12. dvividhauṣadhavijñānīyaḥ

Adhikarana atha dvividhauShadhavij~jAnIyo nAma dvAdasho~adhyAyaH upodghAtaH · Śloka

আহারমুক্ত্বা তত্সংস্কারোপযোগিত্বান্মিথ্যাহারোদ্ভবরোগসাধনোপযোগিত্বাচ্চ প্রাযোপযোগিনাং দ্রব্যাণাং স্বরূপপরিজ্ঞানার্থমুচ্যতে| তদর্থমধ্যাযারম্ভঃ|

Adhikarana pratij~jA (1) · Śloka 1

অথাতো দ্বিবিধৌষধবিজ্ঞানীযমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

Adhikarana auShadhasya dvividhauShadhakrameNa nirdeshaH (2) · Śloka 2

দ্বিবিধমৌষধম্- ঊর্জস্করং রোগঘ্নঞ্চ| উভযমপি চোভযাত্মকম্| বাহুল্যেন তু নির্দেশঃ| তত্রোর্জরস্করং দ্বিবিধং রসাযনং বাজীকরণঞ্চ| রোগঘ্নমপি দ্বিবিধম্- রোগস্য প্রশমনমপুনর্ভবকরঞ্চ||২||

সর্বং শরীরবিষযং বস্তু দ্বিবিধমৌষধমনৌষধং চ| তত্র ঔষধং পথ্যমনৌষধং চ শরীরস্যাপথ্যম্| তত্রৌষধং প্রাধান্যাদাদাবুচ্যতে| অনৌষধং বক্ষ্যামঃ সর্বমৌষধং শরীরহিতং দ্বিবিধম্| ঊর্জস্করং রোগঘ্নঞ্চ| ঊর্জস্করং যত্স্বস্থস্যাপি বলবর্ণাদ্যুপচযং করোতি| রোগঘ্নং ব্যাধিনাশনম্| উভযমপি দ্বযমপি পুনর্দ্রব্যাত্মকমূর্জ্জস্করেঽপি ধাতুসাম্যকরণশক্তত্বাত্ ব্যাধ্যুপশমঃ সম্ভবতি| ব্যাধ্যুপশমে তু বর্ণবলাদ্যুপচযঃ স্পষ্ট এব| তস্মাদ্ দ্বযমপি দ্রব্যাত্মকং তত্রাপি যদ্যত্র প্রধানং তেন ব্যপদেশে ঊর্জস্করং রোগঘ্নং চেতি| তত্রোর্জস্করং দ্বিবিধং- রসাযনবাজীকরণভেদেন| রোগঘ্নমপি দ্বিবিধম্- ব্যাধেঃ স্থিতস্য নাশনং নষ্টস্য চ পুনরুত্পত্তিরক্ষণম্| অনেনাঽপি প্রকারেণ দ্বিবিধং রোগঘ্নম্||২||

Adhikarana dravyAdravyabhedenauShadhabhedAH (3) · Śloka 3

পুনশ্চ দ্বিবিধং দ্রব্যমদ্রব্যঞ্চ| তত্র দ্রব্যং ত্রিবিধং- ভৌমমৌদ্ভিদং জঙ্গমমিতি| তেষু বক্ষ্যমাণং হেমাদিলবণান্তং প্রাযেণ ভৌমম্| ঔদ্ভিদং পুনর্বনস্পতিবানস্পত্যবীরুদৌষধিভেদেন চতুর্বিধং ভবতি| তত্র ফলিনো বনস্পতিঃ, পুষ্পফলবান্ বানস্পত্যঃ, বল্লীগুল্মং বীরুত্, ফলপাকান্তাশ্চৌষধ্য ইতি| জঙ্গমোদ্ভবং মধুঘৃতাদি জঙ্গমদ্রব্যমাহুঃ| অদ্রব্যং পুনরুপবাসানিলাতপচ্ছাযামন্ত্রসান্ত্বদান-ভযোত্ত্রাসসংক্ষোভণহর্ষণ- ভর্ত্সনহসনস্ব্বপ্নজাগরণসংবাহনাদীনি||৩||

দ্রব্যমদ্রব্যং চ| দ্রব্যং মূর্ত্তং সকলেন্দ্রিযবিষযং চ| অতোঽন্যদদ্রব্যম্| এতচ্চ দ্বযমপি রোগস্য প্রশমনে পুনর্ভবরক্ষণে ব সমর্থং ভবতি| তত্র ভৌমাদিভেদেন ত্রিবিধং দ্রব্যমিহাধ্যাযে বক্ষ্যমাণম্| সুবর্ণাদিলবণান্তং বাহুল্যেন ভৌমম্| ঔদ্ভিদং বনস্পত্যাদিভেদেন চতুর্বিধম্| তত্র ফলিনো বনস্পতিঃ| ফলিনশব্দঃ ফলবতি বর্ততে| ফলবর্হাভ্যামিনজিতীনচ্প্রত্যাযন্তঃ| পুষ্পপ্রাধান্যেন ফলবান্ বানস্পত্যঃ| বল্লী সন্তানবতী লতাগুল্মং চ| হ্রস্বং ভূমিলগ্নং বহুসূক্ষ্মশাখং চ বীরুচ্ছব্দেনোচ্যতে| ফলপাকেঽন্তঃ পর্ণাদিবিনাশলক্ষণো যাসাং তা ঔষধ্যঃ| জঙ্গমপ্রাণিযোনিত্বান্মধুঘৃতমূত্রাদি জঙ্গমমুচ্যতে| অদ্রব্যং পুনরুপবাসাদি| অনিলস্যাসকলেন্দ্রিযগ্রাহ্যত্বাদমূর্ত্তত্বাচ্চাদ্রব্যত্বমত্রৈব ব্যবহারার্থম্| বাহ্যস্য সংবাহনমঙ্গমর্দনম্| এতে চোপবাসাদযোঽস্মিন্ তন্ত্রে যথাপ্রদেশং রোগঘ্নত্বেনোক্তাঃ||৩||

Adhikarana draivavyapAshrayAdibhedenauShadhasya traividhyam (4) · Śloka 4

পুনরপি চ ত্রিবিধং দৈবব্যপাশ্রযং যুক্তিব্যপাশ্রযং সত্ত্বাবজযশ্চেতি| তত্র দৈবব্যপাশ্রযং মন্ত্রৌষধিমণিমঙ্গলবল্যুপহারহোমনিযমপ্রাযশ্চিত্তোপ-বাসস্বস্ত্যনপ্রণিধানগমনাদি| যুক্তিব্যপাশ্রযমাহারৌষধযোজনাদি| সত্ত্বাবজযঃ পুনরহিতান্ মনোনিগ্রহঃ||৪||

