37. śalyāharaṇavidhiḥ

Adhikarana atha shalyAharaNavidhirnAma saptatriMsho~adhyAyaH pratij~jA (1) · Śloka 1

অথাতঃ শল্যাহরণবিধিং নামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

শল্যানাং লোহরক্তাদীনামাহরণ উপায উক্তো যন্ত্রশস্ত্রাণি| ন ত্বাহরণবিধানমতস্তদ্বিজ্ঞানার্থমধ্যাযারম্ভঃ|| ১||

Adhikarana shalyagatiBedAH (2) · Śloka 2

ত্রিবিধা হি গতিঃ শল্যানামুর্ধ্বমধস্তির্যক্ চ| সা পুনঃ প্রত্যেকমৃজুবক্রভেদেন দ্বিধা||২||

সর্বশল্যানামূর্ধ্বাদিভেদেন শরীরে ত্রিবিধা গতির্গমনম্| তত্রোত্তমাঙ্গাভিমুখা ঊর্ধ্বগতিঃ| পাদাভিমুখা ত্বধোগতিঃ| অঙ্গপার্শ্বগমনং তির্যগ্গতিঃ| ঋজু কৃত্বা যত্ প্রবেশনং শল্যস্য সা ঋজ্বী গতিঃ| প্রবিষ্টস্যান্তঃস্বাবযবৈঃ কুটিলীভবনং কুটিলা গতিঃ|| ২||

Adhikarana sashalyavraNalakShaNam (3) · Śloka 3

তত্র ধ্যামং পিটকাচিতং শোফবেদনাবন্তং মুহুর্মুহুঃ শোণিতাস্ত্রাবিণং বুদ্বুদবদুদ্গতং মৃদুমাংসঞ্চ ব্রণং সশল্যং বিদ্যাত্||৩||

তত্র ধ্যামত্বাদিযুক্তং ব্রণং সশল্যমন্তশ্শল্যং বিদ্যাদিতি সম্বন্ধঃ| উদ্গতমুদ্গতৌষ্ঠমিতি সামান্যেন সশল্যব্রণলক্ষণম্||৩||

Adhikarana tvagAdigatashalyalakShaNAni (4) · Śloka 4

বিশেষতস্তু ত্বগ্গতে শল্যে বিবর্ণঃ শোফো ভবত্যাযতঃ কঠিনশ্চ| মাংসগতে শোফাভিবৃদ্ধিঃ শল্যমার্গানুপসংরোহঃ পীডনাসহিষ্ণুতা চোষঃ পাকশ্চ| পেশ্যন্তরস্থে শোফবর্জ্যং মাংসপ্রাপ্তবত্| সিরাগতে সিরাধ্মানং শূলঞ্চ| স্নাবগতে স্নাবজালাবক্ষেপণং সংরম্ভশ্চোগ্ররুক্| স্রোতোগতে স্রোতসাং স্বকর্মগুণহানিঃ| ধমনীস্থে সফেনং রক্তমীরযন্ননিলঃ| সশব্দো নির্গচ্ছত্যঙ্গপীডাহৃল্লাসশ্চ| অস্থিগতে বিবিধা বেদনাঃ শোফশ্চ| সন্ধিগতেঽস্থিবচ্চেষ্টোপরোধশ্চ| অস্থিসন্ধিগতেঽস্থিপূর্ণতা সঙ্ঘর্ষে বলবাংশ্চ||৪||

