Adhikarana 1 (1-2) · Śloka 2
অথাতঃ পন্নরূপীযমিন্দ্রিযং ব্যাখ্যাস্যামঃ||১||
ইতি হ স্মাহ ভগবানাত্রেযঃ||২||
View original
अथातः पन्नरूपीयमिन्द्रियं व्याख्यास्यामः||१||
इति ह स्माह भगवानात्रेयः||२||
ব্যাধিরূপানন্তরং বেদনোপদ্রবৌ উদ্দিষ্টৌ, তৌ চ পূর্বাধ্যায এব “শূলাটোপান্ত্রকূজাশ্চ” (ইং.অ.৫) ইত্যাদিনা তথা অন্যত্র “আনাহশ্চাতিসারশ্চ” (ইং.অ.৬) ইত্যাদিনা রিষ্টরূপতযা উক্তাবেবেতি কৃত্বা ছাযাপ্রতিচ্ছাযারূপারিষ্টস্য ক্রমপ্রাপ্তস্যাভিধাযকং পন্নরূপীযমুচ্যতে| পন্নরূপামধিকৃত্য কৃতং পন্নরূপীযম্||১-২||
Adhikarana 2 (3) · Śloka 3
দৃষ্ট্যাং যস্য বিজানীযাত্ পন্নরূপাং কুমারিকাম্|
প্রতিচ্ছাযামযীমক্ষ্ণোর্নৈনমিচ্ছেচ্চিকিত্সিতুম্||৩||
View original
दृष्ट्यां यस्य विजानीयात् पन्नरूपां कुमारिकाम्|
प्रतिच्छायामयीमक्ष्णोर्नैनमिच्छेच्चिकित्सितुम्||३||
পন্নরূপামিতি নষ্টরূপাম্| কুমারিকামিতি পুরুষান্তরনযনগতাং কুমারিকাং; কিংবা, আতুরনযনগতামেব| যদুক্তং হারীতে- “অদর্শনমসঙ্ঘাতে নেত্রে নষ্টকুমারিকে” ইতি| প্রতিচ্ছাযামযীমিতি প্রতিচ্ছাযারূপাম্||৩||
Adhikarana 3 (4) · Śloka 4
জ্যোত্স্নাযামাতপে দীপে সলিলাদর্শযোরপি|
অঙ্গেষু বিকৃতা যস্য চ্ছাযা প্রেতস্তথৈব সঃ||৪||
View original
ज्योत्स्नायामातपे दीपे सलिलादर्शयोरपि|
अङ्गेषु विकृता यस्य च्छाया प्रेतस्तथैव सः||४||
অন্যত্রাপি ছাযাবিকৃতিমাহ- জ্যোত্স্নেত্যাদি| অঙ্গেষু বিকৃতেতি শিরোবাহুজঙ্ঘাদিষু ছাযাধিকরণভূতেষু ভবন্তী প্রতিচ্ছাযা যস্য বিকৃতা ভবতীত্যর্থঃ| তেন ব্যস্তসমস্তাঙ্গবিকৃতাঽপি ছাযা গৃহ্যতে| অন্যে তু- বিভক্তিবিপরিণামাদঙ্গানামিতি ব্যাখ্যানযন্তি; তথা চ সুগম এবার্থঃ||৪||
Adhikarana 4 (5-6) · Śloka 6
ছিন্না ভিন্নাঽঽকুলা চ্ছাযা হীনা বাঽপ্যধিকাঽপি বা|
নষ্টা তন্বী দ্বিধা চ্ছিন্না বিকৃতা বিশিরা চ যা||৫||
এতাশ্চান্যাশ্চ যাঃ কাশ্চিত্ প্রতিচ্ছাযা বিগর্হিতাঃ|
সর্বা মুমূর্ষতাং জ্ঞেযা ন চেল্লক্ষ্যনিমিত্তজাঃ||৬||
View original
छिन्ना भिन्नाऽऽकुला च्छाया हीना वाऽप्यधिकाऽपि वा|
नष्टा तन्वी द्विधा च्छिन्ना विकृता विशिरा च या||५||
