6. dravadravyavijñānīyaḥ

Adhikarana atha dravadravyavij~jAnIyo nAma ShaShTho~adhyAyaH pratij~jA (1) · Śloka 1

অথাতো দ্রবদ্রব্যবিজ্ঞানীযং নামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

স্বস্থহিতপ্রসঙ্গেনান্নপানমুচ্যতে| তত্রান্নপানানাং সংস্কারাদ্যুপযোগো দ্রবে তোযাদিকে সম্ভবতি| অথ প্রথমং তোযাদীন্যুচ্যন্তে-অথাত ইত্যাদি|| ১||

Adhikarana (1) toyavargaH (2) · Śloka 2

জীবনং তর্পণং হ্র্দ্যং হ্লাদি বুদ্ধিপ্রবোধনম্| তন্বব্যক্তরসং মৃষ্টং শীতং শুচ্যমৃতোপমম্| সূর্যোদ্ধৃতপ্রভুক্তত্ত্বাল্লঘু বাতকফাপহম্| শৈত্যজীবনসৌম্যত্বৈঃ পিত্তরক্তবিষার্তিজিত্| গঙ্গাম্বু নভসো ভ্রষ্টং স্পৃষ্টং ত্বর্কেন্দুমারুতৈঃ| হিতাহিতত্বে তদ্ভূযো দেশকালাবপেক্ষতে||২||

জলস্য চ প্রাধান্যাদ্গ্রে গ্রহণম্| অত আহ - জীবনমিত্যাদি| গঙ্গাম্বু জীবনত্বাদিগুণযুক্তম্| জীবনং সৌম্যধাতুবৃদ্ধিকরম্| ওজোবৃদ্ধিকরমিত্যন্যে| তর্পণং তৃপ্তিকৃত্| হৃদযস্য প্রিযং হৃদ্যম্| হ্লাদি আহ্লাদকরম্| বুদ্ধেঃ প্রবোধনং পটুত্বকরম্| তনু স্বচ্ছম্| অব্যক্তরসং মাধুর্যাদিনাঽবিবিক্তম্| মৃষ্টং স্বাদুত্বাদিগুণযুক্তম্| শীতং বীর্যেণ| অগ্ন্যাতপাদ্যতপ্তমন্যোদকেভ্যঃ স্বভাবেন শীততরম্| শুচি পবিত্রম্| অমৃতোপমং প্রাণসন্ধারকত্বাত্| সূর্যেণ রবিণোদ্ধৃত্য যতো মুক্তমতঃ ক্রিযাযোগাদাগতলাঘবং চ| বাতশ্লেষ্মঘ্নং চ অন্যপানীযাপেক্ষযা| শীতত্বাদিনা চ পিত্তাদিবিনাশনম্| কিম্ভূতং গঙ্গাম্বু নভসোঽন্তরিক্ষ্রাত্ ভ্রষ্টং পতিতম্| তথা রবিচন্দ্রবাযুভিঃ পতদেব স্পৃষ্টম্| এবং স্বরূপমপি গঙ্গাম্বু পথ্যত্বেঽপথ্যত্বে চ দেশং কালং চাপেক্ষতে| এবংবিধে দেশে চ যতঃ পতিতমত এবং গুণং এবং কালেঽপি| দেশকালৌ চ গুণবিশেষেণ বক্ষ্যমাণলক্ষণৌ||২||

Adhikarana gA~ggasAmudrajalalakShaNe tayoH pEyatvamapeyatva~jca (3) · Śloka 3

যেনাভিবৃষ্টমমলং শাল্যন্নং রাজতস্থিতম্| অক্লিন্নমবিবর্ণং বা তত্পেযং গাঙ্গমন্যথা| সামুদ্রং তন্ন পাতব্যং মাসাদাশ্বযুজাদ্বিনা||৩||

ননু গাঙ্গাম্বু ন জ্ঞাযতে| কতমত্তদিত্যত উচ্যতে- যেনাভিবৃষ্টমিতি| যেনাম্বুনাভিবৃষ্টং সিক্ত মমলং নির্মলং শাল্যন্নমক্লিন্নমবিবর্ণং বা ভবতি তদম্বু গাঙ্গত্বাত্পেযম্| বেতি সমুচ্চযে| এতদ্বিপর্যযেণ সামুদ্রম্| তচ্চাশ্বযুজং মাসং বর্জযিত্বা অন্যস্মিন্ মাসে ন পেযম্|| ৩||

Adhikarana gA~ggodakasaMgrahaNopAyaH (4) · Śloka 4

খাতধৌতশিলাপৃষ্ঠবস্ত্রাদিভ্যশ্চ্যুতং জলম্| হেমমৃন্মযপাত্রস্থমবিপন্নং সদা পিবেত্||৪||

এতচ্চাভিবৃষ্টং প্রথমং খাতাদিনোপাযেন গৃহ্যতে| খাতাদ্ গৃহীতম্| ধৌতশিলাপৃষ্ঠাদ্ গৃহীতম্| ধৌতবস্ত্রাদিভ্যো বা চ্যুতম্| হৈমে সৌবর্ণে মৃন্মযে বা পাত্রেঽবস্থিতমবিকৃতম্| তত্সদা পিবেত্| খাতো জলগ্রহণার্থো ভূকুণ্ডিকা|| ৪||

Adhikarana BUmiShThamudakam (5) · Śloka 5

তদভাবে চ ভূমিষ্ঠমান্তরিক্ষানুকারি যত্||৫||

তদভাবে চ ভূমিষ্ঠং পেযম্| যদ্গুণৈঃ স্বচ্ছত্বাদিভিরান্তরিক্ষমনুকরেতি তত্সদৃশং গুণৈরিত্যর্থঃ|| ৫||

Adhikarana deshavargaBedEna BUtavisheSheNa ca jale rasAH (6) · Śloka 6

শ্বেতে কষাযং তত্স্বাদু কৃষ্ণে তিক্তং চ পাণ্ডুরে| নীলে কষাযমধুরং দেশে লবণমূষরে| সক্ষারং কপিলে মিশ্রং মিশ্রেঽথাম্বুগুণাধিকে| ম্ধুরং লবণাম্লং তু ভবেদ্ভূমিগুণাধিকে| তেজোধিকে তিক্তকটু কষাযং পবনাধিকে| দিব্যানুকারি ত্বব্যক্তরসত্বাস্ত্বগুণাধিকে| শুচিপৃথ্বসিতশ্বেতে দেশে চার্কানিলাহতম্||৬||

ভূমিষ্ঠমুক্তং তস্যৈব বিশেষ উচ্যতে দেশবিশেষেণ| শ্বেতে মৃদি প্রদেশে স্থিতমুদকং কষাযরসতং যাতি| এবং কৃষ্ণে মধুরতাম্| পাণ্ডুরে তিক্ততাম্| নীলে কষাযমধুরতাম্| ঊষরে চ্ লাবণ্যম্| ঊষরো যো দগ্ধমৃদিব প্রদেশঃ স ঊষরঃ স্যাত্ `ঊষরঃ ক্ষারমৃত্তিকা'| কপিলে সক্ষারমুদকং ভবতি| সক্ষারং ক্ষারত্বগুণযুক্তং, ক্ষারো নাম রসবিশেষঃ| ক্ষারোঽসৌম্যঃ কঠিনভাববৈপরীত্যকৃত্| মিশ্রলক্ষণে মিশ্রগুণঃ| সর্বশ্চ ভূপ্রদেশঃ পঞ্চভূতাত্মকঃ ন সর্বত্র ভূতসাম্যং ভবতি| অত উচ্যতে আপ্যভাগাধিকে দেশে মধুরমুদকং ভবতি| পর্থিবরুণাধিকে লবণাম্লম্| তেজোভাগাধিকে তিক্তকটুকম্| বাযুভাগাধিকে কষাযম্| আকাশগুণাধিকে চাব্যক্তরসত্বাদান্তরিক্ষসমগুণম্| ভূতাধিক্যঞ্চ বিশিষ্টমনেনৈব মধুরত্বাদিনা জ্ঞাযতে| `গুণশব্দশ্চ ভাগপর্যাযঃ'| সংখ্যাযা গুণস্য সমানে' ইত্যাদিনা (পা০সূ০- ৫.২.৪৭) কাশিকা| বিভাগো গুণ ইতি চ| যথা অব্যক্তরসত্বম্| মূর্তমহাভূতস্বল্পত্বাদিদমপি দিব্যসদৃশং শুচৌ বিস্তীণেং কৃষ্ণো শ্বেতমৃদি চ স্থিতমর্কেণ বাযুনা চাহতম্|| ৬||

Adhikarana jalasyAShTau BedAsteShAM guNAshca (7) · Śloka 7

কৌপসারসতাটাকচৌণ্ডপ্রাস্ত্রবণোদ্ভিদম্| বাপীনদীতোযমিতি তত্পুনঃ স্মৃতমষ্টধা| সক্ষারং পিত্তকৃত্কৌপং দীপনং নাতিবাতলম্| সারসং স্বাদু লঘু চ তাটাকং গুরু বাতলম্| চৌণ্ডং তু পিত্তলং দোষহরং প্রাস্ত্রবণোদকম্| ঔদ্ভিদং স্বাদু পিত্তঘ্নং স্বাদু বাপীজলং লঘু| নাদেযং বাতলং রূক্ষং কটুকঞ্চ তদাঽঽদিশেত্| ধন্বানূপমহীধ্রাণাং সামীপ্যাদ্ গুরুলাঘবম্||৭||

তদ্ভূমিষ্ঠমধাষ্টভিঃ প্রকারৈঃ স্মৃতং কৌপত্বাদিভিঃ| কূপে ভবং কৌপম্| সরসি ভবং সারসম্| তথা তাটাকম্| চৌণ্ডং পর্বতাদৌ পাষাণনিম্নস্থিতম্| তাটাকঞ্চান্তরিক্ষাত্পতিত্বা ভূমৌ স্থিতম্| প্রাস্ত্রবণং পর্বতাত্স্ত্রুতম্| ঔদ্ভিদং ভূমাবুদ্ভিদ্য তত্রৈব তিষ্ঠতি| বাপী কূপবত্সর্বতঃ কৃতসোপানপংক্তিঃ| নদী প্রসিদ্ধা| এতেষাং ক্রমেণ গুণনিদর্শনম্| কৌপং ক্ষারগুণযুক্তং পিত্তলং অগ্নিদীপনমল্পবাতলঞ্চ| সারসং মধুরং লঘু চ| তাটাকং গুরু বাতকরঞ্হ্চ| চৌণ্ডং পিত্তলম্| প্রাস্ত্রবণং ত্রিদোষহরম্| ঔদ্ভিদং মধুরং পিত্তঘ্নম্| বাপীজলং মধুরং লঘু চ| সামান্যেন বাতলং রূক্ষং কটুকং চ নাদেযম্| কৌপাদীনাং চ সপ্তানাং ধন্বাদিসামীপ্যাদ্ গুরুত্বং লঘুত্বঞ্চ বিজ্ঞেযম্| তেনৈতদুক্তং ভবতি-আনূপে যথোক্তলক্ষণে স্থিতা কূপাদযো গুরবঃ| ধন্বনি জাঙ্গলে দেশে স্থিতা আনূপেভ্যো লঘবো বহূদকসম্বন্ধাভাবাত্| তেভ্যো জাঙ্গলেভ্যঃ পর্বতস্থানাং কূপাদীনামতিলঘুত্বমুদকানামত্যন্তাভাবাদিত্যত্র চোত্সর্গাপবাদোপবৃংহণকল্পনা চ স্ববুদ্ধ্যা যোজ্যা|| ৭||

Adhikarana pathyA~apathyAshca nadyaH samudrajalaguNAshca (8) · Śloka 8

পশ্চিমোদধিগাঃ শীঘ্রবহা যাশ্চামলোদকাঃ| পথ্যাঃ সমাসাত্তা নদ্যো বিপরীতাস্ততোঽন্যথা| উপলাস্ফালনাক্ষেপবিচ্ছেদৈঃ খেদিতোদকাঃ| হিমবন্মলযোদ্ভূতাঃ পথ্যাস্তা এব চ স্থিতাঃ| কৃমিশ্লীপদহৃত্কণ্ঠশিরোরোগান্প্রকুর্বতে| প্রাচ্যাবন্ত্যপরান্তোত্থা দুর্নামানি মহেন্দ্রজাঃ| উদরশ্লীপদাতঙ্কান্ সহ্যবিন্ধ্যভবাঃ পুনঃ| কুষ্ঠপাণ্ডুশিরোরোগান্ দোষঘ্ন্যঃ পারিযাত্রজাঃ| বলপৌরুষকারিণ্যঃ সাগরাম্ভস্ত্রিদোষকৃত্||৮||

