35. vātaśōṇitacikitsitam

Adhikarana 1 (1-2) · Śloka 2

অথাতো বাতশোণিতচিকিত্সিতং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

বাতব্যাধিপ্রভেদাদেব বাতব্যাধিচিকিত্সিতানন্তরং বাতরক্তচিকিত্সিতমুচ্যতে| বাতরক্তাভ্যাং জনিতো ব্যাধিঃ বাতরক্তং, কিংবা বাতরক্তে এব অবস্থান্তরপ্রাপ্তে বাতরক্তম্||১-২||

Adhikarana 2 (3-11) · Śloka 11

হুতাগ্নিহোত্রমাসীনমৃষিমধ্যে পুনর্বসুম্| পৃষ্টবান্ গুরুমেকাগ্রমগ্নিবেশোঽগ্নিবর্চসম্||৩|| অগ্নিমারুততুল্যস্য সংসর্গস্যানিলাসৃজোঃ| হেতুলক্ষণভৈষজ্যান্যথাস্মৈ গুরুরব্রবীত্||৪|| লবণাম্লকটুক্ষারস্নিগ্ধোষ্ণাজীর্ণভোজনৈঃ| ক্লিন্নশুষ্কাম্বুজানূপমাংসপিণ্যাকমূলকৈঃ||৫|| কুলত্থমাষনিষ্পাবশাকাদিপললেক্ষুভিঃ| দধ্যারনালসৌবীরশুক্ততক্রসুরাসবৈঃ||৬|| বিরুদ্ধাধ্যশনক্রোধদিবাস্বপ্নপ্রজাগরৈঃ| প্রাযশঃ সুকুমারাণাং মিষ্টান্নসুখভোজিনাম্ ||৭|| অচঙ্ক্রমণশীলানাং কুপ্যতে বাতশোণিতম্| অভিঘাতাদশুদ্ধ্যা চ প্রদুষ্টে শোণিতে নৃণাম্||৮|| কষাযকটুতিক্তাল্পরূক্ষাহারাদভোজনাত্| হযোষ্ট্রযানযানাম্বুক্রীডাপ্লবনলঙ্ঘনৈঃ ||৯|| উষ্ণে চাত্যধ্ববৈষম্যাদ্ব্যবাযাদ্বেগনিগ্রহাত্ | বাযুর্বিবৃদ্ধো বৃদ্ধেন রক্তেনাবারিতঃ পথি||১০|| কৃত্স্নং সন্দূষযেদ্রক্তং তজ্জ্ঞেযং বাতশোণিতম্| খুডং বাতবলাসাখ্যমাঢ্যবাতং চ নামভিঃ||১১||

অগ্নিমারুততুল্যস্যেত্যনেন বাতরক্তস্য দুর্নিবারত্বং শীঘ্রকারিত্বং চাহ| লবণেত্যাদিনা হেতুমাহ| প্রাযশঃ সুকুমারাণামিত্যনেন সুকুমারশরীরে লবণাদিহেতুসেবযা শীঘ্রং দুষ্টং বাতাস্রং বাতশোণিতং ভবতীতি দর্শযতি| মিষ্টমন্নং সুখেন ভুঞ্জতে তেষাং মিষ্টান্নসুখভোজিনাম্| অত্র লবণাদি যদ্যপি বাতশোণিতহেতুতযোক্তং তথাঽপি শোণিতদুষ্টিকারণমেতত্ প্রাধান্যাজ্জ্ঞেযং, বাতদুষ্টিকারণং তু কষাযেত্যাদিনোক্তং, ততশ্চ লবণাদি কষাযাদি চ মিলিতং সদ্ বাতশোণিতোত্পাদকং ভবতি| যত্তু ‘জাযতে বাতশোণিতম্’ ইত্যনেন লবণাদীনাং বাতশোণিতকারণত্বমুক্তং, তদ্বাতশোণিতজনকশোণিতদুষ্টিকারণদ্বারা জ্ঞেযম্| অশুদ্ধ্যেতি শুদ্ধিকালেঽসংশোধনাত্| কেচিত্ ‘অভিঘাতাদশুদ্ধ্যা চ’ ইত্যস্য স্থানে ‘অশুদ্ধ্যা বাতবৈষম্যাত্’ ইতি পঠন্তি| অশুদ্ধ্যা চেতি চকারেণ লবণাদি প্রজাগরৈরিত্যন্তং শোণিতদুষ্টিকারণং সমুচ্চিনোতি| অত্র শোণিতবাতস্য বিচ্ছিদ্য হেতুবহুপাঠেন দ্বযোরপ্যত্র স্বতন্ত্রং প্রকোপং দর্শযতি| হযোষ্ট্ররূপেণ যানেন যানং হযোষ্ট্রযানযানম্| উষ্ণে চাত্যধ্ববৈষম্যাদিতি উষ্ণে কালে অত্যধ্বজনিতাদ্বাতদ্বৈষম্যাত্| বাযুরিত্যাদিনা সম্প্রাপ্তিমাহ| পথীতি বাযুবহনস্রোতসি| ক্রুদ্ধ ইতি বৃদ্ধোঽপি স্বহেতোর্বাযুঃ পুনঃ শোণিতেনাবরণাদ্বিশেষেণ ক্রুদ্ধঃ| ব্যবহারার্থং তন্ত্রান্তরপ্রসিদ্ধসঞ্জ্ঞাভেদানপ্যাহ- খুডমিত্যাদি| খুডদেশপ্রাপ্ত্যা খুডঃ, খুডশব্দেন সন্ধিরুচ্যতে; বাতস্যাবরণেন বলমস্ত্যস্মিঞ্ শোণিতে ইতি বাতবলাশঃ; আঢ্যানাং প্রাযো ভবতীতি আঢ্যরোগঃ||৩-১১||

Adhikarana 3 (12-15) · Śloka 15

তস্য স্থানং করৌ পাদাবঙ্গুল্যঃ সর্বসন্ধযঃ| কৃত্বাঽঽদৌ হস্তপাদে তু মূলং দেহে বিধাবতি||১২|| সৌক্ষ্ম্যাত্ সর্বসরত্বাচ্চ পবনস্যাসৃজস্তথা| তদ্দ্রবত্বাত্ সরত্বাচ্চ দেহং গচ্ছন্ সিরাযনৈঃ||১৩|| পর্বস্বভিহতং ক্ষুব্ধং বক্রত্বাদবতিষ্ঠতে| স্থিতং পিত্তাদিসংসৃষ্টং তাস্তাঃ সৃজতি বেদনাঃ||১৪|| করোতি দুঃখং তেষ্বেব তস্মাত্ প্রাযেণ সন্ধিষু| ভবন্তি বেদনাস্তাস্তা অত্যর্থং দুঃসহা নৃণাম্||১৫||

বাতশোণিতস্য বৈশেষিকং স্থানমাহ| তস্য স্থানমিত্যাদি| করপাদগ্রহণেনৈব অঙ্গুলীনাং গ্রহণে প্রাপ্তে অঙ্গুলীনাং বহুপর্বতযা বিশেষেণাধিষ্ঠানত্বোপদর্শনার্থং পুনরভিধানম্| মূলমাস্থাযেতি আস্পদং কৃত্বা| দেহধাবনে হেতুমাহ- সৌক্ষ্ম্যাদিত্যাদি|- সূক্ষ্মমার্গানুসারিত্বাত্| বাতশোণিতস্য দেহং সর্পতো বিশেষেণ পর্বাবস্থানং সহেতুকমাহ- তদ্দ্রবত্বাদিত্যাদি| সিরাযনৈরিতি সিরারূপৈর্মার্গৈঃ| বক্রত্বাদিতি পর্বণাং বক্রত্বাত্| পিত্তাদিসংসৃষ্টমিতি পিত্তেন কফেন চ হেত্বন্তরাগতেন বাযুনা চ যুক্তম্| তস্মাদিতি সন্ধিষ্ববস্থানাত্||১২-১৫||

