষপ্রকৃতেঃ সুখাবহত্বেনোপদিশন্তি| ইতরেষাং চ বিষমদোষপ্রকৃতীনামপি ক্রমাদভ্যাসেন সর্বরসস্য শরীরগুণৈঃ সাদৃশ্যাত্| তেন বলাদুক্তং ভবতি মধ্যমবরং চ বিষমদোষ- প্রকৃতীনামবরমেবেতি| তচ্চ যথাযথমুপশযাত্||২৫||

Adhikarana hitahitAhAralakShaNantayoH shIlanaparihAropadeshashca (26) · Śloka 26

তত্র যদাহারজাতং সমধাতূননুবর্তযতি বিষমাংশ্চ সমীকরোতি তত্সমাসতো হিতম্| বিপরীতমহিতম্| তত্ পুনর্মাত্রাযোগাদিবৈচিত্র্যাদনিযতমপি যথোপদেশং যথাভূযিষ্ঠং চ শীলযেত্ পরিহরেচ্চ||২৬||

পূর্ব (অ০সং০সূ০-৯) চ সাত্ম্যমহিতং ক্রমেণ ত্যজেদিত্যুক্তমতস্তত্রেত্যাদিনা হিতাহিতলক্ষণমুচ্যতে| তচ্চ হিতাহিতং মাত্রাসংযোগাদীনাং বৈচিত্র্যাদনিযতস্বরূপমপি যথোপদেশং শাস্ত্রোপদেশতন্ত্রতযা যথাভূযিষ্ঠং বহুত্বানতিক্রমেণ যদ্বাহুল্যেন সম্ভবতি তদ্যথাসঙ্খ্যেন শীলযেত্ পরিহরেচ্চ| হিতং শীলযেদভ্যসেদহিতং চ পরিহরেদিত্যর্থঃ||২৬||

Adhikarana samashanAdiparihAravidhisteShAM lakShaNa~jca (27) · Śloka 27

তথা বিশেষতঃ সমশনমধ্যশনমমাত্রাশনং বিষমাশনং চ বর্জযেত্| তত্র পথ্যাপথ্যমেকত্র ভুক্তং সমশনম্| ভুক্তস্যোপরিভুক্তমধ্যশনম্| অমাত্রাশনং পুনঃ পৃথগেবোপদেক্ষ্যতে| অপ্রাপ্তাতীতকালন্তু ভুক্তং বিষমাশনমিতি||২৭||

সমশনাদীংস্তু বিশেষতঃ পরিহরেদিতি সম্বন্ধঃ| পথ্যমপথ্যং চ মিশ্রীভূতং সমশনম্| যথোচিতং ভুক্ত্বা কিঞ্চিত্কালমতিক্রম্য যত্ পুনর্ভুজ্যতে তদধ্যশনম্| অমাত্রাশনমগ্রতো বক্ষ্যতে| যথোচিতভোজনকালেঽপ্রাপ্তেঽতিক্রান্তে বা ভুজ্যতে তদ্বিষমাশনম্||২৭||

Adhikarana bhojanasyopakalpanAprakAraH (28) · Śloka 28

ভুঞ্জানস্তু পেযাযূষরসান্ ব্যঞ্জনানি রাজতেষু পাত্রেষু নিদধ্যাত্| পরিশুষ্কপ্রদিগ্ধানত্যুষ্ণঞ্চ পযঃ সৌবর্ণেষু| খলখট্বরকাম্বলিকান্ কাংস্যেষু| রাগষাডবসট্টকান্ বজ্রবৈডূর্যবিচিত্রেষু| ঘৃতমাযসে| পযঃ সুশীতং তাম্রমযে| পানীযং পানিকানি চ মৃদ্ধেমস্ফটিককাচমযেষু| ওদনং চ বিস্তীর্ণে মনোরমে স্থানে| অন্যথা হি বর্ণগন্ধরসান্যত্বাদহিতং স্যাত্||২৮||

অন্যত্সুবোধম্| কট্বরো নাম কট্বম্লোপদেহব্যঞ্জনবিশেষঃ| সট্টকনামা রাগষাডবসদৃশো দেশান্তরে প্রসিদ্ধঃ|| ২৮||

