1. āyuṣkāmīyaḥ

Adhikarana adhyAyopakramaH (1) · Śloka

|| শ্রীঃ|| শ্রীমদ্বাগ্ভটবিরচিতঃ অষ্টাঙ্গসঙ্গ্রহঃ মহামহোপাধ্যাযেন্দুবিরচিতশশিলেখাব্যাখ্যাসমন্বিতঃ অথ সূত্রস্থানম্ মঙ্গলাচরণম্ রাগাদিরোগাঃ সহজাঃ সমূলা যেনাঽশু সর্বে জগতোঽপ্যপাস্তাঃ| তমেকবৈদ্যং শিরসা নমামি বৈদ্যাগমজ্ঞাংশ্চ পিতামহাদীন্|| ১|| টীকাকারকৃতং মঙ্গলম্ প্রোদ্ভাসি-স্বচ্ছ-শঙ্খ-স্ফুটশশি-শকলোদ্দাম-বৈশদ্যহৃদ্য- প্রোদ্যত্সৌন্দর্যবর্যপ্রকটিতবপুষং নৌমি বাগীশ্বরীং তাম্| কল্লোলোল্লাস-শান্তি-প্রতত-সিততর-ক্ষীরসিন্ধ্বন্তরাল- শ্লিষ্যত্পীযূষরেখাং স্মরযতি বিবুধান্ধ্যাযতো যো দযালুঃ|| ১|| সরসি সুবিপুলাযুর্বেদরূপে কৃতাস্থং মুনিবরবচনৌঘে দীর্ঘনালে নিবদ্ধম্| রচিতদলমিবাঙ্গৈঃ সংগ্রহাখ্যং সরোজং বিকসতি শশিলেখা ব্যাখ্যযেন্দোর্যথাবত্|| ২|| অনালোচিততন্ত্রার্থঃ পদাদাবকৃতশ্রমঃ| যত্রাবভাষতে মূর্খস্তত্রাবাচ্যা বিপশ্চিতঃ|| ৩|| বন্ধচ্ছাযাবিশেষজ্ঞঃ সূক্ষ্মমপ্যধিগচ্ছতি| সুকবেরপি যা বাচঃ কুণ্ঠাস্তা জনসংসদি|| ৪|| কিযদ্বা কথযিষ্যামি যত্সতত্ত্বৈর্ন বুদ্ধ্যতে প্রমাণং চ তদেবাত্র যদস্মাভির্নিরূপ্যতে|| ৫|| দুর্ব্যাখ্যাবিষসুপ্তস্য বাগ্ভটস্যাস্মদুক্তযঃ| সন্তু সংবিত্তিদাযিন্যঃ সদাগমপরিষ্কৃতাঃ|| ৬|| সোঽযং বাগ্ভটনামা শাস্ত্রকারো লোকহিতায শাস্ত্রমারিপ্সুর্বিঘ্নোপশমাযাভিমত দেবতানমস্কারং করোতি রাগাদীত্যাদিনা| রাগাদিরোগা যেনাপাস্তাঃ তং নমামীতি সম্বন্ধঃ| রাগাদযঃ প্রসিদ্ধাঃ| রাগ আদির্যেষাং ত ইমে রাগাদযঃ| আদিগ্রহণেন দ্বেষাদীনাং পরিগ্রহঃ| রুজন্তীতি রোগাঃ, রাগাদযশ্চ তে রোগাশ্চ রাগাদিরোগাঃ, সহ জাতাঃ সহজাঃ জন্মনঃপ্রভৃতি শরীরিণা সঙ্গতাঃ সমূলা যেনাপাস্তাঃ| মূলমেষামজ্ঞানম্| আশু শীঘ্রমেব| সর্বে ন তু কেচিদেব| জগতোঽপি নাঽঽত্মন এব| তমেকবৈদ্যং নমামি| একশ্চাসৌ বৈদ্যশ্চ তং নমামি| এবঙ্গুণযুক্তস্যান্যস্য ভিষজোঽভাবাত্তস্যৈকত্বম্| ন হ্যন্যো বৈদ্যঃ সহজত্বাদ্যসাধ্যলক্ষণযুক্তান্ রোগাঞ্জেতুং শক্নোতি| অভিমতদেবতানমস্কারং কৃত্বা বিঘ্নোপশমাযৈব পুনর্গুরুনমস্কারং করোতি বৈদ্যাগমজ্ঞাংশ্চ পিতামহাদীনিতি| বৈদ্যানামাগমো বৈদ্যাগম আযুর্বেদস্তঞ্জানন্তীতি বৈদ্যাগমজ্ঞাঃ| আদিগ্রহণেন দক্ষপ্রজাপত্যাদীনাং গ্রহণম্|| ১||

Adhikarana athA~a~ayuShkAmIyo nAma prathamo~adhyAyaH pratij~jA (1) · Śloka 1

অথাত আযুষ্কামীযং নামাধ্যাযং ব্যাখ্যাস্যামঃ| ইতি হ স্মাঽহুরাত্রেযাদযো মহর্ষযঃ||১||

অথ নমস্কারং কৃত্বা তন্ত্রং প্রস্তৌতি-অথাত ইত্যাদি| অথেতি মঙ্গলার্থঃ| অত ইতি নমস্কারাদানন্তর্যে| আযুষ্কামেভ্যো হিত আযুষ্কামীযঃ| আযুষ্কামশব্দোঽত্রাস্ত্যধ্যায ইতি বা আযুষ্কামীযঃ| অধ্যায ইতি বিশিষ্টপ্রকরণনাম| ব্যাখ্যাস্যামো বর্ণযিষ্যামঃ| ইতি হ স্মাঽহুরিত্যাদিনা ন স্বমনীষাকারিতেতি দ্যোতযতি| ইতি হেতিনিপাতসমুদাযোঽতীতবস্তুবিষযঃ| আহুঃ স্ম ব্রুবন্তি স্ম `লট্ স্মে' ইতি ভূতে লট্ প্রযোগঃ| আত্রেযাদযো মহর্ষযঃ আদিশব্দেন ভরদ্বাজাদীনাং পরিগ্রহঃ| মহান্তশ্চ তে ঋষযশ্চ মহর্ষযঃ| মহত্ত্বন্তু জ্ঞানাদ্যতিশযযোগাত্পূজ্যতা|| ১||

Adhikarana AyurvedAnusaraNaPalamadhikArI ca (2) · Śloka 2

আযুঃকামযমানেন ধর্মার্থসুখসাধনম্| আযুর্বেদোপদেশেষু বিধেযঃ পরমাদরঃ||২||

কিমাহুঃ? আযুঃকামযমানেনেত্যাদি| অনেনাঽঽযুর্বেদতত্ত্বাধিগমার্থং শিষ্যগণং প্রোত্সাহযতি| আযুঃকামযমানেন যথোচিতং জীবিতং নীরোগমিচ্ছতা| আযুর্বেদোপদেশেষু যৈরুপাযৈরাযুর্বেদ উপদিশ্যতে তেষু| পরমাদরো বিধেযঃ কিম্ভূতমাযুঃ? ধর্মাদিসাধনম্| ন হি প্রাধান্যেন ধর্মাদযঃ সাধ্যন্তে| অনেন সম্বন্ধাদীনি অপ্যুক্তানি ভবন্তি| অত্র উপাযোপেযভাবলক্ষণঃ সম্বন্ধঃ| অস্য তন্ত্রস্যাঽঽযুর্বেদোপদেশত্বাদুপাযত্বম্| তত্ সাধ্যত্বাদাযুষ উপেযত্বম্| অভিধেযমাযুর্বেদঃ| প্রযোজনমাযুঃ ধর্মার্থসুখানি চেতি|

Adhikarana AyurvedAgamakramaH (3) · Śloka 3

আযুর্বেদামৃতং সার্বং ব্রহ্মা বুদ্ধ্বা সনাতনম্| দদৌ দক্ষায সোঽশ্বিভ্যাং তৌ শতক্রতবে ততঃ| ধর্মার্থকামমোক্ষাণাং বিঘ্নকারিভিরামযৈঃ| নরেষু পীড্যমানেষু পুরস্কৃত্য পুনর্বসুম্| ধন্বন্তরিভরদ্বাজনিমিকাশ্যপকশ্যপাঃ| মহর্ধযো মহাত্মানস্তথা লম্বাযনাদযঃ| শতক্রতুমুপাজগ্মুঃ শরণ্যমমরেশ্বরম্| তান্দৃষ্ট্বৈব সহস্রাক্ষো নিজগাদ যথাগমম্| আযুষঃ পালনং বেদমুপবেদমথর্বণঃ| কাযবালগ্রহোর্ধ্বাঙ্গশল্যদংষ্ট্রাজরাবৃষৈঃ| গতমষ্টাঙ্গতাং পুণ্যং বুবুধে যং পিতামহঃ||৩||

সংবন্ধাদীন্যুক্ত্বা আগমশুদ্ধিং দর্শযতি- আযুর্বেদামৃতমিত্যাদিনা| অনেন গুরুপরম্পরামপি দর্শযতি| ব্রহ্মা পদ্মযোনিরাযুর্বেদামৃতং বুদ্ধ্বা দক্ষায দদৌ| যথাঽমৃতেন সকলরোগপরিক্ষযঃ তথৈব আযুর্বেদেনেত্যতঃ সাদৃশ্যম্| সর্বেভ্যো হিতং সার্বম্| সনাতনমবিনাশি| স দক্ষোঽশ্বিভ্যাং দেবভিষগ্ভ্যাং দদৌ| তাবশ্বিনৌ শতক্রতবে ইন্দ্রায দদতুঃ| ততোঽনন্তরমাযুর্বেদজ্ঞানপরিপূর্ণে শতক্রতৌ ধর্মাদিচতুর্বর্গবিঘ্নকারিভিরামযৈঃ পীড্যমানেষু সত্সু নরেষু সকলজনরোগোপশমহেতোর্মহর্ষযঃ শতক্রতুমুপাজগ্মুরুপাবিশন্| যত এব শরণ্যস্ততঃ| অমরাণামীশ্বরং দেবনাযকম্| মহতী ঋদ্ধির্যেষাং তে মহর্দ্ধযঃ| মহর্ষযো ধন্বন্তরিপ্রভৃতযঃ| ন কেবলং ধন্বন্তরিপ্রভৃতযঃ যাবল্লম্বাযনাদযোঽপি| তান্ ধন্বন্তরিপ্রভৃতীন্ দৃষ্ট্বৈব সহস্রাক্ষো যথাঽগমং নিজগাদ আগমমনতিক্রামংস্তেভ্যঃ কথযাঞ্চকার| কিমিত্যাহ- আযুষঃ পালনং জীবিতস্য রক্ষণং উপবেদমথর্বণঃ অথর্ববেদস্যোপবেদম্| কীদৃশমাযুর্বেদং নিজগাদেত্যাহ- কাযেতি| কাযাদিভিরষ্টাঙ্গতাঙ্গতম্| যং পিতমহো বুবুধ ইতি সংবন্ধঃ| কাযচিকিত্সা কাযশব্দেনোচ্যতে| এবং বালাদিষ্বপি যোজ্যম্| এবমন্যেষ্বপি| বৃষং বাজীকরণম্| যথাভূতমেব ব্রহ্মণা বুদ্ধং তথাভূতমেব তেষাং জ্ঞানমিত্যর্থঃ|| ৩||