Adhikarana 4 (16-18) · Śloka 18

স্বেদোঽত্যর্থং ন বা কার্ষ্ণ্যং স্পর্শাজ্ঞত্বং ক্ষতেঽতিরুক্| সন্ধিশৈথিল্যমালস্যং সদনং পিডকোদ্গমঃ||১৬|| জানুজঙ্ঘোরুকট্যংসহস্তপাদাঙ্গসন্ধিষু| নিস্তোদঃ স্ফুরণং ভেদো গুরুত্বং সুপ্তিরেব চ||১৭|| কণ্ডূঃ সন্ধিষু রুগ্ভূত্বা ভূত্বা নশ্যতি চাসকৃত্| বৈবর্ণ্যং মণ্ডলোত্পত্তির্বাতাসৃক্পূর্বলক্ষণম্||১৮||

স্বেদোঽত্যর্থমিত্যাদিনা পূর্বরূপমাহ| স্বেদোঽত্যর্থং নবেতি চ যদ্যপি কুষ্ঠপূর্বরূপেঽপ্যুক্তং, তথাঽপ্যসমানভূরিপূর্বরূপসম্বন্ধাদন্যতরযোগপূর্বরূপত্বে নিশ্চযঃ||১৬-১৮||

Adhikarana 5 (19-23) · Śloka 23

উত্তানমথ গম্ভীরং দ্বিবিধং তত্ প্রচক্ষতে| ত্বঙ্মাংসাশ্রযমুত্তানং গম্ভীরং ত্বন্তরাশ্রযম্||১৯|| কণ্ডূদাহরুগাযামতোদস্ফুরণকুঞ্চনৈঃ| অন্বিতা শ্যাবরক্তা ত্বগ্বাহ্যে তাম্রা তথেষ্যতে||২০|| গম্ভীরে শ্বযথুঃ স্তব্ধঃ কঠিনোঽন্তর্ভৃশার্তিমান্| শ্যাবস্তাম্রোঽথবা দাহতোদস্ফুরণপাকবান্||২১|| রুগ্বিদাহান্বিতোঽভীক্ষ্ণং বাযুঃ সন্ধ্যস্থিমজ্জসু| ছিন্দন্নিব চরত্যন্তর্বক্রীকুর্বংশ্চ বেগবান্||২২|| করোতি খঞ্জং পঙ্গুং বা শরীরে সর্বতশ্চরন্| সর্বৈর্লিঙ্গৈশ্চ বিজ্ঞেযং বাতাসৃগুভযাশ্রযম্||২৩||

বাতশোণিতস্য অবগাঢানবগাঢভেদং চিকিত্সার্থমাহ- উত্তানমিত্যাদি| অন্তরাশ্রযমিতি ত্বঙ্মাংসব্যতিরিক্তগম্ভীরধাত্বাশ্রযম্| সর্বৈর্লিঙ্গৈরিতি উত্তানগম্ভীরবাতরক্তোক্তৈর্মিলিতৈঃ| অযং চ তৃতীযঃ প্রকারো বাহ্যাভ্যন্তরপ্রকারোক্তপ্রকারগৃহীত এবেতি কৃত্বা রোগসঙ্গ্রহে দ্বিবিধং বাতশোণিতমুক্তম্| “দ্বিবিধং বাতশোণিতমুত্তানমবগাঢং চেত্যেকে ভাষন্তে; তত্তু ন সম্যক্, কস্মাত্? কুষ্ঠবদুত্তানং ভূত্বা কালান্তরেণাবগাঢীভবতি” (সু.চি.অ.৫) ইত্যনেন সুশ্রুতেন যদ্দ্বৈবিধ্যং খণ্ডিতং তদাচার্যযোঃ পরমাত্মনোঃ সুশ্রুতাগ্নিবেশযোরেকস্যাপ্যপ্রামাণ্যং ন সঙ্গতমিতি কৃত্বা অবিরোধমেবাত্র ব্যাখ্যানযামঃ; তথাহি- সুশ্রুতেন উত্তানং বাতশোণিতং কুষ্ঠবদ্গম্ভীরং ভবতীত্যুচ্যতে, ন তু সর্বমেবোত্তানং ভূত্বা গম্ভীরং ভবতীতি প্রতিজ্ঞাযতে; তেন যো ব্রূতে- উত্তানমেবাবতিষ্ঠতে, তং প্রতি সুশ্রুতবচনং বাধকং; তন্ন, চরকে উত্তানমেবাবতিষ্ঠতে ইতি নোচ্যত এব, কিন্তু প্রথমোত্পত্তৌ কিঞ্চিদুত্তানমুত্পদ্যতে, কিঞ্চিত্তু গম্ভীরমিতি, তেন ন বিরোধশ্চরকসুশ্রুতযোঃ||১৯-২৩||

Adhikarana 6 (24-29) · Śloka 29

তত্র বাতেঽধিকে বা স্যাদ্রক্তে পিত্তে কফেঽপি বা| সংসৃষ্টেষু সমস্তেষু যচ্চ তচ্ছৃণু লক্ষণম্||২৪|| বিশেষতঃ সিরাযামশূলস্ফুরণতোদনম্ | শোথস্য কার্ষ্ণ্যং রৌক্ষ্যং চ শ্যাবতাবৃদ্ধিহানযঃ||২৫|| ধমন্যঙ্গুলিসন্ধীনাং সঙ্কোচোঽঙ্গগ্রহোঽতিরুক্| কুঞ্চনস্তম্ভনে শীতপ্রদ্বেষশ্চানিলেঽধিকে||২৬|| শ্বযথুর্ভৃশরুক্ তোদস্তাম্রশ্চিমিচিমাযতে| স্নিগ্ধরূক্ষৈঃ শমং নৈতি কণ্ডূক্লেদান্বিতোঽসৃজি ||২৭|| বিদাহো বেদনা মূর্চ্ছা স্বেদস্তৃষ্ণা মদো ভ্রমঃ| রাগঃ পাকশ্চ ভেদশ্চ শোষশ্চোক্তানি পৈত্তিকে||২৮|| স্তৈমিত্যং গৌরবং স্নেহঃ সুপ্তির্মন্দা চ রুক্ কফে| হেতুলক্ষণসংসর্গাদ্বিদ্যাদ্দ্বন্দ্বত্রিদোষজম্||২৯||

তত্র বাতেঽধিকে ইত্যাদৌ রক্তে পিত্তে কফে বা ‘অধিকে’ ইত্যনুবর্তনীযং; তেন পিত্তবৃদ্ধিঃ, শোণিতবৃদ্ধিঃ, কফবৃদ্ধিশ্চ জ্ঞেযা| সংসৃষ্টেষ্বিতি দ্বিত্রিষু মিলিতেষু সমস্তেষ্বিতি চতুঃষ্বপি মিলিতেষ্বধিকেষু| সিরাযামেত্যাদিনা বাতাদ্যুল্বণানাং চতুর্ণাং লক্ষণমাহ| আযামঃ বিস্তরণম্| শ্যাবতা শ্যাববর্ণত্বম্| শ্বযথুরিত্যাদিনা অসৃজীত্যন্তেন উদ্রিক্তরক্তস্য লক্ষণম্| দ্বন্দ্বত্রিদোষজমিত্যত্র অধিকশোণিতানুবন্ধোঽপি গৃহীতব্যঃ; তেন বাতাদিচতুষ্টযাধিকমেলকমপি বাতশোণিতং জ্ঞেযম্| অত এব একদ্বিত্রিসর্বাধিকভেদাদ্ দ্বিবিধস্যাপি বাতশোণিতস্য পূর্বটীকাকৃদ্ভিঃ পঞ্চচত্বারিংশদ্ভেদা উক্তাঃ| খরনাদেন তু প্রকরণান্তরেণ ষট্ত্রিংশদ্বিধমুক্তম্| উক্তং হি- “বাতোত্তরং প্রবৃদ্ধাসৃক্ পঞ্চত্রিংশদ্বিধং মতম্| পিত্তাত্ত্রিংশদ্বিধং যোগাত্ কফাদ্দশবিধং মতম্” ইতি| এতে ভেদা অনতিপ্রযোজনত্বান্ন বিবৃতাঃ||২৪-২৯||

