43. kīṭaviṣapratiṣēdhaḥ

Adhikarana atha kITaviShapratiShedho nAma tricatvAriMsho~adhyAyaH adhyAyapratij~jA (1) · Śloka 1

অথাতঃ কীটবিষপ্রতিষেধং নামাধ্যাযং ব্যাখ্যাস্যামঃ| ইতি হস্ স্মাহুরাত্রেযাদযো মহর্ষযঃ||১||

জঙ্গমবিষপ্রসঙ্গেন সর্পান্বযানাং কীটানাং চিকিত্সাপ্রদর্শনার্থমধ্যায আরভ্যতে|| ১||

Adhikarana kITasvarUpam (2) · Śloka 2

সর্পাণামেব বিণ্মূত্রশুক্রাণ্ডশবকোথজাঃ| দোষৈর্ব্যস্তৈঃ সমস্তৈশ্চ যুক্তাঃ কীটাশ্চতুর্বিধাঃ||২||

অত্র প্রথমমেব কীটানাং স্বরূপমুচ্যতে| তদবিজ্ঞানে হি চিকিত্সাযাঃ প্রদর্শনস্যাশক্যত্বাত্| সর্পাণামেব বিডাদিষু কীটা জাযন্তে বক্ষ্যমাণেন বাযব্যাগ্নেযসৌম্যসঙ্কীর্ণভেদেন চতুর্বিধাঃ| ক্রমেণ চ প্রথমাস্ত্রযো দোষৈর্বাতাদিভির্ব্যস্তৈর্যুক্তা অন্যাঃ সমস্তৈঃ||২||

Adhikarana vAyavyAH kITAH (3) · Śloka 3

কুম্ভীনসস্তুণ্ডিকেরী শৃঙ্গী শতকুলীরকঃ| উচ্চিটিঙোঽগ্নিনামা চ চিচ্চিটাঙ্গো মযূরকঃ| অহিজোরভ্রকাবর্ত্তশারিকামুখবৈদলাঃ| শরাবকুর্দ্দৌ পরুষশ্চিত্রশীর্ষো হি জারকঃ| অষ্টাদশেতি বাযব্যা: কীটা বাতপ্রকোপনাঃ||৩||

কুম্ভীনসাদযোঽষ্টাদশ কীটা বাযব্যাস্তে চ বাতপ্রকোপনাঃ| শরাবকুর্দ্দোঽভিরাজী পুরুষশ্চিত্রশীর্ষকঃ শতবাহুশ্চ যশ্চাপি রক্তরাজিঃ প্রকীর্ত্তিতঃ| ইতি সুশ্রুতপাঠঃ| ব্যাখ্যা-তানেব চতুষ্প্রকারান্ বাতাদিস্বভাবৈর্নির্দিশন্নাহ| কুম্ভীনস ইত্যাদি| এতে কীটকভেদা নানাদেশীযলোকাদবগন্তব্যাঃ| যতঃ সুরসবীরনন্দিবরাহজেজ্জটগযদাসাদিভিঃ টীকাকারৈর্ন ব্যাখ্যাতাঃ| বাতপ্রকোপনানাং কুম্ভীনসাদীনাং মধ্যে শৃঙ্গিচিচ্চিটিঙ্গশরাবকুর্দচিত্রশীর্ষকান্ বর্জযিত্বা শেষাশ্চতুর্দশ মুখসন্দংশবিষাঃ| ইতি প্রবন্ধসংগ্রহঃ|| ৩||

Adhikarana AgneyAH kITAH (4) · Śloka 4

আগ্নেযাঃ কীটাঃ কৌণ্ডিন্যকঃ কণভকো বরটীপত্রবৃশ্চিকঃ| বিনাসিকা ব্রাহ্মণিকা বিন্দুলো ভ্রমরস্তথা| বাহ্যকী পিচ্চিটঃ কুম্ভীবর্চঃ কীটোঽরিমেদকঃ| দুন্দুভিঃ পদ্মকীটশ্চ মকরঃ শতপাদকঃ| পঞ্চালঃ পাকমত্স্যশ্চ সূক্ষ্মতুণ্ডোঽথ গর্দভিঃ| ক্লীতঃ কৃমিশরারী চ যশ্চাপ্যুত্ক্লেশকঃ স্মৃতঃ| চতুর্বিংশতিরাগ্নেযাঃ কীটাঃ পিত্তবিকারদাঃ||৪||

কৌণ্ডিন্যকাদযশ্চতুর্বিংশতিঃ কীটা আগ্নেযাস্তে চ পিত্তবিকারদাঃ| (পিত্তকোপনানাং মধ্যে কৌণ্ডিন্যকবরটীভ্রমরপিচ্চিটবর্চ্চঃ কীটমকরশতপদপঞ্চালপাকমত্স্যসূক্ষ্মতুণ্ডান্ বিহায শেষাশ্চতুর্দ্দশমুখসন্দংশবিষাঃ)|| ৪||

Adhikarana saumyAH kITAH (5) · Śloka 5

বিশ্বম্ভরঃ পঞ্চশুষ্কঃ পঞ্চকৃষ্ণোঽথ কোকিলঃ| স্থৈর্যকঃ প্রচলাকশ্চ বটভঃ কিটিভো জটী| সূচীমুখঃ কৃষ্ণগোধা দর্ভঃ কাষাযবাসিকঃ| ত্রযোদশৈতে নির্দ্দিষ্টাঃ সৌম্যাঃ শ্লেষ্মপ্রকোপনাঃ||৫||

বিশ্বম্ভরাদযস্ত্রযোদশ কীটাঃ সৌম্যাস্তে চ শ্লেষ্মপ্রকোপনাঃ| (শ্লেষ্মপ্রকোপিনাং মধ্যে বিশ্বম্ভরপ্রচলাককৃষ্ণগোধাকষাযবাসিকাংশ্চতুরো বর্জযিত্বা নবাঽন্যে মুখসন্দংশবিষা ইতি প্রবন্ধসংগ্রহে)|| ৫||

Adhikarana sa~gkIrNAH kITAH (6) · Śloka 6

তুঙ্গনাসশ্চিপিলকস্তালকো বাহকস্তথা| কোষ্ঠাগারী কৃমিকরো যশ্চ মণ্ডলপুচ্ছকঃ| তুণ্ডনাভঃ সর্ষপকো মদ্গুলিঃ শম্বুকস্তথা| অগ্নিকীটশ্চ সঙ্কীর্ণা দ্বাদশ প্রাণনাশনাঃ||৬||

তুঙ্গনাসাদযো দ্বাদশ কীটাঃ সঙ্কীর্ণাস্তে চ প্রাণনাশনাঃ সান্নিপাতিকত্বাত্| (ত্রীন্ কীটান্ দর্বীকরমণ্ডলিরাজিলসম্বন্ধেন বায্বাদিপ্রকৃতীন্ ক্রমান্নির্দিশ্য সর্বদোষপ্রকৃতিকানাহ-তুঙ্গনাস ইত্যাদি| সর্বদোষপ্রকৃতিকানাং মধ্যে বাহকসর্ষপশম্বুকান্ বর্জযিত্বা নব মুখসন্দংশবিষাঃ)|| ৬||

