40. viṣapratiṣēdhaḥ

Adhikarana atha viShapratiShedho nAma catvAriMsho~adhyAyaH, pratij~jA (1) · Śloka 1

অথাতো বিষপ্রতিষেধং নামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

আগন্তুপ্রসঙ্গাদুক্তশিষ্টত্বাদ্বিষচিকিত্সাযা অবসরস্তস্যাশ্চানেকপ্রকারত্বেন বক্ষ্যমাণাত্বাত্ সামান্যেন চিকিত্সাং প্রদর্শযিতুমধ্যায আরভ্যতে (-অথাত ইত্যাদি| বিষপ্রতিষেধং স্থাবরজঙ্গমাদিভেদেনানেকবিধস্য বিষস্য প্রতিষেধং চিকিত্সিতং নিদানাদ্বিনা প্রতিষেধস্য দুষ্করত্বাত্স নিদানমিত্যর্থঃ| শেষং পূর্ববত্)||১||

Adhikarana viShasya prAgutpattiH (2) · Śloka 2

পুরা খল্বমৃতার্থং সুরাসুরৈঃ সলিলনিধের্বিমধ্যমানাত্ ক্রোধ ইব রূপবান্ সত্ত্বং সমুদ্বভূব কৃষ্ণমনলনযনমুর্ধ্ব- প্রদীপ্তকেষং দংষ্ট্রাকরালং ভৈরবারাবরূপম্| তদ্দর্শনাদেব যতো দেবদানবাশ্চ বিষণ্ণাস্তস্মাত্তদ্বিষসংজ্ঞামবাপ||২||

(তত্র পূর্বং বিষস্যোত্পত্তিং দর্শযতি|) ইহ হি বিষচিকিত্সা প্রস্তুতা| বিষস্য চ স্বরূপে জ্ঞাতে তদ্ব্যাধীনাং হেত্বাদিকং জ্ঞেযমতঃ স্বরূপমেব প্রথমমিতিহাসরূপেণোচ্যতে-পুরা খল্বিত্যাদি| পুরা কস্মিংশ্চিত্কালে সুরৈশ্চাসুরৈশ্চাঽমৃতার্থং বিমথ্যমানাজ্জলনিধে রূপবানিব ক্রোধঃ কৃষ্ণত্বাদিগুণং সত্ত্বং সমুদ্বভূব| তস্য সত্ত্বস্য দর্শনমাত্রাদেব দেবা দানবাশ্চ যতো বিষাদং প্রাপ্তাস্তস্মাত্ সত্ত্বং বিষসংজ্ঞামন্বর্থতাং চাবাপ প্রাপ|| ২||

Adhikarana viShasyauShadhiShu nyAsaH sthAvaraviSham (3) · Śloka 3

তত্ সহসৈব সর্বভূতানি নির্দগ্ধুকামমুপযোগবিশেষৈর্বিষ মমৃততাং বিনযমানো ব্রহ্যানুনীযৌষধীষু ন্যস্তবান্| ততস্তত্ স্থাবরাসু মূর্তিষ্বধিবসনাত্ স্থাবরমিত্যুচ্যতে||৩||

উদ্ভূতং তদ্বিষং সহসৈব সর্বভূতানি নির্দগ্ধুকামং যদা তদৈতদমৃততাং প্রাপ্নোতীত্যুপযোগবিশেষযোগ্যতাং তস্য কুর্বন্ ব্রহ্মা তদ্বিষমৌষধিষু বিশিষ্টাস্বেব ন্যস্তবান্ ততস্তদ্বিষং স্থাবরাস্বৌষধ্যাখ্যাসু মূর্তিষ্বধিবসনাত্স্থাবরমিত্যুচ্যতে| ইতি স্থাবরস্য বিষস্য সম্ভবঃ|| ৩||

Adhikarana ja~ggamaviShodbhavaH (4) · Śloka 4

জঙ্গমং পুনঃ পৃথিব্যা ভারাবতারার্থমুরগাদিরূপেণ বিষ্ণূ- র্নির্মমে||৪||

জঙ্গমং তু বিষং ভগবান্ বিষ্ণুর্নির্মমে নির্মিতবান্| কিমর্থমিত্যাহ| পৃথিব্যা ভারাবতারার্থং পৃথিবীতো ভারোঽবরতত্বিতি কৃত্বা| অত্র ভগবানেব প্রমাণম্|| ৪||

Adhikarana sthAvarasya viShasya dashAdhiShThAnAni (5) · Śloka 5

তযোঃ স্থাবরং মূলপত্রপুষ্পফলত্বক্সারনির্যাসক্ষীর ধাতুকন্দভেদাদ্দশাধিষ্ঠানম্| তত্র মূলবিষাণি ক্লীত নকাশ্বমারকগুঞ্জাসুগন্ধকগর্গরককর্করকরঘাটকা দীনি| পত্রবিষং কালপত্রিকা লম্বাবরদকরম্ভার্কাদি নাম্| পুষ্পবিষং বল্লীরেণুককরম্ভমহাকরম্ভাদীনাম্| ফলং কুমুদ্বতীরেণুকাকরম্ভমহাকরম্ভমদনকতুবরকা দীনাম্| ত্বক্সারনির্যাসাঃ করককরঘাটককরম্ভম হাকরম্ভনারাচকাদীনাম্| ক্ষীরং কুমুদ্বতী দন্তীস্নুহ্য র্কজালিনীব্যালাদীনাম্| ধাতবো হরিতালফেনাশ্মভস্ম রক্তপ্রভৃতযঃ| কন্দজানি তু হালাহলকালকূটবত্স নাভশৃঙ্গীসার্ষপজালককর্দমকবৈরাটকমুস্তকমুষ্কক সাক্তুকক্রৌঞ্চকবালকমহাবিষপুণ্ডরীকগালবমূলক মর্কটকর্কটককরবীরকেন্দ্রাযুধসঙ্কোচকলাঙ্গলকতৈল পেযকুশপুষ্পকে তু পুষ্পকরোহিষাঞ্জনাভকাদীনি||৫||

তযোঃ স্থাবরজঙ্গমবিষযোর্মধ্যে স্থাবরং মূলাদিভেদেন দশাশ্রযম্| তত্র ক্লীতনকাদীনি মূলবিষাণি| সুবোধম্| সর্বাণি পঠিতাঽপঠিতানি বিষাশ্রযাণি প্রসিদ্ধ্যৈব ভারতদেষেষু জ্ঞাযন্তে| অস্মাভিস্তুল্যব্যাপ্তিবন্ধনভযান্ন লিখ্যন্তে| শাস্ত্রকৃতা তু মূলাদিমুদ্রযৈব তেষাং জাতিসংগ্রহঃ কৃতঃ| (মূলাদিবিষাণাং যত্নপরৈরপি জ্ঞাতুমশক্যত্বাত্তানি হিমবত্প্রদেশে কিরাতশবরাদিভ্যো জ্ঞেযানীতি নিবন্ধসংগ্রহাখ্যাযাং সুশ্রুতটীকাযাম্)|| ৫||

Adhikarana AshrayabhedAnusAraM prabhAvabhedAH (6) · Śloka 6

তত্র মূলবিষৈরুপযুক্তৈরুদ্বেষ্টনপ্রলাপমোহাঃ প্রজাযন্তে| পত্র বিষৈর্জৃম্ভোদ্বেষ্টনশ্বাসাঃ| পুষ্পবিষৈশ্ছর্দ্যাধ্মানমোহাঃ| ফলবিষৈর্দাহমুষ্কশোফৌ| ত্বক্সারনির্যাসবিষৈঃ প্রসে কাস্যাদৌর্গন্ধ্যপারুষ্যশিরোবেদনাঃ| ক্ষীরবিষৈর্জিহ্বাগৌরবং শকৃদ্ভেদশ্চ| ধাতুবিষৈস্তালুদাহমূর্চ্ছাহৃদযপীডাঃ| সর্ব মেব চ স্থাবরং জ্বরহিধ্মাদন্তহর্শহনুস্তম্ভগলগ্রহফেন বমনারুচিশ্বাসমূর্চ্ছাঃ করোতি বিশেষেণ কন্দজম্| তদ্ধ্যতিতীক্ষ্ণত্বাদাশুকারিতরম্| ইতরত্তু প্রাযঃ কালা ন্তরপ্রাণহরম্||৬||

তত্র মূলবিষৈরিত্যাদিনা দশানামুপযোগক্রমেণ ব্যাধিকীর্ত্তিনম্| সুবোধম্| উদ্বেষ্টনং বেষ্টনমিবাঙ্গানাম্| মুষ্কশোফো বৃষণশোফঃ| ধাতবস্তু রক্তাদযঃ প্রাণিবিশেষেণ বিষং ভবন্তি| সর্বমপি চ দশবিধমপি স্থাবরং বিষং জ্বরাদিকং করোতি| ব্যাখ্যাসমম্| ইতরত্তু কন্দজাতাদন্যন্নববিধম্| (উপযোগদিবসাদন্যো দিবসপক্ষমাসাদি কালান্তরমিতি নিবন্ধসংগ্রহঃ)|| ৬||

Adhikarana sthAvaraviShaM sarvameva maulam (7) · Śloka 7

সর্বমপি চৈতন্মৌলমিত্যুচ্যতে মূলাশ্রযত্বাত্পত্রাদীনাম্||৭||

সর্বমপি চৈতত্ স্থাবরং বিষং মৌলমিত্যুচ্যতে, পত্রাদীনাং মূলাশ্রযত্বাত্| ন হি যন্মূলে ন শ্রিতং তত্পত্রাদিষু ভবতি| ইত্যুক্তং স্থাবরম্|| ৭||

Adhikarana ja~ggamasyAshrayAH prabhAvashca (8) · Śloka 8

জঙ্গমস্য ত্বাশ্রযাঃ ষোডশদৃষ্টিনিশ্বাসস্পর্শদংষ্ট্রামুখন খাস্থিমূত্রপুরীষশুক্রার্ত্তবলালাশূকপিত্তশোণিতশবানি| তানি পুনঃ সর্পকীটকণভাদ্যাশ্রিতানি| তত্কৃতান্যথা স্বমামযান্ সাধনং চোত্তরত্র বক্ষ্যতি| সর্বঞ্চ প্রাযশো জঙ্গমং নিদ্রাতন্দ্রাক্লমদাহরোমহর্ষশোফ পাকাতিসারান্ করোতি||৮||

জঙ্গমস্য বিষস্য দুষ্ট্যাদীনি শবান্তানি ষোডশাশ্রযাঃ| তানি দুষ্ট্যাদীনি সর্পাদ্যাশ্রযাণ্যেব বিষাধিষ্ঠানানি বিজ্ঞেযানি| তত্কৃতান্ জঙ্গমাশ্রযবিষকৃতান্| যথাস্বমিতি পৃথগ্ভেদমামযাংস্তত্সাধনঞ্চোত্তরত্রাঽধ্যাযেষু বক্ষ্যতি| সর্বঞ্চ জঙ্গমং বিশং প্রাযশো নিদ্রাদীন্ করোতি|| ৮||

Adhikarana viShasAmAnyaguNAstasya dehe prabhAvashca (9) · Śloka 9

দ্বিবিধমপি চৈতদ্বিষং তীক্ষ্ণোষ্ণরূক্ষবিশদসূক্ষ্মব্যবা য্যাশুকারিবিকাষিলঘ্বব্যক্তরসত্বৈর্দশভির্গুণৈর্যুক্তম পাকি চ| তত্র তৈক্ষ্ণ্যৌষ্ণ্যাত্ পিত্তং রক্তঞ্চ প্রকোপযতি| রৌক্ষ্যা দ্বাযুম্| বৈশদ্যাদসক্তবেগং প্রসরতি| সৌক্ষ্ম্যাদ্ব্যবাযি ত্বাচ্চ দোষধাতুমলাদীন্ সমস্তান্ শরীরাবযবাননু প্রবিশতি| আশুকারিত্বাদাশু ব্যাপাদযতি| বিকাষি ত্বান্মর্মচ্ছেদেন মতিং ব্যামোহযতি| লাঘবাদ্দুর্নির্হরমব্যক্ত রসত্বাচ্ছ্লেষ্মপ্রযত্নেনান্নানি বিষতো রক্ষেদিত্যুক্তম্| অপা কিত্বাত্ জরাং নো যাতি| তেনাভ্যবহৃতমবশ্যং মারযতি| মন্ত্রৌষধবলেন চোপশমিতমপি, প্রত্যযমাসাদ্যপুনঃ প্রকু প্যতীতি||৯||

দ্বিবিধং স্থাবরং জঙ্গমং চ বিষং তীক্ষ্ণাদিভির্দশভির্গুণৈর্যুক্তমপাকি চ ভবতি| (অনেকরসসম্ভবাদেকস্যাপি রসস্যাব্যক্তত্বমস্যাঽব্যক্তরসত্বে হেতুঃ| অপাকিত্বন্তু মন্ত্রতন্ত্রাভ্যামন্তরেণ পাকাভাবাত্| পাকো বীর্যহানিঃ| পক্বেঽপ্যন্নে বিষস্যাপক্বস্যৈবোপলব্ধেঃ| মন্ত্রতন্ত্রাভ্যামপাক এবাস্য কারণান্তরে পুনঃ কোপহেতুঃ)| এভিশ্চ গুণৈর্যত্ করোতি দেহে তত্তৈক্ষ্ণ্যৌষ্ণ্যাত্ পিত্তমিত্যাদিনা ক্রমেণোচ্যতে| তত্রেত্যাদি সুবোধম্| অন্নস্যাপি দুষ্ট্যা তৈর্দেহেন তথা বেদনাত্তথা গুণত্বম্| অপাকিত্বাদেব চ মন্ত্রাদিবলেনোপশমিতমপি প্রত্যযং বক্ষ্যমাণং কারণসামান্যমাসাদ্য প্রাপ্য পুনঃ প্রকুপ্যতীতি||৯||

Adhikarana viShasya kRutrimAkRutrimau bhedau (10) · Śloka 10

ভবতি চাত্র- স্থাবরং জঙ্গমং চেতি বিষং প্রোক্তমকৃত্রিমম্| কৃত্রিমং গরসংজ্ঞং তু ক্রিযতে বিবিধৌষধৈঃ| হন্তি যোগবশেনাশু চিরাচ্চিরতরাচ্চ তত্| শোফপাণ্ডূদরোন্মাদদুর্নামাদীন্ করোতি বা||১০||

গতানুগতিকা| বিষস্য কৃত্রিমাকৃত্রিমভেদং দর্শযতি| স্থাবরজঙ্গমং চেতি দ্বিবিধমপি বিষমাচার্যৈরকৃত্রিমমিতি প্রোক্তম্| (অকৃত্রিমং কেনাপ্যনির্মিতং স্বতঃ সঞ্জাতং বিষমিত্যর্থঃ)| কৃত্রিমং তু বিষং গরসংজ্ঞিতং নানাবিধৈরৌষধৈঃ সংযুক্তৈঃ ক্রিযতে যত্তেন তচ্চ কৃত্রিমং সম্যোগবশাদাশু বা হন্তি চিরাদ্বা চিরতরাদ্বা| অথবা তত্র হন্তি, অপিতু শোফাদীন্ করোতি| (যদ্বিবিধৌষধৈঃ ক্রিযতে তত্তু কৃত্রিমং কৃত্রিমবিষং গরসংজ্ঞঞ্চ| তত্ যোগবশেন তথাবিধদ্রব্যযোগবশাদাশু সদ্য এব চিরাত্ চিরকালেন চিরতরাদতিচিরকালেন চ হন্তি মারযতি| শোফাদীন্ করোতি বা)|| ১০||

