12. dantīdravantīkalpaḥ

Adhikarana 1 (1-2) · Śloka 2

অথাতো দন্তীদ্রবন্তীকল্পং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

পারিশেষ্যাত্ দন্তীদ্রবন্তীকল্পোঽভিধীযতে||১-২||

Adhikarana 2 (3) · Śloka 3

দন্ত্যুদুম্বরপর্ণী স্যান্নিকুম্ভোঽথ মুকূলকঃ| দ্রবন্তী নামতশ্চিত্রা ন্যগ্রোধী মূষিকাহ্বযা||৩|| (তথা মূষিকপর্ণী চাপ্যুপচিত্রা চ শম্বরী| প্রত্যক্শ্রেণী সুতশ্রেণী দন্তী র(চ)ণ্ডা চ কীর্তিতা )|

তযোঃ পর্যাযানাহ- দন্তীত্যাদি||৩||

Adhikarana 3 (4) · Śloka 4

তযোর্মূলানি সঙ্গৃহ্য স্থিরাণি বহলানি চ| হস্তিদন্তপ্রকারাণি শ্যাবতাম্রাণি বুদ্ধিমান্||৪||

স্থিরাণীতি সারভূতানি| বহলানীতি ঘনত্বক্কানি| হস্তিদন্তপ্রকারাণীতি অন্তপূর্বোপচিতানি| শ্যাবতাম্রাণীতি যথাক্রমেণ দন্ত্যাঃ শ্যাবানি, দ্রবন্ত্যাস্তাম্রাণি||৪||

Adhikarana 4 (5) · Śloka 5

পিপ্পলীমধুলিপ্তানি স্বেদযেন্মৃত্কুশান্তরে| শোষযেদাতপেঽগ্ন্যর্কৌ হতো হ্যেষাং বিকাশিতাম্||৫||

স্বেদযেন্মৃত্কুশান্তর ইতি পিপ্পলীমধুককল্কাভ্যাং পরিলিপ্য কুশৈঃ পরিবেষ্ট্য ততো মৃদাবলিপ্তানি স্বেদযেত্| অগ্নিস্বেদাতপশোষণফলমাহ- অগ্ন্যর্কৌ হতো হ্যেষাং বিকাশিতামিতি|- এষাং দন্তীদ্রবন্তীমূলানাং বিকাশিতালক্ষণং গুণং স্বেদোপশোষণাভ্যামগ্ন্যর্কৌ হতঃ; তেন নাতিদোষাণি দন্তীদ্রবন্তীমূলানি স্যুরিতি ভাবঃ||৫||

Adhikarana 5 (6) · Śloka 6

তীক্ষ্ণোষ্ণান্যাশুকারীণি বিকাশীনি গুরূণি চ| বিলাযযন্তি দোষৌ দ্বৌ মারুতং কোপযন্তি চ||৬||

তীক্ষ্ণোষ্ণানীত্যাদিনা তেষাং গুণকথনম্| দোষৌ দ্বাবিতি পিত্তশ্লেষ্মাণৌ||৬||

Adhikarana 6 (7-14) · Śloka 14

দধিতক্রসুরামণ্ডৈঃ পিণ্ডমক্ষসমং তযোঃ| প্রিযালকোলবদরপীলুশীধুভিরেব চ||৭|| পিবেদ্গুল্মোদরী দোষৈরভিখিন্নশ্চ যো নরঃ| গোমৃগাজরসৈঃ পাণ্ডুঃ কৃমিকোষ্ঠী ভগন্দরী||৮|| তযোঃ কল্কে কষাযে চ দশমূলরসাযুতে| কক্ষ্যালজীবিসর্পেষু দাহে চ বিপচেদ্ঘৃতম্||৯|| তৈলং মেহে চ গুল্মে চ সোদাবর্তে কফানিলে| চতুঃস্নেহং শকৃচ্ছুক্রবাতসঙ্গানিলার্তিষু||১০|| রসে দন্ত্যজশৃঙ্গযোশ্চ গুডক্ষৌদ্রঘৃতান্বিতঃ| লেহঃ সিদ্ধো বিরেকার্থে দাহসন্তাপমেহনুত্ ||১১|| বাততর্ষে জ্বরে পৈত্তে স্যাত্ স এবাজগন্ধযা| দন্তীদ্রবন্ত্যোর্মূলানি পচেদামলকীরসে||১২|| ত্রীংস্তু তস্য কষাযস্য ভাগৌ দ্বৌ ফাণিতস্য চ| তপ্তে সর্পিষি তৈলে বা ভর্জযেত্তত্র চাবপেত্||১৩|| কল্কং দন্তীদ্রবন্ত্যোশ্চ শ্যামাদীনাং চ ভাগশঃ| তত্সিদ্ধং প্রাশযেল্লেহং সুখং তেন বিরিচ্যতে||১৪||

দধীত্যাদিনা সপ্তভির্দ্রব্যৈঃ সপ্তপ্রযোগানাহ| শীধুশব্দঃ প্রিযালাদিভিশ্চতুর্ভিঃ পৃথক্ সম্বধ্যতে| অভিখিন্ন ইতি আক্রান্তঃ| গোমৃগাজরসৈরিত্যত্রাপি ‘পিণ্ডমক্ষসমং তযোঃ’ ইত্যনুবর্ততে| অত্রাপি গবাদিরসৈস্ত্রিভিস্ত্রযঃ প্রযোগা ভবন্তি| তযোরিত্যাদিনা ত্রীন্ স্নেহযোগানাহ| অনযোঃ কল্ককষাযেণ দশমূলরসতুল্যভাগেন ঘৃতং পচেদ্বিসর্পাদিষু, তৈলং তু পূর্ববন্মেহাদিষু, চতুঃ স্নেহং তু শকৃচ্ছুক্রবাতসঙ্গাদিষু| রসে ইত্যাদিনা একো লেহঃ| বাততর্ষে ইত্যাদিনা দ্বিতীযঃ| স এবাজগন্ধযেত্যনেন পূর্বোক্তলেহে এবাজশৃঙ্গীস্থানেঽজগন্ধাদানং বিশিষ্টং খ্যাপযতি| দন্তীত্যাদিনা তৃতীযো লেহঃ| ভাগশ ইতি প্রত্যেকভাগগ্রহণেন| এবমেতদন্তৈঃ প্রযোগৈরাদ্যঃ ষোডশকো ভবেত্||৭-১৪||

Adhikarana 7 (15-19) · Śloka 19

রসে চ দশমূলস্য তথা বৈভীতকে রসে| হরীতকীরসে চৈব লেহানেবং পচেত্ পৃথক্ ||১৫|| তযোর্বিল্বসমং চূর্ণং তদ্রসেনেব ভাবিতম্| অসৃষ্টে বিশি বাতোত্থে গুল্মে চাম্লযুতং শুভম্||১৬|| পাটযিত্বেক্ষুকাণ্ডং বা কল্কেনালিপ্য চান্তরা| স্বেদযিত্বা ততঃ খাদেত্ সুখং তেন বিরিচ্যতে||১৭|| মূলং দন্তীদ্রবন্ত্যোশ্চ সহ মুদ্গৈর্বিপাচযেত্| লাববর্তীরকাদ্যৈশ্চ তে রসাঃ স্যুর্বিরেচনে||১৮|| তযোর্বাঽপি কষাযেণ যবাগূং জাঙ্গলং রসম্| মাষযূষং চ সংস্কৃত্য দদ্যাত্তৈশ্চ বিরিচ্যতে||১৯||

রসে চেত্যাদৈ এবমিত্যনেন পূর্বোক্তলেহত্রযমতিদিশতি| তযোরিত্যাদিকশ্চতুর্থঃ; তযোরিতি দন্তীদ্রবন্তীমূলযোঃ| অসৃষ্টে ইতি বিবদ্ধে| পাটযিত্বেত্যাদিনা পঞ্চমঃ| কল্কেনালিপ্য চান্তরেতি দন্তীদ্রবন্তীকল্কেন পাটিতেক্ষুকাণ্ডমধ্যে আলিপ্য| মূলং দন্তীত্যাদিনাঽষ্টৌ কৃতাকৃতরসানাহ| অত্র লাববর্তীরকাদযঃ “লাবো বর্তীরকশ্চৈব বার্তীকঃ সকপিঞ্জলঃ| চকোরশ্চোপচক্রশ্চ ককুভো রক্তচর্মকঃ” (সূ.অ.২৭) ইতি গ্রন্থেনাষ্টাবুক্তাঃ; তেষাং প্রত্যেকযোগাদষ্টৌ রসা ভবন্তি| তযোর্বাঽপীত্যাদিনা যবাগূজাঙ্গলরসযোগং মাষযূষযোগং চাহ| এবমেতৈর্দ্রবৈঃ পূর্বযোগৈশ্চ মিলিত্বা দ্বিতীযঃ ষোডশকো ভবেত্||১৫-১৯||

