38. guhyarōgavijñānīyaḥ

Adhikarana atha guhyarogavij~jAnIyo nAmAShTatriMsho~adhyAyaH, pratij~jA (1) · Śloka 1

অথাতো গুহ্যরোগবিজ্ঞানীযং নামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

ব্রণশস্ত্রপ্রসঙ্গেন ক্ষতপ্রাযত্বাত্ গুহ্যরোগাণাং হেত্বাদিকং প্রদর্শযিতুমধ্যায আরভ্যতে| গুহ্যশব্দেনোপস্থো ভণ্যতে|| ১||

Adhikarana guhyarogahetuH (2) · Śloka 2

স্ত্রীব্যবাযনিবৃত্তস্য সহসা ভজতোঽথবা| দোষাধ্যুষিতসঙ্কীর্ণমলিনাণুরজঃ পথাম্| অন্যযোনিমনিচ্ছন্তীমগম্যাং নবসূতিকাম্| দূষিতং স্পৃশতস্তোযং রতান্তেষ্বপি নৈব বা| বিবর্ধযিষযা তীক্ষ্ণান্ প্রলেপাদীন্ প্রযচ্ছতঃ| মুষ্টিদন্তনখোত্পীডাবিষবচ্ছূকপাতনৈঃ| বেগনিগ্রহদীর্ঘাতিখরশষ্পবিঘট্টনৈঃ| দোষা দুষ্টা গতা গুহ্যং ত্রযোবিংশতিমামযান্| জনযন্ত্যুপদংশাদীন্...........................||২||

স্ত্রীব্যবাযনিবৃত্তত্বাদিযুক্তস্য পুরুষস্য তত এব হেতোর্গুহ্যং গতা বাতাদযো দুষ্টাস্ত্রযোবিংশতিমুপদংশাদীনামযান্ ব্যাধীন্ জনযন্তি| স্ত্রীব্যবাযো মৈথুনম্ অতঃ সহসা যো নিবৃত্তিঃ সহসা সেবনঞ্চ দোষকোপহেতুঃ| অথবা দোষাধ্যুতত্বাদিগুণরজঃ পথামন্যযোনাদিকাং বা স্ত্রিযং ভজতঃ| দোষৈর্বাতাদিভিরধ্যুষিতমধিষ্ঠিতং সঙ্কীর্ণঞ্চ মলিনং চাণু চ রজঃ পথং যোনিদ্বারং যস্যাস্তাম্| সঙ্কীর্ণং কেনচিত্ বীভাত্সেন মিশ্রিতম্| মলিনং শৌচাদ্যভাবেন মলযুক্তম্| অণু সংব্ ঋতম্| অন্যযোনির্বিজাতীযবডবাগবাদিস্তাম্| অনিচ্ছন্তী যা মৈথুনদ্বেষেণাঙ্গসঙ্কোচনপরা| অগম্যা ভগিন্যাদিঃ| তথা রতান্তেষু দূষিতং পঙ্কাদ্যাবিলং তোযং স্পৃশতস্তেন শৌচং কুর্বতঃ অপি বা নৈব স্পৃশতঃ শৌচাদিকং নৈব কুর্বতঃ| তথা বিবর্ধযিষযা শোফং বর্ধযিতুমিচ্ছযা তত্রৈব তীক্ষ্ণান্ প্রলেপসেকাদীন্ প্রযচ্ছতো দদতঃ| মুষ্ট্যাদীনামুত্পীডনযা| বিষবতাং শূকানাং পাতনৈঃ| বেগনিগ্রহঃ শুক্রাদিবেগধারণম্| দীর্ঘণাতিখরেণ চ শষ্পেণ তৃণেন বিঘট্টনং ক্ষোদনম্| 'গুহ্যরোম শষ্পমি'তি জেজ্জটঃ| (স্ত্রীং ব্যবাযনিবৃত্তস্যেতি পাঠঃ| বেগনিগ্রহদীর্ঘাতিখরস্পর্শবিঘট্টনৈরিতি চ| ব্যাবাযনিবৃত্তস্য চিরকালোপেক্ষিতমৈথুনস্য নরস্য পুনঃ সহসা অতর্কিতমেব স্ত্রীং নারীং ভজতঃ সেবমানস্য| অথবেতি বিকল্পে| সঙ্কীর্ণঃ প্রসববৈষম্যাদিনা গুদবস্তিভ্যামেকীভূতঃ| অথবা রজঃ-শব্দোঽপি দোষাধ্যুষিতাদিবদ্ গুণবচনঃ, তথা সতি তজঃপথাং রজোযুক্তযোনিমার্গাং রজস্বলাসূতিকাদিমিত্যর্থঃ| অস্মিন্ পক্ষে দোষাধ্যুষিতাদিভিঃ পথশব্দোঽভিসম্বধ্যঃ| অগম্যাং ভগিন্যাদিকান্তথা সত্যন্যজনজ্ঞানশঙ্কাজুগুপ্সাদিজনিতবৈক্লব্যদূনে হৃদি ক্রুদ্ধা দোষাস্তদ্গতেন মনসা সহ গুহ্যং প্রাপ্তাস্তত্র রোগান্ জনযন্তীত্যর্থঃ| শ্রুতিস্মৃতিবিরুদ্ধাচারতশ্চ| মুষ্ট্যুত্পীডনাদযঃ কামসূত্রবিহিতকরণ ভেদজনিতাঃ| ঊষরজলেষু বাহুল্যেন দৃশ্যমানো জন্তুতুল্যাকৃতিঃ কশ্চিদোষধিবিশেষঃ শূকঃ| তে চ শূকাঃ সবিষনির্বিষভেদাত্ দ্বিধা তত্র বিষবন্তো রোগকারিণঃ| তদুক্তম্- কৃষ্ণানি চিত্রাণ্যথবা শূকানি সবিষাণি তু| পাতিতানি পচন্ত্যাশু মেঢ্রং নিরবশেষতঃ|| ইতি| অথবা বিষদ্রব্যকল্পিতানাং বচ্ছূকানাং বশ্যৌষধানাং পাতনাত্| বেগনিগ্রহদীর্ঘাতিখরস্পর্শবিঘাট্টনাত্ বেগনিগ্রহাচ্ছুক্রাদিবেগধারণাত্| তথা দীর্ঘাণামতিখরণাঞ্চ স্পর্শানাং বিঘট্টনাদাস্ফালনাত্| স্পর্শমিতি কামাতপত্রসংজ্ঞিতস্ত্বগ্বিশেষঃ| তস্য চ বহুরূপতা বিদ্যতে তত্কামশাস্ত্রাদবগন্তব্যম্)|| ২||

Adhikarana apadaMshAnAM sa~gkhyAsamprAptiH (3) · Śloka 3

..................................অপদংশোঽত্র পঞ্চধা| পৃথগ্দোষৈঃ সরুধিরৈঃ সমস্তৈশ্চ...................||৩||

অত্রৈষাং ত্রযোবিংশতের্মধ্যে বাতেন পিত্তেন শ্লেষ্মণা রক্তেন সন্নিপাতেনেতি পঞ্চধা অপদংশাঃ|| ৩||

Adhikarana vAtajApadaMshaH (4) · Śloka 4

................................অত্র মারুতাত্| মেঢশোফো রুজশ্চিত্রাঃ স্তম্ভস্ত্বক্পরিপোটনম্||৪||

ত্বক্পরিপোটনান্তং বাতেনোপদংশে লক্ষণম্| (অত্র পঞ্চানাং মধ্যে বাতেনাপদংশে লিঙ্গে শোফো নানাপ্রকাররুজঃ স্তব্ধতা ত্বচোভেদনং চ স্যাত্)|| ৪||

Adhikarana pittajApadaMshaH (5) · Śloka 5

পক্বোদুম্বরসঙ্কাশং পিত্তেন শ্বযথুর্জ্বরঃ||৫||

জ্বরান্তং পিত্তেন| পিত্তজে অপদংশে পক্বোদুম্বরসঙ্কাশঃ শোফো জ্বরশ্চ স্যাত্|| ৫||

Adhikarana shleShmajApadaMshaH (6) · Śloka 7

শ্লেষ্মণা কঠিনঃ স্নিগ্ধঃ কণ্ডূমাঞ্ছীতলো গুরুঃ||৬|| `|৭|

গুর্বন্তং শ্লেষ্মণা| কঠিন ইত্যাদ্যনন্তরপ্রকৃতস্য শ্বযথোর্বিশেষণম্| (বিশেষণসামর্থ্যাচ্ছ্বযথুরেবাত্র বিশেষ্যঃ| শ্লেষ্ম কৃতে অপদংশে কাঠিন্যযুক্তঃ স্নেহলেপপ্রতীতিকরঃ কণ্ডূসহিতঃ শীতস্পর্শশ্চ শোফো জাযতে)|| ৬||