एताश्चान्याश्च याः काश्चित् प्रतिच्छाया विगर्हिताः|
सर्वा मुमूर्षतां ज्ञेया न चेल्लक्ष्यनिमित्तजाः||६||
এতানেব ছাযাবিকৃতিভেদানাহ- ছিন্নেত্যাদি| আকুলেতি অনিশ্চিতপ্রতিবিম্বা| বিকৃতা বিকৃতানুকারিণী | যদ্যপ্যরিষ্টাধিকারেঽনিমিত্তমেব যদ্ভবতি তদরিষ্টমুক্তং, তথাঽপি পুনঃ স্পষ্টার্থং ‘ন চেল্লক্ষ্যনিমিত্তজাঃ’ ইত্যুক্তম্||৫-৬||
Adhikarana 5 (7) · Śloka 7
সংস্থানেন প্রমাণেন বর্ণেন প্রভযা তথা|
ছাযা বিবর্ততে যস্য স্বস্থোঽপি প্রেত এব সঃ||৭||
View original
संस्थानेन प्रमाणेन वर्णेन प्रभया तथा|
छाया विवर्तते यस्य स्वस्थोऽपि प्रेत एव सः||७||
সম্প্রতি ছাযারূপং সামান্যেন দর্শযঞ্ছাযাশ্রযারিষ্টমাহ- সংস্থানেনেত্যাদি| এতচ্চ ছাযাপ্রতিচ্ছাযযোঃ সমানং সূত্রম্| তত্র সংস্থানেন প্রমাণেন চ প্রতিচ্ছাযাঃ স্বরূপকথনং, তথা বর্ণেন প্রভযা চ ছাযাযাঃ স্বরূপকথনম্| তত্র সংস্থানেন প্রমাণেন চ সদৃশী ছাযা প্রতিচ্ছাযা জ্ঞেযা; বর্ণেন প্রভযা চ লক্ষিতা বর্ণপ্রভাশ্রযাঽগ্রে বক্ষ্যমাণা পঞ্চবিধা চ্ছাযা জ্ঞেযা| অত্র যত্তদোর্নিত্যাভিসম্বন্ধাত্ ‘সা’ ইত্যধ্যাহার্যতে| তেন সংস্থানাদিভির্যা ছাযা প্রতিচ্ছাযারূপা, সা যস্য বিবর্ততে অন্যথা ভবতি, স প্রেত এবেতি যোজনা||৭||
Adhikarana 6 (8-9) · Śloka 9
সংস্থানমাকৃতির্জ্ঞেযা সুষমা বিষমা চ সা|
মধ্যমল্পং মহচ্চোক্তং প্রমাণং ত্রিবিধং নৃণাম্||৮||
প্রতিপ্রমাণসংস্থানা জলাদর্শাতপাদিষু|
ছাযা যা সা প্রতিচ্ছাযা চ্ছাযা বর্ণপ্রভাশ্রযা||৯||
View original
संस्थानमाकृतिर्ज्ञेया सुषमा विषमा च सा|
मध्यमल्पं महच्चोक्तं प्रमाणं त्रिविधं नृणाम्||८||
प्रतिप्रमाणसंस्थाना जलादर्शातपादिषु|
छाया या सा प्रतिच्छाया च्छाया वर्णप्रभाश्रया||९||
প্রতিচ্ছাযাকারণভূতে সংস্থানপ্রমাণে এব বিবৃণোতি- সংস্থানমিত্যাদি| আকৃতিঃ আকারঃ| প্রতীত্যাদি প্রতিচ্ছাযাবিবরণং, ‘ছাযা বর্ণপ্রভাশ্রযা’ ইত্যাদি তু ছাযাবিবরণং ভবিষ্যতি| প্রতিপ্রমাণসংস্থানেত্যত্র প্রতি সাদৃশ্যে; তেন প্রমাণসদৃশী, সংস্থানসদৃশী চ| প্রমাণসংস্থানসদৃশতযা জলাদিষু যা ছাযা, সা প্রতিচ্ছাযা| ছাযা তু যা পঞ্চবিধা সা বর্ণপ্রভাশ্রযা বর্ণপ্রভাসহচরিতোপলভ্যত ইত্যর্থঃ||৮-৯||
