10. raktapittacikitsitam

Adhikarana 1 (1-2) · Śloka 2

অথাতো রক্তপিত্তচিকিত্সিতং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

আদ্যুত্পত্তৌ জ্বরসন্তাপাদ্রক্তপিত্তোত্পত্তের্জ্বরচিকিত্সিতমনু রক্তপিত্তচিকিত্সিতমভিধীযতে||১-২||

Adhikarana 2 (3-4) · Śloka 4

বিহরন্তং জিতাত্মানং পঞ্চগঙ্গে পুনর্বসুম্| প্রণম্যোবাচ নির্মোহমগ্নিবেশোঽগ্নিবর্চসম্||৩|| ভগবন্ রক্তপিত্তস্য হেতুরুক্তঃ সলক্ষণঃ| বক্তব্যং যত্ পরং তস্য বক্তুমর্হসি তদ্গুরো||৪||

পঞ্চগঙ্গঃ দেশবিশেষঃ| বক্তব্যং যত্ পরমিতি উক্তরক্তপিত্তহেতুলক্ষণাতিরিক্তং চিকিত্সিতমিত্যর্থঃ||৩-৪||

Adhikarana 3 (5-6) · Śloka 6

গুরুরুবাচ- মহাগদং মহাবেগমগ্নিবচ্ছীঘ্রকারি চ| হেতুলক্ষণবিচ্ছীঘ্রং রক্তপিত্তমুপাচরেত্||৫|| তস্যোষ্ণং তীক্ষ্ণমম্লং চ কটূনি লবণানি চ| ঘর্মশ্চান্নবিদাহশ্চ হেতুঃ পূর্বং নিদর্শিতঃ||৬||

নিদানে যদ্যপি রক্তপিত্তস্য হেতুলক্ষণানি প্রতিপাদিতান্যেব, তথাঽপীহ চিকিত্সাপরিকরতযা প্রকরণবশাদ্ধেতবঃ সঙ্ক্ষেপেণ লক্ষণানি চ প্রাযঃপ্রাদুর্ভাবীনি পুনঃ কথ্যন্তে| ঘর্ম আতপঃ| অন্নবিদাহস্তু স্বরূপবিদাহিদ্রব্যভক্ষণাদ্ভবতি, তথা পিত্তেনান্নবহস্রোতসো দুষ্টত্বাদবিদাহিভোজনেনাপি ভবতি| যদুক্তমন্যত্র- “স্রোতস্যন্নবহে পিত্তং পক্তৌ বা যস্য তিষ্ঠতি| বিদাহি ভুক্তমন্যদ্বা তস্যাপ্যন্নং বিদহ্যতে” (সু.সূ.অ.৪৬) ইতি||৫-৬||

Adhikarana 4 (7-8) · Śloka 8

তৈর্হেতুভিঃ সমুত্ক্লিষ্টং পিত্তং রক্তং প্রপদ্যতে| তদ্যোনিত্বাত্ প্রপন্নং চ বর্ধতে তত্ প্রদূষযত্||৭|| তস্যোষ্মণা দ্রবো ধাতুর্ধাতোর্ধাতোঃ প্রসিচ্যতে| স্বিদ্যতস্তেন সংবৃদ্ধিং ভূযস্তদধিগচ্ছতি||৮||

তৈর্হেতুভিরিত্যাদিনা সম্প্রাপ্তিমাহ| রক্তং প্রপদ্যতে রক্তং গচ্ছতীত্যর্থঃ| যদ্যপি “পিত্তং স্বেদো রসো লসীকা রুধিরমামাশযশ্চ পিত্তস্থানানি, তত্রাপ্যামাশযো বিশেষেণ পিত্তস্থানম্” (সূ.অ.২০) ইতি বচনেন স্বভাবাদেব রক্তং যাতি, তথাঽপি রক্তপিত্তসম্প্রাপ্তৌ প্রধানস্থানাদামাশযরূপাত্ পিত্তস্যেহ রক্তগমনং জ্ঞেযং; রক্তগমনং চ পিত্তস্য সম্প্রাপ্তিমহিম্না ভবতি| তদ্যোনিত্বাদিতি তদ্যোনিত্বং হেতুঃ রক্তপ্রপন্নস্য পিত্তস্য বর্ধনে জ্ঞেযং; তেন যস্মাদ্রক্তযোনি পিত্তং তস্মাদ্রক্তং প্রাপ্য বর্ধত ইত্যর্থঃ| উক্তং হি- “অসৃজঃ পিত্তং” (চি.অ.১৫) ইতি| তদিতি রক্তং প্রদূষযত্| দ্রবো ধাতুরিতি দ্রবরূপোংঽশঃ| ধাতোর্ধাতোরিতি মাংসাদেঃ| স্বিদ্যতঃ প্রসিচ্যতে অতিক্ষরতি; তেন পিত্তোষ্মণা স্বিদ্যমানধাতুভ্যশ্চ্যুতেন দ্রবরূপেণ ধাতুনা যুক্তং সপিত্তং ভূযোঽতিতরাং বৃদ্ধিং গচ্ছতীতি যোজনা||৭-৮||

Adhikarana 5 (9) · Śloka 9

সংযোগাদ্দূষণাত্তত্তু সামান্যাদ্গন্ধবর্ণযোঃ| রক্তস্য পিত্তমাখ্যাতং রক্তপিত্তং মনীষিভিঃ||৯||

রক্তপিত্তসঞ্জ্ঞানিমিত্তমাহ- সংযোগাদিত্যাদি| রক্তস্য সংযোগাত্তথা রক্তস্য দূষণাত্তথা রক্তস্য গন্ধবর্ণযোঃ পিত্তে সামান্যাত্ পিত্তং রক্তপিত্তমুচ্যতে ইতি বাক্যার্থঃ||৯||

Adhikarana 6 (10) · Śloka 10

প্লীহানং চ যকৃচ্চৈব তদধিষ্ঠায বর্ততে| স্রোতাংসি রক্তবাহীনি তন্মূলানি হি দেহিনাম্||১০||

রক্তপিত্তস্য স্থানমাহ- প্লীহানং চেত্যাদি| বর্ততে ঊর্ধ্বমধশ্চ যাতি; ‘বর্ধতে’ ইতি বা পাঠঃ| কস্মাদ্যকৃত্প্লীহ্নোরেব তদ্বর্তত ইত্যাহ- স্রোতাংসীত্যাদি| যস্মাদ্রক্তস্যাপি যকৃত্প্লীহানাবেব প্রধানং স্থানং, তেন রক্তসংযোগাদিনিষ্পন্নস্য রক্তপিত্তস্য তদেব স্থানমিতি ভাবঃ||১০||

Adhikarana 7 (11-12) · Śloka 13

সান্দ্রং সপাণ্ডু সস্নেহং পিচ্ছিলং চ কফান্বিতম্| শ্যাবারুণং সফেনং চ তনু রূক্ষং চ বাতিকম্||১১|| রক্তপিত্তং কষাযাভং কৃষ্ণং গোমূত্রসন্নিভম্| মেচকাগারধূমাভমঞ্জনাভং চ পৈত্তিকম্||১২|| সংসৃষ্টলিঙ্গং সংসর্গাত্ত্রিলিঙ্গং সান্নিপাতিকম্|১৩|