Adhikarana bhedAnusAraM daMshalakShaNam (7) · Śloka 7

দষ্টস্য কীটৈর্বাযব্যৈর্দ্দংশস্তোদরুজোল্বণঃ| আগ্নেযৈরল্পসংস্রাবো দাহরাগবিসর্পবান্| পক্বপীলুফলপ্রখ্যঃ খর্জূরসদৃশোঽথ বা| কফাদিকৈর্মন্দরুজঃ পক্বোদুম্বরসন্নিভঃ| স্রাবাঢ্যঃ সর্বলিঙ্গস্তু দংশঃ স্যাত্সান্নিপাতিকৈঃ||৭||

দষ্টস্য কীটৈরিত্যাদিনা চতুর্ণাং কীটানাং ক্রমেণ দংশলক্ষণম্| ব্যাখ্যাসমম্| (বাযব্যসংজ্ঞৈঃ কীটৈর্দষ্টস্য নরস্য দংশো দংশব্রণস্তোদরুজাদ্যঃ স্যাত্| আগ্নেযসংজ্ঞৈঃ কীটৈর্দষ্টস্য দংশোঽল্পস্রাবযুক্তো দাহাদিমান্ পক্বপীলুফলসমবর্ণঃ খর্জূরফলবর্ণো বা স্যাত্| কফাদিকৈঃ সৌম্যসংজ্ঞৈঃ কীটৈর্দষ্টস্য দংশব্রণঃ মন্দরুজোঽল্পবেদনঃ পক্বজন্তুফলতুল্যঃ স্নাববহুলশ্চ স্যাত্| সান্নিপাতিকৈঃ কীটৈর্দষ্টস্য তু দংশব্রণো বাযব্যাদিসর্বলক্ষণযুক্তঃ স্যাত্)||৭||

Adhikarana kITaviShavegAH (8) · Śloka 8

বেগাশ্চ সর্পবচ্ছোফো বর্দ্ধিষ্ণুর্বিস্ররক্ততা| শিরোঽক্ষিগৌরবং মূর্চ্ছা ভ্রমঃ শ্বাসোঽতিবেদনা||৮||

কীটেষু বিষবেগাঃ সর্পবদ্বিজ্ঞেযা বাতাদিবিশেষেণ| অত্র তু শোফো বর্দ্ধিষ্ণুর্বিস্ররক্ততাদিকং চ| (বিস্রমামগন্ধি| মুর্চ্ছা মোহঃ| অতিবেদনা রুজাধিক্যম্)|| ৮||

Adhikarana kITadaMshe sAmAnyali~ggam (9) · Śloka 9

সর্বেষাং কর্ণিকা শোফো জ্বরঃ কণ্ডূররোচকঃ||৯||

সর্বেষাং কীটানাং কর্ণিকারাদিসামান্যং লিঙ্গম্| কর্ণিকাকারা পিটকোক্তা ক্ষুদ্ররোগে| (কীটদষ্টানাং সামান্যলক্ষণমাহ-শোফো বর্দ্ধিষ্ণুরিত্যাদি| কর্ণিকাকারঃ কিঞ্চিদুত্সন্নো দংশব্রণঃ কর্ণিকাশোফঃ| তদ্বিধো মাংসাঙ্কুরো বা)|| ৯||

Adhikarana vAtikAdInAM daMshanopAyAH (10) · Śloka 10

বাতিকঃ পক্ষবাতেন স্পর্শদ্দশতি পৈত্তিকঃ| মুখেন শ্লৈষ্মিকঃ কীটঃ সর্বথা সান্নিপাতিকঃ||১০||

বাতিক ইত্যাদিনা চতুর্ণাং কীটানাং দংশনোপাযাঃ| সর্বথেতি পক্ষবাতেন স্পর্শান্মুখেন চ|| ১০||

Adhikarana kaNabhadaShTe lakShaNam (11) · Śloka 11

দষ্টস্য কণভৈঃ শোফো বিসর্পো বমথুর্জ্বরঃ| দংশশ্চ কর্ণিকাকারঃ শ্যাবরক্তো বিশীর্যতে||১১||

দষ্টস্য কণভৈরিত্যাদিনা কীটেভ্যঃ প্রধানবিবরণম্| শ্যাবরক্তো বিশীর্যত ইত্যেবমন্তং কণভে| (সর্ব এব কণভাশ্চতুষ্পাদকীটাঃ সাধ্যা ইতি প্রবন্ধসংগ্রহে)|| ১১||

Adhikarana trikaNTakAdidaMshalakShaNAni (12) · Śloka 12

ত্রিকণ্টকৈস্তু দষ্টস্য নানাবর্ণোঽথবা সিতঃ| দংশো ভবেচ্ছ্বযথুমান্ মোহো ভেদশ্চ বর্চসঃ| কৃকলাসেঽর্দ্ধচন্দ্রাভঃ স্রাববান্ ভৃশলোহিতঃ| দংশো রক্তৈশ্চিতঃ স্ফোটৈঃ সশূলৈর্দম্ভবোদ্ভবঃ| একদংষ্ট্রার্পিতঃ পীতঃ কণ্ডূমান্ দার্দুরঃ সরুক্| দংশো দষ্টঃ সতৃণ্নিদ্রো মূর্চ্ছাবান্ হরিতং বমেত্| মাত্স্যো দংশঃ সরুগ্দাহঃ প্রাগেবোক্তো জলৌকসাম্| বিশ্বভরকৃতো দংশঃ শোফকণ্ডূরুজান্বিতঃ| কফোদ্বমমতীসারং কুরুতে কোঠজন্ম চ| পীতঃ শতপদীদংশঃ স্বেদরুগ্রাগশোফবান্| অতসীপুষ্পবর্ণো বা পিটকাবন্ভ্রমপ্রদঃ| গৃহগোধিকযা স্বেদতোদশ্বযথুদাহবান্| ক্লেদী চ দংশো দষ্টস্য হৃত্পীডাগ্রন্থিসম্ভবঃ| কণ্ডূমান্ মশকৈরীষচ্ছ্বযথুর্মন্দবেদনঃ| অসাধ্যকীটসদৃশমসাধ্যমশকক্ষতম্| প্রাযেণ মক্ষিকা নেত্রে দশন্তি শ্বযথূল্বণঃ| তদ্দংশো দাহকণ্ডূমাংস্তাসাং তু স্থালিকাং ত্যজেত্| তদ্দষ্টে পিটকা শ্যাবা স্রাবিণী ভূর্যুপদ্রবা| রুগ্বান্ পিপীলিকাদংশো বহ্নিনেব চ দহ্যতে||১২||

ত্রিকণ্টকৈরিতি| বর্চ্চোভেদান্তং ত্রিকণ্টকে| ভৃশলোহিতান্তং কৃকলাসদংশে| দম্ভবোদ্ভবো দংশো রক্তৈঃ সশূলৈঃ স্ফোটৈশ্চিতো ভবতি| একদংষ্ট্রার্পিত ইত্যাদি হরিতং বমেদিত্যন্তং দার্দুরে দংশে| দর্দুরো মণ্ডূকঃ| মাত্স্যো দংশঃ সরুগ্দাহো রুগ্দাহসহিতো ভবতি| জলৌকসাং তু দংশঃ প্রাক্সূত্রস্থান এবোক্তঃ| কোঠজন্মান্তং বিশ্বম্ভরকৃতে দংশে| শতপদ্যাঃ কর্ণজলূকিকযা দংশঃ পীতঃ স্বেদাদিমাংশ্চ| অথবা অতসীপুষ্পবর্ণঃ পিটকাযুক্তো ভ্রমপ্রদশ্চ| গ্রন্থিসম্ভবান্তং গৃহগোধিকাযা ঘরোল্লিকাযাং দংশে| মন্দবেদনান্তং মশকদংশে| অসাধ্যমশকক্ষতমসাধ্যকীটলক্ষণৈর্জ্ঞেযম্| মক্ষিকাঃ প্রাযেণ নেত্রে দশন্তি| তদ্দংশো মক্ষিকাদংশো শ্বযথূল্বণঃ শ্বযথুবহুলো দাহাদিমাংশ্চ| তাসাং মক্ষিকাণাং মধ্যে যা স্থালিকা নাম মক্ষিকা তাং তু ত্যজেদসাধ্যত্বাত্| তদ্দষ্ট ইতি স্থালিকাদষ্টে ভূর্যুপদ্রবান্তলক্ষণা পিটকা স্যাত্| দহ্যত ইত্যেতদন্তং পিপীলিকাদংশে|| ১২||