Adhikarana raktajApaMdashaH (7) · Śloka 7

শোণিতেনাসিতস্ফোটসম্ভবোঽস্রশ্রুতির্জ্বরঃ||৭||

জ্বরান্তং রক্তেন| রক্তকৃতে অপদংশে কৃষ্ণবর্ণানাং স্ফোটানামুত্পত্তিরস্রস্রাবো জ্বরশ্চ স্যাত্|| ৭||

Adhikarana sannipAtajApadaMshaH (8) · Śloka 8

সর্বজে সর্বলিঙ্গত্বং শ্বযথুর্মুষ্কযোরপি| তীব্রা রুগাশু পচনং দরণং কৃমিসম্ভবঃ||৮||

কৃমিসম্ভবান্তং সন্নিপাতেন| সরক্তসন্নিপাতজে অপদংশে সর্বলিঙ্গত্বং বাতাদ্যপদংশানাং প্রত্যেকোক্তলক্ষণনিচযসম্ভবঃ| তথা বৃষণযোরপি শোফঃ| অপিশব্দেনান্যত্রাপি| মেঢ্রমাত্রে শোফোদ্ভবং সূচিতম্| রক্তাপদংশেঽপি শোফ উক্তঃ| তীব্রা অত্যর্থমসহনীযা রুক্পীডাবিশেষঃ| আশুপচনং দ্বিত্রিদিনৈরেব পাকঃ| আশুশব্দোক্ত্যা পূর্বেষাং ক্রমেণ পাকঃ সূচিতঃ| দরণং ভেদনম্| কৃমিসম্ভবঃ অন্তঃ স্বযমেব জন্তূনামুদ্ভবঃ)|| ৮||

Adhikarana apadaMshAnAM sAdhyAsAdhyatA (9) · Śloka 9

যাপ্যো রক্তোদ্ভবস্তেষাং মৃত্যবে সন্নিপাতজঃ||৯||

তেষাং পঞ্চানামপদংশানাং মধ্যে রক্তাপদংশো যাপ্যঃ| সন্নিপাতজস্তু মৃত্যবে ভবতি|| ৯||

Adhikarana arshAMsi (10) · Śloka 10

জাযন্তে কুপিতৈর্দোষৈর্গুহ্যাসৃক্পিশিতাশ্রযৈঃ| অন্তর্বহির্বা মেঢ্রস্য কণ্ডূলা মাংসকীলকাঃ| পিচ্ছিলাস্রস্রবা যোনৌ তদ্বচ্চ ছত্রসন্নিভাঃ| তেঽর্শাংস্যুপেক্ষ্যা ঘ্নন্তি মেঢ্রপুংস্ত্বভগার্তবম্||১০||

গুহ্যে যদসৃগ্রক্তং পিশিতং মাংসঞ্চ তত্রোক্তাত্কারণাত্ কুপিতৈর্দোষৈর্মেঢ্রস্যান্তর্বা বহির্বা কণ্ডূলাঃ পিচ্ছিলাস্রস্রবাশ্চ মাংসকীলকা জাযন্তে| তে অনেনৈব প্রকারেণ স্ত্রিযা অপি যোনৌ ছত্তাকৃতযো মাংসকীলকা জাযন্তে নাম্না অর্শাংসি| তে চ পুরুষে জাতা উপেক্ষিতাঃ সন্তো মেঢ্রং পুংস্ত্বং চ নাশযন্তি| স্ত্রিযাস্তদ্বদ্ভগমার্তবং চ| লাঘবার্থমত্র যোনিরোগ উক্তঃ| (কুপিতৈর্যযোক্তেন কারণজাতেন ক্রুদ্ধৈর্গুহ্যাসৃক্পিশিতাশ্রযৈঃ গুহ্যগতমসৃক্পিশিতঞ্চাশ্রযো যেষাং তৈঃ মেঢ্রস্যান্তর্ভাগে বহির্ভাগে বা কণ্ডূলাঃ কণ্ডূযুক্তাঃ পিচ্ছিলাস্রস্রবাঃ পৈচ্ছিল্যযুক্তং রক্তং স্রবন্তঃ মাংসকীলকা কীলকাকারা মাংসাঙ্কুরাঃ জাযন্তে| যোনৌ চ স্ত্রীণাং গুহ্যেঽপি তদ্বত্ যোনিব্যাপদুক্তকারণদুষ্টৈর্দোষৈরন্তর্বহির্বা কণ্ড্বাদিযুক্তা মাংসকীলকা জাযন্তে| তত্র ত্বযং বিশেষঃ তে ছত্রসন্নিভাঃ ছত্রতুল্যাকারাঃ কৃশ মূলাঃ স্থূলাগ্রাশ্চ ভবন্তি| মেঢ্রজা মাংসকীলকাঃ যোনিজাশ্চর্শাংসীতি কথ্যন্তে| উপেক্ষযা তু পুনঃ মেঢ্রপুংস্ত্বভগার্তবং, মেঢ্রে চেন্মেঢ্রম্| পুংস্ত্বং স্ত্রীগমনসামর্থ্যং শুক্রং বা| তথা ভগে চেত্ ভগমৃতুত্বযোগ্যং আর্তবং রক্তং চ ঘ্নন্তি| পুংরোগাণাং মধ্যে স্ত্রীরোগকথনং কারণাদিসাম্যেন লাঘবাত্)|| ১০||

Adhikarana sarShapikAH (11) · Śloka 11

গুহ্যস্য বহিরন্তর্বা পিটকাঃ কফরক্তজাঃ| সর্ষপামানসংস্থানা ঘনাঃ সর্ষপিকাঃ স্মৃতাঃ||১১||

কফরক্তাভ্যাং গুহ্যস্য বহিরন্তর্বা সর্বত্র বা সর্ষপতুল্যপ্রমাণসংস্থানা ঘনাঃ সংহতাঃ পিটকা ভবন্তি তা নাম্না সর্ষপিকা স্মৃতাঃ| (গুহ্যস্য মেঢ্রস্য গুহ্যশব্দোক্ত্যা যোনেরপি বহিরন্তঃ বহির্ভাগেঽন্তর্ভাগে বা কফরক্তজাঃ শ্লেষ্মরক্তসংসর্গনিমিত্তাঃ সর্ষপামানসংস্থানাঃ মানসস্থানাভ্যাং সর্ষপতুল্যাঃ ঘনা নিরন্তরনিচিতাঃ পিটকাঃ সর্ষপিকাসংজ্ঞো গুহ্যতোগঃ)|| ১১||

Adhikarana avamanthaH (12) · Śloka 12

পিটকা বহবো দীর্ঘা দীর্যন্তে মধ্যতশ্চ যাঃ| সোঽবমন্থঃ কফাসৃগ্ভ্যাং বেদনারোমহর্ষবান্||১২||

গুহ্যে যাঃ পিটকা বহবো দীর্ঘা মধ্যতশ্চ দীর্যন্তে স রোগো নাম্নাঽবমন্থঃ| স চ কফবাতাভ্যাং ভবতি| বেদনারোমহর্ষবাংশ্চ ভবতি| (কফাসৃগ্ভ্যাং কফেনাসৃজা চ সংসৃষ্টাভ্যাং জাতাঃ বহবো বহুসঙ্খ্যাঃ দীর্ঘা আযামযুক্তাঃ যা পিটকা মধ্যতো মধ্যপ্রদেশে দীর্যন্তে বিদীর্ণা ভবন্তি| বেদনারোমহর্ষবান্ বেদনযা রোমহর্ষেণ চ যুক্তঃ স রোগোঽবমন্থাখ্যঃ)|| ১২||

Adhikarana kumbhIkA (13) · Śloka 13

কুম্ভীকা রক্তপিত্তোত্থা জাম্ববাস্থিনিভাঽশুজাঃ||১৩||

রক্তপিত্তহেতুর্জাম্ববাস্থিমসদৃশা ক্ষিপ্রজা যা পিটকা সা নাম্না কুম্ভীকা| (রক্তপিত্তাভ্যাং জাতা জাম্বববীজাস্থিসদৃশা আশুজা অতিবেগেনোত্থিতা পিটকা কুম্ভীকা তত্সংজ্ঞো গুহ্যরোগঃ)|| ১৩||

