1. varṇasvarīyamindriyam

Adhikarana 1 (1-2) · Śloka 2

অথাতো বর্ণস্বরীযমিন্দ্রিযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

শারীরে চিকিত্সাধিকরণং শরীরং প্রতিপাদ্য চিকিত্সা বক্তব্যা, সা চ সাধ্য এব রোগে বক্তব্যা নাসাধ্যরোগে, যদুক্তং- “অর্থবিদ্যাযশোহানিমুপক্রোশমসঙ্গ্রহম্| প্রাপ্নুযান্নিযতং বৈদ্যো যোঽসাধ্যং সমুপাচরেত্” (সূ.অ.১০) ইতি; ন চ রিষ্টপ্রতিপত্তিমন্তরাঽসাধ্যত্বপ্রতিপত্তিরিতি রিষ্টপ্রতিপাদকমিন্দ্রিযস্থানমেব চিকিত্সাস্থানাত্ প্রাগুচ্যতে | ইন্দ্রশব্দেন প্রাণ উচ্যতে, তস্যান্তগতস্য লিঙ্গং রিষ্টাখ্যমিন্দ্রিযং; যদুক্তং ব্যাকরণে- “ইন্দ্রিযমিন্দ্রলিঙ্গং” (পা.অ.৫.২.১৩) ইত্যাদি; তস্যেন্দ্রিযস্য স্থানমিন্দ্রিযস্থানম্| তত্রাপি চেন্দ্রিযস্থানে বক্তব্যে ব্যক্ততমরিষ্টাভিধাযকতযা বর্ণস্বরীযমিন্দ্রিযমুচ্যতে, অত্র হি যানি রিষ্টানি বক্তব্যানি তানীতররিষ্টেভ্যশ্চক্ষুরাদিগ্রাহ্যতযা ব্যক্ততমানি| বর্ণস্বরাবধিকৃত্য কৃতো বর্ণস্বরীযঃ, ইন্দ্রিযস্য রিষ্টরূপস্য প্রতিপাদকোঽধ্যায ইন্দ্রিযঃ, তং ব্যাখ্যাস্যামঃ| এবমন্যত্রাপি পুষ্পিতকমিত্যাদ্যপীন্দ্রিযবিশেষণং ব্যাখ্যেযম্||১-২||

Adhikarana 2 (3) · Śloka 3

ইহ খলু বর্ণশ্চ স্বরশ্চ গন্ধশ্চ রসশ্চ স্পর্শশ্চ চক্ষুশ্চ শ্রোত্রং চ ঘ্রাণং চ রসনং চ স্পর্শনং চ সত্ত্বং চ ভক্তিশ্চ শৌচং চ শীলং চাচারশ্চ স্মৃতিশ্চাকৃতিশ্চ প্রকৃতিশ্চ বিকৃতিশ্চ বলং চ গ্লানিশ্চ মেধা চ হর্ষশ্চ রৌক্ষ্যং চ স্নেহশ্চ তন্দ্রা চারম্ভশ্চ গৌরবং চ লাঘবং চ গুণাশ্চাহারশ্চ বিহারশ্চাহারপরিণামশ্চোপাযশ্চাপাযশ্চ ব্যাধিশ্চ ব্যাধিপূর্বরূপং চ বেদনাশ্চোপদ্রবাশ্চ চ্ছাযা চ প্রতিচ্ছাযা চ স্বপ্নদর্শনং চ দূতাধিকারশ্চ পথি চৌত্পাতিকং চাতুরকুলে ভাবাবস্থান্তরাণি চ ভেষজসংবৃত্তিশ্চ ভেষজবিকারযুক্তিশ্চেতি পরীক্ষ্যাণি প্রত্যক্ষানুমানোপদেশৈরাযুষঃ প্রমাণাবশেষং জিজ্ঞাসমানেন ভিষজা||৩||