Adhikarana 8 (20-35) · Śloka 35

তত্কষাযাত্ত্রযো ভাগা দ্বৌ সিতাযাস্তথৈব চ| একো গোধূমচূর্ণানাং কার্যা চোত্কারিকা শুভা||২০|| মোদকো বাঽস্য কল্পেন কার্যস্তচ্চ বিরেচনম্| তযোশ্চাপি কষাযেণ মদ্যান্যস্যোপকল্পযেত্||২১|| দন্তীক্বাথেন চালোড্য দন্তীতৈলেন সাধিতান্| গুডলাবণিকান্ ভক্ষ্যান্ বিবিধান্ ভক্ষযেন্নরঃ||২২|| দন্তীং দ্রবন্তীং মরিচং যবানীমুপকুঞ্চিকাম্| নাগরং হেমদুগ্ধাং চ চিত্রকং চেতি চূর্ণিতম্||২৩|| সপ্তাহং ভাবযেন্মূত্রে গবাং পাণিতলং ততঃ| পিবেত্ঘৃতেন জীর্ণে তু বিরিক্তশ্চাপি তর্পণম্||২৪|| সর্বরোগহরং মুখ্যং সর্বেষ্বৃতুষু যৌগিকম্| চূর্ণং তদনপাযিত্বাদ্বালবৃদ্ধেষু পূজিতম্||২৫|| দুর্ভক্তাজীর্ণপার্শ্বার্তিগুল্মপ্লীহোদরেষু চ| গণ্ডমালাসু বাতে চ পাণ্ডুরোগে চ শস্যতে||২৬|| পলং চিত্রকদন্ত্যোশ্চ হরীতক্যাশ্চ বিংশতিঃ| ত্রিবৃত্পিপ্পলিকর্ষৌ দ্বৌ গুডস্যাষ্টপলেন তত্||২৭|| বিনীয মোদকান্ কুর্যাদ্দশৈকং ভক্ষযেত্ততঃ| উষ্ণাম্বু চ পিবেচ্চানু দশমে দশমেঽহ্নি চ||২৮|| এতে নিষ্পরিহারাঃ স্যুঃ সর্বরোগনিবর্হণাঃ| গ্রহণীপাণ্ডুরোগার্শঃকণ্ডূকোঠানিলাপহাঃ||২৯|| দন্তীদ্বিপলনির্যূহো দ্রাক্ষার্ধপ্রস্থসাধিতঃ | বিরেচনং পিত্তকাসে পাণ্ডুরোগে চ শস্যতে||৩০|| দন্তীকল্কং সমগুডং শীতবারিযুতং পিবেত্| বিরেচনং মুখ্যতমং কামলাহরমুত্তমম্||৩১|| শ্যামাদন্তীরসে গৌডঃ পিপ্পলীফলচিত্রকৈঃ| লিপ্তেঽরিষ্টোঽনিলশ্লেষ্মপ্লীহপাণ্ডূদরাপহঃ||৩২|| তথা দন্তীদ্রবন্ত্যোশ্চ কষাযে সাজগন্ধযোঃ| গৌডঃ কার্যোঽঽজশৃঙ্গ্যা বা স বৈ সুখবিরেচনঃ||৩৩|| তচ্চূর্ণক্বাথমাষাম্বুকিণ্বতোযসমুদ্ভবা| মদিরা কফগুল্মাল্পবহ্নিপার্শ্বকটিগ্রহে||৩৪|| অজগন্ধাকষাযেণ সৌবীরকতুষোদকে| সুরাকম্পিল্লকে যোগৌ লোধ্রবচ্চ তযোঃ স্মৃতৌ||৩৫||

তত্কষাযাদিত্যাদিনা উত্কারিকাযোগং মোদকযোগং চাহ| তত্কষাযাদিতি দন্তীদ্রবন্তীকষাযাত্| মোদককরণেঽপি তত্কষাযাত্ত্রযো ভাগা ইত্যাদিবিধানমনুবর্ততে| তযোশ্চাপি কষাযেণ মদ্যানীতি তৃতীযঃ| দন্তীত্যাদিনা ভক্ষ্যযোগশ্চতুর্থঃ| দন্তীং দ্রবন্তীং মরিচমিত্যাদিকঃ পঞ্চমঃ| হেমদুগ্ধা স্বর্ণক্ষীরী| চূর্ণিতমিত্যন্তং পিবেদিতি সম্বন্ধঃ| পলমিত্যাদিকঃ ষষ্ঠঃ| হরীতক্যাশ্চ বিংশতিরিতি আকৃতিমানেন| অযং যোগস্তন্ত্রান্তরে “অগস্ত্যমোদক” ইতি খ্যাতঃ| দন্তীদ্বিপলেত্যাদিকঃ সপ্তমঃ| অত্র দন্তীদ্বিপলদ্রাক্ষার্ধপ্রস্থযোঃ ক্বাথঃ কর্তব্যঃ| দন্তীকল্কমিত্যাদিকোঽষ্টমঃ| শ্যামেত্যাদিকো নবমঃ| গৌড ইতি গুডপ্রকৃতিকঃ| লিপ্তে ইত্যত্র ‘ঘটে’ ইতি শেষঃ| তথা দন্তীদ্রবন্ত্যোশ্চেত্যাদিকো দশমঃ| তথেত্যনেন পূর্বযোগোক্তপিপ্পল্যাদিঘটাবলেপ অতিদিশ্যতে| অজশৃঙ্গ্যা বেত্যাদিক একাদশঃ| তথা অজশৃঙ্গ্যা দন্তীদ্রবন্ত্যোশ্চ কষাযে গৌডোঽরিষ্টঃ কার্য ইতি সম্বন্ধঃ| তচ্চূর্ণেত্যাদিকো দ্বাদশঃ| অত্র তযোর্দন্তীদ্রবন্ত্যোশ্চূর্ণক্বাথাভ্যাং তথা মাষাম্বুনা কিণ্বকরণপূর্বকং যা সুরা কৃতা তত্সুরোদ্ভবা মদিরা কর্তব্যেতি বাক্যার্থঃ| অজগন্ধেত্যাদিনা যোগদ্বযমাহ| তত্রাজগন্ধাকষাযেণ দন্তীদ্রবন্তীভ্যাং সৌবীরকতুষোদকে কর্তব্যে| সুরেত্যাদিনাঽপরং যোগদ্বযমাহ| লোধ্রবচ্চ তযোরিতি যথা লোধ্রকল্পেষু “সুরা লোধ্রকষাযেণ” ইত্যাদিনা সুরা প্রোক্তা, তথা “কম্পিল্লককষাযেণ” (ক.অ.৯) ইত্যাদিনা কম্পিল্লকযোগ উক্তঃ, তথা তযোরপি দন্তীদ্রবন্ত্যোর্লোধ্রস্থানে প্রক্ষেপাত্ সুরাযোগঃ সৌবীরকতুষোদকবিধানেনৈব কর্তব্যঃ| ইতি তৃতীযঃ ষোডশকঃ||২০-৩৫||

Adhikarana 9 (36-40) · Śloka 40

তত্র শ্লোকাঃ- (দধ্যাদিষু ত্রযঃ পঞ্চ প্রিযালাদ্যৈস্ত্রযো রসে| স্নেহেষু বৈ ত্রযো লেহ্যাঃ ষট্ চূর্ণে ত্বেক এব চ||৩৬|| ইক্ষাবেকস্তথা মুদ্গমাংসানাং চ রসাস্ত্রযঃ| যবাগ্বাদৌ ত্রযশ্চৈব উক্ত উত্কারিকাবিধৌ||৩৭|| একশ্চ মোদকে মদ্যে চৈকস্তত্ক্বাথতৈলকে| চূর্ণমেকং পুনশ্চৈকো মোদকঃ পঞ্চ চাসবে||৩৮|| একঃ সৌবীরকেঽথৈকো যোগঃ স্যাত্তু তুষোদকে| একা সুরৈকঃ কম্পিল্লে তথা পঞ্চ ঘৃতে স্মৃতাঃ )||৩৯|| দন্তীদ্রবন্তীকল্পেঽস্মিন্ প্রোক্তাঃ ষোডশকাস্ত্রযঃ| নানাবিধানাং যোগানাং ভক্তিদোষামযান্প্রতি||৪০||

