25. mukharōgavijñānīyaḥ

Adhikarana atha mukharogavij~jAnIyo nAma pa~jcaviMsho~adhyAyaH - pratij~jA (1) · Śloka 1

অথাতো মুখরোগাবিজ্ঞানীযং নামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

ঊর্ধ্বাঙ্গক্রমেণ মুখরোগাণাং হেত্বাদিকং প্রদর্যিতুমধ্যায আরভ্যতে|| ১||

Adhikarana mukharoganidAnam (2) · Śloka 2

মাত্স্যমাহিষবারাহপিশিতামকমূলকম্| মাষসূপদধিক্ষীরশুক্তেক্ষুরসফাণিতম্| অবাক্শয্যাং চ ভজতো দ্বিষতো দন্তধাবনম্| ধূমচ্ছর্দনগণ্ডূষানুচিতং চ সিরাব্যধম্| ক্রুদ্ধাঃ শ্লেষ্মোল্বণা দোষাঃ কুর্বন্ত্যন্তর্মুখাং গদান্||২||

মাত্স্যেত্যাদিনা মুখরোগাণাং সামান্যং নিদানম্| মাত্স্যাদ্যামিষাদিকং ভজতো দন্তধাবনাদিকং চোচিতসিরাব্যধান্তং দ্বিষতঃ শ্লেষ্মোল্বণস্ত্রযো দোষা অন্তর্মুখং কুপিতাস্তত্রৈব গদান্ কুর্বন্তি| ফাণিতং ক্ষুদ্রগুডঃ| অবাক্শয্যাঽধোমুখস্য শযনম্||২||

Adhikarana khaNDauShThaH (3) · Śloka 3

তত্র খণ্ডৌষ্ঠ ইত্যুক্তো বাতেনৌষ্ঠো দ্বিধা কৃতঃ||৩||

তত্রেত্যাদিনা রোগা উচ্যন্তে| য ওষ্ঠো বাতেন দ্বিধাকৃতো ভবতি স রোগো নাম্না খণ্ডৌষ্ঠঃ ||৩||

Adhikarana vAtauShThakopaH (4) · Śloka 4

ওষ্ঠকোপে তু পবনাত্ স্তব্ধাবোষ্ঠৌ মহারুজৌ| দাল্যেতে পরিপাট্যেতে পরুষাসিতকর্কশৌ||৪||

পবনাদোষ্ঠকোপাখ্যে রোগে স্তব্ধাদিরূপাবোষ্ঠৌ ভবতঃ||৪||

Adhikarana pittauShThakopaH (5) · Śloka 5

পিত্তাত্তীক্ষ্ণাসহৌ পীতৌ সর্ষপাকৃতিভিশ্চিতৌ| পিটিকাভির্বহুক্লেদাবাশুপাকৌ....................||৫||

পিত্তাদোষ্ঠকোপে তীক্ষ্ণাসহত্বাদিগুণাবোষ্ঠৌ|| চিত্তৌ ব্যাপ্তৌ||৫||

Adhikarana kaphauShThakopaH (6) · Śloka 6

..............................কফাত্ পুনঃ| শীতাসহৌ গুরুশূনৌ সবর্ণপিটকাচিতৌ||৬||

কফাদোষ্ঠকোপে শীতাসহত্বাদিগুণৌ|| শূনৌ শোফযুক্তৌ||৬||

Adhikarana sannipAtauShThakopaH (7) · Śloka 7

সন্নিপাতাদনেকাভৌ দুর্গন্ধাস্রবপিচ্ছিলৌ| অকস্মান্ম্লানসংশূনরুজৌ বিষমপাকিনৌ||৭||

সন্নিপাতাদোষ্ঠকোপে অনেকাভৌ নানাবর্ণৌ দুর্গন্ধাদিগুণৌ চ অকস্মাদকারণং ম্লানত্বাদিগুণো যযোঃ| তেন কদাচিন্ম্লানৌ কদাচিত্ সংশূনৌ কদাচিত্ সরুজৌ কদাচিচ্চারুজৌ| বিষমপাকিনৌ ক্বচিত্ সপাকৌ ক্বচিত্ কঠিনাবিত্যর্থঃ||৭||

Adhikarana raktauShThakopo~arbuda~jca (8) · Śloka 8

রক্তোপসৃষ্টৌ রুধিরং স্রবতঃ শোণিতপ্রভৌ| খর্জূরসদৃশং চাত্র ক্ষীণে রক্তেঽর্বুদং ভবেত্||৮||

রক্তোপসৃষ্টৌ রক্তার্দিতাবোষ্ঠৌ রক্তবর্ণৌ ভূত্বা শোণিতং স্রবতঃ|| অত্র চ রক্তৌষ্ঠকোপে রক্তে স্রাবাত্ক্ষীণে খর্জূরসদৃশমর্বুদং ভবেত্ ||৮||

Adhikarana mAMsauShThakopaH (9) · Śloka 9

মাংসপিণ্ডোপমৌ মাংসাত্স্যাতাং মূর্চ্ছত্কৃমী ক্রমাত্||৯||

মাংসাদ্ দুষ্টান্মাংসপিণ্ডোপমাবৌষ্ঠো ক্রমাচ্চ মূর্চ্ছত্ কৃমী স্যাতাম্|| ৯||

Adhikarana medauShThakopaH (10) · Śloka 10

তলাভশ্বযথুক্লেদৌ সকণ্ড্বৌ মেদসা মৃদূ||১০||

মেদসা দুষ্টেনোষ্ঠৌ তৈলাভশ্বযথুক্লেদৌ তৈলাভৌ শ্বযথুক্লেদৌ যযোস্তৌ তথোক্তৌ সক্ণ্ড্বৌ কণ্ডূযুক্তৌ মৃদূ চ ভবতঃ||১০||

Adhikarana kShatauShThakopaH (11) · Śloka 11

ক্ষতজাববদীর্যেতে পাট্যেতে চাসকৃত্ পুনঃ| গ্রথিতৌ চ পুনঃ স্যাতাং কণ্ডূলৌ দশনচ্ছদৌ||১১||

ক্ষতজাবোষ্ঠৌ যৌ ক্ষতেন কুপিতৌ তযোরবদরণাদিকং লিঙ্গম্| (পুনস্তথাপ্যচিকিত্সিতে সতি গ্রথিতৌ কণ্ডূলৌ কণ্ডূযুক্তৌ স্যাতাম্)|| ১১||

