8. bhūtapratiṣēdhaḥ

Adhikarana atha bhUtapratiShedho nAmAShTamo~adhyAyaH - avataraNikA · Śloka

উক্তক্রমেণৈব ভূতানাং চিকিত্সিতং প্রদর্শযিতুমধ্যায আরভ্যতে||

Adhikarana pratij~jA (1) · Śloka 1

অথাতো ভূতপ্রতিষেধং নামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

Adhikarana sAdhyeShu sAmAnyopakramaH (2) · Śloka 2

ভূতং জযেদহিংসেচ্ছুং জপহোমবলিব্রতৈঃ| তপশ্শীলসমধানজ্ঞানদানদযাদিভিঃ||২||

অহিংসেচ্ছুং সাধ্যং রতিকামং বলিকামং চ ভূতং জপপ্রভৃতিভির্জযেত্||২||

Adhikarana hi~gvAdivargaprayogaH (3) · Śloka 3

হিঙুব্যোষালনৈমালীলশুনার্কজটাজটাঃ| অজলোমী সগোলোমী ভূতকেশী বচা লতা| কুক্কুটীসর্পগন্ধাখ্যা তিলাঃ কাণবিকাণকে| বজ্রপ্রোক্তা বযস্থা চ শৃঙ্গী মোহনবত্যপি| স্রোতোজাঞ্জনরক্ষোঘ্নং রক্ষোঘ্নং চান্যদৌষধম্| খরাশ্বশ্বাবিডুষ্ট্রর্ক্ষগোধানকুলশল্যকাত্| দ্বীপিমার্জারগোসিংহব্যাঘ্রসামুদ্রসত্বতঃ| চর্মপিত্তদ্বিজনখা বর্গেঽস্মিন্ সাধযেদ্ ঘৃতম্| পুরাণামথবা তৈলং নবং তত্পাননস্যযোঃ| অভ্যঙ্গে চ প্রযোক্তব্যমেষাং চূর্ণং চ ধূপনে| এভিশ্চ গুলিকাং যুঞ্জ্যাদঞ্জনে সাবপীডনে| প্রলেপে কল্কমেতেষাং ক্বাথং চ পরিষেচনে| প্রযোগোঽযং গ্রহোন্মাদান্সাস্পস্মারান্ শমং নযেত্||৩||

হিঙ্গ্বাদৌ বর্গে পুরাণং ঘৃতং সিদ্ধং নবং তৈলং বা পাননস্যযোরভ্যঙ্গে চ প্রযোক্তব্যম্| নৈপালী মনঃশিলা| অর্কজটা অর্কমূলম্| জটা মাংসী| অজলোমী মেষবিলোচনা| গোলোমী দূর্বা| ভূতকেশী শুক্লা নির্গুণ্ডী| লতা শতপুষ্পা| কুক্কুটী রসাযনোক্তলক্ষণা| সর্পগন্ধা গন্ধনাকুলী| কাণা কাকোলী| বিকাণা ক্ষীরকাকোলী| বজ্রপ্রোক্তা সুধা| বযস্থাং আমলকম্| শৃঙ্গী কর্কটশৃঙ্গী| মোহনবল্লী ব্রাহ্মী শিরীষশ্চ| রক্ষোঘ্নং সর্ষপম্| অন্যদ্রক্ষোঘ্নমৌষধং বচাদি যথালাভম্| খরাদীনাং ত্রযোদশানাং সামুদ্রাণাং চ সত্ত্বানাং প্রাণিনাং যথালাভং চর্মাদিকম্| এষামিত্যেভিরিতি চ হিঙ্গ্বাদীনাং পরামর্শঃ| অবপীডনং কল্কাদিনস্যম্| সুবোধম্||৩||

Adhikarana gajAhvAdiyogaH (4) · Śloka 4

গজাহ্বাপিপ্পলীমূলব্যোষামলকসর্ষপান্| গোধানকুলমার্জারশশপিত্তপ্রপেষিতান্| নাবনাভ্যঙ্গসেকেষু বিদধীত গ্রহাপহান্||৪||

গজাহ্বাদীন্ গোধাদিপিত্তপ্রপেষিতান্ নাবনাদিষু গ্রহাপহান্ বিদধীত| গজাহ্বা হস্তিপিপ্পলী||৪||

Adhikarana ashvAdiviDyogaH (5) · Śloka 5

অশ্বশ্বাশ্বতরোলূককঙ্কগৃধ্রসৃগালজা| বিট্খরোষ্ট্রবরাহাশ্চ তযা তৈলং বিপাচিতম্| পিষ্টযা বস্নমূত্রেণ নাবনাদিষু পূজিতম্||৫||

