17. dravyādivijñānīyaḥ

Adhikarana atha dravyAdivij~jAnIyo nAma saptadasho~adhyAyaH pratij~jA (1) · Śloka 1

অথাতো দ্রব্যাদিবিজ্ঞানীযমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

পূর্বেষু অধ্যাযেষু রসাদিবিশেষৈর্দ্রব্যকার্যস্বরূপমুক্তং, তে চ দ্রব্যরসাদযো ন জ্ঞাতাঃ, অতস্তদ্বিজ্ঞানার্থমধ্যাযারম্ভঃ| তত্র রসাদীনামাশ্রযত্বেন প্রাধান্যাদ্ দ্রব্যমেবাদাবুচ্যতে| রসস্য তু বহুবক্তব্যত্বাদস্মিন্নধ্যাযে কিঞ্চিত্ সূত্রণম্| দ্বিতীযে তু নির্ণযঃ| বীর্যাদীনাং ত্বত্রৈব|| ১||

Adhikarana dravyasya pa~jcamahAbhUtAtmakatvam (2) · Śloka 2

ইহ হি দ্রব্যং পঞ্চমহাভূতাত্মকম্| তস্যাধিষ্ঠানং পৃথিবী, যোনিরুদকং, খানিলানলসমবাযান্নির্বৃত্তিবিশেষৌ| উত্কর্ষেণ তু ব্যপদেশঃ| তস্মাদ্ভূতসমবাযাম্ভবান্নৈকরসং দ্রব্যম্| ততশ্চ নৈকদোষা ব্যাধযঃ||২||

তচ্চ দ্রব্যং পঞ্চভূতাত্মকং পঞ্চভির্মহাভূতৈরারব্ধমিত্যর্থঃ| পঞ্চভূতানি পৃথিব্যপ্তেজোবায্বাকাশানি লোকে প্রসিদ্ধানি| আকাশস্য তু শূন্যাত্মনোঽপি গুণাশ্রযত্বাত্ পৃথিব্যাদিবদেব ভূতত্বং দ্রব্যারম্ভকত্বং চ বিজ্ঞেযম্| তথা চ নভোভাগাধিকে দ্রব্যেঽবযবনিবিডভাবাদ্যভাবেন স্বরূপমজহদেব নভঃকারণতাং যাতি| এষাং চ ভূতানাং পরস্পরবৈলক্ষণ্যং ভাবহেতুত্বং পঞ্চসঙ্খ্যাবত্ত্বং চ ভাবস্বরূপান্বযব্যতিরেকসমধিগম্যম্| ননু পৃথিব্যাদযঃ কেন প্রকারেণ কারণতাং তত্র গচ্ছন্তীত্যাহ-তস্য দ্রব্যস্যাধিষ্ঠানমাশ্রযঃ পৃথিবী| সা হি গুডূচ্যাদেরাহারাদ্যুপযোগিনো দ্রব্যস্যোপলম্ভেন প্রধানং কারণম্| তস্য চ গুডূচ্যাদেঃ সর্বস্যৈব দ্রব্যস্যাম্বু যোনিঃ| যু মিশ্রণে ধাতুঃ তস্মিন্যোনিরিতি রূপং ভবতি| কারণং স্বভাবসম্বন্ধহেতুরিত্যর্থঃ| নভোবায্বনলানাং সমবাযাত্ পৃথিব্যুদকাভ্যামবিনাভাববৃত্তিত্বাত্তস্য দ্রব্যস্য নির্বৃত্তিবিশেষৌ ভবতঃ| নির্বৃত্তির্নিষ্পত্তিরাত্মলাভঃ| বিশেষো দ্রব্যান্তরেণাসাদৃশ্যম্| তথা চ সংস্থানবিশেষলাভাযাবযবব্যূহনে নভঃকারণতাং যাতি| কাঠিন্যাদিকে বাযুঃ| তেজঃপ্রসাদলভ্যাশ্চাঙ্কুরাদ্যবস্থাবিশেষাঃ| তেনৈতদুক্তং ভবতি- পঞ্চানামেব ভূতানাং সংযোগাত্ সর্বদ্রব্যাণামাহারাদ্যুপযোগিনাং সম্ভবঃ| তেষামেব ভূতানামেকাদিতারতম্যাদিসংযোগবিশেষেণ দ্রব্যাণাং পরস্পরব্যাবৃত্তিঃ| যশ্চ পার্থিবং দ্রব্যমাপ্যমিত্যাদিব্যপদেশঃ স ভূযসা প্রভূতেন মহাভূতেন জন্যতে| তেন পঞ্চসু মধ্যে যদধিকং তদীযং ব্যপদেশং প্রাপ্নোতীত্যর্থঃ| এবং সর্বস্য দ্রব্যস্য পঞ্চভূতাত্মকত্বাত্ সর্বরসত্বম্| যতো যেযং ষট্সঙ্খ্যা পরস্পরবিলক্ষণা রসানাং নিষ্পত্তিঃ সা মহাভূতানাং বিশেষকৃতা| তথা চ ভূজলযোরিত্যাদিনা বক্ষ্যতি| যশ্চ সর্বস্য দ্রব্যস্যাপি ষড্রসত্বেঽপি মাধুর্যাদিব্যপদেশঃ স ভূযসাং ভূতেন ক্রিযতে| এবং যতঃ সর্বস্য দ্রব্যস্য ন সর্বরসত্বং ততস্তেন দ্রব্যেণ জনিতত্বাত্সর্বরোগাণামপিত্রিদোষজত্বম্| যস্মাদ্রোগাণাং দোষাঃ কারণং তেষাং চ রসাস্তে চ রসাঃ সর্ব এবৈকস্মিন্ দ্রব্যে স্থিতাঃ দ্রব্যস্য রসজনকভূতনিষ্পাদিতত্বাত্| অত এব সংসর্গসন্নিপাতভেদানামানন্ত্যম্| যত্তু কতিপযানাং ভেদানাং নিদানাদিষু কীর্তনং তদন্যাপেক্ষযা প্রাধান্যাচ্চিকিত্সাসুখপ্রদর্শনায| যা তু রোগাণামেকদোষোক্তিঃ সা সতিশযপ্রাধান্যহেতুকা| তথা চৈকদোষাভিমতেষ্বপি রোগেষু বিবক্ষিতদোষপ্রতীকারোপযোগ্যসধারণং তদ্দোষবিপরীতগুণমেকং দ্রব্যং দুষ্প্রাপমিতি স্থিতম্| নৈকদোষা রোগা ইতি| অথ চৈবং ব্যাখ্যাযতে দ্রব্যাণাং পঞ্চভূতাত্মকত্বে সতি বিশেষব্যপদেশো যতো ভূযসা প্রভূতেন ভবতি| তত এব হেতোর্নৈকরসং দ্রব্যং ন সদৃশরসং ভিন্নরসমিত্যর্থঃ| ভূতসঙ্ঘাতসম্ভবাদ্ধেতোর্যদেকরসত্বং সর্বস্য প্রাপ্তং তত্ প্রতিষিদ্ধ্যতে| অন্যথা যদি বিশেষব্যপদেশবদ্ভিন্নরসত্বমপি ন স্যাত্ততঃ সর্বস্য দ্রব্যস্য পঞ্চভূতাত্মকত্বাত্ সাদৃশ্যাদেকরসত্বমেব স্যাত্| ততশ্চ সর্বাণি দ্রব্যাণি মধুরাদ্যন্যতমরসানি স্যুঃ| তস্মান্নৈকরসং দ্রব্যম্| অত এব হেতো রোগা অপি দোষস্য ব্যবধানেন দ্রব্যহেতুত্বাদ্ দ্রব্যবিশেষবদ্ভিন্নরসবচ্চ তেঽপি নৈকদোষাঃ| অন্যথা জ্বরাণামন্যেষাং দ্রব্যহেতুত্বসামান্যাত্সদৃশদোষাপরপর্যাযমেকদোষত্বং স্যাত্|| ২||

Adhikarana rasAnurasalakShaNam (3) · Śloka 3

তত্র ব্যক্তো রসঃ| অনুরসস্তু রসেনাভিভূতত্বাদব্যক্তো ব্যক্তো বা কিঞ্চিদন্তে||৩||

তত্র চ দ্রব্য রসনেন্দ্রিযগ্রাহ্যো ব্যক্তঃ স্ফুটো রসশব্দেনোক্তঃ| যশ্চ রসো যস্মিন্ দ্রব্যেঽনুরসত্বেনোক্তঃ স প্রধানরসেনাভিভূতত্বাদব্যক্ত এব তিষ্ঠতি| প্রধানরসবিজাতীযকার্যকতৃত্বাত্তস্য সদ্ভাবোঽনুমীযতে| আগমাচ্চ| অথবা যো রসঃ প্রধানরসস্যান্তে কিঞ্চিদ্ব্যক্তোঽপ্যুপলভ্যতে সোঽনুরসঃ|| ৩||