Adhikarana bhojanapAtre bhakShyAdInAM sthAnam (1) · Śloka 1

অপি চ - দক্ষিণপার্শ্বে ভক্ষ্যং স্থাপযেত্| সব্যে পেযং লেহ্যং মুখোদ্ঘর্ষণপিণ্ডীং চ| মধ্যে ভোজ্যমিতি||১||

Adhikarana avasthAvashAdbhojane pUrvaM dravAdInAmupayogaH (29) · Śloka 29

যথাগ্নিসাত্ম্যং তু প্রাক্ দ্রবমুপশুষ্কং বাশ্নীযাত্| প্রাগেব তু গুরুস্বাদুস্নিগ্ধং চ||২৯||

অগ্নিবলাপেক্ষযা সাত্ম্যাপেক্ষযা চ দ্রবং শুষ্কং বা প্রথমমদ্যাত্| গুর্বাদিগুণযুক্তমাহারং পূর্বমেবাদ্যাত্|| ২৯||

Adhikarana bhojanasya madhyAntayorupayojyarasAdi (30) · Śloka 30

মধ্যেঽম্ললবণমন্তে রূক্ষং দ্রবমিতররসযুক্তঞ্চ|৩০|

Adhikarana mandAgnestvAdau dravoShNAhAraH (30) · Śloka 30

তত্র মন্দাগ্নের্দ্রবোষ্ণেন সমুত্তেজিতোষ্মণোঽন্যদুপযুক্তং সম্যক্ পাকমেতি||৩০||

মন্দাগ্নিস্তু দ্রবোষ্ণমেবাদৌ ভুঞ্জীত|| ৩০||

Adhikarana anupAne salilasya shreShThatA (31) · Śloka 31

অনুপানে তু সলিলমেব শ্রেষ্ঠং সর্বরসযোনিত্বাত্সর্বভূতসাত্ম্যত্বাজ্জীবনাদিগুণযোগাচ্চ||৩১||

অনুপানে ভুক্তস্যোপরি পানে জলমেব শ্রেষ্ঠং সর্বরসজনকশক্তেঃ সর্বগুণত্বাদ্ভোজনরসাবিরোধাচ্ছরীরবৃদ্ধিকরম্|| ৩১||

Adhikarana dravyAdivisheSheNAnupAnavisheShavarNanam (32) · Śloka 32

তচ্ছীতং দধিমধুযবগোধূমমদ্যবিশেষেষু সর্বেষু চ বিদাহিষু শরদ্গ্রীষ্মযোশ্চ| উষ্ণং পিষ্টমযেষ্বন্যেষু চ দুর্জরেষু হেমন্তে চ| দ্রবদ্রব্যবিজ্ঞানীযং চেক্ষেত| ক্ষীরং শালিষষ্টিকযোঃতথৈবোপসাধ্বভাষ্যস্ত্রীব্যাযামক্লান্তবালবৃদ্ধেষু| মাংসরসঃ শোষাদিষু| বাতে ত্বম্লানি চ| পিত্তে শর্করোদকম্| ত্রিফলোদকন্তু সক্ষৌদ্রং শ্লেষ্মণি প্রাযশ্চাক্ষিগলরোগেষু| মস্ত্বেব বা দধ্নি কূচিকাকীলাটযোশ্চ| ধান্যাম্লং মস্তু তক্রং বা শাকাবরান্নেষু| মদ্যং মাংসেষু| ফলাম্লমম্বু বাঽঽসবাংশ্চ বিবিধান্ বিভজ্য প্রযোজযেত্| বিশেষতস্তু মধ্বাসবান্ গ্রাম্যেষু, তীক্ষ্ণান্ ত্রিফলাসবান্ বন্যেষু| ন্যগ্রোধাদিফলাসবান্ বিষ্কিরেষু| অর্কশেলুশিরীষকপিত্থাসবান্ বিলেশযেষু, দিগ্ধহতেষু চ| অম্লফলাসবান্ প্রসহেষু| কাশেক্ষুপদ্মবীজশৃঙ্গাটককশেরুকমৃদ্বীকাখদিরাসবান্ ক্ষৌদ্রযুক্তং বা শীতমুদকমুদশ্বিদ্বা মহামৃগেষ্বৌদকেষু চ| সুরাং প্রতুদেষু তথা শ্রমার্তেষু কৃশেষু চ| মধূদকং স্থূলেষু| মদ্যং মদ্যমাংসসাত্ম্যেষ্বল্পাগ্নিষু||৩২||