Adhikarana 7 (30-34) · Śloka 34

একদোষানুগং সাধ্যং নবং, যাপ্যং দ্বিদোষজম্| ত্রিদোষজমসাধ্যং স্যাদ্যস্য চ স্যুরুপদ্রবাঃ||৩০|| অস্বপ্নারোচকশ্বাসমাংসকোথশিরোগ্রহাঃ| মূর্চ্ছাযমদরুক্তৃষ্ণাজ্বরমোহপ্রবেপকাঃ||৩১|| হিক্কাপাঙ্গুল্যবীসর্পপাকতোদভ্রমক্লমাঃ| অঙ্গুলীবক্রতা স্ফোটা দাহমর্মগ্রহার্বুদাঃ||৩২|| এতৈরুপদ্রবৈর্বর্জ্যং মোহেনৈকেন বাঽপি যত্| সম্প্রস্রাবি বিবর্ণং চ স্তব্ধমর্বুদকৃচ্চ যত্||৩৩|| বর্জযেচ্চৈব সঙ্কোচকরমিন্দ্রিযতাপনম্| অকৃত্স্নোপদ্রবং যাপ্যং সাধ্যং স্যান্নিরুপদ্রবম্||৩৪||

সাধ্যাদিবিভাগমাহ- একদোষানুগমিত্যাদি| যস্য চ স্যুরুপদ্রবা ইতি সাধ্যত্বেনোক্তস্যাপি বক্ষ্যমাণোপদ্রবযোগাদসাধ্যতা| ত্রিদোষস্যাসাধ্যত্বেঽপি যদ্বক্ষ্যতি ‘খজেন মথিতা পেযা বাতরক্তে ত্রিদোষজে’ ইতি, তদসম্পূর্ণলক্ষণাভিনবত্রিদোষজাভিপ্রাযেণ| মূর্চ্ছাযঃ মূর্চ্ছা| পাঙ্গুল্যং পঙ্গুতা| মোহেনৈকেনেতি ইতরোপদ্রবাণাং মেলকাদসাধ্যত্বং, মোহস্তু এক এব অসাধ্যতাকর ইত্যর্থঃ; যে তু ‘মেহেনৈকেন’ ইতি পঠন্তি, তে মেহবাতশোণিতযোর্বিরুদ্ধোপক্রমতযা মেহযোগেনাসাধ্যতামাহুঃ; বাতশোণিতস্য হি প্রাযেণ মধুরশীতোপক্রমঃ, তদ্বিপরীতস্তু মেহস্যেতি বিরুদ্ধোপক্রমতা| বিবর্ণমিতি বিপরীতবর্ণং; বিবর্ণত্বমাত্রং তু সর্ববাতানুগতোপদ্রবঃ ||৩০-৩৪||

Adhikarana 8 (35-40) · Śloka 40

রক্তমার্গং নিহন্ত্যাশু শাখাসন্ধিষু মারুতঃ| নিবিশ্যান্যোন্যমাবার্য বেদনাভির্হরেদসূন্||৩৫|| তত্র মুঞ্চেদসৃক্ শৃঙ্গজলৌকঃসূচ্যলাবুভিঃ| প্রচ্ছনৈর্বা সিরাভির্বা যথাদোষং যথাবলম্||৩৬|| রুগ্দাহশূলতোদার্তাদসৃক্ স্রাব্যং জলৌকসা| শৃঙ্গৈস্তুম্বৈর্হরেত্ সুপ্তিকণ্ডূচিমিচিমাযনাত্||৩৭|| দেশাদ্দেশং ব্রজত্ স্রাব্যং সিরাভিঃ প্রচ্ছনেন বা| অঙ্গগ্লানৌ ন তু স্রাব্যং রূক্ষে বাতোত্তরে চ যত্ ||৩৮|| গম্ভীরং শ্বযথুং স্তম্ভং কম্পং স্নাযুসিরামযান্| গ্লানিং চাপি সসঙ্কোচাং কুর্যাদ্বাযুরসৃক্ক্ষযাত্||৩৯|| খাঞ্জ্যাদীন্ বাতরোগাংশ্চ মৃত্যুং চাত্যবসেচনাত্| কুর্যাত্তস্মাত্ প্রমাণেন স্নিগ্ধাদ্রক্তং বিনির্হরেত্||৪০||

বাতশোণিতস্য রক্তহরণার্থং রূপমাহ- রক্তমার্গমিত্যাদি| রক্তস্য মার্গং মারুতো নিহন্তি শাখাসন্ধিষু নিবিশ্যেতি শাখাসন্ধিষু স্থিত্বা, ততশ্চ বাযুনা রক্তনিরোধাত্, অন্যোন্যমাবার্যেতি রক্তেন বাতং বাতেন চ রক্তমাবার্য, বাতরক্তং বেদনাভির্হরেদসূমিতি যোজ্যম্| অত এবাত্র বাতশোণিতে অসৃগ্বিমুঞ্চেদিতি ভাবঃ| অসৃঙ্মোক্ষণেন আবরণব্যপগমাদ্বাযুরপি প্রসন্নো ভবতি, ততশ্চ ব্যাধ্যুপরম ইতি ভাবঃ| দেশাদ্দেশং ব্রজদিতি স্থানান্তরপ্রসরণশীলম্| অঙ্গগ্লানাবিতি অঙ্গশোষে| স্রাবণাহে শোণিতেঽপ্যতিস্রাবণাদ্দোষমাহ- গম্ভীরমিত্যাদি| খাঞ্জ্যাদীনিতি খাঞ্জ্যপাঙ্গুল্যকুব্জত্বাদীন্ বাতরোগান্| কুর্যাদিতি চ্ছেদঃ| প্রমাণেনেতি অবিকারিমাত্রযা||৩৫-৪০||

Adhikarana 9 (41) · Śloka 42

বিরেচ্যঃ স্নেহযিত্বাঽঽদৌ স্নেহযুক্তৈর্বিরেচনৈঃ| রূক্ষৈর্বা মৃদুভিঃ শস্তমসকৃদ্বস্তিকর্ম চ||৪১|| সেকাভ্যঙ্গপ্রদেহান্নস্নেহাঃ প্রাযোঽবিদাহিনঃ| বাতরক্তে প্রশস্যন্ত ...|৪২|

বিরেচনবিধানে স্নেহযুক্তৈ রূক্ষৌর্বেতি বিকল্পদ্বযে স্নেহযুক্তবিরেচনমীষত্স্নিগ্ধবিষযং, রূক্ষৈস্তু বিরেচনমতিস্নিগ্ধবিষযম্| মৃদুভিরিত্যনেন বাতক্ষোভভযাদত্র তীক্ষ্ণবিরেচনং নিষেধযতি| বস্তিকর্মেতি অনুবাসননিরূহরূপম্| প্রাযোঽবিদাহিন ইতি নিতরামবিদাহিনঃ||৪১||-

Adhikarana 10 (42-48) · Śloka 48

... বিশেষং তু নিবোধ মে||৪২|| বাহ্যমালেপনাভ্যঙ্গপরিষেকোপনাহনৈঃ| বিরেকাস্থাপনস্নেহপানৈর্গম্ভীরমাচরেত্||৪৩|| সর্পিস্তৈলবসামজ্জাপানাভ্যঞ্জনবস্তিভিঃ| সুখোষ্ণৈরুপনাহৈশ্চ বাতোত্তরমুপাচরেত্||৪৪|| বিরেচনৈর্ঘৃতক্ষীরপানৈঃ সেকৈঃ সবস্তিভিঃ| শীতৈর্নির্বাপণৈশ্চাপি রক্তপিত্তোত্তরং জযেত্||৪৫|| বমনং মৃদু নাত্যর্থং স্নেহসেকৌ বিলঙ্ঘনম্| কোষ্ণা লেপাশ্চ শস্যন্তে বাতরক্তে কফোত্তরে||৪৬|| কফবাতোত্তরে শীতৈঃ প্রলিপ্তে বাতশোণিতে| দাহশোথরুজাকণ্ডূবিবৃদ্ধিঃ স্তম্ভনাদ্ভবেত্||৪৭|| রক্তপিত্তোত্তরে চোষ্ণৈর্দাহঃ ক্লেদোঽবদারণম্| ভবেত্তস্মাদ্ভিষগ্দোষবলং বুদ্ধ্বাঽঽচরেত্ক্রিযাম্||৪৮||