Adhikarana chedanopashamanahitAhitAnAM na rasatvam (4) · Śloka 4

রসস্য তু ছেদনোপশমনে দ্বে কর্মণী| হিতাহিতৌ প্রভাবৌ||৪||

তত্র য আচার্যাঃ ছেদনোপশমনহিতাহিতানাং চতুর্ণাং রসত্বমিচ্ছন্তি তান্ প্রত্যাত্রেযমতানুসারেণেদমুচ্যতে| রসস্য ছেদনোপশমনে কর্মণী তস্যৈব হিতাহিতৌ প্রভাবৌ| প্রভাবো রসাদিবিলক্ষণা শক্তিঃ ন তু তেষাং রসত্বমিতি| তেন ছেদনোপশমনযোর্ভাবে ল্যুডিতি ছেদনং দোষাদীনাং ভাগশঃ করণম্| উপশমনং তু দোষাণামনুত্ক্লেশেন সমীকরণম্| হিতং যত্ প্রভাবাদেব শরীরস্য পথ্যম্| বিপরীতমহিতম্|| ৪||

Adhikarana raseShu gurutvAdiguNanirdeshaH upacArAt (5) · Śloka 5

তদাশ্রযেষু চ দ্রব্যসংজ্ঞকেষু পৃথিব্যাদিষু গুণাঃ প্রকৃতিবিকৃতিবিচারদেশকালবশাদ্গুর্বাদযো রসেষু সাহচর্যাদুপচর্যন্তে||৫||

তেষাং চ রসাদীনামাশ্রযভূতেষু পৃথিব্যাদিষু পঞ্চসু দ্রব্যসংজ্ঞকেষু কার্যদ্রব্যাবস্থাযাং যে গুণা গুর্বাদযো গুরুস্নেহোষ্ণসূক্ষ্মলঘ্বাদযঃ তে দ্রব্যগুণাঃ সন্তো রসেষু গুণত্বেনোপচারাদুচ্যন্তে| উপচারস্য বহুহেতুদর্শনায সাহচর্যং বিশেষণ্ম্| ননু কথং তে দ্রব্যস্যেত্যাশঙ্ক্যাহ- প্রকৃত্যেত্যাদি| ক্বচিত্ প্রকৃত্যবস্থাযাং ন সন্তোঽপি নানাবিধক্রিযাসাধ্যযা বিকৃত্যা জন্যন্তে| কেচিত্তু বিচারাদিভিঃ| বিচারো বিশিষ্টমাত্রাদিকঃ সংযোগঃ| দেশো দ্বিবিধ উক্তঃ| তদ্বশাদ্ গুর্বাদিগুণযোগো দ্রব্যস্য| দেহদেশবশাত্ সক্থিমাংসাদ্গুরুস্কন্ধ ইত্যাদি| ভূমিদেশবশাদন্যথা জাঙ্গলে অন্যথানূপ ইতি| এবং কালেঽপি| তেন যত্রাঽপি বিকৃত্যাদিবশাদ্রসানাং সম্ভবঃ তত্রাপি যে রসগুণাস্তে দ্রব্যস্যৈব বিজ্ঞেযাঃ| এষা চ প্রকৃত্যাদিবশাদ্ গুর্বাদিকল্পনা রসাশ্রযস্য দ্রব্যস্যৈব গুণাশ্রযাত্ সম্ভবতি; ন রসস্য| তস্য তু সাহচর্যাদুপচর্যতে|| ৫||

Adhikarana pArthivAdidravyANAM lakShaNaM tatkarmANi ca (6) · Śloka 6

তত্র দ্রব্যং গুরুকঠিনবিশদমন্দ্রসান্দ্রস্থূলস্থিরগন্ধগুণবহুলং পার্থিবং উপচযগৌরবসঙ্ঘাতস্থৈর্যকরম্| দ্রবস্নিগ্ধশীতগুরুমন্দ্রসান্দ্রসরমৃদুপিচ্ছিলরসগুণবহুলমৌদকমুপক্লেদস্নেহবন্ধবিষ্যন্দমার্দবপ্রহ্লাদকরম্| তীক্ষ্ণোষ্ণরূক্ষসূক্ষ্মলঘুবিশদরূপগুণবহুলমাগ্নেযং দাহপাকপ্রকাশপ্রভাবর্ণকরম্| রূক্ষসূক্ষ্মলঘুবিশদবিকাষিব্যবাযিশীতখরস্পর্শগুণবহুলং বাযব্যং রৌক্ষ্যলাঘববৈশদ্যগ্লানিবিচারকরম্| সূক্ষ্মলঘুবিশদশ্লক্ষ্ণব্যবাযিবিবিক্তশব্দগুণবহুলমাকাশাত্মকং সৌষির্যলাঘবকরম্||৬||

তত্র পার্থিবং দ্রব্যং গুরুত্বাদিগুণযুক্তং গন্ধগুণেন চাধিকমুপযুক্তং চ দেহ উপচযাদিকরম্| উপচযো মহত্ত্বম্| সঙ্ঘাতঃ কাঠিন্যম্| স্থৈর্যং দার্ঢ্যম্| ঔদকং দ্রব্যং দ্রবত্বাদিগুণযুক্তং রসগুণাধিকং চ| দেহে চোপক্লেদাদিকরম্| বিষ্যন্দঃ স্রোতসাং স্রাবঃ| প্রহ্লাদো হৃত্পুষ্টিঃ| আগ্নেযং তীক্ষ্ণত্বাদিগুণযুক্তং রূপগুণবহুলং চ দেহে চ দাহাদিকরম\\\\\\\\ বাযব্যং রূক্ষত্বাদিগুণযুক্তং স্পর্শগুণবহুলং চ| দেহে চ রৌক্ষ্যাদিকং করোতি| বিচারো ধাতুবহনম্| নাভসং সূক্ষ্মত্বাদিগুণযুক্তং শব্দগুণাধিকং চ| দেহে চ সৌষির্যলাঘবকরম্|| ৬||

Adhikarana sarvasyaiva dravyasyauShadhatvam (7) · Śloka 7

ইত্থঞ্চ নানৌষধভূতং জগতি কিঞ্চিদ্ দ্রব্যমস্তি বিবিধার্থপ্রযোগবশাত্||৭||

ইত্থমেবং স্থিতে জগতি তদ্ দ্রব্যং নাস্তি যদৌষধত্বেন নোপযুজ্যতে| কুতঃ? নানাবিধার্থপ্রযোগবশাত্| অর্থঃ প্রযোজনং, প্রযোগ উপযোগঃ| তেনৈতদুক্তং ভবতি- বিচিত্রিতো ভাবঃ স্বভাবস্তেন যদ্যত্রাপথ্যং তত্তত্রৈব প্রযোজনান্তরেণ পথ্যম্| তথা যত্ পানেঽপথ্যং তদভ্যঙ্গে পথ্যম্| এবং মাত্রাদিবিশেষো বিকল্পনীযঃ| তেন ভস্মপাংস্বাদীনামপি প্রযোজনবশেনৌষধত্বম্|| ৭||

Adhikarana dravyeShu mahAbhUtabAhulyAdvamanavirecanAdivisheShAH (8) · Śloka 8

তত্রাগ্নিমারুতাত্মকং প্রাযেণোর্ধ্বভাগিকম্| তযোর্হি লাঘবাদূর্ধ্বগতিত্বাচ্চাগ্নেঃ প্লবনত্বাচ্চ মারুতস্য| ভূম্যৌদকাত্মকং তু প্রাযেণাধোভাগিকম্| তযোর্হি গৌরবান্নিম্নগত্বাচ্চ তোযস্য| ব্যামিশ্রাত্মকমুভযতোভাগম্| শমনং তু দোষবিপরীতগুণমুক্তং প্রাক্| তত্সঙ্করে চ যতো বাহুল্যেন কার্যকর্তৃত্বং ভবতি যদেবাধিকং তদেব তত্কার্যকরমিতি ব্যপদেশঃ| তথাঽনিলাত্মকং গ্রাহি| অনলাত্মকং দীপনপাচনম্| উভযাত্মকং লেখনম্| ভূম্যুদকাত্মকং বৃংহণম্||৮||

