Adhikarana 1 (1-2) · Śloka 2
অথাতোঽতীসারচিকিত্সিতং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||
अथातोऽतीसारचिकित्सितं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
অগ্নিবলহানিসামান্যাদ্ গ্রহণীদোষচিকিত্সিতমনু অতীসারচিকিত্সিতে বক্তব্যে উপোদ্ঘাতাযাতৈঃ পাণ্ডুরোগাদিভির্ব্যবধানং কৃতং, সম্প্রতি তু যথোক্তোপোদ্ঘাতাযাতপাণ্ডুরোগাদীনভিধায প্রকৃতমেবাতীসারচিকিত্সিতমুচ্যতে||১-২||
Adhikarana 2 (3) · Śloka 3
ভগবন্তং খল্বাত্রেযং কৃতাহ্নিকং হুতাগ্নিহোত্রমাসীনমৃষিগণপরিবৃতমুত্তরে হিমবতঃ পার্শ্বে বিনযাদুপেত্যাভিবাদ্য চাগ্নিবেশ উবাচ- ভগবন্! অতীসারস্য প্রাগুত্পত্তিনিমিত্তলক্ষণোপশমনানি প্রজানুগ্রহার্থমাখ্যাতুমর্হসীতি||৩||
भगवन्तं खल्वात्रेयं कृताह्निकं हुताग्निहोत्रमासीनमृषिगणपरिवृतमुत्तरे हिमवतः पार्श्वे विनयादुपेत्याभिवाद्य चाग्निवेश उवाच- भगवन्! अतीसारस्य प्रागुत्पत्तिनिमित्तलक्षणोपशमनानि प्रजानुग्रहार्थमाख्यातुमर्हसीति||३||
🔊 Audio coming soon
প্রাগুত্পত্তিরিতি প্রাক্কালোত্পত্তিঃ||৩||
Adhikarana 3 (4) · Śloka 4
অথ ভগবান্ পুনর্বসুরাত্রেযস্তদগ্নিবেশবচনমনুনিশম্যোবাচ- শ্রূযতামগ্নিবেশ! সর্বমেতদখিলেন ব্যাখ্যাযমানম্| আদিকালে খলু যজ্ঞেষু পশবঃ সমালভনীযা বভূবুর্নালম্ভায প্রক্রিযন্তে স্ম| ততো দক্ষযজ্ঞং প্রত্যবরকালং মনোঃ পুত্রাণাং নরিষ্যন্নাভাগেক্ষ্বাকুনৃগশর্যাত্যাদীনাং ক্রতুষু পশূনামেবাভ্যনুজ্ঞানাত্ পশবঃ প্রোক্ষণমবাপুঃ| অতশ্চ প্রত্যবরকালং পৃষধ্রেণ দীর্ঘসত্রেণ যজতা পশূনামলাভাদ্গবামালম্ভঃ প্রবর্তিতঃ| তং দৃষ্ট্বা প্রব্যথিতা ভূতগণাঃ, তেষাং চোপযোগাদুপাকৃতানাং গবাং গৌরবাদৌষ্ণ্যাদসাত্ম্যত্বাদশস্তোপযোগাচ্চোপহতাগ্নীনামুপহতমনসাং চাতীসারঃ পূর্বমুত্পন্নঃ পৃষধ্রযজ্ঞে||৪||
अथ भगवान् पुनर्वसुरात्रेयस्तदग्निवेशवचनमनुनिशम्योवाच- श्रूयतामग्निवेश! सर्वमेतदखिलेन व्याख्यायमानम्| आदिकाले खलु यज्ञेषु पशवः समालभनीया बभूवुर्नालम्भाय प्रक्रियन्ते स्म| ततो दक्षयज्ञं प्रत्यवरकालं मनोः पुत्राणां नरिष्यन्नाभागेक्ष्वाकुनृगशर्यात्यादीनां क्रतुषु पशूनामेवाभ्यनुज्ञानात् पशवः प्रोक्षणमवापुः| अतश्च प्रत्यवरकालं पृषध्रेण दीर्घसत्रेण यजता पशूनामलाभाद्गवामालम्भः प्रवर्तितः| तं दृष्ट्वा प्रव्यथिता भूतगणाः, तेषां चोपयोगादुपाकृतानां गवां गौरवादौष्ण्यादसात्म्यत्वादशस्तोपयोगाच्चोपहताग्नीनामुपहतमनसां चातीसारः पूर्वमुत्पन्नः पृषध्रयज्ञे||४||
🔊 Audio coming soon
আদিকালে ইতি কৃতযুগে| সমালভনীযা ইতি মন্ত্রেণ অভিমন্ত্র্যৈব পরিত্যাজ্যা বভূবুঃ; ন আলম্ভার্থং প্রক্রিযন্তে স্ম ইতি আলম্ভায মারণায ন প্রক্রিযন্তে স্ম ন সংস্ক্রিযন্তে স্ম ইত্যর্থঃ| নরিষ্যন্নাভাগাদিমনুপুত্রেষ্বেকমেব মনুপুত্রমুদাহার্য যদ্যাদিশব্দঃ ক্রিযতে তদা তেষাং ক্বচিদন্যত্র সমুদাযেন পাঠাত্ বুদ্ধিভ্রমঃ স্যাত্, তেন সাক্ষাজ্জ্ঞানার্থং কতিপযে পঠিতাঃ; অপঠিতাশ্চাদিশব্দেন প্রকারবাচিনা ইতিহাসজ্ঞানার্থং পুরাণেষূন্নেযাঃ| পশূনামভ্যনুজ্ঞানাদিতি পশূনামেব প্রেরণযা; প্রেরণা চৈষাং বিশিষ্টাপূর্বোত্পাদার্থমেবোচ্যতে আগমেষু- ‘ক্রত্বর্থহিংসাযাং বধকবধ্যযোরুভযোরপি মহত্পুণ্যমুত্পদ্যতে’ ইতি; কিংবা পশূনামেবাভ্যনুজ্ঞানাদিতি বেদে পশূনাং বধ্যত্বেনাভ্যনুজ্ঞানাত্| প্রোক্ষণমিতি বিধিপূর্বকং মারণম্| পৃষধ্রঃ রাজবিশেষঃ| দীর্ঘসত্রেণেতি দীর্ঘকালনির্বর্ত্যেন| ব্যথিতা ইতি অদৃষ্টপূর্বং গবাং বধং দৃষ্ট্বা দুঃখিতাঃ সন্তঃ| উপাকৃতানামিতি অভিমন্ত্র্য হতানাম্| উক্তং হি- “উপাকৃতঃ পশুরসৌ যোঽভিমন্ত্র্য ক্রতৌ হতঃ” ইতি| অনেন চ প্রাগুত্পত্তিনিদর্শনেন মানসোপঘাতো গুর্বাদিসেবা চাতীসারকারণং ভবতীত্যুপদর্শ্যতে||৪||
Adhikarana 4 (5) · Śloka 5
অথাবরকালং বাতলস্য বাতাতপব্যাযামাতিমাত্রনিষেবিণো রূক্ষাল্পপ্রমিতাশিনস্তীক্ষ্ণমদ্যব্যবাযনিত্যস্যোদাবর্তযতশ্চ বেগান্ বাযুঃ প্রকোপমাপদ্যতে, পক্তা চোপহন্যতে; স বাযুঃ কুপিতোঽগ্নাবুপহতে মূত্রস্বেদৌ পুরীষাশযমুপহৃত্য, তাভ্যাং পুরীষং দ্রবীকৃত্য, অতীসারায প্রকল্পতে| তস্য রূপাণি- বিজ্জলমামং বিপ্লুতমবসাদি রূক্ষং দ্রবং সশূলমামগন্ধমীষচ্ছব্দমশব্দং বা বিবদ্ধমূত্রবাতমতিসার্যতে পুরীষং, বাযুশ্চান্তঃকোষ্ঠে সশব্দশূলস্তির্যক্ চরতি বিবদ্ধ ইত্যামাতিসারো বাতাত্| পক্বং বা বিবদ্ধমল্পাল্পং সশব্দং সশূলফেনপিচ্ছাপরিকর্তিকং হৃষ্টরোমা বিনিঃশ্বসঞ্ শুষ্কমুখঃ কট্যূরুত্রিকজানুপৃষ্ঠপার্শ্বশূলী ভ্রষ্টগুদো মুহুর্মুহুর্বিগ্রথিতমুপবেশ্যতে পুরীষং বাতাত্; তমাহুরনুগ্রথিতমিত্যেকে, বাতানুগ্রথিতবর্চস্ত্বাত্||৫||
अथावरकालं वातलस्य वातातपव्यायामातिमात्रनिषेविणो रूक्षाल्पप्रमिताशिनस्तीक्ष्णमद्यव्यवायनित्यस्योदावर्तयतश्च वेगान् वायुः प्रकोपमापद्यते, पक्ता चोपहन्यते; स वायुः कुपितोऽग्नावुपहते मूत्रस्वेदौ पुरीषाशयमुपहृत्य, ताभ्यां पुरीषं द्रवीकृत्य, अतीसाराय प्रकल्पते| तस्य रूपाणि- विज्जलमामं विप्लुतमवसादि रूक्षं द्रवं सशूलमामगन्धमीषच्छब्दमशब्दं वा विबद्धमूत्रवातमतिसार्यते पुरीषं, वायुश्चान्तःकोष्ठे सशब्दशूलस्तिर्यक् चरति विबद्ध इत्यामातिसारो वातात्| पक्वं वा विबद्धमल्पाल्पं सशब्दं सशूलफेनपिच्छापरिकर्तिकं हृष्टरोमा विनिःश्वसञ् शुष्कमुखः कट्यूरुत्रिकजानुपृष्ठपार्श्वशूली भ्रष्टगुदो मुहुर्मुहुर्विग्रथितमुपवेश्यते पुरीषं वातात्; तमाहुरनुग्रथितमित्येके, वातानुग्रथितवर्चस्त्वात्||५||
🔊 Audio coming soon
অথেত্যাদিনা বাতাতীসারাদীনাং পৃথঙ্নিমিত্তলক্ষণে ব্রূতে| বাতলস্যেত্যনেন বাতপ্রকৃতিং প্রাপ্য বাতাতপাদীনাং বাতাতীসারজননে সামর্থ্যাতিশযো দর্শ্যতে; তেনান্যপ্রকৃতেরপি বাতাতপাদযোঽতীসারস্য কারণং ভবন্তীতি জ্ঞেযম্| এবং পিত্তলশ্লেষ্মলশব্দযোরপি তাত্পর্যং ব্যাখ্যেযম্| প্রমিতাশনম্ অতীতকালাশনম্| বেগানুদাবর্তযত ইতি উদ্বৃত্তমাবর্তযতো বেগানিত্যর্থঃ| পুরীষাশযমুপহৃত্যেতি পক্বাশযং নীত্বা| তাভ্যামিতি মূত্রস্বেদাভ্যাম্| তস্য রূপাণীত্যাদিনা আমবাতাতীসারলক্ষণমাহ| আমমিতি আমানুগতম্ | বিপ্লুতমিতি প্রসরণশীলম্| অবসাদীতি ভূমৌ পতিতং লীনং ভবতি| পক্বং বেত্যাদিনা পক্ববাতাতিসারমাহ| বিনিঃশ্বসিন্নিতি শব্দং কুর্বন্| তমাহুরনুগ্রথিতমিতি বিগ্রথিতপুরীষাতিসারাবস্থাং প্রাপ্তং বাতাতিসারম্| বাতগ্রথিতবর্চস্ত্বাদিত্যনেন যত্র পক্ববাতাতিসারেঽপি বাতানুগ্রথিতবর্চস্ত্বং ন ভবতি নাসাবনুগ্রথিতসঞ্জ্ঞ ইতি দর্শযতি||৫||
Adhikarana 5 (6) · Śloka 6
পিত্তলস্য পুনরম্ললবণকটুকক্ষারোষ্ণতীক্ষ্ণাতিমাত্রনিষেবিণঃ প্রততাগ্নিসূর্যসন্তাপোষ্ণমারুতোপহতগাত্রস্য ক্রোধের্ষ্যাবহুলস্য পিত্তং প্রকোপমাপদ্যতে| তত্ প্রকুপিতং দ্রবত্বাদূষ্মাণমুপহত্য পুরীষাশযবিসৃতমৌষ্ণ্যাদ্ দ্রবত্বাত্ সরত্বাচ্চ ভিত্ত্বা পুরীষমতিসারায প্রকল্পতে| তস্য রূপাণি- হারিদ্রং হরিতং নীলং কৃষ্ণং রক্তপিত্তোপহিতমতিদুর্গন্ধমতিসার্যতে পুরীষং, তৃষ্ণাদাহস্বেদমূর্চ্ছাশূলব্রধ্নসন্তাপপাকপরীত ইতি পিত্তাতিসারঃ||৬||