Adhikarana AyurvedAnayanam (4) · Śloka 4

গৃহীত্বা তে তমাম্নাযং প্রকাশ্য চ পরস্পরম্| আযযুর্মানুষং লোকং মুদিতাঃ পরমর্ষযঃ||৪||

তে চ ধন্বন্তরিপ্রভৃতযস্তমাম্নাযং শতক্রতুপ্রোক্তমাগমং গৃহীত্বা মযৈবমজ্ঞাযি মযৈবমজ্ঞাযীতি পরস্পরং প্রকাশ্য চ মানুষং লোকমাযযুঃ প্রাপুঃ| কিম্ভূতাঃ মুদিতাঃ সম্পন্নকার্যত্বাত্সহর্ষাঃ|| ৪||

Adhikarana Ayurvedasya tantranirmANam (5) · Śloka 5

স্থিত্যর্থমাযুর্বেদস্য তেঽথ তন্ত্রাণি চক্রিরে| কৃত্বাঽগ্নিবেশহারীত ভেডমাণ্ডব্যসুশ্রুতান্| করালাদীংশ্চ তচ্ছিষ্যান্ গ্রাহযামাসুরাদৃতাঃ| স্বং স্বং তন্ত্রং ততস্তেঽপি চক্রুস্তানি কৃতানি চ| গুরুন্ সংশ্রাবযামাসুঃ সর্ষিসঙ্ঘান্সুমেধসঃ| তৈঃ প্রশস্তানি তান্যেষাং প্রতিষ্ঠাং ভুবি লেভিরে||৫||

আগত্য চ মানুষং লোকমাযুর্বেদস্য স্থিত্যর্থমাযুর্বেদো মান্তর্ধাদিতি তন্ত্রাণি চক্রিরে অকুর্বন্| ততস্তানি তন্ত্রাণি কৃত্বা আদৃতাঃ সাদরং পুনর্বসুধন্বন্তরিপ্রভৃতযোঽগ্নিবেশাদিকান্ সুশ্রুতান্ তানধিগমযামাসুঃ| ন কেবলমগ্নিবেশাদিকান্ যাবত্তত্ শিষ্যান্ করালাদীনপি গ্রাহযামাসুঃ| তেঽপ্যগ্নিবেশাদযঃ ধন্বন্তরিপ্রভৃতিভ্যস্তানি তন্ত্রাণি গৃহীত্বা স্বযং তন্ত্রং চক্রুঃ| ততশ্চ স্বযংকৃতানি তন্ত্রাণি গুরূন্ ধন্বন্তরিপ্রভৃতীন্ সংশ্রাবযামাসুঃ| কিম্ভূতান্ গুরূন্? সর্ষিসঙ্ঘান্ সমুনিসমূহান্| কিম্ভূতা অগ্নিবেশাদযঃ? সুমেধসঃ সুপ্রজ্ঞাঃ| তানি চ তন্ত্রাণ্যেষামগ্নিবেশাদীনাম্| তৈর্ধন্বন্তরিপ্রভৃতিভিঃ| প্রশস্তানি কৃতপ্রশংসানি| প্রতিষ্ঠাং সুপূজ্যাং স্থিতিম্| ভুবি মনুষ্যলোকে| লেভিরে প্রাপুঃ|| ৫||

Adhikarana aShTA~ggasaMgrahopodghAtaH (6) · Śloka 6

তেষামেকৈকমব্যাপি সমস্তব্যাধিসাধনে| প্রতিতন্ত্রাভিযোগে তু পুরুষাযুষসংক্ষযঃ| ভবত্যধ্যযনেনৈব যস্মাত্প্রোক্তঃ পুনঃ পুনঃ| তন্ত্রকারৈঃ স এবাঽর্থঃ ক্বচিত্কশ্চিদ্বিশেষতঃ| তেঽর্থপ্রত্যাযন পরা বচনে যচ্চ নাদৃতাঃ||৬||

ইত্যনেন গ্রন্থসংদর্ভেণাঽগমশুদ্ধিং দর্শযিত্বা স্বযং তন্ত্রকরণে হেতুমাহ-তেষামিতি| তেষামগ্নিবেশাদিপ্রণীতানাং তন্ত্রাণামেকৈকং তন্ত্রং সমস্তব্যাধিসাধনে সকলরোগচিকিত্সিতেঽব্যাপি অসম্পূর্ণম্| ন হি সুশ্রুতপ্রণীতা ক্বচিচ্চিকিত্সাঽগ্নিবেশকৃতে তন্ত্রে জ্ঞাতে জ্ঞাতা ভবত্যতঃ প্রতিতন্ত্রাভিযোগে ত্বধ্যযনমাত্রেণৈব পুরুষাযুষসংক্ষযো ভবতি, ন হি তদুক্তবিধানানুষ্ঠানস্যাঽযুর্ভবত্যতঃ যস্মাত্ চ সুখগ্রহণার্থং লোকস্যৈক এবার্থস্তন্ত্রকারৈঃ পুনঃপুনঃ প্রোক্তঃ স এবৈকেন প্রোক্তঃ স এবান্যেন| ন কেবলমেবং যাবত্ ক্বচিচ্চ তন্ত্রে কশ্চিদর্থো বিশেষতঃ অন্যেন বিশেষেণোক্তঃ অতস্তদ্বিজ্ঞানমতিদুর্লভম্| যচ্চ যস্মাচ্চ তে তন্ত্রকৃতো বিবক্ষিতার্থপ্রত্যাযনপরত্বাদ্বচনে শব্দে অনাদৃতা অবহেলাবন্তঃ বচনস্য স্বল্পত্ববহুত্বনিরপেক্ষাঃ অর্থাদরেণ বহুভাষিণ ইত্যর্থঃ|| ৬||

Adhikarana saMgrahasya sarvatantrasaMgraharUpatvaM yugAnurUpasandarBatva~jca (7) · Śloka 7

সর্বতন্ত্রাণ্যতঃ প্রাযঃ সংহৃত্যাঽষ্টাঙ্গসংগ্রহঃ| অস্থানবিস্তরাক্ষেপপুনরুক্তাদিবর্জিতঃ| হেতুলিঙ্গৌষধস্কন্ধত্রযমাত্রনিবন্ধনঃ| বিনিগূঢার্থতত্ত্বানাং প্রদেশানাং প্রকাশকঃ| স্বান্যতন্ত্রবিরোধানাং ভূযিষ্ঠং বিনিবর্তকঃ| যুগানুরূপসন্দর্ভো বিভাগেন করিষ্যতে||৭||

অতোঽপি হেতোঃ সর্বতন্ত্রাণি সংহৃত্যাঽষ্টাঙ্গসংগ্রহঃ করিষ্যত ইতি সম্বন্ধঃ| কিম্ভূতোঽষ্টাঙ্গসংগ্রহঃ| অস্থানবিস্তরাদিবর্জিতঃ| উচিতে পুনঃ স্থানে বিস্তরাদীনি বিধীযন্ত এব| তথাহি ঋতুস্বরূপবর্ণনে দোষোপক্রমণে চ স্বস্থাতুরহিতত্বাদ্বিস্তরোঽপ্যুপযুজ্যত এব| তথা গর্ভাবক্রান্ত্যঙ্গবিভাগাদিষু আক্ষেপোঽপি দৃশ্যতে| তথাঽতিযোগাদিপ্রকরণে পুনরুক্তমপীতি| অন্যে পুনরাহুঃ- অন্যত্র বক্তব্যমর্থবস্ত্বন্যত্রোঽচ্যত ইত্যস্থানং তদ্বর্জিতঃ| তথা বিস্তরাক্ষেপাভ্যাং বর্জিতঃ নাতিবিস্তরো নাতিসংক্ষিপ্ত ইত্যর্থঃ| সকৃজ্জ্ঞাপিতস্য বস্তুনঃ পুনর্বচনং পুনরুক্তিস্তদ্বর্জিতঃ| অন্যচ্চ হেত্বাদিস্কন্ধত্রযমাত্রনিবন্ধনঃ| হেতূ রোগোদ্ভবকারণং স্কন্ধঃ সমূহঃ| হেতুস্কন্ধো মিথ্যাহারবিহারাদিঃ| লিঙ্গং ভবিষ্যতঃ সতশ্চ ব্যাধেশ্চিহ্নভূতম্| যথা জ্বরস্যালস্যাদিঃ| ঔষধস্কন্ধো রোগচিকিত্সার্থং হিতাশনচূর্ণলেহক্বাথাদিঃ| সম্প্রাপ্তের্হেতুস্কন্ধ এবাঽন্তর্ভাবঃ| উপশযঃ পুনঃ লিঙ্গস্কন্ধে বা ঔষধস্কন্ধে বাঽনুপ্রবিশতি| এবমন্যদপ্যস্মিন্নেব স্কন্ধত্রযেঽন্তর্ভাব্যম্| এতাবন্মাত্রমত্র নিবধ্যত ইত্যর্থঃ| মাত্রাশব্দঃ স্তোকপর্যাযঃ অন্যতন্ত্রেষু যথা বহুবক্তব্যতা ন তথাঽত্র কিন্তু কেবলং তাত্পর্যবস্তুগ্রহণমিতি মাত্রশব্দপ্রযোগঃ| অন্যচ্চ কিম্ভূতোঽষ্টাঙ্গসংগ্রহঃ? অন্যতন্ত্রেষু বিনিগূঢার্থতত্বা যে প্রদেশাস্তেষাং প্রকাশকঃ| তথা চরকমুনিনা ষষ্টিকস্য গুণেষু "স্নিগ্ধোঽগুরুশ্চে"তি সন্ধানকেঽকারপ্রযোগঃ কৃত ইতি বাগ্ভটেন দর্শযতা লঘুশব্দপ্রযোগঃ কৃতঃ| সুশ্রুতোঽপ্যাহ "ষষ্টিকঃ প্রবরস্তেষাং কষাযমধুরো লঘু"রিতি| কৃষ্ণাত্রেযোঽপি "ষষ্টিকঃ সুকর" ইত্যাদি পঠিত্বা লঘবঃ কটুপাকাশ্চেত্যাহ| খরনাদোঽপ্যাহ-`দোষঘ্নঃ ষষ্টিকো লঘু' রিতি| পরাশরোঽপি `রক্তো মহান্ শকুনাহৃতঃ ষষ্টিক' ইত্যাদি পঠিত্বা লঘবঃ সংগ্রাহিকা ইত্যাহ| চরকেঽপি পঠ্যতে `শালিষষ্টিকাদীনি প্রকৃতিলঘূন্যপি মাত্রাপেক্ষীণি ভবন্তী' তি| অন্যচ্চ স্বতন্ত্রবিরোধানামন্যতন্ত্রবিরোধানাং চ ভূযিষ্ঠমতিশযেন নিবর্তকঃ| স্বতন্ত্রবিরোধো য একস্মিন্নেব তন্ত্রেঽন্যস্থানস্থিতো গ্রন্থোঽন্যস্থানস্থিতেন বিরুধ্যতে| যথা চরকে `চতুর্বিংশতিরিত্যেতাঃ স্নেহস্য প্রবিচারণা' ইত্যুক্ত্বা পুনরপ্যাহ `এবমেতাশ্চতুষ্ষষ্টিঃ স্নেহানাং প্রবিচারণা' ইতি| তদ্বাগ্ভট একীকুর্বন্নাহ `যুক্ত্যাবচারযেত্ স্নেহ'মিত্যাদি| ভক্ষ্যাদিনোপযুজ্যমান এব রসভেদেন ত্রিষষ্টিধা স্নেহো ভবতি একশ্চ| ইতি চতুষ্ষষ্টিঃ| এতচ্চ সম্মোহনমাত্রনিবৃত্তযে উক্তং ন হি বস্তুতো বিরোধঃ সম্ভবতি| পরতন্ত্রবিরোধো যথা চরকগ্রন্থেন কৃষ্ণাত্রেযো বিরুদ্ধঃ| তথা চরকো হিমবত্প্রভবানাং নদীনাং পথ্যত্বমিচ্ছতি| কৃষ্ণাত্রেযসুশ্রুতৌ তাসামেব গলগণ্ডাদিকর্তৃত্বম্| বাগ্ভটস্তূপলাস্ফালনেত্যাদিনা বিরোধং নিবর্তযতি| এবমন্যত্ গ্রন্থগৌরবভযান্ন লিখ্যতে| বিনিবর্তকো বিনাশকঃ, অর্থানাং সুবোধকত্বাত্| তথা যুগানুরুপসন্দর্ভঃ অস্মিন্ কলিযুগে পাঠাববোধধারণযোগ্যগ্রন্থসম্ভারঃ| বিভাগেন শোভনৈরর্থপ্রকরণাদিবিচ্ছেদৈঃ|| ৭||

