Adhikarana 1 (1-2) · Śloka 2
অথাতশ্ছর্দিচিকিত্সিতং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||
अथातश्छर्दिचिकित्सितं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
শরীরে মার্গদ্বযং প্রধানম্- অধো গুদম্, ঊর্ধ্বং চ মুখং; তদধোমার্গাতিপ্রবৃত্তদোষমতীসারমভিধায, ঊর্ধ্বাতিদোষপ্রবৃত্তিরূপা ছর্দিরুচ্যতে, ইতি ছর্দ্যধ্যাযসম্বন্ধঃ||১-২||
Adhikarana 2 (3) · Śloka 3
যশস্বিনং ব্রহ্মতপোদ্যুতিভ্যাং জ্বলন্তমগ্ন্যর্কসমপ্রভাবম্| পুনর্বসুং ভূতহিতে নিবিষ্টং পপ্রচ্ছ শিষ্যোঽত্রিজমগ্নিবেশঃ||৩||
यशस्विनं ब्रह्मतपोद्युतिभ्यां ज्वलन्तमग्न्यर्कसमप्रभावम्| पुनर्वसुं भूतहिते निविष्टं पप्रच्छ शिष्योऽत्रिजमग्निवेशः||३||
🔊 Audio coming soon
ব্রহ্মণঃ তত্ত্বজ্ঞানস্য তপসশ্চ দ্যুতী ব্রহ্মতপোদ্যুতী, তাভ্যাং জ্বলন্তম্||৩||
Adhikarana 3 (4-5) · Śloka 5
যাশ্ছর্দযঃ পঞ্চ পুরা ত্বযোক্তা রোগাধিকারে ভিষজাং বরিষ্ঠ!| তাসাং চিকিত্সাং সনিদানলিঙ্গাং যথাবদাচক্ষ্ব নৃণাং হিতার্থম্||৪|| তদগ্নিবেশস্য বচো নিশম্য প্রীতো ভিষক্শ্রেষ্ঠ ইদং জগাদ| যাশ্ছর্দযঃ পঞ্চ পুরা মযোক্তাস্তা বিস্তরেণ ব্রুবতো নিবোধ||৫||
याश्छर्दयः पञ्च पुरा त्वयोक्ता रोगाधिकारे भिषजां वरिष्ठ!| तासां चिकित्सां सनिदानलिङ्गां यथावदाचक्ष्व नृणां हितार्थम्||४|| तदग्निवेशस्य वचो निशम्य प्रीतो भिषक्श्रेष्ठ इदं जगाद| याश्छर्दयः पञ्च पुरा मयोक्तास्ता विस्तरेण ब्रुवतो निबोध||५||
🔊 Audio coming soon
রোগাধিকারে ইতি অষ্টোদরীযে (সূ.অ.১৯)||৪-৫||
Adhikarana 4 (6) · Śloka 6
দোষৈঃ পৃথক্ত্রিপ্রভবাশ্চতস্রো দ্বিষ্টার্থযোগাদপি পঞ্চমী স্যাত্|৬|
दोषैः पृथक्त्रिप्रभवाश्चतस्रो द्बिष्टार्थयोगादपि पञ्चमी स्यात्|६|
🔊 Audio coming soon
পৃথক্ বাতাদিষু ত্রিষু মিলিতেষু চ প্রভব উত্পত্তির্যাসাং তাঃ পৃথক্ত্রিপ্রভবাশ্চতস্রঃ| দ্বিষ্টার্থযোগাদপীত্যত্র দ্বিষ্টশব্দেন প্রতীপাশুচিপূত্যাদযোঽপি দ্বেষ্যতযা গৃহ্যন্তে| দ্বিষ্টপ্রতীপেত্যাদৌ বক্ষ্যমাণদ্বিষ্টার্থচ্ছর্দিনিদানে দ্বিষ্টশব্দেন গোবলীবর্দন্যাযাত্ প্রতিপুরুষনিযতদ্বিষ্টত্বমুচ্যতে, তেনেহোক্তার্থশব্দেন প্রতিপাদিতা ছর্দিরুচ্যতে|৬|
Adhikarana 5 (6) · Śloka 6
তাসাং হৃদুত্ক্লেশকফপ্রসেকৌ দ্বেষোঽশনে চৈব হি পূর্বরূপম্||৬||
तासां हृदुत्क्लेशकफप्रसेकौ द्वेषोऽशने चैव हि पूर्वरूपम्||६||
🔊 Audio coming soon
যদ্যপি হেত্বভিধানপূর্বকং পূর্বরূপাভিধানং যুজ্যতে, হেতূত্তরকালভাবিত্বাদেব পূর্বরূপস্য; তথাঽপ্যল্পবক্তব্যত্বাত্ তাসামিত্যাদিনা পূর্বরূপমাহ| পূর্বরূপং লিঙ্গাল্পত্বাদুচ্যতে, এবমন্যত্রাপি সাক্ষাত্সূচিতপূর্বরূপাভিধানে জ্ঞেযম্||৬||
Adhikarana 6 (7-9) · Śloka 9