তস্য দোষসম্বন্ধবিশেষেণ লিঙ্গান্যাহ- সান্দ্রমিত্যাদি| কষাযবদাভা যস্য তত্ কষাযাভং, পাটলমিত্যর্থঃ| কৃষ্ণস্য বস্ত্রাদেঃ সসারগন্ধকাদিভির্মসৃণীকৃতস্য যো বর্ণঃ স মেচকঃ| ননু পিত্তমেব রক্তপিত্তমিত্যুক্তং, তত্ কথং শ্লৈষ্মিকং ভবতি? উচ্যতে- সামান্যসম্প্রাপ্তৌ পিত্তমেব রক্তপিত্তনির্বর্তকং, যথা- সর্বগুল্মেষু বাযুঃ, যথা- সর্বজ্বরেষু পিত্তমারম্ভকং; তদেব যদোল্বণেন কফেন স্বলক্ষণকারিণা যুক্তং রক্তপিত্তকরং ভবতি, তদা সামান্যসম্প্রাপ্তিসম্প্রাপ্তং পিত্তমুত্সৃজ্য শ্লেষ্মণৈব সান্দ্রত্বাদিস্বলক্ষণকারিণা ব্যপদিশ্যতে- শ্লৈষ্মিকং রক্তপিত্তমিতি; যথা- শ্লৈষ্মিকে গুল্মে সামান্যসম্প্রাপ্ত্যাগতবাতং পরিত্যজ্য শ্লেষ্মণৈব ব্যপদেশো ভবতি, যথা বা কফজ্বরে সর্বজ্বরানপাযিকারণমনাদৃত্য বিশেষলক্ষণকারিণা শ্লেষ্মণৈব ব্যপদেশো ভবতি; এবং বাতিকেঽপি রক্তপিত্তে ব্যাখ্যেযম্| যত্তু কফবাতবিরহিতেন কেবলেনৈব পিত্তেন বলবতা জনিতং রক্তপিত্তং পৈত্তিকরক্তপিত্তলক্ষণং ভবতি তত্ পৈত্তিকং রক্তপিত্তমিত্যুচ্যতে| লক্ষণেনৈব দোষব্যপদেশো ভবতি; তেন যদ্যদ্দোষজনিতলক্ষণযুক্তং রক্তপিত্তং ভবতি তত্তদ্দোষজমিতি ব্যপদিশ্যতে| শ্লৈষ্মিকাদিরক্তপিত্তাপেক্ষযা পৈত্তিকে রক্তপিত্তেঽত্যুল্বণং পিত্তং ভবতি, যতস্তত্রৈব পিত্তং স্বলক্ষণানি করোতি, নান্যত্র; এবং ব্যবস্থিতে যদুচ্যতে- কেবলপৈত্তিকস্য রক্তপিত্তস্য মার্গো নাস্তি, যতো বাতরক্তমধো যাতি, কফারব্ধমূর্ধ্বমিতি প্রতিপাদিতং; তদপি ন, যতঃ পৈত্তিকস্যাপ্যূর্ধ্বগমনমধোগমনং বা ভবত্যেব; পরং পৈত্তিকং যদূর্ধ্বং যাতি তন্মার্গমহিম্না কফসংযুক্তং ভবতি, যচ্চাধো যাতি তদ্বাতস্থানসম্বন্ধাদ্বাতানুগতং ভবতি| মার্গসম্বন্ধানুগতশ্চ দোষঃ স্বলক্ষণকারকত্বান্নানুবন্ধঃ, তেনাসৌ পৈত্তিকে রক্তপিত্তেঽপি ‘একদোষানুগং সাধ্যং’ ইত্যাদিবচনেষু ন গৃহ্যতে| যতঃ স্বতন্ত্রো ব্যক্তলিঙ্গশ্চ দোষোঽনুবন্ধ্যঃ; তদ্বিপরীতস্তু অনুবন্ধঃ; তেন যথোক্তলক্ষণকারিণা দোষেণানুবন্ধ্যেন বাতিকত্বাদিব্যপদেশো রক্তপিত্তেষু, ন মার্গসম্বন্ধানুগতেনাস্বলক্ষণকারিণাঽনুবন্ধরূপেণেতি| অন্যে তু “প্রদেশান্তরচিতেন পিত্তেন যদোত্তরকালং রক্তপিত্তস্য সম্বন্ধো ভবতি তদৈব পৈত্তিকং রক্তপিত্তং ভবতি” ইতি ব্রুবতে||১১-১২||-

Adhikarana 8 (13-14) · Śloka 14

একদোষানুগং সাধ্যং দ্বিদোষং যাপ্যমুচ্যতে||১৩|| যত্ত্রিদোষমসাধ্যং তন্মন্দাগ্নেরতিবেগবত্| ব্যাধিভিঃ ক্ষীণদেহস্য বৃদ্ধস্যানশ্নতশ্চ যত্||১৪||

সম্প্রতি সাধ্যাসাধ্যবিভাগমাহ- একেত্যাদি| একদোষানুগমিতি উক্তৈকদোষলক্ষণযুক্তম্, এবং দ্বিদোষমপি দোষদ্বযলক্ষণযুক্তম্, এবং ত্রিদোষমপি জ্ঞেযম্| ন তু মার্গসম্বন্ধানুগতমপি দোষং প্রক্ষিপ্য দ্বিদোষত্বং ত্রিদোষত্বং বা গণনীযং, তথাহি সতি কেবলং রকপিত্তং ন স্যাদেব; তথা সম্প্রাপ্তিসম্প্রাপ্তং দোষং গৃহীত্বা মার্গসম্বন্ধানুগতেন বাযুনা কফেন বা যোগাদ্দ্বিদোষজত্বমেব সর্বদা স্যাত্, ন ‘একদোষানুগং সাধ্যং’ ইতি যদুক্তং তত্ স্যাত্; তস্মাদ্যথোক্তমেব সাধু| মন্দাগ্নেরতিবেগবদিতি পৃথগেবাসাধ্যলক্ষণং, ব্যাধিভিঃ ক্ষীণদেহস্যেত্যাদি চ পৃথগেব||১৩-১৪||

Adhikarana 9 (15-21) · Śloka 21

গতিরূর্ধ্বমধশ্চৈব রক্তপিত্তস্য দর্শিতা| ঊর্ধ্বা সপ্তবিধদ্বারা দ্বিদ্বারা ত্বধরা গতিঃ||১৫|| সপ্ত চ্ছিদ্রাণি শিরসি দ্বে চাধঃ, সাধ্যমূর্ধ্বগম্| যাপ্যং ত্বধোগং, মার্গৌ তু দ্বাবসাধ্যং প্রপদ্যতে||১৬|| যদা তু সর্বচ্ছিদ্রেভ্যো রোমকূপেভ্য এব চ| বর্ততে তামসঙ্খ্যেযাং গতিং তস্যাহুরান্তিকীম্||১৭|| যচ্চোভযাভ্যাং মার্গাভ্যামতিমাত্রং প্রবর্ততে| তুল্যং কুণপগন্ধেন রক্তং কৃষ্ণমতীব চ||১৮|| সংসৃষ্টং কফবাতাভ্যাং কণ্ঠে সজ্জতি চাপি যত্| যচ্চাপ্যুপদ্রবৈঃ সর্বৈর্যথোক্তৈঃ সমভিদ্রুতম্||১৯|| হারিদ্রনীলহরিততাম্রৈর্বর্ণৈরুপদ্রুতম্| ক্ষীণস্য কাসমানস্য যচ্চ তচ্চ ন সিধ্যতি||২০|| যদ্বিদোষানুগং যদ্বা শান্তং শান্তং প্রকুপ্যতি| মার্গান্মার্গং চরেদ্যদ্বা যাপ্যং পিত্তমসৃক্ চ তত্||২১||

গতিকৃতং সাধ্যাদিভেদং দর্শযিতুং গতিভেদমেবাহ- গতিরূর্ধ্বমিত্যাদি| গতিপ্রকারান্তরমপ্যসাধ্যস্যাহ- যদা তু সর্বচ্ছিদ্রেভ্য ইত্যাদি| যচ্চোভযাভ্যামিত্যাদিনা কৃষ্ণমতীব চেত্যন্তেনাসাধ্যতালক্ষণমাহ| অত্র মার্গাভ্যামিত্যনেন ন যৌগপদ্যেন মার্গপ্রবৃত্তির্ব্যবস্থিতা, কিন্তু প্রত্যেকং, মার্গদ্বযপ্রবৃত্তস্যাসাধ্যত্বেন পূর্বমেবোক্তত্বাত্| কুণপগন্ধেনেতি শবগন্ধেন| কণ্ঠে সজ্জতীতি কণ্ঠাদ্বহির্ন যাতি| যথোক্তৈরিতি নিদানোক্তৈঃ; তত্র হি উপদ্রবাঃ খলু দৌর্বল্যারোচকাদযঃ স্বরভেদান্তা উক্তাঃ| হারিদ্রবর্ণাদিভির্যুক্তং ক্ষীণস্য কাসিনো ন সিধ্যতীতি জ্ঞেযম্| যদ্বিদোষানুগমিত্যনেনানুবন্ধরূপদোষদ্বযযোগাদ্যাপ্যত্বমুচ্যতে; যত্তু পূর্বং দ্বিদোষজং যাপ্যমিত্যুক্তং তদনুবন্ধ্যদোষদ্বযজন্যাভিপ্রাযেণেতি ন পৌনরুক্ত্যম্| মার্গান্মার্গং চরেদিতি ঊর্ধ্বগং মুখং পরিত্যজ্য নাসাং যাতীত্যাদি জ্ঞেযম্, ঊর্ধ্বগস্য ত্বধোগমনেঽধোগত্বাদেব যাপ্যত্বং ভবতি, অধোগং তু মার্গান্তরমগচ্ছদপি স্বত এব যাপ্যং; তস্মান্নোর্ধ্বাধোমার্গপরিবর্তোঽত্র বিবক্ষিতঃ||১৫-২১||

