39. guhyarōgapratiṣēdhaḥ

Adhikarana atha guhyarogapratiShedho nAmaikonacatvAriMsho~adhyAyaH, pratij~jA (1) · Śloka 1

অথাতো গুহ্যরোগপ্রতিষেধং নামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

উক্তক্রমেণৈব গুহ্যোরোগাণাং প্রতিষেধং প্রদর্শযিতুমধ্যায আরভ্যতে| অথেত্যাদি পূর্ববত্| গুহ্যরোগাণাং প্রতিষেধং চিকিত্সিতম্|| ১||

Adhikarana apadaMshAnAM cikitsAkramaH (2) · Śloka 2

অপদংশেষূত্পন্নমাত্রেষু পাকপরিহারার্থং মেঢ্রমধ্যে সিরাং বিধ্যেত্| উভযতশ্চাস্য বিধিবদ্দোষানপহরেদ্বিশেষতো বিরেচনেন| তদ যোগ্যস্য ত্বত্যুচ্ছ্রিতানাস্থাপনেন| যথাদোষং চালেপসেকাদীনবিরতং বিদধ্যাত্| এবং সদ্য এব রুক্তোদশোফরাগসংরম্ভা নিবর্তন্তে| পক্বেষু তু শস্ত্রমবচারযেত্| সঘৃতক্ষৌদ্রশর্করেণ তিল কল্কেনালেপযেত্||২||

তত্র পূর্বমপদংশানাং সামান্যচিকিত্সামাহ-অপদংশেষ্বিতি| বহুবচনং বিশেষানপেক্ষযা সাধারণচিকিত্সাপ্রদর্শনার্থম্| সুবোধম্| উভযত ঊর্ধ্বমধশ্চ| তদযোগ্যস্যাল্পাগ্ন্যাদেঃ| অত্যুচ্ছ্রিতানিত্যুপদংশবিশেষণম্| (উত্পন্নমাত্রেষ্বচিতকালজনিতেষ্পদংশাখ্যেষু গুহ্যরোগেষু পাকপরিহারার্থং মেঢ্রমধ্যে মেঢ্রস্য মধ্যভাগে ন তু মূলেঽগ্রে বা উপর্যবেধ্যসিরাসঙ্করেণ বেধ্যসিরাযা দুর্জ্ঞেযত্বাদধোভাগে সীবনীং বর্জযিত্বা তত্পার্শ্বত ইতি চ মন্তব্যম্| পূর্বং সিরাবেধে নিবৃত্তাপদংশশুক্রব্যাপত্সু মেঢ্র ইত্যেতাবন্মাত্রকথনেন স্থানবিশেষস্যানির্দেশাদত্র মধ্য ইত্যুক্তম্| উত্পন্নমাত্রেষ্বিত্যুক্ত্যা চিরোত্থিতেঽপ্যতিপ্রবৃদ্ধেন শোফেন সিরান্তর্ধানাদবেধ্যতযা অনপাযিভির্জলৌকোভির্দুষ্টাস্রবিস্রাবণং কার্যমিতি চ দ্যোত্যতে| সৌশ্রুতেঽপ্যুক্তম্ উপদংশেষু সাধ্যেষু স্নিগ্ধস্বিন্নস্য দেহিনঃ| মেঢ্রমধ্যে সিরাং বিধ্যেত্ পাতযেদ্বা জলৌকসঃ|| ইতি)| যথাদোষমিত্যুচ্ছ্রিতদোষানতিক্রমেণ| (প্রাপ্তপাকস্য ক্রিযামাহ শস্ত্রমবচারযেদ্যথাযোগ্যং পাটনাদিকং কর্তুম্| (পক্বেষু পাকং প্রাপ্তেষু সত্সু তুশব্দেনাশু শস্ত্রাবচার্যতাঽস্য দুষ্করত্বং চ দ্যোত্যতে| উক্তং চ শাস্ত্রান্তরে শস্ত্রেণোপাচরেচ্চাপি পাকমাগতমাশু বৈ|| ইতি)|| ২||

Adhikarana apadaMsheShu sAmAnyacikitsA (3) · Śloka 3

জম্ব্বাম্রসুমনোনীপশ্বেতকাম্বোজিকাঙ্কুরান্| সল্লকীবদীবিল্বপলাশতিনিশোদ্ভবাঃ| ত্বচঃ ক্ষীরিদ্রুমাণাঞ্চ ত্রিফলাং চ পচেজ্জলে| স ক্বাথঃ ক্ষালনং তেন পক্বং তৈলঞ্চ রোপণম্| গোজীবিডঙ্গমধুকসর্বগন্ধৈশ্চ পেষিতৈঃ| তুত্থগৈরিকলোধ্রৈলামনোহ্বালরসাঞ্জনৈঃ| হরেণুপুষ্পকাসীসসৌরাষ্ট্রীলবণোত্তমৈঃ| লেপঃ ক্ষৌদ্রদ্রুতৈঃ সূক্ষ্মৈরপদংশব্রণাপহঃ| দার্বীত্বক্শঙ্খতার্ক্ষ্যোত্থলাক্ষাগোক্ষীরবিড্রসঃ| সক্ষৌদ্রতৈলসর্পির্ভির্লেপঃ শ্রেষ্ঠো ব্রণেঽথবা| লাক্ষাদ্রাক্ষাতসীক্ষৌদ্রঃ ক্ষৌদ্রশৈলেযতার্ক্ষ্যজৈঃ| কপালে ত্রিফলাঽদগ্ধা সঘৃতা রোপণী পরম্| সামান্যং সাধনমিদং...........................||৩||

ক্ষালনার্থং তৈলপচনার্থং চ ক্বাথমাহ-জম্ব্বাদ্যঙ্কুরান্ সল্লক্যাদীনাং ক্ষীরিদ্রুমাণাং চ ত্বচঃ ত্রিফলাং চ জলে পচেত্| স ক্বাথঃ ক্ষালনং তেনৈব চ ক্বাথেন গোজ্যাদিভিশ্চ পেষিতৈঃ পক্বং তৈলং রোপণম্| নীপো ভূমিকদম্বঃ| শ্বেতকাম্বোজিকাখ্যঃ শ্বেতপাকী শিখণ্ডিকা চ| সল্লক্যাদ্যুদ্ভবাস্ত্বচঃ ক্ষীরিদ্রুমাণাঞ্চ বটাদীনাং ত্বচ এব| (চতুর্গুণে জলে পচেত্| দ্বাদশাংশাবশিষ্টঃ স ক্বাথঃ ক্ষালনং ব্রণপ্রক্ষালনায হিতমিত্যর্থঃ| তেন কষাযেণ পক্বং পাচিতং তৈলং ব্রণরোপণং চ) গোজী গোজিহ্বা| তুত্থাদিভিঃ সূক্ষ্মপিষ্টৈঃ ক্ষৌদ্রদ্রুতৈর্লেপোঽপদংশব্রণাপহঃ| (ক্ষৌদ্রদ্রুতৈঃ ক্ষৌদ্রেণ দ্রবত্বমাপাদিতৈঃ সূক্ষ্মৈঃ সূক্ষ্মরজীকৃতৈঃ তুত্থাদিভির্হরেবণ্বাদিভিশ্চ প্রলেপ অপদংশব্রণরোপণঃ| 'সৌরাষ্ট্রী তুবরমৃত্তিকা| পুষ্পং পুষ্পাঞ্জনম্' ইতি প্রবন্ধসংগ্রহে)| দার্বীত্বগাদিভির্লেপো ব্রণে শ্রেষ্ঠঃ| তার্ক্ষ্যোত্থং রসাঞ্জনম্, গোঃ ক্ষীরম্, বিড্রসং চ তস্যা এব| অথবা লাক্ষাদিভিঃ ক্ষৌদ্রান্তৈর্লেপঃ| অথবা ক্ষৌদ্রাদিভির্দ্রব্যজাতৈঃ| রোপণদ্রব্যবিশেষমাহ-ত্রিফলাযাঃ কপাল এব দাহো বিবক্ষিতঃ| (অদগ্ধা অন্তর্ধূমং বিপাচিতা সঘৃতা ঘৃতোপেতা ত্রিফলা পরমতিশযেন রোপণং প্রলেপাদ্ ব্রণরোপণম্| রোপণং পরমিতি পাঠঃ)| ইদং সর্বাপদংশানামবিশেষেণ সাধনং চিকিত্সিতম্| (ইদমনন্তরোক্তং সর্বং কর্মসামান্যং সাধনং সর্বেষামপদংশানাং সামান্যং চিকিত্সিতম্)|| ৩||

Adhikarana vAtikApadaMshaicikitsA (4) · Śloka 4

............................বাতিকং তু প্রলেপযেত্| অপক্বং কুষ্ঠযষ্ট্যাহ্বসুরদারুপুনর্নবৈঃ| স্নিগ্ধোষ্ণৈর্লোহসরলরাস্নাপুণ্ড্রাহ্বসংযুতৈঃ| অথবা নিচুলৈরণ্ডবীজগোধূমচিক্কসৈঃ||৪||

বাতিকং ত্বপদংশমপক্বং কুষ্ঠাদিভির্লোহাদিযুতৈঃ স্নিগ্ধোষ্ণৈঃ প্রলেপযেত্| অথবা নিচুলাদিভিঃ| (লোহমগরুঃ| চিক্কসং যবচূর্ণম্)|| ৪||

Adhikarana paittikApadaMshacikitsA (5) · Śloka 5

গৈরিকাঞ্জনমঞ্জিষ্ঠামধুকোশীরপদ্মকৈঃ| সচন্দনোত্পলৈঃ শীতৈর্ঘৃতাঢ্যৈঃ পিত্তসম্ভবম্| পদ্মোত্পলমৃণালৈর্বা সসর্জার্জুনবেতসৈঃ| সেচযেচ্চ ঘৃতক্ষীরশর্করেক্ষুমধূদকৈঃ||৫||

পিত্তসম্ভবং ত্বপদংশমপক্বমিতি প্রকরণাত্| গৈরিকাদিভিরুত্পলান্তৈঃ শীতৈর্ঘৃতাঢ্যৈঃ প্রলেপযেদিতি সম্বন্ধঃ| অথবা পিত্তসম্ভবং পদ্মাদিভির্বেতসান্তৈঃ প্রলেপযেত্ ঘৃতাদিভিশ্চ সেচযেত্| (অঞ্জনং রসাঞ্জনম্| মৃণালং পদ্মনালম্-ইতি নিবন্ধসংগ্রহে)|| ৫||