Adhikarana alajI (14) · Śloka 14

অলজীং মেহবদ্বিদ্যাত্.............................||১৪||

অলজ্যাখ্যাং গুহ্যপিটকাং মেহবচ্ছারাবিকাদিপঠিতালজীবল্লক্ষণৈর্বিদ্যাত্|| ১৪||

Adhikarana uttamA (15) · Śloka 15

.....................................উত্তমাং রক্তপিত্তজাম্| পিটকাং মাষমুদ্গাভাম্.......................................||১৫||

পিত্তরক্তজাং মাষমুদ্গসদৃশাং পিটকাং নাম্নোত্তমাং বিদ্যাত্| (উত্তপামিতি পাঠঃ| পিত্তরক্তকারণজনিতাং সংস্থানমানাভ্যাং মাষেণ মুদ্গেন বা তুল্যাং পিটকামুত্তমাখ্যং ক্ষুদ্ররোগং বিদ্যাত্)|| ১৫||

Adhikarana puShkarikA (16) · Śloka 16

............................পিটকা পিটকাচিতা| কর্ণিকা পুষ্করস্যেব জ্ঞেযা পুষ্করিকেতি সা||১৬||

পুষ্করস্য পদ্মস্য কর্ণিকেব যা পিটকা অন্যাভির্বহ্নীভিঃ পিটকাভিরাচিতা সা নাম্না পুষ্করিকেতি জ্ঞেযা| (পিত্তরক্তাভ্যামেব পদ্মকর্ণিকা তুল্যা তথা পিটকৈরাচিতা স্বযমপ্যণুভিঃ পিটকাভির্ব্যাপ্তেত্যর্থঃ)|| ১৬||

Adhikarana saMvyUDhapiTakA (17) · Śloka 17

পাণিভ্যাং ভৃশসংব্যূঢে সংব্যূঢপিটকা ভবেত্||১৭||

সংব্যূঢখ্যে রাগে মেঢ্রে ভৃশসংব্যূঢে বিমর্দিতে পিটকা ভবেত্| (হস্তাভ্যামতিশযেন সংব্যূঢে সংবাহিতে মর্দিত ইতি যাবত্ মেঢ্র ইত্যর্থাত্| সংব্যূঢপিটকা তত্সংজ্ঞো গুহ্যরোগো ভবেত্| অত্রাপি পিত্তরক্তাভ্যামিত্যূহ্যম্)|| ১৭||

Adhikarana mRuditam (18) · Śloka 18

মৃদিতং মৃদিতং বস্তু সংরব্ধং বাতকোপতঃ||১৮||

বস্তু মেঢ্রাখ্যং মৃদিতং সদ্বাতকোপাত্ সংরব্ধং ভবতি স নাম্না মৃদিতম্| (হর্ষণার্থং হস্তাভ্যাং মর্দিতং যদ্বস্তু মেঢ্রাখ্যং তদ্বাতকোপতঃ মর্দনস্যৈবাতিযোগাত্ কারণান্তরাদ্বা কুপিতাদ্বাতাত্সংরব্ধং হৃষ্টমেব সদা বর্ততে চেন্মৃদিতং মৃদিতাখ্যো গুহ্যরোগঃ|| ১৮||

Adhikarana aShThIlikA (19) · Śloka 19

বিষমা কঠিনা ভুগ্না বাযুনাষ্ঠীলিকা স্মৃতা||১৯||

যা বিষমত্বাদিগুণা পিটকা বাযুনা ভবতি সা নাম্নাঽষ্ঠীলিকা স্মৃতা| (কুপিতেন বাযুনা বিষমা ক্বচিন্নিম্না ক্বচিদুন্নতা কঠিনা প্রাযেণ কাঠিন্যুক্তা ভুগ্না কুটিলাকারা স্ত্রীলিঙ্গ সামর্থ্যাত্ পিট-কেত্যূহ্যং ইযমষ্ঠীলিকাখ্যো গুহ্যরোগঃ|| ১৯||

Adhikarana nivRuttam (20) · Śloka 20

বিমর্দনাদিদুষ্টেন বাযুনা চর্ম মেঢ্রজম্| নিবর্ত্ততে সরুগ্দাহং ক্বচিত্পাকঞ্চ গচ্ছতি| পিণ্ডিতং কুথিতং চর্ম তত্প্রলম্বমধোমণেঃ| নিবৃত্তসংজ্ঞং সকফং কণ্ডূকাঠিন্যবত্তু তত্||২০||

বিমর্দনাদিনা দুষ্টেন বাযুনা মেঢ্রজং চর্ম সরুগ্দাহং সন্নিবর্ততে পরাবৃত্য তিষ্ঠতি| ক্বচিত্তু পাকমপি গচ্ছতি| ততশ্চর্মপিণ্ডিতং সঙ্কুচিতং কুথিতং ক্লিন্নং মণের্মেঢ্রাগ্রভাগস্যাধঃ প্রলম্বং ভবতি তস্য নিবৃত্তমিতি সংজ্ঞা| তচ্চ নিবৃত্তং কফসংযোগাত্ কণ্ডূকাঠিন্যবচ্চ ভবতি ন তু সর্বত্র| (বিমর্দনাদ্ধি দুষ্টেনেতি পাঠঃ| পিণ্ডিতং গ্রথিতমিতি চ| বিমর্দনাদ্বিবিধান্মর্দনাত্ দুষ্টেন বাযুনা মেঢ্রজং চর্ম মেঢ্রস্য ত্বক্ নিবর্ততে পরাবৃত্য তিষ্ঠতি| হি প্রসিদ্ধৌ| ক্বচিত্ কেষুচিত্ পুরুষেষু দোষভেদবশাত্ সরুগ্দাহং রুজযা ঊষ্মাতিশযেন চ যুক্তং সত্পাকং গচ্ছতি চ| তত্তথাভূতং চর্মপিণ্ডিতং গ্রথিতং পিণ্ডাকারতযা গ্রন্থিভাবমাপন্নং মণের্মেঢ্রাগ্রভাগস্যাধঃপ্রলম্বং লম্বমানং নিবৃত্তসংজ্ঞং নিবৃত্তাখ্যো রোগঃ| সকফং কফসম্বদ্ধং তত্তু নিবৃত্তং কণ্ড্বা কাঠিন্যেন চ যুক্তং ভবতি)|| ২০||

Adhikarana avapATikA (21) · Śloka 21

দারূঢং স্ফুটিতং চর্ম নির্দিষ্টমবপাটিকা||২১||

মেঢ্রভবং চর্ম দুষ্টং কৃত্বোঢং মর্দিতং স্ফুটিতং সদবপাটিকেতি নাম্না নির্দিষ্টম্| (দুরুঢং দুষ্টং কৃত্বোঢং অযথাবত্ গৃহীতমর্দিতমিত্যর্থঃ| অত এব স্ফুটিতং ভিন্নং যচ্চর্মত্বক্ তদবপাটিকা তত্সংজ্ঞো গুহ্যরোগঃ)|| ২১||

Adhikarana niruddhamaNiH (22) · Śloka 22

বাতেন দূষিতং চর্ম মণৌ সক্তং রুণদ্ধি চেত্| স্রোতো মূত্রং ততোঽভ্যেতি মন্দধারমবেদনম্| মণের্বিকাসরোধশ্চ স নিরুদ্ধমণির্গদঃ||২২||

বাতেন দূষিতং চর্ম মেঢ্রমণৌ সক্তং শ্লিষ্টং যদি মেঢ্রস্রোতোরুণাদ্ধি ততো মূত্রং মন্দধারমবেদনং চাভ্যেতি মণেশ্চ হর্ষণে বিকাসরোধো ভবতি স গদো নাম্না নিরুদ্ধমণিঃ| (বাতেন কৃতদূষণং চর্ম মণৌ লিঙ্গাগ্রে সক্তং সংশ্লিষ্টং স্রোতো মূত্রমার্গং রুণদ্ধি যদি ততস্তস্মাদ্ধেতোঃ মূত্রঃ মন্দধারং স্রোতোরোধাদন্তরান্তরা বিচ্ছিন্নং অবেদনং বেদনারহিতম্| অর্শ্মর্যাদৌ হি নিরোধস্যাভ্যন্তরত্বাদ্বেদনাসম্ভবঃ ইহ তু বাহ্যত্বাত্তদভাবঃ| অভ্যেতি নির্গচ্ছতি| মণেঃ কর্ণিকাযাস্ত্বক্পরিবর্তনাশক্যতযা বিকাসযিতুমশক্যত্বঞ্চ স্যাত্| য এবং বিধঃ স গদো নিরুদ্ধমণিসংজ্ঞো গুহ্যরোগঃ)|| ২২||