তস্য চ দ্রবস্য যে শোধনশমনগ্রাহিদীপনত্বাদযো বিশেষাস্তেঽপ্যেকাদিমহাভূতোত্কর্ষাপকর্ষকৃতা এবেতি প্রদর্শনার্থমাহ- তত্রেত্যাদি| ঊর্ধ্বভাগিকং যস্যাতিশযো বমনং তদগ্নিমারুতাত্মকম্; অগ্নিমারুতযোর্লঘুত্বাদগ্নেরূর্ধ্বগমনসম্ভবাদ্বাযোশ্চ প্লবনত্বাত্| পৃথিব্যুদকাত্মকমধোভাগিকং যস্যাতিশযো বিরেচনম্| পৃথিব্যুদকযোর্গুরুত্বাদধোগমনং তোযস্য নিম্নগত্বাদপি| ব্যামিশ্রভূতচতুষ্টযাধিক্যেনোভযাত্মকং বমনবিরেচনম্| শমনং যদুক্তভূতাধিক্যরহিতং নাধো গচ্ছতি নাপ্যূর্ধ্বমেতি কেবলং দোষবিপরীতগুণমেব তচ্চ প্রকৃতিবিঘাতত্বেন পূর্বমুক্তম্| তেনৈতদুক্তম্- শমনত্বং দোষগুণবৈপরীত্যাপেক্ষযা সর্বস্মিন্ দ্রব্যে সম্ভ্বতি| ন ত্বেবং শোধনত্বম্| তস্য বিশিষ্টভূতাধিক্যহেতুত্বাত্| যত্র ত্বেকস্মিন্নেব দ্রব্যে ঊর্ধ্বগত্বাধোগত্বশমনত্বানাং সম্ভবঃ তত্র যতো বাহুল্যেন কার্যকর্তৃত্বং ভবতি ততো যদেবাধিকং তদেব কার্যকরমিতি ব্যপদেশ ইত্যর্থঃ| অন্যত্ সুবোধম্|| ৮||

Adhikarana rasAdiShu vIryatAratamyam (9) · Śloka 9

তত্র কট্বম্ললবণা বীর্যেণ যথোত্তরমুষ্ণাঃ| তিক্তকষাযমধুরাঃ শীতাঃ||৯||

তত্র রসানাং গুণনিযমঃ কট্বম্ললবণা বীর্যেণ যথোত্তরমুষ্ণাঃ| শীতাঃ শেষাঃ||৯||

Adhikarana tiktAdiShu rUkShatvAditAratamyam (10) · Śloka 10

তিক্তকটুকষাযা রূক্ষা বদ্ধবিণ্মূত্রমারুতাঃ| লবণাম্লমধুরাঃ স্নিগ্ধা সৃষ্টবিণ্মূত্রমারুতাঃ| লবণকষাযমধুরা গুরবঃ| তদ্বদম্লকটুকতিক্তা লঘবঃ||১০||

তিক্তকটুকষাযা রূক্ষা বদ্ধবিণ্মূত্রামারুতাশ্চ| শেষা লঘবঃ তথোত্তরমিতি সর্বত্রাভিসম্বধ্যতে| পূর্বাদুত্তরো যথোক্তগুণাধিক ইত্যর্থঃ||১০||

Adhikarana anyamatena lavaNaguNAH (11) · Śloka 11

অন্যে পুনর্গুরুলঘুস্নিগ্ধরূক্ষসাধারণং লবণমিচ্ছন্তি||১১||

অন্যে পুনরাচার্যা গুরুত্বলঘুত্বস্নিগ্ধত্বরূক্ষত্বসাধারণং লবণমিচ্ছন্তি| ইতি দ্রব্যরসাবুক্তৌ||১১||

Adhikarana keShA~jcinmatena vIryasyAShTavidhatvam (1) · Śloka 1

বীর্যন্তু কেচিদ্ গুরুলঘুস্নিগ্ধরূক্ষতীক্ষ্ণমন্দশীতোষ্ণভেদেনাষ্টবিধমাহুঃ||১||

Adhikarana apareShAM matena vIryasya bahuvidhatvam (12) · Śloka 12

অপরে পুনঃ পঠন্তি- বীর্যম্ দ্রব্যস্য তজ্জ্ঞেযং যদ্যোগাত্ ক্রিযতে ক্রিযা| নাবীর্যং কুরুতে কিঞ্চিত্ সর্বা বীর্যকৃতা হি সা||১২||

বীর্যমুচ্যতে- কেচিদাচার্যা অষ্টবিধং গুর্বাদিভেদেন বীর্যমাহুঃ| অন্যে বহুবিধম্| অন্যে দ্বিবিধমিতি| যে তু বহুবীর্যবাদিনস্তে পঠন্তি| বীর্যং দ্রব্যস্যেত্যাদি| দ্রব্যস্য তদ্বীর্যং জ্ঞেযং যস্য যোগাত্ দ্রব্যং কার্যং কর্তুং ক্ষমম্| ন চ দ্রব্যমবীর্যং বীর্যেণ বিনা কিঞ্চিত্ কর্ম কুরুতে| অতঃ সর্বাঃ ক্রিযাঃ বীর্যকৃতাঃ| এবং বীর্যং শক্তিঃ কারণমিতি বহুবীর্যবাদিনঃ||১২||

Adhikarana bahuvidhivIryavAdinAmapi aShTavidhavIryatve eva tAtparyaM prabhAvasvarUpasUcanA ca (13) · Śloka 13

তৈরপি চৈবমতিপ্রকৃষ্টশক্তিযুক্তানামশেষৌষধগুণসারভূতানা- মষ্টানামেব গুর্বাদীনাং বীর্যসংজ্ঞাবিশিষ্টাম্নাযবিহিতাপি লৌকিকীতি সমুদ্ভাব্যতে| তথা হি তযা রসবিপাকগুণাঽন্তরবিজযিনো ভূযাংসশ্চ বরিষ্ঠাশ্চ গুণাঃ সঙ্গৃহীতাঃ| বিশেষবৃত্ত্যা চ তত্র তত্র দ্রব্যস্বরূপকথনে ব্যবহারঃ প্রবৃত্তিতো ভবতি| অত এব সর্বাতিশাযী দ্রব্যস্বভাবঃ প্রভাব ইত্যাম্নাতঃ| সত্যপি চ ক্রিযানির্বর্তনসামান্যে তদ্বিপরীতা রসাদযো বীর্যাখ্যযা প্রভাবসংজ্ঞযা বা ন পরামৃশ্যন্তে||১৩||

তৈশ্চানন্তরোক্তৈর্নানাবিধশক্তিত্বাত্ দ্রব্যস্য বহুবীর্যবাদিভির্গুর্বাদীনামষ্টানাং বীর্যসংজ্ঞা বিশিষ্টাগমবিহিতাপি লৌকিকীতি কথ্যতে| যতঃ শক্তির্বীর্যম্| সা চ নানাবিধা| তত্ গুর্বাদীন্ কো নিযমিতুং শক্নোতি| কেবলং প্রকৃষ্টশক্তিত্বাদশেষাণামৌষধগুণানাং মধ্যে সারভূতত্বাল্লোক এব কথ্যতেঽষ্টাবেব বীর্যাণীতি| অতো বহুবীর্যবাদিভির্গুর্বাদিগুণনিযম আগমবিহিতোঽপি লৌকিক ইতি কথ্যতে| এতদেবাহ-তথেত্যাদি| তথা বীর্যসংজ্ঞযা রসবিপাকগুণান্তরবিজযিন এতেঽষ্টাবেব গুণাঃ সঙ্গৃহীতা ভূযাংসশ্চ বরিষ্ঠাশ্চ| তেনৈতদুক্তং ভবতি| এষামষ্টানামেব বীর্যসংজ্ঞা ভূযিষ্ঠত্বাত্ বরিষ্ঠত্বাত্ রসাদিবিজযিত্বাচ্চেতি| বহুবীর্যবাদিভিরপি বলাদঙ্গীকৃতমেব| দ্রব্যে হি ন তথা অন্যে গুণাঃ প্রভূতত্বেন ভবন্তি যথা গুর্বাদয ইতি প্রভূতত্বম্| অন্যে চ গুণাঃ ন তথা দেহোপযোগিত্বে বরাঃ যথা গুর্বাদযঃ ইতি বরিষ্ঠত্বম্| রসকার্যং বিপাককার্যং| গুণান্তরঞ্চ দ্রব্যস্থিতম্| বীর্যত্বেনাভিভবন্তীতি রসাদিবিজযিত্বম্| তত্র রসবিজযিত্বং যথা কিঞ্চিদ্ দ্রব্যং মধুররসং তীক্ষ্ণগুণং চ তত্র তীক্ষ্ণগুণেনোপলেপাদি মধুররসকার্যমভিভূযতে| এবং বিপাককার্যং গুণান্তরে চ| এবং তেষাং প্রাধান্যেন তত্র তত্র হরীতক্যাদিদ্রব্যস্বরূপকথনে গুর্বাদীনাং বিশেষবর্ত্তিত্বেন গুরুলঘ্বিত্যাদিব্যবহারঃ প্রবর্ত্তিতো ভবতি| এবমুত্কৃষ্টা শক্তির্বীর্যম্| অনযৈব যুক্ত্যা যো দ্রব্যস্য সর্বগুণাতিশাযী স্বভাবঃ স প্রভাবশব্দেনোক্তঃ| তেনৈতদুক্তং ভবতি- যথৈব গুর্বাদীনাং কার্যকর্তৃত্বে প্রাধান্যাপেক্ষযা বীর্যত্বং তথৈব গুর্বাদীনাং প্রাধান্যাপেক্ষযা কস্যাশ্চিচ্ছক্তেঃ সর্বাতিশাযিত্বাত্ সংজ্ঞা প্রভাব ইতি| ন হি তদ্ব্যতিরিক্তেষু রসাদিষু কল্প্যমানেষু দৃশ্যতে| অতঃ স্বভাববিশেষ এব সঃ| রসাদযো রসবীর্যবিপাকগুণান্তরাণি যদ্যপি স্বাং স্বাং ক্রিযাং কুর্বন্তি তত্রাপি গুর্বাদ্যুক্তপ্রকারবৈপরীত্যাত্ বীর্যসংজ্ঞযা ন পরামৃশ্যন্তে| এবং বহুবীর্যবাদিনামপ্যষ্টবিধবীর্যবাদিত্বং যুক্ত্যা সাধিতং তৈরপীত্যাদিনা||১৩||