Adhikarana viShasya prANaharatvam (11) · Śloka 11

অপি চৈতদ্বিষং সর্বং তীক্ষ্ণাদ্যৈরন্বিতং গুণৈঃ| বাতপিত্তোত্তরং নৃণাং সদ্যো হরতি জীবিতম্||১১||

অপি চেত্যনুক্রান্তসমুচ্চযে| ব্যাখ্যাসমম্| (তীক্ষ্ণাদিগুণযুক্তমুদ্রিক্তবাতপিত্তমেতত্সর্বং বিষং নরাণাং জীবিতমাশ্বেব হরতি| তীক্ষ্ণাদিগুণযোগ এব বাতপিত্তোদ্রেকে হেতুঃ)|| ১১||

Adhikarana viShasya prANaharaNe kramaH (12) · Śloka 12

বিষং হি দেহং সম্প্রাপ্য প্রাগ্দূষযতি শোণিতম্| কফপিত্তানিলাংশ্চানু সমদোষং সহাশযান্| ততো হৃদযমাস্থায দেহোচ্ছেদায কল্পতে| শরীরে দূষিতে রক্তে সর্বং চিমিচিমাযতে| কোঠঃ সমণ্ডলঃ স্বেদো রোমহর্ষশ্চ জাযতে| ক্ষুদ্রকীটা ইবাঙ্গেষু বিসর্পন্তীতি মন্যতে| বিনামযতি গাত্রাণি জৃম্ভতে শিশিরপ্রিযঃ| ব্যাপিনস্তস্য দুষ্টস্য দ্রুতস্য বিষতেজসা| বাতাদযো বশং যান্তি বলিনোঽপ্যবলা ইব||১২||

এতচ্চ বিষে শোণিতে দুষিতে অনুসমদোষমন্যূনাধিক্যান্যতমবিকারান্ কৃত্বা সহাশযান্ কফাদীন্ দূষযতি| আশযানপি তেষাং তদ্বিষং দূষযতীত্যর্থঃ| তত ইতি পশ্চাত্| (বিষং পীতজগ্ধদিগ্ধা হতান্যতমত্বেন দেহং সম্প্রাপ্য প্রাক্পূর্বং রক্তং দূষযতি| অনন্তরং সমদোষং তুল্যদোষং সমবলদোশমিত্যর্থঃ| সহাশযানাশযসহিতান্ আশযঃ কফদ্যাশযঃ| কফপিত্তানিলান্ দূষযতি| ননু তিক্ষ্ণাদিগুণযুক্তস্য বিষস্য পূর্বং রক্তকোপিত্বং পশ্চাদ্যুগপদেব ত্রিদোষকোপিত্বং চেতি যদুক্তং তদযুক্তমিব মন্যে 'দোষা দুষ্টা রসৈর্দ্ধাতুন্ দূষযন্তী ত্যাদিবচনাত্| অত্র ভণামঃ-'রক্তমণ্বপি তু প্রাপ্তংবর্দ্ধতে তৈলমম্বুবতি'তি বক্ষ্যমাণাত্বাত্| তদ্গতং বিষং বাতপিত্তকফজুষ্টাশুদ্ধভেদেন চতুর্বিধং সর্বশরীরগং রক্তং দ্রাগেব দূষযতি তস্মাদ্রক্তদুষ্টেরনন্তরং যুগপদেব দোষত্রযকোপো যুজ্যত এব| ততোঽনন্তরং হৃদযমাস্থায সশোণিতৈর্দোষৈঃ সহ হৃদযং প্রাপ্য সর্বস্রোতাংসি বদ্ধ্বা দেহনাশায প্রবর্ত্ততে)| শরীরমিত্যাদিনা রক্তাদৌ দূষিতে ক্রমেণ লক্ষণম্| রক্তে দূষিতে সর্বং শরীরং চিমিচিমাযতে কোঠাদিকং চ জাযতে| বিষবাংশ্চাঙ্গেষু সূক্ষ্মা কীটা ইব বিসর্পন্তীতি মনসা মন্যন্তে| শীতপ্রিযশ্চ সন্ গাত্রাণি বিনামযতি জৃম্ভতে চ| তস্যেতি রক্তস্য ব্যাপিনো দুষ্টস্য চ সতো বিষতেজসা চ দ্রুতস্য বেগবতো বলবন্তোঽপি বাতাদযোঽবলা ইব বশং যান্তি|| ১২||

Adhikarana doShAshayAnusAraM viShaprabhAvaH (13) · Śloka 13

বিষং যদ্দোষভূযিষ্ঠং তং দোষং প্রাক্ প্রপদ্যতে| আশযে যস্য যস্যৈব ততস্তদবতিষ্ঠতে| তজ্জান্ বিকারান্ কুরুতে যান্ সর্বৈষূপদেক্ষ্যতি| বাতাশযস্থং কুরুতে তথা শ্লেষ্মামযানপি| পিত্তশ্লেষ্মাশযগতং তদ্বত্পিত্তকফোদ্ভবান্| তত্রাপি চোত্তমাঙ্গস্থে সকোঠং শূযতে শিরঃ| বিশেষাদক্ষিকূটৌষ্ঠনাসাস্যং হৃষ্টদন্ততা| তালুশোষো রুজা মূর্ধ্নি বক্ত্রে চিমিচিমাযনম্| অর্থেষু চক্ষুরাদীনামপ্রবৃত্তির্হনুগ্রহঃ| ইত্যন্যত্রাপি চ বিষং স্থিতমঙ্গেঽভিলক্ষযেত্| ব্যাপ্যৈবং সকলং দেহমুপরুধ্য চ বাহিনীঃ| বিষং বিষমিব ক্ষিপ্রং প্রাণানস্য নিরস্যতি||১৩||

তচ্চ বিষমাশ্রযদ্রব্যবিশেষবশেন যেন চ দোষেণ ভূযিষ্ঠং সদৃশং তমেব দোষং প্রথমং প্রপদ্যতে| তত এব চ ভূযিষ্ঠত্বাদ্ধেতোর্যস্য যদ্বিশিষ্টস্য দোষস্যাশযেঽবতিষ্ঠতে তজ্জানেব বিকারান্ কুরুতে| কাংস্তানিত্যাহ-যান্ সর্বেষু বাতাদিভেদেনোপদেক্ষ্যতি| বাতাশযস্থং চ বিষং স্বানপি বিকারান্ কুরুতে শ্লেষ্মাগতানপি| তদ্বদেব পিত্তশ্লেষ্মাশযগতং পিত্তকফোদ্ভবান্ বিকারান্ কুরুতে| তেনৈতদুক্তং ভবতি-পিত্তাযস্থং পিত্তোদ্ভবান্ কফোদ্ভবাংশ্চ করোতি| কফাশযস্থমপি কফোদ্ভবান্ পিত্তোদ্ভবাংশ্চেতি| তত্রাপীত বিশেষ| উত্তমাঙ্গস্থে বিষে কোঠসহিতং শিরঃ শূযতে| তত্রাপ্যক্ষিকূটাদিকং বিশেষাচ্ছূযতে| হৃষ্টদন্ততাদিকং চ ভবতি| অর্থেষু বিষযেষু রূপাদিষু চক্ষুরাদীনামিন্দ্রিযাণামপ্রবৃত্তিঃ| ইত্যনযা দিশা অন্যত্রাপ্যঙ্গে বিকারৈর্বিষং স্থিতমিত্যভিলক্ষযেত্| এবমন্তরোক্তপ্রকারেণ সকলং নিশ্শেষং দেহং ব্যাপ্য বাহিনীশ্চ সিরাদোষাদি বাহিনীরুপরুধ্য বিষং ক্ষিপ্রমেবাস্য প্রাণান্ নিরস্যতি বিষমিব আত্মানামেব বর্জযিত্বাঽস্য ক্ষিপ্রমারণে অন্যদুপমানং ন বিদ্যত ইত্যর্থঃ|||| ১৩||

Adhikarana viShajagdhAdimAMsaprabhAvaH (14) · Śloka 14

পীতং মৃতস্য হৃদযে জগ্ধদিগ্ধাভিবিদ্ধযোঃ| দংশে তিষ্ঠতি ভূযিষ্ঠং সর্বতঃ পিণ্ডিতং বিষম্| নাদ্যাদতো বিশেষেণ তেষাং মাংসং তদাশ্রযম্| যথাস্বং ভক্ষিতে পীডা যথাস্বং চ ক্রিযাক্রমঃ||১৪||

তচ্চ বিষং যদা পীতং নিগীর্ণং ভবতি তদা তেন মৃতস্য হৃদযে ভূযিষ্ঠং তিষ্ঠতি| বিষপ্রাণিনাং তু জগ্ধস্য ভক্শিতস্য মৃতস্যাপি বিষং দংশে দংষ্ট্রাভিঘাতে ভূযিষ্ঠং তিষ্ঠতি| বিষদগ্ধেন চ শস্ত্রেণাভিহতস্য মৃতস্যাভিঘাতে ভূযিষ্ঠং তিষ্ঠতি| সর্বতঃ শরীরাত্ প্রতি নিবৃত্ত্য তত্রৈব পিণ্ডিতম্| অতো হেতোস্তেষাং পীতজগ্ধবিদ্ধানাং প্রাণিনাং মৃতানাং মাংসং নাদ্যাত্| তদাশ্রযং হৃদযদংশাভিঘাতাশ্রযং মাংসং বিশেষেণ নাদ্যাত্| যথাস্বমিত্যাদেরযমর্থঃ| যেনৈব দোষেণাধিকং বিষং ভক্ষিতং তদ্দোষজা এব পীডা ভবন্তি| তদ্দোষানুগুণ্যেনৈব কির্যাক্রমঃ|| ১৪||

Adhikarana viShavegeShu matadvayam (15) · Śloka 15

সপ্তবেগান্ বিষস্যাহুরষ্টাবিতি পুনর্বসুঃ||১৫||

সর্বে আচার্যা বিষস্য সপ্তবেগান্ প্রবলশক্ত্যুদযক্ষোভানাহুঃ| পুনর্বসুনামা ঋষিস্তু অষ্টাবিত্যাহ|| ১৫||

Adhikarana viShavegAnAM lakShaNAni (16) · Śloka 16

দুষ্যতি প্রথমে বেগে রসশ্ছর্দ্দিপ্রসেককৃত্| দ্বিতীযঽস্রং চিমিচিমাজৃম্ভাবেপথুকারি তত্| তৃতীযে পিশিতং কণ্ডূকোঠমণ্ডলশোফদম্| দোষাশ্চতুর্থে তেষু স্যুর্যথাযমুপদ্রবাঃ| পঞ্চমে দর্শনভ্রান্তিঃ ষষ্ঠে হিধ্মা সমুদ্ভবঃ| সপ্তমে স্কন্ধভঙ্গোঽস্য জাযতে মৃত্যুরষ্টমে||১৬||

দুষ্যতীত্যাদিনা ক্রমেণ বেগানাং কীর্তনম্| প্রথমে বেগে রসাখ্যো ধাতুর্দুষ্যতি| স চ দুষ্টঃ ছর্দিপ্রসেককৃদ্ ভবতি| দ্বিতীযে বেগে অস্রং রক্তং দুষ্যতি| তদ্রক্তং দেহে চিমচিমাদিকারি ভবতি| তৃতীযে পিশিতং মাংসং দুষ্যতি, তচ্চ কণ্ড্বাদিদম্| চতুর্থে দোষা বাতাদযো দুষ্যন্তি| তেষু দুষ্টেষু যথাস্বমুপদ্রবাঃ স্যুঃ| পঞ্চমে বেগে দর্শনভ্রান্তির্মিথ্যাদর্শিত্বম্| ষষ্ঠে হিধ্মাসমুদ্ভবঃ| সপ্তমে অস্য বিষবুক্তস্য স্কন্ধভঙ্গঃ| অষ্টমে মরণম্| এবং জাতূকর্ণকশ্যপাদীনাং পুনর্বসোশ্চাপি প্রতিপত্তিঃ কেবলমষ্টমস্তৈরনুপযোগান্নাঙ্গীকৃতঃ; পুনর্বসুনা তু বিষকার্যত্বাদঙ্গীকৃতঃ|| ১৬||

Adhikarana nagnajitasya matam (17) · Śloka 17

দুষ্যতি প্রথমে রক্তং দ্বিতীযে শ্বযথূদ্ভবঃ| তৃতীযেঽঙ্গে চিমিচিমা চতুর্থে জ্বরমূর্চ্ছনা| পঞ্চমে পাণ্ডুজিহ্বাস্যশোষঃ ষষ্ঠে হৃদি ব্যথা| সপ্তমে মরণং বেগ ইতি নগ্নজিতো মতম্||১৭||

নগ্নজিতো দারুবাহিনোঽপ্যত্র দুষ্যতি প্রথমে রক্তমিত্যাদিক্রমেণ সপ্তবেগা ইতি মতম্|| ১৭||

Adhikarana videhapatimatam (18) · Śloka 18

মূর্চ্ছা হৃদি পরং পীডা শিরোরুগপতন্ত্রকঃ| হিধ্মা চ দারুণো মর্মচ্ছেদো জীবিতসংশযঃ| সপ্তেতি বেগা মূর্চ্ছাদ্যাঃ বিদেহপতিনা স্মৃতঃ||১৮||

বিদেহপতিনা জনকেন মূর্চ্ছাদ্যা জীবিতসংশযান্তাঃ ক্রমোদ্ভবাঃ সপ্ত বেগাঃ স্মৃতাঃ|| ১৮||

Adhikarana AlambAyanamatam (19) · Śloka 19

রক্তমাংসবসাস্নাযু তথাস্থ্যাদ্যাস্রযঃ ক্রমাত্| আশ্রযাঃ সপ্ত সপ্তানামিত্যালম্বাযনোঽব্রবীত্||১৯||

আলম্বাযননামর্ষিঃ সপ্তানাং বেগানাং ক্রমাদুক্তানাং সপ্ত আশ্রযা ইত্যব্রবীত্| অস্থ্যাদ্যাস্রযোঽস্থিমজ্জাশুক্রাখ্যাঃ| তেন প্রথমো বেগো রক্তমাশ্রিতে বিষে ভবতি| দ্বিতীযো মাংসম্| তৃতীযো বসাম্| চতুর্থঃ স্নাযুম্| পঞ্চমোঽস্থি| ষষ্ঠো মজ্জানম্| সপ্তমঃ শুক্রমিত্যর্থঃ||১৯||

Adhikarana dhanvantarimatam (20) · Śloka 20

বেগান্ ধন্বন্তরিস্তদ্বত্ সর্পদষ্টস্য মন্যতে| স্নাববর্জন্তু তত্স্থানে দোষানিচ্ছতি কোষ্ঠগান্||২০||

তদ্বদিত্যালম্বাযনোক্তবিষবেগক্রমেণ ধন্বন্তরিঃ সুশ্রুতোপদেষ্টা সর্পদষ্টস্য বেগান্ মন্যতে স্নাববর্জম্| তত্স্থানে স্নাবস্থানে কোষ্ঠগান্ দোষানিচ্ছতি| তেনৈতদুক্তম্ ভবতি| আলম্বাযনঃ স্নাবস্থে বিষবেগে চতুর্থো বেগো ভবতীতি| ধন্বন্তরিস্তু সর্পদষ্টস্য চতুর্থো বেগঃ কোষ্ঠস্থবাতাদ্যাশ্রিতে বিষে ভবতীত্যাহেতি|| ২০||