অশ্বাদীনাং দশানাং বিশা পুরীষেণ বস্তমূত্রপিষ্টযা তৈলং বিপাচিতং নাবনাদিষু পূজিতম্| অশ্বতরো বেসরঃ||৫||

Adhikarana shirIShAdya~jjanam (6) · Śloka 6

শিরীষপুষ্পং লশুনং শুণ্ঠীং সিদ্ধার্থকং বচাম্| মঞ্জিষ্ঠাং দ্বে নিশে কৃষ্ণাং বস্তমূত্রেণ পেষযেত্| ছাযাশুষ্কা কৃতা বর্তিঃ মত্স্যপিত্তদ্রুতাঞ্জনম্||৬||

শিরীষাদিভির্বস্তমূত্রপিষ্টৈঃ কৃতা বর্তিঃ ছাযাশুষ্কা সতী প্রযোগকালে মত্স্যপিত্তেন দ্রুতা ভূতেষ্বঞ্জনম্||৬||

Adhikarana naktamAlaPalAdya~jjanam (7) · Śloka 7

নক্তমালফলং ব্যোষং বিল্বস্যোনাকযোর্জটা| হরিদ্রে চ কৃতা বর্তিঃ পূর্ববন্নযনাঞ্জনম্| বযস্থাহিঙ্গুকটুকাষড্গ্রন্থাসৈন্ধবং তথা||৭||

নক্তমালফলাদিভিঃ কৃতা বর্তিঃ পূর্ববদিতি বস্তমূত্রপিষ্টা শুষ্কা চ মত্স্যপিত্তেন দ্রুতা নযনাঞ্জনম্| নক্তমালঃ কর্ণিকারঃ| জটা মূলম্| বযেস্থেত্যাদি| তথা পূর্ববন্নযনঞ্জনম্| বযস্থা আমলকম্| ষড্গ্রন্থা বচা|| ৭||

Adhikarana siddhArthakAdisarpiragadashca (8) · Śloka 8

সিদ্ধার্থকবচাহিঙ্গুপ্রিযঙ্গুরজনীদ্বযম্| মঞ্জিষ্ঠাশ্বেতকটভ্Vঈবরাশ্বেতাদ্রিকর্ণিকা| নিম্বস্য পত্রং বীজং তু নক্তমালশিরীষযোঃ| সুরাহ্বং ত্র্যূষণং সর্পির্গোমূত্রে তৈশ্চতুর্গুণে| সিদ্ধং সিদ্ধার্থকং নাম পানে নস্যে চ যোজিতম্| গ্রহান্সর্বান্নিহন্ত্যাশু বিশেষাদাসুরান্ গ্রহান্| কৃত্যালক্ষ্মীবিষোন্মাদজ্বরাপস্মারপাপ্মজিত্| এভিরেবৌষধৈর্বস্তবারিণা কল্পিতোঽগদঃ| পাননস্যাঞ্জনালেপস্নানোদ্ঘর্ড়্ষণযোজিতঃ| গুণৈঃ পূর্ববদুদ্দিষ্টো রাজদ্বারে চ সিদ্ধিকৃত্||৮||

সিদ্ধার্থকাদিভিঃ কল্কীকৃতৈশ্চতুর্গুণে গোমূত্রে সিদ্ধং সর্পির্নাম্না সিদ্ধার্থকম্| গ্রহান্ সর্বান্ সুরাদীন্ নিহন্তি| আসুরান্ গ্রহান্ বিশেষান্নিহন্তি| কৃত্যাদিঘ্নঞ্চ| কৃত্যা আভিচারদেবতা| এভিরিতি সিদ্ধার্থকাদিভির্বস্তমূত্রেণাগদঃ পানাদিযোজিতো গুণৈঃ পূর্ববত্| সুবোধম্|| ৮||

Adhikarana siddhArthakAdiguDAH (9) · Śloka 9

সিদ্ধার্থকব্যোষবচাশ্বগন্ধা নিশাদ্বযং হিঙ্গুপলাণ্ডুকন্দম্| বীজং করঞ্জাত্কুসুমং শীরিষাত্ ফলঞ্চ বল্কঞ্চকপিত্থবৃক্ষাত্| সমাণিমন্থং সনতং সকুষ্ঠং স্যোনাকমূলং কিণিহী সিতা চ| বস্তস্য মূত্রেণ সুভাবিতং তত্ পিত্তেন গব্যেন গুডান্ বিদধ্যাত্| দুষ্টগ্রহোন্মাদতমো নিশান্ধা নুদ্বন্ধকান্ বারিনিমগ্নদেহান্| দিগ্ধাহনান্ দর্পিতসর্পদষ্টাং স্তে সাধযন্ত্যঞ্জননস্যলেপৈঃ||৯||