বিশেষমিতি বিশিষ্টচিকিত্সিতম্| বাহ্যমিতি উত্তানম্| মৃদ্বিতি বমনবিশেষণম্| কফোত্তরে বাতোত্তরে চ শীতপ্রলেপদোষমাহ- কফবাতোত্তরে ইত্যাদি| শীতলেপেন বিদাহোঽত্র ঊষ্মরোধাদ্ভবতীতি জ্ঞেযম্| পিত্তোত্তরে রক্তোত্তরে চ উষ্ণপ্রলেপৈর্দোষমাহ- রক্তপিত্তোত্তরে ইত্যাদি| দোষবলং বুদ্ধ্বা আচরেদিতি দোষবলং বুদ্ধ্বা অনুগুণামেব ক্রিযামাচরেত্; বাতকফোত্তরে উষ্ণাং, রক্তপিত্তোত্তরে শীতাং, মিশ্রে চ মিশ্রামিতি ভাবঃ||৪২-৪৮||

Adhikarana 11 (49-54) · Śloka 54

দিবাস্বপ্নং সসন্তাপং ব্যাযামং মৈথুনং তথা| কটূষ্ণং গুর্বভিষ্যন্দি লবণাম্লং চ বর্জযেত্||৪৯|| পুরাণা যবগোধূমনীবারাঃ শালিষষ্টিকাঃ| ভোজনার্থং রসার্থং বা বিষ্কিরপ্রতুদা হিতাঃ||৫০|| আঢক্যশ্চণকা মুদ্গা মসূরাঃ সমকুষ্ঠকাঃ| যূষার্থং বহুসর্পিষ্কাঃ প্রশস্তা বাতশোণিতে||৫১|| সুনিষণ্ণকবেত্রাগ্রকাকমাচীশতাবরী| বাস্তুকোপোদিকাশাকং শাকং সৌবর্চলং তথা||৫২|| ঘৃতমাংসরসৈর্ভৃষ্টং শাকসাত্ম্যায দাপযেত্| ব্যঞ্জনার্থং, তথা গব্যং মাহিষাজং পযো হিতম্||৫৩|| ইতি সঙ্ক্ষেপতঃ প্রোক্তং বাতরক্তচিকিত্সিতম্| এতদেব পুনঃ সর্বং ব্যাসতঃ সম্প্রবক্ষ্যতে||৫৪||

নীবারঃ উডিকা| সৌবর্চলমিতি সূর্যাবর্তশাকম্| ব্যঞ্জনার্থমিতি ভোজনসাধনতযা ব্যঞ্জতে ইতি ব্যঞ্জনম্| এতদেবেতি সঙ্ক্ষিপ্তপ্রযোগকথনম্| ব্যাসতঃ প্রপঞ্চেন||৪৯-৫৪||

Adhikarana 12 (55-60) · Śloka 60

শ্রাবণীক্ষীরকাকোলীজীবকর্ষভকৈঃ সমৈঃ| সিদ্ধং সমধুকৈঃ সর্পিঃ সক্ষীরং বাতরক্তনুত্||৫৫|| বলামতিবলাং মেদামাত্মগুপ্তাং শতাবরীম্| কাকোলীং ক্ষীরকাকোলীং রাস্নামৃদ্ধিং চ পেষযেত্||৫৬|| ঘৃতং চতুর্গুণক্ষীরং তৈঃ সিদ্ধং বাতরক্তনুত্| হৃত্পাণ্ডুরোগবীসর্পকামলাজ্বরনাশনম্||৫৭|| ত্রাযন্তিকাতামলকীদ্বিকাকোলীশতাবরী| কশেরুকাকষাযেণ কল্কৈরেভিঃ পচেদ্ধৃতম্||৫৮|| দত্ত্বা পরূষকাদ্রাক্ষাকাশ্মর্যেক্ষুরসান্ সমান্| পৃথগ্বিদার্যাঃ স্বরসং তথা ক্ষীরং চতুর্গুণম্||৫৯|| এতত্ প্রাযোগিকং সর্পিঃ পারূষকমিতি স্মৃতম্| বাতরক্তে ক্ষতে ক্ষীণে বীসর্পে পৈত্তিকে জ্বরে||৬০|| ইতি পারূষকং ঘৃতম্|

শ্রাবণী মুণ্ডিতিকা| সক্ষীরমিত্যনেন দ্রবান্তরাভাবাচ্চতুর্গুণক্ষীরমেব ঘৃতাদ্ভবতি| ত্রাযন্তিকেত্যাদৌ কল্কৈরেভিরিত্যনেন শতাবর্যন্তানাং কল্কত্বং, কশেরুকাকষাযঃ, পরূষকরসাদীনাং প্রত্যেকং ঘৃতসমানত্বং, বিদারীরসস্যাপি তথাবচনাত্ সমত্বম্| অত্র জতূকর্ণঃ- “তুল্যরসৈঃ পরূষককাশ্মর্যককশেরুকাবিদরীদ্রাক্ষেক্ষূণাং চতুষ্কে পযসি দ্বিকাকোলীতামলকীশতাবর্যঃ পিষ্ট্বা পচেদ্ ঘৃতং, প্রযোগেণ তদ্বাতাস্রবীসর্পজ্বরজিত্ সর্পিঃ পারূষকং নাম” ইতি| প্রাযোগিকমিতি অভ্যাসোপযোজ্যম্||৫৫-৬০||

Adhikarana 13 (61-70) · Śloka 70

দ্বে পঞ্চমূলে বর্ষাভূমেরণ্ডং সপুনর্নবম্| মুদ্গপর্ণীং মহামেদাং মাষপর্ণীং শতাবরীম্||৬১|| শঙ্খপুষ্পীমবাক্পুষ্পীং রাস্নামতিবলাং বলাম্| পৃথগ্দ্বিপলিকং কৃত্বা জলদ্রোণে বিপাচযেত্||৬২|| পাদশেষে সমান্ ক্ষীরধাত্রীক্ষুচ্ছাগলান্ রসান্| ঘৃতাঢকেন সংযোজ্য শনৈর্মৃদ্বগ্নিনা পচেত্||৬৩|| কল্কানাবাপ্য মেদে দ্বে কাশ্মর্যফলমুত্পলম্| ত্বক্ক্ষীরীং পিপ্পলীং দ্রাক্ষাং পদ্মবীজং পুনর্নবাম্||৬৪|| নাগরং ক্ষীরকাকোলীং পদ্মকং বৃহতীদ্বযম্| বীরাং শৃঙ্গাটকং ভব্যমুরুমাণং নিকোচকম্||৬৫|| খর্জূরাক্ষোটবাতামমুঞ্জাতাভিষুকাংস্তথা| এতৈর্ঘৃতাঢকে সিদ্ধে ক্ষৌদ্রং শীতে প্রদাপযেত্||৬৬|| সম্যক্ সিদ্ধং চ বিজ্ঞায সুগুপ্তং সন্নিধাপযেত্| কৃতরক্ষাবিধিং চৌক্ষে প্রাশযেদক্ষসম্মিতম্||৬৭|| পাণ্ডুরোগং জ্বরং হিক্কাং স্বরভেদং ভগন্দরম্| পার্শ্বশূলং ক্ষযং কাসং প্লীহানং বাতশোণিতম্||৬৮|| ক্ষতশোষমপস্মারমশ্মরীং শর্করাং তথা| সর্বাঙ্গৈকাঙ্গরোগাংশ্চ মূত্রসঙ্গং চ নাশযেত্||৬৯|| বলবর্ণকরং ধন্যং বলীপলিতনাশনম্| জীবনীযমিদং সর্পির্বৃষ্যং বন্ধ্যাসুতপ্রদম্||৭০||

দ্বে পঞ্চমূলে ইত্যাদৌ বর্ষাভূঃ শ্বেতপুনর্নবা| অবাক্পুষ্পী ‘অধঃপুষ্পী’ ইতি খ্যাতা| ক্ষীরাদীনাং স্নেহসমত্বম্| বীরা বৃদ্ধিঃ| ভব্যাদয ঔত্তরাপথিকাঃ| সুগুপ্তমিতি বাতাদ্যস্পর্শনীযং যথা ভবতি| চৌক্ষে ইতি শুচৌ||৬১-৭০||