ব্যাযামতীক্ষ্ণৌষধশোকরোগভযোপবাসাদ্যতিকর্শিতস্য| বাযুর্মহাস্রোতসি সম্প্রবৃদ্ধ উত্ক্লেশ্য দোষাংস্তত ঊর্ধ্বমস্যন্||৭|| আমাশযোত্ক্লেশকৃতাং চ মর্ম প্রপীডযংশ্ছর্দিমুদীরযেত্তু| হৃত্পার্শ্বপীডামুখশোষমূর্ধনাভ্যর্তিকাসস্বরভেদতোদৈঃ||৮|| উদ্গারশব্দপ্রবলং সফেনং বিচ্ছিন্নকৃষ্ণং তনুকং কষাযম্| কৃচ্ছ্রেণ চাল্পং মহতা চ বেগেনার্তোঽনিলাচ্ছর্দযতীহ দুঃখম্||৯||
व्यायामतीक्ष्णौषधशोकरोगभयोपवासाद्यतिकर्शितस्य| वायुर्महास्रोतसि सम्प्रवृद्ध उत्क्लेश्य दोषांस्तत ऊर्ध्वमस्यन्||७|| आमाशयोत्क्लेशकृतां च मर्म प्रपीडयंश्छर्दिमुदीरयेत्तु| हृत्पार्श्वपीडामुखशोषमूर्धनाभ्यर्तिकासस्वरभेदतोदैः||८|| उद्गारशब्दप्रबलं सफेनं विच्छिन्नकृष्णं तनुकं कषायम्| कृच्छ्रेण चाल्पं महता च वेगेनार्तोऽनिलाच्छर्दयतीह दुःखम्||९||
🔊 Audio coming soon
ব্যাযামেত্যাদিনা বাতজাযা হেতুলক্ষণে প্রাহ| মহাস্রোতসীতি কোষ্ঠে| দোষানিতি বহুবচনং বহূনামুত্ক্লেশনীযানাং বিদ্যমানত্বাত্ তথা রক্তাদেরপি ছর্দ্যাদৌ দোষশব্দেনাভিধানাত্| ঊর্ধ্বক্ষেপণমামাশযোত্ক্লেশেনোদীরিতো বাযুরেব করোতি| কিংবা আমাশযোদ্বেগকৃতানিতি দ্বিতীযাবহুবচনং দোষানিত্যস্য বিশেষণম্| মর্মেতি হৃদযম্| কষাযমিতি কষাযরসং কষাযবর্ণং বা||৭-৯||
Adhikarana 7 (10-11) · Śloka 11
অজীর্ণকট্বম্লবিদাহ্যশীতৈরামাশযে পিত্তমুদীর্ণবেগম্| রসাযনীভির্বিসৃতং প্রপীড্য মর্মোর্ধ্বমাগম্য বমিং করোতি||১০|| মূর্চ্ছাপিপাসামুখশোষমূর্ধতাল্বক্ষিসন্তাপতমোভ্রমার্তঃ| পীতং ভৃশোষ্ণং হরিতং সতিক্তং ধূম্রং চ পিত্তেন বমেত্ সদাহম্||১১||
अजीर्णकट्वम्लविदाह्यशीतैरामाशये पित्तमुदीर्णवेगम्| रसायनीभिर्विसृतं प्रपीड्य मर्मोर्ध्वमागम्य वमिं करोति||१०|| मूर्च्छापिपासामुखशोषमूर्धताल्वक्षिसन्तापतमोभ्रमार्तः| पीतं भृशोष्णं हरितं सतिक्तं धूम्रं च पित्तेन वमेत् सदाहम्||११||
🔊 Audio coming soon
অজীর্ণেত্যাদিনা পিত্তজাযা হেতুলক্ষণে ব্রূতে| অজীর্ণেতি অজীর্ণে ভোজনম্| রসাযনীভিরিতি স্রোতোভিঃ| মূর্ধেত্যাদি সন্তাপেন সম্বধ্যতে| ধূম্রং ধূম্রবর্ণম্||১০-১১||
Adhikarana 8 (12-13) · Śloka 13
স্নিগ্ধাতিগুর্বামবিদাহিভোজ্যৈঃ স্বপ্নাদিভিশ্চৈব কফোঽতিবৃদ্ধঃ| উরঃ শিরো মর্ম রসাযনীশ্চ সর্বাঃ সমাবৃত্য বমিং করোতি||১২|| তন্দ্রাস্যমাধুর্যকফপ্রসেকসন্তোষনিদ্রারুচিগৌরবার্তঃ| স্নিগ্ধং ঘনং স্বাদু কফাদ্বিশুদ্ধং সলোমহর্ষোঽল্পরুজং বমেত্তু||১৩||
स्निग्धातिगुर्वामविदाहिभोज्यैः स्वप्नादिभिश्चैव कफोऽतिवृद्धः| उरः शिरो मर्म रसायनीश्च सर्वाः समावृत्य वमिं करोति||१२|| तन्द्रास्यमाधुर्यकफप्रसेकसन्तोषनिद्रारुचिगौरवार्तः| स्निग्धं घनं स्वादु कफाद्विशुद्धं सलोमहर्षोऽल्परुजं वमेत्तु||१३||
🔊 Audio coming soon
স্নিগ্ধেত্যাদিনা কফজামাহ| সন্তোষোঽত্র তৃপ্তিঃ, অন্যে তু সন্তোষো মানস এবাত্র ব্যাধিপ্রভাবাদ্ভবতি| অল্পরুজমিতি ক্রিযাবিশেষণম্||১২-১৩||
Adhikarana 9 (14-15) · Śloka 15