Adhikarana saMgrahasya kAyacikitsAparatvam (8) · Śloka 8

নিত্যোপযোগি দুর্বোধং সর্বাঙ্গব্যাপি ভাবতঃ| সংগৃহীতং বিশেষেণ যত্র কাযচিকিত্সিতম্||৮||

তথা যত্র চাষ্টাঙ্গসংগ্রহে কাযচিকিত্সিতং বিশেষেণাতিশযেন সংগৃহীতম্| কিম্ভূতমিত্যাহ নিত্যোপযোগি সততং শরীরিণা উপযুজ্যতে| দুঃখেন চ বোদ্ধুং শক্যত ইতি দুর্বোধম্| ন হি অকৃতপ্রযত্নঃ তজ্জানাতীত্যর্থঃ| তথা ভাবতস্তত্ত্বতঃ সর্বাঙ্গানাং ব্যাপকম্| কাযচিকিত্সাঙ্গমেকং বর্জযিত্বা সপ্ত সর্বশব্দসংগৃহীতানি| তথা চ বালচিকিত্সাযাং বক্ষ্যতি ক্ষীরদোষজনিতরোগপ্রসঙ্গে `যথা স্বলিঙ্গানি'ত্যাদি| তথা ঊর্ধ্বাঙ্গরোগ চিকিত্সাযাং `সর্বরোগনিদানোক্তৈ'রিত্যাদি| অত এব কাযচিকিত্সিতস্য ব্যাপকত্বম্| যতশ্চ দ্রব্যরসাদিমাত্রাশিতান্নস্বরুপাদি পরিজ্ঞানস্নেহাদ্যুপযোগাসঙ্গিকরোগচিকিত্সাদিসপ্তানামপ্যঙ্গানা কাযচিকিত্সিতমেব| অস্য চ গ্রন্থসন্দর্ভস্য সংগ্রহসংজ্ঞাঽর্থানুগতা তেন খরনাদসংহিতাবচ্চরকাদিনযব্যাখ্যানতাত্পর্যমত্র বিপরীতাবগমসম্ভাবনাভযান্ন ক্রিযত ইতি|| ৮||

Adhikarana saMgrahasya siddhatvam (9) · Śloka 9

ন মাত্রামাত্রমপ্যত্র কিঞ্চিদাগমবর্জিতম্| তেঽর্থাঃ স গ্রন্থবন্ধশ্চ সংক্ষেপায ক্রমোঽন্যথা||৯||

অনন্তরগ্রন্থোক্তার্থমেব প্রকটীকুর্বন্নাহ- ন মাত্রেত্যাদি| মাত্রাঽক্ষরকলা| অক্ষরকলামাত্রমপ্যত্র ন কিঞ্চিদাগমবর্জিতং কথিতমিতি| ত এবার্থাঃ স এব গ্রন্থবন্ধঃ| কেবলং সংক্ষেপার্থমন্যঃ ক্রম আশ্রিতঃ|| ৯||

Adhikarana tridoShANAM nirdeshaH, teShAM vikRutAvikRutAnA~gkArya~jca (10) · Śloka 10

বাযুঃ পিত্তং কফশ্চেতি ত্রযো দোষাঃ সমাসতঃ| প্রত্যেকং তে ত্রিধা বৃদ্ধিক্ষযসাম্যবিভেদতঃ| উত্কৃষ্টমধ্যাল্পতযা ত্রিধা বৃদ্ধিক্ষযাবপি| বিকৃতাঽবিকৃতা দেহং ঘ্নন্তি তে বর্ত্তযন্তি চ||১০||

আযুর্বেদাগমশুদ্ধিং দর্শযিত্বা আত্মন আগমপরতন্ত্রতাং চানন্তরং তন্ত্রমারভতে| তন্ত্রং চাযুষঃ পালনম্| আযুর্জীবিতম্| তচ্চ শরীরসম্বদ্ধম্| শরীরং চ দোষধাতুমলসমুদাযঃ| তেষাঞ্চ ধাত্বাদীনাং দোষা এব প্রধানং, যতো দোষেভ্য এব ধাতূনাং প্রবৃত্তিঃ| তথা চ ধাতুপোষায রসস্য বহনপাকস্নেহকাঠিন্যাদিদোষপ্রসাদলভ্যমেব| অতস্ত এব পূর্বমুচ্যন্তে- বাযুরিত্যাদি| উদ্দেশাদেবাধিগতে ত্রিত্বে পুনস্ত্রিগ্রহণং নিযমার্থম্| ত্রয এব দোষা ন চতুর্থোঽস্তি| যথা সুশ্রুতোক্তাবিতি নিযমযতি| সমাসতঃ সংক্ষেপতঃ ন সংসর্গভেদাদিবিস্তরেণ| বিস্তরতস্তু বহবঃ| দূষণাত্মকত্বাদ্দোষাঃ| তে চ বাতাদযঃ প্রত্যেকং ত্রিধা ত্রিপ্রকারাঃ| কথং ত্রিপ্রকারা? অত আহ-প্রত্যেকং বৃদ্ধিক্ষযসাম্যবিভেদাত্| বাযুর্বৃদ্ধঃ বাযুঃ ক্ষীণঃ বাযুঃ সম ইতি| এবং পিত্তকফযোরপি বাচ্যম্| তেষাং চ প্রাকৃতস্বরুপমপেক্ষ্য বৃদ্ধ্যাদিগতির্বিজ্ঞেযা| বৃদ্ধিক্ষযাবপি পুনরুত্কৃষ্টত্বাদিনা ত্রিধৈব উত্কৃষ্টা বৃদ্ধির্মধ্যা বৃদ্ধিরল্পা বৃদ্ধিরেবং ক্ষযেঽপি বাচ্যম্| সাম্যে তূত্কর্ষাদ্যসম্ভবান্ন ভেদঃ| তে বাতাদযঃ বিকৃতাঽবিকৃতা দেহং ঘ্নন্তি বর্তযন্তি চ| বিকৃতাঃ স্বরুপাত্ চলিতাঃ শরীরং ঘ্নন্তি নাশযন্তি| অবিকৃতাঃ স্বরুপাদচলিতাঃ শরীরং বর্ত্তযন্তি|| ১০||

Adhikarana doShasthAnavisheShaH (11) · Śloka 11

তে ব্যাপিনোঽপি হৃন্নাভ্যোরধোমধ্যোর্ধ্বসংশ্রযাঃ||১১||

ননু বাতাদযঃ কিং নিযতদেশা আহোস্বিদ্ব্যাপিনোঽত আহ-ত ইতি| তে দোষা ব্যাপিনোঽপি সকলশরীরচরা অপি প্রতিনিযতদেশাঃ| কঃ কস্য দেশ ইত্যত আহ-হৃন্নাভ্যোরিতি| অস্যাযমর্থঃ নাভেরধো বাযোঃ স্থানং হৃন্নাভ্যোর্মধ্যে পিত্তস্য হৃদযাদূর্ধ্বং শ্লেষ্মণ ইতি|| ১১||

Adhikarana doShANAM kAlavisheShaH (12) · Śloka 12

বযোহোরাত্রিভুক্তানাং তেঽন্তমধ্যাদিগাঃ ক্রমাত্||১২||

ন কেবলং শরীরব্যাপিনঃ সন্তো নিযতদেশা যাবত্ সকলকালব্যাপিনোঽপি নিযতকালাঃ| এতত্প্রদর্শনার্থমাহ-বয ইতি| অন্তাদীনাং বাতাদিভির্যথাসঙ্খ্যং সংবন্ধঃ| বযসঃ পুরুষাযুষস্য অন্তঃ পশ্চিমো ভাগো বাযোঃ কোপকালঃ| মধ্যভাগঃ পিত্তস্য| পূর্বভাগঃ শ্লেষ্মণঃ| অহ্নোঽপ্যেবং রাত্রেশ্চ| ভুক্তং নিগীর্ণ আহারঃ| তস্যান্তো জীর্ণপ্রাযাবস্থা বাযোঃ কোপকালঃ| মধ্যং বিদাহাবস্থা পিত্তস্য| পূর্বাবস্থা ভুক্তমাত্র এবান্নে শ্লেষ্মণঃ|

