21. grahaṇīdōṣacikitsitam

Adhikarana 1 (1-2) · Śloka 2

অথাতো গ্রহণীদোষচিকিত্সিতং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

অর্শঃকার্যত্বাদ্গ্রহণীদোষস্য অর্শশ্চিকিত্সিতমনু গ্রহণীচিকিত্সিতং ব্রূতে| গ্রহণীমাশ্রিতোঽগ্নিদোষো গ্রহণীদোষঃ, এবং চাশ্রযাশ্রযিণোরভেদোপচারাদ্ গ্রহণীদোষশব্দেন গ্রহণ্যাশ্রিতোঽগ্নিদোষোঽপি গৃহ্যতে||১-২||

Adhikarana 2 (3-4) · Śloka 4

আযুর্বর্ণো বলং স্বাস্থ্যমুত্সাহোপচযৌ প্রভা| ওজস্তেজোঽগ্নযঃ প্রাণাশ্চোক্তা দেহাগ্নিহেতুকাঃ||৩|| শান্তেঽগ্নৌ ম্রিযতে, যুক্তে চিরং জীবত্যনামযঃ| রোগী স্যাদ্বিকৃতে, মূলমগ্নিস্তস্মান্নিরুচ্যতে||৪||

তত্র গ্রহণীদোষনির্দিষ্টাগ্নিদোষে বক্তব্যে প্রকৃতিজ্ঞানানন্তরত্বাদ্বিকৃতিজ্ঞানস্য প্রথমং তাবদবিকৃতস্যাগ্নে রূপমাহ- আযুরিত্যাদি| আযুঃ চেতনানুবৃত্তিঃ| বর্ণঃ গৌরাদিঃ| বলং শক্তিঃ ব্যাযামাদ্যনুমেযা| স্বাস্থ্যশব্দেনৈব বর্ণাদিগ্রহণং যদ্যপি লভ্যতে, তথাঽপি “স্বস্থস্যৌজস্করং যত্তু তদ্বৃষ্যং তদ্রসাযনম্” (চি.অ.১,পা.১) ইতি ; তেন বর্ণাদীনামবিকারত্বং নাবশ্যং স্বস্থে ভবতীতি বর্ণাদীনাং পৃথগুপাদানং কৃতম্| উত্সাহঃ দুষ্করেষ্বপি কার্যেষ্বধ্যবসাযঃ, উপচযঃ দেহপুষ্টিঃ| ওজঃ হৃদযস্থং সর্বধাতুসাররূপম্| তেজঃ দেহোষ্মা শুক্রং বা; যদুক্তং শালাক্যে- “দৃষ্টিস্তেজোমযী প্রোক্তা শুক্রং তেজশ্চ কেবলম্| তস্মাদ্দৃষ্টিবলাপেক্ষী তেজোবৃদ্ধিং সমাচরেত্” ইতি| অগ্নয ইতি ভূতাগ্নযঃ পঞ্চ, ধাত্বগ্নযঃ সপ্ত, ইতি দ্বাদশাগ্নযঃ| প্রাণা ইতি প্রাণাপানোপলক্ষিতাঃ পঞ্চাপি বাযবঃ; কিংবা প্রাণবাযুরেব ‘প্রাণাঃ’ ইতি শব্দেন নিত্যং বহুবচনান্তেনোচ্যতে; যথা- অপ্সরস্শব্দেন একাঽপি বিদ্যাধরী কীর্ত্যতে| দেহাগ্নিহেতুকা ইতি দেহপোষকপ্রধানজাঠরাগ্নিকারণকাঃ| শান্তে ইত্যুত্সন্নে| যুক্তে ইতি সমে| বিকৃতে ইতি মন্দে বিষমে তীক্ষ্ণে বা| মূলমগ্নিস্তস্মাদিতি তস্মাত্ প্রাশস্ত্যাদন্বযব্যতিরেকবিধানাদাযুর্বর্ণাদীনামগ্নির্মূলং প্রধানং কারণমিত্যর্থঃ| নিরুচ্যতে ইতি নিশ্চযেনোচ্যতে||৩-৪||

Adhikarana 3 (5) · Śloka 5

যদন্নং দেহধাত্বোজোবলবর্ণাদিপোষকম্| তত্রাগ্নির্হেতুরাহারান্ন হ্যপক্বাদ্রসাদযঃ||৫||

সামান্যকারণমুক্ত্বা, অগ্নেঃ সাক্ষাত্কারণত্বং ব্যুত্পাদযন্নাহ- যদন্নমিত্যাদি| বাহ্যা অপি গৈরিকাদযো ধাতুশব্দেনোচ্যন্তে ইতি তদ্ব্যবচ্ছেদার্থং ধাতোর্দেহবিশেষণম্| অথাহোরাত্রজন্যেষু দেহধাত্বাদিষু কথমগ্নেঃ কারণত্বমিত্যাহ- আহারাদিতি- এতেনাহারমপ্যপেক্ষ্যৈব রসাদীঞ্জনযতি| আদিগ্রহণেন রক্তাদীনি সঙ্গৃহ্যন্তে||৫||

Adhikarana 4 (6-8) · Śloka 8

অন্নমাদানকর্মা তু প্রাণঃ কোষ্ঠং প্রকর্ষতি| তদ্দ্রবৈর্ভিন্নসঙ্ঘাতং স্নেহেন মৃদুতাং গতম্||৬|| সমানেনাবধূতোঽগ্নিরুদর্যঃ পবনোদ্বহঃ| কালে ভুক্তং সমং সম্যক্ পচত্যাযুর্বিবৃদ্ধযে||৭|| এবং রসমলাযান্নমাশযস্থমধঃ স্থিতঃ| পচত্যগ্নির্যথা স্থাল্যামোদনাযাম্বুতণ্ডুলম্||৮||

সম্প্রতি সম্প্রাপ্তস্যান্নস্যাগ্নিনা যথা পাকো ভবতি, যথা চ পচ্যমানমন্নং দেহধাত্বাদিরূপতামাপদ্যতে, তদাহ- অন্নমিত্যাদি| মুখপ্রবেশাদারভ্যান্নস্য ব্যাপার ইহোচ্যতে| আদানমাহারপ্রণযনং কর্ম যস্য স তথা, প্রকর্ষতীতি নযতি| দ্রবৈরিতি পানীযাদিভিঃ | ভিন্নসঙ্ঘাতমিতি অবযবশৈথিল্যমাপন্নম্| কালে ইতি বুভুক্ষাকালে| ভুক্তং সমমিতি মাত্রাপ্রকৃত্যাদিসমম্| সমানেনাবধূত ইতি অগ্নিপার্শ্বস্থিতেন সমানেন সন্ধুক্ষিতঃ, অযং চ সমানঃ প্রাকৃতত্বাদ্ বাহ্যো বাযুরিব অগ্নেঃ সন্ধুক্ষণো ভবতি ন বৈষম্যকরঃ, বিকৃতস্তু বৈষম্যং করোতি; তেন বাতেন বিষমোঽগ্নির্ভবতীতি চোপপন্নং ভবতি| এতে চ দ্রবাদযঃ পাচকস্যাগ্নেঃ সহাযা ভবন্তীত্যনেন গ্রন্থেনোচ্যতে; “আহারপরিণামকরাস্ত্বিমে ভাবা ভবন্তি; তদ্যথা- ঊষ্মা, বাযুঃ, ক্লেদঃ, স্নেহঃ, কালঃ, সমযোগশ্চ” (শা.অ.৬) ইতি| উদর্যঃ পাচক ইত্যর্থঃ| ‘পবনোদ্বহ’ ইত্যগ্নিবিশেষণং কেচিত্ পঠন্তি| সম্যগিতি ভুক্তবিশেষণং কেচিত্ পঠন্তি; তদা সম্যগিত্যনেন মাত্রাসাম্যমুচ্যতে| সম্যগ্গ্রহণেন তু প্রকৃত্যাদিসম্পদুচ্যতে| আযুর্বিবৃদ্ধযে ইতি শরীরেন্দ্রিযসত্ত্বাত্মসংযোগানুবর্তনায তদ্বিবৃদ্ধযে চ| রসমলাযেতি তাদর্থ্যে চতুর্থী| আশযস্থমিতি আমাশযস্থম্| অধঃস্থিত ইত্যনেন অগ্নেরূর্ধ্বজ্বলনস্বভাবতযা ঊর্ধ্বস্থান্নপাকে সামর্থ্যং সূচযতি| অত্রার্থে যথেত্যাদিনা দৃষ্টান্তমাহ||৬-৮||

Adhikarana 5 (9-11) · Śloka 11

অন্নস্য ভুক্তমাত্রস্য ষড্রসস্য প্রপাকতঃ| মধুরাদ্যাত্ কফো ভাবাত্ ফেনভূত উদীর্যতে||৯|| পরং তু পচ্যমানস্য বিদগ্ধস্যাম্লভাবতঃ| আশযাচ্চ্যবমানস্য পিত্তমচ্ছমুদীর্যতে||১০|| পক্বাশযং তু প্রাপ্তস্য শোষ্যমাণস্য বহ্নিনা| পরিপিণ্ডিতপক্বস্য বাযুঃ স্যাত্ কটুভাবতঃ||১১||

এবং স্থূলপাকক্রমমভিধায, অবান্তরমণুপাকক্রমমাহ- অন্নস্যেত্যাদি| ভুক্তমাত্রস্যেতি ভুক্তানন্তরমেব| ষড্রসস্যেতি প্রাশস্ত্যেনাভিধানং, কিংবা ষড্রসস্যাপি প্রথমং মধুরতা নিরুক্তা ভবতীতি দর্শযতি| প্রপাকত ইতি প্রথমপাকতঃ; প্রশব্দ আদিকর্মণি| মধুরশ্চাসৌ আদ্যশ্চেতি মধুরাদ্যঃ; কিংবা ‘মধুরাত্ প্রাক্ কফো ভাবাত্’ ইতি পাঠঃ| ফেনভূত ইতি ফেনসদৃশোঽঘন ইত্যর্থঃ| পরমিতি আদ্যমধুরপাকানন্তরম্| বিদগ্ধস্যেতি পক্বাপক্বস্য| অম্লভাবা ইতি জাতাম্লস্বরূপতঃ| আশযাত্ আমাশযাত্| চ্যবমানস্য অধোভাগং বাযুনা নীযমানস্য, অনেন চ পিত্তস্থানসম্বন্ধং বিদগ্ধাহারস্য দর্শযতি| অচ্ছমিতি অঘনম্| উদীর্যতে ইতি পিত্তমুত্পদ্যতে; অম্লং চ পিত্তমম্লভাবাদাহারস্য উত্পদ্যত ইতি যুক্তমেব| পক্বাশযং তু প্রাপ্তস্যেতি মলরূপতযা পক্বাশযং গতস্য| শোষ্যমাণস্য বহ্নিনেতি যদ্যপ্যূর্ধ্বদাহক্ষমো বহ্নিঃ, তথাঽপ্যস্যাধোগতস্য বহ্নিনা শোষ্যমাণত্বং পক্বাশযগতস্যাপ্যুপপন্নম্| যতশ্চাধোগমনে সম্যগ্বহ্নিব্যাপারো নাস্তি, অতঃ ‘পচ্যমানস্য’ ইতি পদং পরিত্যজ্য ‘শোষ্যমাণস্য’ ইতি কৃতম্| পরিপিণ্ডিতপক্বস্যেতি পরিপিণ্ডিতরূপতযা মলরূপতযা পক্বস্য| বাযুঃ স্যাত্ কটুভাবত ইতি পরিপিণ্ডিতাবস্থোদ্ভূতকটুতা বাযোরুত্পদ্যতে| এবমীদৃশঃ ষড্রসাহারস্যাবস্থাপাকো ভবতি| ননু যদ্যত্রাবস্থাপাকবশাত্ ষণ্ণামেব রসানাং কফাদিকর্তৃত্বমুচ্যতে, তদা “কটুতিক্তকষাযাণাং বিপাকঃ প্রাযশঃ কটুঃ” (সূ.অ.২৬) ইত্যাদিনা যো বিপাক উচ্যতে স বিরুধ্যতে, অবস্থাপাকেনৈব বাধিতত্বাত্; মৈবং, নহ্যবস্থাপাকোঽযং রসস্বভাবং নিষ্ঠাপাকং বাধতে, কিন্ত্ববস্থাযাং স্বকার্যং করোতি; তেন রসাদযোঽপি স্বকার্যং কুর্বন্তি, অবস্থাপাকোঽপি স্বকীযং কার্যং করোতি; যথা- মধুরতিক্তাদিষড্রসেঽন্নে উপযুক্তে মধুরোঽপি স্বকার্যং করোতি, তিক্তাদযশ্চ স্বকার্যং কুর্বন্তি; অযং তু বিশেষঃ- যন্মধুরাখ্যস্যাবস্থাপাকস্য মধুরাদযঃ শ্লেষ্মজনকা রসা অনুগুণা ভবন্তি তদা স বহুশ্লেষ্মাণং জনযতি, যদা ত্ববস্থাপাকো বিপরীতকটুকাদিপরিগৃহীতো ভবতি তদা স্তোকমাত্রং কফং জনযতি; এবং পিত্তজনকেঽবস্থাপাকেঽপি বাচ্যম্| “কটুতিক্তকষাযাণাং” (সূ.অ.২৬) ইত্যাদিনোক্তস্ত্রিধা বিপাকস্তু রসমলবিবেকসমকালো ভিন্নকাল এবাবস্থাপাকৈঃ সমমিতি ন বিরোধঃ| স চ ভিন্নকালোঽপ্যবস্থাপাককার্যদোষানুগুণতযাঽননুগুণতযা বা অবস্থাপাকাহিতদোষাণাং বর্ধনং ক্ষপণং বা করোতীতি তস্যাভিধানং শাস্ত্রে প্রযোজনবদেব| যদ্যপি সর্বমন্নমবস্থাযাং বিদহ্যতে, তথাঽপি যেঽত্যর্থং বিদাহিনস্ত এব ‘বিদাহিনঃ’ ইত্যুচ্যন্তে, বিশেষবিদাহকর্তৃত্বাত্| অন্যে ত্বাহুঃ- ন ষড্রসাদপ্যন্নাত্ সামান্যেনাবস্থাপাকে কফাদ্যুত্পত্তিঃ, কিন্তু ষড্রসাদপ্যন্নাত্ প্রথমে পাকে মধুরোঽযমুদ্ভূতো রসঃ স কফং জনযতি, তথা পিত্তং বিদাহাবস্থাযামুদ্ভূতাদম্লরসাদুত্পদ্যতে, এবং বাযুরপি আহারকটুতাবস্থাযাং ভবতীতি| অন্যে ত্বাহুঃ- যত্- নান্নস্যাগ্নিসংযোগান্মধুরাদ্যাবস্থিকং ভবতি, কিন্তু কফাদিস্থানেষু মনুষ্যাণাং স্বভাবাদেব মধুরাদযো রসাস্তিষ্ঠন্তি, তে চান্নং স্বস্বভাবং নীত্বা কফাদীঞ্জনযন্তি| উক্তং হি তন্ত্রান্তরে- “মধুরো হৃদযাদূর্ধ্বং রসঃ কোষ্ঠে ব্যবস্থিতঃ| ততঃ সংবর্ধতে শ্লেষ্মা শরীরবলবর্ধনঃ|| নাভীহৃদযমধ্যে চ রসস্ত্বম্লো ব্যবস্থিতঃ| স্বভাবেন মনুষ্যাণাং ততঃ পিত্তং বিবর্ধতে|| অধো নাভ্যাস্তু খল্বেকঃ কটুকোঽবস্থিতো রসঃ| প্রাযঃ শ্রেষ্ঠতমস্তত্র প্রাণিনাং বর্ধতেঽনিলঃ|| তস্মাদ্বিপাকস্ত্রিবিধো রসানাং নাত্র সংশযঃ” ইতি| ইহ তু তত্রেত্যাদিগ্রন্থার্থালোচনযা যথোক্ত এব গ্রন্থার্থো ন্যায্যঃ| তন্ত্রান্তরে তু শ্লেষ্মপিত্তগতমধুরাম্লরসৌ বর্ণযন্তি, তে কফাদ্যধিগতা রসা অস্মাকমপি পাকসহকারিতযা অনুমতা এব| যত্তু শ্লেষ্মজনকাংশস্যৈবাবস্থাপাকে শ্লেষ্মকর্তৃত্বমিত্যুক্তং, তদনুমতমেব; এবং যঃ শ্লেষ্মজনকোংঽশ আহারগতঃ স স্থানমহিম্না তদাহারস্য মধুরতামাপাদ্য শ্লেষ্মাণং বিশেষেণ জনযতীতি ব্রূমঃ| যত্তু, অনেনাবস্থাপাকেন কফপিত্তযোরীরণমাত্রং ক্রিযতে নতু বৃদ্ধিঃ, বৃদ্ধিঃ নিষ্ঠাপাকে এব ভবতীতি বদন্তি, তদুপপত্তিশূন্যং ভাতি; কিঞ্চ, অবস্থাপাকাত্ কফপিত্তযোর্বৃদ্ধিঃ, তথা নিষ্ঠাপাকাচ্চ মলরূপতযা উত্পাদ ইতি যুক্তং পশ্যামঃ||৯-১১||

Adhikarana 6 (12) · Śloka 12

অন্নমিষ্টং হ্যুপহিতমিষ্টৈর্গন্ধাদিভিঃ পৃথক্| দেহে প্রীণাতি গন্ধাদীন্ ঘ্রাণাদীনীন্দ্রিযাণি চ||১২||

