28. tr̥ṣṇācikitsitam

Adhikarana 1 (1-2) · Śloka 2

অথাতস্তৃষ্ণাচিকিত্সিতং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

বিসর্পে প্রাযেণ তৃষ্ণা উপদ্রবরূপা ভবতীতি বিসর্পানন্তরং তৃষ্ণাচিকিত্সিতমুচ্যতে||১-২||

Adhikarana 2 (3) · Śloka 3

জ্ঞানপ্রশমতপোভিঃ খ্যাতোঽত্রিসুতো জগদ্ধিতেঽভিরতঃ| তৃষ্ণানাং প্রশমার্থং চিকিত্সিতং প্রাহ পঞ্চানাম্||৩||

জ্ঞানেত্যাদৌ জ্ঞানং তত্ত্বজ্ঞানং, প্রশমঃ শান্তিঃ, তপঃ চান্দ্রাযণাদি| চিকিত্সিতং চিকিত্সাবিধাযকো গ্রন্থঃ, নিদানাদ্যভিধানং চ চিকিত্সার্থমেব, নিদানাদিজ্ঞানপূর্বকত্বাচ্চিকিত্সাযাঃ | পঞ্চানামিতি বচনেন পঞ্চানামপি চিকিত্সাবিষযত্বং দর্শযতি, নহি কাসশ্বাসবদস্যাসাধ্যত্বং কস্যাশ্চিদত্রেত্যর্থঃ, তথা সুশ্রুতোক্তাতিরিক্ততৃষ্ণাদ্বযান্তর্ভাবং পঞ্চস্বেব সূচযতি| উক্তং হি সুশ্রুতে- “তিস্রঃ স্মৃতাস্তাঃ ক্ষতজা চতুর্থী ক্ষযাত্তথা হ্যামসমুদ্ভবা চ| স্যাত্ সপ্তমী ভক্তনিমিত্তজা চ” (সু.উ.অ.৪৮) ইতি||৩||

Adhikarana 3 (4-7) · Śloka 7

ক্ষোভাদ্ভযাচ্ছ্রমাদপি শোকাত্ক্রোধাদ্বিলঙ্ঘনান্মদ্যাত্| ক্ষারাম্ললবণকটুকোষ্ণরূক্ষশুষ্কান্নসেবাভিঃ||৪|| ধাতুক্ষযগদকর্ষণবমনাদ্যতিযোগসূর্যসন্তাপৈঃ| পিত্তানিলৌ প্রবৃদ্ধৌ সৌম্যান্ধাতূংশ্চ শোষযতঃ||৫|| রসবাহিনীশ্চ নালীর্জিহ্বামূলগলতালুকক্লোম্নঃ | সংশোষ্য নৃণাং দেহে কুরুতস্তৃষ্ণাং মহাবলাবেতৌ||৬|| পীতং পীতং হি জলং শোষযতস্তাবতো ন যাতি শমম্| ঘোরব্যাধিকৃশানাং প্রভবত্যুপসর্গভূতা সা||৭||

ক্ষোভাদিত্যাদ্যুক্তনিদানস্য যথাযোগ্যতযা বাতকর্তৃত্বং বাতপিত্তকর্তৃত্বং চোন্নেযম্| পিত্তানিলাবিত্যাদিঃ সর্বতৃষ্ণাসম্প্রাপ্তিগ্রন্থঃ| সৌম্যান্ ধাতূনিতি কফরসোদকানি সোমগুণাতিরিক্তানি| প্রদূষযত ইতি শোষণেন দূষযতঃ| ক্লোম্ন ইতি দ্বিতীযাবহুবচনান্তম্| দেহে ইত্যনেন এতাসাং তৃষ্ণানাং শারীরত্বং দর্শযতি| যা হি মানসী তৃষ্ণা সা শারীরে “ইচ্ছাদ্বেষাত্মিকা তৃষ্ণা সুখদুঃখাত্ প্রবর্ততে” (শা.অ.১) ইত্যাদাবুক্তা; ইযং তু দেহাশ্রযদোষকারণা সতী দেহজৈবেতি ভাবঃ| স্বাভাবিকতৃষ্ণাযামপি বাতপিত্তে আরম্ভকে এব তত্ কিং সাঽপ্যত্র ন গৃহ্যতে? মৈবং, তস্যা উচিতদ্রবপানেনৈবাভিপ্রেতেন প্রশমাদিহ অস্বাভাবিকব্যাধিপ্রকরণে নাধিকার ইতি হৃদি কৃত্বা| স্বাভাবিকতৃষ্ণাকরবাতপিত্তাভ্যাং বক্ষ্যমাণতৃষ্ণারম্ভকবাতপিত্তযোর্বিশেষমাহ- পীতং পীতমিত্যাদি| প্রকৃততৃষ্ণারম্ভকৌ পিত্তবাতৌ পীতং পীতং জলং শোষযতঃ, অতো জলশোষণত্বাদ্ধেতোর্ন শমং যাতি পুরুষঃ; স্বাভাবিক্যাং জলং পীত্বা শান্তিমধিগচ্ছতীতি ভাবঃ| উপদ্রবরূপতৃষ্ণোত্পাদমাহ- ঘোরেত্যাদি| উপসর্গভূতা ইতি উপদ্রবরূপা||৪-৭||

