1. rasāyanādhyāyaḥ - abhayāmalakīyarasāyanapādaḥ

Adhikarana 1 (1-2) · Śloka 2

অথাতোঽভযামলকীযং রসাযনপাদং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

পূর্বস্থানোক্তলক্ষণাভাবেনাবধারিতাযুষ্মদ্ভাবেন চিকিত্সা ধর্মার্থযশস্করী কর্তব্যেত্যনন্তরং চিকিত্সাভিধাযকং স্থানমুচ্যতে| রসাযনবাজীকরণসাধনমপি যথা চিকিত্সোচ্যতে, তথাঽনন্তরমেব বক্ষ্যতি| তত্রাপি জ্বরাদিচিকিত্সাযাঃ প্রাগ্রসাযনবাজীকরণযোর্মহাফলত্বেনাদাবভিধানম্| তযোরপি চ রসাযনমেব বর্ষসহস্রাযুষ্ট্বাদিকারণতযা মহাফলমিতি তদভিধীযতে, তত্রাপি চাভযামলকীযশ্চিকিত্সাস্থানার্থসূত্রাভিধাযকতযাঽগ্রেঽভিধীযতে||১-২||

Adhikarana 2 (3) · Śloka 4

চিকিত্সিতং ব্যাধিহরং পথ্যং সাধনমৌষধম্| প্রাযশ্চিত্তং প্রশমনং প্রকৃতিস্থাপনং হিতম্||৩|| বিদ্যাদ্ভেষজনামানি, ...|৪|

তত্রাদৌ ব্যবহারার্থং স্থানাভিধেযস্য ভেষজস্য পর্যাযানাহ- চিকিত্সিতমিত্যাদি| করোতি চৈবমাদৌ প্রধানাভিধেযপর্যাযাভিধানং, যথা- নিদানে হেতুরূপাদিপর্যাযকথনম্| এতচ্চ পর্যাযাভিধানং প্রাধান্যেন চতুষ্পাদস্যৈব ভেষজস্য, যদুক্তং- “চতুষ্পাদং ষোডশকলং ভেষজমিতি ভিষজো ভাষন্তে” (সূ.অ.১০) ইতি| এবম্ভূতভেষজাঙ্গরূপতযা তু স্থাবরজঙ্গমদ্রব্যরূপস্য ভেষজস্য ভেষজত্বমেবান্তরব্যবহারকৃতং জ্ঞেযম্| প্রাযশ্চিত্তমিতি ভেষজসঞ্জ্ঞা প্রাযশ্চিত্তবদ্ভেষজস্যাধর্মকার্যব্যাধিহরত্বেন||৩||-

Adhikarana 3 (4) · Śloka 4

... ভেষজং দ্বিবিধং চ তত্| স্বস্থস্যোর্জস্করং কিঞ্চিত্ কিঞ্চিদার্তস্য রোগনুত্||৪||

দ্বৈবিধ্যং বিবৃণোতি- স্বস্থস্যেত্যাদি| কিঞ্চিদিতি ন সর্বম্| স্বস্থত্বেন ব্যবহ্রিযমাণস্য পুংসো জরাদিস্বাভাবিকব্যাধিহরত্বেন তথাঽপ্রহর্ষব্যযাযক্ষযিত্বানুপচিতশুক্রত্বাদ্যপ্রশস্তশারীরভাবহরত্বেন ঊর্জঃ প্রশস্তং ভাবমাদধাতীতি স্বস্থস্যোর্জস্করম্| আর্তস্য রোগনুদিতি বিশেষণেন জ্বরাদিনাঽঽর্তস্য জ্বরাদিহরম্| রোগনুদিতি বচনেনৈবার্তবিশেষতাযাং লব্ধাযাং যত্ ‘আর্তস্য’ ইতি করোতি, তেন সহজজরাদিকৃতাং পীডামনুদ্বেজিকাং পরিত্যজ্য জ্বরাদিনাঽস্বাভাবিকেন রোগেণ পীডিতস্যেতি দর্শযতি||৪||

Adhikarana 4 (5) · Śloka 5

অভেষজং চ দ্বিবিধং বাধনং সানুবাধনম্|৫|

ভেষজপ্রসঙ্গাদভেষজদ্বৈবিধ্যমাহ- অভেষজমিত্যাদি| বাধনমিহ তদাত্বমাত্রবাধকং, যথা- স্বল্পমপথ্যম্| সানুবাধনং চ দীর্ঘকালাবস্থাযিকুষ্ঠাদিবিকারকারি||-

Adhikarana 5 (5-6) · Śloka 6

স্বস্থস্যোর্জস্করং যত্তু তদ্বৃষ্যং তদ্রসাযনম্||৫|| প্রাযঃ, প্রাযেণ রোগাণাং দ্বিতীযং প্রশমে মতম্| প্রাযঃশব্দো বিশেষার্থো হ্যুভযং হ্যুভযার্থকৃত্||৬||