पित्तलस्य पुनरम्ललवणकटुकक्षारोष्णतीक्ष्णातिमात्रनिषेविणः प्रतताग्निसूर्यसन्तापोष्णमारुतोपहतगात्रस्य क्रोधेर्ष्याबहुलस्य पित्तं प्रकोपमापद्यते| तत् प्रकुपितं द्रवत्वादूष्माणमुपहत्य पुरीषाशयविसृतमौष्ण्याद् द्रवत्वात् सरत्वाच्च भित्त्वा पुरीषमतिसाराय प्रकल्पते| तस्य रूपाणि- हारिद्रं हरितं नीलं कृष्णं रक्तपित्तोपहितमतिदुर्गन्धमतिसार्यते पुरीषं, तृष्णादाहस्वेदमूर्च्छाशूलब्रध्नसन्तापपाकपरीत इति पित्तातिसारः||६||
🔊 Audio coming soon
পিত্তলস্যেত্যাদিনা পিত্তাতিসারমাহ| দ্রবত্বাদূষ্মাণমুপহত্যেতি যদ্যপি পিত্তমুষ্ণমগ্নেঃ সমানতযা বর্ধকং ভবতীতি যুজ্যতে, তথাঽপি দ্রবত্বাদূষ্মাণমগ্নিরূপং হন্তীত্যর্থঃ| পুরীষাশযবিসৃতমিতি পুরীষাশযগতং পিত্তম্| ব্রধ্নঃ গুদঃ||৬||
Adhikarana 6 (7) · Śloka 7
শ্লেষ্মলস্য তু গুরুমধুরশীতস্নিগ্ধোপসেবিনঃ সম্পূরকস্যাচিন্তযতো দিবাস্বপ্নপরস্যালসস্য শ্লেষ্মা প্রকোপমাপদ্যতে| স স্বভাবাদ্ গুরুমধুরশীতস্নিগ্ধঃ স্রস্তোঽগ্নিমুপহত্য সৌম্যস্বভাবাত্ পুরীষাশযমুপহত্যোপক্লেদ্য পুরীষমতিসারায কল্পতে| তস্য রূপাণি- স্নিগ্ধং শ্বেতং পিচ্ছিলং তন্তুমদামং গুরু দুর্গন্ধং শ্লেষ্মোপহিতমনুবদ্ধশূলমল্পাল্পমভীক্ষ্ণমতিসার্যতে সপ্রবাহিকং, গুরূদরগুদবস্তিবঙ্ক্ষণদেশঃ কৃতেঽপ্যকৃতসঞ্জ্ঞঃ সলোমহর্ষঃ সোত্ক্লেশো নিদ্রালস্যপরীতঃ সদনোঽন্নদ্বেষী চেতি শ্লেষ্মাতিসারঃ||৭||
श्लेष्मलस्य तु गुरुमधुरशीतस्निग्धोपसेविनः सम्पूरकस्याचिन्तयतो दिवास्वप्नपरस्यालसस्य श्लेष्मा प्रकोपमापद्यते| स स्वभावाद् गुरुमधुरशीतस्निग्धः स्रस्तोऽग्निमुपहत्य सौम्यस्वभावात् पुरीषाशयमुपहत्योपक्लेद्य पुरीषमतिसाराय कल्पते| तस्य रूपाणि- स्निग्धं श्वेतं पिच्छिलं तन्तुमदामं गुरु दुर्गन्धं श्लेष्मोपहितमनुबद्धशूलमल्पाल्पमभीक्ष्णमतिसार्यते सप्रवाहिकं, गुरूदरगुदबस्तिवङ्क्षणदेशः कृतेऽप्यकृतसञ्ज्ञः सलोमहर्षः सोत्क्लेशो निद्रालस्यपरीतः सदनोऽन्नद्वेषी चेति श्लेष्मातिसारः||७||
🔊 Audio coming soon
শ্লেষ্মলস্যেত্যাদিনা শ্লেষ্মাতিসারমাহ| সম্পূরকস্যেতি অতিমাত্রাশনশীলস্য| শ্লেষ্মণোঽগ্ন্যুপঘাতে হেতুমাহ- সৌম্যস্বভাবাদিতি; সৌম্যস্যাগ্নের্বিরুদ্ধত্বাদুপঘাতং করোতীতি যুক্তমেবেতি ভাবঃ| পুরীষাশযমুপহত্যেতি পুরীষাশযং গত্বা, হন্তের্গতিহিংসার্থকত্বাদত্র গত্যর্থতা; কিংবা পুরীষাশযশব্দেন স্থানেন স্থানিন উপচারাত্ পুরীষমেবোচ্যতে, যথা- ‘মঞ্চাঃ ক্রোশন্তি’ ইতিবত্, ততশ্চ পুরীষমুপহত্যেতি সম্বন্ধঃ| কৃতেঽপ্যকৃতসঞ্জ্ঞ ইতি কৃতেঽপি বেগে ন বেগং কৃতং বুধ্যত ইত্যর্থঃ| অত্র চ পিত্তাতিসারে শ্লেষ্মাতিসারে চ সামতালক্ষণং যদ্যপি নোক্তং, তথাঽপি সামবাতাতীসারসম্বন্ধকৃতবিজ্জলত্বামগন্ধিত্বপ্রকারৈর্লক্ষণৈস্তযোরপ্যামাতিসাররূপাঽবস্থা জ্ঞেযৈব| তথাহি চিকিত্সাবসরে ‘পিত্তাতিসারং পুনর্নিদানোপশযাকৃতিভিরামান্বযং বিদিত্বা’ ইত্যাদিনাঽঽমাতিসারে পৃথক্ চিকিত্সাং বক্ষ্যতি, শ্লেষ্মাতিসারে তু সামে নিরামে চ রূক্ষোষ্ণাদিরূপা চিকিত্সা সমানৈবেতি কৃত্বা পৃথগামশ্লেষ্মাতীসারচিকিত্সা নোক্তা; ক্ষারপাণিনা সর্বাতিসারাণামেব সামতা পৃথগুক্তা; বচনং হি- “বাতাতিসারঃ সামশ্চ সশূলঃ ফেনিলস্তনুঃ| শ্যাবঃ সশব্দো দুর্গন্ধো বিবদ্ধোঽল্পাল্প এব চ|| এবং পিত্তকফে সামমতীসারং বিনির্দিশেত্” ইতি| অত্রাপি প্রাসৃতযোগিকাযাং সিদ্ধৌ (সি.অ.৮) সর্বদোষাণামেবামসম্বন্ধাত্ পৃথগ্ভেদা উক্তাঃ||৭||
Adhikarana 7 (8) · Śloka 8
অতিশীতস্নিগ্ধরূক্ষোষ্ণগুরুখরকঠিনবিষমবিরুদ্ধাসাত্ম্যভোজনাদভোজনাত্ কালাতীতভোজনাদ্ যত্কিঞ্চিদভ্যবহরণাত্ প্রদুষ্টমদ্যপানীযপানাদতিমদ্যপানাদসংশোধনাত্ প্রতিকর্মণাং বিষমগমনাদনুপচারাজ্জ্বলনাদিত্যপবনসলিলাতিসেবনাদস্বপ্না- দতিস্বপ্নাদ্বেগবিধারণাদৃতুবিপর্যযাদযথাবলমারম্ভাদ্ভযশোকচিত্তোদ্বেগাতিযোগাত্ কৃমিশোষজ্বরার্শোবিকারাতিকর্ষণাদ্বা ব্যাপন্নাগ্নেস্ত্রযো দোষাঃ প্রকুপিতা ভূয এবাগ্নিমুপহত্য পক্বাশযমনুপ্রবিশ্যাতীসারং সর্বদোষলিঙ্গং জনযন্তি||৮||
अतिशीतस्निग्धरूक्षोष्णगुरुखरकठिनविषमविरुद्धासात्म्यभोजनादभोजनात् कालातीतभोजनाद् यत्किञ्चिदभ्यवहरणात् प्रदुष्टमद्यपानीयपानादतिमद्यपानादसंशोधनात् प्रतिकर्मणां विषमगमनादनुपचाराज्ज्वलनादित्यपवनसलिलातिसेवनादस्वप्ना- दतिस्वप्नाद्वेगविधारणादृतुविपर्ययादयथाबलमारम्भाद्भयशोकचित्तोद्वेगातियोगात् कृमिशोषज्वरार्शोविकारातिकर्षणाद्वा व्यापन्नाग्नेस्त्रयो दोषाः प्रकुपिता भूय एवाग्निमुपहत्य पक्वाशयमनुप्रविश्यातीसारं सर्वदोषलिङ्गं जनयन्ति||८||
🔊 Audio coming soon
অতিশীতেত্যাদিনা ত্রিদোষজাতীসারমাহ| অত্র চ শীতাদীনাং যথাসম্ভবং বাতাদিকর্তৃত্বং জ্ঞেযং; কিংবা সর্বেষামেব ত্রিদোষকর্তৃত্বং জ্ঞেযম্| উক্তং হি- “শমপ্রকোপৌ সর্বেষাং দোষাণামগ্নিসংশ্রিতৌ” (চি.অ.৫) ইতি| যত্কিঞ্চিদভ্যবহরণাদিতি পথ্যাপথ্যভোজনাত্| অনুপচারাদিতি প্রতিকর্মণামেবাসম্যগুপচারাদিত্যর্থঃ| সলিলাতিসেবনাদিত্যত্র অবগাহাদিনা বাহ্যসেবনং সলিলস্যোচ্যতে, অতিপানং তু প্রাগেবোক্তম্| ব্যাপন্নাগ্নেরিতি বচনাদ্যথোক্তহেতূনামগ্নিবধদ্বারৈব প্রাযস্ত্রিদোষকর্তৃত্বং দর্শযতি||৮||
Adhikarana 8 (9) · Śloka 9
অপি চ শোণিতাদীন্ ধাতূনতিপ্রকৃষ্টং দূষযন্তো ধাতুদোষস্বভাবকৃতানতীসারবর্ণানুপদর্শযন্তি| তত্র শোণিতাদিষু ধাতুষ্বতিপ্রদুষ্টেষু হারিদ্রহরিতনীলমাঞ্জিষ্ঠমাংসধাবনসন্নিকাশং রক্তং কৃষ্ণং শ্বেতং বরাহভেদঃসদৃশমনুবদ্ধবেদনমবেদনং বা সমাসব্যত্যাসাদুপবেশ্যতে শকৃদ্ গ্রথিতমামং সকৃত্, সকৃদপি পক্বমনতিক্ষীণমাংসশোণিতবলো মন্দাগ্নির্বিহতমুখরসশ্চ; তাদৃশমাতুরং কৃচ্ছ্রসাধ্যং বিদ্যাত্| এভির্বর্ণৈরতিসার্যমাণং সোপদ্রবমাতুরমসাধ্যোঽযমিতি প্রত্যাচক্ষীত; তদ্যথা- পক্বশোণিতাভং যকৃত্খণ্ডোপমং মেদোমাংসোদকসন্নিকাশং দধিঘৃতমজ্জতৈলবসাক্ষীরবেসবারাভমতিনীলমতিরক্তমতিকৃষ্ণমুদকমিবাচ্ছং পুনর্মেচকাভমতিস্নিগ্ধং হরিতনীলকষাযবর্ণং কর্বুরমাবিলং পিচ্ছিলং তন্তুমদামং চন্দ্রকোপগতমতিকুণপপূতিপূযগন্ধ্যামামমত্স্যগন্ধি মক্ষিকাকান্তং কুথিতবহুধাতুস্রাবমল্পপুরীষমপুরীষং বাঽতিসার্যমাণং তৃষ্ণাদাহজ্বরভ্রমতমকহিক্কাশ্বাসানুবন্ধমতিবেদনমবেদনং বা স্রস্তপক্বগুদং পতিতগুদবলিং মুক্তনালমতিক্ষীণবলমাংসশোণিতং সর্বপর্বাস্থিশূলিনমরোচকারতিপ্রলাপসম্মোহপরীতং সহসোপরতবিকারমতিসারিণমচিকিত্স্যং বিদ্যাত্; ইতি সন্নিপাতাতিসারঃ||৯||
अपि च शोणितादीन् धातूनतिप्रकृष्टं दूषयन्तो धातुदोषस्वभावकृतानतीसारवर्णानुपदर्शयन्ति| तत्र शोणितादिषु धातुष्वतिप्रदुष्टेषु हारिद्रहरितनीलमाञ्जिष्ठमांसधावनसन्निकाशं रक्तं कृष्णं श्वेतं वराहभेदःसदृशमनुबद्धवेदनमवेदनं वा समासव्यत्यासादुपवेश्यते शकृद् ग्रथितमामं सकृत्, सकृदपि पक्वमनतिक्षीणमांसशोणितबलो मन्दाग्निर्विहतमुखरसश्च; तादृशमातुरं कृच्छ्रसाध्यं विद्यात्| एभिर्वर्णैरतिसार्यमाणं सोपद्रवमातुरमसाध्योऽयमिति प्रत्याचक्षीत; तद्यथा- पक्वशोणिताभं यकृत्खण्डोपमं मेदोमांसोदकसन्निकाशं दधिघृतमज्जतैलवसाक्षीरवेसवाराभमतिनीलमतिरक्तमतिकृष्णमुदकमिवाच्छं पुनर्मेचकाभमतिस्निग्धं हरितनीलकषायवर्णं कर्बुरमाविलं पिच्छिलं तन्तुमदामं चन्द्रकोपगतमतिकुणपपूतिपूयगन्ध्यामाममत्स्यगन्धि मक्षिकाकान्तं कुथितबहुधातुस्रावमल्पपुरीषमपुरीषं वाऽतिसार्यमाणं तृष्णादाहज्वरभ्रमतमकहिक्काश्वासानुबन्धमतिवेदनमवेदनं वा स्रस्तपक्वगुदं पतितगुदवलिं मुक्तनालमतिक्षीणबलमांसशोणितं सर्वपर्वास्थिशूलिनमरोचकारतिप्रलापसम्मोहपरीतं सहसोपरतविकारमतिसारिणमचिकित्स्यं विद्यात्; इति सन्निपातातिसारः||९||