নদ্য উচ্যন্তে| সমাসাত্সংক্ষেপতঃ ইদমুচ্যতে- পশ্চিমসমুদ্রগাঃ শীঘ্রবাহিন্যো নির্মলপানীযাশ্চ নদ্যঃ পথ্যাঃ| এতদ্বিপরীতলক্ষণা বিপরীতা অপথ্যাঃ| হিমবদুদ্ভূতা মলযোদ্ভূতাশ্চ পাষাণক্ষুণ্ণাঃ পথ্যাঃ| স্থিতাস্তা এবাপথ্যাঃ ক্রিমিশ্লীপদাদিকরাশ্চ| প্রাচ্যাদিজাতা দুর্নামানি কুর্বতে| প্রাচ্যা গৌডাঃ| অবন্তযো মালবাঃ| অপরান্তাঃ কোঙ্কণাঃ| মহেন্দ্রজা উদরাদিকং কুর্বতে| সহ্যাদ্বিন্ধ্যাচ্চ জাতাঃ কুষ্ঠাদিকং কুর্বতে| পারিযাত্রজাস্ত্রিদোষহরা বল্যাঃ পৌরুষকারিণ্যঃ| পৌরুষং বৃষত্বম্| সমুদ্রজলং ত্রিদোষকরম্|| ৮||

Adhikarana snAnapAnayorvarjyajalaM tatra hetuSca (9) · Śloka 9

কীটাহিমূত্রবিট্কোথতৃণজালোত্করাবিলম্| পঙ্কপঙ্কজশৈবালহঠপর্ণাদিসংস্তৃতম্| সূর্যেন্দুপবনাদৃষ্টং জুষ্টং চ ক্ষুদ্রজন্তুভিঃ| অভিবৃষ্টং বিবর্ণঞ্চ কলুষং স্থূলফেনিলম্| বিরসং গন্ধবত্তপ্তং দন্তগ্রহ্যতিশৈত্যতঃ| অনার্তবং চ যদ্দিব্যমার্তবং প্রথমঞ্চ যত্| লূতাদিতন্তুবিণ্মূত্রবিষসংশ্লেষদূষিতম্| তত্কুর্যাত্স্নানপানাভ্যাং তৃষ্ণাঽঽধ্মানোদরজ্বরান্| কাসাগ্নিসাদাভিষ্যন্দকণ্ডূগণ্ডাদিকানতঃ| তদ্বর্জযেদভাবে বা তোযস্যান্যস্য শস্যতে| ঘনবস্ত্রপরিস্ত্রাবৈঃ ক্ষুদ্রজন্ত্বভিরক্ষণম্| ব্যাপন্নস্যাস্য তপনমগ্ন্যর্কাযসপিণ্ডকৈঃ| পর্ণীমূল-বিসগ্রন্থিমুক্তা-কতক-শৈবলৈঃ| বস্ত্রগোমেদকাভ্যাং বা কারযেত্তত্প্রসাদনম্| পাটলা-করবীরাদি-কুসুমৈর্গন্ধ-নাশনম্||৯||

কীটমূত্রাদিযুক্তং জলং স্নানপানাদিনা তৃষ্ণাদীন্ কুর্যাত্| কীটাদীনাং ক্রিম্যাদীনাম্ মূত্রেণ, বিশা, কোথেন চাবিলং মিশ্রীভূতম্| কোথো মৃতশরীরক্লেদঃ| তৃণসমূহেন চাবিলম্| উত্করো গৃহাদিমার্জনরাশিঃ| পঙ্কাদিভিশ্চ সংস্তৃতং গৃহীতপ্রস্তারম্| হঠো নির্মূলোদ্ভবস্তৃণবিশেষঃ| তথা সূর্যাদিভিরদৃষ্টম্| তথা ক্ষুদ্রজন্তুভিঃ ক্রিমিভির্জুষ্টং সেবিতম্| অভিবৃষ্টং তত্কালপতিতান্যবর্ষমিশ্রীভূতম্| তথা ঘনম্| তথা স্থূলফেনিলং বৃহত্ফেনযুক্তম্| বিরসং দুর্গন্ধি| অতিশীতঞ্চ| দিব্যম্ আন্তরিক্ষম্ অনার্তবম্ অনৃতৌ পতিতম্| ঋতুর্দেশবিশেষেণ নিযত এব| বর্ষস্য বর্ষা এবেতি কেচিত্| ঋতাবপি প্রথমপতিতং ন পেযম্| লূতাদিদূষিতং চ| এতচ্চ যতস্তৃষ্ণাধ্মানাদিকান্ কুরুতে অতো বর্জযেত্| সর্বে চেমে রোগা বক্ষ্যমাণলক্ষণাঃ| এতৈশ্চোপহিতমন্যজলালাভে কৃতসংস্কারং শস্যতে| তমেব চ সংস্কারং দর্শযতি ধনবস্ত্রপরিস্ত্রাবণেন ক্ষুদ্রজন্ত্বভিরক্ষণং কার্যম্| ব্যাপন্নস্য পৈচ্ছিল্যাদিযুক্তস্য অগ্নিনা, সূর্যেণ, তপ্তশস্ত্রপিণ্ডমজ্জনেন বা তাপনং কার্যম্| পর্ণীমূলাদিনা প্রসাদনং নির্মলীকরণং কার্যম্| পর্ণীমূলমেরকামূলম্| এরকা কাশ্মীরেষু `পিত্তী' অন্যত্র দণ্ডেরকপট্টেরকভেদেন প্রসিদ্ধা| বিসগ্রন্থিনা, মুক্তাভিঃ, কতকফলেন, শৈবলেন, বস্ত্রস্ত্রাবেণ, গোমেদকেন বা| বিসগ্রন্থিস্ত্রিপাদিকা| কতকং প্রসিদ্ধম্| শৈবলং কচ্ছম্| গোমেদকমঙ্কোলকং মণিবিশেষশ্চ| পাটলাদিপুশ্পৈঃ দুর্গন্ধনশনং সম্পাদনীযম্|| ৯||

Adhikarana jalapAnaniyamAH (10) · Śloka 10

পানীযং ন তু পানীযং পানীযেঽন্যপ্রদেশজে| অজীর্ণে ক্বথিতং চামে পক্বে জীর্ণেঽপি নেতরত্| শীতে বিধিরযং তপ্তে ত্বজীর্ণে শিশিরং ত্যজেত্||১০||

সর্বে পানীযমন্যপ্রদেশজে পানীযেঽজীর্ণে ন পানীযং ন পেযমিতি| তেনৈতদুক্তং ভবতি-বিজাতীযে পানীযে পীতে তজ্জরণান্তং যাবদ্বিজাতীযং পানীযং ন পেযমিতি| যথা কৌপে তাটাকং তাটাকে কৌপমিতি| এবং সর্বত্র| তথা আমে অপক্বজলে অজীর্ণে ক্বথিতং ন পেযম্| তথা পক্বে ক্বথিতে জীর্ণেঽপি ইতরদামং ন পেযম্| সজাতীযমপি পক্বে জের্ণেঽপি যাবত্র ভুক্তং তাবদামং ন পেযমিত্যর্থঃ| এষ চ বিধির্দ্বযোরপ্যামপক্বযোঃ শীতযোঃ| তপ্তে ত্বজীর্ণ এব শীতং ত্যজেন্ন জীর্ণে|| ১০||

Adhikarana jalasya prANamayatvaM nAtyantaniShedhaH (11) · Śloka 11

পানীযং প্রাণিনাং প্রাণা বিশ্বমেব চ তন্মযম্| অতোঽত্যন্তনিষেধেন ন ক্বচিদ্বারি বার্যতে| আস্যশোষাঙ্গসাদাদ্যা মৃত্যুর্বা তদলাভতঃ| নহি তোযাদ্বিনা বৃত্তিঃ স্বস্থ্যস্য ব্যাধিতস্য চ||১১||

অত্যন্তনিষেধেন ন কুত্রচিদ্বারি বার্যতে| যতঃ পানীযমাহ্লাদকত্বাত্ প্রাণিনাং প্রাণাঃ বিশ্বঞ্চ স্থাবরজঙ্গমং পানীযমযমেব| যতঃ স্বস্থস্য ব্যাধিতস্য চ তোযাদ্বিনা বর্ত্তনং ন ভবতি|| ১১||

Adhikarana avasthAvashAjjalavisheShasya hitAhitatvaM jalasyopayogaprakArAshca (12) · Śloka 12

কেবলং সৌষধং পক্বমামমুষ্ণং হিতঞ্চ তত্| সমীক্ষ্য মাত্রযা যুক্তমমৃতং বিষমন্যথা||১২||

অবস্থাবিশেষেণ চ-(১) কেবলং (২) সৌষধং বা (৩) পক্বম্ (৪) আমং (৫) শীতং উষ্ণং চ তদ্ধিতম্| তচ্চ পানীযং সমীক্ষ্য বিষযে মাত্রযা যুক্তমমৃতম্| বিপর্যযেণ যুক্তং বিষম্|| ১২||

Adhikarana tRuShyato~apyatijalapAne doShAH (13) · Śloka 13

অতিযোগেন সলিলং তৃষ্যতোঽপি প্রযোজিতম্| প্রযাতি পিত্তশ্লেষ্মত্বং জ্বরিতস্য বিশেষতঃ| বর্ধযত্যামতৃণ্নিদ্রাতন্দ্রাধ্মানাঙ্গগৌরবম্| কাসাগ্নিসাদহৃল্লাসপ্রসেকশ্বাসপীনসান্||১৩||

অতিযোগেন বাহুল্যেন তৃষ্ণাবতোঽপি প্রযুক্তং সর্বস্য পিত্তশ্লেষ্মতাং যাতি| জ্বরিতস্য বিশেষতঃ আমেনাগ্নৌ বহিষ্কৃতে জ্বরোত্পত্তিঃ আমস্য চ পানীযং তর্পকম্ (বর্ধকম্)| তস্য চ জ্বরিতস্যামতৃডাদীন্ বর্ধযতি| হৃল্লাসঃ সপ্রসেকো হৃদযোত্ক্লেশঃ, প্রসেকঃ স্বতন্ত্র এব, তচ্চ ষ্ঠীবনম্|| ১৩||

Adhikarana jalasya laghutvameva (14) · Śloka 14

পাকে স্বাদু হিমং বীর্যে তদুষ্ণমপি যোজিতম্| তস্মাদযোগপানেন লাঘবান্ন বিযোজযেত্||১৪||

সর্বঞ্চ জলং মধুরবিপাকং যতস্তত্স্পর্শোষ্ণমপি শীতবীর্যম্| অতঃ অযোগপানেনাতিস্বল্পপানেন লাঘবাত্স্বল্পত্বান্ন বিযোজযেত্| স্বল্পত্বং তস্য ন চালনীযমিত্যর্থঃ|| ১৪||

Adhikarana AmaviShTabdhayostRuShNArahitasyApi koShNajalapAnavidhiH (15) · Śloka 15

আমবিষ্টব্ধযোঃ কোষ্ণং নিষ্পিপাসোঽপ্যপঃ পিবেত্| যাবত্যঃ ক্লেদযন্ত্যন্নমতিক্লেদোঽগ্নিনাশনঃ| বিবদ্ধঃ কফবাতাভ্যাং মুক্তামাশযবন্ধনঃ| পচ্যতে ক্ষিপ্রমাহারঃ কোষ্ণতোযদ্রবীকৃতঃ||১৫||

আমবিষ্টব্ধযোঃ পিপাসারহিতোঽপ্যুপকারাযৈব ঈষদুষ্ণা অপঃ পিবেত্| আমং শ্লেষ্মণোপহতজঠরত্বাদজীর্ণমন্নম্| বিষ্টব্ধমপ্যেবং বাতাজীর্ণম্| এতৌ দ্বাবপ্যামবিষ্টব্ধৌ মাত্রাশীতীযে বক্ষ্যমাণলক্ষণৌ (সূ০ অ০-১১) তযোশ্চ তাবতীঃ অপঃ পিবেত্ যাবত্যোঽন্নং ক্লেদযিতুং সমর্থাঃ| অতিক্লেদেন চাগ্নিনাশভযাত্ বহ্ব্যো ন পেযাঃ| কফবাতাভ্যাং জঠরে বিবদ্ধং নিশ্চলমপচ্যমানমন্নং কোষ্ণতোযদ্রবীকরণান্মুক্তামাশযবন্ধনং সত্ক্ষিপ্রমেব পচ্যতে| মুক্তং বন্ধনমামাশযে নিবন্ধনং যেন স তথা|| ১৫||

Adhikarana vishiShTAvasthAyAM sarvAmanA jalaniShedhaH saMskRutajalapAnavidhishca (16) · Śloka 16

