21. grahaṇīdōṣacikitsitam

Adhikarana 1 (1-2) · Śloka 2

অথাতো গ্রহণীদোষচিকিত্সিতং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

Adhikarana 2 (3-4) · Śloka 4

আযুর্বর্ণো বলং স্বাস্থ্যমুত্সাহোপচযৌ প্রভা| ওজস্তেজোঽগ্নযঃ প্রাণাশ্চোক্তা দেহাগ্নিহেতুকাঃ||৩|| শান্তেঽগ্নৌ ম্রিযতে, যুক্তে চিরং জীবত্যনামযঃ| রোগী স্যাদ্বিকৃতে, মূলমগ্নিস্তস্মান্নিরুচ্যতে||৪||

Adhikarana 3 (5) · Śloka 5

যদন্নং দেহধাত্বোজোবলবর্ণাদিপোষকম্| তত্রাগ্নির্হেতুরাহারান্ন হ্যপক্বাদ্রসাদযঃ||৫||

Adhikarana 4 (6-8) · Śloka 8

অন্নমাদানকর্মা তু প্রাণঃ কোষ্ঠং প্রকর্ষতি| তদ্দ্রবৈর্ভিন্নসঙ্ঘাতং স্নেহেন মৃদুতাং গতম্||৬|| সমানেনাবধূতোঽগ্নিরুদর্যঃ পবনোদ্বহঃ| কালে ভুক্তং সমং সম্যক্ পচত্যাযুর্বিবৃদ্ধযে||৭|| এবং রসমলাযান্নমাশযস্থমধঃ স্থিতঃ| পচত্যগ্নির্যথা স্থাল্যামোদনাযাম্বুতণ্ডুলম্||৮||

Adhikarana 5 (9-11) · Śloka 11

অন্নস্য ভুক্তমাত্রস্য ষড্রসস্য প্রপাকতঃ| মধুরাদ্যাত্ কফো ভাবাত্ ফেনভূত উদীর্যতে||৯|| পরং তু পচ্যমানস্য বিদগ্ধস্যাম্লভাবতঃ| আশযাচ্চ্যবমানস্য পিত্তমচ্ছমুদীর্যতে||১০|| পক্বাশযং তু প্রাপ্তস্য শোষ্যমাণস্য বহ্নিনা| পরিপিণ্ডিতপক্বস্য বাযুঃ স্যাত্ কটুভাবতঃ||১১||

Adhikarana 6 (12) · Śloka 12

অন্নমিষ্টং হ্যুপহিতমিষ্টৈর্গন্ধাদিভিঃ পৃথক্| দেহে প্রীণাতি গন্ধাদীন্ ঘ্রাণাদীনীন্দ্রিযাণি চ||১২||

Adhikarana 7 (13) · Śloka 13

ভৌমাপ্যাগ্নেযবাযব্যাঃ পঞ্চোষ্মাণঃ সনাভসাঃ| পঞ্চাহারগুণান্স্বান্স্বান্পার্থিবাদীন্পচন্তি হি||১৩||

Adhikarana 8 (14) · Śloka 14

যথাস্বং স্বং চ পুষ্ণন্তি দেহে দ্রব্যগুণাঃ পৃথক্| পার্থিবাঃ পার্থিবানেব শেষাঃ শেষাংশ্চ কৃত্স্নশঃ||১৪||

Adhikarana 9 (15) · Śloka 15

সপ্তভির্দেহধাতারো ধাতবো দ্বিবিধং পুনঃ| যথাস্বমগ্নিভিঃ পাকং যান্তি কিট্টপ্রসাদবত্ ||১৫||

Adhikarana 10 (16) · Śloka 16

রসাদ্রক্তং ততো মাংসং মাংসান্মেদস্ততোঽস্থি চ| অস্থ্নো মজ্জা ততঃ শুক্রং শুক্রাদ্গর্ভঃ প্রসাদজঃ||১৬||

Adhikarana 11 (17) · Śloka 17

রসাত্ স্তন্যং ততো রক্তমসৃজঃ কণ্ডরাঃ সিরাঃ| মাংসাদ্বসা ত্বচঃ ষট্ চ মেদসঃ স্নাযুসম্ভবঃ ||১৭||

Adhikarana 12 (18-19) · Śloka 20

কিট্টমন্নস্য বিণ্মূত্রং, রসস্য তু কফোঽসৃজঃ| পিত্তং, মাংসস্য খমলা, মলঃ স্বেদস্তু মেদসঃ||১৮|| স্যাত্কিট্টং কেশলোমাস্থ্নো, মজ্জ্ঞঃ স্নেহোঽক্ষিবিট্ত্বচাম্| প্রসাদকিট্টে ধাতূনাং পাকাদেবংবিধর্চ্ছতঃ ||১৯|| পরস্পরোপসংস্তব্ধা ধাতুস্নেহপরম্পরা |২০|

Adhikarana 13 (20-35) · Śloka 35

বৃষ্যাদীনাং প্রভাবস্তু পুষ্ণাতি বলমাশু হি||২০|| ষড্ভিঃ কেচিদহোরাত্রৈরিচ্ছন্তি পরিবর্তনম্| সন্তত্যা ভোজ্যধাতূনাং পরিবৃত্তিস্তু চক্রবত্||২১|| (ইত্যুক্তবন্তমাচার্যং শিষ্যস্ত্বিদমচোদযত্| রসাদ্রক্তং বিসদৃশাত্ কথং দেহেঽভিজাযতে||২২|| রসস্য চ ন রাগোঽস্তি স কথং যাতি রক্ততাম্| দ্রবাদ্রক্তাত্স্থিরং মাংসং কথং তজ্জাযতে নৃণাম্||২৩|| দ্রবধাতোঃ স্থিরান্মাংসান্মেদসঃ সম্ভবঃ কথম্| শ্লক্ষ্ণাভ্যাং মাংসমেদোভ্যাং খরত্বং কথমস্থিষু||২৪|| খরেষ্বস্থিষু মজ্জা চ কেন স্নিগ্ধো মৃদুস্তথা| মজ্জ্ঞশ্চ পরিণামেন যদি শুক্রং প্রবর্ততে||২৫|| সর্বদেহগতং শুক্রং প্রবদন্তি মনীষিণঃ| তথাঽস্থিমধ্যমজ্জ্ঞশ্চ শুক্রং ভবতি দেহিনাম্||২৬|| ছিদ্রং ন দৃশ্যতেঽস্থ্নাং চ তন্নিঃসরতি বা কথম্| এবমুক্তস্তু শিষ্যেণ গুরুঃ প্রাহেদমুত্তরম্||২৭|| তেজো রসানাং সর্বেষাং মনুজানাং যদুচ্যতে| পিত্তোষ্মণঃ স রাগেণ রসো রক্তত্বমৃচ্ছতি||২৮|| বায্বম্বুতেজসা রক্তমূষ্মণা চাভিসংযুতম্| স্থিরতাং প্রাপ্য মাংসং স্যাত্ স্বোষ্মণা পক্বমেব তত্ ||২৯|| স্বতেজোঽম্বুগুণস্নিগ্ধোদ্রিক্তং মেদোঽভিজাযতে| পৃথিব্যগ্ন্যনিলাদীনাং সঙ্ঘাতঃ স্বোষ্মণা কৃতঃ||৩০|| খরত্বং প্রকরোত্যস্য জাযতেঽস্থি ততো নৃণাম্| করোতি তত্র সৌষির্যমস্থ্নাং মধ্যে সমীরণঃ||৩১|| মেদসস্তানি পূর্যন্তে স্নেহো মজ্জা ততঃ স্মৃতঃ| তস্মান্মজ্জ্ঞস্তু যঃ স্নেহঃ শুক্রং সঞ্জাযতে ততঃ||৩২|| বায্বাকাশাদিভির্ভাবৈঃ সৌষির্যং জাযতেঽস্থিষু| তেন স্রবতি তচ্ছুক্রং নবাত্ কুম্ভাদিবোদকম্||৩৩|| স্রোতোভিঃ স্যন্দতে দেহাত্ সমন্তাচ্ছুক্রবাহিভিঃ | হর্ষেণোদীরিতং বেগাত্ সঙ্কল্পাচ্চ মনোভবাত্||৩৪|| বিলীনং ঘৃতবদ্ব্যাযামোষ্মণা স্থানবিচ্যুতম্| বস্তৌ সম্ভৃত্য নির্যাতি স্থলান্নিম্নাদিবোদকম্)||৩৫||