কর্মান্তরেণাপ্যন্নস্য পাকঃ সম্পদ্যতে, তমাহ- অন্নমিত্যাদি| অন্নমিষ্টং হ্যুপহিতমিতি হিশব্দোঽবধারণে; ইষ্টশব্দেনেহ প্রিযং হিতং চোচ্যতে ন প্রিযমাত্রম্, অহিতস্য প্রিযমাত্রস্য ন দেহব্যবস্থিতিঃ গন্ধাদিতর্পকত্বং চ ভবতি; উপহিতমিতি উপযুক্তম্| ইষ্টৈরিতি প্রিযহিতৈঃ গন্ধরসরূপস্পর্শশব্দৈঃ| অত্র যদ্যপি হিতত্বমেব গন্ধাদীনামাহারগতানাং দেহগতগন্ধাদিপোষণে প্রধানং, তথাঽপি প্রিযত্বমপ্যাহারগতগন্ধাদীনাং তদাত্বোপকারকতযা গ্রহীতুং প্রিযত্বহিতত্বযোর্দ্বযোরপ্যুপাদানং কৃতম্| দেহে প্রীণাতি গন্ধাদীনিতি দেহশ্রিতান্ গন্ধাদীন্ পোষযতি| তথা ঘ্রাণাদীনি চ ঘ্রাণদর্শনরসনস্পর্শনশ্রোত্রাণি ইষ্টৈর্গন্ধাদিভিঃ প্রীণাতি তর্পযতি, পোষযতীতি যাবত্| ইন্দ্রিযাণ্যপি হি পাঞ্চভৌতিকান্যস্মদ্দর্শনে; তানি চ প্রতিক্ষণং ক্ষীযমাণানি||১২||

Adhikarana 7 (13) · Śloka 13

ভৌমাপ্যাগ্নেযবাযব্যাঃ পঞ্চোষ্মাণঃ সনাভসাঃ| পঞ্চাহারগুণান্স্বান্স্বান্পার্থিবাদীন্পচন্তি হি||১৩||

ভৌতিকবহ্নিব্যাপারমাহ- ভৌমেত্যাদি| ভৌমাদযঃ পঞ্চোষ্মাণঃ পার্থিবাদিদ্রব্যব্যবস্থিতা জাঠরাগ্নিসন্ধুক্ষিতবলা অন্তরীযং দ্রব্যং পচন্তঃ স্বান্ স্বান্ পার্থিবাদীন্ পূর্বপার্থিবগন্ধত্বাদ্যবিলক্ষণান্ গুণান্ নির্বর্তযন্তি| এতদেব “বিবিধমশিতপীতলীঢখাদিতং জন্তোর্হিতমন্তরগ্নিসন্ধুক্ষিতবলেন যথাস্বেনোষ্মণা সম্যগ্বিপচ্যমানং” (সূ.অ.২৮) ইত্যাদিনা সূত্রাস্থানেঽপ্যুক্তম্| যদ্যপি ভূতাগ্নিনা পার্থিবাদিদ্রব্যং পচ্যতে, তথাঽপি পার্থিবাদিদ্রব্যাণাং পাকেনৈতদেব জননং যদ্বিশিষ্টগুণযুক্তত্বং, তেন পাকেন জন্যমানেঽপি দ্রব্যে গুণা এব জন্যন্ত ইত্যভিপ্রাযেণ পার্থিবাদীনাহারগুণাঞ্জনযন্তীত্যুচ্যতে| অনেন গুণজননমেবাগ্নিনোচ্যতে; ন দ্রব্যজননম্| কিংবা আহারাশ্চ গুণাশ্চেতি বিগ্রহাদাহারশব্দেন আহারাধিকরণরূপং দ্রব্যমপি গৃহ্যতে| পার্থিবাদীনিতি পার্থিবাপ্যতৈজসবাযবীযনাভসান্| তত্র জাঠরাগ্নিঃ সর্বানেবাহাররসমলবিপাকান্ পচতি, ভৌতিকাস্ত্বগ্নযঃ স্বান্ স্বান্ গুণাঞ্জনযন্তি| উক্তং চ- “জাঠরেণাগ্নিনা পূর্বং কৃতে সঙ্ঘাতভেদে পশ্চাদ্ভূতাগ্নযঃ পঞ্চ স্বং স্বং দ্রব্যং পচন্তি” ইতি| অযং চ ভূতাগ্নিব্যাপারো ধাতুষ্বপ্যস্তি, যতো ধাতুষ্বপি পঞ্চভূতানি সন্তি, তত্রাপি ধাত্বগ্নিব্যাপারো ভূতাগ্নিব্যাপারশ্চ জাঠরাগ্নিক্রমেণৈবোক্তো জ্ঞেযঃ||১৩||

Adhikarana 8 (14) · Śloka 14

যথাস্বং স্বং চ পুষ্ণন্তি দেহে দ্রব্যগুণাঃ পৃথক্| পার্থিবাঃ পার্থিবানেব শেষাঃ শেষাংশ্চ কৃত্স্নশঃ||১৪||

অগ্নিপক্বানাহারগুণানাহ- যথাস্বমিত্যাদি| যথাস্বমিতি যদ্যস্যাত্মীযং; সজাতীযা দ্রব্যগুণা সজাতীযান্ দ্রব্যগুণান্ পুষ্ণন্তি| তেন দ্রব্যাণি পার্থিবাদিদ্রব্যরূপাণি দেহধাতুদোষমলাখ্যানি পুষ্ণন্তি, গুণাস্তু পাকস্থিতগন্ধস্নেহৌষ্ণ্যগৌরবাদযঃ দেহগন্ধস্নেহৌষ্ণ্যগৌরবাদীন্ পুষ্ণন্তি| যথাস্বমিত্যাদিশব্দার্থং স্ফোরযতি- পার্থিবা ইত্যাদি| পার্থিবা আহারদ্রব্যগুণা দেহগতান্ পার্থিবানেব দ্রব্যগুণান্ পুষ্ণন্তি| আহারদ্রব্যগুণা ইত্যত্র দ্রব্যগতগুণা এব উচ্যন্তে| দ্রব্যপোষণং তু গুণপোষণেন লভ্যতে, গুণপোষণং দ্রব্যপোষণমন্তরা কর্তুমশক্যত্বাত্||১৪||

Adhikarana 9 (15) · Śloka 15

সপ্তভির্দেহধাতারো ধাতবো দ্বিবিধং পুনঃ| যথাস্বমগ্নিভিঃ পাকং যান্তি কিট্টপ্রসাদবত্ ||১৫||

ভূতাগ্নিব্যাপারং দর্শযিত্বা ধাত্বগ্নিব্যাপারং দর্শযন্নাহ- সপ্তভিরিত্যাদি| দেহধাতার ইতি বিশেষেণ দেহধারকাঃ| দ্বিবিধমিতি দ্বিপ্রকারং পাকম্| তদেব প্রকারদ্বযমাহ- কিট্টপ্রসাদবদিতি; কিট্টপ্রসাদরূপমিত্যর্থঃ| শুক্রস্য যদ্যপি কিট্টবান্ পাকো ন ভবতি, তথাঽপি বহূনাং কিট্টবত্ত্বাদ্ দ্বিবিধমিতি নির্দেশশ্ছত্রিণো গচ্ছন্তীতি ন্যাযাজ্জ্ঞেযঃ| পুনরিতি জাঠরাগ্নিপাকানন্তরম্||১৫||

Adhikarana 10 (16) · Śloka 16

রসাদ্রক্তং ততো মাংসং মাংসান্মেদস্ততোঽস্থি চ| অস্থ্নো মজ্জা ততঃ শুক্রং শুক্রাদ্গর্ভঃ প্রসাদজঃ||১৬||

পাকজন্যানাং রসাদীনামুত্পাদং ক্রমেণাহ- রসাদিত্যাদি| রসাদ্রক্তং প্রসাদজং, ততো রক্তান্মাংসং প্রসাদজং, মাংসান্মেদঃ প্রসাদজমিত্যাদি যাবচ্ছুক্রাদ্গর্ভঃ প্রসাদজ ইতি| প্রসাদজশব্দেন রসাদিভ্যঃ প্রসাদাংশজন্যা রক্তাদযঃ, কিট্টাংশজন্যাস্তু বক্ষ্যমাণাঃ কফাদয ইতি| শুক্রাত্তু নির্মলতযা প্রসাদজ এব গর্ভো ভবতি, নতু মলজন্যং কিঞ্চিত্| কেচিত্তু শুক্রমলতযা শ্মশ্রূণি বদন্তি; তন্ন, তন্ত্রেঽনভিধানাত্| তথা শুক্রমলং যদি শ্মশ্রূণি স্যুস্তদা স্ত্রীণামপি সশুক্রতযা শ্মশ্রূণি ভবেযুঃ; স্ত্রিযশ্চ সশুক্রা এব, পরং তাসাং শুক্রং গর্ভারম্ভকং ন ভবতীত্যাদি প্রতিপাদিতং প্রাক্| অন্যে তু গর্ভপ্রসাদজশব্দেন নপুংসকেন ওজোঽভিদধতি| প্রসাদজ ইত্যত্র জাতশব্দঃ পোষণ এব বর্ততে, নাপূর্বোত্পাদে; রক্তাদযো হি গর্ভাত্প্রভৃত্যেবোত্পন্না রসাদিভিঃ পোষ্যন্তে; রক্তাদযো হি গর্ভপ্রভৃত্যেব পোষ্যন্তে| তত্র চ ত্রিধাতূত্পাদে ব্যাখ্যাতারো বর্ণযন্তি- তত্র রসঃ স্বাগ্নিপচ্যমানো রক্ততাং যাতি, রক্তং মাংসতামিত্যাদি পূর্বপূর্বধাতুপরিণামাদুত্তরোত্তরধাতূত্পাদঃ; যথা ক্ষীরাদ্দধি ভবতি, দধ্নো নবনীতং, নবনীতাদ্ঘৃতং, ঘৃতাদ্ ঘৃতমণ্ডঃ, ইত্যেকঃ পক্ষঃ| কিংবা রস এব রক্তং প্রথমং প্লাবযতি, তত্র চ রক্তস্থানসম্বন্ধাদ্রক্তসাদৃশ্যমনুভবতি, রক্তং চ রক্তসমানেনাংশেন পোষযতি; ততো রক্তমাপ্লাব্য মাংসমাপ্লাবযতি, তত্রাপি মাংসপোষণং করোতি, মাংসসাদৃশ্যতামনুভবতি; এবং উত্তরোত্তরধাতূন্ রস এবাপ্লাবযতি বর্ধযতি চ; যথা কেদারনিষিক্তং কুল্যাজলং প্রত্যাসন্নাং কেদারীং তর্পযিত্বা ক্রমেণ কেদারিকান্তরাণি আপ্লাবযতি| কিংবা আহাররসস্য উত্পন্নো ভিন্নৈরেব মার্গৈ রসরুধিরাদীনি সমানেনাংশেন তর্পযতি, তত্র চ যঃ প্রত্যাসন্নো ধাতুস্তত্পোষকো ধাতুভাগস্তং শীঘ্রং পুষ্ণাতি, যস্তু বিদূরো ধাতুস্তস্য বিদূরমার্গতযা চিরেণ পোষণং ভবতি, এবং ভিন্নৈরেব মার্গৈর্ধাতূনাং পোষণং ভবতি; যথা খলে উত্পতিতানাং কপোতানাং ভিন্নদিগ্গামিনাং স্বীযস্বীযমার্গেণৈব গচ্ছতাং গম্যদেশস্য প্রত্যাসন্নবিপ্রকৃষ্টত্বাদিভেদেন শীঘ্রং চিরেণ চ গমনং ভবতি, তদ্বত্| ইতি ক্ষীরদধিন্যায-কেদারীকুল্যান্যায-খলেকপোতন্যাযাত্ত্রেধা ধাতুপোষণক্রমঃ| তত্রেহ শব্দার্থপর্যালোচনযা কেদারীকুল্যান্যাযঃ ক্ষীরদধিন্যাযো বা সঙ্গত এবঃ, খলেকপোতন্যাযস্তু মনাগ্দুর্ঘটঃ| তস্মিন্ হি পক্ষে রসাদ্রক্তং প্রসাদজমিত্যর্থব্যুত্পাদনং দুঃশকং, প্রপঞ্চিতং চৈতদ্বিবিধাশিতপীতীযে, তত্রৈবানুসরণীযঃ প্রপঞ্চঃ| ননু, বিবিধাশিতপীতীযে আহাররসাদ্রসাদিপুষ্টিরুক্তা “পুষ্যন্তি ত্বাহাররসাদ্রসরুধির” (সূ.অ.২৮) ইত্যাদিনা; তত্র রসদ্বযং স্বীকৃতম্, ইহ ত্বেক এব রক্তপোষকো রস ইতি কথং ন বিরোধঃ? মৈবং, তত্রাপি আহাররসশব্দেন আহারজঃ প্রসাদোঽভিধীযতে, স চ রসগ্রহণগৃহীত এব| যতো দ্বিবিধো রসঃ- স্থাযী, পোষকশ্চেতি; তেন তত্র ধাতুপোষকপোষ্যরসাংশযোর্ভেদবিবক্ষযা ভেদ উক্তঃ; ইহ স্থাযীপোষকরসাংশাবপ্যেকতযা নির্দিষ্টৌ, স্থাযিরসপোষকরসভাগযোঃ স্থানভেদাদ্যভাবাদেকত্বম্; এবং কৃত্বা সপ্তধাতুকং শরীরমুচ্যতে| এতদপি বিবিধাশিতপীতীযে এব প্রপঞ্চিতম্||১৬||

Adhikarana 11 (17) · Śloka 17

রসাত্ স্তন্যং ততো রক্তমসৃজঃ কণ্ডরাঃ সিরাঃ| মাংসাদ্বসা ত্বচঃ ষট্ চ মেদসঃ স্নাযুসম্ভবঃ ||১৭||

ধাতূনাং পোষণমভিধাযোপধাতুপোষণমাহ- রসাত্ স্তন্যমিত্যাদি| রসাত্ স্তন্যং প্রসাদজং, তথা রক্তমপি রজঃসঞ্জ্ঞং রসাদেব প্রসাদভাগজন্যম্; উক্তং চ সুশ্রুতে- “রসাদেব স্ত্রিযা রক্তং রজঃসঞ্জ্ঞং প্রবর্ততে” (সু.সূ.অ.১৪) ইতি| এতচ্চ রজো রসজন্যমপি সূক্ষ্মতযা চিরেণৈব জাযতে; যদুক্তং সুশ্রুতে- “এবং মাসেন রসঃ শুক্রভবতি, স্ত্রীণাং চার্তবম্” (সু.সূ.অ.১৪) ইতি| অস্রজঃ কণ্ডরাঃ স্থূল স্নাযবঃ, মেদসস্তু সূক্ষ্মস্নাযুপোষণং ‘মেদসঃ স্নাযুসম্ভবঃ’ ইত্যনেন বক্তব্যম্| ইহ হি কণ্ডরাশব্দেন স্থূলস্নাযুরুচ্যতে, সুশ্রুতে তু স্থূলসিরা| তে চ স্তন্যাদযো ধাত্বন্তরাপোষণাচ্ছরীরপোষকা অপ্যুপধাতুশব্দেনোচ্যন্তে, রসাদযস্তু শরীরধারকতযা ধাত্বন্তরপোষকতযা চ ধাতুশব্দেনোচ্যন্তে; উক্তং চ ভোজে- “সিরাস্নাযুরজঃস্তন্যত্বচো গতিবিবর্জিতাঃ| ধাতুভ্যশ্চোপজাযন্তে তস্মাত্ত উপধাতবঃ” ইতি| অত্রাপি হি ‘ধাতুভ্যশ্চোপজাযন্তে’ ইত্যনেন জাযন্ত এব, পরং ন জনযন্তীত্যুক্তম্| শুক্রং তু ওজোজনকত্বাদ্ ধাত্বন্তর্গতমেব| ওজস্তু ইহ ন ধাতুষু নাপ্যুপধাতুষু পঠিতং, তস্য সপ্তধাতুসাররূপতযা সপ্তধাত্বন্তরগতত্বাদেব, অত এব তস্যাগ্নিরপি পৃথঙ্নোক্তঃ||১৭||

Adhikarana 12 (18-19) · Śloka 20

কিট্টমন্নস্য বিণ্মূত্রং, রসস্য তু কফোঽসৃজঃ| পিত্তং, মাংসস্য খমলা, মলঃ স্বেদস্তু মেদসঃ||১৮|| স্যাত্কিট্টং কেশলোমাস্থ্নো, মজ্জ্ঞঃ স্নেহোঽক্ষিবিট্ত্বচাম্| প্রসাদকিট্টে ধাতূনাং পাকাদেবংবিধর্চ্ছতঃ ||১৯|| পরস্পরোপসংস্তব্ধা ধাতুস্নেহপরম্পরা |২০|

প্রসাদভাগোত্পাদমভিধায মলভাগোত্পাদমাহ- কিট্টমিত্যাদি| রসস্য কফ ইতি রসে পচ্যমানে কিট্টং কফো ভবতি, প্রসাদশ্চ রক্তং; এবং রক্তাদিমলেঽপি জ্ঞেযম্| মাংসস্য খমলা ইতি কর্ণাক্ষিনাসাস্যপ্রজননমলাঃ| মলঃ স্বেদস্তু মেদস ইতি স্বেদো যদ্যপি উদকবিশেষ এব উক্তস্তথাঽপি তস্য মেদোমলত্বেনৈবোত্পতিঃ; কিংবা, উদকাদপি স্বেদো ভবতি মেদোমলতযা চ ভবতি, যথা- কফোঽবস্থাপাকাদ্ রসমলতযা চ ভবতি| অস্থিমলং নখোঽপি সুশ্রুতপ্রামাণ্যাদুন্নেযঃ| তত্র হি “নখলোম চ” (সু.সূ.অ.৪৬) ইত্যনেনাস্থিমলত্বং নখস্যোক্তম্| উক্তং চ বিবিধাশিতপীতীযে- “কিট্টাত্ কেশনখাদযঃ পুষ্যন্তি” (সূ.অ.২৮) ইতি; কিন্তু শারীরেঽস্থিগণনাযাং “বিংশতির্নখা” (শা.অ.৭) ইত্যনেনাস্থিত্বেন প্রোক্তাঃ| এবমুক্তেন ক্রমেণ প্রসাদকিট্টে দ্বিধা ঋচ্ছতো ভবত ইত্যর্থঃ| সম্প্রতি পোষ্যেণাপি রক্তেন রসস্যাপ্যাযনং ক্রিযতে, তথা মাংসেনাপি রক্তস্যেত্যাদি পরস্পরং ধাতূনামুত্পাদকত্বমাহ- পরস্পরেত্যাদি| ধাতুস্নেহপরম্পরা পরস্পরোপসংস্তব্ধেতি অন্যোন্যমুপস্নেহেন সংস্তব্ধত্বাত্ সন্তর্পিতেতি যাবত্||১৮-১৯||-