বিশেষস্তসু ত্বগ্গত ইত্যাদিনোচ্যতে| শল্যমার্গো যেন শল্যং প্রবিষ্টং তস্যানুপরোহস্তথাবস্থানম্| চোষঃ স্বেদারতিমান্ দাহঃ| পেশীমধ্যগতে শ্বযথুবর্জ্যং মাংসসদৃশং লক্ষণম্| অবক্ষেপণং সঙ্কোচনম্| সংরম্ভ আবেগঃ| স্রোতোগতে স্রোতসাং যানি রক্তাদিবহনাদীনি কর্মাণি গুণাশ্চ শারীরে বক্ষ্যমাণাস্তেষাং হানিঃ| হৃল্লাসো হৃদযোত্ক্লেশঃ| সন্ধিগতেঽস্থিগতসদৃশলক্ষণত্বমঙ্গপ্রসারণাদিচেষ্টারোধশ্চ| সন্ধযো জানুকূর্পরাদযঃ| অস্থিসন্ধির্দ্বযোরস্থ্নোর্যোগঃ| বলবান্ প্রভূতঃ| সঙ্ঘর্ষঃ আকুলত্বম্|| ৪||

Adhikarana koShThagatashalyalakShaNam (5) · Śloka 5

কোষ্ঠগতে ত্বাটোপানাহৌ মূত্রপুরীষাহারদর্শনানি চ ব্রণমুখাদ্ভবন্তি||৫||

কোষ্ঠস্থে শল্যে ব্রণমুখাত্ স্থানবিশেষেণ যথাসম্ভবং মুত্রাদি দর্শনাদি ভবতি|| ৫||

Adhikarana marmagatashalyalakShaNam (6) · Śloka 6

মর্মগতে মর্মবিদ্ধবত্||৬||

মর্মগতে মর্মবিদ্ধবত্ বক্ষ্যেত|| ৬|

Adhikarana parisrAvataH tvagAdigatashalyalakShaNam (7) · Śloka 7

যথাযথং চোপদিষ্টৈঃ পরিস্রাবৈস্ত্বগাদিষু শল্যমুপলক্ষযেত্||৭||

ত্বক্পরিস্রাবণেন ত্বক্শল্যম্| মাংসপরিস্রাবণেন মাংসশল্যম্| এবং সর্বং শল্যম্||৭||

Adhikarana sUkShmagatishalyalakShaNAni (8) · Śloka 8

সূক্ষ্মগতিষু শল্যেষ্বেতান্যেব লক্ষণান্যবিস্পষ্টানি ভবন্তি||৮||

সূক্ষ্মশল্যেষ্বেতান্যেব লক্ষণান্যপূর্ণানি ভবন্তি|| ৮||

Adhikarana shalyoparohaNam (9) · Śloka 9

শুদ্ধদেহানামনুলোমসন্নিবিষ্টান্যুপরুহ্যন্তে||৯||

শুদ্ধদেহত্বাদিযুক্তানাং শল্যং রোহং যাতি|| ৯||

Adhikarana shalyAnAM punarabAdhanam (10) · Śloka 10

দোষপ্রকোপব্যবাযব্যাযামাভিঘাতেভ্যশ্চ প্রচলিতানি পুনরাবাধযন্তি||১০||

পুনর্দোষকোপাদাবাধং করোতি|| ১০||

Adhikarana tvakpranaShTashalyaj~jAnopAyAH (11) · Śloka 11

তত্র ত্বক্প্রনষ্টে স্নিগ্ধস্বিন্নাযাং মৃন্মাষযবগোধূমগোমযচূর্ণমর্দিতাযাং ত্বচি যত্র সংরম্ভো বেদনা বা ভবতি| যত্র বা স্ত্যানং সর্পির্নিহিতমাশু বিলীযতে প্রলেপো বা শুষ্যতি তত্র শল্যং জানীযাত্|১১|

Adhikarana mAMsapranaShTasya koShThAsthipeshIvivaragatasya ca shalyasya j~jAnopAyAH (11) · Śloka 11

মাংসপ্রনষ্টে স্নেহাদিভিঃ ক্রিযাভিরাতুরমুপপাদযেত্কর্শিতস্য চ শিথিলীভূতমনববদ্ধং ক্ষুভ্যমানং যত্র সংরম্ভং বা জনযতি তত্র শল্যম্| এবং কোষ্ঠাস্থিপেশীবিবরেষ্বপি||১১||