সমশ্নতঃ সর্বরসান্ প্রসক্তমামপ্রদোষর্তুবিপর্যযৈশ্চ| সর্বে প্রকোপং যুগপত্ প্রপন্নাশ্ছর্দিং ত্রিদোষাং জনযন্তি দোষাঃ||১৪|| শূলাবিপাকারুচিদাহতৃষ্ণাশ্বাসপ্রমোহপ্রবলা প্রসক্তম্| ছর্দিস্ত্রিদোষাল্লবণাম্লনীলসান্দ্রোষ্ণরক্তং বমতাং নৃণাং স্যাত্||১৫||
समश्नतः सर्वरसान् प्रसक्तमामप्रदोषर्तुविपर्ययैश्च| सर्वे प्रकोपं युगपत् प्रपन्नाश्छर्दिं त्रिदोषां जनयन्ति दोषाः||१४|| शूलाविपाकारुचिदाहतृष्णाश्वासप्रमोहप्रबला प्रसक्तम्| छर्दिस्त्रिदोषाल्लवणाम्लनीलसान्द्रोष्णरक्तं वमतां नृणां स्यात्||१५||
🔊 Audio coming soon
সমশ্নত ইত্যাদিনা ত্রিদোষজামাহ| সমশ্নতঃ সর্বরসানিতি পথ্যাপথ্যমেলকরূপতযা ভজতঃ, উক্তং হি- “পথ্যাপথ্যমিহৈকত্র ভুক্তং সমশনং মতম্” (চি.অ.১৫) ইত্যত্র; ন তু সর্বরসান্ ভুঞ্জানস্যেত্যর্থঃ; সর্বরসভোজনং হি পথ্যমেব, তেনেহ তস্য ত্রিদোষকর্তৃত্বং ন স্যাত্| প্রসক্তমিতি নিরন্তরম্| আমস্য প্রদোষঃ আমপ্রদোষঃ||১৪-১৫||
Adhikarana 10 (16-17) · Śloka 17
বিট্স্বেদমূত্রাম্বুবহানি বাযুঃ স্রোতাংসি সংরুধ্য যদোর্ধ্বমেতি| উত্সন্নদোষস্য সমাচিতং তং দোষং সমুদ্ধূয নরস্য কোষ্ঠাত্||১৬|| বিণ্মূত্রযোস্তত্ সমবর্ণগন্ধং তৃট্শ্বাসহিক্কার্তিযুতং প্রসক্তম্| প্রচ্ছর্দযেদ্দুষ্টমিহাতিবেগাত্তযাঽর্দিতশ্চাশু বিনাশমেতি||১৭||
विट्स्वेदमूत्राम्बुवहानि वायुः स्रोतांसि संरुध्य यदोर्ध्वमेति| उत्सन्नदोषस्य समाचितं तं दोषं समुद्धूय नरस्य कोष्ठात्||१६|| विण्मूत्रयोस्तत् समवर्णगन्धं तृट्श्वासहिक्कार्तियुतं प्रसक्तम्| प्रच्छर्दयेद्दुष्टमिहातिवेगात्तयाऽर्दितश्चाशु विनाशमेति||१७||
🔊 Audio coming soon
বিট্স্বেদেত্যাদিনা উপদ্রবযুক্তাং ছর্দিমুপদ্রবাদসাধ্যামাহ| বিণ্মূত্রযোস্তত্সমগন্ধবর্ণং ছর্দযতীতি বাযুনা বিণ্মূত্রস্রোতসাং দূষিতত্বাজ্জ্ঞেযম্||১৬-১৭||
Adhikarana 11 (18) · Śloka 18
দ্বিষ্টপ্রতীপাশুচিপূত্যমেধ্যবীভত্সগন্ধাশনদর্শনৈশ্চ| যচ্ছর্দযেত্তপ্তমনা মনোধ্নৈর্দ্বিষ্টার্থসংযোগভবা মতা সা||১৮||
द्विष्टप्रतीपाशुचिपूत्यमेध्यबीभत्सगन्धाशनदर्शनैश्च| यच्छर्दयेत्तप्तमना मनोध्नैर्द्विष्टार्थसंयोगभवा मता सा||१८||
🔊 Audio coming soon
দ্বিষ্টেত্যাদিনা দ্বিষ্টার্থজামাহ| দ্বিষ্টাদযো গন্ধেনাশনেন দর্শনেন চ যথাযোগ্যতযা সম্বধ্যন্তে| অশনং ভক্ষণম্| দ্বিষ্টং প্রতিপুরুষাপ্রীতিজনকং, প্রতীপং বচাদি, কেচিত্ প্রতীপং বাতমাহুঃ, অশুচি উচ্ছিষ্টাদি, অমেধ্যং মলিনং, বীভত্সং জুগুপ্সিতম্| মনোঘ্নৈরিত্যনেন দ্বিষ্টাদীনাং মধ্যে যত্কিঞ্চিত্ অশুচ্যাদি যং পুরুষং প্রাপ্য মনোঘ্নং ন ভবতি তং প্রতি তচ্ছর্দিকারকং ন ভবতি, মনোঽনুপঘাতকত্বাদিতি সূচযতি||১৮||
Adhikarana 12 (19) · Śloka 19
ক্ষীণস্য যা ছর্দিরতিপ্রবৃদ্ধা সোপদ্রবা শোণিতপূযযুক্তা| সচন্দ্রিকাং তাং প্রবদন্ত্যসাধ্যাং সাধ্যাং চিকিত্সেদনুপদ্রবাং চ||১৯||