Adhikarana 7 (10-13) · Śloka 13
খাদীনাং পঞ্চ পঞ্চানাং ছাযা বিবিধলক্ষণাঃ|
নাভসী নির্মলা নীলা সস্নেহা সপ্রভেব চ||১০||
রূক্ষা শ্যাবারুণা যা তু বাযবী সা হতপ্রভা|
বিশুদ্ধরক্তা ত্বাগ্নেযী দীপ্তাভা দর্শনপ্রিযা||১১||
শুদ্ধবৈদূর্যবিমলা সুস্নিগ্ধা চাম্ভসী মতা|
স্থিরা স্নিগ্ধা ঘনা শ্লক্ষ্ণা শ্যামা শ্বেতা চ পার্থিবী||১২||
বাযবী গর্হিতা ত্বাসাং চতস্রঃ স্যুঃ সুখোদযাঃ |
বাযবী তু বিনাশায ক্লেশায মহতেঽপি বা||১৩||
View original
खादीनां पञ्च पञ्चानां छाया विविधलक्षणाः|
नाभसी निर्मला नीला सस्नेहा सप्रभेव च||१०||
रूक्षा श्यावारुणा या तु वायवी सा हतप्रभा|
विशुद्धरक्ता त्वाग्नेयी दीप्ताभा दर्शनप्रिया||११||
शुद्धवैदूर्यविमला सुस्निग्धा चाम्भसी मता|
स्थिरा स्निग्धा घना श्लक्ष्णा श्यामा श्वेता च पार्थिवी||१२||
वायवी गर्हिता त्वासां चतस्रः स्युः सुखोदयाः |
वायवी तु विनाशाय क्लेशाय महतेऽपि वा||१३||
খাদীনামিত্যাদিনা ছাযাং বিভজতে| সপ্রভেতি দীপ্তাভা| বাযবী গর্হিতেতি বাযবী রিষ্টায প্রাযো ভবতি| যস্য জন্মপ্রভৃতি বাযবী, স চাপি প্রভূতক্লেশভাগ্ভবতীত্যাহ- বাযবীত্যাদি| বিনাশাযেতি অকস্মাদুত্পন্না বিনাশায, সহজা তু বাযবী ক্লেশাযেতি জ্ঞেযম্||১০-১৩||
Adhikarana 8 (14-15) · Śloka 15
স্যাত্তৈজসী প্রভা সর্বা সা তু সপ্তবিধা স্মৃতা|
রক্তা পীতা সিতা শ্যাবা হরিতা পাণ্ডুরাঽসিতা||১৪||
তাসাং যাঃ স্যুর্বিকাসিন্যঃ স্নিগ্ধাশ্চ বিপুলাশ্চ যাঃ|
তাঃ শুভা রূক্ষমলিনাঃ সঙ্ক্ষিপ্তাশ্চাশুভোদযাঃ ||১৫||
View original
स्यात्तैजसी प्रभा सर्वा सा तु सप्तविधा स्मृता|
रक्ता पीता सिता श्यावा हरिता पाण्डुराऽसिता||१४||
तासां याः स्युर्विकासिन्यः स्निग्धाश्च विपुलाश्च याः|
ताः शुभा रूक्षमलिनाः सङ्क्षिप्ताश्चाशुभोदयाः ||१५||