Adhikarana 14 (71-75) · Śloka 75

দ্রাক্ষামধু(ধূ)কতোযাভ্যাং সিদ্ধং বা সসিতোপলম্| পিবেদ্ধৃতং তথা ক্ষীরং গুডূচীস্বরসে শৃতম্||৭১|| জীবকর্ষভকৌ মেদামৃষ্যপ্রোক্তাং শতাবরীম্| মধুকং মধুপর্ণীং চ কাকোলীদ্বযমেব চ||৭২|| মুদ্গমাষাখ্যপর্ণিন্যৌ দশমূলং পুনর্নবাম্| বলামৃতাবিদারীশ্চ সাশ্বগন্ধাশ্মভেদকাঃ||৭৩|| এষাং কষাযকল্কাভ্যাং সর্পিস্তৈলং চ সাধযেত্| লাভতশ্চ বসামজ্জধান্বপ্রাতুদবৈষ্কিরম্||৭৪|| চতুর্গুণেন পযসা তত্ সিদ্ধং বাতশোণিতম্| সর্বদেহাশ্রিতং হন্তি ব্যাধীন্ ঘোরাংশ্চ বাতজান্||৭৫||

দ্রাক্ষেত্যাদৌ সসিতোপলমিতি প্রক্ষিপ্তশর্করম্| ঋষ্যপ্রোক্তা অতিবলা| কালা মঞ্জিষ্ঠা| মধুপর্ণী বিকঙ্কতঃ| ধান্বপ্রাতুদবৈষ্কিরমিতি বসামজ্জবিশেষণম্||৭১-৭৫||

Adhikarana 15 (76-87) · Śloka 87

স্থিরা শ্বদংষ্ট্রা বৃহতী সারিবা সশতাবরী| কাশ্মর্যাণ্যাত্মগুপ্তা চ বৃশ্চীরো দ্বে বলে তথা||৭৬|| এষাং ক্বাথে চতুঃক্ষীরং পৃথক্ তৈলং পৃথগ্ঘৃতম্| মেদাশতাবরীযষ্টিজীবন্তীজীবকর্ষভৈঃ||৭৭|| পক্ত্বা মাত্রা ততঃ ক্ষীরত্রিগুণাঽধ্যর্ধশর্করা| খজেন মথিতা পেযা বাতরক্তে ত্রিদোষজে||৭৮|| তৈলং পযঃ শর্করাং চ পাযযেদ্বা সুমূর্চ্ছিতম্| সর্পিস্তৈলসিতাক্ষৌদ্রৈর্মিশ্রং বাঽপি পিবেত্ পযঃ||৭৯|| অংশুমত্যা শৃতঃ প্রস্থঃ পযসো দ্বিসিতোপলঃ| পানে প্রশস্যতে তদ্বত্ পিপ্পলীনাগরৈঃ শৃতঃ||৮০|| বলাশতাবলীরাস্নাদশমূলৈঃ সপীলুভিঃ| শ্যামৈরণ্ডস্থিরাভিশ্চ বাতার্তিঘ্নং শৃতং পযঃ||৮১|| ধারোষ্ণং মূত্রযুক্তং বা ক্ষীরং দোষানুলোমনম্| পিবেদ্বা সত্রিবৃচ্চূর্ণং পিত্তরক্তাবৃতানিলঃ||৮২|| ক্ষীরেণৈরণ্ডতৈলং বা প্রযোগেণ পিবেন্নরঃ| বহুদোষো বিরেকার্থং জীর্ণে ক্ষীরৌদনাশনঃ||৮৩|| কষাযমভযানাং বা ঘৃতভৃষ্টং পিবেন্নরঃ| ক্ষীরানুপানং ত্রিবৃতাচূর্ণং দ্রাক্ষারসেন বা||৮৪|| কাশ্মর্যং ত্রিবৃতাং দ্রাক্ষাং ত্রিফলাং সপরূষকাম্| শৃতং পিবেদ্বিরেকায লবণক্ষৌদ্রসংযুতম্||৮৫|| ত্রিফলাযাঃ কষাযং বা পিবেত্ ক্ষৌদ্রেণ সংযুতম্| ধাত্রীহরিদ্রামুস্তানাং কষাযং বা কফাধিকঃ||৮৬|| যোগৈশ্চ কল্পবিহিতৈরসকৃত্তং বিরেচযেত্| মৃদুভিঃ স্নেহসংযুক্তৈর্জ্ঞাত্বা বাতং মলাবৃতম্||৮৭||

স্থিরেত্যাদৌ চতুঃক্ষীরমিতি চতুর্গুণং ক্ষীরম্| পৃথক্ তৈলং পৃথগ্ঘৃতমিত্যনেন সম্মিশ্রপাকং নিষেধযতি| ক্ষীরত্রিগুণ সার্ধভাগা শর্করা যস্যাং মাত্রাযাং সা ক্ষীর ত্রিগুণাঽধ্যর্ধশর্করা| খজঃপঞ্চাঙ্গুলো হস্তঃ, মন্থানং বা| মাত্রা চাত্র মিলিতযোস্তৈলসর্পিষোর্গ্রাহ্যা| অংশুমতী শালপর্ণী| দ্বিসিতোপল ইতি শর্করাপলদ্বযযুক্তঃ| ইযং চ ক্ষীরমাত্রা উত্তমাগ্নীন্ প্রতি| ধারোষ্ণমিতি দোহকালধারাপতিতমগ্নিযোগাদ্বিনা উষ্ণীভূতম্| মূত্রং চাত্র ক্ষীরসমম্| সত্রিবৃচ্চূর্ণং ধারোষ্ণং ক্ষীরমিতি সম্বন্ধঃ| প্রযোগেণেতি অভ্যাসেন| ক্ষীরপ্রধানো বস্তিঃ ক্ষীরবস্তিঃ||৭৬-৮৭||

Adhikarana 16 (88-95) · Śloka 95

নির্হরেদ্বা মলং তস্য সঘৃতৈঃ ক্ষীরবস্তিভিঃ| ন হি বস্তিসমং কিঞ্চিদ্বাতরক্তচিকিত্সিতম্||৮৮|| বস্তিবঙ্ক্ষণপার্শ্বোরুপর্বাস্থিজঠরার্তিষু| উদাবর্তে চ শস্যন্তে নিরূহাঃ সানুবাসনাঃ||৮৯|| দদ্যাত্তৈলানি চেমানি বস্তিকর্মণি বুদ্ধিমান্| নস্যাভ্যঞ্জনসেকেষু দাহশূলোপশান্তযে||৯০|| মধুযষ্ট্যাস্তুলাযাস্তু কষাযে পাদশেষিতে| তৈলাঢকং সমক্ষীরং পচেত্ কল্কৈঃ পলোন্মিতৈঃ||৯১|| শতপুষ্পাবরীমূর্বাপযস্যাগুরুচন্দনৈঃ| স্থিরাহংসপদীমাংসীদ্বিমেদামধুপর্ণিভিঃ||৯২|| কাকোলীক্ষীরকাকোলীতামলক্যৃদ্ধিপদ্মকৈঃ| জীবকর্ষভজীবন্তীত্বক্পত্রনখবালকৈঃ||৯৩|| প্রপৌণ্ডরীকমঞ্জিষ্ঠাসারিবৈন্দ্রীবিতুন্নকৈঃ| চতুষ্প্রযোগাত্তদ্ধন্তি তৈলং মারুতশোণিতম্||৯৪|| সোপদ্রবং সাঙ্গশূলং সর্বগাত্রানুগং তথা| বাতাসৃক্পিত্তদাহার্তিজ্বরঘ্নং বলবর্ণকৃত্||৯৫|| ইতি মধুপর্ণ্যাদিতৈলম্|

মধুযষ্ট্যা ইত্যাদৌ মধুকতুলাযাং জলদ্রোণং দত্ত্বা তৈলাঢকমানঃ ক্বাথো ভবতি| বরী শতাবরী| হংসপদী স্বনামখ্যাতা| পযস্যা অর্কপুষ্পী| বিতুন্নকং ধান্যকম্| চতুষ্প্রযোগাদিতি পানাভ্যঙ্গবস্তিনস্যপ্রযোগাত্||৮৮-৯৫||