Adhikarana jAlArbudam (12) · Śloka 12

জলবুদ্বুদবদ্বাতকফাদোষ্ঠে জলার্বুদম্||১২||

বাতকফাদ্ধেতোর্জলবুদ্বুদবজ্জলার্বুদমোষ্ঠে ভবতি ইত্যোষ্ঠে একাদশ|| ১২||

Adhikarana gaNDAlajI (13) · Śloka 13

গণ্ডালজীস্থিরঃ শোফো গণ্ডে দাহরুজান্বিতঃ||১৩||

দাহাদ্যন্বিতঃ স্থিরশ্চাচলো গণ্ডে যঃ শোফঃ স গণ্ডালজী ইতি গণ্ড একঃ||১৩||

Adhikarana SItadantaH (14) · Śloka 14

বাতাদুষ্ণাসহাদন্তাঃ শীতস্পর্শাধিকব্যথাঃ| দাল্যন্ত ইব শূলেন শীতাখ্যো দালনশ্চ সঃ||১৪||

বাতাদ্ধেতোরুষ্ণাসত্বাদিগুণাদন্তা ভবন্তি| স রোগো নাম্না শীতো দালনশ্চোচ্যতে| (শূলেন দাল্যন্ত ইবেত্যনেন শূলস্যাতিপীডাকরত্বং সূচিতম্ )||১৪||

Adhikarana dantaharShaH (15) · Śloka 15

দন্তহর্ষে প্রবাতাম্লশীতভক্ষাক্ষমা দ্বিজাঃ| ভবন্ত্যম্লাশনেনৈব সরুজশ্চলিতা ইব||১৫||

বাতাদেব দন্তহর্ষাখ্যে রোগে প্রবাতাদ্যক্ষমা আম্লাশনেনৈব সরুজশ্চলিতা ইব দন্তা ভবন্তি| প্রবাতে অম্লশীতযোর্ভক্ষে ভক্ষণে চাক্ষমা অশক্তাঃ| অত্রাঽম্লশব্দো রসবাচী| অম্লাশনেনৈবেত্যত্রাঽম্লশব্দো বৃক্ষাম্লবাচী ||১৫||

Adhikarana dantaBedaH (16) · Śloka 16

দন্তভেদে দ্বিজাস্তোদভেদরুক্স্ফুটনান্বিতাঃ||১৬||

দন্তভেদাখ্যে রোগে দ্বিজা দন্তাস্তোদভেদাদ্যন্বিতা ভবতি| (অত্র রুক্তোদৌ দন্তমূলে| স্ফুটনভেদৌ দন্ত এবেতি মন্তব্যম্)||১৬||

Adhikarana dantacAlaH (17) · Śloka 17

চালশ্চলদ্ভির্দশনৈর্ভক্ষণাদধিকব্যথৈঃ||১৭||

চালো নাম রোগশ্চলদ্ভির্ভক্ষণাদধিকব্যথৈশ্চ দশনৈর্ভবতি| (চলিদ্ভঃ কম্পমানৈর্ভক্ষণাদ্ যস্য কস্যাপি চর্বণাদধিকা পূর্বস্মাদতিরিক্তা ব্যথা পীডা যেষাং তৈঃ)||১৭||

Adhikarana karAlaH (18) · Śloka 18

করালস্তু করালানাং দশনানাং সমুদ্ভবঃ||১৮||

স করালো নাম রোগো যঃ করালানাং বিকটানাং দন্তানাং সমুদ্গমঃ||১৮||

Adhikarana adhidantaH (19) · Śloka 19

দন্তোঽধিকোঽধিদন্তাখ্যঃ স চোক্তঃ খলবর্দ্ধনঃ| জাযমানেঽতিরুগ্দন্তে জাতে তত্র তু শাম্যতি||১৯||

যস্তু সন্নিবেশাদধিকো দন্তঃ সোঽধিদন্তাখ্যো রোগঃ তস্যৈব খলবর্ধন ইতি নাম| তত্র চাধিদন্তে জাযমানে রুগ্জাযতে জাতে তু তস্মিন্ রুক্ শাম্যতি|| ১৯||

Adhikarana dantaSarkarA (20) · Śloka 20

অধাবনান্মলো দন্তে কফো বা বাতশোষিতঃ| পূতিগন্ধিঃ স্থিরীভূতঃ শর্করা...........||২০||

দন্তানামধাবনাদপ্রক্ষালনাদ্যোঽন্নাদিমলঃ শ্লেষ্মা বা বাতেন শোষিতঃ সন্ পূতিগন্ধিঃ স্থিরীভূতশ্চ স নাম্না শর্করেত্যুচ্যতে||২০||

Adhikarana dantakapAlikA (21) · Śloka 21

..........................সাঽপ্যুপেক্ষিতা| শতাযত্যণুশো দন্তকপালানি কপালিকা||২১||

সাঽপি শর্করোপেক্ষিতা সত্যণুশোঽল্পশো দন্তকপালানি শাতযতি স কপালিকা নাম রোগঃ||২১||

Adhikarana shyAvadantaH (22) · Śloka 22

শ্যাবঃ শ্যাবত্বমাযাতো রক্তপিত্তানিলৈর্দ্বিজঃ||২২||

দ্বিজো দন্তো রক্তাদিভিঃ শ্যাববর্ণত্বমাযাতঃ শ্যাবো নাম রোগো ভবতি||২২||

Adhikarana kRumidantaH (23) · Śloka 23

সমূলং দন্তমাশ্রিত্য দোষৈরুল্বণমারুতৈঃ| শোষিতে মজ্জ্ঞি সুষিরে দন্তেঽন্নমলপূরিতে| পূতিত্বাত্কৃমযঃ সূক্ষ্মা জাযন্তে জাযতে ততঃ| অহেতুতীব্রার্ত্তিশমঃ সসংরম্ভো সিতশ্চলঃ| প্রলূনঃ পূযরক্তস্রুত্স চোক্তঃ কৃমিদন্তকঃ||২৩||

উল্বণমারুতৈর্মারুতাধিকৈস্ত্রিভির্দোষৈঃ সমূলং মূলসংহিতং দন্তমাশ্রিত্য তন্মজ্জনি শোষিতে অত এব চান্তর্দন্তে সুষিরেঽন্নমলপূরিতে সতি তেন মলেন পূতিত্বাত্ সূক্ষ্মাঃ কৃমযো জাযন্তে| ততশ্চাহেত্বকারণমেব তীব্রার্ত্তির্জাযতে| অকারণমেব তস্যাঃ শমশ্চ| সসংরম্ভ ইত্যাদি প্রকরণাদ্ দন্তঃ| প্রলূন্ উদ্ধূতঃ| ছিন্ন ইত্যর্থঃ| সঃ রোগঃ কৃমিদন্তাখ্য উক্তঃ| ইতি দন্তে দশ রোগাঃ||২৩||