ত্বগাদিনষ্টে লক্ষণমুক্তম্| প্রদেশবিশেষস্তু ন জ্ঞাযতে| তদ্বিজ্ঞানং ত্বক্প্রনষ্টেত্যাদিনোচ্যতে| এবং কোষ্ঠাদীনাং স্পর্শবেদনাস্পর্শাসহত্বাদিভিঃ কল্পযেত্|| ১১||

Adhikarana sirAsrotodhamanIsnAvapranaShTashalyaj~jAnopAyaH (12) · Śloka 12

সিরাস্রোতোধমনীস্নাবপ্রণষ্টে খণ্ডচক্রমশ্বযুক্তং রথমারোপ্যাতুরং বিষমেঽধ্বনি শীঘ্রং নযেত্| ততঃ সংরম্ভাদিভির্জানীযাত্||১২||

সিরাদিনষ্টে রথমারোপ্যাতুরং নযেত্| তেন শল্যং জানীযাত্| খণ্ডানি চক্রাণি যস্য তত্তথোক্তম্|| ১২||

Adhikarana sandhipranaShTashalyaj~jAnopAyaH (13) · Śloka 13

সন্ধিপ্রণষ্টে স্নেহস্বেদোপপন্নং সন্ধিং প্রসারণাকুঞ্চনবন্ধনপীডনৈরুপাচরন্ পূর্ববদবগচ্ছেত্|১৩|

Adhikarana asthipranaShTashalyaj~jAnopAyaH (13) · Śloka 13

অস্থিপ্রণষ্টে স্নিগ্ধস্বিন্নান্যস্থীনি বন্ধনপীডনাভ্যাং ভৃশমুপচরংস্তদ্বদুপলক্ষযেত্||১৩||

স্নেহস্বেদাভিরুপাচরন্ পূর্ববত্ সংরম্ভাদিভির্জানীযাত্| তদ্বদিতি পূর্ববত্ সংরম্ভাদিভিঃ|| ১৩||

Adhikarana marmapranaShTashalyaM mAMsAdibahushalyaj~jAnopAyaH (14) · Śloka 14

মর্মপ্রণষ্টে ত্বনন্যভাবান্মাংসাদিভ্যো মর্মণা মুক্তং পরীক্ষণং ভবতি||১৪||

মর্মসু মাংসাদ্যাশ্রযণাত্ মাংসাদিভিরেবোক্তং লক্ষযেত্|| ১৪||

Adhikarana sAmAnyaM shalyapranaShTalakShaNam (15) · Śloka 15

সামান্যলক্ষণং তূচ্ছ্রিতহস্তিস্কন্ধাশ্বমাদ্গুরোহণদ্রুতযানলঙ্ঘনপ্লবনব্যাযামৈর্জৃম্ভোদ্গারকাস ক্ষবথুষ্ঠীবনহসনপ্রাণাযামৈর্মলশুক্রোত্সর্গৈর্বা যত্র সংরম্ভো বেদনা বা ভবতি| যত্র বা স্বল্পেঽপ্যাযাসে স্বাপো গৌরবম্ ঘট্টনং শোফো বা স্যাত্তত্র শল্যমাদিশেত্||১৫||

উচ্ছ্রিতহস্তিস্কন্ধযানাদিসামান্যং শল্যপ্রদেশবিশেষপরিজ্ঞানলক্ষণম্| প্রাণাযামঃ শ্বাসোচ্ছ্বাসনিরোধঃ || ১৫||

Adhikarana shalyaBedAH (16) · Śloka 16

সমাসতশ্চতুর্বিধং শল্যং ভবতি| বৃত্তদ্বিত্রিচতুরস্রভেদেন| তদদৃশ্যমানং বৃত্তসম্স্থানাদনুমিমীত||১৬||

তত্র চতুর্বিধং শল্যং প্রকীর্তিতং বৃত্তং দ্ব্যস্রং ত্র্যস্রং চতুরস্রং চ| সর্বমদৃশ্যমানং ব্রণাকৃত্যা কল্পযেত্|| ১৬||