Adhikarana 14 (36-37) · Śloka 38

ব্যানেন রসধাতুর্হি বিক্ষেপোচিতকর্মণা| যুগপত্ সর্বতোঽজস্রং দেহে বিক্ষিপ্যতে সদা||৩৬|| ক্ষিপ্যমাণঃ খবৈগুণ্যাদ্রসঃ সজ্জতি যত্র সঃ| করোতি বিকৃতিং তত্র খে বর্ষমিব তোযদঃ||৩৭|| দোষাণামপি চৈবং স্যাদেকদেশপ্রকোপণম্ |৩৮|

Adhikarana 15 (38-41) · Śloka 41

ইতি ভৌতিকধাত্বন্নপক্তৄণাং কর্ম ভাষিতম্||৩৮|| অন্নস্য পক্তা সর্বেষাং পক্তৄণামধিপো মতঃ| তন্মূলাস্তে হি তদ্বৃদ্ধিক্ষযবৃদ্ধিক্ষযাত্মকাঃ||৩৯|| তস্মাত্তং বিধিবদ্যুক্তৈরন্নপানেন্ধনৈর্হিতৈঃ| পালযেত্ প্রযতস্তস্য স্থিতৌ হ্যযুর্বলস্থিতিঃ||৪০|| যো হি ভুঙ্ক্তে বিধিং ত্যাক্ত্বা গ্রহণীদোষজান্ গদান্| স লৌল্যাল্লভতে শীঘ্রং, বক্ষ্যন্তেঽতঃ পরং তু তে||৪১||

Adhikarana 16 (42-44) · Śloka 44

অভোজনাদজীর্ণাতিভোজনাদ্বিষমাশনাত্| অসাত্ম্যগুরুশীতাতিরূক্ষসন্দুষ্টভোজনাত্||৪২|| বিরেকবমনস্নেহবিভ্রমাদ্ব্যাধিকর্ষণাত্| দেশকালর্তুবৈষম্যাদ্বেগানাং চ বিধারণাত্||৪৩|| দুষ্যত্যগ্নিঃ, স দুষ্টোঽন্নং ন তত্ পচতি লঘ্বপি| অপচ্যমানং শুক্তত্বং যাত্যন্নং বিষরূপতাম্ ||৪৪||

Adhikarana 17 (45-49) · Śloka 49

তস্য লিঙ্গমজীর্ণস্য বিষ্টম্ভঃ সদনং তথা| শিরসো রুক্ চ মূর্চ্ছা চ ভ্রমঃ পৃষ্ঠকটিগ্রহঃ||৪৫|| জৃম্ভাঽঙ্গমর্দস্তৃষ্ণা চ জ্বরশ্ছর্দিঃ প্রবাহণম্| অরোচকোঽবিপাকশ্চ, ঘোরমন্নবিষং চ তত্||৪৬|| সংসৃজ্যমানং পিত্তেন দাহং তৃষ্ণাং মুখামযান্| জনযত্যম্লপিত্তং চ পিত্তজাংশ্চাপরান্ গদান্||৪৭|| যক্ষ্মপীনসমেহাদীন্ কফজান্ কফসঙ্গতম্| করোতি বাতসংসৃষ্টং বাতজাংশ্চ গদান্ বহূন্||৪৮|| মূত্ররোগাংশ্চ মূত্রস্থং কুক্ষিরোগান্ শকৃদ্গতম্| রসাদিভিশ্চ সংসৃষ্টং কুর্যাদ্রোগান্ রসাদিজান্||৪৯||

Adhikarana 18 (50) · Śloka 50

বিষমো ধাতুবৈষম্যং করোতি বিষমং পচন্| তীক্ষ্ণো মন্দেন্ধনো ধাতূন্ বিশোষযতি পাবকঃ||৫০||

Adhikarana 19 (51) · Śloka 51

যুক্তং ভুক্তবতো যুক্তো ধাতুসাম্যং সমং পচন্|৫১|

Adhikarana 20 (51-54) · Śloka 54

দুর্বলো বিদহত্যন্নং তদ্যাত্যূর্ধ্বমধোঽপি বা||৫১|| অধস্তু পক্বমামং বা প্রবৃত্তং গ্রহণীগদঃ| উচ্যতে সর্বমেবান্নং প্রাযো হ্যস্য বিদহ্যতে||৫২|| অতিসৃষ্টং বিবদ্ধং বা দ্রবং তদুপদিশ্যতে| তৃষ্ণারোচকবৈরস্যপ্রসেকতমকান্বিতঃ||৫৩|| শূনপাদকরঃ সাস্থিপর্বরুক্ ছর্দনং জ্বরঃ| লোহামগন্ধিস্তিক্তাম্ল উদ্গারশ্চাস্য জাযতে||৫৪||

Adhikarana 21 (55) · Śloka 55

পূর্বরূপং তু তস্যেদং তৃষ্ণাঽঽলস্যং বলক্ষযঃ| বিদাহোঽন্নস্য পাকশ্চ চিরাত্ কাযস্য গৌরবম্||৫৫||

Adhikarana 22 (56-57) · Śloka 57

অগ্ন্যধিষ্ঠানমন্নস্য গ্রহণাদ্গ্রহণী মতা| নাভেরুপর্যহ্যগ্নিবলেনোপষ্টব্ধোপবৃংহিতা ||৫৬|| অপক্বং ধারত্যন্নং পক্বং সৃজতি পার্শ্বতঃ| দুর্বলাগ্নিবলা দুষ্টা ত্বামমেব বিমুঞ্চতি||৫৭||