Adhikarana viShavegavyAkhyA (21) · Śloka 21

ধাত্বন্তরেষু যাঃ সপ্ত কলাঃ পূর্বং প্রকীর্ত্তিতাঃ| অতীত্য তাসামেকৈকাং বেগং প্রকুরুতে বিষম্||২১||

ধাত্বন্তরেষ্বস্মাভির্যাঃ কলাঃ প্রাক্শারীরে প্রকীর্তিতাঃ সপ্ত তাসাং সপ্তানাং ক্রমেণৈকৈকাং কলামতীত্যাতিক্রম্য বিষং কর্তৃ বেগং প্রকুরুতে| তেন প্রথমামতীত্য প্রথমং কুরুতে| দ্বিতীযাং দ্বিতীযমিতি ক্রমেণ সপ্তানাং বাচ্যম্|| ২১||

Adhikarana vegAntarakAlaH (23) · Śloka 23

তত্কালকল্পং কালেন কলামভ্যেতি যাবতা| ঊহ্যমানং সমীরেণ তাবদ্বেগান্তরং স্মৃতম্||২৩||

শাস্ত্রকারস্তু যেন মুনিনা যদুক্তং তত্সর্বমিহ মযা প্রদর্শিতম্| এবং চ মুনিত্বে যত্তদাহ| যতঃ- স্মর্তারো বযমাগমস্য ন পুনঃ কর্তু ব্যবস্থাং ক্ষমাঃ| ক্রান্তে বর্ত্মনি তৈর্ন ভাবগহনে বুদ্ধিঃ প্রবিশ্যত্যলম্|| পারাবারদৃশঃ করামলকবত্ পশ্যন্তি ভাবান্ সুখম্| যে তেষাং রসনা প্রযাতু গদিতুং যদ্যুক্তমত্রাস্ফুটম্|| ২৩||

Adhikarana dUShIviSham (24) · Śloka 24

জীর্ণং বিষঘ্নৌষধিভির্হং বা দবাগ্নিবাতাতপশোষিতং বা| স্বভাবতো বা ন গুণৈঃ সুযুক্তং দূষীবিষাখ্যাং বিষমভ্যুপৈতি||২৪||

দূষীবিষলক্ষণমাহ-জীর্ণমিতি| তদেব চ বিষং জীর্ণত্বাদিগুণযুক্তং সত্ দূষীবিষাখ্যামভ্যুপৈতি| দূষীবিষমিতি নাম প্রাপ্নোতি| জীর্ণং চিরকালাতীতম্| অথবা বিষঘ্নাভিরৌষধীভিঃ সংযোগাদিনা হতশক্তিঃ| অথবা দবাদিভিঃ শোষিতম্| দবো বনদহনঃ| অথবা স্বভাবাদেবাত্মীযৈস্তীক্ষ্ণাদিভির্গুণৈঃ সুযুক্তং যন্ন ভবতীতি| (বিষঘ্নাভিরোষধীভিঃ শিরীষাদিবিষহরদ্রব্যৈঃ| বাশব্দস্যান্তরান্তরা প্রযোগঃ প্রত্যেকং দূষীবিষকারণত্বজ্ঞাপনার্থঃ| অত্র বিষস্যাবিশেষকথনাত্ স্থাবরজঙ্গমাত্মকং সর্বমপি বিষং দূষী বিষাখ্যাং দূষীবিষসংজ্ঞামভ্যুপৈতি প্রাপ্নোতি)|| ২৪||

Adhikarana dUShIviShasyAvibhAvyAtA (25) · Śloka 25

বীর্যাল্পভাবাদবিভাব্যমেতত্ কফাবৃতং বর্ষগণানুবন্ধি||২৫||

এতচ্চ দূষীবিষমুপযুক্তমপি দেহে অল্পবীর্যত্বাদ্ বিভাব্যমানং ভবতি| কফেন চাবৃতং সত্ স্ফুটমবিভাব্যমানং বর্ষগণমনুবধ্নাতি| (আবিভাব্যমলক্ষ্যম্| বর্ষগণানুবন্ধি অনেকসংবত্সরস্থাযিত্বাত্ ইতি শেষঃ)|| ২৫||

Adhikarana dUShIviShalakShaNAni (26) · Śloka 26

তেনার্দিতো ভিন্নপুরীষবর্ণো দুষ্টাস্ররোগী তৃডরোচকার্ত্তঃ| মূর্চ্ছন্ বমন্ গদ্গদবাগ্বিমুহ্যন্ ভবেচ্চ দূষ্যোদরলিঙ্গজুষ্টঃ||২৬||

তেন চ দূষীবিষেণার্দিতঃ পীডিতো ভিন্নপুরীষাদিগুণো ভবতি| পুরীষং ভিন্নমতিপ্রবৃত্তম্| বর্ণাত্ ভিন্নো বিযুক্তঃ| দুষ্যোদরলিঙ্গানি নিদানোক্তানি তৈর্জুষ্টঃ সহিতঃ| (তেন বপুষ্যনেকসংবত্সরস্থেন দূষীবিষেণ| ভিন্নবর্ণো ব্যক্তশুক্লরক্তাদিবর্ণঃ| দুষ্টাস্ররোগী দুষ্টাসৃঙ্নিমিত্তানেকরোগযুক্তঃ| তৃষা অরোচকেন চার্ত্তঃ পীডিতঃ| বমন্ সদা বমনযুক্তঃ| গদ্গদবাগস্পষ্টবচনঃ| বিমুহ্যন্ মোহমুপগতঃ| মোহং বৈচিত্যম্| দূষ্যোদরং সন্নিপাতোদরম্)|| ২৬||

Adhikarana AshayAdyanusAraM prabhAvaH (27) · Śloka 27

আমাশযস্থে কফবাতরোগী পিত্তশযস্থেঽনিলপিত্তরোগী| ভবেন্নরো ধ্বস্তশিরোরুহাঙ্গো বিলূনপক্ষঃ স যথা বিহঙ্গঃ| স্থিতং রসাদিষ্বথবা বিচিত্রান্ করোতি ধাতুপ্রভবান্ বিকারান্||২৭||

তস্য দূষীবিষস্যান্তরধিষ্ঠানবিশেষজনিতং রোগবিশেষং দর্শযতি| যদা আমাশযে বিষং তিষ্ঠতি তদা কফবাতাভ্যাং রোগা ভবন্তি| যদা পিত্তাশযে তিষ্ঠতি তদা অলিনপিত্তাভ্যাং রোগা ভবন্তি| স নরো ধ্বস্তশিরোরুহো ধ্বস্তাঙ্গশ্চ ভবতি যথা বিলূনপক্ষো বিচ্ছিন্নপত্রো বিহঙ্গঃ পক্ষী| অথবা কোষ্ঠদ্ধাতুষু সঙ্ক্রান্তং বিচিত্রান্ ধাতুপ্রভবান্ বিকারান্ করোতি|| ২৭||

Adhikarana dUShIviShasyAnvarthatA (28) · Śloka 28

প্রাগ্বাতাজীর্ণশীতাভ্রদিবাস্বপ্নাহিতাশনৈঃ| দুষ্টং দূষযতে ধাতূনতো দূষীবিষং স্মৃতম্||২৮||

দূষীবিষস্যান্বর্থতামাহ-তচ্চ দূষীবিষমিতি নামতঃ স্মৃতং যতস্তদেবং স্থিতমপি প্রাগ্বাতাদিভির্দুষ্টং সদ্ধাতূন্ দূষযতীতি| (বিষং প্রাগ্বাতাদিভির্দুষ্টং ধাতুন্ রসাদীন্ দূষযতে প্রাগ্বাতঃ পুরোবাতঃ| যতঃ অতোঽস্মাদ্ধেতোর্দূষীবিষমিতি সংজ্ঞিতম্)|| ২৮||

Adhikarana sthAvaraviShavegAnAM lakShaNAni prathamavege lakShaNAni (29) · Śloka 29

স্থাবরস্যোপযুক্তস্য পূর্বে বেগেঽথ জাযতে| জিহ্বাযাঃ শ্যাবতা স্তম্ভো মূর্চ্ছা ত্রাসঃ ক্লমো বমিঃ||২৯||

পূর্বং হি মুনিমতানুসারেণ সামান্যেন বিষমুক্ত্বৈকীযমতেন গ্রন্থকৃত্ স্থাবরবিষস্য সপ্তসু বেগেষু লক্ষণং চিকিত্সাযৈ চিকীর্ষুরিদমাহ-স্থাবরস্যেত্যাদি বম্যন্তং প্রথমে বেগে| (অথেত্যানন্তর্যে উপযুক্তস্য উপযোজিতস্য অশিতস্যেত্যর্থঃ| স্থাবরস্য স্থাবরবিষস্য পূর্বে প্রথমে বেগে জিহ্বাশ্যাবত্বাদিকং জাযতে| স্তম্ভো গাত্রস্তম্ভঃ| মূর্চ্ছা মোহঃ| ত্রাসো ভযাচিকিতত্বম্| ক্লম ইন্দির্যসাদঃ| বমির্বমনম্|| ২৯||

Adhikarana dvitIyavege lakShaNAni (30) · Śloka 30

দ্বিতীযে বেপথুঃ স্বেদো দাহঃ কণ্ঠে চ বেদনাঃ| বিষং চামাশযং প্রাপ্তং কুরুতে হৃদি বেদনাম্||৩০||

হৃদ্বেদনান্তং দ্বিতীযে বেগে| (দ্বিতীযে বেগে বেপথ্যাদিকং লিঙ্গম্| বিষং চামাশযং প্রাপ্য হৃদ্যতিপীডাং করোতি| কণ্ঠে বেদনা অন্নাভ্যবহারাসহত্বাদিকম্| চশব্দাত্ পূর্বোক্তা জিহ্বাশ্যাবতাদযশ্চ||৩০||

Adhikarana tRutIyavege lakShaNAni (31) · Śloka 31

তালুশোষস্তৃতীযে তু শূলং চামাশযে ভৃশম্| দুর্বলে হরতি শূনে জাযেতে চাস্য লোচনে||৩১||

শূনে লোচন ইত্যন্তং তৃতীযে| (তৃতীযে বিষবেগে তুশব্দো বিশেষদ্যোতকঃ| আমাশযে ভৃশমতিশযেন শূলং আমাশযে ভৃশমিত্যুক্তত্বাত্ পক্বাশযেঽপি শূলং দ্যোত্যতে| চশব্দেন পূর্বোক্তানাং গ্রহণম্| অস্যোপযুক্তবিষস্য পুরুষস্য লোচনে নেত্রে দুর্বলে বলহীনে দর্শনাসমর্থ ইত্যর্থঃ| হরিতে হরিতবর্ণে| শূনে শোফযুক্তে জাযেতে)|| ৩১||

Adhikarana caturthavege lakShaNAni (32) · Śloka 32

পক্বাশযগতে তোদহিধ্মাকাসান্ত্রকূজনম্| চতুর্থে জাযতে বেগে শিরসশ্চাতিগৌরবম্||৩২||

চতুর্থে বেগে পক্বাশযগতে সতি বিষে তোদাদিকং শিরসশ্চাতিগৌরবং জাযতে| (চশব্দেনান্যাঙ্গেষ্বপি গৌরবং দ্যোত্যতে| পূর্বোক্তসমুচ্চযার্থশ্চশব্দঃ)|| ৩২||

Adhikarana pa~jcamavege lakShaNAni (33) · Śloka 33

কফপ্রসেকো বৈবর্ণ্য পর্বভেদশ্চ পঞ্চমে| সর্বদোষপ্রকোপশ্চ পক্বাধানে চ বেদনা||৩৩||

কফপ্রসেকাদি পক্বাধানবেদনান্তং পঞ্চমে| (অত্র পূর্বচকারঃ পূর্বোক্তানাং সমুচ্চযার্থঃ)|| ৩৩||

Adhikarana ShaShThavege lakShaNAni (34) · Śloka 34

ষষ্ঠে সংজ্ঞাপ্রণাশশ্চ সুভৃশং চাতিসার্যতে||৩৪||

সংজ্ঞাপ্রণাশোঽতিসারশ্চ ষষ্ঠে| (সংজ্ঞাপ্রণাশশ্চেতনানাশঃ| চশব্দঃ পূর্ববত্)|| ৩৪||

Adhikarana saptamavege lakShaNAni (35) · Śloka 35

স্কন্ধপৃষ্ঠকটীভঙ্গো ভবেন্মৃত্যুশ্চ সপ্তমে||৩৫||

স্কন্ধাদিভঙ্গো মৃত্যুশ্চ সপ্তমে| ইতি সপ্তবেগাঃ|| ৩৫||

Adhikarana sthAvaraviShavegAnAM cikitsA prathamaviShavege cikitsA (36) · Śloka 36

প্রথমে বিষবেগেঽথ বান্তং শীতাম্বুসেচিতম্| সর্পির্মধুভ্যাং সংযুক্তমগদং পাযযেদ্ দ্রুতম্||৩৬||

বিষবেগলক্ষণমুক্ত্বানন্তরন্তচ্চিকিত্সামাহ-প্রথম ইত্যাদিনা| সপ্তসু বেগেষু ক্রমেণ চিকিত্সা| প্রথমে বিষবেগে পূর্বং বমনং ততঃ শীতাম্বুসেকস্ততো দোষাদ্যপেক্ষমন্যতমমগদং সর্পির্মধুভ্যাং সংযুক্তং দ্রুতং পাযযেত্| (অথশব্দঃ প্রকরণান্তরদ্যোতনার্থঃ| প্রথমে জিহ্বাশ্যাবতাদিলক্ষণলক্ষিতে বিষবেগে বমিতং শীতাম্বুনা পরিষিক্তগাত্রমাতুরং ঘৃতমাক্ষিকোপেতমগদং বিষঘ্নৌষধমাশ্বেব পাযযেত্ ভিষগিতি শেষঃ)|| ৩৬||

Adhikarana dvitIyavege cikitsA (37) · Śloka 37

দ্বিতীযে পূর্ববদ্বান্তং বিরিক্তং চানু পাযযেত্||৩৭||

দ্বিতীযাদিষু সুবোধম্| পূর্ববদিতি সূত্রোক্তপ্রকারেণ| অনুপাযযেদিতি প্রকরণাদন্যতমমগদম্| (দ্বিতীযে বিষবেগে বমনবিরেচনান্তরং পূর্ববত্ প্রথমবেগবত্ অগদং পাযযেত্| পূর্ববদিত্যুক্তত্বাত্ শীতাম্বুপরিষেকঘৃতমধূপেতত্বাদিকং দ্যোত্যতে)|| ৩৭||

Adhikarana tRutIyavege cikitsA (38) · Śloka 38

তৃতীযেঽগদপানং চ হিতং নস্যং তথাঽঞ্জনম্||৩৮||

তৃতীযে বেগে অগদপানাদিকং হিতম্|| ৩৮||

Adhikarana caturthavege cikitsA (39) · Śloka 39

চতুর্থে স্নেহসংযুক্তমগদং প্রতিভোজযেত্||৩৯||

চতুর্থে বেগে স্নেহান্বিতমগদং প্রতিভোজযেত্| স্নেহস্যাবিশেষকথনান্মহাস্নেহ ইত্যর্থঃ|| ৩৯||

