44. lūtāpratiṣēdhaḥ

Adhikarana atha lUtApratiShedho nAma catushcatvAriMsho~adhyAyaH, adhyAyapratij~jA (1) · Śloka 1

অথাতো লূতাপ্রতিষেধং নামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

জঙ্গমবিষপ্রসঙ্গেন লূতানাং প্রদর্শযিতুমধ্যায আরভ্যতে|| ১||

Adhikarana lUtAsambhave matAntarANi (2) · Śloka 2

বিশ্বামিত্রায রুষ্টস্য বসিষ্ঠস্য ললাটজাঃ| স্বেদলেশাঃ স্মৃতা লূতা লূনে যে পতিতাস্তৃণে| খাণ্ডবে দহ্যমানানামসুরাণাং শরীরতঃ| যে স্ফুলিঙ্গা বিনিশ্চেরুস্তে লূতা ইতি কেচন| অন্যে বদন্তি ভুক্তস্য দুষ্টস্যান্নস্য মূর্চ্ছনাত্| সম্ভবন্তি বিষস্ফোটা যে লূতাঃ...................||২||

তত্র প্রথমং লূতানাং সম্ভব উচ্যতে| তত্র চ পক্ষত্রযম্| কেচিদাচার্য আহুঃ কস্মিংশ্চিদিতিহাসে বিশ্বামিত্রায ক্রুদ্ধস্য বসিষ্ঠস্য যে ললাটজাঃ স্বেদলেশাস্তে নিকটবর্তিনি লূনে ছিন্নে তৃণে পতিতাস্তে লূতাঃ স্মৃতা ইতি| অন্যে পুনরাহুঃ-খাণ্ডবদহনে দহ্যমানানামসুরাণাং শরীরাদ্যে অগ্নিস্ফুলিঙ্গা বিনিশ্চেরুস্তে সম্প্রতি লূতা বর্তন্তি ইতি| অন্যে তু বদন্তি-ভুক্তস্য দুষ্টস্যান্নস্য মূর্চ্ছনান্মিশ্রীভাবাত্ কোদ্রাববিষবদ্যে বিষস্ফোটা উত্পদ্যন্তে তে লূতা ইতি|| ২||

Adhikarana sAmAnye kITalakShaNam (3) · Śloka 3

.....................কীটলক্ষণম্| যথাস্বং ধারযন্তস্তে লূতাঃ কীটাশ্চ সংজ্ঞিতাঃ||৩||

তে চাবিচারিতপূর্বজন্মভেদা যথাস্বং বাযব্যাদিভেদেন কীটলক্ষণং ধারযন্তঃ কীটা ইত্যুচ্যন্তে|| ৩||

Adhikarana lUtAnAM ghoratamatvam (4) · Śloka 4

তত্র ঘোরতমা লূতা ভিদ্যন্তে তা অপি ত্রিধা| তীক্ষ্ণমধ্যাবরত্বেন ঘ্নন্তি চাশ্বচিকিত্সিতাঃ| সপ্তাহেন দশাহেন পক্ষেণ চ পরং ক্রমাত্||৪||

পূর্বেভ্যশ্চ কীটেভ্যো ঘোরতমা লূতাঃ সদৃশত্বেঽপি| তা অপি লূতাস্তীক্ষ্ণাদিভেদেন ত্রিধা ভবন্তি| তাশ্চাচিকিত্সিতা আশু ঘ্নন্তি| তীক্ষ্ণাঃ সপ্তাহেন ঘ্নন্তি মধ্যা দশাহেন অবরাঃ পক্ষেণেতি ক্রমার্থঃ| পরশব্দেন সপ্তাহাদিমর্যাদাদিনাদূর্ধ্বং ন জীবতীত্যর্থঃ||৪||

Adhikarana AgneyAH lUtAH (5) · Śloka 5

কপিলাগ্নিমুখী পীতা পদ্মা মূত্রা সিতাঽসিতা| আগ্নেয্যঃ স্বেদজাঃ সপ্ত লতাঃ পিত্তবিকারদাঃ||৫||

কপিলাদযঃ স্বেদজাঃ সপ্তলূতা আগ্নেযো ভবন্তি| তাশ্চ পিত্তবিকারদাঃ|| ৫||

Adhikarana saumyAH lUtAH (6) · Śloka 6

পাণ্ডুরা রক্তপদিকা ভৃঙ্গা পিঙ্গা ত্রিমণ্ডলা| পূতির্বীরাঽরণ্ডজাঃ সপ্ত সৌম্যাঃ শ্লেষ্মবিকারদাঃ||৬||

অণ্ডজাঃ পাণ্ডুরাদযহ্ সপ্ত লূতাঃ সৌম্যাঃ ভবন্তি| তাশ্চ শ্লেষ্মবিকারদাঃ|| ৬||

Adhikarana vAyavyAH lUtAH (7) · Śloka 7

কুমুদাঽলবিষা রক্তাশ্চিত্রা সন্তানিমেচকা| কসনা চোদ্ভিদাঃ সপ্ত বাযব্যা বাযুরোগদাঃ||৭||

উদ্ভিদাঃ কুমুদাদযঃ| সপ্ত লূতা বাযব্যা ভবন্তি| তাশ্চ বাযুরোগদাঃ|| ৭||

Adhikarana mishrAH lUtAH (8) · Śloka 8

কাকাণ্ড্যেণপদী লাজা বৈদেহী জালিনী তথা| মালাগুণা সুবর্ণা চ মিশ্রাঃ সপ্তোপপাদিকাঃ||৮||

কাকাণ্ড্যাদযঃ সপ্ত লূতা মিশ্রাঃ সঙ্কীর্ণা ভবন্তি| তাশ্চো পপাদিকা উচ্যন্তে|| ৮||

Adhikarana sAdhyAsAdhyatA (9) · Śloka 9

ব্যাপ্নুবন্ত্যাশু গাত্রাণি জ্বলত্পাবকসন্নিভাঃ| সন্নিপাতকৃতোঽসাধ্যাঃ সাধ্যাঃ কৃচ্ছ্রেণ চেতরাঃ||৯||

