9. viruddhānnavijñānīyaḥ

Adhikarana atha viruddhAnnavij~jAnIyo nAma navamo~adhyAyaH pratij~jA (1) · Śloka 1

অথাতো বিরুদ্ধান্নবিজ্ঞানীযমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

আহারস্য প্রসক্তত্বাদ্বিরুদ্ধস্য চ তস্য গরসদৃশত্বাত্তত্প্রসঙ্গ এবেদমুচ্যতে- অথাত ইতি|| ১||

Adhikarana grAmyamAMsAnAM madhuguDAdibhiH saha bhakShaNe niShedhaH (2) · Śloka 2

গ্রাম্যানূপৌদকপিশিতানি, মধুগুডতিলপযোমাষমূলকবিসৈর্বিরূঢধান্যৈশ্চ নৈকধ্যমদ্যাত্||২||

আনূপানাং প্রাণিনামৌদকানাং চ জলজানাং পিশিতানি মাংসানি মাক্ষিকাদিভিরৈকধ্যং সহ নাদ্যাত্| ঔদকানামানূপত্বেঽপি বিরোধপ্রাধান্যাত্পৃথগ্গ্রহণম্| বিরূঢধান্যমঙ্কুরিতানি সস্যানি|| ২||

Adhikarana payasA saha matsyabhakShaNe niShedhaH (3) · Śloka 3

বিশেষতঃ পযসা মত্স্যান্| উভযং হ্যেতন্মধুরসবিপাকিত্বাদভিষ্যন্দি, শীতোষ্ণবীর্যত্বাত্পরস্পরং বিরুদ্ধম্||৩||

পযসা ক্ষীরেণ সহ বিশেষান্মত্স্যান্নাদ্যাত্| এতদুভযমভিষ্যন্দি বীর্যবিরুদ্ধং চ|| ৩||

Adhikarana payasA saha visheSheNa cilicimasya bhakShaNe niShedhaH cilicimalakShaNa~jca (4) · Śloka 4

তেষ্বপি বিশেষেণ চিলিচিমঃ| স পুনঃ শকলী লোহিতনযনঃ সর্বতো লোহিতরাজির্লোহিতপ্রভাকরঃ প্রাযো ভূমৌ চরতি, সোঽত্যভিষ্যন্দিতমত্বাত্ সুতরাং ব্যাধীনুপজনযত্যামবিষং চ||৪||

তেষ্বপি মত্স্যেষু মধ্যে বিশেষেণ চিলিচিমঃ পযসা সহ বিশেষেণ নাদ্যাত্| স পুনশ্চিলিচিমঃ শকল্যাখ্যো লোহিতনেত্রঃ সর্বতঃ শরীরে লোহিতরাজিঃ শরীরে চ লোহিতশকলসদৃশঃ প্রাযশ্চ জলনিকটভূমৌ চরতি| সোঽত্যভিষ্যন্দিতমত্বাত্ সুতরাং ব্যাধীনুপজনযতি| অভিষ্যন্দি মালিন্যেন স্রোতসাং স্রাবকম্| আমবিষং মাত্রাশিতীযে বক্ষ্যতে|| ৪||

Adhikarana sarvamamladravyaM ka~ggvAdayashca payasA saha viruddhyante (5) · Śloka 5

সর্বঞ্চাম্লং দ্রবমদ্রবং পযসৈকধ্যং বিরুদ্ধম্| তত উত্তরং বা বিরুদ্ধং ফলঞ্চ কঙ্গুবরকমকুষ্ঠকুলত্থমাষনিষ্পাবাশ্চ||৫||

সর্বং চাম্লং মদ্যধান্যাম্লাদি পযসা সহ ততঃ পযসো বা উত্তরং বিরুদ্ধম্| ফলং চান্যরসমপি পযসা সহ ততো বা উত্তরং বিরুদ্ধম্| কঙ্গ্বাদযশ্চ পযসা সহ ততো বা উত্তরং বিরুদ্ধাঃ|| ৫||

Adhikarana mUlakAdiharitakabhakShaNottaraM payaH na sevyam (6) · Śloka 6

ন মূলকাদিরহিতং ভক্ষযিত্বা পযঃ সেব্যং কুষ্ঠাবাধভযাত্||৬||

মূলককুঠেরাদি হরিতকং ভক্ষযিত্বা ন পযঃ সেব্যং, কুষ্ঠাবাধভযাত্|| ৬||

Adhikarana kShIramadhubhyAM viruddhAni dravyANi (7) · Śloka 7

পৌষ্করং রৌহিণীকং জাতুকং বা শাকং সহ মধুপযোভ্যাং নাভ্যবহরেত্| তাভ্যাঞ্চ সহ কপোতান্ সর্ষপতৈলভৃষ্টান্||৭||

পৌষ্করাদিশাকং ক্ষীরমাক্ষিকাভ্যাং মিশ্রাভ্যাং সহ নাভ্যবহরেত্| তথা সার্ষপতৈলেন ভৃষ্টান্ কপোতাংস্তাভ্যাং মধুক্ষীরাভ্যাং সহ নাভ্যবহরেত্|| ৭||

Adhikarana sarShapatailabhRuShTAni matsyavarAhamAMsAni viruddhAni (8) · Śloka 8

তথা সর্ষপতৈলভৃষ্টানাং মত্স্যবদরাণাং বদরাণি শ্বাবিদ্বরাহমাংসং চৈকধ্যং পিত্তেনামমাংসানি||৮||

তথা সার্ষপতৈলভৃষ্টানাং মত্স্যবদরাণাং সম্বন্ধীনি মাংসানি বিরুদ্ধানি| বদরাণি শ্বাবিন্মাংসং বরাহমাংসেন সহ বিরুদ্ধম্|| ৮||

Adhikarana saMyogaviruddhAni (9) · Śloka 9

দধ্না কুক্কুটং পৃষতং চ| কুসুম্ভশাকেনৌরভ্রম্| সৌবীরকেণ তিলশষ্কুলীঃ| ক্ষীরেণ লবণম্| মূলকেন মাষসূপম্| নবনীতেন মূলশাকম্| উপোদকাং মৈরেযমার্দ্বীকাভ্যাম্| পীলূনি করীরৈঃ| বিসৈর্বিরূঢকানি| দধ্না মাষসূপেন গুডেন মধুনা ঘৃতেন বা লকুচ ফলম্| দধ্না তক্রেণ তালফলেন বা কদলীফলম্| পিপ্পলীমরিচাভ্যাং, মধুনা গুডেন বা কাকমাচীং||৯||

অপক্বান্যপরিপূর্ণপাকানি মাংসানি পিত্তেন সহ ভুক্তানি বিরুদ্ধানি| দধ্না সহ কুক্কুটো বিরুদ্ধঃ পৃষতশ্চ| কুসুম্ভশাকেন ঔরভ্রং মাংসং বিরুদ্ধম্, উরভ্রো মেষঃ| তথা সৌবীরেণ কাঞ্জিকেন সহ তিলশষ্কুলী বিরুদ্ধা| ক্ষীরেণ সহ লবণং বিরুদ্ধম্| দধ্যাদীনামন্যতমেন লকুচ ফলম্| পুনশ্চ দধ্যাদীনামন্যতমেন কদলীফলম্| পিপ্পলীমরিচাভ্যাং মিশ্রাভ্যাং কেবলেনৈব বা মধুনাথবা গুডেন সহ কাকমাচীং বিরোধাত্ত্যজেত্|| ৯||

Adhikarana kAkamAcyA saMskArAdibhirvirodhaH (10) · Śloka 10

তামেব মত্স্যপচনে শৃঙ্গিবেরপচনে বা ভাজনে সিদ্ধামন্যত্র বা সিদ্ধাং রাত্রিমুষিতাম্||১০||

তথা তামেব কাকমাচীং শৃঙ্গিবেরপচনে ভাজনে মত্স্যপচনে বা সিদ্ধাং পক্বাং কেবলামপি নাভ্যবহরেত্| অন্যস্মিন্ বা যথারুচি ভাজনে সিদ্ধাং নিশামুষিতাং নাভ্যবহরেত্|| ১০||

Adhikarana kAMsyabhAjane dasharAtrasthitaM sarpirna sevyam (11) · Śloka 11

কাংস্যভাজনে দশরাত্রোষিতং সর্পিঃ||১১||

কাংস্যভাজনে দশরাত্রস্থিতং ঘৃতং নাভ্যবহরেত্| যাবদ্দশরাত্রং তাবন্ন বিরোধঃ ততো বিরোধ ইত্যর্থঃ|| ১১||

Adhikarana saMyogasaMskArAdi viruddhAni (12) · Śloka 12

মদ্যদধিমধুভল্লাতকেষু চোষ্ণম্| তক্রসিদ্ধকাসম্পিল্লকো বিরুদ্ধঃ| অঙ্গারশূল্যো ভাসঃ| সুরাকৃসরাপাযসাশ্চৈকধ্যং বিরুদ্ধাঃ| মধুসর্পির্বসাতৈলোদকানি সমধৃতানি দ্বিশস্ত্রিশঃ সমস্তানি বা| মধুঘৃতে ভিন্নাংশে দিব্যোদকানুপানে| মধুপুষ্করবীজম্| পদ্মোত্তরিকাশাকং শার্করো মৈরেযো মধু চ সহোপযুক্তং সর্বে বিরুদ্ধম্; বাতং চাতিকোপযতি| হারিদ্রকঃ সর্ষপতৈলভৃষ্টো বিরুদ্ধঃ| পিত্তং চাতিকোপযতি| পাযসো মন্থানুপানো বিরুদ্ধঃ| শ্লেষ্মাণং চাতিকোপযতি| উপোদকা তিলকল্কসিদ্ধা হেতুরতীসারস্য| বলাকা বারুণ্যা কুল্মাষৈশ্চ বিরুদ্ধা| সৈব বরাহবসযা পরিভৃষ্টো সদ্যো ব্যাপাদযতি| গোধালাবতিত্তিরিমযূরকপিঞ্জলাশ্চৈরণ্ডদার্বগ্নিসিদ্ধা এরণ্ডতৈলসম্মূর্চ্ছিতাঃ| হারীতমাংসং হরিদ্রশূলকাবসকং হারিদ্রাগ্নিপ্লুষ্টং চ| তদেব ভস্মপাংসুপরিধ্বস্তং সক্ষৌদ্রং চ| তথা মত্স্যনিস্তালিতস্নেহসাধিতাঃ পিপ্পল্যঃ||১২||

মদ্যাদিষূপযুক্তেষু উষ্ণং সর্বং বিরুদ্ধম্| তক্রেণ পক্বঃ কম্পিল্লকো বিরুদ্ধঃ| অঙ্গারেষু শূলেন সংস্কৃতো ভাসঃ পক্ষী বিরুদ্ধঃ| সুরাদীংশ্চ পরস্পরং সহ নাভ্যবহরেত্| মধ্বাদীনাং দ্বৌ দ্বৌ বা ত্রীস্ত্রীন্বা সমঘৃতত্বেন সমেন পরস্পরং প্রমাণেন নাভ্যবহরেত্| সমস্তানি বা মধ্বাদীনি সমপ্রমাণানি নাভ্যবহরেত্| তথা বিষধৃতে অপি মধুঘৃতে দিব্যোদকানুপানে বিরুদ্ধে| মাক্ষিকং পদ্মবীজং চ সহ বিরুদ্ধম্| পদ্মোত্তরিকাশাদীনি চ পরস্পরং বিরুদ্ধানি, বাতকোপনানি চ| পদ্মোত্তরিকা কুসুম্ভঃ, শার্করমৈরেযৌ মদ্যবিশেষৌ| একঃ শর্করযা ক্রিযতে| দ্বিতীযঃ খর্জ্জূরাসবঃ| হারিদ্রঃ সর্ষপতৈলভৃষ্টো বিরুদ্ধঃ| হারিদ্রো নাম ভূপ্রসবঃ কন্দরূপঃ| স চৈবং পিত্তকোপনঃ পযসা সংস্কৃত ওদনো মন্থানুপানো বিরুদ্ধোঽনিলশ্লেষ্মকোপনশ্চ| উপোদকাং তিলকল্কেন সিদ্ধামতীসারহেতুত্বান্নাভ্যবহরেত্| বলাকা বারুণ্যা সুরযা সহ বিরুদ্ধা, কুল্মাষো নাতিস্বিন্নানি সস্যানি| সৈব চ বলাকা সূকরবসযা সমন্তাত্ বহুভৃষ্টা সদ্য এব মারযতি| গোধাদযশ্চৈরণ্ডদার্বগ্নিসিদ্ধাস্তথা তেনৈবৈরণ্ডতৈলেন সহ মূর্চ্ছিতা বহুনা ভৃষ্টা ইত্যর্থঃ| হারীতস্য পক্ষিবিশেষস্য মাংসং হরিদ্রাদারুসীসকাযাং শূলে আসক্তং হরিদ্রাগ্নিপক্বং চ বিরুদ্ধম্| তথা তদেব হারীতমাংসং ভস্মনা পাংসুভিশ্চ ধ্বস্তং সত্ সমাক্ষিকং বিরুদ্ধম্| মত্স্যনিস্তালনেন স্নেহেন যেন মত্স্যা নিস্তালিতাস্তেন সিদ্ধাঃ পিপ্পল্যো বিরুদ্ধাঃ|| ১২||

Adhikarana shItoShNanavapurANAdIni sammilitAni na sevyAni (13) · Śloka 13

শীতোষ্ণং নবপুরাণমামপক্বঞ্চ নৈকমৈকধ্যমদ্যাত্||১৩||

সামান্যেন স্পর্শেন বা বীর্যেণ বা শীতমুষ্ণং চ সহ নাদ্যাত্| তথা নবং পুরাণং চ শালিদ্রব্যাদি সহ নাদ্যাত্| আমং পক্বং চাহারদ্রব্যং সহ নাদ্যাত্| শীতমুষ্ণেনৈব| নবং পুরাণেনৈবামং পক্বের্নৈব| ইত্যেকশব্দার্থঃ| হরিতকফলাদীনাং তথাবিধোপযোগাদেব ন বিরোধঃ|| ১৩||

Adhikarana uShNAbhitaptasya sahasA salilAvagAhAdiniShedhaH (14) · Śloka 14

সলিলাবগাহঃ সহসোষ্ণাভিতপ্তস্য ত্বগ্দৃষ্ট্যোরুপপাতায| তৃষ্ণাভিপ্রবৃদ্ধযে চ| তথৈব চ পযঃপানং রক্তপিত্তায||১৪||

