25. snēhavidhiḥ

Adhikarana atha snehavidhirnAma pa~jcaviMsho~adhyAyaH pratij~jA (1) · Śloka 1

অথাতঃ স্নেহবিধিমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

পূর্বস্মিন্নধ্যাযে দ্বিবিধ উপক্রম উক্তঃ| তত্র চ লঙ্ঘনস্য শোধনাত্মকত্বাচ্ছোধনস্য চ স্নেহস্বেদপূর্বকত্বাত্ ততোঽপি স্নেহস্য দোষমার্দবকারণপ্রাধান্যাত্তদ্বিজ্ঞানার্থমধ্যাযারম্ভঃ-অথাত ইত্যাদি|| ১||

Adhikarana snehAdyupayuktadravyasamBArasaMgrahaNAvashyakatA (2) · Śloka 2

স্নেহাদিষূপযোগায তদ্ব্যাপচ্ছামনায চ| কুর্যাত্প্রাগেব তদ্যোগিদ্রব্যসম্ভারসঙ্গ্রহম্||২||

স্নেহস্য শোধনাঙ্গত্বাত্ প্রাগেব স্নেহাদিষ্বনারব্ধেষু স্নেহাদ্যুপযোগায দেশাদিবৈপরীত্যাত্ স্নেহাদ্যুদ্ভূতব্যাপচ্ছমনায চ তদ্যোগিদ্রব্যাণাং স্নেহোপযোগযোগিনাং ঘৃততৈলবসাশরাবোদঞ্চনাদীনাং তদ্ব্যাপচ্ছমনযোগিনাং চ দ্রব্যাণাং সম্ভারসঙ্গ্রহং কুর্যাত্|| ২||

Adhikarana snehanavirUkShaNauShadhalakShaNam (3) · Śloka 3

গুরুশীতসরস্নিগ্ধমন্দসূক্ষ্মমৃদুদ্রবম্| ঔষধং স্নেহনং প্রাযো বিপরীতং বিরূক্ষণম্||৩||

সর্বং গুর্বাদিগুণযুক্তমৌষধং প্রাযেণ স্নেহনমন্যদেবংগুণমপ্যস্নেহনং ভবতীতি প্রদর্শনার্থং প্রাযোগ্রহণম্| বিপরীতং লঘ্বাদিগুণং বিরূক্ষণম্| অত্রাপি প্রাযোগ্রহণমনুবধ্যতে|| ৩||

Adhikarana pravarasnehadravyANi teShu GRutasyottamatvam (4) · Śloka 4

সর্পির্মজ্জা বসা তৈলং স্নেহেষু প্রবরং মতম্| তত্রাপি চোত্তমং সর্পিঃ সংস্কারস্যানুবর্তনাত্| মাধুর্যাদবিদাহিত্বাজ্জন্মাদেব চ শীলনাত্||৪||

সর্পিরাদিচতুষ্টযং সর্বস্নেহেষু প্রবরং শ্রেষ্ঠমাশু স্বকার্যকরণাত্| তত্রাপি চতুষ্টযে সর্পিরুত্তমং সংস্কারানুবর্তনাত্| যেন হি দ্রব্যেণ সংস্ক্রিযতে তমনুবর্ততে| স্বগুণানজহত্ সংস্কারগুণান্ গৃহ্ণাতীতি সংস্কারানুবর্তী| ন হ্যেতত্তৈলাদিষু সম্ভবতি| তে হি স্বগুণাংস্ত্যজন্তি| তথা চ চন্দনাদৌ তৈলাদীনাং বিপরীতৈর্দ্রব্যান্তরৈরৌষ্ণ্যাদিনাশো ভবতি| ন হি স্নেহনাশস্তস্য বহুত্বাত্| তথা মাধুর্যদিগুণযোগাচ্চ সর্পিরেবোত্তমম্|| ৪||

Adhikarana sarpirAdInAM doShaghnatvavivaraNam (5) · Śloka 5

পিত্তঘ্নাস্তে যথাপূর্বমিতরঘ্না যথোত্তরম্||৫||

তে সর্পিরাদযো যথাপূর্বং পিত্তঘ্নাঃ| যথোত্তরমিতরঘ্নাঃ| শ্লেষ্মণঃ স্নেহপ্রতিষেধাদিতরশব্দেন বাতঘ্না ইতি গম্যতে| অথবা দ্রব্যান্তরসংস্কৃতসর্পিরাদ্যপেক্ষযা ইতরশব্দেন কফস্যাপি গ্রহণম্| তেনৈবং তৈলস্যাপি পিত্তঘ্নত্বং সিদ্ধম্| অক্ষাদিযোনের্বা তৈলস্য পিত্তঘ্নত্বমিতি| যো যস্মাত্ পূর্বঃ স তস্মাত্ পিতঘ্নঃ| যো যস্মাদুত্তরঃ স তস্মাদ্বাতঘ্নঃ| তৈলস্য পূর্বত্বাসম্ভবাত্ পিত্তঘ্নত্বাসম্ভবঃ | বসাযা মজ্জ্ঞশ্চ যত্র মাংসানুগস্বরূপত্বেন পিত্তঘ্নত্বং সম্ভবতি তত্র পিত্তঘ্নত্বম্| অথবা শোধনাঙ্গানাং সর্পিরাদীনাং বমনাদিক্রিযোপকারযোগা-দেবংস্বরূপতা পরিণাম ইতি গ্রন্থাবিরোধঃ|| ৫||

Adhikarana ghRutAdInAmuttarottaraM gurutvam (6) · Śloka 6

ঘৃতাত্তৈলং গুরু বসা তৈলান্মজ্জা ততোঽপি চ||৬||

সুবোধম্|| ৬||

Adhikarana yamakAdipariBAShAH (7) · Śloka 7

দ্বাভ্যাং ত্রিভিশ্চতুর্ভিস্তৈর্যমকস্ত্রিবৃতো মহান্||৭||

সর্পিরাদিভ্যোঽন্যতমাভ্যাং যমকো ভবত্যন্যতমৈস্ত্রিবৃতো ভবতি| সর্বৈঃ পুনর্মহাস্নেহঃ| এতচ্চ প্রদেশে বাক্যেষূপযুজ্যতে|| ৭||

Adhikarana snehAshayAH (8) · Śloka 8

স্নেহাশযা দধি ক্ষীরং মাংসাস্থিফলদারু চ||৮||

দধ্যাদযঃ স্নেহাশযাঃ সর্পিরাদিস্নেহানাং যোনযঃ| তত্র দধি ক্ষীরশ্চ ঘৃতাশযঃ ক্ষীরস্য নবনীতযোনিত্বাত্| মাংসং বসাশযঃ| অস্থি মজ্জাশযঃ| ফলানি চ দারূণি চ তৈলাশযঃ|| ৮||

Adhikarana snehyAH (9) · Śloka 9

স্বেদ্যসংশোধ্যমদ্যস্ত্রীব্যাযামাসক্তচিন্তকাঃ| বৃদ্ধবালাবলকৃশা রূক্ষাঃ ক্ষীণাস্ররেতসঃ| বাতার্তস্যন্দতিমিরদারুণপ্রতিবোধিনঃ| স্নেহ্যাঃ........................................||৯||

স্নেহস্য বিষযং দর্শযতি| স্বেদ্যাদযঃ স্নেহ্যাঃ| ন হ্যস্নেহিতঃ স্বেদ্য ইত্যর্থঃ| তথা যঃ সংশোধ্যঃ স প্রথমং স্নেহ্যঃ| আসক্ত শব্দস্য মদ্যাদিত্রযেণ সম্বন্ধঃ| স্যন্দী অভিষ্যন্দাক্ষিরোগী| দারুণপ্রতিবোধঃ কৃচ্ছ্রোন্মীলাখ্যো বর্ত্মরোগঃ| এতে স্নেহ্যাঃ|| ৯||