Adhikarana 23 (58-72) · Śloka 72

বাতাত্ পিত্তাত্ কফাচ্চ স্যাত্তদ্রোগস্ত্রিভ্য এব চ| হেতুং লিঙ্গং রূপভেদাঞ্ শৃণু তস্য পৃথক্ পৃথক্||৫৮|| কটুতিক্তকষাযাতিরূক্ষশীতলভোজনৈঃ| প্রমিতানশনাত্যধ্ববেগনিগ্রহমৈথুনৈঃ||৫৯|| করোতি কুপিতো মন্দমগ্নিং সঞ্ছাদ্য মারুতঃ | তস্যান্নং পচ্যতে দুঃখং শুক্তপাকং খরাঙ্গতা||৬০|| কণ্ঠাস্যশোষঃ ক্ষুত্তৃষ্ণা তিমিরং কর্ণযোঃ স্বনঃ| পার্শ্বোরুবঙ্ক্ষণগ্রীবারুজোঽভীক্ষ্ণং বিসূচিকা||৬১|| হৃত্পীডা কার্শ্যদৌর্বল্যং বৈরস্যং পরিকর্তিকা| গৃদ্ধিঃ সর্বরসানাং চ মনসঃ সদনং তথা||৬২|| জীর্ণে জীর্যতি চাধ্মানং ভুক্তে স্বাস্থ্যমুপৈতি চ| স বাতগুল্মহৃদ্রোগপ্লীহাশঙ্কী চ মানবঃ||৬৩|| চিরাদুঃখং দ্রবং শুষ্কং তন্বামং শব্দফেনবত্| পুনঃ পুনঃ সৃজেদ্বর্চঃ কাসশ্বাসার্দিতোঽনিলাত্||৬৪|| কট্বজীর্ণবিদাহ্যম্লক্ষারাদ্যৈঃ পিত্তমুল্বণম্| অগ্নিমাপ্লাবযদ্ধন্তি জলং তপ্তমিবানলম্||৬৫|| সোঽজীর্ণং নীলপীতাভং পীতাভঃ সার্যতে দ্রবম্| পূত্যম্লোদ্গারহৃত্কণ্ঠদাহারুচিতৃডর্দিতঃ||৬৬|| গুর্বতিস্নিগ্ধশীতাদিভোজনাদতিভোজনাত্| ভুক্তমাত্রস্য চ স্বপ্নাদ্ধন্ত্যগ্নিং কুপিতঃ কফঃ||৬৭|| তস্যান্নং পচ্যতে দুঃখং হৃল্লাসচ্ছর্দ্যরোচকাঃ| আস্যোপদেহমাধুর্যকাসষ্ঠীবনপীনসাঃ||৬৮|| হৃদযং মন্যতে স্ত্যানমুদরং স্তিমিতং গুরু| দুষ্টো মধুর উদ্গারঃ সদনং স্ত্রীষ্বহর্ষণম্||৬৯|| ভিন্নামশ্লেষ্মসংসৃষ্টগুরুবর্চঃপ্রবর্তনম্| অকৃশস্যাপি দৌর্বল্যমালস্যং চ কফাত্মকে||৭০|| যশ্চাগ্নিঃ পূর্বমুদ্দিষ্টো রোগানীকে চতুর্বিধঃ| তং চাপি গ্রহণীদোষং সমবর্জং প্রচক্ষ্মহে||৭১|| পৃথগ্বাতাদিনির্দিষ্টহেতুলিঙ্গসমাগমে| ত্রিদোষং নির্দিশেত্তেষাং ভেষজং শৃণ্বতঃ পরম্||৭২||

Adhikarana 24 (73-81) · Śloka 81

গ্রহণীমাশ্রিতং দোষং বিদগ্ধাহারমূর্চ্ছিতম্| সবিষ্টম্ভপ্রসেকার্তিবিদাহারুচিগৌরবৈঃ||৭৩|| আমলিঙ্গান্বিতং দৃষ্ট্বা সুখোষ্ণেনাম্বুনোদ্ধরেত্| ফলানাং বা কষাযেণ পিপ্পলীসর্ষপৈস্তথা||৭৪|| লীনং পক্বাশযস্থং বাঽঽপ্যামং স্রাব্যং সদীপনৈঃ| শরীরানুগতে সামে রসে লঙ্ঘনপাচনম্||৭৫|| বিশুদ্ধামাশযাযাস্মৈ পঞ্চকোলাদিভিঃ শৃতম্| দদ্যাত্ পেযাদি লঘ্বন্নং পুনর্যোগাংশ্চ দীপনান্||৭৬|| জ্ঞাত্বা তু পরিপক্বামং মারুতগ্রহণীগদম্| দীপনীযযুতং সর্পিঃ পাযযেতাল্পশো ভিষক্||৭৭|| কিঞ্চিত্সন্ধুক্ষিতে ত্বগ্নৌ সক্তবিণ্মূত্রমারুতম্| দ্ব্যহং ত্র্যহং বা সংস্নেহ্য স্বিন্নাভ্যক্তং নিরূহযেত্||৭৮|| তত এরণ্ডতৈলেন সর্পিষা তৈল্বকেন বা| সক্ষারেণানিলে শান্তে স্রস্তদোষং বিরেচযেত্||৭৯|| শুদ্ধং রূক্ষাশযং বদ্ধবর্চসং চানুবাসযেত্| দীপনীযাম্লবাতঘ্নসিদ্ধাতৈলেন মাত্রযা||৮০|| নিরূঢং চ বিরিক্তং চ সম্যক্ চৈবানুবাসিতম্| লঘ্বন্নং প্রতিসম্ভুক্তং সর্পিরভ্যাসযেত্ পুনঃ||৮১||

Adhikarana 25 (82-86) · Śloka 86

দ্বে পঞ্চমূলে সরলং দেবদারু সনাগরম্| পিপ্পলীং পিপ্পলীমূলং চিত্রকং হস্তিপিপ্পলীম্||৮২|| শণবীজং যবান্ কোলন্ কুলত্থান্ সুষবীং তথা | পাচযেদারনালেন দধ্না সৌবীরকেণ বা||৮৩|| চতুর্ভাগাবশেষেণ পচেত্তেন ঘৃতাঢকম্| স্বর্জিকাযাবশূকাখ্যৌ ক্ষারৌ দত্ত্বা চ যুক্তিতঃ||৮৪|| সৈন্ধবৌদ্ভিদসামুদ্রবিডানাং রোমকস্য চ| সসৌবর্চলপাক্যানাং ভাগান্দ্বিপলিকান্ পৃথক্||৮৫|| বিনীয চূর্ণিতান্ তস্মাত্ পাযযেত্ প্রসৃতং বুধঃ| করোত্যগ্নিং বলং বর্ণং বাতঘ্নং ভুক্তপাচনম্||৮৬|| ইতি দশমূলাদ্যং ঘৃতম্|

Adhikarana 26 (87) · Śloka 87

ত্র্যূষণত্রিফলাকল্কে বিল্বমাত্রে গুডাত্ পলে| সর্পিষোঽষ্টপলং পক্ত্বা মাত্রাং মন্দানলঃ পিবেত্||৮৭|| ইতি ত্র্যূষণাদ্যং ঘৃতম্|

Adhikarana 27 (88-93) · Śloka 93

পঞ্চমূলাভযাব্যোষপিপ্পলীমূলসৈন্ধবৈঃ| রাস্নাক্ষারদ্বযাজাজীবিডঙ্গশটিভির্ঘৃতম্||৮৮|| শুক্তেন মাতুলুঙ্গস্য স্বরসেনার্দ্রকস্য চ| শুষ্কমূলককোলাম্বুচুক্রিকাদাডিমস্য চ||৮৯|| তক্রমস্তুসুরামণ্ডসৌবীরকতুষোদকৈঃ| কাঞ্জিকেন চ তত্ পক্বমগ্নিদীপ্তিকরং পরম্||৯০|| শূলগুল্মোদরশ্বাসকাসানিলকফাপহম্| সবীজপূরকরসং সিদ্ধং বা পাযযেদ্ঘৃতম্||৯১|| সিদ্ধমভ্যঞ্জনার্থং চ তৈলমেতৈঃ প্রযোজযেত্| এতেষামৌষধানাং বা পিবেচ্চূর্ণং সুখাম্বুনা||৯২|| বাতে শ্লেষ্মাবৃতে সামে কফে বা বাযুনোদ্ধতে| দদ্যাচ্চূর্ণং পাচনার্থমগ্নিসন্দীপনং পরম্||৯৩|| ইতি পঞ্চমূলাদ্যং ঘৃতং চূর্ণং চ|

Adhikarana 28 (94-95) · Śloka 95

মজ্জত্যামা গুরুত্বাদ্বিট্ পক্বা তূত্প্লবতে জলে| বিনাঽতিদ্রবসঙ্ঘাতশৈত্যশ্লেষ্মপ্রদূষণাত্||৯৪|| পরীক্ষ্যৈবং পুরা সামং নিরামং চামদোষিণম্| বিধিনোপাচরেত্ সম্যক্ পাচনেনেতরেণ বা||৯৫||