উষ্ণেনাঽঽতপাগ্ন্যাদিনা তপ্তস্য সহসা তত্কালমেব সলিলাবগাহো জলমজ্জনং ত্বচো দৃষ্টেশ্চ নাশনং, তৃষ্ণাযাশ্চাতিবৃদ্ধিং করোতি তথৈবোষ্ণাভিতপ্তস্য সহসা পযঃপানং রক্তপিত্তায|| ১৪||

Adhikarana shrAntasya sahasA bhojane doShaH (15) · Śloka 15

শরীরেণাযস্তস্য সহসাঽভ্যবহারঃ ছর্দিষে গুল্মায বা| বাচা ত্বাযস্তস্য স্বরসাদায||১৫||

শরীরেণাযস্তস্য উত্পন্নশ্রমস্য ভোজনং ছর্দিষে গুল্মায বা| বাচা তূত্পন্নশ্রমস্য ভোজনং স্বরসাদায ভবতি|| ১৫||

Adhikarana prakaraNopasaMhAraH (16) · Śloka 16

ইত্যন্নপানদ্রব্যবিরোধৈকদেশো বাহুল্যেনোপযোগী কথিতঃ| ভেষজদ্রব্যাণান্তু যথোপদেশমেব প্রযোগে ন্যায্যতরঃ| তদ্বিরোধঃ পুনরতিপ্রসঙ্গভযান্নোক্তঃ| ন চ তদ্বিজ্ঞানমেকান্তভদ্রকম্||১৬||

ইত্যনেন প্রকারেণান্নপানদ্রব্যাণাং বিরোধৈকদেশঃ কথিতঃ| যো বাহুল্যেনোপযুজ্যতে| অন্যত্স্বযমূহ্যম্| ভেষজদ্রব্যাণাং গুডূচ্যাদীনাং বিদ্যমানোঽপি বিরোধোঽতিপ্রসঙ্গভযোন্নোক্তঃ| ননু চাজ্ঞাতবিরোধাবিরোধানাং কথং তেষাং প্রযোগ ইত্যাহ- যথোপদেশমেব তেষাং প্রযোগো ন্যায্যতরঃ| তেনৈতদুক্তং ভবতি| ভেষজদ্রব্যাণাং যত্র স্ববুদ্ধ্যা সংযোগকল্পনা ক্রিযতে তত্র শাস্ত্রানুগমনেন প্রযোগো ন্যায্যতর ইতি| ন চ তদ্বিজ্ঞানং ভেষজদ্রব্যবিরোধবিজ্ঞানমেকান্তভদ্রকং ন ভদ্রকমেবেত্যর্থঃ| যতস্তেষাং বিরোধে জ্ঞাতে সংযোগকল্পনাযাং স্বল্পমতির্ভিষক্ কদাচিন্মুহ্যতি যতোঽবশ্যং কেনচিদংশেন কশ্চিত্ কেনচিদ্বিরুধ্যতে অতঃ| এতচ্চ বুধ্যমানো ভিষক্ শাস্ত্রান্বযিনমপ্যূহং কর্তুং ন শক্নোতি| যত্র তু শাস্ত্রং বহু প্রবিশতি তথাবিধ ঊহঃ কার্য এব| তস্মাদ্যথোপদেশমেব প্রযোগো ন্যায্যতরঃ| ঊহো যথাশক্তি শাস্ত্রানুগমনেন কার্যঃ|| ১৬||

Adhikarana viruddhadravyalakShaNam (17) · Śloka 17

অপি চ- উত্ক্লেশ্য দোষান্ন হরেত্ দ্রব্যং যত্তত্সমাসতঃ| বিরুদ্ধং তদ্ধি ধাতূনাং প্রত্যনীকতযা স্থিতম্||১৭||

অপি চেতি সমুচ্চযে| সমাসতঃ সঙ্ক্ষেপতঃ বিরুদ্ধং কিমিত্যাহ| দোষানুত্ক্লেশ্য স্বস্থানাত্সঞ্চলয্য যত্ দ্রব্যং নহরেত্ তত্রৈব নাশনে বহির্বা নির্হর্তুমশক্তং তদ্বিরুদ্ধম্| তদ্ধি দ্রব্যং রসাদীনাং ধাতূনাং প্রত্যনীকতযা প্রতিপক্ষত্বেন স্থিতম্|| ১৭||

Adhikarana virodhaprakArAH (18) · Śloka 18

বলিনাং মিথোগুণানাং বিষমতযা সমতযাঽপ্যুভযথাপি| সংস্কারাদিবশেন চ ভবতি নিসর্গাদপি বিরোধঃ||১৮||

তথা সর্বশ্চ বিরোধ এবমেবং ভবতি| কথমিত্যাহ- সংযোগিদ্রব্যগুণানাং বলিনামুভযত্রাপি বলবতাং মিথঃ পরস্পরং বিষমত্বেনাসাদৃশত্বেন বিরোধঃ| তথান্যত্র বলিনাং সদৃশানামপি বিরোধঃ| কেনচিদ্ গুণেন বলিনা সাদৃশ্যাত্ কেনচিদসাদৃশ্যাচ্চ সংস্কারাদিবশেন চান্যোঽপি বিরোধো ভবতি| আদিগ্রহণেন সংযোগদেশকালাদীনাং গ্রহণম্| অন্যশ্চ নিসর্গাত্স্বভাবেনৈব বিরোধঃ|

Adhikarana virodhaprakArANAmudAharaNAni (19) · Śloka 19

ক্ষীরং কুলত্থৈঃ পনসেন মত্স্যৈঃ তপ্তং দধিক্ষৌদ্রঘৃতে সমাংশে| বার্যূষরে রাত্রিষু সক্তাবশ্চ তোযান্তরাস্তে যবকাস্তথা চ||১৯||

এতেষামেব ক্রমেণোদাহরণমাহ| ক্ষীরং বলিনা মধুরবিপাকিত্বেন যুক্তং শীতবীর্যত্বেন চ কুলত্থৈরম্লবিপাকৈরুষ্ণবীর্যৈশ্চ সহ বিরুদ্ধমিত্যসদৃশগুণেনোদাহরণম্| তথা ক্ষীরং মধুররসবিপাকং শীতবীর্যঞ্চ তদ্বিধেনৈব পনসেন বিরুদ্ধমিতি সদৃশগুণেনোদাহরণম্| তথা ক্ষীরং মধুররসবিপাকং চ মত্স্যৈর্মধুররসবিপাকৈরুষ্ণবীর্যৈশ্চ বিরুদ্ধমিত্যেকদেশসাদৃশ্যেনৈকদেশাসাদৃশ্যেন চোদাহরণম্| তপ্তং দধি বিরুদ্ধমিতি সংস্কারোদাহরণম্| ক্ষৌদ্রঘৃতে সমভাগে বিরুদ্ধে ইতি মাত্রোদাহরণম্| ঊষরে স্থিতং বারি বিরুদ্ধমিতি দেশোদাহরণম্| রাত্রৌ সক্তবো বিরুদ্ধা ইতি কালোদাহরণম্| তে চ সক্তোবস্তোযান্তরিতা ইতি সংযোগবিশেষোদাহরণম্| যবকাস্তু কেবলা বিরুদ্ধা ইতি স্বভাবোদাহরণম্|| ১৯||

Adhikarana kushAgrabuddhInAmetadudAharaNamAtram (20) · Śloka 20

কুশাগ্রীযধিযামেতদুদাহরণমাত্রকম্| উপনীতমলং বিদ্বান্ সর্বত্র ক্রমতে যতঃ||২০||

কুশাগ্রীযধিযাং তীক্ষ্ণবুদ্ধীনামেতদনন্তরোক্তমুদাহরণমাত্রমুপনীতম্| যতো বিদ্বান্ শাস্ত্রজ্ঞঃ তীক্ষ্ণবুদ্ধিঃ সর্বত্র ক্রমতে, স্ববুদ্ধ্যৈব সর্বমবগচ্ছতীত্যর্থঃ|| ২০||

Adhikarana viruddhAshane vyApada (21) · Śloka 21

বিস্ফোটশোফমদবিদ্রধিগুল্মযক্ষ্মতেজোবলস্মৃতিমতীন্দ্রিযচিত্তনাশান্| কুর্যাদ্ বিরুদ্ধমশনং জ্বরমস্রপিত্তমষ্টৌ গদাংশ্চ মহতো বিষবচ্চ মৃত্যুম্||২১||

বিরুদ্ধমশনং বিস্ফোটাদীন্ কুর্যাত্| মতির্বুদ্ধির্বিকল্পযোগ্যা| চিত্তং চেতনা| মহতশ্চাষ্টৌ গদান্ কুর্যাত্| যথাযোগং কিঞ্চিদ্বিরুদ্ধং শূলবিষূচিকাদীংস্তাত্কালিকান্ করোতি| অন্যদভ্যাসাদ্যপেক্ষযা যক্ষ্মাদীন্ করোতি| অন্যচ্চ সদ্য এব বিষবন্মৃত্যুং করোতীতি ভিষজা পরিকল্পনীযম্| বাতব্যাধ্যশ্মরীকুষ্টমেহোদরভগন্দরাঃ| অর্শাংসি গ্রহণীত্যষ্টৌ মহারোগঃ সুদুস্তরাঃ|

Adhikarana viruddhAshanajeShu rogeShu pratIkAraH (22) · Śloka 22

তেষ্বাশু কুর্যাত্সংশুদ্ধিং শমং বা তদ্বিরোধিভিঃ| দ্রব্যৈস্তৈরেব বা পূর্বং শরীরস্যাভিসংস্কৃতিম্||২২||

তেষু চ বিরুদ্ধাশনজেষু বিস্ফোটাদিষু রোগেষু সংশুদ্ধিং, বমনবিরেচনাদিকং কুর্যাত্| অথবা তস্য যথাস্বং রোগকারণস্য বিরুদ্ধাশনস্য সর্বের্গুণৈঃ বিপরীতানি যানি দ্রব্যাণি তৈর্বিস্ফোটাদীনাং শমমেব কুর্যাত্| অথবা দেশবিশেষাদ্যপেক্ষযা ভবিষদ্বিরুদ্ধাশনশঙ্কাযাং তৈরেব ভবিষ্যদ্বিরুদ্ধাশনগুণবিপরীতৈর্দ্রব্যৈঃ শরীরস্যাভিসংস্কৃতিং সংস্কারমেব প্রথমং কুর্যাত্| যথাবিরুদ্ধমপ্যন্নং গুণৈর্বিপরীতগুণৈঃ সংস্কারাদ্দেহে দুর্বলং সন্ন রোগায ভবতীতি| এতচ্চস্মদ্গুরবো যথাপ্রক্রান্তশব্দার্থপরতন্ত্রাস্তৈবেরেতি চ তদ্বিরুদ্ধানি পরামৃশন্তো বমনাদিবত্ পূর্বং দেহস্যাভিসংস্কৃতেরপিবৈদ্যবিধেযতামভিমন্যমানাশ্চরকস্য বোদ্ধারো ব্যাখ্যানমভিমন্যন্তে| ভট্টারকেণ তু `তথাবিধৈর্বা দ্রব্যৈঃ পূর্বমভিসংস্কারঃ শরীরস্য' ইত্যস্য বাক্যস্য ব্যাধ্যুত্পত্ত্যনৈকান্তিকপ্রদর্শনপরত্বমঙ্গীকৃত্য তথাবিধৈরিতি চ বিরুদ্ধসমানি পরামৃশ্য বিরুদ্ধৈরেব পূর্বসংস্কারো ব্যাধ্যনুত্পত্তিহেতুরিতি সাত্ম্যাহারপ্রাযতযা দ্বিতীযোঽপি পক্ষো য উদ্ভাসিতঃ সোঽস্মাভিরুপেক্ষিত এব|| ২২||

Adhikarana vyAyAmasnigdhAdInAM virodhyapi na bAdhakam (23) · Śloka 23

ব্যাযামস্নিগ্ধদীপ্তাগ্নিবযস্থবলশালিনাম্| বিরোধ্যপি ন পীডাযৈ সাত্ম্যমল্পং চ ভোজনম্||২৩||

ব্যাযামেত্যাদিনা সাত্ম্যত্বেনৈব গতত্বাত্| তথা ব্যাযামদিপ্তগ্ন্যাদিনাং বিরুদ্ধমপি ভোজনং পীদাযৈ ন ভবতি| স্বল্পকালোপযুক্তং ব্যাযামেন স্নিগ্ধেন চ দীপ্তাগ্নযো যে তেষাম্| অন্যেষাং ব্যাযামীতি পাঠঃ| তেষাং ব্যাযামবতঃ স্নিগ্ধস্য, দীপ্তগ্নেশ্চ বযস্থস্য, প্রত্যগ্রবযসঃ বলশালিনো বলেন যঃ শ্লাঘতে অতিবলস্যেত্যর্থঃ| তথা বিরুদ্ধমপন্নং দেশাভ্যাসাদ্যপেক্ষযা সাত্মীবূতং শরীরে সুখরংপীডাযৈ ন ভবতি| অল্পং চ ভোজনং বিরুদ্ধং পীডাযৈন ভবতি|| ২৩||

Adhikarana viruddhopayoge~api roganivRuttau bIjam (24) · Śloka 24

দোষাদিবৈপরীত্যেন হরতে রোগিণাং রুজম্| একধ্যং দধিদুগ্ধাদিযোজনা ন বিরুধ্যতে| যোগাদিভেদাদ্যদ্যদ্বা পথ্যানামপ্যপথ্যতা| তদ্ভেদান্তরতস্তদ্বদ্বিরোধোঽপি নিবর্ত্ততে||২৪||

ননু চ প্রাযেণ হি রোগে ক্বচিদ্বিরুদ্ধানামপি যথেচ্ছোপযোগাদ্রোগনিবৃত্তির্দৃশ্যতে তত্কথমিত্যাহ| দোষাদীনাং দোষদূষ্যবলকালাদীনাং অংশস্বরূপবিপরীতত্বেন রোগিণো রুজং হরতি| একধ্যং সহভাবেন দধিদুগ্ধাদীনাং যোজনা ন বিরুধ্যতে| তেনৈতদুক্তং ভবতি-কদাচিদ্বিরুদ্ধস্য প্রযুজ্যমানস্য সমুদাযগুণৈর্বিপরীতা রোগদোষগতিরংশাংশিকযা ভবতি| তত্র রুজাহরত্বং দৃষ্টম্| বিরুদ্ধমপ্যবিরুদ্ধম্| অথবা যদ্বত্ পথ্যানামপি ভাবানাং সংযোগাদিভেদেনাপথ্যতা দৃশ্যতে তদ্বত্তস্য সংযোগাদিনা বিরুদ্ধস্য ভেদান্তরেণাধিকসংযোগাদিকৃতেন বিরোধনাশঃ| তেনৈতদুক্তং ভবতি-সংযোগবিশেষাদ্যথা পথ্যানামপ্যপথ্যতা দৃষ্টা তদ্বদ্বিরুদ্ধানামপ্যন্যসংযোগাদ্বিরোধোঽপি নির্বততে ন ভবতীতি| তথা হিতমপ্যপথ্যং সাত্মীভূতং চ দেহেঽভ্যাসাদিবশাত্তত্কাল এব উচিতং তদহিতফলত্বাত্ত্যজেত্|| ২৪||