ইন্দ্রিযস্থানপ্রতিপাদ্যং কৃত্স্নং বিষযমাহ- ইহেত্যাদি| ইহ ইন্দ্রিযস্থানে| খলুশব্দো বাক্যালঙ্কারে| ইহ চ যদ্যপীন্দ্রিযাণ্যেব বিষযবর্ণাদিগ্রাহকতযা অগ্রে বক্তুং যুজ্যন্তে, তথাঽপি তেষামতীন্দ্রিযত্বেন তদাশ্রযরিষ্টানামব্যক্তত্বং ; তেন, প্রব্যক্তানি বর্ণাদীন্যেব প্রব্যক্তরিষ্টাধিকরণান্যগ্রেঽভিধীযন্তে| বর্ণাদিষ্বপি চ যথা ব্যক্তত্বং তথা পূর্বনিপাতঃ| মেঘাদিশব্দস্তু যদ্যপি বর্ণাদপি ব্যক্তস্তথাঽপি শব্দবিশেষ এবেহ তাল্বাদিসম্পাদ্যঃ স্বরশব্দাভিধেযো রিষ্টাধিকরণত্বেনাভিমতঃ, স চ বর্ণাপেক্ষযাঽব্যক্ত এব| ইহেত্যাদাবসমাসেন প্রত্যেকমপি বর্ণাদীনাং রিষ্টাধিকরণত্বং দর্শযতি; সমাসে হি সমুদাযস্যৈব রিষ্টাধিকরণকতযা পরীক্ষিতব্যত্বং শঙ্ক্যেত| বর্ণশব্দেন চ বর্ণসহচরিতাশ্চক্ষুর্গ্রাহ্যা রৌক্ষ্যাদযোঽপি গৃহ্যন্তে; অত এব বর্ণপ্রস্তাব এব বক্ষ্যতি- যত্- “বর্ণগ্রহণেন গ্লানিহর্ষরৌক্ষ্যস্নেহা ব্যাখ্যাতাঃ” ইতি| স্বরাদিগ্রহণেন চ স্বরাদ্যভাবোঽপি গৃহ্যতে, তেনাঙ্গুলিপর্বশব্দাভাব-গন্ধাভাবাদযোঽপি রিষ্টান্যবরুধ্যন্তে| স্পর্শগ্রহণেন চ স্পর্শোপলভ্যকাঠিন্যাদ্যবরোধঃ| সত্ত্বং মনঃ; সত্ত্ববিকৃতেরুদাহরণং যথা- “ঔত্সুক্যং ভজতে সত্ত্বং চেতো ভীরাবিশত্যপি” (ইং.অ.১২) ইত্যাদি| ভক্তিঃ ইচ্ছা| শীলং সহজং বৃত্তম্| আচারঃ শাস্ত্রশিক্ষাকৃতো ব্যবহারঃ| ভক্ত্যাদযো যদ্যপি সত্ত্ববিকারত্বেন সত্ত্বগ্রহণেনৈব লভ্যন্তে; যদুক্তং- “ভক্তিঃ শীলং শৌচং দ্বেষঃ স্মৃতির্মোহস্ত্যাগোঽমাত্সর্যং ভযং ক্রোধস্তন্দ্রোত্সাহস্তৈক্ষ্ণ্যং মার্দবং গাম্ভীর্যমনবস্থিতত্বমিত্যেবমাদযঃ সত্ত্ববিকারাঃ” (শা.অ.৩) ইতি; তথাঽপি ভক্ত্যাদীনামপি পৃথগরিষ্টাধিকরণত্বেনেহ পৃথক্করণম্| নিদ্রাদৌর্বল্যাত্তন্দ্রেতি তন্দ্রাশব্দেন নিদ্রোচ্যতে; অত্র চ রিষ্টমুক্তং যথা- “নিদ্রা নিত্যা ভবতি বা ন বা” (ইং.অ.১১) ইতি| আরম্ভ ইতি অরিষ্টব্যাধ্যুত্পাদারম্ভঃ ; যদুক্তং- “শ্বযথুর্যস্য কুক্ষিস্থো হস্তপাদং প্রধাবতি” (ইং.অ.৯) ইত্যাদি| গৌরবে রিষ্টং যথা- “নিষ্ঠ্যূতং চ পুরীষং চ রেতশ্চাম্ভসি মজ্জতি” (ইং.অ.৯) ইত্যাদি| লাঘবে রিষ্টং- গুরূণামঙ্গানাং লাঘবং জ্ঞেযম্| গুণরিষ্টং যথা- “গুণাঃ শরীরদেশানাং শীতোষ্ণমৃদুদারুণাঃ| বিপর্যাসেন লক্ষ্যন্তে স্থানেষ্বন্যেষু তদ্বিধাঃ” (ইং.অ.১২) ইতি| আহাররিষ্টং যথা- “আহারমুপযুঞ্জানো ভিষজা সূপকল্পিতম্” (ইং.অ.১২) ইত্যাদি| আহারপরিণামরিষ্টং যথা- “দুর্বলো বহু ভুঙ্ক্তে যো প্রাগভুক্ত্বাঽন্নমাতুরঃ| অল্পমূত্রপুরীষশ্চ” (ইং.অ.৭) ইতি| উপায উপগমনং ব্যাধিমেলক ইত্যর্থঃ; যদুক্তং- “সহসা জ্বরসন্তাপস্তৃষ্ণা মূর্চ্ছা বলক্ষযঃ| বিশ্লেষণং চ সন্ধীনাং” (ইং.অ.৮) ইতি| ব্যাধ্যপগমনমপাযঃ; যদুক্তং- “যং নরং সহসা রোগো দুর্বলং পরিমুঞ্চতি” (ইং.অ.৯) ইত্যাদি| ব্যাধিশ্চেতি ব্যাধিরেব রিষ্টং যথা- “বাতাষ্ঠীলা সুসংবৃত্তা দারুণা হৃদি তিষ্ঠতি” (ইং.অ.১০) ইতি| ছাযা ভৌতিকী পঞ্চরূপা, প্রতিচ্ছাযা তু দেহচ্ছাযা; প্রতিচ্ছাযযা চ নেত্রকুমারিকাঽপি প্রতিচ্ছাযারূপা গৃহীতব্যা| অযং চ ছাযাদিভেদঃ পন্নরূপীযেন্দ্রিযে দর্শযিতব্যঃ | আতুরকুলে ভাবাবস্থারিষ্টং যথা- “অগ্নিপূর্ণানি পাত্রাণি ভিন্নানি বিশিখানি চ| ভিষঙ্মুমূর্ষতাং বেশ্ম প্রবিশন্নেব পশ্যতি” (ইং.অ.১২) ইত্যাদি| ভেষজসংবৃত্তৌ রিষ্টং যথা- “যমুদ্দিশ্যাতুরং বৈদ্যঃ সংবর্তযিতুমৌষধম্| যতমানো ন শক্নোতি দুর্লভং তস্য জীবিতম্” (ইং.অ.১২) ইতি| ভেষজস্য বিকারেণ সমং যুক্তির্ভেষজবিকারযুক্তিঃ; তত্র রিষ্টং যথা- “বিজ্ঞাতং বহুশঃ সিদ্ধং বিধিবচ্চাবচারিতম্| ন সিধ্যত্যৌষধং যস্য তস্য নাস্তি চিকিত্সিতম্” (ইং.অ.১২) ইতি| শেষং তু রিষ্টোদাহরণং ব্যক্তম্| ইতি সমাপ্তৌ| প্রত্যক্ষপূর্বকত্বাত্ সর্বপ্রমাণানামিহাদৌ প্রত্যক্ষং কৃতম্| যদ্যপি বর্ণাদয আযুর্লক্ষণপ্রতিপাদিতা দীর্ঘাযুঃপ্রমাণজিজ্ঞাসাযামপি পরীক্ষ্যন্তে, তথাঽপীহ রিষ্টপ্রকরণে আযুঃপ্রমাণাবশেষজ্ঞানার্থমেব পরীক্ষণীযাঃ, অত উক্তং- প্রমাণাবশেষং জিজ্ঞাসমানেনেতি||৩||