Adhikarana 13 (20-35) · Śloka 35

বৃষ্যাদীনাং প্রভাবস্তু পুষ্ণাতি বলমাশু হি||২০|| ষড্ভিঃ কেচিদহোরাত্রৈরিচ্ছন্তি পরিবর্তনম্| সন্তত্যা ভোজ্যধাতূনাং পরিবৃত্তিস্তু চক্রবত্||২১|| (ইত্যুক্তবন্তমাচার্যং শিষ্যস্ত্বিদমচোদযত্| রসাদ্রক্তং বিসদৃশাত্ কথং দেহেঽভিজাযতে||২২|| রসস্য চ ন রাগোঽস্তি স কথং যাতি রক্ততাম্| দ্রবাদ্রক্তাত্স্থিরং মাংসং কথং তজ্জাযতে নৃণাম্||২৩|| দ্রবধাতোঃ স্থিরান্মাংসান্মেদসঃ সম্ভবঃ কথম্| শ্লক্ষ্ণাভ্যাং মাংসমেদোভ্যাং খরত্বং কথমস্থিষু||২৪|| খরেষ্বস্থিষু মজ্জা চ কেন স্নিগ্ধো মৃদুস্তথা| মজ্জ্ঞশ্চ পরিণামেন যদি শুক্রং প্রবর্ততে||২৫|| সর্বদেহগতং শুক্রং প্রবদন্তি মনীষিণঃ| তথাঽস্থিমধ্যমজ্জ্ঞশ্চ শুক্রং ভবতি দেহিনাম্||২৬|| ছিদ্রং ন দৃশ্যতেঽস্থ্নাং চ তন্নিঃসরতি বা কথম্| এবমুক্তস্তু শিষ্যেণ গুরুঃ প্রাহেদমুত্তরম্||২৭|| তেজো রসানাং সর্বেষাং মনুজানাং যদুচ্যতে| পিত্তোষ্মণঃ স রাগেণ রসো রক্তত্বমৃচ্ছতি||২৮|| বায্বম্বুতেজসা রক্তমূষ্মণা চাভিসংযুতম্| স্থিরতাং প্রাপ্য মাংসং স্যাত্ স্বোষ্মণা পক্বমেব তত্ ||২৯|| স্বতেজোঽম্বুগুণস্নিগ্ধোদ্রিক্তং মেদোঽভিজাযতে| পৃথিব্যগ্ন্যনিলাদীনাং সঙ্ঘাতঃ স্বোষ্মণা কৃতঃ||৩০|| খরত্বং প্রকরোত্যস্য জাযতেঽস্থি ততো নৃণাম্| করোতি তত্র সৌষির্যমস্থ্নাং মধ্যে সমীরণঃ||৩১|| মেদসস্তানি পূর্যন্তে স্নেহো মজ্জা ততঃ স্মৃতঃ| তস্মান্মজ্জ্ঞস্তু যঃ স্নেহঃ শুক্রং সঞ্জাযতে ততঃ||৩২|| বায্বাকাশাদিভির্ভাবৈঃ সৌষির্যং জাযতেঽস্থিষু| তেন স্রবতি তচ্ছুক্রং নবাত্ কুম্ভাদিবোদকম্||৩৩|| স্রোতোভিঃ স্যন্দতে দেহাত্ সমন্তাচ্ছুক্রবাহিভিঃ | হর্ষেণোদীরিতং বেগাত্ সঙ্কল্পাচ্চ মনোভবাত্||৩৪|| বিলীনং ঘৃতবদ্ব্যাযামোষ্মণা স্থানবিচ্যুতম্| বস্তৌ সম্ভৃত্য নির্যাতি স্থলান্নিম্নাদিবোদকম্)||৩৫||

বৃষ্যাদিদ্রব্যাণাং ধাতুপরম্পরাক্রমেণ শুক্রজননাদিকার্যং নিষেধযন্নাহ- বৃষ্যাদীনামিত্যাদি| আদিশব্দেন বল্যভেদনাদীনি গ্রাহযতি| বৃষ্যাদীনাং ক্ষীরাদিদ্রব্যাণাং প্রভাবো বলং শীঘ্রং পুষ্ণাতি, ততস্তে ক্ষীরাদযঃ প্রভাববর্ধিতবলাঃ শীঘ্রমেবান্নকার্যং শুক্রজননাদি কুর্বন্তি, ন যথোক্তধাতুক্রমেণেত্যর্থঃ| কিংবা বৃষ্যাদীনাং ক্ষীরাদিদ্রব্যাণাং যঃ প্রভাবঃ স আশু বলং পুষ্ণাতি স্বজন্যানাং শুক্রাদীনামিত্যর্থঃ; হিশব্দোঽবধারণে; এবং বৃষ্যাদীনাং প্রভাবাচ্ছুক্রাদ্যুত্পত্তিঃ শীঘ্রং ভবতি| অথোত্সর্গতঃ কিযতা কালেন ধাতুপরিবৃত্তির্ভবতীত্যাহ- ষড্ভিরিত্যাদি| ষড্ভিরহোরাত্রৈ রসস্য শুক্ররূপতযা পরিবর্তনং ভবতীতি কেচিদিচ্ছন্তি| তত্রোত্পন্নো রসো রক্তমেকেনাহোরাত্রেণ যাতি, এবং রসোত্পত্তিদিনং পরিত্যজ্য ষডহেন শুক্রতা ভবতি; যদা তু রসোত্পত্তিদিনমপি প্রক্ষিপ্যতে তদা ষড্ভির্দিনৈরতিক্রান্তৈঃ সপ্তমে শুক্রভাবতযা পরিবর্তনং ভবতীতি জ্ঞেযম্| উক্তং হি পরাশরে- “আহারোঽদ্যতনঃ শ্বো হি রসত্বং গচ্ছতি নৃণাম্| শোণিতত্বং তৃতীযেঽহ্নি, চতুর্থে মাংসতামপি|| মেদস্ত্বং পঞ্চমে, ষষ্ঠে ত্বস্থিত্বং, সপ্তমে ত্বিযাত্| মজ্জতাং, শুক্রতাং যাতি নিযমাদষ্টমে নৃণাম্” ইতি| এবদপ্যুপযোগদিনং সম্পূর্ণং পরিত্যজ্যৈব ব্যাখ্যাতব্যমিত্যাহুঃ| কিঞ্চ রসধাতোঃ রক্তধাতুরূপতযা চ পরিণমনং যত্তদপি ষষ্ঠদিননির্বর্ত্যমেবেতি| যদুক্তং সুশ্রুতে- “স খল্বাপ্যো রস একৈকস্মিন্ ধাতৌ ত্রীণি ত্রীণি কলাসহ স্রাণ্যবতিষ্ঠতি দশ চ কলাঃ, এবং মাসেন রসঃ শুক্রীভবতি” (সু.সূ.অ.১৪) ইতি| তেনৈতত্পক্ষদ্বযমপি কেচিদিত্যাদিনা দর্শযতি| স্বমতমাহ- সন্তত্যেত্যাদি| ভোজ্যে উপযুক্তে সতি ধাতূনাং রসাদীনাং চক্রবত্ পরিবৃত্তির্ভবতি অবিশ্রান্তা সমুত্পত্তির্ধাতূনাং ভবতি| চক্রদৃষ্টান্তেন তু পরিবৃত্তিকালানিযমং দর্শযতি; যথা চক্রং পানীযোদ্ধারণার্থং নিযুক্তং বাহ্যমানং বাহুবলপ্রকর্ষাত্ কদাচিদাশ্বেব পরিবর্ততে, কদাচিদ্ বাহুবলমান্দ্যাচ্চিরেণ; এবং ধাতবোঽপি অগ্ন্যাদিসৌষ্ঠবাচ্ছীঘ্রমেব পরিবর্তন্তে, অগ্ন্যাদিবৈগুণ্যে চিরেণ পরিবর্তন্তে ইতি; এবং সুশ্রুতেনাপি “শব্দার্চির্জলসন্তানবদণুনা বিশেষেণানুধাবত্যেব শরীরং কেবলম্” (সু.সূ.অ.১৪) ইত্যত্র দৃষ্টান্তত্রযেণ রসপরিণামোঽপি অগ্ন্যাদিভেদেন প্রকৃষ্টাপ্রকৃষ্টকালজ উক্ত এব| তত্র হি জলসন্তানদৃষ্টান্তেন চিরেণ মাসপর্যন্তেন শুক্রতাপত্তী রসস্যোক্তা, শব্দসন্তানদৃষ্টান্তেন তু নাতিশীঘ্রং নাতিচিরাচ্চ শুক্রোত্পত্তিরুক্তা, অর্চিঃসন্তানদৃষ্টান্তেন ত্বতিশীঘ্রং শুক্রোত্পত্তিরুক্তা| তথাঽন্যত্রাপ্যুক্তং- “কেচিদাহুরহোরাত্রাত্, ষড্রাত্রাদপরে, পরে| মাসেন যাতি শুক্রত্বমন্নং পাকক্রমাদিতি”| তদেতত্ সকলং চক্রদৃষ্টান্তেন গৃহীতং জ্ঞেযম্||২০-৩৫||

Adhikarana 14 (36-37) · Śloka 38

ব্যানেন রসধাতুর্হি বিক্ষেপোচিতকর্মণা| যুগপত্ সর্বতোঽজস্রং দেহে বিক্ষিপ্যতে সদা||৩৬|| ক্ষিপ্যমাণঃ খবৈগুণ্যাদ্রসঃ সজ্জতি যত্র সঃ| করোতি বিকৃতিং তত্র খে বর্ষমিব তোযদঃ||৩৭|| দোষাণামপি চৈবং স্যাদেকদেশপ্রকোপণম্ |৩৮|

অথ কোঽন্নরসং রক্তাদিধাতুপোষকং প্রেরযতি; যেন তত্র তত্র রসঃ সর্পতীত্যাহ- ব্যানেনেত্যাদি| রসরূপো ধাতুঃ, কিংবা রসতীতি রসো দ্রবধাতুরুচ্যতে, তেন রুধিরাদীনামপি দ্রবাণাং গ্রহণং ভবতি; বিক্ষেপঃ উচিতং প্রাকৃতং কর্ম যস্য স বিক্ষেপোচিতকর্মা; তেন ব্যানেন, যুগপদিতি এককালং, সর্বত ইতি সর্বস্মিন্ দেহে, বিক্ষিপ্যতে ইতি নীযতে, অজস্রমিতি অবিশ্রান্তং বিক্ষিপ্যতে, সদেতি সর্বকালম্| নন্বেবং সর্বত্র রসবিক্ষেপে কথমেকদেশে রসাদৌ বিকারাশ্রযো দৃশ্যত ইত্যাহ- ক্ষিপ্যমাণ ইত্যাদি| খবৈগুণ্যাদিতি স্রোতোবৈগুণ্যাত্| সজ্জতীতি তিষ্ঠতি| বিকারং কুরুতে ইতি রসাশ্রযিবিকারং কুরুতে; রসোঽপি হি বিকারকরণে আশ্রযতযা ব্যাপ্রিযতে, তেনেহ তস্য কর্তৃত্বং যুক্তম্| খে বর্ষমিব তোযদ ইতি যথা চণ্ডেন বাযুনা নীযমানো মেঘো যত্র সক্তো ভবতি তত্রৈব বর্ষং করোতি, তথা রসোঽপীত্যর্থঃ| যথা রস একদেশে বিকারং করোতি, এবং দোষা অপ্যেকদেশবিকারং কুর্বন্তীত্যাহ- দোষাণামিত্যাদি| সুশ্রুতোঽপ্যাহ- “কুপিতানাং হি দোষাণাং শরীরে পরিধাবতাম্| যত্র সঙ্গঃ খবৈগুণ্যাদ্ব্যাধিস্তত্রোপজাযতে” (সু.সূ.অ.২৪) ইতি||৩৬-৩৭||-

Adhikarana 15 (38-41) · Śloka 41

ইতি ভৌতিকধাত্বন্নপক্তৄণাং কর্ম ভাষিতম্||৩৮|| অন্নস্য পক্তা সর্বেষাং পক্তৄণামধিপো মতঃ| তন্মূলাস্তে হি তদ্বৃদ্ধিক্ষযবৃদ্ধিক্ষযাত্মকাঃ||৩৯|| তস্মাত্তং বিধিবদ্যুক্তৈরন্নপানেন্ধনৈর্হিতৈঃ| পালযেত্ প্রযতস্তস্য স্থিতৌ হ্যযুর্বলস্থিতিঃ||৪০|| যো হি ভুঙ্ক্তে বিধিং ত্যাক্ত্বা গ্রহণীদোষজান্ গদান্| স লৌল্যাল্লভতে শীঘ্রং, বক্ষ্যন্তেঽতঃ পরং তু তে||৪১||

উক্তমগ্নীনাং কর্ম উপসংহরতি- ইতি ভৌতিকেত্যাদি| ভৌতিকাঃ পঞ্চ, ধাত্বগ্নযঃ সপ্ত, অন্নপক্তৈকঃ| অত্র চ যান্যগ্ন্যন্তরাণি উপধাতুমলাদিগতানি তান্যপ্যবরুদ্ধানি ভূতাগ্নিষ্বেব; কিংবা, অপ্রাধান্যাদন্যান্যকিঞ্চিত্করাণি নোক্তানি| সর্বাগ্নিষু জাঠরাগ্নেঃ প্রাধান্যমাহ- অন্নস্যেত্যাদি| প্রাধান্যে হেতুমাহ- তন্মূলা ইত্যাদি| তন্মূলত্বে হেতুগর্ভবিশেষণমাহ- তদ্বৃদ্ধীত্যাদি| তস্য জাঠরাগ্নেঃ বৃদ্ধ্যা বৃদ্ধ্যাত্মকাঃ ক্ষযেণ চ ক্ষযাত্মকা যস্মাদিহাগ্নযস্তস্মাদন্বযব্যতিরেকার্থবিধাযিত্বাত্তন্মূলা ইত্যর্থঃ| যতশ্চাযমন্তরগ্নির্মূলং সর্বত্র তস্মাত্তং পালযেদিতি যোজ্যম্| বিধিবদ্যুক্তৈরিত্যত্র আহারবিধিযোগাদুপযুক্তৈঃ| আযুর্বলস্থিতিরিতি অন্নপাচকাগ্নিস্থিতৌ আযুর্বলস্থিত্যা অন্যেঽপ্যতিপ্রেযা বর্ণাদযো লক্ষণীযাঃ| বিপর্যযে দোষমাহ- যো হীত্যাদি| গ্রহণীদোষজানিতি গ্রহণ্যাশ্রিতদোষজান্| এতেন বক্ষ্যমাণলক্ষণাশ্চত্বারো গ্রহণীবিকারা বিশেষেণ গ্রহণীদোষশব্দবাচ্যা গৃহ্যন্তে, তথাঽগ্নিমান্দ্যাজীর্ণাদযশ্চ গ্রহণ্যাশ্রিতা রোগা গৃহ্যন্তে| অগ্নিমান্দ্যাজীর্ণাদযস্তু যদ্যপি গ্রহণ্যাশ্রিতত্বেন গ্রহণীরোগা এব, তথাঽপীহ গ্রহণীরূপনাডীব্যাপারবৈপরীত্যেন যে জাযন্তে ত এব মুখ্যগ্রহণীশব্দবাচ্যাশ্চত্বারো রোগাঃ| যতো ‘অধস্তু পক্বমামং বা’ ইত্যাদিনা গ্রহণীগদসামান্যলক্ষণবিশিষ্টমেব গ্রহণীগদং গ্রহণীপ্রাকৃতব্যাপারোপমর্দেন জাযমানং বক্ষ্যতি| বক্ষ্যতি চ গ্রহণ্যা দুষ্টমদুষ্টং চ রূপং “অপক্বং ধারযত্যন্নং পক্বং সৃজতি পার্শ্বতঃ| সা দুষ্টা বহুশো ভুক্তমামমেব বিমুঞ্চতি” ইতি| ন চেযং পক্বান্নবিমোক্ষলক্ষণা দুষ্টিরগ্নিদোষে আমাদ্যজীর্ণে বা| অনেন বিশেষাভিধেযগ্রহণীশব্দত্বং গ্রহণ্যাশ্রিতদোষজন্যগ্রহণীগদস্যৈবেহোচ্যতে; অগ্নিদোষাণাং ন বিশেষাদ্গ্রহণীগদত্বম্; অতিসারে যদ্যপি পক্বান্নমুঞ্চনমস্তি, তথাঽপি তস্য ভিন্নসম্প্রাপ্তিকত্বাত্ তথা চিকিত্সাভেদাদ্ গ্রহণীদোষাদন্যত্বমুক্তম্||৩৮-৪১||