অনবস্থিতদোষাগ্নের্ব্যাধিক্ষীণবলস্য চ| নল্পমপ্যামমুদকং হিতং তদ্ধি ত্রিদোষকৃত্| তেজসঃ প্রতিপক্ষত্বান্মন্দাগ্নির্বর্জযেজ্জলম্| সর্বমেব তথা স্যন্দপ্লীহবিদ্রদ্ধিগুল্মিনঃ| পাণ্ডূদরাতিসারার্শোগ্রহণীশোষশোফিনঃ| কামমল্পমশক্তৌ তু পেযমৌষধসংস্কৃতম্| ঋতে শরন্নিদাঘাভ্যাম্পিবেত্স্বস্থোঽপি চাল্পশঃ||১৬||

অনবস্থিতদোষস্যানবস্থিতাগ্নেশ্চ স্বল্পমপ্যামং জলং ন পথ্যম্| তদ্ধ্যামমেষাং ত্রিদোষকরম্| অনবস্থিতাঃ স্বরূপাচ্চলিতা অনেকরূপাশ্চ দোষা যস্য স তথাবিধঃ| এবমনবস্থিতাগ্নিরপি| তথা ব্যাধিভিঃ ক্ষীণং বলং যস্য তস্যামমুদকং ত্রিদোষকরম্| তথা মন্দাগ্নিঃ সর্বমেব জলং কৌপাদিকমামং স্বল্পং, পক্বং বহু চ বর্জযেত্| তথাভিষ্যন্দাদ্যার্তৈশ্চ সর্বমেব জলং বর্জনীযম্| অভিষ্যন্দো নাম চক্ষূরোগো বক্ষ্যমাণঃ (উ০অ০-১৮)| অশক্তৌ তু বিনা জলং প্রাণসন্ধারণাসামর্থ্যে কদাচিত্ পেযম| তচ্চ স্বল্পম্| কিম্ভূতমল্পং পেযম্? আহ রোগযোগ্যৈরৌষধৈঃ সংস্কৃতম্| তথা শরদং নিদাঘং চ বর্জযিত্বা অন্যস্মিন্ ঋতৌ স্বস্থেনাপি স্বল্পমেব| এতযোস্তু যথেচ্ছমেব|| ১৬||

Adhikarana bhojanasyAdimadhyAnteShu jalapAnam (17) · Śloka 17

ভক্তস্যাদৌ জলং পীতমগ্নিসাদং কৃশাঙ্গতাম্| অন্তে করোতি স্থূলত্বমূর্ধ্বং চামাশযাত্কফম্| মধ্যে মধ্যাঙ্গতাং সাম্যং ধাতূনাং জরণং সুখম্||১৭||

তচ্চ জলং ভোজনকালে অন্নাত্পূর্বং পীতমগ্নিমান্দ্যং কার্শ্যং চ করোতি| সর্বং চ ভুত্তবা অন্তে পীতং শরীরস্য স্থৌল্যমামাশযাদুপরি চ শ্লেষ্মবৃদ্ধিং করোতি| মধ্যে ত্বন্নস্য পীতং সমাঙ্গতাং চ করোতি| সুখেন চান্নং জরযতি|| ১৭||

Adhikarana shItajalaguNAH (18) · Śloka 18

শীতং মদাত্যযগ্লানিমূর্চ্ছাচ্ছর্দিশ্রমভ্রমান্| তৃষ্ণোষ্ণদাহপিত্তাসৃগ্বষাণি চ নিহন্তি তত্||১৮||

শীতঞ্চ তদম্বু মদাত্যযাদীন্ বক্ষ্যমাণলক্ষণান্নিহন্তি নাশযতি| উষ্ণেন কালেন উষ্ণেনাহারাদিনা চ দাহঃ উষ্ণাদাহঃ|| ১৮||

Adhikarana uShNakvathitashItajalaguNAH (19) · Śloka 19

ক্ষীণপাদত্রিভাগার্ধং দেশর্তুগুরুলাঘবাত্| ক্বথিতং ফেনরহিতমবেগমমলং হিতম্| হিধ্মাঽঽধ্মানানিলশ্লেষতৃট্কাসশ্বাসপীনসে| পার্শ্বশূলামমেদঃসু সদ্যঃ শুদ্ধৌ নবজ্বরে| দীপনং পাচনং কণ্ঠ্যং লঘু বস্তিবিশোধনম্| পাষাণরূপ্যমৃদ্ধেমজতুতাপার্কতাপিতম্| পানীযমুষ্ণং শীতং বা ত্রিদোষঘ্নং তৃডর্তিজিত্| লঘ্বরূক্ষং ক্লমঘ্নঞ্চ তোযং ক্বথিতশীতলম্| সংসর্গে পিত্তকফযোঃ সন্নিপাতে চ শস্যতে||১৯||

তচ্চাম্বু হিধ্মাদিষু ক্বথিতং পেযম্| কা ক্বথনমাত্রেত্যত্রোচ্যতে- দেশর্তুগুরুলাঘবং বিকল্প্য ক্ষীণচতুর্ভাগং বা ক্ষীণত্রিভাগং বা ক্ষীণার্ধং বেতি ত্রিধা| তেনৈতদুক্তং ভবাতি যত্ ক্বচিদ্ দেশে ঋতৌ বা স্বল্পেন গুরুত্বেন যুক্তম্ উদকং তত্ক্বথনেন ক্ষীণচতুর্ভাগম্| অধিকগুরৌ ক্ষীণত্রিভাগম্| অত্যন্তগুরৌ অর্ধক্ষীনমিতি| এতদ্বিপরীতঞ্চ লাঘবেঽপ্যেবং ব্যাখ্যেযম্| তচ্চ জলমগ্নিসংযোগেঽপি আফেনপরিক্ষযাদামং ভবতি| ফেনরহিতং তু ক্বথিতং ভবতি| বেগরহিতত্বঞ্চ পক্বলক্ষণং নির্মলত্বং চ| তচ্চ পক্বং হিধ্মাদীনাং হিতম্| উষ্ণামুদকং দীপনমামদোষপাচনম্| স্বর্যং লঘু বস্তিশোধনঞ্চ| তপ্তৈশ্চ পাষাণাদিভিস্তাপিতং তত্কালোষ্ণং শীতমেব বা পীতং ত্রিদোষঘ্নং তৃষ্ণঘ্নঞ্হ্চ| ক্বথিতশীতলং লঘুত্বাদিযুক্তম্| সংসর্গে পিত্তশ্লেষ্মণোঃ, সন্নিপাতে চ পথ্যম্| উত্তরত্র শীতস্য বাতশ্লেষ্মকোপহেতুত্বেনোক্তেঃ| বাতে বাতশ্লেষ্মণি কফে চ ন পথ্যম্|| ১৯||

Adhikarana paryuShitajalaguNAH (20) · Śloka 20

তোযং বহ্নিগুণভ্রষ্টং পাকেঽম্লং সর্বদোষকৃত্| ভবেত্পর্যুষিতং তচ্চ............................||২০||

তচ্চ ক্বথিতশীতলং পর্যুষিতং বিগতাহোরাত্রং সদ্বহ্নিগুণাল্লঘুত্বদীপনীযত্বাদিতঃ ভ্রষ্টং রহিতং ভবতি| অম্লবিপাকং দোষকরঞ্চ||২০||

Adhikarana himakarajalaguNAH (21) · Śloka 21

...............................তোযং হিমকরোদ্ভবম্| অতিশৈত্যগুরুস্থৈর্যসঙ্ঘাতৈঃ কফবাতকৃত্||২১||

হিমকরস্রুতং তোযমতিশৈত্যাদিনা বাতশ্লেষ্মকৃত্|| ২১||

Adhikarana candrakAntajalaguNAH (22) · Śloka 22

চন্দ্রকন্তভবং রক্ষোবিষপিত্তজ্বরাপহম্| দৃষ্টিমেধাবপুস্থৈর্যকরং স্বাদু হিমং লঘু||২২||

চন্দ্রকান্তমণিস্রুতং রক্ষোঘ্নত্বাদিযুক্তম্|| ২২||

Adhikarana nArikelodakaguNAH (23) · Śloka 23

নারিকেলোদকং স্নিগ্ধং স্বাদু বৃষ্যং হিমং লঘু| তৃষ্ণাপিত্তানিলহরং দীপনং বস্তিশোধনম্||২৩||

নারিকেলান্তর্জাতং স্নিগ্ধত্বাদিযুক্তম্|| ২৩||

Adhikarana jalAnAM varAvaratve (24) · Śloka 24

দ্বযং বারি বরং বর্ষে নাদেযমবরং পরম্||২৪||

বর্গার্থমুপসংহরতি-বর্ষকালে আন্তরিক্ষং জলমত্যন্তপথ্যং নদীগৃহীতমপথ্যম্|| ২৪|| ইতি তোযবর্গঃ

Adhikarana (2) kShIravargaH kShIrabhedAH kShIrasAmAnyaguNAH (26) · Śloka 26

গব্যং মাহিষমাজং চ ক্রারভং স্ত্রৈণমাবিকম্| ঐভমৈকশফং চেতি ক্ষীরমষ্টবিধং স্মৃতম্||২৫|| স্বাদুপাকরসং স্নিগ্ধমোজস্যং ধাতুবর্ধনম্| বাতপিত্তহরং বৃষ্যং স্লেষ্মলং গুরু শীতলম্| প্রাযঃ পযো......................................||২৬||

তোযান্যুক্ত্বা ক্ষীরাণ্যুচ্যন্তে- স্বাদুপাকরসমিত্যাদি| সর্বমপি বিশেষেণ ক্ষীরজাতং মধুররসং মধুরবিপাকত্বাদিযুক্তম্ ওজসে হিতমোজস্যম্| ওজো নাম ধাতুসারভূতং বক্ষ্যমাণলক্ষণম্ (সূ০অ০-৯)| বৃষ্যত্বেন শুক্রাখ্যধাতুবৃদ্ধ্যতিশযস্ত্রীগমনশক্ততা চোক্তা| প্রাযো বাহুল্যেন সর্বমেবংবিধং পয ইতি|| ২৬||

Adhikarana sagokShIraM kShIrANAM guNAH (27) · Śloka 27

..........ঽত্র গব্যং তু জীবনীযং রসাযনম্| ক্ষতক্ষীণহিতং মেধ্যং বল্যং স্তন্যকরং সরম্| শ্রমভ্রমমদালক্ষ্মীশ্বাসকাসাতিতৃট্ক্ষুধঃ| জীর্ণজ্বরং মূত্রকৃচ্ছ্রং রক্তপিত্তং চ নাশযেত্||২৭||

সামান্যেন পযোগুণসঙ্কীর্তনং কৃত্বা গবাং বিশেষেণ ক্রিযতে| তত্র চ সামান্যোক্তগুণবিপরীতো যো বিশেষগুণঃ সোঽপবাদো বিজ্ঞেযঃ| অথ চেত্সদৃশঃ স তস্যৈবোপবৃংহকঃ| গব্যন্তু জীবনীযত্বাদিযুক্তম্| জীবনীযং সৌম্যধাতুবৃদ্ধিকরম্| রসাযনমিব রসাযনম্| প্রাণসন্ধারকত্বাত্ শস্তরসাদিধাতুলাভোপাযত্বাচ্চ| উরঃ ক্ষতযুক্তায ক্ষীণায চ হিতম্| ক্ষীণঃ ক্ষীণধাতুঃ| মেধাযৈ বুধ্যৈ হিতং মেধ্যম্| স্ত্রীণাঞ্চ স্তন্যবৃদ্ধিং করোতি| সরং শরীরে নৈকত্র তিষ্ঠতি| শ্রমাদীংশ্চ নাশযেত্|| ২৭||

Adhikarana mAhiShakShIraguNAH (28) · Śloka 28

হিতমত্যগ্ন্যনিদ্রেভ্যো গরীযো মাহিষং হিমম্||২৮||

মাহিষং পযোঽত্যগ্ন্যীনামনিদ্রাণাং চ হিতম্ পথ্যম্| অতিগুরু চ| বীর্যেণ চ হিমম্|| ২৮||

Adhikarana AjakShIraguNAH (29) · Śloka 29

অল্পাম্বুপানব্যাযামকটুতিক্তাশনৈর্লঘু| আজং শোষজ্বরশ্বাসরক্তপিত্তাতিসারজিত্||২৯||

অজানাং পযঃ অল্পাম্বুপানাদিহেতোর্ল্ঘু| হেতুকীর্তনমস্যান্যস্যা অপ্যেবং হেতুযুক্তাযা জাতেঃ ক্ষীরলঘুত্বজ্ঞাপনার্থম্| এতদ্বিপরীতাযাশ্চ গুরুত্বং সামর্থ্যলভ্যম্| অজানাং তু স্বল্পাম্বুপানাদিস্বভাবঃ| অন্যাসান্তু দেশাদ্যপেক্ষযা| এতচ্চাজং শোষাণাদিবিনাশনম্|| ২৯||