Adhikarana shItAdaH (24) · Śloka 24

শ্লেষ্মরক্তেন পূতীনি বহন্ত্যস্রমহেতুকম্| শীর্যন্তে দন্তমাংসানি মৃদুক্লিন্নাসিতানি চ| শিতাদোঽসৌ..................................||২৪||

শ্লেষ্মরক্তেন হেতুনা পূতীনি দুর্গন্ধিনী দন্তমাংসান্যহেতুকমেবাস্রং বহন্তি| মৃদ্বাদিগুণযুক্তানি চ ভবন্তি শির্যন্তে চাসৌ রোগঃ শীতাদঃ||২৪||

Adhikarana upakushaH (25) · Śloka 25

.............উপকুশঃ পাকঃ পিত্তাসৃগুদ্ভবঃ| দন্তমাংসানি দহ্যন্তে রক্তান্যুত্সেধবন্ত্যতঃ| কণ্ডূমন্তি স্রবন্ত্যস্রমাধ্মাযন্তেঽসৃজি স্থিতে| চলা মন্দরুজো দন্তাঃ পূতিবক্ত্রং চ জাযতে||২৫||

পিত্তাসৃগুদ্ভবো যো দন্তমাংসানাং পাকঃ স নাম্নোপকুশঃ| তত্র দন্তমাংসানাং দাহো রক্তত্বগুত্সেধশ্চ ভবতি| অতশ্চোত্সেধাত্ দন্তমাংসানি কণ্ডূমন্ত্যস্রং চ স্রবন্তি| অসৃজি রক্তে স্থিতে রুদ্ধে আধ্মাযন্তে পরিপূর্যন্তে দশনাশ্চ চলা মন্দরুজশ্চ ভবন্তি বক্ত্রং চ পূতি জাযতে||২৫||

Adhikarana dantapuppuTaH (26) · Śloka 26

দন্তযোস্ত্রিষু বা শোফো বদরাস্থিনিভো ঘনঃ| কফাস্রাত্তীব্ররুক্শীঘ্রং পচ্যতে দন্তপুপ্পুটঃ||২৬||

দন্তযোরিতি দ্বযোস্ত্রিষু বা দন্তেষু মূলোষ্বিতি প্রকরণাত্| কফাস্রাদ্ধেতোর্বদরাস্থিনিভো ঘনস্তীব্ররুক্ চ শোফো ভবতি| স চ শীঘ্রং পচ্যতে| স নাম্না দন্তপুপ্পুটঃ||২৬||

Adhikarana dantavidradhiH (27) · Śloka 27

দন্তমাংসে মলৈঃ সাস্রৈর্বাহ্যন্তঃ শ্বযথুর্গুরুঃ| সরুগ্দাহঃ স্রবেদ্ভিন্নঃ পূযাস্রং দন্তবিদ্রধিঃ||২৭||

সাস্রৈঃ সরক্তৈর্বাতাদিভিস্ত্রিভির্দোষৈর্দন্তমাংসে অন্তর্বহিশ্চ গুরুঃ সরুগ্দাহশ্চ শ্বযথুর্ভবতি| স চ ভিন্নঃ পূযাস্রং স্রবেত্| স রোগো নাম্না দন্তাবিদ্রধিঃ||২৭||

Adhikarana suShiraH (28) · Śloka 28

শ্বযথুর্দন্তমূলেষু রুজাবান্ রক্তপিত্তজঃ| লালাস্রাবী স সুষিরো দন্তমাংসপ্রশাতনঃ||২৮||

দন্তমূলেষু দন্তোত্পত্তিস্থানেষু রক্তপিত্তজো রুজাবান্ রুজাযুক্তঃ লালাস্রাবী লালাস্রবযুক্তো দন্তমাংসপ্রশাতনশ্চ যঃ শ্বযথুঃ স নাম্না সুষিরঃ| দন্তমাংসং প্রকর্ষেণ শাতযতীতি দন্তমাংসপ্রশাতনঃ||২৮||

Adhikarana mahAsuShiraH (29) · Śloka 29

স সন্নিপাতজ্বরবান্ সপূযরুধিরস্রুতিঃ| মহাসুষির ইত্যুক্তো বিশীর্ণদ্বিজবন্ধনঃ||২৯||

স এব শোফঃ সন্নিপাতজ্বরাদিনা যুক্তো বিশ্লিষ্টদন্তবন্ধনস্থানশ্চ নাম্না মহাসুষির ইত্যুক্তঃ||২৯||

Adhikarana adhimAMsakaH (30) · Śloka 30

দন্তান্তে কীলবচ্ছোফো হনুকর্ণরুজাকরঃ| প্রতিহন্ত্যভ্যবহৃতিং শ্লেষ্মণা সোঽধিমাংসকঃ||৩০||

শ্লেষ্মণা হেতুনা দন্তান্তে দন্তমালাবিচ্ছেদে হন্বাদিরুজাকরো যঃ শ্বযথুরভ্যবহৃতিং ভোজনং প্রতিহন্ত্যন্তরা শল্যভূতত্বাত্ স রোগো নাম্নাঽধিমাংসকঃ||৩০||

Adhikarana vidarBaH (31) · Śloka 31

ঘৃষ্টেষু দন্তমাংসেষু সংরম্ভো জাযতে মহান্| যস্মিংশ্চলন্তি দন্তাশ্চ স বিদর্ভোঽভিঘাতজঃ||৩১||

স বিদর্ভো নামাভিঘাতজো রোগো ভবতি| যো যেন কেনচিত্ ঘৃষ্টেষু দন্তমাংসেষু মহান্ সংরম্ভো জাযতে| যস্মিন্ দন্তাশ্চাচলাশ্চলন্তি||৩১||

Adhikarana dantanADyaH pa~jca (33) · Śloka 33

দন্তমাংসাশ্রিতান্ রোগান্ যঃ সাধ্যানপ্যুপেক্ষতে| অন্তস্তস্যাস্রবন্ দোষঃ সূক্ষ্মাং সঞ্জনযেদ্গতিম্| পূযং মুহুঃ সা স্রবতি ত্বঙ্মাংসাস্থিপ্রভেদিনী| তাঃ পুনঃ পঞ্চ বিজ্ঞেযা লক্ষণৈঃ স্বৈর্যথোদিতৈঃ||৩৩||