Adhikarana avamUtritalakShaNam (13) · Śloka 13

জলবিন্দুনিভৈঃ স্ফোটৈর্দাহকণ্ডূরুজান্বিতৈঃ| যদ্গাত্রমাচিতং সোষ্ম তদ্বিদ্যাদবমূত্রিতম্||১৩||

জলবিন্দুপ্রখ্যৈর্দাহাদ্যন্বিতৈঃ স্ফোটৈর্যদ্গাত্রমাচিতং ব্যাপ্তমূষ্মসহিতং ভবতি তদ্বিষপ্রাণিনা অবমূত্রিতমিতি বিদ্যাত্|| ১৩||

Adhikarana vRushcikaviShaM bhedAH lakShaNAni ca (14) · Śloka 14

বৃশ্চিকস্য বিষং তীক্ষ্ণমাদৌ দহতি বহ্নিবত্| ঊর্ধ্বমারোহতি ক্ষিপ্রং দংশে পশ্চাত্তু তিষ্ঠতি| দংশঃ সদ্যোতিরুক্ শ্যাবস্তুদ্যতে স্ফুটতীব চ| তে গবাদিশকৃত্ কোথাদ্দিগ্ধদষ্টাদিকোপতঃ| সর্পকোথাচ্চ সম্ভূতাঃ মন্দমধ্যমহাবিষাঃ| মন্দাঃ পীতাঃ সিতাঃ শ্যাবা রূক্ষাঃ কর্বুরমেচকাঃ| রোমশা বহুপর্বাণো লোহতাঃ পাণ্ডুরোদরাঃ| ধূম্রোদরাস্ত্রিপর্বাণো মধ্যাস্তু কপিলারুণাঃ| পিশঙ্গাঃ শবলাশ্চিত্রাঃ শোণিতাভা মহাবিষাঃ| অগ্ন্যাভা দ্ব্যেকপর্বাণো রক্তাসিতসিতোদরাঃ| তৈর্দষ্টঃ শূনরসনঃ স্তব্ধগাত্রো রুজার্দিতঃ| খৈর্বমন্ শোণিতং কৃষ্ণমিন্দ্রিযার্থানসংবিদন্| স্বিদ্যন্ মূর্চ্ছন্ বিশুষ্কাস্যো বিহ্বলো বেদনাতুরঃ| বিশীর্যমাণমাংসশ্চ প্রাযশো বিজহাত্যসূন্| উচ্চিটিঙ্গস্তু বক্ত্রেণ দশত্যভ্যধিকব্যথঃ| সাধ্যতো বৃশ্চিকাত্স্তম্ভং শেফসো হৃষ্টরোমতাম্| করোতি সেকমঙ্গানাং দংশঃ শীতাম্বুনেব চ| উষ্ট্রবর্ণতযা প্রোক্তঃ স এব হ্যুষ্ট্রধূমকঃ| রাত্রিকো রাত্রিচারাচ্চ.............................||১৪||

বৃশ্চিকস্যেত্যাদি সুবোধম্| বৃশ্চিকস্য বিষং তীক্ষ্ণমাশুকারি আদৌ দংশসময এব অগ্নিরিব দহতি| ক্ষিপ্রমাশ্বেব ঊর্ধ্বং দংশব্রণাদূর্ধ্বদেহমারোহতি পশ্চাত্তদনন্তরমেব দংশব্রণমাশ্রিত্য তিষ্ঠতি| ততো দংশ আশ্বেবাধিকবেদনাযুক্তঃ শ্যাববর্ণস্তোদযুক্তঃ স্ফুটনপ্রতীতিযুক্তশ্চ ভবতি| তেষামুত্পত্তিভেদজনিতং বিষভেদং দর্শযতি| তে বৃশ্চিকাস্ত্রিভিঃ কোথৈর্জাযন্তে| তে চ গবাদিশকৃত্কোথজা মন্দবিষাঃ| দিগ্ধদষ্টাদিকোথজাঃ মধ্যবিষাঃ| সর্পকোথজা মহাবিষাঃ| কোথঃ ক্লেদঃ| এষাং বিশেষপরিজ্ঞানার্থং লক্ষণমাহ| পাণ্ডুরোদরান্তং মন্দবিষবৃশ্চিকে লক্ষণম্| মন্দা মন্দবিষাঃ| গবাদিশকৃত্কোথজা বৃশ্চিকাঃ পীতাদিবর্ণাঃ কর্বুরা নানাবর্ণাঃ মেচকাঃ কৃষ্ণবর্ণাঃ| রোমশা রোমবহুলাঃ বহুপর্বাণো বহুসন্ধ্যুপেতপুচ্ছাঃ| লোহিতাঃ রক্তাঃ উদরে পাণ্ডুবর্ণাঃ| অরুণান্তং মধ্যবিষে| মধ্যা মধ্যবিষা দিগ্ধদষ্টাদিকোথজা বৃশ্চিকাঃ| তুর্বিশেষে| ধূম্রোদরা ধূম্রবর্ণমুদরং যেষাং তে তথোক্তাঃ| ত্রিপর্বাণঃ পুচ্ছে ত্রীণি পর্বাণি সন্ধযো যেষাং তে| কপিলারুণাঃ কপিলবর্ণা অরুণবর্ণাশ্চ| পিশঙ্গাদিকং মহাবিষে| মহাবিষাঃ সর্পকোথশবজা বৃশ্চিকাঃ পিশঙ্গাস্তাম্রবর্ণাঃ শবলা নানাবর্ণাঃ চিত্রা বিচিত্রবর্ণাঃ শোণিতাভা রক্তবর্ণাঃ| সিতোদরান্তমগ্ন্যাভেষু| দ্বে বা একং বা পর্ব যেষাং তে তথোক্তাঃ| অগ্ন্যাভা অগ্নিসদৃশবর্ণাঃ রক্তাসিতাসিতোদরা রক্তাদ্যন্যতমবর্ণোদরাঃ| পিশঙ্গাদি সিতোদরন্তং মহাবিষবৃশ্চিকলক্ষণমিতি কেচিত্| তৈরগ্ন্যাভৈর্দষ্টাঃ শূনরসনাদিকঃ সন্ প্রাযোঽসূন্ বিজহাতি| শূনরসন উচ্ছূনজিহ্বঃ| স্তব্ধগাত্রো নিশ্চলাঙ্গঃ| জ্বরার্দিতস্তীব্রজ্বরযুক্তঃ| খৈঃ রোমকূপৈঃ কৃষ্ণবর্ণং রক্তমুদ্বমন্| ইন্দ্রিযার্থানসংবিদন্ শ্রোত্রাদীন্দ্রিযাণাং শব্দাদিবিষযানবিজানন্| স্বিদ্যন্ স্বেদযুক্তঃ| মূর্চ্ছন্ মোহং গচ্ছন্| বিশুষ্কাস্যঃ অনার্দ্রবদনঃ| বেদনাতুরো বেদনযা পীডিতঃ বিশীর্যমাণমাংসঃ দংশব্রণাদ্বিশীর্যমাণানি মাংসানি যস্য| প্রাযশঃ প্রাযেণাসূন্ প্রাণান্ বিজহাতি ত্যজতি| উচ্চিটিঙ্গাখ্যো বৃশ্চিকস্তু বক্ত্রেণ দশত্যধিকব্যথশ্চ ভবতি| 'বৃশ্চিকস্তনুদীর্ঘোচ্চ উচ্চিটিঙ্গঃ স্মৃতো বুধৈরিতি' মঞ্জরী| সাধ্যতঃ সাধ্যসংজ্ঞাদ্ বৃশ্চিকাত্ শেফস্তম্ভাদিকং ভবতি| দংশশ্চাঙ্গানাং শীতাম্বুনা সেকং করোতীব| স এব সাধ্যসংজ্ঞো বৃশ্চিক উষ্ট্রবদ্ধূমবর্ণত্বাদুষ্ট্রধূম ইত্যুক্তঃ| রাত্রিচরণাচ্চ রাত্রিকঃ||১৪||