Adhikarana mahatAM shalyAnAmAharaNopAyau (17) · Śloka 17

সর্বশল্যানাং মহতামাহরণে দ্বাবেবোপাযৌ প্রতিলোমোঽনুলোমশ্চ| তত্র প্রতিলোমমর্বাচীনমানযেদনুলোমং পরাচীনম্| তির্যগ্গতং যতঃ সুখাহার্যং ভবতি| ততশ্ছিত্বাঽপহরেত্||১৭||

আহরণে দ্বাবুপাযৌ প্রতিলোমোঽনুলোমশ্চ| তত্র প্রতিলোমং যদ্যত এব প্রবিষ্টং তেনৈবানীযতে| অনুলোমং যদ্যতঃ প্রবিষ্টং ততঃ প্রবেশ্য দ্বিতীযেন হ্নিযতে| তত্রার্বাচীনং যচ্ছল্যং তত্ প্রতিলোমমানযেত্| অর্বাচীনং পূর্বোক্তমূর্ধ্বগতিঃ| তদ্যত এব প্রবিষ্টং তেনৈবাহরেত্| যচ্ছল্যং পরাচীনং তদনুলোমমানযেত্| যত্রাভিমুখংতত্রৈবানযেদিত্যর্থঃ| পরাচীনমধোগতিঃ| তির্যগ্গতং মাংসং চ ছিত্বাঽপহরেত্| কস্মিন্ প্রদেশ ইত্যাহ-যত এব সুখেনাহর্তুং শক্যতে||১৭||

Adhikarana anirGAtanIyashalyaprakAshaH (18) · Śloka 18

প্রতিলোমমনুত্তুণ্ডিতং ছেদনীযং পৃথুমুখং চ শল্যং নির্ঘাতযেত্| তথা কক্ষ্যাবঙ্ক্ষণোরঃ পরশুকান্তরপতিতানি| নৈব চাহরেদ্বিশল্যঘ্নং মর্মপ্রণষ্টং বাঽশোফবেদনং পাকবিরহিতম্||১৮||

প্রতিলোমং লোমাভিমুখপ্রবিষ্টণ্ ন নির্ঘাতযেত্| উত্তুণ্ডিতং দৃশ্যমানমুখং তদ্বিপরীতমনুত্তুণ্ডিতম্| ছেদনীযমুখং বিস্তীর্ণমুখমর্ধচন্দ্রাদি| কক্ষ্যাদিপতিতানি শল্যাণি ন নির্ঘাতযেত্| বিশল্যঘ্নং যদা হৃতং সত্ শূন্যং স্রোতঃ কৃত্ব মারযতি তন্নৈবাহরেদিতি সম্বন্ধঃ| যচ্চ মর্মস্থিতং শোফাদিরহিতং তদপি নাহরেত্|| ১৮||

Adhikarana shalyoddharaNopAyAH (19) · Śloka 19

অথ হস্তপ্রাপ্যং শল্যং হস্তেনাহরেত্| তদশক্যং যথাযথং যন্ত্রেণ| তথাপ্যশক্যং শস্ত্রেণ বিশস্য ততো নির্লোহিতং ব্রণং কৃত্বাঽগ্নিঘৃতমধুপ্রভৃতিভিঃ স্বেদযিত্বাঽবদহ্য তর্পযিত্বা সর্পির্মধুভ্যাং বধ্বাঽঽচারিকমাদিশেত্|১৯|

Adhikarana sirAsnAyulagnashalyoddharaNopAyAH, hRudayapranaShTashalyAharaNopAyAH (19) · Śloka 19

সিরাস্নাবলগ্নং শলাকাগ্রণাভিমোচ্যাহরেত্| হৃদযেঽভিবর্তমানং শল্যং শীতজলাদিভিরুদ্বেজিতস্যাহরেদ্যথামার্গম্| দুরাহরমন্যতোঽপ্যেবমাহরেত্||১৯||