Adhikarana uShTrIkShIraguNAH (30) · Śloka 30

ঈষ্দ্রুক্ষোষ্ণলবণমৌষ্ট্রিকং দীপনং লঘু| শস্তং বাতকফানাহকৃমিশোফোদরার্শসাম্||৩০||

ঔষ্ট্রমেবৌষ্ট্রকং ক্ষীরমীষদ্রূক্ষমীষত্ লবণমীষদুষ্ণম্| দীপনং লঘু চ| বাতস্লেষ্মাদ্যার্তানাঞ্চ পথ্যম্|| ৩০||

Adhikarana mAnuShakShIraguNAH (31) · Śloka 31

মানুষং বাতপিত্তাসৃগভিঘাতাক্ষীরোগজিত্| তর্পণাশ্চ্যোতনৈর্নস্যেরহৃদ্যং তূষ্ণমাবিকম্||৩১||

মানুষং ক্ষীরং বাতেন পিত্তেনাসৃজা অভিঘাতেন চোত্পন্নানাং চক্ষূরোগাণাং নাশনম্| কথমিত্যুচ্যতে-তর্পণেনাশ্চ্যোতনেন নস্যেন চ| এতানি চাস্মিন্নেব স্থানে বক্ষ্যমাণলক্ষণানি|| ৩১||

Adhikarana AvikShIraguNAH (32) · Śloka 32

বাতব্যাধিহরং হিধ্মাশ্বাসপিত্তকফপ্রদম্||৩২||

আবিকমহৃদ্যমুষ্ণবীর্য বাতব্যাধিবিনাশনং হিধ্মাদিকরঞ্চ|

Adhikarana hastinIkShIraguNAH (33) · Śloka 33

হস্তিন্যাঃ স্থৈর্যকৃদ্বাঢমুষ্ণং ত্বৈকশফং লঘু||৩৩||

হস্তিন্যাঃ পযো বাঢমতিশযেন শরীরস্থৈর্যকৃত্|| ৩৩||

Adhikarana EkashaPakShIraguNAH (34) · Śloka 34

শখাবাতহরং সাম্ললবণং জডতাকরম্||৩৪||

একশফস্যেদমৈকশফং পযঃ উষ্ণবীর্যং শাখাবাতহরমমধুররসমীশদম্ললবণেন চ রসেন যুক্তং জাড্যকরং চ| একবিভাগঃ খুরো যস্য স একশফঃ অশ্বগর্দভাদিঃ| শাখা রক্তাদযো ধাতবস্ত্বক্চ| তত্র স্থিতস্য বাতস্য নাশনম্| জাড্যং স্তৈমিত্যম্ ইতি|| ৩৪||

Adhikarana Ama-shRuta-dhAroShNapayoguNAH (35) · Śloka 35

পযোঽভিষ্যন্দি গুর্বামং যুক্ত্যা শৃতমতোঽন্যথা| বিনা তু বনিতাস্তন্যমামেব তু তদ্ধিতম্| ভবেদ্ গরীযোঽতিশৃতং ধারোষ্ণমমৃতোপমম্||৩৫||

আমপক্বং পযঃ অভিষ্যন্দি গুরু চ| অভিষ্যন্দি মালিন্যেন স্ত্রোতসাং স্ত্রাবকং যুক্ত্যা শৃতং পযঃ আমাদ্বিপরীতং নাতিশৃতং ন স্বল্পশ্রৃতমিতি যুক্তিঃ| অতিশৃতঞ্চাতিগুরু| ধারোষ্ণমমৃতোপমং পথ্যত্বেন|| ৩৫||

Adhikarana AhAradivashena kShIrAdInAM lAghavagauravam (36) · Śloka 36

পিণ্যাকাম্লাশিনীনান্তু গুর্বভিষ্যন্দি তদ্ভৃশম্| অচেষ্টযা চ প্রাদোষাদ্ গরীযঃ স্মৃতমৌষসম্| ব্যাখ্যাতস্তেন লঘিমা চেষ্টাবত্প্রকৃতিষ্বপি| হ্রত্বেষু চাতিদেহেভ্যো মাংসেষ্বপ্যেবমাদিশেত্||৩৬||

পিণ্যাকং নিষ্পীডিতরসং তিলাদি| অম্লরসং চান্যত্কিঞ্হ্চিদ্যাঃ ক্ষীরযোনয অশ্নন্তি তাসাং পযোঽতিগুর্বত্যভিষ্যন্দি চ| প্রদোষে অপরাহ্ণে গৃহীতং যত্পযঃ তদপেক্ষযা ঔষসং প্রভাতগৃহীতমতিগুরু| কুতঃ? চেষ্টারহিতত্বাত্| যস্মাত্প্রাণিনাং রাত্রৌ ন কদাচিচ্চেষ্টা ভবতি| অত ঔষসং গুরু| দিবা চ ধাবনপ্লবনাদিকযা চেষ্টযা প্রাদোষং লঘু| অনযা চ দিশা চেষ্টাবত্প্রকৃতিষ্বপি লঘিমা ব্যাখ্যাতঃ| তেনৈতদুক্তং-ভবতি চেষ্টাস্বভাবেষু হরিণাদিষু লঘু| অচেষ্টাস্বভাবেষু সূকরাদিষু গুরু| অতিদেহান্মহাভোগশরীরানপেক্ষ্য স্বল্পভোগশরীরেষু লঘু পযঃ| ন কেবলং পযঃসু যাবন্মাংসেষু অপি চেষ্টাস্বল্পত্ববৃংহত্ববিশেষেণ গুরুলাঘবং বিজ্ঞেযম্|

Adhikarana dadhiguNAH (37) · Śloka 37

অম্লপাকরসং গ্রাহি গুরূষ্ণং দধি বাতজিত্| মেদঃশুক্রবলশ্লেষ্মপিত্তরক্তাগ্নিশোফকৃত্| রোচিষ্ণু শস্তমরুচৌ শীতকে বিষমজ্বরে| পীনসে মূত্রকৃচ্ছ্রে চ রূক্ষং তু গ্রহণীগদে||৩৭||

দধি ত্বম্লবিপাকত্বাদিযুক্তম্| রোচিষ্ণু সাধু রোচতে| অরুচৌ পথ্যম্| অন্যদপ্যাহারং রোচযতীত্যর্থঃ| শীতকে শীতপূর্বকে বিষমজ্বরে সন্ততকাদৌ পথ্যম্| পীনসো নাসাস্ত্রাবঃ| রূক্ষন্তূদ্ধৃতসারং গ্রহণীদোষে হিতম্|| ৩৭||

Adhikarana dadhyupayoge niyamAH niyamasya ulla~gghane hAnishca (38) · Śloka 38

নৈবাদ্যান্নিশি নৈবোষ্ণং বসন্তোষ্ণশরত্সু ন| নামুদ্গসূপং নাক্ষৌদ্রং নাঘৃতং নাসিতোপলম্| ন চানামলকং নাপি নিত্যং নো মন্দমন্যথা| জ্বরাসৃক্পিত্ত বীসর্পকুষ্ঠপাণ্ড্বামযপ্রদম্||৩৮||

তচ্চ দধি রাত্রৌ ন ভোজ্যম্| এবকারো রাত্রাবুষ্ণং চাত্যন্তপ্রতিষেধায| বসন্তগ্রীষ্মশরত্সু ন ভোজ্যং, ন চ মুদ্গসূপাদীনামন্যতমেন রহিতম্| নাপি নিত্যং, সাতত্যেন ন ভোজ্যং, ন চ মন্দমজাতম্| এবং চ সতি যদি কশ্চিত্ ভুঙ্ক্তে সোঽবশ্যং জ্বরাদীন্ প্রাপ্নোতি|| ৩৮||

Adhikarana takraguNAH takravarjyAH (39) · Śloka 39

তক্রং লঘু কষাযাম্লং দীপনং কফবাতজিত্| শোফোদরার্শো- গ্রহণী- দোষ- মূত্র- গ্রহারুচীঃ| গুল্মপ্লীহঘৃতব্যাপদ্গরপাণ্ড্বামযাঞ্জযেত্| নৈবং তক্রং ক্ষতে দদ্যান্নোষ্ণকালে ন দুর্বলে| ন মূর্চ্ছাভ্রমদাহেষু ন রোগে রক্তপৈত্তিকে||৩৯||

তক্রং দণ্ডেন মথিতাদ্দধ্নঃ উদ্ধৃতেঽ বা স্নেহে| তত্তক্রং লঘুত্বাদিযুক্তম্| ঘৃতব্যাপত্ ঘৃতস্যাতিপানাদুত্পন্নো রোগঃ| গরঃ বক্ষ্যমাণলক্ষণঃ(উ০ন০অ০-৪০)|| ৩৯||

Adhikarana mastuguNAH (40) · Śloka 40

তদ্বন্মস্তু স্ত্রোতশ্শোধি বিষ্টম্ভজিল্লঘু||৪০||

তদ্বত্তক্রবত্ গুণৈর্মস্তু বিজ্ঞেযং, মস্তুনঃ স্ত্রোতঃশোধকত্বেন বিষ্টম্ভনাশকত্বেন চ বিশেষঃ| তক্রস্য স্ত্রোতশ্শোধকত্বেঽপি মস্তুনোঽতিশযঃ|| ৪০||

Adhikarana navanItaguNAH (41) · Śloka 41

শীতং স্বাদু কষাযাম্লং নবনীতং নবোদ্ধৃতম্| যক্ষ্মার্শোঽর্দিতপিত্তাসৃগ্বাতজিদ্ গ্রাহি দীপনম্||৪১||

নবোদ্ধৃতং সদ্য উদ্ধৃতং নবনীতং, শীতং শীতবীর্যং মধুরং চ কষাযাম্লত্বেন চ যুক্তম্| রাজযক্ষ্মাদিনাশনং সংগ্রাহি যদ্ দ্রবান্ ভাবান্পিণ্ডীকরোতি|| ৪১||

Adhikarana kShIroddhRutanavanItaguNAH (42) · Śloka 42

ক্ষীরোদ্ভবং তু সংগ্রাহি রক্তপিত্তাক্ষিরোগজিত্||৪২||

ক্ষীরোদ্ভবনবনীতং রক্তপিত্তাক্ষিরোগং নাশযতি সংগ্রাহি চ| ক্ষীরোদ্ভবং যত্ ক্ষীরমেব মথিত্বোত্পাদিতম্|| ৪২||

Adhikarana GRutaguNAH (43) · Śloka 43

শস্তং ধীস্মৃতিমেধাগ্নিবলাযুঃ শুক্রচক্ষুষাম্| বালবৃদ্ধপ্রজাকান্তিসৌকুমার্যস্বরার্থিনাম্| ক্ষতক্ষীণপরীসর্পশস্ত্রাগ্নিগ্লপিতাত্মনাম্| বাতপিত্তবিষোন্মাদশোষালক্ষ্মীজ্বরাপহম্| স্নোহানামুত্তমং শীতং বযসঃস্থাপনং ঘৃতম্| সহস্রবীর্যং বিধিভিঃ শৃতং কর্মসহস্রকৃত্||৪৩||

ঘৃতং তু ধীপ্রভৃতীনামগ্নিগ্লপিতাত্মান্তানাং শস্তং হিতম্| ধীঃ বুদ্ধির্বস্তুগ্রহণে শক্তিঃ| মেধা প্রজ্ঞা বস্তুবিবেকশক্তিঃ| প্রজাদ্যর্থিনাঞ্চ প্রজা অপত্যং শুক্রস্য সফলতাকরমিত্যর্থঃ| বযঃস্থাপনং জরযা বিনা বযঃস্থাপযতীতি বযঃস্থাপনম্| সহস্রবীর্যমনেকশক্তিঃ| তথা বিধিভিঃ বিধানৈঃ নানাবিধাভিঃ যোজনাভিঃ| কর্মসহস্রকৃত্ অনেককার্যকৃদিত্যর্থঃ|| ৪৩||

Adhikarana purANaGRutaguNAH (44) · Śloka 44

মদাপস্মারমূর্চ্ছাযশিরঃকর্ণাক্ষিযোনিজান্| পুরাণং জযতি ব্যাধীন্ ব্রণশোধনরোপণম্| পূর্বোক্তাংশ্চাধিকান্কুর্যাদ্ গুণাংস্তদমৃতোপমম্||৪৪||