Adhikarana 17 (96-109) · Śloka 109

মধুকস্য শতং দ্রাক্ষা খর্জূরাণি পরূষকম্| মধূকৌদনপাক্যৌ চ প্রস্থং মুঞ্জাতকস্য চ||৯৬|| কাশ্মর্যাঢকমিত্যেতচ্চতুর্দ্রোণে পচেদপাম্| শেষেঽষ্টভাগে পূতে চ তস্মিংস্তৈলাঢকং পচেত্||৯৭|| তথাঽঽমলককাশ্মর্যবিদারীক্ষুরসৈঃ সমৈঃ| চতুর্দ্রোণেন পযসা কল্কং দত্ত্বা পলোন্মিতম্||৯৮|| কদম্বামলকাক্ষোটপদ্মবীজকশেরুকম্| শৃঙ্গাটকং শৃঙ্গবেরং লবাণং পিপ্পলীং সিতাম্||৯৯|| জীবনীযৈশ্চ সংসিদ্ধং ক্ষৌদ্রপ্রস্থেন সংসৃজেত্| নস্যাভ্যঞ্জনপানেষু বস্তৌ চাপি নিযোজযেত্||১০০|| বাতব্যাধিষু সর্বেষু মন্যাস্তম্ভে হনুগ্রহে| সর্বাঙ্গৈকাঙ্গবাতে চ ক্ষতক্ষীণে ক্ষতজ্বরে||১০১|| সুকুমারকমিত্যেতদ্বাতাস্রামযনাশনম্| স্বরবর্ণকরং তৈলমারোগ্যবলপুষ্টিদম্||১০২|| ইতি সুকুমারকতৈলম্| গুডূচীং মধুকং হ্রস্বং পঞ্চমূলং পুনর্নবাম্| রাস্নামেরণ্ডমূলং চ জীবনীযানি লাভতঃ||১০৩|| পলানাং শতকৈর্ভাগৈর্বলাপঞ্চশতং তথা| কোলবিল্বযবান্মাষান্কুলত্থাংশ্চাঢকোন্মিতান্||১০৪|| কাশ্মর্যাণাং সুশুষ্কাণাং দ্রোণং দ্রোণশতেঽম্ভসি| সাধযেজ্জর্জরং ধৌতং চতুর্দ্রোণং চ শেষযেত্||১০৫|| তৈলদ্রোণং পচেত্তেন দত্ত্বা পঞ্চগুণং পযঃ| পিষ্ট্বা ত্রিপলিকং চৈব চন্দনোশীরকেশরম্||১০৬|| পত্রৈলাগুরুকুষ্ঠানি তগরং মধুযষ্টিকাম্| মঞ্জিষ্ঠাষ্টপলং চৈব তত্ সিদ্ধং সার্বযৌগিকম্||১০৭|| বাতরক্তে ক্ষতক্ষীণে ভারার্তে ক্ষীণরেতসি| বেপনাক্ষেপভগ্নানাং সর্বাঙ্গৈকাঙ্গরোগিণাম্||১০৮|| যোনিদোষমপস্মারমুন্মাদং খঞ্জপঙ্গুতাম্| হন্যাত্ প্রসবনং চৈতত্তৈলাগ্র্যমমৃতাহ্বযম্||১০৯|| ইত্যমৃতাদ্যং তৈলম্|

গুডূচীত্যাদৌ গুডূচ্যাদীনাং প্রত্যেকং শতপলত্বং, কোলাদীনাং প্রত্যেকমাঢকমানত্বম্| কাশ্মর্যাণামিতি গঙ্গারীফলানাম্| সার্বযৌগিকমিতি পানাদিচতুষ্প্রযোগে যৌগিকম্| প্রসবনমিতি প্রসূতিকারকম্||৯৬-১০৯||

Adhikarana 18 (110-113) · Śloka 113

পদ্মবেতসযষ্ট্যাহ্বফেনিলাপদ্মকোত্পলৈঃ| পৃথক্পঞ্চপলৈর্দর্ভবলাচন্দনকিংশুকৈঃ||১১০|| জলে শৃতৈঃ পচেত্তৈলপ্রস্থং সৌবীরসম্মিতম্| লোধ্রকালীযকোশীরজীবকর্ষভকেশরৈঃ||১১১|| মদযন্তীলতাপত্রপদ্মকেশরপদ্মকৈঃ| প্রপৌণ্ডরীককাশ্মর্যমাংসীমেদাপ্রিযঙ্গুভিঃ||১১২|| কুঙ্কুমস্য পলার্ধেন মঞ্জিষ্ঠাযাঃ পলেন চ| মহাপদ্মমিদং তৈলং বাতাসৃগ্জ্বরনাশনম্||১১৩|| ইতি মহাপদ্মং তৈলম্|

পদ্মবেতসেত্যাদৌ ফেনিলা উপোদিকা| সৌবীরসম্মিতমিতি স্নেহসমং সৌবীরকম্| লোধ্রাদিভিঃ কার্ষিকৈঃ, কুঙ্কুমং চ দ্বিকার্ষিকম্||১১০-১১৩||

Adhikarana 19 (114) · Śloka 115

পদ্মকোশীরযষ্ট্যাহ্বরজনীক্বাথসাধিতম্| স্যাত্ পিষ্টৈঃ সর্জমঞ্জিষ্ঠাবীরাকাকোলিচন্দনৈঃ||১১৪|| খুড্ডাকপদ্মকমিদং তৈলং বাতাস্রদাহনুত্|১১৫| ইতি খুড্ডাকপদ্মকং তৈলম্|

খুড্ডাকপদ্মকমিতি অল্পপদ্মকসঞ্জ্ঞং; সঞ্জ্ঞা চৈষা বৈদ্যব্যবহারার্থা||১১৪||-

Adhikarana 20 (115-118) · Śloka 118

শতেন যষ্টিমধুকাত্ সাধ্যং দশগুণং পযঃ||১১৫|| তস্মিংস্তৈলে চতুর্দ্রোণে মধুকস্য পলেন তু| সিদ্ধং মধুককাশ্মর্যসৈর্বা বাতরক্তনুত্||১১৬|| মধুপর্ণ্যাঃ পলং পিষ্ট্বা তৈলপ্রস্থং চতুর্গুণে| ক্ষীরে সাধ্যং শতং কৃত্বা তদেবং মধুকাচ্ছতে||১১৭|| সিদ্ধং দেযং ত্রিদোষে স্যাদ্বাতাস্রে শ্বাসকাসনুত্| হৃত্পাণ্ডুরোগবীসর্পকামলাদাহনাশনম্||১১৮|| ইতি শতপাকং মধুকতৈলম্|

শতেন যষ্টিমধুকাদিত্যাদৌ যষ্টীমধুপলশতং দশগুণেন ক্ষীরেণ সাধ্যং, তেন চতুর্ভাগস্থিতেন ক্ষীরেণ তৈলং পক্তব্যম্| তদেবং মধুকাচ্ছতে সিদ্ধমিতি শতধাপাকেন মধুকপলশতাত্ সিদ্ধমিত্যর্থঃ| অনেন চ মধুকপলশতসাধনোপদেশেন শতং কৃত্বেত্যত্র শতশব্দস্য বিপুলবাচিতাং নিষেণযতি||১১৫-১১৮||

Adhikarana 21 (119-120) · Śloka 120

বলাকষাযকল্কাভ্যাং তৈলং ক্ষীরসমং পচেত্| সহস্রং শতবারং বা বাতাসৃগ্বাতরোগনুত্||১১৯|| রসাযনমিদং শ্রেষ্ঠমিন্দ্রিযাণাং প্রসাদনম্| জীবনং বৃংহণং স্বর্যং শুক্রাসৃগ্দোষনাশনম্||১২০|| ইতি সহস্রপাকং শতপাকং বা বলাতৈলম্|

বলাকষাযেত্যাদিনোক্তশতসহস্রপাকে অত্যর্থপাকাত্ স্নেহক্ষযং পশ্যন্তঃ শতগুণেন সহস্রগুণেন বা দ্রবেণৈকদৈব পাকং ব্যাখ্যানযন্তি; কিন্তু তাবতী স্নেহমাত্রাঽত্র পক্তব্যা যা পাকোপক্ষযেণ নিঃশেষা ন ভবতি, ক্ষীরং চাত্র স্নেহবর্ধকমস্তি, তেন যথাশ্রুতমেবাত্রাচার্যবচনং প্রমাণমিতি পশ্যামঃ| কিঞ্চ প্রত্যাসন্নে এব পাকে সদ্রবে স্নেহকল্কোদ্ধরণমত্র কর্তব্যং, তেন স্নেহাপেপক্ষযৈঽপি মাত্রাঽনেন ভবতি||১১৯-১২০||