Adhikarana pa~jcamavege cikitsA (40) · Śloka 40

পঞ্চমে মধুকক্বাথমাক্ষিকাভ্যাং যুতং হিতম্||৪০||

পঞ্চমে বেগে মধুকক্বাথমাক্ষিকান্বিতমগদং পিবেদাতুর ইতি শেষঃ||৪০||

Adhikarana ShaShThavege cikitsA (41) · Śloka 41

ষষ্ঠেঽতিসারবত্ সিদ্ধিঃ..........................||৪১||

ষষ্ঠে বিষবেগে অতিসারতুল্যা চিকিত্সা হিতা|| ৪১||

Adhikarana saptamavege cikitsA (42) · Śloka 42

..............................অবপীডস্তু সপ্তমে| মূর্ধ্নি কাকপদং কৃত্বা সাসৃগ্বা পিশিতং ক্ষিপেত্||৪২||

অবপীডঃ কল্কাদি নস্যম্| অথবা সপ্তমে বেগে মূর্ধ্নি শিরসি তালুপ্রদেশস্য কাকপদং কাকপদমুদ্রাকৃতিং শস্ত্রচ্ছেদং কৃত্বা অন্যপ্রাণিসম্বন্ধি পিশিতং সাস্রং রক্তসহিতং ক্ষিপেত্| (সপ্তমে বেগে তুশব্দেনাস্যাপি চিকিত্সিতব্যত্বং দ্যোত্যতে| অবপীডঃ রোগানুত্পাদনীযোক্তো ঘৃতপানমাত্রাবিশেষঃ| মূর্ধ্নি শিরসি কাকপদং কৃত্বা কাকপদাকারেণ ছিত্বা অন্যজন্তূনাং সরক্তং মাংসং বিষসঙ্ক্রমণপ্রকারং চোক্তমালম্বাযনেন- মূর্ধ্নি কাকপদং চাস্য মুণ্ডিতে ত্বথ কারযেত্| মাংসং সশোণিতং সদ্যস্তস্মিন্ কাকপদে ন্যসেত্|| বিষসঙ্ক্রমণান্তে তত্পরমাংসং পরিত্যজেত্| ঊর্ধ্বমুত্ক্রমমাণং তু বিষং মূর্ধ্নি প্রতিষ্ঠতি| নিবর্তমানং তং হন্তি তস্মাত্সঙ্ক্রামযেদ্বিষম্|| ইতি)|| ৪২||

Adhikarana viShaghnI yavAgUH (43) · Śloka 43

কোশাতক্যগ্নিকঃ পাঠা সূর্যবল্ল্যমৃতাভযাঃ| শেলুঃ শিরীষঃ কিণিহী হরিদ্রে ক্ষুদ্রসাহ্বযা| পুনর্নবে ত্রিকটুকং বৃহত্যৌ শারিবে বলে| এষাং যবাগূং নির্যূহে শীতাং সঘৃতমাক্ষিকাম্| যুঞ্জ্যাদ্বেগান্তরে সর্ববিষঘ্নীং কৃতকর্মণঃ||৪৩||

বিষঘ্নীং পেযামাহ-বেগান্তরে উক্তলক্ষণে কোষাতক্যাদীনাংনির্যূহে ক্বাথে কৃতাং শীতাং সঘৃতমাক্ষিকাং যবাগূং কৃতকর্মণো বিহিতবমনাদিকস্য সতো যুঞ্জ্যাত্| সা হি সর্ববিষঘ্নী| অগ্নিকশ্চিত্রকঃ ভল্লাতকং চ| সূর্যবল্লী অর্কঃ শেলুঃ শ্লেষ্মাতকঃ| কিণিহী কটভী| ক্ষৌদ্রসহ্বযা মাক্ষিকধাতুঃ| (প্রকৃতাদ্বেগাদন্যো বেগো বেগান্তরম্| কোশাতক্যাদীনাং ক্বাথে ষডঙ্গকল্পনাকল্পিতে কৃতং যবাগূমিতি নিবন্ধসংগ্রহে| কোষাতকী ঘোষকঃ| অগ্নিকোঽজমোদঃ| মোরট ইত্যন্যে| সূর্যবল্লী পটোলসদৃশপত্রা; যস্যাঃ পত্ররসেনাক্তং মাংসং স্বিন্নমিব ভবতি| কৃতকর্মণঃ কৃতবমনাদিকস্য কোশাতক্যাদীনাং নির্যূহে ক্বাথে কৃতাং শীতাং স্পর্শশীতলাং ঘৃতমাক্ষিকোপেতাং সর্ববিষহরাং যবাগূং বেগান্তরে যোজযেত্| কোশাতকী (পুট্টল্পীরম্) অগ্নিকোঽগ্নিমন্থঃ| সূর্যবল্লী (বেম্বাড), করবীরমিতি কেচিত্| কিণিহী (কিলুক্কিলুপ্প) ক্ষৌদ্রসাহ্বযা (মক্কীরকল্ল) ইতি কোলভাষা)|| ৪৩||

Adhikarana aparA yavAgUH (44) · Śloka 44

তদ্বন্মধূকমধুকপদ্মকেসরচন্দনৈঃ||৪৪||

মধুকাদিভিস্তদ্বদিতি কোশাতক্যাদিবিধানেন যবাগূম্| (মধূকাদীনাং নির্যূহে কৃতা যবাগূস্তত্তুল্যগুণা| মধূকাদি সুবোধম্)||৪৪||

Adhikarana agadAnAM prayogaH (45) · Śloka 45

অগদান্ বক্ষ্যতে চাতঃ সিদ্ধান্ পূর্বর্ষিনির্মিতান্| সর্বেষু সর্বাবস্থেষু যে বিষেষু পরং হিতাঃ||৪৫||

অতোঽনন্তরং পূর্বর্ষিনির্মিতান্ দুষ্টফলানগাদান্ বক্ষ্যতে| যে অগদাঃ সর্বেষু বিষেষু সর্বাবস্থেষু পরমত্যর্থং হিতাঃ|| ৪৫||

Adhikarana sa~jjIvano agadaH (46) · Śloka 46

চন্দনং কুঙ্কুমং কুষ্ঠং কাঙ্ক্ষী লাক্ষা প্রিযঙ্গবঃ| মুস্তস্থৌণেযশৈলেযরোচনা মদনপ্লবম্| শ্রীবেষ্টকবিডঙ্গৈলা বিশালালমনশ্শিলাঃ| সুরসপ্রসবস্পৃক্কা রজনীদ্বযবালকম্| হিঙ্গুসিদ্ধার্থকাঃ পদ্মচারিণী পদ্মকেসরম্| জাত্যাঃ পুষ্পং প্রবালশ্চ পুষ্পমর্কশিরীষযোঃ| দ্বিরোধ্রবৃহতী কৌন্তী মধুকং গন্ধনাকুলী| মুদ্গপর্ণী কণা শ্যামা ধ্যামকং নলদং নতম্| সিন্দুবারকশক্যাকদেবদারুমযূরকম্| পুষ্যে সমাহৃতৈঃ পিষ্টৈর্যোজ্যস্তৈরগদোত্তমঃ| সঞ্জীবনঃ প্রাগমৃতাদ্বিহিতোঽযং স্বযম্ভুবা| পাননস্যঞ্জনাঘ্রাণধূমালেপনধারণৈঃ| জীবনো বিষসুপ্তানাং রাজদ্বারে জযাবহঃ| ধন্যো ধান্যধনাযুঃশ্রীক্ষেমপুষ্টিসুখপ্রদঃ| গৃহে স্থিতো বিষালক্ষ্মীমন্ত্রজ্বরগরগ্রহান্| কৃত্যাকার্মণকাখোর্দব্যালজন্তুসরীসৃপান্| স্বপ্নোপঘাতদুঃ স্বপ্নতোযাগ্নিরিপুতস্করান্| নিহন্ত্যকালমরণমারকাশানিবিগ্রহান্||৪৬||

চন্দনকুঙ্কুমাদিভিঃ পুষ্পদিনে সমাহৃতৈঃ সঞ্জীবনো নামাগদঃ সংযোজ্যঃ| অযমগদোঽমৃতাত্পূর্বমুত্পন্নোঽমৃততুল্যকার্যকরঃ স্বযম্ভুবা ব্রহ্মণা বিহিতঃ| স্থৌণেযঃ কৃতবর্হাখ্যঃ| প্ল্বং পরিপেলবম্| সুরসস্য প্রসবমঙ্কুরঃ| পুষ্পং প্রবালশ্চ জাত্যাঃ| প্রবালঃ কিসলযম্| শ্যামা প্রিযঙ্গুঃ| নলদং মাংসী| নতং তগরম্| শম্যাক আরগ্বধঃ| ময়ুরকোঽপামার্গঃ| এষ চ সঞ্জীবনঃ পানাদিভির্জ্জীবনাদিগুণো ধান্যাদিপ্রদশ্চ| গৃহে স্থিতো বিষাদীন্ হন্তি| ধন্যো মঙ্গল্যঃ| মন্ত্রোঽন্যেনাভিচারপ্রযুক্তঃ| কৃত্যা অভিচারদেবতা| কাড়্মণং বশীকরণম্| কাখোর্দ্দো নাম ভূতবিশেষঃ| জন্তবঃ কৃমযঃ| সরীসৃপঃ সর্পাদযঃ| স্বপ্নোপঘাতঃ স্বপ্নে ভযঙ্করৈরভিভবঃ| দুঃস্বপ্নং শারীরোক্তম্| বিগ্রহো দ্বন্দ্বঃ|| ৪৬||

Adhikarana yApano agadaH (47) · Śloka 47

চন্দনং বালকং মুস্তং ধ্যামকং কটুকা নতম্| দাডিমং কুঙ্কুমং শুণ্ঠী কপিত্থং বত্সলাফলম্| করঞ্জবীজং মরিচমুত্পলং কমলং দলম্| নলমূলমপামার্গং করবীরকমঞ্জনম্| লাক্ষামালত্যহিচ্ছত্র নাগপুষ্পাম্লবেতসম্| বিষালারোচনাশ্যামা শঙ্খপুষ্পীপ্রিযঙ্গুকা| অজাজীসারিবাকুষ্ঠমজমোদঃ কুরণ্ডকঃ| বযস্থা সিন্দুবারৈলা কাযস্থা চারটী বচা| কর্কটী পূতনা কেশী শ্বেতা চ গিরিকর্ণিকা| গোলোমী সিংহলোমী চ বর্ষাভুর্গজপিপ্পলী| অগদো যাপনাখ্যোঽযং পূর্বেণ সদৃশো গুণৈঃ||৪৭||

চন্দনাদিভিঃ পঞ্চভিঃ শ্লোকৈর্যাপনাখ্য অগদঃ পূর্বেণ সঞ্জীবনেন গুণৈঃ সদৃশঃ| ধ্যামকং শ্যামকম্| কত্তৃণমিতি কেচিত্| বত্সকাত্ফলমিন্দ্রযবঃ| দলং গন্ধপত্রম্| অহিচ্ছত্রং কবকম্| তদেব ভূস্ফোটম্| ছত্রাকারমেতত্ (কূণ্ণ-ইতি ভাষা)| শ্যামা পিপ্পলী| শঙ্খপুষ্পী বীরটিঃ| কুরণ্ডকং পীতাম্লাযনকম্| বয-স্থা আমলকম্| কাযস্থা হরীতকী| চারটী স্থোণেযম্| কর্কটী বিল্বম্| পূতনা মাংসী| কেশী নির্গুণ্ডী| গোলোমী দূর্বা| বাসক ইতি চ| সিংহলোমী (নি) সুরসা চ সুপত্রা চ বহুপুত্রী চ তক্রলা| বর্ষাভূঃ পুনর্নবা|| ৪৭||

Adhikarana sUryodayo agadaH (48) · Śloka 48

শ্রীবেষ্টকং হরিদ্রে দ্বে কোবিদারং মনশ্শিলাম্| পিপ্পলীং পাটলী পদ্মাং শ্বেতাঞ্চ গিরিকর্ণিকাম্| মঞ্জিষ্ঠাং বৃহতী বক্রং যষ্টী মরিচকেসরম্| ফলিনীং কিণিহীং চেতি গবাং পিত্তেন ভাবযেত্| সূর্যোদযো হন্তি বিষং তমঃ সূর্যোদযো যথা||৪৮||

শ্রীবেষ্টকাদিভির্গোপিত্তপিষ্টৈঃ সূর্যোদযনামাঽগদো বিষং হন্তি যথা সূর্যোদযস্তমোঽন্ধকারম্| শ্রীবেষ্টকঃ শ্রীবাসকঃ শ্বেতা গিরিকর্ণিকা কটভী| বক্রং তগরম্| কেসরং নাগকেসরম্| ফলিনী প্রিযঙ্গুঃ| কিণিহী গিরিকর্ণিকা|| ৪৮||

Adhikarana apare agadAH (49) · Śloka 49

নিম্বপত্রং গৃহাদ্ধূমং ফাণিতং বৃহতীফলম্| গোপিত্তযুক্তমগদঃ পরমং মৃতজীবনঃ| গোপিত্তকুষ্ঠসুরসমধুকদ্বিনিশং তথা| বিশালারজনীকুষ্ঠশ্বপিত্তব্যোষতুম্বরুঃ| বচাশিরীষপঞ্চাঙ্গী মৃতসঞ্জীবনোঽগদঃ| পঞ্চাঙ্গানি শিরীষস্য শ্বপিত্তঞ্চ বরোঽগদঃ| প্রিযঙ্গুতগরং লাক্ষা মঞ্জিষ্ঠা মধুকং মধু| হরিদ্রা চেত্যযং শ্রেষ্ঠঃ কৌটল্যদযিতোঽগদঃ| বিসংজ্ঞানাং বিষৈর্ঘোরৈঃ প্রহারৈর্নষ্টচেতসাম্| উদ্বন্ধানাং জলৌঘে চ মৃতানাং চেতনাবহঃ| শিরীষফলকাকাণ্ডসুরসাগ্রপুনর্নবৈঃ| কক্ষ্যাবাযসিসংযুক্তৈরগদঃ পূর্ববদ্গুণৈঃ| কটুকালাবুমূলানি গবাং পিত্তেন কল্কযেত্| ব্রাহ্মো ধার্যোঽযমগদঃ সর্বকর্মসু পূজিতঃ| অগারধূমস্ত্রিবৃতা গোপিত্তং ত্র্যূষণং বচা| প্রাজাপত্যোঽযমগদঃ সর্বরক্ষো বিষাপহঃ| শ্বেতপুষ্করতুল্যাংশৈর্জীবন্ত্যা কুসুমৈঃ কৃতঃ| রুক্মপিটো মণির্দ্ধার্যশ্চাণক্যেষ্টো বিষাপহঃ| মংসীত্বক্পত্রসুরসমনোহ্বা শীতকুঙ্কুমম্| নিশা ব্যাঘ্রনখং শুণ্ঠী দশাঙ্গোঽযং বিষাপহঃ| উত্পাতগণ্ডপিটকাদিগ্ধবিদ্ধবিষাপহঃ| উদুম্বরত্বগ্জম্ব্বস্থিমধুকোত্পলগৈরিকৈঃ| চন্দনোশীরনলদনাগকেসরপদ্মকৈঃ| বিশেষাদ্বিষবিস্ফোটবিসর্পজ্বরদাহহা| শিরীষোদুম্বরপ্লক্ষন্যগ্রোধাশ্বত্থবল্কলৈঃ| সঘৃতো দাহতৃষ্ণাস্রবিষবীসর্পপিত্তহা| গজপিপ্পলিকাসীসক্ষারযষ্টীমযূরকম্| রক্তা নতং বচা দন্তী শিবঃ শিবকৃতোঽগদঃ| সুরালাপাবকীসোমাভোগবত্যমৃতানতম্| আঢকীকিণিহীসোমরাজী চৌশনসোঽগদঃ| শ্লেষ্মাতকার্ককুসুমং তণ্ডুলীযো মযূরকঃ| সুরসামঞ্জরী কাকমাচী পানেঽগদো বরঃ||৪৯||