Adhikarana 29 (96-97) · Śloka 97

চিত্রকং পিপ্পলীমূলং দ্বৌ ক্ষারৌ লবণানি চ| ব্যোষং হিঙ্গ্বজমোদাং চ চব্যং চৈকত্র চূর্ণযেত্||৯৬|| গুটিকা মাতুলুঙ্গস্য দাডিমস্য রসেন বা| কৃতা বিপাচযত্যামং দীপযত্যাশু চালনম্||৯৭|| ইতি চিত্রকাদ্যা গুটিকা|

Adhikarana 30 (98-110) · Śloka 110

নাগরাতিবিষামুস্তক্বাথঃ স্যাদামপাচনঃ| মুস্তান্তকল্কঃ পথ্যা বা নাগরং চোষ্ণবারিণা||৯৮|| দেবদারুবচামুস্তনাগরাতিবিষাভযাঃ| বারুণ্যামাসুতাস্তোযে কোষ্ণে বাঽলবণাঃ পিবেত্||৯৯|| বর্চস্যামে সশূলে চ পিবেদ্বা দাডিমাম্বুনা| বিডেন লবণং পিষ্টং বিল্বং চিত্রকনাগরম্||১০০|| সামে বা সকফে বাতে কোষ্ঠশূলকরে পিবেত্| কলিঙ্গহিঙ্গ্বতিবিষাবচাসৌবর্চলাভযাঃ||১০১|| ছর্দ্যর্শোগ্রন্থিশূলেষু পিবেদুষ্ণেন বারিণা| পথ্যাসৌবর্চলাজাজীচূর্ণং মরিচসংযুতম্||১০২|| অভযাং পিপ্পলীমূলং বচাং কটুকরোহিণীম্| পাঠাং বত্সকবীজানি চিত্রকং বিশ্বভেষজম্||১০৩|| পিবেন্নিষ্ক্বাথ্য চূর্ণং বা কৃত্বা কোষ্ণেন বারিণা| পিত্তশ্লেষ্মাভিভৃতাযাং গ্রহণ্যাং শূলনুদ্ধিতম্||১০৪|| সামে সাতিবিষং ব্যোষং লবণক্ষারহিঙ্গু চ| নিঃক্বাথ্য পাযযেচ্চূর্ণং কৃত্বা বা কোষ্ণবারিণা||১০৫|| পিপ্পলীং নাগরং পাঠাং সারিবাং বৃহতীদ্বযম্| চিত্রকং কৌটজং বীজং লবণান্যথ পঞ্চ চ||১০৬|| তচ্চূর্ণং সযবক্ষারং দধ্যুষ্ণাম্বুসুরাদিভিঃ| পিবেদগ্নিবিবৃদ্ধ্যর্থং কোষ্ঠবাতহরং নরঃ||১০৭|| মরিচং কুঞ্চিকাম্বষ্ঠাবৃক্ষাম্লাঃ কুডবাঃ পৃথক্| পলানি দশ চাম্লস্য বেতসস্য পলার্ধিকম্||১০৮|| সৌবর্চলং বিডং পাক্যং যবক্ষারঃ সসৈন্ধবঃ| শটীপুষ্করমূলানি হিঙ্গু হিঙ্গুশিবাটিকা||১০৯|| তত্ সর্বমেকতঃ সূক্ষ্মং চূর্ণং কৃত্বা প্রযোজযেত্| হিতং বাতাভিভূতাযাং গ্রহণ্যামরুচৌ তথা||১১০|| ইতি মরিচাদ্যং চূর্ণম্|

Adhikarana 31 (111) · Śloka 112

চতুর্ণাং প্রস্থমম্লানাং ত্র্যূষণস্য পলত্রযম্| লবণানাং চ চত্বারি শর্করাযাঃ পলাষ্টকম্| সঞ্চূর্ণ্য শাকসূপান্নরাগাদিষ্ববচারযেত্||১১১|| কাসাজীর্ণারুচিশ্বাসাহৃত্পাণ্ড্বামযশূলনুত্|১১২|

Adhikarana 32 (112-116) · Śloka 117

চব্যত্বক্পিপ্পলীমূলধাতকীব্যোষচিত্রকান্||১১২|| কপিত্থং বিল্বমম্বষ্ঠাং শাল্মলং হস্তিপিপ্পলীম্| শিলোদ্ভেদং তথাঽজাজীং পিষ্ট্বা বদরসম্মিতম্||১১৩|| পরিভর্জ্য ঘৃতে দধ্না যবাগূং সাধযেদ্ভিষক্| রসৈঃ কপিত্থচুক্রীকাবৃক্ষাম্লৈর্দাডিমস্য চ||১১৪|| সর্বাতিসারগ্রহণীগুল্মার্শঃপ্লীহনাশিনী| পঞ্চকোলকযূষশ্চ মূলকানাং চ সোষণঃ||১১৫|| স্নিগ্ধো দাডিমতক্রাম্লো জাঙ্গলঃ সংস্কৃতো রসঃ| ক্রব্যাদস্বরসঃ শস্তো ভোজনার্থে সদীপনঃ||১১৬|| তক্রারনালমদ্যানি পানাযারিষ্ট এব চ|১১৭|

Adhikarana 33 (118-121) · Śloka 121

তক্রং তু গ্রহণীদোষে দীপনগ্রাহিলাঘবাত্||১১৭|| শ্রেষ্ঠং মধুরপাকিত্বান্ন চ পিত্তং প্রকোপযেত্| কষাযোষ্ণবিকাশিত্বাদ্রৌক্ষ্যাচ্চৈব কফে হিতম্||১১৮|| বাতে স্বাদ্বম্লসান্দ্রত্বাত্ সদ্যস্কমবিদাহি তত্| তস্মাত্ তক্রপ্রযোগা যে জঠরাণাং তথাঽর্শসাম্||১১৯|| বিহিতা গ্রহণীদোষে সর্বশস্তান্ প্রযোজযেত্| যবান্যামলকে পথ্যা মরিচং ত্রিপলংশিকম্||১২০|| লবণানি পলাংশানি পঞ্চ চৈকত্র চূর্ণযেত্| তক্রে তদাসুতং জাতং তক্রারিষ্টং পিবেন্নরঃ| দীপনং শোথগুল্মার্শঃক্রিমিমেহোদরাপহম্||১২১|| ইতি তক্রারিষ্টঃ|

Adhikarana 34 (122-124) · Śloka 124

স্বস্থানগতমুত্ক্লিষ্টমগ্নিনির্বাপকং ভিষক্| পিত্তং জ্ঞাত্বা বিরেকেণ নির্হরেদ্বমনেন বা||১২২|| অবিদাহিভিরন্নৈশ্চ লঘুভিস্তিক্তসংযুতৈঃ| জাঙ্গলানাং রসৈর্যূষৈর্মুদ্গাদীনাং খডৈরপি||১২৩|| দাডিমাম্লৈঃ সসর্পিষ্কৈর্দীপনগ্রাহিসংযুতৈঃ| তস্যাগ্নিং দীপযেচ্চূর্ণৈঃ সর্পির্ভিশ্চাপি তিক্তকৈঃ||১২৪||

Adhikarana 35 (125-128) · Śloka 128

চন্দনং পদ্মকোশীরং পাঠাং মূর্বাং কুটন্নটম্| ষড্গ্রন্থাসারিবাস্ফোতাসপ্তপর্ণাটরূষকান্||১২৫|| পটোলোদুম্বরাশ্বত্থবটপ্লক্ষকপীতনান্| কটুকাং রোহিণীং মুস্তং নিম্বং চ দ্বিপলাংশিকম্||১২৬|| দ্রোণেঽপাং সাধযেত্ পাদশেষে প্রস্থং ঘৃতাত্ পচেত্| কিরাততিক্তেন্দ্রযববীরামাগধিকোত্পলৈঃ||১২৭|| কল্কৈরক্ষসমৈঃ পেযং তত্ পিত্তগ্রহণীগদে| তিক্তকং যদ্ঘৃতং চোক্তং কৌষ্ঠিকে তচ্চ দাপযেত্||১২৮|| ইতি চন্দনাদ্যং ঘৃতম্|