তচ্চ ঘৃতং পুরাণমতীতবহুকালং মদাদীন্ ব্যাধীন্ জযতি| ব্রণানাং পৈচ্ছিল্যাদিকং শোধযতি| ব্রণাংশ্চ রোপযতি| তচ্চ পুরাণং পূর্বোক্তান্ সামান্যঘৃতোক্তান্ গুণানাধিক্যেন করোতি| অমৃতোপমঞ্চ|| ৪৪||

Adhikarana GRutamaNDaguNAH (45) · Śloka 45

তদ্বচ্চ ঘৃতমণ্ডোঽপি রূক্ষস্তীক্ষ্ণস্তনুশ্চ সঃ||৪৫||

ঘৃতমণ্ডোঽপি ঘৃতগুণানধিকং কুর্যাদমৃতোপমশ্চ রূক্ষত্বেন তীক্ষ্ণত্বেন তনুত্বেন চাস্য বিশেষঃ| মণ্ড উপরিভবঃ স্বচ্ছঃ||৪৫||

Adhikarana kIlATAdikShIravikAraguNAH (46) · Śloka 46

বল্যাঃ কীলাটকূচীকাতক্রপিণ্ডকমোরটাঃ| সক্ষীরশাকপীযূষা রোচনা বহ্নিসাদনাঃ| শুক্রনিদ্রাকফকরা বিষ্টম্ভিগুরুদোষলাঃ||৪৬||

কীলাটাদযঃ সর্বে ক্ষীরবিকারাঃ তদ্বিকৃতিবিকারাশ্চ| বলকরা রূচ্যাঃ অগ্নিনাশনাঃ শুক্রাদিকরাশ্চ বিষ্টম্ভিনো গুরবো দোষলাশ্চ| দোষলা অপথ্যত্বেন বিকারকারিণঃ| কীলাটাঃ তক্রাদিকৃতাঃ| কূচীকাঃ ক্ষীরকীলাটিকাঃ| মোরটঃ ক্ষীরসদৃশঃ কীলাটিকঃ| পীডন উত্তরাপথে প্রসিদ্ধঃ| ঘনবস্ত্রবদ্ধং স্বযং স্রুতদ্ভাগং পিণ্ডীভূতং তক্রং তক্রপিণ্ডকঃ ক্ষীরশাকং প্রসিদ্ধং, পীযূষং সদ্যঃপ্রসূতাযাঃ ক্ষীরকৃতম্ দধি|| ৪৬||

Adhikarana dadhighRutAdInAM kShIraguNAtideshaH (47) · Śloka 47

বিদ্যাদ্দধিঘৃতাদীনাং গুণদোষান্ যথা পযঃ||৪৭||

দধিঘৃতানাঞ্চ পযোগুণানতিক্রমেণ গুণান্ বিদ্যাত্| তেন এতদুক্তং ভবতি-যথা স্বাদুপাকরসমিত্যাদিনা সামান্যেন ক্ষীরগুণা উক্তাঃ তদ্বত্ সামান্যেন দধ্যাদিগুণা অপি| বিশেষাকাংক্ষাযাং তু দধ্যাদীনাং সত্স্বপি প্রকৃতিভূতক্ষীরগুণান্বযোঽপি গ্রাহ্যঃ|| ৪৭||

Adhikarana varAvarakShIraghRute (48) · Śloka 48

গব্যে ক্ষীরঘৃতে শ্রেষ্ঠে নিন্দিতে চাবিসম্ভবে||৪৮||

বর্গার্থং নির্ধারযতি-ক্ষীরং ঘৃতং চ গব্যং শ্রেষ্ঠম্| আবিকং নিন্দিতম্| প্রাধান্যাত্তু ক্ষীরঘৃতযোরেব গ্রহণম্|| ৪৮|| (৩) ইক্ষুবর্গঃ

Adhikarana (3) ikShuvargaH ikShurasaguNAH (49) · Śloka 49

ইক্ষোঃ রসো গুরুঃ স্নিগ্ধো বৃংহণঃ কফমূত্রকৃত্| বৃষ্যঃ শীতঃ পবনজিত্ ভুক্তে বাতপ্রকোপনঃ| রক্তপিত্তপ্রশমনঃ স্বাদুপাকরসো সরঃ|৪৯|

ইক্ষুরসবর্গো দ্রবপ্রসঙ্গেনোচ্যতে| ইক্ষো রসঃ সরত্বাদিগুণযুক্তঃ, বৃংহণো বক্ষ্যমাণলক্ষণঃ(সূ০অ০-২৮) পবনজিদ্বাতনাশনঃ| ভুক্তে ভুক্তমাত্রে পীতো বাতপ্রকোপনঃ|| ৪৯||

Adhikarana dantapIDitekShurasaguNAH (49) · Śloka 49

সোঽগ্রে সলবণো দন্তপীডিতঃ শর্করাসমঃ||৪৯||

স চ রসঃ অগ্রে ইক্ষোঃ প্রান্তে জাতঃ সলবণঃ ঈষত্ লবণঃ দন্তপীডিতোঽযন্ত্রকালাদ্যনুপহতত্বাদ্ গুণৈঃ শর্করযা সমঃ||৪৯||

Adhikarana yAntrikekShurasaguNAH (50) · Śloka 50

মূলাগ্রজন্তুজগ্ধাদিপীডনান্মলসঙ্করাত্| কিঞ্চিত্কালবিধৃত্যা চ বিকৃতিং যাতি যান্ত্রিকঃ| বিদাহী গুরুবিষ্টম্ভী তেনাসৌ...................||৫০||

যস্তু যান্ত্রিকো যন্ত্রপীডিতো মূলাদিমিশ্রপীডনাত্ মলসঙ্করাদ্বৈকৃত্যং প্রাপ্নোত্যতোঽসৌ যান্ত্রিকো বিদাহী বিষ্টম্ভকরশ্চ| জন্তুজগ্ধঃ ক্রিমিভক্ষিতঃ, বিদাহী সৌম্যভাববিদহনশীলঃ| হেতুনির্দেশো হেত্বভাবাত্ কার্যাভাবপ্রতিপাদনার্থঃ| রক্তপিত্তে চ বিশিষ্টে বিশেষেণ বিদহনশীলস্যাপি প্রযোগো ন বিরুদ্ধঃ|| ৫০||

Adhikarana pauNDrakAdInAM guNAH (51) · Śloka 51

.................তত্র পৌণ্ড্রকঃ| শৈত্যপ্রসাদমাধুর্যৈর্বরস্তমনু বাংশিকঃ| শতপর্বককাংতারনৈপালাদ্যাস্ততঃ ক্রমাত্| সক্ষারাঃ সকষাযাশ্চ সোষ্ণাঃ কিঞ্চিদ্বিদাহিনঃ||৫১||

তত্র চেক্ষুরসেষু মধ্যে পৌণ্ড্রকঃ শৈত্যেন প্রসন্নত্বেন মাধুর্যেণ চ শ্রেষ্ঠঃ সর্বেক্ষুরসেভ্যঃ| তমনু বাংশিকঃ শৈত্যাদিভিঃ পৌণ্ড্রকাদ্ধীনো বাংশিক ইত্যর্থঃ| শতপর্বকাদযশ্চ রসাঃ ক্রমাদুত্তরোত্তরং শৈত্যাদিভির্হীনাঃ| তে চ শতপর্বকাদযঃ ঈষত্ক্ষারত্বেন যুক্তাঃ ঈষত্কষাযরসা ঈষদুষ্ণবীর্যাঃ কিঞ্চিদ্বিদাহিনশ্চ|| ৫১||

Adhikarana phANitaguNAH (52) · Śloka 52

ফাণিতং গুর্বভিষ্যন্দি চযকৃন্মূত্রশোধনং||৫২||

ফাণিতং ক্ষুদ্রগুডীভূতমিক্ষুরসঃ| তত্ গুর্বভিষ্যন্দি ত্রিদোষসঞ্চযকৃত্| মূত্রসংশোধনং মূত্রমতিবাহযতি|| ৫২||

Adhikarana dhautAdiBEdena dhautaguDaguNAH (53) · Śloka 53

নাতিশ্লেষ্মকরো ধৌতঃ সৃষ্টমূত্রশকৃদ্গুডঃ| প্রভূতকৃমিমজ্জাসৃঙ্মেদোমাংসকফোঽপরঃ||৫৩||

গুডঃ সংস্কারবশেন নির্মলঃ নাতিশ্লেষ্মকর ঈষত্ শ্লেষ্মকর ইত্যর্থঃ| তথা মূত্রং শকৃচ্চ সৃজতি বহিঃ ক্ষিপতি| তথা অপরঃ অধৌতঃ প্রভূতান্ ক্রিম্যাদীন্ করোতীত্যুপচারাত্ স এবোক্তঃ|| ৫৩||

Adhikarana purANanavaguDaguNAH (54) · Śloka 54

হৃদ্যঃ পুরাণঃপথ্যশ্চ নবঃ শ্লেষ্মাগ্নিসাদকৃত্||৫৪||

স এব চ গুডঃ পুরাণো হৃদ্যঃ শরীরস্য চ পথ্যঃ; নবস্তু কফমগ্নিসাদং চ করোতি|| ৫৪||

Adhikarana matsyaNDikA-khaNDa-sharkarAguNAH (55) · Śloka 55

বৃষ্যাঃ ক্ষীণক্ষতহিতা রক্তপিত্তানিলাপহা| মত্স্যণ্ডিকাখণ্ডসিতাঃ ক্রমেণ গুণবত্তমাঃ||৫৫||

মত্স্যণ্ডিকাদযস্ত্রযো বৃষ্যত্বাদিযুক্তাঃ ক্রমেণ| পূর্বস্মাত্ উত্তরো বৃষ্যত্বাদিভিরতিশযেন যুক্তঃ| মত্স্যণ্ডিকাগুডা নির্মলাঃ প্রসিদ্ধাশ্চ লোকে| ততোঽপি সংস্কারেণ গুণৈশ্চাধিকঃ খণ্ডঃ| ততোঽপি সিতা শর্করা|| ৫৫||

Adhikarana yAShaSarkarAdInAM guNAH (56) · Śloka 56

তদ্গুণা তিক্তমধুরা কষাযা যাষশর্করা| ত্রিদোষঘ্নী সিতা কাশেক্ষুদর্ভচ্ছদসংভবা||৫৬||

যাষশর্করা তু তদ্গুণা মত্স্যণ্ডিকাদিগুণা তিক্তমধুরকষাযরসা চ| যাষশর্করা লোকে যবাষশর্করেতি প্রসিদ্ধা| কেচিদ্ ব্রুবন্তি-দুরালভারসেন সা ক্রিযত ইতি|| ৫৬||

Adhikarana sarvasharkarAguNAH (57) · Śloka 57

দাহতৃট্চ্ছর্দিমূর্চ্ছাসৃক্পিত্তঘ্ন্যঃ সর্বশর্করাঃ||৫৭||

এতা অন্যাশ্চ কাশ্চন সর্বাঃ শর্করাঃ দাহাদিনাশনাঃ (চ০সূ০অ০-২৭, ২৩৮-২৪২)|| ৫৭||

Adhikarana sharkarAphANitayorvarAvaratvam (58) · Śloka 58

শর্করেক্ষুবিকারাণাং ফাণিতং চ বরাবরে||৫৮||

বর্গার্থং নির্ধারযতি| ইক্ষুবিকারাণাং মধ্যে শর্করা শ্রেষ্টা| ফাণিতমশ্রেষ্ঠমিতি|| ৫৮||

Adhikarana madhunaH madhusharkarAyAshca guNAH (59) · Śloka 59

চক্ষুষ্যং ছেদি তৃট্শ্লেষ্মবিষহিধ্মাস্রপিত্তনুত্| কুষ্ঠমেহকৃমিচ্ছর্দিশ্বাসকাসাতিসারজিত্| ব্রণশোধনসন্ধানরোপণং বাতলং মধু| রূক্ষং কশাযমধুরং তত্তুল্যা মধুশর্করা||৫৯||

শর্করাযোনিপ্রসঙ্গেন মধুনোঽপি গুণা উচ্যন্তে| মধু মক্ষিকং বাতলং চক্ষুষশ্চ পথ্যম্| চ্ছেদি বিচ্ছেদি যত্তৈক্ষ্ণাদ্দেহে পিণ্ডিতান্ ভাবান্ চ্ছিনত্তি বিভজতি, তৃডাদীংশ্চ নাশযতি| ব্রণানাং শোধনং তত্ যত্ পূযপৈচ্ছিল্যাদিপ্রেরকম্| সন্ধানং তত্ যত্ দ্বৌ ব্রণোষ্ঠাবেকীকরোতি| রোপণং প্রসিদ্ধম্| তথা মধু রূক্ষম্| রসেন চ কষাযমধুরম্| অস্য চ সর্বাত্মকস্যাপি প্রভাবাদ্বানুমীযতে বাতলত্বাদিযোগঃ| তত্তুল্যা মধুসমা গুণৈর্মধুশর্করা|| ৫৯||