নিম্বপত্রগোপিত্তবিশালাপঞ্চাঙ্গানীত্যাদযঃ সুবোধঃ| (গোপিত্তং গোরোচনেতি সুশ্রুতটীকা)| তথেতি পরমং মৃতজীবনঃ| শিরীষপঞ্চাঙ্গানি পত্রপুষ্পফলত্বঙ্মূলানি| বরঃ শ্রেষ্ঠা| প্রিযঙ্গ্বাদিরযমগদঃ শ্রেষ্ঠঃ| যঃ কৌটিল্যস্য দযিতঃ বিসংজ্ঞাদীনাং চেতনাবহশ্চ| শিরীষফলাদিভিরগদো গুণৈঃ পূর্ববত্ প্রিযঙ্গ্বাদিবদ্বিজ্ঞেযঃ| সুরসাগ্রং তুলসীকুসুমম্| কক্ষ্যা বাযসী কাকোদুম্বরিকা| কটুকালাবুমূলানি গোপিত্তেন কল্কযেত্| ব্রাহ্মোঽযমগদো মণিবাদ্ধার্যঃ| সর্বকর্মস্বভীষ্টেষু পূজিতঃ শ্রেষ্ঠঃ| (কটুকালাবু ঘেচ্চুরঃ)| অগারধূমাদিভিঃ প্রাজাপত্যো নামাগদঃ সুবোধঃ| শ্বেতপদ্মং জীবন্তীকুসুমং চ সমভাগং কৃত্বা রুক্মেন সুবর্ণেন পেষযেদযং মণিশ্চাণক্যস্য কৌটিল্যস্য বিষাপহ ইষ্টঃ| মাংস্যাদিভির্দশাঙ্গো নামাগদো বিষাপহঃ| বিশেষত উত্পাতাদ্যাপহশ্চ| শীতং চন্দনম্| উদুম্বরত্বগাদিভিরগদো বিশেষাদ্বিষবিস্ফোটাদিহা| শিরীষাদিবল্কলৈঃ সঘৃতোঽগদো দাহাদিহা| গজপিপ্পল্যাদিভির্ভগবতা শিবেন কৃতোঽগদঃ| শিবঃ শ্রেযষ্করঃ| মযূরকমপামার্গঃ রক্তা| গুঞ্জা| নতং তগরম্| সুরালাদিভিরৌশনসোঽগদঃ| সুরালা (নি)- সুলক্ষণা সুরালাখ্যা জ্ঞেযা পুত্রবতী পরা| পূজা বৃদ্ধাকরী জ্ঞেযা পত্রপুষ্পফলৈঃ শুভা| পাবকী (নি)- ক্ষুরধারা পাবকাখ্যা জ্ঞেযা সস্যবতীতি চ| বীরণী বীরগুচ্ছোক্তা সৈবারুণবচা মতা|| সোমা ব্রাহ্মী চন্দ্রতরুর্বা| ভোগবতী সমঙ্গা| কিণিহী কটভী| শ্লেষ্মাতকাদিভিরগদঃ পানে বরঃ শ্রেষ্ঠঃ| (সুরসা নির্গুণ্ডী| মঞ্জরী তুলসী)|| ৪৯||

Adhikarana dadhyAdikaM mUlaviShaghnam (50) · Śloka 50

দধ্যাজ্যাক্ষৌদ্রলবণং পীতং মূলবিষাপহম্||৫০||

দধ্যাদিকং সংযোজ্য পীতং মূলবিষাপহং ভবতি|| ৫০||

Adhikarana haridrAdiyogaH (51) · Śloka 51

হরিদ্রাসৈন্ধবক্ষৌদ্রঘৃতং সংসৃজ্য পাযযেত্| আর্ত্তান্ মূলবিষৈর্ঘোরৈর্দিগ্ধবিদ্ধান্ বিশেষতঃ||৫১||

ঘোরৈর্মূলবিষৈরার্ত্তান্ হরিদ্রাদীনি সংসৃজ্য পাযযেত্| বিষদিগ্ধশস্ত্রবিদ্ধান্ বিশেষেণ পাযযেত্|| ৫১||

Adhikarana nishAyAH antarbahiH prayogaH (52) · Śloka 52

হরিদ্রান্তর্বহিঃ শস্তা বিষদোষাতুরে পরম্||৫২||

বিষদোষৈরাতুরে পুরুষে অন্তঃপানাদিনা বহিশ্চ লেপাদিনা হরিদ্রৈব পরং শস্তা|| ৫২||

Adhikarana nishAdya~jjanam (53) · Śloka 53

নিশাশ্বমারসুরসকরঞ্জব্যোষদারুভিঃ| অঞ্জনং বস্ত্রমূত্রেণ পিষ্টৈর্নেত্রোপরোধজিত্||৫৩||

নিশাদিভির্বস্তমূত্রপিষ্টৈরঞ্জনং বিষাতুরে নেত্রোপরোধজিদ্ ভবতি||৫৩||

Adhikarana bIjapUrAdya~jjanam (54) · Śloka 54

কর্ণাক্ষিনাসিকাকণ্ঠজিহ্বারোগেষু নাবনম্| বীজপূরার্যবৃহতীফলজ্যোতিষ্মতীকৃতম্||৫৪||

বীজপূরাদিকৃতং নাবনং বিষাতুরে কর্ণাদিরোগেষু যোজ্যমিতি শেষঃ| আর্যুবৃহতী স্থূলফলা কণ্টকারিকা তস্যাঃ ফলানি|| ৫৪||

Adhikarana gandhahastI agadaH (55) · Śloka 55

শ্বেত বচা হিঙ্বমৃতা সুগন্ধা কুষ্ঠসৈন্ধবম্| শিরীষপুষ্পদ্বিনিশাব্যোষটুণ্টুকসর্ষপাঃ| কপিত্থমধ্যং লশুনং করঞ্জো বংশলেখনম্| পিষ্ট্বা গোবস্তমূত্রেণ তত্পিত্তেনৈব ভাবযেত্| দিনানি সপ্ত ব্যত্যাসাদ্বিনিহন্তি ততোঽঞ্জনাত্| বিষং শিরস্থং মূর্দ্ধার্ত্তিজ্বরাজীর্ণাবিষূচিকাঃ| অপস্মারগ্রহোন্মাদপাণ্ডুমেহমদাত্যযান্| শুষ্কনেত্রামযশিরোরোগপৈল্লগণার্বুদান্| কাচান্ধকারপটলকণ্ডূদৌর্বল্যপক্ষ্মণঃ| লেপাত্ পীতক্ষতালীঢদষ্টদিঘ্দবিষং জযেত্| শ্বিত্রং কৃচ্ছ্রাণি কুষ্ঠানি দুষ্টনাডীমহাব্রণান্| আনাহার্শো গুদে লেপাল্ললাটে দুষ্টপীনসম্| যোনিলেপেন নারীণাং মূঢগর্ভানুলোমনঃ| উন্মূলযত্যেষ বিষং গন্ধহস্তীব কাননম্||৫৫||

শ্বেতাদিকং গোবস্তমূত্রেণ পিষ্টং সংশোষ্য সপ্তদিনানি তত্পিত্তেন গোবস্তপিত্তেন ব্যত্যাসাত্ পর্যাযেণ ভাবযেত্| পুনর্গোপিত্তেন পুনর্বস্তপিত্তেনেত্যর্থঃ| ততোঽনন্তরমঞ্জনেন শিরঃস্থং বিষং মূর্দ্ধার্ত্যাদীংশ্চ বিনিহন্তি| শুষ্কনেত্রামযঃ শুষ্কাক্ষিপাকঃ| অন্ধকারং তিমিরম্| লেপাত্ পীতবিষং ক্ষতবিষমালীঢবিষং দষ্টবিষং দিগ্ধবিষং চ জযেত্| ক্ষতবিষাদীনাং লক্ষণং বক্ষ্যতি| শ্বিত্রপীডাদীংশ্চ লেপাত্ জযেত্| গুদে লেপাদানাহমর্শশ্চ| ললাটলেপাদ্দুষ্টপীনসম্| এষ চাগদো নারীণাং যোনিলেপনেন মূঢগর্ভানুলোমনঃ| এষ চ বিষমুন্মূলযতি যথা গন্ধহস্তী বনম্| (শ্বেতা শ্বেতবচা| সুগন্ধা গন্ধনাকুলী| টুণ্টুকঃ স্যোনাকঃ| বংশলেখনং বংশত্বক্)||৫৫||

Adhikarana ajito~agadaH (56) · Śloka 56

বিডঙ্গপাঠা ত্রিফলাজমোদা হিঙ্গ্বগ্নিবক্রং লবণস্য বর্গঃ| ব্যোষান্বিতং স্থাবরজঙ্গমানাং জেতা বিষাণামগদোঽজিতাখ্যঃ||৫৬||

বিডঙ্গাদিভিরজিতনামাগদঃ স্থাবরাণাং জঙ্গমানাং চ বিষাণাং জেতা| লবণবর্গঃ সূত্রোক্তঃ|| ৫৬||

Adhikarana bAlasUryo~agadaH (57) · Śloka 57

মনোহ্বা রোচনা চণ্ডা ত্বগেলাসিতসর্ষপৈঃ| স্পৃক্কাহিঙ্গুলকাশ্মীরকান্তাভিঃ কল্কিতোঽগদঃ| বিষঘ্নো বালসূর্যোঽযং শ্রীরক্ষাবিজযর্দ্ধিদঃ||৫৭||

মনোহ্বাদিভিঃ কল্কিতোঽগদো নাম্না বালসূর্যো বিষঘ্নঃ শ্র্যাদিপ্রদশ্চ| মনোহ্বা মনশ্শিলা| চণ্ডা চোরকম্| কাশ্মীরং কুঙ্কুমম্| কান্তা প্রিযঙ্গুঃ|| ৫৭||

Adhikarana mAheshvaro yogaH (58) · Śloka 58

অজগন্ধা সগোমূত্রা গৃহধূমঃ সগুগ্গুলুঃ| এষ মাহেশ্বরো যোগো ন ক্বচিত্ প্রতিহন্যতে||৫৮||

অজগন্ধাদিভির্মাহেশ্বরো যোগঃ সুবোধঃ| অশ্বগন্ধা সগোমূত্রা ইতি চ পাঠঃ|| ৫৮||

Adhikarana digdhaviddhalakShaNAni (59) · Śloka 59

বিষদিগ্ধেন বিদ্ধস্তু প্রতাম্যতি মুহুর্মুহুঃ| বিবর্ণভাবং ভজতে বিষাদং চাশু গচ্ছতি| কীটৈরিবাবৃতং চাস্য গাত্রং চিমিচিমাযতে| শ্রোণিপৃষ্ঠশিরঃ স্কন্ধসন্ধযঃ স্যুঃ সবেদনাঃ| কৃষ্ণদুষ্টাস্রবিস্রাবী তৃণ্মূর্চ্ছাজ্বরদাহবান্| দুষ্টিকালুষ্যবমথুশ্বাসকাসকরঃ ক্ষণাত্| আরক্তপীতপর্যন্তঃ শ্যাবমধ্যোঽতিরুগ্ব্রণঃ| শূযতে পচ্যতে সদ্যো গত্বা মাংসং চ কৃষ্ণতাম্| প্রক্লিন্নং শীর্যতেঽভীক্ষ্ণং সপিচ্ছিলপরিস্রবম্||৫৯||

বিষদিগ্ধাস্ত্রবিদ্ধস্য লক্ষণমাহ-প্রতাম্যতি মুহুর্মুহুরিত্যাদিকং বিষদিগ্ধেন বিদ্ধস্য লক্ষণম্| তত্র ব্রণঃ ক্ষণাত্ দৃষ্টিকালুষ্যাদিকর ইতি সম্বন্ধঃ| আরক্তা ঈষল্লোহিতাঃ পর্যন্তা যস্মিন্ ব্রণে স তথোক্তঃ| শূযত ইতি ব্রণবিশেষণম্| (বিষদিগ্ধেন শস্ত্রেণ বিদ্ধো নরস্তু মুহুর্মুহুঃ পুনঃ পুনঃ প্রতাম্যতি গ্লানিং প্রাপ্নোতি বিবর্ণভাবংম্ বৈবর্ণ্যং ভজতে| আশ্বেব বিষাদং গচ্ছতি| চশব্দঃ সমুচ্চযে| অস্য বিষদিগ্ধাহতস্য শরীরং কীটৈঃ কৃমিভিরাচিতং ব্যাপ্তমিব চিমিচিমাযতে চিমিচিমাবদাচরতি| অণুপ্রাণি পরিসর্পণপ্রতীতিশ্চিমিচিমা| অস্য শ্রোণ্যাদি নানা বেদনাঽন্বিতা ভবন্তি| ব্রণঃ কৃষ্ণং দুষ্টং চাস্রং সদা স্রবতি| তৃডাদিযুক্তশ্চ ভবতি| মূর্চ্ছা বৈচিত্যম্| ক্ষণেন দৃষ্টিকালুষ্যাদিকরো ভবতি| বেধব্রণ ঈষদ্রক্তপীতবর্ণপর্যন্তঃ শ্যাবর্ণমধ্যঃ শোফং প্রাপ্নোতি| সহসা পাকং চ প্রাপ্নোতি| তদ্গতং মাংসং কাড়্র্ষ্ণ্যমাসাদ্য অতিশযেন ক্লিন্নং সত্ পৈচ্ছিল্যযুক্তপূযস্রাবোপেতমনবরতং শীর্যতে| চশব্দঃ সমুচ্চযার্থঃ)|| ৫৯||

Adhikarana digdhaviddhacikitsA (60) · Śloka 60

কুর্যাদমর্মবিদ্ধস্য হৃদযাবরণং দ্রুতম্| শল্যমাকৃষ্য তপ্তেন লোহেনানু দহেদ্ ব্রণম্| অথবা মুষ্ককশ্বেতাসোমত্বক্তাম্রবল্লিতঃ| শিরীষাদ্গৃধ্রনখ্যাশ্চ ক্ষারেণ প্রতিসারযেত্| শুকনাসাপ্রতিবিষাব্যাঘ্ড়ীমূলৈশ্চ লেপযেত্| পীতদষ্টচিকিত্সাং চ কুর্যাত্তস্য যথার্হতঃ| ব্রণে তু পূতিপিশিতে ক্রিযা পিত্তবিসর্পবত্||৬০||