Adhikarana 10 (22) · Śloka 22

একমার্গং বলবতো নাতিবেগং নবোত্থিতম্| রক্তপিত্তং সুখে কালে সাধ্যং স্যান্নিরুপদ্রবম্||২২||

একমার্গমিত্যাদিনা সাধ্যলক্ষণম্| একমার্গমিতি সামান্যবচনেঽপ্যূর্ধ্বমার্গমেব লভ্যতে, অধোগস্যৈকমার্গগস্যাপি যাপ্যত্বাত্| সুখে কালে ইতি হেমন্তে শিশিরে চ| অত্র মার্গেণ তথা দোষেণ তথা লক্ষণেন সাধ্যাসাধ্যযাপ্যভেদাঃ পৃথগুক্তাঃ| তত্র চ সাধ্যলক্ষণযাপ্যলক্ষণমেলকে যাপ্যত্বমেব; যাপ্যাসাধ্যমেলকেঽসাধ্যত্বমেব, যথা- একদোষং যদধোগতং তদেকদোষত্বাত্ সাধ্যং কিন্ত্বধোগতত্বাদ্যাপ্যং; যত্ত্রিদোষমধোগতং তদধোগতত্বেন যাপ্যং, কিন্তু ত্রিদোষত্বাদসাধ্যমেবেতি জ্ঞেযম্| যদুক্তং- “নাসাধ্যঃ সাধ্যতাং যাতি সাধ্যো যাতি ত্বসাধ্যতাম্” (নি.অ.৮) ইতি; “সাধ্যা যাপ্যত্বমাযান্তি যাপ্যাশ্চাসাধ্যতাং তথা” (নি.অ.৮) ইতি চ||২২||

Adhikarana 11 (23-24) · Śloka 24

স্নিগ্ধোষ্ণমুষ্ণরূক্ষং চ রক্তপিত্তস্য কারণম্| অধোগস্যোত্তরং প্রাযঃ, পূর্বং স্যাদূর্ধ্বগস্য তু||২৩|| ঊর্ধ্বগং কফসংসৃষ্টমধোগং মারুতানুগম্| দ্বিমার্গং কফবাতাভ্যামুভাভ্যামনুবধ্যতে||২৪||

স্নিগ্ধোষ্ণমিত্যাদি নিদানোক্তমপি প্রাযিকত্বাদ্বিশেষোপদর্শনার্থং পুনরিহোচ্যতে| প্রাযঃশব্দেন কদাচিদ্রূক্ষোষ্ণমপি ঊর্ধ্বগস্য হেতুর্ভবতি, তথা স্নিগ্ধোষ্ণমপি অধোগস্যেতি দর্শযতি| এবং চ নিদানমার্গানিযমে সতি ‘মার্গৌ দোষানুবন্ধং চ নিদানং প্রসমীক্ষ্য চ’ ইত্যত্র মার্গাদি পঞ্চ (যচ্চ) পঠিতং...| যদ্যপ্যধোগে রূক্ষোষ্ণমেব পরং হেতুস্তথাঽপি স্নিগ্ধোষ্ণং কদাচিত্ কারণং ভবতি, স্নিগ্ধকৃতশ্চ কফোঽপ্যধোগে ভবতি; এবমূর্ধ্বগেঽপি চিন্তনীযম্| ঊর্ধ্বগং কফসংসৃষ্টমিত্যাদাবপি প্রাযঃশব্দসম্বন্ধাদ্ব্যভিচারো জ্ঞেযঃ||২৩-২৪||

Adhikarana 12 (25-28) · Śloka 28

অক্ষীণবলমাংসস্য রক্তপিত্তং যদশ্নতঃ| তদ্দোষদুষ্টমুত্ক্লিষ্টং নাদৌ স্তম্ভনমর্হতি||২৫|| গলগ্রহং পূতিনস্যং মূর্চ্ছাযমরুচিং জ্বরম্| গুল্মং প্লীহানমানাহং কিলাসং কৃচ্ছ্রমূত্রতাম্||২৬|| কুষ্ঠান্যর্শাংসি বীসর্পং বর্ণনাশং ভগন্দরম্| বুদ্ধীন্দ্রিযোপরোধং চ কুর্যাত্ স্তম্ভিতমাদিতঃ||২৭|| তস্মাদুপেক্ষ্যং বলিনো বলদোষবিচারিণা | রক্তপিত্তং প্রথমতঃ প্রবৃদ্ধং সিদ্ধিমিচ্ছতা||২৮||

অশ্নত ইত্যনেন সন্তর্পণোত্থিতং দর্শযতি| উত্ক্লিষ্টমিতি প্রবৃত্ত্যুন্মুখম্, আমদোষাশ্রিতত্বাত্| বলদোষবিচারিণেতি যদৈব বলহ্রাসং সম্পশ্যেদ্ধীনদোষত্বং বা তদৈব স্তম্ভনং কার্যম্||২৫-২৮||

Adhikarana 13 (29-30) · Śloka 30

প্রাযেণ হি সমুত্ক্লিষ্টমামদোষাচ্ছরীরিণাম্| বৃদ্ধিং প্রযাতি পিত্তাসৃক্তস্মাত্তল্লঙ্ঘ্যমাদিতঃ||২৯|| মার্গৌ দোষানুবন্ধং চ নিদানং প্রসমীক্ষ্য চ| লঙ্ঘনং রক্তপিত্তাদৌ তর্পণং বা প্রযোজযেত্||৩০||

সম্প্রতি কৃত্স্নং লঙ্ঘনহেতুমাহ- মার্গাবিত্যাদি| তত্রোর্ধ্বমার্গঃ, সামং পিত্তং, কফো দোষঃ, স্নিগ্ধোষ্ণং চ নিদানং লঙ্ঘনপ্রযোজকং; তদ্ব্যতিরিক্তং তু মার্গাদি ভোজনরূপতর্পণপ্রযোজকম্| তর্পযতীতি তর্পণমশনম্| তেন যবাগূস্তর্পণং চ গ্রাহ্যম্| যে তু তর্পণশব্দেন সক্তুতর্পণমেব গ্রাহযন্তি তেষাং যবাগূদানপক্ষো ন সঙ্গৃহীতঃ স্যাত্||২৯-৩০||

Adhikarana 14 (31-35) · Śloka 35

হ্রীবেরচন্দনোশীরমুস্তপর্পটকৈঃ শৃতম্| কেবলং শৃতশীতং বা দদ্যাত্তোযং পিপাসবে||৩১|| ঊর্ধ্বগে তর্পণং পূর্বং পেযাং পূর্বমধোগতে| কালসাত্ম্যানুবন্ধজ্ঞো দদ্যাত্ প্রকৃতিকল্পবিত্||৩২|| জলং খর্জূরমৃদ্বীকামধূকৈঃ সপরূষকৈঃ| শৃতশীতং প্রযোক্তব্যং তর্পণার্থে সশর্করম্||৩৩|| তর্পণং সঘৃতক্ষৌদ্রং লাজচূর্ণৈঃ প্রদাপযেত্| ঊর্ধ্বগং রক্তপিত্তং তত্ পীতং কালে ব্যপোহতি||৩৪|| মন্দাগ্নেরম্লসাত্ম্যায তত্ সাম্লমপি কল্পযেত্| দাডিমামলকৈর্বিদ্বানম্লার্থং চানুদাপযেত্||৩৫||