দ্বিবিধং ভেষজমুক্তং বিভজতে- স্বস্থস্যেত্যাদি| তদ্বৃষ্যং তদ্রসাযনং প্রায ইতি চ্ছেদঃ| যদ্বৃষ্যং প্রাযো ভবতি, তথা রসাযনং যত্ প্রাযো ভবতি, আর্তস্য রোগহরং যদ্বাহুল্যেন, তত্ স্বস্থোর্জস্করমুচ্যতে; যত্তু দ্বিতীযমার্তরোগহরং, তত্ প্রাযেণ জ্বরাদিশমনং রসাযনং বাজীকরণং চ ভবতি; যথা- ক্ষতক্ষীণোক্তং সর্পির্গুডাদি রসাযনং বৃষ্যং চ ভবতি, তথা পাণ্ডুরোগোক্তো যোগরাজো রসাযনত্বেনোক্তঃ, তথা কাসাধিকারেঽগস্ত্যহরীতকী রসাযনত্বেনোক্তেত্যাদ্যনুসরণীযম্| রসাযনোক্তানাং চ জ্বরাদিহরত্বমত্র সুব্যক্তমেব রসাযনগ্রন্থেষু| অন্যে তু ব্রুবতে- যদ্ব্যাধিমাত্রহরং ন তদ্রসাযনং, কিন্তু শরীরসংযোগদার্ঢ্যাদ্দীর্ঘাযুঃকর্তৃত্বসাধারণধর্মযোগাদুপচরিতব্যাধিহরং রসাযনমিহোচ্যত ইতি| ননু যদি স্বস্থোর্জস্করমপি ব্যাধিহরং, ব্যাধিহরং চ স্বস্থোর্জস্করং তত্ কিং কিঞ্চিদিতি পদেন ভেষজকর্মব্যবস্থাদর্শকেন ক্রিযতে? ব্রূমঃ- বাহুল্যেন স্বস্থোর্জস্করত্বং ব্যাধিহরত্বং চ ব্যবস্থাপ্যতে, ন চেহ সর্বার্তরোগহরস্য স্বস্থোর্জস্করত্বমিতি প্রতিজ্ঞাযতে, যেন পাঠাসপ্তপর্ণাদীনামপি রসাযনত্বং সাধনীযশক্তিত্বাদার্ত্তরোগহরত্বেন যদুচ্যতে তদপি রসাযনং বাজীকরণং চ ভবতীতি লবমাত্রোপদর্শনং ক্রিযতে, তত্ স্বস্থার্তযোরুভযার্থকর্তৃত্বম্| প্রাযঃশব্দতাত্পর্যং বিবৃণোতি- প্রায ইত্যাদি| বিশেষার্থ ইতি বাহুল্যার্থ ইত্যর্থঃ||৫-৬||

Adhikarana 6 (7-8) · Śloka 8

দীর্ঘমাযুঃ স্মৃতিং মেধামারোগ্যং তরুণং বযঃ| প্রভাবর্ণস্বরৌদার্যং দেহেন্দ্রিযবলং পরম্||৭|| বাক্সিদ্ধিং প্রণতিং কান্তিং লভতে না রসাযনাত্| লাভোপাযো হি শস্তানাং রসাদীনাং রসাযনম্||৮||

রসাযনকার্যমাহ- দীর্ঘমিত্যাদি| প্রভাদীনাং ত্রযাণামৌদার্যং যোজনীযম্| বাক্সিদ্ধিঃ যদুচ্যতে তদবশ্যং ভবতীত্যর্থঃ| প্রণতিঃ লোকবন্দ্যতা| কথমেতদ্রসাযনেন ক্রিযত ইত্যাহ- লাভেত্যাদি| রসাদিগ্রহণেন স্মৃত্যাদযোঽপি গৃহ্যন্তে||৭-৮||

Adhikarana 7 (9-12) · Śloka 12

অপত্যসন্তানকরং যত্ সদ্যঃ সম্প্রহর্ষণম্| বাজীবাতিবলো যেন যাত্যপ্রতিহতঃ স্ত্রিযঃ||৯|| ভবত্যতিপ্রিযঃ স্ত্রীণাং যেন যেনোপচীযতে| জীর্যতোঽপ্যক্ষযং শুক্রং ফলবদ্যেন দৃশ্যতে||১০|| প্রভূতশাখঃ শাখীব যেন চৈত্যো যথা মহান্| ভবত্যর্চ্যো বহুমতঃ প্রজানাং সুবহুপ্রজঃ||১১|| সন্তানমূলং যেনেহ প্রেত্য চানন্ত্যমশ্নুতে| যশঃ শ্রিযং বলং পুষ্টিং বাজীকরণমেব তত্||১২||

বাজীকরণকার্যমাহ- অপত্যেত্যাদি| অপত্যসন্তানঃ অপত্যপরম্পরা, তেন পুত্রপৌত্রকরমিত্যর্থঃ; বাজীকরণজনিতাচ্ছুক্রাজ্জাতঃ পুত্রঃ পুত্রজননসমর্থো ভবতীত্যর্থঃ| অতিপ্রিযত্বং চেহোপচিতশুক্রতযা নিরন্তরব্যবাযকর্তৃত্বাত্; যদুক্তং- “বিরূপমপি যোদ্ধারং ভৃত্যমিচ্ছন্তি পার্থিবাঃ| ব্যবাযব্যাযতং মূর্খং ধৃষ্টং পতিমিব স্ত্রিযঃ” ইতি| উপচীযত ইতি পুষ্টিং প্রাপ্নোতি| অক্ষযমিবাক্ষযম্| ফলবদিতি গর্ভজনকম্| চৈত্যো দেবতাযতনম্| অর্চ্যঃ অর্চনীযঃ | আনন্ত্যমিবানন্ত্যং; দীর্ঘসন্তানতামিত্যর্থঃ||৯-১২||

Adhikarana 8 (13-14) · Śloka 14

স্বস্থস্যোর্জস্করং ত্বেতদ্দ্বিবিধং প্রোক্তমৌষধম্| যদ্ব্যাধিনির্ঘাতকরং বক্ষ্যতে তচ্চিকিত্সিতে||১৩|| চিকিত্সিতার্থ এতাবান্ বিকারাণাং যদৌষধম্| রসাযনবিধিশ্চাগ্রে বাজীকরণমেব চ||১৪||