ইত্যৌষধস্যোর্জস্করত্বরোগঘ্নত্বাভ্যাং দ্বৈবিধ্যমুক্ত্বা তস্যৈব দৈবব্যপাশ্রযত্বাদিনা তৈবিধ্যমুচ্যতে| তত্র দৈবব্যপাশ্রযং যত্ পাপস্যোপঘাতকত্বেনৈব জঠরাগ্নিসংযোগেন বিনা ধাতুসাম্যকরং মন্ত্রৌষধ্যাদি| অত্রৌষধীনাং ধারণমেবাভিপ্রেতম্| বলেরুপহারো দেবাদিষু| নিযমো বর্জ্যবর্জনম্| প্রাযশ্চিত্তং ব্রতাদি| উপবাসঃ প্রসিদ্ধঃ পাপহর্তৃত্বে| স্বস্ত্যযনং বেদোক্তং কর্ম| যুক্তিব্যপাশ্রযং তু জাঠরাগ্নিসংযোগমাত্রাদিবিশেষেণ ধাতুসাম্যকরং তচ্চাহারস্যৌষধস্য চ যোজনম্| সত্ত্বাবজযঃ সত্ত্বস্য মনসোঽবজযঃ| অহিতাদ্বিষযান্নিগ্রহো নিবারণম্||৪||

Adhikarana apakarShaNAdibhedenauShadhasya traividhyam (5) · Śloka 5

পুনরপি চ ত্রিবিধম্| অপকর্ষণং প্রকৃতিবিঘাতো নিদানত্যাগশ্চ| তে পুনরপকর্ষণাদযো দ্বিবিধাঃ বাহ্যাভ্যন্তরভেদেন| তত্র বাহ্যমপকর্ষণং গ্রন্থ্যর্বুদোপপক্ষ্মক্রিমিশল্যাদিষু শস্ত্রহস্তযন্ত্রাদিভিঃ| আভ্যন্তরং পুনর্বমনবিরেচনাদিভিঃ| প্রকৃতিবিঘাতঃ সংশমনম্| তদ্বাহ্যমভ্যঙ্গস্বেদপ্রদেহপরিষেকোপমর্দনাদি| আভ্যন্তরং যদন্তরমনুপ্রবিশ্যাবিক্ষোভযদ্দোষান্ শমযতি| নিদানত্যাগো যথাদোষং শীতোষ্ণাশনব্যাযামাদীনাং বর্জনং স্নিগ্ধরূক্ষাদ্যনভ্যবহারশ্চ| তত্র শস্ত্রাদিসাধ্যে ভেষজমনুক্রমতে ন তু ভেষজসাধ্যে শস্ত্রাদি||৫||

ইত্যৌষধস্য দৈবব্যপাশ্রযত্বাদিনা ত্রৈবিধ্যমুক্ত্বা অপকর্ষণাদিভেদেন তস্যৈব ত্রৈবিধ্যমুচ্যতে| তানি চাপকর্ষণাদীনি প্রত্যেকং বাহ্যাভ্যন্তরভেদেন দ্বিবিধানি| তত্র গ্রন্থ্য্দীনাং শস্ত্রাদিভিরপকর্ষণং বাহ্যমপকর্ষণম্| বমনবিরেচনাদিনান্তঃস্থিতস্য দোষস্যাপকর্ষণমাভ্যন্তরম্| প্রকৃতিবিঘাতো দুষ্টস্য দোষাদের্দেহস্থস্য শমনং সাম্যকরম্| বহিঃপ্রযোগেণ দোষশমনমভ্যঙ্গাদি বাহ্যঃ প্রকৃতিবিঘাতঃ| যদ্ দ্রব্যমন্তর্মহাস্রোতঃ প্রবিশ্য দোষানক্ষোভযচ্ছমযতি তদাভ্যন্তরঃ প্রকৃতিবিঘাতঃ| এতচ্চ পাচনদীপনাদিনা সপ্তবিধং বক্ষ্যামঃ| নিদানত্যাগো যথাদোষং শীতাদিগুণানামাহারাদীনাং বর্জনম্| ব্যাযামাদিবর্জনং যথাদোষমেব| যথা শ্লেষ্মণি তত্সদৃশগুণানামাহারবিহারাদীনাং ত্যাগঃ| এবং বাতপিত্তযোরপি| প্রসঙ্গাদাহ-বাহ্যাপকর্ষণেন শস্ত্রাদিনা সাধ্যে গ্রন্থ্যাদৌ ব্যাধৌ ভেষজমৌষধমান্তরাপকর্ষণম্| প্রকৃতিবিঘাতো নিদানত্যাগশ্চোপযুজ্যতে| ন তু যথোক্তভেষজসাধ্যে গ্রহণীরোগাদৌ শস্ত্রাদি বাহ্যমপকর্ষণমনুক্রমতে| সোপযোগং ন ভবতীতি সম্বন্ধঃ||৫||

Adhikarana hetuviparItAdibhedenauShadhasya traividhyam (6) · Śloka 6

পুনরপি ত্রিবিধং হেতুবিপরীতং ব্যাধিবিপরীতমুভযার্থকারি চ| তত্র হেতুবিপরীতং গুরুস্নিগ্ধশীতাদিজে ব্যাধৌ লঘুরূক্ষোষ্ণাদি তথেতরস্মিন্নিতরত্| ব্যাধিবিপরীতং দ্বৌ মূলোপক্রমৌ লঙ্ঘনবৃংহণে| পঞ্চকর্মাণি বমনাদীনি সধূমধূপাঞ্জনাদীনি চ| তথা বিম্লাপনোপনাহনপাটনাদীনি| যচ্চ দোষশমনত্বে সত্যপি জ্বরে বিশেষতো হিতং মুস্তাপর্পটকং যবাগ্বশ্চ প্রমেহে রজনী যবান্নং চেত্যাদি| রক্তপিত্তে চোর্ধ্বগে বিরেচনমধোগে বমনম্||৬||

ইত্যপকর্ষণাদিভেদেনৌষধস্য ত্রৈবিধ্যমুক্ত্বা তস্যৈব হেতুবিপরীতত্বাদিনা ত্রৈবিধ্যমুচ্যতে| তত্র হেতুবিপরীতং যত্ ব্যাধিবিশেষাবিবক্ষাযাং ব্যাধিজনকদোষকারণবিপরীতগুণম্| যথা গুর্বাদিগুণযুক্তদ্রব্যজে ব্যাধৌ লঘ্বাদিগুণমৌষধম্| তথেতরস্মিন্ লঘ্বাদিজে ইতরত্ গুর্বাদি| ব্যাধিবিপরীতং তু যত্র হেতুবিশেষবিবক্ষা নাশ্রীযতে কেবলং যথোপদেশং স্ববিষযব্যাধিবিশেষেণোপযুজ্যতে| যথা দ্বৌ মূলোপক্রমৌ| লঙ্ঘনং বৃংহণং চ| পঞ্চকর্মাণি বমনাদীনি ক্রমেণ ধূমাদীনি চ| শস্ত্রাদি সাধ্যানাং চ গুল্মাদীনাং ব্যাধিবিপরীতং বিম্লাপনাদি| বিম্লাপনং বিলযনমুপনাহঃ পিণ্ডবন্ধঃ| ন কেবলমেতাবদেব ব্যাধিবিপরীতলক্ষণং যাবদিদমপি| যচ্চেতি সমুচ্চযে| যদ্ দ্রব্যং সত্যপি ব্যাধ্যারম্ভকদোষশমনত্বে ন তজ্জেষু সর্বব্যাধিষু তথা পথ্যম্| যথৈকস্মিন্নেব ব্যাধৌ দৃষ্টান্তো মুস্তাপর্পটকং যদ্যপি পিত্তশ্লেষ্মঘ্নং ন তথা গুল্মাদিষু পিত্তশ্লেষ্মজেষু হিতং যথা জ্বর ইতি| এবং যবাগ্বাদ্যপি যথাযথং বুদ্ধ্যা বিকল্প্য বাচ্যম্||৬||