Adhikarana shlaiShmikApadaMshacikitsA (6) · Śloka 6

ধবসালাশ্বকর্ণাজকর্ণত্বগ্ভিঃ কফোত্থিতম্| সুরাপিষ্টাভিরুষ্ণাভিঃ সতৈলাভিঃ প্রলেপযেত্| রজন্যতিবিষামুস্তসরলামরদারুভিঃ| সপত্রপাঠাপত্তূরৈরথবা শ্লেষ্মসম্ভবম্||৬||

কফোত্থিতমপদংশং ধবাদিত্বগ্ভিঃ সুরযা পিষ্টাভিরুষ্ণাভিস্তৈলযুক্তাভিঃ প্রলেপযেত্| অথবা রজন্যাদিভিঃ পত্তূরান্তৈঃ শ্লেষ্মসম্ভবং প্রলেপযেত্| (সুশ্রুতে তু বাতজেঽপদংশে কুষ্ঠযষ্ট্যাদিকষাযেণ কফজে সুরসারগ্বধাদিকষাযাভ্যাঞ্চ সেচনমুক্তম্)|| ৬||

Adhikarana pAkaprAptipariharaNam (7) · Śloka 7

ন চ যাতি যথা পাকং প্রযতেত তথা ভৃশম্| পক্বৈঃ স্নাযুসিরামাংসৈঃ প্রাযো নশ্যতি হি ধ্বজঃ||৭||

সর্বশ্চপদংশো যথা পাকং ন যাতি তথা ভৃশং প্রযতেত| যতঃ পক্বৈঃ স্নায্বাদিভিঃ ধ্বজো মেঢ্রঃ প্রাযো নশ্যতি| (যথা যেন প্রকারেণ পাকং ন প্রাপ্নোতি তথা তথা তেন প্রকারেণ ভৃশং প্রযতেত অতিশযেন যত্নমাচরেত্| বমনবিরেচনাসৃঙ্হ্মোক্ষপ্রলেপপরিষেকাদিভিরনবরতমুপাচরেদিত্যর্থঃ| পক্বৈঃ প্রাপ্তপাকৈঃ স্নায্বাদিভিঃ ধ্বজো লিঙ্গং প্রাযো নশ্যতি নাশং প্রাপ্নোতি| প্রাযঃশব্দেন কেষাঞ্চিচ্চিকিত্সাসাধ্যত্বমপি সূচিতম্)|| ৭||

Adhikarana avashiShTApadaMshayoshcikitsA (8) · Śloka 8

অপদংশদ্বযে শিষ্টে প্রত্যাখ্যাযাচরেত্ ক্রিযাম্||৮||

শিষ্টদ্বযং রক্তজং সন্নিপাতজঞ্চ তত্র প্রত্যাখ্যানং কৃত্বা ন সিধ্যতীত্যুক্ত্বা ক্রিযামাচরেত্| ইত্যপদংশঃ|| ৮||

Adhikarana arshasAM cikitsA (9) · Śloka 9

অর্শাংসি যথাযোগং শুদ্ধদেহস্য শস্ত্রক্ষারাগ্নিভিঃ সাধ যেত্| উপদংশোক্তা চাত্র রসক্রিযা লেপঃ||৯||

অর্শসাং সুবোধম্| অপদংশোক্তা রসক্রিযা তুত্থাদিকা|| ৯||

Adhikarana sarShapikAcikitsA (10) · Śloka 10

সর্ষপিকাং বিলিখ্য কষাযৈরবচূর্ণযেত্| তৈরেব চ তৈলং ব্রণরোপণং কুর্যাত্||১০||

সর্ষপিকাযাং প্রথমং শস্ত্রেণ বিলেখনং ততঃ কাযৈর্লোধ্রাদিভিরবচূর্ণনং তৈরেব চ কষাযৈস্তৈলং ব্রণরোপণং কুর্যাত্সাধযেত্|| ১০||

Adhikarana avamanthacikitsA (11) · Śloka 11

অবমন্থে জলৌকসো যোজযেত্| পক্বভিন্নং ধবতিন্দুক সল্লকীপত্তঙ্গসর্জকৃতেন তৈলেন রোপযেত্||১১||

অবমন্থে সুবোধম্-স্বযং পক্বং ততশ্চ ভিন্নং ধবাদিভিঃ কৃতেন তৈলেন রোপযেত্|| ১১||

Adhikarana kumbhIkAcikitsA (12) · Śloka 12

তদ্বত্ কুম্ভীকামুপচরেত্| লোধ্রতিন্দুকত্রিফলাকৃতস্তু লেপস্তৈলং চ রোপণম্||১২||

কুম্ভীকাং তদ্বদবমন্থবদুপাচরেত্| লোধ্রাদিকো লেপঃ তৈরেব চ কৃতং তৈলং রোপণম্|| ১২||

Adhikarana alajIcikitsA (13) · Śloka 13

অলজীং স্রুতরক্তাং কষাযৈরবচূর্ণযেত্| তেষ্বেব চ তৈলং ব্রণরোপণার্থং কুর্বীত||১৩||

অলজ্যাং সুবোধম্| তেষ্বেব চেতি কষাযদ্রব্যেষু|| ১৩||

Adhikarana uttamAcikitsA (14) · Śloka 14

উত্তমাং পিটকাং শস্ত্রেণ চ্ছিত্বা কষাযচূর্ণপ্রদেহৈর্মধু মদ্ভিরুপাচরেত্||১৪||

উত্তমাযাং সুবোধম্| মধুমদ্ভির্মধুযুক্তৈঃ কষাযরসদ্রব্যাণাং চূর্ণৈঃ প্রদেহৈশ্চোপাচরেত্|| ১৪||

Adhikarana puShkarikAdInAM cikitsA (15) · Śloka 15

পুষ্করিকাসংব্যূঢাস্পর্শহানিত্বক্পাকেষু পিত্তবিসর্পোক্তো বিধিঃ||১৫||

পুষ্করিকাদিষু চিকিত্সিতোক্তপিত্তবিসর্পবিধিঃ|| ১৫||

Adhikarana mRuditacikitsA (16) · Śloka 16

মৃদিতং কোষ্ণেন বলাতৈলেন পরিষেচযেত্| মধুরদ্রব্যকল্কৈ শ্চ সুখোষ্ণৈর্ঘৃতস্নিগ্ধৈরুপনাহযেত্||১৬||

মৃদিতমিতি মৃদিতাখ্যম্| বলাতৈলং শারীরোক্তম্| মধুরদ্রব্যাণি সূত্রোক্তানি, তৈঃ সুখোষ্ণাদিগুণৈরুপনাহযেত্|| ১৬||

Adhikarana aShThIlikAcikitsA (17) · Śloka 17

অষ্ঠীলিকাং জলৌকোভির্গ্রহযেত্| তথাঽনুপশমে শ্লেষ্ম গ্রন্থিমিব শস্ত্রেণোদ্ধরেত্||১৭||

অষ্ঠীলিকাযাং সুবোধম্| শ্লেষ্মগ্রন্থির্গ্রন্থ্যাদাবুক্তা|| ১৭||

Adhikarana nivRuttacikitsA (18) · Śloka 18

নিবৃত্তং সর্পিষাভ্যজ্য স্বেদযেত্| স্বিন্নমুপনাহযেত্ত্রিরাত্রং পঞ্চরাত্রং বা সাল্বলেন| ততো ভূযঃ স্বেদযিত্বা ঘৃতেনা ভ্যজ্য শনৈঃ শনৈশ্চর্ম সমানযন্ মণিমবপীডযেত্| পীড যিত্বা চ পুনরুপনাহযেত্| স্নিগ্ধোষ্ণং চান্নপানম্||১৮||

নিবৃত্তাখ্যে সর্পিষাভ্যক্তে পশ্চাত্ স্বিন্নে সূত্রোক্তৈঃ সাল্বলাদিভিস্ত্রিরাত্রং দোষাদ্যপেক্ষযা পঞ্চরাত্রং বোপনাহযেত্| উপনাহো বন্ধঃ| সাল্বলঃ সুবোধঃ| সমানযেদ্যথাপ্রাপ্তং সম্যগানযেত্|| ১৮||

Adhikarana avapATikAcikitsA (19) · Śloka 19

অবপাটিকাযামপ্যযং বিধিঃ||১৯||

অবপাটিকাযামপি অযমেব নিবৃত্তোক্তো বিধিঃ|| ১৯||

Adhikarana niruddhamaNicikitsA (20) · Śloka 20

নিরুদ্ধমণৌ সুবর্ণাদিকৃতাং দারুজাং বা জতুসৃতাং নাডী মুভযতোদ্বারং স্নেহাভ্যক্তাং স্রোতসি প্রণিধায সূকরশিং শুমারযোর্বসযা মজ্জ্ঞা বা পরিষেচযেত্| চক্রতৈলেন বা| বাতহরসিদ্ধেন বা ত্রিবৃতেন| তৃতীযে তৃতীযে চাহনি নাডীং পীনতরাং বিদধ্যাত্| এবমস্য স্রোতোদ্বারং বিবর্ধযেত্ স্নিগ্ধং চাহারং ভোজযেত্| এবমনুপশান্তৌ শস্ত্রেণ সেবনীং পরিহৃত্য দারযিত্বা সদ্যঃ ক্ষতবদুপাচরেত্||২০||

নিরুদ্ধমণৌ নাডীবিধানম্| পরিষেকশ্চ সুবোধঃ| শিংশুমারো মত্স্যবিশেষঃ| বাতহরৈর্দ্রব্যৈঃ সিদ্ধেন ত্রিবৃতেন স্নেহত্রযেণ| সুবোধম্| সদ্যঃক্ষতবত্সদ্যোব্রণবিধানতঃ|| ২০||

Adhikarana grathitAdInAM cikitsA (21) · Śloka 21

গ্রথিতং নাডীস্বেদেন স্বেদযিত্বা স্নিগ্ধোষ্ণৈরুপনাহযেত্| শতপোনকং লিখিত্বা কষাযর্চূর্ণৈঃ সক্ষৌর্দ্রৈর্লেপযেত্| বিদার্যাদিসিদ্ধেন চ তৈলেন রোপযেত্| শর্করার্বুদে রক্ত বিদ্রধিবত্ সাধনম্||২১||