Adhikarana 4 (8) · Śloka 8

প্রাগ্রূপং মুখশোষঃ, স্বলক্ষণং সর্বদাঽম্বুকামিত্বম্| তৃষ্ণানাং সর্বাসাং লিঙ্গানাং লাঘবমপাযঃ||৮||

তৃষ্ণাপ্রাগ্রূপমাহ- প্রাগ্রূপমিত্যাদি| প্রাগ্রূপকথনে এব মধ্যে তৃষ্ণানামব্যভিচারিলক্ষণমাহ- স্বলক্ষণমিত্যাদি| স্বলক্ষণমিতি অব্যভিচারিলক্ষণং; যথা- জ্বরস্য সন্তাপঃ, শ্বযথোরুত্সেধঃ| পুনঃ প্রকৃতং প্রাগ্রূপমাহ- লিঙ্গানাং লাঘবমপায ইতি|- লিঙ্গানাং বক্ষ্যমাণবাতাদিজতৃষ্ণালিঙ্গানাং লাঘবমল্পত্বং কেষাঞ্চিচ্চাভাবঃ পূর্বরূপং তৃষ্ণানামিত্যর্থঃ| তেন পূর্বরূপাবস্থাযাং বক্ষ্যমাণলক্ষণানি কানিচিন্ন ভবন্ত্যেব, যানি চ ভবন্তি তান্যল্পতযাঽস্ফুটানি ভবন্তি| উক্তং চ- “অব্যক্তং লক্ষণং তস্য পূর্বরূপমিতি স্মৃতম্” (চি.অ.১১) ইতি| কিংবা যদেতত্ প্রাগ্রূপং মুখশোষঃ, স্বলক্ষণং সর্বদাম্বুকামিত্বং, এতত্ প্রাগ্রূপং স্বলক্ষণং চ তৃষ্ণানাং; তেন মুখশোষাম্বুকামিত্বে স্বলক্ষণে তথা পূর্বরূপে চ ভবতঃ, পূর্বরূপাবস্থাযাং ত্বপ্রবলে মুখশোষাম্বুকামিত্বে জ্ঞেযে| যে তু ‘প্রাগ্রূপং মুখশোষঃ স্বরক্ষযঃ সর্বদাঽম্বুকামিত্বম্’ ইতি পঠন্তি, তেষাং মতে তৃষ্ণাযাঃ স্বলক্ষণং নোক্তং স্যাত্| উক্তং চ হারীতেঽপি তৃষ্ণাস্বলক্ষণং- “স্বলক্ষণং তু তৃষ্ণানাং সর্বদাঽম্বুপিপাসিতা” ইতি| কিংবা মুখশোষস্বরক্ষযে এব পূর্বরূপং, সর্বদাঽম্বুকামিত্বং চ স্বলক্ষণং, লিঙ্গানাং চ লাঘবং রোগরূপাযাস্তৃষ্ণাযা অপাযো গমনমিত্যর্থঃ; অযমেব তৃষ্ণাব্যুপরমো যদ্বক্ষ্যমাণলিঙ্গানামল্পত্বং, সর্বথোচ্ছেদো হি তৃষ্ণালক্ষণানাং ন ভবত্যেব, সহজতৃষ্ণাগ্রস্তত্বেনৈতল্লক্ষণানামল্পমাত্রতযাঽবস্থানাত্| কৈশ্চিত্তু লিঙ্গানাং লাঘবমাশূত্পাদঃ, স চ অপাযো মরণমিতি কৃত্বা তৃষ্ণানামসাধ্যতালক্ষণমিদমুচ্যতে, তন্নাতিমনোহরম্||৮||

Adhikarana 5 (9-10) · Śloka 10

মুখশোষস্বরভেদভ্রমসন্তাপপ্রলাপসংস্তম্ভান্| তাল্বোষ্ঠকণ্ঠজিহ্বাকর্কশতাং চিত্তনাশং চ||৯|| জিহ্বানির্গমমরুচিং বাধির্যং মর্মদূযনং সাদম্| তৃষ্ণোদ্ভূতা কুরুতে, পঞ্চবিধাং লিঙ্গতঃ শৃণু তাম্||১০||

সর্বতৃষ্ণানামুপদ্রবানাহ- মুখশোষেত্যাদি| উদ্ভূতেতি বৃদ্ধা| যে তু মুখশোষাদীনি লক্ষণান্যাহুস্তন্মতে তৃষ্ণোপদ্রবানামভিধানং ন স্যাত্, উপদ্রবাশ্চাধ্যাযসঙ্গ্রহে সঙ্গৃহীতাঃ; তেনাতিশযবৃদ্ধা মুখশোষাদয উপদ্রবাঃ, বৃদ্ধাস্তু লিঙ্গমিতি ব্যবস্থা||৯-১০||

Adhikarana 6 (11) · Śloka 11

অব্ধাতুং দেহস্থং কুপিতঃ পবনো যদা বিশোষযতি| তস্মিঞ্শুষ্কে শুষ্যত্যবলস্তৃষ্যত্যথ বিশুষ্যন্||১১||