🔊 Audio coming soon
অপিচেত্যাদিনা বিকৃতিবিষমসমবাযারব্ধত্রিদোষজলক্ষণমাহ| অতিপ্রকৃষ্টং প্রদূষযন্ত ইতি অতিপ্রকৃষ্টং যথা ভবতি তথা প্রদূষযন্ত ইত্যর্থঃ| মাংসধাবনং মাংসপ্রক্ষালনোদকম্| সমাসব্যত্যাসাদুপবেশ্যত ইতি সমাসঃ যথোক্তলক্ষণানাং মেলকঃ, ব্যত্যাসঃ অমেলকঃ| সকৃদিতি কদাচিত্| বিগতরসং মুখং যস্য স বিরসমুখঃ| এভিঃ বক্ষ্যমাণৈঃ| বেসবারাভং বেসবারসদৃশং; তল্লক্ষণং চ “নিরস্থি পিশিতং পিষ্টং” (সু.সূ.অ.৪৬) ইত্যাদিনোক্তম্| মেচকাভমিতি স্নিগ্ধকৃষ্ণম্| মক্ষিকাকান্তমিতি মক্ষিকাপ্রিযং, ‘মক্ষিকাক্রান্তং’ ইতি পাঠে পক্ষিকাপরীতমিত্যর্থঃ| তৃষ্ণেত্যাদিনা সোপদ্রবমিত্যনেন সূচিতানুপদ্রবানাহ| মুক্তনালমিতি মুক্তগুদম্| সহসোপরতবিকারত্বং যদ্যপি রিষ্টে সংশযিতমরণমুক্তং, তথাঽপীহাতীসারং প্রাপ্য নিশ্চিতমরণজ্ঞাপকতযোচ্যতে||৯||
Adhikarana 9 (10) · Śloka 10
তমসাধ্যতামসম্প্রাপ্তং চিকিত্সেদ্ যথাপ্রধানোপক্রমেণ হেতূপশযদোষবিশেষপরীক্ষযা চেতি||১০||
तमसाध्यतामसम्प्राप्तं चिकित्सेद् यथाप्रधानोपक्रमेण हेतूपशयदोषविशेषपरीक्षया चेति||१०||
🔊 Audio coming soon
যথাপ্রধানোপক্রমেণেতি দোষত্রযে যঃ প্রধানো ভবতি তস্যোপক্রমেণেত্যর্থঃ| হেত্বাদিপরীক্ষা চেহোত্তরকালভাবিনী, তেনাত্র বিশিষ্টা চিকিত্সৈবোচ্যতে||১০||
Adhikarana 10 (11) · Śloka 11
আগন্তূ দ্বাবতীসারৌ মানসৌ ভযশোকজৌ| তত্তযোর্লক্ষণং বাযোর্যদতীসারলক্ষণম্||১১||
आगन्तू द्वावतीसारौ मानसौ भयशोकजौ| तत्तयोर्लक्षणं वायोर्यदतीसारलक्षणम्||११||
🔊 Audio coming soon
আগন্তূ ইত্যাদিনা ভযশোকজাবতীসারৌ প্রাহ| আগন্তূ ইতি আগন্তুহেতুজনিতভযশোকজৌ| মানসাবিতি মানসদোষভযশোকজনিতৌ| এতেন মানসত্বমাগন্তুত্বং চানযোর্ন বিরোধি ভবতি| অনযোর্লক্ষণমতিদেশেনাহ- তত্তযোর্লক্ষণমিত্যাদিনা||১১||
Adhikarana 11 (12-13) · Śloka 13
মারুতো ভযশোকাভ্যাং শীঘ্রং হি পরিকুপ্যতি| তযোঃ ক্রিযা বাতহরী হর্ষণাশ্বাসনানি চ||১২|| ইত্যুক্তাঃ ষডতীসারাঃ, সাধ্যানাং সাধনং ত্বতঃ| প্রবক্ষ্যাম্যনুপূর্বেণ যথাবত্তন্নিবোধত||১৩||
मारुतो भयशोकाभ्यां शीघ्रं हि परिकुप्यति| तयोः क्रिया वातहरी हर्षणाश्वासनानि च||१२|| इत्युक्ताः षडतीसाराः, साध्यानां साधनं त्वतः| प्रवक्ष्याम्यनुपूर्वेण यथावत्तन्निबोधत||१३||
🔊 Audio coming soon
কস্মাত্ পুনর্বাতাতিসারলক্ষণমনযোর্ভবতীত্যাহ- মারুত ইত্যাদি| যস্মাদ্ ভযশোকজনিতোঽত্র মারুতঃ কারণং ভবতি, তস্মাদ্বাতাতীসারলক্ষণানি ভবন্তীতি যুক্তমিত্যর্থঃ| ন চানযোর্বাতজন্যত্বেন বাতজলক্ষণযুক্তত্বেন বাতজেনৈব গ্রহণমস্ত্বিতি বাচ্যং; যতোঽনযোর্বাতজাদ্ভিন্নাঽপি চিকিত্সা ভবিষ্যতি হর্ষণাশ্বাসনরূপা, চিকিত্সাভেদার্থমেব ব্যাধীনাং ভেদোঽভিধীযতে| কিঞ্চ, লক্ষণভেদোঽপ্যত্র ‘মারুতঃ শীঘ্রং হি পরিকুপ্যতি’ ইত্যনেনোক্তঃ| যতো ভযশোকজেঽতীসারে শীঘ্রকারী বাযুর্ভবতীতি শীঘ্রং কুপ্যতীতি পদেনোচ্যতে; তেন নিদানানন্তরং ঝটিতি উত্পাদ এবাত্র বিশিষ্টমপি লক্ষণম্| সন্নিপাতাতিসারে ভযশোকৌ কারণত্বেনোক্তৌ, তৌ হি হেত্বন্তরসহিতৌ তত্র কারণং ভবত ইতি নৈককারণতা ত্রিদোষজভযশোকজানাম্| ভযশোকজযোশ্চ যদ্যপি তুল্যং লক্ষণমিহোক্তং, তথাঽপি চিকিত্সাভেদাত্তযোর্ভেদ উক্তঃ; তথাহি- ভযজে আশ্বাসনং, শোকজে হর্ষণমিতি চিকিত্সাভেদঃ| সুশ্রুতে তু- “তৈস্তৈর্ভাবৈঃ শোচতোঽল্পাশনস্য বাষ্পোষ্মা বৈ বহ্নিমাবিশ্য জন্তোঃ” (সু.উ.ত.অ.৪০) ইত্যাদিনা শোকজঃ প্রবন্ধেনোক্তঃ, স ইহোক্তশোকজাদন্য এব বিশিষ্টহেতুজন্যঃ, ইহ ত্বসৌ সান্নিপাতিকেঽবরুদ্ধো জ্ঞেযঃ| তথাহি- তত্র বাষ্পোষ্মণোঽপি কারণত্বমুক্তং, তেন শোকানশনতো বাযুঃ বাষ্পোষ্মণা চ পিত্তকফাবপি তত্র কারণত্বেন দর্শিতৌ, অত এব চ তস্যাসাধ্যত্বমপি তত্রোক্তম্; অত্রাপি চ ত্রিদোষজে শোকোঽপি কারণত্বেনোক্তঃ| যস্তু সুশ্রুতে “অন্নাজীর্ণাত্ প্রদ্রুতাঃ” (সু.উ.ত.অ.৪০) ইত্যাদিনাঽজীর্ণজঃ পৃথগুক্তঃ, তস্যেহোক্তত্রিদোষজেঽবরোধো ব্যক্ত এব; যতস্তত্রৈব ‘দোষাঃ’ ইতি বহুবচনেন অন্নাজীর্ণস্য ত্রিদোষকারণত্বমুক্তং, ইহাপি চ ‘ব্যাপন্নেঽগ্নৌ’ ইত্যনেন অগ্নিমান্দ্যজনিতাজীর্ণস্য ত্রিদোষজাতিসারে কারণত্বমুক্তমেব; তেন সুশ্রুতোক্তসর্বাতিসারাবরোধোঽত্র জ্ঞেযঃ||১২-১৩||
Adhikarana 12 (14-19) · Śloka 19
দোষাঃ সন্নিচিতা যস্য বিদগ্ধাহারমূর্চ্ছিতাঃ| অতীসারায কল্পন্তে ভূযস্তান্ সম্প্রবর্তযেত্||১৪|| ন তু সঙ্গ্রহণং দেযং পূর্বমামাতিসারিণে| বিবধ্যমানাঃ প্রাগ্দোষা জনযন্ত্যামযান্ বহূন্||১৫|| দণ্ডকালসকাধ্মানগ্রহণ্যর্শোগদাংস্তথা| শোথপাণ্ড্বামযপ্লীহকুষ্ঠগুল্মোদরজ্বরান্||১৬|| তস্মাদুপেক্ষেতোত্ক্লিষ্টান্ বর্তমানান্ স্বযং মলান্| কৃচ্ছ্রং বা বহতাং দদ্যাদভযাং সম্প্রবর্তিনীম্||১৭|| তযা প্রবাহিতে দোষে প্রশাম্যত্যুদরামযঃ| জাযতে দেহলঘুতা জঠরাগ্নিশ্চ বর্ধতে||১৮|| প্রমথ্যাং মধ্যদোষাণাং দদ্যাদ্দীপনপাচনীম্| লঙ্ঘনং চাল্পদোষাণাং প্রশস্তমতিসারিণাম্||১৯||
दोषाः सन्निचिता यस्य विदग्धाहारमूर्च्छिताः| अतीसाराय कल्पन्ते भूयस्तान् सम्प्रवर्तयेत्||१४|| न तु सङ्ग्रहणं देयं पूर्वमामातिसारिणे| विबध्यमानाः प्राग्दोषा जनयन्त्यामयान् बहून्||१५|| दण्डकालसकाध्मानग्रहण्यर्शोगदांस्तथा| शोथपाण्ड्वामयप्लीहकुष्ठगुल्मोदरज्वरान्||१६|| तस्मादुपेक्षेतोत्क्लिष्टान् वर्तमानान् स्वयं मलान्| कृच्छ्रं वा वहतां दद्यादभयां सम्प्रवर्तिनीम्||१७|| तया प्रवाहिते दोषे प्रशाम्यत्युदरामयः| जायते देहलघुता जठराग्निश्च वर्धते||१८|| प्रमथ्यां मध्यदोषाणां दद्याद्दीपनपाचनीम्| लङ्घनं चाल्पदोषाणां प्रशस्तमतिसारिणाम्||१९||
🔊 Audio coming soon
দোষাঃ সন্নিচিতা ইত্যাদিনা চিকিত্সামাহ| বিদগ্ধশব্দেনাত্রাপক্বাহারবাচিনা চতুর্বিধমপ্যামং, বিদগ্ধং, বিষ্টব্ধং, রসশেষং চাজীর্ণং গৃহ্যতে| সম্প্রবর্তযেদিত্যনেন প্রবর্তমানস্যোপেক্ষযা প্রবর্তনং, তথা স্তোকং বহতাং বিরেচনযোগাত্ প্রবর্তনং; যদ্বক্ষ্যতি- ‘কৃচ্ছ্রং বা বহতাং দদ্যাদভযাং সম্প্রবর্তিনীম্’ ইতি| ন তু সঙ্গ্রহণং পূর্বং দেযমামাতিসারিণে ইত্যত্র পূর্বমিতি বিশেষণেনোত্তরকালং দেযমামাতীসারে সঙ্গ্রহণং দর্শযতি| প্রথমং চামাতীসারস্যোপেক্ষযা বিরেচনদানেন প্রবর্তনমুক্তমিতি বিরোধে ইযং ব্যবস্থা- যত্ প্রবৃদ্ধে আমে বলবতি চ পুরুষে প্রবর্তনমেব কর্তব্যং, যদা তু দুর্বলঃ পুমান্ ক্ষীণশ্চামস্তদা প্রথমমুপেক্ষযা প্রবর্তনং কৃত্বা সঙ্গ্রহণং কর্তব্যং; তস্যাং হ্যবস্থাযামসঙ্গ্রহণে আতুরস্য বলভ্রংশান্মরণমেব স্যাত্| অন্যে তু পূর্বং সঙ্গ্রহণং ন দেযমিতি প্রধানমম্বষ্ঠাশাল্মলকুটজত্বগাদিসঙ্গ্রহণং ন দেযং, মুস্তোদীচ্যাদি তু পাচনসঙ্গ্রহণং দেযমিতি বর্ণযন্তি| ইযং চামাতিসারচিকিত্সা সর্বামাতিসারাণাং সাধারণী জ্ঞেযা| কৃচ্ছ্রং বা বহতামিতি সবিবন্ধং বহতাম্| প্রমথ্যামিতি পাচনদীপনীযং কষাযং; প্রমথ্যাশব্দো হি বৃদ্ধপরম্পরযা পাচনদীপনকষাযে বৈদ্যকশাস্ত্রে পরিভাষিতঃ শ্রূযতে; যথা- বিডঙ্গকষাযঃ শৈখরিককষাযশব্দেন বৈদ্যৈরুচ্যতে| বহুদোষে প্রবর্তনং, তথা মধ্যদোষে প্রমথ্যোক্তা, অল্পদোষে চ সামে প্রথমকর্তব্যমাহ- লঙ্ঘনমিত্যাদি||১৪-১৯||
