পুষ্পফলদৃষ্টান্তেন রিষ্টমরণযোর্দুর্বোধত্বাত্ পুষ্পফলব্যভিচারমপি শিষ্যো গৃহ্ণীযাদিতি তন্নিরাসার্থমাহ- অপ্যেবমিত্যাদি| ফলেনানুবন্ধীতি যথা- বেতসপুষ্পম্| যস্য পুষ্পং ন পূর্বজমিতি যথা- অশ্বত্থাদিফলম্| জাতস্যেতি সম্পূর্ণস্য, কিঞ্চিদুদিতে হ্যরিষ্টেঽসম্পূর্ণে নাবশ্যং মৃত্যুঃ| অন্যে তু জাতস্য নিযতস্যেতি বর্ণযন্তি; দ্বিবিধং হি রিষ্টং- নিযতং চানিযতং চ; তত্র নিযতং “মৃতমেব তমাত্রেযো ব্যাচচক্ষে পুনর্বসুঃ” (ইং.অ.৭) ইত্যাদি, অনিযতং যথা- “সংশযপ্রাপ্তমাত্রেযো মন্যতে তস্য জীবিতম্” (ইং.অ.৯), “অরোগঃ সংশযং গত্বা কশ্চিদেব প্রমুচ্যতে” (ইং.অ.৫) ইতি; তথাঽনিযতারিষ্টাভিপ্রাযেণৈব সুশ্রুতেঽপ্যুক্তং- “ধ্রুবং ত্বরিষ্টে মরণং ব্রাহ্মণৈস্তত্ কিলামলৈঃ| রসাযনতপোজপ্যতত্পরৈর্বা নিবার্যতে” ইতি| (সু.সূ.অ.) এতচ্চান্যে ন মন্যন্তে, আচার্যেণ রিষ্টমরণযোরব্যভিচারস্য মহতা প্রযত্নেন দর্শিতত্বাত্| সংশযপ্রাপ্তমিতি বচনং মরণপ্রতিপাদকমেবাচার্যেণ ভঙ্গ্যন্তরেণোক্তং, যথাঽঽচার্যস্য রিষ্টার্থস্তথা তদ্গ্রন্থ এব ব্যাখ্যাস্যামঃ| যত্তু রসাযনাদিনা বাধ্যত্বং রিষ্টস্য তদনুমতমেব, রসাযনমহেশ্বরপ্রসাদাদযো হি সর্বলোকমর্যাদামপি হন্তুং ক্ষমাঃ, অতস্তেন তদ্ব্যভিচারমবেক্ষ্যেহ গ্রন্থঃ ক্রিযতে; মহেশ্বরো হি ভস্মীভূতং কামং পুনর্জীবযতি স্ম, তপসা চ রামেণ মৃতোঽপি বিপ্রপুত্রঃ পুনর্জীবিত ইত্যাদ্যনুসরণীযম্| অন্যে তু কালমৃত্যাবেব রিষ্টপূর্বকং মরণং ভবতীতি বর্ণযন্তি, বদন্তি চ- “যদ্যকালমৃত্যৌ রিষ্টং ভবতি তদা বর্ণাদ্যং মৃত্যুপ্রদং রিষ্টং তদ্বিফলং স্যাত্, যেন কালমৃত্যাবুচিতাচরণেঽপি পরং মৃত্যুর্ভবতি নাকালমৃত্যৌ, তত্র রিষ্টে জাতে যদ্যুচিতা ক্রিযা ক্রিযতে ন তদা মৃত্যুর্ভবিতুমর্হতি; তেন কালমৃত্যুগতমেব রিষ্টম্” ইতি| তচ্চ ন, অবিশেষেণ কালাকালমরণে রিষ্টসদ্ভাবনিযমাভিধানাত্| অকালমৃত্যৌ চ যদৈব ক্রিযাপথমতিক্রান্তেঽপচারজনিতো ব্যাধির্ভবতি, তদৈব পরং রিষ্টং ভবতি, অত এবোক্তং- “ক্ষণেন হি রিষ্টানি প্রাদুর্ভবন্তি” ইতি| যশ্চৈনং (বং) ন স্বীকরোতি তস্য নিযতাযুষোঽপচারজন্যব্যাধেরসাধ্যতা কদাঽপি ন স্যাত্; যেন, যথা- অপচারজা দোষা অতিশযপ্রমাদাদসাধ্যব্যাধিজনকা ভবন্তি, তথা মরণপূর্বরিষ্টজনকা অপি ভবন্তি||৪-৫||