অব্ধাতুমিত্যাদিনা পঞ্চানাং সম্প্রাপ্ত্যাদ্যাহ| দেহস্থমিতি দেহে নানারসাদিরূপতযা স্থিতম্| শুষ্কেঽব্ধাতৌ শুষ্যতীতি যোজ্যম্||১১||

Adhikarana 7 (12) · Śloka 12

নিদ্রানাশঃ শিরসো ভ্রমস্তথা শুষ্কবিরসমুখতা চ স্রোতোঽবরোধ ইতি চ স্যাল্লিঙ্গং বাততৃষ্ণাযাঃ||১২||

স্রোতোবরোধ ইতি অত্যুপঘাতঃ ||১২||

Adhikarana 8 (13-14) · Śloka 14

পিত্তং মতমাগ্নেযং কুপিতং চেত্তাপযত্যপাং ধাতুম্| সন্তপ্তঃ স হি জনযেত্তৃষ্ণাং দাহোল্বণাং নৄণাম্||১৩|| তিক্তাস্যত্বং শিরসো দাহঃ শীতাভিনন্দতা মূর্চ্ছা| পীতাক্ষিমূত্রবর্চস্ত্বমাকৃতিঃ পিত্ততৃষ্ণাযাঃ||১৪||

পিত্তমিত্যাদিনা পিত্তজামাহ| শরীরসঙ্খ্যাশারীরে পিত্তমাপ্যমুক্তং “যদ্দ্রবসরস্নিগ্ধমন্দমৃদুপিচ্ছিলং রসরুধিরবসাকফপিত্তমূত্রস্বেদাদি তদাপ্যং রসো রসনং চ” (শা.অ.৭) ইত্যনেন, তথা তত্রৈব “যত্ পিত্তমূষ্মা যো, যা চ শরীরে ভাঃ, তত্ সর্বমাগ্নেযম্” ইত্যনেন দ্বযাত্মকত্বং পিত্তস্য যদ্যপ্যুক্তং, তথাঽপ্যাগ্নেযাকারত্বাদ্ বাহুল্যাত্ পিত্তমাগ্নেযমেবেতি দর্শযন্নাহ- পিত্তং মতমাগ্নেযমিতি; দ্বযাত্মকত্বেঽপি চ পিত্তস্যাগ্নেযাংশপ্রাধান্যাদন্যত্রাপি সৌম্যাগ্নেযবাযব্যবিকারভেদে পৈত্তিকবিকারা আগ্নেযত্বেন গৃহীতা এব | সন্তপ্তঃ স হীতি অব্ধাতুঃ সন্তপ্তঃ| ‘সন্তপ্তং হি’ ইতি পাঠপক্ষে পিত্তমেব জনযেদিতি যোজ্যম্| যদাঽব্ধাতুর্জনযতি তদা পিত্তসন্তপ্ত এব জনযতীতি পিত্তস্যৈব কর্তৃত্বম্||১৩-১৪||

Adhikarana 9 (15) · Śloka 15

তৃষ্ণা যাঽঽমপ্রভবা সাঽপ্যাগ্নেযাঽঽমপিত্তজনিতত্বাত্ | লিঙ্গং তস্যাশ্চারুচিরাধ্মানকফপ্রসেকৌ চ||১৫||

তৃষ্ণেত্যাদিনাঽঽমজামাহ| আমশব্দেন চেহ লক্ষণযা আমসমানচিকিত্সিত আমসমানলক্ষণশ্চ কফোঽপি গৃহ্যতে| তেনামপ্রভবাযা ব্যুত্পাদনেন কফজাঽপি সুশ্রুতোক্তা গৃহীতৈবেহ| সাঽপ্যাগ্নেযেত্যনেন পূর্বপরিজ্ঞাতং সর্বাসাং বাতপিত্তজন্যত্বং সমুন্নযতি| বাতশ্চ তৃষ্ণাকারণত্বেনোক্তোঽপ্যত্রাপ্রধানং, পিত্তমেব তু প্রধানমিতীহ বাতাকথনাদুন্নীযতে| অন্যত্রাপ্যুক্তং- “দর্শনং পক্তিরূষ্মা চ ক্ষুত্তৃষ্ণা দেহমার্দবম্| প্রভাপ্রসাদৌ মেধা চ পিত্তকর্মাবিকারজম্” (সূ.অ.১৮) ইতি| আমপিত্তজনিতত্বাদিতি আমাবরোধবৃদ্ধপিত্তজনিতত্বাদিত্যর্থঃ||১৫||

Adhikarana 10 (16) · Śloka 16

দেহো রসজোঽম্বুভবো রসশ্চ তস্য ক্ষযাচ্চ তৃষ্যেদ্ধি| দীনস্বরঃ প্রতাম্যন্ সংশুষ্কহৃদযগলতালুঃ ||১৬||

দেহো রসজ ইত্যাদিনা ক্ষযজামাহ| আহাররসাত্ সর্বধাতুপোষকো ধাতুরস উত্পদ্যতে, স চ রসো দেহপোষকোঽম্বুভব ইতি আপ্য ইত্যর্থঃ| তস্য ক্ষযাদিতি রসক্ষযাত্ তৃষ্যতে; রসক্ষযাদম্বুক্ষযো ভবতি, তেন চাম্বুক্ষযেণ পুরুষঃ পানীযপ্রার্থনারূপতৃষ্ণযা যুক্তো ভবতীতি যুক্তমিতি দর্শযতি| উক্তং হি সুশ্রুতে- “দোষধাতুমলক্ষীণো বলক্ষীণোঽপি মানবঃ| স্বযোনিবর্ধনং যত্তদন্নপানং প্রকাঙ্ক্ষতি” (সু.সূ.অ.১৫) ইতি; ইহাপি চোক্তং ‘তস্য ক্ষযাচ্চ তৃষ্যেদ্ধি’ ইতি||১৬||