Adhikarana hetuvyAdhiviparItArthakAryauShadham (7) · Śloka 7

উভযার্থকারি পুনর্দৈবব্যপাশ্রযমৌষধম্| তথা ছর্দ্যাং ছর্দনমতিসারে বিরেচনং, মদাত্যযে মদ্যপানং, তুত্থদগ্ধেঽগ্নিপ্রতপনং, পিত্তেঽন্তর্ন্নিগূঢে বিমার্গগে বা স্বেদঃ কট্বম্ললবণতীক্ষ্ণোষ্ণাভ্যবহারশ্চ বহিঃ প্রবর্ত্তনায স্বমার্গাপাদনায চ| শ্লেষ্মণি চান্তর্নিগূঢে স্তব্ধে বহিঃ শীতোপচারস্তত্পীডিতস্যোষ্মণোঽন্তঃপ্রবেশেন কফো বিলযতামুপযাতি| এবংবিধং হ্যবিপরীতমেব সদ্ভেষজং হেতুব্যাধিবিপরীতমর্থং করোতি||৭||

উভযার্থকারি যদুভযস্য হেতুবিপরীতস্য ব্যাধিবিপরীতস্য চ সম্বন্ধিনমর্থং রোগোপশমলক্ষণমেতদ্গুণমপি করোতি| তচ্চ দৈবব্যপাশ্রযং মণিমন্ত্রাদিকৃতম্| তথা রোগস্বভাবাদিবিপরীতস্বরূপমপি যদ্রোগোপশমনং করোতি তদুভযার্থকারি| যথা ছর্দ্যাং তত্স্বরূপমেব বমনমেবমপি স্ববুদ্ধ্যা বিকল্প্যম্| পিত্তে বান্তর্নিগূঢে স্বেদঃ শস্যতে| অবিপরীতোঽপি পিত্তাত্ কট্বাদিরসাভ্যবহারশ্চেতি যথাসঙ্খ্যেন প্রযোজনমন্তর্নিগূঢে বহিঃ প্রবর্ত্তনায বিমার্গগে স্বমার্গাপাদনাযাত্র তু স্বেদস্য পিত্তস্যাতিশযপ্রাপ্তেরৌষধত্বং ন তু শ্লেষ্মাদিপ্রতিবন্ধকনাশনেন স্বেদস্যেতি কামলাদৌ দৃশ্যতে| শ্লেষ্মণি চান্তর্নিগূঢ ইতি হেমন্তেঽগ্নিবলবত্ত্বযুক্ত্যা জ্ঞাযতে| এবমনেন প্রকারেণ রোগাদবিপরীতমপি বিপরীতার্থং রোগস্য নাশনং করোতীতি||৭||

Adhikarana anauShadhasya dvaividhyam (8) · Śloka 8

অনৌষধং পুনর্দ্বিবিধং বাধনমনুবাধনঞ্চ| তত্র সদ্যঃ প্রাণহরং বাধনম্| কালান্তরেণানুবাধনম্ ইতি||৮||

বহুভির্ভেদৈরৌষধমুক্ত্বাঽনৌষধমুচ্যতে| তচ্চ দ্বিবিধম্ ইত্যাদি সুবোধম্||৮||

Adhikarana pradhAnadravyANAM svarUpakathanapratij~jA (9) · Śloka 9

পরং চাতো রসবীর্যাদিভেদেন যথাস্থূলমৌষধৈকদেশ উপদিশ্যতে||৯||

অতঃ পরং প্রধানদ্রব্যাণাং রসাদিভেদৈঃ স্বরূপমুচ্যতে| অন্যেষাং রসাদ্যনুমাণাদ্রসভেদীযাদৌ বক্ষ্যামঃ||৯||

Adhikarana suvarNaguNAH (10) · Śloka 10

সুবর্ণং বৃংহণং স্নিগ্ধং মধুরং রসপাকযোঃ| বিষদোষহরং শীতং সকষাযং রসাযনম্||১০||

সুবর্ণমিত্যাদি সুবোধম্||১০||

Adhikarana rUpyaguNAH (11) · Śloka 11

রূপ্যং স্নিগ্ধং কষাযাম্লং বিপাকে মধুরং রসম্| বযসঃ স্থাপনং শীতং লেখনং বাতপিত্তজিত্|১১|

Adhikarana tAmraguNAH (11) · Śloka 11

তাম্রং সতিক্তমধুরং কষাযং লেখনং লঘু| কটুপাকরসং শীতং রোপণং কফপিত্তজিত্|১১|

Adhikarana kAMsyaguNAH (11) · Śloka 11

কাংস্যং কষাযানুরসং বিশদং লেখনং লঘু| দৃষ্টিপ্রসাদনং রূক্ষং তিক্তং পিত্তকফাহম্|১১|

Adhikarana trapu-sIsayorguNAH (11) · Śloka 11

সতিক্তলবণং ভেদি পাণ্ডুত্বকৃমিবাতনুত্| লেখনং পিত্তলং কিঞ্চিত্ত্রপুসীসঞ্চ তদ্গুণম্||১১||

ত্রপু তিক্তলবণাদিগুণং লেখনং কিঞ্চিত্ পিত্তলং চ| সীসং তদ্গুণং ত্রপুগুণম্||১১||

Adhikarana kRuShNalohasya guNAH (12) · Śloka 12

চক্ষুষ্যং কৃষ্ণলোহং তু কষাযং স্বাদু তিক্তকম্| লেখনং বাতলং শীতং কৃমিকুষ্ঠকফপ্রণুত্| গাত্রশৈথিল্যপালিত্যপাণ্ডুঘ্নং শোষশোফজিত্| তদ্বত্তীক্ষ্ণং বিশেষেণ তদ্বিকাষি সুদুর্জরম্|১২|