Adhikarana pathyApathyayostyAgashIlanayorvidhiH (25) · Śloka 25

পাদাংশেন ত্যজেত্সাত্ম্যমহিতং হিতমাচরেত্| একান্তরং ততশ্চোর্ধ্বং দ্ব্যন্তরং ত্র্যন্তরং তথা||২৫||

হিতং চাসাত্মীভূতমপ্যাচরেত্| তচ্চাহিতং সহসা ত্যক্তং হিতং চ সেবিতং রোগায সম্পদ্যতে| অত উচ্যতে-পাদাংশেনেতি| পাদেন চতুর্থভাগেনাপথ্যং ত্যজেত্| অংশেনৈব ভজেত্| অংশো ভাগঃ| স চ প্রকরণাত্ পাদস্যৈব বিজ্ঞেযঃ| তেন পাদেন বা পাদপাদেন বা ত্যজেদপথ্যং তেনৈব চ পথ্যং ভজেত্| কেন ক্রমেণেত্যাহ-একান্তরমিত্যাদি| তেনৈতদুক্তং ভবতি-অপথ্যাদুচিতাদেকং পাদং চতুর্ভাগং রোগী, বলাদ্যপেক্ষযা পাদপাদং বা প্রথমদিবসে ত্যজেত্| স চতুর্ভাগঃ পথ্যাদনুচিতাত্ সেব্যঃ, ততো দ্বিতীযেঽহ্নি সর্বমেবাপথ্যং ততস্তৃতীযেঽহ্নি অপথ্যস্য ত্রয এব ভাগাঃ পথ্যস্যৈকো ভাগ ইত্যেকদিবসান্তরিতং চতুর্থাদিষু দিবসেষ্বেবমেব বা| উপযুজ্যমানচতুর্থভাগসাত্মীভাবাত্| ততশ্চোর্ধ্বং দ্ব্যন্তরম্| কিমুক্তং ভবতি? চতুর্থে ভাগে পথ্যস্য সাত্মীভূতে অপথ্যাদুচিতাত্ দ্বিতীযো ভাগস্ত্যাজ্যঃ| তেনার্দ্ধমপথ্যস্যার্দ্ধং পথ্যস্য তস্মিন্ দিনে ভবতি| দ্বিতীযে দিবসে সাত্মীভূতচতুর্ভাগ এব যোজ্যঃ| এবং তৃতীযে দিবসে চতুর্থে পুনরর্দ্ধমাত্রমেবং দ্বিদিনান্তরিতম্| এবং পঞ্চমাদিদিবসেষ্বপি| আ অর্দ্ধসাত্মীভাবাত্| ততস্ত্র্যন্তরিতম্| সাত্মীভূতেঽর্দ্ধে তৃতীযো ভাগেঽপথ্যাত্ত্যাজ্যঃ, পথ্যাচ্চ সেব্যঃ| তস্মিন্দিনে পথ্যস্য ভাগাস্ত্রযঃ, অপথ্যস্যৈকো ভাগঃ| দ্বিতীযে দিবসে সাত্মীভূতং পথ্যাপথ্যযোরর্দ্ধমর্দ্ধম্| এবং তৃতীযে চতুর্থে চ| পঞ্চমে পুনশ্চতুর্থো ভাগোঽপথ্যস্য ভাগাস্ত্রযঃ পথ্যস্যেতি ত্র্যন্তরিতম্| এবং ষষ্ঠাদিষু দিবসেষ্বা ভাগত্রযসাত্মীভাবাত্| ততঃ সর্বমেব পথ্যম্| এবমেকদ্বিত্রিদিনানি ক্রমেণাসাত্ম্যং সাংত্ম্যেনান্তরযিতব্যম্| (১) অন্যে মন্যন্তে-প্রথমে দিবসে ভাগঃ পথ্যাত্সেব্যঃ| শেষমপথ্যম্| দ্বিতীযে সর্বমপথ্যম্| তৃতীযে পুনরেকো ভাগঃ| এবং ভাগ একান্তরিতঃ| চতুর্থে দ্বৌ| পঞ্চমে একঃ| ষষ্ঠে চ সপ্তমে পুনর্দ্বৌ দ্বাবিতি দ্ব্যন্তরেণ| অষ্টমে ত্রযঃ, নবমে দ্বৌ| দশমে তদ্বদেকাদশে চ, দ্বাদশে পুনস্ত্রয ইতি ত্র্যন্তরিতঃ| ততস্ত্রযোদশাত্ প্রভৃতি সর্বং পথ্যমেবেতি| (২) অন্যে পুনরন্যথা বর্ণযন্তি| যথা-অনেনৈবৈকাদিনা সাত্ম্যমসাত্ম্যেনান্তরযিতব্যম্| তত্র বিচারণাদপথ্যং সাত্ম্যং ভুঞ্জানঃ পথ্যভোজনেচ্ছুরেকদিবসমপথ্যস্য ভাগত্রযং পথ্যস্য চৈকো ভাগঃ| দ্বিতীযে সর্বমেবাপথ্যমিত্যেকান্তরিতম্| তৃতীযে দ্বৌ পথ্যস্য দ্বাবপ্যপথ্যস্য, এবং চতুর্থেঽপি| পঞ্চমে পুনরপথ্যস্য ভাগত্রযং চতুর্থো ভাগঃ পথ্যস্য, এবং দ্ব্যন্তরম্| ততঃ ষষ্ঠে দিবসে ত্রীন্ভাগান্ পথ্যস্য একমপথ্যস্য| এবং সপ্তমেঽষ্টমে চ| নবমে পুনর্দ্বৌ দ্বৌ ভাগৌ দশমে চতুর্থোঽপি পথ্যস্য| তদ্বদেকাদশে দ্বাদশে, ত্রযোদশে| চতুর্দশে পুনস্ত্রযো ভাগাঃ পথ্যস্য ভাগোঽপথ্যস্য| অতঃ পঞ্চদশাত্ প্রভৃতি সর্বং পথ্যমেব যোজ্যম্| অনযোরেব চ পক্ষযোর্যুজ্যমানত্বমেব মন্যামহে| তথা চ শাস্ত্রকৃদ্ভিরেব ঋতুসন্ধৌ চতুর্দ্দশদিনমানা ক্রমসমাপ্তিরিষ্টা| অন্যে পুনরন্যথা বর্ণযন্তি-প্রথমে দিবসেঽপথ্যস্য ত্রীন্ভাগান্ পথ্যস্যৈকম্| দ্বিতীযে সর্বমেবাপথ্যম্| তৃতীযে পথ্যস্য দ্বাবপথ্যস্য চ দ্বৌ| চতুর্থে পথ্যস্যৈকো ভাগঃ, অপথ্যস্য ভাগাস্ত্রযঃ| পঞ্চমেঽপ্যেবমেব| ষষ্ঠে পথ্যস্য ত্রীন্ ভাগানপথ্যস্যৈকম্| সপ্তমে দ্বৌ দ্বৌ পথ্যাপথ্যযোরেবমষ্টমে নবমে চ| দশমাদারভ্য সর্বমেব পথ্যম্|| ২৫||

Adhikarana kramashaH pathyApathyashIlanaparihAraguNAH (26) · Śloka 26

ক্রমেণানেন সান্ত্যক্তা দোষাঃ সংবর্ধিতা গুণাঃ| প্রভবন্তি ন পীডাযৈ প্রাপ্নুবন্তি স্থিরাত্মতাম্||২৬||

ইত্যনেন ক্রমেণাপথ্যদোষাস্ত্যক্তাঃ পীডাযৈ ন ভবন্তি| পথ্যগুণাশ্চ সংবর্দ্ধিতাঃ স্থিরাত্মতাং প্রাপ্নুবন্তি|| ২৬||

Adhikarana trayaH upastambhAH (27) · Śloka 27

ত্রিতযং চৈতদুপস্তম্ভনমাহারঃ স্বপ্নোঽব্রহ্মচর্যং চ| এভির্যুক্তিযুক্তৈরুপাতব্ধমুপস্তম্ভৈঃ শরীরং বলবর্ণোপচযোচিতমনুবর্ততে যাবদাযুঃ সংস্কারঃ| তত্রাঽঽহার উক্তো বক্ষ্যতে চ||২৭||

এতত্প্রসঙ্গ এবেদমুচ্যতে| এতত্ত্রযমুপস্তম্ভো ধারকং শরীরস্য| কিমিত্যাহ-আহারঃ, স্বপ্নঃ অব্রহ্মচর্যং চ| এভিরুপস্তব্ধং দেহং শরীরং যুক্ত্যা অন্যূনাধিকতাঽভিধানযা যুক্তৈঃ| প্রকর্ষযুক্তৈর্বলাদিভিঃ সমৃদ্ধমাপূর্বকর্মসংস্কারপরিক্ষযাদাযুরনুবর্ত্ততে| তত্রাহারঃ পূর্বেষ্বধ্যাযেষূক্তঃ| উত্তরে চাধ্যাযে জ্বরাদিষু চ বক্ষ্যতে|| ২৭||

Adhikarana nidrAyAH svarUpam (28) · Śloka 28

লোকাদিসর্গপ্রভবা তমোমূলা তমোমযী| বাহুল্যাত্তমসো রাত্রৌ নিদ্রা প্রাযেণ জাযতে||২৮||

ক্রমপ্রাপ্তঃ স্বপ্ন উচ্যতে| লোকানামাদিসর্গে জগদুত্পাত্তিকালে প্রভবো যস্যাঃ সা তথাবিধা| তমঃ কারণান্মূলং যস্যাঃ সা তমোমূলা| তমোমযী তমস এব বিকারঃ| তেনৈতদুক্তং ভবতি-সর্বথা তমস্তস্যাঃ কারণমিতি| অত এব সা রাত্রৌ প্রাযেণোত্পদ্যতে| তমসো নাম মহাগুণস্য বাহুল্যাত্| সা চ নিদ্রা রাত্রৌ ভবতি দিবা বা| কেবলমনযা যুক্ত্যা জন্তূনাবিশতি|| ২৮||

Adhikarana nidrAveshAvasthA (29) · Śloka 29

শ্লেষ্মাবৃতেষু স্রোতস্সু শ্রমাদুপরতেষু চ| ইন্দ্রিযেষু স্বকর্মভ্যো নিদ্রা বিশতি দেহিনম্||২৯||

কযেত্যাহ-শ্লেষ্মাবৃতেষ্বিত্যাদি| আহাররসবশাত্ শ্লেষ্মণা স্রোতস্বাবৃতেষু নিরুদ্ধেষ্বিন্দ্রিযেষু চ স্বস্ববিষযগ্রহণকারণাচ্ছ্রমাদুপরতেষু নিবৃত্তেষু দেহিনং নিদ্রা আবিশতি|| ২৯||

Adhikarana svapnAvasthA (30) · Śloka 30

সর্বেন্দ্রিযব্যুপরতৌ মনোঽনুপরতং যদা| বিষযেভ্যস্তদা স্বপ্নং নানারূপং প্রপশ্যতি||৩০||

আবিষ্টাযাং চ নিদ্রাযাং ইন্দ্রিযেষু চ বিষযেভ্যো নিবৃত্তেষু মনো যদা স্বকর্মণো ন নিবৃত্তং, তদা নানারূপং স্বপ্নে প্রপশ্যতি দেহী| যদা তু কারণবশেন মনোঽপি স্বকর্মণো নিবৃত্তং ভবতি, সা সুষুপ্তাবস্থা| তস্যাং ন কিঞ্চিদপি পশ্যতি|| ৩০||

Adhikarana nidrAyAM mAhAtmyam (31) · Śloka 31

নিদ্রাযত্তং সুখং দুঃখং পুষ্টিঃ কার্শ্যং বলাবলম্| বৃষতাং ক্লীবতা জ্ঞানমজ্ঞানং জীবিতং ন চ||৩১||

তস্যাশ্চ নিদ্রাযাঃ সুখাদিকমাযত্তম্| তেনৈতদুক্তং ভবতি-সম্যক্ সেবিতা সুখপুষ্টিবলবৃষত্বজ্ঞানজীবিতৈর্যোজযতি নরম্| অসম্যক্ প্রযুক্তা তু দুঃখকার্শ্যাবলত্বক্লীবতাজ্ঞানৈঃ যোজযতীত্যর্থঃ| বৃষতং স্ত্রীগমনশক্তিঃ| জ্ঞানং বৃদ্ধিঃ|| ৩১||

Adhikarana akAlanidrAdidoShAH (32) · Śloka 32

অকালেঽতিপ্রসঙ্গাচ্চ ন চ নিদ্রা নিবেষিতা| সুখাযুষী পরাত্কুর্যাত্কালরাত্রিরিবাপরা||৩২||

এতদেবোচ্যতে-সা নিদ্রা অকালে বক্ষ্যমাণে তদুপযোগপ্রতিষিদ্ধে কালে অপি স্বল্পোপসেবিতা, তথা কালেঽপ্যত্যন্তসেবিতা, সর্বদা বা, নৈব বা সেবিতা আযুর্জীবিতং পরাকরোতি নাশযতি| জীবিতেঽপি ব্যাধ্যাদিভিঃ সুখং পরাকরোতি| যথা পরা দ্বিতীযেব কালরাত্রিঃ মরণনিশা সুখস্যাযুষশ্চ নাশনাত্সাদৃশ্যম্|| ৩২||

Adhikarana yuktanidrAyAH guNAH (33) · Śloka 33

সৈব যুক্তা পুনর্যুঙ্ক্তে নিদ্রাদেহং সুখাযুষা| যোগাভিযোগিনো বুদ্ধির্নির্মলাঽতমসা যথা||৩৩||

সৈব নিদ্রা যুক্তা সম্যক্ প্রযোগেণ দেহং সুখেনাযুষা চ যোজযতি| যথা যোগে তত্ত্বজ্ঞানেঽভিযোগিনঃ পুরুষস্য নির্মলা বুদ্ধিরতমসা শুদ্ধস্বভাবেন সত্ত্বরূপেণ যোজযতি| অথবা তমসা কারণেন নির্মলা সুখাযুষা যোজযতীত্যর্থঃ|| ৩৩||