Adhikarana anyeShAM matena vIryasya dvaividhyam (14) · Śloka 14

অন্যে তু গুর্বাদীনামগ্নীষোমাত্মকত্বাদাদানবিসর্গবিভাগেন কালস্য চোষ্ণশীতাত্মকত্বাদ্ দ্বিবিধমেবামনন্তি| এবং চাহুঃ- নানাত্মকমপি দ্রব্যমগ্নীষোমৌ মহাবলৌ| ব্যক্তাব্যক্তং জগদিব নাতিক্রামতি জাতুচিত্||১৪||

অন্যে বীর্যদ্বযবাদিনঃ অগ্নীষোমাত্মকত্বাদ্ গুণানাং কালস্য চোষ্ণশীতদ্বৈবিধ্যাদ্ দ্বিবিধমেব বীর্যমুষ্ণং শীতং চেতি বদন্তি| তথা হি গুর্বাদীনাং কেচন সৌম্যাঃ কেচনাগ্নেযাঃ| মহাভূতপরাযত্তত্বাদ্ গুণানাম্| তে গুর্বাদযো দ্বিবিধে কালে সম্ভবন্ত্যাদানে বিসর্গে চ| তত্রাদানকালভবানামাগ্নেযত্বং গুর্বাদীনাং বিসর্গভবানাং তু সৌম্যত্বমিতি স্থিতমেব| এতস্যৈবাগ্নীষোমদ্বযাত্মকত্বস্য তৈর্দৃষ্টান্তোপপত্তিরুচ্যতে- নানাত্মকমিত্যাদিনা| নানাত্মকং পরস্পরেণ ব্যাবৃত্তমপি দ্রব্যজাতং মহাবলাবুত্কৃষ্টশক্তী অগ্নীষোমৌ নাতিক্রামতি নাতিবর্ততে| অবশ্যং কিঞ্চিদাগ্নেযং ভবতি কিঞ্চিত্সৌম্যমিতি| দৃষ্টান্তো যথা- নানাত্মকমপি জগদ্ ব্যক্তমব্যক্তং চ নাতিক্রামতি ব্যক্তম্ তরুপর্বতজলাদি অব্যক্তং কালভূতগ্রামাদি| অস্মিন্ পক্ষে পূর্বযোরপি পক্ষযোরন্তর্ভাবঃ| বিশেষস্য সামান্যেঽন্তর্ভাবাত্||১৪||

Adhikarana uShNashItavIryayoH guNAH (15) · Śloka 15

তত্রোষ্ণং দহনপচনস্বেদনবিলযনানিলকফশমনানি করোতি| শীতং হ্লাদনস্তম্ভনজীবনরক্তপিত্তপ্রসাদনাদীনি||১৫||

তত্রোষ্ণবীর্যস্য দহনাদীনি কর্মাণি শীতস্য হ্লাদনাদীনি||১৫||

Adhikarana vipAkasya traividhyam (16) · Śloka 16

ইতি বীর্যমুক্তং বিপাকস্তূচ্যতে| বিপাকস্তু প্রাযঃ স্বাদুঃ স্বাদুলবণযো- রম্লোঽম্লস্য কটুরিতরেষাম্| রসৈরসৌ তুল্যফলঃ| দ্রব্যগুণবিশেষেণ চাস্যাল্পমধ্যভূযস্ত্বমুপলক্ষযেত্||১৬||

স্বাদ্বম্লকটুকাস্ত্রযো বিপাকাঃ| তত্র মধুরদ্রব্যস্য সর্বস্য মধুরবিপাকিত্বম্| তদ্বল্লবণস্য| অম্লো বিপাকোঽম্লস্যৈব| শেষাণাং কটুঃ| বিপাকস্তু জঠরাগ্নিসংযোগে পরিণামবশাত্ দ্রব্যস্য রসস্য স্বরূপান্তরপ্রাদুর্ভাবঃ| অসৌ বিপাকো রসৈর্মধুরাম্লকটুকৈস্তুল্যফলঃ সদৃশফলঃ| তেন মধুরস্য বিপাকস্য তে গুণা যে মধুরস্য রসস্য| এবমম্লকটুকযোরপি| অস্য চ বিপাকস্য স্বল্পত্বং মধ্যত্বং ভূযস্ত্বং চ দ্রব্যগুণবিশেষেণোপলক্ষযেত্| কিমুক্তং ভবতি? উচ্যতে- যত্র রসেন সদৃশো বিপাকো মধুরাম্লকটুকানাং দ্রব্যাণাং তত্র প্রধানরসসমানগুণানামুত্কৃষ্টত্বাদ্বিপাকস্যোত্কৃষ্টত্বং কল্পনীযম্| এবং মধ্যত্বান্মধ্যত্বম্| স্বল্পত্বাচ্চ স্বল্পত্বম্| যত্র তু রসাদ্বিপরীতো বিপাকো লবণতিক্তকষাযাণাং তত্র রসবিপরীতানাং গুণানামুত্কৃষ্টত্বাদুত্কৃষ্টত্বং কল্পযেদ্বিপাকসদৃশানামিত্যর্থঃ| এবং মধ্যত্বমল্পত্বং চ| বিপাকমেবমূচুশ্চরকবিদঃ||১৬||

Adhikarana parAsharamatena vipAkatraividhyaM saMshayotthApana~jca (17) · Śloka 17

পরাশরস্তু পঠতি- পাকাস্ত্রযো রসানামম্লোঽম্লং পচ্যতে কটুঃ কটুকম্| চত্বারোঽন্যে মধুরং সঙ্কীর্ণরসাস্তু সঙ্কীর্ণম্| কটুতিক্তকষাযাণাং কটুকো যেষাং বিপাক ইতি পক্ষঃ| তেষাং পিত্তবিঘাতে তিক্তকষাযৌ কথং ভবতঃ||১৭||