Adhikarana asnehyAH (10) · Śloka 10

..........................ংঅ ত্বতিমন্দাগ্নিতীক্ষ্ণাগ্নিস্থূলদুর্বলাঃ| ঊরুস্তম্ভাঽতিসারামগলরোগগরোদরৈঃ| মূর্চ্ছাচ্ছর্দ্যরুচিশ্লেষ্মতৃষ্ণামদ্যৈশ্চ পীডিতাঃ| অপপ্রসূতা যুক্তে চ নস্যে বস্তৌ বিরেচনে||১০||

অতিমন্দাগ্ন্যাদযো ন তু স্নেহ্যা ইতি সম্বন্ধঃ| তীক্ষ্ণাগ্নেঃ স্নেহনাদত্যগ্নিত্বমতিস্থূলস্যাগ্নিমেদসোর্বৃদ্ধিঃ| দুর্বলস্যা-জরণশক্তেঃ স্নেহব্যাপত্| ঊরুস্তম্ভাদীনাং পীডিতশব্দেন সম্বন্ধঃ| অত্র শোধনপ্রসঙ্গেঽপ্যস্নেহনং স্নেহেন বিনা শোধনমিতি যাবত্| অপপ্রসূতা ন স্নেহ্যেতি বিভক্তিপরিণামঃ| তথা নস্যাদিত্রিতযে যুক্ত আদোষসাম্যাত্ স্নেহো ন যোজ্যঃ|| ১০||

Adhikarana ghRutAdiviBAgAnusAramadhikAraBedaH (11) · Śloka 11

তত্র ধীস্মৃতিমেধাগ্নিকাংক্ষিণাং শস্যতে ঘৃতম্| গ্রন্থিনাডীকৃমিশ্লেষ্মমেদোমারুতরোগিষু| তৈলং লাঘবদার্ঢ্যার্থিক্রূরকোষ্ঠেষু দেহিষু| বাতাতপাধ্বভারস্ত্রীব্যাযামক্ষীণধাতুষু| রূক্ষক্লেশক্ষমাত্যগ্নিবাতাবৃতপথেষু চ| শেষৌ......................................||১১||

তত্র স্নেহেষু মধ্যে ধীপ্রভৃতিকাঙ্ক্ষিণাং স্নেহপ্রসঙ্গে সতি ঘৃতং স্নেহঃ শস্যতে| তস্য তথাশক্তিত্বাত্| ধীর্বুদ্ধিঃ| মেধা প্রজ্ঞা| গ্রন্থ্যাদিষু শ্লেষ্মাদিরোগিষু শরীরলাঘবদৃঢত্বার্থিষু ক্রূরকোষ্ঠেষু চ দেহিষু তৈলং শস্যত ইতি সম্বন্ধঃ| বাতাদিভিঃ কারণৈঃ ক্ষীণধাতুষু রূক্ষাদিষু চ শেষো বসা মজ্জা চ| ক্লেশক্ষমশব্দেনাক্লেশক্ষমস্য সর্পিস্তৈলং চ প্রযোজযেদিতি| অত্যগ্নেরতিতীক্ষ্ণাগ্নেঃ স্নেহপ্রতিষেধো বসাযা মজ্জ্ঞশ্চাপবাদবাক্যম্| বাতাবৃতপথঃ বাতরুদ্ধদেহস্রোতঃ|| ১১||

Adhikarana vasAyAH visheShakShetram (12) · Śloka 12

................বসা তু সন্ধ্যস্থিমর্মকোষ্ঠরুজাসু চ| তথা দগ্ধাহতভ্রষ্টযোনিকর্ণশিরোরুজি||১২||

বসা পুনঃ সন্ধ্যাদিরুজাস্বপীষ্টা| তথা দগ্ধাদিষু যোন্যাদিরুজি চ বসা শস্যত ইতি সম্বন্ধঃ|| ১২||

Adhikarana RutuvisheSheNa snehavisheShanirNayaH (13) · Śloka 13

তৈলং প্রাবৃষি বর্ষান্তে সর্পিরন্যৌ তু মাধবে| সর্বং সর্বস্য চ স্নেহং যুঞ্জ্যাদ্ভাস্বতি নির্মলে| ঋতৌ সাধারণে...................................||১৩||

অনন্তরং স্নেহানামৃতুবিশেষেণ নিযমপ্রদর্শনার্থমিদমাহ-তৈলং প্রাবৃষীত্যাদি| প্রাবৃষি শ্রাবণে শোধনপ্রসঙ্গে তৈলং স্নেহনায শস্তম্| বর্ষান্তে কার্তিকে সর্পিঃ শস্তম্| অন্যৌ শেষৌ বসামজ্জানৌ মাধবে বসন্তে চৈত্রে| শোধনপ্রসঙ্গে প্রাবৃষি তৈলং বাতজযপ্রাধান্যাত্| শরদি ঘৃতং পিত্তজযায| বমনপ্রযোগে কফোত্ক্লেশনশক্তত্বাত্| সদৃশেঽপি কালে বসাযা মজ্জ্ঞোশ্চোপযোগঃ| তথা সর্বো ঘৃতাদিস্নেহঃ সর্বস্য শোধ্যস্যাশোধ্যস্য চ সাধারণে বসন্তশরত্প্রাবৃডাখ্যে ঋতৌ ভাস্বতি তীক্ষ্ণরশ্মৌ নির্মলে ব্যভ্রে যোজ্যঃ| ন ত্বত্যর্থশীতোষ্ণবর্ষাহেমন্তশিশিরগ্রীষ্মাখ্যে|| ১৩||

Adhikarana doShAnusAraM divArAtriviBAgaH (14) · Śloka 14

..............................দোষসাম্যেঽনিলকফে কফে| দিবা নিশ্যনিলে পিত্তে সংসর্গে পিত্তবত্যপি||১৪||

ঋতুনিযমং দর্শযিত্বা তত্পৃষ্ঠভাবিতযা রাত্র্যহর্ভেদেন নিযমং দর্শযতি| দোষসাম্যে প্রাকৃতে অনিলকফে কেবলে চ কফে প্রাকৃতে বৈকৃতে চ যথোক্তেষ্বৃতুষু দ্বিধৈব স্নেহযোজনম্| অনিলে কেবলে পিত্তে চ কেবলে তথা পিত্তবতি সংসর্গে পিত্তানিলে পিত্তকফে ন চ নিশি স্নেহো যোজ্যঃ|| ১৪||

Adhikarana Atyayike vidhiH (15) · Śloka 15

ত্বরমাণে তু শীতেঽপি দিবা তৈলং চ যোজযেত্| উষ্ণেঽপি রাত্রৌ সর্পিশ্চ দোষাদীন্ বীক্ষ্য চান্যথা| নিশ্যশ্নুতে বাতকফাদ্রোগানহনি পিত্ততঃ||১৫||