চিকিত্সিত ইতি জ্বরাদিচিকিত্সিতে| ননু রসাযনবাজীকরণে অপি জ্বরাদিচিকিত্সিতে এব, তত্ কিং বিশিষ্যোচ্যতে- ‘বক্ষ্যতে তচ্চিকিত্সিতে’ ইত্যাহ- চিকিত্সিতার্থ ইত্যাদি| সত্যং, রসাযনং বাজীকরণং চ জ্বরাদিব্যাধিহরত্বাচ্চিকিত্সিতশব্দেনোচ্যত ইত্যর্থঃ| অথ ব্যাধিহরত্বাচ্চিকিত্সিতে বক্তব্যত্বাচ্চ রসাযনবাজীকরণে ক্ব নু বক্তব্যে ইত্যাহ- রসাযনেত্যাদি| বিধিঃ বিধানং রসাযনাভিধানমিত্যর্থঃ | অগ্রে ইতি অনন্তরম্| বাজীকরণং চাগ্রে ‘অভিধাস্যতে’ ইতি শেষঃ||১৩-১৪||

Adhikarana 9 (15) · Śloka 15

অভেষজমিতি জ্ঞেযং বিপরীতং যদৌষধাত্| তদসেব্যং নিষেব্যং তু প্রবক্ষ্যামি যদৌষধম্||১৫||

অভেষজমপি পূর্বোদ্দিষ্টং বিবৃণোতি- অভেষজমিত্যাদি| বিপরীতং রোগজননলক্ষণার্থকারি||১৫||

Adhikarana 10 (16-24) · Śloka 24

রসাযনানাং দ্বিবিধং প্রযোগমৃষযো বিদুঃ| কুটীপ্রাবেশিকং চৈব বাতাতপিকমেব চ||১৬|| কুটীপ্রাবেশিকস্যাদৌ বিধিঃ সমুপদেক্ষ্যতে| নৃপবৈদ্যদ্বিজাতীনাং সাধূনাং পুণ্যকর্মণাম্||১৭|| নিবাসে নির্ভযে শস্তে প্রাপ্যোপকরণে পুরে| দিশি পূর্বোত্তরস্যাং চ সুভূমৌ কারযেত্ কুটীম্||১৮|| বিস্তারোত্সেধসম্পন্নাং ত্রিগর্ভাং সূক্ষ্মলোচনাম্| ঘনভিত্তিমৃতুসুখাং সুস্পষ্টাং মনসঃ প্রিযাম্||১৯|| শব্দাদীনামশস্তানামগম্যং স্ত্রীবিবর্জিতাম্| ইষ্টোপকরণোপেতাং সজ্জবৈদ্যৌষধদ্বিজাম্ ||২০|| অথোদগযনে শুক্লে তিথিনক্ষত্রপূজিতে| মুহূর্তকরণোপেতে প্রশস্তে কৃতবাপনঃ||২১|| ধৃতিস্মৃতিবলং কৃত্বা শ্রদ্দধানঃ সমাহিতঃ| বিধূয মানসান্ দোষান্ মৈত্রীং ভূতেষু চিন্তযন্||২২|| দেবতাঃ পূজযিত্বাঽগ্রে দ্বিজাতীংশ্চ প্রদক্ষিণম্| দেবগোব্রাহ্মণান্ কৃত্বা ততস্তাং প্রবিশেত্ কুটীম্||২৩|| তস্যাং সংশোধনৈঃ শুদ্ধঃ সুখী জাতবলঃ পুনঃ| রসাযনং প্রযুঞ্জীত তত্প্রবক্ষ্যামি শোধনম্||২৪||

কুটীপ্রবেশেন যত্ ক্রিযতে তত্ কুটীপ্রাবেশিকম্| বাতাতপসেবযাঽপি যত্ ক্রিযতে তদ্ বাতাতপিকম্| ত্রিগর্ভাং প্রথমমেকং গৃহং, তস্যাভ্যন্তরে দ্বিতীযম্, এবং ত্রিগর্ভাস্ত্রযো গর্ভা অন্তরাণি যস্যাং সা; ত্রিগর্ভামিতি অন্তস্ত্রিপ্রকোষ্ঠাম্| সূক্ষ্মলোচনামিতি অল্পদ্বারজালকাম্| শুক্লে শুক্লপক্ষে| সজ্জা বৈদ্যাদযো যস্যাং সা তথা| তিথিনক্ষত্রপূজিত ইতি শুভতিথিনক্ষত্রযোগাত্ পূজিতে| কৃতবাপন ইতি কৃতক্ষৌরঃ| মানসান্ দোষানিতি কামক্রোধাদীন্| সংশোধনৈরিতি বমনবিরেচনাস্থাপনশিরোবিরেচনৈঃ| সুখীতি অরোগঃ| জাতবল ইতি সংশোধনাপহৃতমলতযা সংসর্জনাদিক্রমেণ পুনর্জাতবলঃ| যদ্যপীহ সংশোধনৈরিতি বহুবচনপ্রযোগাত্ সর্বাণ্যেব সংশোধনানি সম্মতানি, তথাঽপীহ রসাযনে বিশেষেণ যৌগিকত্বাদ্ধরীতক্যাদিপ্রযোগ এবোক্তঃ; অন্যে তু হরীতক্যাদিপ্রযোগেণৈব পরং সংশোধনং কর্তব্যমিত্যাহুঃ, সংশোধনৈরিতি বহুবচনং পুনর্যাবচ্ছুদ্ধের্হরীতক্যাদিপ্রযোগস্যৈব করণং দর্শযতি||১৬-২৪||