দন্তীত্যাদ্যধ্যাযার্থসঙ্গ্রহো ব্যক্ত এব| ভক্তিদোষামযান্ প্রতি উক্তানাং নানাবিধানাং যোগানাং ত্রযঃ ষোডশকাঃ প্রোক্তা ইতি যোজনা| ভক্তিঃ ইচ্ছা||৩৬-৪০||

Adhikarana 10 (41-42) · Śloka 42

ত্রিশতং পঞ্চপঞ্চাশদ্যোগানাং বমনে স্মৃতম্| দ্বে শতে নবকাঃ পঞ্চ যোগানাং তু বিরেচনে||৪১|| ঊর্ধ্বানুলোমভাগানামিত্যুক্তানি শতানি ষট্| প্রাধান্যতঃ সমাশ্রিত্য দ্রব্যাণি দশ পঞ্চ চ||৪২||

সম্প্রতি কল্পস্থানার্থসঙ্গ্রহমাহ- ত্রিশতমিত্যাদিনা| ত্রিশতং পঞ্চপঞ্চাশদিতি পঞ্চপঞ্চাশদ্যোগাধিকং ত্রিশতম্| প্রাধান্যতঃ সমাশ্রিত্যেতি প্রাধান্যেন মদনফলাদীনি দ্রবন্তীপর্যন্তানি পঞ্চদশদ্রব্যাণি যোগব্যপদেশতযাঽঽশ্রিত্য||৪১-৪২||

Adhikarana 11 (43-44) · Śloka 44

ভবন্তি চাত্র- যদ্ধি যেন প্রধানেন দ্রব্যং সমুপসৃজ্যতে| তত্সঞ্জ্ঞকঃ স যোগো বৈ ভবতীতি বিনিশ্চযঃ ||৪৩|| ফলাদীনাং প্রধানানাং গুণভূতাঃ সুরাদযঃ| তে হি তান্যনুবর্তন্তে মনুজেন্দ্রমিবেতরে||৪৪||

অথাত্র বমনাদিযোগেষু দ্রব্যান্তরাণাং সুরাদীনামপি বিদ্যমানত্বাত্ কথং মদনফলাদ্যাশ্রযবত্ত্বেনৈবামী যোগা ব্যপদিশ্যন্ত ইত্যাহ- যদ্ধীত্যাদি| যদ্যপি মদনাদিভিঃ সুরাদিভিশ্চ মিলিত্বৈবামী যোগাঃ ক্রিযন্তে, তথাঽপি ফলাদীনাং প্রাধান্যাত্ ফলাদীনাং যোগা এতে ইতি ব্যপদেশো ভবতি, ন সুরাদিযোগা ইতি| গুণভূতা ইতি অপ্রধানভূতাঃ | সুরাদীনামপ্রাধান্য এব হেতুমাহ- তে হি তান্যনুবর্তন্ত ইতি; সুরাদযো হি মদনাদীনি বমনবিরেচনপ্রকারকার্যানুগুণতযাঽপ্রতীঘাতেন চানুবর্তন্তে||৪৩-৪৪||

Adhikarana 12 (45) · Śloka 45

বিরুদ্ধবীর্যমপ্যেষাং প্রধানানামবাধকম্| অধিকং তুল্যবীর্যে হি ক্রিযাসামর্থ্যমিষ্যতে ||৪৫||

ননু যে তাবদনুগুণা মদনাদীনাং তে গুণভূতা ভবন্তু, বিপরীতা যে দন্ত্যা উগ্রতাযা মাংসরসাদযঃ, তথা এলাদযো হৃদ্যতযা বমনপ্রতিকূলা মদনাদীনাং তে কথং গুণভূতা ইত্যাহ- বিরুদ্ধবীর্যমপ্যেষাং প্রধানানামবাধকমিতি| বিরুদ্ধবীর্যমপীতি বিরেচনরূপকার্যাপ্রবাধকতযা গুণভূতমিত্যর্থঃ| যদি হি বিরুদ্ধবীর্যং গুণভূতং ন স্যাত্ তদা মদনাদীনাং কার্যং প্রতিহন্যাত্; বিরুদ্ধস্যাপি চ কার্যাপ্রতীঘাতোঽবশ্যমবাধকত্বমেবেতি ভাবঃ| বিপরীতস্য কার্যাবাধনরূপং সাহায্যমভিধায তুল্যবীর্যস্য কার্যমাহ- অধিকমিত্যাদি| তুল্যবীর্যে সংযুক্তে সতি ক্রিযাসামর্থ্যমধিকং ভবতীত্যর্থঃ||৪৫||

Adhikarana 13 (46) · Śloka 46

ইষ্টবর্ণরসস্পর্শগন্ধার্থং প্রতি চামযম্| অতো বিরুদ্ধবীর্যাণাং প্রযোগ ইতি নিশ্চিতম্||৪৬||

অথ তুল্যবীর্যং তাবত্ ক্রিযাসামর্থ্যাধিক্যকারকং , তেন তত্সংযোগোঽস্তু, বিরুদ্ধবীর্যসংযোগাস্তু কিমর্থং ক্রিযন্ত ইত্যাহ- ইষ্টেত্যাদি| ইষ্টবর্ণত্বাদিসম্পত্ত্যর্থম্; অতো মদনফলাদের্বিরুদ্ধবীর্যাণাং প্রযোগস্তথা বিরুদ্ধামযং চ প্রতি বিরুদ্ধবীর্যাণাং প্রযোগো বমনবিরেচনহর্তব্যামযবিশেষে যৌগিক ইত্যর্থঃ||৪৬||

Adhikarana 14 (47) · Śloka 48

ভূযশ্চৈষাং বলাধানং কার্যং স্বরসভাবনৈঃ| সুভাবিতং হ্যল্পমপি দ্রব্যং স্যাদ্বহুকর্মকৃত্||৪৭|| স্বরসৈস্তুল্যবীর্যৈর্বা তস্মাদ্দ্রব্যাণি ভাবযেত্|৪৮|

অথ মদনফলাদীনাং বীর্যোত্কর্ষাদিকে বিধিমাহ- ভূযশ্চৈষামিত্যাদি| তুল্যবীর্যৈর্বেতি তুল্যবীর্যৈঃ স্বরসৈঃ ক্বাথৈর্বা||৪৭||-

Adhikarana 15 (48) · Śloka 49

অল্পস্যাপি মহার্থত্বং প্রভূতস্যাল্পকর্মতাম্||৪৮|| কুর্যাত্ সংযোগবিশ্লেষকালসংস্কারযুক্তিভিঃ|৪৯|

তুল্যাতুল্যবীর্যসংযোগাদিকার্যমাহ- অল্পস্যাপীত্যাদি| তত্রাল্পমাত্রস্য সমানবীর্যসংযোগান্মহার্থত্বং ভবতি, তথা বিরুদ্ধবীর্যসংযোগাত্ প্রভূতমাত্রস্যাপ্যল্পকর্মতা কর্তব্যা| ইযং চাল্পকর্মকতা প্রভূতভেষজস্য দীপ্তিকারণকোষ্ঠব্যাপ্ত্যাদিপ্রযোজনাত্ ক্রিযতে, তেন ন নিষ্প্রযোজনা| বিশ্লেষাদপ্যল্পস্য মহার্থত্বং বিরুদ্ধবীর্যবিশ্লেষাদ্বোদ্ধব্যং; সমাধিকবিশ্লেষাত্তু প্রভূতস্যাল্পকর্মতা জ্ঞেযা| এবং সংস্কারাদপি সমানাসমানগুণান্মহার্থত্বমল্পকর্মতা বা যুক্তা| অল্পস্যাপি মহার্থত্বং যথা স্নিগ্ধেঽল্পমাত্রমপি শোধনং বহুদোষহরণায ভবতি, তদ্বিপর্যযেণ প্রভূতস্যাল্পকর্মতা উদাহরণীযা||৪৮||-