Adhikarana 3 (4) · Śloka 4

তত্র তু খল্বেষাং পরীক্ষ্যাণাং কানিচিত্ পুরুষমনাশ্রিতানি, কানিচিচ্চ পুরুষসংশ্রযাণি| তত্র যানি পুরুষমনাশ্রিতানি তান্যুপদেশতো যুক্তিতশ্চ পরীক্ষেত, পুরুষসংশ্রযাণি পুনঃ প্রকৃতিতো বিকৃতিতশ্চ||৪||

পুরুষমনাশ্রিতানি দূতাদ্যাশ্রযাণি রিষ্টানি| যুক্তিতশ্চেত্যনুমানত ইত্যর্থঃ, অত্র যুক্তেরপি রিষ্টত্বাবধারণে ক্ষমত্বাত্| প্রত্যক্ষং হি দূতাদীনাং স্বরূপমাত্রং গৃহ্ণাতি, রিষ্টং তু দূতাদীনামাগমাদেব জ্ঞাযতে| পুরুষাশ্রযিবর্ণাদিগতরিষ্টগ্রহণে তু প্রত্যক্ষমপি তত্তদরিষ্টবিশেষগ্রহণে তত্তদ্বিশেষেণ ব্যাপ্রিযত ইতি মত্বাঽত্র তত্প্রতিষিদ্ধম্| অনুমানং তু রিষ্টত্বেন প্রতিপাদিতমনিমিত্তত্বাদিধর্মবিচারে ব্যাপ্রিযতে, এবং সর্বত্র| প্রকৃতিতশ্চেতি পুরুষাশ্রযবিকৃতিজ্ঞানহেতুতযা প্রকৃতী রিষ্টজ্ঞানে ব্যাপ্রিযতে, যতঃ প্রকৃতিজ্ঞানাধীনং বিকৃতিজ্ঞানং ভবতি; প্রকৃতিবিকৃতিপরীক্ষা ত্বত্রাধিকৃতৈঃ প্রসিদ্ধৈঃ প্রত্যক্ষাদিভিরেব জ্ঞেযা||৪||

Adhikarana 4 (5) · Śloka 5

তত্র প্রকৃতির্জাতিপ্রসক্তা চ, কুলপ্রসক্তা চ, দেশানুপাতিনী চ, কালানুপাতিনী চ বযোঽনুপাতিনী চ, প্রত্যাত্মনিযতা চেতি| জাতিকুলদেশকালবযঃপ্রত্যাত্মনিযতা হি তেষাং তেষাং পুরুষাণাং তে তে ভাববিশেষা ভবন্তি||৫||