কেবলমিতি হ্রীবেরাদিরহিতং; জলমেবৈকং কেবলমৌষধদ্বেষিণে পুরুষায দেযম্| পূর্বমিতি পদেন পশ্চাদ্বলহ্রাসকারকং নিষেধযতি| কালঃ হেমন্তাদিঃ, অনুবন্ধঃ দোষানুবন্ধঃ| প্রকৃতিঃ স্বাভাবিকী দ্রব্যাণাং গুরুলাঘবাদিরূপা, কল্পনং কল্পঃ সংস্কার ইত্যর্থঃ| এতেন কালং দোষানুবন্ধং চ জ্ঞাত্বা যস্য যত্স্বভাবং দ্রব্যং যুক্তং ভবতি তেন তর্পণং যবাগূর্বা কার্যেত্যর্থঃ| খর্জূরাদিনা জলং ষডঙ্গবিধানেনৈব কর্তব্যম্| এতচ্চ জলমত্র মধুরমপ্যূর্ধ্বগে কফসংসৃষ্টেঽপি রক্তপিত্তে যৌগিকং ভবতি, রক্তপিত্তব্যাধিপ্রত্যনীকত্বাত্||৩১-৩৫||

Adhikarana 15 (36-48) · Śloka 48

শালিষষ্টিকনীবারকোরদূষপ্রশান্তিকাঃ| শ্যামাকশ্চ প্রিযঙ্গুশ্চ ভোজনং রক্তপিত্তিনাম্||৩৬|| মুদ্গা মসূরাশ্চণকাঃ সমকুষ্ঠাঢকীফলাঃ| প্রশস্তাঃ সূপযূষার্থে কল্পিতা রক্তপিত্তিনাম্||৩৭|| পটোলনিম্ববেত্রাগ্রপ্লক্ষবেতসপল্লবাঃ| কিরাততিক্তকং শাকং গণ্ডীরঃ সকঠিল্লকঃ||৩৮|| কোবিদারস্য পুষ্পাণি কাশ্মর্যস্যাথ শাল্মলেঃ| অন্নপানবিধৌ শাকং যচ্চান্যদ্রক্তপিত্তনুত্||৩৯|| শাকার্থং শাকসাত্ম্যানাং তচ্ছস্তং রক্তপিত্তিনাম্| স্বিন্নং বা সর্পিষা ভৃষ্টং যূষবদ্বা বিপাচিতম্||৪০|| পারাবতান্ কপোতাংশ্চ লাবান্ রক্তাক্ষবর্তকান্| শশান্ কপিঞ্জলানেণান্ হরিণান্কালপুচ্ছকান্||৪১|| রক্তপিত্তে হিতান্ বিদ্যাদ্রসাংস্তেষাং প্রযোজযেত্| ঈষদম্লাননম্লান্ বা ঘৃতভৃষ্টান্ সশর্করান্||৪২|| কফানুগে যূষশাকং দদ্যাদ্বাতানুগে রসম্| রক্তপিত্তে যবাগূনামতঃ কল্পঃ প্রবক্ষ্যতে||৪৩|| পদ্মোত্পলানাং কিঞ্জল্কঃ পৃশ্নিপর্ণী প্রিযঙ্গুকাঃ| জলে সাধ্যা রসে তস্মিন্ পেযা স্যাদ্রক্তপিত্তিনাম্||৪৪|| চন্দনোশীরলোধ্রাণাং রসে তদ্বত্ সনাগরে| কিরাততিক্তকোশীরমুস্তানাং তদ্বদেব চ||৪৫|| ধাতকীধন্বযাসাম্বুবিল্বানাং বা রসে শৃতা| মসূরপৃশ্নিপর্ণ্যোর্বা স্থিরামুদ্গরসেঽথ বা||৪৬|| রসে হরেণুকানাং বা সঘৃতে সবলারসে| সিদ্ধাঃ পারাবতাদীনাং রসে বা স্যুঃ পৃথক্পৃথক্||৪৭|| ইত্যুক্তা রক্তপিত্তঘ্ন্যঃ শীতাঃ সমধুশর্করাঃ| যবাগ্বঃ কল্পনা চৈষা কার্যা মাংসরসেষ্বপি||৪৮||

শালীত্যাদিনাঽন্নমাহ| প্রশান্তিকা জলমধ্যে প্রাযো ভবতি| প্রিযঙ্গুঃ কঙ্গুঃ| কোরদূষস্য রক্তপিত্তহেতুত্বং নিষ্পাবমাষসূপাদিযুক্তস্যৈব সংযোগমহিম্না নিদানে প্রোক্তম্, অযং তু কষাযমধুরলঘুত্বাত্ কোরদূষঃ কেবলো রক্তপিত্তহর এবেতীহ পঠ্যতে| এবং গণ্ডীরোঽপি নিদানে সুরাসৌবীরকাদিযুক্ত এব হেতুত্বেনোক্তঃ, স তু কেবলো হিত এব; কিংবা স্থলজজলজভেদেন গণ্ডীরো দ্বিবিধঃ; তত্র হরিতবর্গপঠিতো যঃ স নিদানং ভবতি, ইতরস্তু জলজঃ শাকবর্গে পঠিতো যঃ স ইহ কফাধিকে রক্তপিত্তে জ্ঞেযঃ| যূষবদ্বা বিপাচিতমিতি যূষো যথা দাডিমাদ্যম্লদ্রব্যযুক্তো জলে বিপাচ্যতে তথাঽযমপীত্যর্থ; কিংবা যূষযুক্তং যথা ভবতি তথা বিপাচিতমিত্যর্থঃ| রক্তাক্ষঃ চকোরকঃ| যূষশ্চ শাকং চেতি যূষশাকম্||৩৬-৪৮||

Adhikarana 16 (49-51) · Śloka 51

শশঃ সবাস্তুকঃ শস্তো বিবন্ধে রক্তপিত্তিনাম্| বাতোল্বণে তিত্তিরিঃ স্যাদুদুম্বররসে শৃতঃ||৪৯|| মযূরঃ প্লক্ষনির্যূহে ন্যগ্রোধস্য চ কুক্কুটঃ| রসে বিল্বোত্পলাদীনাং বর্তকক্রকরৌ হিতৌ||৫০|| তৃষ্যতে তিক্তকৈঃ সিদ্ধং তৃষ্ণাঘ্নং বা ফলোদকম্| সিদ্ধং বিদারিগন্ধাদ্যৈরথবা শৃতশীতলম্||৫১||

আবস্থিকং ভোজনমাহ- শশ ইত্যাদি| অত্র শশঃ কষাযত্বাদ্রক্তপিত্তহরো ভবত্যেব, বিবন্ধহরেণ বাস্তুকেন সংস্কৃতত্বাদ্বিবন্ধহরোঽপি ভবতি| এবং তিত্তিরিমযূরাদযো যদ্যপ্যুষ্ণত্বেন বাতহরাস্তথাঽপি রক্তপিত্তে ন হিতা উষ্ণত্বেন; ততশ্চ তেষাং সাধনে উদুম্বররসাদযো রক্তপিত্তহরা নিযুজ্যন্তে; তথা সতি বাতং রক্তপিত্তং চ ঘ্নন্তি| প্রতিনিযতসাধকদ্রব্যোপন্যাসাত্ সংযোগমহিম্নৈব কার্যকরা ভবন্তীতি জ্ঞাযতে| ন শশঃ কষাযোঽপি বিবন্ধং করোতি, বাস্তুকসংস্কারাত্; ন তিত্তিরিপ্রভৃতযো রক্তপিত্তং কোপযন্তি, উদুম্বররসাদিসংস্কারাত্; এবং বিপরীতফলসম্ভবো নাস্তি, সংযোগশক্তেরচিন্ত্যত্বাত্| বাস্তুকরসে এব শশস্য সাধনপ্রযোগঃ, ইতরসাহচর্যাত্| উক্তং হি- “বিপচেত্তু বাস্তুকরসে শশং বিবন্ধে পুরীষস্য” ইতি| সিদ্ধং বিদারিগন্ধাদ্যৈরিতি শালিপর্ণ্যাদিপঞ্চমূলশৃতমুদকম্||৪৯-৫১||