Adhikarana uShNena madhuno virodhaH (60) · Śloka 60

উষ্ণমুষ্ণার্তমুষ্ণে চ যুক্তং চোষ্ণৈর্নিহন্তি তত্| বিষান্বযত্বেনবিষপুষ্পেভ্যোঽপি যতো মধু| কুর্বতে তে স্বযং যচ্চ সবিষা ভ্রমরাদযঃ||৬০||

তচ্চ মধু উষ্ণং নিহন্তি মারযতি| উষ্ণার্তং চ পুরুষং মারযতি| অত উচ্যতে- বিষান্বযত্বেন| কুতো বিষান্বযত্বং মধুনঃ অত আহ- বিষপুষ্পেভ্যোঽপি যতো মধু কুর্বন্তি তত্কৃতঃ| ন কেবলমন্যপুষ্পেভ্যঃ ইত্যপি শব্দস্যার্থঃ| যদ্যস্মাচ্চ ভ্রমরাদযঃ স্বযং শরীরেণৈব সবিষা মধু কুর্বন্ত্যত উষ্ণাদিযুক্তং মারযতি (সু০সূ০ ৪৫-১৪৪)|| ৬০||

Adhikarana madhunaH uShNavirodhasyApavAdaH (61) · Śloka 61

প্রচ্ছর্দনে নিরূহে চ মধূষ্ণং ন নিবার্যতে| অলব্ধপাকমাশ্বেব তযোর্যস্মান্নিবর্ততে||৬১||

তচ্চ মধু প্রচ্ছর্দনে বমনে নিরূহে চোষ্ণমপি ন নিবার্যতে| যতঃ অপক্বমাশ্বেব প্রযুক্তং নিবর্ততে পুনরাগচ্ছতি|| ৬১||

Adhikarana madhuno hitA mAtrA (62) · Śloka 62

গুরুরূক্ষকষাযত্বাচ্ছৈত্যাচ্চাল্পং হিতং মধু| ন হি কষ্টতমং কিঞ্চিত্তদজীর্ণাদ্যতো নরম্| উপক্রমবিরোধত্বাত্সদ্যো হন্যাদ্যথা বিষম্||৬২||

গুরুত্বাদিতো হেতোঃ শরীরে চাল্পং পথ্যম্| তথা চ মধুনঃ অজীর্ণাদন্যত্কষ্টমং ন বিদ্যতে| কুতঃ? যতো বিরুদ্ধোপক্রমত্বাদ্বিষবন্নরং নাশযতি| অজীর্ণে হ্যুষ্ণোদকপানাদিকং বিহিতম্| তচ্চ মধুনো বিরুদ্ধম্| অথ চ শীতা ক্রিযা ক্রিযতে| সা হ্যজীর্ণেঽপ্যপথ্যা| অত উপক্রমবিরোধঃ (চ০সূ০অ০২৭-২৪৮)|

Adhikarana madhuno yogavAhitvam (63) · Śloka 63

নানাদ্রব্যাত্মকত্বাচ্চ যোগবাহি পরং মধু| বৃষ্যযোগৈরতো যুক্তং বৃষতামনুবর্ততে||৬৩||

তচ্চ মধু নানাদ্রব্যস্বরূপত্বাদত্যর্থং যোগবাহিত্বেন যুক্তম্| তেনৈতদুক্তং ভবতি-সর্বাঃ শক্তযঃ প্রসেবকবত্তত্র স্থিতাঃ কেবলং যা যা শক্তিঃ সংযোগিদ্রব্যে শক্তিং সহাযভূতামাসাদযতি সা সা তামতিশযেনাভিব্যনক্তি| এতদেব হি যোগবাহিত্বং যত্ স্বগুণাপরিত্যাগেনাংশেন সাদৃশ্যাত্ পরস্য চ শক্তিপরিপূরণমত এব কারণাদ্বৃষ্যযোগৈর্যুক্তং মধু বৃষ্যতাং যাতি| এতাবতা হি বৃষ্যযোগস্য তু শক্তিঃ তেন পরিপূরিতা ভবতি|| ৬৩||

Adhikarana madhuno BedAH teShAM shreShThatvAdi ca (64) · Śloka 64

ভ্রামরং পৌষ্পিকং ক্ষৌদ্রং মাক্ষিকং চ যথোত্তরম্| বরং জীর্ণং চ তেষ্বন্ত্যে দ্বে এব হ্যুপযোজযেত্||৬৪||

ভ্রমরাদিভিশ্চ কৃতং মধু যথোত্তরং শ্রেষ্ঠম্| যদ্যস্মাদুত্তরং তত্তস্মাত্ শ্রেষ্ঠমিতি| জীর্ণং পুরাণং মধু শ্রেষ্ঠম্| তেষু ভ্রমরাদিষু মধ্যে দ্বে এবান্ত্যে ক্ষৌদ্রং মাক্ষিকঞ্চ পথ্যত্বাদুপযোজযেত্| ইতি ইক্ষুবর্গঃ||৬৪||

Adhikarana (4) tailavargaH tailasAmAnyaguNAH tilatailaguNAshca (65) · Śloka 65

তৈলং স্বযোনিবত্তত্র মুখ্যং তীক্ষ্ণং ব্যবাযি চ| ত্বগ্দোষকৃদচক্ষুষ্যং সূক্ষ্মোষ্ণং কফকৃন্ন চ| কৃশানাং বৃংহণাযালং স্থূলানাং কর্শনায চ| বদ্ধবিট্কং কৃমিঘ্নঞ্চ সংস্কারাত্সর্বরোগজিত্||৬৫||

দ্রবত্বাত্তৈলমুচ্যতে| তৈলং স্বযোনিবত্সর্বং তৈলং স্বকারণ সমগুণম্| তত্র তৈলেষু মধ্যে মুখ্যং তিলোদ্ভবং তীক্ষ্ণম্| ব্যবাযি ব্যাপ্তিশীলম্| যদ্দেহং ব্যাপ্য পাকং যাতি| ত্বগ্দোষকৃত্ পানাভ্যাসেন ত্বচং দূষযতি| যৈস্তু ত্বগ্দোষহরমিত্যুক্তং তৈর্বাতাদিকে অভ্যঙ্গেন| অথবা ত্বগ্দোষং কৃন্ততীতি ত্বগ্দোষকৃদিতি| কৃতিচ্ছেদনে (৬-প০) ইত্যস্য ধাতোঃ প্রযোগঃ| চক্ষুষশ্চাহিতম্, সূক্ষ্মস্রোতঃপ্রবেশি| উষ্ণবীর্যম্| তিলোদ্ভবত্বাচ্ছ্লেষ্মকরত্বং প্রাপ্তমত উচ্যতে-কফকৃন্ন চেতি| সংস্কারবশাত্ কৃশস্য ব্রংহণাযালং পর্যাপ্তম্| স্থূলানাং চ কর্শনায| অথবা কেবলমপি যেনৈব হেতুনা স্রোতঃশোধকত্বাদিনা কৃশানাং ব্রংহণায অলং পর্যাপ্তম্, তেনৈব হেতুনা স্থূলানাং কর্শনাযেতি ন কশ্চিদ্ বিরোধঃ| অস্যৈব চ পক্ষস্য যুক্তত্বং সংস্কারাত্ সর্বরোগজিদিতি স্বযং পাঠাত্| বিষং পুরীষং বধ্নাতি গ্রথযতীতি বদ্ধবিট্কম্| সংস্কারং প্রতিরোগং বিশিষ্টমাশ্রিত্য সর্বরোগজিত্|| ৬৫||

Adhikarana tailaprayogasyetihAsaH (66) · Śloka 66

তৈলপ্রযোগাদজরা নির্বিকারা জিতশ্রমাঃ| আসন্নতিবলা যুদ্ধে দৈত্যাধিপতযঃ পুরা||৬৬||

তৈলপ্রযোগানিতিহাসরূপেণ কথযতি- তৈলপ্রযোগাদিত্যাদিনা| দৈত্যাধিপতযঃ পুরো যুদ্ধে অতিবলাঃ জরাদিহরহিতাশ্চ আসন্|| ৬৬||

Adhikarana eraNDatailaguNAH (67) · Śloka 67

সতিক্তোষণমৈরণ্ডং তৈলং স্বাদু সরং গুরু| বর্ধ্মগুল্মানিলকফানুদরং বিষমজ্বরম্| রুক্ছোফো চ কটীগুহ্যকোষ্ঠপৃষ্ঠাশ্রযো জযেত্||৬৭||

এরণ্ডং তৈলং তু ঈষত্তিক্তকটুকং, রসেন মধুরং বর্ধ্মাদীন্ জযেত্ কট্যাদিস্থিতৌ তু রুক্ছোফো নাশযতি|| ৬৭||

Adhikarana rakteraNDatailaguNAH (68) · Śloka 68

তীক্ষ্ণোষ্ণং পিচ্ছিলং বিস্রং রক্তৈরণ্ডোদ্ভবন্ত্বতি||৬৮||

লোহিতৈরণ্ডতৈলমতিশযেন তৈক্ষ্ণ্যাদিযুক্তম্|| ৬৮||

Adhikarana sarShapatailaguNAHumAkusumbhatailaguNAH (69) · Śloka 69

কটূষ্ণং সার্ষপং তীক্ষ্ণং কফশুক্রানিলাপহম্| লঘু পিত্তাস্রকৃত্কোঠকুণ্ঠাক্ষো ব্রণজন্তুজিত্| উমাকুঔম্ভজঞ্চোষ্ণং ত্বগ্দোষকফপিত্তকৃত্||৬৯||

উমাতৈলং কুসুম্ভতৈলং চোষ্ণবীর্যং ত্বগ্দোষং করোতি পিত্তশ্লেষ্মাণৌ চ|| ৬৯||

Adhikarana dantyAditailAnAM sAmAnyaguNAH (70) · Śloka 70

দন্তীমূলকরক্ষোঘ্নকরঞ্চারিষ্টশিগ্রুজম্| সুবর্চলেঙ্গুদীপীলুশঙ্খিনীনীপসম্ভবম্| সরলাগুরুদেবহ্বশিংশপাসারজন্ম চ| তুবরারু০করোথ্যঞ্চ তীক্ষ্ণং কট্বস্রপিত্তকৃত্| অর্শঃকুষ্ঠক্রিমিশ্লেষ্মশুক্রমেদোনিলাপহম্||৭০||

দন্ত্যাদিজং তৈলং তৈক্ষ্ণ্যাদিগুণযুক্তম্| রক্ষোঘ্নং সার্ষপম্| সরলাদীনাং সারশব্দেন সম্বন্ধঃ|| ৭০||

Adhikarana kara~jcanimbatailaguNAH (71) · Śloka 71

করঞ্চনিম্বজে তিক্তে নাত্যুষ্ণে তত্র নির্দিশেত্||৭১||

করঞ্চনিম্বতৈলযোস্তু কটুত্বাপবাদস্তিক্তত্বম্| নাত্যন্তোষ্ণবীর্যে চেমে|| ৭১||

Adhikarana saralatailaguNAH (72) · Śloka 72

কষাযতিক্তকটুকং সারলং ব্রণশোধনম্||৭২||

সরলকাষ্ঠসারজং তৈলং কষাযাদিরসং ব্রণশোধনঞ্চ| অত্র কষাযতিক্তত্বং ব্রণশোধনত্বং চাধিকম্|| ৭২||

Adhikarana tuvarAruShkaratailaguNAH (73) · Śloka 73

ভৃশোষ্ণে তীক্ষ্ণকটুকে তুবরারুষ্করোদ্ভবে| বিশেষাত্ক্রিমিকুষ্ঠঘ্নে ততোর্ধ্বাধো বিরেচনে||৭৩||

তুবরারুষ্করতৈলযোস্তৈক্ষ্ণ্যাদ্যতিশযঃ| অর্শঃক্রিমিকুষ্ঠনাশনে চাতিশযঃ| ঊর্ধ্বাধোবিরেচনং বমনবিরেচনাভ্যাং দোষনির্হরণম্| তেনাধিকে|| ৭৩||

Adhikarana akShAditailAnAM guNAH (74) · Śloka 74

অক্ষাতিমুক্তকাক্ষোডনালিকেরমধূকজম্| ত্রপুসৈর্বারুকুষ্মাণ্ডুশ্লেষ্মাতকপ্রিযালজম্| বাতপিত্তহরং কেশ্যং শ্লেষ্মলং গুরু শীতলম্||৭৪||