শীতোষ্ণযোঃ স্নেহপ্রতিষেধাদিদমুচ্যতে-ত্বরমাণ ইত্যাদি| স্নেহবিষযব্যাধ্যুপশমায ত্বরমাণ শীতেঽপ্যৃতৌ স্নেহং যোজযেত্| ন তু সামান্যেনাপি তু দিবা তৈলমেব ন চ রাত্রৌ নাঽপ্যন্যস্নেহঃ| তথা কারণবশাত্ ত্বরমাণ উষ্ণেঽপ্যৃতৌ স্নেহং যোজযেত্| অত্র তু রাত্রাবেব সর্পিরেব চ| অথবা দোষদূষ্যবলাদীন্ বীক্ষ্য তদানুগুণ্যেনান্যথাপি যোজযেত্| যত্র দিবা উক্তং তত্র রাত্রাবপি যোজযেত্| যত্র চ তৈলমুক্তং তত্রান্যোঽপি স্নেহো যোজ্যঃ| তথা যত্র রাত্রৌ সর্পিরুক্তং তত্র দিবান্যদপি| অন্যথা যথোক্তকারণবৈপরীত্যে ইতি প্রাপ্তম্| নিশি স্নেহমুপযুঞ্জানো বাতকফাদ্ধেতো রোগানশ্নুতে| এবমহনি পিত্ততো রোগানশ্নুতে ইতি সম্বন্ধঃ||১৫||

Adhikarana acCapeyasya shreShThatA (16) · Śloka 16

যুক্ত্যাবচারযেত্স্নেহং ভক্ষ্যাদ্যন্নেন বস্তিভিঃ| নস্যাভ্যঞ্জনগণ্ডূষমূর্ধকর্ণাক্ষিতর্পণৈঃ| রসভেদৈককত্বাভ্যাং চতুষ্ষষ্টির্বিচারণাঃ| স্নেহস্যান্যাভিভূতত্বাদল্পত্বাচ্চ ক্রমাত্স্মৃতাঃ| যথোক্তহেত্বভাবাচ্চ নাচ্ছপেযো বিচারণা| স্নেহস্য কল্পঃ স শ্রেষ্ঠঃ স্নেহকর্মাশুসাধনাত্||১৬||

ইতি স্নেহস্য কালনিযমমুক্ত্বা যোজনাং দর্শযতি-যুক্ত্যেত্যাদি| সর্বং যুক্ত্যা মাত্রাদিকযা স্নেহমবচারযেত্| কেনেত্যাহ-ভক্ষ্যাদিনা আদিগ্রহণেন ভোজ্যলেহ্যপেযস্য বিবিধস্যাপ্যন্নস্য গ্রহণম্| তথা বস্তিভির্নস্যাদিভিশ্চ| এবং ভক্ষ্যাদিনান্নেন প্রযুজ্যমানস্য স্নেহস্য চতুষ্ষষ্টিসঙ্খ্যা বিচারণা ভবন্তি-কথমিত্যাহ| রসভেদৈককত্বাভ্যাম্| তত্র রসভেদাঃ পূর্বং ত্রিষষ্টির্ব্যাখ্যাতাঃ| একস্নেহেন চতুষ্ষষ্টিঃ| এককো যঃ স্নেহঃ কেবলমুপযুজ্যতে ন চ পীযতে তস্মাত্| ভক্ষ্যাদ্যন্নে রসভেদসম্ভবঃ| এককশব্দেন বস্তিনস্যাভ্যঞ্জনাদিকং গৃহ্যতে| কথমেতা এব বিচারণা উচ্যন্তে-নাচ্ছপেয ইত্যাহ| স্নেহস্যেত্যাদি| ক্রমাদ্যথাসঙ্খ্যেন রসভেদেষ্বন্যাভিভূতত্বাত্ স্নেহস্য| নস্যাদিষু শরীরে স্নেহস্যাল্পত্বাচ্চ চতুষ্ষষ্টির্বিচারণা উচ্যন্তে| যথোক্তস্য চ হেতোরন্যাভিভবলক্ষণস্যাল্পত্বলক্ষণস্য চাভাবাদচ্ছাপেযস্নেহো বিচারণাশব্দেন নোচ্যতে| স্নেহস্য চোপযোগে স এবাচ্ছপেযাখ্যঃ কল্পঃ শ্রেষ্ঠঃ| কুতঃ? স্নেহকর্মণাং তর্পণমাড়্দবাদীনামাশু সম্পাদনাত্|| ১৬||

Adhikarana snehamAtrA (17) · Śloka 17

দ্বাভ্যাং চতুর্ভিরষ্টাভির্যামৈর্জীর্যন্তি যাঃ ক্রমাত্| হ্রস্বমধ্যোত্তমা মাত্রাস্তাস্তাভ্যশ্চ হ্রসীযসীম্| কল্পযেদ্বীক্ষ্য দোষাদীন্ প্রাগেব তু হ্রসীযসীম্| অজ্ঞাতকোষ্ঠে হি বহুঃ কুর্যাজ্জীবিতসংশযম্||১৭||

তস্য চ স্নেহস্য হ্রস্বমধ্যমোত্তমা মাত্রা ভবন্তি| কাস্তা ইত্যাহ-দ্বাভ্যামিত্যাদি| এবং ক্রমাদেব তল্লভ্যতে| যা দ্বাভ্যাং যামাভ্যাং স্নেহমাত্রা জীর্যতি সা হ্রস্বা যা বা চতুর্ভির্যামৈর্জীর্যতি সা মধ্যমা| যা ত্বষ্টাভির্জীর্যতি সা উত্তমা| তাভ্যশ্চ তিসৃভ্যো মাত্রাভ্যঃ হ্রসীযসীং কল্পযেদিতি| ইযং হ্রস্বা ইযং চ হ্রস্বা| ইযমনযোরতিশযেন হ্রস্বা হ্রসীযসী| ননু সর্বত্র হ্রসীযসীং কল্পযেত্ ? ন অপি তু দোষাদীন্ বীক্ষ্য| তেনৈতদুক্তং ভবতি-দোষদূষ্যাদ্যানুগুণ্যেন হ্রসীযসীমপি চতুর্থী মাত্রাং কল্পযেত্| জরণকালানুক্তের্দোষাদিপারতন্ত্র্যোক্তেশ্চ হ্রসীযস্যা বহুবিধমাত্রত্বং দর্শিতম্| তথা যত্রাপ্যন্যতমা মাত্রা যোজ্যা তত্রাপ্যজ্ঞাতকোষ্ঠত্বাত্ প্রাগেব প্রথমমেব হ্রসীযসীং কল্পযেত্| তুশব্দোঽবধারণে| কুত ইত্যাহ-অজ্ঞাতকোষ্ঠে পুরুষে বহুস্নেহোঽশক্তস্য কদাচিজ্জীবসংশযং কুর্যাত্| হিশব্দো যস্মাদর্থে| যস্মাদেবং তস্মাত্ প্রাগেব হ্রসীযসীং কল্পযেদিত্যর্থঃ|| ১৭||

Adhikarana hrasvamAtrAyAH adhikArIhrasvamAtrAyAH adhikArI tasyAH prAshastya~jca (18) · Śloka 18

তত্র দুর্বলমন্দাগ্নিবালবৃদ্ধসুখাত্মকঃ| অপথ্যরিক্তকোষ্ঠশ্চ জ্বরাতীসারকাসিভিঃ| হ্রস্বা পেযা সুখা সা হি পরিহারেঽনুবর্ততে| চিরাচ্চ বল্যা ন রুজে ব্যাপন্নাপি প্রকল্পতে||১৮||

অনন্তরং হ্রস্বাদীনাং মাত্রাণাং বিষযভেদং দর্শযতি-তত্রেত্যাদি| তত্র মাত্রাত্রযে হ্রস্বা মাত্রা দুর্বলাদিভিঃ পেযা| অপথ্যমহিতং রিক্তকোষ্ঠত্বং যেষাং তৈরপথ্যরিক্তকোষ্ঠত্বৈর্হ্রস্বা পেযা| সা হি হ্রস্বা পরিহারে যন্ত্রণাযাং সুখা ন দুঃখপরিহারা| চিরং বহুকালং চ শরীরেঽনুবর্ততে| অবলানাং বল্যা ভবতি| দেশকালাপচারাদিনা ব্যাপন্না বিরমিতাপি রুজে রোগায ন প্রবর্ততে|| ১৮||