Adhikarana 17 (52) · Śloka 52

জ্ঞাত্বা দোষাবনুবলৌ বলমাহারমেব চ| জলং পিপাসবে দদ্যাদ্বিসর্গাদল্পশোঽপি বা||৫২||

সম্প্রতি পানীযদানবিষযপ্রকারমাহ- জ্ঞাত্বেত্যাদি| দোষাবিতি বাতকফৌ, পিত্তং তু নাযকমেব নানুবলম্| বিসর্গাদিতি বিরতেঃ, যাবদিচ্ছমিত্যর্থঃ| পক্ষান্তরমাহ- অল্পশোঽপি বা, স্তোকং স্তোকমিত্যর্থঃ| অত্র যদি বলবানগ্নিঃ শরীরং চ মহত্তদা বিসর্গপর্যন্তং জলং দেযং; বিপর্যযে তু পানীযং নাতিপথ্যং, তেনাল্পশো দেযম্||৫২||

Adhikarana 18 (53) · Śloka 54

নিদানং রক্তপিত্তস্য যত্কিঞ্চিত্ সম্প্রকাশিতম্| জীবিতারোগ্যকামৈস্তন্ন সেব্যং রক্তপিত্তিভিঃ||৫৩|| ইত্যন্নপানং নির্দিষ্টং ক্রমশো রক্তপিত্তনুত্|৫৪|

রক্তপিত্তনিদানবর্জনার্থমাহ- নিদানমিত্যাদি||৫৩||-

Adhikarana 19 (54-61) · Śloka 61

বক্ষ্যতে বহুদোষাণাং কার্যং বলবতাং চ যত্||৫৪|| অক্ষীণবলমাংসস্য যস্য সন্তর্পণোত্থিতম্| বহুদোষং বলবতো রক্তপিত্তং শরীরিণঃ||৫৫|| কালে সংশোধনার্হস্য তদ্ধরেন্নিরুপদ্রবম্| বিরেচনেনোর্ধ্বভাগমধোগং বমনেন চ||৫৬|| ত্রিবৃতামভযাং প্রাজ্ঞঃ ফলান্যারগ্বধস্য বা| ত্রাযমাণাং গবাক্ষ্যা বা মূলমামলকানি বা||৫৭|| বিরেচনং প্রযুঞ্জীত প্রভূতমধুশর্করম্| রসঃ প্রশস্যতে তেষাং রক্তপিত্তে বিশেষতঃ||৫৮|| বমনং মদনোন্মিশ্রো মন্থঃ সক্ষৌদ্রশর্করঃ| সশর্করং বা সলিলমিক্ষূণাং রস এব বা||৫৯|| বত্সকস্য ফলং মুস্তং মদনং মধুকং মধু| অধোবহে রক্তপিত্তে বমনং পরমুচ্যতে||৬০|| ঊর্ধ্বগে শুদ্ধকোষ্ঠস্য তর্পণাদিঃ ক্রমো হিতঃ| অধোগতে যবাগ্বাদির্ন চেত্স্যান্মারুতো বলী||৬১||

বক্ষ্যতে ইত্যাদিনা সংশোধনানি প্রধানভেষজত্বাদুচ্যন্তে| অক্ষীণবলমাংসস্যেত্যনেন সহজা বলাহানিরুচ্যতে, বলবত ইত্যনেন কালকৃতং বলমুচ্যতে| কালে সংশোধনযোগ্যেঽনত্যুষ্ণশীতকালে| নিরুপদ্রবমিতি ক্রিযাবিশেষণং, কিংবা রক্তপিত্তবিশেষণম্| বিরেচনেনোর্ধ্বভাগমিত্যাদিনা অনুলোমহরণং রক্তপিত্তে নিষেধযতি| উক্তং চ- “প্রতিমার্গং চ হরণং রক্তপিত্তে বিধীযতে” (নি.অ.২) ইতি| রক্তপিত্তে বিশেষত ইত্যনেন রক্তপিত্তাদন্যত্র কল্কাদযোঽপ্যেষাং ভবন্তি| বমনমিতি বমনকারকো যোগো বমনমুচ্যতে| মদনস্য দোষাদ্যপেক্ষযা কর্ষাদিকা মাত্রা কল্পে বক্ষ্যমাণা জ্ঞেযা| সশর্করে সলিলে তথেক্ষুরসে মদনযোগাদেব বমনকর্তৃত্বং জ্ঞেযম্| অধোবহে ইত্যত্রাপি শুদ্ধকোষ্ঠস্যেতি যোজ্যম্| ন চেত্ স্যান্মারুতো বলীত্যনেন যদি মারুতো বলী স্যাত্তদা মাংসৌদন এব দেয ইতি জ্বরোক্তং বিধিং সূচযতি||৫৪-৬১||

Adhikarana 20 (62-72) · Śloka 72

বলমাংসপরিক্ষীণং শোকভারাধ্বকর্শিতম্| জ্বলনাদিত্যসন্তপ্তমন্যৈর্বা ক্ষীণমামযৈঃ||৬২|| গর্ভিণীং স্থবিরং বালং রূক্ষাল্পপ্রমিতাশিনম্| অবম্যমবিরেচ্যং বা যং পশ্যেদ্রক্তপিত্তিনম্||৬৩|| শোষেণ সানুবন্ধং বা তস্য সংশমনী ক্রিযা| শস্যতে রক্তপিত্তস্য পরং সাঽথ প্রবক্ষ্যতে||৬৪|| অটরূষকমৃদ্বীকাপথ্যাক্বাথঃ সশর্করঃ| মধুমিশ্রঃ শ্বাসকাসরক্তপিত্তনিবর্হণঃ||৬৫|| অটরূষকনির্যূহে প্রিযঙ্গুং মৃত্তিকাঞ্জনে| বিনীয লোধ্রং ক্ষৌদ্রং চ রক্তপিত্তহরং পিবেত্||৬৬|| পদ্মকং পদ্মকিঞ্জল্কং দূর্বাং বাস্তূকমুত্পলম্| নাগপুষ্পং চ লোধ্রং চ তেনৈব বিধিনা পিবেত্||৬৭|| প্রপৌণ্ডরীকং মধুকং মধু চাশ্বশকৃদ্রসে| যবাসভৃঙ্গরজসোর্মূলং বা গোশকৃদ্রসে||৬৮|| বিনীয রক্তপিত্তঘ্নং পেযং স্যাত্তণ্ডুলাম্বুনা| যুক্তং বা মঘুসর্পির্ভ্যাং লিহ্যাদ্গোশ্বশকৃদ্রসম্||৬৯|| খদিরস্য প্রিযঙ্গূণাং কোবিদারস্য শাল্মলেঃ| পুষ্পচূর্ণানি মধুনা লিহ্যান্না রক্তপিত্তিকঃ||৭০|| শৃঙ্গাটকানাং লাজানাং মুস্তখর্জূরযোরপি| লিহ্যাচ্চূর্ণানি মধুনা পদ্মানাং কেশরস্য চ||৭১|| ধন্বজানামসৃগ্লিহ্যান্মধুনা মৃগপক্ষিণাম্| সক্ষৌদ্রং গ্রথিতে রক্তে লিহ্যাত্ পারাবতং শকৃত্||৭২||

সংশমনবিষযমাহ- বলমাংসেত্যাদি| শোষেণেতি রাজযক্ষ্মণা| অটরূষকমৃদ্বীকেত্যাদি কামলাহরং কেচিদাহুঃ| অটরূষকনির্যূহ ইত্যাদৌ প্রিযঙ্গ্বাদীনাং মিলিতানাং কল্কঃ কর্ষঃ, ক্ষৌদ্রস্য চ কর্ষো গ্রাহ্যঃ, পরিভাষাবলাত্| উক্তং চাগ্নিবেশেন- “কর্ষশ্চূর্ণস্য কল্কস্য গুডিকানাং চ সর্বশঃ| মাত্রা ক্ষৌদ্রঘৃতাদীনাং ক্বাথস্নেহেষু চূর্ণবত্” ইতি| অন্যে তু ব্রুবতে- চূর্ণাদীনাং কর্ষমানত্বং স্বতন্ত্রপ্রযোগে ভবতি| অত্র চাটরূষক্বাথঃ ক্বাথপরিভাষযা কার্যঃ, কল্কশ্চ কল্কপরিভাষযা কার্যঃ| প্রিযঙ্গ্বাদীনাং প্রত্যেকং কর্ষমানত্বে ভেষজভূযস্ত্বং ভবতি, তেনাত্র মিলিতৈঃ কর্ষমানস্য কর্তব্যতা যুক্তা| তেনৈব বিধিনেতি অটরূষকনির্যূহক্ষৌদ্রযুতম্| খদিরস্যেত্যাদৌ পুষ্পচূর্ণানীতি বহুবচনত্বাদ্রক্তপিত্তনুদিতি বিশেষণং পুরুষস্য জ্ঞেযম্ | ধন্বজানামিতি জাঙ্গলানাম্||৬২-৭২||