Adhikarana 13 (20-22) · Śloka 22
পিপ্পলী নাগরং ধান্যং ভূতীকমভযা বচা| হ্রীবেরং ভদ্রমুস্তানি বিল্বং নাগরধান্যকম্||২০|| পৃশ্নিপর্ণী শ্বদংষ্ট্রা চ সমঙ্গা কণ্টকারিকা| তিস্রঃ প্রমথ্যা বিহিতাঃ শ্লোকার্ধৈরতিসারিণাম্||২১|| বচাপ্রতিবিষাভ্যাং বা মুস্তপর্পটকেন বা| হ্রীবেরশৃঙ্গবেরাভ্যাং পক্বং বা পাযযেজ্জলম্||২২||
पिप्पली नागरं धान्यं भूतीकमभया वचा| ह्रीवेरं भद्रमुस्तानि बिल्वं नागरधान्यकम्||२०|| पृश्निपर्णी श्वदंष्ट्रा च समङ्गा कण्टकारिका| तिस्रः प्रमथ्या विहिताः श्लोकार्धैरतिसारिणाम्||२१|| वचाप्रतिविषाभ्यां वा मुस्तपर्पटकेन वा| ह्रीवेरशृङ्गवेराभ्यां पक्वं वा पाययेज्जलम्||२२||
🔊 Audio coming soon
তিস্রঃ প্রমথ্যা ইতি যথাক্রমং কফপিত্তবাতেষু বিভজ্য দেযা ইতি বদন্তি; তথা বচাপ্রতিবিষাদিবিহিতানি ত্রীণ্যপি জলানি কফপিত্তবাতেষু যথাক্রমং বদন্তি| ষডঙ্গবিধিনাঽত্র জলসাধনং জ্ঞেযম্||২০-২২||
Adhikarana 14 (23-25) · Śloka 25
যুক্তেঽন্নকালে ক্ষুত্ক্ষামং লঘূন্যন্নানি ভোজযেত্| তথা স শীঘ্রমাপ্নোতি রুচিমগ্নিবলং বলম্||২৩|| তক্রেণাবন্তিসোমেন যবাগ্বা তর্পণেন বা| সুরযা মধুনা চাদৌ যথাসাত্ম্যমুপাচরেত্||২৪|| যবাগূভির্বিলেপীভিঃ খডৈর্যূষৈ রসৌদনৈঃ| দীপনগ্রাহিসংযুক্তৈঃ ক্রমশ্চ স্যাদতঃ পরম্||২৫||
युक्तेऽन्नकाले क्षुत्क्षामं लघून्यन्नानि भोजयेत्| तथा स शीघ्रमाप्नोति रुचिमग्निबलं बलम्||२३|| तक्रेणावन्तिसोमेन यवाग्वा तर्पणेन वा| सुरया मधुना चादौ यथासात्म्यमुपाचरेत्||२४|| यवागूभिर्विलेपीभिः खडैर्यूषै रसौदनैः| दीपनग्राहिसंयुक्तैः क्रमश्च स्यादतः परम्||२५||
🔊 Audio coming soon
যুক্তেঽন্নকালে ইতি সম্যগ্বুভুক্ষাকালে| অবন্তিসোমং কাঞ্জিকম্| কাঞ্জিকতক্রদীনাং চ দ্রবাণাং তর্পণালোডনার্থমিহাভিধানম্| যবাগূর্বিরলদ্রবা বিলেপী বহুসিক্থা চ;| দীপনগ্রাহিগণৌ ষড্বিরেচনশতাশ্রিতীযোক্তৌ| অতঃ পরমিতি যবাগ্বাদ্যুপচারানন্তরম্||২৩-২৫||
Adhikarana 15 (26-29) · Śloka 29
শালপর্ণীং পৃশ্নিপর্ণীং বৃহতীং কণ্টকারিকাম্| বলাং শ্বদংষ্ট্রাং বিল্বানি পাঠাং নাগরধান্যকম্||২৬|| শটীং পলাশং হপুষাং বচাং জীরকপিপ্পলীম্| যবানীং পিপ্পলীমূলং চিত্রকং হস্তিপিপ্পলীম্||২৭|| বৃক্ষাম্লং দাডিমাম্লং চ সহিঙ্গু বিডসৈন্ধবম্| প্রযোজযেদন্নপানে বিধিনা সূপকল্পিতম্||২৮|| বাতশ্লেষ্মহরো হ্যেষ গণো দীপনপাচনঃ| গ্রাহী বল্যো রোচনশ্চ তস্মাচ্ছস্তোঽতিসারিণাম্||২৯||
शालपर्णीं पृश्निपर्णीं बृहतीं कण्टकारिकाम्| बलां श्वदंष्ट्रां बिल्वानि पाठां नागरधान्यकम्||२६|| शटीं पलाशं हपुषां वचां जीरकपिप्पलीम्| यवानीं पिप्पलीमूलं चित्रकं हस्तिपिप्पलीम्||२७|| वृक्षाम्लं दाडिमाम्लं च सहिङ्गु बिडसैन्धवम्| प्रयोजयेदन्नपाने विधिना सूपकल्पितम्||२८|| वातश्लेष्महरो ह्येष गणो दीपनपाचनः| ग्राही बल्यो रोचनश्च तस्माच्छस्तोऽतिसारिणाम्||२९||
🔊 Audio coming soon
শালিপর্ণীত্যাদিনা যবাগ্বাদিসংস্কারদ্রব্যাণ্যাহ||২৬-২৯||
Adhikarana 16 (30-33) · Śloka 33
আমে পরিণতে যস্তু বিবদ্ধমতিসার্যতে| সশূলপিচ্ছমল্পাল্পং বহুশঃ সপ্রবাহিকম্||৩০|| যূষেণ মূলকানাং তং বদরাণামথাপি বা| উপোদিকাযাঃ ক্ষীরিণ্যা যবান্যা বাস্তুকস্য বা||৩১|| সুবর্চলাযাশ্চঞ্চোর্বা শাকেনাবল্গুজস্য বা| শট্যাঃ কর্কারুকাণাং বা জীবন্ত্যাশ্চির্ভটস্য বা||৩২|| লোণিকাযাঃ সপাঠাযাঃ শুষ্কশাকেন বা পুনঃ| দধিদাডিমসিদ্ধেন বহুস্নেহেন ভোজযেত্||৩৩||
आमे परिणते यस्तु विबद्धमतिसार्यते| सशूलपिच्छमल्पाल्पं बहुशः सप्रवाहिकम्||३०|| यूषेण मूलकानां तं बदराणामथापि वा| उपोदिकायाः क्षीरिण्या यवान्या वास्तुकस्य वा||३१|| सुवर्चलायाश्चञ्चोर्वा शाकेनावल्गुजस्य वा| शट्याः कर्कारुकाणां वा जीवन्त्याश्चिर्भटस्य वा||३२|| लोणिकायाः सपाठायाः शुष्कशाकेन वा पुनः| दधिदाडिमसिद्धेन बहुस्नेहेन भोजयेत्||३३||
🔊 Audio coming soon
সপ্রবাহিকমিত্যত্র প্রবাহিকালক্ষণং “বাযুর্বিবৃদ্ধো নিচিতং বলাসং নুদত্যধস্তাদহিতাশনস্য| প্রবাহতোঽল্পং বহুশো মলাক্তং প্রবাহিকাং তাং প্রবদন্তি তজ্জ্ঞাঃ” (সু.উ.তং.অ.৪০) ইত্যনেন সুশ্রুতোক্তং জ্ঞেযম্| ক্ষীরিণী দুগ্ধিকা, সুবর্চলা সূর্যভক্তা, চঞ্চুঃ নাডীচঃ, কর্কারুঃ কূষ্মাণ্ডভেদঃ, চির্ভটঃ কর্কটী, লোণিকা স্বনামখ্যাতা; শুষা কাসমর্দঃ, রূক্ষদেশজং শাকমিত্যেকে||৩০-৩৩||
Adhikarana 17 (34-41) · Śloka 41
কল্কঃ স্যাদ্বালবিল্বানাং তিলকল্কশ্চ তত্সমঃ| দধ্নঃ সরোঽম্লস্নেহাদ্যঃ খডো হন্যাত্ প্রবাহিকাম্||৩৪|| যবানাং মুদ্গমাষাণাং শালীনাং চ তিলস্য চ| কোলানাং বালবিল্বানাং ধান্যযূষং প্রকল্পযেত্||৩৫|| ঐকধ্যং যমকে ভৃষ্টং দধিদাডিমসারিকম্| বর্চঃক্ষযে শুষ্কমুখং শাল্যন্নং তেন ভোজযেত্||৩৬|| দধ্নঃ সরং বা যমকে ভৃষ্টং সগুডনাগরম্| সুরাং বা যমকে ভৃষ্টাং ব্যঞ্জনার্থে প্রদাপযেত্||৩৭|| ফলাম্লং যমকে ভৃষ্টং যূষং গৃঞ্জনকস্য বা| লোপাকরসমম্লং বা স্নিগ্ধাম্লং কচ্ছপস্য বা||৩৮|| বর্হিতিত্তিরিদক্ষাণাং বর্তকানাং তথা রসাঃ| স্নিগ্ধাম্লাঃ শালযশ্চাগ্র্যা বর্চঃক্ষযরুজাপহাঃ||৩৯|| অন্তরাধিরসং পূত্বা রক্তং মেষস্য চোভযম্| পচেদ্দাডিমসারাম্লং সধান্যস্নেহনাগরম্||৪০|| ওদনং রক্তশালীনাং তেনাদ্যাত্ প্রপিবেচ্চ তত্| তথা বর্চঃক্ষযকৃতৈর্ব্যাধিভির্বিপ্রমুচ্যতে||৪১||
कल्कः स्याद्बालबिल्वानां तिलकल्कश्च तत्समः| दध्नः सरोऽम्लस्नेहाद्यः खडो हन्यात् प्रवाहिकाम्||३४|| यवानां मुद्गमाषाणां शालीनां च तिलस्य च| कोलानां बालबिल्वानां धान्ययूषं प्रकल्पयेत्||३५|| ऐकध्यं यमके भृष्टं दधिदाडिमसारिकम्| वर्चःक्षये शुष्कमुखं शाल्यन्नं तेन भोजयेत्||३६|| दध्नः सरं वा यमके भृष्टं सगुडनागरम्| सुरां वा यमके भृष्टां व्यञ्जनार्थे प्रदापयेत्||३७|| फलाम्लं यमके भृष्टं यूषं गृञ्जनकस्य वा| लोपाकरसमम्लं वा स्निग्धाम्लं कच्छपस्य वा||३८|| बर्हितित्तिरिदक्षाणां वर्तकानां तथा रसाः| स्निग्धाम्लाः शालयश्चाग्र्या वर्चःक्षयरुजापहाः||३९|| अन्तराधिरसं पूत्वा रक्तं मेषस्य चोभयम्| पचेद्दाडिमसाराम्लं सधान्यस्नेहनागरम्||४०|| ओदनं रक्तशालीनां तेनाद्यात् प्रपिबेच्च तत्| तथा वर्चःक्षयकृतैर्व्याधिभिर्विप्रमुच्यते||४१||
🔊 Audio coming soon
কল্কঃ স্যাদিত্যাদিনা খডঃ| ধান্যযূষমিতি ধান্যপ্রধানং যূষং যথোক্তমেব| যমকে ইতি ঘৃততৈলে| দধিদাডিমসারাভ্যাং সংস্কৃতং দধিদাডিমসারিকম্| শালীনাং যদ্যপি বদ্ধবর্চস্ত্বমুক্তং, তথাঽপীহ খডযূষরসবিশেষযুক্তানাং সংযোগশক্ত্যা বর্চঃক্ষযে হিতত্বং দর্শযন্নাহ- স্নিগ্ধাম্লাঃ শালযশ্চাগ্র্যা বর্চঃক্ষযরুজাপহা ইতি| তেনাদ্যাত্ প্রপিবেচ্চ তমিতি উক্তান্তরাধিরসাধিকৃতেন দ্রবেণ সন্ধীযাদ্যাত্ পৃথক্ চ দ্রবং পিবেত্| বর্চঃক্ষযকৃতৈঃ মুখশোষদৌর্বল্যোদাবর্তাদিভিঃ||৩৪-৪১||