জ্বলদগ্নিবদাশু গাত্রাণি ব্যাপ্নুবন্তি সন্নিপাতঞ্চ কুর্বন্ত্যসাধ্যাশ্চ| ইতরাঃ পিত্তবিকারদাদযঃ কৃচ্ছ্রসাধ্যাঃ|| ৯||

Adhikarana teShAM dashanakAlAH (10) · Śloka 10

তা দশন্তি সিতে পক্ষেঽসিতে সন্ধৌ সদৈব চ||১০||

তাশ্চ লূতাঃ সিতপক্ষাদিষু ক্রমেণ দশন্তি| আগ্নেযাঃ শুক্লপক্ষে| সৌম্যাঃ কৃষ্ণপক্ষে| বাযব্যাঃ সন্ধাবমাবস্যারাকযোঃ| মিশ্রাঃ সদৈব|| ১০||

Adhikarana sAmAnyaM daMshalakShaNam (11) · Śloka 11

দংশঃ সামান্যতস্তাসাং দদ্গুমণ্ডলসন্নিভঃ| সিতোঽসিতোঽরুণঃ পীতঃ শ্যাবো বা মৃদুরুন্নতঃ| মধ্যে কৃষ্ণোঽথবা শ্যাবঃ পর্যন্তে জালকাবৃতঃ| বিসর্পবাঞ্ছোফযুতস্তপ্যতে বহুবেদনঃ| জ্বরাশুপাকবিক্লেদকোথাবদরণান্বিতঃ| ক্লেদেন যত্স্পৃশত্যঙ্গং তত্রাপি কুরুতে ব্রণম্||১১||

লূতাদংশস্য লক্ষণং সামান্যেনাহ-কুরুতে ব্রণমিত্যেবমন্তং সামান্যেন লূতাদংশলক্ষণম্| তাসামাগ্নেয্যাদিভেদেন চতুর্বিধানাং লূতানাং সামান্যেন দংশো দংশব্রণঃ দদ্রুমণ্ডলসন্নিভঃ দদ্রবাখ্যকুষ্ঠমণ্ডলসদৃশঃ তথা সিতাদ্যন্যতমবর্ণঃ মৃদুর্মৃদুস্পর্শঃ উন্নতঃ ঔত্রত্যযুক্তঃ| দদ্রুমণ্ডলসাম্যেনৈবোন্নত্যৈ সিদ্ধে পুনরপ্যৌন্নত্যকথনমাধিক্যসূচনার্থম্| মধ্যে দংশব্রণমধ্যে কৃষ্ণঃ কৃষ্ণবর্ণঃ অথবা শ্যাববর্ণঃ| পর্যন্তে দংশব্রণস্য পরিতঃ জালকVরুতঃ জালকাকারাভিঃ সূক্ষ্মাভিঃ সিরাভিরাবৃতঃ বিসর্পাদ্যন্বিতশ্চ ভবতি| ক্লেদেনেতি দংশব্রণোদ্ভূতেন পূযেন যদঙ্গং স্পৃশতি তত্র তস্মিন্নঙ্গেঽপি ব্রণং কুরুতে|| ১১||

Adhikarana viShodvamanasAdhanAni (12) · Śloka 12

শ্বাসদংষ্ট্রাশকৃন্মূত্রশুক্রলালানখার্ত্তবৈঃ| অষ্টাভিরুদ্বমন্ত্যেতা বিষম্ বক্ত্রাদ্বিশেষতঃ||১২||

এতাশ্চ সর্বা লূতাঃ শ্বাসাদিভিরষ্টাভিঃ করণৈর্বিষমুদ্বমন্তি| বক্ত্রেণ তু বিশেষেণোদ্বমন্তি|| ১২||

Adhikarana karaNabhedena daMshalakShaNAni (13) · Śloka 13

শ্বাসেন দংশঃ সহসা সূযতে জ্বরদাহবন্| দংষ্ট্রাকৃতস্তূগ্রতরো বিবর্ণঃ কঠিনঃ স্থিরঃ| গম্ভীরশোফবাংস্তোদবেদনাদাহসংযুতঃ| দুর্গন্ধী শকৃতা দাহকণ্ডূচিমিচিমান্বিতঃ| পচ্যতে চাশু পক্বশ্চ পাণ্ডুঃ পীলুফলোপমঃ| মূত্রেণ রক্তপর্যন্তো মধ্যে কৃষ্ণো বিশীর্যতে| আবর্ত্তসদৃশঃ শূনঃ পূতিঃ সর্পতি দহ্যতে| শুক্রেন গ্রন্থিসংস্থানঃ কঠিনস্তীব্রবেদনাঃ| অল্পমূলোঽল্পরুক্কোঠো লালযা কণ্ডূরো মৃদুঃ| নখেন চোষপিটকাকণ্ডূধূমাযনান্বিতঃ| কিংশুকোদরবর্ণস্তু রজসা চঞ্চুমালবান্||১৩||

শ্বাসেনেত্যাদিনা করণবিশেষেণাষ্টানাং দংশানাং লক্ষণং সুবোধম্| দাহান্তং শ্বাসেন দংশে| দাহসংযুতমিত্যেবমন্তং দংষ্ট্রাকৃতে| পীলু ফলোপম ইত্যেবমন্তং শকৃত্কৃতে| দহ্যত ইত্যেবমন্তং মূত্রেণ দংশে| তীব্রবেদন ইত্যেবমন্তং শুক্রেণ| মৃদুরিত্যেবমন্তং লালযা| ধূমাযন ইত্যেবমন্তং নখদংশে| চঞ্চুমালবানিত্যেবমন্তং রজসা আর্ত্তবেন| কিংশুকোদরং পলাশকুসুমাভ্যন্তরম্| চঞ্চুরিব মালমুপরিভাগোঽস্যাস্তীতি চঞ্চুমালবান্|| ১৩||

Adhikarana kITalUtayordashasthAnAni (14) · Śloka 14

লূতা নাভের্দশন্ত্যূর্ধ্বমূর্ধ্বং চাধশ্চ কীটকাঃ| তদ্দূষিতং চ বস্ত্রাদি দেহে পৃক্তং বিকারকৃত্||১৪||