কির্যাদিত্যাদিনা দিগ্ধবিদ্ধস্য চিকিত্সা-অমর্মণি বিদ্ধস্যাশু হৃদযবরণং কুর্যাত্| হৃদযাবরণং তত্ যেন পীতেন হৃদয প্রাপ্তেন বিষমভিভবিতুং ন শক্নোতি তচ্চ বক্ষ্যতে| ব্রণাচ্চ বিষদিগ্ধং শল্যমাকৃষ্যানু পশ্চাত্তপ্তেন শস্ত্রেণ ব্রণং দহেত্| (অমর্মবিদ্ধস্য মর্মবেধস্যাসাধ্যত্বান্মর্মরহিতপ্রদেশে বিদ্ধস্য দ্রুতমাশ্বেব হৃদযাবরণং ঘৃতপানেন হৃদযাচ্ছাদনং কুর্যাত্ ভিষগিতি শেষঃ)| হৃদযস্য সর্বধাতুমূলত্বাদাহারমার্গত্বাত্ প্রধানমর্মত্বাচ্চ তস্মিন্ বিষঘ্নঘৃতাদিভিঃ প্রচ্ছাদিতে সতি বিষং সহসা নাতিবিসর্পতি| উক্তং চালম্বাযনেন- যাঃ সিরাঃ সর্বগাত্রেষু হৃদযে সম্প্রতিষ্ঠিতাঃ| তাভিরস্য বিষং সর্বং হৃদযং সম্প্রধাবতি|| ঘৃতেন তু প্রতিচ্ছন্নং বিষং নাতি প্রপীডযেত্| নির্বাণজননং সর্পিঃ প্রাণিনাং প্রাণবর্দ্ধনম্|| হৃদযাবরণাস্তদ্বদ্ভক্ষ্যা ভোজ্যাশ্চ সাগদাঃ|| ইতি| অনু হৃদযাবরণাদনন্তরং শল্যং বিষদিগ্ধশিলীমুখাদিকং সূত্রোদিতেন বিধিনাঽহৃত্য অগ্নিনা তপ্তেন লোহমযেন জাম্ব্বোষ্ঠাদিনা বেধব্রণং দহেত্| অথবা নৈব দহেদপি তু মুষ্ককাদীনাং ক্ষারেণ প্রতিসারযেত্| শুকনাসাদিভির্ব্রণং লেপযেত্| (অথবা অদাহে যস্য চেত্ মুষ্ককাদিভবেন ক্ষারেণ ব্রণং প্রতিসারযেত্| মুষ্ককঃ কালমুষ্ককঃ| শ্বেতা শ্বেতবচা| সোমাত্বক্ কট্ফলত্বক্| তাম্রবল্লী (চোম্বুল্লির্কোডি) শিরীষং প্রসিদ্ধং লোকে| গৃধ্রনখী (কার্তোট্টি) বিরলেতি পাঠ্যকারঃ| পিষ্টৈঃ শুকনাসাদিভির্বেধব্রণং লেপযেচ্চ| শুকনাসা স্যোনাকঃ| প্রতিবিষাঽতিবিষা| ব্যাঘ্রী বৃহতী)| তস্য বিষদিগ্ধশস্ত্রবিদ্ধস্য পীতদষ্টবিষাদ্যপেক্ষযা যোজযেত্| সুবোধম্| পূতিপিশিতে ক্লিন্নমাংসে| (তস্য বিষদিগ্ধশস্ত্রবিদ্ধস্য পীতদষ্টচিকিত্সাং পীতচিকিত্সাং বিষপীতায সূত্রোদিতাং বমনাদিকাং দষ্টচিকিত্সামুপরি বক্ষ্যমাণাং সর্পাদিদুষ্টক্রিযাং চ কুর্যাত্| ব্রণে বিদ্ধব্রণে পূতিপিশিতে দুর্গন্ধযুক্তামিষে সতি তুশব্দেন দুষ্টীভূতেঽপি কারণবিশেষাত্ শীতোপচার এব কর্ত্তব্য ইতি দ্যোত্যতে| পিত্তবিসর্পবত্ পিত্তবিসর্প ইব শতধৌতঘৃতাপ্লুতন্যগ্রোধগণাদ্যালেপনাদিকা ক্রিযা চিকিত্সা কার্যেতি শেষঃ)|| ৬০||

Adhikarana garAkhyaM kRutrimaM viSham (61) · Śloka 61

সৌভাগ্যার্থং স্ত্রিযো ভর্ত্রে রাজ্ঞে বারাতিচোদিতাঃ| গরমাহারসম্পৃক্তং যচ্ছন্ত্যাসন্নবর্তিনঃ||৬১||

ইত্যকৃত্রিমমুক্ত্বা ক্রমপ্রাপ্তং কৃত্রিমং নির্ণেতুমাহ-সৌভাগ্যার্থং ভর্ত্রেরাহারসম্প্রযুক্তং গরং স্ত্রিযো যচ্ছন্তি দদতি| রাজ্ঞে চাসন্নবর্তিনো যচ্ছন্তি কিম্ভূতা অরাতিচোদিতাঃ রাজশত্রুপ্রযুক্তাঃ| (স্ত্রিযঃ সৌভাগ্যার্থং ভর্ত্রে আসন্নবর্তিনঃ অরাতিচোদিতাঃ বৈরিজনপ্রেরিতাঃ রাজ্ঞে নৃপায বাশব্দো বিকল্পার্থঃ| গরং বক্ষ্যমাণবিশেষবিষং আহার সম্পৃক্তং আহোরেণ সংযুক্তং আহারশব্দেনাদ্যমানং সকলমপি বস্তুজাতং গৃহ্যতে| যচ্ছন্তি প্রযচ্ছন্তি)|| ৬১||

Adhikarana 'gara'nirvacanam (62) · Śloka 62

নানাপ্রাণ্যঙ্গশমলবিরুদ্ধৌষধিভস্মনাম্| বিষাণাঞ্চাল্পবীর্যাণাং যোগো গর ইতি স্মৃতঃ||৬২||

ননু গরশব্দেন কিমুচ্যত ইত্যাহ-নানাবিধপ্রাণ্যঙ্গশমলানাং দেহবিরুদ্ধৌষধিভস্মনামল্পবীর্যাণাং বিষাণাং চ য একত্র যোগঃ স গর ইতি স্মৃতঃ| (নানাপ্রাণ্যঙ্গশমলবিরুদ্ধৌষধিভস্মনাং নানাবিধপ্রাণিনামঙ্গানামবযবানাং শমলানাং মূত্রপুরীষাদিমলানাং চ অথবা নানাপ্রাণীনাং অঙ্গমলানাং মনুষ্যদেহমলানাং চ প্রাণীনামেবাঙ্গমলানাং বা| বিরুদ্ধৌষধিভস্মনাং বিরুদ্ধবীর্যদ্রব্যভস্মনাং অল্পবীর্যাণাং বত্সনাভাদি মন্দবীর্যাণাং বিষদ্রব্যাণাং চ যোগঃ একীকরণং গর ইতি গরসংজ্ঞঃ স্মৃতঃ মুনিভিরিতি শেষঃ)|| ৬২||

Adhikarana garaprayukte lakShaNAni (63) · Śloka 63

তেন পাণ্ডুঃ কৃশোঽল্পাঘ্নিঃ কাসশ্বাসজ্বরার্দিতঃ| বাযুনা প্রতিলোমেন স্বপ্নচিন্তাপরাযণঃ| মহোদরযকৃত্প্লীহো দীনবাগ্দুর্বলোঽলসঃ| শোফবান্ সততাধ্মাতঃ শুষ্কপাদকরঃ ক্ষযী| প্রাযঃ পশ্যতি শুষ্কাংশ্চ বনস্পতিজলাশযান্| মন্যতে কৃষ্ণমাত্মানং গৌরো গৌরং চ কালকঃ| বিকর্ণনাসানযনং পশ্যেত্তদ্বিহতেন্দ্রিযঃ| এতৈরন্যৈশ্চ বহুভিঃ ক্লিষ্টো ঘোরৈরুপদ্রবৈঃ| গরার্ত্তো নাশমাপ্নোতি কশ্চিত্সদ্যোঽচিকিত্সিতঃ||৬৩||

গরোপযুক্তস্য লক্ষণমাহ-তেন গরেণোপযুক্তেন পুরুষঃ পাণ্ড্বাদিগুণো ভবতি| অর্দ্দিতশব্দস্য কাসাদিভিঃ সম্বন্ধঃ| প্রতিলোমো বাযুর্বিপরীতবাহী| মহচ্ছব্দস্য প্লীহান্তৈঃ সম্বন্ধঃ স্বপ্নে চ গোমায্বাদীন্ জলাশযান্তান্ প্রাযঃ পশ্যতি| যশ্চ স্বভাবাদেব গৌরঃ স কৃষ্ণমাত্মানং মন্যতে কালশ্চ গৌরম্| তেন চ গরণ বিহতেন্দ্রিযঃ সর্বং কর্ণাদিরহিতং পশ্যতি| গরার্ত্তশ্চ পুরুষঃ এতৈরন্যৈশ্চ ঘোরৈর্বহুভিরুপদ্রবৈঃ ক্লিষ্টো নাশমাপ্নোতি| কশ্চ্ত্ সদ্য এবাচিকিত্সিতঃ সন্|| ৬৩||

Adhikarana garacikitsAkramaH (64) · Śloka 64

গরার্ত্তো বান্তবান্ভুক্ত্বা তত্পথ্যং পানভোজনম্| শুদ্ধহৃচ্ছীলযেদ্ধেম সূত্রস্থানবিধেঃ স্মরন্||৬৪||

গরার্ত্ত ইত্যাদিনা চিকিত্সা| যো গরার্ত্তঃ স প্রথমমেব বান্তবান্ গরে পথ্যং পানভোজনং ভুক্ত্বা শুদ্ধহৃত্ সন্ হেম সুবর্ণং সূত্রস্থানোক্তবিধিনা শীলযেত্| (গরার্ত্তঃ গরপীডিতো নরঃ বান্তবান্ কৃতবমনঃ তত্পথ্যাং গরহিতং পানভোজনং ভুক্ত্বা সূত্রস্থানবিধেঃ স্মরন্ অন্নসংরক্ষাযাং বিষপীতায দদ্যাদিত্যাদি সূত্রস্থানোক্তং নিরূপযন্ শুদ্ধহৃত্ সক্ষৌদ্রতাম্ররজসা শুদ্ধহৃদযঃ হেম হেমচূর্ণং শীলযেদভ্যসেত্)|| ৬৪||

Adhikarana sharkarAdilehaH (65) · Śloka 65

শর্করাক্ষৌদ্রসংযুক্তশ্চূর্ণস্তাপ্যসুবর্ণযোঃ| লেহঃ প্রশমযত্যুগ্রং সর্বং যোগকৃতং বিষম্||৬৫||

শর্করাদিলেহঃ সুবোধঃ| তাপ্যং মাক্ষিকধাতুঃ| তাপ্যসুবর্ণযোশ্চূর্ণঃ শর্করযা ক্ষৌদ্রেণ চ সংযোজিতো লেহ উগ্রমুত্কৃষ্টবীর্যং যোগকৃতং সর্বং বিষং প্রশমযতি নাশযতি| অত্র সর্বশব্দেন গরস্য নানাত্বং দ্যোত্যতে|| ৬৫||

Adhikarana mUrvAdicUrNam (66) · Śloka 66

মূর্বামৃতানতকণাপটোলীচব্যচিত্রকান্| বচামুস্তবিডঙ্গানি তক্রকোষ্ণাম্বুমস্তুভিঃ| পিবেদ্রসেন চাম্লেন গরোপহতপাবকঃ||৬৬||

যস্য গরেণ পাবক উপহতঃ স মূর্বাদিচূর্ণং তক্রাদিভিরম্লেন কাঞ্জিকাদ্যম্লদ্রব্যেণ মাংসরসেন চ পিবেত্|| ৬৬||

Adhikarana pArAvatAmiShAdiyogaH (67) · Śloka 67

পারাবতামিষশটীপুষ্করাহ্বশৃতং হিমম্| গরতৃষ্ণারুজাকাসশ্বাসহিধ্মাজ্বরাপহম্||৬৭||

পারাবতমাংসাদিকং রসবিধানেন শৃতং পক্বং পশ্চাচ্চ হিমং গরাদ্যপহরম্| (পারাবতামিষাদিভিঃ শৃতং অত্র শ্রপণোকত্যা দ্রবদ্রব্যত্বাত্তোযমিত্যর্থঃ)|| ৬৭||

Adhikarana shvAsakAsaghnayogau (68) · Śloka 68

বাযসী শ্বাসকাসঘ্নী ভৃষ্টাজ্যত্রিফলারসে| ভার্ঙ্গীনাগরনির্যূহঃ শিশিরশ্চ সমাক্ষিকঃ||৬৮||

আজ্যত্রিফলারসযোর্ভৃষ্টা বাযসী গরার্ত্তস্য শ্বাসকাসঘ্নী| বাযসী কাকোদুম্বরিকা| ভার্ঙ্গীনাগরযোঃ ক্বাথঃ শীতো মাক্ষিকযুক্তশ্চশব্দাচ্ছ্বাসকাসঘ্নঃ|| ৬৮||

Adhikarana hareNvAdilepanam (69) · Śloka 69

হরেণুচন্দনশ্যামানলদং শ্লক্ষ্ণপেষিতম্| বিলেপনং প্রযোক্তব্যং গরেণোপহতত্বচঃ||৬৯||

যেষাং গরেণ ত্বগুপহতা তেষাং হরেণ্বাদিকং শ্লক্ষ্ণপিষ্টং বিলেপনং প্রযোক্তব্যম্|| ৬৯||

Adhikarana ma~jjiShThAtipragharShaNam (70) · Śloka 70

মঞ্জিষ্ঠা কিণিহী নিম্বরজন্যশ্বত্থচন্দনৈঃ| প্রঘর্ষণং কৃশানাং তু গরেণ ক্ষপিতৌজসাম্||৭০||

যে গরেণ ক্ষপিত্তৌজসঃ কৃশাশ্চ তেষাং মঞ্জিষ্ঠাদিভির্দেহে প্রঘর্ষণং হিতম্|| ৭০||

Adhikarana shreShThaM pathyam (70) · Śloka 71

পথ্যং পরমমুদ্দিষ্টং শীলনং ক্ষীরসর্পিষোঃ||৭১||

পথ্যমিত্যাদি গরে বিজ্ঞেযম্|| ৭০||

Adhikarana vRuShadisiddhaghRutAniA (72) · Śloka 72

বৃষনিম্বপটোলীনাং ক্বাথেন বিপচেত্ ঘৃতম্| অভযাগর্ভিণং শ্রেষ্ঠং তত্ গরস্য নিবর্হণম্| হরিদ্রাং নাকুলীং জাতীং পৃথক্পিষ্ট্বা বিপাচযেত্| ঘৃতত্রযং বিষার্ত্তানামেতদারোগ্যদং পরম্| তণ্ডুলীযকমূলেন গৃহধূমেন চৈকতঃ| ক্ষীরেণ চ ঘৃতং সিদ্ধং সমস্তবিষরোগজিত্| নাগদন্তী ত্রিবৃদ্দন্তী দ্রবন্তী স্নুক্পযঃ পলৈঃ| সাধিতং মাহিষং সর্পিঃ সগোমূত্রাঢকং হিতম্| সর্পকীটবিষর্ত্তানাং গরার্ত্তানাং চ শান্তযে||৭২||

বৃষাদিক্বাথে হরীতকীগর্ভং ঘৃতং পচেত্তদ্ঘ্রুতং শ্রেষ্ঠং গরনিবর্হণম্| হরিদ্রাদিকং পৃথক্পিষ্ট্বা ঘৃতত্রযং বিপাচযেত্| তেনৈকং ঘৃতং হরিদ্রযা দ্বিতীযং নাকুল্যা তৃতীযং জাত্যা| তণ্ডুলীযকমূলাদাবেকত ইতি মিশ্রীকৃত্য| নাগদন্ত্যাদ্যং সর্পির্ব্যাখ্যাসমম্| শান্তযে রোগোপশমায||৭২||