পরাশরনামা মুনির্বিপাকমন্যথা পঠিতবান্| পাকাস্ত্রযো রসানামিত্যার্যাদ্বযং পরাশরপঠিতমনুপঠতি| সর্বেষাং রসানাং ত্রযো বিপাকাঃ মধুরোঽম্লঃ কটুশ্চ| তত্রাম্লরসোঽম্লবিপাকঃ কটুরসঃ কটুবিপাকঃ| চত্বারোঽন্যে শেষা মধুরলবণতিক্তকষাযা মধুরবিপাকাঃ| সঙ্কীর্ণরসানাং মিশ্ররসানাং সঙ্কীর্ণবিপাকিত্বম্| স তু পরাশরস্তিক্তকষাযযোর্মধুরবিপাকিত্বমিচ্ছন্তি| অন্যে ত্বাচার্যাস্তাবেব কটুকবিপাকাবিচ্ছন্তি| তন্মতং দূষযিতুকামঃ পরাশর আহ- য আচার্যাঃ কটুতিক্তকষাযাণাং কটুবিপাকিত্বমিচ্ছন্তি তেষাং তিক্তকষাযযোঃ পিত্তহরত্বং ন সম্ভবতি| মন্মতে তু তযোর্মধুরবিপাকিত্বাত্ পিত্তহরত্বং সম্ভবতীতি পরাশরঃ| তচ্চ ন চতুরস্রমিতি মন্যামহে| যতঃ পিত্তহর্ত্তৃত্বং রসস্যৈব স্বরূপম্| কটুস্তু বিপাকো যত্র স্বল্পোঽপি ভবতি ন তত্র কটুঃ স্বকার্যং করোতি যদ্যদ্ দ্রব্যে রসাদীনামিতি ন্যাযাত্| তথা চ তিক্তরসস্য কটুবিপাকস্যাপি নিম্বস্য পিত্তরত্বমেব| যত্র চ বিপাকস্য কটোরাধিক্যং তত্র তস্য পিত্তকর্তৃত্বমেব| যথা তিক্তরসেঽপি দ্রব্যে কটোর্বিপাকস্যাধিক্যাদ্ বৃহতীদ্বযস্য পিত্তকরত্বমেবং কষাযেঽপি কল্পীনযম্| এবং রসস্যৈব স্বভাবঃ পিত্তহরত্বম্| যতশ্চ তিক্তরসে কষাযরসে চ দ্রব্যে নৈসর্গিকেণ বলেন রসবীর্যাভ্যাং বিপাকঃ প্রাযেণাভিভূযতে| অত উচ্যতে- তিক্তকষাযৌ পিত্তহরাবিত্যস্মাভিরতঃ পরাশরমতমচতুরস্রমিব||১৭||

Adhikarana granthakartuH siddhAntaH (18) · Śloka 18

তত্র যন্মধুরং রসবিপাকযোঃ শীতবীর্যঞ্চ দ্রব্যং যচ্চাম্লং তযোরূষ্ণবীর্যঞ্চ যদ্বা কটুকং তেষাং যথাস্বং রসেভ্যঃ প্রাযো গুণান্ দোষকোপশমনত্বং চ বিদ্যাত্| তদ্যথা ক্ষীরমদিরামরিচাদীনাম্||১৮||

অনন্তরং বাগ্ভটো যন্মধুরমিত্যাদিনা প্রকৃতং প্রস্তৈতি| যদ্দ্রব্যং মধুররসং মধুরবিপাকং শীতবীর্যং চ তথা তযোঃ রসবিপাকযোরস্লং সদ্যদুষ্ণবীর্যং যদ্বা কটুকং তযো রসবিপাকযোরুষ্ণবীর্যং চ তেষাং ত্রযাণামপি যথাত্মীযরসগুণান্ সাতিশযান্ বিদ্যাত্| রসানুরূপেণৈব চ তেষাং দোষকোপশমৌ| তেনৈতদুক্তং ভবতি- যত্র রসবীর্যবিপাকানামেকজাত্যন্বযত্বং তত্রৈকগুণত্বমপি| তথা চ ক্ষীরে মধুররসবিপাকে শীতবীর্যে চ মধুররসবত্ শ্লেষ্মকোপনত্বং বাতপিত্তশমনত্বং চ| এবং মদিরাযা অম্লরসবিপাকাযা উষ্ণবীর্যাযাশ্চাম্লরসবদ্বাতশমনত্বং পিত্তস্লেষ্মপ্রকোপনত্বাদিকং চ| কটুকরসবিপাকস্যোষ্ণবীর্যস্য মরিচস্য কটুকরসবত্শ্লেষ্মশমনত্বং বাতপিত্তপ্রকোপনত্বং চ||১৮||

Adhikarana svamatapuShTyarthaM nidarshanAni (19) · Śloka 19

রসাদিসঙ্করেণ ত্বন্যথাত্বম্| যথা মধু মধুরং শ্লেষ্মাণং শমযতি কটুবিপাকতযা| সকষাযত্বাদ্রৌক্ষ্যাচ্চ বাতং জনযতি শীতবীর্যত্বাচ্চ| তথা যবোঽপি| আনূপৌদকপিশিতং শীতমপি পিত্তং করোত্যুষ্ণবীর্যত্বাত্| তথা তৈলং কটুবিপাকতযা চ বিপাকত এব বদ্ধবিণ্মূত্রম্| অম্লং কাঞ্জিকং কফং জযতি রূক্ষ্ণোষ্ণত্বাত্| কপিত্থং তু রৌক্ষ্যাত্, পিত্তং তু শীতবীর্যত্বাত্| আমলকং পিত্তং শীতবীর্যত্বাত্ স্বাদুপাকতযা চ কফং রৌক্ষ্যাল্লাঘবাচ্চ শৈত্যরৌক্ষ্যলাঘবৈস্তু ন বাতম্| লবণং সৈন্ধবং স্বাদুপাকতযা পিত্তং জযতি লাঘবাত্কফং জযতি| কটুকাঽপি শুণ্ঠী স্নেহৌষ্ণ্যস্বাদুপাকৈর্বাতং ক্ষপযতি পিপ্পলী চ| লশুনোঽপি স্নেহৌষ্ণ্যগৌরবৈঃ| পলাণ্ডুশ্চ| স তু স্নেহগৌরবাভ্যাং জনযতি শ্লেষ্মাণম্| বৃদ্ধং চ মূলকং স্বাদুপাকতযা| স্নিগ্ধানি তিক্তানি ব্যাঘ্রীবিশল্যাঽর্কাগরূণ্যুষ্ণবীর্যত্বাত্ পিত্তং জনযন্তি| কষাযতিক্তং মহত্ পঞ্চমূলং বাতং জযতি নতু পিত্তমুষ্ণবীর্যত্বাত্| কষাযশ্চ কুলত্থোঽম্লপাকতযা চেত্যেতন্নিদর্শনমাত্রমুক্তম্||১৯||

যত্র তু রসাদীনাং বিজাত্যন্বযত্বেন সঙ্করস্তত্র ক্বচিদ্রসাধিক্যেন কার্যকারিত্বং ক্বচিদ্বীর্যাধিক্যেন ক্বচিদ্বিপাকাধিক্যেন ইত্যস্যৈবার্থস্য যথা মধুমধুরমিত্যাদ্যুদাহরণম্| সুবোধম্| বৃদ্ধমূলকস্য ত্রিদোষকর্তুঃ কটুকস্য কফকর্তৃত্বে যদাচার্যবাগ্ভটেন মধুরবিপাকিত্বং কারণমুক্তং তত্স্বযং হৃদযপঠিতস্যৈব বৃদ্ধমূলকস্য কটুবিপাকিত্বং স্মৃতং কিং বান্যত্ কিঞ্চিদিতি ন জানে|

Adhikarana dravyasya rasavIryAdinA bhinna-bhinna-kAryakartRutvam (20) · Śloka 20

তস্মাত্- কিঞ্চিদ্রসেন কুরুতে কর্ম পাকেন চাপরম্| দ্রব্যং গুণেন বীর্যেণ প্রভাবেণৈব কিঞ্চন||২০||

এবং স্থিতেঽনন্তরপ্রক্রান্তমেবার্থং স্ফুটযন্নাহ-তস্মাদিত্যাদি| দ্রব্যং মধ্বাদি কিঞ্চিত্ কর্মাস্রপিত্তোপশমনাদিকং রসেন কুরুতে| কিঞ্চিত্ শ্লেষ্ম- শমনাদিকং বিপাকেনাপরং বাতবৃদ্ধ্যাদিলঘ্বাদিনা গুণেনাপরং তৃট্শমনাদি বীর্যেণ শীতেন কিঞ্চন বিষাপনুত্যাদি প্রভাবেণেতি||২০||

Adhikarana rasavIryAdiShu balIyasya kAryasAdhakatvam (21) · Śloka 21

যদ্যদ্দ্রব্যে রসাদীনাং বলবত্ত্বেন বর্ততে| অভিভূযেতরাংস্তত্তত্ কারণত্বং প্রপদ্যতে| বিরুদ্ধসংযোগে প্রভূতেনাল্পং জীযতে বিরুদ্ধগুণসংযোগে ভূযসাঽল্পং হি জীযতে||২১||