Adhikarana rAtrijAgaraNAdInAM guNAH (34) · Śloka 34

রাত্রৌ জাগরণং রূক্ষং স্নিগ্ধং প্রস্বপনং দিবা| অরূক্ষমনভিষ্যন্দি ত্বাসীনপ্রচলাযিতম্||৩৪||

তস্যাশ্চ নিদ্রাযাঃ কালে প্রযোগ উক্তঃ, তং চ কালং দর্শযতি-রাত্রৌ জাগরণং নিদ্রাযা অসেবা রূক্ষং দেহে রূক্ষাণাং ভাবানাং বৃদ্ধিকরমিত্যর্থঃ, এবং দিবা প্রস্বপনং স্নিগ্ধম্| আসীনপ্রচলাযিতং ন রূক্ষং ন চাভিষ্যন্দি| আসীনপ্রচলাযিতং দিবাঽপ্যুপবিষ্টস্য স্বল্পা নিদ্রা, অভিষ্যন্দি মালিন্যেন স্রোতসাং স্রাবকঃ|| ৩৪||

Adhikarana grIShme divAsvapnaM hitam (35) · Śloka 35

গ্রীষ্মে বাযুচযাদানরৌক্ষ্যরাত্র্যল্পভাবতঃ| দিবাস্বপ্নো হিতোঽন্যস্মিন্ কফপিত্তকরো হি সঃ||৩৫||

গ্রীষ্মে তু দিবাস্বপ্নং বিহিতম্| যতস্তস্মিন্ কালে বাযোশ্চযো ভবতি| আদানং চ পরিপুষ্টং ভবত্যতো রৌক্ষ্যং রাত্র্যশ্চ নিদ্রাসমাপ্ত্যযোগ্যাঃ স্বল্পা ভবন্তি| দিবাস্বপ্নশ্চ সন্তর্পকঃ| গ্রীষ্মাদন্যস্মিন্ কালে দিবাস্বপ্নঃ পিত্তশ্লেষ্মকরঃ|| ৩৫||

Adhikarana grIShmavarjyeShu RutuShu divAsvApaniShedhaH apavAdashca (36) · Śloka 36

মুক্তাঽতিভাষ্যযানাধ্বমদ্যস্ত্রীভারকর্মভিঃ| ক্রোধশোকভযৈঃ ক্লান্তান্ শ্বাসহিধ্মাতিসারিণঃ| বৃদ্ধবালাবলক্ষীণক্ষততৃট্চ্ছূলপীডিতান্| অজীর্ণ্যভিহতোন্মত্তান্দিবাস্বপ্নোচিতানপি| ধাতুসাম্যং তথা হ্যেষাং শ্লেষ্মা চাঙ্গানি পুষ্যতি||৩৬||

এষাং হ্যতিভাষ্যক্লান্তাদীনাং দিবাস্বপ্নেন ধাতূনাং বাতাদীনাং দেহধারকাণাং সাম্যমন্যূনাধিকতা ভবতি| শ্লেষ্মা চাঙ্গানি পুষ্যতি উপচিনোতীত্যর্থঃ|| ৩৬||

Adhikarana grIShme~api divAsvApe~ayogyAH (37) · Śloka 37

বহুমেদঃ কফাঃ স্বপ্যুঃ স্নেহনিত্যাশ্চ নাহনি||৩৭||

বহুমেদঃ শ্লেষ্মশরীরা অপ্যতিস্নিগ্ধাহারাদিশীলিনশ্চ গ্রীষ্মেঽপ্যহনি ন স্বপ্যুঃ|| ৩৭||

Adhikarana rAtriShvapi svapne~anarhAH (38) · Śloka 38

বিষার্ত্তঃ কণ্ঠরোগী চ নৈব জাতু নিশাস্বপি||৩৮||

বিষার্ত্তঃ কণ্ঠরোগী চ নিশাস্বপি ন জাতুচিত্ স্বপ্যাত্|

Adhikarana ahitanidrayA jAyamAnA rogAH (39) · Śloka 39

হলীমকশিরোজাড্যস্তৈমিত্যগুরুগাত্রতাঃ| জ্বরভ্রমমতিভ্রংশস্রোতোরোধাগ্নিমন্দতাঃ| শোফারোচনহৃল্লাসপীনসার্দ্ধাবভেদকাঃ| কণ্ডূরুক্কোঠপিটকাকাসতন্দ্রাগলামযাঃ| বিষবেগপ্রবৃত্তিশ্চ ভবেদহিতনিদ্রযা||৩৯||

অহিতনিদ্রাযা বিরুদ্ধনিদ্রাযাঃ সেবনেন হলীমকাদীনামুদ্ভবঃ| ইমে বক্ষ্যমাণলক্ষণাঃ| শিরসো জাড্যং গুরুত্বমিন্দ্রিযাপাটবং চ| স্তৈমিত্যং গাত্রাণাং নিরুত্সাহত্বম্| বিষার্তস্য নিদ্রযা বিষবেগপ্রবৃত্তিঃ|| ৩৯||

Adhikarana atinidrAyAH kAraNam (40) · Śloka 40

অপচ্যমানো বাহুল্যাত্স্রোতাংস্যাবৃণুতে কফঃ| ততঃ স্রোতস্সু রুদ্ধেষু জাযতে গাত্রগৌরবম্| গুরুগাত্রস্য চালস্যমালস্যাদতিনিদ্রতা||৪০||

অতিনিদ্রাযাঃ কারণমুচ্যতে| বাহুল্যাত্ কফস্যাগ্নিঃ কফং পক্তুং ন শক্নোতি| অতঃ সোঽচ্যমানঃ স্রোতাংস্যাবৃণুতে স্থগযতি| ততঃ স্রোতোরোধাত্ গত্রগৌরবং, গাত্রগৌরবাদালস্যমালস্যাদতিনিদ্রাতা|| ৪০||

Adhikarana atinidrAnAshakAni (41) · Śloka 41

বিরেকঃ কাযশিরসোর্বমনং রক্তমোক্ষণম্| ধূমঃ ক্ষুত্তৃড্ব্যথাহর্ষশোকমৈথুনভীক্রুধঃ| চিন্তোত্কণ্ঠাঽসুখা শয্যা সত্ত্বৌদার্যং তমোজযঃ| রূক্ষান্নং চাহিতাং নিদ্রাং বারযন্তি প্রসঙ্গিনীম্||৪১||

এতামতিনিদ্রাং প্রসঙ্গিনীমনুষক্তাং কাযবিরেকাদীনি নাশযন্তি| অসুখা কষ্টা| উত্কৃষ্টসত্ত্বত্বং সত্বৌদার্যম্|| ৪১||

Adhikarana nidrAnAshe hetavaH (42) · Śloka 42

এত এব চ বিজ্ঞেযা নিদ্রানাশস্য হেতবঃ| কালশীলক্ষযো ব্যাধির্বৃদ্ধিশ্চানিলপিত্তযোঃ||৪২||

এতান্যেব চ বিরেকাদীনি সম্যঙ্ নিদ্রাযা অপি নাশহেতবঃ| কালশ্চ নিদ্রানাশহেতুঃ যেন প্রভাতাদৌ সা ন ভবতি| শীলমভ্যাসঃ তেন যস্য যস্য যস্মিন্ কালে নিদ্রানিবৃত্তিরভ্যস্তা তস্য তস্য তস্মিন্ কালে সা ভবতীতি| তথা ক্ষযো ধাতূনাং নিদ্রানাশকারণম্| ব্যাধিশ্চান্যো জ্বরাদিঃ| বাতপিত্তযোশ্চ বৃদ্ধিঃ|

Adhikarana nidrAnAshAjjAyamAnA rogAH (43) · Śloka 43

নিদ্রানাশাদঙ্গমর্দ্দশিরোগৌরবজৃম্ভিকাঃ| জাড্যগ্লানিভ্রমাপক্তিতন্দ্রারোগাশ্চ বাতজাঃ||৪৩||

তস্যাশ্চ সম্যঙ্ নিদ্রাযা নাশাদঙ্গমর্দাদ্যুদ্ভবঃ|| ৪৩||

Adhikarana tandrAnidAnAni (44) · Śloka 44

কফোঽল্পো বাযুনোদ্ধূতো ধমনীঃ সন্নিরুধ্য তু| কুর্যাত্সংজ্ঞাপহাং তন্দ্রাং দারুণাং মোহকারিণীম্| উন্মীলিতবিনির্ভুগ্নে পরিবর্তিততারকে| ভবতস্তত্র নযনে স্রুতে লুলিতপক্ষ্মণী| অর্দ্ধত্রিরাত্রাত্সা সাধ্যা ন সা সাধ্যা ততঃ পরম্||৪৪||

কফোঽল্পঃ ইত্যাদি সুবোধম্|| ৪৪||

Adhikarana rAtrau sAtmyataH nidrAM seveta (45) · Śloka 45

যথাকালমতো নিদ্রাং রাত্রৌ সেবেত সাত্ম্যতঃ||৪৫||

অতঃ কারণাত্ কালানতিক্রমেণ রাত্রৌ নিদ্রাং সেবেত যাদৃশী সাত্ম্যা|| ৪৫||

Adhikarana rAtrau jAgaritasya prAtaH svApavidhiH (46) · Śloka 46

অসাত্ম্যাজ্জাগরাদর্ধং প্রাতঃ স্বপ্যাদভুক্তবান্||৪৬||

অসাত্ম্যে জাগরণে প্রবৃত্তে প্রাতর্দিবাঽপ্যর্দ্ধং জাগরণস্য স্বপ্যাত্| তেনৈতদুক্তং ভবতি যস্য রাত্রৌ যামদ্বযং জাগরণং প্রবৃত্তং তেন দিবা প্রভাতে যাম একঃ স্বপ্তব্যঃ অভুক্তবতা|| ৪৬||

Adhikarana mandanidrasya upacArAH (47) · Śloka 47

শীলযেন্মন্দনিদ্রস্তু ক্ষীরমিক্ষুরসং রসান্| আনূপৌদকমাংসানাং ভক্ষ্যান্ গৌডিকপৌষ্টিকান্| শালীন্মদ্যানি মাষাংশ্চ কীলাটান্ মাহিষং দধি| অভ্যঙ্গোদ্বর্ত্তনস্নানমূর্ধ্বশ্রবণপূরণম্| চক্ষুষস্তর্পণং লেপঃ শিরসো বদনস্য চ| প্রবাতে সুরভৌ দেশে সুখাং শয্যাং যথোচিতে| সংবাহনং স্পর্শসুখং চিত্তজ্ঞৈরনুজীবিভিঃ| সর্পিঃ ক্ষীরানুপানং চ জীবনীযৈঃ শৃতং পিবেত্| কান্তাবাহুলতাশ্লেষো নির্বৃত্তিঃ কৃতকৃত্যতা| মনোঽনুকূলা বিষযাঃ কামং নিদ্রাসুখপ্রদাঃ||৪৭||

যস্তু বিরেকাদিকারণেন বাতকোপেন মন্দনিদ্রঃ ক্ষীরাদীন্ শীলযেত্| তথাঽঽনূপানামৌদকাদীনাঞ্চ মাংসানাং সম্বন্ধিনো রসান্ ভক্ষ্যাংশ্চ গুডসংস্কৃতান্ পিষ্টশালিকৃতাংশ্চ, তথা শালিযোনীনি মদ্যানি| কিম্ভূতানি? মদকারণশক্তিযুক্তানি| অন্যেষাং শালিমদ্যানি মাষাংশ্চ ইতি পাঠঃ| মূর্ধ্নঃ শিরসস্তর্পণং স্নেহপূরণম্| তচ্চ বক্ষ্যতে| শিরসো বদনস্য চ সুস্নিগ্ধৈর্লেপঃ| প্রবাতে বাতসংযোগে দেশে| সংবাহনং মর্দনম্| কিম্ভূতম্? স্পর্শসুখকরং ন পীডাকরমিত্যর্থঃ| কেন কার্যম্? চিত্তজ্ঞৈরনুজীবিভিঃ তথা জীবনীযৈঃ ঔষধৈঃ শৃতং পক্বং সর্পিঃ পিবেত্| তদনু চ ক্ষীরং কেবলমেব| কান্তাবাহুলতেত্যাদি সুবোধম্|| ৪৭||

Adhikarana brahmacaryAdiyutasya nidrA kAle bhavatyeva,mandanidropacArANAM varjanIyatvenAtideshaH (48) · Śloka 48

ব্রহ্মচর্যরতের্গ্রাম্যসুখনিঃ স্পৃহচেতসঃ| নিদ্রা সন্তোষতৃপ্তস্য স্বং কালং নাতিবর্ত্ততে| এতান্যেব চ ভূযিষ্ঠং নিদ্রালুঃ পরিবর্জযেত্||৪৮||

এতান্যেব চ ক্ষীরাদীনি নিদ্রালুঃ প্রসক্তনিদ্রো ভূযিষ্ঠং বাহুল্যেন পরিবর্জযেত্|| ৪৮||

Adhikarana saptavidhAH nidrAH tAsAM vivaraNa~jca (49) · Śloka 49

কালস্বভাবামযচিত্তদেহ- খেদৈঃ কফাগন্তুতমোভবা চ| নিদ্রা বিভর্তি প্রথমা শরীরং পাপ্মাঽন্তগা ব্যাধিনিমিত্তমন্যাঃ||৪৯||

কালস্বভাবাদিভিঃ সপ্তবিধা নিদ্রা| তত্র প্রথমা যা নিদ্রা সা কালস্বভাবপ্রভবা শরীরং ধারযতি| অন্তগা তমোভবা পাপ্মা দুষ্টা| অন্যা শেষা যা আমযখেদেন, চিত্তখেদেন, দেহখেদেন, চামাদিনা, শ্লেষ্মপ্রভবা, আগন্তুনা শস্ত্রপ্রহারাদিনা জাতা| এতাঃ ব্যাধীনাং নিমিত্তম্|| ৪৯||

Adhikarana sambhoge niShiddhA strI deshakAlAdi ca (50) · Śloka 50

গ্রাম্যধর্মপ্রবৃত্তৌ তু রজস্বলামনিষ্টাচারামশস্তামতিস্থূলামতিকৃশাং গর্ভিণীং সূতিকামনুত্তানাং বিকৃতাঙ্গাং গণিকামপ্রজসং দুষ্টযোনিমন্যযোনিমন্যস্ত্রিযং বিশেষাচ্চ বযোবর্ণবৃদ্ধাং সগোত্রাং গুরুমিত্রবন্ধুভৃত্যপত্নীং বর্ণিনীং তথা চৈত্যচত্বরচতুষ্পথোপবনশ্মশানাঘাতসলিলৌষধদ্বিজগুরুসুরনৃপালযেষ্বহনি গোসর্গে মধ্যন্দিনেঽর্দ্ধরাত্রৌ পর্বেষ্বনঙ্গে পিপাসুরপ্রণীতসঙ্কল্পো বা ন গচ্ছেত্||৫০||