Adhikarana padmarAgAdiguNAH (12) · Śloka 12

পদ্মরাগমহানীলপুষ্পরাগাবিদূরকাঃ| মুক্তাবিদ্রুমবজ্রেন্দ্রবৈডূর্যস্ফটিকাদিকম্| মণিরত্নং সরং শীতং কষাযং স্বাদুলেখনম্| চক্ষুষ্যং ধারণাত্তত্তু পাপ্মালক্ষ্মীবিষাপহম্| ধন্যমাযুষ্যমোজস্যং হর্ষোত্সাহকরং শিবম্||১২||

মুক্তাদযঃ সর্বে মণযো বৈডূর্যানি চ রত্নানি শৈত্যাদিগুণযুক্তানি শিরঃপ্রভৃতিষু ধারণাত্ পাপ্মাদিনাশনানি||১২||

Adhikarana kAcaguNAH (13) · Śloka 13

সক্ষার উষ্ণবীর্যশ্চ কাচো দৃষ্টিকৃদঞ্জনাত্|১৩|

অন্যত্ সুবোধম্||১৩||

Adhikarana sha~gkha-udadhimalayorguNAH (13) · Śloka 13

শঙ্খোদধিমলৌ শীতৌ কষাযাবতিলেখনৌ|১৩|

Adhikarana tutthakaguNAH (13) · Śloka 13

তুত্থকং কটু সক্ষারং কষাযং বিশদং লঘু| লেখনং ভেদি চক্ষুষ্যং কণ্ডূকৃমিবিষাপহম্|১৩|

Adhikarana gairikaguNAH (13) · Śloka 13

বিশদো গৈরিকঃ স্নিগ্ধঃ কষাযমধুরো হিমঃ|১৩|

Adhikarana manohvAguNAH (13) · Śloka 13

কফঘ্নী তিক্তকটুকা মনোহ্বা লেখনী সরা||১৩||

Adhikarana haritAlaguNAH (14) · Śloka 14

স্নিগ্ধং কষাযকটুকং হরিতালং বিষপ্রণুত্| স্রোতোঽঞ্জনাত্সৌবীরাঞ্জনস্য শ্রেষ্ঠত্বম্ কষাযং মধুরং শীতং লেখনং স্নিগ্ধমঞ্জনম্| রক্তপিত্তবিষচ্ছর্দিহিধ্মাঘ্নং দৃক্প্রসাদনম্| স্রোতোঽঞ্জনং বরং তত্র ততঃ সৌবীরকাঞ্জনম্||১৪||

উদধিমলং সমুদ্রফেনম্| সৌবীরমঞ্জনং কষাযত্বাদিগুণযুক্তং তস্য জাতিবিশেষাত্স্রোতোঞ্জনাদিনামবিশেষঃ| তত্র অঞ্জনজাতিষু মধ্যে স্রোতোঞ্জনং শ্রেষ্ঠং ততোঽপি সৌবীরম্||১৪||

Adhikarana rasA~jjanaguNAH (15) · Śloka 15

কফঘ্নং তিক্তকটুকং ছেদি সোষ্ণং রসাঞ্জনম্||১৫||

রসাঞ্জনং তার্ক্ষ্যশৈলম্| দারুহরিদ্রাবিকারঃ কফঘ্নত্বাদিযুক্তঃ||১৫||

Adhikarana shilAjatuguNAH (16) · Śloka 16

স্বাদু হিধ্মাপ্রশমনং কাসমেহক্ষযাপহম্| কফঘ্নমুষ্ণং কটুকং শিলাজতু রসাযনম্| তিক্তঞ্চ ছেদনং যোগবাহিত্বাত্সর্বরোগজিত্| বিশেষাত্ কৃচ্ছ্রমেহার্শঃপাণ্ডুশোফকফাপহম্|১৬|

Adhikarana vaMsharocanAguNAH (16) · Śloka 16

কষাযা মধুরা রূক্ষা কাসঘ্নী বংশরোচনা|১৬|

Adhikarana tugAkShIrIguNAH (16) · Śloka 16

তুগাক্ষীরী ক্ষযশ্বাসকাসঘ্নী মধুরা হিমা|১৬|

Adhikarana lavaNasAmAnyaguNAH (16) · Śloka 16

বিষ্যন্দি লবণং সর্বং সূক্ষ্মং সৃষ্টমলং বিদুঃ| বাতঘ্নং পাকি তীক্ষ্ণোষ্ণং রোচনং কফপিত্তকৃত্||১৬||

বিষ্যন্দীত্যাদিনা পাংসূত্থান্তানাং সর্বেষাং লবণানাং সামান্যগুণাঃ| পাকী পাচকস্য স্বভাবঃ||১৬||

Adhikarana saindhavaguNAH (17) · Śloka 17

সৈন্ধবং তত্র সস্বাদু বৃষ্যং হৃদ্যং ত্রিদোষনুত্| লঘ্বনুষ্ণং দৃশঃ পথ্যমবিদাহ্যগ্নিদীপনম্||১৭||

সৈন্ধবমিত্যাদি লবণবিশেষগুণাঃ| অত্র চোত্সর্গাপবাদোপবৃংহকবচনাদি সর্বং স্ববুদ্ধ্যা কল্পনীযম্||১৭||

Adhikarana sauvarcalaguNAH (18) · Śloka 18

লঘু সৌবর্চলং হৃদ্যং সুগন্ধ্যুদ্গারশোধনম্| কটুপাকং বিবন্ধঘ্নং দীপনীযং রুচিপ্রদম্|১৮|

Adhikarana viDguNAH (18) · Śloka 18

ঊর্ধ্বাধঃ কফবাতানুলোমনং দীপনং বিডম্| বিবন্ধানাহবিষ্টম্ভশূলগৌরবনাশনম্|১৮|

Adhikarana sAmudralavaNaguNAH (18) · Śloka 18

বিপাকে স্বাদু সামুদ্রং গুরু শ্লেষ্মবিবর্ধনম্|১৮|

Adhikarana audBidalavaNaguNAH (18) · Śloka 18

সতিক্তকটুকক্ষারং তীক্ষ্ণমুত্ক্লেদি চৌদ্ভিদম্||১৮||

উত্ক্লেদি রক্তং মাংসং চ ক্লেদযতি||১৮||

Adhikarana kRuShNalavaNaguNAH (19) · Śloka 19

কৃষ্ণে সৌবর্চলগুণা লবণে গন্ধবর্জিতাঃ|১৯|

Adhikarana romakalavaNaguNAH (19) · Śloka 19

রোমকং লঘু পাংসূত্থং সক্ষারং শ্লেষ্মলং গুরু|১৯|

Adhikarana lavaNaprayoge kramanirdeshaH (19) · Śloka 19

লবণানাং প্রযোগে তু সৈন্ধবাদীন্ প্রযোজযেত্||১৯||

যত্র ত্বেকং লবণং দ্বে লবণে ত্রীণি লবণানীত্যাদি সংখ্যযা প্রযোগঃ তত্র সৈন্ধবাদির্যথাস্থিতক্রমো যোজ্যঃ| সৈন্ধবম্, সৈন্ধবসৌবর্চলে, সৈন্ধবসৌবর্চলবিডান্যেবমন্যেঽপি||১৯||