Adhikarana 11 (17) · Śloka 17

ভবতি খলু যোপসর্গাত্তৃষ্ণা সা শোষিণী কষ্টা| জ্বরমেহক্ষযশোষশ্বাসাদ্যুপসৃষ্টদেহানাম্ ||১৭||

ভবতীত্যাদিনোপসর্গজামাহ| উপসর্গাদিতি জ্বরাদ্যুপদ্রবাত্, জ্বরাদ্যুপদ্রবরূপতযেতি যাবত্| কষ্টেতি কষ্টসাধ্যা| এবং প্রাক্সূত্রিতবাতপিত্তামাম্বুক্ষযোপসর্গাত্মিকাঃ পঞ্চ তৃষ্ণা ব্যাহৃতাঃ| অত্রৈব সুশ্রুতোক্তা কফজা আমজাযামবরুদ্ধা, ক্ষতজা উপসর্গাত্মিকাযামবরুদ্ধা, অন্নজা চামজাযামেবান্তর্ভাবনীযা||১৭||

Adhikarana 12 (18) · Śloka 18

সর্বাস্ত্বতিপ্রসক্তা রোগকৃশানাং বমিপ্রসক্তানাম্| ঘোরোপদ্রবযুক্তাস্তৃণা মরণায বিজ্ঞেযাঃ||১৮||

ইদানীং তৃষ্ণানামসাধ্যতালক্ষণমাহ- সর্বাস্ত্বিত্যাদি| ঘোরোপদ্রবযুক্তেতি পীডাকরোপদ্রববতী||১৮||

Adhikarana 13 (19-22) · Śloka 22

নাগ্নিং বিনা হি তর্ষঃ পবনাদ্বা তৌ হি শোষণে হেতূ| অব্ধাতোরতিবৃদ্ধাবপাং ক্ষযে তৃষ্যতে নরো হি||১৯|| গুর্বন্নপযঃস্নেহৈঃ সম্মূর্চ্ছদ্ভির্বিদাহকালে চ| যস্তৃষ্যেদ্বৃতমার্গে তত্রাপ্যনিলানলৌ হেতূ||২০|| তীক্ষ্ণোষ্ণরূক্ষভাবান্মদ্যং পিত্তানিলৌ প্রকোপযতি| শোষযতোঽপাং ধাতুং তাবেব হি মদ্যশীলানাম্||২১|| তপ্তাস্বিব সিকতাসু হি তোযমাশু শুষ্যতি ক্ষিপ্তম্| তেষাং সন্তপ্তানাং হিমজলপানাদ্ভবতি শর্ম||২২||

সম্প্রতি তৃষ্ণান্তরাণামুক্ততৃষ্ণাস্বেবান্তর্ভাবং দর্শযন্নুক্তবক্তব্যতৃষ্ণানামপি বাত-পিত্ত-ক্ষযজন্যত্বমাহ- নাগ্নিমিত্যাদি| কস্মাত্ পুনরগ্নিবাতৌ বিনা তর্ষো ন ভবতীত্যাহ- তৌ হীত্যাদি| তৌ হি অতিবৃদ্ধৌ পিত্তবাতরূপৌ অগ্নিপবনৌ অব্ধাতোঃ শোষণে হেতূ, তস্মান্নাগ্নিবাতৌ বিনা তর্ষ ইত্যুক্তমিত্যর্থঃ| এবমগ্নিবাতাভ্যাং কৃতেঽপাং ক্ষযে স্বরূপাদেব নরস্তৃষ্যতি| এবং পিত্তবাতকৃতাব্ধাতুক্ষযজতৃষ্ণাভেদমভিধায অন্তর্ভাবনীযতৃষ্ণাভেদানাহ- গুর্বন্নেত্যাদি| সম্মূর্চ্ছদ্ভিরিতি একতাং গচ্ছদ্ভিঃ| অত্র বাতো বৃদ্ধঃ সম্মূর্চ্ছনেঽন্নস্য তৃষ্ণাকরঃ, বিদাহকালে চ যা তৃষ্ণা তত্র পিত্তং তৃষ্ণাকরম্| মদ্যজামপ্যন্তর্ভাবযন্নাহ- তীক্ষ্ণোষ্ণেত্যাদি| সিকতাসু বালুকাসু| তেষামিত্যুপশমকথনম্| শর্মেতি সুখম্||১৯-২২||

Adhikarana 14 (23) · Śloka 23

শিশিরস্নাতস্যোষ্মা রুদ্ধঃ কোষ্ঠং প্রপদ্য তর্ষযতি| তস্মান্নোষ্ণক্লান্তো ভজেত সহসা জলং শীতম্ ||২৩||

