3. ikṣvākukalpaḥ

Adhikarana 1 (1-2) · Śloka 3

অথাত ইক্ষ্বাকুকল্পং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২|| সিদ্ধং বক্ষ্যাম্যথেক্ষ্বাকুকল্পং যেষাং প্রশস্যতে|৩|

উক্তাধ্যাযসম্বন্ধাদিক্ষ্বাকুকল্পোঽভিধীযতে| যেষাং প্রশস্যতে ইক্ষ্বাকুকল্পস্তান্ বক্ষ্যামীতি যোজ্যম্||১-২||-

Adhikarana 2 (3) · Śloka 4

লম্বাঽথ কটুকালাবূস্তুম্বী পিণ্ডফলা তথা||৩|| ইক্ষ্বাকুঃ ফলিনী চৈব প্রোচ্যতে তস্য কল্পনা|৪|

লম্বেত্যাদি পর্যাযকথনম্||৩||-

Adhikarana 3 (4) · Śloka 5

কাসশ্বাসবিষচ্ছর্দিজ্বরার্তে কফকর্ষিতে||৪|| প্রতাম্যতি নরে চৈব বমনার্থং তদিষ্যতে|৫|

তদিষ্যতে ইতি ইক্ষ্বাকুকল্পনমিষ্যতে||৪||-

Adhikarana 4 (5-10) · Śloka 11

অপুষ্পস্য প্রবালানাং মুষ্টিং প্রাদেশসম্মিতম্||৫|| ক্ষীরপ্রস্থে শৃতং দদ্যাত্ পিত্তোদ্রিক্তে কফজ্বরে| পুষ্পাদিষু চ চত্বারঃ ক্ষীরে জীমূতকে যথা||৬|| যোগা হরিতপাণ্ডূনাং সুরামণ্ডেন পঞ্চমঃ| ফলস্বরসভাগং চ ত্রিগুণক্ষীরসাধিতম্||৭|| উরঃস্থিতে কফে দদ্যাত্ স্বরভেদে চ পীনসে| জীর্ণে মধ্যোদ্ধৃতে ক্ষীরং প্রক্ষিপেত্তদ্যদা দধি||৮|| জাতং স্যাত্ সকফে কাসে শ্বাসে বম্যাং চ তত্ পিবেত্| অজাক্ষীরেণ বীজানি ভাবযেত্ পাযযেত্ চ||৯|| বিষগুল্মোদরগ্রন্থিগণ্ডেষু শ্লীপদেষু চ| মস্তুনা বা ফলান্মধ্যং পাণ্ডুকুষ্ঠবিষার্দিতঃ||১০|| তেন তক্রং বিপক্বং বা সক্ষৌদ্রলবণং পিবেত্|১১|

অপুষ্পস্যেত্যাদিনা একঃ ক্ষীরযোগঃ| অপুষ্পস্যেতি অনুত্পন্নপুষ্পস্য| মুষ্টিং প্রাদেশসম্মিতমিতি প্রদেশিন্যা মূলপর্যন্তকৃতমুষ্টিপরিমাণম্; এবং চ নাত্র মুষ্টিশব্দঃ পলবচনঃ| ক্ষীরপ্রস্থে শৃতমিতি বচনাত্ ক্ষীরপ্রস্থে যথোক্তমানমিক্ষ্বাকুমাবাপ্য চতুর্গুণং পানীযং দত্ত্বা ক্ষীরং সাধনীযম্| পুষ্পাদিষ্বিত্যাদিনা চতুরঃ ক্ষীরযোগানাহ| জীমূতকে যথা “পযঃ পুষ্পেঽস্য নির্বৃত্তে ফলে পেযা পযস্কৃতা| রোমশে ক্ষীরসন্তানং দধ্যুত্তরমরোমশে” (ক.অ.২) ইত্যনেনোক্তং, তথেহাপি যোগচতুষ্টযং করণীযম্| হরিতেত্যাদিনা সুরাযোগমাহ| হরিতপাণ্ডূনামিক্ষ্বাকুফলানাং সুরামণ্ডে জীমূতকবদ্যোগঃ কর্তব্যঃ; জীমূতকবিধানাতিদেশেন “আসুত্য চ সুরামণ্ডে মুদিত্বা প্রস্রুতং পিবেত্” (ক.অ.২) ইতি গ্রন্থোক্তবিধানমিহাপি ভবতি| ফলস্বরসেত্যাদিনা ষষ্ঠঃ ক্ষীরযোগোঽভিধীযতে| ত্রিগুণক্ষীরসাধিতমিতি ত্রিগুণেন ক্ষীরেণ সাধিতং; তচ্চ চতুর্গুণেন তোযেন সাধনীযম্| ফলশব্দেনাত্রেক্ষ্বাকুফলমুচ্যতে| জীর্ণে ইত্যাদিনা সপ্তমঃ ক্ষীরযোগঃ| মধ্যোদ্ধৃতে ইতি উদ্ধৃতমধ্যে| অজাক্ষীরেণেত্যাদিনাঽষ্টমঃ ক্ষীরযোগঃ| তেন তক্রমিত্যাদিনা তক্রযোগঃ| তেনেতি তুম্বীফলমধ্যেন||৫-১০||-