Adhikarana kaNabhAdInAM bhedanirdeshaH (15) · Śloka 15

............................পৃথক্ তু কণভাদিষু| বিকারসাধনাভেদাত্ ভেদাঃ সন্তোঽপি নোদিতাঃ||১৫||

কণভাদিষ্বশেষেষু পৃথক্প্রত্যেকং তু ভেদাঃ সন্তোঽপি ন কীর্তিতাঃ| কুত ইত্যাহ-বিকারাণাং ব্যাধীনাং সাধনস্য চিকিত্সিতস্য চাভেদাত্|| ১৫||

Adhikarana kITeShu vAtAdibhedAH (16) · Śloka 16

বাতপিত্তোত্তরাঃ কীটাঃ শ্লৈষ্মিকাঃ কণভোন্দুরাঃ| প্রাযো বাতোল্বণবিষা বৃশ্চিকাঃ সোষ্ট্রধূমকাঃ||১৬||

সর্বে কীটাঃ প্রাযেণ বাতপিত্তাধিকাঃ| কণভোন্দুরাস্তু প্রাযঃ শ্লৈষ্মিকাঃ| বৃশ্চিকা উষ্ট্রধূমকাশ্চ প্রাযো বাতোল্বণবিষাঃ|| ১৬||

Adhikarana cikitsAsUtram (17) · Śloka 17

যত্র যস্যৈব দোষস্য লিঙ্গাধিক্যং প্রতর্কযেত্| তত্র তস্যৌষধৈঃ কুর্যাদ্বিপরীতগুণৈঃ ক্রিযাম্||১৭||

যত্র যস্য দোষস্য লিঙ্গানামাধিক্যং প্রতর্কযেত্ কল্পযেত্তত্র তস্যৈব বিপরীতগুণৈরৌষধৈর্দ্রব্যাদিভিঃ ক্রিযাং চিকিত্সাং কুর্যাত্||১৭||

Adhikarana vAtikakITaviShalakShaNam (18) · Śloka 18

হৃত্পীডোর্ধ্বানিলঃ স্তম্ভঃ সিরাযামোঽস্থিপর্বরুক্| ঘূর্ণনোদ্বেষ্টনং গাত্রশ্যাবতা বাতিকে বিষে||১৮||

হৃত্পীডাদিকং বাতিকে কীটবিষে ভবতি| বাতাধিকে কীটবিষে হৃত্পীডাদযঃ স্যুঃ| হৃত্পীডা হৃদি বেদনাবিশেষঃ| ঊর্ধ্বানিলঃ ঊর্ধ্বশ্বাসঃ| স্তম্ভঃ স্তব্ধতাঙ্গানাম্| সিরাযামঃ সিরাকর্ষণম্| অস্থিষু পর্বসু চ রুক্ পীডাবিশেষঃ| ঘূর্ণনং ভ্রমণম্| উদ্বেষ্টনং গ্রথনমিবাঙ্গস্য| গাত্রশ্যাবতা শরীরে শ্যাববর্ণত্বম্|| ১৮||

Adhikarana paittikakITaviShalakShaNam (19) · Śloka 19

সংজ্ঞানাশোষ্ণনিঃশ্বাসৌ হৃদ্দাহঃ কটুকাস্যতা| মাংসাবদরণং শোফো রক্তপিত্তং চ পৈত্তিকে||১৯||

সংজ্ঞানাশাদিকং পৈত্তিকে কীটবিষে| (পিত্তাধিকে কীটবিষে সংজ্ঞানাশাদযঃ স্যুঃ| সংজ্ঞানাশো বুদ্ধিভ্রংশঃ| উষ্ণঃ শ্বাস উষ্ণনিঃশ্বাসঃ| হৃদি দাহো হৃদ্দাহঃ| কটুকাস্যতা কটুকবক্ত্রত্বম্| মাংসস্যাবদরণং ব্রণমুখাত্ খণ্ডশঃ পতনম্| রক্তপিত্তং তত্সংজ্ঞ্হো রোগবিশেষঃ|| ১৯||

Adhikarana shlaiShmikakITaviShalakShaNam (20) · Śloka 20

ছর্দ্যরোচকহৃল্লাসপ্রসেকোত্ক্লেশপীনসৈঃ| সশৈত্যমুখমাধুর্যৈর্বিদ্যাচ্ছ্লেষ্মাধিকে বিষম্||২০||

ছর্দ্যাদিকং শ্লেষ্মাধিকে| শ্লেষ্মাধিকং কীটবিষং শৈত্যাদিসহিতৈশ্ছর্দ্যাদিভির্জানীযাত্| শৈত্যং শরীরে|| ২০||

Adhikarana vAtikakITaviShe cikitsA (21) · Śloka 21

পিণ্যাকেন ব্রণালেপস্তৈলাভ্যঙ্গশ্চ বাতিকে| স্বেদো নাডীপুলাকাদ্যৈর্বৃংহণশ্চ বিধির্হিতঃ||২১||

বাতিকাদীনাং চিকিত্সাং ক্রমেণাহ-পিণ্যাকেনেত্যাদিনা হিতান্তেন বাতিকে বিষে চিকিত্সা| বাতিকে বাযব্যে বিষে পিণ্যাকেন দংশব্রণে লেপস্তৈলেনাভ্যঙ্গঃ| তৈলকথনেন ঘৃতাদিনিষেধঃ সূচিতঃ| নাডীপুলাকাদ্যৈঃ স্বেদঃ নাডীস্বেদঃ পুলাকাদিকৃতঃ স্বেদশ্চ| পুলাকঃ পুলাকাখ্যো ধান্যবিশেষঃ| পললং বা| আদিশব্দেন কৃসরোত্কারিকাপাযসপিণ্ডাদযো গৃহ্যন্তে| বৃংহণো বিধিঃ বৃংহণলংঘনভেদেন দ্বিবিধেষূপক্রমেষু বৃংহণোপক্রমশ্চ হিতঃ| তিলানাং স্নেহার্থং পীডিতানাং কিট্টং পিণ্যাক ইতি জেজ্জটঃ|| ২১||