লূতানাং কীটানাঞ্চ দংশস্থানান্যাহ-লূতেত্যাদি| সুবোধম্| তদ্দূষিতং লূতাদূষিতং বস্ত্রাদি আদিশব্দেন শযনাসনাদিকং গৃহ্যতে| দেহে পৃক্তং সম্পৃক্তং যথাস্বং বিকারকৃদ্ ভবতি| তদ্দূষিতং তযা লূতযা মলমূত্রশুক্রলালাপ্রক্ষেপেণাধিষ্ঠানাদিনা দূষিতং দেহে শরীরে পৃক্তং বিকারকৃত্ বিষবিকারং করোতি|| ১৪||

Adhikarana lUtAnAM viShavardhanaprakAraH (15) · Śloka 15

দিনার্ধং লক্ষ্যতে নৈব দংশো লূতাবিষোদ্ভবঃ| সূচীব্যধবদাভাতি ততোঽসৌ প্রথমেঽহনি| অব্যক্তবর্ণঃ প্রচলঃ কিঞ্চিত্কণ্ডূরুজান্বিতঃ| দ্বিতীযে ত্যুন্নতোঽন্তেষু পিটকৈরিবচাচিতঃ| ব্যক্তবর্ণো নতো মধ্যে কণ্ডূমান্ গ্রন্থিসন্নিভিঃ| তৃতীযে সজ্বরো রোমহর্ষকৃদ্রক্তমণ্ডলঃ| শরাবরূপস্তোদাঢ্যো রোমকূপেষু সাস্রবঃ| মহাংশ্চতুর্থে শ্বযথুস্তাপশ্বাসভ্রমপ্রদঃ| বিকারান্ কুরুতে তাংস্তান্ পঞ্চমে বিষকোপজান্| ষষ্ঠে ব্যাপ্নোতি মর্মাণি সপ্তমে হন্তি জীবিতম্| বিষমিত্যতিতীক্ষ্ণানামিতরে বিভজেদতঃ||১৫||

লূতাবিষোদ্ভবো দংশঃ দিনার্ধং ন লক্ষ্যত এব| লূতানাং শ্বাসাদ্যষ্টবিধবিষোদ্বমনসাধনসম্পর্কাদুদ্ভূতো দংশো ব্রণঃ দিনার্ধং পঞ্চদশনাডীকামাত্রং ন লক্ষ্যতে ন দৃশ্যতে| এবশব্দেন ন কিঞ্চিদপি লক্ষ্যত ইত্যর্থঃ| লূতাবিষস্যোপেক্ষযা অনুদিবসং বর্ধমানপ্রকারমাহ| ততঃ প্রথমেঽহন্যসৌ দংশঃ সূচীব্যধবত্ পীডামাবহতি| সুবোধম্| অব্যক্তবর্ণোঽস্পষ্টবর্ণবিশেষঃ| প্রচলঃ প্রকর্ষেণ চলঃ স্পৃষ্টে তোযপূর্ণদৃতিবচ্চলতীত্যর্থঃ| গ্রন্থিসন্নিভ ইত্যেবমন্তং দ্বিতীযেঽহনি| দ্বিতীযেঽহনি দংশঃ অন্তেষু পর্যন্তভাগেষ্বত্যুন্নতঃ পিটকৈরাচিত ইব চ পিটকাচিতপ্রতীতিযুক্তশ্চ ব্যক্তবর্ণঃ স্পষ্টপীতরক্তাদ্যন্যতমবর্ণঃ মধ্যে নতো নিম্নঃ কণ্ডূযুক্তো গ্রন্থিসদৃশশ্চ ভবতি| সাস্রব ইত্যেবমন্তং তৃতীযেঽহনি| তৃতীযেঽহনি দংশো জ্বরান্বিতো রোমহর্ষকারী রক্তবর্ণমণ্ডলঃ শরাবাকারোঽধিকব্যথো রোমকূপেষু রক্তস্রাববাংশ্চ ভবতি| ভ্রমপ্রদ ইত্যেবমন্তং চতুর্থেঽহনি| দংশে তাপাদিকরো মহান্ শোফো ভবতি| তাপঃ প্রাদেশিকদাহঃ| পঞ্চমাদিষু সুবোধম্| পঞ্চমেঽহনি দংশস্থিতZং বিষং বিষকোপজান্ দাহকণ্ডূপর্বভেদহন্মোহাদিকান্ বক্ষ্যমাণাংস্তাংস্তান্ বিকারান্ কুরুতে| ষষ্ঠেঽহনি দংশস্থিতং বিষং তস্মাত্ সর্বমর্মাণি ব্যাপ্নোতি| সপ্তমেঽহন্যখিলমর্মস্থিতং জীবিতং নাশযতি| অতিতীক্ষ্ণানাং লূতানামেবৈতদ্বিষলক্ষণম্| ইতরে মধ্যমল্পঞ্চাতো লক্ষণাদ্যথাতথমেব লাঘবেন বুদ্ধ্যা বিভজেত্| অতিতীক্ষ্ণানাং পিত্তাত্মিকানাং লূতানাং বিষমেবং ভবতি| ইতরে মধ্যং শ্লৈষ্মিকমল্পং বাতিকঞ্চ অতস্তীক্ষ্ণবিষাদ্বিভজেদ্ দিনবাহুল্যানুসারেণ বিভজ্যৈবং কল্পযেত্|| ১৫||

Adhikarana viShashamane paramAvadhiH (16) · Śloka 16

বিষং শাম্যতি সর্বাসামেকবিংশতিরাত্রিতঃ||১৬||

বিষমিত্যাদি সুবোধম্| সুচিকিত্সিতস্য বিষমোচনে কালস্য পরমাবধিং দর্শযতি-বিষমিতি| সর্বাসাং লূতানাং বিষমেকবিংশতিদিনৈঃ শাম্যতি|| ১৬||