Adhikarana madhyayamAtrAyA adhikArI guNAshca (19) · Śloka 19

মেহোরুঃ পিটকাকুষ্ঠবাতশোণিতপীডিতৈঃ| মধ্যমা মৃদুকোষ্ঠৈশ্চ স্নেহনী স্যাত্সুখেন সা| ন বলক্ষপণী মন্দবিভ্রংশা শুদ্ধযেঽপ্যলম্||১৯||

মেহাদিপীডিতৈর্মৃদুকোষ্ঠৈশ্চ মধ্যমা পেযেতি সম্বন্ধঃ| সা হি মধ্যমা সুখেনানাযাসেন স্নেহনী স্যাত্| তথা ন চ বলক্ষপণী মন্দবিভ্রংশা ব্যাপন্নাপি সতী স্বল্পাপাযেত্যর্থঃ| তথা শুদ্ধযে দোষাণাং শোধনাযালং পর্যাপ্তা|| ১৯||

Adhikarana mahatI mAtrAyAH adhikAriNaH guNAshca (20) · Śloka 20

মহাদেহানলবলক্ষুত্তৃট্ক্লেশসহিষ্ণুভিঃ| গুল্মোদাবর্তবীসর্পসর্পদংশাভিপীডিতৈঃ| উন্মত্তৈঃ কৃচ্ছ্রমূত্রৈশ্চ মহতী শীঘ্রমেব সা| সর্বমার্গানুসারেণ জযেদ্ব্যাধীন্ সুযোজিতা||২০||

মহাদেহাদিভিস্তথা গুল্মাদ্যভিপীডিতৈস্তথোন্মত্তৈঃ কৃচ্ছ্রমূত্রৈশ্চ মহতী পেযেতি সম্বন্ধঃ| মহচ্ছব্দস্য দেহাদিত্রযেণ সমাসঃ| সা হি মহতী মাত্রা সর্বমার্গানুসারেণ সকলস্রোতোঽনুগমনেন করণভূতেন সুযোজিতা সতী শীঘ্রমেব ব্যাধীন্ জযেত্| দুর্যোজিতা ত্বজীর্ণাদীন্ ব্যাধীনাবহতীতি তাত্পর্যার্থঃ|| ২০||

Adhikarana shodhanArthaM snehapAnavidhiH (21) · Śloka 21

হ্যস্তনে জীর্ণ এবান্নে স্নেহোঽচ্ছঃ শুদ্ধযে বহুঃ||২১||

তত্র যঃ স্নেহঃ শুদ্ধযে শোধনার্থং যুজ্যতে স হ্যস্তনেঽন্নে জীর্ণমাত্র এব যুজ্যতে| তথা যঃ শুদ্ধযে স্নেহোঽচ্ছো বহুশ্চ যোজ্যঃ| এবকারকরণং কালাতিক্রমপরিহারার্থম্| বহুরুত্তমযা মাত্রযেত্যর্থঃ|| ২১||

Adhikarana shamanArthaM snehapAnavidhiH (22) · Śloka 22

শমনঃ ক্ষুদ্বতোঽনন্নো মধ্যমাত্রশ্চ শস্যতে||২২||

তথা যঃ শমনস্নেহঃ স ক্ষুদ্বতঃ পুরুষস্যাঽনন্নো মধ্যমযা মাত্রযা শস্যতে| অনন্ন ইতি হ্যস্তনেঽন্নে জীর্ণে ততশ্চ ক্ষুদ্বত উপযুজ্যতে| তথা তস্মিন্ জীর্ণেঽন্নমিতি|| ২২||

Adhikarana bRuMhaNArthaM snehapAnavidhiH (23) · Śloka 23

বৃংহণো রসমদ্যাদ্যৈঃ সভক্তোঽল্পো হিতঃ স চ| বালবৃদ্ধপিপাসার্তস্নেহদ্বিণ্মদ্যশীলিষু| স্ত্রীস্নেহনিত্যমন্দাগ্নিসুখিতক্লেশভীরুষু| মৃদুকোষ্ঠাল্পদোষেষু কালে চোষ্ণে কৃশেষু চ||২৩||

যস্তু বৃংহণঃ স রসমদ্যাদ্যৈঃ সভক্তঃ সভোজনোঽল্পোঽল্পযা মাত্রযা যোজ্যঃ| স চ বৃংহণো বালবৃদ্ধাদিভ্যো হিতঃ| পিপাসার্তঃ প্রসক্ততৃডার্তঃ| স্নেহদ্বিষো যে স্বভাবেন স্নেহং দ্বিষন্তি| তথা স্ত্রীনিত্যানাং স্নেহনিত্যানাং চ|| ২৩||

Adhikarana Bojanasya prA~gmadhyottaraM snehapAnaPalam (24) · Śloka 24

স্নেহঃ প্রাগ্ভোজনাত্ কুর্যাদূরুজঙ্ঘাকটীবলম্| বেগানুলোম্যমারোগ্যমধঃ কাযগদক্ষযম্| মধ্যে বৃহত্ত্বাগ্নিবলস্থিরতাকুক্ষিরুক্শমান্| ইন্দ্রিযস্থিরতামূর্ধ্বমূর্ধ্বজত্রুগদক্ষযম্||২৪||

স চ প্রযুক্তো বৃংহণস্নেহো ভোজনাত্ প্রাক্ প্রথমং ভোজনস্য প্রযুক্ত ঊরুবলাদীন্ কুর্যাত্| তথা স এব ভোজনমধ্যে পীতো বৃহত্বাদীন্ কুক্ষিরুক্শমনান্তান্ কুর্যাত্| স এব ভোজনাদূর্ধ্বমনন্তরং প্রযুক্ত ইন্দ্রিযস্থিরতামূর্ধ্বজত্রুগদক্ষযং চ কুর্যাত্|| ২৪||

Adhikarana doShAnusAraM snehasAhAyyadravyANi (25) · Śloka 25

বাতে সলবণং সর্পিঃ পিত্তে কেবলমিষ্যতে| বৈদ্যো দদ্যাদ্বহুকফে ক্ষারত্রিকটুকান্বিতম্||২৫||

সর্বশশ্চ ঘৃতং মারুতেঽধিকে সলবণং হিতম্| পিত্তেঽধিকে কেবলমিষ্যতে| বহুকফে তু পুরুষে ক্ষারত্রিকটুকান্বিতং ঘৃতং বৈদ্যো দদ্যাত্|| ২৫||

Adhikarana acCapAnottaravidhiH (26) · Śloka 26

বাযুর্ষ্ণমচ্ছেঽনুপিবেত্স্নেহে তত্সুখপক্তযে| আস্যোপলেপশুদ্ধ্যৈ চ তৌবরারুষ্করে ন তু| উষ্ণোপচারঃ স্নেহে স্যাদুষ্ণো হ্যুষ্ণৈর্বিরুধ্যতে| ততো গুরুপ্রাবরণো নিবাতশযনস্থিতঃ| জরণান্তং প্রতীক্ষেত তৃষ্যন্নুষ্ণাল্পবারিপঃ||২৬||