Adhikarana paittikakITaviShe cikitsA (22) · Śloka 22

পৈত্তিকং স্তম্ভযেত্সেকৈঃ প্রদেহৈশ্চাতিশীতলৈঃ||২২||

শীতলৈরিত্যন্তেন পৈত্তিকে| পৈত্তিকং বিষং শীতলৈঃ স্পর্শবীর্যযোঃ শীতৈঃ সেকৈঃ প্রলেপৈশ্চ স্তম্ভযেত্ শমযেত্|| ২২||

Adhikarana shlaiShmikakITaviShe cikitsA (23) · Śloka 23

লেখনচ্ছেদনস্বেদবমনৈঃ শ্লৈষ্মিকং জযেত্||২৩||

লেখনাদিভিঃ শ্লৈষ্মিকং জযেত্| শ্লেষ্মাধিকং বিষং লেখনাদিভির্জযেত্| লেখনং দংশব্রণস্য| ছেদো দংশব্রণচ্ছেদঃ|| ২৩||

Adhikarana kITabhedena doShAnusAraprayogAH (24) · Śloka 24

কীটানাং ত্রিপ্রকারাণাং ত্রৈবিধ্যেন ক্রিযা হিতা||২৪||

ত্রিপ্রকারাণাং বাতাদিভেদেন ত্রিবিধানাং কীটানাং ত্রৈবিধ্যেন বাতাদিচিকিত্সাপ্রকারেণ ক্রিযা চিকিত্সা হিতা|| ২৪||

Adhikarana svedAdau sAmAnyaniyamaH (25) · Śloka 25

স্বেদালেপনসেকাংস্তু কোষ্ণান্ প্রাযোবচারযেত্| অন্যত্র মুর্চ্ছিতাদ্দংশপাকতঃ কোথতোঽপি বা||২৫||

মূর্চ্ছাযা দংশপাকাদ্দংশকোথাচ্চান্যত্র সর্বকীটেষু প্রাযঃ কোষ্ণান্ স্বেদাদীনবচারযেত্| প্রাযোগ্রহণেন কুত্রচিচ্ছীতমপি যোজ্যমিতিভাবঃ|| ২৫||

Adhikarana kAshyapoktaM daMshadhUpanam (26) · Śloka 26

নৃকেশাঃ সর্ষপাঃ পীতা গুডো জীর্ণশ্চ ধূপনম্| বিষদংশস্য সর্বস্য কাশ্যপঃ পরমব্রবীত্||২৬||

নৃকেশাদিনা কাশ্যপোক্তং দংশধূপনম্| পীতা ইতি সর্ষপবিশেষণম্| জীর্ণ ইতি গুডবিশেষণম্|| ২৬||

Adhikarana atideshena viShaghnavidhinirdeshaH (27) · Śloka 27

বিষঘ্নং চ বিধিং সর্ব কুর্যাত্ সংশোধনানি চ||২৭||

বিষঘ্নং চ সর্বং বিধিং সংশোধনানি চ কুর্যাত্| সর্বেষু কীটবিষেষু বিষহরং সর্বং বিধিং চিকিত্সিতং বমনবিরেচনাদীনি সংশোধনানি চ কুর্যাত্|| ২৭||

Adhikarana ugrakITAdiShu visheShaH (28) · Śloka 28

সাধযেত্ সর্পবদ্দষ্টান্ বিষোগ্রৈঃ কীটবৃশ্চিকৈঃ||২৮||

বিষোগ্রৈরুগ্রবিষৈঃ কীটৈর্বৃশ্চিকৈশ্চ দষ্টান্ সর্পবত্ সর্পদষ্টবত্ সাধযেত্ চিকিত্সেত্| অনেন সর্বত্র বিষাধিক্যে সর্পস্য বিষোল্বণতযা তদ্বত্প্রতিকর্ত্তব্যমিত্যূহ্যম্|| ২৮||

Adhikarana taNDulIyakAdiyogaH (29) · Śloka 29

তণ্ডুলীযকতুল্যাংশাং ত্রিবৃতাং সর্পিষা পিবন্| যাতি কীটবিষৈঃ কম্পং ন কৈলাস ইবানিলৈঃ||২৯||

তণ্ডুলীযকসমাং ত্রিবৃতাং সর্পিষা ঘৃতেন পিবন্ পুরুষঃ কীটবিষৈঃ তথা কম্পং ন যাতি যথা কৈলাসোঽনিলৈঃ|| ২৯||

Adhikarana dvau lepayogau (30) · Śloka 30

ক্ষীরিবৃক্ষত্বগালেপঃ শুদ্ধে কীটবিষাপহঃ| মুক্তালেপো বরঃ শোফতোদদাহজ্বরপ্রণুত্||৩০||

ক্ষীরিবৃক্ষ ইত্যাদি সুবোধম্| শুদ্ধ ইতি বান্তবিরিক্তে| মুক্তালেপঃ শোফাদিপ্রণুদ্বরঃ শ্রেষ্ঠশ্চ| মুক্তালেপোঽতিশযেন কীটদষ্টানাং শোফাদিঘ্নঃ|| ৩০||

Adhikarana dashA~ggo agadaH (31) · Śloka 31

বচাহিঙ্গুবিডঙ্গানি সৈন্ধবং গজপিপ্পলী| পাঠা প্রতিবিষা ব্যোষং কাশ্যপেন বিনির্মিতম্| দশাঙ্গমগদং পীত্বা সর্বকীটবিষং জযেত্||৩১||

বচাদিভিঃ কাশ্যপবিনির্মিতং দশাঙ্গনামানমগদং পীত্বা সর্বং কীটবিষং জযেত্| বচাদিকং কাশ্যপমুনিনা বিনির্মিতং দশদ্রব্যকৃতত্বাদ্দশাঙ্গসংজ্ঞমেতমগদমৌষধযোগমনুক্তদ্রবত্বাজ্জলেনালোড্য পীত্ব সর্বং কীটবিষং জযেত্|| ৩১||

Adhikarana mahAsnehAdiyogaH (32) · Śloka 32

ঐকধ্যং কীটবিষজিন্মহাস্নেহং পযো মধু||৩২||

চত্বারঃ স্নেহাঃ ক্ষীরং মধু চেত্যৈকধ্যং পীতং কীটবিষং জযেত্||৩২||

Adhikarana shikhipicchAdidhUpaH (33) · Śloka 33

শিখিকুক্কুটজৈঃ পিচ্ছঃ সতৈললবণোত্তমৈঃ| ধূপো হন্তি কৃতঃ শীঘ্রং কীটবৃশ্চিকজং বিষম্||৩৩||

শিখিপিচ্ছাদিভির্ধূপঃ কীটবৃশ্চিকজং বিষং শীঘ্রং হন্তি||৩৩||

Adhikarana kaNabhamatsyayorviSha cikitsA (34) · Śloka 34

বিষে কণভজে কুর্যাদুন্দুরোক্তমুপক্রমম্| শিরীষবীজং মণ্ডূকে লেপঃ স্নুক্ক্ষীরকল্কিতম্| মধুত্রিকটুকং শ্বেতপিণ্ডামূলং চ মত্স্যজে||৩৪||