Adhikarana yavakShAraguNAH (20) · Śloka 20

গুল্মহৃদ্ গ্রহণীপাণ্ডুপ্লীহানাহগলামযান্| শ্বাসার্শঃ কফবাতাংশ্চ শমযেদ্যবশূকজঃ||২০||

যবক্ষারো গুল্মাদিনাশনঃ||২০||

Adhikarana svarjikAkShAraguNAHsarvakShAraguNAH (21) · Śloka 21

স্বর্জিকা তদ্গুণান্ন্যূনা ক্ষারেণ তু ততোঽধিকা| ক্ষারঃ সর্বশ্চ পরমং তীক্ষ্ণোষ্ণঃ কৃমিজিল্লঘুঃ| পিত্তাসৃগ্দূষণঃ পাকী ছেদ্যহৃদ্যো বিদারণঃ| অপথ্যঃ কটুলাবণ্যাচ্ছুক্রৌজঃ কেশচক্ষুষাম্||২১||

সর্বশ্চ স্বর্জিকাদিঃ ক্ষারোঽত্যর্থতীক্ষ্ণত্বাদিযুক্তঃ||২১||

Adhikarana harItakIguNAH (22) · Śloka 22

কষাযা মধুরা পাকে রূক্ষা বিলবণা লঘুঃ| দীপনী পাচনী মেধ্যা বযসঃ স্থাপনী পরম্| উষ্ণবীর্যা সরাযুষ্যা বুদ্ধীন্দ্রিযবলপ্রদা| কুষ্ঠবৈবর্ণ্যবৈস্বর্যপুরাণবিষমজ্বরান্| শিরোঽক্ষিপাণ্ডুহৃদ্রোগকামলাগ্রহণীগদান্| সশোষশোফাতীসারমেহমোহবমিক্রিমীন্| শ্বাসকাসপ্রসেকার্শঃপ্লীহানাহগরোদরম্| বিবন্ধং স্রোতসাং গুল্মমূরুস্তম্ভমরোচকম্| হরীতকরী জযেদ্ব্যাধীংস্তাংস্তাংশ্চ কফবাতজান্||২২||

হরীতকী কষাযত্বাদিগুণযুক্তা| বিলবণা ইতি লবণরসবর্জিতা| বলাদুক্তং ভবতি পঞ্চরসা ইতি| তত্রাপি কষাযোঽধিকঃ| সা হরীতকী কুষ্ঠাদীনন্যাংশ্চ রোগান্ বাতশ্লেষ্মোদ্ভবান্ নাশযতি||২২||

Adhikarana AmalakaguNAH (23) · Śloka 23

তদ্বদামলকং শীতং মাধুর্যাত্ পিত্তজিত্পরম্| কফং কটুবিপাকিত্বাদম্লত্বান্মারুতঞ্জযেত্| পরং চ কণ্ঠ্যং চক্ষুষ্যং হৃদ্যং দাহজ্বরাপহম্||২৩||

আমলকং তদ্বত্, গুণৈর্হরীতকীসদৃশমিত্যর্থঃ||২৩||

Adhikarana bibhItakaguNAH (24) · Śloka 24

অক্ষন্তু তদ্গুণান্ন্যূনং কষাযমধুরং হিমম্| কাসশ্বাসগলশ্লেষ্মপিত্তশুক্রহরং লঘু| পরং কেশ্যস্তু তন্মজ্জা শুক্রঘ্নঞ্চ ততোঽঞ্জনম্||২৪||

অক্ষং বিভীতকং কটুবিপাকিত্বাদিগুণযুক্তং ইর্ষচ্চ তদ্গুণং হরীতকীগুণযুক্তমিত্যর্থঃ||২৪||

Adhikarana triphalAguNAH (25) · Śloka 25

ইযং রসাযনবরা ত্রিফলাক্ষ্যামযাপহা| রোপণী ত্বগ্গদক্লেদমেদোমেহকফাস্রজিত্||২৫||

ইযং ত্রিফলা হরীতক্যামলকবিভীতকসমাহারঃ||২৫||

Adhikarana trijAtakacaturjAtakayorguNAH (26) · Śloka 26

সকেসরং চতুর্জাতং ত্বক্পত্রৈলং ত্রিজাতকম্| পিত্তপ্রকোপি তীক্ষ্ণোষ্ণং রূক্ষং রোচনদীপনম্| (পত্রকং কফবাতঘ্নং ত্রিসুগন্ধি ত্রিজাতকম্| কেসরং রক্তগুদজবিষপিত্তকফাপহম্| তদ্যুক্তং তচ্চতুর্জাতং নাতিশীতোষ্ণমুচ্যতে)||২৬||

ত্বগাদিত্রযং ত্রিজাতকসংজ্ঞমেতদেব নাগকেসরযুক্তং চতুর্জাতকম্| সুবোধম্||২৬||

Adhikarana maricaguNAH (27) · Śloka 27

রসে পাকে চ কটুকং কফঘ্নং মরিচং লঘু||২৭||

মরিচং রসপাকযোঃ কটুকং কফঘ্নত্বাদিযুক্তং চ||২৭||

Adhikarana ArdrapippalIguNAH (28) · Śloka 28

শ্লেষ্মলা স্বাদুশীতার্দ্রা গুর্বী স্নিগ্ধা চ পিপ্পলী||২৮||

আর্দ্রা পিপ্পলী শ্লেষ্মলাদিগুণা||২৮||

Adhikarana shuShkapippalIguNAH (29) · Śloka 29

সা শুষ্কা বিপরীতাতঃ স্নিগ্ধা বৃষ্যা রসে কটুঃ| স্বাদুপাকানিলশ্লেষ্মশ্বাসকাসাপহা সরা|২৯|

Adhikarana pippalyA atyupayoganiShedho~apavAdashca (29) · Śloka 29

ন তামত্যুপযুঞ্জীত রসাযনবিধিং বিনা||২৯||

সা পিপ্প্পলী শুষ্কা অতঃ আর্দ্রীযাঃ সকাশাত্ বিপরীতাস্নিগ্ধত্বাদিগুণযুক্তা চ| এবংবিধামপি তাং চ পিপ্পলীমতিযোগেন নোপযুঞ্জীত বিনা রসাযনবিধিনা||২৯||

Adhikarana nAgaraguNAH ArdrakaguNAshca (30) · Śloka 30

নাগরং দীপনং বৃষ্যং গ্রাহি হৃদ্যং বিবন্ধনুত্| রুচ্যং লঘু স্বাদুপাকং স্নিগ্ধোষ্ণং কফবাতজিত্| তদ্বদার্দ্রকমেতচ্চ ত্রযং ত্রিকটুকং জযেত্| স্থৌল্যাগ্নিসদনশ্বাসকাসশ্লীপদপীনসান্||৩০||