শীতম্লানজামন্তর্ভাবযন্নাহ- শিশিরেত্যাদি| শিশিরং শীতম্| ঊষ্মা রুদ্ধ ইতি শীতস্পর্শজলেন বহিরনির্গচ্ছন্ রোমকূপৈরুষ্মাঽবরুদ্ধঃ প্রতীপীকৃতঃ, এতেন এতস্যাপি পিত্তজত্বমুক্তম্| ন সহসেত্যনেন বিশ্রম্য শীতজলসেবাযাং ন তথাবিধা তৃষ্ণা ভবতীতি দর্শযতি||২৩||

Adhikarana 15 (24) · Śloka 24

লিঙ্গং সর্বাস্বেতাস্বনিলক্ষযপিত্তজং ভবত্যথ তু| পৃথগাগমাচ্চিকিত্সিতমতঃ প্রবক্ষ্যামি তৃষ্ণানাম্||২৪||

সম্প্রতি অন্নসম্মূর্চ্ছনাদিনা যথোক্তক্রমেণ অনিল-ক্ষয-পিত্তজাবরোধমভিধায সর্বাসামেবানিল-ক্ষয-পিত্তজত্বমুপদর্শযন্নাহ- লিঙ্গং সর্বাস্বিত্যাদি| অনিল-ক্ষয-পিত্তজমিত্যত্র ক্ষযজমিতি অব্ধাতুক্ষযজমেব| সামান্যেঽপি তৃষ্ণানাং ভেদেন চিকিত্সাভিধানে হেতুমাহ- অথ ত্বিত্যাদি| পৃথগাগমাদিতি পৃথগ্ঘেতুত্বাত্, আগচ্ছত্যস্মাদিতি আগমো হেতুঃ; বাতাদিহেতুভেদাচ্চিকিত্সিতভেদং বক্ষ্যামীত্যর্থঃ| কিংবা পৃথক্ চিকিত্সিতং বক্ষ্যামি, আগমাদিতি আযুর্বেদাগমপ্রামাণ্যাত্; আগমে তৃষ্ণানাং ভেদেন চিকিত্সাভিধানাদহমপি পৃথক্ চিকিত্সাং বক্ষ্যামীত্যর্থঃ||২৪||

Adhikarana 16 (25-26) · Śloka 26

অপাং ক্ষযাদ্ধি তৃষ্ণা সংশোষ্য নরং প্রণাশযেদাশু| তস্মাদৈন্দ্রং তোযং সমধু পিবেত্তদ্গুণং বাঽন্যত্||২৫|| কিঞ্চিত্তুবরানুরসং তনু লঘু শীতলং সুগন্ধি সুরসং চ| অনভিষ্যন্দি চ যত্তত্ক্ষিতিগতমপ্যৈন্দ্রবজ্জ্ঞেযম্||২৬||

অপাং ক্ষযাদিত্যাদিনা চিকিত্সামাহ| ঐন্দ্রমিতি আন্তরিক্ষম্| তদ্গুণং বাঽন্যদিতি যদুক্তং তত্রাহ- কিঞ্চিদিত্যাদি| কিঞ্চিদিতি মনাক্| তুবরোঽনুরসতযা রস্যতে আস্বাদ্যতে যস্মিন্ তত্তুবরানুরসম্| অন্তরিক্ষং জলং হ্যব্যক্তসর্বরসযুক্তম্ “অব্যক্তীভাবস্তু রসানাং প্রকৃতৌ ভবত্যনুরসসমন্বিতে বা দ্রব্যে” (চি.অ.সূ.২৬) ইতি| ঐন্দ্রবদিত্যনেন অন্তরিক্ষানুকারি ক্ষিতিসমাবদ্ধং ভবতি| অন্যে তু তুবরশব্দেন কষাযমাহুঃ, তেন কিঞ্চিত্কষাযানুরসমিত্যর্থঃ| তন্বিতি স্বচ্ছম্| সুগন্ধীতি অনিষ্টগন্ধরহিতম্; উক্তং হি সুশ্রুতে- “অনিষ্টগন্ধতা গন্ধদোষঃ” (সু.সূ.অ.৪৫) ইতি| অপ্রাতিকূল্যেন রসনযা আস্বাদ্যতে ইতি সুরসং; ন তু ব্যক্তসুষ্ঠুরসং সুরসম্’; উক্তং হি সুশ্রুতে- “ব্যক্তরসতা রসদোষঃ” ইতি (সু.সূ.অ.৪৫)||২৫-২৬||