অচ্ছস্নেহেঽনু পশ্চাদুষ্ণং বারি পিবেত্| কিং প্রযোজনমাহ-তস্য স্নেহস্য সুখপক্ত্যর্থমাস্যোপলেপশুদ্ধ্যর্থঞ্চ| কিং সর্বত্র আহ-ন তু তৌবরে আরুষ্করে চ স্নেহে বার্যুষ্ণং পিবেদিতি সম্বন্দঃ| কস্মাদিত্যাহ-উষ্ণেত্যাদি| সর্বস্নেহেষূষ্ণোপচারেণ ভবিতব্যম্| উষ্ণোপচার উষ্ণৈস্তৌরবাদিভির্যতো বিরুধ্যতে| ততস্তত্র ত্যজেত্| ততশ্চ প্রকৃতাদুষ্ণোদকপানাদনন্তরং গুরুপ্রাবরণাদ্যুক্তগুণঃ সন্ জরণান্তং প্রতীক্ষেত| জীর্যমাণে তস্মিন্ তৃষ্যন্ সন্নুষ্ণাল্পবারিপো ভবেত্|| ২৬||

Adhikarana jIryamANasnehalakShaNam (27) · Śloka 27

শিরোরুগ্ভ্রমনিষ্ঠীবমূর্চ্ছাসাদারতিক্লমৈঃ| জানীযাদ্ ভেষজং জীর্যত্.....................||২৭||

তচ্চ ভেষজং স্নেহাখ্যং শিরোরুগাদিভির্লক্ষণৈর্জীর্যজ্জানীযাত্|

Adhikarana jIrNasnehalakShaNam (28) · Śloka 28

...........................জীর্ণং তচ্ছান্তিলাঘবাত্| অনুলোমানিলস্বাস্থ্যক্ষুত্তৃষ্ণোদ্গারশুদ্ধিভিঃ||২৮||

তদেব ভেষজং তচ্ছান্ত্যা শিরোরুগাদিশান্ত্যা অঙ্গানাং লাঘবেন চ জীর্ণং জানীযাত্| তথা অনুলোমানিলাদিভিশ্চ জীর্ণং জানীযাত্|| ২৮||

Adhikarana jIrNAjIrNavisha~gkAyAM kRutyam (29) · Śloka 29

জীর্ণাজীর্ণবিশঙ্কাযাং পুনরুষ্ণোদকং পিবেত্| তেনোদ্গারবিশুদ্ধিঃ স্যাত্ততশ্চ রুচিলাঘবম্||২৯||

তথা স্নেহস্য জীর্ণাজীর্ণশঙ্কাযাং পুনরুষ্ণোদকং পিবেত্| উষ্ণোদকেন পীতেনোদ্গারবিশুদ্ধিঃ স্যাত্| ততশ্চ জীর্ণাজীর্ণশঙ্কাতোঽধিকমঙ্গলাঘবং রুচিশ্চ ভবতি|| ২৯||

Adhikarana snehaM pAsyataH pibataH pItavatashca BojanavidhiH (30) · Śloka 30

ভোজ্যোঽন্নং মাত্রযা পাস্যন্ শ্বঃ পিবন্ পীতবানপি| দ্রবোষ্নমনভিষ্যন্দি নাতিস্নিগ্ধমসঙ্করম্||৩০||

তং চ স্নেহং শ্বঃ পাস্যন্ পুরুষোঽদ্য বা পিবন্ হ্যঃ পীতবাংশ্চ মাত্রযা স্বল্পত্বেনান্নং ভোজ্যঃ| কিম্ভূতমন্নমাহ-দ্রবোষ্ণেত্যাদি| অসঙ্করম্ অনানাজাতীযম্|| ৩০||

Adhikarana snehapIte niyamAH (31) · Śloka 31

উষ্ণোদকোপচারী স্যাদ্ ব্রহ্মচারী ক্ষপাশযঃ| ব্যাযামবেগসংরোধশোকবর্ষহিমাতপান্| প্রবাতযানযানাধ্বভাষ্যাত্যাসনসংস্থিতীঃ| নীচাত্যুচ্চোপধানাহস্স্বপ্নধূমরজাংসি চ| যান্যহানি পিবেত্তানি তাবন্ত্যন্যান্যপি ত্যজেত্| সর্বকর্মস্বযং প্রাযো ব্যাধিক্ষীণেষু চ ক্রমঃ| উপচারস্তু শমনে কার্যঃ স্নেহে বিরিক্তবত্||৩১||

তথা স্নেহপ্রসঙ্গেষু পুরুষ উষ্ণোদকোপচারী ব্রহ্মচারী ক্ষপাশযশ্চ স্যাত্| ক্ষপাশযশব্দেন দিবাস্বপ্নস্য রাত্রিজাগরণস্য চ প্রতিষেধ উক্তঃ| তথা পুরুষো যান্যহানি স্নেহং পিবেত্তানি ব্যাযামাদীংস্ত্যজেত্| অনন্তরমন্যানি স্নেহরহিতান্যপি তাবন্ত্যেব ব্যাযামাদীংস্ত্যজেত্| যাবন্তি স্নেহস্যোপযোগঃ| ন কেবলমযমুষ্ণোদকোপচারাদিকঃ ক্রমঃ স্নেহ এব যোজ্যঃ| যাবত্সর্বকর্মসু স্বেদবমনাদিষু ব্যাধিক্ষীণেষু চাযমেব ক্রমঃ| শমনে স্নেহে বিরিক্তবদুপচারঃ কার্যঃ| তত্র বিরিক্তস্য শমনস্নেহস্য চ সদৃশ উপচারঃ| বিরিক্তস্য চ যদধিকং কর্ম পেযাদি তত্সর্বমস্মিন্নপি কার্যম্|| ৩১||

Adhikarana snehapAnAtpUrvaM dIpanauShadhaM deyam (32) · Śloka 32

স্নেহস্য পানাত্ পূর্বঞ্চ দাতব্যং মৃদু ভেষজম্| উত্তেজনং হুতাশস্য কোষ্ঠলাঘবকারি চ||৩২||

সর্বস্য চ স্নেহস্য পানাত্পূর্বং হুতাশস্যাগ্নেরুত্তেজনং কোষ্ঠলাঘবকারি চ মৃদু ভেষজং দাতব্যম্|| ৩২||

Adhikarana snehapAne kAlamaryAdA (33) · Śloka 33

ত্র্যহমচ্ছং মৃদৌ কোষ্ঠে ক্রূরে সপ্তদিনং পিবেত্| সম্যক্স্নিগ্ধোঽথবা যাবদতঃ সাত্মীভবেত্পরম্||৩৩||

তত্র ত্বচ্ছং স্নেহং মৃদৌ কোষ্ঠে ত্র্যহং পিবেত্| তমেবাচ্ছং ক্রূরে কোষ্ঠে সপ্তদিনং পিবেত্| অথবা নৈষ নিযমঃ| সম্যক্ স্নিগ্ধলক্ষণোত্পত্তিরেব নিযমঃ| অতো যথোক্তান্নিযমাত্ পরং ঊর্ধ্বমচ্ছঃ স্নেহঃ প্রযুক্তঃ সাত্মীভবেত্| ন শোধনকার্যং করোতীত্যর্থঃ|| ৩৩||

Adhikarana sAtmIBUtasnehapraBAvaH (34) · Śloka 34

সাত্মীভূতো হি কুরুতে ন মলানামুদীরণম্||৩৪||

এতদেবাচষ্টে-সাত্মীভূত ইত্যাদি|| ৩৪||

Adhikarana snehAtiyoge doShaH (35) · Śloka 35

অতিযোগেন বা ব্যাধীন্ যথাম্ব্বোঘোঽতিযোজনাত্| বিহত্য সেতুং মৃত্কোষ্ঠাত্ স্রবতি ক্ষপযন্ মৃদম্| স্নেহোঽপ্যগ্নিং তথা হত্বা স্রবতি ক্ষপযংস্তনুম্||৩৫||