Adhikarana agneshcAturvidhyam (13) · Śloka 13

তৈর্ভবেদ্বিষমস্তীক্ষ্ণো মন্দশ্চাগ্নিঃ সমৈঃ সমঃ||১৩||

তৈশ্চ বাতাদিভিঃ পুরুষস্যাগ্নিশ্চতুর্বিধো ভবতি| ন হ্যেকেনাপি দোষেণ হীনা বাতাদযঃ শরীরজননে সমর্থাঃ| অবশ্যং চ সর্বৈরেব ভবিতব্যম্| যশ্চৈষামেকব্যপদেশঃ স উত্কর্ষকৃতঃ| বাতোত্কর্ষেণ বিষমঃ পিত্তোত্কর্ষেণ তীক্ষ্ণঃ কফোত্কর্ষেণ মন্দঃ সমৈর্হান্যুত্কর্ষবর্জিতৈঃ সমঃ| বিষমাদীনাং লক্ষণং শারীরে বক্ষ্যতে| যত্র তু দ্বাবুত্কৃষ্টৌ তত্র ভিষজা স্ববুদ্ধ্যা পরিকল্পনীযঃ| বযং দিশং দর্শযামঃ- দ্বৌ দোষৌ বাতপিত্তে বা বাতকফৌ বা পিত্তকফৌ বা| তত্র বাতস্য যোগবাহিত্বাদ্বাতপিত্তে তীক্ষ্ণত্বোত্কর্ষঃ| বাতকফে মন্দত্বোত্কর্ষঃ| পিত্তকফে ত্বাহারবিশেষাত্কদাচিত্তৈক্ষ্ণ্যং কদাচিন্মান্দ্যম্| প্রকৃত্যা বিকৃত্যা চৈবমেব|| ১৩||

Adhikarana koShThacAturvidhyam (14) · Śloka 14

কোষ্ঠঃ ক্রূরো মৃদুর্মধ্যো মধ্যঃ স্যাত্তৈঃ সমৈরপি||১৪||

তৈশ্চ বাতাদিভিঃ কোষ্ঠচতুর্বিধো ভবতি| প্রকৃত্যা বিকৃত্যা চ| বাতোত্কর্ষেণ ক্রূরঃ, পিত্তোক্তর্ষেণ মৃদুঃ, শ্লেষ্মোত্কর্ষেণ মধ্যঃ, সর্বৈঃ সমৈর্মধ্য এব| ক্রূরাদীনাং চ লক্ষণং বক্ষ্যতে|| ১৪||

Adhikarana prakRutisambhavaH (15) · Śloka 15

শুক্রার্তবস্থৈর্জন্মাদৌ বিষেণেব বিষকৃমেঃ| তৈশ্চ তিস্রঃ প্রকৃতযো হীনমধ্যোত্তমাঃ পৃথক্| সমধাতুঃ সমস্তাসু শ্রেষ্ঠা নিন্দ্যা দ্বিদোষজাঃ||১৫||

তৈশ্চ বাতাদিভিঃ প্রকৃতযো ভবন্তি| প্রকৃতিঃ শরীরস্বরূপম্| কিম্ভূতৈঃ বাতাদিভিঃ প্রকৃতিঃ সম্পদ্যতে, অত আহ- শুক্রার্তবস্থৈরিত্যাদি| তথা চ বক্ষ্যতি `শুক্রাসৃগ্গর্ভিণীভোজ্যে'ত্যাদি| জন্মাদৌ গর্ভাধানকালে পিণ্ডীভূতশুক্রার্ত্তবস্থৈঃ| শুক্রং রেতঃ আর্তবং শোণিতম্| দৃষ্টান্তঃ বিষেণেব বিষকৃমেঃ| যথা বিষকৃমেঃ বিষযোনেঃ কীটস্যান্যমারণস্বভাবেনাপি বিষেণ প্রকৃতিঃ স্বরুপং সম্পদ্যতে| এবং পুরুষস্য দোষৈঃ প্রকৃতিঃ সম্পদ্যতে| অনেন দৃষ্টান্তেনৈতদ্দর্শযতি- বাতাদীনামুপঘাতকত্বেঽপি শুক্রার্ত্তবস্থাবস্থাযাং প্রকৃতিনিষ্পাদনং প্রত্যনুপহন্তৃত্বম্| তৈশ্চ প্রকৄতয ইত্যুক্তম্| তাস্তু কিযন্ত্য ইত্যাহ-তিস্র ইতি| পৃথগ্দোষৈঃ প্রকৃতযস্তিস্রো ভবন্তি| মিশ্রদোষাণাং তূদ্দেশকথনে পৃথগ্গ্রহণং লিঙ্গম্| দোষাণাং পৄথক্ত্ত্বং মিশ্রীভাবশ্চ সপ্তপ্রকৃতিহেতুঃ| তত্র চ বাতোত্কর্ষেণ হীনা প্রকৃতিরুচ্যতে| পিত্তোত্কর্ষেণ মধ্যা| শ্লেষ্মোত্কর্ষেণোত্তমা| যাশ্চ মিশ্রদোষজাঃ প্রকৃতযঃ তাঃ সর্বা নিন্দ্যা গর্হণীযাঃ| সর্বাসু প্রকৃতিষু মধ্যে সমধাতুঃ শ্রেষ্ঠা| যা সর্বৈরেব সমদোষৈর্নোনেব কেনচিন্নাঽপ্যধিকেন| ধাতুশব্দো দোষপর্যাযঃ, ধারণাদ্ধাতব ইতি|| ১৫||

Adhikarana tridoShaguNAH (16) · Śloka 16

তত্র রুক্ষো লঘুঃ শীতঃ খরঃ সূক্ষ্মশ্চলোঽনিলঃ| পিত্তং সস্নেহতীক্ষ্ণোষ্ণং লঘুঃ বিস্রং সরং দ্রবম্| স্নিগ্ধঃ শীতো গুরুর্মন্দঃ শ্লক্ষ্ণো মৃত্স্নঃ স্থিরঃ কফঃ||১৬||

দোষাণাং বাতাদীনাং প্রকৃত্যাদিকারণত্বমুক্তম্| তেষাং স্বরূপং ন জ্ঞাতমতস্তদ্বিজ্ঞানার্থমাহ-তত্রেতি| এবং হি স্বরূপে জ্ঞাতে বাতাদিহেতুকস্য রোগগ্রামস্য স্বকারণদোষবিশেষগুণসমন্বযেনাপ্রতিপদোক্তাবপি বিশিষ্টদোষকারণত্বং বৃদ্ধিহানিকারণস্য চ দোষাণাং বস্তুজাতস্য যথাস্বং দোষৈঃ সাদৃশ্যমসাদৃশ্যঞ্চ জ্ঞাতং ভবতি| যস্মাদ্বক্ষ্যতি `বৃদ্ধিঃ সমানৈঃ সর্বেষা'মিতি| তত্রানিলো বাযূ রূক্ষঃ লঘুঃ শীতঃ| খরঃ অমৃদুঃ| সূক্ষ্মঃ সূক্ষ্মস্রোতোগামিত্বাত্সূক্ষ্মঃ| চলঃ নৈকত্র স্থিতিশীলঃ| বাতস্য যোগবাহিত্বেঽপি তাবন্মাত্রং শৈত্যং স্বাভাবিকং ন বিনশ্যতি| পিত্তম্ ঈষত্ স্নিগ্ধং, তীক্ষ্ণং শীঘ্রকারি, উষ্ণং লঘু, বিস্রং দুর্গন্ধি, সরং ব্যাপ্তিশীলং, দ্রবমকঠিনম্| কফঃ স্নিগ্ধঃ, শীতঃ, গুরুঃ, মন্দশ্চিরকারী| শ্লক্ষ্ণঃ অপরুষঃ| মৃত্স্নঃ কচকচাযমানঃ| স্থিরঃ অব্যাপনশীলঃ|| ১৬||

Adhikarana saMsargasannipAtau (17) · Śloka 17

সংসর্গঃ সন্নিপাতশ্চ তদ্দ্বিত্রিক্ষযকোপতঃ| তৌ ষোঢা দশধা চোক্তাবুত্কর্ষাদিবিকল্পনাত্||১৭||

এষাং দোষাণাং মিশ্রীভূতানাং তন্ত্রব্যবহারার্থং সংজ্ঞাদ্বযং চিকীর্ষুরিদমাহ-সংসর্গ ইতি| দ্বযোস্ত্রযাণাঞ্চ সংসর্গসন্নিপাতৌ যথাসঙ্খ্যম্| দ্বৌ দোষৌ মিশ্রীভূতৌ ক্ষীণৌ কুপিতৌ বা সংসর্গবাচ্যৌ| এবং ত্রযো দোষাঃ সন্নিপাতবাচ্যাঃ| তৌ চ সংসর্গসন্নিপাতৌ যথাসঙ্খ্যেন ষোঢা দশধা চোক্তৌ| ষড্ভিঃ প্রকারৈঃ ষোঢা দশভিঃ দশধা| কথম্? উত্কর্ষাদিবিকল্পনাত্| আদিগ্রহণেন মধ্যহান্যোঃ পরিগ্রহঃ| তেনৈতদুক্তং ভবতি-সংসর্গ উত্কর্ষাদিনা বিকল্পিতঃ ষোঢা ভবতি| সন্নিপাতশ্চ দশধা| তত্র সংসর্গ একো দোষঃ উত্কৃষ্টেন কোপেন কুপিতঃ ক্ষযেণ বা ক্ষীণঃ দ্বিতীযো মধ্যেনাল্পেন চেতি দ্বৌ ভেদৌ| একো মধ্যেন দ্বিতীযোঽল্পেনেতি তৃতীযঃ| দ্বাবপ্যুত্কর্ষেণেতি চতুর্থঃ| দ্বাবপি মধ্যেনেতি পঞ্চমঃ| দ্বাবল্পেনেতি ষষ্ঠঃ| ইতি সংসর্গঃ সন্নিপাতে একোত্কর্ষেণ দ্বযোঃ মধ্যত্বেনাল্পত্বেন চেতি দ্বৌ ভেদৌ| একো মধ্যেন দ্বিতীযোঽল্পেনেতি তৃতীযঃ| দ্বযোরুত্কর্ষেণৈকস্য মধ্যত্বেনাল্পত্বেন চেতি চতুর্থঃ পঞ্চমশ্চ| দ্বৌ মধ্যাবেকোঽল্প ইতি ষষ্ঠঃ| সর্ব উত্কর্ষেণেতি সপ্তমঃ| সর্বে মধ্যেন ইতি অষ্টমঃ| সর্বে অল্পেনেতি নবমঃ| এক উত্কর্ষেণ দ্বিতীযো মধ্যেন তৃতীযোঽল্পেনেতি দশমঃ| ইতি সন্নিপাতো দশধা|| ১৭||

Adhikarana sapta dhAtavaH (18) · Śloka 18

রসাসৃঙ্মাংসমেদোস্থিমজ্জশুক্রাণি ধাতবঃ| সপ্ত দূষ্যাঃ................................||১৮||