Adhikarana doShAnusAraM daMshalakShaNAni (17) · Śloka 17

দংশঃ পিত্তাত্মকো দাহতৃট্স্ফোটজ্বরদাহবান্| সশোফঃ কঠিনঃ পাণ্ডুঃ কণ্ডূমান্ শ্লৈষ্মিকোঽল্পরুক্| বাতিকঃ পরুষঃ শ্যাবঃ পর্বভেদাদিরুক্করঃ||১৭||

জ্বরমোহবানিত্যেবমন্তং পিত্তাত্মকলূতাদংশবিষলক্ষণম্| অল্পরুগিত্যেবমন্তং কফাত্মকে| পর্বভেদাদিরুক্কর ইত্যেবমন্তং বাতাত্মকে|| ১৭||

Adhikarana doShodrekanirdhAraNe upAyAntaram (18) · Śloka 18

সর্পজ্ঞানোদিতৈর্লিঙ্গৈর্দোষোদ্রেকং চ লক্ষযেত্||১৮||

ন কেবলমেতৈর্লিঙ্গৈর্লূতাবিষে বিষোদ্রেকং লক্ষযেদ্যাবত্ সর্পজ্ঞানোক্তৈরপি দোষোদ্রেকলক্ষণৈঃ|| ১৮||

Adhikarana lUtAsu daMshasambhavaprAyikatvam (19) · Śloka 19

ত্রিদোষাঃ প্রাযশঃ সর্বা লূতাঃ পিত্তকফাধিকাঃ||১৯||

সর্বা অপি লূতাঃ প্রাযেণ ত্রিদোষাঃ পিত্তকফাধিকাশ্চ|| ১৯||

Adhikarana prANAntikIShu lakShaNam (20) · Śloka 20

প্রাণান্তিকীষু হৃন্মোহশ্বাসহিধ্মাশিরোগ্রহাঃ| শ্বেতাসিতাঃ পীতরক্তাঃ পিটকাঃ শ্বযথূদ্ভবঃ| বেপথুর্বমথুর্দাহস্তৃডান্ধ্যং বক্রনাসতা| শ্যাবোষ্ঠবক্ত্রদন্তত্বং পৃষ্ঠগ্রীবাবভঞ্জনম্| পক্বজম্বূসবর্ণঞ্চ দংশাত্স্রবতি শোণিতম্||২০||

প্রাণান্তিকীষু মারণফলাসু লূতাসু হৃন্মোহাদিকং পক্বজম্বূসবর্ণশোণিতস্রাবান্তং লক্ষণম্| প্রাণান্তিকীষু সন্নিপাতবৃদ্ধিকরকাণ্ড্যাদিসপ্তলূতাসু তাভির্দষ্টস্যেত্যর্থঃ| শ্বেতাদ্যন্যতমবর্ণাঃ পিটকাঃ| বক্রনাসতা নাসাযা বক্রত্বম্| দংশাদ্দংশব্রণাত্|| ২০||

Adhikarana lUtAdaMshe chedadAhau (21) · Śloka 21

অথাশু লূতাদষ্টস্যশস্ত্রেণাদংশমুদ্ধরেত্| দহেত্ জাম্ববোষ্ঠাদ্যৈর্ন তু পিত্তোতরং দহেত্||২১||

লূতাবিষস্য লক্ষণমুক্ত্বা চিকিত্সামাহ-অথেত্যাদিনা লূতানাং চিকিত্সা| দংশ এবাদংশস্তম্| জম্ববোষ্ঠং নাম যন্ত্রং সূত্রোক্তম্| পিত্তোত্তরং তু দংশং ন দহেত্| অথ পৈত্তিকাদি লূতাদ্দংশপরিজ্ঞানাদনন্তরং লূতাদষ্টস্য আদংশং সমূলং দংশস্থানং দংশব্রণাবধীত্যর্থঃ| আশু শস্ত্রেণ মণ্ডলাগ্রাদিনা উদ্ধৃত্য দহেত্| জাম্ববোষ্ঠাদ্যৈর্যন্ত্রৈর্দশং দহেচ্চ|| ২১||

Adhikarana chedanadahanAyogyavraNAH (22) · Śloka 22

কর্কশং ভিন্নরোমাণং মর্মসন্ধ্যাদিসংশ্রিতম্| প্রসৃতং সর্বতো দংশং ন ছিন্দীত দহেত বা||২২||

ছেদনদহনাযোগ্যং দর্শযতি-কর্কশাদিকং দংশং ন ছিন্দীত নাপি দহেত| কর্কশং কঠিনস্পর্শম্| ভিন্নরোমাণং চ্যুতরোমাণম্| মর্মসন্ধ্যাদ্যাশ্রিতং আদিশব্দেন ক্ষারবিধাবুক্তাঃ সিরাস্নায্বাদযো গৃহ্যন্তে| সর্বতঃ প্রসৃতং দেহে সর্বতো ব্যাপ্তঞ্চ দংশং ন ছিন্দ্যান্ন দহেত চ||২২||

Adhikarana dAhAnantarIyakRutyam (23) · Śloka 23

লেপযেদ্দগ্ধমগদৈর্মধুসৈন্ধবসংযুতৈঃ| সুশীতৈঃ সেচযেত্র্যানু কষাযৈঃ ক্ষীরিবৃক্ষজৈঃ||২৩||

দাহানন্তরকরণীযমাহ-দগ্ধং চ দংশং মধুসৈন্ধবযুক্তৈরগদৈর্লেপযেত্| তথানু পশ্চাত্ ক্ষীরিবৃক্ষজৈঃ সুশীতৈঃ কষাযৈঃ সেচযেচ্চ||২৩||

Adhikarana raktanirharaNam (24) · Śloka 24

সর্বতোঽপহরেদ্রক্তং শৃঙ্গাদ্যৈঃ সিরযাপি বা| স্রুতে রক্তে পরীষেকো ঘৃতক্ষিরাদিভির্হিতঃ||২৪||

সর্বতঃ ইতি সর্বাঙ্গেভ্যঃ| ব্যাখ্যাসমম্| শৃঙ্গাদ্যৈঃ শৃঙ্গজলূকালাবুভিঃ সিরযাপি বা সিরাবেধেন বা শরীরাত্ সর্বতো রক্তমপহরেত্| রক্তে স্রুতে সতি ঘৃতাদিভিঃ পরিষেকো হিতঃ|| ২৪||