যঃ পুরুষঃ সাধ্যানপি দন্তমাংসাশ্রিতান্ রোগানুপেক্ষতে তস্যান্তরস্রবন্ গৃহ্ণন্ দোষাঃ সূক্ষ্মাং গতিং নাডীং সঞ্জনযেত্| সা চ নাডী ত্বগাদিভেদিনী মুহুঃ পূযং স্রবতি| (যঃ পুরুষঃ সাধ্যান্ সাধযিতব্যান্ শীতাদাদীনুপেক্ষতে ন সাধযতি অপি শব্দান্ন কেবলমন্যরোগোপেক্ষযা দোষদিভিঃ স্বযমপি জাযত ইতি সূচিতম্| তস্যান্তঃস্থিতো দোষঃ অস্রবন্ স্রোতোরোধাদনির্গচ্ছন্| দোষশব্দেন পূযং গৃহ্যতে)| তাঃ পুনর্নাড্যঃ পঞ্চ বিজ্ঞেযাঃ| কথমিত্যাহ-স্বৈর্নাডীবিজ্ঞাননির্দিষ্টৈঃ পৃথগ্দোষসন্নিপাতশল্যভেদেন বাতাত্ সরুগিত্যাদিভির্লক্ষণৈর্যথোদিতৈঃ| এবং দন্তমূলে ত্রযোদশ রোগাঃ||৩৩||

Adhikarana vAtAdidUShitA - jihvA (34) · Śloka 34

শাকপত্রখরা স্রস্তা স্ফুটিতা বাতদূষিতা| জিহ্বা পিত্তাত্সদাহোষা রক্তৈর্মাসাঙ্কুরৈশ্চিতা| শাল্মলীকণ্টকাভৈস্তু কফেন বহলা গুরুঃ||৩৪||

বাতদূষিতা জিহ্বা শাকতরুপত্রবত্ খরা স্রস্তা চ নিবন্ধনাত্ ভবতি স্ফুটিতা চ| পিত্তাদ্ধেতোর্দাহাদিযুক্তা জিহ্বা ভবতি| কফেন হেতুনা দূষিতা জিহ্বা তু শাল্মলীকণ্টকাভৈর্মাংসাঙ্কুরৈশ্চিতা ব্যাপ্তা বহলা গুরুশ্চ ভবতি||৩৪||

Adhikarana alasaH (35) · Śloka 35

কফপিত্তাদধঃ শোফো জিহ্বাস্তম্ভকৃদুন্নতঃ| মত্স্যগন্ধির্ভবেত্ পক্বঃ সোঽলসো মাংসশাতনঃ||৩৫||

জিহ্বাযা অধোভাগে কফপিত্তাচ্ছোফো জিহ্বাস্তম্ভকৃদুন্নতশ্চ ভবতি স চ পক্বঃ সন্ মত্স্যগন্ধির্ভবেন্মাংসশাতনশ্চ| স রোগং নাম্নাঽলসঃ||৩৫||

Adhikarana adhijihvA (36) · Śloka 36

প্রবন্ধনেঽধো জিহ্বাযাঃ শোফো জিহ্বাগ্রসন্নিভঃ| সাঙ্কুরঃ কফপিত্তাস্রৈর্লালোষাস্তম্ভবান্ খরঃ| অধিজিহ্বাঃ সরুক্কণ্ডূর্বাক্যাহারবিঘাতকৃত্||৩৬||

জিহ্বাযা অধোভাগে প্রবন্ধনে মূলে জিহ্বাগ্রসন্নিভঃ সাঙ্কুরশ্চ সঃ শোফঃ কফাদিভির্লালাদিযুক্তঃ খরঃ খরস্পর্শো রুগাদিকৃচ্চ ভবতি স রোগো নাম্না অধিজিহ্বঃ| বিঘাতশব্দঃ বাক্যাহারাভ্যাং সম্বধ্যতে||৩৬||

Adhikarana upajihvA (37) · Śloka 37

তাদৃগেবোপজিহ্বাস্তু জিহ্বাযা উপরি স্থিতঃ||৩৭||

তাদৃগেবৈবংলক্ষণ এব জিহ্বাযা উপৈ স্থিতঃ শোফ উপজিহ্বাখ্যো রোগঃ| ইতি জিহ্বাযাং ষট্||৩৭||

Adhikarana tAlupiTakA (38) · Śloka 38

তালুমাংসেঽলিনাদ্ দুষ্টে পিটকাঃ সরুজাঃ খরাঃ| বহ্ব্যো ঘনাস্রাবযুতাস্তাস্তালুপিটকাঃ স্মৃতাঃ|৩৮|

অনিলাত্তালুমাংসে দুষ্টে সরুজত্বাদিগুণা যাঃ পিটকা ভবন্তি তা নাম্না তালুপিটকাঃ স্মৃতাঃ||৩৮||

Adhikarana galaSuNDikA (38) · Śloka 38

তালমূলে কফাত্সাস্রান্মত্স্যবস্তিনিভো মৃদুঃ| প্রলম্বঃ পিচ্ছিলঃ শোফো নাসযাহারমীরযন্| কণ্ঠোপরোধতৃট্কাসবমিকৃদ্ গলশুণ্ডিকা||৩৮||

সাস্রাত্ কফাত্তালুমূলে যঃ শোফো ভবতি| কিম্ভূত ইত্যাহ-মত্স্যবস্তিনিভত্বাদিস্বরূপঃ| মত্স্যবস্তিঃ শিক্লমত্স্যেষু মধ্যে দৃশ্যতে| স শোফো ভুজ্যমানমাহারং নাসরযেন্ প্রেরযন্ কণ্ঠোপরোধাদিকৃদ্ ভবতি| স রোগো নাম্না গলশুণ্ডিকা||৩৮||

Adhikarana tAlusaMhatiH (39) · Śloka 39

তালুমধ্যে নিরুঙ্মাংসং সংহতং তালুসংহতিঃ||৩৯||

তালুমধ্যে রুজযা বিনা যন্মাংসং সংহতং ভবতি স রোগস্তালুসংহতির্নাম্না| সংহতমেকত্র পুঞ্জীভূতম্||৩৯||

Adhikarana tAlvarbudam (40) · Śloka 40

পদ্মাকৃতিস্তালুমধ্যে রক্তাচ্ছ্বযথুরর্বুদম্||৪০||

রক্তাদ্ধেতোস্তালুমধ্যে যঃ পদ্মাকৃতিঃ শ্বযথুঃ স নাম্নাঽর্বুদং ভবতি||৪০||

Adhikarana kacCapaH (41) · Śloka 41

কচ্ছপঃ কচ্ছপাকারশ্চিরবৃদ্ধিঃ কফাদরুক্||৪১||

তত্রৈব তালুমধ্যে কফাদ্ধেতোশ্চিরবৃদ্ধী রুজারহিতশ্চ যঃ কচ্ছপাকারঃ শ্বযথুঃ স নাম্না কচ্ছপঃ||৪১||