Adhikarana 18 (42-44) · Śloka 44
গুদনিঃসরণে শূলে পানমম্লস্য সর্পিষঃ| প্রশস্যতে নিরামাণামথবাঽপ্যনুবাসনম্||৪২|| চাঙ্গেরীকোলদধ্যম্লনাগরক্ষারসংযুতম্| ঘৃতমুত্ক্বথিতং পেযং গুদভ্রংশরুজাপহম্||৪৩|| ইতি চাঙ্গেরীঘৃতম্| সচব্যপিপ্পলীমূলং সব্যোষবিডদাডিমম্| পেযমম্লং ঘৃতং যুক্ত্যা সধান্যাজাজিচিত্রকম্||৪৪|| ইতি গুদভ্রংশে চব্যাদিঘৃতম্|
गुदनिःसरणे शूले पानमम्लस्य सर्पिषः| प्रशस्यते निरामाणामथवाऽप्यनुवासनम्||४२|| चाङ्गेरीकोलदध्यम्लनागरक्षारसंयुतम्| घृतमुत्क्वथितं पेयं गुदभ्रंशरुजापहम्||४३|| इति चाङ्गेरीघृतम्| सचव्यपिप्पलीमूलं सव्योषविडदाडिमम्| पेयमम्लं घृतं युक्त्या सधान्याजाजिचित्रकम्||४४|| इति गुदभ्रंशे चव्यादिघृतम्|
🔊 Audio coming soon
সূত্রিতমম্লঘৃতমাহ- চাঙ্গেরীত্যাদি| অত্র চাঙ্গেরীরসকোলরসদধ্নাং দ্রবত্বং, নাগরক্ষারযোশ্চ কল্কত্বম্| পেযমম্লং ঘৃতমিত্যত্র অম্লার্থমনন্তরোক্তমেব দ্রবং চাঙ্গেরীস্বরসাদি দেযং, চব্যাদযশ্চ দশ কল্কাঃ; উক্তং চ তন্ত্রান্তরে- “পঞ্চকোলবিডাজাজীধান্যদাডিমবেতসৈঃ| পচেদম্লং ঘৃতং তদ্বন্নাগরক্ষারসংযুতম্” ইতি||৪২-৪৪||
Adhikarana 19 (45) · Śloka 45
দশমূলোপসিদ্ধং বা সবিল্বমনুবাসনম্| শটীশতাহ্বাবিল্বৈর্বা বচযা চিত্রকেণ বা||৪৫|| ইতি গুদভ্রংশেঽনুবাসনম্|
दशमूलोपसिद्धं वा सबिल्वमनुवासनम्| शटीशताह्वाबिल्वैर्वा वचया चित्रकेण वा||४५|| इति गुदभ्रंशेऽनुवासनम्|
🔊 Audio coming soon
দশমূলোপসিদ্ধমিত্যাদৌ অনুবাসনমিতি অনুবাসনস্নেহঃ| অত্রানুবাসনে স্নেহস্তু প্রাযোদর্শনাত্তৈলমেব; অন্যে তু ঘৃতস্য প্রক্রান্তত্বাদ্ধৃতমেবাহুঃ| শটীত্যাদিনাঽপ্যনুবাসনস্নেহত্রযমুচ্যতে||৪৫||
Adhikarana 20 (46) · Śloka 46
স্তব্ধভ্রষ্টগুদে পূর্বং স্নেহস্বেদৌ প্রযোজযেত্| সুস্বিন্নং তং মৃদূভূতং পিচুনা সম্প্রবেশযেত্||৪৬||
स्तब्धभ्रष्टगुदे पूर्वं स्नेहस्वेदौ प्रयोजयेत्| सुस्विन्नं तं मृदूभूतं पिचुना सम्प्रवेशयेत्||४६||
🔊 Audio coming soon
পিচুনা সম্প্রবেশযেদিতি পিচুনাঽঽচ্ছাদিতং পীডযিত্বা প্রবেশযেত্| পিচুঃ স্থূলকর্পটিকা||৪৬||
Adhikarana 21 (47-49) · Śloka 49
বিবদ্ধবাতবর্চাস্তু বহুশূলপ্রবাহিকঃ| সরক্তপিচ্ছস্তৃষ্ণার্তঃ ক্ষীরসৌহিত্যমর্হতি||৪৭|| যমকস্যোপরি ক্ষীরং ধারোষ্ণং বা পিবেন্নরঃ| শৃতমেরণ্ডমূলেন বালবিল্বেন বা পযঃ ||৪৮|| এবং ক্ষীরপ্রযোগেণ রক্তং পিচ্ছা চ শাম্যতি| শূলং প্রবাহিকা চৈব বিবন্ধশ্চোপশাম্যতি||৪৯||
विबद्धवातवर्चास्तु बहुशूलप्रवाहिकः| सरक्तपिच्छस्तृष्णार्तः क्षीरसौहित्यमर्हति||४७|| यमकस्योपरि क्षीरं धारोष्णं वा पिबेन्नरः| शृतमेरण्डमूलेन बालबिल्वेन वा पयः ||४८|| एवं क्षीरप्रयोगेण रक्तं पिच्छा च शाम्यति| शूलं प्रवाहिका चैव विबन्धश्चोपशाम्यति||४९||
🔊 Audio coming soon
সৌহিত্যং তৃপ্তিঃ||৪৭-৪৯||
Adhikarana 22 (50) · Śloka 50
পিত্তাতিসারং পুনর্নিদানোপশযাকৃতিভিরামান্বযমুপলভ্য যথাবলং লঙ্ঘনপাচনাভ্যামুপাচরেত্| তৃষ্যতস্তু মুস্তপর্পটকোশীরসারিবাচন্দনকিরাততিক্তকোদীচ্যবারিভিরুপচারঃ| লঙ্ঘিতস্য চাহারকালে বলাতিবলাসূর্পপর্ণীশালপর্ণীপৃশ্নিপর্ণীবৃহতীকণ্টকারিকাশতাবরীশ্বদংষ্ট্রানির্যূহসংযুক্তেন যথাসাত্ম্যং যবাগূমণ্ডাদিনা তর্পণাদিনা বা ক্রমেণোপচারঃ| মুদ্গমসূরহরেণুমকুষ্ঠকাঢকীযূষৈর্বা লাবকপিঞ্জলশশহরিণৈণকালপুচ্ছকরসৈরীষদম্লৈরনম্লৈর্বা ক্রমশোঽগ্নিং সন্ধুক্ষযেত্| অনুবন্ধে ত্বস্য দীপনীযপাচনীযোপশমনীযসঙ্গ্রহণীযান্ যোগান্ সম্প্রযোজযেদিতি||৫০||
पित्तातिसारं पुनर्निदानोपशयाकृतिभिरामान्वयमुपलभ्य यथाबलं लङ्घनपाचनाभ्यामुपाचरेत्| तृष्यतस्तु मुस्तपर्पटकोशीरसारिवाचन्दनकिराततिक्तकोदीच्यवारिभिरुपचारः| लङ्घितस्य चाहारकाले बलातिबलासूर्पपर्णीशालपर्णीपृश्निपर्णीबृहतीकण्टकारिकाशतावरीश्वदंष्ट्रानिर्यूहसंयुक्तेन यथासात्म्यं यवागूमण्डादिना तर्पणादिना वा क्रमेणोपचारः| मुद्गमसूरहरेणुमकुष्ठकाढकीयूषैर्वा लावकपिञ्जलशशहरिणैणकालपुच्छकरसैरीषदम्लैरनम्लैर्वा क्रमशोऽग्निं सन्धुक्षयेत्| अनुबन्धे त्वस्य दीपनीयपाचनीयोपशमनीयसङ्ग्रहणीयान् योगान् सम्प्रयोजयेदिति||५०||
🔊 Audio coming soon
আমান্বযমিতি আমযুক্তম্| লঙ্ঘনপাচনাভ্যামুপাচরেদিত্যনেন যত্ পূর্বমামাতিসারে সামান্যবিধানমুক্তং তদিহ নানুমন্যতে; পিত্তং হি সরং, তত্র চ প্রবর্তনে ক্রিযমাণেঽতিযোগভযং স্যাদিতি ভাবঃ| যত্তু বিরেচনমিহ বক্তব্যং তত্ সামগ্রীবিশেষসম্পত্তাবেব| লঙ্ঘিতস্য চেত্যাদৌ সূর্পপর্ণী মুদ্গমাষপর্ণ্যৌ| নির্ব্যূহশব্দেন চ ষডঙ্গবিধানসিদ্ধং জলমুচ্যতে, যবাগ্বাদিসাধনে তস্যৈবাধিকারাত্| অনুবন্ধে ত্বস্যেতি পিত্তাতিসারানুবন্ধে| ইমানিতি বক্ষ্যমাণান্||৫০||
Adhikarana 23 (51-56) · Śloka 56
সক্ষৌদ্রাতিবিষং পিষ্ট্বা বত্সকস্য ফলত্বচম্| পিবেত্ পিত্তাতিসারঘ্নং তণ্ডুলোদকসংযুতম্||৫১|| কিরাততিক্তকো মুস্তং বত্সকঃ সরসাঞ্জনঃ| বিল্বং দারুহরিদ্রা ত্বক্ হ্রীবেরং সদুরালভম্||৫২|| চন্দনং চ মৃণালং চ নাগরং লোধ্রমুত্পলম্| তিলা মোচরসো লোধ্রং সমঙ্গা কমলোত্পলম্||৫৩|| উত্পলং ধাতকীপুষ্পং দাডিমত্বঙ্মহৌষধম্| কট্ফলং নাগরং পাঠা জম্ব্বাম্রাস্থিদুরালভাঃ||৫৪|| যোগাঃ ষডেতে সক্ষৌদ্রাস্তণ্ডুলোদকসংযুতাঃ| পেযাঃ পিত্তাতিসারঘ্নাঃ শ্লোকার্ধেন নিদর্শিতাঃ||৫৫|| জীর্ণোষধানাং শস্যন্তে যথাযোগং প্রকল্পিতৈঃ| রসৈঃ সাঙ্গ্রাহিকৈর্যুক্তাঃ পুরাণা রক্তশালযঃ||৫৬||
सक्षौद्रातिविषं पिष्ट्वा वत्सकस्य फलत्वचम्| पिबेत् पित्तातिसारघ्नं तण्डुलोदकसंयुतम्||५१|| किराततिक्तको मुस्तं वत्सकः सरसाञ्जनः| बिल्वं दारुहरिद्रा त्वक् ह्रीबेरं सदुरालभम्||५२|| चन्दनं च मृणालं च नागरं लोध्रमुत्पलम्| तिला मोचरसो लोध्रं समङ्गा कमलोत्पलम्||५३|| उत्पलं धातकीपुष्पं दाडिमत्वङ्महौषधम्| कट्फलं नागरं पाठा जम्ब्वाम्रास्थिदुरालभाः||५४|| योगाः षडेते सक्षौद्रास्तण्डुलोदकसंयुताः| पेयाः पित्तातिसारघ्नाः श्लोकार्धेन निदर्शिताः||५५|| जीर्णोषधानां शस्यन्ते यथायोगं प्रकल्पितैः| रसैः साङ्ग्राहिकैर्युक्ताः पुराणा रक्तशालयः||५६||
🔊 Audio coming soon
ফলত্বচমিতি ফলং চ ত্বক্ চেতি ফলত্বচম্| মৃণালম্ উষীরম্| সমঙ্গা খাদিরী; ‘বরাহক্রান্তা’ ইত্যন্যে||৫১-৫৬||
Adhikarana 24 (57-62) · Śloka 62
পিত্তাতিসারো দীপাগ্নেঃ ক্ষিপ্রং সমুপশাম্যতি| অজাক্ষীরপ্রযোগেণ বলং বর্ণশ্চ বর্ধতে||৫৭|| বহুদোষস্য দীপ্তাগ্নেঃ সপ্রাণস্য ন তিষ্ঠতি| পৈত্তিকো যদ্যতীসারঃ পযসা তং বিরেচযেত্||৫৮|| পলাশফলনির্যূহং পযসা সহ পাযযেত্| ততোঽনুপাযযেত্ কোষ্ণং ক্ষীরমেব যথাবলম্||৫৯|| প্রবাহিতে তেন মলে প্রশাম্যত্যুদরামযঃ| পলাশবত্ প্রযোজ্যা বা ত্রাযমাণা বিশোধিনী||৬০|| সাংসর্গ্যাং ক্রিযমাণাযাং শূলং যদ্যনুবর্ততে| স্রুতদোষস্য তং শীঘ্রং যথাবদনুবাসযেত্||৬১|| শতপুষ্পাবরীভ্যাং চ পযসা মধুকেন চ| তৈলপাদং ঘৃতং সিদ্ধং সবিল্বমনুবাসনম্||৬২||