Adhikarana asthipranaShTashalyAharaNopAyAH (20) · Śloka 20

অস্থিবিবরপ্রণষ্টমস্থিবিদষ্টং বা অবগৃহ্য পদ্ভ্যাং পুরুষং যন্ত্রেণাপকর্ষেত্| অশক্যমেবং ব বলবদ্ভিঃ সুগৃহীতস্য যন্ত্রেণ গ্রাহযিত্বা শল্যং বারঙ্গং প্রতিভুজ্য বা ধনুর্গুণৈরেকতো বধ্বাঽন্যতশ্চ পঞ্চাঙ্গ্যা সুসংযতস্যাশ্বস্য বক্ত্রকটকে বধ্নীযাত্| অথৈনমেবং কশযা তাডযেদ্যথোন্নমযঞ্ছিরো বেগেন শল্যমুদ্ধরতি| দৃঢাং বা বৃক্ষশাখামবনম্য তস্যাং পুর্ববদ্বধ্বোদ্ধরেত্| দুর্বলবারঙ্গং তু কুশাভির্বধ্বা| শ্বযথুগ্রস্তবারঙ্গমুত্পীড্য শ্বযথুম্||২০||

অস্থিবিদষ্টমস্থিদ্বযমধ্যগতম্| বিদষ্টমিব বিদষ্টম্| শল্যবারঙ্গং প্রতিভুজ্য কুটিলীকৃত্য যথা রজ্বা গৃহীতুং যুজ্যতে| অশ্বস্য পঞ্চাঙ্গী মুখং খুরচতুষ্টযং চ তাডযেন্মুখতস্তথা বেগেন শির উন্নমযতি| পূর্ববদিতি বলিভির্গৃহীতস্য বারঙ্গং প্রতিভুজ্য| একতো রজ্যুর্বধ্যতে অন্যতশ্চ বৃক্ষশাখাযামিতি| দুর্বলবারঙ্গং যদ্রজ্জ্বা যন্ত্রেণ বা আকৃষ্যমাণং ভজ্যতে তত্ কুশাভিরভিবেষ্ট্যাহরেত্|| ২০||

Adhikarana adeshottuNDitashalyAharaNopAyAH (21) · Śloka 21

অদেশোত্তুণ্ডিতমশ্মমুদ্গরপ্রহারেণ বিচাল্য যথামার্গমেব||২১||

অদেশোত্তুণ্ডিতং যতো নির্হর্ত্তুং ন যুজ্যতে ততোঽশ্মাদিপ্রহারেণ চালযিত্ব যথামার্গমেবানীযাহরেত্|| ২১||

Adhikarana karNayuktashalyAharaNopAyAH (22) · Śloka 22

কর্ণবত্তু যন্ত্রেণ বিমৃদিতকর্ণং কৃত্বা| নাডীযন্ত্রেণ বা বহুমুখেন যথাস্বমুপসঙ্গৃহ্য শলাকাযন্ত্রেণাঽন্যেন বা পূর্ববদাহরেত্||২২||

দৃশ্যমুখং সকর্ণং শল্যং যন্ত্রেণ বিমৃদিতকর্ণং কৃত্বাহরেত্| নাডীযন্ত্রেণ বা বহুমুখেনামৃতিদকর্ণমেব|| ২২||