দ্রবদ্রব্যবিজ্ঞানীযং চেক্ষেত ইত্যেতাবতৈতদুক্তং ভবতি| শীতস্যোষ্ণস্য চ পানীযস্য তত্রোক্তেঃ স্ববিষযেঽনুপানপ্রযোগঃ| ক্ষীরং শালিষষ্টিকযোরুপবাসক্লান্তাদিষু চ| মাংসরসঃ শোষাদিষু অতিলঙ্ঘনোক্তেষু রোগেষু| বাতে তু বৃদ্ধে অনুপানমম্লানি কাঞ্জিকাদীনি চকারান্মাংসরসোঽপি| পিত্তে শর্করোদকম্| শ্লেষ্মণি মাক্ষিকসংযুক্তং ত্রিফলাক্বথিতং জলম্| অক্ষিরোগেষু সর্বেষু গলরোগেষু চ প্রাযশঃ সর্বেষু সমাক্ষিকং ত্রিফলোদকম্| দধ্নি শীতোদকমনুপানং পূর্বমুক্তম্| সম্প্রত্যুচ্যতে- মস্ত্বেব বেতি| দধ্ন উভযানুপানসমুচ্চযপ্রতিষেধার্থমেবকারকরণম্| তেন শীতোদকং বা মস্তু বা দধ্যনুপানমিত্যর্থঃ কূচিকাকীলাটযোশ্চ মস্ত্বেব| অবরান্নং বিদলসস্যান্নম্| অর্কাদ্যাসবান্ বিলেশযেষু| সামান্যেনান্যেষু চ বিষদিগ্ধশস্ত্রহতেষু চ মধূদকং স্থূলেষ্বেব|| ৩২||

Adhikarana anupAnalakShaNam (33) · Śloka 33

অপি চ - সমাসেনান্নবিপরীতমবিরোধি চ||৩৩||

সমাসতঃ সঙ্ক্ষেপত উচ্যতে| ভুক্তস্যান্নস্য গুণৈর্বিপরীতং যদ্ দ্রবং তদনুপানায যোজ্যম্| তচ্চ যদি বিরুদ্ধান্নবিজ্ঞানীযোক্তেন প্রকারেণ ন বিরুদ্ধ্যতে| তত্র পরস্পরং সদৃশানামসদৃশানাং বা গুণানামুভযত্রাপি বলবতাং সতাং বিরোধ উক্তঃ|| ৩৩||

Adhikarana anupAnaguNAH (34) · Śloka 34

অনুপানং খলু তর্পযতি প্রীণযত্যূর্জযতি বৃংহযতি দেহস্য পর্যাপ্তিমভিনির্বর্তযতি ভুক্তমবসাদযত্যন্নসঙ্ঘাতং ভিনত্তি মার্দবমাপাদযতি ক্লেদযতি সুখপরিণামিতামাশুব্যবাযিতাং চাহারস্যোপজনযতি||৩৪||

তর্পণত্বাদযোঽনুপানগুণাঃ|| ৩৪||

Adhikarana anupAnavarjyAH (35) · Śloka 35

বর্জ্যং তূর্ধ্বজত্রুগদশ্বাসকাসপ্রসেকহিধ্মাস্বরভেদোরঃক্ষতিভির্গীতভাষ্যপ্রসক্তৈশ্চ| তেষাং হি প্রদূষ্যামাশযমুরঃকণ্ঠস্থিতমাহারজং স্নেহমাসাদ্য তদভিষ্যন্দাগ্নিসাদচ্ছর্দ্যাদীনামযান্ বিদধ্যাত্||৩৫||

জত্রুণ ঊর্ধ্বমক্ষকসন্ধেরুপরি যস্য রোগস্তেন শ্বাসাদিমদ্ভিশ্চ সর্বমনুপানং ন সেব্যম্| অন্যে মন্যন্তে যদেতদনুপানং প্রতিষিদ্ধং তজ্জলমেব| কাসাদীনাং ক্ষীরাদ্যনুপানবিধানাত্| বযং তু মন্যামহে সামান্যেনাত্র সর্বপ্রতিষেধঃ| কাসাদীনাং বিশিষ্টানাং ক্ষীরাদীনামপবাদত্বং ভবতি| তেষাং হ্যূর্ধ্বজত্রুগদাদীনাং তদনুপানং যথোক্তেন প্রকারেণাভিষ্যন্দাদীন্ বিদধ্যাত্| আদিগ্রহণেন এবং হেতুকানামন্যেষাং গ্রহণম্|