সিদ্ধার্থকাদ্যনেকবারং বস্তমূত্রেণ ভাবিতং গোপিত্তেন গুডান্ কুর্যাত্| তে গুডা অঞ্জনাদিভির্দুষ্টগ্রহাদীন্ সাধযন্তি| বল্কং ত্বক্| মাণিমন্থং সৈন্ধবম্| স্যোনাকস্য মযূরজঙ্ঘস্য মূলম্| কিণিহী গিরিকর্ণিকা| সা তু সিতা শুক্লা| তমস্তিমিরম্| উদ্বন্ধকো গলবন্ধেন মৃতকল্পঃ| তদ্বজ্জলনিমগ্নদেহঃ| বিষলিপ্তেন শস্ত্রেণাহতো দিগ্ধাহতঃ||৯||

Adhikarana kArpAsAsthyAdidhUpanam (10) · Śloka 10

কার্পাসাস্থিমযূরপত্রবৃহতীনির্মাল্যপিণ্ডীতক ত্বগ্বাংশীবৃষদংশবিট্তুষবচাকেশাহিনির্মোচনৈঃ| নাগেন্দ্রদ্বিজশৃঙ্গহিঙ্গুমরিচৈস্তুল্যৈঃ কৃতং ধূপনং স্কন্দোন্মাদপিশাচরাক্ষসসুরোবেশগ্রহঘ্নং পরম্||১০||

কার্পাসাস্থ্যাদিভিস্তুল্যৈঃ সমভাগৈঃ কৃতং ধূপনং স্কন্দগ্রহাদিঘ্নম্| নির্মাল্যং স্পৃক্কা| পিণ্ডীতকো মদনঃ||১০||

Adhikarana bhUtarAvaM ghRutam (11) · Śloka 11

ত্রিকটুকদলকুঙ্কুমগ্রন্থিকক্ষারসিংহী নিশাদারুসিদ্ধার্থযুগ্মাম্বুশক্রাহ্বযৈঃ| সিতলশুনফলত্রযোশীরতিক্তাবচা তুত্থযষ্টীবলালোহিতৈলাশিলাপদ্মকৈঃ| দধিতগরমধূকসারপ্রিযাহ্বাবিষাখ্যা বিষাতার্ক্ষ্যশৈলৈঃ সচব্যামযৈঃ কল্কিতৈঃ| ঘৃতমনবমশেষমূত্রাংশসিদ্ধং মতং ভূতরাবাহ্বযং পানতস্তদ্গ্রহঘ্নং পরম্||১১||

ত্রিকটুকাদিভিস্তুল্যৈঃ সমভাগৈঃ কল্কিতৈরশেষমূত্রাংশসিদ্ধমষ্টানাং মূত্রাণামংশেন ভাগেন পক্বমাজ্যমনবং পুরাণং নাম্না ভূতরাবম্| তত্পানাত্পরং গ্রহঘ্নম্| গ্রন্থিকং পিপ্পলীমূলম্| সিংহী বৃহতী| সিদ্ধার্থযুগ্মং রক্তশ্বেতভেদেন| সিতং চন্দনম্| লোহিতা মঞ্জিষ্ঠা| দধি শ্রীবাসম্| প্রিযাহ্বা প্রিযঙ্গুঃ| বিষাখ্যা লাঙ্গলী| বিষা অতিবিষা| আভযং কুষ্ঠম্| ত্রিংশদ্বর্ণৈঃ পূর্ণপাদস্ত্বর্ণাখ্যোযং হি দণ্ডকঃ|| ১১||

Adhikarana mahAbhUtarAvaM ghRutam (12) · Śloka 12

নতমধুককরঞ্জলাক্ষাপটোলীসমঙ্গাবচা পাটলীহিঙ্গুসিদ্ধার্থসিংহীনিশাযুগ্লতারোহিণৈঃ| বদরকট্ফলত্রিকাকাণ্ডদ্রুক্রিমিঘ্নাজগ ন্ধামরাঙ্কোলকোশাতকীশিগ্রুনিম্বাম্বুদেন্দ্রাহ্বযৈঃ| গদশুকতরুপুষ্পবীজোগ্রযষ্ট্যাদ্রিকর্ণীনিকু ম্ভাগ্নিবিল্বৈঃ সমৈঃ কল্কিতৈর্মূত্রবর্গেণ সিদ্ধং ঘৃতম্| বিধিবিনিহিতমাশু সর্বৈঃ ক্রমৈর্যোজিতং হন্তি স র্বগ্রহোন্মাদকুষ্ঠজ্বরংস্তন্মহাভূতরাবং স্মৃতম্||১২||