Adhikarana 16 (42-44) · Śloka 44

অভোজনাদজীর্ণাতিভোজনাদ্বিষমাশনাত্| অসাত্ম্যগুরুশীতাতিরূক্ষসন্দুষ্টভোজনাত্||৪২|| বিরেকবমনস্নেহবিভ্রমাদ্ব্যাধিকর্ষণাত্| দেশকালর্তুবৈষম্যাদ্বেগানাং চ বিধারণাত্||৪৩|| দুষ্যত্যগ্নিঃ, স দুষ্টোঽন্নং ন তত্ পচতি লঘ্বপি| অপচ্যমানং শুক্তত্বং যাত্যন্নং বিষরূপতাম্ ||৪৪||

এবং ব্যবস্থিতে সামান্যেন গ্রহণীদোষবিকারণাং হেত্বাদীন্যাহ- অভোজনাদিত্যাদি| কালশব্দেন চ সংবত্সরাত্মকঃ কাল উচ্যতে| দেশবৈষম্যং দেশব্যাপত্; সা চ জনপদোদ্ধ্বংসনীযে প্রোক্তা| ঋতুশব্দেন তু শিশিরাদ্যৃতুঃ| কালবৈষম্যেণ সর্বেষামৃতূনাং বৈষম্যং গৃহ্যতে, ঋতুবৈষম্যেণ দ্ব্যেকর্তুবৈষম্যমিতি বিশেষঃ| শুক্তত্বমিতি অম্লতাম্| বিষরূপতামিতি যথা বিষং বহুবিকারকারি ভবতি তথা তদ্রূপতাম্, অনেন সর্ব এবাজীর্ণভেদা অবরুদ্ধা জ্ঞেযাঃ, যে তন্ত্রান্তরে “আমং বিদগ্ধং বিষ্টব্ধং কফপিত্তানিলৈঃ ক্রমাত্| অজীর্ণং কেচিদিচ্ছন্তি চতুর্থং রসশেষতঃ” (সু.সূ.অ.৪৬) ইত্যনেনোক্তাঃ||৪২-৪৪||

Adhikarana 17 (45-49) · Śloka 49

তস্য লিঙ্গমজীর্ণস্য বিষ্টম্ভঃ সদনং তথা| শিরসো রুক্ চ মূর্চ্ছা চ ভ্রমঃ পৃষ্ঠকটিগ্রহঃ||৪৫|| জৃম্ভাঽঙ্গমর্দস্তৃষ্ণা চ জ্বরশ্ছর্দিঃ প্রবাহণম্| অরোচকোঽবিপাকশ্চ, ঘোরমন্নবিষং চ তত্||৪৬|| সংসৃজ্যমানং পিত্তেন দাহং তৃষ্ণাং মুখামযান্| জনযত্যম্লপিত্তং চ পিত্তজাংশ্চাপরান্ গদান্||৪৭|| যক্ষ্মপীনসমেহাদীন্ কফজান্ কফসঙ্গতম্| করোতি বাতসংসৃষ্টং বাতজাংশ্চ গদান্ বহূন্||৪৮|| মূত্ররোগাংশ্চ মূত্রস্থং কুক্ষিরোগান্ শকৃদ্গতম্| রসাদিভিশ্চ সংসৃষ্টং কুর্যাদ্রোগান্ রসাদিজান্||৪৯||

তস্যেতি সামান্যাজীর্ণস্য লক্ষণম্| বিষ্টম্ভ ইতি বিষ্টম্ভোঽপ্রচলনরূপতযাঽবস্থানম্| ঘোরমন্নবিষং চ তত্ পিত্তেন সংসৃজ্যমানমিত্যাদিনা পিত্তাদিদুষ্টস্যাজীর্ণস্য লক্ষণমাহ| এতচ্চ পিত্তাদিসংসর্গকৃতং লক্ষণম্, অজীর্ণস্য কোষ্ঠমাত্রগতত্বেন যক্ষ্মাদিবিকারকরণেঽসামর্থ্যোপলব্ধেঃ| অম্লপিত্তং চেতি অম্লগুণোদ্রিক্তং পিত্তম্| অস্য তন্ত্রান্তরে লক্ষণমুক্তং- “অবিপাকক্লমোত্ক্লেদতিক্তাম্লোদ্গারগৌরবৈঃ| হৃত্কণ্ঠদাহারুচিভিশ্চাম্লপিত্তং বিনির্দিশেত্” ইতি| যক্ষ্মণস্ত্রিদোষজত্বেঽপি স্রোতোঽবরোধে কফব্যাপারপ্রাধান্যাদিহ কফজত্বমুক্তম্| কিট্টধাতুযোগেন রসশেষান্নস্য গদানাহ- মূত্ররোগাংশ্চেত্যাদি| রসাদিজানিত্যত্র যে রসাদিজা অরুচ্যাদয উক্তাস্তে ভবন্তীতি জ্ঞেযম্||৪৫-৪৯||

Adhikarana 18 (50) · Śloka 50

বিষমো ধাতুবৈষম্যং করোতি বিষমং পচন্| তীক্ষ্ণো মন্দেন্ধনো ধাতূন্ বিশোষযতি পাবকঃ||৫০||

অজীর্ণলক্ষণমভিধায অগ্নিদোষলক্ষণমাহ- বিষম ইত্যাদি| তীক্ষ্ণাগ্নিকার্যমাহ- তীক্ষ্ণমিত্যাদি| অত্র মন্দেন্ধন ইত্যনেন তীক্ষ্ণোঽপি যদি শুচীন্ধনো ভবতি তদা ধাতুপোষণং ভবতীতি দর্শযতি||৫০||

Adhikarana 19 (51) · Śloka 51

যুক্তং ভুক্তবতো যুক্তো ধাতুসাম্যং সমং পচন্|৫১|

অগ্নিপ্রসঙ্গাত্ সমাগ্নেঃ কার্যমাহ- যুক্তমিত্যাদি| যুক্ত ইতি সমঃ| যুক্তমন্নং পচন্ ধাতুসাম্যং করোতীত্যর্থঃ| সমশব্দেন সমানো বাযুরগ্নিসহাযো গৃহ্যতে| কিংবা যুক্তবাযুতযা ধাতুসাম্যং করোতি, যুক্তশব্দেন চ কফপিত্তসাম্যমগ্নৌ গৃহ্যতে| যতঃ “সমঃ সমৈঃ” (বা.সূ.অ.১) ইতি বচনেন দোষাণাং সমত্বেনৈব সমাগ্নিত্বমুক্তম্|৫১|

Adhikarana 20 (51-54) · Śloka 54

দুর্বলো বিদহত্যন্নং তদ্যাত্যূর্ধ্বমধোঽপি বা||৫১|| অধস্তু পক্বমামং বা প্রবৃত্তং গ্রহণীগদঃ| উচ্যতে সর্বমেবান্নং প্রাযো হ্যস্য বিদহ্যতে||৫২|| অতিসৃষ্টং বিবদ্ধং বা দ্রবং তদুপদিশ্যতে| তৃষ্ণারোচকবৈরস্যপ্রসেকতমকান্বিতঃ||৫৩|| শূনপাদকরঃ সাস্থিপর্বরুক্ ছর্দনং জ্বরঃ| লোহামগন্ধিস্তিক্তাম্ল উদ্গারশ্চাস্য জাযতে||৫৪||

মন্দাগ্নিব্যাপারমাহ- দুর্বল ইত্যাদি| উক্তবিকারেষু প্রধানত্বেন অধ্যাযপ্রকৃতং গ্রহণীদোষবিকারং নির্ধারযন্নাহ- অধস্ত্বিত্যাদি| পক্বমামং বেতি বাশব্দঃ সমুচ্চযে; তেন কিঞ্চিত্পক্বং কিঞ্চিদপক্বং চ| কুতঃ পক্বাপক্বং সৃজতীত্যাহ- সর্বমেবান্নং প্রযো হ্যস্য বিদহ্যতে ইতি; পক্বাপক্বং ভবতি| অতিসৃষ্টমিতি বিমুক্তম্| তম এব তমকঃ||৫১-৫৪||

Adhikarana 21 (55) · Śloka 55

পূর্বরূপং তু তস্যেদং তৃষ্ণাঽঽলস্যং বলক্ষযঃ| বিদাহোঽন্নস্য পাকশ্চ চিরাত্ কাযস্য গৌরবম্||৫৫||

পূর্বরূপে বিদাহোঽন্নস্যেতি বিশিষ্টো দাহো বিদাহঃ||৫৫||

Adhikarana 22 (56-57) · Śloka 57

অগ্ন্যধিষ্ঠানমন্নস্য গ্রহণাদ্গ্রহণী মতা| নাভেরুপর্যহ্যগ্নিবলেনোপষ্টব্ধোপবৃংহিতা ||৫৬|| অপক্বং ধারত্যন্নং পক্বং সৃজতি পার্শ্বতঃ| দুর্বলাগ্নিবলা দুষ্টা ত্বামমেব বিমুঞ্চতি||৫৭||

সম্প্রতি গ্রহণীদোষস্য সুখপ্রতিপত্ত্যর্থং গ্রহণ্যাঃ স্বরূপং প্রাকৃতং কর্ম চাহ- অগ্ন্যধিষ্ঠানমিত্যাদি| অগ্ন্যধিষ্ঠানম্ অগ্নেরাশ্রয ইত্যর্থঃ| গ্রহণীসঞ্জ্ঞানিমিত্তমাহ- অন্নস্যেত্যাদি| গ্রহণাদিতি ধারণাত্, নাভেরুপর্যন্নস্য ধারণাদিত্যর্থঃ| কিংবা নাভেরুপরি অগ্নেরূর্ধ্বজ্বলনেন বলেনোপস্তম্ভিতা উপবৃংহিতা চ সতি অপক্বমন্নং ধারযতি, পক্বং চ পার্শ্বতঃ সৃজতীতি বামপার্শ্বতঃ সৃজতি; যতঃ গ্রহণীগুদৌ বামপার্শ্বাশ্রযৌ, তেন বামে পার্শ্বে পক্বং সৃজতীতি যুক্তম্| উপস্তম্ভিতা ইতি অগ্নিনা পিত্তব্যাপারকরণেন অনুকূলিতা, উপবৃংহিতেতি অগ্নিনা বৃংহণব্যাপারকরণেন সশক্তীকৃতা; কিংবা উপস্তম্ভত্বেন উপবৃংহিতা, অত্র পক্ষে উপস্তম্ভসাধারণ্যং গ্রহণ্যা আহ| গ্রহণ্যাঃ প্রাকৃতং কর্মাভিধায বৈকৃতং কর্মাহ- দুর্বলেত্যাদি| দুর্বলাগ্নিশ্চ অবলা চেতি, কিংবা দুর্বলমগ্নিবলং যস্যাঃ সা দুর্বলাগ্নিবলা| দুষ্টা ইতি দোষদুষ্টা| আমং বিমুঞ্চতীতি অপক্বমেবান্নং বিমুঞ্চতি| পূর্বরূপে পক্বমামং বা বিমুঞ্চতীত্যনেন বিদগ্ধরূপমামমেবোক্তম্, ইহ ত্বামং নিযমেন বিমুঞ্চতীতি ন বিরোধঃ||৫৬-৫৭||

Adhikarana 23 (58-72) · Śloka 72

বাতাত্ পিত্তাত্ কফাচ্চ স্যাত্তদ্রোগস্ত্রিভ্য এব চ| হেতুং লিঙ্গং রূপভেদাঞ্ শৃণু তস্য পৃথক্ পৃথক্||৫৮|| কটুতিক্তকষাযাতিরূক্ষশীতলভোজনৈঃ| প্রমিতানশনাত্যধ্ববেগনিগ্রহমৈথুনৈঃ||৫৯|| করোতি কুপিতো মন্দমগ্নিং সঞ্ছাদ্য মারুতঃ | তস্যান্নং পচ্যতে দুঃখং শুক্তপাকং খরাঙ্গতা||৬০|| কণ্ঠাস্যশোষঃ ক্ষুত্তৃষ্ণা তিমিরং কর্ণযোঃ স্বনঃ| পার্শ্বোরুবঙ্ক্ষণগ্রীবারুজোঽভীক্ষ্ণং বিসূচিকা||৬১|| হৃত্পীডা কার্শ্যদৌর্বল্যং বৈরস্যং পরিকর্তিকা| গৃদ্ধিঃ সর্বরসানাং চ মনসঃ সদনং তথা||৬২|| জীর্ণে জীর্যতি চাধ্মানং ভুক্তে স্বাস্থ্যমুপৈতি চ| স বাতগুল্মহৃদ্রোগপ্লীহাশঙ্কী চ মানবঃ||৬৩|| চিরাদুঃখং দ্রবং শুষ্কং তন্বামং শব্দফেনবত্| পুনঃ পুনঃ সৃজেদ্বর্চঃ কাসশ্বাসার্দিতোঽনিলাত্||৬৪|| কট্বজীর্ণবিদাহ্যম্লক্ষারাদ্যৈঃ পিত্তমুল্বণম্| অগ্নিমাপ্লাবযদ্ধন্তি জলং তপ্তমিবানলম্||৬৫|| সোঽজীর্ণং নীলপীতাভং পীতাভঃ সার্যতে দ্রবম্| পূত্যম্লোদ্গারহৃত্কণ্ঠদাহারুচিতৃডর্দিতঃ||৬৬|| গুর্বতিস্নিগ্ধশীতাদিভোজনাদতিভোজনাত্| ভুক্তমাত্রস্য চ স্বপ্নাদ্ধন্ত্যগ্নিং কুপিতঃ কফঃ||৬৭|| তস্যান্নং পচ্যতে দুঃখং হৃল্লাসচ্ছর্দ্যরোচকাঃ| আস্যোপদেহমাধুর্যকাসষ্ঠীবনপীনসাঃ||৬৮|| হৃদযং মন্যতে স্ত্যানমুদরং স্তিমিতং গুরু| দুষ্টো মধুর উদ্গারঃ সদনং স্ত্রীষ্বহর্ষণম্||৬৯|| ভিন্নামশ্লেষ্মসংসৃষ্টগুরুবর্চঃপ্রবর্তনম্| অকৃশস্যাপি দৌর্বল্যমালস্যং চ কফাত্মকে||৭০|| যশ্চাগ্নিঃ পূর্বমুদ্দিষ্টো রোগানীকে চতুর্বিধঃ| তং চাপি গ্রহণীদোষং সমবর্জং প্রচক্ষ্মহে||৭১|| পৃথগ্বাতাদিনির্দিষ্টহেতুলিঙ্গসমাগমে| ত্রিদোষং নির্দিশেত্তেষাং ভেষজং শৃণ্বতঃ পরম্||৭২||

বাতপিত্তকফসন্নিপাতজান্ গ্রহণীভেদান্ তেষাং পৃথগ্ঘেত্বাদীংশ্চাহ- বাতাদিত্যাদি| ত্রিভ্য ইতি সন্নিপাতাত্| রূপভেদানিতি গ্রহণীদোষলিঙ্গত্বেন বক্ষ্যমাণান্| শুক্তমিবান্নস্য পাকঃ শুক্তপাকঃ| গৃদ্ধিঃ সর্বরসানামিতি সপ্তম্যর্থে ষষ্ঠী| জীর্ণে জীর্যতি ‘অন্নে’ ইতি শেষঃ| গুল্মাদিশঙ্কিত্বং গুল্মাদিসদৃশপীডাযুক্তত্বেন ভবতি| পৈত্তিকগ্রহণ্যাং পিত্তস্যাগ্নিসমানতযা বর্ধনমেব যুক্তমিত্যাশঙ্ক্য পিত্তস্য দ্রবত্বেনাগ্নিহননং ক্রিযতে ইতি দর্শযন্নাহ- আপ্লাবযদ্ধন্ত্যনলমিতি; আপ্লাবনং দ্রবেণার্দ্রীকরণম্| উষ্ণস্যাপি দ্রবতযা অগ্নিনির্বাপণে দৃষ্টান্তমাহ- জলং তপ্তমিত্যাদি| দৌর্বল্যং বলহানিঃ| যশ্চাগ্নিরিত্যাদিশ্লোকং কেচিদ্বৈশেষিকগ্রহণীদোষব্যতিরিক্তাগ্নিদোষত্রযস্য গ্রহণীরোগান্তর্নিবেশনমসঙ্গতমিতি কৃত্বাঽনার্ষং বদন্তি, কিন্তু তং চাপীতিপদেনাঽগ্নিমান্দ্যাদীনাং প্রাকৃতানাং সামান্যগ্রহণীদোষাবাধে সতি ন কিঞ্চিদ্বিরোধং পশ্যামঃ; সামান্যগ্রহণীদোষেঽপি অগ্নিমান্দ্যাদয উক্তা এবেতি দর্শিতমেব| সমবর্জমিতি সমপ্রকৃতিপুরুষগতত্বেনোক্তাগ্নিবর্জম্||৫৮-৭২||