সম্প্রতি ছাযাশ্রযত্বেন বর্ণভেদ উক্তঃ, তত্র বর্ণভেদাস্তদরিষ্টং চ প্রথমাধ্যায এবোক্তং; প্রভাযাস্তু ভেদং রিষ্টং চাহ- স্যাত্তৈজসীত্যাদি| প্রভা চ যদ্যপি প্রথমাধ্যাযে সঙ্গ্রহে নোক্তা; তথাঽপি তত্র চ্ছাযাশ্রযত্বেন বর্ণভেদা উক্তাঃ, তত্র বর্ণভেদাস্তদরিষ্টং চ প্রথমাধ্যাযে সঙ্গ্রহেণোক্তং, ছাযাশ্রযত্বেন তত্র প্রভাঽপি সূচিতেতি জ্ঞেযম্| অশুভোদযা ইতি অকস্মাদুত্পাদে মরণোদযাঃ, সহজোত্পাদে তু বহুদুঃখরূপা অশুভোদযা ইতি জ্ঞেযম্||১৪-১৫||
Adhikarana 9 (16-17) · Śloka 17
বর্ণমাক্রামতি চ্ছাযা ভাস্তু বর্ণপ্রকাশিনী|
আসন্না লক্ষ্যতে চ্ছাযা ভাঃ প্রকৃষ্টা প্রকাশতে||১৬||
নাচ্ছাযো নাপ্রভঃ কশ্চিদ্বিশেষাশ্চিহ্নযন্তি তু|
নৃণাং শুভাশুভোত্পত্তিং কালে ছাযাপ্রভাশ্রযাঃ||১৭||
View original
वर्णमाक्रामति च्छाया भास्तु वर्णप्रकाशिनी|
आसन्ना लक्ष्यते च्छाया भाः प्रकृष्टा प्रकाशते||१६||
नाच्छायो नाप्रभः कश्चिद्विशेषाश्चिह्नयन्ति तु|
नृणां शुभाशुभोत्पत्तिं काले छायाप्रभाश्रयाः||१७||
প্রভাচ্ছাযযোর্দুর্লক্ষ্যত্বেন ভেদকং লক্ষণমাহ- বর্ণমিত্যাদি| বর্ণমাক্রামতীতি ছাযাক্রান্তো বর্ণো নোপলভ্যতে সম্যক্| আসন্না লক্ষ্যতে চ্ছাযা, যথা- চিত্রগতা ছাযা প্রত্যাসন্নৈব লক্ষ্যতে| ভাঃ প্রকৃষ্টা প্রকাশতে; যথা- মণিমৌক্তিকাদীনাং প্রভা দূরাদুপলভ্যত ইত্যর্থঃ| বিশেষা ইতি ছাযাপ্রভযোঃ শুভাশুভরূপবিশেষাঃ| চিহ্নযন্তীতি গমযন্তি| কালে ইতি পরিপাককালে||১৬-১৭||
Adhikarana 10 (18-20) · Śloka 20
কামলাঽক্ষ্ণোর্মুখং পূর্ণং শঙ্খযোর্মুক্তমাংসতা|
সন্ত্রাসশ্চোষ্ণগাত্রত্বং যস্য তং পরিবর্জযেত্||১৮||
উত্থাপ্যমানঃ শযনাত্ প্রমোহং যাতি যো নরঃ|
মুহুর্মুহুর্ন সপ্তাহং স জীবতি বিকত্থনঃ ||১৯||
সংসৃষ্টা ব্যাধযো যস্য প্রতিলোমানুলোমগাঃ|
ব্যাপন্না গ্রহণী প্রাযঃ সোঽর্ধমাসং ন জীবতি||২০||
View original
कामलाऽक्ष्णोर्मुखं पूर्णं शङ्खयोर्मुक्तमांसता|
सन्त्रासश्चोष्णगात्रत्वं यस्य तं परिवर्जयेत्||१८||
उत्थाप्यमानः शयनात् प्रमोहं याति यो नरः|
मुहुर्मुहुर्न सप्ताहं स जीवति विकत्थनः ||१९||
संसृष्टा व्याधयो यस्य प्रतिलोमानुलोमगाः|
व्यापन्ना ग्रहणी प्रायः सोऽर्धमासं न जीवति||२०||