Adhikarana grathitam (23) · Śloka 23

লিঙ্গং শূকৈরিবাকীর্ণং গ্রথিতাখ্যং কফোদ্ভবম্||২৩||

কফেন হেতুনা লিঙ্গং মেঢ্রমন্তঃ শূকৈঃ কিংশারুভিরিবাবৃতং ভবতি তস্য গ্রথিত ইত্যাখ্যা| (শূকাচিতপ্রতীতিযুক্তং মেঢ্রং গ্রথিতাখ্যং তচ্চ কফোদ্ভবং কফেন জাযত ইত্যর্থঃ| (কিংশারুর্ধান্যশূকম্)|| ২৩||

Adhikarana sparshahAniH (24) · Śloka 24

শূকদূষিতরক্তোত্থা স্পর্শহানিস্তদাহ্বযা||২৪||

শূকেন দূষিতং যন্মেঢ্রে রক্তং তদুত্থা মেঢ্রে স্পর্শস্য হানিরচেতনত্বং ভবতি| তত্তদাহ্বযং নাম্না স্পর্শহানিঃ| (লিঙ্গবৃদ্ধ্যর্থং প্রলিপ্ত শূকদূষিতাদ্রক্তাদুত্পন্না স্পর্শহানিঃ স্বাপপ্রযুক্তং স্পর্শাজ্ঞানং তদাহ্বযো স্পর্শহান্যাখ্যো রোগঃ|| ২৪||

Adhikarana shataponakam (25) · Śloka 25

ছিদ্রৈরণুমুখৈর্যত্তু মেহনং সর্বতশ্চিতম্| বাতশোণিতকোপেন তে বিদ্যাচ্ছতপোনকম্||২৫||

যত্তু মেহনং মেঢ্রং সর্বত্র অণুমুখৈঃ সূক্ষ্মাস্যৈশ্ছিদ্রৈশ্চিতং বাতশোণিতকোপেন হেতুনা ভবতি তং নাম্না শতপোনকং বিদ্যাত্| (যত্তু লিঙ্গং বাতরক্তযোঃ কোপাদণুমুখৈঃ সূক্ষ্মাস্যৈর্মুখস্যাণুত্বোক্ত্যা মূলস্য স্থূলত্বমপি ব্যক্তিতম্| অত্র এব হি তেভ্যো মূত্রাদিপরিস্রুতিঃ| ছিদ্রৈঃ সূষিরৈঃ সর্বতশ্চিতং ব্যাপ্তং তং শতপোনকাখ্যং বিদ্যাত্| ভগন্দরোক্তশতপোনকবত্ বহুচ্ছিদ্রত্বাত্)|| ২৫||

Adhikarana tvakpAkaH (26) · Śloka 26

পিত্তাসৃগ্ভ্যাং ত্বচঃ পাকস্ত্বক্পাকো জ্বরদাহবান্||২৬||

পিত্তাসৃগ্ভ্যাং হেতুভ্যাং জ্বরদাহবান্ যস্ত্বচঃ পাকঃ স নাম্না ত্বক্পাকঃ| (পিত্তেনাসৃজা চ হেতুনা জ্বরদাহবান্ জ্বরেণ দাহেন চ যুক্তো মেঢ্রা ত্বচঃ পাকো ত্বক্পাকাখ্যো গুহ্যরোগঃ)|| ২৬||

Adhikarana mAMsapAkaH (27) · Śloka 27

মাংসপাকঃ সর্বজঃ সর্ববেদনো মাংসশাতনঃ||২৭||

সর্বজঃ সন্নিপাতজো মাংসপাকঃ সর্বাভির্বেদনাভির্যুক্তো মাংসশাতনো ভবতি| (সর্বজঃ সন্নিপাতজঃ সর্ববেদনঃ ছেদভেদতোদস্ফুরণব্যাসব্যধস্রংসস্বাপাদ্যখিলবেদনান্বিতঃ মাংসশাতনঃ মাংসং পক্ত্বা মেঢ্রাদণুশঃ পাতযন্ মাংসপাকঃ মাংসপাকাখ্যো রোগঃ)||২৭||

Adhikarana asRugarbudam (28) · Śloka 28

সরাগৈরসিতৈঃ স্ফোটৈর্বেদনাভিশ্চ পীডিতম্| মেহনং বেদনা চোগ্রা তং বিদ্যাদসৃগর্বুদম্||২৮||

সরাগত্বাদিযুক্তৈঃ স্ফোটৈস্তদ্বিধাভিশ্চ সূক্ষ্মাভিঃ পিটকাভির্যত্র মেহনং পীডিতং ভবত্যুগ্রা চ বেদনা তস্য রোগস্যাসৃগর্বুদমিতি নাম বিদ্যাত্| (মেঢ্রং সরাগৈরীষদ্রক্তবর্ণৈরসিতৈঃ কৃষ্ণবর্ণৈর্বা স্ফোটৈরথাত্তাদৃশীভিরেব পিটকাভিশ্চ পীডিতং ব্যাপ্তং তথা উগ্রা অত্যর্থমসহনীযা বেদনা চ স্যাদ্য এবংবিধো রোগস্তমসৃগর্বুদং বিদ্যাত্)||২৮||

Adhikarana mAMsArbudaM vidradhishca (29) · Śloka 29

মাংসার্বুদং প্রাগুদিতং বিদ্রধিশ্চ ত্রিদোষজঃ||২৯||

গুহ্যে তু যন্মাংসার্বুদং তত্ লক্ষণৈঃ প্রাক্ গ্রন্থ্যাদ্যধ্যায উদিতম্| গুহ্যে চ ত্রিভির্দোষৈর্বিদ্রধির্ভবতি| (অর্বুদানাং মধ্যে মাংসার্বুদং বিদ্রধীনাং মধ্যে সন্নিপাতজো বিদ্রধিশ্চাত্রাপি ভবতঃ| তৌ চ স্বস্ব নিদানেন বোদ্ধব্যাবিত্যর্থঃ)|| ২৯||

Adhikarana tilakAlakAH (30) · Śloka 30

কৃষ্ণানি ভূত্বা মাংসানি বিশীর্যন্তে সমন্ততঃ| পক্বানি সন্নিপাতেন তান্ বিদ্যাত্তিলকালকান্||৩০||

সন্নিপাতেন হেতুনা গুহ্যে পক্বানি মাংসানি কৃষ্ণানি ভুত্বা সমন্তাদ্বিশীর্যন্তে তাংস্তিলকালকান্ বিদ্যাত্| (সন্নিপাতকোপেন পক্বানি মেঢ্রমাংসানি কৃষ্ণানি কৃষ্ণবর্ণানি ভূত্বা সমন্ততঃ আবস্তিপর্যন্তং বিশীর্যন্তে শকলীভূয নিপতন্তি বহুবচনং শকলাপেক্ষযা| য এবংবিধাস্তান্ তিলকালকসংজ্ঞান্ জানীযাত্)| ইত্যপদংশার্শঃসর্ষপিকাঽবমন্থকুম্ভীকালজ্যুত্তমাপুষ্করিকাসংব্যূঢামৃদিতাঽষ্ঠীলিকা- নিবৃত্তাঽবপাটিকানিরুদ্ধমণিগ্রথিতস্পর্শহানিশতপোনকত্বক্পাকমাংসপাকাঽসৃগর্বুদ- মাংসার্বুদবিদ্রধিতিলকালকাখ্যাস্রযোবিংশতিঃ পুংগুহ্যরোগাঃ উক্তাঃ|| ৩০||

Adhikarana sAdhyAsAdhyatA (31) · Śloka 31

মাংসোত্থমর্বুদং পাকং বিদ্রধিং তিলকালকান্| চতুরো বর্জযেদেষাং শেষান্ শীঘ্রমুপাচরেত্||৩১||