Adhikarana 36 (129-131) · Śloka 131

নাগরাতিবিষে মুস্তং ধাতকীং চ রসাঞ্জনম্| বত্সকত্বক্ফলং বিল্বং পাঠাং কটুকরোহিণীম্||১২৯|| পিবেত্ সমাংশং তচ্চূর্ণং সক্ষৌদ্রং তণ্ডুলাম্বুনা| পৈত্তিকে গ্রহণীদোষে রক্তং যচ্চোপবেশ্যতে||১৩০|| অর্শাংসি চ গুদে শূলং জযেচ্চৈব প্রবাহিকাম্| নাগরাদ্যমিদং চূর্ণং কৃষ্ণাত্রেযেণ পূজিতম্||১৩১|| ইতি নাগরাদ্যং চূর্ণম্|

Adhikarana 37 (132-133) · Śloka 133

ভূনিম্বকটুকাব্যোষমুস্তকেন্দ্রযবান্ সমান্| দ্বৌ চিত্রকাদ্বত্সকত্বগ্ভাগান্ ষোডশ চূর্ণযেত্||১৩২|| গুডশীতাম্বুনা পীতং গ্রহণীদোষগুল্মনুত্| কামলাজ্বরপাণ্ডুত্বমেহারুচ্যতিসারনুত্||১৩৩|| ইতি ভূনিম্বাদ্যং চূর্ণম্|

Adhikarana 38 (134-140) · Śloka 140

বচামতিবিষাং পাঠাং সপ্তপর্ণং রসাঞ্জনম্| স্যোনাকোদীচ্যকট্বঙ্গবত্সকত্বগ্দুরালভাঃ||১৩৪|| দার্বীং পর্পটকং পাঠাং যবানীং মধুশিগ্রুকম্| পটোলপত্রং সিদ্ধার্থান্ যূথিকাং জাতিপল্লবান্||১৩৫|| জম্ব্বাম্রবিল্বমধ্যানি নিম্বশাকফলানি চ| তদ্রোগশমমন্বিচ্ছন্ ভূনিম্বাদ্যেন যোজযেত্||১৩৬|| কিরাততিক্তঃ ষড্গ্রন্থা ত্রাযমাণা কটুত্রিকম্| চন্দনং পদ্মকোশীরং দার্বীত্বক্ কটুরোহিণী||১৩৭|| কুটজত্বক্ফলং মুস্তং যবানী দেবদারু চ| পটোলনিম্বপত্রৈলাসৌরাষ্ট্রযতিবিষাত্বচঃ||১৩৮|| মধুশিগ্রোশ্চ বীজানি মূর্বা পর্পটকস্তথা| তচ্চূর্ণং মধুনা লেহ্যং পেযং মদ্যৈর্জলেন বা||১৩৯|| হৃত্পাণ্ডুগ্রহণীরোগগুল্মশূলারুচিজ্বরান্| কামলাং সন্নিপাতং চ মুখরোগাংশ্চ নাশযেত্||১৪০|| ইতি কিরাতাদ্যং চূর্ণম্|

Adhikarana 39 (141-145) · Śloka 145

গ্রহণ্যাং শ্লেষ্মদুষ্টাযাং বমিতস্য যথাবিধি| কট্বম্ললবণক্ষারৈস্তিক্তৈশ্চাগ্নিং বিবর্ধযেত্||১৪১|| পলাশং চিত্রকং চব্যং মাতুলুঙ্গং হরীতকীম্| পিপ্পলীং পিপ্পলীমূলং পাঠাং নাগরধান্যকম্||১৪২|| কার্ষিকাণ্যুদকপ্রস্থে পক্ত্বা পাদাবশেষিতম্| পানীযার্থং প্রযুঞ্জীত যবাগূং তৈশ্চ সাধযেত্||১৪৩|| শুষ্কমূলকযূষেণ কৌলত্থেনাথবা পুনঃ| কট্বম্লক্ষারপটুনা লঘূন্যন্নানি ভোজযেত্||১৪৪|| অম্লং চানু পিবেত্তক্রং তক্রারিষ্টমথাপি বা| মদিরাং মধ্বরিষ্টং বা নিগদং সীধুমেব বা||১৪৫||

Adhikarana 40 (146-151) · Śloka 151

দ্রোণং মধূকপুষ্পাণাং বিডঙ্গানাং ততোঽর্ধতঃ| চিত্রকস্য ততোঽর্ধং স্যাত্তথা ভল্লাতকাঢকম্||১৪৬|| মঞ্জিষ্ঠাষ্টপলং চৈব ত্রিদ্রোণেঽপাং বিপাচযেত্| দ্রোণশেষং তু তচ্ছীতং মধ্বর্ধাঢকসংযুতম্||১৪৭|| এলামৃণালাগুরুভিশ্চন্দনেন চ রূষিতে| কুম্ভে মাসস্থিতং জাতমাসবং তং প্রযোজযেত্||১৪৮|| গ্রহণীং দীপযত্যেব বৃংহণঃ কফপিত্তজিত্| শোথং কুষ্ঠং কিলাসং চ প্রমেহাংশ্চ প্রণাশযেত্||১৪৯|| ইতি মধূকাসবঃ| মধূকপুষ্পস্বরসং শৃতমর্ধক্ষযীকৃতম্| ক্ষৌদ্রপাদযুতং শীতং পূর্ববত্ সন্নিধাপযেত্||১৫০|| তং পিবন্ গ্রহণীদোষাঞ্জযেত্ সর্বান্ হিতাশনঃ| তদ্বদ্দ্রাক্ষেক্ষুখর্জূরস্বরসানাসুতান্ পিবেত্||১৫১||

Adhikarana 41 (152-159) · Śloka 159

প্রস্থৌ দুরালভাযা দ্বৌ পস্থমামলকস্য চ| দন্তীচিত্রকমুষ্টী দ্বে প্রত্যগ্রং চাভযাশতম্||১৫২|| চতুর্দ্রোণেঽম্ভসঃ পক্ত্বা শীতং দ্রোণাবশেষিতম্| সগুডদ্বিশতং পূতং মধুনঃ কুডবাযুতম্||১৫৩|| তদ্বত্ প্রিযঙ্গোঃ পিপ্পল্যা বিডঙ্গানাং চ চূর্ণিতৈঃ| কুডবৈর্ঘৃতকুম্ভস্থং পক্ষাজ্জাতং ততঃ পিবেত্||১৫৪|| গ্রহণীপাণ্ডুরোগার্শঃকুষ্ঠবীসর্পমেহনুত্| স্বরবর্ণকরশ্চৈষ রক্তপিত্তকফাপহঃ||১৫৫|| ইতি দুরালভাসবঃ| হরিদ্রা পঞ্চমূলে দ্বে বীরর্ষভকজীবকম্| এষাং পঞ্চপলান্ ভাগাংশ্চতুর্দ্রোণেঽম্ভসঃ পচেত্||১৫৬|| দ্রোণশেষে রসে পূতে গুডস্য দ্বিশতং ভিষক্| চূর্ণিতান্ কুডবার্ধাংশান্ প্রক্ষিপেচ্চ সমাক্ষিকান্||১৫৭|| প্রিযঙ্গুমুস্তমঞ্জিষ্ঠাবিডঙ্গমধুকপ্লবান্| লোধ্রং শাবরকং চৈব মাসার্ধস্থং পিবেত্তু তম্||১৫৮|| এষ মূলাসবঃ সিদ্ধো দীপনো রক্তপিত্তজিত্| আনাহকফহৃদ্রোগপাণ্ডুরোগাঙ্গসাদনুত্||১৫৯|| ইতি মূলাসবঃ|