প্রকৃতিং বিভজতে- তত্রেত্যাদি| জাতিপ্রসক্তা যথা- ব্রাহ্মণজাতৌ শৌচং, কুলপ্রসক্তা যথা- কিঞ্চিদেব কুলং শুচ্যাচারবদ্ভবতি, দেশানুপাতিনী যথা- অন্তর্বেদিবাসিনঃ শুচযো ভবন্তি, কালানুপাতিনী যথা- কৃতযুগে শৌচং, বযোঽনুপাতিনী যথা- বাল্যেঽশৌচং, প্রত্যাত্মনিযতা যথা- কশ্চিদেব পুরুষঃ প্রকৃত্যা শুচির্ভবতি; ইত্যাদ্যুদাহরণীযম্| কুতঃ পুনর্জাত্যাদিনিযতা প্রকৃতির্ভবতীত্যত্র হেতুমাহ- জাতিকুলেত্যাদি| তে তে ভাববিশেষা ইতি শুচিত্বাশৌচাদযঃ ||৫||

Adhikarana 5 (6) · Śloka 6

বিকৃতিঃ পুনর্লক্ষণনিমিত্তা চ, লক্ষ্যনিমিত্তা চ, নিমিত্তানুরূপা চ||৬||

রিষ্টাধিকারাধিকৃতাং বিকৃতিং বিবেচযিতুং সর্বানেব বিকৃতিভেদানাহ- বিকৃতিরিত্যাদি||৬||

Adhikarana 6 (7(1)) · Śloka 7

তত্র লক্ষণনিমিত্তা নাম সা যস্যাঃ শরীরে লক্ষণান্যেব হেতুভূতানি ভবন্তি দৈবাত্; লক্ষণানি হি কানিচিচ্ছরীরোপনিবদ্ধানি ভবন্তি, যানি হি তস্মিংস্তস্মিন্ কালে তত্রাধিষ্ঠানমাসাদ্য তাং তাং বিকৃতিমুত্পাদযন্তি|৭|

হেতুভূতানীতি হেতুসদৃশানি| তেন দৈবমেব নখরেখাপদ্মাদিসামুদ্রিকোক্তলক্ষণযুক্তে শরীরে রাজ্যধনগমনবধবন্ধনাদিরূপবিকৃতিপ্রাপ্তৌ হেতুঃ, লক্ষণানি তু দৈবনিমিত্তানি বোধকমাত্রাণি, অত এব দৈবাদিত্যুক্তং; দৈবং চ প্রাক্তনং কর্মোচ্যতে| বিকৃতিমুত্পাদযন্তীত্যত্রাপি দৈবাদিতি যোজনীযং; তেন, দৈববলাদেব লক্ষণানাং রাজ্যধনবধবন্ধনাদিরূপবিকৃতিকর্তৃত্বম্| তস্মিংস্তস্মিন্ কালে ইত্যনেন লক্ষণসূচিতাদৃষ্টপরিপাককালে নিযতত্বং বিকৃতের্দর্শযতি| লক্ষণাসূচিতাশ্চ রাজ্যাদয ইহ পুরুষস্য কদাচিদ্ভবন্তোঽস্বাভাবিকা এবেতি কৃত্বা বিকৃতিশব্দেনোচ্যন্তে||৭(১)||

Adhikarana 7 (7(2)) · Śloka 7

লক্ষ্যনিমিত্তা তু সা যস্যা উপলভ্যতে নিমিত্তং যথোক্তং নিদানেষু|৭|

যথোক্তং নিদানেষ্বিতি যথা- রূক্ষাদিসেবযা বাতাদিপ্রকোপরূপা বিকৃতির্নিদানোক্তেত্যর্থঃ||৭(২)||

Adhikarana 8 (7) · Śloka 7

নিমিত্তানুরূপা তু নিমিত্তার্থানুকারিণী যা, তামনিমিত্তাং নিমিত্তমাযুষঃ প্রমাণজ্ঞানস্যেচ্ছন্তি ভিষজো ভূযশ্চাযুষঃ ক্ষযনিমিত্তাং প্রেতেলিঙ্গানুরূপাং, যামাযুষোঽন্তর্গতস্য জ্ঞানার্থমুপদিশন্তি ধীরাঃ| যাং চাধিকৃত্য পুরুষসংশ্রযাণি মুমূর্ষতাং লক্ষণান্যুপদেক্ষ্যামঃ| ইত্যুদ্দেশঃ| তং বিস্তরেণানুব্যাখ্যাস্যামঃ||৭||