Adhikarana 24 (73-81) · Śloka 81

গ্রহণীমাশ্রিতং দোষং বিদগ্ধাহারমূর্চ্ছিতম্| সবিষ্টম্ভপ্রসেকার্তিবিদাহারুচিগৌরবৈঃ||৭৩|| আমলিঙ্গান্বিতং দৃষ্ট্বা সুখোষ্ণেনাম্বুনোদ্ধরেত্| ফলানাং বা কষাযেণ পিপ্পলীসর্ষপৈস্তথা||৭৪|| লীনং পক্বাশযস্থং বাঽঽপ্যামং স্রাব্যং সদীপনৈঃ| শরীরানুগতে সামে রসে লঙ্ঘনপাচনম্||৭৫|| বিশুদ্ধামাশযাযাস্মৈ পঞ্চকোলাদিভিঃ শৃতম্| দদ্যাত্ পেযাদি লঘ্বন্নং পুনর্যোগাংশ্চ দীপনান্||৭৬|| জ্ঞাত্বা তু পরিপক্বামং মারুতগ্রহণীগদম্| দীপনীযযুতং সর্পিঃ পাযযেতাল্পশো ভিষক্||৭৭|| কিঞ্চিত্সন্ধুক্ষিতে ত্বগ্নৌ সক্তবিণ্মূত্রমারুতম্| দ্ব্যহং ত্র্যহং বা সংস্নেহ্য স্বিন্নাভ্যক্তং নিরূহযেত্||৭৮|| তত এরণ্ডতৈলেন সর্পিষা তৈল্বকেন বা| সক্ষারেণানিলে শান্তে স্রস্তদোষং বিরেচযেত্||৭৯|| শুদ্ধং রূক্ষাশযং বদ্ধবর্চসং চানুবাসযেত্| দীপনীযাম্লবাতঘ্নসিদ্ধাতৈলেন মাত্রযা||৮০|| নিরূঢং চ বিরিক্তং চ সম্যক্ চৈবানুবাসিতম্| লঘ্বন্নং প্রতিসম্ভুক্তং সর্পিরভ্যাসযেত্ পুনঃ||৮১||

গ্রহণীমাশ্রিতমিত্যাদৌ দোষমিতি সামান্যবচনাদ্বাতাদীনাং ত্রযাণামপি গ্রহণম্| আমস্যাপক্বস্য লিঙ্গৈরন্বিতমিতি আমলিঙ্গান্বিতম্| উদ্ধরেদিতি বমেত্| ফলানামিতি মদনফলানাম্| লীনমিতি অনুত্ক্লিষ্টম্| পক্বাশযস্থমিতি অধোগতত্বেন পক্বাশযসমীপগতম্| স্রাব্যমিতি বিরেচনীযম্| সদীপনৈরিতি দীপনদ্রব্যসংযুক্তৈর্বিরেচনপ্রযোগৈঃ| শরীরানুগতে ইতি শরীরব্যাপকে| সামে রসে ইতি অপক্বে রসে; আমশ্চাত্রাপক্বরসরূপ এবেষ্টঃ, আহাররসস্য রসসম্বন্ধেন শরীরব্যাপকতযা দুর্ঘটত্বাত্| লঙ্ঘনম্ অনশনং, পাচনং যবাগ্বাদি| বিশুদ্ধামাশযে ইত্যত্র বিশুদ্ধির্হি বিরেচনলঙ্ঘনৈর্যথাযোগ্যতযা জ্ঞেযা| দীপনীযযুতমিতি ষড্বিরেচনশতাশ্রিতীযোক্তদীপনীযগণসাধিতম্| স্বিন্নাভ্যক্তমিতি স্বিন্নং চাভ্যক্তং চেতি স্বিন্নাভ্যক্তম্| স্রস্তদোষমিতি নিরূহেণ স্রস্তদোষম্||৭৩-৮১||

Adhikarana 25 (82-86) · Śloka 86

দ্বে পঞ্চমূলে সরলং দেবদারু সনাগরম্| পিপ্পলীং পিপ্পলীমূলং চিত্রকং হস্তিপিপ্পলীম্||৮২|| শণবীজং যবান্ কোলন্ কুলত্থান্ সুষবীং তথা | পাচযেদারনালেন দধ্না সৌবীরকেণ বা||৮৩|| চতুর্ভাগাবশেষেণ পচেত্তেন ঘৃতাঢকম্| স্বর্জিকাযাবশূকাখ্যৌ ক্ষারৌ দত্ত্বা চ যুক্তিতঃ||৮৪|| সৈন্ধবৌদ্ভিদসামুদ্রবিডানাং রোমকস্য চ| সসৌবর্চলপাক্যানাং ভাগান্দ্বিপলিকান্ পৃথক্||৮৫|| বিনীয চূর্ণিতান্ তস্মাত্ পাযযেত্ প্রসৃতং বুধঃ| করোত্যগ্নিং বলং বর্ণং বাতঘ্নং ভুক্তপাচনম্||৮৬|| ইতি দশমূলাদ্যং ঘৃতম্|

দ্বে পঞ্চমূলে ইত্যাদৌ সুষবীস্বরসো জলস্থানীযঃ, আরনালাদি ক্বাথ্যং চ মিলিত্বা দ্রোণং মানং গ্রাহ্যম্| ক্ষারৌ দত্ত্বা চ যুক্তিত ইত্যনেন ক্ষারযোরল্পমানত্বমুচ্যতে, কিন্তু প্রক্ষেপ্যান্যতমলবণমানেন পৃথক্ ক্ষারৌ দেযৌ; যুক্তিত ইত্যনেন তু যোগ্যে কালে ক্ষারযোগমাহ, স চ যোগ্যকালোঽত্র ঘৃতাবতারণকাল এব| যদাহ জতূকর্ণঃ- “দশমূলং পঞ্চকোলং কুলত্থং সুরভিং যবম্| দেবদারুং চ সরলং শণবীজং চ সাধযেত্|| দধ্না সৌবীরকেণৈব তেন পক্বে ঘৃতাঢকে| দ্বৌ ক্ষারৌ সপ্তলবণান্যাবপেদ্ দ্বিপলানি তু” ইতি| ঔদ্ভিদম্ উত্কারিকালবণম্| রোমকং রুমাহৃদ্ভবম্| পাক্যং পাকজম্||৮২-৮৬||

Adhikarana 26 (87) · Śloka 87

ত্র্যূষণত্রিফলাকল্কে বিল্বমাত্রে গুডাত্ পলে| সর্পিষোঽষ্টপলং পক্ত্বা মাত্রাং মন্দানলঃ পিবেত্||৮৭|| ইতি ত্র্যূষণাদ্যং ঘৃতম্|

বিল্বমাত্রে ইতি পলমানে কল্কে, অষ্টপলমানমেবাত্র সর্পিঃ পক্তব্যং মহর্ষিবচনেন ফলদাযিত্বাত্||৮৭||

Adhikarana 27 (88-93) · Śloka 93

পঞ্চমূলাভযাব্যোষপিপ্পলীমূলসৈন্ধবৈঃ| রাস্নাক্ষারদ্বযাজাজীবিডঙ্গশটিভির্ঘৃতম্||৮৮|| শুক্তেন মাতুলুঙ্গস্য স্বরসেনার্দ্রকস্য চ| শুষ্কমূলককোলাম্বুচুক্রিকাদাডিমস্য চ||৮৯|| তক্রমস্তুসুরামণ্ডসৌবীরকতুষোদকৈঃ| কাঞ্জিকেন চ তত্ পক্বমগ্নিদীপ্তিকরং পরম্||৯০|| শূলগুল্মোদরশ্বাসকাসানিলকফাপহম্| সবীজপূরকরসং সিদ্ধং বা পাযযেদ্ঘৃতম্||৯১|| সিদ্ধমভ্যঞ্জনার্থং চ তৈলমেতৈঃ প্রযোজযেত্| এতেষামৌষধানাং বা পিবেচ্চূর্ণং সুখাম্বুনা||৯২|| বাতে শ্লেষ্মাবৃতে সামে কফে বা বাযুনোদ্ধতে| দদ্যাচ্চূর্ণং পাচনার্থমগ্নিসন্দীপনং পরম্||৯৩|| ইতি পঞ্চমূলাদ্যং ঘৃতং চূর্ণং চ|

পঞ্চমূলাদ্যে শুক্তাদিত্রযোদশদ্রবাণাং প্রত্যেকং স্নেহসমত্বম্| সবীজপূরকরসমিত্যত্রাপি পঞ্চমূল্যাদীনি কল্কত্বেনেচ্ছন্তি; কিংবা পূর্বমেব ঘৃতং বীজপুররসসংযুক্তং পেযমিত্যর্থঃ| তৈলমিত্যাদৌ এতৈঃ পঞ্চমূল্যাদিভিঃ সিদ্ধং তৈলমভ্যঙ্গার্থং যোজ্যং, তথা এতেষামেব কল্কোক্তানাং পঞ্চমূল্যাদীনাং চূর্ণং সুখাম্বুনা পেযম্| চূর্ণবিষযমাহ- বাতে ইত্যাদি| বাতশ্লেষ্মাবৃতে গ্রহণীগদে তথা সামে গ্রহণীগদে; কেচিত্ “সামে পুরীষে” ইতি বদন্তি; আমং চানেকবিধমাহুঃ, যদুচ্যতে- “আমমন্নরসং কেচিত্ কেচিত্তু মলসঞ্চযম্| প্রথমাং দোষদুষ্টিং চ কেচিদামং প্রচক্ষতে” ইতি| ভোজোঽপ্যাহ- “আমাশযস্থঃ কাযাগ্নের্দৌর্বল্যাদবিপাচিতঃ| আদ্য আহারধাতুর্যঃ স আম ইতি সঞ্জ্ঞিতঃ” ইতি| ঈশ্বরসেনোঽপ্যাহ- “এবমামাশযেঽপ্যন্নং বহু সম্যঙ্ন জীর্যতি| চীযমানং তদেবান্নং কালেনামত্বমাপ্নুযাত্” ইত্যাদি| তদিহাপি তদ্বচনপ্রামাণ্যাদামব্যবস্থা কর্তব্যা||৮৮-৯৩||

Adhikarana 28 (94-95) · Śloka 95

মজ্জত্যামা গুরুত্বাদ্বিট্ পক্বা তূত্প্লবতে জলে| বিনাঽতিদ্রবসঙ্ঘাতশৈত্যশ্লেষ্মপ্রদূষণাত্||৯৪|| পরীক্ষ্যৈবং পুরা সামং নিরামং চামদোষিণম্| বিধিনোপাচরেত্ সম্যক্ পাচনেনেতরেণ বা||৯৫||

সামনিরামগ্রহণীগদজ্ঞানার্থং সামনিরামবিড্লক্ষণমাহ- মজ্জতীত্যাদি| আমেতি আমাশ্রিতা| গুরুত্বাদিতি আমাহিতগুরুত্বাত্| পক্বেতি নিরামা; উপসংহরিষ্যত্যামপক্বলক্ষণান্তে ‘পরীক্ষ্যৈবং পুরা সামং নিরামং বা’ ইতি| দ্বযোরপি আমপক্বলক্ষণযোরপবাদমাহ- বিনাঽতিদ্রবেত্যাদি| অতিদ্রবত্বাদামাঽপি প্লবতে, অতিসংহতা তু পক্বাঽপি অতিসঙ্ঘাতাদেব মজ্জতি, শৈত্যশ্লেষ্মপ্রদূষণাচ্চ কফযোগাহিতগৌরবা পক্বাঽপি মজ্জতি গুরুত্বাদেব ন প্লবতে| ননু সবিষ্টম্ভপ্রসেকার্তীত্যাদিনৈব সামস্যোক্তত্বাত্ কিমনেন সামতালক্ষণেন পুনরুক্তেন? উচ্যতে- বাতকফাধিকারাত্তদুক্তম্, ইদং তু বিডামতাজ্ঞানার্থমুক্তমিতি বিশেষঃ| পরীক্ষ্যেত্যাদৌ নিরামং চামদোষিণমিতি কথং, যাবতা ন নিরামতাযামামদোষত্বমস্তি? ন, আমদোষশব্দেন গ্রহণীদোষিণোঽভিপ্রেতত্বাত্| ইতরেণেতি গ্রহণীদোষশমনেন||৯৪-৯৫||

Adhikarana 29 (96-97) · Śloka 97

চিত্রকং পিপ্পলীমূলং দ্বৌ ক্ষারৌ লবণানি চ| ব্যোষং হিঙ্গ্বজমোদাং চ চব্যং চৈকত্র চূর্ণযেত্||৯৬|| গুটিকা মাতুলুঙ্গস্য দাডিমস্য রসেন বা| কৃতা বিপাচযত্যামং দীপযত্যাশু চালনম্||৯৭|| ইতি চিত্রকাদ্যা গুটিকা|

চিত্রকেত্যাদৌ লবণানি চেত্যত্র কপিঞ্জলাধিকরণন্যাযেন লবণত্রযমিচ্ছন্তি; কিন্ত্বনিযতে স ন্যাযো ভবতি, ইহ তু পঞ্চলবণানাং প্রাধান্যেন দীর্ঘঞ্জীবিতীযে নির্দিষ্টত্বাত্ পঞ্চলবণস্য চ শক্যোপাদানত্বাত্ পঞ্চৈব লবণানি গ্রাহ্যাণি||৯৬-৯৭||

Adhikarana 30 (98-110) · Śloka 110

নাগরাতিবিষামুস্তক্বাথঃ স্যাদামপাচনঃ| মুস্তান্তকল্কঃ পথ্যা বা নাগরং চোষ্ণবারিণা||৯৮|| দেবদারুবচামুস্তনাগরাতিবিষাভযাঃ| বারুণ্যামাসুতাস্তোযে কোষ্ণে বাঽলবণাঃ পিবেত্||৯৯|| বর্চস্যামে সশূলে চ পিবেদ্বা দাডিমাম্বুনা| বিডেন লবণং পিষ্টং বিল্বং চিত্রকনাগরম্||১০০|| সামে বা সকফে বাতে কোষ্ঠশূলকরে পিবেত্| কলিঙ্গহিঙ্গ্বতিবিষাবচাসৌবর্চলাভযাঃ||১০১|| ছর্দ্যর্শোগ্রন্থিশূলেষু পিবেদুষ্ণেন বারিণা| পথ্যাসৌবর্চলাজাজীচূর্ণং মরিচসংযুতম্||১০২|| অভযাং পিপ্পলীমূলং বচাং কটুকরোহিণীম্| পাঠাং বত্সকবীজানি চিত্রকং বিশ্বভেষজম্||১০৩|| পিবেন্নিষ্ক্বাথ্য চূর্ণং বা কৃত্বা কোষ্ণেন বারিণা| পিত্তশ্লেষ্মাভিভৃতাযাং গ্রহণ্যাং শূলনুদ্ধিতম্||১০৪|| সামে সাতিবিষং ব্যোষং লবণক্ষারহিঙ্গু চ| নিঃক্বাথ্য পাযযেচ্চূর্ণং কৃত্বা বা কোষ্ণবারিণা||১০৫|| পিপ্পলীং নাগরং পাঠাং সারিবাং বৃহতীদ্বযম্| চিত্রকং কৌটজং বীজং লবণান্যথ পঞ্চ চ||১০৬|| তচ্চূর্ণং সযবক্ষারং দধ্যুষ্ণাম্বুসুরাদিভিঃ| পিবেদগ্নিবিবৃদ্ধ্যর্থং কোষ্ঠবাতহরং নরঃ||১০৭|| মরিচং কুঞ্চিকাম্বষ্ঠাবৃক্ষাম্লাঃ কুডবাঃ পৃথক্| পলানি দশ চাম্লস্য বেতসস্য পলার্ধিকম্||১০৮|| সৌবর্চলং বিডং পাক্যং যবক্ষারঃ সসৈন্ধবঃ| শটীপুষ্করমূলানি হিঙ্গু হিঙ্গুশিবাটিকা||১০৯|| তত্ সর্বমেকতঃ সূক্ষ্মং চূর্ণং কৃত্বা প্রযোজযেত্| হিতং বাতাভিভূতাযাং গ্রহণ্যামরুচৌ তথা||১১০|| ইতি মরিচাদ্যং চূর্ণম্|

মুস্তান্তকল্ক ইতি পশ্চাদুক্তনাগরাদিকল্ক ইত্যর্থঃ| অর্শোগ্রন্থিঃ অর্শোঽনুগ্রথিতবর্চস্ত্বম্| মরিচসংযুতমিতি পর্যন্তং ‘চূর্ণং কৃত্বা পিবেত্’ ইত্যনুবর্ততে| সামে দোষে সতি পিপ্পলীমূলাদিষু অতিবিষাদি প্রক্ষিপ্য চূর্ণং কর্তব্যমিত্যর্থঃ| সুরাদিভিরিত্যত্রাদিশব্দেন কাঞ্জিকসৌবীরাদিগ্রহণম্||৯৮-১১০||

Adhikarana 31 (111) · Śloka 112

চতুর্ণাং প্রস্থমম্লানাং ত্র্যূষণস্য পলত্রযম্| লবণানাং চ চত্বারি শর্করাযাঃ পলাষ্টকম্| সঞ্চূর্ণ্য শাকসূপান্নরাগাদিষ্ববচারযেত্||১১১|| কাসাজীর্ণারুচিশ্বাসাহৃত্পাণ্ড্বামযশূলনুত্|১১২|

চতুর্ণাং প্রস্থমম্লানামিত্যত্র চতুরম্লং হৃদ্যবর্গে প্রথমোক্তং বৃক্ষাম্লাম্লবেতসদাডিমবদররূপমাহুঃ; অন্যে তু চব্যত্বগিত্যাদিপ্রযোগবক্ষ্যমাণকপিত্থচুক্রিকাবৃক্ষাম্লদাডিমানাং গ্রহণমাহুঃ| তন্ত্রান্তরে তু “বৃক্ষাম্লমাতুলুঙ্গাম্লবদরাম্লাম্লবেতসৈঃ| চতুরম্লমিদং প্রোক্তং পঞ্চাম্লং তু সদাডিমম্” ইত্যুক্তম্| ত্র্যূষণাচ্চ পলত্রযমিতি মিলিতাত্ পলত্রযম্| রাগঃ কপিত্থাদিদ্রব্যকৃতো ব্যঞ্জনবিশেষঃ||১১১||-