Adhikarana akarNashalyAharaNopAyAH (23) · Śloka 23

অনুলোমমকর্ণমনল্পব্রণমুখমযস্কান্তেন||২৩||

অনুলোমত্বাদিযুক্তমযস্কান্তেন|| ২৩||

Adhikarana pakvAshayagatashalyAharaNopAyaH (24) · Śloka 24

পক্বাশযগতং বিরেচনেন||২৪||

সুবোধম্|| ২৪||

Adhikarana vAtaviNmUtragarBashalyAharaNopAyaH (25) · Śloka 25

বাতবিণ্মূত্রগর্ভসঙ্গং প্রবাহণেন||২৫||

অধোবাতাদিশল্যং প্রবাহণেন নিস্তাননাদিনা|| ২৫||

Adhikarana duShTavAtAdishalyAharaNopAyAH (26) · Śloka 26

দুষ্টবাতবিষস্তন্যাদীন্যাস্যবিষাণচূষণেন||২৬||

দুষ্টবাতাদীনি কর্ণাদিগতান্যাস্যচূষণেন বিষাণচূষণেন বা| বিষাণং শৃঙ্গম্|| ২৬||

Adhikarana kaNThasrotogatashalyAharaNopAyAH (27) · Śloka 27

কণ্ঠস্রোতোগতে তু শল্যে বিসংসক্তং সূত্রং কণ্ঠে প্রবেশযেত্| অথ তদ্গৃহীতং বিজ্ঞায শল্যং সমমেব সূত্রং বিসং চাক্ষিপেত্| বিসাভাবে মৃণালেঽপ্যযমেব বিধিঃ|২৭|

Adhikarana kaNThAsakte jAtuShAjAtuShashalyAharaNopAyAH (27) · Śloka 27

জাতুষে তু কণ্ঠসক্তে নাডীং প্রবেশযেত্তদা চাগ্নিতপ্তাং সূক্ষ্মমুখীং শলাকামথ তাং গৃহীতশল্যাং শীতাভিরদ্ভিঃ পরিষিচ্য স্থিরীভূতামাহরেত্| অজাতুষেঽপ্যেবমেব প্রতপ্তাং জতুমধূচ্ছিষ্টান্যতরপ্রদিগ্ধাং শলাকাম্|২৭|

Adhikarana kaNThasaktakaNTakashalyAharaNopAyAH (27) · Śloka 27

মত্স্যকণ্টকমন্যদ্বা তাদৃগস্থিশল্যং কণ্ঠলগ্নং সূত্রেণ সূত্রপ্লোতেন বা বেষ্টিতযাঽঙ্গুল্যাঽপহরেত্| অথবা কেশোণ্ডুকং দৃঢদীর্ঘসূত্রবদ্ধং দ্রবোপহিতং পাযযেদ্বামযেচ্চ| বমতশ্চ শল্যৈকদেশসক্তং সূত্রং সহসৈবাক্ষিপেত্| মৃদুনা বা দন্তধাবনকূর্চ্চেনাপহরেত্| পরতো ব প্রণদেত্| বালোণ্ডুকে বিলগ্নে তদ্বত্কণ্টকম্| ক্ষতকণ্ঠশ্চ ত্রিফলাচূর্ণং মধুঘৃতসিতোপেতমনুকণ্ঠযন্ লিহ্যাত্||২৭||

কণ্ঠস্রোতোগত ইত্যাদি সুবোধম্| মৃণালং বিসাঙ্কুরম্| বমতশ্চ যদি কেশোণ্ডুকং সজ্জতি ততো গৃহীতশল্যং জ্ঞাত্বা জটিত্যাকর্ষযেত্| পরতঃ অতঃ প্রণুদেত্ বালোণ্ডুকম্| বালোণ্ডুকে কণ্ঠলগ্নে কণ্টকং তদ্বদ্ দ্রবেণ সূত্রবদ্ধং পাযযেদ্বামযেদাকর্ষেচ্চ| ক্ষতকণ্ঠস্ত্রিফলাচূর্ণং লিহ্যাদনুকণ্ঠযন্ কণ্ঠে অবলেহস্য সঙ্গং কুর্বন্ ন তু ত্বরযা|| ২৭||

Adhikarana apshalyAharaNopAyAH (28) · Śloka 28

অপাং পূর্ণং পুরুষমবাক্শিরসমবপীডযেদ্ধুনুযাদ্বামযেচ্চ ভস্মরাশৌ ব নিখন্যাদামুখাত্| অন্যথা হ্যুন্মার্গগামিভিরদ্ভিরাধ্মানকাসশ্বাসপীনসেন্দ্রিযোপঘাতজ্বরাদযঃ শ্লেষ্মবিকারা মৃত্যুশ্চ| তত্র যথাস্বং কফে প্রতিকুর্যাত্|২৮|