पित्तातिसारो दीपाग्नेः क्षिप्रं समुपशाम्यति| अजाक्षीरप्रयोगेण बलं वर्णश्च वर्धते||५७|| बहुदोषस्य दीप्ताग्नेः सप्राणस्य न तिष्ठति| पैत्तिको यद्यतीसारः पयसा तं विरेचयेत्||५८|| पलाशफलनिर्यूहं पयसा सह पाययेत्| ततोऽनुपाययेत् कोष्णं क्षीरमेव यथाबलम्||५९|| प्रवाहिते तेन मले प्रशाम्यत्युदरामयः| पलाशवत् प्रयोज्या वा त्रायमाणा विशोधिनी||६०|| सांसर्ग्यां क्रियमाणायां शूलं यद्यनुवर्तते| स्रुतदोषस्य तं शीघ्रं यथावदनुवासयेत्||६१|| शतपुष्पावरीभ्यां च पयसा मधुकेन च| तैलपादं घृतं सिद्धं सबिल्वमनुवासनम्||६२||
🔊 Audio coming soon
ন তিষ্ঠতি ন নিবর্ততে| পলাশবদিতি উক্তপলাশফলবিধানেন| সাংসর্গ্যামিতি পেযাদিক্রমে| শতপুষ্পেত্যাদৌ বরী শতাবরী| অনুবাসনং ‘দদ্যাত্’ ইতি শেষঃ||৫৭-৬২||
Adhikarana 25 (63-68) · Śloka 68
কৃতানুবাসনস্যাস্য কৃতসংসর্জনস্য চ| বর্ততে যদ্যতীসারঃ পিচ্ছাবস্তিরতঃ পরম্||৬৩|| পরিবেষ্ট্য কুশৈরার্দ্রৈরার্দ্রবৃন্তানি শাল্মলেঃ| কৃষ্ণমৃত্তিকযাঽঽলিপ্য স্বেদযেদ্গোমযাগ্নিনা||৬৪|| সুশুষ্কাং মৃত্তিকাং জ্ঞাত্বা তানি বৃন্তানি শাল্মলেঃ| শৃতে পযসি মৃদ্নীযাদাপোথ্যোলূখলে ততঃ||৬৫|| পিণ্ডং মুষ্টিসমং প্রস্থে তত্ পূতং তৈলসর্পিষোঃ| স্নেহিতং মাত্রযা যুক্তং কল্কেন মধুকস্য চ||৬৬|| বস্তিমভ্যক্তগাত্রায দদ্যাত্ প্রত্যাগতে ততঃ| স্নাত্বা ভুঞ্জীত পযসা জাঙ্গলানাং রসেন বা||৬৭|| পিত্তাতিসারজ্বরশোথগুল্মজীর্ণাতিসারগ্রহণীপ্রদোষান্| জযত্যযং শীঘ্রমতিপ্রবৃদ্ধান্ বিরেচনাস্থাপনযোশ্চ বস্তিঃ ||৬৮||
कृतानुवासनस्यास्य कृतसंसर्जनस्य च| वर्तते यद्यतीसारः पिच्छाबस्तिरतः परम्||६३|| परिवेष्ट्य कुशैरार्द्रैरार्द्रवृन्तानि शाल्मलेः| कृष्णमृत्तिकयाऽऽलिप्य स्वेदयेद्गोमयाग्निना||६४|| सुशुष्कां मृत्तिकां ज्ञात्वा तानि वृन्तानि शाल्मलेः| शृते पयसि मृद्नीयादापोथ्योलूखले ततः||६५|| पिण्डं मुष्टिसमं प्रस्थे तत् पूतं तैलसर्पिषोः| स्नेहितं मात्रया युक्तं कल्केन मधुकस्य च||६६|| बस्तिमभ्यक्तगात्राय दद्यात् प्रत्यागते ततः| स्नात्वा भुञ्जीत पयसा जाङ्गलानां रसेन वा||६७|| पित्तातिसारज्वरशोथगुल्मजीर्णातिसारग्रहणीप्रदोषान्| जयत्ययं शीघ्रमतिप्रवृद्धान् विरेचनास्थापनयोश्च बस्तिः ||६८||
🔊 Audio coming soon
পরিবেষ্ট্যেত্যাদিনা পিচ্ছাবস্তিমাহ| শৃতে পযসীত্যত্র পানীযমাত্রেণৈব পযঃ শৃতং জ্ঞেযম্| প্রস্থ ইতি শৃতে পযসীত্যস্য বিশেষণম্| বৃন্তানি শাল্মলেঃ উলূখলে আপোথ্য তত আপোথিতাত্ পিণ্ডং মুষ্টিসমং শৃতে প্রস্থে পযসি মৃদ্নীযাদিতি যোজনা| মাত্রযেতি বচনাত্ তৈলসর্পিষোরত্র তাবতী মাত্রা যাবত্যা স্নেহনমাত্রং ভবতি, তথা যষ্টীমধুকল্কস্যাপি তাবতী মাত্রা যাবত্যা ঘনো বস্তির্ভবতি||৬৩-৬৮||
Adhikarana 26 (69-70) · Śloka 70
পিত্তাতিসারী যস্ত্বেতাং ক্রিযাং মুক্ত্বা নিষেবতে| পিত্তলান্যন্নপানানি তস্য পিত্তং মহাবলম্||৬৯|| কুর্যাদ্রক্তাতিসারং তু রক্তমাশু প্রদূষযেত্| তৃষ্ণাং শূলং বিদাহং চ গুদপাকং চ দারুণম্||৭০||
पित्तातिसारी यस्त्वेतां क्रियां मुक्त्वा निषेवते| पित्तलान्यन्नपानानि तस्य पित्तं महाबलम्||६९|| कुर्याद्रक्तातिसारं तु रक्तमाशु प्रदूषयेत्| तृष्णां शूलं विदाहं च गुदपाकं च दारुणम्||७०||
🔊 Audio coming soon
পিত্তাতিসারীত্যাদিনা পিত্তাতিসারস্যৈব হেতুবিশেষকৃতাবস্থাভেদরূপং রক্তাতিসারং দর্শযতি| অযং চ রক্তাতিসারো যদ্যপি পিত্তাতিসারোত্তরকালভাবিতযেহোক্তঃ, তথাঽপি পিত্তাতিপ্রকোপেণ রক্তদুষ্ট্যা চ প্রথমমপি ভবত্যেবাযং দৃষ্টত্বাদিতি জ্ঞেযম্| তেনাত্রোত্পত্তিক্রমাভিধানমতন্ত্রতম্ | যথা “পাণ্ডুরোগী তু যোঽত্যর্থং” (চি.অ.১৬) ইত্যাদিনোক্তকামলোত্পাদে যথোক্তক্রমং বিনাঽপি কামলা ভবতি| এবমপি চাস্য রক্তাতীসারস্য পিত্তজন্যত্বাত্ পৈত্তিকে এবাবরোধঃ; তেন ষট্সঙ্খ্যা ন ব্যাহন্যতে| অতীসারস্য যত্ প্রসৃতাযাং সিদ্ধৌ আমরক্তশকৃত্পিত্তবাতকফানতীসারকারকানভিধাযোক্তং- “ষণ্ণামেষাং দ্বিসংসর্গাত্ত্রিংশদ্ভেদা ভবন্তি তে| কেবলৈঃ সহ ষট্ত্রিংশত্” (সি.অ.৮) ইতি, তদপ্যত্রৈব ষট্কেঽন্তর্ভাবনীযং, তত্র সূক্ষ্মভেদগণনযা স ভেদঃ কৃত ইত্যবিরোধঃ||৬৯-৭০||
Adhikarana 27 (71-76) · Śloka 76
তত্র চ্ছাগং পযঃ শস্তং শীতং সমধুশর্করম্| পানার্থং ভোজনার্থং চ গুদপ্রক্ষালনে তথা||৭১|| ওদনং রক্তশালীনাং পযসা তেন ভোজযেত্| রসৈঃ পারাবতাদীনাং ঘৃতভৃষ্টৈঃ সশর্করৈঃ||৭২|| শশপক্ষিমৃগাণাং চ শীতানাং ধন্বচারিণাম্| রসৈরনম্লৈঃ সঘৃতৈর্ভোজযেত্তং সশর্করৈঃ||৭৩|| রুধিরং মার্গমাজং বা ঘৃতভৃষ্টং প্রশস্যতে| কাশ্মর্যফলযূষো বা কিঞ্চিদম্লঃ সশর্করঃ||৭৪|| নীলোত্পলং মোচরসং সমঙ্গা পদ্মকেশরম্| অজাক্ষীরযুতং দদ্যাজ্জীর্ণে চ পযসৌদনম্||৭৫|| দুর্বলং পাযযিত্বা বা তস্যৈবোপরি ভোজযেত্| প্রাগ্ভক্তং নবনীতং বা দদ্যাত্ সমধুশর্করম্||৭৬||
तत्र च्छागं पयः शस्तं शीतं समधुशर्करम्| पानार्थं भोजनार्थं च गुदप्रक्षालने तथा||७१|| ओदनं रक्तशालीनां पयसा तेन भोजयेत्| रसैः पारावतादीनां घृतभृष्टैः सशर्करैः||७२|| शशपक्षिमृगाणां च शीतानां धन्वचारिणाम्| रसैरनम्लैः सघृतैर्भोजयेत्तं सशर्करैः||७३|| रुधिरं मार्गमाजं वा घृतभृष्टं प्रशस्यते| काश्मर्यफलयूषो वा किञ्चिदम्लः सशर्करः||७४|| नीलोत्पलं मोचरसं समङ्गा पद्मकेशरम्| अजाक्षीरयुतं दद्याज्जीर्णे च पयसौदनम्||७५|| दुर्बलं पाययित्वा वा तस्यैवोपरि भोजयेत्| प्राग्भक्तं नवनीतं वा दद्यात् समधुशर्करम्||७६||
🔊 Audio coming soon
তত্র ছাগমিত্যাদৌ ব্যঞ্জনার্থমিতি ভোজ্যোপকরণার্থম্| পযসা তেনেতি ছাগেন পযসা| মৃগস্যেদং মার্গম্, অজস্যেদমাজং, রুধিরমিতি যোজনা||৭১-৭৬||
Adhikarana 28 (77-79) · Śloka 79
প্রাশ্য ক্ষীরোত্থিতং সর্পিঃ কপিঞ্জলরসাশনঃ| ত্র্যহাদারোগ্যমাপ্নোতি পযসা ক্ষীরভুক্ তথা||৭৭|| পীত্বা শতাবরীকল্কং পযসা ক্ষীরভুগ্জযেত্| রক্তাতিসারং পীত্বা বা তযা সিদ্ধং ঘৃতং নরঃ||৭৮|| ঘৃতং যবাগূমণ্ডেন কুটজস্য ফলৈঃ শৃতম্| পেযং তস্যানু পাতব্যা পেযা রক্তোপশান্তযে||৭৯||
प्राश्य क्षीरोत्थितं सर्पिः कपिञ्जलरसाशनः| त्र्यहादारोग्यमाप्नोति पयसा क्षीरभुक् तथा||७७|| पीत्वा शतावरीकल्कं पयसा क्षीरभुग्जयेत्| रक्तातिसारं पीत्वा वा तया सिद्धं घृतं नरः||७८|| घृतं यवागूमण्डेन कुटजस्य फलैः शृतम्| पेयं तस्यानु पातव्या पेया रक्तोपशान्तये||७९||
🔊 Audio coming soon
প্রাশ্যেত্যাদৌ ক্ষীরোত্থিতং সর্পিঃ পযসা প্রাশ্যেতি সম্বন্ধঃ| কপিঞ্জলঃ গৌরতিত্তিরিঃ| ক্ষীরং ভুঙ্ক্তে ইতি ক্ষীরভুক্| তযেতি শতাবর্যা| যবাগূমণ্ডেন পেযমিতি সম্বন্ধঃ||৭৭-৭৯||
Adhikarana 29 (80-81) · Śloka 81
ত্বক্ চ দারুহরিদ্রাযাঃ কুটজস্য ফলানি চ| পিপ্পলী শৃঙ্গবেরং চ দ্রাক্ষা কটুকরোহিণী||৮০|| ষড্ভিরেতৈর্ঘৃতং সিদ্ধং পেযামণ্ডাবচারিতম্| অতীসারং জযেচ্ছীঘ্রং ত্রিদোষমপি দারুণম্||৮১||
त्वक् च दारुहरिद्रायाः कुटजस्य फलानि च| पिप्पली शृङ्गवेरं च द्राक्षा कटुकरोहिणी||८०|| षड्भिरेतैर्घृतं सिद्धं पेयामण्डावचारितम्| अतीसारं जयेच्छीघ्रं त्रिदोषमपि दारुणम्||८१||