ননু চ যত্র দ্রব্যাশ্রিতানাং রসবীর্যগুণবিপাকপ্রভাবানাং বিরোধঃ তত্র তেষাং কার্যনিষ্পাদনে সমশক্তিত্বং ন বেত্যাশঙ্কানিবৃত্ত্যর্থমাহ- যদ্যদ্ দ্রব্য ইতি| রসাদীনাং রসবীর্যগুণবিপাকপ্রভাবানাং যদ্রসো বা বীর্যং বা বিপাকো গুণঃ প্রভাবো বা বলবত্ত্বেন বিজাতীযাধিক্যেন বর্ততে তত্তত্ কারণত্বং কার্যসাধকত্বং প্রতিপদ্যতে| কিং কৃত্বা? ইতরান্ দ্রব্যাশ্রিতান্ হীনানভিভূয বিফলীকৃত্য| যত্র তু দ্রব্যে রসাদিদ্রাবকো বিরুদ্ধানাং গুণানাং গুর্বাদীনামেব সংযোগো ন তু রসাদযোঽপেক্ষ্যন্তে| তত্র কথং কার্যকর্তৃত্বমিতি পৃষ্ট আহ- বিরুদ্ধেত্যাদি| অথবা রসাদিকল্পনাবিশেষেণৈব যত্র বিরুদ্ধগুণোপনিপাতঃ তত্র কথং কার্যকারণত্বমিত্যাহ-বিরুদ্ধেত্যাদি| তত্র ভূযসা প্রভূতেন গুণেনাল্পং জীযতে নিষ্ফলীক্রিযতে| দ্বিবিধশ্চ বিরোধঃ-স্বরূপতঃ কার্যতশ্চ| স্বরূপবিরোধো যথা গুরুলঘ্বোঃ শীতোষ্ণযোশ্চ| কার্যবিরোধো যথা গুরুরূক্ষযোরুষ্ণস্নিগ্ধযোশ্চ| তথা হি গুরুঃ শ্লেষ্মবৃদ্ধিকরঃ রূক্ষশ্চ গুরোর্বিরুদ্ধঃ কার্যেণ শ্লেষ্মবৃদ্ধ্যাখ্যেন বিরুদ্ধ্যতে| এবমুষ্ণস্য শ্লেষ্মহন্তৃত্বং স্নিগ্ধস্য শ্লেষ্মকর্তৃত্বেন| ইহ চোভযোরপি বিরোধযোর্গ্রহণম্| একত্র্ দ্রব্যে স্বরূপকার্যবিরুদ্ধযোর্ভাব আগমলব্ধঃ পঞ্চভূতাত্মকত্বাদ্ দ্রব্যস্যোপপদ্যতে||২১||

Adhikarana rasAdInAM balasAmye naisargikabalanirdeshaH (22) · Śloka 22

রসং বিপাকস্তৌ বীর্যং প্রভাবস্তান্যপোহতি| বলসাম্যে রসাদীনামিতি নৈসর্গিকং বলম্||২২||

ননু যদ্যদ্ দ্রব্যে রসাদীনাং বলবত্তত্তত্ কার্যকরণশক্তমিত্যুক্তম্| যত্র তু দ্রব্যে রসাদীনামুত্কর্ষাসম্ভবঃ পরস্পরসাম্যং তত্র কস্য কার্যকারণত্বমিত্যুচ্যতে- রসমিত্যাদি| বিপাকঃ কর্তা রসং কর্মাপোহতি কার্যকরণে কুণ্ঠযতি| তৌ রসবিপাকৌ কর্মণী বীর্যং কর্তৃ অপোহতি| তানি রসবিপাকবীর্যাণি প্রভাবো বক্ষ্যমাণঃ অপোহতীত্যেতদ্রসাদীনাং বলসাম্যে নৈসর্গিকং স্বাভাবিকং বলম্| তেনৈতদুক্তং ভবতি- রসাদীনাং সমবলানামপি তথাবিধো বলস্বভাবো যত্ পূর্বস্য বলমুত্তরস্য বলেন সমেনাপ্যভিভূযতে| রসবলং বিপাকবলেন সমেনাপি স্বভাবাদেবাভিভূযতে| এবং রসবিপাকযোর্বলং বীর্যবলেন| রসবিপাকবীর্যবলং প্রভাববলেনেতি| তেন রসাদীনাং বিষমত্বেঽপি স্বভাববলমপেক্ষ্যাধিকস্য সামর্থ্যং বিজ্ঞেযম্||২২||

Adhikarana rasAdayaH viruddhA api nAnyonyakAryanAshakAH (23) · Śloka 23

বিরুদ্ধা অপি চান্যোন্যং রসাদ্যাঃ কার্যসাধনে| নাবশ্যং স্যুর্বিঘাতায গুণদোষা মিথো যথা||২৩||

ননু যত্র রসাদীনামন্যতমস্য কার্যমিতরস্য কার্যেণ বিরুদ্ধ্যতে তত্র কস্য কার্যকর্তৃত্বং ভবতি? যদি তু প্রভূতস্য স্বভাববলবতশ্চেত্যুচ্যতে| তত্রাল্পোঽল্পবলশ্চ কিঞ্চিত্ কর্তুং শক্তো ন বেত্যেবং পৃষ্ট ইদমাহ- বিরুদ্ধা ইত্যাদি| রসাদ্যা রসবীর্যবিপাকগুণপ্রভাবা অন্যোন্যং পরস্পরং বিরুদ্ধা অপি ন নাশায ভবন্তি কার্যসাধনকালে| দৃষ্টান্তো-গুণদোষা মিথো যথেতি| গুণাঃ সত্ত্বরজস্তমাংসি পরস্পরং পুরুষাদ্যভিধানকার্যসাধনে বিরুদ্ধা অপি যথা বিঘাতায ন ভবন্তি| দোষাশ্চ বাতপিত্তকফাবিরুদ্ধা অপি দেহরোগাদিসাধনে যথা মিথো বিঘাতায ন ভবন্তি| তদ্বদ্রসাদযোঽপি||২৩||

Adhikarana rasavIryAdInAM samaviShamatve bhUtotkarShApakarShayorhetutvam (24) · Śloka 24

রসবীর্যপ্রভৃতযো ভূতোত্কর্ষাপকর্ষতঃ| একরূপা বিরূপা বা দ্রব্যং সমধিশেরতে| মাধুর্যশৈত্যপৈচ্ছিল্যস্নেহগৌরবমন্দতাঃ| সহবৃত্ত্যা স্থিতাঃ ক্ষীরে ন ত্বানূপৌদকামিষে||২৪||

ননু দ্রব্যে রসাদীনাং পরস্পরসমবিষমতযা কার্যকরত্বমুক্তং তস্যাশ্চ রসাদিসমবিষমতাযাঃ কারণং ন জ্ঞাযতে| অত উচ্যতে-রসবীর্যেত্যাদি| রসবীর্যাদীনাং কার্যকরত্বে পরস্পরসদৃশানাং বিসদৃশানাং বা যদ্ দ্রব্যাশ্রযণং তন্মহাভূতস্য পৃথিব্যাদেরুত্কর্ষাদপকর্ষাচ্চ সম্পদ্যতে| তেনৈতদুক্তং ভবতি যত্ দ্রব্যে রসস্য বীর্যাদিভিঃ সাদৃশ্যমসাদৃশ্যং বা তত্সর্বমেকাদীনাং ভূতানাং কেষাঞ্চিত্ কিযতাপ্যুত্কর্ষেণান্যেষাং কিযতাপ্যপকর্ষেণ জন্যতে| তেন দ্রব্যেণ সদৃশস্যাপি দ্রব্যস্য যোংঽশাংশো বিশেষঃ স ভূতকৃত এব| এতদেব মাধুর্যেণেত্যাদ্যুদাহরণেন স্ফুটযতি| তেন ক্ষীরে মাধুর্যাদীনাং সমানকার্যকর্তৃত্বেন যদেকত্র সদৃশানামবস্থানং তদেবান্যস্য মহাভূতস্যোত্কর্ষেণান্যভূতেভ্যঃ ||২৪||

Adhikarana sharIradoShANAM sthitivRuddhikShayA dravyahetukAH (25) · Śloka 25

গুণা দ্রব্যেষু যে চোক্তাস্ত এব তনুদোষযোঃ| স্থিতিবৃদ্ধিক্ষযাস্তস্মাত্তেষাং হি দ্রব্যহেতুকাঃ||২৫||

যে হি গুরুত্বাদযো দ্রব্যে সম্ভবন্তি ত এব গুণাস্তনোঃ শরীরস্য প্রত্যঙ্গং সম্ভবন্তি| দোষস্য চ বাতাদেঃ তস্মাত্তনোর্বাতাদীনাং চ স্থিতিবৃদ্ধিক্ষযা দ্রব্যহেতুকাঃ| বৃদ্ধিঃ সমানৈরিত্যাদিন্যাযাত্||২৫||