Adhikarana tAlupuppuTaH (42) · Śloka 42

কোলাভঃ শ্লেষ্মমেদোভ্যাং পুপ্পুটো নীরুজঃ স্থিরঃ||৪২||

তত্রৈব শ্লেষ্মমেদোভ্যাং বদরসদৃশঃ স্থিরো নীরুজশ্চ যঃ শ্বযথুঃ স নাম্না পুপ্পুটঃ|| ৪২||

Adhikarana tAlupAkaH (43) · Śloka 43

পিত্তেন পাকঃ পাকাখ্যঃ পূযাস্রাবী মহারুজঃ||৪৩||

পিত্তেন তালুমধ্যে পূযাস্রাবী মহারুজশ্চ যঃ পাকঃ স রোগো নাম্না পাকঃ|| ৪৩||

Adhikarana tAluSoShaH (44) · Śloka 44

বাতপিত্তজ্বরাযাসৈস্তালুশোষস্তদাহ্বযঃ||৪৪||

বাতপিত্তাদিভিস্তালুনি শোষো ভবতি স রোগস্তদাহ্বযস্তালুশোষনামেত্যর্থঃ| ইত্যষ্টৌ তালুরোগাঃ|| ৪৪||

Adhikarana rohiNI (45) · Śloka 45

জিহ্বাপ্রবন্ধজাঃ কণ্ঠে দারুণা মার্গরোধিনঃ| মাংসাঙ্কুরাঃ শীঘ্রচযা রোহিণী শীঘ্রকারিণী| কণ্ঠাস্যশোষকৃদ্বাতাত্সা হনুঃশ্রোত্ররুক্করী| পিত্তাজ্জ্বরোষাতৃণ্মোহকণ্ঠধূমাযনান্বিতা| ক্ষিপ্রজা ক্ষিপ্রপাকাতিরাগিণী স্পর্শনাসহা| কফেন পিচ্ছিলা পাণ্ডুরসৃজা স্ফোটকাচিতা| তপ্তাঙ্গারনিভা কর্ণরুক্করী পিত্তজাকৃতিঃ| গম্ভীরপাকা নিচযাত্ সর্বলিঙ্গসমন্বিতা||৪৫||

কণ্ঠে কণ্ঠস্যান্তর্ভাগে জিহ্বাপ্রবন্ধনে জিহ্বামূলে জাতা যে দারুণাদিগুণা মাংসাঙ্কুরাস্তে রোহিণী নাম রোগে ভবতি| সা চ শীঘ্রকারিণী শীঘ্রমেব স্বং কর্ম মারণাখ্যং করোতি| কণ্ঠেত্যাদি রুক্পর্যন্তং বাতজরোহিণীলক্ষণম্| জ্বরাদিকং স্পর্শনাসহান্তং পিত্তরোহিণ্যাঃ| কফেন রোহিণী পিচ্ছিলা পৈচ্ছিল্যযুক্তা পাণ্ডুঃ পাণ্ডূরবর্ণা চ ভবতি| অসৃজা দোষদুষ্টেন রোহিণী স্ফোটকাচিতত্বাদিগুণা পিত্তজাকৃতিঃ পিত্তরোহিণীসমানলক্ষণা চ| নিচযাত্ সন্নিপাতাদ্রোহিণী গম্ভীরপাকাঽবগাঢপাকা সর্বৈর্বাতাদিরোহিণীলিঙ্গৈঃ সমন্বিতা চ ভবতি|| ৪৫||

Adhikarana SAlUkaH (46) · Śloka 46

দোষৈঃ কফোল্বণৈঃ শোফঃ কোলবত্ গ্রথিতোন্নতঃ| শূককণ্টকবত্ কণ্ঠে শালূকো মার্গরোধনঃ||৪৬||

কফোল্বণৈস্ত্রিভির্দোষৈর্বদরবত্ গ্রথিতশ্চোন্নতশ্চ শূকবত্ কণ্টকবচ্চ স্রোতোরোধনো যঃ শ্বযথুঃ কণ্ঠে ভবতি স নাম্না শালূকঃ|| ৪৬||

Adhikarana vRundaH (47) · Śloka 47

বৃন্দো বৃত্তোন্নতো দাহজ্বরকৃদ্গলপার্শ্বগঃ||৪৭||

তৈরেব দোষৈর্গলস্য পার্শ্বগো বৃত্তোন্নতো দাহজ্বরকৃচ্চ যঃ শ্বযথুঃ স নাম্না বৃন্দঃ| ( অনুক্তকারণবিশেষত্বাত্ পূর্বোক্তৈরেব দোষৈঃ কৃতো গলপার্শ্বগঃ গলমার্গস্য বামদক্ষিণান্যতরপার্শ্বগতঃ বৃত্তশ্চোন্নতশ্চ বৃত্তোন্নতঃ| বৃত্তো বর্তুলঃ| দাহং জ্বরং চ করোতীতি দাহজ্বরকৃত্ দাহাদিজ্বরং করোতীতি বা য এবংবিধঃ শোফঃ স বৃন্দাখ্যো রোগঃ )||৪৭||

Adhikarana tuNDikerikA (48) · Śloka 48

হনুসন্ধ্যাশ্রিতঃ কণ্ঠে কার্পসীফলসন্নিভঃ| পিচ্ছলো মন্দরুক্শোফঃ কঠিনস্তুণ্ডিকেরিকা||৪৮||

তৈরেব যঃ শ্বযথুঃ কণ্ঠে হনুসন্ধিমাশ্রিত্য জাতঃ কার্পাসীফলসদৃশঃ পিচ্ছিলত্বাদিগুণশ্চ ভবতি স নাম্না তুণ্ডিকেরিকা||৪৮||

Adhikarana galaughaH (49) · Śloka 49

বাহ্যান্তঃশ্বযথুর্ঘোরো গলমার্গার্গলোপমঃ| গলৌঘো মূর্দ্ধগুরুতাতন্দ্রালালাজ্বরপ্রদঃ||৪৯||

তৈরেব যঃ শ্বযথুঃ কণ্ঠে বাহ্যান্তঃ বহির্ভাগেঽন্তর্ভাগে চ ঘোরো ভযঙ্করঃ গলস্রোতসোঽর্গলোপমো দ্বারবন্ধনসদৃশো মূর্ধগুরুতাদিপ্রদশ্চ স নাম্না গলৌঘঃ| (তপ্তাঙ্গারনিভা তপ্তাঙ্গারসদৃশী তাপদ্বিনাঙ্গারস্যাসম্ভবাদঙ্গারশব্দেনৈব তাপে সিদ্ধে পুনরপি তপ্তাঙ্গারনিভেত্যুক্তত্বাদস্য তাপরাগাদ্যতিশযো ধ্বন্যতে)|| ৪৯||