Adhikarana 22 (121-122) · Śloka 122

গুডূচীরসদুগ্ধাভ্যাং তৈলং দ্রাক্ষারসেন বা| সিদ্ধং মধুককাশ্মর্যরসৈর্বা বাতরক্তনুত্||১২১|| আরনালাঢকে তৈলং পাদসর্জরসং শৃতম্| প্রভূতে খজিতং তোযে জ্বরদাহার্তিনুত্ পরম্||১২২||

গুডূচীত্যাদৌ দ্রবাত্ পাদিকঃ স্নেহ ইতি ন্যাযাত্ প্রস্থং তৈলস্য ভবতি| খজিতমিতি মথিতম্||১২১-১২২||

Adhikarana 23 (123) · Śloka 123

সমধূচ্ছিষ্টমাঞ্জিষ্ঠং সসর্জরসসারিবম্| পিণ্ডতৈলং তদভ্যঙ্গাদ্বাতরক্তরুজাপহম্||১২৩|| ইতি পিণ্ডতৈলম্|

সমধূচ্ছিষ্টেত্যাদৌ মধুচ্ছিষ্টাদীনি কল্কঃ, জলং চ দ্রবং দেযম্| পিণ্ডতৈলভাষযা চাত্র বস্ত্রপূতমেবৈতত্তেলং কর্তব্যমিত্যাহুঃ| কিন্তু, আরনালাঢকসাধ্যতৈলে এব সর্জরসস্থানে মধূচ্ছিষ্টাদীনাং প্রক্ষেপাত্ পিণ্ডতৈলমনেনোচ্যত ইতি জতূকর্ণবচনাদুন্নীযতে; উক্তং হি তত্র- “কাঞ্জিকসর্জরসশৃতং খজিতং বহুনা জলেন সিক্থকসর্জরসৈর্যুক্তমভ্যঞ্জনম্” ইতি||১২৩||

Adhikarana 24 (124-155) · Śloka 155

দশমূলশৃতং ক্ষীরং সদ্যঃ শূলনিবারণম্| পরিষেকোঽনিলপ্রাযে তদ্বত্ কোষ্ণেন সর্পিষা||১২৪|| স্নেহৈর্মধুরসিদ্ধৈর্বা চতুর্ভিঃ পরিষেচযেত্| স্তম্ভাক্ষেপকশূলার্তং কোষ্ণৈর্দাহে তু শীতলৈঃ||১২৫|| তদ্বদ্গব্যাবিকচ্ছাগৈঃ ক্ষীরৈস্তৈলবিমিশ্রিতৈঃ| ক্বাথৈর্বা জীবনীযানাং পঞ্চমূলস্য বা ভিষক্||১২৬|| দ্রাক্ষেক্ষুরসমদ্যানি দধিমস্ত্বম্লকাঞ্জিকম্| সেকার্থে তণ্ডুলক্ষৌদ্রশর্করাম্বু চ শস্যতে||১২৭|| কুমুদোত্পলপদ্মাদ্যৈর্মণিহারৈঃ সচন্দনৈঃ| শীততোযানুগৈর্দাহে প্রোক্ষণং স্পর্শনং হিতম্||১২৮|| চন্দ্রপাদাম্বুসংসিক্তে ক্ষৌমপদ্মদলচ্ছদে| শযনে পুলিনস্পর্শশীতমারুতবীজিতে||১২৯|| চন্দনার্দ্রস্তনকরাঃ প্রিযা নার্যঃ প্রিযংবদাঃ| স্পর্শশীতাঃ সুখস্পর্শা ঘ্নন্তি দাহং রুজং ক্লমম্||১৩০|| সরাগে সরুজে দাহে রক্তং বিস্রাব্য লেপযেত্| মধুকাশ্বত্থত্বঙ্মাংসীবীরোদুম্বরশাদ্বলৈঃ||১৩১|| জলজৈর্যবচূর্ণৈর্বা সযষ্ট্যাহ্বপযোঘৃতৈঃ| সর্পিষা জীবনীযৈর্বা পিষ্টৈর্লেপোঽর্তিদাহনুত্||১৩২|| তিলাঃ প্রিযালো মধুকং বিসং মূলং চ বেতসাত্| আজেন পযসা পিষ্টঃ প্রলেপো দাহরাগনুত্||১৩৩|| প্রপৌণ্ডরীকমঞ্জিষ্ঠাদার্বীমধুকচন্দনৈঃ| সিতোপলৈরকাসক্তুমসূরোশীরপদ্মকৈঃ||১৩৪|| লেপো রুগ্দাহবীসর্পরাগশোফনিবারণঃ| পিত্তরক্তোত্তরে ত্বেতে, লেপান্ বাতোত্তরে শৃণু||১৩৫|| বাতঘ্নৈঃ সাধিতঃ স্নিগ্ধঃ সক্ষীরমুদ্গপাযসঃ | তিলসর্ষপপিণ্ডৈর্বাঽপ্যুপনাহো রুজাপহঃ||১৩৬|| ঔদকপ্রসহানূপবেশবারাঃ সুসংস্কৃতাঃ| জীবনীযৌষধৈঃ স্নেহযুক্তাঃ স্যুরুপনাহনে||১৩৭|| স্তম্ভতোদরুগাযামশোথাঙ্গগ্রহনাশনাঃ| জীবনীযৌষধৈঃ সিদ্ধা সপযস্কা বসাঽপি বা||১৩৮|| ঘৃতং সহচরান্মূলং জীবন্তী চ্ছাগলং পযঃ| লেপঃ পিষ্টাস্তিলাস্তদ্বদ্ভৃষ্টাঃ পযসি নির্বৃতাঃ||১৩৯|| ক্ষীরপিষ্টমুমালেপমেরণ্ডস্য ফলানি চ| কুর্যাচ্ছূলনিবৃত্ত্যর্থং শতাহ্বামনিলেঽধিকে||১৪০|| সমূলাগ্রচ্ছদৈরণ্ডক্বাথে দ্বিপ্রাস্থিকং পৃথক্| ঘৃতং তৈলং বসা মজ্জা চানূপমৃগপক্ষিণাম্||১৪১|| কল্কার্থে জীবনীযানি গব্যং ক্ষীরমথাজকম্| হরিদ্রোত্পলকুষ্ঠৈলাশতাহ্বাশ্বহনচ্ছদান্ ||১৪২|| বিল্বমাত্রান্ পৃথক্ পুষ্পং কাকুভং চাপি সাধযেত্| মধূচ্ছিষ্টপলান্যষ্টৌ দদ্যাচ্ছীতেঽবতারিতে||১৪৩|| শূলেনৈষোঽর্দিতাঙ্গানাং লেপঃ সন্ধিগতেঽনিলে| বাতরক্তে চ্যুতে ভগ্নে খঞ্জে কুব্জে চ শস্যতে||১৪৪|| শোফগৌরবকণ্ড্বাদ্যৈর্যুক্তে ত্বস্মিন্ কফোত্তরে| মূত্রক্ষারসুরাপক্বং ঘৃতমভ্যঞ্জনে হিতম্||১৪৫|| পদ্মকং ত্বক্ সমধুকং সারিবা চেতি তৈর্ঘৃতম্| সিদ্ধং সমধুশুক্তং স্যাত্ সেকাভ্যঙ্গে কফোত্তরে||১৪৬|| ক্ষারস্তৈলং গবাং মূত্রং জলং চ কটুকৈঃ শৃতম্| পরিষেকে প্রশংসন্তি বাতরক্তে কফোত্তরে||১৪৭|| লেপঃ সর্ষপনিম্বার্কহিংস্রাক্ষীরতিলৈর্হিতঃ| শ্রেষ্ঠঃ সিদ্ধঃ কপিত্থত্বগ্ঘৃতক্ষীরৈঃ সসক্তুভিঃ||১৪৮|| গৃহধূমো বচা কুষ্ঠং শতাহ্বা রজনীদ্বযম্| প্রলেপঃ শূলনুদ্বাতরক্তে বাতকফোত্তরে||১৪৯|| তগরং ত্বক্ শতাহ্বৈলা কুষ্ঠং মুস্তং হরেণুকা| দারু ব্যাঘ্রনখং চাম্লপিষ্টং বাতকফাস্রনুত্||১৫০|| মধুশিগ্রোর্হিতং তদ্বদ্বীজং ধান্যাম্লসংযুতম্| মুহূর্তং লিপ্তমম্লৈশ্চ সিঞ্চেদ্বাতকফোত্তরম্||১৫১|| ত্রিফলাব্যোষপত্রৈলাত্বক্ক্ষীরীচিত্রকং বচাম্| বিডঙ্গং পিপ্পলীমূলং রোমশং বৃষকত্বচম্||১৫২|| ঋদ্ধিং তামলকীং চব্যং সমভাগানি পেষযেত্| কল্যং লিপ্তমযস্পাত্রে মধ্যাহ্নে ভক্ষযেত্ততঃ||১৫৩|| বর্জযেদ্দধিশুক্তানি ক্ষারং বৈরোধিকানি চ| বাতাস্রে সর্বদোষেঽপি হিতং শূলার্দিতে পরম্||১৫৪|| বুদ্ধ্বা স্থানবিশেষাংশ্চ দোষাণাং চ বলাবলম্| চিকিত্সিতমিদং কুর্যাদূহাপোহবিকল্পবিত্||১৫৫||