क्षीणस्य या छर्दिरतिप्रवृद्धा सोपद्रवा शोणितपूययुक्ता| सचन्द्रिकां तां प्रवदन्त्यसाध्यां साध्यां चिकित्सेदनुपद्रवां च||१९||
🔊 Audio coming soon
অসাধ্যলক্ষণযুক্তাং ছর্দিং পরিত্যাগার্থমাহ- ক্ষীণস্যেত্যাদি| অতিপ্রবৃদ্ধেতি সদাঽনুবদ্ধা| সোপদ্রবেত্যত্র বিট্স্বেদেত্যাদিনা রোগোপদ্রবা জ্ঞেযাঃ| সচন্দ্রিকামিতি ধাতুস্নেহমণ্ডলাকারযুক্তাম্ ||১৯||
Adhikarana 13 (20-22) · Śloka 22
আমাশযোত্ক্লেশভবা হি সর্বাশ্ছর্দ্যো মতা লঙ্ঘনমেব তস্মাত্| প্রাক্কারযেন্মারুতজাং বিমুচ্য সংশোধনং বা কফপিত্তহারি||২০|| চূর্ণানি লিহ্যান্মধুনাঽভযানাং হৃদ্যানি বা যানি বিরেচনানি| মদ্যৈঃ পযোভিশ্চ যুতানি যুক্ত্যা নযন্ত্যধো দোষমুদীর্ণমূর্ধ্বম্||২১|| বল্লীফলাদ্যৈর্বমনং পিবেদ্বা যো দুর্বলস্তং শমনৈশ্চিকিত্সেত্| রসৈর্মনোজ্ঞৈর্লঘুভির্বিশুষ্কৈর্ভক্ষ্যৈঃ সভোজ্যৈর্বিবিধৈশ্চ পানৈঃ||২২||
आमाशयोत्क्लेशभवा हि सर्वाश्छर्द्यो मता लङ्घनमेव तस्मात्| प्राक्कारयेन्मारुतजां विमुच्य संशोधनं वा कफपित्तहारि||२०|| चूर्णानि लिह्यान्मधुनाऽभयानां हृद्यानि वा यानि विरेचनानि| मद्यैः पयोभिश्च युतानि युक्त्या नयन्त्यधो दोषमुदीर्णमूर्ध्वम्||२१|| वल्लीफलाद्यैर्वमनं पिबेद्वा यो दुर्बलस्तं शमनैश्चिकित्सेत्| रसैर्मनोज्ञैर्लघुभिर्विशुष्कैर्भक्ष्यैः सभोज्यैर्विविधैश्च पानैः||२२||
🔊 Audio coming soon
আমাশযেত্যাদিনা সাধ্যানাং চিকিত্সামাহ| যস্মাদামাশযোত্ক্লেশাত্ সর্বাশ্ছর্দযো ভবন্তি, আমাশযোত্থে চ রোগে লঙ্ঘনাদি কফহরং ভেষজং যুক্তং, তস্মাল্লঙ্ঘনমেব কর্তব্যমিতি ভাবঃ| লঙ্ঘনমল্পদোষবিষযং, শোধনং চ বহুদোষবিষযমিতি ব্যবস্থা| সংশোধনশব্দেন চেহ বিরেচনবমনে অপি গৃহ্যেতে; অন্যে ত্বত্র সংশোধনশব্দেন প্রতিমার্গহরণতযা অত্যর্থহিতং বিরেচনমেব বর্ণযন্তি| সংশোধনযোগানাহ- চূর্ণানীত্যাদি| ফলাদ্যৈরিতি ফলানি জীমূতেক্ষ্বাকুপ্রভৃতীনি ফলমাত্রাসিদ্ধি (সি.অ.১১) পঠিতানি, তৈঃ| শমনৈরিতি দোষনিবর্হণং বিনা দোষসাম্যকরৈঃ; উক্তং হি পুষ্কলাবতে- “ন শোধযতি যদ্দোষান্ সমান্নোদীরযত্যপি| সমীকরোতি বিষমাংস্তত্ সংশমনমুচ্যতে” ইতি||২০-২২||
Adhikarana 14 (23-25) · Śloka 25
সুসংস্কৃতাস্তিত্তিরিবর্হিলাবরসা ব্যপোহন্ত্যনিলপ্রবৃত্তাম্| ছর্দিং তথা কোলকুলত্থধান্যবিল্বাদিমূলাম্লযবৈশ্চ যূষঃ||২৩|| বাতাত্মিকাযাং হৃদযদ্রবার্তো নরঃ পিবেত্ সৈন্ধববদ্ধৃতং তু| সিদ্ধং তথা ধান্যকনাগরাভ্যাং দধ্না চ তোযেন চ দাডিমস্য||২৪|| ব্যোষেণ যুক্তাং লবণৈস্ত্রিভিশ্চ ঘৃতস্য মাত্রামথবা বিদধ্যাত্| স্নিগ্ধানি হৃদ্যানি চ ভোজনানি রসৈঃ সযূষৈর্দধিদাডিমাম্লৈঃ||২৫||