Adhikarana 42 (160-162) · Śloka 162

প্রাস্থিকং পিপ্পলীং পিষ্ট্বা গুডং মধ্যং বিভীতকাত্| উদকপ্রস্থসংযুক্তং যবপল্লে নিধাপযেত্||১৬০|| তস্মাত্ পলং সুজাতাত্তু সলিলাঞ্জলিসংযুতম্| পিবেত্পিণ্ডাসবো হ্যেষ রোগানীকবিনাশনঃ||১৬১|| স্বস্থোঽপ্যেনং পিবেন্মাসং নরঃ স্নিগ্ধরসাশনঃ | ইচ্ছংস্তেষামনুত্পত্তিং রোগাণাং যেঽত্র কীর্তিতাঃ||১৬২|| ইতি পিণ্ডাসবঃ|

Adhikarana 43 (163-167) · Śloka 167

নবে পিপ্পলিমধ্বাক্তে কলসেঽগুরুধূপিতে| মধ্বাঢকং জলসমং চূর্ণানীমানি দাপযেত্||১৬৩|| কুডবার্ধং বিডঙ্গানাং পিপ্পল্যাঃ কুডবং তথা| চতুর্থিকাংশাং ত্বক্ক্ষীরীং কেশরং মরিচানি চ||১৬৪|| ত্বগেলাপত্রকশটীক্রমুকাতিবিষাঘনান্| হরেণ্বেল্বালুতেজোহ্বাপিপ্পলীমূলচিত্রকান্||১৬৫|| কার্ষিকাংস্তত্ স্থিতং মাসমত ঊর্ধ্বং প্রযোজযেত্| মন্দং সন্দপযত্যগ্নিং করোতি বিষমং সমম্||১৬৬|| হৃত্পাণ্ডুগ্রহণীরোগকুষ্ঠার্শঃশ্বযথুজ্বরান্| বাতশ্লেষ্মামযাংশ্চান্যান্মধ্বরিষ্টো ব্যপোহতি||১৬৭|| ইতি মধ্বরিষ্টঃ|

Adhikarana 44 (168-170) · Śloka 170

সমূলাং পিপ্পলীং ক্ষারৌ দ্বৌ পঞ্চ লবণানি চ| মাতুলুঙ্গাভযারাস্নাশটীমরিচনাগরম্||১৬৮|| কৃত্বা সমাংশং তচ্চূর্ণং পিবেত্ প্রাতঃ সুখাম্বুনা| শ্লেষ্মিকে গ্রহণীদোষে বলবর্ণাগ্নিবর্ধনম্||১৬৯|| এতৈরেবৌষধৈঃ সিদ্ধং সর্পিঃ পেযং সমারুতে| গৌল্মিকে ষট্পলং প্রোক্তং ভল্লাতকঘৃতং চ যত্||১৭০||

Adhikarana 45 (171-178) · Śloka 178

বিডং কালোত্থলবণং সর্জিকাযবশূকজম্| সপ্তলাং কণ্টকারীং চ চিত্রকং চেতি দাহযেত্||১৭১|| সপ্তকৃত্বঃ স্রুতস্যাস্য ক্ষারস্য দ্ব্যাঢকেন তু| আঢকং সর্পিষঃ পক্ত্বা পিবেদগ্নিবিবর্ধনম্||১৭২|| ইতি ক্ষারঘৃতম্| সমূলাং পিপ্পলীং পাঠাং চব্যেন্দ্রযবনাগরম্| চিত্রকাতিবিষে হিঙ্গু শ্বদংষ্ট্রাং কটুরোহিণীম্||১৭৩|| বচাং চ কার্ষিকং পঞ্চলবণানাং পলানি চ| দধ্নঃ প্রস্থদ্বযে তৈলসর্পিষোঃ কুডবদ্বযে||১৭৪|| খণ্ডীকৃতানি নিষ্ক্বাথ্য শনৈরন্তর্গতে রসে| অন্তর্ধূমং ততো দগ্ধবা চূর্ণং কৃত্বা ঘৃতাপ্লুতম্||১৭৫|| পিবেত্ পাণিতলং তস্মিঞ্জীর্ণে স্যান্মধুরাশনঃ| বাতশ্লেষ্মামযান্সর্বান্হন্যাদ্বিষগরাংশ্চ সঃ||১৭৬|| ভল্লাতকং ত্রিকটুকং ত্রিফলাং লবণত্রযম্| অন্তর্ধূমং দ্বিপলিকং গোপুরীষাগ্নিনা দহেত্||১৭৭|| স ক্ষারঃ সর্পিষা পীতো ভোজ্যে বাঽপ্যবচূর্ণিতঃ| হৃত্পাণ্ডুগ্রহণীদোষগুল্মোদাবর্তশূলনুত্||১৭৮||

Adhikarana 46 (179-180) · Śloka 180

দুরালভাং করঞ্জৌ দ্বৌ সপ্তপর্ণং সবত্সকম্| ষড্গ্রন্থাং মদনং মূর্বাং পাঠামারগ্বধং তথা||১৭৯|| গোমূত্রেণ সমাংশানি কৃত্বা চূর্ণানি দাহযেত্| দগ্ধ্বা চ তং পিবেত্ ক্ষারং গ্রহণীবলবর্ধনম্||১৮০||

Adhikarana 47 (181-182) · Śloka 182

ভূনিম্বং রোহিণীং তিক্তাং পটোলং নিম্বপর্পটম্| দহেন্মাহিষমূত্রেণ ক্ষার এষোঽগ্নিবর্ধনঃ||১৮১|| দ্বে হরিদ্রে বচা কুষ্ঠং চিত্রকঃ কটুরোহিণী| মুস্তং চ বস্তমূত্রেণ দহেত্ ক্ষারোঽগ্নিবর্ধনঃ||১৮২||

Adhikarana 48 (183-187) · Śloka 187

চতুষ্পলং সুধাকাণ্ডাত্ত্রিপলং লবণত্রযাত্| বার্তাকীকুডবং চার্কাদষ্টৌ দ্বে চিত্রকাত্ পলে||১৮৩|| দগ্ধানি বার্তাকুরসে গুটিকা ভোজনোত্তরাঃ| ভুক্তং ভুক্তং পচন্ত্যাশু কাসশ্বাসার্শসাং হিতাঃ||১৮৪|| বিসূচিকাপ্রতিশ্যাযহৃদ্রোগশমনাশ্চ তাঃ| ইত্যেষা ক্ষারগুটিকা কৃষ্ণাত্রেযেণ কীর্তিতা||১৮৫|| ইতি ক্ষারগুডিকা| বত্সকাতিবিষে পাঠাং দুঃস্পর্শাং হিঙ্গু চিত্রকম্| চূর্ণীকৃত্য পলাশাগ্রক্ষারে মূত্রস্রুতে পচেত্||১৮৬|| আযসে ভাজনে সান্দ্রাত্তস্মাত্ কোলং সুখাম্বুনা| মদ্যৈর্বা গ্রহণীদোষশোথার্শঃপাণ্ডুমান্ পিবেত্||১৮৭|| ইতি চতুর্থক্ষারঃ|