নিমিত্তানুরূপেতি নিমিত্তসদৃশী| তদেব স্ফোটযতি- নিমিত্তার্থানুকারিণীতি|- নিমিত্তস্য যোঽর্থঃ কার্যজননরূপঃ কার্যবোধনরূপো বা তমনুকরোতীতি নিমিত্তার্থানুকারিণী| রিষ্টাখ্যা হি বিকৃতির্মরণে তস্যৈবাববোধনে বা নিমিত্তং ভবতি| অপরমপি নিমিত্তানুরূপাযা বিকৃতের্বিশেষমাহ- তামিত্যাদি| অনিমিত্তামিতি তদাত্বেঽনুপলভ্যমাননিমিত্তাং, ন তু পুনঃ সর্বথৈবাহেতুকীং, যত ‘আযুষঃ ক্ষযনিমিত্তাম্’ ইত্যনন্তরমস্য বিশেষণং কথযিষ্যতি; রিষ্টস্য হি ন রৌক্ষ্যাদিনা শরীরসম্বন্ধাদি নিমিত্তমুপলভ্যতে| যদ্বা, আযুঃক্ষযরূপং যন্নিমিত্তং তদ্বিদ্যমানমপি নান্যৈরুপলভ্যতে , কিন্তু তদেব হি রিষ্টাদুন্নীযতে; তেন, অব্যক্তনিমিত্তত্বমিহানিমিত্তত্বং জ্ঞেযম্| অত্র গতাযুষ্ট্বমেব সকলপুরুষসংশ্রিতরিষ্টব্যাপকং কারণং সাধু| যত্তু বক্ষ্যতি- “ক্রিযাপথমতিক্রান্তাঃ কেবলং দেহমাশ্রিতাঃ| চিহ্নং কুর্বন্তি যদ্দোষাস্তদরিষ্টং প্রচক্ষতে” (ইং.অ.১১) ইতি, তদ্দূতাদিগতরিষ্টাব্যাপকতযা পুরুষাশ্রযিরিষ্টমাত্রাভিপ্রাযেণ জ্ঞেযম্| আযুষঃ প্রমাণজ্ঞানস্যেতি আযুঃশেষপ্রমাণজ্ঞানস্যেত্যর্থঃ| ভূয ইতি অত্যর্থম্| তেনাত্যর্থমাযুঃক্ষযনিমিত্তাং প্রত্যাসন্নাযুঃক্ষযজন্যামিতি যাবত্| যামিতি ক্ষীণাযুঃকার্যাম্| প্রেতলিঙ্গানুরূপামিতি প্রেতসদৃশীং; “মলা দন্তেষু জাযন্তে প্রেতাকৃতিরুদীর্যতে” (ইং.অ.১২) ইত্যাদিগ্রন্থবক্ষ্যমাণাম্| ইমাং হি বিকৃতিমাযুষোঽন্তর্গ(গ)তস্য জ্ঞানার্থং বদন্তি| যা ত্বন্যা প্রেতলিঙ্গাননুরূপা বর্ণাশ্রযা সা প্রত্যাসন্নমরণবোধিকা; তেন সা নাত্যর্থন্নাত্যর্থক্ষীণাযুঃকার্যেত্যর্থঃ| এবং ‘ভূযশ্চ’ ইত্যাদিনা ‘ধীরাঃ’ ইত্যন্তেন নিমিত্তানুরূপবিকৃতিবিশেষস্য কার্যবিশেষং মরণলক্ষণমভিধায পুনঃ সামান্যেনানিমিত্তাযা ধর্মান্তরমাহ- যামধিকৃত্যেত্যাদি| পুরুষসংশ্রযাণীতি বিশেষণেন পুরুষানাশ্রিতদূতাদিরিষ্টে নাবশ্যমনিমিত্ততাঽস্তীতি দর্শযতি| যতো দূতাধিকারাদৌ যানি রিষ্টানি তানি দৃশ্যমাননিমিত্তান্যপ্যাগমাদেব রিষ্টত্বেনাবধার্যন্তে| যথা- “মুক্তকেশেঽথবা নগ্নে রুদত্যপ্রযতেঽথবা| ভিষগভ্যাগতং দৃষ্ট্বা দূতং মরণমাদিশেত্” (ইং.অ.১২) ইতি| অত্র চ ভিষজো মুক্তকেশবচনাদ্দৃশ্যত এব কারণং, তথা দূতাগমনে চাতুরস্য প্রেরণাদি কারণমস্ত্যেব, তেনানিমিত্তত্বমাতুরাশ্রযিরিষ্ট এব| অন্যে তু, এবম্ভূতবৈদ্যদূতসমাগমঃ পরিহর্তব্যত্বেন জ্ঞাতঃ সন্ যদা দৈবাদ্ভবতি, তদা দৈবনিমিত্তঃ সন্ রিষ্টং ভবতি; তেন, সর্বরিষ্টব্যাপিকৈবেযমনিমিত্ততা; ভূযশ্চেত্যাদিগ্রন্থেন তু প্রেতলিঙ্গানুরূপাং বিকৃতিং ভূয আযুষোঽন্তর্গ(গ)তস্য জ্ঞানার্থমুপদিশন্তি, তথা পুরুষসংশ্রযাণি ভূয উপদেক্ষ্যন্তে, পুরুষানাশ্রযাণি তু স্বল্পগ্রন্থেনোপদেক্ষ্যন্তে ইতি ব্যাখ্যানযন্তি| ইত্যুদ্দেশ ইন্দ্রিযস্থানার্থোদ্দেশ ইত্যর্থঃ||৭||