Adhikarana prapauNDarIkAdilepaH paittike (25) · Śloka 25

প্রপৌণ্ডরীকহ্রীবেরশারিবোশীরজীবকাঃ| লোধ্রচন্দনজীবন্তীমঞ্জিষ্ঠাসর্জবঞ্জুলাঃ| মৃণালবিসশৈবালকুমুদোত্পলগৈরিকাঃ| ন্যগ্রোধোদুম্বরাশ্বত্থনিচুলপ্লক্ষবেতসাঃ| সমঙ্গাপাটলীগুন্দ্রাকাকোলীশতপর্বিকাঃ| শিরীষধাতকীমূর্বাবিদারীপদ্মকিংশুকঃ| শৃঙ্গাটকং কোশবতী বাযসী সোমরাজযঃ| মধুকাংশুমতী মূর্বা যথালাভং সমাহৃতাঃ| শস্তঃ পর্যুষিতো লেপঃ সঘৃতঃ পৈত্তিকে ব্রণে||২৫||

প্রপৌণ্ডরীকাদিকং শ্লোকচতুষ্টযোক্তং যথালাভং সর্বম্ সংগৃহ্য সঘৃতঃ সন্নহোরাত্রং পর্যুষিতো লেপঃ| পৈত্তিকে লূতাব্রণে প্রশস্তঃ| কোশবতী কোশাতকী| বাযসী কাকোদুম্বরিকা|| ২৫||

Adhikarana shyAmAdilepaH shlaiShmike (26) · Śloka 26

শ্যামাদ্বযনিশামুস্তানখরাস্নামহাসহাঃ| বাসাপত্তঙ্গসুবহানাকুলীগিরিকর্ণিকাঃ| সর্পগন্ধাযবফলানির্গুণ্ড্যশ্মন্তকস্থিরাঃ| শুকাখ্যা মহিষাক্রান্তা কুষ্ঠেন্দ্রযবকুঙ্কুমম্| করবীরাগরুনতং সুগন্ধা সিন্দুবারকম্| আস্ফোতগুন্দ্রা চ হিতা প্রলেপঃ শ্লৈষ্মিকে বিষে||২৬||

শ্যামাদ্বযাদিভিস্ত্রিভিঃ শ্লোকৈঃ শ্লৈষ্মিকে লূতাবিষে লেপঃ| শ্যামাদ্বযং পিপ্পলী প্রিযঙ্গুশ্চ| সুবহোত্তমকারিণী| নির্গুণ্ডী প্রসিদ্ধা| অশ্মন্তকো মালুকপর্ণঃ| শুকাখ্যা শুকনাসা| মহিষাক্রান্তা আস্ফোতোঽর্কঃ| গুন্দ্রা তৃণজাতিঃ|| ২৬||

Adhikarana bimbyAdilepaH vAtike (27) · Śloka 27

বিম্বীবিদুলবন্ধূককোবিদারপলাশকাঃ| সুবহারিষ্টকব্রাহ্মীগুডূচীবিশ্বসৈর্যকাঃ| সিদ্ধার্থকা দেবদারুবিডঙ্গানীন্দ্রবারুণী| শতাবরীলাঙ্গলিকীরাজবৃক্ষপুনর্নবাঃ| জীবন্তীবাযসীভার্ঙ্গীকতকেন্দ্রযবার্জুনাঃ| মিসিব্যাঘ্রপদীসিংহপুচ্ছীমণ্ডলপর্ণিকাঃ| শ্বদংষ্ট্রাকোলবৃহতী রেবতী পুষ্পসেবিকা প্রপুন্নাটঃ কুরবকঃ প্রলেপো বাতিকে বিষে||২৭||

বিম্ব্যাদিভিশ্চতুর্ভিঃ শ্লোকৈর্বাতিকে লূতাবিষে লেপঃ| সুবহোত্তমকারিণী| অরিষ্টকঃ কৃষ্ণফলঃ| সৈর্যকঃ সহচরঃ| ইন্দ্রবারুণী গবাক্ষী| রাজবৃক্ষঃ আরগ্বধঃ| বাযসী কাকোদুম্বরিকা| কতকঃ ফলবিশেষঃ| মিসিঃ শতপুষ্পা| ব্যাঘ্রপদী শার্দূলপদিকা| সিংহপুচ্ছী গুহা| মণ্ডলপর্ণিকা শিংশপা| শ্বদংষ্ট্রা গোক্ষুরকঃ| কোলো বদরঃ| শ্বেতপুষ্পিকা রেবতী| শ্বেতপুষ্পী গবাক্ষী|| ২৭||

Adhikarana bodhyAdilepaH sarvatra viShe (28) · Śloka 28

সর্বত্রৈব চ শস্যন্তে বোধিশ্লেষ্মাতকাক্ষকাঃ||২৮||

বোধ্যাদিকং সর্বত্রসর্বস্মিন্ লূতাবিষে লেপে শস্যতে| বোধিঃ পিপ্পলঃ| শ্লেষ্মাতকঃ শেলুঃ| অক্ষকো বিভীতকঃ|| ২৮||

Adhikarana mahati viShe vamanarekau (29) · Śloka 29

উদীর্ণদোষান্ বলিনো বিষে মহতি বামযেত্| কাকাণ্ডকীকোশবতী লোধ্রেন্দ্রযবসৈন্ধবৈঃ| পটোলপত্রমরিচকরঘাটপ্রিযঙ্গুভিঃ| কৃষ্ণাশুকনসানীপনিম্বসপ্তাহ্বযষ্টিভিঃ| বিরেচযেচ্চ ত্রিফলাত্রিবৃত্ত্রিকটুসৈন্ধবৈঃ| সদন্তীপূগমৃদ্বীকাবিডঙ্গৈরথবা পচেত্| এভিঃ পলার্ধিকৈঃ প্রস্থং সমব্রাহ্মীরসং ঘৃতাত্| পঞ্চমূলশৃতং ক্ষীরং তোযং বা শোধনৌষধৈঃ| যথাস্বং কল্কিতৈর্যুক্তং পৃথগ্দদ্যাদ্বিরেচনম্||২৯||