Adhikarana valayam (50) · Śloka 50

বলযং নাতিরুক্শোফস্তদ্বদেবাযতোন্নতঃ||৫০||

তৈরেব দোষৈস্তদ্বদেব বাহ্যান্তর্গলমার্গার্গলোপমো নাতিরুগাযতোন্নতশ্চ যঃ শোফঃ স বলযমিতি নাম্না ভবতি||৫০||

Adhikarana gilAyukaH (51) · Śloka 51

মাংসকীলো গলে দোষৈরেকোঽনেকোথবাল্পরুক্| কৃচ্ছ্রোছ্বাসোঽভ্যবহৃতিঃ পৃথুমূলো গিলাযুকঃ||৫১||

দোষৈর্বাতাদিভির্গলে একো বাঽনেকো বা কৃচ্ছ্রোছ্বাসঃ কৃচ্ছ্রাভ্যবহৃতিশ্চ যো মাংসাঙ্কুরো ভবতি স নাম্না গিলাযুকঃ||৫১||

Adhikarana shataghnI (52) · Śloka 52

ভূরিমাংসাঙ্কুরবৃতা তীব্রতৃড্জ্বরমূর্দ্ধরুক্| শতঘ্নী নিচিতা বর্তিঃ শতঘ্নীবাতিরুক্করী||৫২||

তৈরেব দোষৈঃ কৃতা ভূরিভিঃ প্রভূতৈর্মাসাঙ্কুরৈবৃতা পরিবৃতা তীব্রতৃডাদিযুক্তা গলে নিচিতা কণ্ঠস্রোতসি সমন্তাদ্ব্যাপ্তা যা বর্ত্তিরতিরুক্করী ভবতি স রুজাযাঽকৃত্যা চ শতঘ্নীসাদৃশ্যাচ্ছতঘ্নী| শতঘ্ন্যাখ্যশ্চাযুধঃ কণ্টকাচিতা যষ্টির্ভবতি||৫২||

Adhikarana galavidradhiH (53) · Śloka 53

ব্যাপ্তসর্বগলঃ শীঘ্রজন্মপাকো মহারুজঃ| পূতিপূযনিভাস্রাবী শ্বযথুর্গলবিদ্রধিঃ||৫৩||

ব্যাপ্তসর্বগলত্বাদিযুক্তঃ শ্বযথুর্নাম্না গলবিদ্রধিঃ| শীঘ্রং জন্মপাকৌ যস্য স তথোক্তঃ| ব্যাপ্তসর্বগলঃ গলে সমন্তাদ্ব্যাপ্তঃ| অত্র সর্বশব্দেন গলস্য বাহ্যাভ্যন্তরপরিগ্রহঃ| পূতিপূযনিভশব্দেন পক্বোঽপ্যন্যবিদ্রধিবত্ পূযং ন স্রবতি তত্তুল্যং কফমেব স্রবতীত্যর্থঃ|| ৫৩||

Adhikarana galArbudam (54) · Śloka 54

জিহ্বাবসানে কণ্ঠাদাবপাকং শ্বযথুং মলাঃ| জনযন্তি স্থিরং রক্তং নীরুজং তদ্ গলার্বুদম্||৫৪||

মলা বাতাদযো জিহ্বায অবসানে কণ্ঠস্যাদৌ প্রারম্ভে বা পাকরহিতং স্থিরমচলং লোহিতং রুজারহিতং চ যং শ্বযথুং জনযন্তি তদ্ গলার্বুদং ভবতি| (জিহ্বাযা অবসানে অন্তে হৃদযে জিহ্বাবসানমিতি ধন্বন্তরিঃ| হৃদযাত্ পচ্যমানানামাধ্মানাদ্রুক্মসারবত্| কফশোণিতমাংসানাং সারো জিহ্বা প্রজাযতে| অত্র কণ্ঠরোগপ্রসঙ্গাত্ জত্রোরুপরি জিহ্বাবসানমিতি মন্তব্যম্ )||৫৪||

Adhikarana galagaNDaH (55) · Śloka 55

পবনশ্লেষ্মমেদোভির্গলগণ্ডো ভবেদ্ বহিঃ| বর্দ্ধমানঃ স কালেন মুষ্কবল্লম্বতে নিরুক্||৫৫||

পবনাদিভির্বহিস্ত্বগ্ভাগে গলগণ্ডাখ্যো রোগো ভবেত্| স চ কালেন বর্দ্ধমানো নিরুক্ সন্ মুষ্কবদ্ বৃষণবল্লম্বতে||৫৫||

Adhikarana galagaNDaBedAH (56) · Śloka 56

কৃষ্ণারুণো বা তোদাঢ্যঃ স বাতাত্কৃষ্ণরাজিমান্| বৃদ্ধস্তালুগলে শোষং কুর্যাচ্চ বিরসাস্যতাম্| স্থিরঃ সবর্ণঃ কণ্ডূমান্ শীতস্পর্শো গুরুঃ কফাত্| বৃদ্ধস্তালুগলে লেপং কুর্যাচ্চ মধুরাস্যতাম্| মেদসা শ্লেষ্মবৃদ্ধানিবৃদ্ধ্যোঃ সোঽনুবিধীযতে| দেহং বৃদ্ধশ্চ কুরুতে গলে শব্দং স্বরেঽল্পতাম্||৫৬||

তত্র কৃষ্ণ ইত্যাদিনা পবনহেতুকস্য গলগণ্ডস্য লিঙ্গম্| শ্লেষ্মজস্য স্থির ইত্যাদি| মেদসা হেতোর্গলগণ্ডে শ্লেষ্মবত্ কফগলগণ্ডবত্ লিঙ্গম্| স গলগণ্ডো হানিবৃদ্ধ্যোশ্চ দেহমনুবিধীযতে| যদৈব দেহো বর্দ্ধতে তদৈব গলগণ্ডোঽপি বর্দ্ধতে| যদৈব দেহোঽপচীযতে তদৈব সোঽপীত্যর্থঃ| স চ মেদোজো গলে গণ্ডো বৃদ্ধো গলশব্দাদিকং কুরুতে|| ৫৬||

Adhikarana svarahA (57) · Śloka 57

শ্লেষ্মরুদ্ধানিলগতিঃ শুষ্ককণ্ঠো হতস্বরঃ| তাম্যন্ প্রসক্তং শ্বসিতি যেন স স্বরহাঽনিলাত্||৫৭||