Adhikarana pAnAnantaraM niShiddhAni varjanIyAni ca (36) · Śloka 36

পীত্বা চ ভাষ্যগেযাধ্বস্বপ্নান্ন শীলযেত্| পানং চ প্রক্লিন্ন দেহমেহকণ্ঠাক্ষিরোগব্রণিন ইতি||৩৬||

বহু চ পানং পীত্বা ভাষ্যাদীন্ন শীলযেত্| প্রক্লিন্নদেহাদিনা সতা পানং নৈব সেব্যম্|| ৩৬||

Adhikarana bhojanAnantaravidhiH dravottarabhojanasya visheShashca (37) · Śloka 37

ততঃ পাণিগতমন্নমন্যেনাপনীয দন্তান্তরস্থঞ্চ শনৈঃ শনৈঃ শোধনেন বিশোধ্য লেপগন্ধস্নেহাপনোদমাচান্তোঽঙ্গুল্যগ্রগলিতাম্বুপরিষিক্তনেত্রস্তাম্বূলা-দিকৃতবদনবৈশদ্যো ধূমপানাদিহৃতোর্ধ্বকফবেগঃ পদশতমাত্রং গত্বা বামপার্শ্বেন সংবিশেত্| দ্রবোত্তরভোজনস্তু শয্যাং নাতিসেবেত||৩৭||

পাণিগতং হস্তলগ্নমন্নং পরিশুষ্কেণান্যেনাপনীয দন্তান্তরস্থং চ শস্ত্রবিধৌ (অ০সং০সূ০-৩৪) বক্ষ্যমাণদন্তশোধনেনাপনীযাচামেত্| ঊর্ধ্বকফবেগোঽন্নপীডযা শ্লেষ্মণঃ শিরঃপ্রাপ্তিঃ| বহুদ্রব আহারো যেন ভুক্তস্তেন তত্কালং শয্যা নাশ্রযণীযা| অথবা দ্রবমুত্তরভোজনমন্তভোজনং যস্যেতি বিগ্রহঃ|| ৩৭||

Adhikarana bhuktavataH niShiddhAni (38) · Śloka 38

যানপ্লবনবাহনাগ্ন্যাতপাংশ্চ ভুক্তবান্ বর্জযেত্| আহারপরিণামকরা ভাবাঃ তেষাং কার্যাণি চ আহারপরিণামকরাঃ পুনরিমে ভাবাঃ| তদ্যথা ঊষ্মা, বাযুঃ, স্নেহঃ, ক্লেদঃ, কালঃ সমযোগশ্চ তত্রোষ্মা পচতি, বাযুরপকর্ষতি, স্নেহো মার্দবং জনযতি, ক্লেদশৈথিল্যমাপাদযতি, কালঃ সর্ববপুর্ব্যাপ্তিমভিনির্বর্তযতি| সমযোগস্ত্বেষামন্নপরিণামধাতুসাম্যকরঃ সম্পদ্যতে||৩৮||

ঊষ্মাদয আহারপরিণামকরাঃ- ঊষ্মাগ্নিঃ পচতি| বাযুঃ স্থানাত্ স্থানমন্নস্য পাকাযাপকর্ষতি| ক্লেদোঽন্নসঙ্ঘাতং শ্লথযতি| স্নেহোঽন্নস্য কাঠিন্যং নাশযতি| কালঃ পরিণামমন্নস্য বপুর্ব্যাপ্তিমভিনির্বর্তযতি| তেষাঞ্চ ক্লেদাদীনাং সমযোগঃ অহীনাতিমাত্রত্বমন্নপরিণামোদ্ভবানাং দোষধাতুমলানাং সমত্বকরঃ সম্পদ্যতে|| ৩৮||

Adhikarana samayogasya kAraNAni (39) · Śloka 39

সমযোগস্য তু পুনঃ কারাণান্যুচিতো হিতশ্চ দেহসংস্কারোঽভ্যবহারচেষ্টা শযনং সৌমনস্যঞ্চ||৩৯||

কথমেতেষাং ক্লেদাদীনাং সমযোগো ভবতীত্যুচ্যতে- উচিতোঽভ্যস্তঃ হিতশ্চ পথ্যশ্চাহারাদিকৃতো দেহসংস্কারঃ এবমভ্যবহারাদযোঽপি সুমনস্ত্বঞ্চ|| ৩৯||