Adhikarana grAsashalyapraveshanopAyaH (28) · Śloka 28

গ্রাসশল্যমম্বুনা প্রবেশযেত্স্কন্ধে বা মুষ্টিনাভিহন্যাত্|২৮|

Adhikarana kaNThasthashleShmAdishalyanirharaNopAyaH (28) · Śloka 28

কণ্ঠস্থং শ্লেষ্মাণমন্নলবং বা প্রধমনোত্কাসনাপকসনৈর্বিধমেত্||২৮||

অপাং পূর্ণং নদ্যাদিপতনে| আমুখাত্| মুখবর্জ্যম্| আধ্মানাদিষু যথাস্বমাত্মীযং শ্লেষ্মণি চিকিত্সা কার্যা| উত্কসনং বহিরীরণম্| অপকসনমন্তরীরণম্|| ২৮||

Adhikarana netrashalyAharaNopAyAH (29) · Śloka 29

সূক্ষ্মমক্ষিশল্যং লেখনপ্রধমনবালজলবস্ত্রজিহ্বাভিরপনযেত্| তথা নির্ভুজ্য বর্ত্ম বর্ত্মগতমপনীয চোষ্ণাম্বুবাষ্পস্বেদং সমধুমধুকক্বাথেন সর্পিষা চ পরিষেকং কুর্যাত্| স্বযমপি চ শল্যমশ্রুক্ষবথুকাসোদ্গারমূত্রপুরীষানিলৈর্নযনাদিভ্যোঙ্গাবযবেভ্যঃ পততি||২৯||

বর্ত্মগতং বর্ত্মাক্ষিপুটং নির্ভুজ্য পরিবর্ত্যাহরেত্| নযননাসাদিষু শল্যং ক্ষবথ্বাদিভিঃ ক্রিযমাণৈঃ স্বযং পততি|| ২৯||

Adhikarana karNagatakITashalyAharaNopAyAH (30) · Śloka 30

কীটে কর্ণস্রোতঃপ্রবিষ্টে তোদো গৌরবং ভরভরাযমাণং চ ভবতি স্পন্দমানে চাপ্যধিকং বেদনা| তত্র সলবণেনাম্বুনা মধুকযুক্তেন মদ্যেন বা সুখোষ্ণেন পূরণম্| নির্গতে চ কীটে তদুত্সর্জনম্| তত্রৈব তু মৃতে পাককোথক্লেদা ভবন্তি| তেষু কর্ণস্রাবোক্তং কুর্যাত্প্রতিনাহোক্তঞ্চ| তোযপূর্ণং কর্ণং হস্তোন্মথিতেন তৈলাম্বুনা পূরযেত্| পার্শ্বাবনতং বা কৃত্বা হস্তেনাহন্যান্নাড্যা বাঽঽচূষযেত্||৩০||

কীট ইত্যাদি সুবোধম্| নির্গতে কীটে তদুত্সর্জনং লবণাম্ব্বাদিনা সহ ত্যাগঃ| প্রতীনাহো নাসারোগবিশেষঃ| কর্ণস্রাবশ্চ কর্নরোগে বক্ষ্যমাণঃ|| ৩০||

Adhikarana dehe vilIyamAnAni shalyAni (31) · Śloka 31

ভবন্তি চাত্র শ্লোকাঃ- জাতুষং হেমরূপ্যাদিধাতুজং চ চিরস্থিতম্| ঊষ্মণা প্রাযশঃ শল্যং দেহজেন বিলীযতে|৩১|

Adhikarana dehe avilIyamAnAni shalyAni (31) · Śloka 31

বিষাণবেণুদার্বস্থিদন্তবালোপলানি তু| শল্যানি ন বিশীর্যন্তে শরীরে মৃন্মযানি চ| বিষাণবেণ্বযস্তালদারুশল্যং চিরাদপি| প্রাযো নির্ভুজ্যতে তদ্ধি পচত্যাশু পলাসৃজী||৩১||