রসাদযঃ সপ্ত ধাতুসংজ্ঞাঃ| শরীরধারণাদ্ধাতবঃ| তে চ দূষ্যাঃ বাতাদিভির্দোষৈর্দূষণীযাঃ|| ১৮||

Adhikarana malAH (19) · Śloka 19

মলা মূত্রশকৃত্স্বেদাদযোঽপি চ||১৯||

অনন্তরং মলা উচ্যন্তে-দোষধাতুমলসমুদাযাত্মকত্বাত্ কাযস্য মলাঃ মূত্রশকৃত্স্বেদাদযঃ| তেঽপি চ দূষ্যাঃ| ন কেবলং ধাতব ইত্যপি শব্দার্থঃ| আদিশব্দাত্ কর্ণমলাদীনাং গ্রহণম্| চশব্দাত্ মলানাং ধাতুসংজ্ঞাপি দেহধারকত্বাত্|| ১৯||

Adhikarana rasajaH vyAdhirityupacArAt (20) · Śloka 20

রসাদিস্থেষু দোষেষু ব্যাধযঃ সংভবন্তি যে| তজ্জানিত্যুপচারেণ তানাহুর্ঘৃতদাহবত্||২০||

দোষা এব সর্বেষাং রোগাণাং কারণং বিকৃতা ন ধাতুমলাঃ| যা তু ধাতূনাং মলানাং রোগহেতুকত্বকল্পনা সা ঔপচারিকী| এতদেবাহরসাদীত্যাদি| রসাদিধাতুস্থেষু দোষেষু যে ব্যাধযঃ সম্ভবন্তি তে রসাদিজা ইত্যাচার্যা উপচারেণ ব্রুবন্তি| দৃষ্টান্তঃ `ঘৃতদাহবত্'| ন হি ঘৃতস্য দাহশক্তিঃ কদাচিদস্তি, কিং তর্হি তত্স্থস্যাগ্নেঃ| এবং চোচ্যতে `ঘৃতেনাযং দগ্ধ' ইতি|| ২০||

Adhikarana dhAtUnAM karmANi (21) · Śloka 21

প্রীণনং জীবনং লেপঃ স্নেহো ধারণপূরণে| গর্ভোত্পাদশ্চ কর্মাণি ধাতূনাং ক্রমশো বিদুঃ| শরীরং ধারযন্ত্যেতে ধাত্বাহারাশ্চ সর্বদা||২১||

এষাং চ ধাতূনাং সপ্তানাং যথাসঙ্খ্যেন প্রীণনাদীনি সপ্ত কর্মাণি| যানি কুর্বন্তো দেহং ধারযন্তি| প্রীণনং রসস্য কর্ম| প্রীণনং চিত্তপ্রীতিঃ| জীবনমসৃজঃ| জীবনম্ জীবিতং প্রাণনমিতি যাবত্| তথা চ রক্তমযমষ্টবিন্দুকমোজো নাম জীবানাং গ্রহণধারণবিবেককার্যকরং বক্ষ্যতে| লেপো মাংসস্য| লেপনং অস্থ্যাদীনাং লেপঃ| শরীরস্নেহো মেদসঃ| শরীরধারণমস্থ্নঃ| অন্যথা নিরবলম্বনং মাংসং স্যাত্| পূরণমস্থ্নো মজ্জ্ঞঃ কর্ম| গর্ভোত্পাদঃ শুক্রস্য| এতে চানন্তরোক্তা ধাতবঃ শরীরং ধারযন্তি| ধাত্বাহারাশ্চ-আহারো যথা জন্তূনাং বৃদ্ধিকারণং তথৈব ধাতূনাং ধাতব এব বৃদ্ধিকারণম্| পূর্বঃ পূর্বো ধাতুরুত্তরস্যোত্তরস্য আহারঃ|| ২১||

Adhikarana sAmAnyavisheShau vRuddhihrAsahetu (22) · Śloka 22

বৃদ্ধিঃ সমানৈঃ সর্বেষাং বিপরীতৈর্বিপর্যযঃ||২২||

দোষাদীনাং বৃদ্ধিহানিকারণবাদপ্রসঙ্গেন সর্বভাবানামপি বৃদ্ধিহানিকারণমাহবৃদ্ধিরিত্যাদি| সমানৈঃ সদৃশৈঃ সর্বেষাং বৃদ্ধিঃ| যো যো যেন যাবতা চাংশেন যস্য সমানঃ তেনৈব তাবতা চাংশেন সদৃশেন স তস্য বৃদ্ধিকারণম্| যথা বাযোরন্যো বাযুর্দ্রব্যস্বভাবেনৈব সমানঃ| তস্যৈব মরিচং লাঘবরৌক্ষ্যগুণতঃ| তস্যৈব সরণাদিকা ক্রিযা চলনাদিসাধর্ম্যাত্| এবং সর্বভাবানামপ্যূহ্যম্| এতত্সমানমসমানং চ সামান্যবিশেষরূপং গোত্বাদিবিষযমপেক্ষ্য বিজ্ঞেযম্| নতু দ্রব্যত্বসত্তাদিমহাবিষযং সামান্যম্| ততো ব্যবহারাসিদ্ধেঃ| তথা চ মহাসামান্যাপেক্ষযা ন কস্যচিদপি বস্তুনো বস্ত্বন্তরেণ সমানত্বব্যভিচারো ন চাসমানত্বসম্ভবঃ| যতশ্চৈকস্যৈব বস্তুনঃ কেনচিত্সাদৃশ্যমন্যেন বৈপরীত্যমতঃ সকৃদেবোভযস্য বৃদ্ধিহানিলক্ষণস্য প্রবৃত্তিঃ ন বিরুধ্যতে| যদ্যপি বস্তুনঃ যেনৈব বস্তুনোংঽশেন সাদৃশ্যং তেনৈবাংশেন বৈপরীত্যমপি| তথাপি তযোর্বস্তুনোরুভযরূপত্বাদ্বৃদ্ধিহানিলক্ষণমুভযং প্রত্যেকদৈব কারণত্বম্| কথমেকো বিরুদ্ধকার্যকর ইতি চেন্ন, বিরুদ্ধযোঃ কারণযোরেকস্মিন্দ্রব্যে নিবেশাত্| ন হি বিরুদ্ধযোর্জলতেজসোরত্র দ্রব্যে ন সম্ভবঃ, পঞ্চভূতাত্মকত্বাত্তস্য| অথৈবমুচ্যতে-যথা সুরযা দ্রব্যত্বেন সমানস্য স্তন্যস্য বৃদ্ধিঃ ক্রিযতে তথৈব কথমম্লত্বাদুষ্ণত্বাচ্চ বিপরীতত্বে তস্যৈব ন ক্ষয ইত্যেতদপি ন| তথাবিধস্বভাবত্বাত্| ন হি স্বভাবঃ পর্যনুযোক্তব্যঃ| তথা চ বক্ষ্যতি শাস্ত্রকারঃ- কটুপাকরসস্নিগ্ধগুরুত্বৈঃ কফবাতজিত্| লশুনো বাতকফকৃন্ন তু তৈরেব যদ্ গুণৈঃ|| ইতি|| তচ্চ তত্রৈব ব্যাখ্যাতম্| সাদৃশ্যসামান্যযোশ্চাত্র ন কশ্চিদ্বিশেষঃ, একেন রূপেণ বিনা সাদৃশ্যমপি ন সম্ভবতি| তথা সামান্যস্যাপ্যর্থক্রিযাসু ব্যক্ত্যনুবিধাযিত্বাত্সামান্যং বৃদ্ধিকারণমিত্যুক্তেঽপি ন গোস্পর্শবদ্ব্যক্তিবিশেষানপেক্ষা| ন হি সামান্যমনালম্বনবদ্বৃদ্ধিহেতুতাং যাতি| অপি ত্বাশ্রযযোর্মিশ্রীভাববিশেষেণেতি|| ২২||

Adhikarana ShaDrasAH (23) · Śloka 23

রসাঃ স্বাদ্বম্ললবণতিক্তোষণকষাযকাঃ| ষড্ দ্রব্যমাশ্রিতাস্তে চ যথাপূর্বং বলাবহাঃ||২৩||

বাতাদীনামাধ্যাত্মিকানাং বাহ্যেন দ্রব্যেণ সাদৃশ্যম্| দ্রব্যঞ্চ মহাভূতকার্যং রসবীর্যবিপাকপ্রভাবৈঃ কার্যকরম্| তে চ রসাদযোঽস্মিন্নেব সূত্রস্থানে বক্ষ্যন্তে| অত্র ত্বধ্যাযে তন্ত্রার্থসূচনার্থং কিঞ্চিদুচ্যতে-রসা ইত্যাদি| স্বাদ্বাদযঃ ষড্রসাঃ| রসনেন্দ্রিযগ্রাহ্যত্বাত্ রসাঃ দ্রব্যম্ নির্বিশেষং পঞ্চভূতাত্মকং মূর্তমাশ্রিতাঃ| তেষাঞ্চ যো যস্মাত্ পূর্বঃ স তস্মাদ্দেহিনো বলাবহঃ স্বভাববিশেষাত্|| ২৩||

Adhikarana rasAnAM kAryANi (24) · Śloka 24

তত্রাদ্যা মারুতং ঘ্নন্তি ত্রযস্তিক্তাদযঃ কফম্| কষাযতিক্তমধুরাঃ পিত্তমন্যে তু কুর্বতে||২৪||

এষাঞ্চ রসানাং দোষবিশেষপ্রশমনপ্রকোপপ্রশমনবিভাগং তত্রেত্যাদিনা দর্শযতি| অন্যে তু কুর্বতে ইত্যেতত্ ঘ্নন্তীত্যেতচ্চ মারুতাদিভিঃ প্রত্যেকমভিসম্বধ্যতে| তেষু রসেষু মধ্যে আদ্যাস্ত্রযঃ স্বাদ্বম্ললবণা মারুতমনিলং ঘ্নন্তি| অন্যে তু তিক্তোষণকষাযাঃ তমেব চানিলং কুর্বতে| তিক্তাদযস্ত্রযঃ তিক্তোষণকষাযাঃ কফং ঘ্নন্তি| অন্যে তু মধুরাম্ললবণাঃ তমেব কফং কুর্বতে| কষাযতিক্তমধুরাঃ পিত্তং ঘ্নন্তি নাশযন্তি| অন্যে ত্বম্ললবণোষণাঃ পিত্তমেব কুর্বতে| তেনৈতদুক্তং ভবতি-মধুরো বাতপিত্তঘ্নঃ শ্লেষ্মকরঃ| অম্লো বাতং হন্তি কফপিত্তে তু জনযতি| লবণো মারুতং হন্তি কফপিত্তে তু কুরুতে| তিক্তঃ কফপিত্তে নাশযতি বাতং তু জনযতি| ঊষণঃ কফং নাশযতি বাতপিত্তে তু জনযতি| কষাযঃ কফপিত্তে হন্তি বাতং করোতীতি|| ২৪||