এষাং চ মধ্যান্মাংসোত্থমর্বুদং মাংসোত্থমেব চ পাকং বিদ্রধিং তিলকালকাংশ্চেতি চতুরো বর্জযেত্ ন চিকিত্সেত্| শেষাংস্তু শীঘ্রমেবোপচরেত্| (অপদংশানাং সাধ্যাসাধ্যবিভাগস্যোক্তত্বাদেষামনন্তরোক্তানামর্শঃপ্রভৃতীনাং মধ্যে মাংসোত্থমর্বুদং মাংসার্বুদং পাকং মাংসপাকং বিদ্রধিং তিলকালকানিতি চতুরঃ বর্জযেত্| উদ্দেশত এবৈষাং চতুষ্ট্বে সিদ্ধেঽপি চতুরৈতি চতুর ইতি পুনরুক্তিঃ সুখনিশ্চযার্থা বহুবচনোক্তানাং তিলকালকানাং বহুত্বশঙ্কানিরাসার্থং চ| শেষানর্শঃ সর্ষপিকাদীন্ শীঘ্রমাশ্বেবোপাচরেত্ তেষামপি কালাতিপাতে মহান প্রত্যবাযঃ স্যাদিতি ভাবঃ)|| ৩১||

Adhikarana strIguhyarogANAM hetuH (yonivyApadaH) (32) · Śloka 32

বিংশতির্ব্যাপদো যোনের্জাযন্তে দুষ্টভোজনাত্| বিষমস্থাঙ্গশযনভৃশমৈথুনসেবনৈঃ| দুষ্টার্তবাদপদ্রব্যৈর্বীজদোষেণ দৈবতঃ||৩২||

এবং পুংগুহ্যরোগানুক্ত্বা স্ত্রীগুহ্যরোগানাহ-যোনেঃ স্ত্রীগুহ্যস্য দুষ্টভোজনাদিহেতোর্বিংশতির্ব্যাপদো জাযন্তে| বিষমস্থৈরঙ্গৈঃ শযনং তথোক্তম্| দুষ্টার্তবেন স্রবতা| অপদ্রব্যাণি লোহাদিমযানি দাক্ষিণাত্যাসু প্রসিদ্ধানি| বীজদোষঃ স্ত্রিযো জন্মকালে যোন্যারম্ভকস্য বীজস্যোপহতত্বম্| দৈবমন্যজন্মকৃতং কর্ম| ইতি যোনিব্যাপদা মবিশেষেণ হেতুরুক্তঃ| (দুষ্টভোজনাত্ পর্যুষিতাদ্যন্যভোজনাত্| উক্তং চ- ভবেত্ পর্যুষিতং পূতিক্লিন্নমুষ্ণীকৃতং পুনঃ| দুষ্টং কৃম্যাদিজুষ্টং চ শোষিতং চান্নমাতপে|| ইতি| বিষমস্থাঙ্গশযনভৃশমৈথুনসেবনৈঃ অযথাবদ্বিন্যস্তৈরঙ্গৈঃ শযনস্য ভৃশমৈথুনস্য চ শীলনৈঃ| দুষ্টার্তবাদ্বাতাদিদূষিতাদৃতুজরক্তাত্| উপদ্রব্যৈরিতি পাঠঃ| উপদ্রব্যৈর্লোহাদিকৃতৈরুপলিঙ্গৈঃ| উপলিঙ্গসুরতং দেশান্তরেষু প্রসিদ্ধম্| উক্তঞ্চ রতিরহস্যে- বিমৃদ্যমানাঃ কৃতকধ্বজেন দ্রবন্তি হৃষ্যন্তি দৃঢপ্রহারৈঃ| স্ত্রীরাজ্যজাঃ কোসলজাশ্চ নার্যঃ প্রচণ্ডকণ্ডূতিভগা ভবন্তি|| ইতি|| বীজদোষেণ যোন্যারম্ভকস্যাকাশাদিকস্য বীজস্যোপহতত্বেন দৈবতো জন্মান্তরকৃতপাপফলপরিণামাচ্চ হেতোঃ যোনের্বিংশতির্ব্যাপদো ভবন্তি| ইযতা গ্রন্থজালেন যোনিব্যাপদাং সামান্যকারণমুক্তম্)||৩২||

Adhikarana vAtikI yonivyApad (33) · Śloka 33

যোনৌ ক্রুদ্ধোঽনিলঃ কুর্যাদ্রুক্তোদাযামসুপ্ততাঃ| পিপীলিকাসৃপ্তিমিব স্তম্ভং কর্কশতাং স্বনম্| ফেনিলারুণকৃষ্ণাল্পতনুরূক্ষার্ত্তবস্রুতিম্| ভ্রংশং বঙ্ক্ষণপার্শ্বাদৌ ব্যথাং গুল্মং ক্রমেণ চ| তাংস্তাংশ্চ স্বান্ গদান্ ব্যাপদ্বাতিকী নাম সা স্মৃতা||৩৩||

যোনাবিত্যাদিনা লিঙ্গান্যুচ্যন্তে| যোনৌ ক্রুদ্ধো বাযুঃ রুগাদীন্ কুর্যাত্| ফেনিলেত্যাদ্যার্ত্তববিশেষণং তস্য স্রুত্যা সম্বন্ধঃ| ভ্রংশো যোনিভ্রংশঃ| বঙ্ক্ষণাদৌ ব্যথাং ক্রমেণ গুল্মমপি কুর্যাত্| তাংস্তাংশ্চ স্বান্ বাতজান্ স্তম্ভাদীন্ গদান্| ইযং বাতিকী নাম যোনিব্যাপত্ স্মৃতা| (দুষ্টভোজনাদিনা কুপিতো বাযুর্যোনৌ রুগাদীন্ কুর্যাত্| পিপী-লিকাসৃপ্তিমিব তাসাং সঞ্চরণপ্রতীতিমিত্যর্থঃ| কর্কশতা কাঠিন্যম্| ফেনিলং ফেনযুক্তমরুণবর্ণং কৃষ্ণং কৃষ্ণবর্ণং বা অল্পমবহু তনু স্বচ্ছং রূক্ষমস্নিগ্ধং এবম্ভূতস্যার্ত্তবস্য স্রুতিঃ স্রবণম্| স্রংসমিতি পাঠঃ| স্রংসো বেদনাবিশেষঃ (কলত্তুনোক্ক)| বঙ্ক্ষণপার্শ্বাদৌ ব্যথাং বঙ্ক্ষণ্যোঃ পাড়্শ্বযোশ্চ কটীপৃষ্ঠপরিগ্রহঃ| ক্রমেণ উপেক্ষযা কালাতিপাতাত্ গুল্মং গুল্মাখ্যং রোগং তাংস্তানাযামাক্ষেপকস্তম্ভাদীন্ স্বান্ বাতব্যাধিসম্বন্ধিনো গদাংশ্চ করোতি| যৈবংবিধা সা বাতিকী নাম যোনিব্যাপত্ স্মৃতা)|| ৩৩||

Adhikarana aticaraNA (34) · Śloka 34

সৈবাতিচরণা শোফসংযুক্তাতিব্যবাযতঃ||৩৪||

সৈব বাতিকী অতিব্যবাযাচ্ছোফসংযুক্তা সত্যতিচরণেত্যুচ্যতে| (সা বাতিক্যেব অতিব্যবাযতঃ ভৃষমৈথুনাদ্ধেতোঃ শোফ সংযুক্তা যোনিপ্রদেশে শ্বযথুমতী সঞ্জাতা চেদতিচরণা অতিচরণেতি সংজ্ঞান্তরং লভতে)|| ৩৪||

Adhikarana prAkcaraNA (35) · Śloka 35

মৈথুনাদতিবালাযাঃ পৃষ্ঠজঙ্ঘোরুবঙ্ক্ষণম্| রুজন্ সন্দূষযেদ্যোনিং বাযুঃ প্রাক্চরণেতি সা||৩৫||

অতিবালাযা স্ত্রিযা মৈথুনাদ্বাযুঃ পৃষ্ঠাদিকং রুজন্ যোনিং সন্দূষযেত্| সা ব্যাপন্নাম্না প্রাক্চরণা| (বালাযা অসম্পূর্ণষোডশবযস্কাযা অতিমৈথুনাদনল্পব্যবাযাত্ পৃষ্ঠজঙ্ঘোরুবঙ্ক্ষণং পৃষ্ঠং জঙ্ঘে ঊরু বঙ্ক্ষণৌ চ রুজন্ যোনিং সন্দূষযেত্| রুক্তোদাদিযুক্তাং করোতি সা প্রাক্চরণেতি যোনিব্যাপত্)||৩৫||

Adhikarana udAvRuttA (36) · Śloka 36

বেগোদার্বত্তনাদ্যোনিং প্রপীডযতি মারুতঃ| সা ফেনিলং রজঃকৃচ্ছ্রাদুদাবৃত্তং বিমুঞ্চতি| ইযং ব্যাপদুদাবৃত্তা..........................||৩৬||