এতচ্চ ত্রযং মরিচপিপ্পলীনাগরসংজ্ঞকং ত্রিকটুকসংজ্ঞম্||৩০||

Adhikarana cavikApippalImUlaguNAH (31) · Śloka 31

চবিকা পিপ্পলীমূলং মরিচাল্পান্তরং গুণৈঃ||৩১||

চবিকা পিপ্পলীমূলং চ মরিচাত্ ক্রমেণাল্পগুণম্||৩১||

Adhikarana citrakaguNAH (32) · Śloka 32

চিত্রকোঽগ্নিসমঃ পাকে শোফার্শঃ কৃমিকুষ্ঠহা||৩২||

চিত্রকঃ পাকে পাককর্তৃত্বেঽগ্নিসমঃ||৩২||

Adhikarana pa~jcakolaguNAH (33) · Śloka 33

পঞ্চকোলকমেতচ্চ মরিচেন বিনা স্মৃতম্| গুল্মপ্লীহোদরানাহশূলঘ্নং দীপনং পরম্||৩৩||

এতত্ পিপ্পল্যাদিচিত্রকান্তং পঞ্চকোলসংজ্ঞিতম্||৩৩||

Adhikarana bRuhatpa~jcamUlaguNAH (34) · Śloka 34

বিল্বকাশ্মর্যতর্কারীপাটলাটুণ্টুকৈর্মহত্| জযেত্কষাযং তিক্তোষ্ণং পঞ্চমূলং কফানিলৌ||৩৪||

Adhikarana hrasvapa~jcamUlaguNAH (2) · Śloka 2

হ্রস্বং বৃহত্যংশুমতীদ্বযগোক্ষুরকৈঃ স্মৃতম্| স্বাদুপাকরসং নাতিশীতোষ্ণং সর্বদোষজিত্||২||

Adhikarana madhyamapa~jcamUlaguNAH (34) · Śloka 34

বলাপুনর্নবৈরণ্ডশূর্পপর্ণীদ্বযেন চ| মধ্যমং কফবাতঘ্নং নাতিপিত্তকরং লঘু|৩৪|

Adhikarana jIvanapa~jcamUlaguNAH (34) · Śloka 34

অভীরুবীরাজীবন্তীজীবকর্ষভকৈঃ স্মৃতম্| জীবনাখ্যং তু চক্ষুষ্যং বৃষ্যং পিত্তানিলাপহম্|৩৪|

Adhikarana tRuNapa~jcamUlaguNAH (34) · Śloka 34

তৃণাখ্যং শরদর্ভেক্ষুশালিকাশৈস্তু পিত্তজিত্| অজশৃঙ্গী হরিদ্রা চ বিদারী সারিবাঽমৃতাঃ|৩৪|

Adhikarana vallIkaNTakapa~jcamUlayorguNAH (34) · Śloka 34

বল্ল্যাখ্যং কণ্টকাখ্যং তু শ্বদংষ্ট্রাঽভীরুসৈর্যকৈঃ| সহিংস্রাকরমর্দীকৈঃ সর্বদোষহরে চ তে||৩৪||

মিশ্রীভাবাত্ বিল্বাদিকং মহত্ পঞ্চমূলং বাতশ্লেষ্মাণৌ জযেত্ কষাযত্বাদিগুণযুক্তঞ্চ| বৃহত্যাদিপঞ্চমূলঞ্চ হ্রস্বং মধুররসত্বাদিগুণযুক্তং চ| বলাদি মধ্যমং কফবাতঘ্নত্বাদিযুক্তম্| অভীর্বাদি জীবনং নাম পঞ্চমূলং চক্ষুষ্যত্বাদিযুক্তম্| দর্ভাদিতৃণপঞ্চমূলসংজ্ঞিতং পিত্তজিত্| অজশৃঙ্গ্যাদিপঞ্চমূলং বল্লীনাম সর্বদোষহরম্| শ্বদংষ্ট্রাদি কণ্টকনাম| এতচ্চ সর্বদোষহরম্|

Adhikarana kAravyAdiguNAH (35) · Śloka 35

কারবী কুঞ্চিবাজাজীকবরীধান্যতুম্বুরু| অন্নগন্ধহরং রুচ্যং দীপনং কফবাতজিত্||৩৫||

কারব্যাদি প্রত্যেকমন্নানামাহার্যাণাং দুর্গন্ধং নাশযতি||৩৫||

Adhikarana bAShpikArAjikayorguNAH (36) · Śloka 36

বাষ্পিকা কটুতিক্তোষ্ণা কৃমিশ্লেষ্মহরা পরম্| তদ্বচ্চ রাজিকা বিঘ্নসাদনী দীপনী পরা| শূলাটোপহরা রুচ্যা..........................||৩৬||

বাষ্পিকা কটুকত্বাদিযুক্তা| রাজিকা বাষ্পিকাসদৃশগুণা||

Adhikarana dIpyakaguNAH (37) · Śloka 37

...............দীপ্যকঃ কোষ্ঠশূলজিত্|৩৭|

Adhikarana sarShapaguNAH (37) · Śloka 37

অহৃদ্যাঃ সর্ষপাঃ স্নিগ্ধা বাষ্পিকাবচ্চ কীর্ত্তিতাঃ|৩৭|

Adhikarana hi~gguguNAH (37) · Śloka 37

হিঙ্গু বাতকফানাহশূলঘ্নং পিত্তকোপনম্| কটুপাকরসং রুচ্যং দীপনং পাচনং লঘু| পিত্তাস্রকোপি তচ্চৈব শ্রেষ্ঠং বোষ্কাণদেশজম্| ততো ন্যূনগুণং ত্বন্যদ্দ্রব্যব্যঞ্জনধূপনম্|৩৭|

Adhikarana shatAhvAdInAM guNAH (37) · Śloka 37

শতাহ্বাকুষ্ঠতগরসুরদারুহরেণবঃ| এলৈলবালুসরলত্বগ্ব্যাঘ্রনখচোরকাঃ| লঘূষ্ণাঃ কটুকাঃ পাকে কফবাতনিবর্হণাঃ|৩৭|