Adhikarana 5 (11) · Śloka 12

তুম্ব্যা ফলরসৈঃ শুষ্কৈঃ সপুষ্পৈরবচূর্ণিতম্||১১|| ছর্দযেন্মাল্যমাঘ্রায গন্ধসম্পত্সুখোচিতঃ|১২|

তুম্ব্যা ইত্যাদিনা ঘ্রেযযোগমাহ| গন্ধসম্পত্সুখোচিত ইতি গন্ধসম্পত্ সুগন্ধবত্ত্বং, তযা গন্ধসম্পদা সুখমুচিতমভ্যস্তং যেন সঃ; অবচূর্ণিতেক্ষ্বাকুফলরসপুষ্পং মাল্যমাঘ্রাযৈব বমত্যনভ্যস্তদুর্গন্ধ ইতি ভাবঃ||১১||-

Adhikarana 6 (12) · Śloka 13

ভক্ষযেত্ ফলমধ্যং বা গুডেন পললেন চ||১২|| ইক্ষ্বাকুফলতৈলং বা সিদ্ধং বা পূর্ববদ্ঘৃতম্|১৩|

ভক্ষযেদিত্যাদিনা বমনযোগমেকমাহ| ফলমধ্যম্ ইক্ষ্বাকুফলমধ্যম্| ইক্ষ্বাকুফলকল্কসাধিতং তৈলমিক্ষ্বাকুফলতৈলম্; অযমেক এব তৈলযোগঃ| পূর্ববদিতি জীমূতকবত্, তেন “তথা জীমূতকক্ষীরাত্” (ক.অ.২) ইত্যাদিনোক্তবিধানেন জীমূতকস্থানে ইক্ষ্বাকুফলং দত্ত্বেহ ঘৃতং সাধনীযম্||১২||-

Adhikarana 7 (13) · Śloka 14

পঞ্চাশদ্দশবৃদ্ধানি ফলাদীনাং যথোত্তরম্||১৩|| পিবেদ্বিমৃদ্য বীজানি কষাযেষ্বাশতং পৃথক্|১৪|

পঞ্চাশদিত্যাদিনা ষড্ বর্ধমানকযোগানাহ| পঞ্চাশদারভ্য দশকেন বৃদ্ধৈরিক্ষ্বাকুবীজৈঃ শতং পূরণীযম্| তেন ষড্যোগা ভবন্তি| তানি চ যথাসঙ্খ্যং মদনফলাদীনাং ষণ্ণামন্যতমকষাযেষ্বাসুত্য বিমৃদিতানি পাতব্যানি | অন্যে তু দশবীজাদারভ্য পঞ্চাশদ্বীজপর্যন্তং দোষাদ্যপেক্ষযা পাতব্যং; তত্র মদনাদিকষাযভেদাদেব যোগভেদ ইত্যাহুঃ||১৩||-

Adhikarana 8 (14) · Śloka 14

যষ্ট্যাহ্বকোবিদারাদ্যৈর্মুষ্টিমন্তর্নখং পিবেত্||১৪||

যষ্ট্যাহ্বেত্যাদিনা নবকষাযযোগানাহ| তত্র যষ্ট্যাহ্বমেকং, কোবিদারাদযো মদনকল্পোক্তা অষ্টৌ||১৪||

Adhikarana 9 (15) · Śloka 15

কষাযৈঃ কোবিদারাদ্যৈর্মাত্রাশ্চ ফলবত্ স্মৃতাঃ|১৫|

কষাযৈরিত্যাদিনা মদনফলসদৃশবিধা অষ্টৌ মাত্রালক্ষিতাঃ প্রযোগা উচ্যন্তে|১৫|-

Adhikarana 10 (15-18) · Śloka 19

বিল্বমূলকষাযেণ তুম্বীবীজাঞ্জলিং পচেত্||১৫|| পূতস্যাস্য ত্রযো ভাগাশ্চতুর্থঃ ফাণিতস্য তু| সঘৃতো বীজভাগশ্চ পিষ্টানর্ধাংশিকাংস্তথা ||১৬|| মহাজালিনিজীমূতকৃতবেধনবত্সকান্| তং লেহং সাধযেদ্দর্ব্যা ঘট্টযন্মৃদুনাঽগ্নিনা||১৭|| যাবত্ স্যাত্তন্তুমত্তোযে পতিতং তু ন শীর্যতে| তং লিহন্মাত্রযা লেহং প্রমথ্যাং চ পিবেদনু||১৮|| কল্প এষোঽগ্নিমন্থাদৌ চতুষ্কে পৃথগুচ্যতে|১৯|