Adhikarana 49 (188-193) · Śloka 193

ত্রিফলাং কটভীং চব্যং বিল্বমধ্যমযোরজঃ| রোহিণীং কটুকাং মুস্তং কুষ্ঠং পাঠাং চ হিঙ্গু চ||১৮৮|| মধুকং মুষ্ককযবক্ষারৌ ত্রিকটুকং বচাম্| বিডঙ্গং পিপ্পলীমূলং স্বর্জিকাং নিম্বচিত্রকৌ||১৮৯|| মূর্বাজমোদেন্দ্রযবান্ গুডূচীং দেবদারু চ| কার্ষিকং লবণানাং চ পঞ্চানাং পলিকান্পৃথক্||১৯০|| ভাগান্ দধ্নি ত্রিকুডবে ঘৃততৈলেন মূর্চ্ছিতম্| অন্তর্ধূমং শনৈর্দগ্ধ্বা তস্মাত্ পাণিতলং পিবেত্||১৯১|| সর্পিষা কফবাতার্শোগ্রহণীপাণ্ডুরোগবান্| প্লীহমূত্রগ্রহশ্বাসহিক্কাকাসক্রিমিজ্বরান্||১৯২|| শোষাতিসারৌ শ্বযথুং প্রমেহানাহহৃদ্গ্রহান্| হন্যাত্ সর্ববিষং চৈব ক্ষারোঽগ্নিজননো বরঃ||১৯৩|| জীর্ণে রসৈর্বা মধুরৈরশ্নীযাত্ পযসাঽপি বা| ইতি পঞ্চমক্ষারঃ|

Adhikarana 50 (194-195) · Śloka 196

ত্রিদোষে বিধিবিদ্বৈদ্যঃ পঞ্চ কর্মাণি কারযেত্||১৯৪|| ঘৃতক্ষারাসবারিষ্টান্ দদ্যাচ্চাগ্নিবিবর্ধনান্| ক্রিযা যা চানিলাদীনাং নির্দিষ্টা গ্রহণীং প্রতি||১৯৫|| ব্যত্যাসাত্তাং সমস্তাং বা কুর্যাদ্দোষবিশেষবিত্|১৯৬|

Adhikarana 51 (196-197) · Śloka 198

স্নেহনং স্বেদনং শুদ্ধির্লঙ্ঘনং দীপনং চ যত্||১৯৬|| চূর্ণানি লবণক্ষারমধ্বরিষ্টসুরাসবাঃ| বিবিধাস্তক্রযোগাশ্চ দীপনানাং চ সর্পিষাম্||১৯৭|| গ্রহণীরোগিভিঃ সেব্যাঃ, ...|১৯৮|

Adhikarana 52 (198-200) · Śloka 201

... ক্রিযাং চাবস্থিকীং শৃণু| ষ্ঠীবনং শ্লৈষ্মিকে রূক্ষং দীপনং তিক্তসংযুতম্||১৯৮|| সকৃদ্রূক্ষং সকৃত্স্নিগ্ধং কৃশে বহুকফে হিতম্| পরীক্ষ্যামং শরীরস্য দীপনং স্নেহসংযুতম্||১৯৯|| দীপনং বহুপিত্তস্য তিক্তং মধুরসংযুতম্| বহুবাতস্য তু স্নেহলবণাম্লযুতং হিতম্||২০০|| সন্ধুক্ষতি তথা বহ্নিরেষাং বিধিবদিন্ধনৈঃ|২০১|

Adhikarana 53 (201-205) · Śloka 205

স্নেহমেব পরং বিদ্যাদ্দুর্বলানলদীপনম্||২০১|| নালং স্নেহসমিদ্ধস্য শমাযান্নং সুগুর্বপি| মন্দাগ্নিরবিপক্বং তু পুরীষং যোঽতিসার্যতে||২০২|| দীপনীযৌষধৈর্যুক্তাং ঘৃতমাত্রাং পিবেত্তু সঃ| তযা সমানঃ পবনঃ প্রসন্নো মার্গমাস্থিতঃ||২০৩|| অগ্নেঃ সমীপচারিত্বাদাশু প্রকুরুতে বলম্| কাঠিন্যাদ্যঃ পুরীষং তু কৃচ্ছ্রান্মুঞ্চতি মানবঃ||২০৪|| সঘৃতং লবণৈর্যুক্তং নরোঽন্নাবগ্রহং পিবেত্| রৌক্ষ্যান্মন্দে পিবেত্সর্পিস্তৈলং বা দীপনৈর্যুতম্||২০৫||

Adhikarana 54 (206-210) · Śloka 211

অতিস্নেহাত্তু মন্দেঽগ্নৌ চূর্ণারিষ্টাসবা হিতাঃ| ভিন্নে গুদোপলেপাত্তু মলে তৈলসুরাসবাঃ||২০৬|| উদাবর্তাত্তু মন্দেঽগ্নৌ নিরূহাঃ স্নেহবস্তযঃ| দোষবৃদ্ধ্যা তু মন্দেঽগ্নৌ শুদ্ধো দোষবিধিং চরেত্||২০৭|| ব্যাধিযুক্তস্য মন্দে তু সর্পিরেবাগ্নিদীপনম্| উপবাসাচ্চ মন্দেঽগ্নৌ যবাগূভিঃ পিবেদ্ঘৃতম্||২০৮|| অন্নাবপীডিতং বল্যং দীপনং বৃংহণং চ তত্| দীর্ঘকালপ্রসঙ্গাত্তু ক্ষামক্ষীণকৃশান্নরান্||২০৯|| প্রসহানাং রসৈঃ সাম্লৈর্ভোজযেত্ পিশিতাশিনাম্| লঘু, তীক্ষ্ণোষ্ণশোধিত্বাদ্দীপযন্ত্যাশু তেঽনলম্||২১০|| মাংসোপচিতমাংসত্বাত্তথাঽঽশুতরবৃংহণাঃ|২১১|

Adhikarana 55 (211-216) · Śloka 217

নাভোজনেন কাযাগ্নির্দীপ্যতে নাতিভোজনাত্||২১১|| যথা নিরিন্ধনো বহ্নিরল্পো বাঽতীন্ধনাবৃতঃ| স্নেহান্নবিধিভিশ্চিত্রৈশ্চূর্ণারিষ্টসুরাসবৈঃ ||২১২|| সম্যক্প্রযুক্তৈর্ভিষজা বলমগ্নেঃ প্রবর্ধতে| যথা হি সারদার্বগ্নিঃ স্থিরঃ সন্তিষ্ঠতে চিরম্||২১৩|| স্নেহান্নবিধিভিস্তদ্বদন্তরগ্নির্ভবেত্ স্থিরঃ| হিতং জীর্ণে মিতং চাশ্নংশ্চিরমারোগ্যমশ্নুতে||২১৪|| অবৈষম্যেণ ধাতূনামগ্নিবৃদ্ধৌ যতেত না| সমৈর্দোষৈঃ সমো মধ্যে দেহস্যোষ্মাঽগ্নিসংস্থিতঃ||২১৫|| পচত্যন্নং তদারোগ্যপুষ্ট্যাযুর্বলবৃদ্ধযে| দোষৈর্মন্দোঽতিবৃদ্ধো বা বিষমৈর্জনযেদ্গদান্||২১৬|| বাচ্যং মন্দস্য তত্রোক্তমতিবৃদ্ধস্য বক্ষ্যতে|২১৭|