অক্ষাতিমুক্তকাদিতৈলং বাতপিত্তহরত্বাদিযুক্তম্| অক্ষং বিভিতকম্| অতিমুক্তকং মাধবীফলম্|| ৭৪||

Adhikarana shrIparNIkiMshukatailaguNAH (75) · Śloka 75

পিত্তশ্লেষ্মপ্রশমনং শ্রীপর্ণীকিংশুকোদ্ভবম্||৭৫||

শ্রীপর্ণীকিংশুকতৈলং পিত্তশ্লেষ্মপ্রশমনম্| শ্রীপর্ণী কাশ্মরী| কিংশুকঃ পলাশঃ|| ৭৫||

Adhikarana taileshu varAvaratvAnirUpaNam (76) · Śloka 76

তিলতৈলং বরং তেষু কৌসুম্ভমবরং পরম্||৭৬||

তেষু চ তৈলেষু মধ্যে তিলতৈলং পথ্যত্বেনাতিশ্রেষ্ঠম্, তদ্বিপরীতং কৌসুম্ভম্|| ৭৬||

Adhikarana vasAdInAM svarUpaM guNAshca (77) · Śloka 77

বসা মজ্জা চ বাতঘ্নৌ বলপিত্তকফপ্রদৌ| মাংসানুগস্বরূপৌ চ বিদ্যান্মেদোঽপি তাবিব||৭৭||

স্নেহপ্রসঙ্গেনেদমপ্যুচ্যতে| বসা নাম তনুমেদোরুপং শুদ্ধমাংসস্নেহঃ| মজ্জা চ ধাতু| তৌ বাতং নাশযতঃ| বলপিত্তকফাংশ্চ কুরুতঃ| যস্য প্রাণিনঃ সম্বন্ধিনৌ তন্মাংসসদৃশস্বরূপৌ চ| মেদোঽপি বসামজ্জ্ঞোঃ স্বরূপম্|| ৭৭||

Adhikarana varAvaravasAH (78) · Śloka 78

বৌলূকী শৌকরী পাকহংসজা কুক্কুদোদ্ভবা| বসা শ্রেষ্ঠা স্ববর্গেষু কুম্ভীরমহিষোদ্ভবা| কাকমদ্গুবসা তদ্বত্কারণ্ডোত্থা চ নিন্দিতা||৭৮||

বুলুক্যাদীনাং চতুর্ণাং বসাঃ স্ববর্গেষু ক্রমেণ মত্স্যমহামৃগাপ্চরবিষ্কিরেষু পথ্যত্বেন শ্রেষ্ঠাস্তদ্বত্স্বর্গেষু মধ্যে কুম্ভীরাদিবসা অশ্রেষ্ঠাঃ|| ৭৮||

Adhikarana medaHsu varAvaraBedaH (79) · Śloka 79

শাখাদমেদসাং চ্ছাগং হাস্তিনং চ বরাবরে||৭৯||

শাখাদানাং মধ্যে চ্ছাগং মেদঃ শ্রেষ্ঠম্| যে শাখাঃ প্রাযো ভঞ্জতে তে শাখাদাঃ| ন তু ভূযিষ্ঠং তৃণাদি, স্বভাবেনৈব| ইতি তৈলবর্গঃ|

Adhikarana (5) madyavargaH madyasAmAnyaguNAH (80) · Śloka 80

দীপনং রোচনং মদ্যং তীক্ষ্ণোষ্ণং তুষ্টিপুষ্টিদম্| সস্বাদুতিক্তকটুকমম্লপাকরসং সরম্| সকষাযং স্বরারোগ্যপ্রতিভাবর্ণকৃল্লঘু| নষ্টনিদ্রাতিনিদ্রেভ্যো হিতং পিত্তাস্রদূষণম্| কৃশস্থূলহিতং রূক্ষং সূক্ষ্মং স্রোতোবিশোধনম্| বাতশ্লেষ্মহরং যুক্ত্যা পীতং বিষবদন্যথা||৮০||

মদ্যমুচ্যতে-সর্বং মদ্যং দীপনাদিগুণযুক্তম্| তুষ্টির্মনঃপরিতোষঃ| পুষ্টিঃ শরীরপোষঃ| নষ্টনিদ্রস্য চাতিনিদ্রস্য চাহারবিশেষাদ্বৈপরীত্যং করোতি, প্রভাবাদ্বা| এবং কৃশস্থূলযোরপি| যুক্ত্যা মাত্রাদিকযা পীতমেবঙ্গুণম্| অযুক্ত্যা বিষসদৃশম্ সা চ যুক্তির্মদাত্যযচিকিত্সতে (চি০অ০-৯) বক্ষ্যমাণা, আচরণং বা|| ৮০||

Adhikarana nava-purANamadyaguNAH (81) · Śloka 81

গুরু ত্রিদোষজননং নবং জীর্ণমতোঽন্যথা||৮১||

তত্র সর্বং মদ্যং নবমনতীতসংবত্সরং গুরু ত্রিদোষকরঞ্চ| কেষাঞ্চিজ্জাতানাং কতিপযদিবসপরিবাসো নবত্বম্| ক্রমেণ চ তন্নাশঃ| জীর্ণং পুরাণমেতদ্বিপরীতম্|| ৮১||

Adhikarana madyapAne visheShaniyamAH (82) · Śloka 82

পেযং নোষ্ণোপচারেণ ন বিরিক্তক্ষুধাতুরৈঃ| নাতিতীক্ষ্ণমৃদুস্বচ্ছঘনং ব্যাপন্নমেব বা||৮২||

তচ্চ মদ্যমুষ্ণোপচারেণ ন পেযম্| উষ্ণং বেশ্মাহারাদিকং উপচারো যস্যেতি| কৃতবিরেচনেন চাঽঽদোষসামাম্যান্ন পেযম্| অতিতৈক্ষ্ণ্যমার্দবাদিযুক্তং চ ন পেযম্| ব্যাপন্নং দেশকালাদ্যুপহতম্|| ৮২||

Adhikarana surAguNAH (83) · Śloka 83

গুল্মোদরার্শো গ্রহণীশোষহৃত্ স্নেহনী গুরুঃ| সুরাঽনিলঘ্নীঃ মেদোঽসৃক্স্তন্যমূত্রকফাবহা||৮৩||

অনন্তরং মদ্যবিশেষা উচ্যন্তে-সুরা গুল্মাদিনাশিনী মেদোরক্তাদিকরী চ| সুরা পিষ্টকৃতা ঘনা শ্বেতা|| ৮৩||

Adhikarana vAruNIguNAH (84) · Śloka 84

তদ্গুণা বারুণী হৃদ্যা লঘুস্তীক্ষ্ণা নিহন্তি চ| শূলকাসবমিশ্বাসবিবন্ধাধ্মানপীনসান্||৮৪||

বারিণী নাম সুরা তদ্গুণা অনন্তরোক্তসুরাসমগুণা| ইযং তু লঘ্বী তীক্ষ্ণা চ, শূলাদীংশ্চ নিহন্তি| বিবন্ধঃ স্রোতস উপলেপেন দোষাদীনামবহনম্|| ৮৪||

Adhikarana jagalamedakayorguNAH (85) · Śloka 85

শূলপ্রবাহাহিকাটোপতৃষ্ণাশোফার্শসাং হিতঃ| জগলঃ পাচনো গ্রাহি রূক্ষস্তদ্বচ্চ মেদকঃ||৮৫||

জগলো বারুণ্যাঃ সুরযা অধোভাগো ঘনঃ শোলপ্রবাহিকাদিহরঃ| প্রবাহিকা নিস্তানিকা| আটোপো জঠরে বাযুনা নিশ্চলেন সশব্দং পূরণম্| তথা পাচনঃ সংগ্রহণো রূক্ষশ্চ| মেদকো নাম জগলস্যাধোভাগো গুণৈর্জগলবদ্বিজ্ঞেযঃ|| ৮৫||

Adhikarana bakkasaguNAH (86) · Śloka 86

বক্কসো হৃতসারত্বাদ্বিষ্টম্ভী দোষকোপনঃ||৮৬||

বক্কসো নাম পানীযেন মদ্যকল্কপীডনেন হৃতসারত্বাদ্বিষ্টম্ভী ত্রিদোষকোপনশ্চ|| ৮৬||

Adhikarana baibhItakIsurAguNAH (87) · Śloka 87

নাতিতীব্রমদা লঘ্বী তথ্যা বৈভীতকী সুরা| ব্রণে পাণ্ড্বামযে কুষ্ঠে ন চাত্যর্থং বিরুধ্যতে||৮৭||

বিভীতকস্য সুরা অতিতীব্রং মদং ন জনযতি| লঘ্বী পথ্যা| ব্রণাদিষু চাত্যর্থং ন বিরুদ্ধা||৮৭||

Adhikarana yavasurAyAH guNAH (88) · Śloka 88

বিষ্টম্ভিনী যবসুরা গুর্বী রূক্ষা ত্রিদোষলা||৮৮||

যবসুরা বিষ্টম্ভকরী গর্বী রূক্ষা ত্রিদোষকরা চ|| ৮৮||

Adhikarana kauhalImadhUlakasurayorguNAH (89) · Śloka 89

কৌহলী বৃংহণী গৌর্বী স্লেষ্মলস্তু মধূলকঃ||৮৯||

কৌহলী সুরা বৃংহণী গৌর্বী চ| মধূলকঃ শ্লেষ্মকরঃ| সর্বং মদ্যমসঞ্জাতং মধূলক ইতি স্মৃতঃ|| ৮৯||

Adhikarana ariShTaguNAH (90) · Śloka 90

যথাদ্রব্যগুণোঽরিষ্টঃ সর্বমদ্যগুণাধিকঃ| গ্রহণীপাণ্ডুকুষ্ঠার্শঃশোষশোফোদরজ্বরান্| হন্তি গুল্মকৃমিপ্লীহঃ কষাযকটুবাতলঃ||৯০||

অরিষ্টসন্ধানমুচ্যতে| স হি যৈর্যৈদ্রৈব্যৈঃ সিদ্ধস্তেষাং গুণাননুগচ্ছতি| সর্বৈশ্চ দীপনত্বাদিভির্মদ্যগুণৈরধিকঃ| গ্রহণ্যাদকাংশ্চ রোগান্নাশযতি| কষাযকটুরসো বাতকরশ্চ|| ৯০||

Adhikarana mArdvIkamadyaguNAH (91) · Śloka 91

মার্দ্বীকং লেখনং হৃদ্যং নাত্যুষ্ণং মধুরং সরম্| অল্পপিত্তানিলং পাণ্ডুমেহার্শঃকৃমিনাশনম্||৯১||

মার্দ্বীকং দ্রাক্ষারসং লেখনত্বাদিযুক্তম্| পিত্তমনিলং চান্যমদ্যাপেক্ষ্যা স্বল্পং করোতি| পাণ্ড্বাদিনাশনঞ্চ| যোঽতিতৈক্ষ্ণ্যাচ্ছ্লেষ্মাদিকং বিলিখিতি স লেখনম্|| ৯১||

Adhikarana khArjUramadyaguNAH (92) · Śloka 92

অস্মাদল্পাদন্তরগুণং খার্জূরং বাতলং গুরু||৯২||

খার্জূরমদ্যং মার্দীকগুণৈরূনম্| বাতলং গুরু চ|| ৯২||

Adhikarana shArkaramadyaguNAH (93) · Śloka 93

শার্করঃ সুরভিঃ স্বাদুর্হৃদ্যো নাতিমদো লঘু||৯৩||

শর্করযা কৃতং মদ্যং সুরভিত্বাদিযুক্তম্|| ৯৩||

Adhikarana gauDamadyaguNAH,shIdhuguNAH (95) · Śloka 95

সৃষ্টমূত্রশকৃদ্বাতো গৌডস্তর্পণদীপনঃ||৯৪|| বাতপিত্তকরঃ শীধুঃ স্নেহশ্লেষ্মবিকারহা| মেদঃশোফোদরার্শোঘ্নস্তত্র পক্বারসো বরঃ||৯৫||

শীধুর্বাতপিত্তকরঃ| স্নেহবিকারান্ শ্লেষ্মবিকারাংশ্চ নাশযতি| শীধুরপক্বেক্ষুরসকৃতঃ পক্বেক্ষুরসকৃতশ্চ| তত্র শীধুষু মধ্যে পক্বরসো মেদঃপ্রভৃতীনাং নাশনঃ শ্রেষ্ঠশ্চ|| ৯৫||