Adhikarana pariNamata AhAraguNAH (40) · Śloka 40

পরিণমতস্ত্বাহারস্য গুণাঃ শরীরগুণভাবমাপদ্যন্তে যথাস্বমবিরুদ্ধাঃ||৪০||

এষাং ক্লেদাদীনাং সমযোগেনান্নস্য পরিণামাত্ কিং ভবতীত্যাহ- পরিণমতঃ পরিণতিং ক্রমেণ গচ্ছতো গুণা গুরুত্বদ্রবত্বাদযঃ শরীরস্থৈঃ গুরুত্বদ্রবত্বাদিভিরেকত্বমাপদ্যন্তে| অথবা গুণশব্দো ভাগপর্যায এব গৃহ্যতে ত্রিগুণা রজ্জুরিত্যত্র যথা| জগতঃ পঞ্চভূতাত্মকত্বাচ্ছরীরস্যাপি পঞ্চভূতাত্মকত্বাত্ বৃদ্ধিঃ সমানৈঃ সর্বেষাং ইত্যনেন (অ০সং০সূ০-১) ন্যাযেন পরিণতাহারগুণৈঃ সদৃশেষু শরীরগুণেষু বৃদ্ধিরিতি যথাস্বশব্দস্যার্থঃ|| ৪০||

Adhikarana viruddhAhAradoShaH (41) · Śloka 41

বিরুদ্ধাস্তু বিহতাশ্চ বিরোধিভির্বিহন্যুঃ শরীরমিতি||৪১||

শরীরগুণৈরবিরুদ্ধাস্ত্বাহারগুণাঃ স্বভাবপ্রকৃত্যাদ্যপেক্ষযা বিরুদ্ধাহারগুণৈশ্চ বিহিতাহারগুণাঃ শরীরং বিহন্যুরিতি||৪১||

Adhikarana bhuktavatA abhyojyAnyatyarthAkAMkShAyAM mAtrayA bhojyAni ca (42) · Śloka 42

ভবন্তি চাত্র- ঔকুলাভ্যোষপৃথুকান্ সুপিষ্টকৃততণ্ডুলান্| ন জাতু ভুক্তবানদ্যান্মাত্রযাদ্যাত্সুকাংক্ষিতঃ||৪২||

ঔকুলং কাণ্ডস্থান্যপক্বানি ভৃষ্টানি সস্যানি, অভ্যোষস্তদ্বিধা এব যবাঃ| পৃথুকাঃ কৃতান্নবর্গোক্তাঃ (অ০সং০সূ০-৭), এতান্ শালিপিষ্টকৃতাংশ্চ তণ্ডুলাংশ্চ ভুক্তবান্নাদ্যাত্| অত্যর্থাকাংক্ষাযাং তু মাত্রযাদ্যাত্ অতিস্তোক- মদ্যাদিত্যর্থঃ||৪২||

Adhikarana tyAjyaM bhojanam (43) · Śloka 43

শাকাবরান্নকট্বম্লকষাযলবণোত্কটম্| ত্যজেদেকরসাসাত্ম্যং গুরু শুষ্কং চ ভোজনম্||৪৩||

শাকভূযিষ্ঠমেকরসাদিকং চ ভোজনং ত্যজেত্||৪৩||

Adhikarana sAtatyenAshIlanIyAni (44) · Śloka 44

বক্ষ্যতে যন্নিদানাদৌ সর্বদোষপ্রকোপণম্| অত্যভিষ্যন্দি বিষ্টম্ভি বিদাহি গুরু রূক্ষণম্| কিলাটদধিকূচীকামত্স্যশুষ্কামমূলকম্| ক্ষারপিষ্টবিরূঢাদ্যং তত্সমস্তং ন শীলযেত্||৪৪||

তথা নিদানস্থানাদৌ রোগহেতুবক্তব্যপ্রসঙ্গে সর্বেষাং রোগাণাং যত্কারণত্বেনোক্তং তত্র শীলযেত্| যত্ক্বচিত্কারণত্বেনোক্তং তত্সাতত্যেন নাভ্যসেদিত্যর্থঃ| অত্যভিষ্যন্দিত্বাদিগুণযুক্তঞ্চ ন শীলযেত্||৪৪||