Adhikarana 11 (25-28) · Śloka 28

হরীতকীনাং চূর্ণানি সৈন্ধবামলকে গুডম্| বচাং বিডঙ্গং রজনীং পিপ্পলীং বিশ্বভেষজম্||২৫|| পিবেদুষ্ণাম্বুনা জন্তুঃ স্নেহস্বেদোপপাদিতঃ| তেন শুদ্ধশরীরায কৃতসংসর্জনায চ||২৬|| ত্রিরাত্রং যাবকং দদ্যাত্ পঞ্চাহং বাঽপি সর্পিষা| সপ্তাহং বা পুরাণস্য যাবচ্ছুদ্ধেস্তু বর্চসঃ||২৭|| শুদ্ধকোষ্ঠং তু তং জ্ঞাত্বা রসাযনমুপাচরেত্| বযঃপ্রকৃতিসাত্ম্যজ্ঞো যৌগিকং যস্য যদ্ভবেত্||২৮||

যাবকমিতি যবান্নম্| ত্রিরাত্রাদিবিকল্পত্রযং হীনমধ্যোত্তমশুদ্ধিবিষযম্||২৫-২৮||

Adhikarana 12 (29-37) · Śloka 37

হরীতকীং পঞ্চরসামুষ্ণামলবণাং শিবাম্| দোষানুলোমনীং লঘ্বীং বিদ্যাদ্দীপনপাচনীম্||২৯|| আযুষ্যাং পৌষ্টিকীং ধন্যাং বযসঃ স্থাপনীং পরাম্| সর্বরোগপ্রশমনীং বুদ্ধীন্দ্রিযবলপ্রদাম্||৩০|| কুষ্ঠং গুল্মমুদাবর্তং শোষং পাণ্ড্বামযং মদম্| অর্শাংসি গ্রহণীদোষং পুরাণং বিষমজ্বরম্||৩১|| হৃদ্রোগং সশিরোরোগমতীসারমরোচকম্| কাসং প্রমেহমানাহং প্লীহানমুদরং নবম্||৩২|| কফপ্রসেকং বৈস্বর্যং বৈবর্ণ্যং কামলাং ক্রিমীন্| শ্বযথুং তমকং ছর্দিং ক্লৈব্যমঙ্গাবসাদনম্||৩৩|| স্রোতোবিবন্ধান্ বিবিধান্ প্রলেপং হৃদযোরসোঃ| স্মৃতিবুদ্ধিপ্রমোহং চ জযেচ্ছীঘ্রং হরীতকী||৩৪|| (অজীর্ণিনো রূক্ষভুজঃ স্ত্রীমদ্যবিষকর্শিতাঃ| সেবেরন্নাভযামেতে ক্ষুত্তৃষ্ণোষ্ণার্দিতাশ্চ যে)||৩৫|| তান্ গুণাংস্তানি কর্মাণি বিদ্যাদামলকীষ্বপি| যান্যুক্তানি হরীতক্যা বীর্যস্য তু বিপর্যযঃ||৩৬|| অতশ্চামৃতকল্পানি বিদ্যাত্ কর্মভিরীদৃশৈঃ| হরীতকীনাং শস্যানি ভিষগামলকস্য চ||৩৭||

যদ্যপি দ্রব্যান্তরাণি দশবর্ষশতাযুষ্কররসাযনাধিকৃতানি সন্তি, তথাঽপি হরীতক্যামলকে এব রোগহরত্বাযুষ্করত্বরূপোভযধর্মযোগাদধ্যাযাদৌ গুণকর্মভ্যামুচ্যেতে; তত্রাপি যদ্যপি “আমলকং বযঃস্থাপনানাম্” (সূ.অ.২৫) ইত্যুক্তম্, তথাঽপি রোগহরত্বে হরীতকী প্রকর্ষবতীতি কৃত্বা হরীতক্যগ্রেঽভিহিতা| হরীতক্যাদিষু পঞ্চরসত্বাদ্যুত্পাদোঽদৃষ্টবশাদ্ভূতসন্নিবেশবিশেষপ্রভাবকৃতঃ; তেন নাত্রোপপত্তযঃ ক্রমন্তে| শিবামিতি কল্যাণকারিণীং, প্রশস্তগুণযুক্তত্বাত্| সর্বরোগপ্রশমনীমিতি সংযোগসংস্কারাদিনা| সর্বরোগহরত্বমভিধাযাপি কুষ্ঠাদিহন্তৃত্বাভিধানং বিশেষেণ কুষ্ঠাদিহন্তৃত্বোপদর্শনার্থম্| প্রবর্তকত্বেঽপ্যতীসারগ্রহণীহরত্বং বিবদ্ধদোষপ্রবর্তকতযা জ্ঞেযং; যদুক্তং- “স্তোকং স্তোকং বিবদ্ধং বা সশূলং যোঽতিসার্যতে| অভযাপিপ্পলীকল্কৈঃ সুখোষ্ণৈস্তং বিরেচযেত্” ইতি| বুদ্ধিস্মৃতিপ্রদত্বমভিধাযাপি স্মৃতিবুদ্ধিপ্রমোহহরত্বাভিধানং তত্র বিশিষ্টশক্ত্যুপদর্শনার্থম্| বীর্যস্য তু বিপর্যয ইত্যনেনামলকস্য শীতবীর্যত্বমুক্তম্| শস্যানীতি অস্থিরহিতানি ফলানি||২৯-৩৭||