বেগোদাবর্ত্তনাদধোবাতাদিবেগধারণনিমিত্তাদূর্ধ্বমুদ্গমাদ্বাযুর্যোনিং প্রপীডযতি সা পীডতা সত্যুদাবৃত্তং বদ্ধং ফেনিলং ফেনযুক্তং রজো রক্তং কৃচ্ছ্রাদ্বিমুঞ্চতি| ইযং ব্যাপন্নম্নাঽপ্যুদাবৃত্তা| (প্রপীডযত্যতিব্যথাং করোতি| সা অনিলপীডিতা যোনিঃ ঋতুকালে প্রাপ্তে রজো রক্তং ফেনিলং ফেনযুক্তং কৃচ্ছ্রাদল্পাল্পমুদাবৃত্তং মধ্যে মধ্যে ঊর্ধ্বমাবর্তমানং বিসৃজতি)|| ৩৬||

Adhikarana jAtaghnI (37) · Śloka 37

.............................জাতঘ্নী তু যদানিলঃ| জাতং জাতং সুতং হন্তি রৌক্ষ্যাদ্দুষ্টার্ত্তবোদ্ভবম্||৩৭||

যদা তু দুষ্টার্ত্তবোদ্ভবং সুতং জাতং তত্কাল এব বাযূ রৌক্ষ্যাদ্ধন্তি তদা জাতঘ্নী নাম ব্যাপদ্ভবতি| (যদা যস্মিন্ কালে বাযূ রৌক্ষ্যাত্ স্নেহক্ষযোদ্ভূতরূক্ষগুণাধিক্যাত্ ক্রুদ্ধো দুষ্টাবর্ত্তবোদ্ভবং দুষ্টশোণিতসম্ভূতং জাতং জাতং সঞ্জাতান্ সর্বানিত্যর্থঃ| জাতশব্দশক্ত্যা জন্মানন্তরত এবেতি চ দ্যোত্যতে| হন্তি মারযতি তদা তু জাতঘ্নী| জাতঘ্নী নাম যোনিব্যাপত্| দুষ্টশোণিতস্যাপি গর্ভাধানসামর্থ্যমস্তীত্যুক্তং শারীরে)|| ৩৭||

Adhikarana antarmukhI (38) · Śloka 38

অত্যাশিতাযা বিষমং স্থিতাযাঃ সুরতে মরুত্| অন্নেনোত্পীডিতো যোনেঃ স্থিতঃ স্রোতসি বক্রযেত্| সস্থিমাংসং মুখং তীব্ররুজমন্তর্মুখীতি সা||৩৮||

যা তু স্ত্রী অত্যাশিতা সতী সুরতে পুংযোগে বিষমং কৃত্বা তিষ্ঠতি তদা তস্যা মরুদ্বাযুরন্নেনোত্পীডিতো যোনেঃ স্রোতসি স্থিতঃ সন্ তস্যা মুখং তীব্ররুজং সাস্থিমাংসং বক্রযেত্ সা ব্যাপন্নাম্নাঽন্তর্মুখী| (অত্যাশিতাযা অতিভুক্তাযাঃ সুরতে করণবৈচিত্র্যাদঙ্গং বিষমং কৃত্বা স্থিতাযা নার্যাঃ বাযূরন্নেন নিরবকাশং নিষ্পীডিতো বিষমস্থিত্যা সাবকাশে যোনিস্রোতস্যেব স্থিতস্তস্যা মুখমস্থ্না মাংসেন চ সহ তীব্ররুজমত্যর্থং বেদনং বক্রেযেত্| সা অন্তর্মুখীতি নাম যোনিব্যাপত্)|| ৩৮||

Adhikarana sUcImukhI (39) · Śloka 39

বাতলাহারসেবিন্যা জনন্যাং কুপিতোঽনিলঃ| স্ত্রিযা যোনিমণুদ্বারাং কুর্যাত্ সূচীমুখীতি সা||৩৯||

জনন্যাং মাতরি বাতলাহারসেবিন্যামনিলঃ কুপিতো যোষাযা যোনিং সংবৃতমুখীং কুর্যাত্ সা ব্যাপন্নাম্না সূচীমুখী|| ৩৯||

Adhikarana yonishoShaH (40) · Śloka 40

বেগরোধাদৃতৌ বাযুর্দুষ্টো বিণ্মূত্রসংগ্রহম্| করোতি যোনিশোষঞ্চ শুষ্কাখ্যা সাতিবেদনা||৪০||

ঋতুকালে বেগরোধাদ্দৃষ্টো বাযুর্বিণ্মূত্রসংগ্রহং যোনিশোষং চ করোতি| সা ব্যাপচ্ছুষ্কাখ্যা| সা চাতিবেদনা ভবতি| (ঋতুকালে বেগরোধাত্ অধোবাতাদিবেগধারণাত্ দুষ্টঃ ক্রুদ্ধো বাযুর্বিণ্মূত্রসংগ্রহং মলমূত্রযোর্নিরোধং যোনিশোষং যোনিদ্বারে দ্রবাভাবং চ করোতি| অতিবেদনা অধিকবেদনাযুক্তা যা এবংবিধা সা শুষ্কাখ্যা শুষ্কা সংজ্ঞা যোনিব্যাপত্)|| ৪০||

Adhikarana vAminI (41) · Śloka 41

ষডহাত্ সপ্তরাত্রাদ্বা শুক্রং গর্ভাশযান্মরুত্| বমেত্সরুঙ্নীরুজো বা যস্যাং সা বামিনী মতা||৪১||

যস্যাং ব্যাপদি নিষিক্তং শুক্রং গর্ভাশযান্মরুত্ সরুজো বা নীরুজো বা ষডহাত্ সপ্তরাত্রাদ্বা বহিঃ ক্ষিপেত্ সা ব্যাপদ্বামিনী মতা| (যস্যাং ব্যাপদি বাযুঃ ষডহাত্ ষণ্ণামহ্নাং সমাহারাত্ হেত্বর্থং পঞ্চাম্যাঃ করণার্থে পরিণামাত্ ষড্ভিরহোভিরিত্যর্থঃ| সপ্তাহাত্ সপ্তভিরহোভির্বা| অত্র সপ্তাহশব্দস্য মর্যাদাত্বেনাভিবিধিত্বেন চেষ্টত্বাদত্র ষদহাত্ সপ্তরাত্রাদ্বেতি পক্ষদ্বযং পরিগৃহীতম্| সরুক্ রুজা সহিতঃ নীরুজো রুজা রহিতঃ বাশব্দো বিকল্পে ক্বচিত্ সরুজঃ ক্বচিন্নীরুজশ্চেত্যর্থঃ| শুক্রং পুংসা নিষিক্তং গর্ভাশযাত্ গর্ভকোষ্ঠং প্রবিষ্টমপীতি ভাবঃ| বমেত বহির্নিরস্যেত্| নুদেদিতি বক্তব্যে বমেদিত্যুক্তির্বামিনীশব্দস্য নিরুক্তিদ্যোতনায| এবংবিধা সা ব্যাপদ্বামিনীসংজ্ঞা)|| ৪১||

Adhikarana ShaNDA (42) · Śloka 42

যোনৌ বাতোপতপ্তাযাং স্ত্রীগর্ভে বীজদোষতঃ| নৃদ্বেষিণ্যস্তনী চ স্যাত্ ষণ্ডসংজ্ঞানুপক্রমা||৪২||

স্ত্র্যাখ্যগর্ভে বীজদোষাদ্বাতোপতপ্তাযাং যোনৌ পুরুষদ্বেষিণী স্তনরহিতা চ স্ত্রী স্যাত্ সা ব্যাপত্ ষণ্ডসংজ্ঞানুপক্রমা ত্যাজ্যা| (যোনৌ কুতশ্চিত্ কারণাত্ ক্রুদ্ধেন বাযুনা পীডিতাযাং সত্যাং মাতুরিত্যর্থাত্| গর্ভে গর্ভাধানসমযে বীজদোষতঃ আর্ত্তবদুষ্ট্যা স্ত্রী জাযমানা পুত্রী নৃদ্বেষিণী পুংসম্ভোগবিরক্তা অস্তনী যৌবনেঽত্যল্পস্তনী চ স্যাত্ সা ব্যাপত্ষণ্ডাখ্যা অনুপক্রমা অসাধ্যত্বাচ্চিকিত্সারহিতা চ )|| ৪২||