Adhikarana nityaM shIlanIyAni (45) · Śloka 45

শীলযেচ্ছালিগোধূমযবষষ্টিকজাঙ্গলম্| সুনিষণ্ণকজীবন্তীবালমূলকবাস্তুকম্| পথ্যামলকমৃদ্বীকাপতোলীমুদ্গশর্করাঃ| ঘৃতদিব্যোদকক্ষীরক্ষৌদ্রদাডিমসৈন্ধবম্| ত্রিফলাং মধুসর্পিভ্যাং নিশি নেত্রবলায চ| স্বাস্থ্যানুবৃত্তিকৃদ্যচ্চ রোগোচ্ছেদকরঞ্চ যত্||৪৫||

শালিগোধূমাদীংস্তু শীলযেদভ্যসেত্| নেত্রবলেচ্ছুশ্চ মাক্ষিকঘৃতাভ্যাং মিশ্রাং ত্রিফলাং শীলযেত্|তথেদমপি শীলযেত্ যদাহারবিহারং স্বস্থস্য স্বাস্থ্যমনুবর্ত্তযত্যাতুরস্য চ ব্যাধ্যুপশমং করোতীতি||৪৫||

Adhikarana svabhAvAdiviparItAni varjyAni (46) · Śloka 46

স্বভাবমাত্রাযোগাদিপরস্পরবিপর্যযৈঃ| ভোজনানি বিরুদ্ধ্যন্তে তানি বিদ্বান্ বিবর্জযেত্||৪৬||

প্রসঙ্গেনোচ্যতে-স্বভাবমাত্রেত্যাদি| সুবোধম্||৪৬||

Adhikarana dhAtusAmyAnuvRuttau dhAtuvaiShamyAnuvRuttau ca hetuH (47) · Śloka 47

ত্যগাদ্বিষমহেতূনাং সমানাং চোপসেবনাত্| বিষমা নানুবধ্নন্তি জাযন্তে ধাতবঃ সমাঃ||৪৭||

বিষমাণাং দোষধাতুবৈষম্যহেতূনাং অসমযোগস্থিতানামাহারদেশাদীনাং ত্যাগাদ্বিষমা ধাতবঃ শরীরং নানুবধ্নন্তি| সমানাঞ্চ যথোচিতহিতানাং সংসেবনাদ্ধাতবঃ সমা জাযন্তে| তেনৈতদুক্তং ভবতি- স্বকারণসামগ্রী- বিরহাত্ স্বযং নাশঃ, তথা কারণসামগ্রীসন্নিধানেঽবশ্যং জন্মেতি||৪৭||

Adhikarana kukShAvannapAnapUraNakramaH apavAdashca (48) · Śloka 48

অন্নেন কুক্ষের্দ্বাবংশৌ পানেনৈকং প্রপূরযেত্| আশ্রযং পবনাদীনাং চতুর্থমবশেষযেত্| মন্দানলবলারোগ্যনৃপেশ্বরসুখাত্মসু| যোজ্যঃ ক্রমোঽযং সততং নাবশ্যমিতরেষু চ||৪৮||

অন্নেন কুক্ষের্দ্বৌ ভাগৌ পূরযেত্| তৃতীযং ভাগং পানেন পূরযেত্| দোষাণামাশ্রযং সঞ্চরণস্থানং চতুর্থং ভাগমবশেষযেত্| অন্যথা অন্নপানপূরিতে সর্বকুক্ষৌ দোষা নিরাশ্রযাস্তমেবান্নপানমুত্পীড্য বিষূচিকাদীন্ রোগান্ কুর্যুঃ| এষাঞ্চ কল্পনা অর্ধভাগত্রযতৃপ্ত্যাদিনানুমীযতে (অ০সং০সূ০-১১) ন চ কুক্ষের্ভাগো বিজ্ঞাযতে| অযঞ্চানন্তরোক্তান্নপানক্রমো মন্দানলাদীনাং পুরুষাণাং যোজ্যঃ| ইতরেষামুক্তেভ্যোঽন্যেষামবশ্যং ন যোজ্যঃ| দরিদ্রাত্যগ্ন্যাতুরদুঃখাত্মনাং হি যথাযথমগ্নিবলোপকরণাদিসম্ভবাপেক্ষযা বুদ্ধ্যা ঊহ্যম্||৪৮||