Adhikarana 32 (112-116) · Śloka 117

চব্যত্বক্পিপ্পলীমূলধাতকীব্যোষচিত্রকান্||১১২|| কপিত্থং বিল্বমম্বষ্ঠাং শাল্মলং হস্তিপিপ্পলীম্| শিলোদ্ভেদং তথাঽজাজীং পিষ্ট্বা বদরসম্মিতম্||১১৩|| পরিভর্জ্য ঘৃতে দধ্না যবাগূং সাধযেদ্ভিষক্| রসৈঃ কপিত্থচুক্রীকাবৃক্ষাম্লৈর্দাডিমস্য চ||১১৪|| সর্বাতিসারগ্রহণীগুল্মার্শঃপ্লীহনাশিনী| পঞ্চকোলকযূষশ্চ মূলকানাং চ সোষণঃ||১১৫|| স্নিগ্ধো দাডিমতক্রাম্লো জাঙ্গলঃ সংস্কৃতো রসঃ| ক্রব্যাদস্বরসঃ শস্তো ভোজনার্থে সদীপনঃ||১১৬|| তক্রারনালমদ্যানি পানাযারিষ্ট এব চ|১১৭|

চব্যেত্যাদৌ শাল্মলং শাল্মলীবেষ্টকম্| শিলোদ্ভবং শৈলজম্| চুক্রিকা চাঙ্গেরী| সোষণ ইতি সমরিচঃ||১১২-১১৬||-

Adhikarana 33 (118-121) · Śloka 121

তক্রং তু গ্রহণীদোষে দীপনগ্রাহিলাঘবাত্||১১৭|| শ্রেষ্ঠং মধুরপাকিত্বান্ন চ পিত্তং প্রকোপযেত্| কষাযোষ্ণবিকাশিত্বাদ্রৌক্ষ্যাচ্চৈব কফে হিতম্||১১৮|| বাতে স্বাদ্বম্লসান্দ্রত্বাত্ সদ্যস্কমবিদাহি তত্| তস্মাত্ তক্রপ্রযোগা যে জঠরাণাং তথাঽর্শসাম্||১১৯|| বিহিতা গ্রহণীদোষে সর্বশস্তান্ প্রযোজযেত্| যবান্যামলকে পথ্যা মরিচং ত্রিপলংশিকম্||১২০|| লবণানি পলাংশানি পঞ্চ চৈকত্র চূর্ণযেত্| তক্রে তদাসুতং জাতং তক্রারিষ্টং পিবেন্নরঃ| দীপনং শোথগুল্মার্শঃক্রিমিমেহোদরাপহম্||১২১|| ইতি তক্রারিষ্টঃ|

তক্রমিত্যাদিনা তক্রগুণাভিধানম্| মধুরপাকিত্বান্ন চ পিত্তপ্রকোপণম্; অম্লত্বাত্ পিত্তপ্রকোপণে প্রাপ্তে মধুরপাকিতযা পিত্তং ন প্রকোপযতি, নাপি পিত্তং প্রশমযতীত্যাহুঃ| সদ্যস্কমবিদাহীতি সদ্যো মথিতমেব তক্রং পচ্যমানাবস্থাযাং বিদাহকৃন্ন ভবতি, কিঞ্চিত্কালস্থিতং তু বিদাহী ভবত্যেব| যবানীত্যাদৌ তক্রে তদাসুতমিতি তক্রাঢকে আসুতম্| জাতমিতি অম্লরসতযা জাতম্||১১৮-১২১||

Adhikarana 34 (122-124) · Śloka 124

স্বস্থানগতমুত্ক্লিষ্টমগ্নিনির্বাপকং ভিষক্| পিত্তং জ্ঞাত্বা বিরেকেণ নির্হরেদ্বমনেন বা||১২২|| অবিদাহিভিরন্নৈশ্চ লঘুভিস্তিক্তসংযুতৈঃ| জাঙ্গলানাং রসৈর্যূষৈর্মুদ্গাদীনাং খডৈরপি||১২৩|| দাডিমাম্লৈঃ সসর্পিষ্কৈর্দীপনগ্রাহিসংযুতৈঃ| তস্যাগ্নিং দীপযেচ্চূর্ণৈঃ সর্পির্ভিশ্চাপি তিক্তকৈঃ||১২৪||

বমনেন বেত্যূর্ধ্বগপিত্তাপেক্ষযা জ্ঞেযম্| সর্পির্ভিশ্চাপি তিক্তকৈরিত্যত্র জাত্যাখ্যাযাং বহুবচনং; কিংবা কুষ্ঠোক্তং তিক্তঘৃতদ্বযমন্যচ্চ তিক্তসাধিতং ঘৃতমিতি বহুবচনং সাধু||১২২-১২৪||

Adhikarana 35 (125-128) · Śloka 128

চন্দনং পদ্মকোশীরং পাঠাং মূর্বাং কুটন্নটম্| ষড্গ্রন্থাসারিবাস্ফোতাসপ্তপর্ণাটরূষকান্||১২৫|| পটোলোদুম্বরাশ্বত্থবটপ্লক্ষকপীতনান্| কটুকাং রোহিণীং মুস্তং নিম্বং চ দ্বিপলাংশিকম্||১২৬|| দ্রোণেঽপাং সাধযেত্ পাদশেষে প্রস্থং ঘৃতাত্ পচেত্| কিরাততিক্তেন্দ্রযববীরামাগধিকোত্পলৈঃ||১২৭|| কল্কৈরক্ষসমৈঃ পেযং তত্ পিত্তগ্রহণীগদে| তিক্তকং যদ্ঘৃতং চোক্তং কৌষ্ঠিকে তচ্চ দাপযেত্||১২৮|| ইতি চন্দনাদ্যং ঘৃতম্|

কুটন্নটং কৈবর্তমুস্তকম্| ষড্গ্রন্থা বচা| আস্ফোতা ‘অস্ফুরমল্লিকা’ ইতি লোকে খ্যাতা| কপীতনঃ ‘গন্ধমুণ্ড’ ইতি খ্যাতঃ||১২৫-১২৮||

Adhikarana 36 (129-131) · Śloka 131

নাগরাতিবিষে মুস্তং ধাতকীং চ রসাঞ্জনম্| বত্সকত্বক্ফলং বিল্বং পাঠাং কটুকরোহিণীম্||১২৯|| পিবেত্ সমাংশং তচ্চূর্ণং সক্ষৌদ্রং তণ্ডুলাম্বুনা| পৈত্তিকে গ্রহণীদোষে রক্তং যচ্চোপবেশ্যতে||১৩০|| অর্শাংসি চ গুদে শূলং জযেচ্চৈব প্রবাহিকাম্| নাগরাদ্যমিদং চূর্ণং কৃষ্ণাত্রেযেণ পূজিতম্||১৩১|| ইতি নাগরাদ্যং চূর্ণম্|

নাগরাদ্যে সক্ষৌদ্রমিতি মধুপ্রক্ষেপযুক্তম্| তণ্ডুলাম্বুনেতি তণ্ডুলধাবনাম্বুনা; অন্যে তু তণ্ডুলাদ্দ্বিগুণমম্লং তণ্ডুলেন সমং চিরং স্থিতং তত্তণ্ডুলাম্বু বদন্তি| কৃষ্ণাত্রেযেণ পূজিতত্বোপদর্শনাদস্য সিদ্ধযোগত্বং দর্শ্যতে; কৃষ্ণাত্রেযঃ পুনর্বসোরভিন্ন এবেতি বৃদ্ধাঃ||১২৯-১৩১||

Adhikarana 37 (132-133) · Śloka 133

ভূনিম্বকটুকাব্যোষমুস্তকেন্দ্রযবান্ সমান্| দ্বৌ চিত্রকাদ্বত্সকত্বগ্ভাগান্ ষোডশ চূর্ণযেত্||১৩২|| গুডশীতাম্বুনা পীতং গ্রহণীদোষগুল্মনুত্| কামলাজ্বরপাণ্ডুত্বমেহারুচ্যতিসারনুত্||১৩৩|| ইতি ভূনিম্বাদ্যং চূর্ণম্|

ভূনিম্বাদ্যে গুডযুতং শীতাম্বু গুডশীতাম্বু; গুডশ্চাত্র গুডবর্ণতামাধুর্যাপত্তিমাত্রো দেযঃ||১৩২-১৩৩||

Adhikarana 38 (134-140) · Śloka 140

বচামতিবিষাং পাঠাং সপ্তপর্ণং রসাঞ্জনম্| স্যোনাকোদীচ্যকট্বঙ্গবত্সকত্বগ্দুরালভাঃ||১৩৪|| দার্বীং পর্পটকং পাঠাং যবানীং মধুশিগ্রুকম্| পটোলপত্রং সিদ্ধার্থান্ যূথিকাং জাতিপল্লবান্||১৩৫|| জম্ব্বাম্রবিল্বমধ্যানি নিম্বশাকফলানি চ| তদ্রোগশমমন্বিচ্ছন্ ভূনিম্বাদ্যেন যোজযেত্||১৩৬|| কিরাততিক্তঃ ষড্গ্রন্থা ত্রাযমাণা কটুত্রিকম্| চন্দনং পদ্মকোশীরং দার্বীত্বক্ কটুরোহিণী||১৩৭|| কুটজত্বক্ফলং মুস্তং যবানী দেবদারু চ| পটোলনিম্বপত্রৈলাসৌরাষ্ট্রযতিবিষাত্বচঃ||১৩৮|| মধুশিগ্রোশ্চ বীজানি মূর্বা পর্পটকস্তথা| তচ্চূর্ণং মধুনা লেহ্যং পেযং মদ্যৈর্জলেন বা||১৩৯|| হৃত্পাণ্ডুগ্রহণীরোগগুল্মশূলারুচিজ্বরান্| কামলাং সন্নিপাতং চ মুখরোগাংশ্চ নাশযেত্||১৪০|| ইতি কিরাতাদ্যং চূর্ণম্|

বচামিত্যাদৌ স্যোনাককট্বঙ্গশব্দাভ্যাং দ্বাবপি পৃথুশিম্বাল্পশিম্বৌ স্যোনাকৌ গৃহ্যেতে| তদ্রোগশমমন্বিচ্ছন্নিতি ভূনিম্বাদ্যুক্তগ্রহণীদোষাদিরোগশান্তিং কাঙ্ক্ষন্| ভূনিম্বাদ্যেনেতি ভূনিম্বাদ্যুক্তদ্রব্যগণেন যথোক্তমানেন যোজযদ্ বচাদীন্; অপরে তু ভূনিম্বাদ্যেনেতি বচনেনাত্র ভূনিম্বাদ্যুক্তগুডশীতাম্বুপেযতামস্যাপ্যতিদিশতীতি বদন্তি||১৩৪-১৪০||

Adhikarana 39 (141-145) · Śloka 145

গ্রহণ্যাং শ্লেষ্মদুষ্টাযাং বমিতস্য যথাবিধি| কট্বম্ললবণক্ষারৈস্তিক্তৈশ্চাগ্নিং বিবর্ধযেত্||১৪১|| পলাশং চিত্রকং চব্যং মাতুলুঙ্গং হরীতকীম্| পিপ্পলীং পিপ্পলীমূলং পাঠাং নাগরধান্যকম্||১৪২|| কার্ষিকাণ্যুদকপ্রস্থে পক্ত্বা পাদাবশেষিতম্| পানীযার্থং প্রযুঞ্জীত যবাগূং তৈশ্চ সাধযেত্||১৪৩|| শুষ্কমূলকযূষেণ কৌলত্থেনাথবা পুনঃ| কট্বম্লক্ষারপটুনা লঘূন্যন্নানি ভোজযেত্||১৪৪|| অম্লং চানু পিবেত্তক্রং তক্রারিষ্টমথাপি বা| মদিরাং মধ্বরিষ্টং বা নিগদং সীধুমেব বা||১৪৫||

পানীযার্থং পানায| কট্বম্লক্ষারপটুনেতি কট্বাদিযোগাত্ পটুনা ইন্দ্রিযোত্তেজকেনেত্যর্থঃ| কফগ্রহণ্যাং সদ্যস্কমেব যদ্যপি কষাযত্বাত্তক্রমুচিতং, তথাঽপি অগ্নিদীপনতযা অম্লমেব তক্রং ‘অম্লং চানুপিবেত্’ ইত্যনেনৈবোক্তম্| নিগদং সীধুমিতি নির্দোষং সীধুম্||১৪১-১৪৫||

Adhikarana 40 (146-151) · Śloka 151

দ্রোণং মধূকপুষ্পাণাং বিডঙ্গানাং ততোঽর্ধতঃ| চিত্রকস্য ততোঽর্ধং স্যাত্তথা ভল্লাতকাঢকম্||১৪৬|| মঞ্জিষ্ঠাষ্টপলং চৈব ত্রিদ্রোণেঽপাং বিপাচযেত্| দ্রোণশেষং তু তচ্ছীতং মধ্বর্ধাঢকসংযুতম্||১৪৭|| এলামৃণালাগুরুভিশ্চন্দনেন চ রূষিতে| কুম্ভে মাসস্থিতং জাতমাসবং তং প্রযোজযেত্||১৪৮|| গ্রহণীং দীপযত্যেব বৃংহণঃ কফপিত্তজিত্| শোথং কুষ্ঠং কিলাসং চ প্রমেহাংশ্চ প্রণাশযেত্||১৪৯|| ইতি মধূকাসবঃ| মধূকপুষ্পস্বরসং শৃতমর্ধক্ষযীকৃতম্| ক্ষৌদ্রপাদযুতং শীতং পূর্ববত্ সন্নিধাপযেত্||১৫০|| তং পিবন্ গ্রহণীদোষাঞ্জযেত্ সর্বান্ হিতাশনঃ| তদ্বদ্দ্রাক্ষেক্ষুখর্জূরস্বরসানাসুতান্ পিবেত্||১৫১||

অর্ধক্ষযীকৃতমিতি পাকাদর্ধাবশিষ্টং কৃতম্| পূর্ববত্সন্নিধাপযেদিতি এলাদিলিপ্তে কুম্ভে সংস্থাপযেত্||১৪৬-১৫১||

Adhikarana 41 (152-159) · Śloka 159

প্রস্থৌ দুরালভাযা দ্বৌ পস্থমামলকস্য চ| দন্তীচিত্রকমুষ্টী দ্বে প্রত্যগ্রং চাভযাশতম্||১৫২|| চতুর্দ্রোণেঽম্ভসঃ পক্ত্বা শীতং দ্রোণাবশেষিতম্| সগুডদ্বিশতং পূতং মধুনঃ কুডবাযুতম্||১৫৩|| তদ্বত্ প্রিযঙ্গোঃ পিপ্পল্যা বিডঙ্গানাং চ চূর্ণিতৈঃ| কুডবৈর্ঘৃতকুম্ভস্থং পক্ষাজ্জাতং ততঃ পিবেত্||১৫৪|| গ্রহণীপাণ্ডুরোগার্শঃকুষ্ঠবীসর্পমেহনুত্| স্বরবর্ণকরশ্চৈষ রক্তপিত্তকফাপহঃ||১৫৫|| ইতি দুরালভাসবঃ| হরিদ্রা পঞ্চমূলে দ্বে বীরর্ষভকজীবকম্| এষাং পঞ্চপলান্ ভাগাংশ্চতুর্দ্রোণেঽম্ভসঃ পচেত্||১৫৬|| দ্রোণশেষে রসে পূতে গুডস্য দ্বিশতং ভিষক্| চূর্ণিতান্ কুডবার্ধাংশান্ প্রক্ষিপেচ্চ সমাক্ষিকান্||১৫৭|| প্রিযঙ্গুমুস্তমঞ্জিষ্ঠাবিডঙ্গমধুকপ্লবান্| লোধ্রং শাবরকং চৈব মাসার্ধস্থং পিবেত্তু তম্||১৫৮|| এষ মূলাসবঃ সিদ্ধো দীপনো রক্তপিত্তজিত্| আনাহকফহৃদ্রোগপাণ্ডুরোগাঙ্গসাদনুত্||১৫৯|| ইতি মূলাসবঃ|

দন্তীচিত্রকমুষ্টী দ্বে ইতি চিত্রকদন্ত্যোর্মিলিত্বা দ্বিপলম্| তদ্বদিতি এলাদিনা লিপ্তবৃহত্কুম্ভস্থম্||১৫২-১৫৯||

Adhikarana 42 (160-162) · Śloka 162

প্রাস্থিকং পিপ্পলীং পিষ্ট্বা গুডং মধ্যং বিভীতকাত্| উদকপ্রস্থসংযুক্তং যবপল্লে নিধাপযেত্||১৬০|| তস্মাত্ পলং সুজাতাত্তু সলিলাঞ্জলিসংযুতম্| পিবেত্পিণ্ডাসবো হ্যেষ রোগানীকবিনাশনঃ||১৬১|| স্বস্থোঽপ্যেনং পিবেন্মাসং নরঃ স্নিগ্ধরসাশনঃ | ইচ্ছংস্তেষামনুত্পত্তিং রোগাণাং যেঽত্র কীর্তিতাঃ||১৬২|| ইতি পিণ্ডাসবঃ|

প্রাস্থিকমিত্যাদৌ পিপ্পলীগুডবিভীতকমজ্জানঃ প্রত্যেকং প্রস্থমানাঃ| স্নিগ্ধরসাশন ইতি স্নেহবন্মাংসরসভোজনঃ||১৬০-১৬২||

Adhikarana 43 (163-167) · Śloka 167

নবে পিপ্পলিমধ্বাক্তে কলসেঽগুরুধূপিতে| মধ্বাঢকং জলসমং চূর্ণানীমানি দাপযেত্||১৬৩|| কুডবার্ধং বিডঙ্গানাং পিপ্পল্যাঃ কুডবং তথা| চতুর্থিকাংশাং ত্বক্ক্ষীরীং কেশরং মরিচানি চ||১৬৪|| ত্বগেলাপত্রকশটীক্রমুকাতিবিষাঘনান্| হরেণ্বেল্বালুতেজোহ্বাপিপ্পলীমূলচিত্রকান্||১৬৫|| কার্ষিকাংস্তত্ স্থিতং মাসমত ঊর্ধ্বং প্রযোজযেত্| মন্দং সন্দপযত্যগ্নিং করোতি বিষমং সমম্||১৬৬|| হৃত্পাণ্ডুগ্রহণীরোগকুষ্ঠার্শঃশ্বযথুজ্বরান্| বাতশ্লেষ্মামযাংশ্চান্যান্মধ্বরিষ্টো ব্যপোহতি||১৬৭|| ইতি মধ্বরিষ্টঃ|