Adhikarana ajeyaM ghRutam (73) · Śloka 73

মধুকং তগরং কুষ্ঠং ভদ্রদারু হরেণবঃ| মঞ্জিষ্ঠৈলৈলবালূনি নাগপুষ্পোত্পলং প্লবম্| বিডঙ্গং চন্দনং পত্রং প্রিযঙ্গুর্ধ্যামকং বলা| অংশুমত্যৌ হরিদ্রে দ্বে বৃহত্যৌ সারিবাদ্বযম্| এষাং কল্কৈর্ঘৃতং সিদ্ধমজেযং নাম বিশৃতম্| বিষাণি হন্তি সর্বাণি শীঘ্রমেব প্রযোজিতম্||৭৩||

মধুকাদিকল্কৈরজেযং নাম ঘৃতং সুবোধম্| প্লবং পরিপেলবম্| পত্রং গন্ধপত্রম্| ধ্যামকং কত্তৃণম্| অংশুমত্যৌ সালপর্ণীপৃশ্নিপর্ণ্যৌ|| ৭৩||

Adhikarana amRutaM ghRutam (74) · Śloka 74

শ্বেতে কপোতে বীজানি প্রত্যক্পুষ্পীশিরীষযোঃ| গোমূত্রপিষ্টৈস্তৈঃ সর্পিঃ সিদ্ধং বিষহরং পরম্| অমৃতং নাম বিখ্যাতমপি সঞ্জীবযেন্মৃতম্||৭৪||

শ্বেতাদিভির্গোমূত্রপিষ্টৈঃ সর্পিঃ সিদ্ধং নাম্নাঽমৃতং পরং বিষহরম্| মৃতং সঞ্জীবযেদিতি সম্ভাব্যতে| শ্বেতে দ্বে বচা কটভী চ| প্রত্যক্পুষ্পী শিরীষযোর্বীজানি| প্রত্যকপুষ্য্পপামার্গঃ|| ৭৪||

Adhikarana shirIShatvagAdighRutam (75) · Śloka 75

শিরীষত্বক্ত্রিত্রকটুকং বিদারী চন্দনোত্পলম্| দ্বে বলে সারিবাস্ফোতবৃহতীনিম্বপল্লবাঃ| বন্ধুজীবাঢকীমূর্বাবাসাসুরসবত্সকাঃ| পাঠাঙ্কোলাশ্বগন্ধার্কমূলযষ্ট্যাহ্বপদ্মকম্| বিশালা বৃহতী লাক্ষা কোবিদারশতাবরীঃ| কটভীদন্ত্যপামার্গপৃশ্নিপর্ণীরসাঞ্জনম্| শ্বেতৌ বাণাশ্বখুরকৌ কুষ্ঠদারুপ্রিঙ্গুকাঃ| সারং মধূকাত্ত্রিফলাং করঞ্জস্য ফলং বচাম্| রজন্যৌ লোধ্রমক্ষাংশং পিষ্ট্বা সাধ্যং ঘৃতাঢকম্| তুল্যাম্বুছাগগোমূত্রত্র্যাঢকে তদ্বিষাপহম্| অপস্মারক্ষযোন্মাদভূতগ্রহগরোদরান্| পাণ্ডুরোগকৃমিপ্লীহগুল্মোরুস্তম্ভকার্মিলাঃ| হনুস্তম্ভগ্রহাদীংশ্চ পানাভ্যঞ্জননাবনৈঃ| হন্তি সঞ্জীবযতি চ বিষোদ্বন্ধমৃতান্ নরান্||৭৫||

শিরীষত্বগাদিকমক্ষাংশং পিষ্ট্বা গোচ্ছাগযোর্মূত্রাত্ত্র্যাঢকে তুল্যাম্বুঘৃতাঢকং সাধ্যম্| তত্পানাদিভির্বিষাপহমপস্মারাদীংশ্চ হন্তি| বিষমৃতানুদ্বন্ধমৃতাংশ্চ নরান্ সঞ্জীবযতি| আস্ফোতোঽর্কঃ| সুরভিঃ সল্লকী| বন্ধুজীবো বন্ধূকঃ| আঢকী তুবরী| অঙ্কোলঃ অঙ্কোলকঃ| বাণোঽশ্বখুরশ্চ শ্বেতঃ| বাণঃ সহচরঃ| অশ্বখুরো গিরিকর্ণিকা|| ৭৫||

Adhikarana haritAlaviShArttalakShaNaM cikitsA ca (76) · Śloka 76

ভক্ষিতে হরিতালে তু হৃদি দাহো রসাগ্রহঃ| আনাহোঽম্লস্য বমনং পীতহারিদ্রবিট্স্রুতিঃ| তথা মণ্ডলিসর্পোক্তা বিকারাস্তচ্চ ভেষজম্| বিভজ্য যোজযেদূর্ধ্বমধঃ সংশোধিতং চ তম্| অঙ্কোলজালিনীবীজশুকনাসাপ্রিযঙ্গুকাঃ| লোধ্রধ্যামকতালীসনতযষ্ট্যাহ্বগুগ্গুলুঃ| হ্নীবেরং ভদ্রকাষ্ঠং চ লেহযেন্মধুসর্পিষা| দদ্যান্নকুলগোপিত্তযুক্তং নস্যেঽজ্জনে চ তত্||৭৬||

ভক্ষিত ইত্যাদিনা হরিতালাদীনাং ক্ষুদ্রবিষাণাং নির্ণযঃ| হরিতালে ভক্ষিতে হৃদ্ব্যথাদিকং ভবতি| মণ্ডলিসর্পভক্ষিতে চ যে রোগা বক্ষ্যমাণাস্তে চ ভবন্তি| তত্র তদেব মণ্ডলিসর্পোক্তং ভেষজমৌষধং দোষাদীন্ বিভজ্য যোজযেত্|| তং চ হরিতালভোজিনং ঊর্ধ্বমধশ্চ বমনবিরেচনাভ্যাং সংশোধিতমঙ্কোলাদিকং মধুসর্পিষা সহ লেহযেত্| তচ্চাঙ্কোলাদিকং নকুলস্য গোশ্চ পিত্তেন যুক্তং নস্যঽঞ্জনে চ দদ্যাত্| জালিনীবীজং গরাগরীবীজম্| শুকনাসা স্যোনাকঃ| ধ্যামকং সৌগন্ধিকম্| হ্নীবেরং বালকম্| ভদ্রকাষ্ঠং দেবদারু| ইতি হরিতালবিষে|| ৭৬||

Adhikarana dhattUraviShArttalakShaNa~jcikitsA ca (77) · Śloka 77

ধুর্ধূরকোপযোগেন সর্বং পশ্যতি পীতকম্| কম্পলালামদচ্ছর্দিস্মৃতিভ্রংশভ্রমান্বিতঃ| তং বামযেত মধুরৈঃ পাযযেদ্বা সিতাপযঃ||৭৭||

ধুর্ধূরকস্য ধত্তূরস্যোপযোগেন কম্পান্বিতঃ সন্ পুরুষঃ সর্বং পীতকং পশ্যতি| তমুপযুক্তধুর্ধূরং মধুরৈর্বামযেত্| শর্করাক্ষীরং বা পাযযেদিতি ধুর্ধূরবিষে|| ৭৭||

Adhikarana koradUShamadanakayorviShalakShaNaM cikitsA ca (78) · Śloka 78

কোরদূষৈর্মদনকৈঃ প্রাযো ধুর্ধূরবদ্গদাঃ| উন্মাদোঽক্ষিবিনাশশ্চ তত্রাপি বমনং হিতম্| কূষ্মাণ্ডকং চ সগুডং বহুশস্তত্র ভক্ষযেত্| নানাপ্রকারৈঃ সংযোগৈঃ কোদ্রবা মদহেতবঃ| তান্ বিভজ্য যথাদোষং চিকিত্সেদবিরোধিভিঃ||৭৮||

কোরদূষৈঃ কোদ্রবৈরুপযুক্তৈস্তথা মদনকৈঃ প্রাযেণ ধুর্ধূরবদ্ গদা ভবন্তি| অত্র তু বিশেষঃ উন্মাদাক্ষিনাশৌ| ব্যাখ্যাসমম্| কোদ্রবাঃ কোরদূষা নানাবিধৈঃ সংযোগৈর্মদহেতবো ভবন্তি| তান্ মদান্ দোষাদিভির্বিভজ্যাবিরোধেন চিকিত্সেত্|| ৭৮||

Adhikarana dUShIviShe kramaH (79) · Śloka 79

দূষীবিষার্ত্তং সুস্বিন্নমূর্ধ্বং চাধশ্চ শোধিতম্| দূষীবিষারিমগদং লেহযেন্মধুনা প্লুতম্||৭৯||

গরং নির্ণীয ক্রমপ্রাপ্তং দূষীবিষং নির্ণেতুমাহ-দূষীবিষার্ত্তমিত্যাতি| দূষীবিষেণার্ত্তমাদাবেব স্বিন্নং কৃতোর্ধ্বমধশ্চ বমনবিরেচনাভ্যাং শোধিতং দূষীবিষারিনামানমগদং মধুনা প্লুতং লেহযেত্||৭৯||

Adhikarana dUShIviShAriH agadaH (80) · Śloka 80

পিপ্পল্যো ধ্যামকং মাংসী লোধ্রমেলা সুবর্চিকা| কুটন্নটং নতং কুষ্ঠং যষ্টীচন্দনগৈরিকম্| দূষীবিষারির্নাম্নাঽযং ন চান্যত্রাপি বার্যতে||৮০||

পিপ্পল্য ইত্যাদিনা স এব দূষীবিষারেরুচ্যতে| অযমগদো নাম্না দূষীবিষারিরন্যত্রাপি বিষে ন নিবার্যতে|| ৮০||

Adhikarana virecanayogau (81) · Śloka 81

হরীতকী সলবণা মাগধী মরিচানি চ| এতদ্দূষীবিষার্ত্তানাং কাশ্যপোক্তং বিরেচনম্| যুঞ্জ্যাদ্বা বিষরোগেষু রেকে ব্যোষাদিকং ভিষক্||৮১||

হরীতক্যাদি কাশ্যপোক্তং বিরেচনম্| মাগধী পিপ্পলী| ব্যোষাদির্নাম কল্পোক্তস্তং ব্যোষত্রিজাতকেত্যাদি বিরেচনং সর্বেষু বিষরোগেষু যুঞ্জ্যাত্|| ৮১||

Adhikarana taruNapalAshakShArayogaH (82) · Śloka 82

তরুণস্য পলাশস্য স্রুতং ক্ষারোদকং পচেত্| ক্বাথে তত্র প্রতীবাপং প্রক্ষিপেচ্ছ্লক্ষ্ণচূর্ণিতম্| ব্যোষং শিরীষকুসুমং মধুকং সারিবে মিসিম্| কুষ্ঠং বেল্লনিশে লাক্ষাং শুক্লাং সুরসমঞ্জরীম্| সিন্ধূত্থং রক্তমৃন্মাংসী রেণুকাং হিঙ্গুবাহ্বিকম্| দর্বীপ্রলেপি তজ্জাতং গোবিষাণে নিধাপযেত্| ক্ষযগুল্মোদরার্শাংসি মেহং মন্দাগ্নিতাং জ্বরম্| ত্বগ্দোষকাসাপস্মারগ্রহোন্মাদভগন্দরান্| পাণ্ডুং কণ্ঠস্বরগদান্ প্লীহানং শ্বযথুং কৃমীন্| কোলমাত্রমতঃ খাদন্ জযেত্ সর্ববিষাণি চ||৮২||

তরুণপলাশস্য ক্ষারেণ স্রুতমুদকং পচেত্| তস্মিন্ ক্বাথে পচ্যমানে ব্যোষাদিকং শ্লক্ষ্ণচূর্ণিতং প্রতীবাপং প্রক্ষিপেত্| তচ্চ পাকেন দর্বীপ্রলেপি জাতং গোশৃঙ্গে নিধাপযেত্| অতঃ প্রত্যহং কোলমাত্রং খাদন্ ক্ষযাদীনি সর্ববিষাণি চ জযেত্| শুক্লামিতি সুরসমঞ্জর্যা বিশেষণম্| রক্তমৃত্ গৈরিকম্| রেণুকা হরেণুঃ| বাহ্লীকং কুঙ্কুমম্|| ৮২||

Adhikarana agadaprabhAvanidarshanam (83) · Śloka 83

বিষং তেজোমযং মন্ত্রৈঃ সত্যব্রহ্মতপোমযৈঃ| যথা নিবার্যতে শীঘ্রং প্রযুক্তৈর্ন তথৌষধৈঃ| ন তু সর্বমনুষ্যাণাং সন্তি ভেষজসম্পদঃ| অজ্ঞাতরোগসদ্ভাবে যোগ্যতা চাতিদুর্লভা| প্রকুপ্যতি বিষং ভূযঃ কেবলৈশ্চৌষধৈর্জিতম্| অবাপ্তৌ সিদ্ধমন্ত্রাণাং যতেতাতশ্চিকিত্সকঃ| তেঽপি চ ব্রতহীনস্য হীনা বা স্বরবর্ণতঃ| যস্মান্ন সিদ্ধিমাযান্তি তস্মাদ্যোজ্যোঽগদক্রমঃ||৮৩||

বিষমিত্যাদিশ্লোকচতুষ্টযেনাগদানাং প্রভাবাতিশযকীর্তিনম্| বিষাণাং বিষরোগাণাং চ ঔষধেভ্যো মন্ত্রাঃ পরমৌষধম্| তে চ ব্রতাদিসাপেক্ষত্বাত্ সর্বস্য চ ন সিদ্ধিদাঃ তস্মাত্তত্কার্যে অগদক্রমো যোজ্য ইতি পিণ্ডার্থঃ| বিষং হি তেজোমযং তচ্চ যথা সত্যাদিমযৈর্মন্ত্রৈঃ প্রযুক্তৈঃ শীঘ্রং নিবার্যতে তথা নৌষধৈঃ| ন চাপি সর্বেষাং মনুষ্যাণাং ভেষজসম্পদো বিদ্যন্তে| সতীষ্বপি বা তাসু বিষস্য ক্ষিপ্রকারিত্বাদবিজ্ঞাতরোগসদ্ভাবে বিষভুক্তে পুরুষে ভেষজযোগ্যতৈবাতিদুর্লভা| ন কেবলমেতাবানেব যাবদৌষধৈর্জিতমপি বিষং ভূযঃ প্রকুপ্যতি| যত এবমতশ্চিকিত্সকঃ সিদ্ধমন্ত্রাণামবাপ্তৌ যতেত| এতাবতা ঔষধস্যাপ্রাধান্যমুক্তম্| সম্প্রতি মন্ত্রাণাং দুর্লভত্বমুচ্যতে-ত ইতি| তেঽপি চ মন্ত্রা ব্রতহীনস্য ভিষজোঽথবা স্বরেণ বর্ণেন বা হীনা নৈব সিদ্ধিমাযান্তি| তস্মাদ্ধেতোরগদক্রম এব যোজ্যঃ|| ৮৩||

Adhikarana viShasa~gkaTam (84) · Śloka 84

বিষপ্রকৃতিকালান্নদোষদূষ্যাদিসঙ্গমে| বিষসঙ্কটমুদ্দিষ্টং শতস্যৈকোঽত্র জীবতি||৮৪||

বিষাদীনামর্থাত্ সদৃশানাং সঙ্গম একত্র সন্নিপাতে বিষসঙ্কটমুদ্দিষ্টমাচার্যৈঃ| অত্র বিষসঙ্কটে শতস্যৈকো জীবতি| জীবিতং দুর্লভমিতি তাত্পর্যার্থঃ| (বিষপ্রকৃতিঃ তীক্ষ্ণাদিগুণসাম্যাত্পিত্তপ্রকৃতিঃ| বিষকালোঽম্বুযোনিত্বাদ্বর্ষাকালঃ| বিষান্নং কটুতীক্ষ্ণাদিসাম্যত্ সর্ষপাদি| দোষো গুণসাম্যাত্ পিত্তম্| এবং দূষ্যং তদা শ্রযত্বাদ্রক্তম্| আদিশব্দেনান্যদপি তত্সদৃশগুণং ক্ষুত্পিপাসাদ্যপতর্পণং চ গৃহ্যতে)|| ৮৪||