মধুরসিদ্ধৈরিতি জীবনীযসিদ্ধস্নেহৈঃ| তণ্ডুলেত্যাদৌ প্রত্যেকং ত্রিভিরম্বুশব্দঃ সম্বধ্যতে| শীততোযানুগৈরিতি শীততোযসিক্তৈঃ| চন্দ্রপাদাম্বুসংসিক্তে ইতি তুষারজলসিক্তৈ| পুলিনং নদীতটঃ, পুলিনস্পর্শেন শীতো মারুতঃ, তেন বীজিতে শযনে, ‘শযনস্য’ ইতি শেষঃ| এরকা হোগ্গলঃ| পযসি নির্বৃতা ইতি ক্ষীরে নির্বাপিতাঃ| উমা অতসী| অগ্রচ্ছদাঃ তরুণপত্রাণি | মূত্রক্ষারেত্যাদৌ ক্ষারঃ ক্ষারোদকম্| অম্লৈরিতি কাঞ্জিকাদিভিঃ| রোমশং কাসীসম্| কল্যমিতি প্রাতঃ| অবস্থাকর্তব্যমাহ- বুদ্ধ্বেত্যাদি| ঊহাপোহবিকল্পবিদিতি পূর্বোক্তচিকিত্সিতস্য ঊহাপোহবিকল্পজ্ঞঃ||১২৪-১৫৫||

Adhikarana 25 (156-159) · Śloka 159

কুপিতে মার্গসংরোধান্মেদসো বা কফস্য বা| অতিবৃদ্ধ্যাঽনিলে নাদৌ শস্তং স্নেহনবৃংহণম্||১৫৬|| ব্যাযামশোধনারিষ্টমূত্রপানৈর্বিরেচনৈঃ| তক্রাভযাপ্রযোগৈশ্চ ক্ষপযেত্ কফমেদসী||১৫৭|| বোধবৃক্ষকষাযং তু প্রপিবেন্মধুনা সহ| বাতরক্তং জযত্যাশু ত্রিদোষমপি দারুণম্||১৫৮|| পুরাণযবগোধূমসীধ্বরিষ্টসুরাসবৈঃ| শিলাজতুপ্রযোগৈশ্চ গুগ্গুলোর্মাক্ষিকস্য চ||১৫৯||

কুপিত ইত্যাদি| মেদসঃ কফস্য বা অতিবৃদ্ধ্যা কৃতাত্ মার্গসংরোধাদনিলে কুপিতে সতি আদৌ স্নেহনং তথা বৃংহণং চ ন শস্তমিতি শ্লোকার্থঃ| অত্র স্নেহনবৃংহণনিষেধে সতি কর্তব্যমাহ- ব্যাযামেত্যাদিনা মাক্ষিকস্য চেত্যন্তেন||১৫৬-১৫৯||

Adhikarana 26 (160) · Śloka 160

গম্ভীরে রক্তমাক্রান্তং স্যাচ্চেত্তদ্বাতবজ্জযেত্| পশ্চাদ্বাতে ক্রিযাং কুর্যাদ্বাতরক্তপ্রসাদনীম্||১৬০||

গম্ভীরে ইতি অবগাঢে অনুত্তানে বাতরক্তে| রক্তমাক্রান্তমিতি অভিভূতং বাযুনা বাতবজ্জযেদিতি| এতত্ক্রিযোত্তরকালীনং কর্তব্যমাহ- পশ্চাদ্বাতেত্যাদি| কফমেদোবৃতে এব নির্জিতকফমেদসি বাতে বাতরক্তপ্রসাদিনী ক্রিযা অত্রৈবোক্তস্নেহপ্রযোগাদিকা কার্যা; বাতবিকারত্বাদ্ বাতব্যাধিচিকিত্সিতেন জযেত্| এতচ্চ বাতেন রক্তাভিভবনং গম্ভীর এব বাতরক্তে প্রাযো ভবতীতি দর্শযিতুং ‘গম্ভীরে’ ইতি কৃতম্| গম্ভীরানুগতে হি বাতরক্তে রক্তং বহু নাস্তি, যতো রক্তস্য দ্বিতীযা রক্তধরা ত্বক্ স্থানং; তেনোত্তানে এব রক্তং বলবত্, বাহ্যস্থানত্বাদ্রক্তস্য||১৬০||

Adhikarana 27 (161-162) · Śloka 162

রক্তপিত্তাতিবৃদ্ধ্যা তু পাকমাশু নিযচ্ছতি| ভিন্নং স্রবতি বা রক্তং বিদগ্ধং পূযমেব বা||১৬১|| তযোঃ ক্রিযা বিধাতব্যা ভেদশোধনরোপণৈঃ | কুর্যাদুপদ্রবাণাং চ ক্রিযাং স্বাং স্বাচ্চিকিত্সিতাত্||১৬২||

আবস্থিকং বিধিমাহ- রক্তেত্যাদি| রক্তবৃদ্ধ্যা পিত্তবৃদ্ধ্যা চেতি রক্তপিত্তাতিবৃদ্ধ্যা| পাকং নিযচ্ছতি ‘বাতরক্তম্’ ইতি শেষঃ| তযোরিত্যাদি বৃদ্ধপিত্তবৃদ্ধরক্তকৃতপাকযোর্বাতরক্তযোঃ| উপদ্রবচিকিত্সামতিদিশন্নাহ- কুর্যাদিত্যাদি||১৬১-১৬২||

Adhikarana 28 (163-165) · Śloka 165

তত্র শ্লোকাঃ- হেতুঃ স্থানানি মূলং চ যস্মাত্ প্রাযেণ সন্ধিষু| কুপ্যতি প্রাক্ চ যদ্রূপং দ্বিবিধস্য চ লক্ষণম্||১৬৩|| পৃথগ্ভিন্নস্য লিঙ্গং চ দোষাধিক্যমুপদ্রবাঃ| সাধ্যং যাপ্যমসাধ্যং চ ক্রিযা সাধ্যস্য চাখিলা||১৬৪|| বাতরক্তস্য নির্দিষ্টা সমাসব্যাসতস্তথা| মহর্ষিণাঽগ্নিবেশায তথৈবাবস্থিকী ক্রিযা||১৬৫||

হেতুঃ স্থানানীত্যাদিসঙ্গ্রহে দোষাধিক্যমুপদ্রবাঃ সাধ্যং যাপ্যমসাধ্যং চেতি অননুক্রমেণ সঙ্গ্রহং করোতি, উপদ্রবাণামভাবসদ্ভাবস্তোকভাবৈঃ সাধ্যত্বাসাধ্যত্বযাপ্যত্বখ্যাপনার্থম্||১৬৩-১৬৫||

Adhikarana puShpikA · Śloka 29

ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে চিকিত্সিতস্থানে বাতশোণিতচিকিত্সিতং নামৈকোনত্রিংশোঽধ্যাযঃ||২৯||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং চিকিত্সাস্থানে বাতরক্তচিকিত্সিতং নামৈকোনত্রিংশোঽধ্যাযঃ||২৯||