নতাদিভিঃ সমৈঃ কল্কিতৈর্ঘৃতং মূত্রবর্গেণাষ্টভির্মূত্রৈঃ সিদ্ধং বিধিনা চ পাত্রে নিহিতং সর্বৈশ্চ পানাদিভিঃ ক্রমৈর্যোজিতং সর্ব গ্রহাদীন্ হন্তি নাম্না মহাভূতরাবং স্মৃতম্| সমঙ্গা মঞ্জিষ্ঠা| সিংহী বৃহতী| নিশাযুগ্দার্বী পিণ্ডাহরিদ্রা চ| লতা শারিবা শতপুষ্পা চ| রোহিণী কটুরোহিণী| কটু মরিচম্| ফলত্রিকং ত্রিফলা| দারুর্দেবদারুঃ| অমরা নির্গুণ্ডী| অঙ্কোলোঽঙ্কোলঃ| অম্বুদো মুস্তঃ| ইন্দ্রাহ্বযঃ ইন্দ্রবৃক্ষঃ| গদং কুষ্ঠম্| শুকতরুঃ শিরীষঃ| বীজোগ্রো বংশঃ| অদ্রিকর্ণী গিরিকর্ণী| নিকুম্ভো দন্তী| অগ্নিশ্চিত্রকঃ| ষট্ত্রিংশদ্বর্ণপাদোঽযং ব্যালাখ্যো দণ্ডকঃ স্মৃতঃ|| ১২||

Adhikarana balihomAdyarthe kAlanirdeshaH (13) · Śloka 13

গ্রহা গৃহ্ণন্তি যে যেষু তেষাং তেষু বিশেষতঃ| দিনেষু বলিহোমাদীন্ প্রযুঞ্জীত চিকিত্সকঃ||১৩||

পূর্বাধ্যাযোক্তপ্রকারেণ গ্রহা ভূতা যেষু দিনেষু গৃহ্ণন্তি তেষ্বেব দিনেষু বিশেষতস্তেষাং বল্যাদীশ্চিকিত্সকঃ প্রযুঞ্জীত| বিশেষশব্দাদন্যদাপীতি||১৩||

Adhikarana balyupaharaNArthaM sAmAnyavidhiH (14) · Śloka 14

স্নানবস্ত্রবসামাংসমদ্যক্ষীরগুডাদি চ| রোচতে যদ্যদা যেভ্যস্তানেষামাহরেত্তদা| রত্নানি গন্ধমাল্যানি বীজানি মধুসর্পিষী| ভক্ষ্যাশ্চ সর্বে সর্বেষাং সামান্যো বিধিরিত্যযম্||১৪||

যেভ্যো গ্রহেভ্যঃ স্নানাদিকং যদৈব রোচতে তদৈবাহরেদুপনযেত্| রত্নাদিকং সর্বেষাং গ্রহাণাং সামান্যঃ সাধাড়্রণো বিধিঃ||১৪||

Adhikarana balyupaharaNArthaM deshanidarshanam (15) · Śloka 15

সুরর্ষিগুরুবৃদ্ধেভ্যঃ সিদ্ধেভ্যশ্চ সুরালযে| দিশ্যুত্তরস্যাং তত্রাপি দেবাযোপহরেত্ বলিম্| পশ্চিমাযাং যথাকালং দৈত্যভূতায চত্বরে| গন্ধর্বায গবাং মার্গে সবস্ত্রাভরণং বলিম্| পিতৃনাগগ্রহে নদ্যাং নাগেভ্যঃ পূর্বদক্ষিণে| যক্ষায যক্ষাযতনে সরিতোর্বা সমাগমে| চতুষ্পথে রাক্ষসযোর্ভীমেষু গহনেষু বা| রক্ষসাং দক্ষিণস্যাং তু পূর্বস্যাং ব্রহ্মরক্ষসাম্| শূন্যালযে পিশাচায পশ্চিমাং দিশমাস্থিতে||১৫||