Adhikarana madhvAsavAdInAM guNAH (96) · Śloka 96

ছেদী মধ্বাসবস্তীক্ষ্ণো মেহপীনসকাসজিত্| সুরাসবস্তীক্ষ্ণমদঃ স্বাদুস্তীক্ষ্ণোঽনিলাবহঃ| মৈরেযো মধুরো বৃষ্যঃ সরঃ সন্তর্পণো গুরুঃ| ধাতক্যভিষুতো জীর্ণো রূক্ষো রোচনদীপনঃ| দ্রাক্ষাসবো মধুসমঃ পরমং স তু দীপনঃ| মার্দ্বীকসদৃশঃ প্রোক্তো মৃদ্বীকেক্ষুরসাসবঃ||৯৬||

মধ্বাসবো মাধবকো নাম মদ্যবিশেষঃ| চ্ছেদী তীক্ষ্ণো মেহাদিঘ্নশ্চ| সুরাসবো নামোত্কটমদঃ| মধুরস্তীক্ষ্ণো বাতঘ্নশ্চ| মৈরেযো মধুরত্বাদিযুক্তঃ| মৈরেযঃ কোদ্রবৈঃ সহ জাযতে| ধাতক্যাসুতো জীর্ণঃ পুরাণঃ রূক্ষো রুচ্যঃ অগ্নিদীপনশ্চ ন ত্বেবং নবঃ| দ্রাক্ষাসমো মধুসমো মাক্ষিকসমঃ| অযং চাত্যর্থদীপনঃ| মৃদ্বীকেক্ষুরসাভ্যাং কৃতসন্ধানাসবঃ গুণৈর্মার্দ্বীকসমঃ|| ৯৬||

Adhikarana AsavasAmAnyaguNAH (97) · Śloka 97

সমাসাদাসবো হৃদ্যো বাতলঃ স্বৌষধানুগঃ||৯৭||

সমাসাত্সংক্ষেপঃ আসবগুণা উচ্যন্তে- যো কশ্চিদাসবঃ স সর্বো হৃদ্যো বাতলঃ স্বৌষধগুণশ্চ| আসবো যো দ্রবেণ শুষ্কমাসুত্য ক্রিযতে|| ৯৭||

Adhikarana madyayonayaH (98) · Śloka 98

দ্রাক্ষেক্ষুমাক্ষিকং শালিরুত্তমা ব্রীহিপঞ্চমাঃ| মদ্যাকরা যদেভ্যোঽন্যত্তন্মদ্যপ্রতিরূপকম্| গুণৈর্যথোল্বণৈর্বিদ্যান্মদ্যমাকরসঙ্করাত্||৯৮||

দ্রাক্ষাদযঃ পঞ্চোত্তমা মদ্যাকরা মদ্যযোনযঃ| এতদ্বর্জিতমন্যন্মদ্যপ্রতিরূপকম্| আকসঙ্করাচ্চ মদ্যং গুণৈর্দীপনত্বাদিভির্যথোল্বণং বিদ্যাত্| উল্বণস্য গুণাননুবর্তত ইত্যর্থঃ তেনৈতদুক্তং ভবতি-দ্বিমদ্যাকরমিশ্রীভাবজাতং মদ্যমুল্বণেনাধিকেনাকরদ্রব্যেণ সমানগুণম্| যো হ্যাকরসংযোগেঽধিকে ভবতি তদ্গুণং মদ্যমিত্যর্থঃ|| ৯৮||

Adhikarana shuktaguNAH (99) · Śloka 99

রক্তপিত্তকফোত্ক্লেদি শুক্তং বাতানুলোমন্| বিদাহী ভৃশতীক্ষ্ণোষ্ণং হৃদ্যং রুচিকরং সরম্| দীপনং শিশিরস্পর্শং পাণ্ডুদৃক্ক্রিমিনাশনম্||৯৯||

শুক্তং রক্তপিত্তকফানুত্ক্লেদযতি| বাতং চানুলোমযতি| বিদাহিত্বাদিগুণযুক্তং চ|| ৯৯||

Adhikarana guDashuktAdInAmuttarottaraM laghutvam (100) · Śloka 100

গুডেক্ষুমদ্যমার্দ্বীকশুক্তং লঘু যথোত্তরম্||১০০||

গুডাদিশুক্তানাং যথোত্তরং লঘুত্বং বিজ্ঞেযম্| গুডকৃতাচ্ছুক্তাদিক্ষুশুক্তং লঘু| ইক্ষুশুক্তাদন্যন্মদ্যশুক্তং লঘু| সর্বমদ্যশুক্তাঞ্চমার্দ্বীকশুক্তং লঘু| অন্যে তু ব্রবতে-গুডমদ্যশুক্তাদিক্ষুমদ্যশুক্তং লঘু| ইক্ষুমদ্যশুক্তান্মার্দ্বীকমদ্যশুক্তমিতি| পূর্বস্তো পক্ষো যুক্ত ইতি নির্ণীতঃ| তথাধাতকীগুডতোযাদিকারণং মদ্যশুক্তযোরিত্যুক্তম্|

Adhikarana kandamUlAdyAsutaguNAH (101) · Śloka 101

কন্দমূলফলাদ্যাংশ্চ তদ্বদ্বিদ্যাত্তদাসুতম্||১০১||

কন্দাদিকং চ তদাসুতং গুডশুক্তাদ্যাসুতং তদ্বদ্বিদ্যাত্| আসবনশুক্তসমানগুণং জানীযাদিত্যর্থঃ|| ১০১||

Adhikarana shANDAkIguNAH (102) · Śloka 102

শাণ্ডাকী চাসুতং চান্যত্কালাম্লং রোচনং লঘু||১০২||

শাণ্ডাকী চ শকান্যাসুত্য ক্রিযতে যা সা চান্যচ্চাপ্যনুক্তমাসুতমাসবনশিক্তগুণম্| কালেনাম্লং সদ্রুচ্চং লঘু চ কালাম্লং নাম|| ১০২||

Adhikarana dhAnyAmlaguNAH (103) · Śloka 103

ধান্যাম্লং ভেদি তীক্ষ্ণোষ্ণং পিত্তকৃত্স্পর্শশীতলম্| শ্রমক্লমহরং রুচ্যং দীপনং বস্তিশূলনুত্| শস্তমাস্থাপনে হৃদ্যং লঘু বাতকফাপহম্||১০৩||

ধন্যাম্লং কাঞ্জিকং মেদিত্বাদিযুক্তম্| উষ্ণবীর্যম্| স্বভাবেনৈব স্পর্শশীতলম্| ব্যাযামাদিনা তান্তত্বং শ্রমঃ| নিব্যাযামাদেব তান্তত্বং ক্লমঃ| আস্থাপনং বাতনাশায নেত্রেণ দ্রবস্য গুদপ্রণিধানম্|| ১০৩||

Adhikarana sauvIrakAmlatuShodakAmlayorguNAH (104) · Śloka 104

এভিরেব গুণৈর্যুক্তে সৌবীরকতুষোদকে| ক্রিমিহৃদ্রোগগুল্মার্শঃপাণ্ডুরোগনিবর্হণে| তে ক্রমাদ্বিতুষৈর্বিদ্যাত্সতুষৈশ্চ যবৈঃ কৃতে||১০৪||

সৌবীরকতুষোদকে ধান্যাম্লগুণযুক্তে| ক্রিম্যাদিনাশনে চ| সৌবীরকতুষোদকে ক্রমেণানুপূর্ব্যা বিতুষৈঃ সতুষৈশ্চ যবৈর্বিদ্যাত্| তেনৈতদুক্তং ভবতি| সৌবীরকং যন্নিস্তুষৈর্যবৈঃ ক্রিযতে| তুষোদকং যস্ততুষৈঃ ক্রিযতে| ইতি মদ্যবর্গঃ|| ১০৪||

Adhikarana (6) mUtravargaH gavAdimUtrasAmAnyaguNAH gomUtrasya prAdhAnya~jca (105) · Śloka 105

মূত্রং গোজাবিমহিষীগজাশ্বেষ্ট্রখরোদ্ভবম্| পিত্তলং রূক্ষতীক্ষ্ণোষ্ণং লবণানুরসং কটু| ক্রিমিশোফোদরানাহশূলপাণ্ডুকফানিলান্| গুল্মারুচিবিশ্বিত্রকুষ্ঠার্শাংসি জযেল্লঘু| বিরেকাস্থাপনালেপস্বেদাদিষু চ পূজিতম্| দীপনং পাচনং ভেদি তেষু গোমূত্রমুত্তমম্||১০৫||

দ্রবত্বাত্তীক্ষ্ণত্বাদেশ্চ প্রসঙ্গেন চ মূত্রাণ্যপ্যুচ্যন্তে| গবাদীনাং মূত্রং পিত্তলত্বদিগুণযুক্তম্| কৃম্যাদীংশ্চ জযেত্| লঘু চ| রসে কটু| লবণমনুরসং স্বল্পং যস্য তত্তথাবিধম্| বিরেকাদিষু চ শস্যতে| দীপনত্বাদিগুণং চ| মূত্রেষু মধ্যে গোমূত্রমুত্তমং প্রধানম্ (চ০সূ০-১/৮২-১০৪)|| ১০৫||

Adhikarana CAgagajavAjimUtraguNAH (106) · Śloka 106

শ্বাসকাসহরং ছাগং পূরণাত্ কর্ণশূলজিত্| দদ্যাত্ক্ষারে কিলাসে চ গজবাজিসমুদ্ভবম্||১০৬||

ছাগমূত্রং কাসশ্বাসহরম্| কর্ণপূরণেন চ কর্ণশূলজিত্|দন্তিতুরগমূত্রে কিলাসে শ্বিত্রে উপযোগার্থং দদ্যাত্| ক্ষীরে চ পচ্যমানে (কিলাসম্-নি০অ০-১৫)|| ১০৬||

Adhikarana rAsabhamUtraguNAH (107) · Śloka 107

হন্ত্যুন্মাদমপস্মারং ক্রিমীন্মেহঞ্চ রাসভম্||১০৭||

রাসভং মূত্রম্ উন্মাদাদীন্ হন্তি|| ১০৭||

Adhikarana gavAdishakRudguNAH,mRugAdInAM shakRudguNAH (108) · Śloka 108

কষাযতিক্তমেতেষাং হিধ্মাশ্বসহরং শকৃত্| মার্গমোজঃক্ষযহরং বৈষ্কিরং বাতরোগনুত্| প্রসহানামপস্মারমুন্মাদঞ্চ নিযচ্ছতি| মহামৃগসমুদ্ভূতং কুষ্ঠহৃজ্জলচারিণাম্| নেত্ররোগহরং পিত্তং প্রবৃদ্ধঞ্চ নিযচ্ছতি||১০৮||

এতেষামনন্তরোক্তানাং মূত্রপ্রাণিনাং শকৃত্পুরীষং রসেন কষাযাতিক্তম্| হিধ্মাশ্বাসহরঞ্চ| অন্যত্ সুবোধম্|| ১০৮||

Adhikarana gavAdipittarocanayorguNAH (109) · Śloka 109

পিত্তং তিক্তং বিষহরং রোচনা কফবাতজিত্| তিক্তা পামাহরা..........................||১০৯||

এতেষামেব পিত্তং জাঠরমুপযুক্তং তিক্তরসং বিষহরং চ| এতেষামেব রোচনা নাভিপ্রদেশভবা বাতশ্লেষ্মবিনাশিনী তিক্তরসা পামাহরা চ|| ১০৯||

Adhikarana mAnuShamUtraguNAH (110) · Śloka 110

........................ মূত্রং মানুষং তু বিষাপহম্||১১০||

মানুষং তু মূত্রং বিষঘ্নম্| ইতি মূত্রবর্গঃ|| ১১০||

Adhikarana upasaMhAraH (6) · Śloka 6

তোযক্ষীরেক্ষুতৈলানাং বর্গৈর্মদ্যস্য চ ক্রমাত্| ইতি দ্রব্যৈকদেশোঽযং যথাস্থূলমুদাহৃতঃ||১১১|| ইতিশ্রীবৈদ্যপতিসিংহগুপ্তস্য সূনোর্বাগ্ভটস্য কৃতৌ অষ্টাঙ্গসংগ্রহসংহিতাযাং সূত্রস্থানে দ্রবদ্রব্যবিজ্ঞানীযো নাম ষষ্ঠোঽধ্যাযঃ||৬||

ইত্যনন্তরোক্তেন প্রকারেণ তোযাদিবর্গৈঃ প্রধানানতিক্রমেণ দ্রাবাণামেকদেশ উদাহৃতঃ|| ১১১|| ইতিশ্রীমন্মহামহোপাধ্যাযেন্দুবিরচিতাযাম্ অষ্টাঙ্গসংগ্রহব্যাখ্যাযাং শশিলেখাযাং সূত্রস্থানে ষষ্ঠোঽধ্যাযঃ||৬||