কণভবিষে উন্দুরোক্তমপক্রমং চিকিত্সাং কুর্যাত্| সর্ব এব কণভাশ্চতুষ্পাদকীটাঃ সাধ্যাশ্চেতি সুশ্রুতটীকা| উন্দুরুর্মূষকঃ| স্নুক্ক্ষীরেণ সুধাক্ষীরেণ কল্কিতং শিরীষবীজং মণ্ডূকবিষে লেপঃ| মণ্ডূকো দর্দুরঃ| মধ্বাদিনা লেপো মত্স্যবিষে| শ্বেতপিণ্ডামূলং মদনমূলম্| শ্বেতভিণ্ডা ইতি চ পাঠঃ| ভিণ্ডা ভিণ্ডীতকো ভিণ্ডী ভিণ্ডকঃ ক্ষেত্রসম্ভবঃ| চতুষ্পদঃ সুশাকশ্চ করপর্ণোস্রপত্রকঃ| বৃত্তবীজশ্চতুষ্পুণ্ড্রো ভিণ্ড ইত্যভিধীযতে| গ্রাহিণ্যুষ্ণা রুচিকরী সাম্লা ভিণ্ডা প্রকীর্তিতা| ইতি রাজনিঘণ্টৌ| 'মূলানি শ্বেতভণ্ডীনামি'তি চরকপাঠঃ| ভিণ্ডা বেণ্ট ইতি ভাষা|| ৩৪||

Adhikarana vacAdi agadaH (35) · Śloka 35

বচাং বংশত্বচং পাঠাং নতং সুরসমঞ্জরীম্| দ্বে বলে নাকুলীং কুষ্ঠং শিরীষং রজনীদ্বযম্| গুহামতিগুহাং শ্বেতামজগন্ধাং শিলাজতু| কত্তৃণং কটভীক্ষারং গৃহধূমং মনশ্শিলাম্| রোহীতকং চ পিত্তেন কল্কযেত্স বরোঽগদঃ| বিশ্বম্ভরাদিষ্বালেপনাবনাঞ্জনপানতঃ||৩৫||

বচাদিকং কেনচিত্ পিত্তেন কল্কযেত্ সোগদো বিশ্বম্ভরাদিষ্বালেপনাদিতো বরঃ শ্রেষ্ঠঃ| গুহা পৃশ্নিপর্ণী অতিগুহা সালপর্ণী| শ্বেতা কটভী| কত্তৃণং ভূস্তৃণম্| রোহীতকং দাডিমপুষ্পকাখ্যম্| নাকুলী সর্পসুগন্ধা| অজগন্ধা পশুগন্ধা শুক্লা| পিত্তেন পিষ্ট্বা আদিলেপাদ্ গোপিত্তেনেত্যর্থঃ| ইতি জেজ্জটঃ|| ৩৫||

Adhikarana shatapadIviShe agadaH (36) · Śloka 36

স্বর্জিকাজশকৃত্ক্ষারঃ সুরসঃ সাক্ষিপীডকঃ| মদিরামণ্ডসংযুক্তো হিতঃ শতপদীবিষে||৩৬||

স্বর্জিকাদিভিরগদঃ শতপদ্যাঃ কর্ণজলূকিকাযা বিষে হিতঃ| অক্ষিপীডকঃ শঙ্খিনী|| ৩৬||

Adhikarana gRuhagodhikAviShe agadaH (37) · Śloka 37

কপিত্থমক্ষিপীডোঽর্কবীজং ত্রিকটুকান্বিতম্| করঞ্জো দ্বে হরিদ্রে চ গৃহগোধীবিষাপহঃ||৩৭||

কপিত্থাদিভিরগদো গৃহগোধীবিষাপহঃ| কপিত্থো দধিত্থঃ| করঞ্জো নক্তমালঃ|| ৩৭||

Adhikarana sarvaviShe agadaH (38) · Śloka 38

কাকাণ্ডযুক্তঃ সর্বেষাং বিষাণাং তণ্ডুলীযকঃ| প্রশস্তো বর্হিণোঽণ্ডেন তদ্বদ্বাযসপীলুকঃ||৩৮||

কাকস্যাণ্ডেন যুক্তস্তণ্ডুলীযকঃ সর্ববিষাণাং প্রশস্তোঽগদঃ| তদ্বচ্চ মযূরাণ্ডেন বাযসপীলুকঃ কাকপীলুকফলানি| কাকপীলুকো গুঞ্জা|| ৩৮||

Adhikarana makShikAviShe agadaH (39) · Śloka 39

তগরং নাগরং নাগকেসরং মরিচনি চ| প্রযুক্তং পানলেপাভ্যাং মক্ষিকাবিষনাশনম্||৩৯||

তগরাদিকং পানলেপাভ্যাং পানে লেপনে চ প্রযুক্তং মক্ষিকাবিষনাশনং ভবতি|| ৩৯||

Adhikarana varaTIviShe agadaH (40) · Śloka 40

সিতাসিতে চ লবণে মরিচং চ সনাগরম্| ফণিজ্জকরসোপেতং বরটীনাং বিষাপহম্||৪০||

সিতাসিতলবণাদিকং বরটীনাং পিপীলিকানাং বিষাপহম্| সিতলবণং শুক্ললবণম্| অসিতলবণং কৃষ্ণলবণম্| ফণিজ্জকো মরুবকঃ, তস্য রসঃ|| ৪০||

Adhikarana vRushcikaviShacikitsA sadyaH kartavyam (41) · Śloka 41

সদ্যো বৃশ্চিকজং দংশং চক্রতৈলেন সেচযেত্| বিদারিগন্ধাসিদ্ধেন কবোষ্ণেনেতরেণ বা| লবণোত্তমযুক্তেন সর্পিষা বা পুনঃ পুনঃ| সিঞ্চেত্কোষ্ণারনালেন সক্ষীরলবণেন বা| উপনাহো ঘৃতে ভৃষ্টঃ কল্কোজাজ্যাঃ সসৈন্ধবঃ||৪১||

বৃশ্চিকস্য বিষাধিক্যাত্তচ্চিকিত্সাং পৃথগাহ-সদ্য ইত্যাদি| চক্রাদেব গৃহীতং তৈলমামং চক্রতৈলং তেনাথবা বিদারিগন্ধযা সালপর্ণ্যা সিদ্ধেনেষদুষ্ণেনেতরেণ তিলতৈলেন বৃশ্চিকজং দংশং সদ্যঃ সেচযেত্| অথবা সলবণোত্তমেন ঘৃতেন| লবণোত্তমং সৈন্ধবম্| অথবা কোষ্ণেন ক্ষীরলবণযুক্তেনারনালেন সিঞ্চেত্| উপনাহো দংশে বন্ধঃ| অজাজিরজমোদা| 'সক্ষারলবণেন বা' ইতি চ পাঠঃ|| ৪১||

Adhikarana svedAdi upacArAH daMshasthale (42) · Śloka 42

আদংশং স্বেদিতং চূর্ণৈঃ প্রচ্ছায প্রতিসারযেত্| রজনীসৈন্ধবব্যোষশিরীষফলপুষ্পজৈঃ||৪২||

আদংশমিতি যত্র দংশস্তত্র স্বেদঃ| প্রচ্ছানং কৃত্বা রজন্যাদিচূর্ণৈঃ প্রতিসারণং দংশে| স্বেদিতমনন্তরোক্তেনাজাজীকল্কেন কৃতোপনাহস্বেদমাদংশং দংশব্রণাবধিপরিত ইত্যর্থঃ| প্রচ্ছানং কৃত্বা রজন্যাদিচূর্ণৈঃ প্রতিসারযেদবকিরেত্| শিরীষস্য ফলং পুষ্পং চ|| ৪২||

Adhikarana lepanam (43) · Śloka 43

মাতুলুঙ্গাম্লগোমূত্রপিষ্টং চ সুরসাগ্রজম্| লেপঃ সুখোষ্ণশ্চ হিতঃ পিণ্যাকো গোমযোঽপি বা||৪৩||