সুরাদিভ্যঃ পঞ্চভ্যঃ সুরালযে বলিস্তত্রাপি তেষ্বপি উত্তরস্যাং দিশিদেবেষু বিশেষঃ| দৈত্যভূতায চত্বরে ত্রিপথে পশ্চিমাযাম্ দিশি| গবাং মার্গে বস্ত্রাভরণযুক্তো গন্ধর্বায বলিঃ| পিতৃগ্রহে নাগগ্রহে চ নদ্যাং বলিঃ| নাগানাং বিশেষমাহ- নাগেভ্যঃ পূর্বদক্ষিণাযাং দিশি| যক্ষায যক্ষাযতনে যক্ষাযতনং যক্ষদেবতাক্ষেত্রম্| যদ্বা বটবিটপিমূলং তত্র যক্ষাধিবাসস্য প্রসিদ্ধত্বাত্| সরিতোঃ সমাগমো নদ্যোঃ সঙ্গমঃ| রাক্ষসযোরিতি রাক্ষসানাং ব্রহ্ম-রাক্ষসানাং চ চতুষ্পথে বা ভীষণেষু বা গহনেষু কাননেষু| তযোরেব দিক্ সবোধা| পশ্চিমাং দিশমাস্থিতে শূন্যালযে পিশাচায বলিঃ সর্বত্র দিগ্বিভাগ আতুরগৃহাপেক্ষযেতি|| ১৫||

Adhikarana devAnAM baliH (16) · Śloka 16

শুচিশুক্লানি মাল্যানি গন্ধাঃ ক্ষৈরেযমোদনম্| দধিচ্ছত্রং চ ধবলং দেবানাং বলিরিষ্যতে||১৬||

দিগ্দেশমুক্ত্বা শুচীত্যাদিনা বলিরুচ্যতে| শুচিমাল্যাদিকং দেবানাং বলিরিষ্যতে||১৬||

Adhikarana devagrahe pAnAdyupacArAH (17) · Śloka 17

হিঙ্গুসর্ষপষড্গ্রন্থাব্যোষৈরর্ধপলোন্মিতৈঃ| চতুর্গুণে গবাং মূত্রে ঘৃতপ্রস্থং বিপাচযেত্| তত্পাননাবনাভ্যঙ্গৈর্দেবগ্রহবিমোক্ষণম্| নস্যাঞ্জনং বচাহিঙ্গুলশুনং বস্তবারিণা||১৭||

হিঙ্গ্বাদিভিরর্ধপলোন্মিতৈর্ঘৃতপ্রস্থং চতুর্ষু গোমূত্রপ্রস্থেষু বিপাচযেত্| তদ্ ঘৃতং পানাদিভির্দেবগ্রহবিমোক্ষণম্| ষড্গ্রন্থা বচা| বচাদিকং বস্তমূত্রেণ সহ নস্যং চাঞ্জনং চ দেবগ্রহবিমোক্ষণমিতি সম্বন্ধঃ| ইতি দেবানাম্||১৭||

Adhikarana daitye balivisheShaH (18) · Śloka 18

দৈত্যে বলির্বহুফলঃ সোশীরকমলোত্পলঃ||১৮||

বহফলাদিযুক্তো দৈত্যে বলিঃ| ইতি দৈত্যে|| ১৮||

Adhikarana nAgAnAM balyAdivisheShAH (19) · Śloka 19

নাগানাং সুমনোলাজগুডাপূপগুডৌদনৈঃ| পরমান্নমধুক্ষীরকৃষ্ণমৃন্নাগকেসরৈঃ| বচাপদ্মপুরোশীররক্তোত্পলদলৈর্বলিঃ| শ্বেতপত্রং চ লোধ্রং চ তগরং নাগসর্ষপাঃ| শীতেন বারিণা পিষ্টং নাবনাঞ্জনযোর্হিতম্||১৯||

সুমনঃপ্রভৃতিভির্নাগানাং বলিঃ গুডাপূপঃ সোমালকম্| পরমান্নং পাযসম্| পুরো গুগ্গুলুঃ| রক্তোত্পলং রক্তোত্পলকুসুমম্| ইতি নাগানাম্|| (শ্বেতপত্রমিত্যাদি| শীতেনানুষ্ণেন জলেন পিষ্টং শ্বেতপত্রাদিকং নাবনাঞ্জনযোর্নাবনেঽঞ্জনে চ হিতং নাগগ্রহবিমোক্ষণমিত্যর্থঃ| শ্বেতপত্রং (বেল্লিযিল) শ্বেতপদ্মমিতি কেচিত্| নাগং নখম্| সর্ষপং হ্রস্বসর্ষপম্| নপুংসকমনপুংসকেনৈকবচ্চান্যতরস্যামিতি হিতশব্দস্য ক্লীবত্বমেকত্বং চ| ইতি কৈরলী ব্যাখ্যা|| ১৯||

Adhikarana yakShANAM balyAdivisheShAH (20) · Śloka 20

যক্ষাণাং ক্ষীরদধ্যাজ্যমিশ্রকৌদনগুগ্গুলুঃ| দেবদারুত্পলং পদ্মমুশীরং বস্ত্রকাঞ্চনম্| হিরণ্যং চ বলির্যোজ্যো মূত্রাজ্যক্ষীরমেকতঃ| সিদ্ধং সমোন্মিতং পাননাবনাভ্যঞ্জনে হিতম্| হরীতকী হরিদ্রে দ্বে লশুনো মরিচং বচা| নিম্বপত্রঞ্চ বস্তাম্বুকল্কিতং নাবনাঞ্জনম্||২০||