স্বপ্নমুক্ত্বা ক্রমপ্রাপ্তমব্রহ্মচর্যমুচ্যতে| অব্রহ্মচার্যং স্ত্রীগমনম্ গ্রাম্যধর্মপ্রবৃত্তিরিতি পর্যাযঃ| তস্যাং তু গ্রাম্যধর্মপ্রবৃত্তৌ প্রকৃতাযাং রজস্বলাত্বাদিযুক্তাং নারীং ন গচ্ছেত্| চৈত্যাদিষু প্রদেশেষু দিবসগোসর্গাদিষু চ কালেষু অনঙ্গঞ্চ পিপাসাদ্যবস্থাসু চ| রজস্বলা উদক্যা অনিষ্ঠাং রূপাদিনা অপ্রিযাং অনিষ্টাচারা যা প্রিযাঽপি তদ্দ্বিষ্টমাচরতি| অশস্তাম্ হীনাকৃতিজন্মলক্ষণাম্| বিকৃতাঙ্গাং কৌব্জবামনত্বাদিজন্মযুক্তাম্| গণিকাং বেশ্যাম্| অপ্রজসং বন্ধ্যাম্| যস্যা বা প্রজা জাতাঽপি ন জীবতি| দুষ্টং ব্যাধিভির্যোনির্যস্যাঃ| অন্যযোনির্বডবাগর্দভ্যাদিঃ অন্যস্ত্রী পরস্ত্রী বিশেষাচ্চ বযোবর্ণবৃদ্ধাং ন গচ্ছেত্| বর্ণবৃদ্ধা জাত্যধিকা| বযোবৃদ্ধা প্রসিদ্ধা| সগোত্রামেকগোত্রাং তথা গুর্বাদিপত্নীং চ বিশেষাদ্বর্জযেত্| চৈত্যঃ প্রসিদ্ধঃ| গ্রামাদ্বহির্মহাবৃক্ষশ্চ চৈত্যঃ| চত্বরঃ ত্রিপথম্| আঘাতনং সূনাদিনিগ্রহস্থানম্| সলিলাদীনামালযেনাশ্রযবাচিনা সম্বন্ধঃ| সলিলালযো নদীতটাকাদিঃ| ঔষধালযঃ তত্স্থানং পর্বতবেষ্মাদিঃ যত্র বহূন্যৌষধানি ভবন্তি| গোসর্গো রাত্রিক্ষযঃ| পর্বদিনং চতুর্থী, ষষ্ঠী, অষ্টমী অমাবস্যা চ| অনঙ্গং যোন্যাভিধানাদঙ্গাদন্যত্ পাণ্যূর্বাদি| অপ্রণীতসঙ্কল্পো অনুত্পন্নতদিচ্ছঃ|| ৫০||

Adhikarana viparItavyavAyAdInAM niShedhaH (51) · Śloka 51

ন চ বিপরীতব্যবাযে যোজযেত্||৫১||

ন বিপরীতব্যবাযে চ স্ত্রিয কাঞ্চন যোজযেত্| বিপরীতব্যবাযঃ স্ত্রিযাঃ পুরুষকর্ম|| ৫১||

Adhikarana sambhoge mahAbhogasharIrAdInAM visheShaniShedhaH (52) · Śloka 52

বিশেষেণ চাতিব্যাযতাং গর্ভিণীং নবপ্রসূতামৃতুমতীং সংবৃতযোনিঞ্চ||৫২||

অতিব্যাযতত্বাদিযুক্তাং তু বিশেষেণ ন যোজযেত্| অত্রানৃতুমত্যসঞ্জাতার্ত্তবা বালা| ঋতুমতীমিতি কেচিত্ পঠন্তি| অতিব্যাযতা মহাভোগশরীরা|| ৫২||

Adhikarana mUrddhAbhighAtaniShedhaH (53) · Śloka 53

মূর্দ্ধাভিঘাতং চ পরিহরেত্| ন চ নিষেকাভিমুখং শুক্রং ধারযেদিতি||৫৩||

মৈথুনে মূর্ধ্নঃ শিরসোঽভিঘাতং তাডনং বর্জযেত্| তথা বৃক্ষঃপ্রভৃতীনাং দেশাদ্যপেক্ষযা চ পরিগ্রহঃ|| ৫৩||

Adhikarana vyavAyamAtrA (54) · Śloka 54

মনঃশরীরস্থিতিমাত্রমেব ব্যবাযং সেবেত| ন তত্পরঃ স্যাদিতি||৫৪||

যাবতা ব্যবাযেন মনস ঔত্সুক্যং শরীরে চ শুক্রস্রুত্যাদিকং ন পশ্যতি| তাবন্তমেব ব্যবাযং সেবেত| নৈব মৈথুনপরঃ স্যাদিতি|| ৫৪||

Adhikarana sambhoganiyamAH (55) · Śloka 55

ভবতি চাত্র শ্লেকঃ- বিস্রব্ধহৃষ্টো রহসি তত্কামস্তরুণঃ পুমান্| সমস্থিতাঙ্গঃ সুরভির্মুক্তমূত্রাদিরব্যথঃ| নানাশিতো নাত্যশিতো বৃষ্যাণাং তর্পিতস্ত্র্যহম্| নারীং নারীর্গুণৈর্যুক্তাং সহপূর্ণগুণাং ব্রজেত্||৫৫||

ভবতি চাত্রেতি শৈলী| বিস্রম্ভাদিযুক্তো নারীং ব্রজেত্| বিস্রব্ধঃ স্বস্থামনাঃ রহস্যেকান্তে| তত্কামো গম্যমানযোষিত্কামঃ গমনদিবসাত্ পূর্বং দিবসত্রযং বৃষ্ণৈরাহারৈঃ কৃততৃপ্তিঃ| কিম্ভূতাং নারীং নারীগুণৈর্বাজীকরণাধ্যাযোত্কৈর্যুক্তাম্| তত্র হি `তস্মাদ্যা যস্য হৃদযম্' ইত্যাদিনা বক্ষ্যতি| পূর্বোক্তৈশ্চ গুণৈর্বিস্রম্ভাদিভিঃ পুরুষোক্তঃ| কেবলং লিঙ্গবৈপরীত্যম্|| ৫৫||

Adhikarana RutuvisheSheNa saMyoge kAlaniyamaH (56) · Śloka 56

দ্ব্যহাদ্বসন্তে তস্যান্তে পক্ষাত্তদ্বদ্ ঘনোদযে| সেবেত কামতঃ কামং হেমন্তে শিশিরে বলী||৫৬||

বসন্তে দ্ব্যহান্নারীং ব্রজেত্ তস্য বসন্তস্যান্তে গ্রীষ্মে পক্ষাত্তদ্বত্ ঘনোদযে বর্ষাসু হেমন্তে শিশিরে চ বলী বলবান্ কামতো যথেচ্ছং সেবেত| শরদি ত্বনুক্তাবপি বসন্তসদৃশবলাদিমত্বাদ্ দ্ব্যহাদেব নারীং ব্রজেত্| তথা চ শ্রীবাগ্ভটগ্রন্থ এব- `দ্ব্যহাবসন্তশরদোঃ' ইতি|| ৫৬||

Adhikarana maithunAnantaraM sevanIyAni (57) · Śloka 57

স্নানাঙ্গরাগব্যজনেন্দুপাদ- মাংসাসবক্ষীররসান্ রসালাম্| ভক্ষ্যান্ সিতাঢ্যান্ সলিলং সুশীতং সেবেত নিদ্রাঞ্চ রতান্ততান্তঃ||৫৭||

রতান্তে চ তান্তঃ ক্লান্তঃ স্নানাদীন্ সেবেত|| ৫৭||

Adhikarana grAmyadharmottaraM snAnAdisevanasya phalam (58) · Śloka 58

স্ত্রীসংসর্গাদ্ধি সদ্যঃ স্যাত্ক্লীবতা বলিনামপি| এবং চাপ্যাযতে শীঘ্রং তেষাং শুক্রং চ ধাম চ||৫৮||

কিমর্থমেতত্ কুর্যাদত আহ- স্ত্রীসংসর্গাদিতি| বলিনামপি স্ত্রীসংসর্গে তত্কালং ক্লৈব্যমবশ্যমেব ভবতি| অনেন তু স্নানাদিনা কৃতেন শীঘ্রমেব শুক্রমাপ্যাযতে|| ৫৮||

Adhikarana avidhigrAmyadharmasevAyA doShAH (59) · Śloka 59

দুষ্ট্যাযুরোজঃশুক্রাণাং ক্ষযং মেঢ্রাশ্রযান্ গদান্| বাযোঃ কোপমধর্মং চ মূঢঃ প্রাপ্নোত্যতোঽন্যথা| উত্তানো বেগরোধী বা বৃদ্ধিমেহাশ্মশর্করাঃ| তিমিরাদিগদোত্পত্তির্মূর্দ্ধাদ্যহননাদ্ ধ্রুবম্||৫৯||

অতো যথোক্তাদ্বিধানাদন্যেন নারীং গচ্ছন্মূঢো দৃষ্ট্যাদিক্ষযং মেঢ্ররোগান্ বাতকোপধর্মং চ প্রাপ্নোতি যথাসম্ভবম্| তথা স্ত্রিযাঃ পুরুষাযিতে পুরুষ উত্তানো গচ্ছন্ বাযোর্বৈপরীত্যেনাশু শুক্রনির্গমনাদ্ বৃদ্ধ্যাদীন্ প্রাপ্নোতি| যশ্চান্যথাপি শুক্রবেগরোধী সোঽপি| বৃদ্ধিরান্ত্রবৃদ্ধিঃ বক্ষোমূর্দ্ধাদ্যাহননাত্তিমিরাদীন্ ঊর্ধ্বজত্রুরোগানুরসঃ শূলাদীংশ্চ প্রাপ্নোতি| ধ্রুবমাবশ্যকে|| ৫৯||

Adhikarana atimaithune vyApadaH (60) · Śloka 60

ভ্রমক্লমোরুদৌর্বল্যবলধাত্বিন্দ্রিযক্ষযঃ| অপর্বমরণং চ স্যাদ্বিশেষেণাতিমৈথুনাত্||৬০||

অতিমৈথুনাত্ ভ্রমাদ্যুত্পত্তিঃ| অপর্বমরণমকালমরণম্| বিশেষেণোর্বোর্বলহানিঃ, ঊরুদৌর্বল্যম্|| ৬০||

Adhikarana sambhoge niyamaH (61) · Śloka 61

ন চোনঃ ষোডশাদ্বর্ষাত্ সপ্ততেঃ পরতো ন চ| আযুষ্কামো নরঃ স্ত্রীভিঃ সংযোগং গন্তুমর্হতি||৬১||

আযুর্যোঃ নরঃ কামযতে স ষোডশাদ্ বর্ষাদধঃ সপ্ততেরূর্ধ্বং চ বর্ষেষু স্ত্রীভিঃ সংসর্গে গন্তুং নার্হতি|| ৬১||

Adhikarana bAlyAvasthAyAM sambhoge hAniH (62) · Śloka 62

অতিবালো হ্যাসম্পূর্ণসর্বধাতুঃ স্ত্রিযং ব্রজন্| উপতপ্যেত সহসা তটাকমিব কাজলম্||৬২||

যতঃ ষোডশাদূনবর্ষ অতিবালঃ অসম্পূর্ণধাতুঃ সহসা স্ত্রিযো গচ্ছন্নুপতপ্যেত যথা তটাকং কাজলং স্তোকজলং ঝটিত্যেব সূর্যসন্তাপাদি ভিরুপতপ্যতে শুষ্যতি তথা|| ৬২||

Adhikarana vRuddhasya strIgamane hAniH (63) · Śloka 63

শুষ্কং রূক্ষং যথা কাষ্ঠং জন্তুজগ্ধং বিজর্জরম্| স্পৃষ্টমাশু বিশীর্যেত তথা বৃদ্ধঃ স্ত্রিযং ব্রজন্||৬৩||

সপ্ততেরূর্ধ্বং বৃদ্ধঃ স্ত্রিযো ব্রজন্ আশু বিশীর্যেত জটিতি নশ্যেত| যথা জন্তুভিঃ কৃমিভির্ভক্ষিতং কাষ্ঠং শুষ্কং রূক্ষং বিজর্জ্জরমতিপুরাণত্বান্নষ্টস্থৈর্যং স্পৃষ্টং নশ্যতীতি|| ৬৩||

Adhikarana shukraparirakShaNopadeshaH (64) · Śloka 64

কাযস্য তেজঃ পরমং হি শুক্রমাহারসারাদপি সারভূতম্| জিতাত্মনা তত্পরিরক্ষণীযং ততো বপুঃ সন্ততিরপ্যুদারা||৬৪||

এবং স্থিতে জিতাত্মনা জিতেন্দ্রিযেণ সতা শুক্রং পরিরক্ষণীযম্| যতঃ কাযস্য শরীরস্য শুক্রং শ্রেষ্ঠং তেজঃ| কিম্ভূতম্ তত্? আহারস্য সারাদ্রসাখ্যাদপি সারভূতং তস্মাদ্রক্ষণীযম্| অতশ্চ রক্ষণীযম্| যতস্ততঃ শুক্রাদ্রক্ষিতাদ্বপুঃ শরীরং সতেজস্ত্বাদুদারমুত্কৃষ্টং ভবতি|| ৬৪||

Adhikarana tAtkAlikasukhakarANyapramattena sevyAni shAshvatasukha-dAyikAni tu tatpareNa sevyAni (65) · Śloka 65

অপ্রমতো ভজেদ্ভাবাংস্তদাত্বসুখসংজ্ঞকান্| সুখোদর্কেষু সজ্জেত দেহস্যৈতদলং হিতম্||৬৫||

ইদং কর্তব্যতাপ্রসঙ্গেনোচ্যতে| তদাত্বসুখসজ্ঞকান্ ভাবানপ্রমত্তং ভজেত্| তদাত্বসুখসংজ্ঞকান্ যে তদাত্বে দৃষ্টং এব তত্কালং সুখফলা যোষিদাহারদযস্তে ভাবাঃ অপ্রমত্তাদিনা সতা সেব্যাঃ| যতো দৃষ্টাদৃষ্ট্যোর্দুঃখকর্ত্তৃত্বেন ন বিরুধ্যন্তে যে তদাত্বসুখাস্তেষাং বস্তুতো দুঃখানামেব সুখবুদ্ধির্লোকস্যেতি জ্ঞাপযতি সংজ্ঞাগ্রহণেন| তথা সুখোদর্কেষু সদ্যো দুঃখাদেষ্বপি অদৃষ্টসুখফলেষু সজ্জেত তাত্পর্যমাশ্রযেত তপোদানাদিষু| এতদুভযং দেহস্য হিতত্বে পর্যাপ্তম্|| ৬৫||