Adhikarana 17 (27-33) · Śloka 33

শৃতশীতং সসিতোপলমথবা শরপূর্বপঞ্চমূলেন| লাজাসক্তুসিতাহ্বামধুযুতমৈন্দ্রেণ বা মন্থম্||২৭|| বাট্যং বাঽঽমযবানাং শীতং মধুশর্করাযুতং দদ্যাত্| পেযাং বা শালীনাং দদ্যাদ্বা কোরদূষাণাম্||২৮|| পযসা শৃতেন ভোজনমথবা মধুশর্করাযুতং যোজ্যম্| পারাবতাদিকরসৈর্ঘৃতভৃষ্টৈর্বাঽপ্যলবণাম্লৈঃ||২৯|| তৃণপঞ্চমূলমুঞ্জাতকৈঃ প্রিযালৈশ্চ জাঙ্গলাঃ সুকৃতাঃ| শস্তা রসাঃ পযো বা তৈঃ সিদ্ধং শর্করামধুমত্||৩০|| শতধৌতঘৃতেনাক্তঃ পযঃ পিবেচ্ছীততোযমবগাহ্য| মুদ্গমসূরচণকজা রসাস্তু ভৃষ্টা ঘৃতে দেযাঃ||৩১|| মধুরৈঃ সজীবনীযৈঃ শীতৈশ্চ সতিক্তকৈঃ শৃতং ক্ষীরম্| পানাভ্যঞ্জনসেকেষ্বিষ্টং মধুশর্করাযুক্তম্||৩২|| তজ্জং বা ঘৃতমিষ্টং পানাভ্যঙ্গেষু নস্যমপি চ স্যাত্| নারীপযঃ সশর্করমুষ্ট্র্যা অপি নস্যমিক্ষুরসঃ||৩৩||

শরপূর্বপঞ্চমূলেনেতি “শরেক্ষুদর্ভকাশানাং শালীনাং মূলমেব চ” (চি.অ.১পা.১) ইত্যত্রোক্তেন শরাদিপঞ্চমূলেন| আমযবানাং বাট্যমিতি ঈষদ্ভৃষ্টাদলিতযবমণ্ডঃ| মুঞ্জাতক উত্তরাপথপ্রসিদ্ধঃ| সুকৃতা ইতি সুসংস্কৃতাঃ| তৈরিতি তৃণপঞ্চমূল্যাদিভিঃ| মধুরৈরিতি মধুররসৈঃ| শীতৈরিতি শীতবীর্যৈঃ| তজ্জমিতি মধুরাদিশৃতক্ষীরজম্||২৭-৩৩||

Adhikarana 18 (34-39) · Śloka 39

ক্ষীরেক্ষুরসগুডোদকসিতোপলাক্ষৌদ্রসীধুমার্দ্বীকৈঃ | বৃক্ষাম্লমাতুলুঙ্গৈর্গণ্ডূষাস্তালুশোষঘ্নাঃ||৩৪|| জম্ব্বাম্রাতকবদরীবেতসপঞ্চবল্কপঞ্চাম্লৈঃ| হৃন্মুখশিরঃপ্রদেহাঃসঘৃতা মূর্চ্ছাভ্রমতৃষ্ণাঘ্নাঃ স্যুঃ||৩৫|| দাডিমদধিত্থলোধ্রৈঃ সবিদারীবীজপূরকৈঃ শিরসঃ| লেপো গৌরামলকৈর্ঘৃতারনালাযুতৈশ্চ হিতঃ||৩৬|| শৈবলপঙ্কাম্বুরুহৈঃ সাম্লৈঃ সঘৃতৈশ্চ শক্তুভির্লেপঃ| মস্ত্বারনালার্দ্রবসনকমলমণিহারসংস্পর্শাঃ||৩৭|| শিশিরাম্বুচন্দনার্দ্রস্তনতটপাণিতলগাত্রসংস্পর্শাঃ| ক্ষৌমার্দ্রনিবসনানাং বরাঙ্গনানাং প্রিযাণাং চ||৩৮|| হিমবদ্দরীবনসরিত্সরোঽম্বুজপবনেন্দুপাদশিশিরাণাম্| রম্যশিশিরোদকানাং স্মরণং কথাশ্চ তৃষ্ণাঘ্নাঃ||৩৯||

মার্দ্বীকং মৃদ্বীকারসকৃতং মদ্যম্| গণ্ডূষঃ মুখপূরকো দ্রবঃ| পঞ্চাম্লং “কোলাম্লং চিক্রিকাম্লং চ মাতুলুঙ্গাম্লবেতসম্| চতুরম্লমিতি প্রোক্তং পঞ্চাম্লং তু সদাডিমম্” ইতি বচনাজ্জ্ঞেযম্| দধিত্থঃ কপিত্থঃ| গৌরামলকৈরিতি আর্দ্রতযা গৌরবর্ণৈরামলকৈঃ| মস্ত্বারনালস্তিমিতং বসনং মস্ত্বারনালবসনম্| ইন্দুপাদাঃ চন্দ্ররশ্মযঃ||৩৪-৩৯||

Adhikarana 19 (40) · Śloka 41

বাতঘ্নমন্নপানং মৃদু লঘু শীতং চ বাততৃষ্ণাযাম্| ক্ষযকাসনুচ্ছৃতং ক্ষীরঘৃতমূর্ধ্ববাততৃষ্ণাঘ্নম্ ||৪০|| স্যাজ্জীবনীযসিদ্ধং ক্ষীরঘৃতং বাতপিত্তজে তর্ষ|৪১|

বাতঘ্নেত্যাদিনা তৃষ্ণানাং বৈশেষিকীং চিকিত্সামাহ| ক্ষযকাসহরৈঃ শৃতং ক্ষযকাসনুচ্ছৃতম্| ঊর্ধ্ববাতঃ শ্বাসঃ| বাতপিত্তজে তর্ষে ইত্যত্র সংসর্গজা তৃষ্ণা অসূত্রিতাঽপি অসূত্রিতদ্বন্দ্বজগুল্মাভিধানন্যাযেনোচ্যতে||৪০||-