ক্ষীরাদিকং হিরণ্যান্তং যক্ষাণাং বলিঃ| মিশ্রকৌদনং মাংসমিশ্রমোদনম্| বস্ত্রকাঞ্চনং হিরণ্যং স্বর্ণম্| নাগকেসরমিতি কেচিত্| মূত্রং ঘৃতং ক্ষীরং চ সমোন্মিতং তুল্যমেকত্র মিশ্রীভাবেন সিদ্ধং পানাদৌ হিতম্| হরীতক্যাদিকং বস্তমূত্রেণ কল্কিতং নাবনমঞ্জনং চ নাবনাঞ্জনবিষযে হিতম্| ইতি যক্ষাণাম্||২০||

Adhikarana brahmarakShasAM balyAdivisheShAH (21) · Śloka 21

ব্রহ্মরক্ষো বলিঃ সিদ্ধং যবানাং পূর্ণমাঢকম্| তোযস্য কুম্ভঃ পললং ছত্রং বস্ত্রং বিলেপনম্| গাযত্রীবিংশতিপলক্বাথেঽর্ধপলিকৈঃ পচেত্| ত্র্যূষণত্রিফলাহিঙ্গুষড্গ্রন্থামিসিসর্ষপৈঃ| গোমূত্রে ত্রিগুণে পাননস্যাভ্যঙ্গেষু তদ্ধিতম্||২১||

যবানাং পূর্ণমন্যূনাধিকমাঢকং সিদ্ধং কল্কিতং তোযকুম্ভাদিকং চ ব্রহ্মরক্ষসো বলির্ভবতি| আঢকং ষোডশকুডবপ্রমাণম্| তোযস্য কুম্ভো দ্রোণঃ| পললং মাংসম্| বিলেপনং চন্দনাদ্যনুলেপনম্| গাযত্রীবিংশতিপলস্য খদিরপলবিংশতেঃ ক্বাথে ক্বাথপরিভাষযা কৃতে ত্র্যূষণাদিভিরর্ধপলৈঃ সহ সপ্ত কুডবান্ সর্পিষস্ত্রিগুণে গোমূত্রে পচেত্| তত্ পক্বং ঘৃতং ব্রহ্মরক্ষসাং পানাদিষু হিতম্| লশুনং সিতলশুনম্| ইতি ব্রহ্মরক্ষসাম্||২১||

Adhikarana rakShasAM balyAdivisheShAH (22) · Śloka 22

রক্ষসাং পললং শুক্লং কুসুমং মিশ্রকৌদনম্| বলিঃ পক্বামমাংসানি নিষ্পাবা রুধিরোক্ষিতাঃ| নক্তমালশিরীষত্বঙ্মূলপুষ্পফলানি চ| তদ্বচ্চ কৃষ্ণপাটল্যা বিল্বমূলং কটুত্রিকম্| হিঙিগ্বন্দ্রযবসিদ্ধার্থলশুনামলকীফলম্| নাবনাঞ্জনযোর্যোজ্যো বস্তমূত্রদ্রুতোঽগদঃ| এভিরেব ঘৃতং সিদ্ধং গবাং মূত্রে চতুর্গুণে| রক্ষোগ্রহান্ বারযতে পানাভ্যঞ্জননাবনৈঃ||২২||

পললাদিকং রুধিরোক্ষিতনিষ্পাবান্তং রক্ষসাং বলিঃ বলিসাধনম্| পললং তিলচূর্ণম্| মিশ্রকৌদনং মাংসেন সহ পক্বমোদনম্| পক্বান্যামানি চ মাংসানি| রুধিরেণ রক্তোনোক্ষিতঃ সিক্তাঃ| নক্তমালশিরীষত্বগাদিকং বস্তমূত্রদ্রুতোঽগদো রক্ষসাং নাবনাঞ্জনযোর্নাবনবিষযে চ যোজ্যঃ| নক্তমালঃ কর্ণিকারঃ| কৃষ্ণপাটলী কৃষ্ণপুষ্পা পাটলী| এভিরেব নক্তমালত্বগাদিভিশ্চতুর্গুণে গোমূত্রে সিদ্ধং পক্বং ঘৃতং পানাদিভী রক্ষোগ্রহান্ বারযতে রুণাদ্ধি| ইতি রক্ষসাম্|| ২২||