গ্রথিতং গ্রথিতাখ্যম্| ব্যাখ্যাসমং শতপোনকমর্বুদঞ্চ|| ২১||

Adhikarana sarvaiShvantaHshuddhicikitsA (22) · Śloka 22

সর্বেষু চ যথাস্বমন্তঃ শুদ্ধিং কষাযলেপঘৃততৈলরসক্রিযা চূর্ণশোধনরোপণান্ বিদধ্যাত্||২২||

সর্বেষ্বিতি পুরুষগুহ্যরোগেষু| যথাস্বমিতি দোষাদ্যপেক্ষযা অন্তঃ-শুদ্ধ্যাদীন্ বিদধ্যাত্| ইত্যুক্তা মেঢ্রব্যাপদঃ| (কষাযরসদ্রব্যকৃতো লেপঃ কষাযলেপঃ)|| ২২||

Adhikarana vAtikIyonivyApaccikitsA (23) · Śloka 23

যোনিব্যাপদি তু বাতিক্যাং লবণতৈলাক্তাং যোনিং পিণ্ড নাডীকুম্ভীপ্রভৃতিভিঃ স্বেদযেত্| ততঃ সুখোষ্ণাম্বুপরিষি ক্তসর্বগাত্রাং জাঙ্গলরসৈর্ভোজযেত্| বলাদ্রোণদ্বযনির্যূহে পযস্যাসালপর্ণীমাগধিকশতা বরীকাকনাসাশ্রাবণীশর্করাজীবনীযগর্ভং ক্ষীরচতুর্গুণং ঘৃততৈলাঢকং সাধযেত্ তত্পানাত্ সর্বান্ বাতপিত্তবিকা রানপোহতি গর্ভজননং চ| শতাবরীত্রিফলাগুডূচীকাশ্মর্যমৃদ্বীকাকাসমর্দকপরূষ কহরিদ্রাদ্বযসহচরশুকনাসাপুনর্নবৈঃ কার্ষিকৈর্ঘৃতপ্রস্থঃ সিদ্ধঃ পীতো বাতজান্ যোনিরোগানপোহতি গর্ভজননশ্চ| সৈন্ধববচোপকুঞ্চিকাপিপ্পলীবৃষকযবক্ষারাজমোদাজাজী সিতোপলাচিত্রকচূর্ণো মদিরালুলিতঃ সর্পিষা সংযাবীকৃত্য ভক্ষিতো যোনিপার্শ্ববস্তিবেদনার্শোগুল্মহৃদ্রোগহরঃ| শূলে বৃষকরাস্নাগোক্ষুরক শৃতং পযঃ পিবেত্| বৃষক মাতুলুঙ্গমূলমদযন্তিকাসৈন্ধবপিপ্পলীকৃষ্ণজীরককল্কং বা মদ্যেন| তেনৈব চার্জকমূলং বিল্বযুক্তং বা পিপ্পলী যুক্তং বা| সৌবর্চলোপকুঞ্চিকা পিপ্পলীর্বা মদ্যেনাবন্তি সোমেন বা| দন্তীত্রিফলাগুডূচীক্বাথঃ সুখোষ্ণো যোনেঃ পরিষেকঃ| কুষ্ঠতগরদেবদারুবার্তাকিনীসৈন্ধবৈঃ সাধিতং তৈলং পিচুনা ধারযেত্| রাস্নামালতীচ্ছিন্নরুহামধুকবলাব্যাঘ্রীদেবদারুচিত্রকযূ থিকামূলৈঃ কর্ষাংশৈস্তৈলপ্রস্থঃ সমূত্রো দ্বিগুণপযসা বিপ ক্বঃ পিচুনা প্রণীতোঽনিলার্তিহরঃ| বস্তিকর্ম চাভীক্ষ্ণং স্বেদং চ প্রযোজযেদ্বিশেষতো বাতহরৈঃ সুকুমারবলাতৈলশিরীষতৈলৈঃ শতপাকসহস্রপাকৈশ্চা নুবাসনমুত্তরবস্তিঞ্চ| এষ ক্রমো বিশেষেণ যোনির্বেদনা কার্কশ্যস্তম্ভস্রংসস্পর্শহানিঘ্নশ্চ||২৩||

এবং পুংগুহ্যরোগাণাং চিকিত্সামুক্ত্বাঽনন্তরং স্ত্রীগুহ্যরোগচিকিত্সামাহ-বাতিকাভিধানাযাং যোনিব্যাপদি যোনিং লবণতৈলেনাভ্যজ্য পিণ্ডাদিস্বেদৈঃ স্বেদযেত্| সর্বগাত্রামিতি সম্ভবাত্স্ত্রিযম্| বলাকষাযে পযস্যাদিগর্ভং ঘৃততৈলযোর্মিশ্রীভূতযোরাঢকং সাধযেত্ পচেত্| দ্রোণদ্বযনির্যূহো দ্রোণদ্বযক্বাথঃ| সুবোধম্| শতাবর্যাদিভির্ঘৃতপ্রস্থঃ সুবোধঃ| (কার্ষিকৈঃ কর্ষপ্রমাণৈঃ শতাবর্যাদিভিঃ সিদ্ধঃ পক্বো ঘৃতপ্রস্থঃ পীতো বাতজনিতান্ যোনিরোগানপোহতি নাশযতি)| সৈন্ধবাদিচূর্ণো মদিরাদিলুলিতঃ সর্পিষা সংযাবীকৃত্য যবধান্যবত্ সাধযিত্বা ভাক্ষিতো যোন্যাদিবেদনাদিহরঃ| (সংযাব উত্কারিকা ইতি জেজ্জটঃ)| যোনিশূলে বৃষকাদিসিদ্ধং পযঃ পিবেত্| বৃষকো বাসকঃ| বৃষকমাতুলুঙ্গাদিকং বা মদ্যেন পিবেত্| তেনৈবেতি মদ্যেনার্জকস্য সূক্ষ্মকুঠেরস্য মূলং বিল্বযুক্তং বা পিপ্পলীযুক্তং বা অথবা সৌবর্চলাদিকং মদ্যেনাবন্তিসোমেন বা| (অবন্তিসোমং কাঞ্জিকম্)| দন্ত্যাদিক্বাথেন যোনেঃ পরিষেকঃ| কুষ্ঠাদিভিঃ সাধিতং তৈলং পিচুনা কার্পাসচুলুকেন যোনৌ ধারযেত্| বার্তাকিনী বৃহতী| রাস্নাদিবিপক্বতৈলপিচুপ্রযোগঃ সুবোধঃ| ব্যাখ্যাসমম্| শতপাকসহস্রপাকৌ বাতব্যাধ্যুক্তৌ| এষ ইত্যনন্তরোক্তঃ সর্বঃ ক্রমঃ|| ২৩||

Adhikarana aticaraNAdInAM cikitsAkramaH (24) · Śloka 24

অতিচরণাদিষু সর্বাস্বনিলজাস্বযমেব ক্রমঃ||২৪||

অতিচরণাদিষু দশসু মহাযোন্যন্তাস্বযমেব বাতিকীবিহিতঃ ক্রমঃ|| ২৪||

Adhikarana aticaraNAyAM visheShaH (25) · Śloka 25

ধারযেচ্চাতিচরণাযাং যবগোধূমকিণ্বকুষ্ঠশতপুষ্পা শ্রযাহ্বপ্রিযঙ্গুবলাখুকর্ণীকল্ককৃতামুত্কারিকাম্||২৫||

তত্র বিশেষ অতিচরণাযাং যবাদিকৃতামুত্কারিকাং যোনৌ ধারযেত্|| ২৫||

Adhikarana prAkcaraNAdiShu punaH kramavisheShaH (26) · Śloka 26

প্রাক্চরণাশুষ্কাবিপ্লুতাকর্ণিনীষু তৈলমুত্তরবস্তিং দদ্যাত্||২৬||

প্রাক্চরণাদিষু চতুর্ষু সুবোধম্|| ২৬||

Adhikarana viplutAyAM visheShaH (27) · Śloka 27

ধারযেচ্চ বিপ্লুতাযাং গোমত্স্যান্যতরপিত্তেনৈকবিংশতি কৃত্বো ভাবিতান্ ক্ষৌমনক্তকান্ কিণ্বং বা মাক্ষিক যুক্তমেবমস্যাঃ স্রোতাংসি বিশুদ্ধ্যন্তি কণ্ডূক্লেদশো ফাশ্চ নিবর্তন্তে||২৭||

গোর্বা মত্স্যানাং বা পিত্তেনৈকবিংশতিবারান্ ভাবিতান্ ক্ষৌমনক্তকান্ বিপ্লুতাযাং ধারযেত্| সুবোধম্| অস্যা বিপ্লুতাযাঃ||২৭||

Adhikarana karNinyAM visheShaH (28) · Śloka 28

কর্ণিন্যাং তু কুষ্ঠার্কপল্লবপিপ্পলীসৈন্ধবৈর্বস্তমূত্র পিষ্টৈর্বর্ত্তি কৃত্বা ধারযেত্| শ্লেষ্মহরঞ্চ সর্বং কুর্যাত্||২৮||

কর্ণিন্যাং বিশেষঃ কুষ্ঠাদিভির্বর্ত্তি শ্লেষ্মহরং বমনাদিকম্||২৮||

Adhikarana udAvRuttAyAM visheShaH (29) · Śloka 29

উদাবৃত্তাযামানূপমাংসরসাঃ ক্ষীরং স্বেদো দশমূলত্রিবৃতা ক্বাথকল্কসিদ্ধশ্চ স্নেহঃ পানানুবাসনোত্তরবস্তিষু| যোনিস্রংসে চ মহাযোনিপ্রভৃতিষ্বেষ এবং বিধিঃ||২৯||

উদাবৃত্তাযাং সুবোধম্| মহাযোনিপ্রভৃতিষু যোনিস্রংসে চ এষ এব উদাবৃত্তাবিধিঃ|| ২৯||

Adhikarana jAtAghnyAdInAM cikitsA (30) · Śloka 30

জাতঘ্নীরক্তযোনিরক্তক্ষযাসু কুটজকাড়্শ্মর্যক্বাথ সিদ্ধং সর্পিরুত্তরবস্তৌ দদ্যাত্| অথবা মৃগাজাবিবরা হরুধিরাম্লদধিমধুঘৃতানীতি||৩০||