Adhikarana sairyakaguNAH (37) · Śloka 37

সৈর্যকস্তিক্তমধুরঃ স্নিগ্ধোষ্ণঃ কফবাতজিত্|৩৭|

Adhikarana gokShurakaguNAH (37) · Śloka 37

বস্তিমূত্রবিবন্ধঘ্নো বৃষ্যো গোক্ষুরকো হিমঃ|৩৭|

Adhikarana viShAdvayaguNAH (37) · Śloka 37

পাচনং কফপিত্তঘ্নং তিক্তং শীতং বিষাদ্বযম্||৩৭||

বিষাদ্বযমতিবিষা প্রতিবিষা চ||৩৭||

Adhikarana mustaguNAH (38) · Śloka 38

কফঘ্নং তিক্তকটুকং মুস্তং সংগ্রাহি পাচনম্|৩৮|

Adhikarana amRutAguNAH (38) · Śloka 38

তিক্তাঽমৃতা ত্রিদোষঘ্নী গ্রাহিণ্যুষ্ণা রসাযনী| দীপনী জ্বরতৃড্দাহকামলাবাতরক্তনুত্|৩৮|

Adhikarana bhUnimbaparpaTayorguNAH (38) · Śloka 38

তিক্তশীতৌ জ্বরহরৌ লঘূ ভূনিম্বপর্পটৌ|৩৮|

Adhikarana nimbaguNAH (38) · Śloka 38

নিম্বস্তিক্তো হিমঃ কুষ্ঠকৃমিপিত্তকফাপহঃ|৩৮|

Adhikarana mahAnimbaguNAH (38) · Śloka 38

মহানিম্বঃ পরং গ্রাহী কষাযো রূক্ষশীতলঃ|৩৮|

Adhikarana gugguluguNAH (38) · Śloka 38

গুগ্গুলুঃ পিচ্ছিলস্পর্শে বিশদোঽভ্যবহারতঃ| সস্বাদুঃ সকটুস্তিক্তঃ সকষাযো রসাযনম্| বর্ণ্যঃ স্বর্যঃ কটুঃ পাকে রূক্ষঃ সূক্ষ্মোঽগ্নিদীপনঃ| ক্লেদমেদোনিলশ্লেষ্মগণ্ডমেহাপচীক্রিমীন্| পিটকাগ্রন্থিশোফাংশ্চ হন্ত্যুষ্ণঃ স্রংসনো লঘুঃ||৩৮||

গুগ্গুলুঃ স্পর্শে পিচ্ছিলঃ অভ্যবহারাত্তু স্রোতোবৈশদ্যকৃত্| তথা স্বাদুরসত্বাদিযুক্তঃ স্রংসনোঽনুলোমনঃ||৩৮||

Adhikarana sha~gKapuShpIguNAH (39) · Śloka 39

শঙ্খপুষ্পী সরা তিক্তা মেধ্যা কৃমিবিষাপহা|৩৯|

Adhikarana aguruguNAH (39) · Śloka 39

কটুতিক্তোষ্ণমগুরু স্নিগ্ধং বাতকফাপহম্| পিত্তাস্রবিষতৃড্দাহক্লমঘ্নং গুরু রূক্ষণম্|৩৯|

Adhikarana caMdanasAmAnyaguNAH (39) · Śloka 39

সর্বং সতিক্তমধুরং চন্দনং শিশিরং পরম্| লঘু রক্তম্......................||৩৯||

সর্বং চন্দনং শ্বেতং রক্তং পীতং চ তিক্তরসত্বাদিযুক্তম্| তেভ্যো রক্তচন্দনং লঘু| বলাদুক্তং ভবতি শেষে গুরুণী ইতি||৩৯||

Adhikarana ushIravAlakayorguNAH (40) · Śloka 40

..............তথোশীরং বালকং পাচনং চ তত্| জ্বরাতিসারবমথুরক্তপিত্তক্ষতাপহম্||৪০||

উশীরং বালকং চ তথৈব রক্তচন্দনবদ্ গুণৈর্বিজ্ঞেযং জ্বরাদিনাশনঞ্চ||৪০||

Adhikarana madhukaguNAH (41) · Śloka 41

মধুকং রক্তপিত্তঘ্নং ব্রণশোধনরোপণম্| গুরু স্বাদু হিমং বৃষ্যং চক্ষুষ্যং স্বরবর্ণকৃত্||৪১||

সুবোধম্||৪১||

Adhikarana nishAdvayaguNAH (42) · Śloka 42

কটুতিক্তে নিশে কুষ্ঠমেহপিত্তকফাপহে| প্রলেপাজ্জযতঃ কণ্ডূং শোফং দুষ্টব্রণং বিষম্|৪২|

নিশে দ্বে পিণ্ডহরিদ্রা দারুহরিদ্রা চ||৪২||

Adhikarana prapauNDarIkaguNAH (42) · Śloka 42

প্রপৌণ্ডরীকং চক্ষুষ্যং শিশিরং ব্রণরোপণম্| কষাযতিক্তমধুরং রক্তপিত্তপ্রসাদনম্|৪২|

Adhikarana balAtrayaguNAH (42) · Śloka 42

বলাত্রযং স্বাদু বৃষ্যং স্নিগ্ধং শীতং বলপ্রদম্|৪২|

Adhikarana nAgabalAguNAH (42) · Śloka 42

তত্র নাগবলা বল্যা ক্ষতক্ষীণহিতা গুরুঃ||৪২||

Adhikarana tAmbUlaguNAH (43) · Śloka 43

তাম্বূলং কটু সক্ষারং রুচ্যমুষ্ণং কফপ্রণুত্||৪৩||

তাম্বূলং তাম্বূলীলতাপত্রং সক্ষারমীষত্ ক্ষারগুণযুক্তম্|

Adhikarana pUgaguNAH (44) · Śloka 44

ভেদি সম্মোহকৃত্ পূগং কষাযং স্বাদু রোচনম্|৪৪|

সুবোধম্||৪৪||

Adhikarana jAtipatryAdInAM guNAH (44) · Śloka 44

জাতিপত্রী কটুফলং কঙ্কোলকলবঙ্গকম্| লঘু তৃষ্ণাপহং হৃদ্যং বক্ত্রদৌর্গন্ধ্যনাশনম্||৪৪||

Adhikarana karpUraguNAH (1) · Śloka 1

সস্বাদুতিক্তস্তৃষ্ণাঘ্নঃ কর্পূরশ্ছেদনো হিমঃ||১||

Adhikarana latAkastUrikAguNAH (44) · Śloka 44

লতাকস্তূরিকা তদ্বন্মুখশোষহরা পরম্|৪৪|

Adhikarana padmAdInAM guNAH (44) · Śloka 44

কষাযমধুরং শীতং পদ্মং পিত্তকফাস্রজিত্| তদ্বদ্বকুলপুন্নাগকুমুদোত্পলপাটলম্||৪৪||

Adhikarana campakAdInAM guNAH (45) · Śloka 45

সচম্পকং ততো ন্যূনং গুণৈঃ কোরণ্ডকিংশুকম্| মালতীমল্লিকাপুষ্পং তিক্তং জযতি মারুতম্||৪৫||