বিল্বেত্যাদিনা একো লেহঃ, তথা ‘কল্প’ ইত্যাদিনা চত্বারো লেহা অন্তে দ্রষ্টব্যাঃ, এবং পঞ্চ লেহাঃ| অঞ্জলিঃ পলচতুষ্টযম্| অত্র চ “ততশ্চ কুডবং যাবত্তোযমষ্টগুণং ভবেত্” ইতি বচনাদ্বিল্বমূলকষাযস্যাষ্টাবঞ্জলযো দেযাঃ, ততশ্চতুর্ভাগাবশেষেণ কুডবদ্বযম্| ফাণিতম্ অর্ধশৃত ইক্ষুরসঃ| ‘চতুর্থঃ ফাণিতস্য চ’ ইত্যস্য স্থানে ‘ত্রযস্ত্রিকটুকস্য চ’ ইতি কেচিত্ পঠন্তি| সঘৃত ইতি ঘৃতস্যৈকো ভাগঃ| অর্ধাংশিকানিতি একভাগার্ধমানান্ প্রত্যেকং মহাজালিন্যাদীন্| মহাজালিনী পীতকোষাতকী, কৃতবেধনঃ ঘোষকভেদঃ ‘জ্যোত্স্নিকা” ইতি খ্যাতঃ| যাবত্ স্যাত্তন্তুমদিত্যাদিনা লেহপাকলক্ষণমাহ; এতচ্চ লক্ষণং লেহান্তরেষ্বপি পাচনীযেষু জ্ঞেযম্| ন শীর্যতে ন বিস্তীর্যতে| প্রমথ্যাং চ পিবেদন্বিতি অতীসারচিকিত্সিতে “পিপ্পলী নাগরং ধান্যং” (চি.অ.১৯) ইত্যাদিনোক্তপ্রমথ্যানাং মধ্যেঽন্যতমপ্রমথ্যাকৃতং কষাযং পিবেদিত্যর্থঃ| ‘প্রমথ্যাং চ’ ইত্যস্য স্থানে কেচিত্ ‘মন্থং চাপি’ ইতি পঠন্তি| অগ্নিমন্থাদাবিতি প্রত্যেকমগ্নিমন্থ-স্যোনাক-পাটলা-গম্ভারীমূলচতুষ্কং পঞ্চমূলকথনপ্রস্তাবে রসাযনে কথিতম্||১৫-১৮||-

Adhikarana 11 (19) · Śloka 20

শক্তুভির্বা পিবেন্মন্থং তুম্বীস্বরসভাবিতৈঃ||১৯|| কফজেঽথ জ্বরে কাসে কণ্ঠরোগেষ্বরোচকে|২০|

শক্তুভিরিত্যাদিনৈকো মন্থযোগঃ||১৯||-

Adhikarana 12 (20) · Śloka 20

গুল্মে মেহে প্রসেকে চ কল্কং মাংসরসৈঃ পিবেত্| নরঃ সাধু বমত্যেবং ন চ দৌর্বল্যমশ্নুতে||২০||

গুল্মে জ্বর ইত্যাদিনা রসৈকযোগমাহ| কল্কম্ ইক্ষ্বাকুবীজকল্কম্||২০||

Adhikarana 13 (21-23) · Śloka 23

তত্র শ্লোকাঃ- পযস্যষ্টৌ সুরামণ্ড-মস্তু-তক্রেষু চ ত্রযঃ| ঘ্রেযং সপললং তৈলং বর্ধমানাঃ ফলেষু ষট্||২১|| ঘৃতমেকং কষাযেষু নবান্যে মধুকাদিষু| অষ্টৌ বর্তিক্রিযা লেহাঃ পঞ্চ মন্থো রসস্তথা||২২|| যোগা ইক্ষ্বাকুকল্পে তে চত্বারিংশচ্চ পঞ্চ চ| উক্তা মহর্ষিণা সম্যক্ প্রজানাং হিতকাম্যযা||২৩||

পযস্যষ্টাবিত্যাদিসঙ্গ্রহার্থো ব্যাকৃত এব| অত্র ফলেষ্বিতি মদনফলাদিষু| ঘৃতং যদ্যপি বর্ধমানপূর্বপঠিতং, তথাঽপি ছন্দোনুরোধাদিহ পশ্চাত্ পঠিতম্||২১-২৩||

Adhikarana puShpikA · Śloka 3

ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে কল্পস্থানে ইক্ষ্বাকুকল্পো নাম তৃতীযোঽধ্যাযঃ||৩||

ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযাং কল্পস্থানে ইক্ষ্বাকুকল্পো নাম তৃতীযোঽধ্যাযঃ||৩||