মহতি বিষে উদীর্ণদোষাদিযুক্তান্ কাকাণ্ডক্যাদিভির্বামযেত্ কাকাণ্ডকী কাকমাচী| কোশবতী কোশাতকী| করঘাটো মদনঃ| ত্রিফলাদিভিরুদীর্ণদোষাদিকমেব বিরেচযেত্| অথবৈভিস্ত্রিফলাদিভিঃ পলার্দ্ধিকৈরর্দ্ধপলপ্রমাণৈর্ঘৃতাত্ প্রস্থং সমব্রাহ্মীরসং পচেত্| শেষং সুবোধম্| শোধনৌষধানি সূত্রোক্তানি বিরেচনদ্রব্যাণি| তেষাং পৃথক্ কল্কৈর্যথাস্বম্ দোষাদ্যপেক্ষযা যুক্তং পঞ্চমূলশৃতং ক্ষীরং তোযং বা শোধনার্থং দদ্যাত্|| ২৯||

Adhikarana shuddhasya saMsarjanakramaH (30) · Śloka 30

পিপ্পলীপিপ্পলীমূলশুণ্ঠীন্দ্রযবসৈন্ধবৈঃ| পাঠাজমোদাযষ্ট্যাহ্বমুস্তাসর্ষপদারুভিঃ| লঘুনা পঞ্চমূলেন সরলেন চ সাধিতা| পেযা সংসর্জনে যোজ্যা সঘৃতা বিষনাশিনী||৩০||

শুদ্ধস্য চ সংসর্জনে পেযাদিক্রমে পিপ্পল্যাদিভিঃ সিদ্ধাঃ পেযা ঘৃতসহিতা বিষনাশিনী যোজ্যা|| ৩০||

Adhikarana viShe bastividhAnam (31) · Śloka 31

আধ্মানহিধ্মাশ্বাসেষু পৃষ্ঠগ্রীবাবভঞ্জনে| সঙ্কোচস্তমকম্পেষু শূলেষ্বর্ধাবভেদকে| বাতরোগেষু চান্যেষু পর্বভেদার্দিতাদিষু| এরণ্ডবিল্বসরলচিরিবিল্বার্কপাটলীঃ| শিগ্রুপাঠা কুশবৃষং বিদুলং চ জলে পচেত্| কনীযঃ পঞ্চমূলঞ্চ তস্মিন্মণ্ডং পচেদ্ঘৃতাত্| দ্বিগুণে তুল্যগোক্ষীরে পিষ্টৈর্যষ্টীনিশানতৈঃ| সুরাহ্ববেল্লসরলশতাহ্বালোধ্রগৈরিকৈঃ| পযস্যাক্লুষ্ঠগাঙ্গেযীকৃষ্ণামদনসৈন্ধবৈঃ| বস্তৌ প্রত্যাগতেঽশ্নীযাত্পঞ্চমূলান্বিতৈঃ রসৈঃ||৩১||

আধ্মানাদিষ্বন্যেষু পর্বভেদাদিষু বাতরোগেষু চ এরণ্ডাদিক্বাথে ঘৃতান্মণ্ডং পচেত্| ঘৃতমণ্ডাদ্ দ্বিগুণ এরণ্ডাদিক্বাথস্তাবন্মাত্রমেব গোক্ষীরম্| যষ্ট্যাহ্বাদিকং গর্ভম্| গাঙ্গেযী মুস্তা| মদনঃ করঘাটঃ| ইদং ঘৃতং বস্তৌ যোজ্যম্| তস্মিন্ গুদাত্ প্রত্যাগতে পঞ্চমূলান্বিতৈর্মাংসরসৈরশ্নীযাত্|| ৩১||

Adhikarana tIkShNaM nAvanam (32) · Śloka 32

নাবনং গৌরবে শোফে লালাস্রাবে হনুগ্রহে| গিরিকর্ণী ফলরসো বন্ধূকং কিণিহী সিতা| ষড্গ্রন্থালশুনব্যোষব্রুহতীবেল্লসৈন্ধবম্| অপামার্গফলং ভার্ঙ্গী নাকুলী সর্পগন্ধিকা| শ্যামা যবফলা বীজং ফণির্জকশিরীষযোঃ| বার্তাকরসপিষ্টানি নস্যং বিষহরং পরম্||৩২||

গৌরবাদিকে গিরিকর্ণ্যাদিকং সর্পগন্ধিকান্তং নাবনম্| সর্পগন্ধিকা নাকুলী সর্পসুগন্ধা ইতি জেজ্জটঃ| শ্যামাদিকং বার্তকরসপিষ্টং নস্যং পরং বিষহরম্| যবফলা দুগ্ধিকা|| ৩২||

Adhikarana snehanasyam (33) · Śloka 33

বিরিক্তশিরসশ্চাস্য সর্পির্মণ্ডোঽনু নাবনম্||৩৩||

অনেন চ তীক্ষ্ণনস্যেন বিরিক্তে শিরসি সর্পির্মণ্ডোঽনু পশ্চান্নাবনং হিতম্|| ৩৩||

Adhikarana vacAdi a~jjanam (34) · Śloka 34

নেত্রোপরোধশ্বযথুকণ্ডুনিদ্রাসমাগমে| বচামনোহ্বাত্রিকটুত্রিফলালোধ্রগৈরিকাঃ| শঙ্খো নীলোত্পলং তাম্রং মুক্তা হেম প্রবালকম্| জীবন্তী লশুনং কুষ্ঠং কতকং মার্কবং নতম্| প্রপৌণ্ডরীকং মধুকং করঞ্জফলসৈন্ধবম্| নিশে ফণির্জকং তুত্থং স্রোতোঽঞ্জনরসাঞ্জনে| মেষশৃঙ্গ্যাশ্চ কুসুমং পিষ্টং গোবারিণাঞ্জনম্||৩৪||