কোরণ্ডং কিংশুকং চ পদ্মাদূনগুণম্||৪৫||

Adhikarana nAgakesarasindhuvArayorguNAH (46) · Śloka 46

বিষপিত্তকফান্নাগং সিন্দুবারং চ তদ্গুণম্||৪৬||

নাগং নাগপুষ্পম্||৪৬||

Adhikarana ketakIshirIShapuShpayoH guNAH (47) · Śloka 47

কফঘ্নং কৈতকং তিক্তং শৈরীষং বিষহারি চ|৪৭|

Adhikarana agastyapuShpaguNAH (47) · Śloka 47

বাতলং পুষ্পমাগস্ত্যং কষাযং কফপিত্তজিত্| চতুর্থিকজ্বরহরং নাবনেনোপযোজিতম্|৪৭|

Adhikarana bandhUkayUthikApuShpayorguNAH (47) · Śloka 47

বন্ধূকং শ্লেষ্মলং গ্রাহি তদ্বদেব চ যূথিকা|৪৭|

Adhikarana ku~gkumaguNAH (47) · Śloka 47

কফঘ্নমুষ্ণবীর্যং চ কুঙ্কুমং ব্রণশোধনম্|৪৭|

Adhikarana avalgujaiDagajabIjayorguNAH (47) · Śloka 47

অবল্গ্বেডকজং বীজং কটিবাতকফপ্রণুত্|৪৭|

Adhikarana AsyA-adhva-caMkramaNa-guNAH (47) · Śloka 47

আস্যা বর্ণশ্লেষ্মমেদঃ সৌকুমার্যকৃদন্যথা| অতোঽধ্বাগ্নিবলাযূংষি কুর্যাচ্চঙ্ক্রমণং সুখম্| মারুতস্যানুলোম্যং চ খুডস্তম্ভশ্রমাপহম্||৪৭||

আস্যা নিষ্ক্রিযস্যাসনে অভ্যাসঃ বর্ণকৃত্বাদিগুণযুক্তা| অধ্বা এতদ্বিপরীতগুণঃ| চঙ্ক্রমণমগ্নিবৃদ্ধ্যাদিকরং মারুতস্য বাযোরানুলোম্যং চ করোতি||৪৭||

Adhikarana pAdatraguNAH (48) · Śloka 48

অন্বর্থসংজ্ঞং পাদত্রং বলদৃক্শুক্রবর্দ্ধনম্||৪৮||

পাদত্রমন্বর্থসংজ্ঞং পাদরক্ষণমিত্যর্থঃ| তচ্চ খুডাদিনাশনম্||৪৮||

Adhikarana chatraguNAH (49) · Śloka 49

বর্ণ্যং নেত্রহিতং ছত্রং বাতবর্ষাতপাপহম্||৪৯||

Adhikarana pravAta- apravAtayorguNAH (50) · Śloka 50

প্রবাতো রৌক্ষ্যবৈবর্ণ্যস্তম্ভকৃদ্দাহতৃড্ভ্রমান্| শ্রমাগ্নিমূর্চ্ছাংশ্চ জযেদপ্রবাতস্ত্বতোঽন্যথা||৫০||

প্রবাতঃ প্রদেশো যত্র প্রকৃষ্টো বাতঃ স রৌক্ষ্যাদিগুণযুক্তঃ| দাহাদিকং চ জযেত্| এতদ্বিপরীতগুণোঽপ্রবাতঃ||৫০||

Adhikarana prAgvAtaguNAH (51) · Śloka 51

প্রাগ্বাযুরুষ্ণোঽভিষ্যন্দি ত্বগ্দোষার্শোবিষক্রিমীন্| সন্নিপাতজ্বরং শ্বাসমামং বাযুং চ কোপযেত্|৫১|

Adhikarana pashcimavAtaguNAH (51) · Śloka 51

পশ্চিমঃ শিশিরো হন্তি মূর্চ্ছাং দাহং তৃষং বিষম্|৫১|

Adhikarana dakShiNamArutaguNAH (51) · Śloka 51

দক্ষিণো মারুতঃ শ্রেষ্ঠো নেত্র্যোঽঙ্গবলবর্ধনঃ| রক্তপিত্তপ্রশমনো ন চ বাতপ্রকোপনঃ|৫১|

Adhikarana uttaravAtaguNAH (51) · Śloka 51

উত্তরো মারুতঃ স্নিগ্ধো মৃদুর্মধুর এব চ| কষাযানুরসঃ শীতো দোষাণামপ্রকোপনঃ|৫১|

Adhikarana AtapAdInAM guNAH (51) · Śloka 51

আতপো ভ্রমতৃট্স্বেদদাহমূর্চ্ছাবিবর্ণতাঃ| কুর্যাত্ পিত্ত্তাস্রবহ্নিংশ্চ ছাযা চৈতানপোহতি| তমঃ কষাযকটুকং জ্যোত্স্না মধুরশীলতা||৫১||

ছাযা ত্বেতান্ ভ্রমাদীন্ ব্যপোহতি| অদ্রব্যাণাং গুণনির্দেশস্তদ্গুণশারীরদ্রব্যাভিবৃদ্ধিনাশহেতুত্বপ্রদর্শনায|| ৫১||

Adhikarana tamasaH guNAH (52) · Śloka 52

তমঃ কষাকটুকং জ্যোত্স্না মধুরশীলতা|৫২|

Adhikarana upasaMhAraH (12) · Śloka 12

ভবতি চাত্র- রসাদিভেদৈরিতি ভেষজানাং দিঙ্মাত্রমুক্তন্ন যতোঽস্তি কিঞ্চিত্| অনৌষধং দ্রব্যমিহাববোধো রূপস্য তেষাং বনগোচরেভ্যঃ||৫২|| ইতি শ্রীবৈদ্যপতিসিংহগুপ্তস্য সূনোর্বাগ্ভটস্য কৃতাবষ্টাঙ্গসংগ্রহসংহিতাযাং সূত্রস্থানে বিবিধৌষধবিজ্ঞানীযো নাম দ্বাদশোঽধ্যাযঃ||১২||

রসাদীনাং রসবীর্যবিপাকপ্রভাবানাং ভেদৈঃ পরস্পরং সংযোগপ্রকারৈর্ভেষজানামৌষধানাং দিঙ্মাত্রমুক্তং মার্গো দর্শিতঃ যতো ন কিঞ্চিদনৌষধমস্তি| বিষং মারণাত্মকমপি কার্যেষূপযুজ্যতে| যত্ত্বনৌষধং পূর্বমুক্তং তন্মাত্রাবস্থাকালাদিবশাত্| তেষাং চ ভেষজানাং রূপাববোধো বনগোচরেভ্যো গোপতাপসাদিভ্যো বৈদ্যস্য নিষ্পদ্যতে||৫২|| ইতি শ্রীমন্মহামহোপাধ্যাযেন্দুবিরচিতাযা-মষ্টাঙ্গসংগ্রহব্যাখ্যাযাং শশিলেখাযাং সূত্রস্থানে দ্বাদশোঽধ্যাযঃ||১২||