জাতঘ্ন্যাদিত্রযে কুটজাদিসিদ্ধঘৃতোত্তরবস্তির্যোনৌ প্রণিধেযঃ| অথ বা মৃগাদিরুধিরাণ্যম্লদধ্যাদীনি চ মিশ্রীকৃতান্যুত্তরবস্তিঃ স্যাত্|| ৩০||

Adhikarana doShAnusAraM kramavisheShaH (31) · Śloka 31

ভবতি চাত্র- স্নেহেন বেদবস্ত্যাদি বাতলাস্বনিলাপহম্| কারযেদ্রক্তপিত্তঘ্নং শীতং পিত্তকৃতাসু চ| শ্লেষ্মলাসু চ রূক্ষোষ্ণং কর্ম কুর্যাদ্যথাযথম্| সন্নিপাতে বিমিশ্রং তু সংসৃষ্টাসু চ কারযেত্||৩১||

ভবতি চাত্রেতি তন্ত্ররীতিঃ| বাতলাসু যোনিব্যাপত্সু স্নেহনাদিকমনিলাপহং সর্বং কর্ম কারযেত্| পিত্তকৃতাসু সর্বং রক্তপিত্তঘ্নং শীতঞ্চ| শ্লেষ্মলাসু তু সর্বং কর্ম রূক্ষোষ্ণম্| যথাযথমিতি দোষাদ্যপেক্ষযা বিমিশ্রং কর্ম সন্নিপাতে সংসৃষ্টাসু চ কারযেত্|| ৩১||

Adhikarana sthApanApavRuttAyAH karma (32) · Śloka 32

স্নিগ্ধস্বিন্নাং তথা যোনিং দুঃস্থিতাং স্থাপযেত্সমাম্| পাণিনা নমযেত্ জিহ্যাং সংবৃতাং প্রথযেত্ পুনঃ| প্রবেশযেন্নিস্সৃতাং চ বিবৃতাং পরিবর্তযেত্| স্থাপনাপবৃতা যোনির্হি শল্যভূতা স্রিযামতা||৩২||

সুবোধম্| সমস্থাপনাদৌ হেতুঃ স্থাপনাবৃত্তেত্যাদি (দোষবৈপরীত্যেনাভিধায ব্যাধিবৈপরীত্যেন ভেষজনির্দেশঃ| স্নিগ্ধস্বিন্নাং দুঃস্থিতাং স্থাপযেদ্যথাপূর্বম্| পাণিনা নমযেজ্জিহ্যাং স্নিগ্ধস্বিন্নামিত্যনুবর্তনীযম্| জিহ্যাং কুটিলমিত্যর্থঃ| সংবৃতাং ব্যাসযেত্ পুনঃ ক্রমেণ বিস্তারযেত্| অনেকার্থত্বাদ্ধাতূনাম্| প্রবেশযেন্নিসৃতাং তু বিবৃতাং পরিবর্তযেত্,তির্যগ্ব্যবস্থিতামিত্যর্থঃ| যস্মাত্ স্থাপনাপবৃত্যা যোনিঃ শল্যভূতা স্রিযা মতা- ইতি জেজ্জটঃ)| তথা তদ্বত্ দুঃস্থিতাং স্থানভ্রংশাদ্বিষমাং যোনিং সমাং যথাস্থানং স্থাপযেত্| জিহ্যাং কুটিলাং যোন্যন্তর্গততুল্যাগ্রেণ হস্তেন নমযেত্| অত্র নমনকথনেনোন্নমনস্যাঽশক্যত্বাদুন্নতপ্রদেশস্য নমনেনৈব নিম্নস্যৌন্নত্যজননং দ্যোত্যতে| সংবৃতাং সংবরণাদণূভূতাং পুনঃ প্রথযেত্ অঙ্গুল্যগ্রেণ প্রসারযেত্| নিস্সৃতাং বহির্নির্গতাং প্রবেশযেত্ হস্তাগ্রেণ মন্দং মন্দং প্রপীড্যান্তরাবেশযেত্| বিবৃতাং বিচিত্রকর্মণোঽনিলস্য বৈগুণ্যেন বিবণাদ্বেণুনাড্যাকারেণ স্থিতাং পরিবর্তযেত্ পরিতঃ শনৈর্গৃহীত্বা সংবৃণুযাত্| চশব্দঃ সমুচ্চযে| স্থানাদ্ ভ্রষ্টা যোনিঃ স্ত্রিযা নার্যাঃ শল্যভূতা শল্যত্বং প্রাপ্তা মতা| শল্যশব্দেনৈকাবযবজত্বেঽপ্যেষামবযবানামকর্মণ্যতাকরত্বং দ্যোত্যতে| হি প্রসিদ্ধৌ) ||৩২||

Adhikarana pa~jcakarmabhiH shodhanam (33) · Śloka 33

সর্বাং ব্যাপন্নযোনিং চ কর্মভির্বমনাদিভিঃ| মৃদুভিঃ পঞ্চভির্নারীং স্নিগ্ধস্বিন্নামুপাচরেত্||৩৩||

সর্বাং ব্যাপন্নযোনিং যোনিব্যাপদ্যুক্তাং নারীং সংস্নেহ্য স্বেদযিত্বা বমনাদিভিঃ পঞ্চভিঃ কর্মভির্মৃদুভিরেবোপচরেত্| মৃদুভিরতীক্ষ্ণৈর্বমনাদিভির্বমনবিরেচনাস্থাপনাস্রসাবনস্যৈঃ পঞ্চভিঃ কর্মভিঃ||৩৩||

Adhikarana sthAnApavRuttAyAH karma (34) · Śloka 34

সর্বতঃ সুবিশুদ্ধাযাঃ শেষং কর্ম বিধীযতে| বস্ত্যভ্যঙ্গপরীষেকপ্রলেপপিচুধারণম্||৩৪||

স্নিগ্ধস্বিন্নাং তথা যোনিং দুঃস্থিতাং স্থাপযেত্সমাম্| কর্মাণি যথোল্বণদোষপ্রশমনায বিধীযন্তে দ্বিত্রাণি সর্বাণি বা যথাসম্ভবম্| সর্বতঃ শুদ্ধানাং যদ্যত্ কর্ম বক্ষ্যামাণং তত্ সর্বং কার্মুকং সম্পদ্যতে যত আহ সর্বতঃ সুবিশুদ্ধাযাঃ সম্যগূর্ধ্বমধশ্চ শেষং কর্ম বিধীযতে-ইতি জেজ্জটঃ|| ৩৪||

Adhikarana doShAdyavasthAnusAraM yogavisheShAH (35) · Śloka 35

হিংস্রাকল্কং সমীরার্ত্তৌ কোষ্ণমভ্যজ্য ধারযেত্| পঞ্চবল্কস্য পিত্তার্ত্ত্তৌ শ্যামাদীনাং কফাতুরা| বমিন্যাপ্লুতযোশ্চৈব স্বেদযিত্বা প্রযোজযেত্| তর্পণং স্নেহপিচুভির্ভোজনং চানিলাপহম্| সল্লকীজিঙ্গিণীজম্বুধবত্বক্পঞ্চবল্কলৈঃ| কষাযৈঃ সাধিতাত্স্নেহাত্পর্যুপপ্লুতযোঃ পিচুম্| কুলীরসূকরবসা সর্পির্ভির্মধুরৈঃ শৃতৈঃ| পূরযিত্বা মহাযোনিং বধ্নীযাত্ ক্ষৌমনক্তকঃ| প্রস্রস্তাং সর্পিষাভ্যজ্য ক্ষীরস্বিন্নাং প্রবেশযেত্| বধ্নীযাদ্বেশবারস্য পিণ্ডেনামূত্রকালতঃ||৩৫||

হিংস্রেত্যাদিভিস্রযঃ কল্কা বাতার্ত্যাদিষু যোনিধারণে| সুবোধম্| পঞ্চবল্কলো ন্যগ্রোধোদুম্বরাশ্বত্থপ্লক্ষবেতসত্বচঃ| মহাযোনিং কুলীরাদিবসাসর্পির্ভির্মধুরদ্রব্যসিদ্ধৈঃ পূরযিত্বা ক্ষৌমনক্তকৈর্বধ্নীযাত্| প্রস্রস্তেত্যাদি সুবোধম্| আমূত্রকালত ইতি বেগধারণ্প্রতিষেধার্থম্|| ৩৫||

Adhikarana vAtavyAdhyuktaM karma (36) · Śloka 36

যচ্চ বাতবিকারাণাং কর্মোক্তং তচ্চ কারযেত্| সর্বব্যাপত্সু মতিমান্ মহাযোন্যাং বিশেষতঃ| ন হি বাতাদৃতে যোনির্বনিতানাং প্রদুষ্যতি| অতো জিত্বা তমন্যস্য কুর্যাদ্দোষস্য ভেষজম্||৩৬||

যচ্চ চিকিত্সিতে বাতবিকারাণাং কর্মোক্তং তত্ সর্বং সর্বাসু যোনিব্যাপত্স্বপি কারযেত্| তদ্বাতহরং কর্ম মহাযোন্যাং বিশেষতঃ কারযেত্| যস্মাদ্বাতাদৃতে বনিতানাং যোনির্ন দুষ্যতি অতো হেতোস্তং বাতং জিত্বাঽন্যস্য দোষস্য ভেষজং কুর্যাত্| (বনিতানাং স্ত্রীণাং যোনিঃ বাতাদৃতে বাতমন্তরেণ ন প্রদুষ্যতি দুষ্টিং ন প্রাপ্নোতি| হির্যস্মাদর্থে অতোঽস্মাদ্ধেতোস্তং বাতং জিত্বা অন্যস্য দোষস্য পিত্তশ্লেষ্মাদের্ভেষজং চিকিত্সিতং কুর্যাত্|| ৩৬||