Adhikarana 9 (8) · Śloka 8

তত্রাদিত এব বর্ণাধিকারঃ| তদ্যথা- কৃষ্ণঃ, শ্যামঃ , শ্যামাবদাতঃ, অবদাতশ্চেতি প্রকৃতিবর্ণাঃ শরীরস্য ভবন্তি; যাংশ্চাপরানুপেক্ষমাণো বিদ্যাদনূকতোঽন্যথা বাঽপি নির্দিশ্যমানাংস্তজ্জ্ঞৈঃ||৮||

প্রকৃতিজ্ঞানান্তরীযকত্বাদ্বিকৃতিজ্ঞানস্য প্রকৃতিবর্ণানেব তাবদাহ- কৃষ্ণ ইত্যাদি| অবদাতো গৌরঃ| ইহ চ প্রাযেণ যে বর্ণাঃ প্রকৃত্যা ভবন্তি তে প্রকৃতিবর্ণা উচ্যন্তে, যে তু প্রাযেণ বিকৃত্যা ভবন্তি তে বিকৃতিবর্ণা উচ্যন্তে, ইতি জ্ঞেযম্| তেন প্রকৃতিবর্ণা অপি কদাচিদ্বিকৃতিবর্ণা ভবন্তি, তথা বিকৃতিবর্ণা অপি জন্মপ্রভৃতিজাযমানতযা কদাচিত্ প্রকৃতিবর্ণা ভবন্তীতি জ্ঞেযম্| অনুক্তপ্রকৃতিবর্ণাতিদেশার্থমাহ- যাংশ্চেত্যাদি| উপেত্য ঈক্ষমাণ ইতি উপেক্ষমাণঃ| অনূকত ইতি সাদৃশ্যতঃ; অনেন চ শ্যামেত্যাদিবর্ণশব্দেন নির্দিশ্যমানান্ বিদ্যাদিতি যোজনা| তজ্জ্ঞৈরিতি বর্ণভেদনামজ্ঞৈঃ||৮||

Adhikarana 10 (9) · Śloka 9

নীলশ্যাবতাম্রহরিতশুক্লাশ্চ বর্ণাঃ শরীরস্য বৈকারিকা ভবন্তি; যাংশ্চাপরানুপেক্ষমাণো বিদ্যাত্ প্রাগ্বিকৃতানভূত্বোত্পন্নান্ | ইতি প্রকৃতিবিকৃতিবর্ণা ভবন্ত্যুক্তাঃ শরীরস্য| তত্র প্রকৃতিবর্ণমর্ধশরীরে বিকৃতিবর্ণমর্ধশরীরে, দ্বাবপি বর্ণৌ মর্যাদাবিভক্তৌ দৃষ্ট্বা; যদ্যেবং সব্যদক্ষিণবিভাগেন, যদ্যেবং পূর্বপশ্চিমবিভাগেন, যদ্যুত্তরাধরবিভাগেন, যদ্যন্তর্বহির্বিভাগেন, আতুরস্যারিষ্টমিতি বিদ্যাত্; এবমেব বর্ণভেদো মুখেঽপ্যন্যত্র বর্তমানো মরণায ভবতি||৯||

নীলেত্যাদিনা (বিকৃতিজাযমানতযা ) বিকৃতিবর্ণানাহ| ইহ, ‘অপরান্’ ইতি বচনেন বিকৃতিবর্ণসঙ্করজা বর্ণা জ্ঞেযাঃ| বিকৃতিবর্ণান্তরমাহ- প্রাগিত্যাদি| প্রাগ্বিকৃতানিতি পূর্ববর্ণাদন্যথাভূতানিত্যর্থঃ| তেনাপি, যেন শ্যামেন সতা রসাযনোপযোগাদ্গৌরবর্ণত্বং প্রাপ্তং, স চ ত্যক্তরসাযনঃ কালবশাত্ পুনঃ শ্যামবর্ণো ভবতি তস্যাপি পূর্বগৌরবর্ণাদ্বিকৃতিঃ শ্যামবর্ণো ভবন্ রিষ্টং স্যাদিত্যাহ- অভূত্বোত্পন্নানিতি; তেন নাযং দোষঃ; অত্র হি পূর্বভূত এব বর্ণঃ পুনর্ভবতি, তেন ন রিষ্টম্| মর্যাদাবিভক্তাবিতি সমসীমাব্যবস্থাপিতৌ| পূর্বপশ্চিমবিভাগেনেতি অভিমুখপৃষ্ঠভাগেনেত্যর্থঃ| অন্তর্বহির্বিভাগেনেতি অত্রান্তর্গতো বর্ণো মুখনাসাকর্ণশ্রোত্রান্তর্গততযা উন্নেযঃ| অন্যত্রেতি অবান্তরে হস্তপাদাদৌ||৯||