Adhikarana dravyANAM traividhyam (25) · Śloka 25

শমনং কোপনং স্বস্থহিতং দ্রব্যমিতি ত্রিধা||২৫||

এষাং চ রসানামাশ্রযো দ্রব্যং যদ্রসাদীননপেক্ষ্য প্রভাবাদেব কিঞ্চিত্ করোতি| তত্ ত্রিপ্রকারং বিশিষ্টৈঃ রসাদিভির্যুক্তং কুপিতানাং বাতাদীনাং শমনং নাশকরং গুডূচ্যাদি| অন্যৈর্যুক্তং কোপনং সাম্যনাশকরং যবকাদি| অন্যৈঃ স্বস্থহিতং শাল্যাদি| যন্ন কুপিতস্য সমীকরণে সমর্থং নাপি সমস্য কোপনে কেবলং যথাস্থিতমেব সংবাহযতি| কেচিত্তু একস্যৈব দ্রব্যস্য যোগমাত্রাকালাদিভেদাত্ ত্রিরূপতামাহুঃ|| ২৫||

Adhikarana vIryadvaividhyam (26) · Śloka 26

উষ্ণশীতগুণোত্কর্ষাত্তত্র বীর্যং দ্বিধা স্মৃতম্||২৬||

তত্র দ্রব্যে বীর্যং দ্বিবিধং উষ্ণশীতগুণাধিক্যাত্| যদ্যপি সর্বং দ্রব্যং পঞ্চভূতাত্মকং তথাপ্যগ্নীষোমাত্মকত্বাত্ সর্বভাবানাং কিঞ্চিদুষ্ণগুণোত্কর্ষাত্ তন্মুখেনৈব কার্যকারণমুষ্ণবীর্যমুচ্যতে| তদ্বিপরীতং শীতবীর্যম্| বীর্যং শক্তিঃ কার্যকারণহেতুঃ|| ২৬||

Adhikarana tridhA vipAkaH (27) · Śloka 27

ত্রিধা বিপাকো দ্রব্যস্য স্বাদ্বম্লকটুকাত্মকঃ||২৭||

বিপাকস্তু ত্রিধা| সর্বদ্রব্যাণাং বিপাকো জঠরাগ্নিসম্বন্ধাত্ দ্রব্যস্য স্বরূপান্তর প্রাদুর্ভাবঃ| তত্র কিঞ্চিত্ স্বাদুবিপাকং কিঞ্চিদম্লবিপাকম্| কিঞ্চিত্ কটুবিপাকম্|| ২৭||

Adhikarana dravyamAshritAH guNAH (28) · Śloka 28

গুরুমন্দ- হিমস্নিগ্ধ- শ্লক্ষ্ণসান্দ্র- মৃদুস্থিরাঃ| গুণাঃ সসূক্ষ্মবিশদা বিংশতিঃ সবিপর্যযাঃ| ইন্দ্রিযার্থা ব্যবাযী চ বিকাষী চাপরে গুণাঃ| ব্যবাযী দেহমখিলং ব্যাপ্য পাকায কল্পতে| বিকাষী বিকষন্ধাতূন্সন্ধিবন্ধান্ বিমুঞ্চতি| সরতীক্ষ্ণপ্রকর্ষৌ তু কৈশ্চিত্তৌ পরিকীর্তিতৌ||২৮||

তদেব চ দ্রব্যমাশ্রিতা বিংশতির্গুণা গুর্বাদযঃ, সবিপর্যযাঃ সবিপরীতাঃ| গুরুর্লঘুর্মন্দস্তীক্ষ্ণঃ, হিম উষ্ণঃ, স্নিগ্ধঃ রূক্ষঃ, শ্লক্ষ্ণঃ পরুষঃ, সান্দ্রঃ দ্রবঃ, মৃদুঃ কঠিনঃ, স্থিরশ্চলঃ, সূক্ষ্মঃ স্থূলঃ, বিশদঃ পিচ্ছিলঃ| খরাদযস্ত্বেতদ্ভেদা এব যথাসম্ভবং ব্যাখ্যেযাঃ| এতেভ্য অন্যে গুণা ইন্দ্রিযার্থাঃ শব্দাদযঃ| ব্যবাযী বিকাষী চ| ইন্দ্রিযার্থানাং প্রসিদ্ধত্বাত্ লক্ষণং নোচ্যতে| সর্বং দেহং ব্যাপ্য যত্ পাকং যাতি স ব্যবাযী| বিকাষী ধাতূন্ বিকষন্ হিংসন্ সন্ধিবন্ধানুপলেপাদিকান্ মুঞ্চতি নাশযতি| কৈশ্চিদাচার্যৈর্ব্যবাযী সরস্যৈব প্রকর্ষ ইতি পরিকল্পিতঃ| বিকাষী তীক্ষ্ণপ্রকর্ষঃ|| ২৮||

Adhikarana mahAguNAH (29) · Śloka 29

সত্ত্বং রজস্তমশ্চেতি ত্রযঃ প্রোক্তা মহাগুণাঃ||২৯||

সত্ত্বং রজস্তমশ্চ তন্ত্রে ব্যবহারার্থে মহাগুণশব্দেন উক্তাঃ|| ২৯||

Adhikarana rogArogyakAraNam (30) · Śloka 30

কালার্থকর্মণাং যোগো হীনমিথ্যাতিমাত্রকঃ| সম্যগ্যোগশ্চ বিজ্ঞেযো রোগারোগ্যৈককারণম্||৩০||

দোষাদীনাং সদৃশেন বৃদ্ধ্যা বিসদৃশেন চ হান্যা রোগকারণত্বমুক্তম্| কালাদীনাং ত্বতিযোগাদযো দোষবৃদ্ধিক্ষযমুখেনৈব রোগকারণত্বেনোচ্যন্তে- কালেতি| কালঃ শীতোষ্ণবর্ষলক্ষণস্ত্রিবিধো বক্ষ্যতে| তস্য স্বরূপহানির্হীনযোগঃ| স্বরূপাতিশযোঽতিযোগঃ| স্বরূপবৈপরীত্যং মিথ্যাযোগঃ| অর্থাঃ ইন্দ্রিযার্থাঃ শব্দাদযঃ তেষামিন্দ্রিযেণাল্পসংযোগঃ সংযোগাভাবশ্চ হীনযোগঃ| অত্যন্তসংযোগোঽতিযোগঃ| পরুষানভিমতাদিস্বরূপস্যার্থজাতস্য ইন্দ্রিযেণ যোগো মিথ্যাযোগঃ| কাযবাঙ্মনসাং ক্রিযা কর্ম| তস্য হীনা প্রবৃত্তির্হীনযোগঃ| অতিপ্রবৃত্তিরতিযোগঃ| বেগোদীরণাদিমুত্তরত্র বক্ষ্যমাণং মিথ্যাযোগঃ| সর্বেষাং সমা প্রবৃত্তিঃ সমযোগঃ| হীনাদিযোগস্ত্রযো রোগকারণম্| সম্যগ্যোগঃ ত্বারোগ্যকারণম্|

Adhikarana rogArogyasvarUpam (31) · Śloka 31

রোগস্তু দোষবৈষম্যং দোষসাম্যমরোগতা| নিজাগন্তু বিভাগেন রোগাশ্চ দ্বিবিধা মতাঃ| তেষাং কাযমনোভেদাদধিষ্ঠানমপি দ্বিধা| রজস্তমশ্চ মনসো দ্বৌ চ দোষাবুদাহৃতৌ||৩১||

রোগারোগ্যে কে উচ্যেতে ইত্যাহ- রোগ ইতি| রোগো বাতাদীনাং বিষমতা স্বরূপাচ্চলনম্| সংপ্রাপ্তিবশেন মুখ্যোক্তির্হেতুত্বেনৌপচারিকী| বিশিষ্টসংপ্রাপ্তযো হি দোষা এব রোগাঃ তত্ কার্যং বেতি পক্ষদ্বযণ্ তেন ব্যাধিবিশেষমনিষ্পাদযদপি দোষবৈষম্যং পরিগৃহীতং ভবতি| রোগবিশেষাণাং জ্বরাদীনাং নামানি| বাতাদীনাং সাম্যমরোগতা| তে চ রোগা দ্বিবিধা নিজাগন্তুবিভাগেন| মিথ্যাহারবিহারেণ যো দোষকোপস্তত্কৃতা পীডা নিজো রোগঃ| অভিঘাতাদিনা দোষকোপ আগন্তূ রোগঃ| তেষাং রোগানাং কাযমনোভেদেন দ্বিবিধমধিষ্ঠানং স্থানম্| জ্বরাস্রপিত্তাদীনাং কাযঃ রাগদ্বেষাদীনাং মনঃ| ননু চ রোগাণাং বাতাদযঃ কারণত্বেনোক্তাঃ তে চ কাযিকানামেব সম্ভবন্তি ন মানসানামত আহ- রজস্তমশ্চেতি| মনঃ শুদ্ধং সত্বম্| রজঃ তমসী দোষৌ তস্যোপপ্লবাববিদ্যাসম্ভূতৌ|| ৩১||

Adhikarana rogiparIkShA (32) · Śloka 32

দর্শনস্পর্শনপ্রশ্নৈঃ পরীক্ষেত চ রোগিণম্||৩২||

রোগো জ্ঞাতঃ, রোগোপহতশরীরজ্ঞানোপাযমাহ- দর্শনেতি| দর্শনেন দৃষ্ট্যা বর্ণসংস্থানাদিকম্| স্পর্শনেন সন্তাপকাঠিন্যোত্সেধাদিকম্| প্রশ্নেন শূলারোচকাদি| এবং রোগোপহতশরীরং দর্শনাদিভির্জ্ঞাতব্যম্|| ৩২||

Adhikarana rogaparIkShA (33) · Śloka 33

রোগং নিদানপ্রাগ্রূপলক্ষণোপশযাপ্তিভিঃ||৩৩||

সামান্যেন শরীরস্য রোগসম্বন্ধে জ্ঞাতে রোগবিশেষস্যাধিগমোপাযমাহ- রোগমিতি| নিদানাদিভিঃ পঞ্চভির্লক্ষণৈঃ রোগং পরীক্ষেত| নিদানং হেতুঃ| এবংবিধমর্থজাতমেবংবিধস্য রোগস্য হেতুত্বেনোপদিষ্টমেবংবিধশ্চোত্পন্নঃ| অতো নিদানাত্ জ্ঞাযতে রোগঃ| প্রাগ্রূপং ভবিষ্যতো ব্যাধেরপ্রকাশিতদোষবিশেষাধিষ্ঠানস্য লক্ষণম্| লক্ষণমুত্পন্নস্য চিহ্নম্| উপশযঃ সুখানুবন্ধ্যাহারাদ্যুপযোগঃ| এবংবিধেরাহারাদিনা হ্যস্য পীডা নাভূদেবংবিধেনাভূদত উপশযাত্ জ্ঞাযতেঽযং রোগ ইতি| আপ্তিঃ সমাপ্তিঃ| এবংদুষ্টেন এবংস্থানস্থিতেন এবমনুগতেনানযা কল্পনযা এবং মার্গেণ দোষেণেতি পরিকল্পনম্| অত আপ্ত্যা জ্ঞাযতেঽযম্ রোগ ইতি|| ৩৩||