অথবা শোধনকার্যং কুর্বন্নপ্যতিযোগেন দেহনাশরূপান্ ব্যাধীন্ কুরুতে| তত্র দৃষ্টান্তো যথা অম্ব্বোঘো বারিবেগোঽতিযোজনাত্ সেতুং নিহত্য মৃত্কোষ্ঠৈকদেশাত্ স্রবতি| স্রবংশ্চ মৃদং ক্ষপযেত্| তদ্বত্ স্নেহোঽপি সেতুসংস্থানমগ্নিং হত্বা দেহকোষ্ঠাত্ স্রবন্মৃত্সংস্থানাং তনুং ক্ষপযেত্|| ৩৫||

Adhikarana samyaksnigdhAsnigdhalakShaNam (36) · Śloka 36

বাতানুলোম্যং দীপ্তোঽগ্নির্বর্চঃ স্নিগ্ধমসংহতম্| মৃদুস্নিগ্ধাঙ্গতাগ্লানি স্নেহোদ্বেগোঽথ লাঘবম্| বিমলেন্দ্রিযতা সম্যক্ স্নিগ্ধে রূক্ষে বিপর্যযঃ||৩৬||

সম্যক্ স্নিগ্ধে পুরুষে বাতানুলোম্যাদিলক্ষণং ভবতি| বর্চঃ পুরীষম্| স্নিগ্ধমসংহতং শিথিলং চ| বিমলেন্দ্রিযতান্তং সম্যক্ স্নিগ্ধলক্ষণম্| রূক্ষে পুনরস্নিগ্ধে যথোক্তেভ্যো লক্ষণেভ্যো যথাস্বং বৈপরীত্যমিতি স্নেহাযোগলক্ষণম্|| ৩৬||

Adhikarana atisnigdhalakShaNAni (37) · Śloka 37

পাণ্ড্বামযাঙ্গসদনঘ্রাণবক্ত্রগুদস্রবাঃ| গুদদাহারুচিশ্ছর্দিমূর্চ্ছাতৃষ্ণাপ্রবাহিকাঃ| শুক্তোদ্গারভ্রমশ্বাসকাসাঃ স্নেহাতিসেবনাত্||৩৭||

স্নেহস্যাতিসেবনাত্ পাণ্ড্বামযাদ্যুদ্ভবঃ| স্রবশব্দস্য ঘ্রাণাদিনা সমাসঃ| প্রবাহিকা নিস্তানিকা| শুক্তোদ্গারো বিদগ্ধাম্লোদ্গারঃ| ইতি স্নেহাতিযোগলক্ষণম্|| ৩৭||

Adhikarana mithyAsnigdhalakShaNam (38) · Śloka 38

অমাত্রযাঽহিতোঽকালে মিথ্যাহারবিহারতঃ| স্নেহঃ করোতি শোফার্শস্তন্দ্রানিদ্রাবিসংজ্ঞতাঃ| কণ্ডূকুষ্ঠজ্বরোত্ক্লেশশূলানাহবলক্ষযান্| জঠরেন্দ্রিযদৌর্বল্যজাড্যামস্তম্ভবাগ্গ্রহান্| তাংস্তান্স্বদোষহেতূত্থান্পাণ্ড্বাদীংশ্চাতিযোজনাত্||৩৮||

সর্বস্য স্নেহো দোষানপেক্ষযা মাত্রযা অপ্থ্যশ্চাকালে চ যুক্তস্তথা মিথ্যাহারবিহারতশ্চ হেতোঃ স্নেহঃ শোফাদীন্ করোতি| তাংস্তাংশ্চ পূর্বোক্তানপচারানুগুণ্যেন বাতাদিদোষকারণজান্ ব্যাধীন্ করোতি| উত্ক্লেশো দোষাদীনাং বিকারঃ|| ৩৮||

Adhikarana snehavyApadi sAdhanam (39) · Śloka 39

ক্ষুত্তৃষ্ণোল্লেখনস্বেদরূক্ষপান্নভেষজম্| তক্রারিষ্টখলোদ্দালযবশ্যামাককোদ্রবাঃ| পিপ্পলীত্রিফলাক্ষৌদ্রপথ্যাগোমূত্রগুগ্গুলু| যথাস্বং প্রতিরোগং চ স্নেহব্যাপদি সাধনম্||৩৯||

অস্যাং চ শোফাদিকাযাং স্নেহব্যাপদি ক্ষুত্তৃডাদিসাধনং চিকিত্সা| উল্লেখনং বমনম্| রূক্ষশব্দস্য পানাদিত্রযেণ সম্বন্ধঃ| উদ্দালঃ শালিবিশেষঃ| তথা যদ্দোষানুগুণ্যেন প্রতিরোগং যদ্যস্মিন্ রোগে স্বাধ্যাযোক্তং তদপি সাধনম্|| ৩৯||

Adhikarana virUkShaNasya samyakkRutAtikRutalakShaNam (40) · Śloka 40

বিরূক্ষণে লঙ্ঘনবত্ কৃতাতিকৃতলক্ষণম্||৪০||

স্নেহব্যাপত্সাধনস্য বিরূক্ষণস্বভাবত্বাত্ প্রসঙ্গেন বিরূক্ষণস্য সম্যক্কৃতাতিকৃতলক্ষণমুচ্যতে| যত্ লঙ্ঘনস্য সম্যক্কৃতস্য লক্ষণং তদ্বিরূক্ষণস্যাপি| এবমতিকৃতলক্ষণং লঙ্ঘনবদ্ জ্ঞেযম্| বিরূক্ষণাযোগলক্ষণং তু স্নেহাযোগলক্ষণৈরেবোক্তম্|

Adhikarana pittaprakRuteH snehenAtitIkShNIBUtA- nilatRuShNAyAmupacAraH (41) · Śloka 41

স্নেহেন পৈত্তিকস্যাগ্নির্যদা তীব্রতরীকৃতঃ| স্নেহমাশু জরাং নীত্বা পুনরোজোঽভিতশ্চরন্| উদীরযেত্ সোপসর্গাং পিপাসামস্য বাধিকাম্| সোঽসূংস্ত্যজেদ্যদ্যুদকং ন পিবেদাশু শীতলম্| শীতসেকাবগাহান্ বা তত্তৃষ্ণাপীডিতো ভজেত্| স্নেহাগ্নিনা দহ্যমানঃ স্ববিষেণৈব পন্নগঃ||৪১||

পৈত্তিকস্য পিত্তপ্রকৃতেঃ পুরুষস্য যদা স্নেহেনাগ্নিস্তীক্ষ্ণতরীকৃতো ভবতি তদা সোঽগ্নিরাশু স্নেহং জরাং নীত্বা পুনরোজসশ্চাভিমুখ্যেন চরন্ তীক্ষ্ণত্বাদস্য হি পৈত্তিকস্য সোপসর্গাং সজ্বরাদিমহারোগাং বাধিকাং প্রাণনাশিনীং পিপাসাং তৃষমুদীরযেত্| স চ তথাবিধঃ পুরুষস্তথাবিধযা পিপাসযাসূন্ প্রাণাংস্ত্যজেত্ যদ্যুদকং শীতলং ন পিবেত্| তথাবিধস্তৃষ্ণাপীডিতঃ শীতসেকাদীন্নভজেদ্যদি তদাসূংস্ত্যজেত্| কিম্ভূতস্তৃষ্ণাপীডিত আহ-স্নেহাগ্নিনা দহ্যমানঃ| অত্র দৃষ্টান্তো যথা স্ববিশেষাভিবৃদ্ধেন পন্নগো ভস্মসাত্ ক্রিযতে, তদ্বত্ স্নেহাগ্নিনা পুরুষঃ|| ৪১||