যেন রোগেণ পুরুষঃ শ্লেষ্মরুদ্ধানিলগতিঃ শুষ্ককণ্ঠত্বাদিযুক্তো ভবতি সোঽনিলাজ্জযতে স নাম্না স্বরহা| (শ্লেষ্মণা রুদ্ধা অনিলস্য প্রাণাখ্যস্য মরুতো গতির্গমনং যস্য| শুষ্কমনার্দ্রং কণ্ঠং যস্য| হতস্বরঃ সন্নস্বরঃ তাম্যন্ গ্লপিতেন্দ্রিযঃ| প্রসক্তং কফাবৃতকণ্ঠমার্গত্বাত্ প্রকর্ষেণ সক্তম্| শ্বসিতি শ্বাসমুক্তিং করোতি )| ইত্যষ্টাদশ গলরোগাঃ||৫৭||

Adhikarana muKapAkaH vAtajaH (58) · Śloka 58

করোতি বদনস্যন্তর্ব্রণান্ সর্বসরোঽনিলঃ| সঞ্চারিণোঽরুণান্ রূক্ষানোষ্ঠৌ তাম্রৌ চলত্বচৌ| জিহ্বা শীতাসহা গুর্বী স্ফুটিতা কণ্টকাচিতা| বিবৃণোতি চ কৃচ্ছ্রেণ মুখং পাকো মুখস্য সঃ||৫৮||

সর্বসরো ব্যাপ্তিমাননিলোঽন্তর্বদনং সঞ্চার্যাদিগুণান্ ব্রণান্ করোতি| সঞ্চারিণোঽনিযতস্থানাঃ ততশ্চোষ্ঠৌ তাম্রৌ তাম্রবর্ণৌ মলত্বচঃ চ ভবতঃ| জিহ্বা শীতাসত্বাদিগুণা| স চাঽঽতুরঃ কৃচ্ছ্রেণ মুখং বিবৃণোতি স রোগো নাম্না মুখপাকঃ||৫৮||

Adhikarana UrdhvagudaH (59) · Śloka 59

অধঃ প্রতিহতো বাযুরর্শোগুল্মকফাদিভিঃ| যাত্যূর্ধ্বং বক্ত্রদৌর্গন্ধ্যং কুর্বন্নূর্ধ্বগুদস্তু সঃ||৫৯||

অর্শোগুল্মাসিভির্বাযুরধঃপ্রতিহতো বক্ত্রদৌর্গন্ধ্যং কুর্বন্ ঊর্ধ্বং যাতি| স রোগো নাম্না ঊর্ধ্বগুদঃ||৫৯||

Adhikarana pittajaH raktajashca mukhapAkaH (60) · Śloka 60

মুখস্য পিত্তজে পাকে দাহোষে তিক্তবক্ত্রতা| ক্ষারোক্ষিতক্ষতসমা ব্রণাস্তদ্বচ্চ রক্তজে||৬০||

পিত্তজমুখপাকে দাহাদিকং লিঙ্গম্| ক্ষারেণোক্ষিতং সিক্তং যত্ ক্ষতং ব্রণস্তত্সমা দাহবেদনাদিগুণা ব্রণঃ| তদ্বদেব রক্তজে||৬০||

Adhikarana kaphajamukhapAkaH (61) · Śloka 61

কফজে মধুরাস্যত্বং কণ্ডূমত্পিচ্ছিলা ব্রণাঃ||৬১||

কফজে মুখপাকে মধুরাস্যত্বাদি লিঙ্গম্| কণ্ডূমন্তশ্চ| তে পিচ্ছিলাশ্চ কণ্ডূমত্পিচ্ছিলাঃ ||৬১||

Adhikarana kaPArbudam (62) · Śloka 62

অন্তঃকপোলমাশ্রিত্য শ্যাবপাণ্ডুকফোঽর্বুদম্| কুর্যাত্তদ্ ঘট্টিতং ছিন্নং মৃদিতং চ বিবর্ধতে||৬২||

অন্তঃকপোলং কপোলান্তর্ভাগমাশ্রিত্য কফঃ শ্যাবপাণ্ড্বর্বুদং কুর্যাত্| তচ্চার্বুদং ঘট্টিতং শাকপত্রাদিনাবঘৄষ্টং ছিন্নং বৃদ্ধিপত্রাদিনা| মৃদিতং বিলাযনায কৃতমর্দনমপি পুনর্বর্দ্ধতে| (সর্বাস্যরোগস্যাস্যান্তঃকপোলকথনমাস্যান্তর্ভাগদ্যোতনার্থম্| আশ্রিত্যেত্যুক্তত্বাত্ প্রবৃদ্ধস্য পুনর্বহির্গতিঃ সূচিতা| বিবর্দ্ধত ইত্যুক্তত্বাত্ ছেদনাদ্যনন্তরজনিতস্য পূর্বস্মাদাধিক্যমপি সূচিতম্)||৬২||

Adhikarana sannipAtamuKapAkaH (63) · Śloka 63

মুখপাকো ভবেত্ সাস্রৈঃ সর্বৈঃ সর্বাকৃতির্মলৈঃ||৬৩||

সাস্রৈঃ সরক্তৈঃ সবৈর্মলৈঃ বাতাদিভির্মুখপাকো নাম সর্বলক্ষণো রোগো ভবেত্| (সর্বাকৃতিঃ সর্বলক্ষণঃ সর্বেষাং বাতাদিমুখপাকানাং লক্ষণৈর্যুক্ত ইত্যর্থঃ)||৬৩||

Adhikarana pUtyAsyatA (64) · Śloka 64

পূত্যাস্যতা চ তৈরেব দন্তকাষ্ঠাদিবিদ্বিষঃ||৬৪||

দন্তকাষ্ঠাদিবিদ্বিষঃ অননুষ্ঠিতদন্তকাষ্ঠাদিকস্য পুরুষস্য আদিশব্দেনাঞ্জননস্যধূমগণ্ডূষাদিপরিগ্রহঃ| তৈরেবেতি সাস্রৈর্মলৈঃ পূত্যাস্যনামা রোগো ভবতি| ইত্যষ্টৌ সর্বাস্যরোগাঃ||৬৪||

Adhikarana mukhAmayAnAM sa~gkhyA (65) · Śloka 65

ওষ্ঠে গণ্ডে দ্বিজে মূলে জিহ্বাযাং তালুকে গলে| বক্ত্রে সর্বত্র চেত্যুক্তা পঞ্চসপ্ততিরামযাঃ| একাদশৈকো দশ চ ত্রযোদশ তথা চ ষট্| অষ্টাবষ্টাদশাষ্টৌ চ ক্রমাত্..............||৬৫||