Adhikarana 16 (49-50) · Śloka 50

প্রদেশমাত্রমেতাবদ্দ্রষ্টব্যমিহ ষট্শতম্||৪৯|| স্ববুদ্ধ্যৈবং সহস্রাণি কোটীর্বাঽপি প্রকল্পযেত্| বহুদ্রব্যবিকল্পত্বাদ্যোগসঙ্খ্যা ন বিদ্যতে||৫০||

সম্প্রতি, উক্তপ্রযোগষট্শতবীজেনানুক্তপ্রযোগকল্পনং দর্শযন্নাহ- প্রদেশেত্যাদি| প্রদেশ একদেশঃ| অথ কস্মান্নিঃশেষেণ নৈব যোগা অভিধীযন্ত ইত্যাহ- বহুদ্রব্যেত্যাদি| অসঙ্খ্যত্বান্নিঃশেষানভিধানমিতি ভাবঃ||৪৯-৫০||

Adhikarana 17 (51-52) · Śloka 53

তীক্ষ্ণমধ্যমৃদূনাং তু তেষাং শৃণুত লক্ষণম্| সুখং ক্ষিপ্রং মহাবেগমসক্তং যত্ প্রবর্ততে||৫১|| নাতিগ্লানিকরং পাযৌ হৃদযে ন চ রুক্করম্| অন্তরাশযমক্ষিণ্বন্ কৃত্স্নং দোষং নিরস্যতি||৫২|| বিরেচনং নিরূহো বা তত্তীক্ষ্ণমিতি নির্দিশেত্|৫৩|

অথ বমনবিরেচনানাং তদুপোদ্ঘাতাচ্চ নিরূহাণাং তীক্ষ্ণমধ্যমৃদুতাযা লক্ষণং কারণং চাহ- তীক্ষ্ণেত্যাদি| সুখমিতি দুঃখমকুর্বন্| অসক্তমিতি অপ্রতিবদ্ধম্| নাতিগ্লানিকরং পাযাবিতি বিরেচনস্য নিরূহস্য চ, হৃদযে ন চ রুক্করমিতি তু বমনস্য লক্ষণং জ্ঞেযম্| অক্ষিণ্বন্নিতি অপীডযন্| বিরেচনমিতি বমনং বিরেচনং চ; উক্তং হি- উভযং হি শরীরদোষমলবিরেচনাদ্বিরেচনশব্দং লভতে (ক.অ.১) ইতি||৫১-৫২||-

Adhikarana 18 (53-56) · Śloka 56

জলাগ্নিকীটৈরস্পৃষ্টং দেশকালগুণান্বিতম্||৫৩|| ঈষন্মাত্রাধিকৈর্যুক্তং তুল্যবীর্যৈঃ সুভাবিতম্| স্নেহস্বেদোপপন্নস্য তীক্ষ্ণত্বং যাতি ভেষজম্||৫৪|| কিঞ্চিদেভির্গুণৈর্হীনং পূর্বোক্তৈর্মাত্রযা তথা| স্নিগ্ধস্বিন্নস্য বা সম্যঙ্মধ্যং ভবতি ভেষজম্||৫৫|| মন্দবীর্যং বিরূক্ষস্য হীনমাত্রং তু ভেষজম্| অতুল্যবীর্যৈঃ সংযুক্তং মৃদু স্যান্মন্দবেগবত্||৫৬||

জলাগ্নীত্যাদিনা তীক্ষ্ণত্বে কারণমাহ| দেশকালগুণান্বিতমিতি অনুগুণদেশকালপ্রাপ্ত্যোত্কৃষ্টগুণবত্| স্নেহস্বেদোপপন্নস্যেতি সুস্নিগ্ধস্বিন্নস্য| কিঞ্চিদিত্যাদিনা মধ্যস্য বমনাদেঃ কারণলক্ষণে আহ| এভির্গুণৈরিত্যনেন ক্ষিপ্রত্বাদি জলাগ্নিকীটাস্পৃষ্ঠত্বাদি চ প্রত্যবমৃষ্যতে| মন্দবীর্যমিত্যাদিনা মৃদূনাং লক্ষণং কারণং চাহ| মন্দবেগবদিতি লক্ষণং, শেষং তু কারণম্||৫৩-৫৬||

Adhikarana 19 (57) · Śloka 57

অকৃত্স্নদোষহরণাদশুদ্ধী তে বলীযসাম্| মধ্যাবরবলানাং তু প্রযোজ্যে সিদ্ধিমিচ্ছতা||৫৭||

তীক্ষ্ণাদিশুদ্ধিবিষযাবচারণার্থমাহ- অকৃত্স্নেত্যাদি| তে মধ্যাল্পশুদ্ধী বলীযসাং পুরুষাণাং কৃত্স্নদোষং যস্মান্ন নির্হরতঃ, তস্মাদশুদ্ধী| অকৃত্স্নদোষহরণাদিতি হেতুবর্ণনেন যদা বলীযসোঽল্পদোষতযা কৃত্স্নদোষহরণকারিকে মধ্যাল্পশুদ্ধী ভবতঃ, তদা সম্যক্শুদ্ধী এব তে ইতি সূচযতি| মধ্যেত্যাদি মধ্যবলে মধ্যা, অবরবলে তু মৃদ্বী শুদ্ধিঃ প্রযোজ্যেতি বাক্যার্থঃ| তত্র প্রযোজ্যভাষযা অসম্যক্শুদ্ধী অপি বলাপেক্ষযা কর্তব্যে, মধ্যাবরৌ প্রতি তযোঃ সম্যক্শুদ্ধিকর্তৃত্বং ভবতীতি দর্শযতি||৫৭||

Adhikarana 20 (58) · Śloka 58

তীক্ষ্ণো মধ্যো মৃদুর্ব্যাধিঃ সর্বমধ্যাল্পলক্ষণঃ| তীক্ষ্ণাদীনি বলাবেক্ষী ভেষজান্যেষু যোজযেত্||৫৮||

ব্যাধিতীক্ষ্ণত্বাদিবিভাগেন বিশুদ্ধৌ তীক্ষ্ণত্বাদিবিধানমাহ- তীক্ষ্ণো মধ্য ইত্যাদি| সর্বমধ্যাল্পলক্ষণ ইতি যথাসঙ্খ্যং তীক্ষ্ণাদিব্যাধিলক্ষণং; সর্বলক্ষণঃ তীক্ষ্ণঃ, মধ্যলক্ষণঃ মধ্যঃ, অল্পলক্ষণঃ মৃদুর্ব্যাধিঃ| বলাবেক্ষীত্যনেন ব্যাধেস্তীক্ষ্ণত্বে যদি বলং মহদ্ভবতি তদৈব তীক্ষ্ণশোধনং কর্তব্যমিতি দর্শযতি||৫৮||

Adhikarana 21 (59) · Śloka 59

দেযং ত্বনির্হৃতে পূর্বং পীতে পশ্চাত্ পুনঃ পুনঃ| ভেষজং বমনার্থীযং প্রায আপিত্তদর্শনাত্||৫৯||

বমনে ক্রিযমাণেঽবস্থাবিশেষকর্তব্যমাহ- দেযমিত্যাদি| এবং পীতে বমনে সতি অনির্হৃতে দোষে পশ্চাত্ পুনঃ পুনর্বমনার্থীযং ভেষজং দেযম্| আপিত্তদর্শনাদিতি যাবত্ পিত্তং ন দৃশ্যতে তাবত্ পুনঃ পুনর্বমনং দেযম্| বমনং হি পিত্তান্ততযা সম্যগ্যুক্তং ভবতি| উক্তং হি- “পিত্তান্তমিষ্টং বমনং বিরেকাদর্ধং” (সি.অ.১) ইতি||৫৯||

Adhikarana 22 (60) · Śloka 60

বলত্রৈবিধ্যমালক্ষ্য দোষাণামাতুরস্য চ| পুনঃ প্রদদ্যাদ্ভৈষজ্যং সর্বশো বা বিবর্জযেত্||৬০||

পুনঃ পুনর্ভৈষজ্যপ্রযোগস্যাপবাদবিষযমুচিতবিষযং চ দর্শযন্নাহ- বলেত্যাদি| বলবতি দোষে পুরুষেঽপি পুনঃ প্রযোজ্যং ভৈষজ্যং, হীনবলে দোষে পুরুষে চ সর্বশো বা ভেষজং শোধনার্থং বিবর্জযেত্, শোধনং ন কুর্যাদিত্যর্থঃ| বাশব্দেন চ মধ্যমবলে পুরুষে দোষে চ ন সর্বথা বিবর্জনেনৈকবারপ্রযোগং শোধনস্য দর্শযতি||৬০||