सुसंस्कृतास्तित्तिरिबर्हिलावरसा व्यपोहन्त्यनिलप्रवृत्ताम्| छर्दिं तथा कोलकुलत्थधान्यबिल्वादिमूलाम्लयवैश्च यूषः||२३|| वातात्मिकायां हृदयद्रवार्तो नरः पिबेत् सैन्धववद्धृतं तु| सिद्धं तथा धान्यकनागराभ्यां दध्ना च तोयेन च दाडिमस्य||२४|| व्योषेण युक्तां लवणैस्त्रिभिश्च घृतस्य मात्रामथवा विदध्यात्| स्निग्धानि हृद्यानि च भोजनानि रसैः सयूषैर्दधिदाडिमाम्लैः||२५||
🔊 Audio coming soon
সুসংস্কৃতা ইত্যাদিনা বৈশেষিকী বাতজাচিকিত্সোচ্যতে| হৃদযদ্রব ইতি পরিশ্রান্তস্যেব হৃদযক্ষোভঃ| সৈন্ধববদিতি সৈন্ধবপ্রক্ষেপং; কেচিত্ সৈন্ধববত্ সিদ্ধমিতি যোজযন্তি| তোযেন চ দাডিমস্যেতি দাডিমরসেন| ব্যোষেণেত্যাদৌ ব্যোষাদীনাং পেযঘৃতমাত্রাযাং প্রক্ষেপ্যত্বম্||২৩-২৫||
Adhikarana 15 (26-33) · Śloka 33
পিত্তাত্মিকাযামনুলোমনার্থং দ্রাক্ষাবিদারীক্ষুরসৈস্ত্রিবৃত্ স্যাত্| কফাশযস্থং ত্বতিমাত্রবৃদ্ধং পিত্তং হরেত্ স্বাদুভিরূর্ধ্বমেব||২৬|| শুদ্ধায কালে মধুশর্করাভ্যাং লাজৈশ্চ মন্থং যদি বাঽপি পেযাম্| প্রদাপযেন্মুদ্গরসেন বাঽপি শাল্যোদনং জাঙ্গলজৈ রসৈর্বা||২৭|| সিতোপলামাক্ষিকপিপ্পলীভিঃ কুল্মাষলাজাযবসক্তুগৃঞ্জান্| খর্জূরমাংসান্যথ নারিকেলং দ্রাক্ষামথো বা বদরাণি লিহ্যাত্||২৮|| স্রোতোজলাজোত্পলকোলমজ্জচূর্ণানি লিহ্যান্মধুনাঽভযাং চ| কোলাস্থিমজ্জাঞ্জনমক্ষিকাবিড্লাজাসিতামাগধিকাকণান্ বা||২৯|| দ্রাক্ষারসং বাঽপি পিবেত্ সুশীতং মৃদ্ভৃষ্টলোষ্টপ্রভবং জলং বা| জম্ব্বাম্রযোঃ পল্লবজং কষাযং পিবেত্ সুশীতং মধুসংযুতং বা||৩০|| নিশি স্থিতং বারি সমুদ্গকৃষ্ণং সোশীরধান্যং চণকোদকং বা| গবেধুকামূলজলং গুডূচ্যা জলং পিবেদিক্ষুরসং পযো বা||৩১|| সেব্যং পিবেত্ কাঞ্চনগৈরিকং বা সবালকং তণ্ডুলধাবনেন| ধাত্রীরসেনোত্তমচন্দনং বা তৃষ্ণাবমিঘ্নানি সমাক্ষিকাণি||৩২|| কল্কং তথা চন্দনচব্যমাংসীদ্রাক্ষোত্তমাবালকগৈরিকাণাম্| শীতাম্বুনা গৈরিকশালিচূর্ণং মূর্বাং তথা তণ্ডুলধাবনেন||৩৩||
पित्तात्मिकायामनुलोमनार्थं द्राक्षाविदारीक्षुरसैस्त्रिवृत् स्यात्| कफाशयस्थं त्वतिमात्रवृद्धं पित्तं हरेत् स्वादुभिरूर्ध्वमेव||२६|| शुद्धाय काले मधुशर्कराभ्यां लाजैश्च मन्थं यदि वाऽपि पेयाम्| प्रदापयेन्मुद्गरसेन वाऽपि शाल्योदनं जाङ्गलजै रसैर्वा||२७|| सितोपलामाक्षिकपिप्पलीभिः कुल्माषलाजायवसक्तुगृञ्जान्| खर्जूरमांसान्यथ नारिकेलं द्राक्षामथो वा बदराणि लिह्यात्||२८|| स्रोतोजलाजोत्पलकोलमज्जचूर्णानि लिह्यान्मधुनाऽभयां च| कोलास्थिमज्जाञ्जनमक्षिकाविड्लाजासितामागधिकाकणान् वा||२९|| द्राक्षारसं वाऽपि पिबेत् सुशीतं मृद्भृष्टलोष्टप्रभवं जलं वा| जम्ब्वाम्रयोः पल्लवजं कषायं पिबेत् सुशीतं मधुसंयुतं वा||३०|| निशि स्थितं वारि समुद्गकृष्णं सोशीरधान्यं चणकोदकं वा| गवेधुकामूलजलं गुडूच्या जलं पिबेदिक्षुरसं पयो वा||३१|| सेव्यं पिबेत् काञ्चनगैरिकं वा सबालकं तण्डुलधावनेन| धात्रीरसेनोत्तमचन्दनं वा तृष्णावमिघ्नानि समाक्षिकाणि||३२|| कल्कं तथा चन्दनचव्यमांसीद्राक्षोत्तमाबालकगैरिकाणाम्| शीताम्बुना गैरिकशालिचूर्णं मूर्वां तथा तण्डुलधावनेन||३३||