Adhikarana pishAcAnAM balyAdivisheShAH (23) · Śloka 23

পিশাচানাং বলিঃ সীধুঃ পিণ্যাকঃ পললং দধি| মূলকং লবণং সর্পিঃ সভূতৌদনযাবকম্| হরিদ্রাদ্বযমঞ্জিষ্ঠামিসিসৈন্ধবনাগরম্| হিঙ্গুপ্রিযঙ্গুত্রিকটুরসোনত্রিফলাবচাঃ| পাটলীশ্বেতকটভীশিরীষকুসুমৈর্ঘৃতম্| গোমূত্রপাদিকং সিদ্ধং পানাভ্যঞ্জনযোর্হিতম্| বস্তাম্বুপিষ্টৈস্তৈরেব যোজ্যমঞ্জননাবনম্||২৩||

সীধ্বাদি যাবকান্তং পিশাচানাং বলিঃ| সীধুরিক্ষুকৃতং মদ্যম্| পিণ্যাকস্তিলকল্কঃ| পললং মাংসম্| মূলকং তত্সংজ্ঞং শাকম্| ভূতৌদনং মাংসৌদনম্| যাবকং বাট্যম্| পাটল্যাদিভিঃ কৃতে ক্বাথে হরিদ্রাদ্বযাদিকং কল্কীকৃত্য গোমূত্রচতুর্ভাগযুক্তং সিদ্ধং ঘৃতং পানেঽভ্যঞ্জনে চ পিশাচানাং পিশাচগ্রহগৃহীতানাং হিতম্| শ্বেতকটভী সুষবী| পুল্লানীতি ভাষাযাম্| বস্তাম্বুনাবিমূত্রেণ পিষ্টৈস্তৈরেব হরিদ্রাদ্বযাদিভিরঞ্জনং নাবনং চ যোজ্যম্| ইতি পিশাচানাম্||২৩||

Adhikarana tIkShNapratikUlopacAraniShedhavisheShAH (24) · Śloka 24

দেবর্ষিপিতৃগন্ধর্বে তীক্ষ্ণং নস্যাদি বর্জযেত্| সর্পিষ্পানাদি মৃদ্বস্মিন্ ভৈষজ্যমবচারযেত্| ঋতে পিশাচাত্সর্বেষু প্রতিকূলং চ নাচরেত্| সবৈদ্যমাতুরং ঘ্নন্তি ক্রুদ্ধাস্তে হি মহৌজসঃ||২৪||

দেবাদিচতুষ্টযে তীক্ষ্ণমসহনীযং নস্যাদিকং বর্জযেত্| অস্মিংশ্চতুষ্টযে সর্পিষ্পানাদিকং সর্বং চ ভৈষজ্যং মৃদ্বতীক্ষ্ণমবচারযেত্ প্রযোজযেত্| সর্পিষ্পানাদীত্যত্রাদিশব্দেন নাবনাভ্যঙ্গাদিপরিগ্রহঃ| সর্বেষু গ্রহেষু প্রতিকূলং ন কিঞ্চিদপ্যাচরেত্ পিশাচাদৃতে পিশাচং বর্জযিত্বা| তে সুরাদযঃ পিশাচবর্জিতা মহৌজসোঽনির্দেশ্যশক্তিবিশেষা যতঃ প্রতিকূলাচরণেন ক্রুদ্ধাঃ সবৈদ্যমাতুরং ঘ্নন্তি|| ২৪||

Adhikarana cittaviplave japAdyupacArAH (25) · Śloka 25

ঈশ্বরং দ্বাদশভুজং নাথমার্যাবলোকিতম্| সর্বব্যাধিচিকিত্সাং চ জপন্সর্বগ্রহাঞ্জযেত্| তথোন্মাদানপস্মারানন্যং বা চিত্তবিপ্লবম্| মহাবিদ্যাং চ মাযূরীং শুচিস্তং শ্রাবযেত্সদা| ভূতেশং পূজযেত্স্থাণুং প্রমথাখ্যাংশ্চ তদ্গণান্| জপন্ সিদ্ধাংশ্চ তন্মাত্রান্ গ্রহান্ সর্বানপোহতি||২৫||