Adhikarana 23 (61) · Śloka 61

নির্হৃতে বাঽপি জীর্ণে বা দোষনির্হরণে বুধঃ| ভেষজেঽন্যত্প্রযুঞ্জীত প্রার্থযন্সিদ্ধিমুত্তমাম্||৬১||

নির্হৃতে ইত্যাদৌ দোষনির্হরণে ইতি দোষনির্হরণকপ্রযোজনে ভেষজে| নির্হৃতে ইতি দোষমনির্হৃত্যৈব নির্গতে| জীর্ণে বেতি যেন বমনমধিকৃত্যৈতদুচ্যতে, তেন বমনস্য পাককালাপ্রতীক্ষৈবেতি ‘অপক্বং বমনং’ ইত্যাদিনা বক্তব্যম্| জীর্ণসদৃশতা চ বমনস্য ক্ষোভাকর্তৃতযা পাকোন্মুখতযা চ জ্ঞেযা| অন্যত্ প্রযুঞ্জীতেতি বমনার্থভেষজপানানন্তরং তদহরেব দদ্যাত্||৬১||

Adhikarana 24 (62) · Śloka 62

অপক্বং বমনং দোষং পচ্যমানং বিরেচনম্| নির্হরেদ্বমনস্যাতঃ পাকং ন প্রতিপালযেত্||৬২||

বমনপ্রযোগেষ্বযোগপ্রতীকারার্থং ভেষজান্তরপ্রযোগে কর্তব্যে পাককালাপ্রতীক্ষণং সোপপত্তিকমাহ- অপক্বমিত্যাদি||৬২||

Adhikarana 25 (63) · Śloka 63

পীতে প্রস্রংসনে দোষান্ন নির্হত্য জরাং গতে| বমিতে চৌষধে ধীরঃ পাযযেদৌষধং পুনঃ||৬৩||

বমনে আবশ্যকং কর্তব্যমভিধায বিরেচনেঽপ্যাহ- পীতে প্রস্রংসনে ইত্যাদি| বমিতে চৌষধে ইতি বিরেচনৌষধমাত্রে বমিতে| পুনরিতি তদহরেব||৬৩||

Adhikarana 26 (64-65) · Śloka 65

দীপ্তাগ্নিং বহুদোষং তু দৃঢস্নেহগুণং নরম্| দুঃশুদ্ধং তদহর্ভুক্তং শ্বোভূতে পাযযেত্ পুনঃ||৬৪|| দুর্বলো বহুদোষশ্চ দোষপাকেন যো নরঃ| বিরিচ্যতে শনৈর্ভোজ্যৈর্ভূযস্তমনুসারযেত্ ||৬৫||

বিরেচনেন স্তোকদোষহরণে সতি কর্তব্যমাহ- দীপ্তাগ্নিমিত্যাদি| দৃঢস্নেহগুণমিত্যনেন স্নেহলক্ষণো গুণো দেহে যদা দৃঢো নাস্তি তদাঽস্য ভেষজং ন দাতব্যং, কিন্তু স্নেহ এব তাবত্ কর্তব্যঃ; অসম্যক্স্নিগ্ধে হি পুনরপি ক্রিযমাণং বিরেচনমসম্যগ্যোগাযৈব ভবতি| দুঃশুদ্ধমিতি অযোগেনাবিশুদ্ধম্ | শ্বোভূতে, দিনান্তরে ভূতে, কিংবা ‘শ্বো ভূযঃ’ ইতি পাঠঃ| দোষপাকেনেতি পক্বদোষেঽবিবদ্ধত্বাদ্বহুত্বাচ্চ শনৈর্বিরিচ্যতে| ভোজ্যৈরিতি অনুলোমনৈঃ| অত্র চ প্রবৃত্তদোষেঽতিযোগভযান্ন পুনর্বিরেচনপ্রযোগমনুজানীতে||৬৪-৬৫||

Adhikarana 27 (66) · Śloka 66

বমনৈশ্চ বিরেকৈশ্চ বিশুদ্ধস্যাপ্রমাণতঃ | ভোজনান্তরপানাভ্যাং দোষশেষং শমং নযেত্||৬৬||

বমনবিরেচনাভ্যাং কিঞ্চিচ্ছেষীকৃতদোষপ্রতীকারার্থমাহ- বমনৈশ্চেত্যাদি| অত্র বহুবচনং বেগবহুত্বাপেক্ষযা| অপ্রমাণত ইতি ন নিঃশেষেণ| তত্র ভোজনং পাচনং যবাগ্বাদিভোজনম্| অন্তরপানং কষাযপানম্| যে তু ‘প্রমাণতঃ’ ইতি পঠন্তি, তে সম্যক্শুদ্ধাবপি কোষ্ঠোপলেপকদোষপ্রশমনার্থং ভোজনান্তরপানং ব্যাখ্যানযন্তি||৬৬||

Adhikarana 28 (67) · Śloka 67

দুর্বলং শোধিতং পূর্বমল্পদোষং চ মানবম্| অপরিজ্ঞাতকোষ্ঠং চ পাযযেতৌষধং মৃদু||৬৭||

মৃদুশোধনোপপাদনীযমাহ- দুর্বলমিত্যাদি| শোধিতং পূর্বমিতি পূর্বশোধিতস্য দুর্বলতযা মৃদু ভেষজং দেযং, তীক্ষ্ণেন হি বলভ্রংশোঽতিযোগশ্চ স্যাত্||৬৭||

Adhikarana 29 (68) · Śloka 68

শ্রেযো মৃদ্বসকৃত্পীতমল্পবাধং নিরত্যযম্| ন চাতিতীক্ষ্ণং যত্ ক্ষিপ্রং জনযেত্প্রাণসংশযম্||৬৮||

মৃদুভেষজপ্রযোগোপপত্তিমাহ- শ্রেয ইত্যাদি| অসকৃত্পীতমিতি অসকৃত্পীতমল্পবাধং ভবতীত্যর্থঃ| শ্রেয ইতি শ্রেযস্ত্বং চাস্যাতিব্যাপত্তিকরতীক্ষ্ণাপেক্ষযা জ্ঞেযম্| ন চাতিতীক্ষ্ণমিতি ন চাতিতীক্ষ্ণং দুর্বলাদীনাং দেযং; যস্মাদতিতীক্ষ্ণং দুর্বলাদীন্ প্রাপ্য ক্ষিপ্রং প্রাণসংশযং জনযেত্||৬৮||

Adhikarana 30 (69) · Śloka 69

দুর্বলোঽপি মহাদোষো বিরেচ্যো বহুশোঽল্পশঃ| মৃদুভির্ভেষজৈর্দোষা হন্যুর্হ্যেনমনির্হৃতাঃ||৬৯||

দুর্বলে বহুদোষে কর্তব্যমাহ- দুর্বলোঽপীত্যাদি| বহুশোঽল্পশ ইতি পুনঃ পুনঃ স্তোকমাত্রযা| এবম্ভূতানাং মহাদোষনির্হরণে হেতুমাহ- দোষা হন্যুর্হ্যেনমনির্হৃতা ইতি||৬৯||

Adhikarana 31 (70-72) · Śloka 72

যস্যোর্ধ্বং কফসংসৃষ্টং পীতং যাত্যানুলোমিকম্| বমিতং কবলৈঃ শুদ্ধং লঙ্ঘিতং পাযযেত্তু তম্||৭০|| বিবদ্ধেঽল্পে চিরাদ্দোষে স্রবত্যুষ্ণং পিবেজ্জলম্| তেনাধ্মানং তৃষা চ্ছর্দির্বিবন্ধশ্চৈব শাম্যতি||৭১|| ভেষজং দোষরুদ্ধং চেন্নোর্ধ্বং নাধঃ প্রবর্ততে| সোদ্গারং সাঙ্গশূলং চ স্বেদং তত্রাবচারযেত্||৭২||

যস্যেত্যাদাবানুলোমিকং বিরেচনমৌষধমূর্ধ্বং যাতি যস্য, তং পাযযেত্ ‘বিরেচনমৌষধম্’ ইতি শেষঃ| কবলৈঃ শুদ্ধমিতি কবলৈঃ শোধিতমুখকণ্ঠম্| তেনেতি উষ্ণজলেন পীতেন||৭০-৭২||