নবে ইত্যাদৌ ত্বগেলাদীনাং কার্ষিকত্বম্||১৬৩-১৬৭||

Adhikarana 44 (168-170) · Śloka 170

সমূলাং পিপ্পলীং ক্ষারৌ দ্বৌ পঞ্চ লবণানি চ| মাতুলুঙ্গাভযারাস্নাশটীমরিচনাগরম্||১৬৮|| কৃত্বা সমাংশং তচ্চূর্ণং পিবেত্ প্রাতঃ সুখাম্বুনা| শ্লেষ্মিকে গ্রহণীদোষে বলবর্ণাগ্নিবর্ধনম্||১৬৯|| এতৈরেবৌষধৈঃ সিদ্ধং সর্পিঃ পেযং সমারুতে| গৌল্মিকে ষট্পলং প্রোক্তং ভল্লাতকঘৃতং চ যত্||১৭০||

সমূলাং পিপ্পলীমিতি পিপ্পলীং পিপ্পলীমূলং চ| ভল্লাতকঘৃতং চ গুল্মোক্তমিতি জ্ঞেযম্||১৬৮-১৭০||

Adhikarana 45 (171-178) · Śloka 178

বিডং কালোত্থলবণং সর্জিকাযবশূকজম্| সপ্তলাং কণ্টকারীং চ চিত্রকং চেতি দাহযেত্||১৭১|| সপ্তকৃত্বঃ স্রুতস্যাস্য ক্ষারস্য দ্ব্যাঢকেন তু| আঢকং সর্পিষঃ পক্ত্বা পিবেদগ্নিবিবর্ধনম্||১৭২|| ইতি ক্ষারঘৃতম্| সমূলাং পিপ্পলীং পাঠাং চব্যেন্দ্রযবনাগরম্| চিত্রকাতিবিষে হিঙ্গু শ্বদংষ্ট্রাং কটুরোহিণীম্||১৭৩|| বচাং চ কার্ষিকং পঞ্চলবণানাং পলানি চ| দধ্নঃ প্রস্থদ্বযে তৈলসর্পিষোঃ কুডবদ্বযে||১৭৪|| খণ্ডীকৃতানি নিষ্ক্বাথ্য শনৈরন্তর্গতে রসে| অন্তর্ধূমং ততো দগ্ধবা চূর্ণং কৃত্বা ঘৃতাপ্লুতম্||১৭৫|| পিবেত্ পাণিতলং তস্মিঞ্জীর্ণে স্যান্মধুরাশনঃ| বাতশ্লেষ্মামযান্সর্বান্হন্যাদ্বিষগরাংশ্চ সঃ||১৭৬|| ভল্লাতকং ত্রিকটুকং ত্রিফলাং লবণত্রযম্| অন্তর্ধূমং দ্বিপলিকং গোপুরীষাগ্নিনা দহেত্||১৭৭|| স ক্ষারঃ সর্পিষা পীতো ভোজ্যে বাঽপ্যবচূর্ণিতঃ| হৃত্পাণ্ডুগ্রহণীদোষগুল্মোদাবর্তশূলনুত্||১৭৮||

বিডং কালোত্থলবণমিতি বিডং বিডলবণং, কাললবণং তু সৌবর্চললবণমিত্যর্থঃ| খণ্ডীকৃতানীতি খণ্ডং খণ্ডং কৃতানি| অনুগতে রসে ইতি নিপীতে দ্রবে| পাণিতলমিতি কর্ষঃ| মধুরাশনত্বমিহ ক্ষারপ্রযোগাভিচ্ছেদকত্বহন্তৃতযা যৌগিকত্বাজ্জ্ঞেযম্||১৭১-১৭৮||

Adhikarana 46 (179-180) · Śloka 180

দুরালভাং করঞ্জৌ দ্বৌ সপ্তপর্ণং সবত্সকম্| ষড্গ্রন্থাং মদনং মূর্বাং পাঠামারগ্বধং তথা||১৭৯|| গোমূত্রেণ সমাংশানি কৃত্বা চূর্ণানি দাহযেত্| দগ্ধ্বা চ তং পিবেত্ ক্ষারং গ্রহণীবলবর্ধনম্||১৮০||

গোমূত্রেণ সমাংশানীতি গোমূত্রেণ মিলিতং চূর্ণং তুল্যম্| অস্য চ পানং পূর্বক্ষারবত্ সর্পিষা জ্ঞেযম্||১৭৯-১৮০||

Adhikarana 47 (181-182) · Śloka 182

ভূনিম্বং রোহিণীং তিক্তাং পটোলং নিম্বপর্পটম্| দহেন্মাহিষমূত্রেণ ক্ষার এষোঽগ্নিবর্ধনঃ||১৮১|| দ্বে হরিদ্রে বচা কুষ্ঠং চিত্রকঃ কটুরোহিণী| মুস্তং চ বস্তমূত্রেণ দহেত্ ক্ষারোঽগ্নিবর্ধনঃ||১৮২||

মাহিষমূত্রেণেত্যাদৌ চূর্ণসমত্বং মাহিষমূত্রস্য, পূর্বপ্রযোগদৃষ্টত্বাত্||১৮১-১৮২||

Adhikarana 48 (183-187) · Śloka 187

চতুষ্পলং সুধাকাণ্ডাত্ত্রিপলং লবণত্রযাত্| বার্তাকীকুডবং চার্কাদষ্টৌ দ্বে চিত্রকাত্ পলে||১৮৩|| দগ্ধানি বার্তাকুরসে গুটিকা ভোজনোত্তরাঃ| ভুক্তং ভুক্তং পচন্ত্যাশু কাসশ্বাসার্শসাং হিতাঃ||১৮৪|| বিসূচিকাপ্রতিশ্যাযহৃদ্রোগশমনাশ্চ তাঃ| ইত্যেষা ক্ষারগুটিকা কৃষ্ণাত্রেযেণ কীর্তিতা||১৮৫|| ইতি ক্ষারগুডিকা| বত্সকাতিবিষে পাঠাং দুঃস্পর্শাং হিঙ্গু চিত্রকম্| চূর্ণীকৃত্য পলাশাগ্রক্ষারে মূত্রস্রুতে পচেত্||১৮৬|| আযসে ভাজনে সান্দ্রাত্তস্মাত্ কোলং সুখাম্বুনা| মদ্যৈর্বা গ্রহণীদোষশোথার্শঃপাণ্ডুমান্ পিবেত্||১৮৭|| ইতি চতুর্থক্ষারঃ|

চতুষ্পলমিত্যাদৌ, ‘চতুষ্পলং সুধাকাণ্ডাত্ত্রিফলালবণানি চ’ ইতি যে পঠন্তি, তে ত্রিফলালবণৈর্মিলিত্বা চতুষ্পলং বদন্তি| দগ্ধানি বার্তাকুরসে ইতি ক্ষারীভূতানি পুনর্বার্তাকুরসে গুটিকাঃ কর্তব্যাঃ||১৮৩-১৮৭||

Adhikarana 49 (188-193) · Śloka 193

ত্রিফলাং কটভীং চব্যং বিল্বমধ্যমযোরজঃ| রোহিণীং কটুকাং মুস্তং কুষ্ঠং পাঠাং চ হিঙ্গু চ||১৮৮|| মধুকং মুষ্ককযবক্ষারৌ ত্রিকটুকং বচাম্| বিডঙ্গং পিপ্পলীমূলং স্বর্জিকাং নিম্বচিত্রকৌ||১৮৯|| মূর্বাজমোদেন্দ্রযবান্ গুডূচীং দেবদারু চ| কার্ষিকং লবণানাং চ পঞ্চানাং পলিকান্পৃথক্||১৯০|| ভাগান্ দধ্নি ত্রিকুডবে ঘৃততৈলেন মূর্চ্ছিতম্| অন্তর্ধূমং শনৈর্দগ্ধ্বা তস্মাত্ পাণিতলং পিবেত্||১৯১|| সর্পিষা কফবাতার্শোগ্রহণীপাণ্ডুরোগবান্| প্লীহমূত্রগ্রহশ্বাসহিক্কাকাসক্রিমিজ্বরান্||১৯২|| শোষাতিসারৌ শ্বযথুং প্রমেহানাহহৃদ্গ্রহান্| হন্যাত্ সর্ববিষং চৈব ক্ষারোঽগ্নিজননো বরঃ||১৯৩|| জীর্ণে রসৈর্বা মধুরৈরশ্নীযাত্ পযসাঽপি বা| ইতি পঞ্চমক্ষারঃ|

ত্রিফলামিত্যাদৌ মুষ্ককং ঘণ্টাপাটলকম্| ঘৃততৈলেনেত্যত্র দধিসাহচর্যাদ্ঘৃততৈলস্যাপি মিলিতস্য কুডবত্রযম্||১৮৮-১৯৩||-

Adhikarana 50 (194-195) · Śloka 196

ত্রিদোষে বিধিবিদ্বৈদ্যঃ পঞ্চ কর্মাণি কারযেত্||১৯৪|| ঘৃতক্ষারাসবারিষ্টান্ দদ্যাচ্চাগ্নিবিবর্ধনান্| ক্রিযা যা চানিলাদীনাং নির্দিষ্টা গ্রহণীং প্রতি||১৯৫|| ব্যত্যাসাত্তাং সমস্তাং বা কুর্যাদ্দোষবিশেষবিত্|১৯৬|

ত্রিদোষে পঞ্চকর্মাণীত্যত্র শিরোবিরেচনস্যাযৌগিকত্বেঽপ্যত্র ভূযসাং কর্মণাং যৌগিকত্বাত্ পঞ্চকর্মাণীতি কৃতং, কিংবা শিরোরোগাদিসদ্ভাবে শিরোবিরেচনমপ্যত্র দেযমেব| ব্যত্যাসাত্তাং সমস্তাং চেতি উক্তবাতাদিক্রিযাং ব্যত্যাসাদেকৈকদোষক্রিযাপরিবর্তনেন কুর্যাত্, কিংবা মিলিতৈরপি ক্রিযা এককালং কর্তব্যা; ক্রিযামেলনং চ বাতাদিদ্রব্যমেলনাদেব ভবতি||১৯৪-১৯৫||-

Adhikarana 51 (196-197) · Śloka 198

স্নেহনং স্বেদনং শুদ্ধির্লঙ্ঘনং দীপনং চ যত্||১৯৬|| চূর্ণানি লবণক্ষারমধ্বরিষ্টসুরাসবাঃ| বিবিধাস্তক্রযোগাশ্চ দীপনানাং চ সর্পিষাম্||১৯৭|| গ্রহণীরোগিভিঃ সেব্যাঃ, ...|১৯৮|

স্নেহনমিত্যাদিনা গ্রহণীদোষভেষজং সঙ্কলয্যাহ||১৯৬-১৯৭||-

Adhikarana 52 (198-200) · Śloka 201

... ক্রিযাং চাবস্থিকীং শৃণু| ষ্ঠীবনং শ্লৈষ্মিকে রূক্ষং দীপনং তিক্তসংযুতম্||১৯৮|| সকৃদ্রূক্ষং সকৃত্স্নিগ্ধং কৃশে বহুকফে হিতম্| পরীক্ষ্যামং শরীরস্য দীপনং স্নেহসংযুতম্||১৯৯|| দীপনং বহুপিত্তস্য তিক্তং মধুরসংযুতম্| বহুবাতস্য তু স্নেহলবণাম্লযুতং হিতম্||২০০|| সন্ধুক্ষতি তথা বহ্নিরেষাং বিধিবদিন্ধনৈঃ|২০১|

ক্রিযাং চাবস্থিকীমিতি গ্রহণীদোষ এব অবস্থাবিশেষে কর্তব্যাং ক্রিযাং শৃণু| সকৃদ্রূক্ষং সকৃত্স্নিগ্ধং কৃশ ইতি যদি রূক্ষমেব ক্রিযতে তদা কৃশস্য বলহানিঃ স্যাত্, অথ স্নিগ্ধমেব ক্রিযতে তদা বহুকফে কফবৃদ্ধিঃ স্যাত্, তেনোভযাপেক্ষযা অন্তরা রূক্ষমন্তরা চ স্নিগ্ধং কর্তব্যমিত্যর্থঃ| স্নেহলবণাম্লযুতমিতি দীপনমিত্যর্থঃ| সন্ধুক্ষতি বিধিবদিন্ধনৈরিতি যথাবিধানদীপিত ইত্যর্থঃ||১৯৮-২০০||-

Adhikarana 53 (201-205) · Śloka 205

স্নেহমেব পরং বিদ্যাদ্দুর্বলানলদীপনম্||২০১|| নালং স্নেহসমিদ্ধস্য শমাযান্নং সুগুর্বপি| মন্দাগ্নিরবিপক্বং তু পুরীষং যোঽতিসার্যতে||২০২|| দীপনীযৌষধৈর্যুক্তাং ঘৃতমাত্রাং পিবেত্তু সঃ| তযা সমানঃ পবনঃ প্রসন্নো মার্গমাস্থিতঃ||২০৩|| অগ্নেঃ সমীপচারিত্বাদাশু প্রকুরুতে বলম্| কাঠিন্যাদ্যঃ পুরীষং তু কৃচ্ছ্রান্মুঞ্চতি মানবঃ||২০৪|| সঘৃতং লবণৈর্যুক্তং নরোঽন্নাবগ্রহং পিবেত্| রৌক্ষ্যান্মন্দে পিবেত্সর্পিস্তৈলং বা দীপনৈর্যুতম্||২০৫||

উক্তানুক্তস্নেহফলমবধারযন্নাহ- স্নেহমেবেত্যাদি| পরমিতি শ্রেষ্ঠম্| স্নেহস্য দীপনশ্রেষ্ঠত্বে হেতুমাহ- নালমিত্যাদিনা| নালমিতি ন সমর্থম্| স্নেহসমিদ্ধস্যেতি স্নেহদীপ্তস্য| স্নেহশব্দেনাত্র সামান্যবাচিনা সর্পিরেবোচ্যতে, সর্পিষ এবাত্রাধিকারাত্| মন্দাগ্নিরিত্যাদৌ অবিপক্বমিতি পুরীষবিশেষণং; তেনাবিপক্বশব্দেনেহ রসামস্য গ্রহণং ন ভবতি, রসামে “জঠরামগরার্দিতাঃ” (সূ.অ.১৩) ইত্যত্র স্নেহো নিষিদ্ধঃ, স্নেহাপক্বপুরীষং প্রতি স্নেহপ্রযোগো বিরুদ্ধ এব; কিঞ্চ দীপনীযৌষধসংস্কারাদপি স্নেহস্য সংস্কারগুণাবিঘাতাদেব অপক্বপুরীষং প্রতি হিতত্বং ভবতি; স্নেহাংশস্তু বাতপ্রগুণতাকরণত্বেন সহাযতযা উপাদীযতে, অত এবোক্তং- তযা সমান ইত্যাদি| প্রসন্ন ইতি দুষ্টিবিরহতঃ| মার্গমাস্থিত ইতি স্বাভাবিকমার্গমাপন্নঃ| সমীপচারিত্বাদিতি প্রসন্নত্বাদিগুণযোগে সতি অগ্নিপার্শ্বস্থিতত্বাদ্বলমেব বহ্নেঃ করোতি ন বৈষম্যম্, অগ্নিদীপ্তিকরত্বস্বভাবাদিত্যর্থঃ| অন্নাবগ্রহমিতি অন্নেনাবগ্রহোঽস্যেতি অন্নাবগ্রহঃ; অন্নমধ্যপ্রযুক্তমিত্যর্থঃ||২০১-২০৫||

Adhikarana 54 (206-210) · Śloka 211

অতিস্নেহাত্তু মন্দেঽগ্নৌ চূর্ণারিষ্টাসবা হিতাঃ| ভিন্নে গুদোপলেপাত্তু মলে তৈলসুরাসবাঃ||২০৬|| উদাবর্তাত্তু মন্দেঽগ্নৌ নিরূহাঃ স্নেহবস্তযঃ| দোষবৃদ্ধ্যা তু মন্দেঽগ্নৌ শুদ্ধো দোষবিধিং চরেত্||২০৭|| ব্যাধিযুক্তস্য মন্দে তু সর্পিরেবাগ্নিদীপনম্| উপবাসাচ্চ মন্দেঽগ্নৌ যবাগূভিঃ পিবেদ্ঘৃতম্||২০৮|| অন্নাবপীডিতং বল্যং দীপনং বৃংহণং চ তত্| দীর্ঘকালপ্রসঙ্গাত্তু ক্ষামক্ষীণকৃশান্নরান্||২০৯|| প্রসহানাং রসৈঃ সাম্লৈর্ভোজযেত্ পিশিতাশিনাম্| লঘু, তীক্ষ্ণোষ্ণশোধিত্বাদ্দীপযন্ত্যাশু তেঽনলম্||২১০|| মাংসোপচিতমাংসত্বাত্তথাঽঽশুতরবৃংহণাঃ|২১১|