Adhikarana rUkShasnigdhAhAraguNAH (49) · Śloka 49

করোতি রূক্ষং বলবর্ণনাশং ত্বগ্রূক্ষতাং বাতশকৃন্নিরোধম্| স্নিগ্ধন্ত্বতিশ্লেষ্মচযপ্রসেকহৃদ্গৌরবালস্যরুচিপ্রণাশান্||৪৯||

রূক্ষ আহারো বলনাশাদিকং করোতি| অতিস্নিগ্ধঃ শ্লেষ্মসঞ্চযাদীন্ করোতি| প্রসেকো মুখাচ্ছ্লেষ্মস্রুতিঃ||৪৯||

Adhikarana atyuShNAtishItAhAraguNAH (50) · Śloka 50

অত্যুষ্ণমন্নম্মদদাহতৃষ্ণাবলপ্রণাশভ্রমরক্তপিত্তম্| শীতন্তু সাদারুচিবহ্নিসাদহৃল্লাসবিষ্টম্ভনরোমহর্ষান্||৫০||

অত্যুষ্ণো মদাদীন্ করোতি| অতিশীতমগ্নিসাদাদীন্ করোতি| হৃদযস্যোত্ক্লেশেন যুক্তঃ প্রসেক এব হৃল্লাসশব্দবাচ্যঃ||৫০||

Adhikarana atikaThinAtidravAhAraguNAH (51) · Śloka 51

অতিস্থিরং মূত্রশকৃদ্বিবন্ধমতৃপ্তিমব্যাপ্তিমশীঘ্রপক্তিম্| অতিদ্রবং পীনসমেহকাসস্যন্দান্ করোত্যগ্নিবলঞ্চ হন্তি||৫১||

অতিস্থিরোঽতিকঠিনো মূত্রশকৃদ্বিবন্ধাদীন্ করোতি| অব্যাপ্তিরেকস্মিন্ভাগে জঠরস্য স্থিতিঃ| অতিদ্রবঃ পীনসাদীন্ করোতি| স্যন্দো নামাক্ষিরোগঃ(অ০সং০সূ০-১৮)||৫১||

Adhikarana atimadhurAsAtmyAtilavaNatIkShNAtyamlAhAraguNAH (52) · Śloka 52

অতিমধুরমনলশমনং ভুক্তমসাত্ম্যং ন পুষ্টযে বপুষঃ| অতিলবণমচক্ষুষ্যং তীক্ষ্ণাত্যম্লং জরা সাক্ষাত্||৫২||

অতিমধুরশ্চাহারোঽগ্নিনাশনঃ| অসাত্ম্যং চ ভুক্তং দেহপুষ্টিং ন করোতি| অতিলবণং চক্ষুষোঽপথ্যম্| অতিতীক্ষ্ণমত্যম্লং চ জরা সাক্ষাদতিশযেন জরাকারণত্বাত্|| ৫২||

Adhikarana annapAnavidhyadhyAyopasaMhAraH (10) · Śloka 10

ইতি বিবিধমবলম্ব্য যোঽন্নপানং বলমিব বিগ্রহবত্সদোপযুঙ্ক্তে| তনুমপি তনুজাং রুজাং ত্বনাপ্য ব্রজতি নরঃ স সমাশতস্য পারম্||৫৩|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতৌ অষ্টাঙ্গসংগ্রহসংহিতাযাং সূত্রস্থানেঽন্নপানবিধির্নাম দশমোঽধ্যাযঃ||১০||

ইত্যনেন প্রকারেণ বিধিং ক্রমং মাত্রাভ্যাসাদিকমবলম্ব্য গৃহীত্বা যো নরোঽন্নপানং ভুঙ্ক্তে| কিম্ভূতম্? বিগ্রহবত্সশরীরমিব বলং, তদ্ধেতুকত্বাত্| স নরস্তনুমপি স্বল্পামপি তনুজাং দেহজাং রুজাং পীডামনাপ্যালব্ধ্বা সমাশতস্য সংবত্সরশতস্য পারমন্তং ব্রজতি| অনাপ্যেত্যত্রাঙ্প্রযুক্তস্তেন সাধ্বিতি|| ৫৩|| ইতি শ্রীমন্মহামহোপাধ্যাযেন্দুবিরচিতাযাম্ অষ্টাঙ্গসংগ্রহব্যাখ্যাযাং শশিলেখাযাং সূত্রস্থানে দশমোঽধ্যাযঃ||১০||