Adhikarana 32 (73) · Śloka 73

সুবিরিক্তে তু সোদ্গারমাশ্বেবৌষধমুল্লিখেত্| অতিপ্রবর্তনং জীর্ণে সুশীতৈঃ স্তম্ভযেদ্ভিষক্||৭৩||

অতিযোগশঙ্কাযাং কর্তব্যমাহ- সুবিরিক্তে ইত্যাদি| সুবিরিক্তে ইতি সম্যক্প্রমাণেন নির্হৃতে ইত্যর্থঃ| সোদ্গারমিতি উদ্গারেণ পচ্যমানাবস্থাঽভিহিতা | এতেন সম্যগ্বিরেচনে ভূতেঽপি যদৌষধং তিষ্ঠতি তত্তদ্দিনে এবোল্লিখেত্| তস্যাপ্যৌষধৈকদেশস্যাপচ্যমানতাযাং বিরেচনাতিযোগঃ স্যাদিতি দর্শযতি||৭৩||

Adhikarana 33 (74) · Śloka 74

কদাচিচ্ছ্লেষ্মণা রুদ্ধং তিষ্ঠত্যুরসি ভেষজম্| ক্ষীণে শ্লেষ্মণি সাযাহ্নে রাত্রৌ বা তত্প্রবর্ততে||৭৪||

কদাচিদিত্যাদিনা বিরেচনস্যাবিক্রমত্বে হেতুমাহ| অত্র কর্তব্যং যদ্যপি নোক্তং, তথাঽপি শ্লেষ্মণা নিরোধং ভেষজস্য গৌরবাদিভিরুপলভ্য রাত্রিপর্যন্তং ভেষজস্যাযোগপ্রবৃত্তিরুপেক্ষণীযেতি কর্তব্যমূহনীযম্| প্রবর্ততে ইতি দোষসহিতং ভেষজং প্রবর্ততে||৭৪||

Adhikarana 34 (75) · Śloka 75

রূক্ষানাহারযোর্জীর্ণে বিষ্টভ্যোর্ধ্বং গতেঽপি বা| বাযুনা ভেষজে ত্বন্যত্ সস্নেহলবণং পিবেত্||৭৫||

রূক্ষেত্যাদাবযোগাজ্জীর্ণে বিষ্টভ্য ঊর্ধ্বং গতে বা ভেষজে অন্যদ্বিরেচনং সস্নেহলবণং দাতব্যম্|৭৫||

Adhikarana 35 (76) · Śloka 76

তৃণ্মোহভ্রমমূর্চ্ছাযাঃ স্যুশ্চেজ্জীর্যতি ভেষজে| পিত্তঘ্নং স্বাদু শীতং চ ভেষজং তত্র শস্যতে||৭৬||

তৃণ্মোহেত্যাদিনা পিত্তাবৃতভেষজস্য লক্ষণং চিকিত্সিতং চাহ| স্যুর্জীর্যতীতি জীর্যতি ভেষজে তৃডাদযো ভবন্তীত্যর্থঃ||৭৬||

Adhikarana 36 (77) · Śloka 77

লালাহৃল্লাসবিষ্টম্ভলোমহর্ষাঃ কফাবৃতে| ভেষজং তত্র তীক্ষ্ণোষ্ণং কট্বাদি কফনুদ্ধিতম্||৭৭||

লালেত্যাদিনা কফাবৃতভেষজস্য লক্ষণং চিকিত্সিতং চাহ||৭৭||

Adhikarana 37 (78) · Śloka 78

সুস্নিগ্ধং ক্রূরকোষ্ঠং চ লঙ্ঘযেদবিরেচিতম্| তেনাস্য স্নেহজঃ শ্লেষ্মা সঙ্গশ্চৈবোপশাম্যতি||৭৮||

সুস্নিগ্ধমিত্যাদৌ অবিরেচিতমিতি ঈষদ্বিরেচিতম্| স্নেহজ ইতি স্নেহপ্রযোগজনিতঃ শ্লেষ্মা| সঙ্গঃ দোষসঙ্গঃ| তেন লঙ্ঘনেন দোষপাকাদেব প্রবলশ্লেষ্মোপশমো দোষসঙ্গোপশমশ্চ ক্রিযত ইত্যর্থঃ||৭৮||

Adhikarana 38 (79-80) · Śloka 80

রূক্ষ-বহ্বনিল-ক্রূরকোষ্ঠ-ব্যাযামশালিনাম্ | দীপ্তাগ্নীনাং চ ভৈষজ্যমবিরিচ্যৈব জীর্যতি||৭৯|| তেভ্যো বস্তিং পুরা দত্ত্বা পশ্চাদ্দদ্যাদ্বিরেচনম্| বস্তিপ্রবর্তিতং দোষং হরেচ্ছীঘ্রং বিরেচনম্||৮০||

রূক্ষাদীনাং বিরেচনপ্রযোগে ক্রমবিশেষং সোপপত্তিকমাহ- রূক্ষেত্যাদি| বস্তিং পুরা দত্ত্বেত্যত্র বস্তিশব্দেন স্নেহবস্তিমিচ্ছন্তি, নিরূহস্তু বাতকোপকতযা তথা নিরূহানন্তরং বিরেচনস্য নিষিদ্ধত্বাদিহ নেষ্যতে; উক্তং হি “নিরূহদানাত্ পবনাদ্ভযং স্যাত্” (সি.অ.১) ইতি, তথা “নরো বিরিক্তস্তু নিরূহদানং বিবর্জযেত্ সপ্তদিনান্যবশ্যম্| শুদ্ধো নিরূহেন বিরেচনং তু” (সি.অ.১) ইতি; কিন্তু বস্তিশব্দেন নিরূহঃ স্নেহবস্তিশ্চ গৃহ্যতে; নিরূহস্য যদ্বাতকর্তৃত্বমুক্তং তদেকস্যৈব স্নেহবস্তিরহিতস্যাভ্যাসাত্, উত্সর্গতস্তু বাতহন্তৃত্বং “বস্তির্বাতহরাণাং” (সূ.অ.২৫) ইত্যনেনৈবোক্তম্| নিরূহানন্তরং বিরেচননিষেধস্ত্বৌত্সর্গিকঃ, তেন বিশেষবিধিনা তস্যাপবাদো যুজ্যত এব; কিঞ্চ, ইহ বস্ত্যনন্তরং যদ্বিরেচনং বিধীযতে তচ্চ বস্তিদানাদূর্ধ্বং সপ্তাহানন্তরমেব ভবিষ্যতীতি ন কশ্চিদ্বিরোধঃ| প্রবর্তিতমিতি প্রবৃত্ত্যুন্মুখীকৃতম্||৭৯-৮০||

Adhikarana 39 (81-82) · Śloka 82

রূক্ষাশনাঃ কর্মনিত্যা যে নরা দীপ্তপাবকাঃ| তেষাং দোষাঃ ক্ষযং যান্তি কর্মবাতাতপাগ্নিভিঃ ||৮১|| বিরুদ্ধাধ্যশনাজীর্ণদোষানপি সহন্তি তে| স্নেহ্যাস্তে মারুতাদ্রক্ষ্যা নাব্যাধৌ তান্ বিশোধযেত্ ||৮২||

রূক্ষাশনা ইত্যাদিনা স্নেহ্যা অপি ন ব্যাধিব্যতিরেকেণ শোধনীযা ইত্যাহ| কর্মনিত্যা ইতি নিত্যং ব্যাযামাদিকর্মকরাঃ| বিরুদ্ধাধ্যশনাজীর্ণান্ দোষান্ সহন্তীতি বিরুদ্ধাশনাদযো দোষরূপা ন তেষাং বিকারং জনযন্তীত্যর্থঃ; বিরুদ্ধাধ্যশনাদযশ্চ দোষজনকতযা দোষশব্দেনোচ্যন্তে| নাব্যাধাবিতি অবিদ্যমানসংশোধনৈকসাধ্যে ব্যাধৌ ন তান্ বিশোধযেদিতি; অন্যত্রাপ্যুক্তোঽযমর্থঃ “অনীরিতানাং দোষাণামীরণং ন প্রশস্যতে| উপর্যুপরি সক্তানামশ্মনামিব তাডনম্ ” ইতি||৮১-৮২||