নেত্রোপরোধাদিকে বচাদিভিস্ত্রিভিঃ শ্লোকৈর্গোমূত্রপিষ্টৈঃ অঞ্জনম্||৩৪||

Adhikarana surasAdi a~jjanam (35) · Śloka 35

সুরসপ্রসবব্যোষবিল্বমূলসুরাহ্বযম্| হরিদ্রাছাগলীমূত্রম্ লূতাকীটঘ্নমঞ্জনম্||৩৫||

সুরসপ্রসবাদিকং ছাগলীমূত্রপিষ্টং লূতাকীটবিষঘ্নমঞ্জনম্| সুরসপ্রসবম্ সুরসমঞ্জরী| সুরাহ্বযং দেবদারু|| ৩৫||

Adhikarana shirIShAdyagadaH (36) · Śloka 36

শিরীষপদ্মকোশীরপাটলীসিন্দুবারকম্| ক্ষীরিশুঙ্গনতোদীচ্যশারিবাকুষ্ঠচন্দনম্| শেলুস্বরসপিষ্টোঽযমগদো নাবনেঽঞ্জনে| পানে প্রলেপে সেকে চ লূতাসু পরমং হিতঃ||৩৬||

শিরীষাদিকঃ শ্লেষ্মাতকস্বরসপিষ্টোঽযমগদো নাবনাদিকে যুক্তো লূতাসু পরমং হিতঃ| সিন্দুবারকো নির্গুণ্ডী| শেলুঃ শ্লেষ্মাতকঃ|| ৩৬||

Adhikarana payasyAdiragadaH (37) · Śloka 37

পযস্যা মধুমৃদ্বীকাশ্বদম্ষ্ট্রাক্ষীরমোরটাঃ| গোজীবিদারীযষ্ট্যাহ্বমধুকানি চ তদ্গুণঃ||৩৭||

পযস্যাদিরগদস্তদ্গুণঃ পূর্বগুণঃ| ক্ষীরমোরটা মধুস্রবা| গোজী গোজিহ্বা|| ৩৭||

Adhikarana shirIShakusumAdyagadaH (38) · Śloka 38

তথা শিরীষকুসুমং চন্দ্রলেখোদ্ভবং ফলম্| সুরালা কটভী জাতিঃ শ্বেতা চ গিরিকর্ণিকা||৩৮||

শিরীষকুসুমাদিকং শ্বেতগিরিকর্ণিকান্তং তথেতি গুণৈঃ পূর্ববত্| সুরালা অতিবিষা|| ৩৮||

Adhikarana tagarAdi agadaH (39) · Śloka 39

তদ্বচ্চ যুঞ্জ্যাত্তগরকুষ্ঠনাগবলাবলাঃ||৩৯||

তদ্বদেব তগরাদিকং বলান্তম্|| ৩৯||

Adhikarana haridrAyugalAdiragadaH (40) · Śloka 40

হরিদ্রাযুগলং নাগদন্তী লোধ্রং চ শাবরম্| শিরীষপুষ্পং তগরং সহদেবা শতাবরী| পুনর্নবা নাগবলা সর্পগন্ধা কুটন্নটম্| গবাদনী দন্তশঠসোমবল্কেন্দুরাজযঃ| বিষেষু সর্বেষ্বগদঃ সক্ষৌদ্রঃ সর্বকর্মকৃত্||৪০||

হরিদ্রাযুগলাদিরগদঃ সক্ষৌদ্রঃ সর্ববিষেষু সর্বাভীষ্টকর্মকৃত্| কুটন্নটং পরিপেলবম্| সোমবল্কঃ সোমবৃক্ষবল্কঃ| সোমবৃক্ষঃকট্ফলঃ|| ৪০||

Adhikarana sarpAkShyAdirvaro agadaH (41) · Śloka 41

সর্পাক্ষী চন্দনং বক্রং মৃগাক্ষী গন্ধনাকুলী| এলা মহাসুগন্ধা চ বস্তমূত্রেণ কল্কিতঃ| লেপে পানে চ লূতাসু নানেন সদৃশোঽগদঃ||৪১||

সর্পাক্ষ্যাদির্বস্তমূত্রকল্কিতো লূতাসু লেপে পানে চ যোজ্যঃ| অনেন সমোলূতাবিষস্যাগদো ন ভবতি| সর্পাক্ষী রক্তপুষ্পা পুর্বদেশে প্রসিদ্ধা| বক্রং তগরম্| গন্ধনাকুলী সুগন্ধমূলা রাস্না| ইতি প্রবন্ধসংগ্রহে|| ৪১||

Adhikarana kaTabhImUlAdighRutam (42) · Śloka 42

কটভীমূলতগরসমঙ্গাদেবদারুভিঃ| বৃহতীদ্বযগাঙ্গেযীরোচনাচন্দনৈর্ঘৃতম্| সিদ্ধং চতুর্গুণক্ষীরং পানাভ্যঞ্জনযোর্হিতম্| লূতাকণভকীটনাং বিষে পরমদারুণে||৪২||

কটভীমূলাদিভিশ্চতুর্গুণক্ষীরং সিদ্ধং ঘৃতং পানাভ্যঞ্জনযোঃ পরমদারুণে লূতাদিবিষে হিতম্| সমঙ্গা মঞ্জিষ্ঠা| গাঙ্গেযী মুস্তা||৪২||

Adhikarana karNikApAtanam (43) · Śloka 43

নিবৃত্তে দাহশোফাদৌ কর্ণিকাং পাতযেদ্ ব্রণাত্| কুসুম্ভপুষ্পং গোদন্তঃ স্বর্ণক্ষীরী কপোতবিট্| ত্রিবৃতা সৈন্ধবং দন্তী কর্ণিকাপাতনং তথা| হরিদ্রা গুগ্গুলুঃ কিণ্বং বংশলেখঃ কপোতবিট্| তদ্বচ্চ সৈন্ধবং কুষ্ঠং দন্তীকটুকদৌগ্ধিকম্| রাজকোশাতকীমূলং কিণ্বো বা মথিতোদ্ভবঃ||৪৩||