ইত্যনন্তরোক্তপ্রকারেণৌষ্ঠাদিষ্বষ্টসু স্থানেষু পঞ্চসপ্ততিরামযা উক্তাঃ| কেন বিভাগেনেত্যাহ-একাদশেত্যাদি| ওষ্ঠেষু খণ্ডৌষ্ঠঃ বাতোষ্ঠকোপঃ, পিত্তৌষ্ঠকোপঃ, কফৌষ্ঠকোপঃ, সন্নিপাতৌষ্ঠকোপঃ, রক্তৌষ্ঠকোপঃ, অর্বুদম্ম্ মাংসৌষ্ঠকোপঃ, মেদৌষ্ঠকোপঃ, ক্ষতৌষ্ঠকোপঃ, জলার্বুদাখ্যাঃ ইত্যেকাদশরোগাঃ| গণ্ডে গণ্ডালজ্যাখ্য একো রোগঃ| দ্বিজে দন্তে শীতদন্ত, দন্তহর্ষ, দন্তভেদ, চাল, করালাধিদন্ত, শর্করা, কপালিকা, শ্যাব, কৃমিদন্তাখ্য দশ রোগাঃ| মূলে প্রকরণাদ্দন্তমূলে শীতাদ, উপকুশ, দন্তপুপ্পুট, দন্তবিদ্রধি, সুষির, মহাসুষিরাঽধিমাংস, বিদর্ভাখ্যাঃ পঞ্চভির্নাডীভিঃ সহ ত্রযোদশ রোগা ভবন্তি| জিহ্বাযাং বাতদূষিতা, পিত্তদূষিত্তা, কফদূষিতাঽলসাঽধিজিহ্বোপজিহ্বাকাখ্যাঃ ষড্রোগা ভবন্তি| তালুকে তালুপিটকা, গলশুণ্ডী, তালুসংহতি, তাল্বর্বুদ, কচ্ছপ, তালু-পুপ্পুট, তালুপাক, তালুশোষাখ্যা অষ্টৌ রোগাঃ| গলে বাতরোহিণী, পিত্তরোহিণী, কফরোহিণী, রক্তরোহিণী, সন্নিপাতরোহিণী, শালূক, বৃন্দ, তুণ্ডিকেরী, গলৌঘ, বলয, গিলাযুক, শতঘ্নী, গলবি-দ্রধি, গলার্বুদ, পবনগলগণ্ড, শ্লেষ্মগলগণ্ড মেদোগলগণ্ড, স্বরহাখ্যা অষ্টাদশ রোগা ভবন্তি| সর্বত্রাশেষে বক্ত্রে বাতমুখপাকোঽর্ধ্বগুদ, পিত্তমুখপাক, রক্তমুখপাক, কফমুখপাক, কফার্বুদ, সন্নিপাতমুখপাক, পূত্যাস্যাখ্যা অষ্টৌ রোগা ভবন্তীতি ক্রমার্থঃ| এবমেকীকৃত্যৈতে পঞ্চসপ্ততী রোগাঃ||৬৫||

Adhikarana mukharogANAM sAdhyAsAdhyatA (66-25) · Śloka 25

............................তেষ্বনুপক্রমাঃ| করালো মাংসরক্তৌষ্ঠাবর্বুদানি জলাদ্বিনা| কচ্ছপস্তালুপিটকা গলৌঘঃ সুষিরো মহান্| স্বরঘ্নোর্ধ্বগুদশ্যাবশতঘ্নীবলযালসাঃ| নাড্যোষ্ঠকোপৌ নিচযাদ্রক্তাত্সর্বৈশ্চ রোহিণী| দশনে স্ফুটিতে দন্তভেদঃ পক্বোপজিহ্বকা| গলগণ্ডঃ স্বরভ্রংশী কৃচ্ছ্রোচ্ছ্বাসোঽতিবত্সরঃ| যাপ্যস্তু হর্ষো ভেদশ্চ শেষান্ শস্ত্রৌষধৈর্জযেত্||৬৬|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতাবষ্টাঙ্গসংগ্রহসংহিতাযামুত্তরতন্ত্রে মুখরোগবিজ্ঞানীযো নাম পঞ্চবিংশোঽধ্যাযঃ||২৫||

তেষু মধ্য ইমেঽনুপক্রমাস্ত্যাজ্যাঃ| ক ইত্যাহ-করালো ইত্যাদি| করালো নাম দন্তরোগঃ| মাংসৌষ্ঠরক্তৌষ্ঠাবোষ্ঠরোগৌ| জলাদ্বিনা জলার্বুদমেকং বর্জযিত্বা শেষাণি চত্বার্যর্বুদানীত্যোষ্ঠার্বুদ-গলার্বুদ-তাল্বর্বুদ-কফার্বুদানীত্যেতান্যসাধ্যানি| কচ্ছপো নাম তালুরোগস্তালুপিটকা চ| গলৌঘাখ্যো গলরোগঃ| মহান্ সুষিরঃ মহাসুষিরাখ্যো দন্তমূলরোগঃ তথা স্বরঘ্নাদযশ্চ| স্বরঘ্নাখ্যঃ সর্বাস্যরোগঃ| শ্যাবাখ্যো দন্তরোগঃ, শতঘ্নি কণ্ঠরোগঃ, তদ্বদ্বলযম্| অলসো জিহ্বারোগঃ| এতে চাসাধ্যাঃ| নাডী দন্তমলজা সন্নিপাতজা ত্যাজ্যা| ওষ্ঠকোপঃ সন্নিপাতজোঽসাধ্যঃ| রক্তাত্ সর্বৈঃ রোহিণী চ রক্তসন্নিপাতরোহিণ্যৌ কণ্ঠরোগাবসাধ্যৌ| দন্তভেদাখ্যো রোগো দশনে স্ফুটিত এবাসাধ্যো ন ত্বস্ফুটিতে| উপজিহ্বিকা পক্বা এবাসাধ্যা| গলগণ্ডঃ স্বরভ্রংশী স্বরহা কৃচ্ছ্রোচ্ছ্বাসত্বেন চ যুক্তোঽতিক্রান্তবত্সরশ্চ ত্যাজ্যঃ| দন্তহর্ষো দন্তভেদশ্চ যাপ্যঃ| এভ্যঃ শেষান্ যথাযোগং বক্ষ্যমাণপ্রকারেণ শস্ত্রৈরৌষধৈশ্চ জযেদিতি|| ৬৬|| ইতি শ্রীমন্মহামহোপাধ্যাযেন্দুবিরচিতাযামষ্টাঙ্গসংগ্রহব্যাখ্যাযাং শশিলেখাযামুত্তরতন্ত্রে পঞ্চবিংশোঽধ্যাযঃ||