🔊 Audio coming soon
কফাশযস্থমিতি কফস্থানমামাশযোর্ধ্বভাগো বক্ষঃ, তত্স্থম্| হরেদূর্ধ্বমেবেতি বমনেনৈব হরেত্| যদি বাঽপি পেযামিতি মন্দাগ্নিং প্রত্ত পেযা জ্ঞেযা| কুল্মাষা উত্সিন্নযবপিষ্টকৃতা ভক্ষ্যাঃ; পারিযাত্রাস্তু মুদ্গান্মসূরানুত্স্বিন্নমৃদিতান্ কুল্মাষানাহুঃ| গৃঞ্জঃ সমণ্ডো যবৌদনঃ| খর্জূরমাংসানীতি খর্জূরফলসস্যানি | খর্জূরেত্যাদৌ লিহ্যাদিত্যত্র ‘সিতোপলামাক্ষিকপিপ্পলীভিঃ’ ইত্যনুবর্তনীযম্| স্রোতোজ স্রোতোঞ্জনম্| কোলমজ্জা কোলাভ্যন্তরম্| অভযাং বেত্যত্রাপি ‘মধুনা লিহ্যাত্’ ইতি সম্বধ্যতে| কোলাস্থীত্যাদাবপি ‘মধুনা লিহ্যাত্’ ইত্যনুবর্ততে| মৃদ্ভৃষ্টলোষ্টপ্রভবং জলং বেতি মৃন্মযলোষ্টনির্বাপণভবং জলমিত্যর্থঃ| সমুদ্গকৃষ্ণং পিপ্পলীমুদ্গসহিতম্| নিশি স্থিতমিত্যাদৌ সোষীরধান্যমিতি দ্বিতীযঃ, চণকোদকং বেতি তৃতীযো যোগঃ| তথা গবেধুকাদিযোগদ্বযেঽপি শীতকষাযবিধির্জ্ঞেযঃ| কাঞ্চনগৈরিকমিতি গৈরিকং দাক্ষিণাত্যপ্রসিদ্ধং কাঞ্চনবর্ণম্| সবালকং তণ্ডুলধাবনেনেতি বিধানং ‘সেব্যং পিবেত্’ ইত্যনেন তথা ‘কাঞ্চনগৈরিকং বা’ ইত্যনেন চ দ্বিতীযযোগেন সম্বধ্যতে| দ্রাক্ষোত্তমা গোস্তনী দ্রাক্ষেত্যর্থঃ| উত্তমচন্দনং ধবলচন্দনম্||২৬-৩৩||
Adhikarana 16 (34-39) · Śloka 39
কফাত্মিকাযাং বমনং প্রশস্তং সপিপ্পলীসর্ষপনিম্বতোযৈঃ| পিণ্ডীতকৈঃ সৈন্ধবসম্প্রযুক্তৈর্বম্যাং কফামাশযশোধনার্থম্||৩৪|| গোধূমশালীন্ সযবান্ পুরাণান্ যূষৈঃ পটোলামৃতচিত্রকাণাম্| ব্যোষস্য নিম্বস্য চ তক্রসিদ্ধৈর্যূষৈঃ ফলাম্লৈঃ কটুভিস্তথাঽদ্যাত্||৩৫|| রসাংশ্চ শূল্যানি চ জাঙ্গলানাং মাংসানি জীর্ণান্মধুসীধ্বরিষ্টান্| রাগাংস্তথা ষাডবপানকানি দ্রাক্ষাকপিত্থৈঃ ফলপূরকৈশ্চ||৩৬|| মুদ্গান্মসূরাংশ্চণকান্ কলাযান্ ভৃষ্টান্ যুতান্নাগরমাক্ষিকাভ্যাম্| লিহ্যাত্তথৈব ত্রিফলাবিডঙ্গচূর্ণং বিডঙ্গপ্লবযোরথো বা||৩৭|| সজাম্ববং বা বদরাম্লচূর্ণং মুস্তাযুতাং কর্কটকস্য শৃঙ্গীম্| দুরালভাং বা মধুসম্প্রযুক্তাং লিহ্যাত্ কফচ্ছর্দিবিনিগ্রহার্থম্||৩৮|| মনঃশিলাযাঃ ফলপূরকস্য রসৈঃ কপিত্থস্য চ পিপ্পলীনাম্| ক্ষৌদ্রেণ চূর্ণং মরিচৈশ্চ যুক্তং লিহঞ্জযেচ্ছর্দিমুদীর্ণবেগাম্||৩৯||
कफात्मिकायां वमनं प्रशस्तं सपिप्पलीसर्षपनिम्बतोयैः| पिण्डीतकैः सैन्धवसम्प्रयुक्तैर्वम्यां कफामाशयशोधनार्थम्||३४|| गोधूमशालीन् सयवान् पुराणान् यूषैः पटोलामृतचित्रकाणाम्| व्योषस्य निम्बस्य च तक्रसिद्धैर्यूषैः फलाम्लैः कटुभिस्तथाऽद्यात्||३५|| रसांश्च शूल्यानि च जाङ्गलानां मांसानि जीर्णान्मधुसीध्वरिष्टान्| रागांस्तथा षाडवपानकानि द्राक्षाकपित्थैः फलपूरकैश्च||३६|| मुद्गान्मसूरांश्चणकान् कलायान् भृष्टान् युतान्नागरमाक्षिकाभ्याम्| लिह्यात्तथैव त्रिफलाविडङ्गचूर्णं विडङ्गप्लवयोरथो वा||३७|| सजाम्बवं वा बदराम्लचूर्णं मुस्तायुतां कर्कटकस्य शृङ्गीम्| दुरालभां वा मधुसम्प्रयुक्तां लिह्यात् कफच्छर्दिविनिग्रहार्थम्||३८|| मनःशिलायाः फलपूरकस्य रसैः कपित्थस्य च पिप्पलीनाम्| क्षौद्रेण चूर्णं मरिचैश्च युक्तं लिहञ्जयेच्छर्दिमुदीर्णवेगाम्||३९||