Adhikarana 40 (83-85) · Śloka 85

নাতিস্নিগ্ধশরীরায দদ্যাত্ স্নেহবিরেচনম্| স্নেহোত্ক্লিষ্টশরীরায রূক্ষং দদ্যাদ্বিরেচনম্||৮৩|| এবং জ্ঞাত্বা বিধিং ধীরো দেশকালপ্রমাণবিত্| বিরেচনং বিরেচ্যেভ্যঃ প্রযচ্ছন্নাপরাধ্যতি||৮৪|| বিভ্রংশো বিষবদ্যস্য সম্যগ্যোগো যথাঽমৃতম্| কালেষ্ববশ্যং পেযং চ তস্মাদ্যত্নাত্ প্রযোজযেত্||৮৫||

উক্তং বিধিমুপসংহরন্নাহ- এবং জ্ঞাত্বেত্যাদি| বিরেচ্যেভ্য ইতি বিরেচনার্হেভ্যঃ| বিভ্রংশ ইত্যাদৌ যস্যেতি সংশোধনস্য| ননু বিষতুল্যবিভ্রংশমেতচ্ছোধনং তত্কিমনেনাচরিতেনেত্যাহ- কালেষ্ববশ্যং পেযং চেতি; সংশোধনসাধ্যব্যাধাববশ্যং পেযম্| তেন, অবস্থাবিশেষেঽবশ্যকর্তব্যতযা ন শোধনং পরিহর্তুং পার্যত ইতি ভাবঃ||৮৩-৮৫||

Adhikarana 41 (86) · Śloka 86

দ্রব্যপ্রমাণং তু যদুক্তমস্মিন্মধ্যেষু তত্ কোষ্ঠবযোবলেষু| তন্মূলমালম্ব্য ভবেদ্বিকল্প্যং তেষাং বিকল্প্যোঽভ্যধিকোনভাবঃ||৮৬||

সম্প্রতি যদেতচ্ছোধনস্য ক্বচিত্ কর্ষাদিমানমুক্তং ন তত্ সর্বপুরুষবিষযং, কিন্তু মধ্যেষু কোষ্ঠবযোবলেষু তন্মানং জ্ঞেযমিতি দর্শযন্নাহ- দ্রব্যেত্যাদি| তন্মূলমালম্ব্যেতি উক্তপ্রমাণমনুক্তপ্রমাণানুমানবীজং কৃত্বা| বিকল্পার্থমাহ- তেষাং বিকল্প্যোঽভ্যধিকোনভাব ইতি; ভেষজপ্রমাণস্যাধিকভাব ঊনভাবশ্চ বিকল্প্য ইত্যর্থঃ||৮৬||

Adhikarana 42 (87-97) · Śloka 98

ষড্ ধ্বংশ্যস্তু মরীচিঃ স্যাত্ ষণ্মরীচ্যস্তু সর্ষপঃ| অষ্টৌ তে সর্ষপা রক্তাস্তণ্ডুলশ্চাপি তদ্দ্বযম্||৮৭|| ধান্যমাষো ভবেদেকো ধান্যমাষদ্বযং যবঃ| অণ্ডিকা তে তু চত্বারস্তাশ্চতস্রস্তু মাষকঃ||৮৮|| হেমশ্চ ধান্যকশ্চোক্তো ভবেচ্ছাণস্তু তে ত্রযঃ| শাণৌ দ্বৌ দ্রঙ্ক্ষণং বিদ্যাত্ কোলং বদরমেব চ||৮৯|| বিদ্যাদ্দ্বৌ দ্রঙ্ক্ষণৌ কর্ষং সুবর্ণং চাক্ষমেব চ| বিডালপদকং চৈব পিচুং পাণিতলং তথা||৯০|| তিন্দুকং চ বিজানীযাত্ কবলগ্রহমেব চ| দ্বে সুবর্ণে পলার্ধং স্যাচ্ছুক্তিরষ্টমিকা তথা||৯১|| দ্বে পলার্ধে পলং মুষ্টিঃ প্রকুঞ্চোঽথ চতুর্থিকা| বিল্বং ষোডশিকা চাম্রং দ্বে পলে প্রসৃতং বিদুঃ||৯২|| অষ্টমানং তু বিজ্ঞেযং কুডবৌ দ্বৌ তু মানিকা| পলং চতুর্গুণং বিদ্যাদঞ্জলিং কুডবং তথা||৯৩|| চত্বারঃ কুডবাঃ প্রস্থশ্চতুঃপ্রস্থমথাঢকম্| পাত্রং তদেব বিজ্ঞেযং কংসঃ প্রস্থাষ্টকং তথা||৯৪|| কংসশ্চতুর্গুণো দ্রোণশ্চার্মণং নল্বণং চ তত্| স এব কলশঃ খ্যাতো ঘটমুন্মানমেব চ||৯৫|| দ্রোণস্তু দ্বিগুণঃ শূর্পো বিজ্ঞেযঃ কুম্ভ এব চ| গোণীং শূর্পদ্বযং বিদ্যাত্ খারীং ভারং তথৈব চ||৯৬|| দ্বাত্রিংশতং বিজানীযাদ্বাহং শূর্পাণি বুদ্ধিমান্| তুলাং শতপলং বিদ্যাত্ পরিমাণবিশারদঃ||৯৭|| শুষ্কদ্রব্যেষ্বিদং মানমেবমাদি প্রকীর্তিতম্|৯৮|

প্রমাণোপোদ্ঘাতাত্ সর্বশাস্ত্রব্যবহ্রিযমাণং প্রমাণং নিরূপযন্নাহ- ষড্ ধ্বংশ্য ইত্যাদি| ধ্বংশীং ত্রসরেণুকং বদন্তি; অন্যে তু ধ্বংশীং ধূলিমাহুঃ| অষ্টৌ তে সর্ষপা রক্তাস্তণ্ডুলা ইত্যত্র রক্তা ইতি সর্ষপাণাং বিশেষণম্| তদ্দ্বযং ধান্যমাষ ইতি তণ্ডুলদ্বযং ধান্যমাষো ভবেত্| তে তু চত্বার ইতি যবচত্বারঃ; অন্যে তু মাষাশ্চত্বারঃ অণ্ডিকা ইতি বদন্তি| ত্রযো মাষকাঃ শাণঃ| অত্র মানে অষ্টচত্বারিংশন্মাষকমানং পলং ভবতি, তদেব দশরক্তিমানেন চতুঃষষ্টিমাষকপলেন তুল্যং ভবতি, যতশ্চতুর্বিংশতিধান্যমাষৈর্দশরক্তিকাস্তুল্যা ভবন্তি; ততশ্চ দশরক্তিমানাশ্চতুঃষষ্টিমাষকাশ্চতুর্বিংশতিধান্যমাষৈর্গুণিতাঃ ষট্ত্রিংশদধিকপঞ্চদশশতধান্যমাষা এব ভবন্তি; তেন দশরক্তিকচতুঃষষ্টিধান্যমাষপলমানেন সহ দ্বাত্রিংশদ্ধান্যমাষপ্রমাণাষ্টচত্বারিংশন্মাষকৃতপলমানস্য তুল্যতা| সুশ্রুতেঽপি “তত্র দ্বাদশ ধান্যমাষাঃ স্বর্ণমাষকঃ, তে চ চতুঃষষ্টিঃ পলম্” (সু. চি. অ. ৩১) ইতি ব্যবস্থাপিতম্| তেন চতুঃষষ্টিমাষকা দ্বাদশধান্যমাষৈর্গুণিতাঃ সন্তোঽষ্টষষ্ট্যধিকসপ্তশতধান্যমাষা ভবন্তি; এবং দৃঢবলোক্তমানাদর্ধেন সুশ্রুতপলাদিমানং ভবতি; এবং সুশ্রুতেঽপি পঞ্চরক্তিকমাষো ভবতি| দৃঢবলমানং মাগধং, সুশ্রুতমানং কালিঙ্গমিতি ব্রুবতে| জতূকর্ণে তু ষড্গুঞ্জকো মাষক উক্তঃ||৮৭-৯৭||-

Adhikarana 43 (98-99) · Śloka 99

দ্বিগুণং তদ্দ্রবেষ্বিষ্টং তথা সদ্যোদ্ধৃতেষু চ||৯৮|| যদ্ধি মানং তুলা প্রোক্তা পলং বা তত্ প্রযোজযেত্| অনুক্তে পরিমাণে তু তুল্যং মানং প্রকীর্তিতম্||৯৯||