মাতুলুঙ্গাম্লেন গোমূত্রেণ পিষ্টং সুরসাগ্রজং লেপে| সুখোষ্ণঃ পিণ্যাকোঽপি বা গোমযঃ মাতুলুঙ্গপ্রক্ষেপণাদম্লীভূতেন গোমূত্রেণ পিষ্টং সুরসাগ্রজং প্রলেপবিষযে হিতম্| সুরসাগ্রজং সুরসপুষ্পম্| সুখোষ্ণ ঈষদুষ্ণঃ পিণ্যাকো গোমযো বা লেপনায হিতঃ| পিণ্যাকপেষণস্যানুক্তদ্রবত্বাত্ পূর্বোক্তং গোমূত্রমেব গ্রাহ্যম্|| ৪৩||

Adhikarana pAnam (44) · Śloka 44

পানে সর্পির্মধুযুত&ল্ত্; ক্ষীরং বা ভূরিশর্করম্| গুডোদকং ব সুহিমং চাতুর্জাতকবাসিতম্||৪৪||

মাক্ষিকযুক্তং ঘৃতং পানে অথবা ভূরিশর্করং ক্ষীরম্| সুবোধম্||৪৪||

Adhikarana shUlaghno lepaH (45) · Śloka 45

পলাশবীজং শূলঘ্নো লেপোঽর্কক্ষীরভাবিতম্||৪৫||

অর্কক্ষীরভাবিতং পলাশবীজং বৃশ্চিকেষু শূলঘ্নো লেপঃ|| ৪৫||

Adhikarana agadAH (46) · Śloka 46

পারাবতশকৃত্পথ্যা তগরং বিশ্বভেষজম্| বীজপূররসোন্মিশ্রং বরোঽযং বৃশ্চিকাগদঃ| মনোহ্বা সৈন্ধবং হিঙ্গু মালতীপল্লবানি চ| গোশকৃদ্রসপিষ্টেযং গুলিকা বৃশ্চিকার্দ্দিতে| লশুনো মরিচং হিঙ্গু সুরসং বিশ্বভেষজম্| অর্কক্ষীরেণ গুলিকা বৃশ্চিকার্দিতশঙ্করী||৪৬||

পারাবতপুরীষাদিকোঽগদঃ সুবোধঃ| তথৈব চ মনোহ্বাদিগুলিকা| লশুনাদিকা চ| বৃশ্চিকেনার্দ্দিতঃ পীডিতো বৃশ্চিকার্দিতঃ শঙ্করী সুখকরী|| ৪৬||

Adhikarana uShTradaMShTrAlepayogaH (47) · Śloka 47

সশৈবলোষ্ট্রদংষ্ট্রা চ হন্তি বৃশ্চিকজং বিষম্||৪৭||

উষ্ট্রস্য দংষ্ট্রা চ শৈবলেন যুক্তা বৃশ্চিকবিষং হন্তি| শৈবলোপেতা উষ্ট্রস্য দংষ্ট্রা চ লেপাদ্ বৃশ্চিকবিষং নাশযতি|| ৪৭||

Adhikarana lepA~jjanArthe gulikA (49) · Śloka 48

হিঙ্গুনা হরিতালেন মাতুলুঙ্গরসেন চ| লেপাঞ্জনাভ্যাং গুলিকা পরমং বৃশ্চিকাপহা||৪৮||

হিঙ্গুহরিতালাভ্যাং পিষ্টাভ্যাং মাতুলুঙ্গরসেন কৃতা গুলিকা পরমং বৃশ্চিকাপহা লেপেঽঞ্জনে চ প্রযুক্তা|| ৪৯||

Adhikarana kara~jjAdidaMshalepanam (49) · Śloka 49

করঞ্জার্জুনশেলূনাং কটভ্যাঃ কুটজস্য চ| শিরীষস্য চ পুষ্পাণি মস্তুনা দংশলেপনম্||৪৯||

করঞ্জাদীনাং পুষ্পাণি মস্তুনা পিষ্টানি বৃশ্চিকদংশে লেপনম্||৪৯||

Adhikarana pippalyAdilepaH (50) · Śloka 50

পিপ্পলীং মরিচং যষ্টিং শ্ব্বেতাং সুরসমঞ্জরীম্| সহদেবামপামার্গং তণ্ডুলীযং চ কল্কযেত্| কুতলক্ষারতোযেন লেপোঽলিবিষনাশনঃ||৫০||

পিপ্পল্যাদীনি কুতলক্ষারোদকেন কল্কিতানি লেপোঽলিবিষে| অলির্বৃশ্চিকঃ|| ৫০||

Adhikarana mohAdiShu lepayogaH (51) · Śloka 51

যো মুহ্যতি প্রশ্বসিতি প্রলপত্যুগ্রবেদনঃ| তস্য পথ্যানিশাকৃষ্ণামঞ্জিষ্ঠাতিবিষোষণম্| সালাবুবৃন্তং বার্তাকরসপিষ্টং প্রলেপনম্||৫১||

যঃ কীটদষ্টো মোহাদিযুক্তস্তস্য পথ্যাদিকং মরিচান্তমলাবুবৃন্তসহিতং বার্তাকরসপিষ্টং দংশলেপনম্| বৃশ্চিকদষ্টো যো নরো মুহ্যতি মোহং গচ্ছতি প্রশ্বসিতি তমকশ্বাসযুক্তশ্চ ভবতি উগ্রবেদনস্তীব্রবেদনাযুক্তঃ প্রলপতি অসম্বদ্ধানি ভাষতে তস্য বার্তাকরসপিষ্টমলাবুবৃন্তসহিতং পথ্যাদিকং প্রলেপনং হিতম্| বার্তাকরসো বার্তাকফলরসঃ| বার্তাকস্তর্ক্কারী| অলাবুবৃন্তমলাবুপত্রবৃন্তম্|| ৫১||

Adhikarana daMshe kaNDUvAdau lepaH (52) · Śloka 52

আদংশে যস্য কণ্ডূঃ স্যাত্কোথঃ কোঠ দারুণম্| তস্য লেপস্ত্রিকটুকং যবক্ষারোঽক্ষিপীডকঃ| পারাবতশকৃত্কান্তাস্বর্জিকাগ্নিহরেণবঃ| রসেন মাতুলুঙ্গস্য ক্ষারেণার্কস্য বা দ্রুতাঃ||৫২||

দংশ এবাদংশস্তত্র যস্য কণ্ড্বাদিকং স্যাত্তস্য লেপস্ত্রিকটুকাদযো মাতুলুঙ্গরসেনার্কক্ষীরেণ বা দ্রুতাঃ|| ৫২||

Adhikarana hRudayapIDAdau visheShaH (53) · Śloka 53

হৃদযং পীড্যতে যস্য মূর্চ্ছা চিমিচিমাযনম্| দন্তৌষ্ঠদংশো রোম্ণাং চ হর্ষস্তস্য নিবর্ত্ততে| বেগো বিষস্য পঞ্চাহান্নৈব বা ক্রিযযা বিনা| তত্র কুর্বীত দংশস্য লেপনং মস্তুকল্কিতৈঃ| শ্বেতপাটল্যতিবিষাহরিদ্রাহরিণীনতৈঃ| বিল্বমূলযবক্ষারসূক্ষ্মমাগধিকাযুতৈঃ||৫৩||