Adhikarana rasavIryavipAkaj~jAne prakArAH (26) · Śloka 26

রসং বিদ্যান্নিপাতেন তেনাধিবসনেন চ| বীর্যং বিপাকং দ্রব্যাণাং কর্মণঃ পরিনিষ্ঠযা||২৬||

রসাদীনাং দ্রব্যস্থিতানাং স্বরূপবিশেষঃ কথং জ্ঞাযতে ইত্যাহ- রসমিত্যাদি| জিহ্বানিপাতেন স্পর্শমাত্রেণ রসবিশেষং বিদ্যাত্ দ্রব্যস্য| তেন নিপাতেনাধিবাসনেন কালপরিবসনেন চ জ্ঞাযতে বীর্যবিশেষঃ| নিপাতমাত্রেণৌষ্ণ্যং শৈত্যং বা জ্ঞাযতে| যত্র তু দ্রব্যে বিপরীতত্বাদ্রসেনাভিভূতং বীর্যং নিপাতমাত্রান্ন জ্ঞাযতে তত্র কালাধিবাসেন দেহমার্দবাদিকরণাত্ জ্ঞাযতে| বিপাকবিশেষস্তু কর্মণঃ তত্কৃতস্য পরিনিষ্ঠযা নিষ্পত্তের্দোষবৃদ্ধিক্ষযেণ||২৬||

Adhikarana rasasa~gkhyAviShaye pUrvapakShaH siddhAntashca (27) · Śloka 27

মধুরস্কন্ধনির্দিষ্টঘৃততৈলগুডাদিষু| গুণাস্বাদাদিভেদেন রসষট্কং ন যুজ্যতে| অস্তু ভেদাদসঙ্খ্যত্বমৈক্যং বা স্বাদলক্ষণাত্| ভূতোত্কর্ষাপকর্ষেণ ভেদো যোঽল্পেন কল্প্যতে| সঙ্কীর্ণাত্ব ফলে চাসৌ তুল্যত্বান্ন বিবক্ষ্যতে| গুর্বাদীনাং বিশেষেঽপি স্বজাতেরনতিক্রমাত্| সঙ্খ্যাভেদো যথা নাস্তি রসানামপি স ক্রমঃ| দৃষ্টং মুখোপলেপাদি যত্সর্বেষু ঘৃতাদিষু| ন চ তদ্দাডিমাদ্যেষু ষডেবাতো রসাঃ স্মৃতাঃ| আনন্ত্যৈকত্বযোশ্চ স্যান্ন বিচিত্রার্থতন্ত্রণম্||২৭||

ননু রসানাং মধুরাদিত্বেন ষট্সঙ্খ্যানিযম উক্তঃ; স ন যুজ্যতে কেবলমেকরসত্বমনেকরসত্বং বা| তত্রানেকরসত্বে কারণং বক্ষ্যমাণমধুরাদিস্কন্ধনির্দিষ্টানাং ঘৃততৈলগুডদ্রাক্ষাশর্করামধুমধুকাদীনাং গুণস্বাদাদিভেদঃ| তথা হি ত্বযা যে মধুরত্বেন নির্দিষ্টা গুডদ্রাক্ষাদয আস্বাদনেন তে ন পরস্পরসদৃশাঃ ন চ গুরুত্বাদিনা গুণেন| ন চাম্লাদিযুক্তা ইতি বক্তুং যুজ্যতে| অতো জ্ঞাযতে অন্যে বিশিষ্টা এব ত ইতি প্রতিরসস্কন্ধমানন্ত্যম্| রসৈকত্বে কারণং জিহ্বেন্দ্রিযাস্বাদনসামান্যম্| তত্র প্রতিবিধীযতে ভূতোত্কর্ষাপকর্ষেণেত্যাদি| তত্র প্রথমং গুণভেদদূষণং পরিহ্রিযতে| যোঽযমল্পেন ভূতানামুত্কর্ষেণাপকর্ষেণ মধুরাণাং গুণভেদঃ স সঙ্কীর্ণত্বাত্ ফলে চ সদৃশত্বাত্ সন্নপি ন বিবক্ষ্যতে| আস্বাদভেদাদানন্ত্যং পরিহ্রিযতে| গুর্বাদীনামিত্যাদি| গুর্বাদীনাং গুণানাং যদ্যপি প্রতিদ্রব্যং বৈলক্ষ্যণ্যমস্তি তথাপি গুরুত্বাদিজাত্যনতিক্রমাত্ গুরুর্গুরুর্লঘুর্লঘুরিতি সঙ্খ্যাভেদাবিবক্ষযা নির্দিশ্যন্তে| তদ্বন্মধুরাদিস্কন্ধপঠিতানাং দ্রব্যাণাং যদ্যপ্যাস্বাদবৈলক্ষণ্যং দৃশ্যতে তথাপি যন্মুখোপলেপহ্লাদনাদি ঘৃতাদিষু মধুরেষু দৃষ্টং ন তন্মুখোপলেপাদি দাডিমসৈন্ধবাদিষ্বম্ললবণাদিষু দৃশ্যতে| ন চৈতান্ রসানতিক্রম্য জাত্যন্তরং সংভবতি| অতঃ ষডেব রসাঃ নোনাধিকাঃ| যদি সদেবানন্ত্যমৈক্যং বা যথোক্তপ্রকারেণ তন্ত্রব্যবহারে গৃহ্যতে ততো বিচিত্রস্য রসপৃষ্ঠভাবিনো বক্তব্যস্যানেকস্য তন্ত্রণস্য শাস্ত্রে প্রযোগো ন স্যাত্| অত আনন্ত্যেন রসানাং তত্স্বরূপতন্ত্রণস্যাপ্যানন্ত্যাদবক্তব্যতা| একরসত্বে চ বিশেষস্যানুক্তত্বাত্ স্বরূপতন্ত্রেণাপি ন যুজ্যত ইতি| রসা উপসংহৃতাঃ||২৭||

Adhikarana vIryAkhyaguNavaishiShTyam (28) · Śloka 28

গুর্বাদ্যা বীর্যমুচ্যন্তে শক্তিমন্তোঽন্যথা গুণাঃ| পরসামর্থ্যহীনত্বাদ্ গুণা এবেতরে গুণাঃ||২৮||

বীর্যমুপসংহ্রিযতে-গুর্বাদ্যা ইত্যাদি| পূর্বোক্তা গুর্বাদ্যা অষ্টৌ যদোত্কৃষ্টশক্তযঃ সন্তো দ্রব্যং সমধিশেরতে তদা বীর্যশব্দবাচ্যাঃ| যদা তূত্কৃষ্টশক্তিযুক্তা ন ভবন্তি সামান্যগুণা এব| যে চ গুর্বাদিবিশিষ্টা দ্বাদশগুণাঃ তে স্বভাবেনৈব পরসামর্থ্যহীনা উত্কৃষ্টশক্তিরহিতাস্তেঽপি সামান্যগুণশব্দবাচ্যাঃ| তে ন কদাচিদপি বীর্যাখ্যাং লভন্ত ইতি বীর্যমুপসংহৃতম্||২৮||

Adhikarana yathArasavipAkapakShaH tatkhaNDana~jca (29) · Śloka 29

যথারসং জগুঃ পাকান্ ষট্ কেচিত্তদসাম্প্রতম্| যত্স্বাদুর্ব্রীহিরম্লত্বং ন চাম্লমপি দাডিমম্| যাতি তৈলং চ কটুতাং কটুকাপি ন পিপ্পলী| যথারসত্বে পাকানাং ন স্যাদেবং বিপর্যযঃ| যস্মাত্ দৃষ্টো যবঃ স্বাদুর্গুরুরপ্যনিলপ্রদঃ| দীপনং শীতমপ্যাজ্যং বসোষ্ণাপ্যগ্নিসাদিনী| কটুপাকোঽপি পিত্তঘ্নো মুদ্গো মাষস্তু পিত্তলঃ| স্বাদুপাকোঽপি চলকৃত্স্নিগ্ধোষ্ণং গুরু ফাণিতম্| রসঃ স্বাদুর্যথা চৈতত্তথান্যেষ্বপি দৃশ্যতে| বাতলং কফপিত্তঘ্নমম্লমপ্যক্ষিকীফলম্| কুরুতে দধি গুর্বেব বহ্নিং পারাবতং ন তু| কপিত্থং দাডিমং সাম্লং গ্রাহি নামলকীফলম্| কষাযা গ্রাহিণী শীতা ধাতকী ন হরীতকী| অপ্রধানাঃ পৃথক্ তস্মাদ্রসাদ্যাঃ সংশ্রিতাস্তু তে||২৯||