দ্বিগুণং তদ্দ্রবেষ্বিষ্টমিত্যাদি| অত্র যদ্যপি সামান্যেনৈব দ্রবস্য দ্বৈগুণ্যমুক্তং, তথাঽপি তন্ত্রান্তরদর্শনাত্ কুডবাদাবেব দ্রবস্য দ্বৈগুণ্যম্| উক্তং হি “রক্তিকাদিষু মানেষু যাবন্ন কুডবো ভবেত্| শুষ্কে দ্রবার্দ্রযোশ্চৈব তুল্যং মানং প্রকীর্তিতম্” ইতি| জতূকর্ণেঽপ্যুক্তং “দ্বিগুণাঃ কুডবাদযো দ্রবাণাম্” ইতি| ইহাপি সুনিষণ্ণকচাঙ্গেরীঘৃতে “ত্রিংশত্পলানি প্রস্থোঽত্র বিজ্ঞেযো দ্বিপলাধিকঃ” (চি.অ.১৪) ইতি বচনেন দ্রবদ্বৈগুণ্যং পারিভাষিকপ্রস্থে দ্রঢযতাঽঽচার্যেণ রক্তিকাদৌ দ্বৈগুণ্যপরিভাষাব্যভিচারঃ সূচ্যত ইত্যুপপাদিতমেব প্রাক্| আর্দ্রদ্বৈগুণ্যং চ তস্যৈব ভবতি যস্য দ্রব্যস্য শুষ্কস্য চার্দ্রস্য চোপযোগঃ সম্ভবতি, যচ্চ নিত্যমার্দ্রমেবোপযুজ্যতে ন তত্র দ্বৈগুণ্যম্| উক্তং হ্যন্যত্র- “বাসাকুটজকূষ্মাণ্ডশতপত্রীসহামৃতাঃ| প্রসারণ্যশ্বগন্ধা চ শতপুষ্পাসহাচরাঃ|| নিত্যমার্দ্রাঃ প্রযোক্তব্যা ন তেষাং দ্বিগুণং ভবেত্” ইতি| অন্যেষাং চ দ্বৈগুণ্যং কৃত্বা মানস্য বারদ্বযগ্রহণং কর্তব্যমিত্যর্থঃ||৯৮-৯৯||

Adhikarana 44 (100) · Śloka 100

দ্রবকার্যেঽপি চানুক্তে সর্বত্র সলিলং স্মৃতম্| যতশ্চ পাদনির্দেশশ্চতুর্ভাগস্ততশ্চ সঃ||১০০||

পরিভাষান্তরমাহ- দ্রবকার্যেঽপীত্যাদি| স্নেহাদিসাধনে দ্রবসম্পাদ্যে যত্র দ্রবং নোক্তং তত্র সলিলং দেযমিত্যর্থঃ| যতশ্চ পাদনির্দেশশ্চতুর্ভাগস্ততশ্চ স ইতি অস্যার্থো লোকত এব সিদ্ধঃ, তথাঽপি স্পষ্টার্থং পুনরভিধীযতে||১০০||

Adhikarana 45 (101) · Śloka 101

জলস্নেহৌষধানাং তু প্রমাণং যত্র নেরিতম্ | তত্র স্যাদৌষধাত্ স্নেহঃ স্নেহাত্তোযং চতুর্গুণম্||১০১||

জলস্নেহৌষধানামিত্যাদৌ ঔষধাত্ স্নেহশ্চতুর্গুণ ইতি কল্কাত্ স্নেহশ্চতুর্গুণঃ| স্নেহাত্তোযং চতুর্গুণমিতি তোযশব্দস্য দ্রবোপলক্ষণত্বাদ্দ্রবং চতুর্গুণমিত্যর্থঃ| যত্র তু বিশিষ্টং মানং জলাদীনামুক্তং তত্র তথৈব কর্তব্যং, “নির্দিষ্টে তত্তদেব তু” (সু.চি.অ.৩১) ইতিবচনাত্||১০১||

Adhikarana 46 (102-103) · Śloka 103

স্নেহপাকস্ত্রিধা জ্ঞেযো মৃদুর্মধ্যঃ খরস্তথা| তুল্যে কল্কেন নির্যাসে ভেষজানাং মৃদুঃ স্মৃতঃ||১০২|| সংযাব ইব নির্যাসে মধ্যো দর্বীং বিমুঞ্চতি| শীর্যমাণে তু নির্যাসে বর্তমানে খরস্তথা||১০৩||

স্নেহপাকত্রৈবিধ্যলক্ষণমাহ- স্নেহপাক ইত্যাদি| তুল্যে কল্কেন নির্যাস ইতি প্রথমপ্রক্ষিপ্তকল্কতুল্যতাং গতে পাকেন নির্যাসে সতি| সংযাব ইবেতি অত্র সংযাবশব্দেন সমঘৃতগুডগোধূমকণিকাকৃতপিণ্ড উচ্যতে| শীর্যমাণে ইত্যাদি খরপাকলক্ষণম্| শীর্যমাণে ইতি অবসীদতি| বর্তমানে অঙ্গুলিপীডনাদ্বর্তিতাং গচ্ছতি||১০২-১০৩||

Adhikarana 47 (104) · Śloka 104

খরোঽভ্যঙ্গে স্মৃতঃ পাকো, মৃদুর্নস্তঃক্রিযাসু চ| মধ্যপাকং তু পানার্থে বস্তৌ চ বিনিযোজযেত্||১০৪||

খরপাকাদিবিষযমাহ- খর ইত্যাদি||১০৪||

Adhikarana 48 (105) · Śloka 105

মানং চ দ্বিবিধং প্রাহুঃ কালিঙ্গং মাগধং তথা| কালিঙ্গান্মাগধং শ্রেষ্ঠমেবং মানবিদো বিদুঃ||১০৫||

কালিঙ্গমিত্যাদিকং শ্লোকং কেচিত্ পঠন্তি, তং চানার্ষং বদন্তি||১০৫||

Adhikarana 49 (106-107) · Śloka 107

তত্র শ্লোকৌ- কল্পার্থঃ শোধনং সঞ্জ্ঞা পৃথগ্ঘেতুঃ প্রবর্তনে| দেশাদীনাং ফলাদীনাং গুণা যোগশতানি ষট্||১০৬|| বিকল্পহেতুর্নামানি তীক্ষ্ণমধ্যাল্পলক্ষণম্| বিধিশ্চাবস্থিকো মানং স্নেহপাকশ্চ দর্শিতঃ||১০৭||

কল্পার্থ ইত্যাদিঃ স্থানার্থসঙ্গ্রহঃ| কল্পার্থঃ “কল্পার্থং ভেদার্থং” (ক.অ.১) ইত্যাদিনোক্তঃ| শোধনসঞ্জ্ঞা- “উভযং বা শরীরমলবিরেচনাত্” (ক.অ.১) ইত্যাদিনোক্তা| পৃথগ্ঘেতুঃ প্রবর্তনে ইতি “তত্রোষ্ণতীক্ষ্ণবিকাশী” (ক.অ.১) ইত্যাদিনোক্তঃ| দেশাদীনাং গুণাঃ “তত্র দেশস্তু” (ক.অ.১) ইত্যাদিনোক্তাঃ| ফলাদীনাং গুণাঃ মদনফলাদিকল্প এবোক্তাঃ| যোগশতানি ষডিতি “ত্রিশতং পঞ্চপঞ্চাশত্” ইত্যাদিনোক্তম্| বিকল্পহেতুঃ “উপভোগসুখার্থং” (ক.অ.১) ইত্যাদিনা প্রথমাধ্যাযে প্রোক্তঃ| নামানি মদনফলাদীনামেব, তানি চ প্রত্যধ্যাযমুক্তানি| তীক্ষ্ণমধ্যাল্পলক্ষণমিতি “সুখং ক্ষিপ্রং মহাবেগং” (ক.অ.১২) ইত্যাদিনোক্তম্| বিধিশ্চাবস্থিকঃ “দেযং হ্যনির্গতে পূর্বং” (ক.অ.১২) ইত্যাদিনোক্তঃ| শেষং সুগমম্||১০৬-১০৭||

Adhikarana puShpikA · Śloka 12

ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে কল্পস্থানে দন্তীদ্রবন্তীকল্পো নাম দ্বাদশোঽধ্যাযঃ||১২|| ইতি চরকসংহিতাযাং সপ্তমং কল্পস্থানং সম্পূর্ণম্|

ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযাং কল্পস্থানে দন্তীদ্রবন্তীকল্পো নাম দ্বাদশোঽধ্যাযঃ||১২||