Adhikarana hitAhArasevane~api rogodbhave kAraNam (66) · Śloka 66

প্রজ্ঞাপরাধোঽসাত্ম্যার্থসংযোগঃ কালবৈকৃতম্| হিতেঽপি রতমাহারে যোজযন্ত্যামযৈর্নরম্||৬৬||

তস্মাত্ প্রজ্ঞাপরাধাদি নরমামযৈর্ব্যাধিভির্যোজযতি| প্রজ্ঞাপরাধো দিনচর্যোক্তাচারব্যতিক্রমঃ| তথাঽসাত্ম্যৈরনুচিতৈঃ শব্দাদিভিরিদ্রিযার্থৈঃ সংযোগঃ| কালস্য চ বিকৃতত্বং বিষমত্বং বা| যথাপ্রাপ্তত্বাদ্বিপরীতস্বরূপত্বম্| কিম্ভূতং নরমিত্যাহ- হিতেঽপ্যাহারে রতমহিতস্য ত্বাহারস্য রোগকৃত্ত্বং স্থিমেবেত্যপি শব্দস্যার্থঃ|| ৬৬||

Adhikarana ahitAhArAsevane~api rogAsambhave kAraNam (67) · Śloka 67

নাপথ্যসেবনং সদ্যঃ প্রবাধন্তে তদা মলাঃ| প্রকোপং প্রতিবিঘ্নন্তি ভিন্নৈর্দূষ্যাদিভির্যদা| ন চ সর্বোপচারোঽপি সর্বদা সর্বদোষকৃত্| ন হি সর্বাণ্যপথ্যানি তুল্যদোষাণি নৈব চ| সর্বে তুল্যবলা দোষা ন সর্বাণি বপূংষি চ| ব্যাধিক্শমত্বে শক্তানি...................||৬৭||

ননু চৈবং হি দৃষ্টং যথা অপথ্যং সেবিতং ন চ রোগ উত্পন্নঃ| তত্ কথমিত্যুচ্যতে| অপথ্যসেবিনং পুরুষং মলা বাতাদযঃ সদ্য এব তদা ন বাধন্তে যদা ভিন্নৈর্বিসদৃশৈর্দূষ্যদেশাদিভিঃ প্রকোপে বিঘ্নন্তি| যথা পিত্তকোপকারণে আনূপদেশে সেবিতে ঝটিতি ব্যাধির্নোত্পদ্যতে| যদা তু দূষ্যাদীনাং সাদৃশ্যাত্ মলানাং কোপে বিঘ্নো ন ভবতি তদাবশ্যং সদ্য এব বাধন্তে| অতশ্চ সদ্যো ন বাধন্তে মলাঃ| যতো ন সর্বাপচারোঽপথ্যসেবনং সর্বদৈব সর্বদোষকরঃ| তেনৈতদুক্তং ভবতি- কিশ্চ্দপচারঃ কদাচিদ্দোষবিশেষহেতুঃ| দূষ্যাসাদৃশ্যাত্| যতো ন হি সর্বাণ্যপথ্যানি তুল্যদোষাণি একদোষহেতূনি| তথা হি - যেনাপথ্যং শ্লেষ্মকারণং সেবিতং তস্য তস্মিন্নাহারাদাববশ্যং তদ্বিপরীতদোষকারণমপি সম্ভবতি| যেন স ন তথা কুপ্যতি| যতশ্চ সর্বে দোষা ন সদৃশবলাঃ| কশ্চিদ্ধীনবলো বলাধিকেন রুদ্ধকোপো ন কুপ্যতি ন চ সর্বাণি বপূংষি ব্যাধিক্ষমত্বে শক্তানি| তেনৈতদুক্তং ভবতি- বহুরপি দোষঃ কুপিতো ব্যাধিক্ষমে দেহে ন লক্ষ্যতে| পীডাকরণাশক্তত্বাত্|| ৬৭||

Adhikarana apathyasyApathyatamatve bhAve kAraNam (68) · Śloka 68

....................যতোঽপথ্যং তদেব তু| গচ্ছত্যপথ্যতমতাং তুল্যদোষাদিবর্দ্ধিতম্||৬৮||

তথা তুল্যৈর্দূষ্যাদিভিরুপবৃংহিতমপথ্যং যতোঽপথ্যতমতাং গচ্ছন্তি বলাত্| এতদুক্তং ভবতি- বিসদৃশৈর্দূষ্যাদিভির্যুক্তমপথ্যং কদাচিদ্দোষকরং ন ভবতি| তুল্যাঃ সদৃশদূষ্যাদযঃ| যথা শ্লেষ্মপ্রকৃতের্মন্দাগ্নেরল্পবলস্য স্বল্পসত্ত্বস্য স্নিগ্ধাদিসাত্ম্যস্য স্নিগ্ধগুর্বাদিপ্রকুপিতেন কফেন বসন্তে মেদসো দূষণম্| অত্রৈকদ্বিত্রাণাং দূষ্যাদীনাং সাদৃশ্যাসাদৃশ্যযোঃ কার্যকর্ত্তৃত্বে গুরুলাঘবং কল্পনীযম্|| ৬৮||

Adhikarana bahubhiH kAraNaiH prakupitAnAM doShANAmAshukAritvam (69) · Śloka 69

ত এব চ পুনর্দোষা হেতুভির্বহুভিশ্চিতাঃ| মিথে বিরুদ্ধা বলিনো দীর্ঘকালানুবন্ধিনঃ| সর্বে সমপ্রকুপিতাঃ প্রাপ্যাল্পমপি কারণম্| প্রাণাযতনমাশ্রিত্য গম্ভীরাঃ সর্বমার্গগাঃ| দেহেঽহিতোচিতে তে স্যুশ্চিরাদপ্যাশুকারিণঃ||৬৯||

ত এব চ বাতাদযো দোষা যে অপথ্যহেতবস্তে চিরাদপি স্বল্পমপি কারণমাসাদ্যাপথ্যোচিতে দেহে আশুকারিণো ব্যাধীনাং মারণাত্মকেন কর্মণা ভবন্তি| কিম্ভূতাঃ? হেতুভিঃ কারণৈঃ শীতগুর্বাদিভির্বহুভিশ্চিতাঃ সঞ্চিতা মিথঃ পরস্পরেণ বিরুদ্ধাস্তথা বলবন্তো দীর্ঘকালানুবন্ধিনো বহুকালস্থিতাঃ সর্বে চ সমমেককালং প্রকুপিতাঃ প্রাণাযতনং প্রাণস্থানং হৃদযাদিকমাশ্রিত্য প্রকুপিতা গম্ভীরা অন্তস্সরাঃ সর্বমার্গগা অশেষস্রোতোব্যাপিনঃ|| ৬৯||

Adhikarana keShA~jcidahitAhArAdibhirapi sAtmyatvAdi (70) · Śloka 70

অহিতান্যপি চান্যেষামভ্যাসাদুপশেরতে| দোষাশ্চৈষাং ক্ষযং যান্তি কর্মবাতাতপাদিভিঃ||৭০||

অন্যেষাং চাহিতান্যপি অভ্যাসাদুপশযবন্তি ভবন্তি| উপশযঃ সাত্ম্যং দেহসুখকর্ত্তৃত্বম্| ননু চ তদহিতং বাতাদিকোপেন কথং রোগং ন করোতি? উচ্যতে- তেষামহিতোচিতানাং দোষাঃ কর্মভির্দ্ধাবনলঙ্ঘনাদিভির্বাতাতপাদিভিশ্চ ক্ষযমাযান্তি| প্রতিদিনং বৃদ্ধাঃ প্রতিদিনমেব ক্ষীযন্তে|| ৭০||

Adhikarana bhinnAhArAdimatAmapi bahUnAmekarogotpattau hetuH (71) · Śloka 71

ভিনাহারাবযঃসাত্ম্যপ্রকৃতীনাং সমং ভবেত্| একো বিকৃবায্বাদিযুগপত্সেবনাদ্গদঃ||৭১||

ননু চৈবমনন্তরোক্তেন প্রকারেণ ভিন্নেষু ভিন্নবলেষু ভিন্নকালেষু চ দোষদূষ্যাদিষু বহূনামেকরোগোত্পত্তিঃ সমকালং দৃষ্টা তত্ কথমিত্যুচ্যতে- ভিন্নাহারেত্যাদি| ভিন্না বিসদৃশা আহারদযো যেষাং তে তথাবিধাঃ তেষাং সমমেককালং য একো গদঃ স বিকৃতানাং বায্বাদীনাং সেবনাত্|| ৭১||

Adhikarana vAtAdInAM vikRutau kAraNAni (72) · Śloka 72

বাতাদীনাং তু বিকৃতির্বিকৃতাদ্গ্রহচারতঃ| ভৌমান্তরিক্ষদিব্যেভ্য উত্পাতেভ্যশ্চ জাযতে||৭২||

কথং তেষাং বাতাদীনাং তথাবিধা বিকৃতিরুচ্যতে| বিকৃতাত্ গ্রহাণাং রাশিগমনাত্| ভৌমাদিভ্যশ্চোত্পাতেভ্যঃ| ভূমৌ জাতো ভৌমঃ| এবং দিবি স্বর্গে অন্তরিক্ষে চ|| ৭২||

Adhikarana vikRutagrahacArAdisambhavahetuH (73) · Śloka 73

সম্ভবঃ পুনরেতেষাং কর্মণঃ সামুদাযিকাত্||৭৩||

এতেষাং চ বিকৃতগ্রহচারভৌমোত্পাতাদীনাং সামুদাযিকাত্ পূর্বকৃতাত্সম্প্রতি কৃতাচ্চ মিশ্রীভূতাত্ কর্মণঃ সম্ভবঃ| পূর্বে কৃতেন তস্মিন্ কালে পুরুষস্য প্রাপ্তফলেন সাম্প্রতিকেন চ পূজ্যপূজাব্যতিক্রমেণ চ|| ৭৩||

Adhikarana duShTavAyorlakShaNam (74) · Śloka 74

দুষ্টো বাযুরভিষ্যন্দী স্তিমিতোঽত্যূষ্ণশীতলঃ| কুণ্ডলী ভৈরবরবঃ পরুষোঽনার্ত্তবো বলী| অন্যোন্যব্যাহতগতিঃ পাংসুবাষ্পবিষান্বিতঃ||৭৪||

ননু দুষ্টানাং বাতাদীনাং দোষকারণত্বমুক্তম্| কে চ তে ইতি ন জ্ঞাযন্তে| অতো লক্ষণার্থমুচ্যতে| দুষ্টো বাযুরভিষ্যন্দী মালিন্যেন স্রোতসাং স্রাবকঃ| স্তিমিতঃ অবেগবানত্যুষ্ণো ভবত্যতিশীতো বা কুণ্ডল্যাবর্ত্তবান্ ভৈরবরবো ভীষণশব্দঃ| পরুষস্তথানার্ত্তবঃ আর্তবাদ্বিপরীতঃ বলী বলবান্ অন্যোন্যং পরস্পরং দিগ্বিশেষেণ ব্যাহতগতী রুদ্ধমার্গঃ পাংস্বাদ্যন্বিতশ্চেতি দুষ্তবাতলক্ষণম্|| ৭৪||

Adhikarana duShTajalalakShaNam (75) · Śloka 75

রসবর্ণাদিবিকৃতমপক্রান্তবিহঙ্গমম্| নিন্দিতপ্রভবং তোযমুপক্ষীণজলাশযম্||৭৫||

তোযং দুষ্টং রসবিকৃত্যাদিযুক্তং নিন্দিতাত্ কুস্তিতাদ্যেশাদেঃ প্রভবো যস্য তন্নিন্দিতপ্রভবং অথবা নিন্দিতানাং ক্রিম্যাদীনাং প্রভবো যতঃ স নিন্দিতপ্রভবঃ|| ৭৫||

Adhikarana duShTadeshalakShaNam (76) · Śloka 76

মক্ষিকামূষিকাব্যালবহূত্পাতপ্রদূষিতঃ| দেশোঽপথ্যান্নবহুলো নষ্টধর্মমহৌষধিঃ||৭৬||

দেশো দুষ্টো মক্ষিকাদপ্রদূষিতো ভবতি| অত্র চ ভূযিষ্ঠমপথ্যান্যন্নানি ভবন্তি|| ৭৬||

Adhikarana duShTakAlalakShaNam (77) · Śloka 77

কালশ্চ বিপরীতোঽতিহীনলিঙ্গো যথাযথম্||৭৭||

কালশ্চ দুষ্টো যথাপ্রাপ্তর্তুস্বরূপবিবক্ষযা বিপরীতলিঙ্গোঽতিলিঙ্গো হীনলিঙ্গশ্চ|| ৭৭||

Adhikarana duShTavAtAdInAmuttaramahitatvam (78) · Śloka 78

এতে দুষ্পরিহারত্বাদহিতাযোত্তরোত্তরম্||৭৮||

এতে দুষ্টা বাতাদযঃ উত্তরোত্তরমহিতাঃ| যো যস্মাদুত্তরঃ স তস্মাদহিতঃ| কথমাহ- উত্তরোত্তরমেব দুষ্পরিহারত্বাদ্বাতোঽপি দুষ্পরিহারঃ| সোঽপি কদাচিত্ পরিহর্তুং শক্যতে বেশ্মপ্রবেশাদিনা| ততোঽপি জলং দুষ্পরিহারম্| অন্নপানাদ্যুপযোগাত্| ততোঽপি দেশো বিনা দেশান্তরমুপাযাভাবাত্| ততোঽপি কালঃ অন্যদেশগমনাদ্যুপাযাসম্ভবাত্ সর্বগত্বাত্ কালস্য|| ৭৮||

Adhikarana vikRutavAtAdisambhave pratIkAraH (79) · Śloka 79

যেষামনিযতং কর্ম তস্মিন্ কালে সুদারুণে| কর্ম পঞ্চবিধং তেষাং যোজ্যং তদ্বদ্রসাযনম্| শস্যতে দেহবৃদ্ধিশ্চ ভেষজৈঃ পূর্বমুদ্ধৃতৈঃ| ব্রহ্মচর্যং দযা দানং সদাচাররতিঃ শমঃ| সদ্ধর্মঃ সত্কথা পূজা দেবর্ষীণাং জিতাত্মনাম্| দেশানামবিপন্নানাং সাধূনাং চ নিষেবণম্| দৈবব্যপাশ্রযং চেষ্টং কর্ম জীবিতরক্ষণম্||৭৯||