Adhikarana 11 (10) · Śloka 10

বর্ণভেদেন গ্লানিহর্ষরৌক্ষ্যস্নেহা ব্যাখ্যাতাঃ||১০||

বর্ণভেদেনেতি যথা বর্ণবিভাগেন রিষ্টং, তথা গ্লান্যাদিবিভাগেনাপীত্যর্থঃ| হর্ষ ইহোপচযো জ্ঞেযঃ, মানসহর্ষস্যেহ চাক্ষুষাধিকারেঽসঙ্গতত্বাত্||১০||

Adhikarana 12 (11) · Śloka 11

তথা পিপ্লুব্যঙ্গতিলকালকপিডকানামন্যতমস্যাননে জন্মাতুরস্যৈবমেবাপ্রশস্তং বিদ্যাত্||১১||

তথেত্যাদৌ পিপ্লুপ্রভৃতীনামপি বর্ণবত্ সব্যদক্ষিণাদিবিভাগেন জন্ম রিষ্টং ভবতীত্যেবমেবশব্দেনোচ্যতে||১১||

Adhikarana 13 (12) · Śloka 12

নখনযনবদনমূত্রপুরীষহস্তপাদৌষ্ঠাদিষ্বপি চ বৈকারিকোক্তানাং বর্ণানামন্যতমস্য প্রাদুর্ভাবো হীনবলবর্ণেন্দ্রিযেষু লক্ষণমাযুষঃ ক্ষযস্য ভবতি||১২||

নখেত্যাদৌ বলহান্যাদ্যভাবে সতি ন রিষ্টম্||১২||

Adhikarana 14 (13) · Śloka 13

যচ্চান্যদপি কিঞ্চিদ্বর্ণবৈকৃতমভূতপূর্বং সহসোত্পদ্যেতানিমিত্তমেব হীযমানস্যাতুরস্য শশ্বত্, তদরিষ্টমিতি বিদ্যাত্| ইতি বর্ণাধিকারঃ||১৩||

যচ্চেত্যাদিনাঽনুক্তবর্ণরিষ্টং সঙ্গৃহ্ণাতি| অভূতপূর্বমিতি পূর্বব্যাকৃতরসাযনবিহিতবর্ণপ্রাদুর্ভাবব্যুদাসার্থম্| সহসোত্পদ্যত ইত্যনেন রিষ্টানাং শীঘ্রস্বভাবং দর্শযতি| অনিমিত্তমিতি পূর্বোক্তার্থমেব| হীযমানস্য শশ্বদিতি স্বভাবকথনং, রিষ্টোত্পত্ত্যা হীযমানতা শশ্বদবশ্যং ভবতি||১৩||

Adhikarana 15 (14) · Śloka 14

স্বরাধিকারস্তু- হংসক্রৌঞ্চনেমিদুন্দুভিকলবিঙ্ককাককপোতজর্জরানুকারাঃ প্রকৃতিস্বরা ভবন্তি; যাংশ্চাপরানুপেক্ষমাণোঽপি বিদ্যাদনূকতোঽন্যথা বাঽপি নির্দিশ্যমানাংস্তজ্জ্ঞৈঃ| এডককলগ্রস্তাব্যক্তগদ্গদক্ষামদীনানুকীর্ণাস্ত্বাতুরাণাং স্বরা বৈকারিকা ভবন্তি; যাংশ্চাপরানুপেক্ষমাণোঽপি বিদ্যাত্ প্রাগ্বিকৃতানভূত্বোত্পন্নান্ | ইতি প্রকৃতিবিকৃতিস্বরা ব্যাখ্যাতা ভবন্তি||১৪||

ক্রমাগতং স্বরমাহ- স্বরেত্যাদি| জর্জরঃ বাদ্যভাণ্ডবিশেষঃ| যাংশ্চেত্যাদি পূর্ববদ্ ব্যাখ্যেযম্| এডকো মেষঃ, কিংবা অরণ্যচ্ছাগলঃ; কলঃ সূক্ষ্মঃ; গ্রস্তঃ সর্বথাঽনুচ্চারঃ; ক্ষামঃ রূক্ষঃ; দীনঃ দুঃখোচ্চার্যমাণস্বরঃ; অনুকীর্ণ উপর্যুপর্যুচ্চার্যমাণঃ||১৪||