কামলাঽক্ষ্ণোরিতি কামলিন ইব পীতাক্ষত্বম্| বিকত্থন ইতি নিন্দাপরঃ| সংসৃষ্টা ইতি পরস্পরসম্বদ্ধাঃ, কিংবা সংসৃষ্টদোষজন্যাঃ| প্রতিলোমানুলোমগা ইতি অধোমার্গোর্ধ্বমার্গগতাঃ| ব্যাপন্না গ্রহণীতি চ্ছেদঃ; কিংবা, ব্যাপন্না গ্রহণী যস্য স ‘ব্যাপন্নগ্রহণী’ ইতি পাঠঃ| প্রাযঃ সোঽর্ধমাসং ন জীবতীতি অনেনার্ধমাসমতিক্রম্যাপি মরণং ভবতি, ন তু মরণব্যভিচারঃ||১৮-২০||
Adhikarana 11 (21-26) · Śloka 26
উপরুদ্ধস্য রোগেণ কর্শিতস্যাল্পমশ্নতঃ|
বহু মূত্রপুরীষং স্যাদ্যস্য তং পরিবর্জযেত্||২১||
দুর্বলো বহু ভুঙ্ক্তে যঃ প্রাগ্ভুক্তাদন্নমাতুরঃ |
অল্পমূত্রপুরীষশ্চ যথা প্রেতস্তথৈব সঃ||২২||
ইষ্টং চ গুণসম্পন্নমন্নমশ্নাতি যো নরঃ|
শশ্বচ্চ বলবর্ণাভ্যাং হীযতে ন স জীবতি||২৩||
প্রকূজতি প্রশ্বসিতি শিথিলং চাতিসার্যতে|
বলহীনঃ পিপাসার্তঃ শুষ্কাস্যো ন স জীবতি||২৪||
হ্রস্বং চ যঃ প্রশ্বসিতি ব্যাবিদ্ধং স্পন্দতে চ যঃ|
মৃতমেব তমাত্রেযো ব্যাচচক্ষে পুনর্বসুঃ||২৫||
ঊর্ধ্বং চ যঃ প্রশ্বসিতি শ্লেষ্মণা চাভিভূযতে|
হীনবর্ণবলাহারো যো নরো ন স জীবতি||২৬||
View original
उपरुद्धस्य रोगेण कर्शितस्याल्पमश्नतः|
बहु मूत्रपुरीषं स्याद्यस्य तं परिवर्जयेत्||२१||
दुर्बलो बहु भुङ्क्ते यः प्राग्भुक्तादन्नमातुरः |
अल्पमूत्रपुरीषश्च यथा प्रेतस्तथैव सः||२२||
इष्टं च गुणसम्पन्नमन्नमश्नाति यो नरः|
शश्वच्च बलवर्णाभ्यां हीयते न स जीवति||२३||
प्रकूजति प्रश्वसिति शिथिलं चातिसार्यते|
बलहीनः पिपासार्तः शुष्कास्यो न स जीवति||२४||
ह्रस्वं च यः प्रश्वसिति व्याविद्धं स्पन्दते च यः|
मृतमेव तमात्रेयो व्याचचक्षे पुनर्वसुः||२५||
ऊर्ध्वं च यः प्रश्वसिति श्लेष्मणा चाभिभूयते|
हीनवर्णबलाहारो यो नरो न स जीवति||२६||
প্রাগ্ভুক্তাদিতি যাবদন্নং ভুঙ্ক্তে স্ম পূর্বদিনেষু ততো বহু ভুঙ্ক্তে ইত্যর্থঃ| ইষ্টমিতি ইষ্টরসম্| গুণসম্পন্নমিতি পথ্যম্| শিথিলমিতি পূর্বেণ সম্বধ্যতে, তেন শ্লথ ইব প্রকূজতি| প্রশ্বসিতীতি অন্তঃ শ্বাসং নযতি| ব্যাবিদ্ধমিতি কুটিলম্||২১-২৬||
Adhikarana 12 (27-32) · Śloka 32
ঊর্ধ্বাগ্রে নযনে যস্য মন্যে চারতকম্পনে|
বলহীনঃ পিপাসার্তঃ শুষ্কাস্যো ন স জীবতি||২৭||
যস্য গণ্ডাবুপচিতৌ জ্বরকাসৌ চ দারুণৌ|
শূলী প্রদ্বেষ্টি চাপ্যন্নং তস্মিন্ কর্ম ন সিধ্যতি||২৮||