Adhikarana 13 (38-40) · Śloka 40

ওষধীনাং পরা ভূমির্হিমবাঞ্ শৈলসত্তমঃ| তস্মাত্ফলানি তজ্জানি গ্রাহযেত্কালজানি তু||৩৮|| আপূর্ণরসবীর্যাণি কালে কালে যথাবিধি| আদিত্যপবনচ্ছাযাসলিলপ্রীণিতানি চ||৩৯|| যান্যজগ্ধান্যপূতীনি নির্ব্রণান্যগদানি চ| তেষাং প্রযোগং বক্ষ্যামি ফলানাং কর্ম চোত্তমম্||৪০||

যদ্যপি “হিমবানৌষধভূমীনাম্” (সূ.অ.২৫) ইত্যুক্তং, তথাঽপি রসাযনে হিমবত্প্রভবাণ্যেব ভেষজানি গ্রাহ্যাণীতি দর্শযিতুমৌষধীনামিত্যাদ্যভিধানম্| কালে কালে ইতি ফলপাককালে ইত্যর্থঃ| যথাবিধীতি যথা ভেষজগ্রহণং মঙ্গলদেবতার্চনাদিপূর্বকং স্যাত্তথাঽবশ্যং রসাযনে কর্ত্তব্যম্| অগদানীত্যনেন পবনদহনাদ্যদোষং ফলস্য দর্শযতি||৩৮-৪০||

Adhikarana 14 (41-57) · Śloka 57

পঞ্চানাং পঞ্চমূলানাং ভাগান্ দশপলোন্মিতান্| হরীতকীসহস্রং চ ত্রিগুণামলকং নবম্||৪১|| বিদারিগন্ধাং বৃহতীং পৃশ্নিপর্ণীং নিদিগ্ধিকাম্| বিদ্যাদ্বিদারিগন্ধাদ্যং শ্বদংষ্ট্রাপঞ্চমং গণম্||৪২|| বিল্বাগ্নিমন্থশ্যোনাকং কাশ্মর্যমথ পাটলাম্| পুনর্নবাং শূর্পপর্ণ্যৌ বলামেরণ্ডমেব চ||৪৩|| জীবকর্ষভকৌ মেদাং জীবন্তীং সশতাবরীম্| শরেক্ষুদর্ভকাশানাং শালীনাং মূলমেব চ||৪৪|| ইত্যেষাং পঞ্চমূলানাং পঞ্চানামুপকল্পযেত্| ভাগান্ যথোক্তাংস্তত্সর্বং সাধ্যং দশগুণেঽম্ভসি||৪৫|| দশভাগাবশেষং তু পূতং তং গ্রাহযেদ্রসম্| হরীতকীশ্চ তাঃ সর্বাঃ সর্বাণ্যামলকানি চ||৪৬|| তানি সর্বাণ্যনস্থীনি ফলান্যাপোথ্য কূর্চনৈঃ| বিনীয তস্মিন্নির্যূহে চূর্ণানীমানি দাপযেত্||৪৭|| মণ্ডূকপর্ণ্যাঃ পিপ্পল্যাঃ শঙ্খপুষ্প্যাঃ প্লবস্য চ| মুস্তানাং সবিডঙ্গানাং চন্দনাগুরুণোস্তথা||৪৮|| মধুকস্য হরিদ্রাযা বচাযাঃ কনকস্য চ| ভাগাংশ্চতুষ্পলান্ কৃত্বা সূক্ষ্মৈলাযাস্ত্বচস্তথা||৪৯|| সিতোপলাসহস্রং চ চূর্ণিতং তুলযাঽধিকম্| তৈলস্য দ্ব্যাঢকং তত্র দদ্যাত্ত্রীণি চ সর্পিষঃ||৫০|| সাধ্যমৌদুম্বরে পাত্রে তত্ সর্বং মৃদুনাঽগ্নিনা| জ্ঞাত্বা লেহ্যমদগ্ধং চ শীতং ক্ষৌদ্রেণ সংসৃজেত্||৫১|| ক্ষৌদ্রপ্রমাণং স্নেহার্ধং তত্ সর্বং ঘৃতভাজনে| তিষ্ঠেত্সম্মূর্চ্ছিতং তস্য মাত্রাং কালে প্রযোজযেত্||৫২|| যা নোপরুন্ধ্যাদাহারমেকং মাত্রা জরাং প্রতি| ষষ্টিকঃ পযসা চাত্র জীর্ণে ভোজনমিষ্যতে||৫৩|| বৈখানসা বালখিল্যাস্তথা চান্যে তপোধনাঃ| রসাযনমিদং প্রাশ্য বভূবুরমিতাযুষঃ||৫৪|| মুক্ত্বা জীর্ণং বপুশ্চাগ্র্যমবাপুস্তরুণং বযঃ| বীততন্দ্রাক্লমশ্বাসা নিরাতঙ্কাঃ সমাহিতাঃ||৫৫|| মেধাস্মৃতিবলোপেতাশ্চিররাত্রং তপোধনাঃ| ব্রাহ্মং তপো ব্রহ্মচর্যং চেরুশ্চাত্যন্তনিষ্ঠযা||৫৬|| রসাযনমিদং ব্রাহ্মমাযুষ্কামঃ প্রযোজযেত্| দীর্ঘমাযুর্বযশ্চাগ্র্যং কামাংশ্চেষ্টান্ সমশ্নুতে||৫৭|| (ইতি ব্রাহ্মরসাযনম্)|