Adhikarana deshadvaividhyam (34) · Śloka 34

ভূমিদেহপ্রভেদেন দেশমাহুরিহ দ্বিধা||৩৪||

উপশযাদিপ্রসঙ্গেন চ দেশকালাবপ্যুপযুজ্যেতে অতস্তাবপি সূত্রযতি| ইহাযুর্বেদশাস্ত্রে আচার্যা দ্বিপ্রকারং দেশমাহুঃ| ভূমিভেদেন দেহভেদেন চ| দেহদেশঃ শিরঃপাণ্যাদিঃ প্রসিদ্ধঃ|| ৩৪||

Adhikarana bhUdeshatraividhyam (35) · Śloka 35

জাঙ্গলং বাতভূযিষ্ঠমানূপং তু কফোল্বণম্| সাধারণং সমমলং ত্রিধা ভূদেশমাদিশেত্||৩৫||

ভূমিদেশ উচ্যতে- জাঙ্গলমিত্যাদি| জাঙ্গলো নামাল্পোদক তরুপর্বতত্বেন বক্ষ্যমাণলক্ষণো বাতভূযিষ্ঠঃ সঞ্জাতৌষধিখগমৃগপুরুষাদির্যো বাতপ্রধানঃ| আনূপস্তস্মাদ্বিপরীতলক্ষণঃ| স কফপ্রাযৌষধিসলিলঃ শ্লীপদাদিরোগদঃ| সাধারণঃ উভযলক্ষণমধ্যপতিতঃ, সমমলঃ সমবাতাদিদোষঃ| এবং ত্রিবিধো ভূমিদেশঃ|| ৩৫||

Adhikarana kAlanirUpaNam (36) · Śloka 36

ক্ষণাদির্ব্যাধ্যবস্থা চ কালো ভৈষজ্যযোগকৃত্||৩৬||

কালো দ্বিবিধঃ ক্ষণাদির্ব্যাধ্যবস্থা চ ব্যবহারার্থং তন্ত্রে প্রযুজ্যতে| তত্র ক্ষণাদিঃ প্রসিদ্ধঃ| ব্যাধ্যবস্থা চ পুরাণনবত্বাদিকং বিশিষ্টলক্ষণসংযুক্তত্বং ব্যাধেঃ| দ্বিবিধোঽপি কালো রোগিণো ভেষজস্য সম্বন্ধং করোতি| তথা চ বক্ষ্যতি `পূর্বাহ্ণে বমনং দেযং মধ্যাহ্নে তু নিরূহণম্' ইতি| তথা চ বস্তিবিধৌ `নিবৃত্তিকালঃ পরমস্ত্রযো যামাঃ' ইত্যাদি| তথা জ্বরে `কষাযপানপথ্যান্নৈ'রিতি| `ইতি দোষে বিজিতে' ইত্যাদি কুষ্ঠে|| ৩৬||

Adhikarana auShadhasya dvaividhyam (37) · Śloka 37

শোধনং শমনং চেতি সমসাদৌষধং দ্বিধা||৩৭||

কালো ভেষজযোগকৃদিত্যুক্তম্| ভেষজমৌষধম্, অতঃ তদ্বিজ্ঞানার্থমাহ-শোধনমিতি| যদ্ দ্রব্যমদ্রব্যং বাঽভযাতপাদিকুপিতদোষবিনাশনার্থমুপযুজ্যতে তদৌষধমিত্যুচ্যতে| সংক্ষেপেণ দ্বিবিধমৌষধং শোধনং শমনঞ্চ| বিস্তরতস্তু নিরূহপাচনক্বাথচূর্ণাদিকং বহুবিধম্| শোধনং যত্ কুপিতান্ দোষান্ নিঃসার্য বহিঃ রোগোপশমনং করোতি| শমনং পুনর্যত্ স্বস্থানস্থিতানামেব সাম্যহেতুঃ|| ৩৭||

Adhikarana SArIramAnasarogayoH paramauShadham (38) · Śloka 38

শরীরজানাং দোষাণাং ক্রমেণ পরমৌষধম্| বস্তির্বিরেকো বমনং তথা তৈলং ঘৃতং মধু| ধীধৈর্যাত্মাদিবিজ্ঞানং মনোদোষৌষধং পরম্||৩৮||

ঔষধমুক্তং, তস্য বিশেষতঃ প্রাধান্যমুচ্যতে-শরীরজানামিত্যাদি| শরীরজানাং বাতাদীনাং ক্রমেণ যথাসঙ্খ্যেন পরমৌষধং প্রধানৌষধম্| কিমিত্যাহ-বস্তিরিত্যাদি| বস্তির্গুদপ্রণিধেযঃ স্নেহক্বাথাদির্বাতস্য পরমৌষধম্| বিরেকো মুখপীতং গুদমার্গেণাঽন্তঃস্থিতস্য দোষস্য নিস্সারণং পিত্তস্য পরমৌষধম্| বমনং মুখেন পীতম্, তেনৈব দোষস্য নিস্সারণং শ্লেষ্মণঃ পরমৌষধমিতি শোধনরূপেণ দোষাণামৌষধম্| তথৈব বাতাদিষু শমনস্বরূপেণৈতদাহ-তথেতি| তৈলং বাতস্য ঘৃতং পিত্তস্য মধু শ্লেষ্মণঃ| মনোদোষযো রজস্তমসো রোগবিঘ্নকারিধীধৈর্যাদিকং পরমৌষধম্| কালবিশেষমাশ্রিত্য সর্বত্র সর্বমেব|| ৩৮||

Adhikarana granthAdhyAyasaMgrahaH (39) · Śloka 39

তন্ত্রস্যাস্য পরং চাতো বক্ষ্যতেঽধ্যাযসংগ্রহঃ||৩৯||

অস্য চাষ্টাঙ্গসংগ্রহাভিধানস্য তন্ত্রস্য সুখস্মরণার্থমধ্যাযানাং সংগ্রহো বক্ষ্যতে|| ৩৯||

Adhikarana sUtrasthAnAdhyAyAH (40) · Śloka 40

আযুষ্কামীয শিষ্যার্থ-দিনর্তুব্যাধ্যসংভবাঃ| দ্রবান্ন-জ্ঞান-সংরক্ষা-বিরুদ্ধান্নান্ন-পানিকাঃ| মাত্রাশিতৌষধ-জ্ঞান-শ্রেষ্ঠ-শুধ্যাদি- সংগ্রহাঃ| মহাকষায-বিবিধ-দ্রব্যাদি-রস-ভেদকাঃ| দোষাদিজ্ঞানতদ্ভেদতত্ক্রিযা রোগভেষজম্| দ্ব্যৌষধ-স্নেহন-স্বেদ-শুধ্যাস্থাপন-নাবনম্| ধূম-গণ্ডূষ-দৃক্সেক-তৃপ্তি-যন্ত্র-জলৌকসঃ| সিরাবিধিঃ শল্যবিধিঃ শস্ত্রক্ষারাগ্নিকর্মকাঃ| চত্বারিংশদিমেঽধ্যাযাঃ সূত্রম্.................||৪০||

১. আযুষ্কামীযঃ ২. শিষ্যার্থঃ শিষ্যোপনযনীযঃ ৩. দিনচর্যা ৪. ঋতুচর্যা ৫. ব্যাধ্যসম্ভবঃ রোগানুত্পাদনীযঃ ৬. দ্রবদ্রব্যবিজ্ঞানীযঃ ৭. অন্নস্বরূপবিজ্ঞানীযঃ ৮. অন্নসংরক্ষণীযঃ ৯. বিরুদ্ধান্নবিজ্ঞানীযঃ ১০. অন্নপানবিধিঃ ১১. মাত্রাশিতীযঃ ১২. দ্বিবিধৌষধবিজ্ঞানীযঃ ১৩. শ্রেষ্ঠসংগ্রহঃ অগ্র্যসংগ্রহঃ ১৪. শোধনাদিসংগ্রহঃ ১৫. মহাকষাযসংগ্রহঃ ১৬. বিবিধগণসংগ্রহঃ ১৭. দ্রব্যাদিবিজ্ঞানীযঃ ১৮. রসভেদীযঃ ১৯. দোষাদিবিজ্ঞানীযঃ ২০. দোষভেদীযঃ তত্ক্রিযা ২১. দোষোপক্রমণীযঃ ২২. রোগভেদীযঃ ২৩. ভেষজাবচরণীযঃ ২৪. দ্বিবিধোপক্রমণীযঃ ২৫. স্নেহবিধিঃ ২৬. স্বেদবিধিঃ ২৭. শুদ্ধিঃ বমনবিরেচনবিধিঃ ২৮. বস্তিবিধিঃ ২৯. নাবনবিধিঃ ৩০. ধূমবিধিঃ ৩১. গণ্ডূষাদিবিধিঃ ৩২. আশ্চ্যোতনবিধিঃ ৩৩. তর্পণবিধিঃ ৩৪. যন্ত্রবিধিঃ ৩৫. জলৌকাবচরণীযঃ ৩৬. সিরাবেধবিধিঃ ৩৭. শল্যাপহরণবিধিঃ ৩৮. শস্ত্রকর্মবিধিঃ ৩৯. ক্ষারকর্মবিধিঃ ৪০. অগ্নিকর্মবিধিঃ ইমে চত্বারিংশদধ্যাযাঃ সূত্রস্থানম্|| ৪০||

Adhikarana SArIrasthAnAdhyAyAH (41) · Śloka 41

...................শারীরমুচ্যতে| পুত্রার্থগর্ভাবক্রান্তি-চর্যাব্যাপচ্ছরীরজাঃ| সিরামর্মপ্রকৃত্যাখ্যা বিকৃতাঙ্গেহিতামযাঃ| সদূতা দ্বাদশাধ্যাযাঃ..................||৪১||

শারীরমুচ্যতে- ১. পুত্রার্থঃপুত্রকামীযঃ ২. গর্ভাবক্রান্তীযঃ ৩. চর্যা গর্ভাবচরণীযঃ ৪. ব্যাপত্ গর্ভব্যাপত্ ৫. শরীরজঃ অঙ্গবিভাগঃ ৬. সিরাবিভাগঃ ৭. মর্মবিভাগঃ ৮. প্রকৃতিভেদীযঃ ৯. বিকৃতাঙ্গবিজ্ঞানীযঃ ১০. বিকৃতেহিতবিজ্ঞানীযঃ ১১. বিকৃতামযবিজ্ঞানীযঃ ১২. দূতাদিবিজ্ঞানীযঃ ইতি দ্বাদশাধ্যাযাঃ শারীরম্|| ৪১||