🔊 Audio coming soon
ষড্ভিরেতৈরিতিপদং যথালাভনিষেধার্থম্||৮০-৮১||
Adhikarana 30 (82-84) · Śloka 84
কৃষ্ণমৃন্মধুকং শঙ্খং রুধিরং তণ্ডুলোদকম্| পীতমেকত্র সক্ষৌদ্রং রক্তসঙ্গ্রহণং পরম্||৮২|| পীতঃ প্রিযঙ্গুকাকল্কঃ সক্ষৌদ্রস্তণ্ডুলাম্ভসা| রক্তস্রাবং জযেচ্ছীঘ্রং ধন্বমাংসরসাশিনঃ||৮৩|| কল্কস্তিলানাং কৃষ্ণানাং শর্করাপঞ্চভাগিকঃ| আজেন পযসা পীতঃ সদ্যো রক্তং নিযচ্ছতি||৮৪||
कृष्णमृन्मधुकं शङ्खं रुधिरं तण्डुलोदकम्| पीतमेकत्र सक्षौद्रं रक्तसङ्ग्रहणं परम्||८२|| पीतः प्रियङ्गुकाकल्कः सक्षौद्रस्तण्डुलाम्भसा| रक्तस्रावं जयेच्छीघ्रं धन्वमांसरसाशिनः||८३|| कल्कस्तिलानां कृष्णानां शर्करापञ्चभागिकः| आजेन पयसा पीतः सद्यो रक्तं नियच्छति||८४||
🔊 Audio coming soon
কৃষ্ণমৃদিত্যাদৌ রুধিরং শোণিতং, কেচিত্ কুঙ্কুমমাহুঃ| শর্করাপঞ্চভাগিক ইতি অত্র শর্করাযাঃ পঞ্চমেন ভাগেন কৃষ্ণতিলদানম্; উক্তং হি জতূকর্ণে- “কৃষ্ণতিলাঞ্ শর্করাপাদিকাঞ্ছাগীপযসা” ইতি||৮২-৮৪||
Adhikarana 31 (85-86) · Śloka 86
পলং বত্সকবীজস্য শ্রপযিত্বা রসং পিবেত্| যো রসাশী জযেচ্ছীঘ্রং স পৈত্তং জঠরামযম্||৮৫|| পীত্বা সশর্করাক্ষৌদ্রং চন্দনং তণ্ডুলাম্ভসা| দাহতৃষ্ণাপ্রমেহেভ্যো রক্তস্রাবাচ্চ মুচ্যতে||৮৬||
पलं वत्सकबीजस्य श्रपयित्वा रसं पिबेत्| यो रसाशी जयेच्छीघ्रं स पैत्तं जठरामयम्||८५|| पीत्वा सशर्कराक्षौद्रं चन्दनं तण्डुलाम्भसा| दाहतृष्णाप्रमेहेभ्यो रक्तस्रावाच्च मुच्यते||८६||
🔊 Audio coming soon
পলমিত্যাদৌ রসমিতি ক্বাথম্| রসাশীতি মাংসরসেন ভুঞ্জানঃ||৮৫-৮৬||
Adhikarana 32 (87-88) · Śloka 88
গুদো বহুভিরুত্থানৈর্যস্য পিত্তেন পচ্যতে| সেচযেত্তং সুশীতেন পটোলমধুকাম্বুনা||৮৭|| পঞ্চবল্কমধূকানাং রসৈরিক্ষুরসৈর্ঘৃতৈঃ| ছাগৈর্গব্যৈঃ পযোভির্বা শর্করাক্ষৌদ্রসংযুতৈঃ||৮৮||
गुदो बहुभिरुत्थानैर्यस्य पित्तेन पच्यते| सेचयेत्तं सुशीतेन पटोलमधुकाम्बुना||८७|| पञ्चवल्कमधूकानां रसैरिक्षुरसैर्घृतैः| छागैर्गव्यैः पयोभिर्वा शर्कराक्षौद्रसंयुतैः||८८||
🔊 Audio coming soon
ক্ষৌদ্রসংযুতৈরিত্যন্তং সেচযেদিত্যনুবর্ততে||৮৭-৮৮||
Adhikarana 33 (89-92) · Śloka 93
প্রক্ষালনানাং কল্কৈর্বা সসর্পিষ্কৈঃ প্রলেপযেত্| এষাং বা সুকৃতৈশ্চূর্ণৈস্তং গুদং প্রতিসারযেত্||৮৯|| ধাতকীলোধ্রচূর্ণৈর্বা সমাংশৈঃ প্রতিসারযেত্| তথা স্রবতি নো রক্তং গুদং তৈঃ প্রতিসারিতম্||৯০|| পক্বতা প্রশমং যাতি বেদনা চোপশাম্যতি| যথোক্তৈঃ সেচনৈঃ শীতৈঃ শোণিতেঽতিস্রবত্যপি||৯১|| গুদবঙ্ক্ষণকট্যূরু সেচযেদ্ঘৃতভাবিতম্| চন্দনাদ্যেন তৈলেন শতধৌতেন সর্পিষা||৯২|| কার্পাসসঙ্গৃহীতেন সেচযেদ্গুদবঙ্ক্ষণম্|৯৩|
प्रक्षालनानां कल्कैर्वा ससर्पिष्कैः प्रलेपयेत्| एषां वा सुकृतैश्चूर्णैस्तं गुदं प्रतिसारयेत्||८९|| धातकीलोध्रचूर्णैर्वा समांशैः प्रतिसारयेत्| तथा स्रवति नो रक्तं गुदं तैः प्रतिसारितम्||९०|| पक्वता प्रशमं याति वेदना चोपशाम्यति| यथोक्तैः सेचनैः शीतैः शोणितेऽतिस्रवत्यपि||९१|| गुदवङ्क्षणकट्यूरु सेचयेद्घृतभावितम्| चन्दनाद्येन तैलेन शतधौतेन सर्पिषा||९२|| कार्पाससङ्गृहीतेन सेचयेद्गुदवङ्क्षणम्|९३|
🔊 Audio coming soon
প্রক্ষালনানামিতি প্রক্ষালনার্থমুক্তানাং পটোলমধুকাদীনাম্| প্রতিসারযেত্ অবচূর্ণযেত্||৮৯-৯২||-
Adhikarana 34 (93-95) · Śloka 96
অল্পাল্পং বহুশো রক্তং সশূলমুপবেশ্যতে||৯৩|| যদা বাযুর্বিবদ্ধশ্চ কৃচ্ছ্রং চরতি বা ন বা| পিচ্ছাবস্তিং তদা তস্য যথোক্তমুপকল্পযেত্||৯৪|| প্রপৌণ্ডরীকসিদ্ধেন সর্পিষা চানুবাসযেত্| প্রাযশো দুর্বলগুদাশ্চিরকালাতিসারিণঃ||৯৫|| তস্মাদভীক্ষ্ণশস্তেষাং গুদে স্নেহং প্রযোজযেত্|৯৬|
अल्पाल्पं बहुशो रक्तं सशूलमुपवेश्यते||९३|| यदा वायुर्विबद्धश्च कृच्छ्रं चरति वा न वा| पिच्छाबस्तिं तदा तस्य यथोक्तमुपकल्पयेत्||९४|| प्रपौण्डरीकसिद्धेन सर्पिषा चानुवासयेत्| प्रायशो दुर्बलगुदाश्चिरकालातिसारिणः||९५|| तस्मादभीक्ष्णशस्तेषां गुदे स्नेहं प्रयोजयेत्|९६|
🔊 Audio coming soon
পিচ্ছাবস্তিং তদা তস্য যথোক্তমিতি অত্রৈব ‘পরিবেষ্ট্য’ ইত্যাদিগ্রন্থোক্তম্| গুদে স্নেহং প্রযোজযেদিতি অত্র স্নেহভাবিতপিচুপ্রণযনেন গুদে স্নেহপ্রযোগমিচ্ছন্তি; অন্যে তু প্রকৃতত্বাদনুবাসনেনৈবাত্র প্রযোগমাহুঃ||৯৩-৯৫||-
Adhikarana 35 (96-100) · Śloka 101
পবনোঽতিপ্রবৃত্তো হি স্বে স্থানে লভতেঽধিকম্||৯৬|| বলং তস্য সপিত্তস্য জযার্থে বস্তিরুত্তমঃ| রক্তং বিট্সহিতং পূর্বং পশ্চাদ্বা যোঽতিসার্যতে||৯৭|| শতাবরীঘৃতং তস্য লেহার্থমুপকল্পযেত্| শর্করার্ধাংশিকং লীঢং নবনীতং নবোদ্ধৃতম্||৯৮|| ক্ষৌদ্রপাদং জযেচ্ছীঘ্রং তং বিকারং হিতাশিনঃ| ন্যগ্রোধোদুম্বরাশ্বত্থশুঙ্গানাপোথ্য বাসযেত্||৯৯|| অহোরাত্রং জলে তপ্তে ঘৃতং তেনাম্ভসা পচেত্| তদর্ধশর্করাযুক্তং লিহ্যাত্ সক্ষৌদ্রপাদিকম্||১০০|| অধো বা যদি বাঽপ্যূর্ধ্বং যস্য রক্তং প্রবর্ততে|১০১|
पवनोऽतिप्रवृत्तो हि स्वे स्थाने लभतेऽधिकम्||९६|| बलं तस्य सपित्तस्य जयार्थे बस्तिरुत्तमः| रक्तं विट्सहितं पूर्वं पश्चाद्वा योऽतिसार्यते||९७|| शतावरीघृतं तस्य लेहार्थमुपकल्पयेत्| शर्करार्धांशिकं लीढं नवनीतं नवोद्धृतम्||९८|| क्षौद्रपादं जयेच्छीघ्रं तं विकारं हिताशिनः| न्यग्रोधोदुम्बराश्वत्थशुङ्गानापोथ्य वासयेत्||९९|| अहोरात्रं जले तप्ते घृतं तेनाम्भसा पचेत्| तदर्धशर्करायुक्तं लिह्यात् सक्षौद्रपादिकम्||१००|| अधो वा यदि वाऽप्यूर्ध्वं यस्य रक्तं प्रवर्तते|१०१|
🔊 Audio coming soon
স্বে স্থানে ইতি পক্বাশযকট্যাদৌ| বস্তিরিতি সামান্যবচনাদনুবাসনং নিরূহশ্চ জ্ঞেযঃ| শতাবরীঘৃতমিতি “শতাবরীমূলতুলাশ্চতস্রঃ” (চি.অ.৩০) ইত্যাদিনা যোনিব্যাপদুক্তং শতাবরীঘৃতম্| বিকারমিতি ‘রক্তং সবিট্’ ইত্যাদিনোক্তম্||৯৬-১০০||-
Adhikarana 36 (101) · Śloka 102
যস্ত্বেবং দুর্বলো মোহাত্ পিত্তলান্যেব সেবতে||১০১|| দারুণং স বলীপাকং প্রাপ্য শীঘ্রং বিপদ্যতে|১০২|
यस्त्वेवं दुर्बलो मोहात् पित्तलान्येव सेवते||१०१|| दारुणं स वलीपाकं प्राप्य शीघ्रं विपद्यते|१०२|
🔊 Audio coming soon
বলীপাকমিতি গুদবলীপাকম্||১০১||-
Adhikarana 37 (102-103) · Śloka 104
শ্লেষ্মাতিসারে প্রথমং হিতং লঙ্ঘনপাচনম্||১০২|| যোজ্যশ্চামাতিসারঘ্নো যথোক্তো দীপনো গণঃ| লঙ্ঘিতস্যানুপূর্ব্যাং চ কৃতাযাং ন নিবর্ততে||১০৩|| কফজো যদ্যতীসারঃ কফঘ্নৈস্তমুপাচরেত্|১০৪|
श्लेष्मातिसारे प्रथमं हितं लङ्घनपाचनम्||१०२|| योज्यश्चामातिसारघ्नो यथोक्तो दीपनो गणः| लङ्घितस्यानुपूर्व्यां च कृतायां न निवर्तते||१०३|| कफजो यद्यतीसारः कफघ्नैस्तमुपाचरेत्|१०४|
🔊 Audio coming soon
দীপনো গণ ইতি ‘শালিপর্ণী পৃশ্নিপর্ণী’ ইত্যাদিনোক্তঃ||১০২-১০৩||-
Adhikarana 38 (104-112) · Śloka 113