Adhikarana 20 (41-46) · Śloka 46

পৈত্তে দ্রাক্ষাচন্দনখর্জূরোশীরমধুযুতং তোযম্||৪১|| লোহিতশালিতণ্ডুলখর্জূরপরূষকোত্পলদ্রাক্ষাঃ| মধু পক্বলোষ্টমেব চ জলে স্থিতং শীতলং পেযম্||৪২|| লোহিতশালিপ্রস্থঃ সলোধ্রমধুকাঞ্জনোত্পলঃ ক্ষুণ্ণঃ| পক্বামলোষ্টজলমধুসমাযুতো মৃন্মযে পেযঃ||৪৩|| বটমাতুলুঙ্গবেতসপল্লবকুশকাশমূলযষ্ট্যাহ্বৈঃ| সিদ্ধেঽম্ভস্যগ্নিনিভাং কৃষ্ণমৃদং কৃষ্ণসিকতাং বা||৪৪|| তপ্তানি নবকপালান্যথবা নির্বাপ্য পাযযেতাচ্ছম্| আপাকশর্করং বাঽমৃতবল্ল্যুদকং তৃষাং হন্তি||৪৫|| ক্ষীরবতাং মধুরাণাং শীতানাং শর্করামধুবিমিশ্রাঃ| শীতকষাযা মৃদ্ভৃষ্টসংযুতাঃ পিত্ততৃষ্ণাঘ্নাঃ||৪৬||

পৈত্তে ইত্যত্র ‘তর্ষে’ ইতি শেষঃ| লোহিতশালিপ্রস্থ ইত্যাদৌ লোধ্রাদীনাং মিলিতানাং চতুষ্পলং, প্রক্ষেপ্যন্যাযাত্ পাদিকং মধু, পক্বামলোষ্টপ্রসাদনং (চালোডনযোগ্যমাত্রং ) দত্ত্বা শালিতণ্ডুলপ্রস্থঃ ক্ষপাযাং স্থাপ্যতে, তদন্নং (তস্য পানযোগ্যমাত্রমধুপ্রক্ষেপং) মৃন্মযে পাত্রে পীযত ইতি বৃদ্ধৈরুপদর্শিতঃ কর্মমার্গঃ| নবকপালানি নূতনশরাবাদিখণ্ডান্| আপাকশর্করমিতি পাকনিমিত্তশর্করাসহিতম্| অমৃতবল্লী গুডূচী| মৃদ্ভৃষ্টসংযুতা ইতি ভৃষ্টমৃদ্যুক্তাঃ||৪১-৪৬||

Adhikarana 21 (47-56) · Śloka 56

ব্যোষবচাভল্লাতকতিক্তকষাযাস্তথাঽঽমতৃষ্ণাঘ্নাঃ| যচ্চোক্তং কফজাযাং বম্যাং তচ্চৈব কার্যং স্যাত্||৪৭|| স্তম্ভারুচ্যবিপাকালস্যচ্ছর্দিষু কফানুগাং তৃষ্ণাম্| জ্ঞাত্বা দধিমধুতর্পণলবণোষ্ণজলৈর্বমনমিষ্টম্||৪৮|| দাডিমমম্লফলং বাঽপ্যন্যত্ সকষাযমথ লেহম্| পেযমথবা প্রদদ্যাদ্রজনীশর্করাযুক্তম্ ||৪৯|| ক্ষযকাসেন তু তুল্যা ক্ষযতৃষ্ণা সা গরীযসী নৄণাম্| ক্ষীণক্ষতশোষহিতৈস্তস্মাত্তাং ভেষজৈঃ শমযেত্||৫০|| পানতৃষার্তঃ পানং ত্বর্ধোদকমম্ললবণগন্ধাঢ্যম্| শিশিরস্নাতঃ পানং মদ্যাম্বু গুডাম্বু বা তৃষিতঃ||৫১|| ভক্তোপরোধতৃষিতঃ স্নেহতৃষার্তোঽথবা তনুযবাগূম্| প্রপিবেদ্গুরুণা তৃষিতো ভুক্তেন তদুদ্ধরেদ্ভুক্তম্||৫২|| মদ্যাম্বু বাঽম্বু কোষ্ণং বলবাংস্তৃষিতঃ সমুল্লিখেত্ পীত্বা| মাগধিকাবিশদমুখঃ সশর্করং বা পিবেন্মন্থম্||৫৩|| বলবাংস্তু তালুশোষে পিবেদ্ধৃতং তৃষ্যমদ্যাচ্চ| সর্পির্ভৃষ্টং ক্ষীরং মাংসরসাংশ্চাবলঃ স্নিগ্ধান্||৫৪|| অতিরূক্ষদুর্বলানাং তর্ষং শমযেন্নৃণামিহাশু পযঃ| ছাগো বা ঘৃতভৃষ্টঃ শীতো মধুরো রসো হৃদ্যঃ||৫৫|| স্নিগ্ধেঽন্নে ভুক্তে যা তৃষ্ণা স্যাত্তাং গুডাম্বুনা শমযেত্| তর্ষং মূর্চ্ছাভিহতস্য রক্তপিত্তাপহৈর্হন্যাত্||৫৬||