Adhikarana 21 (73-77) · Śloka 77

উশীরকালীযকলোধ্রপদ্মকপ্রিযঙ্গুকাকট্ফলশঙ্খগৈরিকাঃ| পৃথক্ পৃথক্ চন্দনতুল্যভাগিকাঃ সশর্করাস্তণ্ডুলধাবনাপ্লুতাঃ||৭৩|| রক্তং সপিত্তং তমকং পিপাসাং দাহং চ পীতাঃ শমযন্তি সদ্যঃ| কিরাততিক্তং ক্রমুকং সমুস্তং প্রপৌণ্ডরীকং কমলোত্পলে চ||৭৪|| হ্রীবেরমূলানি পটোলপত্রং দুরালভা পর্পটকো মৃণালম্| ধনঞ্জযোদুম্বরবেতসত্বঙ্ন্যগ্রোধশালেযযবাসকত্বক্||৭৫|| তুগালতাবেতসতণ্ডুলীযং সসারিবং মোচরসঃ সমঙ্গা| পৃথক্ পৃথক্ চন্দনযোজিতানি তেনৈব কল্পেন হিতানি তত্র||৭৬|| নিশি স্থিতা বা স্বরসীকৃতা বা কল্কীকৃতা বা মৃদিতাঃ শৃতা বা| এতে সমস্তা গণশঃ পৃথগ্বা রক্তং সপিত্তং শমযন্তি যোগাঃ||৭৭||

উশীরেত্যাদৌ পৃথক্ পৃথগিতি বীপ্সাযাং, তেন প্রত্যেকমুশীরাদীনাং চন্দনসমানাং প্রযোগং দর্শযতি; তথা চাষ্টৌ প্রযোগা ভবন্তি| সশর্করা ইতি বচনেনাত্র শর্করা সমভাগৈব দেযা; উক্তং হ্যগ্নিবেশে- “মাষিকং হিঙ্গু, সিন্ধূত্থলবণাদ্যাস্তু শাণিকাঃ| সিতোপলাগুডক্ষারাঃ সমা, এষা প্রকল্পনা” ইতি| যত্র শর্করাযাঃ প্রক্ষেপ্যত্বং তত্র প্রক্ষেপন্যাযেনৈব শর্করা দেযা| কিরাতাদিকেঽপি পৃথক্ পৃথক্ চন্দনযোজিতানীত্যনেন সমচন্দনত্বং প্রত্যেকং দ্রব্যপ্রযোগাণাম্| তেনৈব কল্পেনেত্যনেন সশর্করত্বং তণ্ডুলধাবনাপ্লুতত্বং চোচ্যতে| ক্রমুকং পট্টিকালোধ্রম্| ধনঞ্জযঃ অর্জুনঃ| লতা প্রিযঙ্গুঃ| সমঙ্গা বরাহক্রান্তা, ‘লজ্জালুঃ’ ইতি লোকে| নিশিস্থিতা ইত্যাদিনা কিরাততিক্তাদীনাং কল্পনামাহ| নিশিস্থিতা বেত্যনেন শীতকষায উচ্যতে| মৃদিতা ইতি ফাণ্টীকৃতাঃ; কল্কগ্রহণেন চূর্ণস্যাপি গ্রহণং ক্রিযতে, যতঃ সুশ্রুতে ষডেব কল্পাঃ পাঠভেদাত্ পাঠ্যন্তে- “ক্ষীরং রসঃ কল্কমথো কষাযঃ শৃতশ্চ শীতশ্চ তথৈব ফাণ্টঃ| কল্পাঃ ষডেতে খলু ভেষজানাং যথোত্তরং তে লঘবঃ প্রদিষ্টাঃ” (সু.সূ.অ.৪৪) ইতি| অন্যে তু চূর্ণমপি ফাণ্টশব্দেন গৃহ্যতে ইতি ব্রুবতে| যদা তত্র ফাণ্টগ্রহণাদেব স পাঠঃ সুশ্রুতে প্রমাণং, তদা চূর্ণশব্দেন চ কল্পান্তরমেবোচ্যতে (?)| ইহ তু ফাণ্টস্য শ্রুতত্বাত্ কৃষ্ণাত্রেযাদিপঠিত এব ফাণ্টো গ্রাহ্যঃ| যদুক্তং- “ক্ষুণ্ণস্য সলিলে তপ্তে মৃদিতস্যোদ্ধৃতস্য চ| যো রসো গৃহ্যতে তজ্জ্ঞৈঃ স ফাণ্টঃ সম্প্রকীর্তিতঃ” ইতি| তেনেহ নির্দ্রবঃ কল্ক এব চূর্ণশব্দেনোচ্যতে| সম্প্রতি ব্যস্তসমস্তপ্রযোগমেষামাহ- এতে ইত্যাদি| গণশ ইতি উশীরাদিগণশঃ, কিরাততিক্তাদিগণশঃ, তুগাদিগণশশ্চেতি| অত্র চ প্রত্যেকপ্রত্যোগে সমচন্দনত্বং শ্রুতং, যদা গণশঃ প্রযোগো ভবতি তদাঽপি চন্দনস্য সমো ভাগো দেয ইতি ব্যাখ্যানযন্তি বৃদ্ধাঃ||৭৩-৭৭||

Adhikarana 22 (78) · Śloka 78

মুদ্গাঃ সলাজাঃ সযবাঃ সকৃষ্ণাঃ সোশীরমুস্তাঃ সহ চন্দনেন| বলাজলে পর্যুষিতাঃ কষাযা রক্তং সপিত্তং শমযন্ত্যুদীর্ণম্||৭৮||

বলাজল ইতি বলাসাধিতশীতজলে| পর্যুষিতাঃ কষাযা ইতি শীতকষাযাঃ||৭৮||

Adhikarana 23 (79-81) · Śloka 81

বৈদূর্যমুক্তামণিগৈরিকাণাং মৃচ্ছঙ্খহেমামলকোদকানাম্| মধূদকস্যেক্ষুরসস্য চৈব পানাচ্ছমং গচ্ছতি রক্তপিত্তম্||৭৯|| উশীরপদ্মোত্পলচন্দনানাং পক্বস্য লোষ্টস্য চ যঃ প্রসাদঃ| সশর্করঃ ক্ষৌদ্রযুতঃ সুশীতো রক্তাতিযোগপ্রশমায দেযঃ||৮০|| প্রিযঙ্গুকাচন্দনলোধ্রসারিবামধূকমুস্তাভযধাতকীজলম্| সমৃত্প্রসাদং সহ যষ্টিকাম্বুনা সশর্করং রক্তনিবর্হণং পরম্||৮১||

বৈদূর্যাদিভিঃ সহ স্থিতং জলং বৈদূর্যাদিজলং জ্ঞেযম্| উশীরেত্যাদৌ শীতকষাযে প্রসাদ ইতি প্রসন্নং জলং গ্রাহ্যম্| প্রিযঙ্গ্বাদৌ অভযম্ উশীরম্| সমৃত্প্রসাদমিত্যত্র মৃত্প্রসাদোঽপ্যনন্তরং প্রক্ষেপ্যঃ; এবং যষ্টিকাপ্রযোগেঽপি||৭৯-৮১||

Adhikarana 24 (72-84) · Śloka 84

কষাযযোগৈর্বিবিধৈর্যথোক্তৈর্দীপ্তেঽনলে শ্লেষ্মণি নির্জিতে চ| যদ্রক্তপিত্তং প্রশমং ন যাতি তত্রানিলঃ স্যাদনু তত্র কার্যম্||৮২|| ছাগং পযঃ স্যাত্ পরমং প্রযোগে গব্যং শৃতং পঞ্চগুণে জলে বা| সশর্করং মাক্ষিকসম্প্রযুক্তং বিদারিগন্ধাদিগণৈঃ শৃতং বা||৮৩|| দ্রাক্ষাশৃতং নাগরকৈঃ শৃতং বা বলাশৃতং গোক্ষুরকৈঃ শৃতং বা| সজীবকং সর্ষভকং সসর্পিঃ পযঃ প্রযোজ্যং সিতযা শৃতং বা||৮৪||