পঞ্চানামিত্যাদৌ প্রতিদ্রব্যং দশপলভাগগ্রহণম্ , উক্তং হি জতূকর্ণে- “ইতি পঞ্চ পঞ্চমূলানি, তেষাং প্রতিদ্রব্যং দশপলানি” ইতি| হরীতকীসহস্রমিতি হরীতকীফলসহস্রম্| শূর্পপর্ণ্যৌ মুদ্গমাষপর্ণ্যৌ| বীরা জালন্ধরং শাকম্| কূর্চনং জর্জরীকরণসাধনং শিলাপুত্রকমুসলাদি| বিনীযেতি প্রক্ষিপ্য| প্লবঃ কৈবর্তমুস্তকম্| কনকং নাগকেশরম্| ত্বক্ গুডত্বক্| ঔদুম্বরে ইতি তাম্রমযে| স্নেহার্ধমিতি সর্পিস্তৈলার্ধম্| একম্ অনপরাহ্ণিকমাহারম্||৪১-৫৭||

Adhikarana 15 (58-61) · Śloka 61

যথোক্তগুণানামামলকানাং সহস্রং পিষ্টস্বেদনবিধিনা পযস ঊষ্মণা সুস্বিন্নমনাতপশুষ্কমনস্থি চূর্ণযেত্| তদামলকসহস্রস্বরসপরিপীতং স্থিরাপুনর্নবাজীবন্তীনাগবলাব্রহ্মসুবর্চলামণ্ডূকপর্ণীশতাবরীশঙ্খপুষ্পীপিপ্পলীবচাবিডঙ্গস্বযঙ্গুপ্তামৃতা- চন্দনাগুরুমধুকমধূকপুষ্পোত্পলপদ্মমালতীযুবতীযূথিকাচূর্ণাষ্টভাগসংযুক্তং পুনর্নাগবলাসহস্রপলস্বরসপরিপীতমনাতপশুষ্কং দ্বিগুণিতসর্পিষা ক্ষৌদ্রসর্পিষা বা ক্ষুদ্রগুডাকৃতিং কৃত্বা শুচৌ দৃঢে ঘৃতভাবিতে কুম্ভে ভস্মরাশেরধঃ স্থাপযেদন্তর্ভূমেঃ পক্ষং কৃতরক্ষাবিধানমথর্ববেদবিদা, পক্ষাত্যযে চোদ্ধৃত্য কনকরজততাম্রপ্রবালকালাযসচূর্ণাষ্টভাগসংযুক্তমর্ধকর্ষবৃদ্ধ্যা যথোক্তেন বিধিনা প্রাতঃ প্রাতঃ প্রযুঞ্জানোঽগ্নিবলমভিসমীক্ষ্য, জীর্ণে চ ষষ্টিকং পযসা সসর্পিষ্কমুপসেবমানো যথোক্তান্ গুণান্ সমশ্নুত ইতি||৫৮|| ভবন্তি চাত্র- ইদং রসাযনং ব্রাহ্মং মহর্ষিগণসেবিতম্| ভবত্যরোগো দীর্ঘাযুঃ প্রযুঞ্জানো মহাবলঃ||৫৯|| কান্তঃ প্রজানাং সিদ্ধার্থশ্চন্দ্রাদিত্যসমদ্যুতিঃ| শ্রুতং ধারযতে সত্ত্বমার্ষং চাস্য প্রবর্ততে||৬০|| ধরণীধরসারশ্চ বাযুনা সমবিক্রমঃ| স ভবত্যবিষং চাস্য গাত্রে সম্পদ্যতে বিষম্||৬১|| (ইতি দ্বিতীযং ব্রাহ্মরসাযনম্)|

পিষ্টস্বেদনবিধিনেতি যথা পিষ্টকং তোযপরিপূরিতপাত্রোপরিদত্ততৃণাদিসংস্থিতং স্বেদ্যতে, তথা তত্ স্বেদনীযমিত্যর্থঃ| স্বরসপরিপীতমিতি স্বরসভাবিতম্| ব্রহ্মসুবর্চলাদ্যৌষধান্যাযুর্বেদসমুত্থানীযে বক্ষ্যমাণানি| যুবতিঃ নবমালিকা| অষ্টমো ভাগোঽষ্টভাগঃ| ক্ষুদ্রগুডাকৃতিমিতি ফাণিতাকৃতিম্| অর্ধকর্ষবৃদ্ধ্যেতি অর্ধকর্ষাত্প্রভৃতি বর্ধযেত্| যথোক্তবিধিনেতি কুটীপ্রাবেশিকেন বিধিনা| যথোক্তান্ গুণানিতি পূর্বপ্রযোগফলশ্রুতিপঠিতান্| ধরণীধরসার ইতি উষ্ট্রমুখবত্; তেন ধরণীধরাঃ পর্বতাঃ, তেষাং সারো লৌহং, তদ্বত্সার ইত্যর্থঃ| অবিষমিতি বিষমবিকারি||৫৮-৬১||