অস্মিংশ্চোপহতবাতাদিসম্ভবে কালে সুদারুণে পঞ্চবিধং কর্ম প্রযোজ্যং প্রতিঘাতার্থমুচ্যতে| এষাং পুরুষাণাং তস্মিন্ দুষ্টে কালে সুদারুণে পূর্বকৃতং কর্মানিযতফলদাযি তেষাং পঞ্চবিধং বমনাদিকর্ম যোজ্যম্| নিযতফলদাযিনা তু কর্মণা কেষাঞ্চিদৌষধাদয উপাযাঃ কুণ্ঠীভবন্ত্যেব| পূর্বকৃতস্য কর্মণো নিযতানিযতত্বেন দ্বৈবিধ্যমস্মিন্নেবাধ্যাযে বক্ষ্যতে| তেষাং তস্মিন্নেব কালে রসাযনং যোজ্যম্| ভেষজানি পূর্বোদ্ধৃতানি যান্যনুপহতকালগৃহীতানি| তস্মিন্ কালে এজীবিতরক্ষণায দৈবব্যপাশ্রযং কর্ম বল্যুপহারমণিমন্ত্রাদিকং ব্রহ্মচর্যাদিকং চ শস্যতে| অবিপন্নানামদুষ্টানাং দেশানাম্|| ৭৯||

Adhikarana AkAlikaRutucaryAnusaraNam (80) · Śloka 80

হেমন্তাদিষু কুর্বীত স্বং স্বং চাকালিকেষ্বপি| বিধিং তচ্ছীলনং যস্মাচ্ছীতাদিদ্বন্দ্বকারিতম্| ঋতুচর্যাদিশীতোষ্ণবৃষ্টিদোষপ্রতিক্রিযা| অতএব চ চর্যাযাংহেমন্তশিশিরে সমে||৮০||

তথাকালিকেষু বিপরীতর্তুপ্রসঙ্গোদ্ভূতেষু হেমন্তাদিষু স্বং স্বমাত্মীযং বিধিং কুর্যাত্| যতস্তস্য বিধেঃ শীলনে শীতাদীনাং শীতোষ্ণবর্ষাণাং দ্বন্দ্ব উপতাপঃ পুরুষং কারযতি| তেনৈতদুক্তং ভবতি- জ্যেষ্ঠাষাঢযোরন্যযোর্বা মাসযোঃ গ্রীষ্মাদিস্বলক্ষণপ্রসঙ্গে হেমন্তাদিস্বলক্ষণং দৃশ্যতে| তত্র তস্যাগন্তোর্হেমন্তাদিকস্য চর্যাং সেবেত| যতো যৈষা ঋতু চর্যাধ্যাযকথিতা হেমন্তাদিষু চর্যা সা ন যথেচ্ছমেব ক্রিযতে| কিং তর্হি? শীতাদিদোষপ্রতী কারার্থম্| তেন যস্মিন্নেব মাসে শীতাদযস্তস্মিন্নেব সা চর্যা সেব্যা| এতদেবোচ্যতে-ঋতুচর্যেত্যাদিনা| শীতাদিদোষপ্রতীকারা ঋতুচর্যোক্তা ন মাসমাত্রমাশ্রিত্য| এতস্মিন্নর্থ উপপত্তিরুচ্যতে-অত এব চেত্যাদি| হেমন্তশিশিরযোরত এব শীতদোষসদৃশ্যাচ্চর্যাপি সদৃশ্যেবোক্তা||৮০||

Adhikarana AyuSho yuktyapekShatvamsarvaprANabhRutAM nityamAyuryuktimapekShate| (81) · Śloka 81

দৈবে পুরুষকারে চ স্থিতং তস্য বলাবলম্||৮১||

আযুষো রক্ষণবস্তুনঃ প্রকৃতত্বাদিদমুচ্যতে- সর্বেষাং প্রাণভৃতাং শরীরিণামাযুর্নিত্যমুভযকর্মবলবত্বাদ্বলবত্বরূপামপেক্ষতে যুক্তিম্| এষ চ পূর্বো গ্রন্থো যথোত্তরগ্রন্থেন সবিস্তরমুচ্যতে| দৈবে পুরুষকৃতে বা কর্মণি বলবতি তদাঽঽযুষোঽপি বলবত্বম্| তস্যাবলত্বেঽপ্যাযুষোঽপ্যবলবত্বম্|| ৮১||

Adhikarana daivapuruShakArayorlakShaNam (82) · Śloka 82

অন্যজন্মকৃতং কর্ম দৈবং পৌরুষমৈহিকম্||৮২||

সুবোধম্|| ৮২||

Adhikarana daivapuruShakarmaNastraividhyam (83) · Śloka 83

বিদ্যাত্তে কর্মণী ত্রেধা শ্রেষ্ঠমধ্যাবরত্বতঃ||৮৩||

তে চ দৈবপুরুষকর্মণী আযুষো হেতুভূতে প্রত্যেকং শ্রেষ্ঠমধ্যাবরত্বেন ত্রিপ্রকারে|| ৮৩||

Adhikarana daivapuruShakArayoryuktyA dIrghAyustvAdisambhavaH (84) · Śloka 84

তযোরুদারযোর্যুক্তির্দীর্ঘস্য সুসুখস্য চ| নিযতস্যাযুষো হেতুর্বিপরীতস্য চাপরা| মধ্যা মধ্যস্য মিশ্রস্য সংকীর্ণা...........................||৮৪||

তযোর্দৈবপুরুষকর্মণোরুদারযোঃ শ্রেষ্ঠযোর্যা যুক্তিঃ সা নিযতকালস্য দীর্ঘস্য চাযুষো হেতুঃ| তযোশ্চ হীনযোরপরা যুক্তিরেতদ্বিপরীতস্যাযুষো হেতুঃ| তযোশ্চ মধ্যা যুক্তির্মধ্যস্যাযুষো হেতুঃ সংকীর্ণা যুক্তির্যত্র একস্য কর্মণো বলবত্বমন্যস্য মধ্যত্বমবলত্বং বা| এবং মধ্যত্বাবলবত্বে অপি| সা সংকীর্ণা সংকীর্ণস্য লক্ষণসংকরযুক্তস্যাযুষো হেতুঃ|| ৮৪||

Adhikarana balIyena pauruSheNa durbalaM daivamupahanyate (85) · Śloka 85

..................................শৃণু চাপরম্| দৈবং পুরুষকারেণ দুর্বলং হ্যুপহন্যতে| তথা দৈবেন বলিনা পৌরুষং কর্ম দুর্বলম্||৮৫||

ননু দ্বে বলবত্বাবলবত্বযুক্তে একত্র বিরোধাত্ কথং ফলদাযিনো অত উচ্যতে- পুরুষকারেণ দানাদিনা বলবতা অবলং দৈবং কর্মোপহন্যতে| দৈবেন বলিনা পৌরুষবলমুপহন্যতে|| ৮৫||

Adhikarana keShA~jcinmatenAyuShorniyatapramANam (86) · Śloka 86

দৃষ্ট্বা যদেকে মন্যন্তে নিযতং মানমাযুষঃ||৮৬||

যদ্দৈবং কর্ম বলবদ্ দৃষ্ট্বা একে আযুর্নিযতপ্রমাণং মন্যন্তে তেঽপ্যেবং ব্রুবন্তি| যথা প্রাপ্তোপাযা অপি ম্রিযমাণা দৃষ্টাস্তস্মান্নিযতমাযুঃ| এতচ্চ পৌরুষস্য বলবতা দৈবেনোপঘাতাত্|

Adhikarana daivasya karmaNaH dvaividhyam (87) · Śloka 87

কর্ম কিঞ্চিত্ক্বচিত্কালে বিপাকনিযতং মহত্| কিঞ্চিচ্চ কালনিযতং প্রত্যযৈঃ প্রতিবোধ্যতে||৮৭||

তচ্চ দৈবং কর্ম দ্বিবিধং মহত্বান্নিযতফলমল্পত্বাচ্চনিযতফলম্| তচ্চ পৌরুষৈঃ কর্মভিঃ প্রতিবোধকৈঃ ফলদানেন নিযম্যতে|| ৮৭||

Adhikarana mRutyordvaividhyam (88) · Śloka 88

এবং চ দ্বিবিধো মৃত্যুঃ কালাকালবিভেদতঃ| অকালমৃত্যুপরিহারাযৈব হিতাহিতোপদেশঃ উপদিষ্টস্ততশ্চৈষ হিতাহিতবিধিক্রমঃ||৮৮||

এবং চ কর্মণো দ্বৈবিধ্যান্নিযতানিযতফলরূপাত্কালাকালভেদেন মৃত্যুরপি দ্বিবিধঃ| তেনৈতদুক্তং ভবতি- অনিযতফলেন কর্মণা মৃত্যুরকালজ উপদিষ্টো নিযতফলেন কালজ ইতি| অতশ্চ কারণান্মৃত্যুদ্বৈবিধ্যাদস্মিন্নাযুর্বেদে হিতাহিতবিধিরুপদিষ্টঃ| তেনৈতদুক্তং ভবতি- নিযতফলকর্মজস্য মৃত্যোরাযুর্বেদমকারণম্| অনিযতফলস্য তূত্পত্তিরক্ষণার্থং হিতাহিতজ্ঞানহেতুত্ত্বেনাযুর্বেদ উপযুজ্যত এব|| ৮৮||

Adhikarana vedavAdInAM matena kAlagantumRutyuvicAraH (89) · Śloka 89

একোত্তরং মৃত্যুশতং ব্রুবতে বেদবাদিনঃ| তত্রৈকঃ কালসংযুক্তঃ শেষাস্ত্বাগন্তবঃ স্মৃতাঃ||৮৯||

তথা চ্ অবেদবাদিন একোত্তরং মৃত্যুশতং ব্রুবতে| তত্রৈকঃ কালজঃ| শতমাগন্তবঃ| তৈশ্চ বেদবাদিভিঃ আযুষো বৃদ্ধিনাশহেতূ চোক্তৌ|

Adhikarana AyuShaH upAyApekShatve pramANam (90) · Śloka 90

শ্যেনাদিনা চ যাগেন ভ্রাতৃব্যস্য তথা চ তৈঃ| দীর্ঘশ্রবসসোমাদ্যৈর্বিহিতশ্চাত্মনো বধঃ| আযুষ্কামস্য তত্প্রাপ্তিস্তথেষ্ট্যা মিত্রবিন্দযা| সর্বস্মাদেব চাত্মানং গোপাযেদীদৃশী স্মৃতিঃ||৯০||

তথা চ তৈঃ শ্যেনাদিনা চ যাগেন ভ্রাতৃব্যস্য শত্রোর্বধো বিহিতঃ| দীর্ঘশ্রবসসোমাদিনা চাত্মনো বধস্তৈর্বিহিতঃ| আযুষ্কামস্য পুরুষস্য তত্প্রাপ্তিরাযুষ্প্রাপ্তিস্তৈর্বেদবাদিভিঃ মিত্রবিন্দাভিধযেষ্ট্যা বিহিতা| সর্বস্মাদেব চাত্মানং গোপাযেদ্রক্ষেদিতি তেষাং স্মৃতিঃ| যদি চোপাযাপেক্ষিণ্যাযুষঃ স্থিতির্ন স্যাত্তদৈতত্সর্বং ন সম্ভবেত্|| ৯০||

Adhikarana saugatamatena maraNasya cAturvidhyam (91) · Śloka 91

তথা মরণৌদ্দিষ্টং সৌগতানাং চতুর্বিধম্||৯১||

তথা সৌগতানাং বৌদ্ধদর্শনস্থিতানাং তত্সিদ্ধান্তজ্ঞৈশ্চতুর্বিধং মরণমুদ্দিষ্টম্| তচ্চ তত এব জ্ঞাতব্যম্|| ৯১||

Adhikarana niyatAyuShAmapathyasevayA rogitvaM aniyatAyuShAM tu mRutyureva (92) · Śloka 92

বিষমাপরিহারেণ জাযতে নিযতাযুষাম্||৯২||

এবং স্থিতে এতন্নিশ্চিতং নিযতাযুষাং পুংসাং বিষমস্যাহারবিহারাদেরপরিহারেণ ধ্রুবমবশ্যং রোগিত্বং জাযতে|| ৯২||

Adhikarana apathyasevayA mRutyureva (93) · Śloka 93

ধ্রুবং রোগিত্বমন্যেষাং মৃত্যুরেব ত্বপর্বণি| অকাণ্ডে শস্ত্রঘাতাদ্যৈঃ প্রত্যক্ষো মৃত্যুরন্যথা||৯৩||

অন্যেষাং চানিযতাযুষাং বিষমাপরিহারেণাপর্বণ্যকালে মৃত্যুর্জাযতে| অথবা কিমনযা অকালমৃত্যুসাধনপরিকল্পনযা| অকাণ্ডে অকালে শস্ত্রঘাতাদ্যৈঃ প্রত্যক্ষ এব মৃত্যুঃ দৃষ্টঃ|| ৯৩||

Adhikarana akAlamRutyusadbhAve pramANam (94) · Śloka 94

উদ্ভ্রান্তচণ্ডমাতঙ্গতুরঙ্গাদিসমাগমম্| আরাতিদুষ্টবায্বাদিসাহসাহিতভোজনম্| বর্জযেদিতি ন ব্রূযুর্মুনযো দিব্যচক্ষুষঃ| দৈবব্যপাশ্রযাদীংশ্চ রসাযনবিধীংস্তথা| ন বা তেঽপি যথাকামমাযুষঃ স্থিতিমাপ্নুযুঃ| অহিসিংহগজাদিভ্যো বিদুষাং ন ভযং ভবেত্| মিথ্যাপ্রাকারদুর্গাণি মিথ্যামারণরক্ষণম্| আযুষ্কামস্য মিথ্যৈব পরদারাদিবর্জনম্| মন্ত্রদেবতযাহূতা নাচক্ষীরন্ মহাহযঃ| বিষসুপ্তপ্রবুদ্ধস্থা ভাবাভাবৌ তদাযুষঃ| সংন্যাসরোহিণীকাদিগ্রস্তস্য সহসা ভবেত্| উপেক্ষযা ন মরণং জীবিতং বা চিকিত্সযা| প্রত্যহং নৃসহস্রস্য যুদ্ধেঽন্যোন্যমভিঘ্নতঃ| সাধুবৃত্তস্য চাতুল্যা ন ভবেদাযুষঃ স্থিতিঃ| নাযুধৈর্দ্বিষমিন্দ্রাদ্যা নৌষধৈরার্তমশ্বিনৌ| উপক্রমেরন্ ন ভবেদকালমরণং যদি| ঘটানামামপক্বানাং পালনাপরিপালনৈঃ| চিরাল্পকালবর্তিত্বং চিত্রস্থানাং চ দৃশ্যতে| ইত্যত্যন্তপ্রসিদ্ধেঽপি সিদ্ধে সর্বাগমৈরপি| দৃষ্টেঽপ্যকালমরণে বিচিকিত্সেত্কথং বুধঃ||৯৪||