Adhikarana nidAnasthAnAdhyAyAH (42) · Śloka 42

................ংইদানং সার্বরৌগিকম্| জ্বরাসৃক্শ্বাসযক্ষ্মাদি-মদাদ্যর্শোতিসারিণাম্| মূত্রাঘাতপ্রমেহাণাং বিদ্রধ্যাদ্যুদরস্য চ| পাণ্ডুকুষ্ঠানিলার্ত্তানাং বাতাস্রস্য চ ষোডশ||৪২||

নিদানমুচ্যতে- ১. সর্বরোগনিদানম্ ২. জ্বরনিদানম্ ৩. রক্তপিত্তনিদানম্ ৪. শ্বাসহিধ্মানিদানম্ ৫. যক্ষ্মাদিনিদানম্ ৬. মদাত্যযনিদানম্ ৭. অর্শোনিদানম্ ৮. অতিসারনিদানম্ ৯. মূত্রঘাতনিদানম্ ১০. প্রমেহনিদানম্ ১১. বিদ্রধ্যাদিনিদানম্ ১২. উদরনিদানম্ ১৩. পাণ্ডুরোগনিদানম্ ১৪. কুষ্ঠনিদানম্ ১৫. বাতব্যাধিনিদানম্ ১৬. বাতশোণিতনিদানম্ ইতি ষোডশাধ্যাযা নিদানস্থানম্||৪২||

Adhikarana cikitsAsthAnAdhyAyAH (43) · Śloka 43

চিকিত্সাজ্বরযোরস্রকাসযোঃ শ্বাসযক্ষ্মণোঃ| বমৌ মদাত্যযেঽর্শস্সু বিশি দ্বৌ দ্বৌ চ মূত্রিতে| বিদ্রধৌ গুল্মজঠরপাণ্ডুশোফবিসর্পিষু| কুষ্ঠশ্বিত্রানিলব্যাধিবাতাস্রেষু চিকিত্সিতম্| চতুর্বিংশতিরধ্যাযাঃ......................||৪৩||

চিকিত্সিতমুচ্যতে- ১. জ্বরচিকিত্সিতম্ ২. জীর্ণজ্বরচিকিত্সিতম্ ৩. রক্তপিত্তচিকিত্সিতম্ ৪. কাসচিকিত্সিতম্ ৫. ক্ষতক্ষযকাসচিকিত্সিতম্ ৬. শ্বাসচিকিত্সিতম্ ৭. যক্ষ্মচিকিত্সিতম্ ৮. ছর্দ্যাদিচিকিত্সিতম্ ৯. মদাত্যযচিকিত্সিতম্ ১০. অর্শশ্চিকিত্সিতম্ বিশি দ্বৌ- ১১. অতিসারচিকিত্সিতম্ ১২. গ্রহণীদোষচিকিত্সিতম্ ১৩. মূত্রাঘাতচিকিত্সিতম্ ১৪. প্রমেহচিকিত্সিতম্ ১৫. বিদ্রধিবৃদ্ধিচিকিত্সিতম্ ১৬. গুল্মচিকিত্সিতম্ ১৭. উদরচিকিত্সিতম্ ১৮. পাণ্ডুরোগচিকিত্সিতম্ ১৯. শোফচিকিত্সিতম্ ২০. বিসর্পচিকিত্সিতম্ ২১. কুষ্ঠচিকিত্সিতম্ ২২. শ্বিত্রচিকিত্সিতম্ ২৩. বাতব্যাধিচিকিত্সিতম্ ২৪. বাতশোণিতচিকিত্সিতম্ ইতি চতুর্বিংশতিরধ্যাযাশ্চিকিত্সিতস্থানম্||৪৩||

Adhikarana kalpasthAnAdhyAyAH (44) · Śloka 44

........................কল্পসিদ্ধিরতঃপরম্| কল্পো বমের্বিরেকস্য তত্সিদ্ধির্বস্তিকল্পনা| কল্পশ্চ সিদ্ধবস্তীনাং সিদ্ধির্বস্ত্যনুবাসযোঃ| দ্রব্যকল্পোষ্টমঃ....................||৪৪||

কল্পস্থানমুচ্যতে- ১. বমনকল্পঃ ২. বিরেচনকল্পঃ ৩. বমনবিরেচনব্যাপত্ সিদ্ধিকল্পঃ ৪. বস্তিকল্পঃ ৫. সিদ্ধবস্তিকল্পঃ ৬. বস্তিব্যাপত্সিদ্ধিকল্পঃ ৭. অনুবাসনব্যাপত্ সিদ্ধিকল্পঃ ৮. দ্রব্যকল্পঃ| ইত্যষ্টাবধ্যাযাঃ কল্পস্থানম্||৪৪||

Adhikarana uttarasthAnAdhyAnAdhyAyAH (1) · Śloka 1

................স্থানমত উত্তরমুত্তরম্| বালোপচরণে ব্যাধিগ্রহজ্ঞাননিষেধনে| স্নানে পৃথগ্গ্রহে ভূতে দ্বাবুন্মাদে স্মৃতিক্ষযে| বর্ত্মসন্ধিগতৌ দ্বৌ দ্বৌ দৃক্ত্তমোলিঙ্গনাশিষু| সর্বদৃক্স্যন্দদৃক্পাকে কর্ণনাসামুখেষু চ| মূর্ধ্নি ব্রণে তথা দ্বৌ দ্বৌ সদ্যোভঙ্গে ভগন্দরে| গ্রন্থ্যাদৌ ক্ষুদ্ররোগেষু গুহ্যরোগে পৃথগ্দ্বযম্| বিষে দ্বৌ ভুজগে কীটে দ্বৌ চ লূতাসু মূষিকে| বিষে বিষোপযোগে চ তথাঽধ্যাযো রসাযনে| বাজীকরণমুদ্দিশ্য পঞ্চাশোঽষ্টাঙ্গপূরণঃ||৪৫|| ইতি বৈদ্যপতিসিহ্মগুপ্তস্য সূনোর্বাগ্ভটস্য কৃতাবষ্টাঙ্গসংগ্রহসংহিতাযাং সূত্রস্থানে আযুষ্কামীযো নাম প্রথমোঽধ্যাযঃ ইতি পঞ্চাশদধিকমধ্যাযশতং ষড্ভিঃ স্থানৈঃ সমীরিতং সম্যগুক্তম্||১||

অত উত্তরমনন্তরমুত্তরস্থানমুচ্যতে- ১. বালোপচরণীযঃ ২. বালামযপ্রতিষেধঃ ৩. বালগ্রহবিজ্ঞানীযঃ ৪. বালগ্রহপ্রতিষেধঃ ৫. স্নানবিধিঃ ৬. পৃথগ্গ্রহে প্রত্যেকগ্রহপ্রতিষেধঃ ৭. ভূতগ্রহবিজ্ঞানীযঃ ৮. ভূতগ্রহপ্রতিষেধঃ ৯. উন্মাদপ্রতিষেধঃ ১০. অপস্মারপ্রতিষেধঃ বর্ত্মসন্ধিগতৌ দ্বৌ দ্বৌ- ১১. বর্ত্মরোগবিজ্ঞানীযঃ ১২. বর্ত্মরোগপ্রতিষেধঃ ১৩. সন্ধিসিতাসিতরোগবিজ্ঞানীযঃ ১৪. সন্ধিসিতাসিতরোগপ্রতিষেধঃ ১৫. দৃষ্টিরোগবিজ্ঞানীযঃ ১৬. তিমিরপ্রতিষেধঃ ১৭. লিঙ্গনাশপ্রতিষেধঃ ১৮. সর্বাক্ষিরোগবিজ্ঞানীযঃ ১৯. অভিষ্যন্দপ্রতিষেধঃ ২০. দৃষ্টিপাকপ্রতিষেধঃ কর্ণাদিষু ব্রণান্তেষু দ্বৌ দ্বৌ- ২১. কর্ণরোগবিজ্ঞানীযঃ ২২. কর্ণরোগপ্রতিষেধঃ ২৩. নাসারোগবিজ্ঞনীযঃ ২৪. নাসারোগপ্রতিষেধঃ ২৫. মুখরোগবিজ্ঞানীযঃ ২৬. মুখরোগপ্রতিষেধঃ ২৭. শিরোরোগবিজ্ঞানীযঃ ২৮. শিরোরোগপ্রতিষেধঃ ২৯. ব্রণবিভক্তিবিজ্ঞানীযঃ ৩০. ব্রণবিভক্তিপ্রতিষেধঃ ৩১. সদ্যোব্রণপ্রতিষেধঃ ৩২. ভঙ্গপ্রতিষেধঃ ৩৩. ভগন্দরপ্রতিষেধঃ| গ্রন্থ্যাদিত্রিতযে দ্বৌ দ্বৌ- ৩৪. গ্রন্থ্যাদিবিজ্ঞানীযঃ ৩৫. গ্রন্থ্যাদিপ্রতিষেধঃ ৩৬. ক্ষুদ্ররোগবিজ্ঞানীযঃ ৩৭. ক্ষুদ্ররোগপ্রতিষেধঃ ৩৮. গুহ্যরোগবিজ্ঞানীযঃ ৩৯. গুহ্যরোগপ্রতিষেধঃ ৪০. বিষপ্রতিষেধঃ| ভুজঙ্গে দ্বৌ- ৪১. সর্পাদিদংষ্ট্রাবিজ্ঞানীযঃ ৪২. সর্পাদিদংষ্ট্রাপ্রতিষেধঃ ৪৩. কীটপ্রতিষেধঃ ৪৪. লূতাদিবিজ্ঞানীযে লূতাদিপ্রতিষেধঃ ৪৫. প্রত্যেকলূতাপ্রতিষেধঃ ৪৬. মূষিকালর্কপ্রতিষেধঃ ৪৭. বিষোপদ্রবপ্রতিষেধঃ ৪৮. বিষোপযোগীযঃ ৪৯. রসাযনাধ্যাযঃ ৫০. বাজীকরণাধ্যাযঃ আহৃত্য গ্রন্থাধ্যযাঃ পঞ্চাশদধ্যাযশতং ষড্ভিঃ স্থানৈঃ সমীরিতম্|| ৪৬|| ইতি শ্রীমন্মহামহোপাধ্যাযেন্দুবিরচিতাযামষ্টাঙ্গসংগ্রহব্যাখ্যাযাং শশিলেখাযাং সূত্রস্থানে প্রথমোঽধ্যাযঃ||১||