Adhikarana paittike yogavisheShAH (37) · Śloka 37

পিত্তলানাং তু যোনিনাং সেকাভ্যঙ্গপিচুক্রিযাঃ| শীতাঃ পিত্তজিতঃ কার্যাঃ স্নেহনার্থং ঘৃতানি চ| শতাবরীমূলতুলাচতুষ্কাত্ ক্ষুণ্ণপীডিতাত্| রসেন ক্ষীরতুল্যেন পাচযেত ঘৃতাঢকম্| জীবনীযৈঃ শতাবর্যা মৃদ্বীকাভিঃ পরূষকৈঃ| পিষ্টৈঃ প্রিযালৈশ্চাক্ষাংশৈর্মধুকাড়্দ্ধপলান্বিতৈঃ| সিদ্ধশীতে তু মধুনঃ পিপ্পল্যাশ্চ পলাষ্টকম্| শর্করাযা দশপলং ক্ষিপেল্লিহ্যাত্ পিচুং ততঃ| যোন্যসৃক্শুক্রদোষঘ্নং বৃষ্যং পুংসবনং পরম্| ক্ষতং ক্ষযমসৃক্পিত্তং কাসং শ্বাসং হলীমকম্| কামিলাং বাতরুধিরং বিসর্পং হৃচ্ছিরোগ্রহম্| অপস্মারার্দিতাযামমদোন্মাদাংশ্চ নাশযেত্| এবমেব পযস্সর্পির্জীবনীযোপসাধিতম্| গর্ভদং পিত্তজানাঞ্চ রোগাণাং পরমং হিতম্||৩৭||

পিত্তলাযাং যোনীনাং সেকাদযঃ শীতাঃ পিত্তজিতশ্চ কার্যাঃ| স্নেহনার্থং ঘৃতান্যেব কার্যাণি| (পিত্তলানাম্ বহুপিত্তানাম্| পিত্তজানামিতি বক্তব্যে পিত্তলানামিত্যুক্তির্ন্ন হি বাতদৃত ইত্যাদিপূর্বোক্তগ্রন্থস্য বিরোধনিরাসার্থম্| যোনীনাং যোনিব্যাপদামিত্যর্থঃ| শীতাঃ স্পর্শবীর্যযোঃ শীতাঃ পিত্তজিতঃ পিত্তঘ্নাঃ শীতশব্দেনৈব পিত্তহরত্বে সিদ্ধে পুনরপি পিত্তঘ্নকথনং পিত্তঘ্নানাং মন্দশীতগুর্বাদীনাং মধ্যেঽত্র শীতস্য বিশেষোপযোজ্যত্বদ্যোতনার্থম্| সেকাভ্যঙ্গপিচুক্রিযাঃ সেকঃ পরিষেকঃ| অভ্যঙ্গঃ স্নেহপ্রলেপঃ| পিচুক্রিযা পিচুনক্তকনিক্ষেপণম্| ক্রিযাশব্দঃ প্রত্যেকং সম্বধ্যতে| কার্যাঃ কর্ত্তব্যাঃ| স্নেহনার্থং শোধ্যবিষযে স্নেহযিতুং ঘৃতানি পিত্তঘ্নৌষধৈর্বহুধা সিদ্ধানি চশব্দাত্ কার্যাণীত্যর্থঃ| শতাবরীত্যাদিনা তান্যেব ঘৃতান্যুচ্যন্তে-শতাবরীমূলানি পরিপূর্ণসারাণ্যনুপহতানি চ গৃহ্যন্তে| সুবোধম্| (দ্বিযষ্টিমধুকৈর্ভিষগিতি চরকপাঠঃ| শতাবরীঘৃতে দ্বিযষ্টিমধুকৈরিতি দ্বিগ্রহণং ভাগাদ্বিগুণপ্রতিপাদনার্থম্| যষ্টিমধুকদ্বযপ্রতিপাদনার্থং বা| স্থলজং জলজং চেতি মধুকং দ্বিবিধং স্মৃতমিত্যাম্নাযাত্| ব্রাহ্মণান্ প্রাশযেত্পূর্বমিতি অদৃষ্টবৃদ্ধ্যর্থমেষা পরিভাষাঽন্যত্রাপি দ্রষ্টব্যা| ইতি জেজ্জটঃ)| দ্বিবলামধুকান্বিতৈরিতি হৃদযপাঠঃ| ক্ষুণ্ণপীডিতান্| শতাবরীমূলস্য তুলাচতুষ্কাত্ ক্ষীরতুল্যেন রসেন| এতাবন্মাত্রস্য শতাবরীমূলস্য যাবান্ রসো জাযতে তত্তুল্যেন পযসেত্যর্থঃ| অক্ষাংশৈরক্ষপ্রমাণৈঃ পিষ্টৈর্জীবনীযাদিভির্ঘৃতাঢকং বিপচেত্| সিদ্ধশীতে চাস্মিন্ ঘৃতে মধুনঃ পিপ্পলীচূর্ণস্য চ পলাষ্টকং সিতাযা দশপলঞ্চ ক্ষিপেত্ ততস্তস্মাত্ পিচুং কর্ষপ্রমাণং লিহ্যাদাতুর ইতি শেষঃ| তদ্ ঘৃতং যোন্যসৃক্শুক্রদোষঘ্নং বৃষ্যং শুক্রবর্ধনম্|| পরমতিশযেন পুংসবনং গর্ভদম্| ক্ষতাদীংশ্চ নাশযেত্| মৃদ্বীকাদীনাং বহুবচনোক্তিঃ ছন্দোঽনুরোধাত্ )| এবমেবেতি শতাবরীবিধানেন পযস্সর্পিঃক্ষীরোদ্ভবং ঘৃতং জীবনীযোপসাধিতং গর্ভদত্বাদিগুণম্| ('গর্ভদং পিত্তলানাং চ যোনীনাং স্যাদ্ভিষগ্জিতম্'-ইতি চরকপাঠঃ| এবমেবেতি ক্ষীরসর্পিঃ ক্ষীরাদুত্থিতং এবমেব পূর্ববিধিমতিদিশতি সিদ্ধশীতে চ মধুন ইত্যাদি যাবত্ ব্রাহ্মণান্ প্রাশযেত্ পূর্বমিত্যাদি-ইতি জেজ্জটঃ)||৩৭||

Adhikarana raktayonicikitsAkramaH (38) · Śloka 38

রক্তযোন্যামসৃগ্বর্ণৈরনুবন্ধমবেক্ষ্য চ| যথাদোষোদযং যুঞ্জ্যাদ্রক্তস্থাপনমৌষধম্||৩৮||

রক্তযোন্যামসৃজো বর্ণৈঃ সিরাব্যধোক্তপ্রকারেণ বাতাদীনামন্যতমস্য দোষস্যানুবন্ধমবেক্ষ্য দোষোদযানতিক্রমেণ রক্তস্থাপনং রক্তস্রাবহরমৌষধং যুঞ্জ্যাত্| (রক্তযোন্যামসৃগ্বর্ণৈরনুবন্ধং কৃষ্ণারুণনীলপীতপাণ্ডূত্বাদিভির্বাতাদীনামাধিক্যমল্পত্বং চ সমীক্ষ্য ততো যথাদোষং যো যো দোষো যথাদোষং রক্তস্থাপনমৌষধং কার্যমিতি জেজ্জটঃ)|| ৩৮||

Adhikarana vAtottarAsRugdaracikitsA (39) · Śloka 39

তিলচূর্ণং দধিঘৃতং ফাণিতং সৌকরী বসা| ক্ষৌদ্রযুক্তং জযেত্পীতং বাতোত্তরমসৃগ্দরম্| বরাহস্য রসো মেধ্যঃ সকৌলত্থশ্চ তদ্গুণঃ| পত্রকল্কো ঘৃতে ভৃষ্টো রাজাদনকপিত্থযোঃ| শর্করাক্ষৌদ্রযষ্ট্যাহ্বনাগরৈশ্চ যুতং দধি||৩৯||

তিলাদিকং ক্ষৌদ্রযুক্তং পীতং বাতাদিকং রক্তস্রাবং জযেত্| উত্তরো বলবান্| বরাহমাংসরসঃ কৌলত্থেন রসেন যুক্তস্তদ্গুণো বাতোত্তরমসৃগ্দরং জযেদিত্যর্থঃ| রাজাদনকপিত্থযোস্তু বালপত্রকল্কো ঘৃতে ভৃষ্টস্তদ্গুণ এব| তথা শর্করাদিভীর্যুক্তং দধি|| ৩৯||

Adhikarana pittottarAsRugdaracikitsA (40) · Śloka 40

পযস্যোত্পলশালূকবিসকালীযবারিজম্| সপযশ্শর্করাক্ষৌদ্রং রক্তে পিত্তোত্তরে পিবেত্| তণ্ডুলীযকমূলং বা সক্ষৌদ্রং তণ্ডুলাম্ভসা| সতার্ক্ষ্যশৈলং লাক্ষাং বা ছাগেন পযসা পিবেত্| বাসাঘৃতং মহাতিক্তং রক্তপিত্তহিতঞ্চ যত্||৪০||

পযস্যাদিকং ক্ষৌদ্রান্তং পিত্তাধিকে রক্তেঽসৃগ্দরে পিবেত্| পযস্যা ক্ষীরিকা| শালূকং জলজকন্দম্| বিসং পদ্মাদিজম্| কালীযং পীতচন্দনম্| অথবা পিত্তোত্তরে রক্তে তণ্ডুলীযকমূলং ক্ষৌদ্রযুক্তং তাড়্ক্ষ্যশৈলযুক্তঞ্চ তণ্ডুলাম্ভসা পিবেত্| অথবা কেবলামেব লাক্ষাং ছাগেন পযসা পিবেত্| বাসাঘৃতঞ্চ রক্তপিত্তোক্তং পিবেত্| তথা মহাতিক্ত-মন্যচ্চ যত্ কিঞ্চিদ্রক্তপিত্তহিতং তত্ সর্বমত্রেষ্যতে| (পৈত্তিকেঽসৃগ্দরে পিবেদিতি চরকপাঠঃ| পযস্যাদীনেকশ একৈকশঃ পযঃশর্করাক্ষৌদ্রসহিতং পৈত্তিকেঽসৃগ্দরে পিবেদিতি জেজ্জটঃ)|| ৪০||

Adhikarana kaphottarAsRugdaracikitsA (41) · Śloka 41

মধুকং ত্রিফলাং লোধ্রং মুস্তং সৌরাষ্ট্রিকাং মধু| মদ্যৈর্নিম্বগুডূচ্যৌ চ কফজেঽসৃগ্দরে পিবেত্||৪১||