রসাযনবিধিনা তে চ মুনযো মত্তমাতঙ্গসমাগমাদিবর্জনেন দৈবব্যপাশ্রযাদিসেবনেন চ যথাকামং যথেচ্ছমাযুষঃ স্থিতিং নাপ্নুযুঃ| যদ্যকালমরণং ন স্যাত্ সর্পাদিতশ্চ বিদুষাং ভযং ন ভবেত্| শত্রুভ্য আত্মনো রক্ষণার্থং প্রাকারদুর্গাদীনি নিরর্থকানি ভবেযুঃ| তথা মহাঽহযো বাসুকিপ্রভৃতযো বিষেণ সুপ্তে ততো মন্ত্রেণ প্রবুদ্ধে পুরুষে স্থিতাঃ মন্ত্রদেবতযাহূতাঃ সন্তস্তথা তথাবিধাঃ পুরুষাযুষো ভাবাভাবৌ নাচক্ষীরন্| তথা সংন্যাসরোহিণিকাদিমহারোগগ্রস্তস্য পুরুষস্য বৈদ্যোপেক্ষযা সহসা ঝটিত্যেব মরণং ন ভবেচ্চিকিত্সযা জীবিতং বা ন ভবেত্| কালমরণস্য নিযতত্বাত্ তথা প্রতিদিবসং পুরুষসহস্রস্য যুগে অন্যোন্যং পরস্পরেণাভিঘ্নতঃ শস্ত্রৈঃ প্রহরতঃ সাধুবৃত্তস্য চ নৃসহস্রস্যাকালমরণাভাবে অতুল্যা বিসদৃশী স্থিতির্ন ভবেত্, তুল্যা ভবেত্| ন চ তুল্যা যস্মাত্ দৃষ্টং যুধ্যন্নৃসহস্রং নশ্যত্ সাধুবৃত্তং চ জীবত্| তথা যদি চাকালমরণং ন ভবেত্, তত ইন্দ্রাদ্যা দেবতাঃ শত্রুমাযুধৈর্মারযিতুং নোপক্রমেরন্নারভেরন্| আর্ত্তং পীডিতঞ্চ যথার্থদৃশাবশ্বিনৌ স্বাস্থ্যাযৌষধৈর্নোপক্রমেযাতাং যদ্যকালমরণং ন স্যাত্| তথাঽঽমানামপি ঘটানাং পালনেন চিরকালবৃত্তিত্বং দৃষ্টং, অপালনেন চ পক্বানামপ্যল্পকালবর্ত্তিত্বং দৃষ্টং, তদ্বত্ চিত্তত্রস্থানামপি ভাবানাং চিরাল্পকালবর্ত্তিত্বং দৃষ্টং পালনাপরিপালনৈঃ| অনেন প্রকারেণাত্যন্তং প্রসিদ্ধেঽকালমরণে সর্বাগমৈশ্চ সিদ্ধে বুধঃ কথং বিচিকিত্সেত্? তেন যে আচার্যা নিযতমানমাযুষ আহুঃ তে দৈবস্যাবলবত্বাত্পুরুষকারবাধাযাং ন তু সর্বথা নিযতত্বম্|| ৯৪||

Adhikarana kAlAkAlamRutyulakShaNamatra dRuShTAntashca (95) · Śloka 95

গুণবদ্ভিষগাদীনাং সম্ভবে সম্ভবেত্তু যঃ| মৃত্যুং তং কালজং প্রাহুরিতরং তদ্বিপর্যযে| যথা রথে বাহ্যমানো ন্যাযেন ক্রমশঃ ক্ষযম্| যাযাদাত্মবতামাযুস্তথাঽন্যেষাং বিপর্যযঃ| শুচিতৈলদশো দীপঃ কীটবাতাদ্যপীডিতঃ| দীপ্তিমান্ বর্ততে সম্যগ্যথৈবাস্নেহসংক্ষযাত্| স এবাতো যথা চ স্যাদ্বিপরীতো বিপর্যযে| হিতাহিতোপচারেণ তথৈব পুরুষো ধ্রুবম্||৯৫||

ননু কথং কালজো মৃত্যুর্জ্ঞাযতে? অতস্তল্লক্ষণমুচ্যতে| গুণবতাং ভিষগাদীনাং সম্ভবে যো মৃত্যুঃ সম্ভবেত্ উত্পদ্যেত স কালজঃ| গুণা দক্ষাদযঃ| ভিষগাদীনামিত্যত্রাদিগ্রহণং শেষপাদত্রযোপলক্ষণার্থম্| তস্য কালজস্য মৃত্যুর্লক্ষণবৈপরীত্যাদকালজঃ| দৃষ্টান্তপূর্বমকালমৃত্যুকারণলক্ষণার্থমাহ- যথা রথ ইত্যাদি| রথো যথা সমভূভাগযোজনাদিনা ন্যাযেন বাহ্যমানঃ ক্রমেণ স্বে কালেঽবশ্যমেব ক্ষযং যাযাত্ এবমাত্মবতাং হিতসেবাহিতপরিহারশীলিনামাযুঃ| তথা অন্যেষামনাত্মবতাং বিপর্যযঃ| তেনৈতদুক্তং ভবতি- যথা ন্যাযেন বাহ্যমানো রথঃ ক্রমেণ ক্ষযং যাতি এবমাত্মবতামপি ক্রমেণাযুঃ ক্ষযং যাতি| যথা তথা রথঃ অন্যাযেন বিষমমার্গযোজনাদিনা যুগপত্ক্ষযং যাত্যেবমনাত্মবতাং প্রমাদিনামাযুর্যুগপদেব ক্ষযং যাতি ইত্যর্থঃ| তথা শুচি নির্মলং তৈলং দশা চ যস্মিন্ দীপে স কীটাদ্যপীডিতো যথৈব স্নেহপরিক্ষযো যাবত্ সম্যগ্দীপ্তিমান্ বর্ততে তদ্বদ্ধিতোপচারেণ পুরুষঃ| এতদ্বিপর্যযে অশুচিতৈলদশত্বে কীটাদিপীডিতত্বে চ স এব চ দীপো বিপরীতো ন দীপ্তিমান্ স্নেহে তিষ্ঠত্যপি স্যাত্তথৈব পুরুষঃ অহিতোপচারেণ ধ্রুবমবশ্যমেব বিজ্ঞেযঃ| তেনৈতদুক্তং ভবতি- শুচিতৈলদশঃ কীটাদ্যপীডিতশ্চ দীপঃ যথা দীপ্তিমান্ বর্ততে, স্নেহক্ষযেন তু ক্ষযং যাত্যেবং পুরুষঃ অপ্রমত্তোঽপ্যাযুষঃ ক্ষযাত্ ক্ষযং যাতি নিযতাযুরপি| তথাঽক্ষীণে স্নেহেঽপি যথা দীপো বাতাদিপীডিতত্বাত্ ক্ষযং যাতি এবমহিতোপচারেণাপি পুরুষ আযুষ্যক্ষীণেঽপি নিযতাযুরহিতোপচারেণ ধ্রুবং অবশ্যম্|| ৯৫||

Adhikarana sharIralakShaNasyAvashyakatA (96) · Śloka 96

সর্বমন্যত্ পরিত্যজ্য শরীরং পালযেদতঃ| তদভাবে হি ভাবানাং সর্বাভাবঃ শরীরিণাম্| নগরী নগরস্যেব রথস্যেব রথী তথা| স্বশরীরস্য মেধাবী কৃত্যেষ্ববহিতো ভবেত্||৯৬||

ইতি জ্ঞাত্বাঽন্যত্সর্বং পরিত্যজ্য বুধঃ শরীরমেব পালযেত্| যতঃ শরীরিণাং তস্য শরীরস্যাভাবে সর্বপদার্থানাং দৃষ্টাদৃষ্টপ্রযোজনানামভাবঃ| অন্যত্ সুবোধম্|| ৯৬||

Adhikarana hitAshanopadeshaH (97) · Śloka 97

আহারকল্পনাহেতূন্ স্ব ভাবাদীন্| সমীক্ষ্য হিতমশ্নীযাদ্দেহো হ্যাহারসম্ভবঃ||৯৭||

তথাঽহারস্য কল্পনাযাং যে হেতবঃ স্বভাবসংস্কারমাত্রাদযস্তান্ বিশেষেণ সমীক্ষ্য হিতমশ্নীযাদাযুষ্কামঃ| যতো দেহ আহারসম্ভবঃ|| ৯৭||

Adhikarana vegA na dhAryAH (98) · Śloka 98

ভীলজ্জাযন্ত্রণালোভহর্ষশোকবশং গতঃ| ন জাতু ধারযেদ্বে গাংস্তদ্ধি সর্বাপদাস্পদম্||৯৮||

তথা ভীলজ্জাদীনাং বশং গতো বেগান্ মূত্রাদীন্ ন কদাচিদ্ধারযেত্| এতদুক্তং ভবতি- ভীলজ্জাদীনাং বেগধারণহেতূনাং বশং গত্বাবেগান্ন ঘারযেত্| তদ্ধি বেগাধারণং সর্বাসামাপদামাস্পদং স্থানম্| হিশব্দোযস্মাদর্থে|| ৯৮||

Adhikarana hitAbhyAsinAmakAle na balAdihAniH (99) · Śloka 99

হিতমভ্যস্যতঃ পুংসো নাকালে কালদংষ্ট্রযা| সঞ্চাযতে পরামর্শো বলোত্সাহেন্দ্রিযাযুষাম্||৯৯||

ইত্যনন্তরোক্তেন প্রকারেণ হিতমভ্যস্যতঃ পুরুষস্যাকালে বলাদীনাং কালদংষ্ট্রযা পরামর্শো ন জাযতে সাকালদংষ্ট্রা ন বাধ্গত বিত্যর্থঃ|| ৯৯||

Adhikarana ahitaparityAginaH rogasambhave~api sAdhUnAmAnRuNyaM bhavati (100) · Śloka 100

অহিতান্যপি সন্ত্যজ্য দোষমপ্যাপ্নুযাদ্যদি| তথাপ্যানৃণ্যমাযাতি সাধূনামাত্মবানিতি||১০০||

ননু হিতোপচারপরস্যাপি রোগাদ্যভিভবো দৃষ্টঃ স কথমিত্যুচ্যতে অহিতানি পরিজ্ঞাযমানানি ত্যক্তবা দৈবাদ্যদি পুরুষো দোষমাপ্নুযাত্ তথাপ্যাত্মবানিতি সাধূনামনৃণো ভবতি|| ১০০||

Adhikarana daivAdaparihAryarogasambhave na shocitavyam (101) · Śloka 101

যচ্চ রোগসমুত্থানং ন শক্যমিহ কেনচিত্| পরহির্তুং ন তত্ প্রাপ্য শোচিতব্যং মনীষিণা||১০১||

যচ্চ দৈবকরণাং সমুত্থানং তত্প্রাপ্য মনীষিণা পণ্ডিতেন ন শোচযিতব্যমপরিহার্থত্বাত্|| ১০১||

Adhikarana sadAcArasevinAM jIvitamamRutopamam (102) · Śloka 102

হিতাহারবিহারাণাং সদাচারনিষেবিণাম্| লোকদ্বযব্যপেক্ষাণাং জীবিতং হ্যমৃতাযতে||১০২||

কিঞ্চিদিদমুচ্যতে- য হিতমাহারং বিহারং চ সেবন্তে সতাং সাধূনামাচারং শীলং চ সেবন্তে অযং লোকঃ পরলোকশ্চৈবং ভবতীতি যে বুদ্ধ্যা কল্পযন্তি তেষাং জীবিতমেবামৃত্বমাচরতি হিতত্বাত্|| ১০২||

Adhikarana grAmyasukhAdilolupasya jIvitamanarthakam (103) · Śloka 103

গৃধ্নুর্গ্রাম্যসুখে বশ্যঃ ক্লেশানাং হতসত্পথঃ| মূঢো জীবত্যনর্থায দুর্গতিং পরিবৃংহযন্||১০৩||

যস্তু মূঢো গ্রাম্যসুখে ঐন্দ্রিযকে সুখৈকগৃধ্নুরতৃপ্তঃ ক্লেশানাং চ রাগলোভাদীনাং বশ্যঃ স দুর্গতিমেব বর্ধযন্ অনর্থাযৈব জীবতি| তথা হতস্ত্যক্তস্সত্পথঃ সাধূনাং পন্থা যেন|| ১০৩||

Adhikarana cira~jjIvitukAmena kartavyam (104) · Śloka 104

বিদুষাঽন্তঃশরীরস্থান্নিত্যং সন্নিহিতানরীন্| জিত্বা বর্জ্যানি বর্জ্যানি চিরং জীবিতুমিচ্ছতা||১০৪||

তস্মাদ্বিদুষা পণ্ডিতেনান্তশ্শরীস্থান্নিত্যসন্নিহিতান্ রাগাদীনরীন্ জিত্বা দিনচর্যিক্তান্যত্রোক্তানি চ বর্জ্যানি ন সেব্যানি|| ১০৪||

Adhikarana dhImatA ashubhaphaladaM karma na kAryam (9) · Śloka 9

তদাত্বে চানুবন্ধে বা তস্মাত্ কর্মশুভোদযম্| স্মরন্নাত্রেযবচসো ন ধীমান্ কর্তুমর্হতি||১০৫|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতৌ অষ্টাঙ্গসংগ্রহসংহিতাযাং সূত্রস্থানে বিরুদ্ধান্নবিজ্ঞানীযো নাম নবমোঽধ্যাযঃ||৯||

যস্য চিরং জীবিতুমিচ্ছা তেনেত্যনন্তরোক্তস্য আত্রেযস্য বচসঃ স্মরন্ অশুভোদযং কর্ম ধীমান্ পণ্ডিতঃ কর্তুং নার্হতি| কীদৃশমশুভোদযং তদাত্বে অশুভোদযং তত্কালোপভোগ্যাশুভফলকারণমনুবন্ধে বাঽন্যস্মিন্ কালে বাঽশুভফলকারণমিতি|| ১০৫|| ইতি শ্রীমন্মহামহোপাধ্যাযেন্দুবিরচিতাযাম্ অষ্টাঙ্গসংগ্রহব্যাখ্যাযাং শশিলেখাযাং সূত্রস্থানে নবমোঽধ্যাযঃ||৯||