বিল্বং কর্কটিকা মুস্তমভযা বিশ্বভেষজম্||১০৪|| বচা বিডঙ্গং ভূতীকং ধান্যকং দেবদারু চ| কুষ্ঠং সাতিবিষা পাঠা চব্যং কটুকরোহিণী||১০৫|| পিপ্পলী পিপ্পলীমূলং চিত্রকং হস্তিপিপ্পলী| যোগাঞ্ছ্লোকার্ধবিহিতাংশ্চতুরস্তান্ প্রযোজযেত্||১০৬|| শৃতাঞ্ছ্লেষ্মাতিসারেষু কাযাগ্নিবলবর্ধনান্| অজাজীমসিতাং পাঠাং নাগরং মরিচানি চ||১০৭|| ধাতকীদ্বিগুণং দদ্যান্মাতুলুঙ্গরসাপ্লুতম্| রসাঞ্জনং সাতিবিষং কুটজস্য ফলানি চ||১০৮|| ধাতকীদ্বিগুণং দদ্যাত্ পাতুং সক্ষৌদ্রনাগরম্| ধাতকী নাগরং বিল্বং লোধ্রং পদ্মস্য কেশরম্||১০৯|| জম্বূত্বঙ্নাগরং ধান্যং পাঠা মোচরসো বলা| সমঙ্গা ধাতকী বিল্বমধ্যং জম্ব্বাম্রযোস্ত্বচঃ||১১০|| কপিত্থানি বিডঙ্গানি নাগরং মরিচানি চ| চাঙ্গেরীকোলতক্রাম্লাংশ্চতুরস্তান্ কফোত্তরে||১১১|| শ্লোকার্ধবিহিতান্ দদ্যাত্ সস্নেহলবণান্ খডান্| কপিত্থমধ্যং লীঢ্বা তু সব্যোষক্ষৌদ্রশর্করম্||১১২|| কট্ফলং মধুযুক্তং বা মুচ্যতে জঠরামযাত্|১১৩|
बिल्वं कर्कटिका मुस्तमभया विश्वभेषजम्||१०४|| वचा विडङ्गं भूतीकं धान्यकं देवदारु च| कुष्ठं सातिविषा पाठा चव्यं कटुकरोहिणी||१०५|| पिप्पली पिप्पलीमूलं चित्रकं हस्तिपिप्पली| योगाञ्छ्लोकार्धविहितांश्चतुरस्तान् प्रयोजयेत्||१०६|| शृताञ्छ्लेष्मातिसारेषु कायाग्निबलवर्धनान्| अजाजीमसितां पाठां नागरं मरिचानि च||१०७|| धातकीद्विगुणं दद्यान्मातुलुङ्गरसाप्लुतम्| रसाञ्जनं सातिविषं कुटजस्य फलानि च||१०८|| धातकीद्विगुणं दद्यात् पातुं सक्षौद्रनागरम्| धातकी नागरं बिल्वं लोध्रं पद्मस्य केशरम्||१०९|| जम्बूत्वङ्नागरं धान्यं पाठा मोचरसो बला| समङ्गा धातकी बिल्वमध्यं जम्ब्वाम्रयोस्त्वचः||११०|| कपित्थानि विडङ्गानि नागरं मरिचानि च| चाङ्गेरीकोलतक्राम्लांश्चतुरस्तान् कफोत्तरे||१११|| श्लोकार्धविहितान् दद्यात् सस्नेहलवणान् खडान्| कपित्थमध्यं लीढ्वा तु सव्योषक्षौद्रशर्करम्||११२|| कट्फलं मधुयुक्तं वा मुच्यते जठरामयात्|११३|
🔊 Audio coming soon
কফঘ্নৈস্তমুপাচরেদিত্যুক্তং, তেন কফঘ্নান্ বিল্বকর্কটকেত্যাদিনা যোগানাহ| ধাতকীদ্বিগুণমিতি একদ্রব্যাপেক্ষযা দ্বিগুণযা ধাতক্যা যুক্তম্| অজাজীমিত্যাদৌ অসিতামিতি পিপ্পলীম্| জতূকর্ণে হ্যযং যোগঃ “পাঠাঽজাজীব্যোষফলপূরং ধাতকীদ্বিগুণম্”| ইত্যুক্তঃ||১০৪-১১২||-
Adhikarana 39 (113-116) · Śloka 116
কণাং মধুযুতাং পীত্বা তক্রং পীত্বা সচিত্রকম্||১১৩|| জগ্ধ্বা বা বালবিল্বানি মুচ্যতে জঠরামযাত্| বালবিল্বং গুডং তৈলং পিপ্পলীং বিশ্বভেষজম্| লিহ্যাদ্বাতে প্রতিহতে সশূলঃ সপ্রবাহিকঃ||১১৪|| ভোজ্যং মূলকষাযেণ বাতঘ্নৈশ্চোপসেবনৈঃ| বাতাতিসারবিহিতৈর্যূষৈর্মাংসরসৈঃ খডৈঃ||১১৫|| পূর্বোক্তমম্লসর্পির্বা ষট্পলং বা যথাবলম্| পুরাণং বা ঘৃতং দদ্যাদ্যবাগূমণ্ডমিশ্রিতম্||১১৬||
कणां मधुयुतां पीत्वा तक्रं पीत्वा सचित्रकम्||११३|| जग्ध्वा वा बालबिल्वानि मुच्यते जठरामयात्| बालबिल्वं गुडं तैलं पिप्पलीं विश्वभेषजम्| लिह्याद्वाते प्रतिहते सशूलः सप्रवाहिकः||११४|| भोज्यं मूलकषायेण वातघ्नैश्चोपसेवनैः| वातातिसारविहितैर्यूषैर्मांसरसैः खडैः||११५|| पूर्वोक्तमम्लसर्पिर्वा षट्पलं वा यथाबलम्| पुराणं वा घृतं दद्याद्यवागूमण्डमिश्रितम्||११६||
🔊 Audio coming soon
কণাং মধুযুতামিত্যত্র কণা পিপ্পলী; অন্যে ‘কণান্’ ইতি পঠন্তি, কণানিত্যনেন চ ষষ্টিকতণ্ডুলান্ গ্রাহযন্তি| বাতে প্রতিহতে ইতি বদ্ধে বাতে| উপসেবনৈরিতি ব্যঞ্জনৈঃ| পূর্বোক্তমম্লসর্পিরিতি “চাঙ্গেরীকোলদধ্যম্লং” ইত্যাদিনোক্তম্||১১৩-১১৬||
Adhikarana 40 (117-120) · Śloka 120
বাতশ্লেষ্মবিবন্ধে বা কফে বাঽতিস্রবত্যপি| শূলে প্রবাহিকাযাং বা পিচ্ছাবস্তিং প্রযোজযেত্||১১৭|| পিপ্পলীবিল্বকুষ্ঠানাং শতাহ্বাবচযোরপি| কল্কৈঃ সলবণৈর্যুক্তং পূর্বোক্তং সন্নিধাপযেত্||১১৮|| প্রত্যাগতে সুখং স্নাতং কৃতাহারং দিনাত্যযে| বিল্বতৈলেন মতিমান্সুখোষ্ণেনানুবাসযেত্||১১৯|| বচান্তৈরথবা কল্কৈস্তৈলং পক্ত্বাঽনুবাসযেত্| বহুশঃ কফবাতার্তস্তথা স লভতে সুখম্||১২০||
वातश्लेष्मविबन्धे वा कफे वाऽतिस्रवत्यपि| शूले प्रवाहिकायां वा पिच्छाबस्तिं प्रयोजयेत्||११७|| पिप्पलीबिल्वकुष्ठानां शताह्वावचयोरपि| कल्कैः सलवणैर्युक्तं पूर्वोक्तं सन्निधापयेत्||११८|| प्रत्यागते सुखं स्नातं कृताहारं दिनात्यये| बिल्वतैलेन मतिमान्सुखोष्णेनानुवासयेत्||११९|| वचान्तैरथवा कल्कैस्तैलं पक्त्वाऽनुवासयेत्| बहुशः कफवातार्तस्तथा स लभते सुखम्||१२०||
🔊 Audio coming soon
পিচ্ছাবস্তিং প্রযোজযেদিতি যদুক্তং তত্র পিচ্ছাবস্তের্বিশেষমাহ- পিপ্পলীত্যাদি| পূর্বোক্তমিতি অত্রৈব পূর্বোক্তং পিচ্ছাবস্তিং পিপ্পল্যাদিকল্কৈর্যুক্তং, সন্নিধাপযেদিতি দাপযেত্| বিল্বতৈলেনেতি সিদ্ধৌ “দশমূলং বলা রাস্না” (সি.অ.৪) ইত্যাদিনা বক্ষ্যমাণবিল্বতৈলেন| বচান্তৈরিতি “পিপ্পলীবিল্বকুষ্ঠানাং শতাহ্বাবচযোরপি” ইত্যত্রোক্তৈর্বচান্তৈঃ||১১৭-১২০||
Adhikarana 41 (121) · Śloka 121
স্বে স্থানে মারুতোঽবশ্যং বর্ধতে কফসঙ্ক্ষযে| স বৃদ্ধঃ সহসা হন্যাত্তস্মাত্তং ত্বরযা জযেত্||১২১||
स्वे स्थाने मारुतोऽवश्यं वर्धते कफसङ्क्षये| स वृद्धः सहसा हन्यात्तस्मात्तं त्वरया जयेत्||१२१||
🔊 Audio coming soon
সম্প্রতি সর্বাতিসারেষু পক্বাশযব্যাপকত্বেন বাযুরবশ্যং বৃদ্ধো ভবতি, স চাশুকারিতযা ত্বরযা জেতব্য ইতি দর্শযন্নাহ- স্বে স্থানে ইত্যাদি| কফসঙ্ক্ষযাদিত্যনেন কফসঙ্ক্ষযে রূক্ষশরীরতযা বাযুঃ কুপ্যতি, শ্লেষ্মশোণিতে বৃদ্ধে তদুপস্নেহিতশরীরে বাযুর্নিবৃত্তপ্রসরো ভবতীতি||১২১||
Adhikarana 42 (122) · Śloka 122
বাতস্যানু জযেত্ পিত্তং, পিত্তস্যানু জযেত্ কফম্| ত্রযাণাং বা জযেত্ পূর্বং যো ভবেদ্বলবত্তমঃ||১২২||
वातस्यानु जयेत् पित्तं, पित्तस्यानु जयेत् कफम्| त्रयाणां वा जयेत् पूर्वं यो भवेद्बलवत्तमः||१२२||
🔊 Audio coming soon
পূর্বং জ্বরাধ্যাযে সন্নিপাতচিকিত্সাযা “কফস্থানানুপূর্ব্যা বা” (চি.অ.৩) ইত্যনেন কফপিত্তবাতানাং ক্রমেণ চিকিত্সোক্তা অতীসারেঽপি ত্রিদোষজে কদাচিত্ স্যাদিত্যাশঙ্ক্যাত্র বিশিষ্টং ক্রমমাহ- বাতস্যান্বিত্যাদি| অযং চ ক্রমো নিরামসন্নিপাতাতিসারে এব জ্ঞেযঃ; সামে তু প্রথমমামস্যৈব চিকিত্সিতং কর্তব্যম্| সমত্রিদোষাতিসারচিকিত্সাক্রমভিধায বিষমত্রিদোষাতিসারচিকিত্সাক্রমমাহ- ত্রযাণামিত্যাদি||১২২||
Adhikarana 43 (123) · Śloka 123
তত্র শ্লোকঃ- প্রাগুত্পত্তিনিমিত্তানি লক্ষণং সাধ্যতা ন চ| ক্রিযা চাবস্থিকী সিদ্ধা নির্দিষ্টা হ্যতিসারিণাম্||১২৩||
तत्र श्लोकः- प्रागुत्पत्तिनिमित्तानि लक्षणं साध्यता न च| क्रिया चावस्थिकी सिद्धा निर्दिष्टा ह्यतिसारिणाम्||१२३||
🔊 Audio coming soon
প্রাগুত্পত্তীত্যাদিনাঽধ্যাযার্থসঙ্গ্রহঃ||১২৩||
Adhikarana puShpikA · Śloka 19
ইত্যগ্নিবেশকৃতে তন্ত্রে চরকপ্রতিসংস্কৃতে চিকিত্সাস্থানেঽতিসারচিকিত্সিতং নামৈকোনবিংশোঽধ্যাযঃ||১৯||
इत्यग्निवेशकृते तन्त्रे चरकप्रतिसंस्कृते चिकित्सास्थानेऽतिसारचिकित्सितं नामैकोनविंशोऽध्यायः||१९||
🔊 Audio coming soon
ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং চিকিত্সাস্থানেঽতীসারচিকিত্সিতং নামৈকোনবিংশোঽধ্যাযঃ||১৯||