Adhikarana mahAyoniH (43) · Śloka 43

দুষ্টো বিষ্টভ্য যোন্যাস্যং গর্ভকোষ্ঠং চ মারুতঃ| কুরুতে বিবৃতাং স্রস্তাং বাতিকীমিব দুঃখিতাম্| উত্সন্নমাংসাং তামাহুর্মহাযোনিং মহারুজম্||৪৩||

দুষ্টো বাযুর্যোন্যাস্যং গর্ভকোষ্ঠঞ্চা বিষ্টভ্য যোনিং বিবৃতাং স্থানাচ্চ স্রস্তাং বাতিক্যাখ্যব্যাপদমিব চ দুঃখিতাং ব্যথিতামুত্সন্নমাংসাং মহারুজঞ্চ কুরুতে তাং নাম্না মহাযোনিমাহুঃ| (যথাস্বৈঃ গুহ্যরোগকারণাভূতৈর্দূষণৈর্দুষ্টো বাযুর্যোনিমুখং গর্ভাশযঞ্চ বিষ্টভ্য স্তম্ভযিত্বা বিবৃতাং ন কদাচিদপি সংবরণযুক্তাং স্রস্তাং স্থানাচ্চলিতাং বহির্নিস্সৃতামিত্যর্থঃ| বাতিকীমিব বাতিক্যাখ্যাং ব্যাপদমিব দুঃখিতাং রুক্তোদাযামাদিবিবিধোপদ্রবযুক্তামিত্যর্থঃ| উত্সন্নমাংসাং উদ্বান্তমুখত্বাদুত্সন্নমাংসাং মহারুজাং অত্যর্থবেদনাযুক্তাং কুরুতে যোনিরিতি মহাযোনিশব্দসান্নিধ্যাহার্যং তাং ব্যাপদং মহযোনিং মহাযোন্যাখ্যামাহুঃ)|| ৪৩||

Adhikarana paittikI yonivyApat (44) · Śloka 44

যথাস্বৈর্দূষণৈর্দুষ্টং পিত্তং যোনিসমাশ্রিতম্| করোতি দাহপাকোষা পূতিগন্ধজ্বরান্বিতাম্| ভৃশোষ্ণভূরিকুণপনীলপীতাসিতার্ত্তবাম্| সা ব্যাপত্ পৈত্তিকী...............................||৪৪||

যথাস্বৈর্দূষণৈর্নিদানকথিতৈর্দুষ্টং পিত্তং যোনিমাশ্রিত্য তামেব দাহাদ্যন্বিতাং ভৃশোষ্ণাদিগুণাং চ করোতি সা ব্যাপন্নাম্না পৈত্তিকী| (যথাস্বৈঃ সর্বরোগনিদানোক্তৈঃ কট্বম্লাদিভির্দুষ্টং প্রাপ্তদূষণং যোনিং প্রাপ্তং পিত্তং তাং যোনিং দাহাদ্যন্বিতাং ভৃশোষ্ণাদিগুণযুক্তার্ত্তবাং চ করোতি| দাহঃ সর্বাঙ্গীণঃ দাহঃ| ঊষা প্রাদেশিকা দাহঃ| পূতিগন্ধো দুর্গন্ধঃ| কুণপাড়্ত্তবং রক্তদোষজং প্রাক্ পুত্রকামীযাধ্যায উক্তম্| এবংবিধা ব্যাপত্সা পৈত্তিকী নাম ভবতি)|| ৪৪||

Adhikarana raktayoniH (45) · Śloka 45

...........................রক্তযোন্যাখ্যাসৃগতিস্রুতেঃ||৪৫||

এষৈবাতিরক্তস্রুতেঃ রক্তযোন্যাখ্যা ভবতি| (সা পৈত্তিকী ব্যাপদেবাত্যসৃক্স্রাবাদ্ধেতোঃ রক্তযোনিসংজ্ঞা স্যাত্)|| ৪৫||

Adhikarana shlaiShmikI yonivyApat (46) · Śloka 46

কফোঽভিষ্যন্দিভিঃ ক্রুদ্ধঃ কুর্যাদ্যোনিমবেদনাম্| শীতলাং কণ্ডুলাং পাণ্ডুং পিচ্ছিলাং তদ্বিধস্রুতিম্| সা ব্যাপচ্ছ্লৈষ্মিকী..............................||৪৬||

অভিষ্যন্দিভিঃ স্রোতোমালিন্যকরৈরাহারৈঃ কফঃ ক্রুদ্ধো বেদনারহিতাং শীতলাদিগুণাং চ যোনিং কুর্যাত্| তদ্বিধস্রুতিং শীতলাদি গুণস্রুতিং সা ব্যাপন্নাম্না শ্লৈষ্মিকী| (যোনিং অবেদনামীষদ্বেদনাযুক্তাং শীতলাং শীতস্পর্শাং কণ্ডূলাং কণ্ডুযুক্তাং পাণ্ডু পিচ্ছিলাং পাণ্ডুরবর্ণাং পৈচ্ছিল্যযুক্তাং চ তদ্বিধস্রুতিং পাণ্ডুপিচ্ছিলাম্বু স্রবণযুক্তাং চ করোতি)|| ৪৬||

Adhikarana lohitakShayAkhyA (47) · Śloka 47

..................বাতপিত্তাভ্যাং ক্ষীযতে রজঃ| সদাহকাড়্শ্যবৈবর্ণ্য যস্যাং সা লোহিতক্ষযা||৪৭||

যস্যাং ব্যাপদি বাতপিত্তাভ্যাং রজঃ ক্ষীযতে দাহাদিকৃচ্চ ভবতি সা ব্যাপন্নাম্না লোহিতক্ষযা| (যস্যাং যোনিব্যাপদ্যনিলপিত্তাভ্যাং কারণাভ্যাং রজো রক্তং দাহাদ্যন্বিতং ক্ষীযতে ক্ষযং যাতি সা লোহিতক্ষ্যাখ্যা ব্যাপত্)|| ৪৭||

Adhikarana pariplutA (48) · Śloka 48

পিত্তলাযা নৃসংবাসে ক্ষবথূদ্গারধারণাত্| পিত্তযুক্তেন মরুতা যোনির্ভবতি দূষিতা| শূনা স্পর্শাসহা সার্ত্তির্নীলপীতাস্রবাহিনী| বস্তিকুক্ষিগুরুত্বাতিসারারোচককারিণী| শ্রোণিবঙ্ক্ষণরুক্তোদজ্বরকৃত্সা পরিপ্লুতা||৪৮||

পিত্তলাযাঃ পিত্তপ্রকৃতেঃ স্ত্রিযা নৃসংবাসে ক্ষবথোরুদ্গারস্য চ ধারণাত্ পিত্তযুক্তেন বাযুনা দূষিতা যোনিঃ শূনাদিগুণা ভবতি সা ব্যাপন্নাম্না পরিপ্লুতা| (পিত্তলাযাঃ প্রভূতপিত্তাযাঃ পিত্তপ্রকৃতেরিত্যর্থঃ| নৃসংবাসে পুংসঙ্গতৌ ক্ষবথূদ্গারযোর্ধারণাত্ পিত্তযুক্তেন মরুতা দূষিতা যোনিঃ শূনা শোফযুক্তা স্পর্শাসহা স্পর্শং কিঞ্চিদপ্যসহমানা সার্ত্তিঃ রুজা যুক্তা নীলপীতাস্রবাহিনী নীলবর্ণং পীতবর্ণং বা অস্রং রক্তং বহমানা তথা বস্তৈঃ কুক্ষেশ্চ গুরুত্বমতিসারমরোচকং চ কুর্বাণা শ্রোণ্যাং বঙ্ক্ষণ্যোঃ রুক্তোদৌ চ জ্বরং চ কুর্বতী ভবতি সা ব্যাপত্ পরিপ্লুতাখ্যা)|| ৪৮||

Adhikarana upaplutA (49) · Śloka 49

বাতশ্লেষ্মামযব্যাপ্তা শ্বেতপিচ্ছিলবাহিনী| উপপ্লুতা স্মৃতা যোনিঃ.......................||৪৯||

বাতশ্লেষ্মলৈরামযৈর্ব্যাপ্তা যোনিঃ শ্বেতং পিচ্ছিলং চ বহতি সা নাম্নোঽপপ্লুতা স্মৃতা| (বাতনিমিত্তৈঃ শ্লেষ্মনিমিত্তৈশ্চামযৈর্ব্যাপ্তা পরিবৃতা শ্বেতপিচ্ছিলবাহিনী শ্বেতবর্ণং পৈচ্ছিল্যযুক্তং চাস্রং বহমানা যোনিঃ যোনিব্যাপত্ উপপ্লুতাখ্যা স্মৃতা)|| ৪৯||