🔊 Audio coming soon
সমাক্ষিকাণীতি পশ্চাদুক্তযোগত্রযদ্রব্যাণি সমাক্ষিকাণি কর্তব্যানি| পিণ্ডীতকৈরিতি মদনৈঃ| কফস্যামাশযস্য চ শোধনার্থং কফামাশযশোধনার্থম্| যদ্যপি গোধূমযবৌ মধুরত্বযোগাত্ কফকরৌ, তথাঽপি পুরাণতযা ন কফকরাবিতি কৃত্বা কফচ্ছর্দ্যাং বিহিতৌ| উক্তং হি- “প্রাযঃ শ্লেষ্মলং মধুরমন্যত্র মধুনঃ পুরাণাচ্চ শালিযবগোধূমাত্” (সূ.অ.২৭) ইতি| রাগাঃ কপিত্থাদিদ্রব্যকৃতাঃ| মনঃশিলাযাশ্চূর্ণং মরিচৈশ্চ যুক্তং ক্ষৌদ্রেণ যুতং ফলপূরকরসৈর্লিহন্, তথা কপিত্থস্য রসৈঃ পিপ্পলীনাং চূর্ণং মরিচৈশ্চ যুক্তং ক্ষৌদ্রেণ যুতং লিহন্নিতি যোজ্যম্||৩৪-৩৯||
Adhikarana 17 (40) · Śloka 40
যৈষা পৃথক্ত্বেন মযা ক্রিযোক্তা তাং সন্নিপাতেঽপি সমস্য বুদ্ধ্যা| দোষর্তুরোগাগ্নিবলান্যবেক্ষ্য প্রযোজযেচ্ছাস্ত্রবিদপ্রমত্তঃ||৪০||
यैषा पृथक्त्वेन मया क्रियोक्ता तां सन्निपातेऽपि समस्य बुद्ध्या| दोषर्तुरोगाग्निबलान्यवेक्ष्य प्रयोजयेच्छास्त्रविदप्रमत्तः||४०||
🔊 Audio coming soon
যৈষেত্যাদিনা সান্নিপাতিক্যাশ্চিকিত্সোধ্যতে| সমস্যেতি একীকৃত্য| দোষর্তুরোগাগ্নিবলান্যবেক্ষ্যেতি দোষাদীনাং বলং বীক্ষ্য যদ্বলবত্ তত্প্রধানা চিকিত্সা কর্তব্যা| রোগঃ ছর্দিরেব||৪০||
Adhikarana 18 (41-44) · Śloka 44
মনোভিঘাতে তু মনোনুকূলা বাচঃ সমাশ্বাসনহর্ষণানি| লোকপ্রসিদ্ধাঃ শ্রুতযো বযস্যাঃ শৃঙ্গারিকাশ্চৈব হিতা বিহারাঃ||৪১|| গন্ধা বিচিত্রা মনসোঽনুকূলা মৃত্পুষ্পশুক্তাম্লফলাদিকানাম্| শাকানি ভোজ্যান্যথ পানকানি সুসংস্কৃতাঃ ষাডবরাগলেহাঃ||৪২|| যূষা রসাঃ কাম্বলিকা খডাশ্চ মাংসানি ধানা বিবিধাশ্চ ভক্ষ্যাঃ| ফলানি মূলানি চ গন্ধবর্ণরসৈরুপেতানি বমিং জযন্তি||৪৩|| গন্ধং রসং স্পর্শমথাপি শব্দং রূপং চ যদ্যত্ প্রিযমপ্যসাত্ম্যম্| তদেব দদ্যাত্ প্রশমায তস্যাস্তজ্জো হি রোগঃ সুখ এব জেতুম্||৪৪||
मनोभिघाते तु मनोनुकूला वाचः समाश्वासनहर्षणानि| लोकप्रसिद्धाः श्रुतयो वयस्याः शृङ्गारिकाश्चैव हिता विहाराः||४१|| गन्धा विचित्रा मनसोऽनुकूला मृत्पुष्पशुक्ताम्लफलादिकानाम्| शाकानि भोज्यान्यथ पानकानि सुसंस्कृताः षाडवरागलेहाः||४२|| यूषा रसाः काम्बलिका खडाश्च मांसानि धाना विविधाश्च भक्ष्याः| फलानि मूलानि च गन्धवर्णरसैरुपेतानि वमिं जयन्ति||४३|| गन्धं रसं स्पर्शमथापि शब्दं रूपं च यद्यत् प्रियमप्यसात्म्यम्| तदेव दद्यात् प्रशमाय तस्यास्तज्जो हि रोगः सुख एव जेतुम्||४४||
🔊 Audio coming soon