তত্রানিলঃ স্যাদিতি তত্র বলবান্ বাতঃ স্যাত্| প্রযোগ ইতি অভ্যাসে| সজীবকমিত্যাদৌ সজীবকং সর্ষভকং চ শৃতং যত্ পযস্তত্ সসর্পিস্তথা সিতযা চ যুক্তং প্রযোজ্যং পেযমিতি জ্ঞেযম্||৭২-৮৪||

Adhikarana 25 (85) · Śloka 85

শতাবরীগোক্ষুরকৈঃ শৃতং বা শৃতং পযো বাঽপ্যথ পর্ণিনীভিঃ| রক্তং নিহন্ত্যাশু বিশেষতস্তু যন্মূত্রমার্গাত্ সরুজং প্রযাতি||৮৫||

পর্ণিনীভিরিতি পর্ণিন্যঃ পর্ণিনীচতুষ্টযম্||৮৫||

Adhikarana 26 (83-87) · Śloka 87

বিশেষতো বিট্পথসম্প্রবৃত্তে পযো মতং মোচরসেন সিদ্ধম্| বটাবরোহৈর্বটশুঙ্গকৈর্বা হ্রীবেরনীলোত্পলনাগরৈর্বা||৮৬|| কষাযযোগান্ পযসা পুরা বা পীত্বাঽনু চাদ্যাত্ পযসৈব শালীন্| কষাযযোগৈরথবা বিপক্বমেতৈঃ পিবেত্ সর্পিরতিস্রবে চ||৮৭||

বটশুঙ্গা অবিকসিতনববটপল্লবাঃ| কষাযযোগানিতি অটরূষকাদীন্ কল্কীকৃতান্ পযসা পীত্বেত্যর্থঃ| এতৈরিতি বক্ষ্যমাণৈঃ; কিংবা এতৈরেব কষাযযোগৈর্যথাযোগ্যতযা সর্পিঃ সাধনীযম্| অতিস্রবে ইতি অতিমাত্ররক্তপিত্তস্রুতৌ||৮৩-৮৭||

Adhikarana 27 (88) · Śloka 88

বাসাং সশাখাং সপলাশমূলাং কৃত্বা কষাযং কুসুমানি চাস্যাঃ| প্রদায কল্কং বিপচেদ্ঘৃতং তত্ সক্ষৌদ্রমাশ্বেব নিহন্তি রক্তম্||৮৮|| ইতি বাসাঘৃতম্|

আর্দ্রাযা এব বাসাযা বিধানানুকথনান্ন দ্বৈগুণ্যম্| বাসাকুসুমকল্কে চ কেচিত্ পুষ্পকল্কস্যাতীব বাহুল্যং ভবতীতি কৃত্বা প্রস্থে ঘৃতে চতুষ্পলং পুষ্পকল্কং বদন্তি| সক্ষৌদ্রমিতি বচনেন ঘৃতাত্ পাদিকত্বং তন্ত্রান্তরপ্রত্যযাজ্জ্ঞেযম্; উক্তং হি- “স্নেহপাদঃ স্মৃতঃ কল্কঃ কল্কবন্মধুশর্করে” ইতি| অগ্নিবেশেঽপ্যুক্তং- “মাত্রা ক্ষৌদ্রঘৃতানাং চ স্নেহক্বাথেষু পূর্ববত্” ইতি| পূর্ববদিতি পাদিকা||৮৮||

Adhikarana 28 (89-90) · Śloka 90

পলাশবৃন্তস্বরসেন সিদ্ধং তস্যৈব কল্কেন মধুদ্রবেণ| লিহ্যাদ্ঘৃতং বত্সককল্কসিদ্ধং তদ্বত্ সমঙ্গোত্পললোধ্রসিদ্ধম্||৮৯|| স্যাত্ত্রাযমাণাবিধিরেষ এব সোদুম্বরে চৈব পটোলপত্রে| সর্পীংষি পিত্তজ্বরনাশনানি সর্বাণি শস্তানি চ রক্তপিত্তে||৯০||

মধুদ্রবেণেতি পাদিকেন মধুনা দ্রবীকৃতম্| ত্রাযমাণাযা এবং সর্পিঃ পূর্ববত্ পক্তব্যম্; উদুম্বরপটোলপত্রাভ্যাং চাপরম্| পিত্তজ্বরনাশনানীত্যনেন সকলচিকিত্সিতবাচ্যানি পিত্তজ্বরহরাণি জ্ঞেযানি, জ্বরচিকিত্সিতে তু ঘৃতানি জীর্ণজ্বরহন্তৃতযোক্তানি ন পিত্তজ্বরহন্তৃতযা; অন্যে তু যান্যেব জীর্ণজ্বরহরাণি ঘৃতানি তান্যেব পিত্তজ্বরহরাণি ভবন্তি, তেষাং তু “রূক্ষং তেজ” (চি.অ.৩) ইত্যাদিনা জ্বরবিষযতযা সমানত্বেন নির্দিষ্টং পিত্তবিষযত্বম্| প্রদেশান্তরেঽপি “জলে দশগুণে সাধ্যং ত্রাযমাণাচতুঃপলম্” ইত্যাদি যাবত্ “পিত্তরক্তভবং গুল্মং বিসর্পং পৈত্তিকং জ্বরম্” (চি.অ.৫) ইতি, তথা “ত্রাযন্তিকা” ইত্যাদি যাবত্ “বাতরক্তে ক্ষতক্ষীণে বিসর্পে পৈত্তিকে জ্বরে” (চি.অ.২৯) ইত্যাদীনি সকলচিকিত্সিতে পঠিতানি পিত্তজ্বরহরঘৃতানি কর্তব্যানি||৮৯-৯০||

Adhikarana 29 (91-92) · Śloka 92

অভ্যঙ্গযোগাঃ পরিষেচনানি সেকাবগাহাঃ শযনানি বেশ্ম| শীতো বিধির্বস্তিবিধানমগ্র্যং পিত্তজ্বরে যত্ প্রশমায দিষ্টম্||৯১|| তদ্রক্তপিত্তে নিখিলেন কার্যং কালং চ মাত্রাং চ পুরা সমীক্ষ্য| সর্পির্গুডা যে চ হিতাঃ ক্ষতেভ্যস্তে রক্তপিত্তং শমযন্তি সদ্যঃ||৯২||

অভ্যঙ্গযোগা ইত্যাদিনা সর্বে যে দাহজ্বরহরা উক্তাঃ পিত্তজ্বরপ্রশমনকত্বেন তানতিদিশতি||৯১-৯২||

Adhikarana 30 (93-94) · Śloka 94

কফানুবন্ধে রুধিরে সপিত্তে কণ্ঠাগতে স্যাদ্গ্রথিতে প্রযোগঃ| যুক্তস্য যুক্ত্যা মধুসর্পিষোশ্চ ক্ষারস্য চৈবোত্পলনালজস্য||৯৩|| মৃণালপদ্মোত্পলকেশরাণাং তথা পলাশস্য তথা প্রিযঙ্গোঃ| তথা মধূকস্য তথাঽসনস্য ক্ষারাঃ প্রযোজ্যা বিধিনৈব তেন||৯৪||

রুধিরে সপিত্তে ইতি রক্তপিত্তে| যুক্ত্যা যুক্তস্যেতি মাত্রযা যুক্তস্য ক্ষারস্য প্রযোগঃ; যুক্তিশব্দোঽত্র মাত্রাবচনঃ| যদ্যপি ক্ষারস্তীক্ষ্ণ উক্তস্তথাঽপি কণ্ঠস্থকফবিলযনার্থমুত্পলনালাদিকৃতগুণানুবিধানাত্ ক্ষারো দীযত এব রক্তপিত্তে; রক্তপিত্তহরত্বপ্রভাবাদুত্পলনালদিক্ষারো ভবত্যেব রক্তপিত্তহরঃ, যেন তীক্ষ্ণানি দ্রব্যাণি পরিত্যজ্যোত্পলনালাদীন্যেব ক্ষারার্থমাহ| ননু, উত্পলাদীনামগ্নিদাহাচ্ছীতত্বমপযাত্যেব, উক্তং চ বার্তিকে ক্ষীরস্বামিদত্তেন- “শীতং জহতি ভূযিষ্ঠং দগ্ধং সপদি সোমতাম্” ইতি চেদ্দৃষ্টো হি ভস্মন্যপি গুণোদয ইতি||৯৩-৯৪||