এবং দাহশোফাদৌ নিবৃত্তে সতি ব্রণাত্ পূর্বোক্তাং কর্ণিকাং পাতযেত্| আদিগ্রহণেন রুগ্রাগাদিপরিগ্রহঃ| নিবৃত্তে উপশান্তে| ব্রণাদ্ ব্রণমুখাত্ কর্ণিকাং দংশস্থানে কর্ণিকাবদুত্পন্নং মাংসাঙ্কুরং পাতযেদপনযেত্| কুসুম্ভপুষ্পাদি দন্তীপর্যন্তং কর্ণিকাযাঃ পাতনম্| হরিদ্রাকপোতবিডন্তং তথেতি কর্ণিকাপাতনম্| বংশলেখঃ বংশতনুবল্কঃ| সৈন্ধবাদি রাজকোশাতকীমূলান্তং চ তদ্বত্ পূর্ববত্| (কটুকদৌগ্ধিকং পেচ্চুরঃ রাজকোশাতকী বলিযপুট্টলপীরম্) অথবা মথিতোদ্ভবঃ কিণ্বস্তক্রমলঃ|| ৪৩||

Adhikarana karNikApAtasamaye bRuMhaNam (44) · Śloka 44

কর্ণিকাপাতসমযে বৃংহযেত বিষাপহৈঃ||৪৪||

যদা তু কর্ণিকা পাত্যেতে তদা যে বিষাপহা ভবন্তি তৈর্যথাযথং চ বৃংহযেত্| অনন্তরোক্তৈরোষধৈঃ কর্ণিকাপাতনকালে বিষহরদ্রব্যৈর্লূতাদষ্টং নরং পোষযেত্|| ৪৪||

Adhikarana karNikAbAhulyavisheShaH (45) · Śloka 45

ঋতুকালে চ লূতানাং যাবন্তঃ শুক্রবিন্দবঃ| দেহে পতন্তি তাবত্যো জাযন্তে কর্ণিকাঃ সমম্||৪৫||

লূতানাং চ যদা গর্ভগ্রহণযোগ ঋতুকালো ভবতি তদা যাবন্তঃ শুক্লবিন্দবঃ পুংসো দেহেঽঙ্গেষু পতন্তি তাবত্য এব কর্ণিকাঃ সমমেককালং জাযন্তে|| ৪৫||

Adhikarana vraNashodhanaM sarpiH (46) · Śloka 46

গোদন্তদন্তী ত্রিবৃতা হরিদ্রে সৈন্ধবং তিলাঃ| মধুকং নিম্বপত্রাণি ঘৃতং চ ব্রণশোধনম্| কান্তাবিডঙ্গখদিরনিম্বকাম্পিল্যকাম্বুদৈঃ| সর্জৈলাধাতকীলোহৈঃ সিদ্ধং সর্পির্ব্রণাপহম্||৪৬||

গোদন্তাদিকং ব্রণানাং শোধনম্| কান্তাদিভিঃ সিদ্ধং সর্পির্ব্রণাপহম্|| ৪৬||

Adhikarana shirIShAdikalkAdirvraNaghnaH (47) · Śloka 47

শিরীষকটভীশেলুক্ষীরিবৃক্ষার্জুনত্বচঃ| কল্কচূর্ণপরীষেকৈঃ কীটলূতাব্রণাপহাঃ||৪৭||

শিরীষাদিকং কল্কাদিভিঃ প্রযুক্তম্ কীটানাং লূতানাঞ্চ ব্রণাপহম্|| ৪৭||

Adhikarana shatAhvAdirvraNaropaNam (48) · Śloka 48

শতাহ্বালোধ্রকাসীসদার্বীজম্ব্বস্থিরোচনাঃ| হরীতকী পূগফলং চূর্ণোঽযং ব্রণরোপণম্||৪৮||

শতাহ্বাদীনাং চূর্ণো ব্রণরোপণঃ|| ৪৮||

Adhikarana lAkShAdikaM tvagvishodhanam (49) · Śloka 49

লাক্ষা রজন্যৌ মঞ্জিষ্ঠা হরিতালং মনশ্শিলা| সর্পির্মধু চ লেপোঽযং ত্বগ্বিশুদ্ধিকরঃ পরম্||৪৯||

রূঢে চ লাক্ষাদিভির্লেপঃ পরং ত্বচো বিশুদ্ধত্বং করোতি|| ৪৯||

Adhikarana romasa~jjananam (50) · Śloka 50

রোমসঞ্জননং কুর্যাদ্যদুক্তং ব্রণসাধনে||৫০||

ব্রণসাধনে ব্রণপ্রতিষেধে যত্ কিঞ্চিদ্রোমসঞ্জননমুক্তং তদত্রাপি কুর্যাত্|| ৫০||

Adhikarana snehakArye sarpireva yojyam (51-44) · Śloka 44

স্নেহকার্যমশেষং চ সর্পিষৈব সমাচরেত্| বিষস্য বৃদ্ধযে তৈলমগ্নেরিব তৃণোপলম্||৫১|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতা বষ্টাঙ্গসংগ্রহসংহিতাযামুত্তরতন্ত্রে লূতাপ্রতি ষেধো নাম চতুশ্চত্বারিংশোঽধ্যাযঃ||৪৪||

যত্ কিঞ্চিদভ্যঞ্জননাবনাদিস্নেহকার্যং তত্সর্পিষৈব সমাচরেত্ নান্যেন তৈলাদিনা স্নেহেন| তৈলং যত্নতঃ পরিহরেত্| তৈলং যত্নতঃ পরিহরেত্| যতস্তৈলং তথা বৃদ্ধযে ভবতি যথা তৃণোপলমগ্নেরিতি| তৈলং তীক্ষ্ণাদিগুণসাম্যাদ্বিষস্য বৃদ্ধযে ভবতি তৃণোপলং শুষ্কতৃণমগ্নের্বৃদ্ধযে যথা|| ৫১|| ইতি শ্রীমন্মহামহোপাধ্যাযেন্দুবিরচিতাযা মষ্টাঙ্গসংগ্রহব্যাখ্যাযাং শশিলেখাযা মুত্তরতন্ত্রে চতুশ্চত্বারিংশোঽধ্যাযঃ