মনোভিধাতে ইতি মনোবিঘাতজচ্ছর্দ্যাম্| লোকপ্রসিদ্ধাঃ শ্রুতয ইতি লৌকিকার্থানুগতা আখ্যাযিকেতিহাসাঃ| বিহারাঃ ক্রীডাঃ| লেহা ইতি ব্যঞ্জনরূপা লেহাঃ| রাগাদীনাং লক্ষণমসকৃদুক্তম্| গন্ধবর্ণরসৈরুপেতানীতি প্রশস্তগন্ধাদিযুতানি| গন্ধমিত্যাদিনা আত্যযিকচ্ছর্দিপ্রশমার্থমসাত্ম্যদানমপ্যভিধত্তে| প্রশমে হি তস্যা ইতি গন্ধাদীনাং প্রিযাণামুপযোগেন ছর্দ্যাঃ প্রশমে সতি, তজ্জো হি রোগ ইতি গন্ধাদীনামসাত্ম্যজনিতরোগো জেতুং সুখ এব সুখোপায এব ভবতি, মূলব্যাধের্মহাত্যযস্য জিতত্বাদিত্যভিপ্রাযঃ| ‘সুখমেব জেতুম্’ ইতি পাঠে সুখং যথা ভবতি তথা জেতুং ‘পার্যতে’ ইতি শেষঃ||৪১-৪৪||
Adhikarana 19 (45) · Śloka 45
ছর্দ্যুত্থিতানাং চ চিকিত্সিতাত্ স্বাচ্চিকিত্সিতং কার্যমুপদ্রবাণাম্| অতিপ্রবৃত্তাসু বিরেচনস্য কর্মাতিযোগে বিহিতং বিধেযম্||৪৫||
छर्द्युत्थितानां च चिकित्सितात् स्वाच्चिकित्सितं कार्यमुपद्रवाणाम्| अतिप्रवृत्तासु विरेचनस्य कर्मातियोगे विहितं विधेयम्||४५||
🔊 Audio coming soon
অতিপ্রবৃত্তাস্বিত্যাদি| অতিপ্রবৃত্তাসু ছর্দিষু বিরেচনস্যাতিযোগে যত্কর্ম বিহিতং সংশোধনব্যাপত্তিসিদ্ধৌ (সি.অ.৬) তদিহ বিধেযমিত্যর্থঃ||৪৫||
Adhikarana 20 (46-47) · Śloka 47
বমিপ্রসঙ্গাত্ পবনোঽপ্যবশ্যং ধাতুক্ষযাদ্ধৃদ্ধিমুপৈতি তস্মাত্| চিরপ্রবৃত্তাস্বনিলাপহানি কার্যাণ্যুপস্তম্ভনবৃংহণানি||৪৬|| সর্পির্গুডাঃ ক্ষীরবিধির্ঘৃতানি কল্যাণকত্র্যূষণজীবনানি| বৃষ্যাস্তথা মাংসরসাঃ সলেহাশ্চিরপ্রসক্তাং চ বমিং জযন্তি||৪৭||
वमिप्रसङ्गात् पवनोऽप्यवश्यं धातुक्षयाद्धृद्धिमुपैति तस्मात्| चिरप्रवृत्तास्वनिलापहानि कार्याण्युपस्तम्भनबृंहणानि||४६|| सर्पिर्गुडाः क्षीरविधिर्घृतानि कल्याणकत्र्यूषणजीवनानि| वृष्यास्तथा मांसरसाः सलेहाश्चिरप्रसक्तां च वमिं जयन्ति||४७||
🔊 Audio coming soon
বমিপ্রসঙ্গাত্ ছর্দ্যনুবন্ধাত্ পবনস্য বৃদ্ধির্ভবতি; তত্রোপস্তম্ভনং ছর্দীনাং পবনস্য বা, বৃংহণং ধাতূনাম্| লেহাঃ চ্যবনপ্রাশাদযঃ||৪৬-৪৭||
Adhikarana 21 (48) · Śloka 48
তত্র শ্লোকঃ- হেতুং সঙ্খ্যাং লক্ষণমুপদ্রবান্ সাধ্যতাং ন যোগাংশ্চ| ছর্দীনাং প্রশমার্থং প্রাহ চিকিত্সিতং মুনিবর্যঃ||৪৮||
तत्र श्लोकः- हेतुं सङ्ख्यां लक्षणमुपद्रवान् साध्यतां न योगांश्च| छर्दीनां प्रशमार्थं प्राह चिकित्सितं मुनिवर्यः||४८||
🔊 Audio coming soon
হেতুমিত্যাদিনা সঙ্গ্রহঃ| উপদ্রবানিতি বিট্স্বেদেত্যাদিনোক্তানুপদ্রবান্| মুনিবর্য ইতি মুনিশ্রেষ্ঠঃ||৪৮||
Adhikarana puShpikA · Śloka 20
ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে চিকিত্সাস্থানে ছর্দিচিকিত্সিতং নাম বিংশোঽধ্যাযঃ||২০||
इत्यग्निवेशकृते तन्त्रे चरकप्रतिसंस्कृतेऽप्राप्ते दृढबलसम्पूरिते चिकित्सास्थाने छर्दिचिकित्सितं नाम विंशोऽध्यायः||२०||
🔊 Audio coming soon
ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং চিকিত্সাস্থানে ছর্দিচিকিত্সিতং নাম বিংশোঽধ্যাযঃ||২০||