ব্যাবৃত্তমূর্ধজিহ্বাস্যো ভ্রুবৌ যস্য চ বিচ্যুতে|
কণ্টকৈশ্চাচিতা জিহ্বা যথা প্রেতস্তথৈব সঃ||২৯||
শেফশ্চাত্যর্থমুত্সিক্তং নিঃসৃতৌ বৃষণৌ ভৃশম্|
অতশ্চৈব বিপর্যাসো বিকৃত্যা প্রেতলক্ষণম্||৩০||
নিচিতং যস্য মাংসং স্যাত্ত্বগস্থিষ্বেব দৃশ্যতে|
ক্ষীণস্যানশ্নতস্তস্য মাসমাযুঃ পরং ভবেত্||৩১||
তত্র শ্লোকঃ- ইদং লিঙ্গমরিষ্টাখ্যমনেকমভিজজ্ঞিবান্|
আযুর্বেদবিদিত্যাখ্যাং লভতে কুশলো জনঃ||৩২||
View original
ऊर्ध्वाग्रे नयने यस्य मन्ये चारतकम्पने|
बलहीनः पिपासार्तः शुष्कास्यो न स जीवति||२७||
यस्य गण्डावुपचितौ ज्वरकासौ च दारुणौ|
शूली प्रद्वेष्टि चाप्यन्नं तस्मिन् कर्म न सिध्यति||२८||
व्यावृत्तमूर्धजिह्वास्यो भ्रुवौ यस्य च विच्युते|
कण्टकैश्चाचिता जिह्वा यथा प्रेतस्तथैव सः||२९||
शेफश्चात्यर्थमुत्सिक्तं निःसृतौ वृषणौ भृशम्|
अतश्चैव विपर्यासो विकृत्या प्रेतलक्षणम्||३०||
निचितं यस्य मांसं स्यात्त्वगस्थिष्वेव दृश्यते|
क्षीणस्यानश्नतस्तस्य मासमायुः परं भवेत्||३१||
तत्र श्लोकः- इदं लिङ्गमरिष्टाख्यमनेकमभिजज्ञिवान्|
आयुर्वेदविदित्याख्यां लभते कुशलो जनः||३२||
ঊর্ধ্বাগ্রে ইতি ঊর্ধ্বমুখে| আরতকম্পনে অবিশ্রান্তকম্পনে| উত্সিক্তমিতি অন্তঃপ্রবিষ্টম্| অতশ্চৈব বিপর্যাস ইতি শেফোঽতিনিঃসৃতং, বৃষণৌ চাতিপ্রবিষ্টৌ| বিকৃত্যেতি স্বভাবং বিনা; তেন স্বভাবোত্সিক্তশেফাদি ন রিষ্টং, কিন্ত্বনিমিত্তং কাদাচিত্কং সদেব রিষ্টম্| নিচিতমিতি ক্ষীণং, নিশব্দস্য প্রতিষেধার্থত্বাত্| এবং চ তথা মাংসং ক্ষীণং ভবতি, যথা ত্বগস্থিষ্বেব লগ্না দৃশ্যতে; কিংবা নিচিতমুপচিতং মাংসং স্যাত্, ত্বগস্থিষ্বেব দৃশ্যতে ত্বগস্থিমাত্রাবশেষো বা ভবতীতি যাবত্||২৭-৩২||
Adhikarana puShpikA · Śloka 7
ইত্যগ্নিবেশকৃতে তন্ত্রে চরকপ্রতিসংস্কৃতে ইন্দ্রিযস্থানে পন্নরূপীযমিন্দ্রিযং নাম সপ্তমোঽধ্যাযঃ||৭||
View original
इत्यग्निवेशकृते तन्त्रे चरकप्रतिसंस्कृते इन्द्रियस्थाने पन्नरूपीयमिन्द्रियं नाम सप्तमोऽध्यायः||७||
ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযামিন্দ্রিযস্থানে পন্নরূপীযমিন্দ্রিযং নাম সপ্তমোঽধ্যাযঃ||৭||