কফাসৃগ্দরে মধুকাদিকং গুডূচ্যন্তং মদ্যৈঃ পিবেত্|| ৪১||

Adhikarana puShyAnugaM cUrNam (42) · Śloka 42

পাঠাং জম্ব্বাম্রযোরস্থিশিলোদ্ভেদং রসাঞ্জনম্| অম্বষ্ঠাং শাল্মলীপিচ্ছাং সমঙ্গাং বত্সকত্বচম্| বাহ্নীকবিল্বাতিবিষালোধ্রতোযদগৈরিকম্| শুণ্ঠীমধুকমাচীকরক্তচন্দনকট্ফলম্| কট্বঙ্গবত্সকানন্তা ধাতকীমধুকার্জুনম্| পুষ্যে গৃহীত্বা সঞ্চ্চূর্ণ্য সক্ষৌদ্রং তণ্ডুলাম্বুনা| পিবেদর্শস্বতীসারে রক্তং যচ্চোপবেশ্যতে| দোষা জন্তুকৃতা যে চ বালানাং তাংশ্চ নাশযেত্| যোনিদোষং রজোদোষং শ্যাবশ্বেতারুণাসিতম্| চূর্ণং পুষ্যানুগং নাম হিতমাত্রেযপূজিতম্||৪২||

পাঠাদিকমর্জুনান্তং পুষ্যে গৃহীত্বা সংযোজ্য পশ্চাচ্চ সঞ্চূর্ণ্য ক্ষৌদ্রেণ যুক্তং তণ্ডুলোদকেনার্শঃপ্রভৃতিষু পিবেত্| এতচ্চ বালানাং যেকৃমিকৃতা দোষাস্তান্ যোনিদোষং চ শ্যাবাদ্যন্যতমবর্ণং রজোদোষং চ নাশযেত্| এতচ্চূর্ণং নাম্না পুষ্যানুগম্| হিতং পথ্যমাত্রেযেণ পুনর্বসূনাং পূজিতম্| জম্বূফলস্যাম্রফলস্য চাস্থি| শিলোদ্ভেদং শিলাজতু| অম্বষ্ঠা সাহস্রী, সৈব বহুমূলিকা| শাল্মল্যাঃ সম্বন্ধিনী পিচ্ছা| সমঙ্গা মঞ্জিষ্ঠা| বাহ্নীকং কুঙ্কুমম্| তোযদো মুস্তঃ| মাচীকং কুটজফলম্| কট্বঙ্গঃ স্যোনাকঃ| অনন্তা যবাসকঃ| (পাঠামিত্যাদি| শিলোদ্ভেদঃ পাষাণভেদকঃ| অম্বষ্ঠা দক্ষিণাপথে প্রসিদ্ধৈব| দ্বিতীযাং পাঠামপরে শাল্মলীবেষ্টংখপুরমিত্যর্থঃ| মাচীকমুত্তরাপথে প্রসিদ্ধমেব| কট্বঙ্গোরলুঃ| বত্সক ইন্দ্রযবোঽভিপ্রেতঃ ফলশব্দলোপাত্| অনন্তা উত্পলসারিবা| মধুকং দ্বিযষ্টিমধুকং স্থলজলজভেদেন দ্বিধেত্যুক্তম্| পুষ্যে গৃহীত্বেত্যাদৃষ্টানুগ্রহার্থম্| যোনিদোষং রজোদোষং রজোদোষা রজোবিশেষাঃ শ্বেতাদযঃ প্রদরভেদাঃ যোনিব্যাপল্লিঙ্গা এব| ইতি জেজ্জটঃ)|| ৪২||

Adhikarana garbhasrAvoktA cikitsA (43) · Śloka 43

সর্বেষু গর্ভস্রাবোক্তং প্রদরেষু প্রশস্যতে||৪৩||

শারীরে যদ্গর্ভস্রাব উক্তং চিকিত্সিতং তত্সর্বং প্রদরেঽপি শস্যতে| প্রদরমসৃগ্দরমতিরজ ইতি পর্যাযাঃ|| ৪৩||

Adhikarana raktakShaye cikitsA (44) · Śloka 44

রক্তক্ষযাযাং ক্ষীরঞ্চ জীবনীয শৃতং পিবেত্||৪৪||

রক্তক্ষযাযাং ব্যাপদি জীবনীযাখ্যমহাকষাযশৃতং ক্ষীরং পিবেত্|| ৪৪||

Adhikarana shlaiShmike yonidoShe varttayaH (45) · Śloka 45

যোন্যাং বলাসদুষ্টাযাং বর্ত্তিঃ সংশোধনে হিতা| বারাহে বহুশঃ পিত্তে ভাবিতৈর্নক্তকৈঃ কৃতাঃ| ভাবিতং পযসাঽর্কস্য মাষচূর্ণং সসৈন্ধবম্| বর্ত্তিঃ কৃতা ক্ষণং ধার্যা সেক্তব্যানুসুখাম্বুনা| পিপ্পলীমাষমরিচশতাহ্বাকুষ্ঠসৈন্ধবৈঃ| প্রদেশিন্যঙ্গুলীতুল্যা বর্ত্তির্যোনিবিশোধনী||৪৫||

শ্লেষ্মযোন্যাখ্যাযাং বরাহপিত্তেন বহুশো ভাবিতৈর্নৈক্তকৈর্বস্রখণ্ডৈঃ কৃতা বর্ত্তির্যোনৌ ধার্যা শোধনী পরং হিতা চ| (যোন্যাঃ শ্লেষ্মপ্রদুষ্টাযা বর্ত্তিঃ সংশোধনী হিতা ব্রণপ্রতিষেধোক্তা| অথবা বারাহে বহুশঃ পিত্ত ইত্যাদি| ততোঽনন্তরং স্বেদ্যা সুখাম্বুনা| ইতি জেজ্জটঃ)| অর্কক্ষীভাবিতং মাষচূর্ণং পশ্চাচ্চ সৈন্ধবযোজিতং তেন কৃতা বর্ত্তিঃ শ্লেষ্মযোন্যাং ক্ষণং ধার্যা| ততশ্চ শ্লেষ্মযোনিঃ সুখাম্বুনা সেক্তব্যা| পিপ্পল্যাদিভিরঙ্গুষ্ঠনিকটাঙ্গুলীতুল্যা বর্তির্যোন্যা বিশোধনী||৪৫||

Adhikarana udumbarashalATusiddhaM tailam (46) · Śloka 46

উদুম্বরশলাটূনাং দ্রোণং দ্রোণেঽম্ভসঃ পচেত্| সপঞ্চবল্কতিলকমালতীনিম্বপল্লবে| নিশাস্থিতে জলে তস্মিংস্তৈলপ্রস্থং বিপাচযেত্| পলাশশাল্মলীলাক্ষাধবনির্যাসবল্কলৈঃ| পিষ্টৈর্যুক্তং ততঃ স্নেহপিচুং যোনৌ নিধাপযেত্| সশর্করৈঃ কষাযৈশ্চ শীতৈঃ কুর্বীত সেচনম্| পিচ্ছিলা বিবৃতা যোনিশ্চিরদুষ্টা তু দারুণা| সপ্তাহাচ্ছুধ্যতি ক্ষিপ্রমপত্যং চ সমশ্নুতে||৪৬||

উদুম্বরশলাটূনাং সূক্ষ্মাণাং ফলানাং দ্রোণং দ্বাদশধিকানি পঞ্চশতনি ফলানি| দ্রোণং জলস্য চ তান্যেব| শলাটূনাং চার্দ্রাণামেব প্রযোগঃ ন্যায্যঃ| কিম্ভূতে অম্ভসঃ দ্রোণে, আহ-সপঞ্চবল্কলাদিকে| ন্যগ্রোধোদুম্বরাশ্বত্থপ্লক্ষবেতসবল্কলৈঃ| সর্বৈরেকত্র সম্যুক্তৈঃ পঞ্চ বলক্লমুচ্যতে| পল্লবশব্দস্য তিলকাদিভিঃ সম্বন্ধঃ| তিলকো মুচুলিন্দঃ (মযিবেলুং)| রাত্রাবুদুম্বরাস্থিতে প্রাতঃ স্রুতে তস্মিন্ জলে তৈলপ্রস্থং পলাশাদীনাং নির্যাসৈর্বল্কলৈশ্চ পিষ্টৈর্যুক্তং পচেত্| ততস্তৈলাত্ স্নেহপিচুং যোনৌ নিধাপযেত্| কষাযদ্রব্যৈঃ সেচনোপযোগিভিঃ সশর্করৈঃ সেচনং কুর্বীত| অনেন স্নেহপিচুনা সেচনান্তে সপ্তাহং প্রযুক্তেন পিচ্ছিলাদিগুণা যোনিঃ ক্ষিপ্রং শুষ্যতি অপত্যং চ লভতে| চিরদুষ্টা চিরকালদুষ্টা| পিচ্ছিলাদিত্বং কফাদি-কৃতম্| ইতি জেজ্জটঃ)|| ৪৬||

Adhikarana udumbarasiddhatailam (47) · Śloka 47

উদুম্বরস্য দুগ্ধেন ষট্কৃত্বো ভাবিতাত্তিলাত্| তৈলং ক্বাথেন তস্যৈব কার্যং ধার্যং চ পূর্ববত্||৪৭||

উদুম্বরস্রুতেষু ক্ষীরেষু ষড্বারান্ ভবিতাত্তিলাত্ পীডিতাত্তৈলং তস্যৈবোদুম্বরস্যৈব ক্বাথেন কার্যমিতি সাধ্যম্| ধার্যং চ পূর্ববদিতি স্নেহপিচুং যোনৌ নিধাপযেত্ কষাযদ্রব্যৈঃ সেচনোপযোগিভিঃ সশর্করৈঃ সেচনান্তে চ স্নেহং পিচুনা যোনৌ ধার্যম্| (ধার্যঞ্চ পূর্ববত্পিচুমিত্যর্থঃ| ইতি জেজ্জটঃ)|| ৪৭||

Adhikarana dhAtakyAditailam (48) · Śloka 48

ধাতক্যামলকীপত্রস্রোতোজমধুকোত্পলৈঃ| জম্ব্বাম্রসারকাসীসলোধ্রকট্ফলতিন্দুকৈঃ| সৌরাষ্ট্রিকাদাডিমত্বগুদুম্বরশলাটুভিঃ| অক্ষমাত্রৈরজামূত্রে ক্ষীরে চ দ্বিগুণে পচেত্| তৈলপ্রস্থং তদভ্যঙ্গপিচুবস্তিষু যোজযেত্| শূনোত্তানোন্নতা স্তব্ধা পিচ্ছিলা স্রাবিণী তথা| বিপ্লুতোপপ্লুতা যোনিঃ সিধ্যেত্সস্ফোটশূলিনী||৪৮||