Adhikarana pittaprakRuteH snehe~ajIrNe tIvratRuShNAyAM copacAraHkaPAnilaprakRuteH samaprakRuteshca tRuShNAyAmupacAraH (42) · Śloka 42

অজীর্ণে বলবত্যা তু শীতৈর্দিহ্যাচ্ছিরোমুখম্| ছর্দযেত্তদশান্তৌ চ পীত্বা শীতোদকং পুনঃ| রূক্ষান্নমুল্লিখেদ্ ভুক্ত্বা.......................... ................................তাদৃশ্যাং তু কফানিলে| সমদোষশ্চ নিঃশেষং স্নেহমুষ্ণাম্বুনোদ্ধরেত্| ততো দোষাদিবলতঃ পূর্বোক্তঞ্চ বিধিং শ্রযেত্||৪২||

স্নেহে ত্বজীর্ণে বলবত্যাং তৃষি পৈত্তিকস্য শীতৈরৌষধৈঃ শিরোমুখং দিহ্যাত্| তং চাজীর্ণং স্নেহং ছর্দযেত্| এবমপি তস্যাস্তৃষোঽশান্তৌ স্নেহে ছর্দিতেঽপি শীতোদকং পীত্বা রূক্ষান্নং চ ভুক্ত্বা পুনরুল্লিখেত্| ছর্দযেদিতি পৈত্তিকস্য তৃট্সাধনম্| কফানিলে পুনস্তাদৃশ্যামতিমাত্রাযাং তৃষ্যুষ্ণাম্বুনা নিঃশেষং স্নেহমুদ্ধরেত্ বমেদিত্যর্থঃ| সমদোষশ্চ তথৈব বমেত্ ততঃ স্নেহে বান্তে দোষদূষ্যাদিবলাপেক্ষযা পূর্বোক্তং লাঘবে জাতে সত্যন্নাদিং বিধিং চরেত্|| ৪২||

Adhikarana pitte sarpiHpAnanirNayaH (43) · Śloka 43

ন সর্পিঃ কেবলং পিত্তে পেযং সামে বিশেষতঃ| সর্বং হ্যনুরুজং দেহং হত্বা সংজ্ঞা চ মারযেত্||৪৩||

স্নেহনির্ণযপ্রসঙ্গেনাহ-সর্পিরিত্যাদি| পিত্তে তু কেবলে কেবলমচ্ছং সর্পির্ন পেযম্| সামে তু পিত্তে বিশেষতঃ কেবলঃ ন পেযম্| কুতঃ ? যথাসঙ্খ্যেন হেতুদ্বযমুচ্যতে| কেবলং পিত্তে সর্পিষি পীতে পিত্তং স্নেহসহাযং সত্ সর্বং দেহমনুব্রজেত্ ততশ্চাধিকং রোগস-মীরণা| সামে পিত্তে পীতং সামং স্নেহসহাযং পিত্তং স্রোতঃ-পিধানেন সংজ্ঞাং হত্বা মারযেত্| ইদং চ শোধ্যপিত্তাশযং পিত্তঘ্নাস্ত ইতি শমনীযম্| তেন গ্রন্থবিরোধো ন ভবতি| পিত্তে কেবলমিষ্যত ইত্যেতচ্চোপপন্নং ভবতি| চশব্দো হেতুসমুচ্চযে|| ৪৩||

Adhikarana snehanAnantaraM virekavamanasevanavidhiH (44) · Śloka 44

স্নিগ্ধদ্রবোষ্ণধন্বোত্থরসভুক্স্বেদমাচরেত্| স্নিগ্ধস্ত্র্যহং স্থিতঃ কুর্যাদ্বিরেকং বমনং পুনঃ| একাহং দিনমন্যচ্চ কফমুত্ক্লেশ্য তত্করৈঃ| তিলমাষদধিক্ষীরগুডমত্স্যরসাদিভিঃ||৪৪||

এবমনন্তরেণ প্রকারেণ স্নিগ্ধঃ সন্ যদা বমনেন বিনা বিরেকমেব কারণবশেন করোতি তদাঽভ্যক্তস্নেহঃ সন্ ত্র্যহং স্থিতো বিরেকং কুর্যাত্| কিম্ভূতঃ কিং কুর্বন্ ত্র্যহং স্থিতঃ| স্নিগ্ধাদিগুণযুক্তমাংসরসভুক্ তথা স্বেদমাচরন্ যদা তু স্নেহাদনন্তরং বমনমেবোপযুঙ্ক্তে| তদা স্নিগ্ধঃ সন্ দ্ব্যহং স্থিতো বমনং কুর্যাত্| কথং দ্ব্যহং স্থিতঃ| একাহমনেনৈব প্রকারেণ স্নিগ্ধদ্রবোষ্ণধন্বোত্থরসভুক্ স্বেদমাচরন্ স্থিতঃ| অন্যচ্চ দ্বিতীযং দিনং কফমুত্ক্লেশ্য স্থিতঃ কেনোত্ক্লেশ্য তত্করৈঃ কফকরৈঃ| কৈরিত্যাহ-তিলেত্যাদিভিঃ|| ৪৪||

Adhikarana mAMsalAdiShu snehanAtpUrvaM rUkShaNam (45) · Śloka 45

মাংসলা মেদুরা ভূরিশ্লেষ্মাণো বিষমাগ্নযঃ| স্নেহোচিতাশ্চ যে স্নেহ্যাস্তান্ পূর্বং রূক্ষযেত্ততঃ| সংস্নেহ্য শোধযেদেবং স্নেহব্যাপন্ন জাযতে| অলং মলানীরযিতুং স্নেহশ্চাসাত্ম্যতাং গতঃ||৪৫||

মাংসলত্বাদিযুক্তাঃ পুরুষা যে শোধ্যত্বেন স্নেহ্যাঃ তান্ স্নেহাত্ পূর্বং রূক্ষযেত্| ততো রূক্ষযিত্বাঽনন্তরং চ সংস্নেহ্য শোধযেত্| কিমেবং সতি ভবতি| ইদং ভবতি-মাংসলাদীনাং স্নেহস্য সদৃশত্বাদ্যা স্নেহব্যাপদাশঙ্ক্যতে সা ন জাযতে| তথা রূক্ষস্য স্নেহঃ প্রযুক্তঃ অসাত্ম্যত্বান্মলানীরযিতুং শোধযিতুমলং পর্যাপ্তো ভবতীতি ফলদ্বযম্|| ৪৫||

Adhikarana sadyaH snehanayogAstadarhAshca (46) · Śloka 46

বালবৃদ্ধাদিষু স্নেহপরিহারাসহিষ্ণুষু| যোগানিমাননুদ্বেগান্ সদ্যঃ স্নেহান্ প্রযোজযেত্| প্রভূতমাংসনিষ্ক্বাথান্ জাঙ্গলানূপজান্ রসান্| স্নেহভৃষ্টেষু বা তেষু যবাগূং বাঽতিসংহতাম্| তিলচূর্ণং চ সস্নেহং ফাণিতং কৃসরং তথা| তিলকাম্বলিকং ভূরিস্নেহং সর্পিষ্মতীমপি| পেযাং সুখোষ্ণাং ক্ষৈরেযীং পাত্রে বা সসিতাঘৃতে| সর্পির্লবণযুক্তং বা সদ্যঃ দুগ্ধং তথা পযঃ| পেযাং চ পঞ্চপ্রসৃতাং স্নেহৈস্তণ্ডুলপঞ্চমৈঃ| পাযসং মাষমিশ্রং চ বহুস্নেহসমাযুতম্| তৈলশুণ্ঠীগুডরসং জীর্ণে মাংসরসাশিনঃ| স্নেহং বৈকং সুরাঽচ্ছেন দধ্নো বা সগুডং সরম্| বসাং বরাহজাং সর্পিঃ পিপ্পলীং লবণং তিলান্| পিপ্পলীং লবণং স্নেহাংশ্চতুরো দধিমস্তুকম্| দধ্না সিদ্ধং ব্যোষগর্ভং ধাত্রীদ্রাক্ষারসে ঘৃতম্| যবকোলকুলত্থাম্বুক্ষারক্ষীরসুরাদধি| ঘৃতং চ সিদ্ধং তুল্যাংশং সদ্যঃ স্নেহনমুত্তমম্| সিদ্ধাংশ্চ চতুরঃ স্নেহান্ বদরত্রিফলারসৈঃ| যোনিশুক্রামযহরান্ সদ্যঃ স্নেহান্ প্রযোজযেত্| লবণোপহিতাঃ স্নেহাঃ স্নেহযন্ত্যচিরান্নরম্| তদ্ধি বিষ্যন্দ্যরূক্ষং চ সূক্ষ্মমুষ্ণং ব্যবাযি চ||৪৬||