Adhikarana 31 (95-96) · Śloka 96

শতাবরীদাডিমতিন্তিডীকং কাকোলিমেদে মধুকং বিদারীম্| পিষ্ট্বা চ মূলং ফলপূরকস্য ঘৃতং পচেত্ ক্ষীরচতুর্গুণং জ্ঞঃ||৯৫|| কাসজ্বরানাহবিবন্ধশূলং তদ্রক্তপিত্তং চ ঘৃতং নিহন্যাত্| যত্ পঞ্চমূলৈরথ পঞ্চভির্বা সিদ্ধং ঘৃতং তচ্চ তদর্থকারি||৯৬|| ইতি শতাবর্যাদিঘৃতম্|

ফলপূরকো বীজপূরকঃ| পঞ্চ পঞ্চমূলানি রসাযনোক্তানি| তদর্থকারীতি অনন্তরোক্তশতাবর্যাদিঘৃতানুকারি||৯৫-৯৬||

Adhikarana 32 (97-101) · Śloka 101

কষাযযোগা য ইহোপদিষ্টাস্তে চাবপীডে ভিষজা প্রযোজ্যাঃ| ঘ্রাণাত্ প্রবৃত্তং রুধিরং সপিত্তং যদা ভবেন্নিঃসৃতদুষ্টদোষম্||৯৭|| রক্তে প্রদুষ্টে হ্যবপীডবন্ধে দুষ্টপ্রতিশ্যাযশিরোবিকারাঃ| রক্তং সপূযং কুণপশ্চ গন্ধঃ স্যাদ্ ঘ্রাণনাশঃ কৃমযশ্চ দুষ্টাঃ||৯৮|| নীলোত্পলং গৈরিকশঙ্খযুক্তং সচন্দনং স্যাত্তু সিতাজলেন| নস্যং তথাঽঽম্রাস্থিরসঃ সমঙ্গা সধাতকীমোচরসঃ সলোধ্রঃ||৯৯|| দ্রাক্ষারসস্যেক্ষুরসস্য নস্যং ক্ষীরস্য দূর্বাস্বরসস্য চৈব| যবাসমূলানি পলাণ্ডুমূলং নস্যং তথা দাডিমপুষ্পতোযম্||১০০|| প্রিযালতৈলং মধুকং পযশ্চ সিদ্ধং ঘৃতং মাহিষমাজিকং বা| আম্রাস্থিপূর্বৈঃ পযসা চ নস্যং সসারিবৈঃ স্যাত্ কমলোত্পলৈশ্চ||১০১||

ঘ্রাণপ্রবৃত্তরক্তপিত্তচিকিত্সিতমাহ- কষাযযোগা ইত্যাদি| কষাযযোগা ইতি উশীরকালীযকেত্যাদিনা যে কষাযযোগা উক্তাস্তে ঘ্রাণপ্রবৃত্তে রক্তপিত্তে প্রদেযাঃ| অবপীডশ্চ দ্রব্যমাপোথিতং কৃত্বা পীডযিত্বা রসো দীযতে যঃ স উচ্যতে; অযং চ নিঃসৃতে রক্তদোষে সতি দেযঃ; বিপর্যযে দোষমাহ- রক্ত ইত্যাদি| সিতাজলেনেতি শর্করাজলেন| নীলোত্পলাদীনি কল্কীকৃত্য অবপীডো দেযঃ| প্রিযালতৈলমিত্যাদৌ মধুককল্কেন পযসা দ্রবেণ সাধ্যং প্রিযালতৈলং ঘৃতং মাহিষমাজং বা| আম্রাস্থিপূর্বৈরিতি ‘নস্যং তথাঽঽম্রাস্থিরসঃ সমঙ্গা’ ইত্যাদিযোগোক্তৈঃ| সারিবাকমলোত্পলানি চ কল্কঃ, পযো দ্রব ইতি জ্ঞেযম্||৯৭-১০১||

Adhikarana 33 (102-109) · Śloka 109

ভদ্রশ্রিযং লোহিতচন্দনং চ প্রপৌণ্ডরীকং কমলোত্পলে চ| উশীরবানীরজলং মৃণালং সহস্রবীর্যা মধুকং পযস্যা||১০২|| শালীক্ষুমূলানি যবাসগুন্দ্রামূলং নলানাং কুশকাশযোশ্চ| কুচন্দনং শৈবলমপ্যনন্তা কালানুসার্যা তৃণমূলমৃদ্ধিঃ||১০৩|| মূলানি পুষ্পাণি চ বারিজানাং প্রলেপনং পুষ্করিণীমৃদশ্চ| উদুম্বরাশ্বত্থমধূকলোধ্রাঃ কষাযবৃক্ষাঃ শিশিরাশ্চ সর্বে||১০৪|| প্রদেহকল্পে পরিষেচনে চ তথাঽবগাহে ঘৃততৈলসিদ্ধৌ| রক্তস্য পিত্তস্য চ শান্তিমিচ্ছন্ ভদ্রশ্রিযাদীনি ভিষক্ প্রযুঞ্জ্যাত্||১০৫|| ধারাগৃহং ভূমিগৃহং সুশীতং বনং চ রম্যং জলবাতশীতম্| বৈদূর্যমুক্তামণিভাজনানাং স্পর্শাশ্চ দাহে শিশিরাম্বুশীতাঃ||১০৬|| পত্রাণি পুষ্পাণি চ বারিজানাং ক্ষৌমং চ শীতং কদলীদলানি| প্রচ্ছাদনার্থং শযনাসনানাং পদ্মোত্পলানাং চ দলাঃ প্রশস্তাঃ||১০৭|| প্রিযঙ্গুকাচন্দনরূষিতানাং স্পর্শাঃ প্রিযাণাং চ বরাঙ্গনানাম্| দাহে প্রশস্তাঃ সজলাঃ সুশীতাঃ পদ্মোত্পলানাং চ কলাপবাতাঃ||১০৮|| সরিদ্ধ্রদানাং হিমবদ্দরীণাং চন্দ্রোদযানাং কমলাকরাণাম্| মনোঽনুকূলাঃ শিশিরাশ্চ সর্বাঃ কথাঃ সরক্তং শমযন্তি পিত্তম্||১০৯||

ভদ্রশ্রিযাদীনি প্রলেপার্থমাহ| বানীরম্ উশীরভেদ এব সুগন্ধিমূলম্| কালানুসার্যা শীতলম্| শিশিরাশ্চ সর্বে ইত্যন্তেন লেপবিধানম্| পদ্মোত্পলানাং চ কলাপবাতা ইতি পদ্মোত্পলসমূহকৃতবাতা ইত্যর্থঃ||১০২-১০৯||

Adhikarana 34 (110-111) · Śloka 111

তত্র শ্লোকৌ- হেতুং বৃদ্ধিং সঞ্জ্ঞাং স্থানং লিঙ্গং পৃথক্ প্রদুষ্টস্য| মার্গৌ সাধ্যমসাধ্যং যাপ্যং কার্যক্রমং চৈব||১১০|| পানান্নমিষ্টমেব চ বর্জ্যং সংশোধনং চ শমনং চ| গুরুরুক্তবান্যথাবচ্চিকিত্সিতে রক্তপিত্তস্য||১১১||

হেতুমিত্যাদিনাঽধ্যাযার্থসঙ্গ্রহো ব্যক্ত এব||১১০-১১১||

Adhikarana puShpikA · Śloka 4

ইত্যগ্নিবেশকৃতে তন্ত্রে চরকপ্রতিসংস্কৃতে চিকিত্সিতস্থানে রক্তপিত্তচিকিত্সিতং নাম চতুর্থোঽধ্যাযঃ||৪||

ইতি শ্রীচক্রপাণিদত্তকৃতাযাযুর্বেদদীপিকাযাং চরকতাত্পর্যটীকাযাং চিকিত্সাস্থানে রক্তপিত্তচিকিত্সিতং নাম চতুর্থোঽধ্যাযঃ||৪||