Adhikarana 16 (15-16) · Śloka 16

তত্র প্রকৃতিবৈকারিকাণাং স্বরাণামাশ্বভিনির্বৃত্তিঃ স্বরানেকত্বমেকস্য চানেকত্বমপ্রশস্তম্| ইতি স্বরাধিকারঃ||১৫|| ইতি বর্ণস্বরাধিকারৌ যথাবদুক্তৌ মুমূর্ষতাং লক্ষণজ্ঞানার্থমিতি||১৬||

প্রকৃতের্বৈকারিকা অন্যথাভূতা ইতি প্রকৃতিবৈকারিকাঃ| স্বরানেকত্বমিতি কদাচিদেডকস্বরত্বং, কদাচিত্ কলস্বরত্বমিত্যাদি| একস্য চানেকত্বমিতি একস্যৈব স্বরস্য চানেকত্বমিব প্রতিভাতি| অনিমিত্তমিতি সর্বত্র সম্বধ্যতে||১৫-১৬||

Adhikarana 17 (17-26) · Śloka 26

ভবন্তি চাত্র- যস্য বৈকারিকো বর্ণঃ শরীর উপপদ্যতে| অর্ধে বা যদি বা কৃত্স্নে নিমিত্তং ন চ নাস্তি সঃ||১৭|| নীলং বা যদি বা শ্যাবং তাম্রং বা যদি বাঽরুণম্| মুখার্ধমন্যথা বর্ণো মুখার্ধেঽরিষ্টমুচ্যতে||১৮|| স্নেহো মুখার্ধে সুব্যক্তো রৌক্ষ্যমর্ধমুখে ভৃশম্| গ্লানিরর্ধে তথা হর্ষো মুখার্ধে প্রেতলক্ষণম্||১৯|| তিলকাঃ পিপ্লবো ব্যঙ্গা রাজযশ্চ পৃথগ্বিধাঃ| আতুরস্যাশু জাযন্তে মুখে প্রাণান্ মুমুক্ষতঃ||২০|| পুষ্পাণি নখদন্তেষু পঙ্কো বা দন্তসংশ্রিতঃ| চূর্ণকো বাঽপি দন্তেষু লক্ষণং মরণস্য তত্||২১|| ওষ্ঠযোঃ পাদযোঃ পাণ্যোরক্ষ্ণোর্মূত্রপুরীষযোঃ| নখেষ্বপি চ বৈবর্ণ্যমেতত্ ক্ষীণবলেঽন্তকৃত্||২২|| যস্য নীলাবুভাবোষ্ঠৌ পক্বজাম্ববসন্নিভৌ| মুমূর্ষুরিতি তং বিদ্যান্নরো ধীরো গতাযুষম্||২৩|| একো বা যদি বাঽনেকো যস্য বৈকারিকঃ স্বরঃ| সহসোত্পদ্যতে জন্তোর্হীযমানস্য নাস্তি সঃ||২৪|| যচ্চান্যদপি কিঞ্চিত্ স্যাদ্বৈকৃতং স্বরবর্ণযোঃ| বলমাংসবিহীনস্য তত্ সর্বং মরণোদযম্ ||২৫|| তত্র শ্লোকঃ- ইতি বর্ণস্বরাবুক্তৌ লক্ষণার্থং মুমূর্ষতাম্| যস্তৌ সম্যগ্বিজানাতি নাযুর্জ্ঞানে স মুহ্যতি||২৬||

অযমেবার্থো গদ্যোক্তঃ স্পষ্টার্থং সুখগ্রহণার্থং চ শ্লোকেনোচ্যতে- যস্যেত্যাদিনা| তিলকা ইত্যাদৌ মুখে ইতি মুখার্ধে| ওষ্ঠাবিতি দ্বিবচনমুক্ত্বাঽপি যত্ ‘উভৌ’ ইতি করোতি, তেন সকলৌষ্ঠব্যাপ্তিং দর্শযতি| মুমূর্ষুরিত্যুকত্বাঽপি যত্ ‘গতাযুষং’ ইতি করোতি, তেন রিষ্টযুক্তো মুমূর্ষর্গতাযুরীতি দর্শযতি; অজাতরিষ্টস্তু প্রতিক্রিযাভাবান্মুমূর্ষুরগতাযুরপি ভবতি| মরণোদযমিতি মরণকারণমিতি জ্ঞানার্থম্||১৭-২৬||

Adhikarana puShpikA · Śloka 1

ইত্যগ্নিবেশকৃতে তন্ত্রে চরকপ্রতিসংস্কৃতে ইন্দ্রিযস্থানে বর্ণস্বরীযমিন্দ্রিযং নাম প্রথমোঽধ্যাযঃ||১||

ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযামিন্দ্রিযস্থানে বর্ণস্বরীযমিন্দ্রিযং নাম প্রথমোঽধ্যাযঃ||১||