অতিস্নেহান্মন্দেঽগ্নৌ সতি চূর্ণারিষ্টাদীনি যোজ্যানি| ভিন্নে ইতি বিশিষ্টগুদোপলেপাদগ্নৌ মন্দে, তৈলসুরাসবা দেযা ইতি বাক্যার্থঃ| দোষবিধিং চরেদিতি অগ্নিমান্দ্যকারকদোষৌষধবিধিং কুর্যাত্| অন্নাবপীডিতং যথা ভবতি তথা যবাগূভির্ঘৃতং পিবেত্; অন্নাবপীডিতং চ মধ্যভোজনপীতং ঘৃতং ভবতি| দীর্ঘকালেত্যাদৌ ক্ষামো ব্যবসাযশূন্যঃ , ক্ষীণো দুর্বলঃ, কৃশো হীনমাংসঃ| প্রসহানাং দ্বৈবিধ্যান্মাংসাশিনামিতি বিশেষণং, তেন তৃণাদপ্রসহানাং গবাদীনাং নিষেধঃ| ননু প্রসহাঃ “গুরূষ্ণস্নিগ্ধমধুরা” (সূ.অ.২৭) ইত্যন্নপানে উক্তং, ইহ তু লঘুতীক্ষ্ণেত্যাদিনা কথং লাঘবমুচ্যতে তেষাং? মৈবং, ভোজযেল্লঘ্বিতি যোজনাত্; তেন প্রসহানাং মধ্যে যে লঘবস্তেষাং রসেনাত্র লঘ্বন্নং ভোজযেত্| তীক্ষ্ণেত্যাদিনা প্রসহগুণাভিধানম্| অন্যে তু প্রসহান্তরাপেক্ষযা যে প্রসহা লঘবস্তেষমিহ লঘুশব্দেনোপাদানম্, তথাঽন্যে অম্লাদিযোগাত্ সংস্কারেণেহ লাঘবং সাধযন্তি; এতেন রাজযক্ষ্মচিকিত্সিতেঽপি প্রসহগুণাস্তীক্ষ্ণোষ্ণলঘুত্বাদয উক্তাস্তে ন্যায্যা এব||২০৬-২১০||-

Adhikarana 55 (211-216) · Śloka 217

নাভোজনেন কাযাগ্নির্দীপ্যতে নাতিভোজনাত্||২১১|| যথা নিরিন্ধনো বহ্নিরল্পো বাঽতীন্ধনাবৃতঃ| স্নেহান্নবিধিভিশ্চিত্রৈশ্চূর্ণারিষ্টসুরাসবৈঃ ||২১২|| সম্যক্প্রযুক্তৈর্ভিষজা বলমগ্নেঃ প্রবর্ধতে| যথা হি সারদার্বগ্নিঃ স্থিরঃ সন্তিষ্ঠতে চিরম্||২১৩|| স্নেহান্নবিধিভিস্তদ্বদন্তরগ্নির্ভবেত্ স্থিরঃ| হিতং জীর্ণে মিতং চাশ্নংশ্চিরমারোগ্যমশ্নুতে||২১৪|| অবৈষম্যেণ ধাতূনামগ্নিবৃদ্ধৌ যতেত না| সমৈর্দোষৈঃ সমো মধ্যে দেহস্যোষ্মাঽগ্নিসংস্থিতঃ||২১৫|| পচত্যন্নং তদারোগ্যপুষ্ট্যাযুর্বলবৃদ্ধযে| দোষৈর্মন্দোঽতিবৃদ্ধো বা বিষমৈর্জনযেদ্গদান্||২১৬|| বাচ্যং মন্দস্য তত্রোক্তমতিবৃদ্ধস্য বক্ষ্যতে|২১৭|

নাভোজনেনেত্যাদিনা অভোজনাতিভোজননিরাসং কৃত্বাঽন্নসম্যক্প্রযোগস্যাগ্নিজনকতামাহ| অভোজনেনেত্যনেনাভোজনমল্পভোজনং চ গৃহ্যতে| অল্পো বা অতীন্ধনাবৃতো বা ন দীপ্যতে ইতি যোজনা| সারদার্বগ্নিরিতি সারদার্বাশ্রযোঽগ্নিঃ সারদার্বগ্নিঃ| স্নেহবদন্নং স্নেহান্নম্| মিতমিতি মাত্রাবত্, যদ্যপি চ হিতমিতাশিনোঽপি কালবিপর্যযাদিনা রোগা ভবন্ত্যেব, তথাঽপি হিতমিতাশিনাং নাহারজরোগোত্পত্তির্ভবতীতি দর্শযতি| চিরমারোগ্যমশ্নুতে ইতি আহারজরোগং ন প্রাপ্নোতীতি ভাবঃ| অবৈষম্যেণ ধাতূনামিতি ধাতুসাম্যেন ক্রিযমাণাযামগ্নিবৃদ্ধৌ যতেত; এতেন দোষবৈষম্যেণ পিত্তোদ্রেকরূপেণ যাঽগ্নিবৃদ্ধিরত্যগ্নিরূপা, তাং নিষেধযতি| সমৈরিত্যাদিনাঽগ্নিভেদান্ সমাগ্নিপরিপালনার্থমাহ| মধ্যে ইতি নাতিসমীপে| অগ্নিসঞ্জ্ঞিত ইতি ভাষযা ঊষ্মারূপে জাঠরাগ্নৌ বাহ্যাগ্নিনা সাম্যং নিষেধযতি| দোষৈরিতি সামান্যোক্তেঽপি যোগ্যতযা কফপিত্তবাতৈর্যথাক্রমমেব মন্দতীক্ষ্ণবিষমত্বানি জ্ঞেযানি| বাচ্যমিতি প্রতিক্রিযার্থং বচনীযং চিকিত্সিতমিতি যাবত্||২১১-২১৬||-

Adhikarana 56 (217-234) · Śloka 235

নরে ক্ষীণকফে পিত্তং কুপিতং মারুতানুগম্||২১৭|| স্বোষ্মণা পাবকস্থানে বলমগ্নেঃ প্রযচ্ছতি| তদা লব্ধবলো দেহে বিরূক্ষে সানিলোঽনলঃ||২১৮|| পরিভূয পচত্যন্নং তৈক্ষ্ণ্যাদাশু মুহুর্মুহুঃ| পক্ত্বাঽন্নং স ততো ধাতূঞ্ছোণিতাদীন্ পচত্যপি||২১৯|| ততো দৌর্বল্যমাতঙ্কান্মৃত্যুং চোপনযেন্নরম্| ভুক্তেঽন্নে লভতে শান্তিং জীর্ণমাত্রে প্রতাম্যতি||২২০|| তৃট্শ্বাসদাহমূর্চ্ছাদ্যা ব্যাধযোঽত্যগ্নিসম্ভবাঃ| তমত্যগ্নিং গুরুস্নিগ্ধশীতৈর্মধুরবিজ্জলৈঃ||২২১|| অন্নপানৈর্নযেচ্ছান্তিং দীপ্তমগ্নিমিবাম্বুভিঃ| মুহুর্মুহুরজীর্ণেঽপি ভোজ্যান্যস্যোপহারযেত্||২২২|| নিরিন্ধনোঽন্তরং লব্ধ্বা যথৈনং ন বিপাদযেত্| পাযসং কৃশরাং স্নিগ্ধং পৈষ্টিকং গুডবৈকৃতম্||২২৩|| অদ্যাত্তথৌদকানূপপিশিতানি ভৃতানি চ| মত্স্যান্বিশেষতঃ শ্লক্ষ্ণান্স্থিরতোযচরাংস্তথা||২২৪|| আবিকং চ ভৃতং মাংসমদ্যাদত্যগ্নিনাশনম্ | যবাগূং সমধূচ্ছিষ্টাং ঘৃতং বা ক্ষুধিতঃ পিবেত্||২২৫|| গোধূমচূর্ণমন্থং বা ব্যধযিত্বা সিরাং পিবেত্| পযো বা শর্করাসর্পির্জীবনীযৌষধৈঃ শৃতম্||২২৬|| ফলানাং তৈলযোনীনামুত্ক্রুঞ্চাশ্চ সশর্করাঃ| মার্দবং জনযন্ত্যগ্নেঃ স্নিগ্ধা মাংসরসাস্তথা||২২৭|| পিবেচ্ছীতাম্বুনা সর্পির্মধূচ্ছিষ্টেন সংযুতম্| গোধূমচূর্ণং পযসা সসর্পিষ্কং পিবেন্নরঃ||২২৮|| আনূপরসসিদ্ধান্ বা ত্রীন্ স্নেহাংস্তৈলবর্জিতান্| পযসা সম্মিতং চাপি ঘনং ত্রিস্নেহসংযুতম্||২২৯|| নারিস্তন্যেন সংযুক্তাং পিবেদৌদুম্বরীং ত্বচম্| তাভ্যাং বা পাযসং সিদ্ধমদ্যাদত্যগ্নিশান্তযে||২৩০|| শ্যামাত্রিবৃদ্বিপক্বং বা পযো দদ্যাদ্বিরেচনম্| অসকৃত্ পিত্তশান্ত্যর্থং পাযসপ্রতিভোজনম্||২৩১|| প্রসমীক্ষ্য ভিষক্ প্রাজ্ঞস্তস্মৈ দদ্যাদ্বিধানবিত্| যত্কিঞ্চিন্মধুরং মেদ্যং শ্লেষ্মলং গুরুভোজনম্||২৩২|| সর্বং তদত্যগ্নিহিতং ভুক্ত্বা প্রস্বপনং দিবা| মেদ্যান্যন্নানি যোঽত্যগ্নাবপ্রতান্তঃ সমশ্নুতে||২৩৩|| ন তন্নিমিত্তং ব্যসনং লভতে পুষ্টিমেব চ| কফে বৃদ্ধে জিতে পিত্তে মারুতে চানলঃ সমঃ||২৩৪|| সমধাতোঃ পচত্যন্নং পুষ্ট্যাযুর্বলবৃদ্ধযে|২৩৫|

পিত্তং পাবকস্থানে কুপিতমিতি সম্বন্ধঃ| তচ্চ পিত্তং মারুতানুগতত্বাদত্যগ্নিকরং ভবতি; এবং ধর্মভেদাদ্বিরুদ্ধকার্যকরং জ্ঞেযম্| পিত্তোষ্মরূপস্যাপি চ বহ্নেঃ প্রাদেশিকপিত্তোষ্মণো হানিজনকত্বং জন্যজনকযোর্ভেদত্বাদুপপন্নমেব জ্ঞেযম্| স্থিরতোযচরানিত্যনেন স্থিরতোযচারিণাং নিষ্ক্রিযতযা গৌরবাতিশযং দর্শযতি| তিলবাতামাদীনাং দৃষদি পিষ্টানামুষ্ণোদকমৃদিতা পিণ্ডা উত্ক্রুঞ্চা উচ্যন্তে, ‘উত্কারিকা’ ইত্যন্যে| ঘনং ত্রিস্নেহসংযুতমিত্যত্র ঘনশব্দেন দধ্যুচ্যতে| পাযসেন প্রতিভোজনং যস্মিন্ পিত্তহরণে তত্ পাযসপ্রতিভোজনম্| মেদ্যমিতি মেদুরং মেদোজনকং বা| অপ্রতান্ত ইতি অবুভুক্ষিতঃ| ব্যসনং মরণমিত্যর্থঃ | পুষ্টিমেব চ লভতে ইতি যোজ্যম্||২১৭-২৩৪||-

Adhikarana 57 (235-243) · Śloka 243

ভবন্তি চাত্র- পথ্যাপথ্যমিহৈকত্র ভুক্তং সমশনং মতম্||২৩৫|| বিষমং বহু বাঽল্পং বাঽপ্যপ্রাপ্তাতীতকালযোঃ| ভুক্তং পূর্বান্নশেষে তু পুনরধ্যশনং মতম্||২৩৬|| ত্রীণ্যপ্যেতানি মৃত্যুং বা ঘোরান্ ব্যাধীন্সৃজন্তি বা| প্রাতরাশে ত্বজীর্ণেঽপি সাযমাশো ন দুষ্যতি||২৩৭|| দিবা প্রবুধ্যতেঽর্কেণ হৃদযং পুণ্ডরীকবত্| তস্মিন্বিবুদ্ধে স্রোতাংসি স্ফুটত্বং যান্তি সর্বশঃ||২৩৮|| ব্যাযামাচ্চ বিহারাচ্চ বিক্ষিপ্তত্বাচ্চ চেতসঃ| ন ক্লেদমুপগচ্ছন্তি দিবা তেনাস্য ধাতবঃ||২৩৯|| অক্লিন্নেষ্বন্নমাসিক্তমন্যত্তেষু ন দুষ্যতি| অবিদগ্ধ ইব ক্ষীরে ক্ষীরমন্যদ্বিমিশ্রিতম্||২৪০|| নৈব দূষ্যতি তেনৈব সমং সম্পদ্যতে যথা| রাত্রৌ তু হৃদযে ম্লানে সংবৃতেষ্বযনেষু চ| যান্তি কোষ্ঠে পরিক্লেদং সংবৃতে দেহধাতবঃ||২৪১|| ক্লিন্নেষ্বন্যদপক্বেষু তেষ্বাসিক্তং প্রদুষ্যতি| বিদগ্ধেষু পযঃস্বন্যত্ পযস্তপ্তমিবার্পিতম্||২৪২|| নৈশেষ্বাহারজাতেষু নাবিপক্বেষু বুদ্ধিমান্| তস্মাদন্যত্সমশ্নীযাত্পালযিষ্যন্বলাযুষী||২৪৩||

সম্প্রতি প্রাগুক্তসমশনাদিলক্ষণমাহ- পথ্যাপথ্যমিত্যাদি| পথ্যাপথ্যং কিঞ্চিদেকত্র মিলিতং, যথা- রক্তশাল্যন্নং যবকান্নং চ মিলিতম্| বহুভুক্তমল্পভুক্তং বা তথাঽপ্রাপ্তমতীতকালং চ ভুক্তং বিষমমুচ্যতে| পূর্বান্নেত্যাদি দিবা ভুক্তস্যোপরি তদহরেব পুনর্ভুজ্যতে তদধ্যশনং; তন্নিষেধযন্নাহ- প্রাতরাশে ইত্যাদি| অশনমাশো ভোজনমিত্যর্থঃ| কস্মান্ন দূষ্যতীত্যাহ- দিবেত্যাদি| স্ফুটত্বমিতি বিবৃতত্বং, বিবৃতত্বাচ্চ স্রোতসাং স্রোতোভির্বহনেন রসোঽব্যাহতগতির্ভবতি, ততশ্চ ন ক্লেদং স্রোতাংসি যান্তি; তথা ব্যাযামাদিভিশ্চ শোষ্যমাণানি ন ক্লেদমুপযান্তি স্রোতাংসি| ব্যাযামো গমনাদিঃ, বিহারঃ অঙ্গক্ষেপণাদিকা চেষ্টা| স্রোতোঽক্লেদে কিং ভবতীত্যাহ- অক্লিন্নেষ্বিত্যাদি| আসিক্তমিতি প্রক্ষিপ্তম্| অবিদগ্ধে ইত্যাদিনাঽত্র দৃষ্টান্তমাহ| ম্লানে ইতি সঙ্কুচিতে| অপক্বেষ্বিতি অন্যেষু| উপসংহরতি- নৈশেষ্বিত্যাদিনা| নান্যত্ সমশ্নীযাদিতি যোজনা||২৩৫-২৪৩||

Adhikarana 58 (244-249) · Śloka 249

তত্র শ্লোকাঃ- অন্তরগ্নিগুণা দেহং যথা ধারযতে চ সঃ| যথাঽন্নং পচ্যতে যাংশ্চ যথাঽঽহারঃ করোত্যপি||২৪৪|| যেঽগ্নযো যাংশ্চ পুষ্যন্তি যাবন্তো যে পচন্তি যান্| রসাদীনাং ক্রমোত্পত্তির্মলানাং তেভ্য এব চ||২৪৫|| বৃষ্যাণামাশুকৃদ্ধেতুর্ধাতুকালোদ্ভবক্রমঃ| রোগৈকদেশকৃদ্ধেতুরন্তরগ্নির্যথাঽধিকঃ||২৪৬|| প্রদুষ্যতি যথা দুষ্টো যান্ রোগাঞ্জনযত্যপি| গ্রহণী যা যথা যচ্চ গ্রহণীদোষলক্ষণম্||২৪৭|| পূর্বরূপং পৃথক্ চৈব ব্যঞ্জনং সচিকিত্সিতম্| চতুর্বিধস্য নির্দিষ্টং তথা চাবস্থিকী ক্রিযা||২৪৮|| জাযতে চ যথাঽত্যগ্নির্যচ্চ তস্য চিকিত্সিতম্| উক্তবানিহ তত্ সর্বং গ্রহণীদোষকে মুনিঃ||২৪৯||

অন্তরগ্নিরিত্যাদিনা অধ্যাযসঙ্গ্রহং ব্রূতে| যেঽগ্নয ইতি ‘ভৌমাপ্যাগ্নেয ...’ ইত্যাদিনোক্তাঃ| যাংশ্চেতি ‘পঞ্চাহারগুণান্’ ইত্যাদ্যুক্তমর্থং সঙ্গৃহ্ণাতি| পুষ্যন্তি যাবন্ত ইতি ‘যথাস্বং স্বং’ ইত্যাদ্যুক্তং সঙ্গৃহ্ণাতি| যে পচন্তি যানিতি ‘সপ্তভির্দেহধাতারঃ’ ইত্যাদ্যুক্তসঙ্গ্রহঃ| আশুকারিত্বেন হেতুনা আশুকৃদ্ধেতুঃ| শেষং ব্যক্তম্||২৪৪-২৪৯||

Adhikarana puShpikA · Śloka 15

ইত্যগ্নিবেশকৃতে তন্ত্রেঽপ্রাপ্তে দৃঢবলসম্পূরিতে চিকিত্সাস্থানে গ্রহণীচিকিত্সিতং নাম পঞ্চদশোঽধ্যাযঃ||১৫||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপকাযাং চিকিত্সাস্থানে গ্রহণীচিকিত্সিতং নাম পঞ্চদশোঽধ্যাযঃ||১৫||