নাথমার্যাবলোকিতাখ্যং ধ্যাত্বা সর্বব্যাধিচিকিত্সাং বিদ্যাং জপন্ সমাহিতঃ পৌনঃপুন্যেনোচ্চরন্ সর্বগ্রহানুন্মাদাদীংশ্চ জযেত্| ঈশ্বরাদিকং তস্যৈব| (ঈশ্বরমিতি)| দ্বাদশভুজং দ্বাদশসঙ্খ্যৈর্ভুজৈর্যুতং আর্যাবলোকিতং আর্যযা পার্বত্যা অবলোকিতমার্যাসহিতমিত্যর্থঃ| নাথং লোকৈকনাথমীশ্বরং মহাদেবং ধ্যাত্বা সর্বব্যাধিচিকিত্সাং লক্ষণযা সর্বব্যোধেঃ প্রাযশ্চিত্তভূতং শ্রীপঞ্চাক্ষরাদিকং মন্ত্রং জপন্ সমাহিতঃ পৌনঃপুন্যোনোচ্চরন্ সর্বগ্রহান্ পঞ্চসপ্তাষ্টাদশবিধানুন্মাদান্ বক্ষ্যমাণলক্ষণানপস্মা রানপস্মারগ্রহানন্যং বা যেন কেনাপি হেতুনোত্পন্নং চিত্তবিপ্লবং বুদ্ধি বিভ্রংশং জযেচ্ছমযেত্| ইতি কৈরলী)| তং চাতুরং শুচির্বৈদ্যো মাযূরীং মহাবিদ্যাং সদা শ্রাবযেত্| ('শুচিং তং শ্রাবযেত্সদা' ইতি চ পাঠঃ| মহাবিদ্যামিতি| শুচিং কাযবাঙ্হ্মনোব্যাপারশুদ্ধং তমাতুরং মহাবিদ্যাং বুদ্ধদেবতাখ্যাং মাযুরীং ত্বরিতাং সদানবরতং শ্রাবযেত্ তং প্রতি ব্রূযাত্| ইতি কৈরলী)| ভূতেশমিতি| ভূতনাথবিগ্রহং স্থাণুঞ্চ ভগবন্তং মহেশ্বরং প্রমথাখ্যাংস্তদ্গণাংশ্চ পূজযেত্| তদিতি স্থাণুপরামর্শঃ| (ভূতেশমিতি| ভূতেশং সর্বভূতানামীশং স্থাণুং মহাদেবং প্রমথাখ্যান্ ভূতপ্রমথগুহ্যকাদিষু মধ্যে প্রমথাখ্যান্ গণাংশ্চ তদিতি স্থাণুপরামর্শঃ পূজযেত্ বলিকর্মাদিপূজাবিশেষৈঃ প্রসাদযেত্| জপন্নিতি| সিদ্ধান্ প্রসিদ্ধাংস্তন্মন্ত্রানঘোরাদীনিতি পাট্যকারঃ| গ্রন্থান্তরেঽন্যথা প্রোক্তং চ - ব্যোমা বাপী মহাবিদ্যা মহাপাশুপতস্তথা| ফেনলাক্ষী বজ্রগান্ধারী মালিনি মন্ত্রসংহিতা| তথা চিবিডনাসা চ শূলিনী চেতি কীর্তিতাঃ| তন্ত্রে সিদ্ধা মহামন্ত্রা গ্রহাণাং নিগ্রহা হিতাঃ| ইতি তান্ মন্ত্রান্ জপন্ সর্বান্ গ্রহানপোহতি| ইতি কৈরলী) ||২৫||

Adhikarana atideshena cikitsAnirdeshaH (8) · Śloka 8

যচ্চানন্তরযোঃ কিঞ্চিদ্বক্ষ্যতেঽধ্যাযযোর্হিতম্| যচ্চোক্তমিহ তত্সর্বং প্রযুঞ্জীত পরস্পরম্||২৬|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতাবষ্টাঙ্গসংগ্রহসংহিতাযামুত্তরতন্ত্রে ভূতপ্রতিবেধো নামাষ্টমোঽধ্যাযঃ||৮||

যচ্চেত্যাদিনোন্মাদাপস্মারযোর্ভূতানাঞ্চ সাধারণী চিকিত্সা বোদ্ধব্যেত্যুক্তম্| (যচ্চেতি| অনন্তরযোরুন্মাদাপস্মারপ্রতিষেধযোর্যদ্ধিতং চিকিত্সিতং বক্ষ্যতে ইহ ভূতপ্রতিষেধে যদুক্তং চ তত্সর্বং কর্ম পরস্পরং ব্যত্যস্য প্রযোজযেত্| তচ্চেতি চ শব্দেন অস্মিন্নাধ্যাযে দেবদানবগ্রহদীনুদ্দিশ্য প্রোক্তং কর্মপি পরস্পরং প্রযুঞ্জীতেতি দ্যোতিতম্| ইতি কৈরলী)||২৬|| ইতি শ্রীমন্মহামহোপাধ্যাযেন্দুবিরচিতাযা- মষ্টাঙ্গসংগ্রহব্যাখ্যাযাং শশিলেখাযামুত্তরতন্ত্রে অষ্টমোঽধ্যাযঃ ||৮||