Adhikarana 56 (217-234) · Śloka 235

নরে ক্ষীণকফে পিত্তং কুপিতং মারুতানুগম্||২১৭|| স্বোষ্মণা পাবকস্থানে বলমগ্নেঃ প্রযচ্ছতি| তদা লব্ধবলো দেহে বিরূক্ষে সানিলোঽনলঃ||২১৮|| পরিভূয পচত্যন্নং তৈক্ষ্ণ্যাদাশু মুহুর্মুহুঃ| পক্ত্বাঽন্নং স ততো ধাতূঞ্ছোণিতাদীন্ পচত্যপি||২১৯|| ততো দৌর্বল্যমাতঙ্কান্মৃত্যুং চোপনযেন্নরম্| ভুক্তেঽন্নে লভতে শান্তিং জীর্ণমাত্রে প্রতাম্যতি||২২০|| তৃট্শ্বাসদাহমূর্চ্ছাদ্যা ব্যাধযোঽত্যগ্নিসম্ভবাঃ| তমত্যগ্নিং গুরুস্নিগ্ধশীতৈর্মধুরবিজ্জলৈঃ||২২১|| অন্নপানৈর্নযেচ্ছান্তিং দীপ্তমগ্নিমিবাম্বুভিঃ| মুহুর্মুহুরজীর্ণেঽপি ভোজ্যান্যস্যোপহারযেত্||২২২|| নিরিন্ধনোঽন্তরং লব্ধ্বা যথৈনং ন বিপাদযেত্| পাযসং কৃশরাং স্নিগ্ধং পৈষ্টিকং গুডবৈকৃতম্||২২৩|| অদ্যাত্তথৌদকানূপপিশিতানি ভৃতানি চ| মত্স্যান্বিশেষতঃ শ্লক্ষ্ণান্স্থিরতোযচরাংস্তথা||২২৪|| আবিকং চ ভৃতং মাংসমদ্যাদত্যগ্নিনাশনম্ | যবাগূং সমধূচ্ছিষ্টাং ঘৃতং বা ক্ষুধিতঃ পিবেত্||২২৫|| গোধূমচূর্ণমন্থং বা ব্যধযিত্বা সিরাং পিবেত্| পযো বা শর্করাসর্পির্জীবনীযৌষধৈঃ শৃতম্||২২৬|| ফলানাং তৈলযোনীনামুত্ক্রুঞ্চাশ্চ সশর্করাঃ| মার্দবং জনযন্ত্যগ্নেঃ স্নিগ্ধা মাংসরসাস্তথা||২২৭|| পিবেচ্ছীতাম্বুনা সর্পির্মধূচ্ছিষ্টেন সংযুতম্| গোধূমচূর্ণং পযসা সসর্পিষ্কং পিবেন্নরঃ||২২৮|| আনূপরসসিদ্ধান্ বা ত্রীন্ স্নেহাংস্তৈলবর্জিতান্| পযসা সম্মিতং চাপি ঘনং ত্রিস্নেহসংযুতম্||২২৯|| নারিস্তন্যেন সংযুক্তাং পিবেদৌদুম্বরীং ত্বচম্| তাভ্যাং বা পাযসং সিদ্ধমদ্যাদত্যগ্নিশান্তযে||২৩০|| শ্যামাত্রিবৃদ্বিপক্বং বা পযো দদ্যাদ্বিরেচনম্| অসকৃত্ পিত্তশান্ত্যর্থং পাযসপ্রতিভোজনম্||২৩১|| প্রসমীক্ষ্য ভিষক্ প্রাজ্ঞস্তস্মৈ দদ্যাদ্বিধানবিত্| যত্কিঞ্চিন্মধুরং মেদ্যং শ্লেষ্মলং গুরুভোজনম্||২৩২|| সর্বং তদত্যগ্নিহিতং ভুক্ত্বা প্রস্বপনং দিবা| মেদ্যান্যন্নানি যোঽত্যগ্নাবপ্রতান্তঃ সমশ্নুতে||২৩৩|| ন তন্নিমিত্তং ব্যসনং লভতে পুষ্টিমেব চ| কফে বৃদ্ধে জিতে পিত্তে মারুতে চানলঃ সমঃ||২৩৪|| সমধাতোঃ পচত্যন্নং পুষ্ট্যাযুর্বলবৃদ্ধযে|২৩৫|

Adhikarana 57 (235-243) · Śloka 243

ভবন্তি চাত্র- পথ্যাপথ্যমিহৈকত্র ভুক্তং সমশনং মতম্||২৩৫|| বিষমং বহু বাঽল্পং বাঽপ্যপ্রাপ্তাতীতকালযোঃ| ভুক্তং পূর্বান্নশেষে তু পুনরধ্যশনং মতম্||২৩৬|| ত্রীণ্যপ্যেতানি মৃত্যুং বা ঘোরান্ ব্যাধীন্সৃজন্তি বা| প্রাতরাশে ত্বজীর্ণেঽপি সাযমাশো ন দুষ্যতি||২৩৭|| দিবা প্রবুধ্যতেঽর্কেণ হৃদযং পুণ্ডরীকবত্| তস্মিন্বিবুদ্ধে স্রোতাংসি স্ফুটত্বং যান্তি সর্বশঃ||২৩৮|| ব্যাযামাচ্চ বিহারাচ্চ বিক্ষিপ্তত্বাচ্চ চেতসঃ| ন ক্লেদমুপগচ্ছন্তি দিবা তেনাস্য ধাতবঃ||২৩৯|| অক্লিন্নেষ্বন্নমাসিক্তমন্যত্তেষু ন দুষ্যতি| অবিদগ্ধ ইব ক্ষীরে ক্ষীরমন্যদ্বিমিশ্রিতম্||২৪০|| নৈব দূষ্যতি তেনৈব সমং সম্পদ্যতে যথা| রাত্রৌ তু হৃদযে ম্লানে সংবৃতেষ্বযনেষু চ| যান্তি কোষ্ঠে পরিক্লেদং সংবৃতে দেহধাতবঃ||২৪১|| ক্লিন্নেষ্বন্যদপক্বেষু তেষ্বাসিক্তং প্রদুষ্যতি| বিদগ্ধেষু পযঃস্বন্যত্ পযস্তপ্তমিবার্পিতম্||২৪২|| নৈশেষ্বাহারজাতেষু নাবিপক্বেষু বুদ্ধিমান্| তস্মাদন্যত্সমশ্নীযাত্পালযিষ্যন্বলাযুষী||২৪৩||

Adhikarana 58 (244-249) · Śloka 249

তত্র শ্লোকাঃ- অন্তরগ্নিগুণা দেহং যথা ধারযতে চ সঃ| যথাঽন্নং পচ্যতে যাংশ্চ যথাঽঽহারঃ করোত্যপি||২৪৪|| যেঽগ্নযো যাংশ্চ পুষ্যন্তি যাবন্তো যে পচন্তি যান্| রসাদীনাং ক্রমোত্পত্তির্মলানাং তেভ্য এব চ||২৪৫|| বৃষ্যাণামাশুকৃদ্ধেতুর্ধাতুকালোদ্ভবক্রমঃ| রোগৈকদেশকৃদ্ধেতুরন্তরগ্নির্যথাঽধিকঃ||২৪৬|| প্রদুষ্যতি যথা দুষ্টো যান্ রোগাঞ্জনযত্যপি| গ্রহণী যা যথা যচ্চ গ্রহণীদোষলক্ষণম্||২৪৭|| পূর্বরূপং পৃথক্ চৈব ব্যঞ্জনং সচিকিত্সিতম্| চতুর্বিধস্য নির্দিষ্টং তথা চাবস্থিকী ক্রিযা||২৪৮|| জাযতে চ যথাঽত্যগ্নির্যচ্চ তস্য চিকিত্সিতম্| উক্তবানিহ তত্ সর্বং গ্রহণীদোষকে মুনিঃ||২৪৯||

Adhikarana puShpikA · Śloka 15

ইত্যগ্নিবেশকৃতে তন্ত্রেঽপ্রাপ্তে দৃঢবলসম্পূরিতে চিকিত্সাস্থানে গ্রহণীচিকিত্সিতং নাম পঞ্চদশোঽধ্যাযঃ||১৫||