Adhikarana viShavRuddhikAraNAni (85) · Śloka 85

ক্ষুত্তৃণাঘর্ম্মদৌর্বল্যক্রোধশোকভযশ্রমঃ| অজীর্ববর্চোদ্রবতাপিত্তমারুতবৃদ্ধিভিঃ| তিলপুষ্পফলাঘ্রাণভূবাষ্পঘনগর্জিতঃ| হস্তিমূষিকবাদিত্রনিস্বনৈর্বিষসঙ্কটৈঃ| পুরো বাতোত্পলামোদমদনৈর্বর্ধতে বিষম্||৮৫||

বিষবৃদ্ধিপ্রসঙ্গাত্তত্কারণমন্যদপ্যাহ-ক্ষুদাদিভির্বিষং বর্দ্ধতে| নিস্বনশব্দেন হস্ত্যাদীনাং প্রত্যেকং সম্বন্ধঃ| বিষসঙ্কটমুক্ত লক্ষণম্| মদনো হর্ষঃ| (তিলপুষ্পফলাঘ্রাণং তিলস্য পুষ্পফলযোরাঘ্রাণম্| তিলপুষ্পস্য মদনফলস্য চেতি কেচিত্| ভূবাষ্পঃ প্রথমজলসিক্তাযা ভূমের্ধূমাকার ঊষ্মা| ঘনগর্জিতং মেঘধ্বনিঃ হস্তিনিস্বনাদীনাং প্রত্যেমেকৈকস্য বহুত্বেঽপি বিষসঙ্কটসংজ্ঞাঽস্তীতি বোধ্যম্| উত্পলস্যামোদঃ উত্পলামোদঃ| মদনেন কামবৃদ্ধ্যা)|| ৮৫||

Adhikarana varShAsu viShavRuddheH kAraNam (86) · Śloka 86

বর্ষাসু চাম্বুযোনিত্বাত্সংক্লেদং গুডবদ্গতম্| বিসর্পতি ঘনাপাযে তদগস্ত্যো হিনস্তি চ| প্রযাতি মন্দবীর্যত্বং বিষং তস্মাদ্ ঘনাত্যযে||৮৬||

বর্ষাসু বিষবৃদ্ধেঃ কারণমাহ-বর্ষাসু চ বিষমম্বুকারণত্বস্বভাবত্বাত্ গুডবত্ সংক্লেদং গতং বিসর্পতি বিস্তীর্যতে| তচ্চ বিষং ঘনাপাযে শরদ্যগত্স্যো হিনস্তি| তস্মাদ্ধেতোর্ঘনাত্যযে শরদি বিষং মন্দবীর্যত্বং যাতি| (অম্বুযোনিত্বাত্ সাগরোদ্ভবতযা বর্ষাসু বর্ষাকালে গুড ইব সংক্লেদং গতং প্রাপ্তং ঘনাপাযে শরদি চ সমুচ্চযে বিসর্পতি সর্বতঃ সঞ্চরতি| অগস্ত্যঃ নক্ষত্ররূপেণ তত্কালোদিতোঽগস্ত্যো নাম মহর্ষিঃ তদ্বিষং হিনস্তি নাশযতি| মন্দবীর্যত্বমল্পবলত্বম্)|| ৮৬||

Adhikarana viShe doShAnusAraM cikitsAkramaH (87) · Śloka 87

ইতি প্রকৃতিসাত্ম্যর্তুস্থানবেগবলাবলম্| আলোচ্য নিপুণং বুদ্ধ্যা কর্মানন্তরমাচরেত্| শ্লৈষ্মিকং বমনৈরুষ্ণরূক্ষতীক্ষ্ণৈঃ প্রলেপনৈঃ| কষাযকটুতিক্তৈশ্চ ভোজনৈঃ শমযেদ্বিষম্| পৈত্তিকং স্রংসনৈঃ সেকপ্রদেহৈর্ভৃশশীতলৈঃ| কষাযতিক্তমধুরৈর্ঘৃতযুক্তৈশ্চ ভোজনৈঃ| বাতাত্মকং জযেত্স্বাদুস্নিগ্ধাম্ললবণান্বিতৈঃ| সঘৃতৈর্ভোজনালেপৈস্তথৈব পিশিতাশনৈঃ||৮৭||

ইত্যনন্তরোক্তপ্রকারেণ প্রকৃত্যাদিকম্ বিশিষ্টযা বুদ্ধ্যা নিপুণমালোচ্য বিকল্প্যানন্তরমব্যবহিতং কর্মাচরেত্| (প্রকৃতির্বিষপ্রকৃতিঃ| সাত্ম্যং পরিচিতবস্তু| ঋতুর্বর্ষাদিঃ| স্থানং বিষস্থানম্| বেগো বিষবেগঃ| বলাবলং দ্রব্যবিশেষজনিতম্)| কফানুপূর্ব্যা বিষস্য চিকিত্সামাহ-শ্লৈষ্মিকমিত্যাদিনা| কফস্থানক্রমেণ চিকিত্সা সুবোধা| বমনৈরুষ্ণাদিগুণৈঃ প্রলেপনৈঃ কষাযাদিরসৈর্ভোজনৈশ্চ শ্লেষ্মাত্মকং বিষং শমযেত্| পিত্তাত্মকং স্রংসনাদিভিঃ| বাতাত্মকং স্বাদ্বাদিগুণৈর্ভোজনৈরালেপৈস্তথা পিশিতাশনৈশ্চ জযেত্|| ৮৭||

Adhikarana viShaharaNe ghRutaM shreShTham (88) · Śloka 88

নাঘৃতং স্রংসনং শস্তং প্রলেপো ভোজ্যমৌষধম্| সর্বেষু সর্বাবস্থাসু বিষেষু ন ঘৃতোপমম্| বিদ্যতে ভেষজং কিঞ্চিদ্বিশেষাত্ প্রবলানিলে||৮৮||

বিষহরণে ঘৃতস্য বৈশিষ্ট্যমাহ-সর্বত্র চ বিষে স্রংসনাদি চতুষ্টযং ঘৃতরহিতং নৈব শস্তম্| কুত ইত্যাহ-সর্বেষ্বিত্যাদি| ব্যাখ্যাসমঃ শ্লোকঃ| (সর্বেষু স্থাবরজঙ্গমাত্মকেষু বিষেষু সর্বাবস্থাসু বমনবিরেচনাস্রাবালোপসেকভোজনাগদপানপ্রভৃতিষু ঘৃতোপমং ঘৃততুল্যমন্যদৌষধং কিঞ্চিদপি ন বিদ্যতে কিমপি নাস্তীত্যর্থঃ| প্রবলানিলে বাতোল্বণে বিষে বিশেষাত্ তত্র ঘৃতমেব বিশেষেণ শস্তমিত্যর্থঃ|| ৮৮||

Adhikarana raktagaviShacikitsA (89) · Śloka 89

রক্তগে স্রাবযেদ্রক্তং পিত্তবচ্চ ক্রিযাক্রমঃ| দূষীবিষে পুনস্তত্স্থে পঞ্চকর্মাণি চাচরেত্||৮৯||

রক্তগে বিষে রক্তং স্রাবযেত্ পিত্তপ্রাপ্তবচ্চ ক্রিযাং কুর্যাত্| দূষীবিষে পুনস্তত্স্থ ইতি রক্তস্থে পঞ্চকর্মাণি বমনাদীনি চাচরেত্|| ৮৯||

Adhikarana shirogataviShacikitsA (90) · Śloka 90

গণ্ডূষৈঃ কবলৈঃ প্রাশৈস্তীক্ষ্ণৈঃ প্রধমনাঞ্জনৈঃ| শিরোগতং প্রশমযেদ্বিষসংক্রমণৈস্তথা||৯০||

শিরোগতং বিষং গণ্ডূষাদিভিস্তীক্ষ্ণৈর্জযেদ্বিষসংক্রমণৈশ্চ|| ৯০||

Adhikarana ruddhavAyoshcikitsA (91) · Śloka 91

বিষদুষ্টকফস্রোতো রুদ্ধবাযুর্মৃতোপমঃ| যঃ স্যাদসাধ্যলিঙ্গৈশ্চ রহিতস্তস্য যোজযেত্| মূর্ধ্নি কাকপদং কৃত্বা কল্কং চর্মকসোদ্ভবম্| ধ্মাপনং চাস্য কটাভীজালিনী কটুকৈর্হিতম্||৯১||

বিষদুষ্টেন কফেন স্রোতস্সু রুদ্ধো বাযুর্যস্য স তথাবিধো মৃতোপমো যঃ স্যাদসাধ্যবিষলিঙ্গরহিতশ্চ তস্য শিরসি শস্ত্রেণ কাকপদং কৃত্বা চর্মকসোদ্ভবং কল্কং যোজযেত্| চর্মকসা কটুকরোহিণী| অস্য চ মৃতোপমস্য কটভ্যাদিভির্নাসাযাং ধ্মাপনঞ্চ হিতম্|| ৯১||

Adhikarana AshrayAshrayiNoravirodhena cikitsA (92) · Śloka 92

আশযে যস্য দোষস্য বিষং তিষ্ঠতি তং পুরঃ| আশ্রযাশ্রযিণোর্বিদ্বানবিরোধেন সাধযেত্||৯২||

যস্য চ দোষস্য বাতাদ্যন্যতমস্যাশযে স্থানে বিষং তিষ্ঠতি তং দোষং বিদ্বান্ ভিষক্ পুরঃ প্রথমং সাধযেত্| কথমিত্যাহ-আশ্রযাশ্রযিণোরবিরোধেন যথা চিকিত্সযোভৌ ন বিরুধ্যতঃ||৯২||

Adhikarana AshayAnusAraM cikitsAvisheShaH (93) · Śloka 93

ক্ষারাগদঃ কফস্থানস্থিতে স্বেদঃ সিরাব্যধঃ| পিত্তে ক্ষৌদ্রপযোঽম্লাজ্যপানসেকাবগাহনম্| স্বেদো বাতাশযে দধ্না পানং চ নতকুষ্ঠযোঃ| ক্ষীরেণাগদগর্ভেণ মদনস্য ফলেন চ| আস্থাপনং প্রযুঞ্জীত বাতাশযগতে বিষে| পচেদ্যষ্টীমধুক্বাথে তৈলং ক্ষীরচতুর্গুণম্| ত্রিফলা সর্পবেতালীশতপুষ্পেন্দুরাজিভিঃ| অনন্তযা চ তত্পাননাবনাভ্যঙ্গবস্তিষু| ভোজনে চ প্রণিহিতং হন্তি বাতাশযাদ্বিষম্| বলযা সোমরাজ্যা বা পচেত্পাটলযাঽথবা| ঘৃতমণ্ডসমং তৈলমানুবাসনিকং পরম্||৯৩||

কফস্থানস্থিতে বিষে চিকিত্সিতোক্তঃ ক্ষারাগদঃ স্বেদঃ সিরাব্যধশ্চ প্রযোজ্যঃ| পিত্তে পিত্তাশযস্থে বিষে ক্ষৌদ্রাদিকমবগাহনান্তম্| বাতাশযে বাতাশযস্থে বিষে স্বেদস্তথা নতকুষ্ঠযোর্দধ্না পানম্| অন্যতমাগদগর্ভেণ ক্ষীরেণ মদনফলযুক্তেনাস্থাপনং চ বাতাশযগতে বিষে প্রযুঞ্জীত| মধুযষ্টীক্বাথে ক্ষীরচতুর্গুণং তৈলং ত্রিফলাদিভিঃ কল্কীকৃতৈঃ পচেত্| তত্তৈলং পানাদিষু প্রণিহিতং বাতাশযাদ্বিষং হন্তি| সর্প(নি) সর্পমঞ্জরিসংজ্ঞাযাং কেসরী তু সমঞ্জরী| বেতালী (নি) বেতালী তালপর্ণী চ তালী চ পরিকীর্তিতা| অনন্তা দূর্বা| বলাদিত্রযাদন্যতমেন ঘৃতমণ্ডসমং তৈলং পচেত্| তত্পরমানুবাসনিকং প্রকরণাদ্বাতাশযগতে বিষে|| ৯৩||

Adhikarana pathyanirdeshaH (94) · Śloka 94

বিষোপদ্রবপথ্যং চ বীক্ষ্য যুঞ্জ্যাদ্যথামযম্|৯৪|

বিষোপদ্রবং পথ্যং চ বক্ষ্যমাণবিষোপদ্রবপ্রতিষেধাধ্যাযবিহিতং বীক্ষ্য যথামযং রোগানতিক্রমেণ যুঞ্জ্যাত্|| ৯৪||

Adhikarana AshayAnusAraM sAdhyAsAdhyatA (94-40) · Śloka 40

অযত্নাচ্ছ্লেষ্মগং সাধ্যং যত্নাত্পিত্তাশযাশ্রিতম্| সুদুস্সাধমসাধ্যং বা বাতাশযগতং বিষম্||৯৪|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতা বষ্টাঙ্গসংগ্রহসংহিতাযামুত্তরতন্ত্রে বিষ প্রতিষেধো নাম চত্বারিংশোঽধ্যাযঃ||৪০||

বিষস্য দোষভেদজনিতং সুসাধদুস্সাধত্বমুপসংহরণমুখেন দর্শযতি-অযত্নাদিত্যাদিনা| সাধ্যাসাধ্যনিরূপণং সুবোধম্| (শ্লেষ্মগং শ্লেষ্মাশযগতং বিষং অযত্নাত্ যত্নেন বিনা সাধ্যম্| পিত্তাশযাশ্রিতং পিত্তাশযগতং যত্নাত্ প্রযত্নেন সাধ্যম্| বাতাশযপ্রাপ্তং সুদুস্সাধং সুতরাং দুস্সাধং দুঃখেন সাধযিতুং শক্যম্| অসাধ্যং সাধযিতুমশক্যম্| বাশব্দো বিকল্পার্থঃ| ক্ষারাগদঃ কফস্থানস্থিত ইত্যাদি ক্রিযাকথনাদাশ্রযাশ্রযিণোঃ ক্রিযাসাম্যতৈবাত্র শ্লেষ্মাশযগতস্যাযত্নসাধ্যত্বে হেতুঃ এবং পিত্তাশযাশ্রিতস্য স্বেদনাদিদ্রব্যোপযোগাদ্যসমক্রিযতযা যত্নসাধ্যত্বম্| বাতাশযগতস্যাশ্রযাশ্রযিণোঃ ক্রিযাসাম্যেঽপি যস্মা দত্যর্থমুষ্ণং বিষমতঃ সর্ববিষেষূক্তাঃ পরিষেকাস্তু শীতলা ইত্যাদি বিষক্রিযাযাঃ শীতলত্বেন বাতলত্বান্মহাত্যযতযাঽস্য দুঃসাধত্বম্|| ৯৪|| ইতি শ্রীমন্মহামহোপাধ্যাযেন্দুবিরচিতাযা মষ্টাঙ্গসংগ্রহব্যাখ্যাযাং শশিলেখাযা মুত্তরতন্ত্রে চত্বারিংশোঽধ্যাযঃ