Adhikarana viplutA (50) · Śloka 50

............................বিপ্লুতাখ্যা ত্বধাবনাত্| সঞ্জাতজন্তুঃ কণ্ডূলা কণ্ড্বা চাতিরতিপ্রিযা||৫০||

যা তু যোনিরধাবনাদপ্রক্ষালনাদ্ধেতোঃ সঞ্জাতজন্তুঃ কণ্ডূলা চ ভবতি কণ্ড্বা চাতিরতিপ্রিযা অতিব্যবাযপ্রিযা চ ভবতি সা নাম্না বিপ্লুতা| (বিপ্লুতাখ্যা তু যোনিঃ তুশব্দঃ পরিপ্লুতাতো বিশেষদ্যোতকঃ| অধাবনাদন্তর্মলাপরিশোধনাত্ সঞ্জাতজন্তুঃ যোন্যন্তর্গতরক্তজক্রিমিযুতত্বাদাগন্তু ক্রিমিসম্ভবে ত্বতিরতি প্রিযেত্যস্যানুপপত্তেশ্চান্তঃপ্রবৃদ্ধনৈসর্গিকক্রিমিরিত্যর্থঃ| রতিরহস্যে চৈতত্স্পষ্টমুক্তম্- রক্তজাঃ ক্রিমযঃ সূক্ষ্মা মৃদুমধ্যোগ্রশক্তযঃ| স্মরসদ্মনি কণ্ডূতিং জনযন্তি যথাবলম্|| ধ্বজদণ্ডাভিঘাতেন কণ্ডূত্যপনযাদতঃ| রক্ষণাচ্চ সুখম্........................|| ইতি| কণ্ডূলা অমর্ষণীকণ্ডূযুক্তা| কণ্ড্বা কণ্ডূতিহেতোঃ| চশব্দঃ সঞ্জাতজন্তুত্বাত্ কণ্ডূঃ কণ্ডুত্যা রত্যভিনিবেশশ্চেতিহেতুপারম্পর্যদ্যোতনার্থঃ| অতিরতিপ্রিযা অতীব সুরতেচ্ছুঃ)|| ৫০||

Adhikarana karNinI (51) · Śloka 51

অকালবাহনাদ্বাযুঃ শ্লেষ্মরক্তবিমূর্চ্ছিতঃ| কর্ণিকাং জনযেদ্যোনৌ রজোমার্গনিরোধিনীম্| সা কর্ণিনী...............................||৫১||

অকালবাহনাদপ্রাপ্তাম্ব্বীরণাদ্বাযুঃ শ্লেষ্মরক্তাভ্যাং মিশ্রিতো যোনৌ রজোমার্গনিরোধিনীং কর্ণিকাং জনযেত্| সা ব্যাপন্নাম্না কর্ণিনী| (বাযুরকালবাহনাদ্বেগোদীরণাত্| কাশ্চিদ্রতান্তে কামাম্বু ছলাদ্বঞ্চযিতুং প্রিযান্| মূত্রং সৃজন্ত্যকালে যা মদনাম্ববেব তত্ দ্বযম্| অকালবাহনস্যার্থ ইতি ব্যাচষ্টসারকৃত্| দ্বেধাঽপ্যনিচ্ছাসুরতে দ্রুতিভাবঃ প্রতীযতে| শ্লেষ্মরক্তবিমূর্চ্ছিতঃ শ্লেষ্ম রক্তাভ্যাং বিমূর্চ্ছিতো বর্দ্ধিতঃ শ্লেষ্মসম্বন্ধাত্ ঘনীভূয দুর্মাংস প্রাযতাং প্রাপ্তস্য রক্তস্য বাযুনোদীরণে কর্ণিন্যাঃ সম্প্রাপ্তিরিতি ভাবঃ| যোনৌ গর্ভাশযদ্বারমুখে রজোমার্গনিরোধিনীং গর্ভাশযদ্বার সংবৃতিকরীং| অত এব নিষিক্তস্য শুক্রস্যাপ্রতিগ্রহাদ্গর্ভো ন জাযত ইতি ভাবঃ| কর্ণিকাং পদ্মকর্ণিকাতুল্যং মাংসাঙ্কুরমিত্যর্থঃ| জনযেদাবিষ্কুর্যাত্| সা কর্ণিনীসংজ্ঞা ব্যাপত্)|| ৫১||

Adhikarana sAnnipAtikI yonivyApat (52) · Śloka 52

...........................ত্রিভির্দোষৈর্যোনিগর্ভাশযাশ্রিতৈঃ| যথাস্বোপদ্রবকরৈর্ব্যাপত্ সা সান্নিপাতিকী||৫২||

ত্রিভির্দোষৈর্যোনৌ গর্ভাশযে বাশ্রিতৈর্যথাস্বোপদ্রবকরৈঃ সূত্রোক্তবাতাদ্যুপদ্রব্যকরৈর্যা ব্যাপত্ সা নাম্না সান্নিপাতিকী| (যোনিং গর্ভাশযং চাশ্রিত্য রুক্তোদদাহপাকশৈত্যকণ্ড্বাদিস্বস্বোপদ্রবং কুর্বদ্ভির্বাতাদিভির্যা ব্যাপত্ সা সান্নিপাতিকী সংজ্ঞা)|| ৫২||

Adhikarana yonivyApadupadravAH (53-38) · Śloka 38

ইতি যোনিগদা নারী যৈঃ শুক্রং ন প্রতীচ্ছতি| ততো গর্ভং ন গৃহ্ণাতি রোগাংশ্চাপ্নোতি দারুণান্| অসৃগ্দরার্শোগুল্মাদীনাবাধাংশ্চানিলাদিভিঃ||৫৩|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতা- বষ্টাঙ্গসংগ্রহসংহিতাযামুত্তরতন্ত্রে গুহ্যরোগ- বিজ্ঞানীযো নামাষ্টত্রিংশোঽধ্যাযঃ||৩৮||

ইতি বিংশতির্বাতিক্যতিচরণাপ্রাক্বরণোদাবৃতাজাতঘ্ন্যন্তর্মুখীসূচী -শুষ্কাখ্যা-বামিনী-ষণ্ডা-মহাযোনি-পিত্তযোনি-রক্তযোনি-শ্লৈষ্মিকী-লোহতক্ষযোঽপপ্লুতা-পরিপ্লুতা-বিপ্লুতা-কর্ণিনী-সান্নিপাতিক্যাখ্যাঃ যোনিগদা উক্তাঃ যৈর্গদৈর্নারী নিষিক্তং শুক্রং ন প্রতীচ্ছতি গর্ভাশযেন ন গৃহ্ণাতি শুক্রস্যাগ্রহণাদ্গর্ভং ন গৃহ্ণাতি অসৃগ্দরাদীংশ্চ রোগান্ দারুণানতি- কৃচ্ছ্রানাপ্নোতিযনিলদিভিশ্চ দোষৈর্দারুণানাবাধান্ ব্যাধীন্ স্তম্ভশূলাদীনাপ্নোতীতি| (যোনিগদা যোনিব্যাপদঃ ইত্যনেন প্রকারেণোক্তাঃ যৈর্যোনিগতৈর্নারী ব্যাপদ্যমানাস্ত্রী শুক্রং পুংসা নিষিক্তং ন প্রতীচ্ছতি ন প্রতিগৃহ্ণাতি| ততস্তসমাদ্ধেতোঃ গর্ভং ন গৃহ্ণাতি, গর্ভো ন জাযতে| অপত্যার্থমেব যস্যাঃ পরিগ্রহো বিধীযতে তদভাবে তযা কিং ফলমিতি ভাবঃ| কিঞ্চ দারুণানতিকৃচ্ছ্রানসৃগ্দরার্শোগুল্মাদীন্ আদিশব্দেন মূত্রকৃচ্ছ্রাস্থিস্রাবাদযো গৃহ্যন্তে রোগানাপ্নোতি| তথা অনিলাদিভির্বাতপিত্তকফৈঃ কৃতানাবাধান্ অসম্ভাবনীযান্ ব্যাপদন্তরংশ্চ প্রাপ্নোতি)|| ৫৩|| ইতি শ্রীমন্মহামহোপাধ্যাযেন্দুবিরচিতাযা মষ্টাঙ্গসংগ্রহব্যাখ্যাযাং শশিলেখাযা মুত্তরতন্ত্রে অষ্টত্রিংশোঽধ্যাযঃ