তত্র বালবৃদ্ধাদিষু পূর্বং বৃংহণস্নেহবিষযপঠিতেশু তথা যে স্নেহে প্রযুজ্যমানে বর্জ্যপরিহারং কর্তুং ন শক্নুবন্তি তেষু চ সদ্যঃ স্নেহাখ্যান্ যোগান্ প্রযোজযেত্| কে ত ইত্যাহ-প্রভুতেত্যাদি| জাঙ্গলসত্ত্বজানানূপসত্ত্বজাংশ্চ মাংসরসান্যথাযোগ্যম্| কিম্ভূতান্ প্রভূতমাংসনিষ্ক্বাথান্| অথবা তেষ্বনন্তরোক্তেষু রসেষু স্নেহেন ঘৃতাদিনা ভৃষ্টেষু সত্স্বধিকরণভূতেষু তেষু যবাগূং সিদ্ধাম্| কিম্ভূতাং নাতিসংহতাং নাতিঘনাম্| তথা সস্নেহফাণিতস্তিলচূর্ণঃ| ফাণিতঃ ক্ষুদ্রগুডঃ| তথা কৃসরঃ তিলমিশ্রা বিলেপী| তথেতি সস্নেহফাণিতেত্যর্থঃ| তথোক্তলক্ষণম্| কাম্বলিকং তিলকৃতং যদ্ ভূরিস্নেহম্| ক্ষৈরেযীং বা পেযাং সর্পিষ্মতীং সঘৃতাং সুখোষ্ণাং চ| অপীতি সমুচ্চযে| তথা শর্করাঘৃতসহিতে পাত্রে সদ্যোদুগ্ধং পযঃ সসর্পির্লবণম্| এতৈর্যুক্তে বা পাত্রে সদ্যোদুগ্ধং পযঃ| তথা পঞ্চপ্রসৃতাখ্যা পেযা স্নেহৈশ্চতুর্ভিঃ প্রসৃতসম্মিতৈঃ পঞ্চমেন চ তাবতা তণ্ডুলেন কৃতা| অথবা পযসা সিদ্ধং বহুস্নেহসমাযুতং মাষমিশ্রমোদনম্| তথা সর্পিরাদিভ্য একমন্যতমং তৈলশুণ্ঠীগুডযুতং সুরাচ্ছেন পীতং সদ্যঃস্নেহনম্| কিম্ভূতস্য পুরুষস্য স্নেহনমাহ| তস্মিন্যোগে জীর্ণে মাংসরসাশিনঃ| অথবা দধ্নঃ সরঃ সগুডঃ| তথা বরাহবসা সর্পিরাদিচতুষ্টযযুক্তা যোগঃ| তথা চত্বারঃ স্নেহাঃ পিপ্পলীলবণদধিমস্তুযুক্তা যোগঃ| তথা ধাত্র্যা দ্রাক্ষাযাশ্চ মিশ্রিতে রসে দধ্না ব্যোষগর্ভং ঘৃতং সিদ্ধং যোগঃ| অত্র দধ্নঃ সহার্থে তৃতীযাবিধানাত্ স্নেহসমত্বাত্ ধাত্রীদ্রাক্ষারসযোঃ প্রত্যেকং স্নেহসমত্বং যোগঃ| তথা যবাদিক্বথিতাম্লাদিসমাংশসিদ্ধং যোগঃ| এতদ্ ঘৃতমুত্তমং সদ্যঃস্নেহনম্| তথা চতুরঃ স্নেহান্| অভিষ্যন্দি স্রোতসাং স্রাবকম্| অরূক্ষত্বাদিগুণযুক্তং চ| সূক্ষ্মং সূক্ষ্মস্রোতঃপ্রবেশিত্বাত্| ব্যবাযি দেহমখিলং ব্যাপ্য পাকায কল্পতে|| ৪৬||

Adhikarana kuShThAdiShu snehanArthaM guDAdInAM niShedhaH triPalAdInAM vidhishca (47) · Śloka 47

গুডানূপামিষক্ষীরতিলমাষসুরাদধি| কুষ্ঠশোফপ্রমেহেষু স্নেহার্থং ন প্রকল্পযেত্| ত্রিফলাপিপ্পলীপথ্যাগুগ্গুল্বাদিবিপাচিতান্| স্নেহান্ যথাস্বমেতেষাং যোজযেদবিকারিণঃ| ক্ষীণানাং ত্বামযৈরগ্নিদেহসন্ধুক্ষণক্ষমান্||৪৭||

কুষ্ঠাদিষু স্নেহপ্রসঙ্গে গুডাদি স্নেহনাড়্র্থং ন প্রকল্পযেত্| কেনতর্হি তান্ স্নেহযেদিত্যাহ-ত্রিফলেত্যাদি| এতেষাং কুষ্ঠাদীনাং যথাস্বমধ্যাযেষু পথ্যত্বেনোক্তৌস্ত্রিফলাদিভিরবিকারিণঃ স্নেহান্ সিদ্ধান্ প্রযোজযেত্| তথা আমযৈর্ব্যাধিভিঃ ক্ষীণানাং নরাণাং স্নেহনার্থমগ্নিদেহসন্ধুক্ষণক্ষমান্ বর্ধনক্ষমান্ স্নেহান্ যোজযেদিতি সম্বন্ধঃ|| ৪৭||

Adhikarana snehAByAsasya Palam (3) · Śloka 3

দীপ্তান্তরাগ্নিঃ পরিশুদ্ধকোষ্ঠঃ প্রত্যগ্রধাতুঃ বলবর্ণযুক্তঃ| দৃঢেন্দির্যো মন্দজরঃ শতাযুঃ স্নেহোপসেবী পুরুষঃ প্রদিষ্টঃ| ইতি শ্রীবৈদ্যপতিসিংহগুপ্তস্য সূনোর্বাগ্ভটস্য কৃতৌ অষ্টাঙ্গসংগ্রহসংহিতাযাং সূত্রস্থানে স্নেহবিধির্নাম পঞ্চবিংশোঽধ্যাযঃ||৩||

উপসংহরতি-যোঽভ্যাসেন স্নেহমুপসেবতে স দীপ্তান্তরাগ্নিত্বাদিগুণযুক্তো ভবতীতি প্রদিষ্ট আগমবিদ্ভিরিতি|| ৪৮|| ইতি শ্রীমন্মহামহোপাধ্যাযেন্দুবিরচিতাযাম্ অষ্টাঙ্গসংগ্রহব্যাখ্যাযাং শশিলেখাযাং সূত্রস্থানে পঞ্চবিংশোঽধ্যাযঃ