ধাতকীপত্রাদিভিস্তৈলপ্রস্থং পচেত্| তচ্চ তৈলমভ্যঙ্গাদিষু যোজযেত্ তেন চ শূনত্বাদিগুণা যোনিঃ সিধ্যেত্| (সৌরাষ্ট্রিকা তুবরমৃত্তিকা| শূনা উন্নতা ইতি অন্তর্মুখী সূচীমুখী চোচ্যতে| অথবা দোষারব্ধং শূনোন্নতত্বম্| ইতি জেজ্জটঃ| অক্ষমাত্রৈরক্ষপ্রমাণৈর্ধাতক্যাদিভিরজামূত্রপ্রস্থেন ক্ষীরদ্বিপ্রস্থেন চ সহ তৈলপ্রস্থং পচেত্| তত্তৈলমভ্যঙ্গে পিচুনিক্ষেপণে বস্তিকর্মণি চ যোজযেত্| তথা প্রযোজিতে সতি শূনত্বাদিযুক্তা যোনিঃ সিধ্যেত্ শমং প্রাপ্নোতি)||৪৮||

Adhikarana dhAvanam (49) · Śloka 49

অর্কনিম্বাম্রকোশাম্রবিল্ববূকধবোদ্ভবৈঃ| করীরজিঙ্গিণীজম্বূকরঞ্জার্জুনশিগ্রুজৈঃ| পলাশসিধ্রকোত্থৈশ্চ কষাযৈর্দ্ধাবনং পরম্| শুক্তসীধুমধূন্মিশ্রৈর্যোনেঃ স্রাবনিবারণম্| কুর্যাত্ সতক্রগো মূত্রশুক্তৈর্বা ত্রিফলারসৈঃ||৪৯||

অর্কাদ্যুদ্ভবৈর্যথালাভং কষাযৈস্তথা করীরাদিজৈস্তথা পলাশসিধ্রকোত্থৈশ্চ কষাযৈঃ সর্বৈশ্চ শুক্তাদিমিশ্রৈর্যোনের্দ্ধাবনং ক্ষালনং পরং শ্রেষ্ঠং স্রাবনিবারণম্| কোশাম্রঃ ক্ষুদ্রাম্রনামকঃ| জিঙ্গিণী মঞ্জিষ্ঠা| সিধ্রকঃ সিন্দুবারকঃ| বূক ঊরুবূকঃ| অদিলোপাত্ এরণ্ডঃ| পুল্লাস উত্তরাপথে| শুক্তং চুক্রং| ইতি জেজ্জটঃ)| অথবা ত্রিফলারসৈস্তক্রাদিযুক্তৈর্ধাবনং কুর্যাত্|| ৪৯||

Adhikarana yavAntAdishIlanam (50) · Śloka 50

যবান্নমভযারিষ্টং শীধু তৈলং চ শীলযেত্| পিপ্পল্যযোরজঃ পথ্যাপ্রযোগাংশ্চ সমাক্ষিকান্||৫০||

যোনিব্যাপত্স্বনবরতশীলনীযান্যাহ-যোনিব্যাপত্সু যবান্নাদিকং শীলযেত্| অভযারিষ্টমর্শশ্চিকিত্সিতোক্তম্| রসাযনাদ্যুক্তাংশ্চ পিপল্যাদিপ্রযোগান্ সমাক্ষিকান্ শীলযেত্| মাক্ষিকোপেতান্ পিপ্পলীপ্রযোগানযোরজঃপ্রযোগান্ পথ্যাপথ্যপ্রযোগাংশ্চ শীলযেত্ সর্বকালং ভজেত্|| ৫০||

Adhikarana pANDurAsRugdaracikitsA (51) · Śloka 51

রোহীতকজটাকল্কং পাণ্ডুরেঽসৃগ্দরে পিবেত্| ধাত্রীমজ্জ্ঞোঽথবা কল্কং সিতামাক্ষিকসংযুতম্| মধুনামলকীচূর্ণং রসং বা প্রাশযেত্ সিতে| সলোধ্রবল্কেন বটত্বক্কষাযেণ ধাবযেত্| আস্রাবে ক্ষৌমপট্টান্ বা ভাবিতাংস্তেন ধারযেত্| প্লক্ষত্বক্চূর্ণপিণ্ডং বা ধারযেন্মধুনা কৃতম্| যোন্যা স্নেহাক্তযা লোধ্রপ্রিযঙ্গুমধুকস্য বা| ধার্যা মধুকৃতা বর্ত্তিঃ কষাযাণাম্ চ ভূরিশঃ| স্রাবচ্ছেদার্থমভ্যক্তাং ধূপযেদ্বা ঘৃতাপ্লুতৈঃ| সরলাগুগ্গুলুযবৈঃ সতৈলৈঃ কটুমত্স্যকৈঃ||৫১||

সুবোধম্| রোহীতকজটা কুশাল্মলীমূলম্| সিতে শুক্লেঽসৃগ্দরে আমলকাচ্চূর্ণং বা রসং বা মধুনা সহ প্রাশযেত্| আমলক এবামলকী| তত্রৈবাস্রাবে বটত্বচঃ কষাযেণ সলোধ্রবল্কেন প্রক্ষালনম্| অথবা তেনৈব প্রক্ষালনকষাযেণ ভাবিতান্ ক্ষৌমনক্তকান্ যোনৌ ধারযেত্| অথবা স্নেহোনাভ্যক্তযা যোন্যা প্লক্ষত্বক্চূর্ণেন মধুনা কৃতং পিণ্ডং লোধ্রাদিকস্য চূর্ণেন মধুনা কৃতং পিণ্ডং বা ধারযেত্| সুবোধম্| অথবা কটুমত্স্যকৈঃ সতৈলৈর্ধূপযেত্|| ৫১||

Adhikarana paicchilye cUrNam (52) · Śloka 52

কাসীসং ত্রিফলা কাঙ্ক্ষী সাম্রজম্ব্বস্থি ধাতকী| পৈচ্ছিল্যে ক্ষৌদ্রসংযুক্তশ্চূর্ণো বৈশদ্যকারকঃ||৫২||

যোনিব্যাপত্প্রসঙ্গান্ বৈভত্স্যজনকত্বেন তদ্বত্ পীডাকরাণাং পৈচ্ছিল্যদৌর্গন্ধ্যাদীনাং চিকিত্সামাহ-কাসীসাদিভির্ধাতক্যন্তৈঃ কৃতশ্চূর্ণঃ ক্ষৌদ্রেণ যুক্তো যোনৌ পৈচ্ছিল্যে যুক্তো বৈশদ্যকারকঃ| কাঙ্ক্ষী সৌরাষ্ট্রী| আম্রজম্বুনোঃ ফলাস্থি|| ৫২||

Adhikarana daurgandhye cikitsA (53) · Śloka 53

পলাশধাতকীজম্বূসমঙ্গামোচসর্জজঃ| দুর্গন্ধে পিচ্ছিলে ক্লেদে স্তম্ভনশ্চূর্ণ ইষ্যতে| আরগ্বধাদিবর্গস্য কষাযঃ পরিষেচনম্||৫৩||

দুর্গন্ধাদিযুক্তে ক্লেদে স্রবতি পলাশাদিজশ্চূর্ণঃ স্তম্ভন ইষ্যতে| তত্রৈবাঽঽরগ্বধাদিবর্গস্য কষাযঃ পরিষেচনম্|| ৫৩||

Adhikarana stabdhakArkashyayoshcikitsA (54) · Śloka 54

স্তব্ধানাং কর্কশানাঞ্চ কার্যং মার্দবকারকম্| ধারণং বেশবারস্য কৃসরা পাযসস্য বা||৫৪||

স্তব্ধানাং যোনীনাং কর্কশানাঞ্চ মার্দ্দবকারকং কর্ম কার্যম্| কিং তদিত্যাহ বেশবারস্য কৃসরাযাঃ পাযসস্য বা ধারণম্| (স্তব্ধানাং পুংসঙ্গমাদ্যসমর্থানাং কর্কশানাং কঠিনস্পর্শানাঞ্চ যোনীনাং বেশবারস্য কৃসরাযাঃ| 'কৃসরা সা তু বিজ্ঞেযা যা কৃতা তিলতণ্ডুলৈ'রিত্যুক্তলক্ষণাযাঃ| পাযসস্য পযস্সংস্কৃতান্নস্য চ ধারণং কার্যম্|| ৫৪||

Adhikarana pUtigandhe cikitsA (55) · Śloka 55

দুর্গন্ধানাং কষাযঃ স্যাত্তৈলং বা কল্ক এব বা| চূর্ণো বা সর্বগন্ধানাং পূতিগন্ধাপকর্ষণঃ||৫৫||

দুর্গন্ধানাং যোনীনাং সর্বগন্ধদ্রব্যাণাং কষাযঃ পূতিগন্ধাপকর্ষণঃ স্যাত্| এতষামেব বা তৈলমেতেষামেব বা কল্ক এতেষামেব বা চূর্ণঃ| (দুর্গন্ধযুক্তানাং প্রকরণবশাদ্যোনীনাং সর্বগন্ধানাং সর্বেষাং কুষ্ঠচন্দনোশীরাদিগন্ধদ্রব্যাণাং কষাযঃ তেন পরিষেকপ্রক্ষালনাদিকম্| তৈলং সর্বগন্ধানাং কল্ককষাযবিপক্বং তেন সেকলেপাদিকম্| বাশব্দো বিকল্পার্থঃ| কল্কস্তেষাং কল্কেনৈব প্রলেপো বা| চূর্ণস্তেষামেব চূর্ণেনাবকিরণং পূতিগন্ধস্য দুর্গন্ধস্যাপকর্ষণো নাশনঃ স্যাত্)|| ৫৫||

Adhikarana bastidravyANi (56) · Śloka 56

শ্লেষ্মলানাং কটুপ্রাযাঃ সমূত্রা বস্তযো হিতাঃ| পিত্তে সমধুকক্ষীরা বাতে তৈলাম্লসংযুতাঃ| সন্নিপাতসমুত্থাযাঃ কর্ম সাধরণং হিতম্||৫৬||