অন্যত্ সকষাযমিতি আমলাদিসকষাযলেহম্| পানতৃষার্ত ইতি অতিশযমদ্যপানজতৃট্পীডিতঃ| ভক্তোপরোধঃ ভক্তচ্ছেদঃ | মাগধিকাবিশদমুখ ইত্যত্র মুখবৈশদ্যমাত্রকারিকা পিপ্পলী প্রযোক্তব্যা| তালুশোষে যদ্যপি ঘৃতং নিষিদ্ধং “তৃষ্ণামূর্চ্ছাপরীতাশ্চ গর্ভিণ্যস্তালুশোষিণঃ” (সূ.অ.১৩) ইতি, তথাঽপীহ বলবত্তৃষ্যানুযুক্তং ঘৃতপানং বিশিষ্টত্বান্ন বিরোধি| স্নিগ্ধেঽন্নে ভুক্তে যা তৃষ্ণা তত্র যদ্যপি গুডাম্বু স্নিগ্ধগুণযুক্তত্বান্ন হিতম্, উক্তং হি- “যদাহারগুণৈঃ পানং বিপরীতং তদিষ্যতে” (সূ.অ.২৭) ইতি; তথাঽপি মধুররসতযা তৃষ্ণাহরত্বাত্ প্রভাবাদ্বোপযুজ্যতে| তর্ষং মূর্চ্ছেত্যাদিনা ঔপসর্গিকতৃষ্ণাচিকিত্সোচ্যতে||৪৭-৫৬||

Adhikarana 22 (57-62) · Śloka 62

তৃট্দাহমূর্চ্ছাভ্রমক্লমমদাত্যযাস্রবিষপিত্তে | শস্তং স্বভাবশীতং, শৃতশীতং সন্নিপাতেঽম্ভঃ||৫৭|| হিক্কাশ্বাসনবজ্বরপীনসঘৃতপীতপার্শ্বগলরোগে| কফবাতকৃতে স্ত্যানে সদ্যঃশুদ্ধে চ হিতমুষ্ণম্||৫৮|| পাণ্ডূদরপীনসমেহগুল্মমন্দানলাতিসারেষু| প্লীহ্নি চ তোযং ন হিতং কামমসহ্যে পিবেদল্পম্||৫৯|| পূর্বামযাতুরঃ সন্ দীনস্তৃষ্ণার্দিতো জলং কাঙ্ক্ষন্| ন লভেত স চেন্মরণমাশ্বেবাপ্নুযাদ্দীর্ঘরোগং বা||৬০|| তস্মাদ্ধান্যাম্বু পিবেত্তৃষ্যন্ রোগী সশর্করাক্ষৌদ্রম্| যদ্বা তস্যান্যত্স্যাত্ সাত্ম্যং রোগস্য তচ্চেষ্টম্||৬১|| তস্যাং বিনিবৃত্তাযাং তজ্জন্য উপদ্রবঃ সুখং জেতুম্| তস্মাত্তৃষ্ণাং পূর্বং জযেদ্বহুভ্যোঽপি রোগেভ্যঃ||৬২||

শীতমুষ্ণং চ জলং কুত্র দেযং বর্জ্যং বা কুত্রেত্যাহ- তৃডিত্যাদি| বিষপিত্তে ইতি বিষে পিত্তে চ| সন্নিপাতে ইতি সন্নিপাতজ্বরোদ্ভূততৃষ্ণাযাম্| ন হিতমিতি পাণ্ড্বাদিরোগে তৃষ্ণাযামপি তোযং ন হিতম্| অসহ্যে ‘তর্ষে’ ইতি শেষঃ| এষ্বসহ্যতৃষ্ণাযাং জলাদানে দোষমাহ- পূর্বেত্যাদি| পূর্বামযাতুর ইতি পূর্বোত্পন্নগদপীডিতঃ| তজ্জন্যোপদ্রব ইতি তৃষ্ণাপ্রশমনার্থং পীযমানপানীযজঃ| সুখং জেতুমিতি মহাত্যযকরীং তৃষ্ণামপেক্ষ্য জেতুং সুখোপাযো ভবতীত্যর্থঃ||৫৭-৬২||

Adhikarana 23 (63) · Śloka 63

তত্র শ্লোকঃ- হেতূ যথাঽগ্নিপবনৌ কুরুতঃ সোপদ্রবাং চ পঞ্চানাম্| তৃষ্ণানাং পৃথগাকৃতিরসাধ্যতা সাধনং চোক্তম্||৬৩||

হেতুরিত্যাদ্যধ্যাযসঙ্গ্রহঃ| অগ্নিপবনৌ ইতি যথাঽগ্নিপবনৌ কুরুতঃ সোপদ্রবাং ‘তৃষ্ণাং’ ইতি শেষঃ| উপদ্রবাশ্চ মুখশোষাদযঃ পূর্বমুক্তাঃ ||৬৩||

Adhikarana puShpikA · Śloka 22

ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে চিকিত্সাস্থানে তৃষ্ণারোগচিকিত্সিতং নাম দ্বাবিংশোঽধ্যাযঃ||২২||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং চিকিত্সিতস্থানে তৃষ্ণাচিকিত্সিতং নাম দ্বাবিংশোঽধ্যাযঃ||২২||