Adhikarana 16 (62-74) · Śloka 74

বিল্বোঽগ্নিমন্থঃ শ্যোনাকঃ কাশ্মর্যঃ পাটলির্বলা| পর্ণ্যশ্চতস্রঃ পিপ্পল্যঃ শ্বদংষ্ট্রা বৃহতীদ্বযম্||৬২|| শৃঙ্গী তামলকী দ্রাক্ষা জীবন্তী পুষ্করাগুরু| অভযা চামৃতা ঋদ্ধির্জীবকর্ষভকৌ শটী||৬৩|| মুস্তং পুনর্নবা মেদা সৈলা চন্দনমুত্পলম্| বিদারী বৃষমূলানি কাকোলী কাকনাসিকা||৬৪|| এষাং পলোন্মিতান্ ভাগাঞ্ছতান্যামলকস্য চ| পঞ্চ দদ্যাত্তদৈকধ্যং জলদ্রোণে বিপাচযেত্||৬৫|| জ্ঞাত্বা গতরসান্যেতান্যৌষধান্যথ তং রসম্| তচ্চামলকমুদ্ধৃত্য নিষ্কুলং তৈলসর্পিষোঃ||৬৬|| পলদ্বাদশকে ভৃষ্ট্বা দত্ত্বা চার্ধতুলাং ভিষক্| মত্স্যণ্ডিকাযাঃ পূতাযা লেহবত্সাধু সাধযেত্||৬৭|| ষট্পলং মধুনশ্চাত্র সিদ্ধশীতে প্রদাপযেত্| চতুষ্পলং তুগাক্ষীর্যাঃ পিপ্পলীদ্বিপলং তথা||৬৮|| পলমেকং নিদধ্যাচ্চ ত্বগেলাপত্রকেশরাত্| ইত্যযং চ্যবনপ্রাশঃ পরমুক্তো রসাযনঃ||৬৯|| কাসশ্বাসহরশ্চৈব বিশেষেণোপদিশ্যতে| ক্ষীণক্ষতানাং বৃদ্ধানাং বালানাং চাঙ্গবর্ধনঃ||৭০|| স্বরক্ষযমুরোরোগং হৃদ্রোগং বাতশোণিতম্| পিপাসাং মূত্রশুক্রস্থান্ দোষাংশ্চাপ্যপকর্ষতি||৭১|| অস্য মাত্রাং প্রযুঞ্জীত যোপরুন্ধ্যান্ন ভোজনম্| অস্য প্রযোগাচ্চ্যবনঃ সুবৃদ্ধোঽভূত্ পুনর্যুবা||৭২|| মেধাং স্মৃতিং কান্তিমনামযত্বমাযুঃপ্রকর্ষং বলমিন্দ্রিযাণাম্| স্ত্রীষু প্রহর্ষং পরমগ্নিবৃদ্ধিং বর্ণপ্রসাদং পবনানুলোম্যম্||৭৩|| রসাযনস্যাস্য নরঃ প্রযোগাল্লভেত জীর্ণোঽপি কুটীপ্রবেশাত্| জরাকৃতং রূপমপাস্য সর্বং বিভর্তি রূপং নবযৌবনস্য||৭৪|| (ইতি চ্যবনপ্রাশঃ)|

পর্ণ্যশ্চতস্র ইতি শালপর্ণী, পৃশ্নিপর্ণী, মুদ্গপর্ণী, মাষপর্ণী চ| তামলকী ভূম্যামলকী| কাকনাসা নাসাফলা, ‘কাকতুণ্ডক’ ইত্যন্যে| গতরসত্বমিহ দ্রব্যাণাং চতুর্ভাগস্থিতজলে ভবতি| নিষ্কুলমিতি নিরস্থি| তৈলসর্পিষোরিতি সমাসনির্দেশাদুভাভ্যামেব দ্বাদশপলানি, ন পৃথক্ পৃথক্| মত্স্যণ্ডিকা খণ্ডসংহতিঃ| অত্র ষট্পলত্বেন সমযোরপি মধুসর্পিষোর্দ্রব্যান্তরযুক্তত্বেনাবিরুদ্ধত্বম্||৬২-৭৪||

Adhikarana 17 (75) · Śloka 75

অথামলকহরীতকীনামামলকবিভীতকানাং হরীতকীবিভীতকানামামলকহরীতকীবিভীতকানাং বা পলাশত্বগবনদ্ধানাং মৃদাঽবলিপ্তানাং কুকূলস্বিন্নানামকুলকানাং পলসহস্রমুলূখলে সম্পোথ্য দধিঘৃতমধুপললতৈলশর্করাসংযুক্তং ভক্ষযেদনন্নভুগ্যথোক্তেন বিধিনা; তস্যান্তে যবাগ্বাদিভিঃ প্রত্যবস্থাপনম্ , অভ্যঙ্গোত্সাদনং সর্পিষা যবচূর্ণৈশ্চ, অযং চ রসাযনপ্রযোগপ্রকর্ষো দ্বিস্তাবদগ্নিবলমভিসমীক্ষ্য , প্রতিভোজনং যূষেণ পযসা বা ষষ্টিকঃ সসর্পিষ্কঃ, অতঃ পরং যথাসুখবিহারঃ কামভক্ষ্যঃ স্যাত্| অনেন প্রযোগেণর্ষযঃ পুনর্যুবত্বমবাপুর্বভূবুশ্চানেকবর্ষশতজীবিনো নির্বিকারাঃ পরং শরীরবুদ্ধীন্দ্রিযবলসমুদিতাশ্চেরুশ্চাত্যন্তনিষ্ঠযা তপঃ||৭৫|| (ইতি চতুর্থামলকরসাযনম্)|

কুকূলকঃ করীষাগ্নিঃ| অকুলকানামিতি অনস্থ্নাম্| দ্রব্যাদীনামত্র মানং নোক্তং, তেন প্রধানস্য চূর্ণস্য দধ্যাদিভির্মিলিতৈঃ সমানমানত্বং; কিংবা প্রত্যেকমেব দধ্যাদীনাং চূর্ণসমত্বম্| পললং তিলচূর্ণম্| ভক্ষযেদিতি বচনং লেহ্যেঽপি অল্পাভ্যবহরণমাত্রার্থত্বাদুপপন্নম্| অনন্নভুগিতি সর্বথাঽঽহারান্তরাভুক্| তস্যান্ত ইতি এতত্প্রযোগপরিত্যাগকালে| প্রত্যবস্থাপনমিতি যবাগ্বাদিক্রমবিশেষণং; তেন প্রযোগান্তে যদা অন্নসংসর্জনং কর্তব্যং, তদা যবাগ্বাদিক্রমেণেত্যুক্তস্যার্থস্য প্রত্যবস্থাপনং ক্রিযত ইত্যর্থঃ| যূষেণ পযসা বেতি বিকল্পোঽগ্নিবলাপেক্ষযা||৭৫||