সর্বেষাং সামান্যেন বস্তিসাধ্যত্বাত্তদ্দ্রব্যাণ্যাহ-শ্লেষ্মলানাং যোনীনাং কটুকদ্রব্যপ্রাযাঃ সমূত্রা বস্তযো হিতাঃ| পিত্তে মধুকক্ষীরযুক্তা বস্তযঃ| বাতে তৈলেনাম্লৈশ্চ মদ্যাদিভিঃ| সান্নিপাতিকী নাম যা ব্যাপত্ তস্যাঃ সকলসাধারণং কর্ম হিতম্| (সন্নিপাতসমুত্থাযাঃ কর্ম সাধরণং যদ্বাতকফপিত্তজাসু যোনিব্যাপত্সুতত্সমস্য্ সর্বম্-ইতি জেজ্জটঃ| শ্লেষ্মলানামিতি| বস্তযঃ উত্তরবস্তযঃ হিতাঃ| একস্মিন্নেব দিনে দ্বিত্রিবারপ্রযোক্ত্ব্যত্বাত্ বহুবচনোক্তিঃ| সন্নিপাতদুষ্টাযাং যোনৌ সাধারণং সমমলঘ্নং কর্ম হিতম্| 'ন হি বাতাদৃতে যোনির্বনিতানাং প্রদুষ্যতী' ত্যাদিবচনাচ্চানিলস্য যোনিব্যাপদি বিশেষেণ প্রাবল্যে সিদ্ধেঽপ্যত্র স্তম্ভকার্কশ্যক্লেদপৈচ্ছিল্যদৌর্গন্ধ্যপ্রস্তাবানন্তরমুত্তরবস্তিদ্রব্যস্য কফাদিক্রমকথনেনৈতেষু কাঠিন্যবিস্রাদিগুণযুক্তযোঃ কফপিত্তযোর্বিশেষকারণত্বং দ্যোত্যতে বস্তিকর্মসাধ্যত্বঞ্চ)|| ৫৬||

Adhikarana yonibIjayoH shuddhermahattvam (57) · Śloka 57

এবং যোনিষু শুদ্ধাসু গর্ভং বিন্দন্তি যোষিতঃ| অদুষ্টে প্রাকৃতে বীজে বীজোপক্রমণে সতি||৫৭||

এবমনন্তরোক্তেন প্রকারেণ যোনিষু শুদ্ধাসু যোষিতো গর্ভং বিন্দন্তি| কদেত্যাহ-অদুষ্ট ইতি প্রাকৃতে বীজে অদুষ্টে বীজস্য অদুষ্টস্বভাবে সতি চাত্মনি উপক্রম আচরতি সতি| (এবমনন্তরোক্তেনোপচরণেন যোনিষু শুদ্ধাসু রোগশান্ত্যা নীরোগাসু প্রাকৃতে নৈসর্গিকে বীজে আর্তবাখ্যে অদুষ্টে বাতাদ্যদূষিতে বীজোপক্রমণে আর্ত্তবসামর্থ্যকরৈঃ পূর্বোক্তৈস্তৈলেন নারীং পিত্তলৈশ্চ মাংসৈরিত্যাদ্যুপক্রমৈরুপক্রান্তে সতি যোষিতো নার্যঃ গর্ভং বিন্দন্তি লভন্তে| অদুষ্ট ইত্যুক্ত্যা প্রকৃত্যা দুষ্টস্য তু ক্রিযাভিরসাধ্যত্বং দ্যোত্যতে| 'অদুষ্টে প্রাকৃতে বীজে জীবোপক্রমণে সতি' ইতি চরকপাঠঃ| অদুষ্টে বীজে প্রকৃতিমাপন্নে কিমবশ্যং গর্ভসম্ভব ইত্যুচ্যতে জীবোপক্রমেণে সতি| বীজশব্দেন দ্বযমঙ্গীকৃতং শুক্রং শোণিতঞ্চ| জীবশ্চাত্র কর্মপুরুষ উক্তঃ শারীরেষ্বস্তি চ সত্ত্বমৌ-পপাদিকং যজ্জীবং স্পৃক্শরীরেণাভিসম্বধ্নাতীত্যাদি| ততশ্চ সামগ্রী জনকম্| ন হ্যেকো বর্ত্ততে ভাবো বর্ত্ততে নাপ্যহেতুক ইত্যাম্নাযাত্| ইতি জেজ্জটঃ)|| ৫৭||

Adhikarana puruShendriyaparIkShaNam (58) · Śloka 58

পঞ্চকর্মবিশুদ্ধস্য পুরুষস্যাপি চেন্দ্রিযম্| পরীক্ষ্য বর্ণৈর্দোষাণাং দুষ্টং তদ্ঘ্নৈরুপাচরেত্||৫৮||

প্রসঙ্গেনোচ্যতে| রজঃশুদ্ধির্যোনিগর্ভাশযশোধনাদিনা উক্তা| শুক্রশোধনাযাহ ইতি জেজ্জটঃ| পুংবীজস্যাপ্যবশ্যমুপক্রমণীযত্বমাহ পঞ্চকর্মবিশুদ্ধস্য পুরুষস্যাপীন্দ্রিযং শুক্রং দুষ্টং দোষাণাং বর্ণৈঃ সূত্রোক্তৈঃ পরীক্ষ্য তদ্ঘ্নৈঃ পুরুষবীজদোষঘ্নৈরুপাচরেত্| (ইন্দ্রিযশব্দোঽত্র শুক্রে বর্ততে| শুক্রমপি দোষবর্ণৈঃ সূত্রোক্তৈঃ পরীক্ষ্য দুষ্টং তদ্বাতাদিঘ্নৈরুপাচরেত্| ননু শুক্রদোষভেষজং প্রাক্শারীরেঽভিহিতং যেন পুনস্তদ্ঘ্নৈরুপাচরেদিতি নাঽপ্যনুক্তমবধারযিতুং শক্যং চিকিত্সিতুং বা প্রাধানঞ্চেদং কার্যমপত্যনিবন্ধনত্বাদ্ উচ্যতে| উক্তমেব| পরীক্ষ্য বর্ণৈর্দোষাণামিত্যনেনেন্দ্রিযস্য বেদনাসংস্থানান্যুক্তান্যেব পঞ্চকর্মোপদেশেন চ সকলশরীরশুদ্ধির্বাজীকরণানি চ ক্ষীণদুষ্টবিশুষ্কস্যাপ্যাযনপ্রসাদনবর্দ্ধনান্যুক্তান্যেব| শারীরেষু চ সূত্রমাত্রেণ দর্শিত এব পন্থাঃ-ইতি জেজ্জটঃ| পঞ্চকর্মবিশুদ্ধস্য পঞ্চভির্বমনবিরেচনবস্তিনস্যাসৃঙ্মোক্ষৈঃ কর্মভির্বিশুদ্ধস্য কৃতবিশোধনস্য পুরুষস্যাঽপি ন কেবলং স্ত্রিযা এব ইন্দ্রিযং শুক্রাখ্যং বীজং দোষাণাং বর্ণৈরসিতপীতপাণ্ডুত্বাদিভিঃ পরীক্ষ্য যথাবদববুধ্য তত্র দুষ্টং বাতাদিদূশিতং তদ্ঘ্নৈর্বীজদূষকদোষঘ্নৈরুপাচরেত্ চিকিত্সেত্|| ৫৮||

Adhikarana phalasarpiH (59-39) · Śloka 39

মঞ্জিষ্ঠাকুষ্ঠতগরত্রিফলাশর্করাবচাঃ| দ্বে নিশে মধুকং মেদা দীপ্যকঃ কটুরোহিণী| পযস্যা হিঙ্গু কাকোলী বাজিগন্ধা শতাবরী| পিষ্ট্বাক্ষাংশং ঘৃতপ্রস্থং পচেত্ ক্ষীরচতুর্গুণম্| যোনিশুক্রপ্রদোষেষু তত্সর্বেষু প্রশস্যতে| আযুষ্যং পৌষ্টিকং মেধ্যং ধন্যং পুংসবনং পরম্| ফলসর্পিরিতি খ্যাতং পুষ্পে পীতং ফলায যত্| ম্রিযমাণপ্রজানাং চ গর্ভিণীনাং চ পূজিতম্| এতত্পরং চ বালানাং গ্রহঘ্নং দেহবর্দ্ধনম্||৫৯|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতা বষ্টাঙ্গসংগ্রহসংহিতাযামুত্তরতন্ত্রে গুহ্যরোগ প্রতিষেধো নামৌকোনচত্বারিংশোঽধ্যাযঃ||৩৯||

মঞ্জিষ্ঠেত্যাদিনা ফলসর্পিঃ সুবোধম্| তত্সর্বেষু যোনিশুক্রপ্রদোষেষু প্রশস্যতে| অযুষ্যাদিগুণং চ| ফলসর্পিরিতি খ্যাতম্| ফলসর্পিরিত্যস্য নাম্নো ভঙ্গযার্থ উচ্যতে| পুষ্পে পীতং যত্ফলায প্রজাখ্যায ভবতীতি| (মঞ্জিষ্ঠাদীন্ প্রত্যেকমক্ষাংশমক্ষপ্রমাণং পিষ্ট্বা কল্কীকৃত্য চতুর্গুণক্ষীরোপেতং ঘৃতস্য প্রস্থং পচেত্| তত্সর্পির্মাত্রযোপযুক্তং সর্বেষু যোনিশুক্রপ্রদোষেষু বিংশতিবেধেষু যোনিব্যাপত্সু বাতাদিকুণপগ্রন্থিপূযক্ষীণমলাহ্বযেষু শুক্রার্তবদোষেষু চ প্রশস্যতে| আযুষ্যমাযুষ্করম্| পৌষ্টিকং দেহপুষ্টিকরম্| মেধ্যং বুদ্ধ্যুন্মেষকরম্| ধন্যং ভাগ্যকরম্| পুংসবনং পুরুষপ্রজাকরণসমর্থম্| ফলসর্পিরিতি প্রসিদ্ধং পুষ্পে আর্ত্তবকালে পীতং ফলায সত্পুত্রজননায ভবতি যস্মাত্ ফলসর্পিরিতি সংজ্ঞেত্যর্থঃ| ম্রিযমাণপ্রজানাং পুনঃ পুনর্মৃতপ্রজানাং গর্ভিণীনাং সঞ্জাতগর্ভাণাং চ পূজিতং শ্রেষ্ঠম্| এতত্ফলসর্পিঃ বালানাং গ্রহঘ্নং গ্রহপীডাহরং পরমতিশযেন দেহপুষ্টিজনকঞ্চ)| ইতি শ্রীমন্মহামহোপাধ্যাযেন্দুবিরচিতাযা মষ্টাঙ্গসংগ্রহব্যাখ্যাযাং শশিলেখাযা মুত্তরতন্ত্রে একোনচত্বারিংশোঽধ্যাযঃ