যস্য বৃশ্চিকার্দিতস্য হৃদযপীডাদিরোমহর্ষান্তং ভবতি তস্য বিষবেগঃ পঞ্চাহাদ্বিনিবর্ততে ক্রিযযা চিকিত্সযা বিনা নৈব বা নিবর্ততে| তত্র হৃদযপীডাদৌ শ্বেতপাটল্যাদির্বিল্বমূলাদিযুক্তৈর্মস্তুকল্কিতৈর্দংশস্য প্রলেপনং কুর্বীত| হারিণী পীতযূথিকা|| ৫৩||

Adhikarana utkarttanAdau visheShaH (54) · Śloka 54

উত্কৃত্য ইবাদংশঃ শূনঃ ক্লিন্নো হতচ্ছবিঃ| জম্বূফলনিভং রক্তং কূজন্ বমতি চেষ্টতে| ইন্দ্রিযার্থং ন জানাতি প্রস্বিদ্যতি চ যো মুহুঃ| স্বর্জিকাকুষ্ঠতগরনাকুলীপীলুপিপ্পলীঃ| বৃহতীং চাচ্ছ্বসুরযা তস্য পিষ্ট্বা বিলেপনম্||৫৪||

উত্কৃত্যত ইব ছিদ্যত ইবাদংশো দংশ ইত্যেবমাদিকং যত্র তত্র স্বর্জিকাদীনাচ্ছ্বসুরযা পিষ্টেন লেপনম্|| ৫৪||

Adhikarana ugrAliviShe kramaH (55) · Śloka 55

সর্বত্র চোগ্রালিবিষে পাযযেন্মধুসর্পিষী| বিধ্যেত্ সিরাং বিদধ্যাচ্চ বমনাঞ্জননাবনম্| উষ্ণস্নিগ্ধাম্লমধুরং ভোজনং চানিলাপহম্||৫৫||

সর্বত্র চোগ্রাণামলীনাং বিষে মধুসর্পিষী পাযযেত্| সর্বত্রেতি সর্ববিকারেষু| অনিলাপহান্তমুগ্রালিবিষে| সুবোধম্| উগ্রালিবিষে সর্পকোথজনিতোগ্রবিষবৃশ্চিকদষ্টে সর্বত্র শূনরসনত্বাদিবিষবিকারেষু| অথবা উগ্রে দারুণে বৃশ্চিকবিষে দধি চ সর্পিশ্চ দধিসর্পিষী তে পাযযেত্ ভিষগিতি শেষঃ| সিরাং ললাটাদিস্থাং যথাসন্নং বিধ্যেত্| বমনাদিকং বাতহরমুষ্ণাদিগুণং ভোজনঞ্চ বিদধ্যাত্| অত্র বাতঘ্নত্বেঽপি লবণস্য তীক্ষ্ণোষ্ণত্বান্নিষেধঃ|| ৫৫||

Adhikarana nAgarAdi agadaH (56) · Śloka 56

নাগরং গৃহকপোতপুরীষং বীজপূরকরসো হরিতালম্| সৈন্ধবঞ্চ বিনিহন্ত্যগদোঽযং লেপতোঽলিকুলজং বিষমাশু||৫৬||

নাগরাদিকোঽগদো লেপনাদলিকুলজং ব্রুশ্চিকসমূহজং বিষমাশু বিনিহন্তি| গৃহকপোতস্য পারাবতস্য পুরীষম্| বীজপূররসপিষ্টো নাগরাদিকোযমগদঃ প্রলেপনাত্সর্ববৃশ্চিকোদ্ভূতং বিষং সদ্য এব হন্তি|| ৫৬||

Adhikarana vRushcikaviShaM paramauShadham (57) · Śloka 57

অন্তে বৃশ্চিকদষ্টানাং সমুদীর্ণে ভৃশং বিষে| বিষেণালেপযেদ্দংশং স্থাবরেণ যথোচিতম্||৫৭||

বৃশ্চিকবিষস্য পরমৌষধমাহ-অন্তে ইতি| অনন্তরোক্তাযাং ক্রিযাযামসিদ্ধাযাং ব্রুশ্চিকজে বিষে ভৃশং সমুদীর্ণে স্থাবরেণ বিষেণ যথোচিতং কৃত্ব দংশমালেপযেত্| অত্রান্তশব্দকথনেন প্রাণসন্দেহকারিণো বিষস্য প্রযোগঃ নান্যোপাযিন্যেব গদে কার্য ইতি চ দ্যোত্যতে| বিষেণ স্থাবরেণ বত্সনাভাদিনা দংশব্রণং প্রলেপযেত্||৫৭||

Adhikarana ucciTi~gge visheShaH (58) · Śloka 58

ক্রিযেযমুচ্চিটিঙ্গেঽপি প্রতিলোমং চ পাংসুভিঃ| উদ্বর্তনং সুখাম্লোষ্ণৈস্তথা প্রচ্ছাদনং ঘনৈঃ||৫৮||

ইযং চ বৃশ্চিকোক্তা ক্রিযা উচ্চিটিঙ্গেঽপি যোজ্যা| কাঞ্জিকাদিনা সুখাম্লৈঃ সুখোষ্ণৈশ্চ পাংসুভিঃ প্রতিলোমমুদ্বর্তনং তথা ঘনৈঃ পাংসুভিঃ প্রচ্ছাদনং চ হিতম্|| ৫৮||

Adhikarana kuTajaphalAdiyogaH pAnAdau (59) · Śloka 59

কুটজস্য ফলং কুষ্ঠং মালতী ফলিনী নতম্| তিক্তেক্ষ্বাকুশ্চ পিষ্টানি পানপ্রধমনাদিভিঃ| বৃশ্চিকোন্দুরুলূতানাং সর্পাণাং চ বিষাপহম্| সমানমমৃতেনেদং গরশেষং চ নাশযেত্||৫৯||

কুটজফলাদিকং তিক্তেক্ষ্বাক্বন্তমৌষধং পানাদিভির্বৃশ্চিকাদিবিষাপহমমৃতসমম্| গরশেষং চ নাশযেত্|| ৫৯||

Adhikarana arkakShIrabhAvito~agadaH (60-43) · Śloka 43

অর্কস্য দুগ্ধেন শিরীষবীজং ত্রির্ভাবিতং পিপ্পলিচূর্ণমিশ্রম্| এষোঽগদো হন্তি বিষাণি কীট ভুজঙ্গলূতোন্দুরুবৃশ্চিকানাম্||৬০|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতা বষ্টাঙ্গসংগ্রহসংহিতাযামুত্তরতন্ত্রে কীটবিষ প্রতিষেধো নাম ত্রিচত্বারিংশোঽধ্যাযঃ||৪৩||

পিপ্পলীচূর্ণেন মিশ্রং শিরীষবীজং ত্রীন্ বারানর্কদুগ্ধেন ভাবিতমগদঃ কীটাদীনাং বিষাণি হন্তি| অর্কক্ষীরেণ ত্রিবারং ভাবিতং পেষণশেষণাদিসংস্কারবিশেষেণ সম্পাদিতবীর্যং শিরীষবীজং পিপ্পলীচূর্ণেন মিশ্রীকৃত্য গুলিকাং কুর্যাত্| এষোঽগদঃ কীটাদীনাং বিষং হন্তি|| ৬০|| ইতি শ্রীমন্মহামহোপাধ্যাযেন্দুবিরচিতাযা মষ্টাঙ্গসংগ্রহব্যাখ্যাযাং শশিলেখাযা মুত্তরতন্ত্রে ত্রিচত্বারিংশোঽধ্যাযঃ