বিপাক উপসংহ্রিযতে-যথারসমিত্যাদি| কেচিদাচার্যা রসানতিক্রমেণ পাকষট্কং জগুরবদন্| যথারসমিতি যথাবিধো রসঃ স্বরূপেণ তথাবিধ এব তস্য বিপাকঃ তেন মধুরস্য মধুরো বিপাকঃ অম্লোঽম্লস্য পটুর্লবণস্য তিক্তস্তিক্তস্য কটুঃ কটোঃ কষাযঃ কষাযস্যেতি| তচ্চাচার্য- মতমসাম্প্রতমযুক্তমিতি| কুতঃ? ব্যভিচারাত্| এতদেবোদাহরণেন দর্শযতি- যত্স্বাদ্বিত্যাদি| যদি হি রসসদৃশঃ সর্বস্য বিপাকঃ স্যাত্ তত এবং বিপর্যযো ন স্যাত্| তে চ রসাদযো দ্রব্যাত্ পৃথগ্ভাবেন কার্যকরত্বেন বিকল্প্যমানা অপ্রধানা যতস্তে স্থিতা অপি যস্মিন্ দ্রব্যে ন তদ্দ্রব্যে তত্সদৃশমেব কার্যং কুর্বন্তি| এতদেব যস্মাদ্ দৃষ্ট ইত্যাদিনিদর্শনেন দর্শযতি| এবং যথা মধুররসে বিপর্যযো দৃষ্টস্তথান্যেষ্বপি রসেষু দৃশ্যত ইত্যপ্রধানাঃ রসাদ্যাঃ|

Adhikarana dravyameva pradhAnam (30) · Śloka 30

প্রভাবশ্চ যতো দ্রব্যে দ্রব্যং শ্রেষ্ঠমতো মতম্||৩০||

দ্রব্যং তু শ্রেষ্ঠমিত্যাচার্যাণাং মতং, যতস্তে রসাদ্যা রসবীর্যবিপাকাঃ প্রভাবশ্চ দ্রব্যসংশ্রিতাঃ তত্পরতন্ত্রা ইত্যর্থঃ||৩০||

Adhikarana prabhAvo~acintyaH prabhAvanirUpaNa~jca sodAharaNam (31) · Śloka 31

রসাদিসাম্যে যত্কর্ম বিশিষ্টং তত্ প্রভাবজম্| দন্তী রসাদ্যৈস্তুল্যাপি চিত্রকস্য বিরেচনী| মধুকস্য চ মৃদ্বীকা ঘৃতং ক্ষীরস্য দীপনম্| কটুপাকরসস্নিগ্ধগুরুত্বৈঃ কফবাতজিত্| লশুনো বাতকফকৃন্ন তু তৈরেব যদ্গুণৈঃ| মিথো বিরুদ্ধান্বাতাদীন্লোহিতাদ্যা জযন্তি যত্| কুর্বন্তি যবকাদ্যাশ্চ তত্প্রভাববিজৃম্ভিতম্| শিরীষাদির্বিষং হন্তি স্বপ্নাদ্যং তদ্বিবৃদ্ধযে| মণিমন্ত্রৌষধীনাম্ চ যত্কর্ম বিবিধাত্মকম্| শল্যাহরণপুঞ্জন্ম রক্ষাযুর্ধীবশাদিকম্| দর্শনাদ্যৈরপি বিষং যন্নিযচ্ছতি চাগদঃ| বিরেচযতি যদ্বৃষ্যমাশু শুক্রং করোতি বা| ঊর্ধ্বাধোভাগিকং যচ্চ দ্রব্যং যচ্ছমনাদি চ| মাত্রাদি প্রাপ্য তত্তচ্চ যত্প্রপঞ্চেন বর্ণিতম্| তচ্চ প্রভাবজং সর্বমতোঽচিন্ত্যঃ স উচ্যতে||৩১||

এবং রসাদ্যাঃ জ্ঞাতাঃ, প্রভাবস্তু ন জ্ঞাতঃ, অতস্তদ্বিজ্ঞানার্থমুচ্যতে-রসাদীত্যাদি| রসবীর্যবিপাকানাং পরস্পরসাম্যেঽপি যদ্যদ্বিশিষ্টং কর্ম দৃশ্যতে তত্তত্ প্রভাবজং বিদ্ধি| এতাবদৈতদুক্তং ভবতি-বিশিষ্টা সর্বাতিশাযিনী দ্রব্যশক্তিঃ প্রভাবশব্দবাচ্যা| তস্য চ প্রভাবজস্য কর্মণ উদাহরণমুচ্যতে-দন্তীত্যাদি|দন্তী রসাদ্যৈশ্চিত্রকস্য তুল্যাদি বিরেচনী ন তু চিত্রকমপি বিরেচনমিতি প্রভাবকর্ম| মধুকস্য রসাদ্যৈঃ সদৃশাপি দ্রাক্ষা বিরেচনী ন মধুকমিতি প্রভাবকর্ম| ক্ষীরস্য রসাদ্যৈঃ সদৃশমপি ঘৃতং দীপনং ন ক্ষীরমিতি প্রভাবঃ| লশুনঃ কটুরসত্বেন কটুবিপাকিত্বেন কফজিত্ স্নিগ্ধত্বেন গুরুত্বেন বাতজিত্ স লশুনঃ স্বৈরেব গুণৈর্বাতকফৌ ন করোতীতি প্রভাবঃ| তেনৈতদুক্তং ভবতি- কটুকরসবিপাকৌ তু লশুনে কফচ্ছিত্বে দ্রব্যপ্রভাবাত্ পর্যাপ্তৌ| ন তু বাতকরত্বে| তথা তত্র স্নিগ্ধত্বং গুরুত্বং চ বাতজিত্ত্বে দ্রব্যপ্রভাবাদেব পর্যাপ্তম্, ন তু শ্লেষ্মকরত্বং ইতি| পরস্পরবিরুদ্ধানপি বাতাদীন্ দোষান্ রক্তশালিঃ স্নিগ্ধত্বেন গুরুত্বেন নাশযতি| যবকশ্চ তানেব করোতীতি প্রভাবকর্ম| শিরীষহরিদ্রাদিকং বিষং নাশযতি স্বপ্নমেঘাদি চ তদেব বিষং বর্দ্ধযতি তত্ প্রভাবকর্ম| বৃষ্যঞ্চ দ্রব্যং যচ্ছীঘ্রমেব শুক্রং বর্দ্ধযতি বহির্বিরেচযতি বা তত্ প্রভাবকর্ম| যচ্চ দ্রব্যং মদনফলাদি ঊর্ধ্বং দেহে গচ্ছতি হরীতক্যাদি বাধস্তত্ প্রভাবাত্| অন্যচ্চ শমনং প্রভাবাদেব| যচ্চ মাত্রাদিপ্রকরণে প্রপঞ্চেন বিস্তারেণ বর্ণিতং তত্ প্রভাবজং বিদ্ধি| অতঃ প্রভাবস্য তত্স্বভাবত্বাত্ স প্রভাবোঽচিন্ত্যঃ কীদৃক্কদা কুতস্য ইতি জ্ঞাতুং ন শক্যতে| সদপি তত্কারণং মহাভূতবিশেষপরিণামাখ্যমস্মদ্বিধৈস্তত্রাধিগন্তুং ন শক্যতঃ ইত্যর্থঃ||৩১||

Adhikarana prabhAvavaishiShTyam (3) · Śloka 3

রসেন বীর্যেণ গুণৈশ্চ কর্ম দ্রব্যং বিপাকেন চ যদ্বিদধ্যাত্| সদ্যোঽন্যথা তত্কুরুতে প্রভাবাদ্ধেতোরতস্তত্র ন গোচরোঽস্তি| ইতি বৈদ্যপতিসিংহগুপ্তস্য সূনোর্বাগ্ভটস্য কৃতৌ অষ্টাঙ্গসংগ্রহসংহিতাযাং সূত্রস্থানে দ্রব্যাদিবিজ্ঞানীযো নাম সপ্তদশোঽধ্যাযঃ||৩||

এতমেব প্রভাবার্থমুপসংহতি-রসেনেত্যাদি| রসাদিভিঃ করণৈর্দ্রব্যং যত্ কর্ম করোতি তত্ প্রভাবেনান্যথা কুরুতে বিপরীতযতীত্যর্থঃ| অতস্তস্য প্রভাবহেতোর্মার্গণা ন শক্যতে| তথাবিধভাবস্বভাবত্বাত্||৩২|| ইতি শ্রীমন্মহামহোপাধ্যাযেন্দুবিরচিতাযাম্ অষ্টাঙ্গসংগ্রহব্যাখ্যাযাং শশিলেখাযাং সূত্রস্থানে সপ্তদশোঽধ্যাযঃ