Adhikarana 18 (76) · Śloka 76

হরীতক্যামলকবিভীতকপঞ্চপঞ্চমূলনির্যূহে পিপ্পলীমধুকমধূককাকোলীক্ষীরকাকোল্যাত্মগুপ্তাজীবকর্ষভকক্ষীরশুক্লাকল্কসম্প্রযুক্তেন বিদারীস্বরসেন ক্ষীরাষ্টগুণসম্প্রযুক্তেন চ সর্পিষঃ কুম্ভং সাধযিত্বা প্রযুঞ্জানোঽগ্নিবলসমাং মাত্রাং জীর্ণে চ ক্ষীরসর্পির্ভ্যাং শালিষষ্টিকমুষ্ণোদকানুপানমশ্নঞ্জরাব্যাধিপাপাভিচারব্যপগতভযঃ শরীরেন্দ্রিযবুদ্ধিবলমতুলমুপলভ্যাপ্রতিহতসর্বারম্ভঃ পরমাযুরনবাপ্নুযাত্||৭৬|| (ইতি পঞ্চমো হরীতকীযোগঃ)|

অত্র হরীতক্যাদৌ ক্ষীরশুক্লা ক্ষীরবিদারিকা| অত্র হরীতক্যাদিক্বাথস্য ত্বেকো ভাগঃ, ক্ষীরস্যাষ্টৌ ভাগাঃ, সর্পিষ একো ভাগঃ| কুম্ভো দ্রোণদ্বযম্| বচনং হি- “দ্রোণস্তু দ্বিগুণঃ সূর্পো বিজ্ঞেযঃ কুম্ভ এব চ” ইতি||৭৬||

Adhikarana 19 (77-80) · Śloka 80

হরীতক্যামলকবিভীতকহরিদ্রাস্থিরাবলাবিডঙ্গামৃতবল্লীবিশ্বভেষজমধুকপিপ্পলীসোমবল্কসিদ্ধেন ক্ষীরসর্পিষা মধুশর্করাভ্যামপি চ সন্নীযামলকস্বরসশতপরিপীতমামলকচূর্ণমযশ্চূর্ণচতুর্ভাগসম্প্রযুক্তং পাণিতলমাত্রং প্রাতঃ প্রাতঃ প্রাশ্য যথোক্তেন বিধিনা সাযং মুদ্গযূষেণ পযসা বা সসর্পিষ্কং শালিষষ্টিকান্নমশ্নীযাত্, ত্রিবর্ষপ্রযোগাদস্য বর্ষশতমজরং বযস্তিষ্ঠতি, শ্রুতমবতিষ্ঠতে, সর্বামযাঃ প্রশাম্যন্তি, বিষমবিষং ভবতি গাত্রে, গাত্রমশ্মবত্ স্থিরীভবতি, অধৃষ্যো ভূতানাং ভবতি||৭৭|| ভবন্তি চাত্র- যথাঽমরাণামমৃতং যথা ভোগবতাং সুধা| তথাঽভবন্মহর্ষীণাং রসাযনবিধিঃ পুরা||৭৮|| ন জরাং ন চ দৌর্বল্যং নাতুর্যং নিধনং ন চ| জগ্মুর্বর্ষসহস্রাণি রসাযনপরাঃ পুরা||৭৯|| ন কেবলং দীর্ঘমিহাযুরশ্নুতে রসাযনং যো বিধিবন্নিষেবতে| গতিং স দেবর্ষিনিষেবিতাং শুভাং প্রপদ্যতে ব্রহ্ম তথেতি চাক্ষযম্ ||৮০||

অমৃতবল্লী গুডূচী| সোমবল্কঃ বিট্খদিরঃ| ক্ষীরসর্পিঃ ক্ষীরসমুত্থিতসর্পিঃ| অযশ্চূর্ণস্য চতুর্থো ভাগঃ, যত এতদযশ্চূর্ণং চতুর্থভাগমত এবাস্মিন্ প্রযোগে জতূকর্ণেন “অযশ্চূর্ণপাদযুক্তম্” ইতি কৃতম্| অমরাণামমৃতং জরাদিহরং, নাগানাং চ সুধা জরামরণহরী, ইত্যুভযোপাদানং দৃষ্টান্তে| ব্রহ্ম মোক্ষঃ| মোক্ষসাধনত্বং চেহ রসাযনস্য বিশুদ্ধসত্ত্বকর্তৃতযোচ্যতে|| ৭৭-৮০||

Adhikarana 20 (81) · Śloka 81

তত্র শ্লোকঃ- অভযামলকীযেঽস্মিন্ ষড্যোগাঃ পরিকীর্তিতাঃ| রসাযনানাং সিদ্ধানামাযুর্যৈরনুবর্ততে||৮১||

অভযেত্যাদিনা সন্দেহনিরাসার্থমুক্তপ্রযোগসঙ্খ্যাং দর্শযতি| এবমন্যত্রাপি সঙ্খ্যাপ্রণযনমন্তে জ্ঞেযম্|| ৮১||

Adhikarana puShpikA · Śloka 1

ইত্যগ্নিবেশকৃতে তন্ত্রে চরকপ্রতিসংস্কৃতে চিকিত্সাস্থানে রসাযনাধ্যাযেঽভযামলকীযো নাম রসাযনপাদঃ প্রথমঃ||১||

ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযাং চিকিত্সাস্থানে রসাযনাধ্যাযেঽভযামলকীযো নাম রসাযনপাদঃ প্রথমঃ|| ১||