ভবন্তি চাত্রেতি তন্ত্ররীতিঃ| জাতুষাদিশল্যং দেহে চিরস্থিতং সত্ দেহোষ্মণা বিলীযতে| বিষাণাদি দেহস্থং ন শীর্যতে| ন বিলীযত ইত্যর্থঃ| ততোঽপি নির্ধার্যতে| বিষাণবেণ্বাদি চিরাদপি ন বিশীর্যতে| তদ্বিষাণাদি শল্যং নির্ভুজ্যতে কুটিলো ভবতি| শীঘ্রঞ্চ পলাসৃজী মাংসরক্তে পচতি|| ৩১||

Adhikarana avagADhashalyAharaNopAyAH (32) · Śloka 32

শল্যে মাংসাবগাঢে চেত্স দেশো ন বিদহ্যতে| ততস্তং মর্দনস্বেদশুদ্ধিকর্শনবৃংহণৈঃ| তীক্ষ্ণোপনাহপানান্নঘনশস্ত্রপদাঙ্কনৈঃ| পাচযিত্বা হরেচ্ছল্যং পাটনৈষণপীডনৈঃ||৩২||

মাংসসক্তে শল্যে যদি শল্যপ্রদেশো ন বিদহ্যতে পাকাভিমুখো ন ভবতি| ততো মর্দনাদিভিঃ পাচযৈত্ব পাটনাদিভিরপহরেত্||৩২||

Adhikarana upasaMhAraH (33) · Śloka 33

শল্যপ্রদেশযন্ত্রাণামবেক্ষ্য বহুরূপতাম্| তৈস্তৈরুপাযৈর্মতিমান্ শল্যং বিদ্যাত্তথাহরেত্||৩৩||

শল্যানাং বহুরূপতামবেক্ষ্য দেহপ্রদেশানাং বহুরূপতাং যন্ত্রাণাং চ রূপতামবেক্ষ্য তৈস্তৈর্যথোক্তৈরুপাযৈঃ শল্যমেবংবিধমিতি বিদ্যাদাহরেচ্চ|| ৩৩||

Adhikarana niHshalyavraNalakShaNam (34) · Śloka 34

ব্রণে প্রশান্তে প্রান্তেষু নাতিস্পর্শাসহিষ্ণুষু| অল্পে শোফে চ তাপে চ নিঃশল্যমিতি নির্দিশেত্|৩৪|

ব্রণেষু প্রসন্নত্বাদিযুক্তেষু নিশ্শল্যতাং শল্যরহিতত্বমাদিশেত্|| ৩৪||

Adhikarana kAya eva shalyam (34-35) · Śloka 35

কায এব পরং শল্যং নিজদোষমলাবিলঃ| শল্যে শল্যং শরাদ্যং তু বিশেষাত্তেন চিন্ত্যতে||৩৪|| ইতি শ্রীবৈদ্যপতিসিংহগুপ্তস্য সূনোর্বাগ্ভটস্য কৃতৌ অষ্টাঙ্গসংগ্রহসংহিতাযাং সূত্রস্থানে শল্যাহরণবিধির্নাম সপ্তত্রিংশোঽধ্যাযঃ||৩৫||

সর্বস্য চাত্মীয এব কাযঃ পরং শল্যং জন্মসহস্নেষ্বাবাধকত্বাত্| কিম্ভূতঃ কায আহ-নিজদোষমলাবিলঃ| শল্যং হি মলাবিলং ভবতি| কাযে তু য এব নিজা দোষা রাগাদযো বাতাদযশ্চ তদেব মলম্| তত্র কাযে শল্যে যদ্যচ্চ শরাদ্যং শল্যং তচ্ছল্যে শল্যং ক্ষতে ক্ষারস্তেন বিশেষাত্ চিন্ত্যতে চর্চ্যত ইতি|| ৩৫|| ইতি শ্রীমন্মহামহোপাধ্যাযেন্দুবিরচিতাযাম্ অষ্টাঙ্গসংগ্রহব্যাখ্যাযাং শশিলেখাযাং সূত্রস্থানে সপ্তত্রিংশোঽধ্যাযঃ